Galatians
Galati1 Byu mae" lagyo: aya: qo" yang: mangad:- byu: yang san: to: qhug' yaug re: mangad:- Yesu Khristu we' yao: re shid: rumae" dam: daui: to" li" nhao: ra" Pho" Mao"So: yang lagyo: dayaug khyo" khyin: san: yu qhug' ra" lagyo: ngo Polu we'- 2 ngo we' daga" na ko" ra" mao:nhaung: alhab' wa- Galati mung" mae" Phung: jham re mugsug' tung" vhin: ke' ra". 3 Ngonhaung" Pho"- Mao"So we' Asang Yesu Khristu wa nhag' myan" ra" jeju we' ngaui pyo: yaug yo: ru naonhaung" re byid: vageshao: wo". 4 Ngonhaung" Pho" Mao"So: myid o ngaui: ru we' dakhyo:- mho dao: gyo: mung: Khristu wa naonhaung" re ana" ce: makhyang" ra" qae" mae" khyad' yu nae" qhid' mae" ngonhaung" nho: qobo: qhid' mae" yao: yao" gaung re byid' pye' ava". 5 Mao"So wa apyad ato mae phungbao qi" qhang: jo, vashao: wo"- Amen. 6 Khristu nho: nhag' myan" ra" jeju khyo" yang naonhaung" re khai: yu: ra" yaug re aiqhi" sho' phyad: ra" khyo" naonhaung" shapye' pye' to: co' mung: Ngaui Bau" Lau Dao: gatau dalam: re naonhaung" khae: yu ko" ruyang ngo wa- naonhaung" re mug' ra". 7 Gai gai: yao: ga" re Ngaui Bau" Lau Dao: wa gatau dalam: majo, lo:ngad: ra". Ngadqere: Khristu nho: Ngaui Bau" Lau Dao: re tha" pye' nae" seim" na mo, damyo" wa- naonhaung" myid re lhau: sad' byid' ra" byu na ko" ruyang ngo ceru: ta" ru ngad: ra". 8 Ngadqere: naonhaung" re ngonhaung" kho" kyo: byid' lo: ra" ai: Ngaui Bau" Lau Dao: we' shai" yang: gatau Ngaui Bau" Lau Dao: re kho" kyo" ngad: re wa- ngonhaung" ngad sho' ngadqere:- mug:gaung mae" mug: lagyo: ngad sho' ngadqere:- yao: wa- myiqid tham: khyo ye: nae" dao: phyid' ru qhug' vashao:- 9 Naonhaung" khae: yu vako" ra" ai: Ngaui Bau" Lau Dao: we' shai" ra" Ngaui Bau" Lau Dao: re kho" kyo" ra" yaug khag' ngadqere:- myiqid tham: khyo ye: nae" dao: phyid' ru qhug' vashao:- ein: ngonhaung" qhid' mae ta" va" ru we' dakhyo:- ngo ana" re: dam: ta" na:. 10 Ngo ceru: ta" ru wa- byu: yang ngore ngaui nae" rure qam: ke' na: ru ngad: ra" i? Airu: dajhid' re: mangad:- ngo o: ru wa Mao"So: yang ngore ngaui nae" ru ngad: ra". Ngo wa byu: qhid' kheim: mae myo, nho lu nae" qhid' mae" qam: ke' na: ra" i? Ngo wa byu: yang o nae" rure za: qam: ke' na: ru ngad: re wa- ngo wa Khristu nho: daui daui yaug maboe" ngad: ra". 11 Nga" mao:nhaung: qe we"- ngo kho" kyo" ra" Ngaui Bau" Lau Dao: wa- xao su byu: yang myid: thug' ke' ru mangad' rure ngo naonhaung" re ta" kyo: geli". 12 Ngo wa ai: Ngaui Bau" Lau Dao: re xao su byu khag' dayaug mae" re: mho" ru makham: yu- Aire khag' yang re: ngore mamho" byid: ngad: ra". Yesu Khristu yao: ai: Ngaui Bau" Lau Dao: re ngore qhu" byid: yang: qo" kham: yu: ru ngad: ra". 13 Ngo wa Yuda caung:pa" thung" re caung:pa" kao bau yaug ngad: ra" au:- ngo khoru: kao so' daui: lo: ra" khyo re naonhaung" the' gyo" ci gau ngad: ako". Ngo wa Mao"So: phung: re dajhid' re: nhag' makhyag' lo:- yhin" ru we' phung: re phyo' sin" pye' nae" qhid' mae" ngoyao: qam: bo: thao" mae" qam: ke' lo yaug ngad: ra". 14 Ngo wa Yuda caung:pa" thung" re phug' cao" rumae nga" qae: qam" Yuda mao:nhaung: qe myo: sho' mo, tho' mae je yang: qam: ke' phug' cao" lo mung:- ngonhaung" phug' pho" qenho: thung" li re gyai kao bau: ra" khyo" phug' cao" lo yaug ngad:. 15 Ngadqere: Mao"So yao" nhag' myan" ra" jeju khyo" yang ngo makhau: li" shimae" yao: re caung da"byid: nae" qhid' mae" ngore khai: yu: ra". 16 Taung bug byu qere yao: zo: khyo" Ngaui Bau" Lau Dao: re ngo qo" kho" kyo: byid: nae" qhid' mae" Mao"So wa yao: zo: re ngore qhu" byid: nae" myid: phyid' ra" au:- ngo wa khag' dayaug jhao" re: pha,jhi" maye mho' yu- 17 nga" qhid' re lagyo: boe" na ko" ra" mo, we' yeqhug' nae" qhid' mae" Yerusalem khyo re: ngo maye:- Airu: kad' nae" atha"- ngo wa dalhang: dae Arabia mung" khyo ye" lo" mung:- ai: thao re Damasku vogaung: khyo dam: tug' lo:. 18 Sam zin kyo thao re ngo wa Petru we' yejho" qhug' jhau nae" qhid' mae" Yerusalem khyo ye" lo" mung:- ai: mae yao: we' shid' laban yethang: na:. 19 Ngadqere: Asang: yao: nhaung: Yaku mae" je yang: lagyo: gatau khoyaug we' re:- mayejho" qhug'. 20 Ngo tung" ke' ra" khyo cegu: alhab' wa- jo: ru ngad mung:- ngo mamhug' rure Mao"So ba: ra". 21 Ai: thao re ngo wa Suri we' Kiliki mang: jham khaung: khyo ye" lo" va". 22 Ai: ayo, mae Yuda mung" mae" Phung: byu qe wa ngore myo, nho te' mamyao: qu" shiko" ngad: ra". 23 Yao: bam wa- qhid' phyao: ngonhaung" re yhin" lo: ra" yaug wa- ganhae" yao: phyo' pye' nae" qam: ke' lo: ra" ai: lam khug: ra" khyo re ana" wa- yao: kho" kyo" na: ra"- ga: su ta" na ko" rure za: ba: ako". 24 Airumung: yao: bam wa nga" mathao mae Mao"So: re jeju caung:khin" byid' ako". 1 Daxe: byid zin kyo thao re ngo wa Barnaba we' daga" Titu re jhui: mung: Yerusalem vogaung: khyo dam: do, lo" va". 2 Pe"mung:ga"re Mao"So wa ngore airu: ye" lo" nae" qhu" lho byid: yang: ngad: ra". Ngo wa au: jhaung qe we' gathaung: san zab phaung phaung mung: Taung bug byu qere ngo kho" kyo: byid: va" Ngaui Bau" Lau Dao: mungdao: re ta" sho' kyo: byid' va". Ngo airu: ta" sho' kyo: byid' ru wa- lai: lo" va" yo, mae we' ana" ceyo, mae ngo zaui" ra" mau"zo" re aje amyid maboe" nhao nug yang: ngad: ra". 3 Damyo" wa ngonhaung" byin cao: pho" Titu re au: qid lhai: khyo re kham: yu nhao nug: ako". Yao: wa Greeg byu dayaug ngad sho' ngadqere: au: qid lhai: khyo re maqad maqui" yao: re makham: yu nhao ngad: ako". 4 Khristu we' dadang: dalam: za: doe; ra" khyo" yang ngonhaung" qo" yu: ra" ai: loe; beim khyo re jo" qu" nae" qhid' mae" ai: byu qe wa jin" byu khyo" lam khug: ra" mao:nhaung: ngad geim kad' yang: ngonhaung" phung: khug khyo jhug' vao li" ako". Yao: bam wa ngonhaung" re jeim toe' pye' nug: ako". 5 Ngadqere: Ngaui Bau" Lau Dao" nho: dangman" ra" khyo re naonhaung" qhid' mae" zaui" zag: ci nae" qhid' mae" ngonhaung" wa yao: bam re dajhid' re: maqhui" byid:. 6 Au: jhaung mang vin mo, wa khoru" ra" mo, ngad geqere:- nga" qhid' mae" akhyag mangad: ngad: ra". Mao"So wa adao shad' myo, nho re qu" yang: dao: kho' yaug mangad: ngad: ra". Ai: au: jhaung qe wa ngore pha,jhi" asag' pe" daja: re: mabyid: ko" ngad: ra". 7 Yao: bam wa ngore pha,jhi" byid: nae" atha"- Mao"So wa Petru re Yuda byumyu" qere Ngaui Bau" Lau Dao: kho" kyo: byid: nae" mau" zo" byid' ru we' dakhyo:- ngo rere:- Taung bug byu qere Ngaui Bau" Lau Dao: kho"kyo: byid: nae" qhid' mae" mau" zo" byid' to" rure yao: bam ba: lo: ako". 8 Pe"mung:ga"re Petru wa Mao"So: qam: so' khyo" yang Yuda byu qe: qhid' mae" lagyo: khyo" san: to" ru we' dakhyo:- Mao"So wa ngo rere: Taung bug byu qe: qhid' mae" lagyo: dayaug khyo" san: to" ra". 9 Au: jhaung qe ngad ko" ra" Yaku- Petru we' Yohan bam wa- Mao"So: yang ngore ce: gakai: lai mung: ra" mau" byid: to" rure xam: so" yu: ako". Airumung: ngonhaung" alhab' wa- mau" zaui: cao: qe ngad: rure sagse: qhu" byid' ra" khyo"- yao: bam wa- Barnaba we' ngore lo, zaui: zaui" ako". Barnaba we' ngo wa Taung bug byu qe: phaung mae mau" zaui: mung:- yao: bam wa Yuda byu qe: phaung mae mau" zaui: nae" rure ngonhaung" myid jho" vang" bam va". 10 Yao: bam ngonhaung" re mho' ra" khyo dakhe' za: ngad: ra". Aiwa yao: bam mae myaung sho: mung: qo ca" ra" phung: byu qere bao" thaug' byid: nae" rure mato" myhid' nae" qhid' mae" za: ngad: ra". Ai: mau" wa ngo gyai kao bau: lo: ra" mau" yao: ngad: ra". 11 Ngadqere: Petru- Antioki vogaung: khyo joe" lo lao"- yao: shad' ru de: de: za: ngad mung:- mo, byu qe: qhid' kheim: mae yao: re ngo qobo ceim: yang: qeim: pye' va". 12 Yaku yang nhao: ke' ra" mo, aimae majoe" li" shire Petru wa- Taung bug byu mao:nhaung: phung: byu qe we' daga" zo: shaug' yang: na: ra". Ngadqere: ai bam joe" li" thao re wa- Taung bug byu qe we' daga" zo: shaug' na: rumae" re: thang: pye' ra". Pe"mung:ga"re yao: wa- Taung bug byu qere au: qid lhai: khyo kham: yu nhao nug ko" ra" ai: byu qere gyaug yang: ngad: ra". 13 Lam khug: ra" Yuda byu- phung: byu qe gaje qere:- Petru we' dakhyo: sang: po" ra" lo, mau" khyo re bocao" qhid: li" ako". Barnaba lhao" re:- yao: bam: sang: po" ra" lo, mau" khyo mae bocao" lo" na: ra". 14 Yao: bam wa Ngaui Bau" Lau Dao" nho: dangman" ru we' dau te' vang" vang" za: masu: ko" rure ngo myao lao"- ngo wa Petru re- yao: bam alhab' mo; qhid' kheim: mae- nao wa Yuda byu dayaug ngad: to: mung:- Yuda byu dayaug we' madau lo:- Taung bug byu dayaug we' dakhyo: na: lo: ra". Aire Taung bug byu qere Yuda byu qe we' dakhyo: kao so' daui nae" maqad maqui" nao khoru: qo" kad' nhao nae" i? ein: ngo ta" va". 15 Ngonhaung" wa khau: li" mae" Yuda byu agyang" ngad mung:- qobo qo" ra" Taung bug byu qe mangad:- ga: mhang" ru qhug' mo, ngad:. 16 Ngadqere:- byu wa kham" to" ra" Tarha" re phug' cao" ra" khyo" yang mangad:- Yesu Khristu re lam khug: ra" khyo" yang za: din:man" ra" ga:- Mao"So: yang sun" yu byid' ru qhug' rure ngonhaung" ba:. Ngonhaung" re: kham" to" ra" Tarha" re phug' cao" ra" khyo" yang mangad:- Khristu re lam khug: ru khyo" yang din:man" ra"- ga: Mao"So: yang sun" yu byid' ru qhug' nae" qhid' mae" Yesu Khristu re lam khug: bam va". Pe"mung:ga"re kham" to" ra" Tarha" re phug' cao" ra" khyo" yang byu wa khag' re: din:man" ra"- ga: Mao"So: yang sun" yu byid' rure maqhug' ngad: ra". 17 Airumung: ngonhaung" wa- Khristu we' dadang: dalam: za: doe; ra" khyo" yang din:man" ra" ga: Mao"So: yang sun" yu byid' ru qhug' nae" qhid' mae" ngonhaung" qam: ke' rumae- Taung bug byu qe we' dakhyo:- qobo shad' lhoe" ra" mo, ngad: rure myao: ngad: re- Khristu wa qobo shad' lhoe" rure qam: byid' ra"- ein: gai: ta" i? Khokhyo" re: magai: ta"- 18 ngoyao: phyo' pye' ra" tarha" khyo re ngo dam: zao: to' yang: ngad: re wa- ngo wa ngoyao" gaung re kham" to" ra" Tarha" re shad' lhoe" ra" yaug ngad: rure qhu" byid: ru ngad: ra". 19 Ngo wa Mao"So: qhid' mae" kao so' qo" daui nae" qhid' mae" ai: kham" to" ra" Tarha" yang se' pye' qhug' mung: kham" to" ra" Tarha" we' sin: yang: ngo wa byushid ngad: ra". Ngo wa Khristu we' daga" pyao: zang dao mae jin" se' pye' ru qhug' va". 20 Airumung: ngo wa- kao so' madaui lo:- Khristu wa nga" khug mae kao so' daui: na: ra". Ana" ngo kao so' daui: na: ru wa- ngore jhid'de; mung: nga" qhid' mae" yao" kao so' re byid' pye' ra" Mao"So: yao: zo: re lam khug: ra" khyo" yang ngo kao so' daui: na: ru ngad:. 21 Mao"So: nhag' myan" ra" jeju re ngo ha: pye' nae" mangad:. Ngadqere: byu wa kham" to" ra" Tarha" khyo" yang din:man" ra"- ga: Mao"So: yang sun" yu byid' ru qhug' ngad: re wa- Khristu shid kham: byid' ru wa aje amyid ngad: ra". 1 Galati phung: byu ago qe we"- naonhaung" re khag' nho: man: dan" yang maung: to" ra" i? Pyao: zang dao mae Yesu Khristu shid kham" ra" bao qab re de: de: za: myao: jo, nae" naonhaung" myo, khung: mae te' to: byid: va". 2 Mao"So: Byo re naonhaung" qo" khae: yu ko" ru wa- ai: kham" to" ra" Tarha" re phug' cao" ra" khyo" ngad ko" i? Mangad: lao"- Ngaui Bau" Lau Dao: re the' gyo" yu mung: aire lam" geyang: qo" khae: yu ko" ru ngad: i? Ce: dao: kheim: ngore ta" kyo" qu" gela,- 3 Naonhaung" aiqhi" sho' go ko" i? Naonhaung" wa Mao"So: Byo khyo" yang zaui" qhid mung:- ana" wa- naonhaung yao" qam: so' khyo" yang zaui" pin" nug ko" i? 4 Naonhaung" thaung" qhug' kham zo" lo: ra" khyo jham alhab' wa- akeim ngad va" i? Gai gai: yao: daja: ja: wa lajheim: thug' nae" za: ngad: ra". 5 Mao"So wa naonhaung" re Byo byid: mung:- mug' pho: ve, lho mau" zo" naonhaung" phaung mae zaui" qhu" ru wa- kham" to" ra" Tarha" re naonhaung" phug' cao" geyang: ngad: ra" i? Mangad: lao"- Ngaui Bau" Lau Dao: re naonhaung" the' gyo" yu mung: lam" geyang: ngad: ra" i? 6 Abraham thaung" qhug' kham zo" lo: ra" khyo re myid: qu" ge,- Jham: Mugsug' mae- Abraham wa Mao"So re lam khug: ra"- yao" lam khug: myid mathao mae Mao"So wa yao: re din:man" ra" yaug khyo" khae: yu: ra"- ga: ta" ra". 7 Airumung: lam khug: myid bo: ra" mo, wa- Abraham nho: myid:zo: gyang" qe ngad: rure naonhaung" ba beim: qo: ako". 8 Mao"So wa Taung bug byu qere lam khug: ru khyo" yang din:man" ra"- ga: sun" yu byid' li" nae" rure Jham: Mugsug' wa geim phan" phan" to" ava". Airumung: Jham: Mugsug' mae- Mao"So wa nao khyo" yang xao su byu alhab' mo, re shaman" byid' li" nae"- ga: Abraham re Lau Dao: Gai ta" hau: byid: ra". 9 Abraham wa Mao"So re lam khug mung: shaman" byid' ru qhug' ra". Amung: lam khug: ra"mo, alhab' wa- Abraham we' dakhyo: shaman" byid' ru qhug' ako"- ga: ta" to" ra". 10 Kham" to" ra" Tarha" phug' cao" rure lam yang: kao so' daui: ra" mo, wa- nhang: kheim: zao" na: ako". Pe"mung:ga"re Jham: Mugsug' mae- Kham" to" ra" Tarha" mugsug' mae tung" to" ra" Tarha" lam: khao: ngo" re maphug' cao" ra" yaug khag' ngadqere: Mao"So: nhang: kheim: zao" ra" yaug ngad: ra"- ga: ta" to" ra". 11 Jham: Mugsug' mae byu wa- lam khug: ru khyo" yang din:man" ra"- ga: Mao"So: yang sun" yu byid' ru qhug' ra" yaug za:- kao so' daui: na: li" nae"- ga: Jham: Mugsug' ta" to" ruyang- byu wa kham" to" ra" Tarha" re phug' cao" ra" khyo" yang din:man" ra"- ga: khag' dayaug rere: Mao"So: yang sun" yu byid' ru maqhug' ra" khyo wa de: de: za: ngad: ra". 12 Ngadqere: Jham: Mugsug' mae- kham" to" ra" Tarha" phug' cao" ra" yaug wa kao so' daui: na: li" nae"- ga: ta" to" ruyang kham" to" ra" Tarha wa ai: lam khug: ru we' pe" majho" sin: ngad: ra". 13 Sag' zang mae jin" se' lhao" to: qhug' ra" yaug wa- Mao"So: nhang: kheim: zao" ra" yaug ngad: ra"- ga: jham: Mugsug' mae tung" to" ru we' dakhyo:- Khristu wa ngonhaung" qhid' mae" nhang: kheim: zao" yaug boe" mung:- Kham" to" ra" Tarha" yang boe" nhao: ra" nhang: kheim: zao" nae" rumae" ngonhaung" re khyad' yu byid' ava". 14 Khristu ceru: kad' ru wa Taung bug byu qe wa- Yesu Khristu khyo" yang Abraham re Mao"So: dao:so: byid' to" ra" shaman" jeju re qo" kham: yu genae" qhid' mae" ngad: ra". Ailao"- ngonhaung" wa lam khug: ra" khyo" yang Mao"So: dao:so: byid' to" ra" Byo re qo" kham: yu nae" ngad: ra". 15 Nga" mao:nhaung: qe we"- xao su byu shad' khyo" ngo ta" nae"- byu shid' yaug wa khyo daja: ja: mae myid vang" mugsug' tung" to: lao" wa- khag' re: aire maqo" phyo' pye'. Mangad: lao" pe" re: magai: laung: ngad: ra". 16 Ana" Mao"So wa yao" dao:so: jham re Abraham we' yao" myid:zo: qhid' mae" byid' to" ra" Jham: dao: mae myo: sho' re ta" nug: ra khyo" myid:zo: qe- ga: mata" ngad: ra". Dayaug re za: ta" nug: ra" khyo" myid:zo:- ga: ta" ra". Ai: yaug wa Khristu ngad: ra". 17 Ngo ta" nug: ru wa- Mao"So wa Abraham we' dao: thang" to: mung:- ai: dao: thang" re phug' cao" nae" dao:so: byid' to" ra" zin na byid yo: sam xe zin kyo thao re qo" yu: ra" kham" to" ra" Tarha" wa dao: thang" re maqo" phyo' pye' ngad: ra". Mao"So: dao:so: rere: maqo" zai" phyo' pye' ngad: ra". 18 Pe"mung:ga"re Mao"So: jeju jhaung qhu" wa ai: kham" to" ra" Tarha" mae ngha yang: ngad: re wa- ai: jeju jhaung qhu" wa- yao" dao:so: mae ngha lo nae" mangad: ngad: ra". Ngadqere: Mao"So wa- yao" dao:so: mathao mae Abraham re ai: jeju jhaung qhu" byid' ra". 19 Aire- ai: kham" to" ra" Tarha" au: qang: ru wa pe" ngad: i? Ai: kham" to" ra" Tarha" wa- shad' lhoe" rure qhu" byid: nae" qhid' mae" byid' to" ru ngad: ra". Aimung:- Kham" to" ra" Tarha" wa- dao:so: re kham: yu: ra" yaug ngad: ra" Abraham nho: myid:zo: joe" li" ra" ayo, joe" sho' za: jo; jo; ra". Ai: kham" to" ra" Tarha" re mug: lagyo: qeyang agyo: mae ta" qham byid' ra" byu dayaug: lo, khyo" yang byid' to" ava". 20 Ngadqere: dayaug: yang dashad' mae za: zaui: so" ra" mau" mae ta" qham byid' ra" yaug maca" lo:ngad: ra"- Mao"So wa date: za: ngad: ra". 21 Airu: ngad lao"- kham" to" ra" Tarha" wa Mao"So: dao:so: jham we' tug' shai" ra" i? Dajhid' re: mangad:- pe"mung:ga"re xao su byu qe wa- kao so' byid' ra" kham" to" ra" Tarha" re qo" khae: yu ko" ngad: re wa- yaug khao: ngo" wa ai: kham" to" ra" Tarha" re phug' cao" ra" khyo" yang din:man" ra"- ga: Mao"So: yang sun" yu byid' rure qhug' genae" ngad: ra". 22 Ngadqere: Jham: Mugsug' mae- mug: myid geim" wa qobo: nho: qam: so' yang eib: ra" qao: mae ngad: jo; ra" ga:- ta" to" ra". Airumung: Yesu Khristu re lam khug: rumae apan aqao: to" ra" dao:so: jeju jhaung qhu" wa- lam khug: ra" mo, re byid' to" ra". 23 Ai: lam khug: ra" khyo mathug' li" shi" ra" qhid' re- ce: lam khug: ra" khyo joe" li" ra" ayo, joe" sho' kham" to" ra" Tarha" wa ngonhaung" alhab' mo, re kyam: byu qekhyo" taui" lhaung" to" ra". 24 Ngonhaung" wa lam khug: ru khyo" yang din:man" ra"- ga: Mao"So: yang sun" yu byid' ru qhug' nae" qhid' mae" kham" to" ra" Tarha" wa- Khristu joe" li" sho' ngonhaung" re mho" jhui" lo: ava". 25 Ana" wa- lam khug: ra" khyo joe" li" va" rumung:- Kham" to" ra" Tarha" wa ngonhaung" re mho" shid' mho" jhui: byid: maqo lo:ngad: ra". 26 Naonhaung" alhab' wa- lam khug: ru khyo" yang Yesu Khristu we' dadang: dalam: za: doe, mung:- Mao"So: yao: zo: qe doe; ako". 27 Naonhaung" wa Khristu we' dadang: dalam: za: doe, nae" qhid' mae" qid nyhab' re kham: yu vako" ruyang ana" naonhaung" wa- Khristu nho: kao so' daui khyo re bau: we' dakhyo: ve; ci: avako". 28 Airumung: Yuda byu qe we' Taung bug byu qe: agyo: mae re:- jeim qe we' jeim mangad: ra" mo; agyo: mae re:- yauggai we' myiqe: qe: agyo: mae re:- pe" jho" kho' ru majo, lo:ngad: ra". Naonhaung" alhab' mo; wa- Khristu khug mae yao: we' dadang: dalam: za: ngad: avako". 29 Naonhaung" wa Khristu yang sang: ra" mo, ngad ko" re wa- naonhaung" wa Abraham nho: myid:zo: qe ngad geyang:- Mao"So byid' to" ra" dao:so: re qo" khae: yu: ra" mo, ngad: ako". 1 Xo' yang: ta" gelang: ein: re- yao: pho" nho: jo,nho" ma re kham: yu nae" ra" yao: zo: wa- alhab' re gaigai: yao: sang: ra" yaug ngad sho' ngadqere:- yao: ngai shi" ra" au: re wa- jeim we' dakhyo: kad' rure qhug' myao: ra". 2 Yao: pho" yang dang: to" ra" ayo, joe" sho'- yao: ngai shi" ra" au: re yao: re gun caung jhui" ra" mo, we' yao" mau" zo" re zaui: pyo byid' ra" mo; qao: mae na: ra". 3 Ai we' dakhyo:- ngonhaung" re: Byo we' sin" ra" khyo mae zoqao" maboe" shi" au:- mug: kin geim" re eib: ra" byo jham: yang eib: ra" jeim qe doe; lo: ra". 4 Ngadqere: lo" thao" mae ayo, joe" lao"- Mao"So wa yao" yao: zo: re nhao: ke' byid' ra". Ai: yao: zo: wa- ngonhaung" re Mao"So yao: zo: qe boe" geshao:- kham" to" ra" Tarha" qao: 5 mae na: jo; ra" mo, re khyad' yu nae" qhid' mae" byu xao su myiqe: mae" khau: li" mung: Yuda kham" to" ra" Tarha" qao: mae kao so' daui: ra". 6 Naonhaung" wa yao" yao: zo: ngad: rure ceim" shid' nae" Mao"So wa- Pho" we"- nga" Pho" we"- ga: ta" ra" yao: zo" nho: Byo ngonhaung" aung khug nhag' lam: khug khyo nhao: ke' byid' ra". 7 Airumung: naonhaung" wa- jeim mangad: loko" ngad: ra". Yao: zo: ngad: avako"- naonhaung" wa yao: zo: qe ngad ko" ruyang Mao"So wa yao: zo: qe: qhid' mae" jaung: to" ra" ma alhab' naonhaung" re ab byid' li" nae". 8 Qhid' phyao:- naonhaung" wa- Mao"So re maba geyang: So mangad: ko" ra" mo; jeim doe; lo: ako". 9 Ngadqere: ana" naonhaung" wa- Mao"So re ba: avako". Je: yo" ra" khyo" ta" re- Mao"So wa naonhaung" re ba: ava"- Airumung:- naonhaung" wa qam: nang: yang:- ko, ko, nin" ra" yui jham eib: ra" khug khyo khoru: mung: naonhaung" dam: phaug' vao lo" nug ko" i? Pe"mung:yang: naonhaung" wa yao: bam: jeim dalhang dam: tug' boe" nug ko" i? 10 Naonhaung" wa ba na lho" khye'- ve, vo: we' zin na daqhae: gu: re gakai: lai khyo" akhyag to" ako". 11 Ngo wa naonhaung" khyo we' sin: yang: gaung yug myid: ci" byid' ra". Naonhaung" qhid' mae" ngo zaui: so" lo: ra" mau" zo" alhab' wa- akeim boe" pye' genae" laug i? 12 Nga" mao:nhaung: qe we"- naonhaung" wa ngo we' dakhyo: ngad genae" qhid' mae" ngo naonhaung" re mho' ra". Aitho' mago" ngo wa naonhaung" we' dakhyo: yao: ngad: ra". Naonhaung" ngore pe" mashad' ko" ngad: ra". 13 Sao qhid' lhang ngo naonhaung" re Ngaui Bau" Lau Dao: kho" kyo: byid' ra" khyo pe"mung: ngad: rure naonhaung" ba: ako". Ngo no phyo: qhug' yang: ngad: rure naonhaung" ba: ako". 14 Nga" gaung dau: maqao" zin" ruyang naonhaung" qhid' mae" gyai aqug: akhai: doe, sho' ngadqere: naonhaung" wa ngore maphug' makhyad' makad'- manug makhyad' re: makad' gengad: ra". Airu: kad' nae" atha"- naonhaung" wa ngore mug:gaung mae" mug: lagyo: re we' dakhyo:- Yesu Khristu re we' dakhyo: re:- lham: khae: yu: ako". 15 Naonhaung" gyai ngaui bau" avako". Ana" pe" boe" na ko" i? Naonhaung" wa gai: boe" ngad: re- naonhaung" yao" myo,jid' jham re lhao" kyaung" thad' yu mung: ngore byid: nug: ra" myid bo ko" rure: ngo yao: qo" ta" ra". 16 Ana" ngo dangman" ra" khyo naonhaung" re ta" kyo: byid: yang:- naonhaung" gyevo boe" byaug va" i? 17 Ai: su gaje qe wa naonhaung" dao mae gyai myid vao zo" rure qhu" byid' ako"- ngadqere: yao: bam: myid: qang: ru jham wa- agai mangad: ko" ngad: ra". Naonhaung" dao mae nhag' lam: gai ko" ru we' dakhyo:- yao: bam: dao mae re: naonhaung" nhag' lam: dam: tug' gai genae" qhid' mae" yao: bam wa naonhaung" re ngo we' xo' taui" rure phyid' pye' byid: nae" qhid' mae" za: ngad: ra". 18 Myid: qang: ru gai yang: ngad: re wa- airu: nhag' lam: gai: ru wa gai: ra". Ceru" ra" khyo wa naonhaung" we' daga" na: au: re za: mangad:- khonhae" re: dangman" jo, gai: ra". 19 Nga" jhid'de; ra" zo: dau qe we"- naonhaung" mae Khristu nho: ave, bo: li" sho'- zo:khau: ra" myiqe: we' dakhyo:- naonhaung" qhid' mae" zo:khau no no: ru dalhang dam: kham zo" na:. 20 Ngo naonhaung" we' daga" qo" na mung: naonhaung" re thoe gatau khyo" qo" jhau nae" ngo myid: na: lhe". Naonhaung" we' sin: yang: ngo wa phabau: phaxe' myid myaung" na:. 21 Kham" to" ra" Tarha" qao: mae na nug ko" ra" mo, naonhaung" re myid: geli". Ai: kham" to" ra" Tarha" mae pe" ta" rure naonhaung" mathe' gyo" qu" ko" i? 22 Ai: kham" to" ra" Tarha" mugsug' mae- Abraham wa yauggai zo: shid' yaug qo" ra". Dayaug wa jeim myhi" khyo" qo" ra" yaug ngad mung: gatau dayaug wa jeim myhi" mangad' ra" yaug khyo" qo" ra" yaug ngad: ra"- ga: ta" to" ra". 23 Jeim myhi" khyo" qo" ra" yao: zo: wa- gaung sho: khyo" cao" yang: khau: li" yaug ngad: ra". Ngadqere: jeim mangad' ra" yaug khyo" qo" ra" Abraham: yao: zo: wa- Mao"So: dao:so: we' dakhyo:- khau: li" yaug ngad: ra". 24 Ce:rure wa- dao: tau" khyo" qo" ba: gyo" ra". Ai: myiqe: shid' yaug wa- dao: thang" shid' lam: re ta" nug: ru ngad: ra". Myiqe: dayaug wa Hagara ngad mung:- yao" yang khau: ke' ra" zo: dau qe wa jeim boe" pye' ako". Yao: wa Sina bam mae to" ra" dao: thang" re alho vin: ra" yaug ngad: ra". 25 Hagara wa- Arabia mung" mae" Sina bam khyo" ngad: ra"- yao: wa yao" vobyu qe alhab' we' daga" jeim doe; na: ra" ana" jo; jo; ra" Yerusalem vogaung: we' dau: ra". 26 Ngadqere: mug: khaung: mung"dan: mae" Yerusalem vogaung: wa loe; beim: ra" vogaung: ngad mung:- yao: wa ngonhaung" yao: myhi" ngad: ra". 27 Pe"mung:ga"re Jham: Mugsug' mae- Zo: dau makhau: ra" bug daung: myhi" we"- Ngaui bau: wa,- Zo:khau no mano: qu" ra" myiqe: we"- Ngaui bau: ngaui yao thoe we' hug' wa,- yham sang pho" yang shapye' to: qhug' ra" myiqe: wa- yham sang pho" qo" ra" myiqe: myhi" tho' zo: dau je: qo" li" nae"- ga: ta" to" ra". 28 Nga" mao:nhaung: qe we"- naonhaung" wa Isag we' dakhyo:- Mao"So yao" dao:so: we' dakhyo: khau: li" ra" Mao"So: yao: zo: qe ngad: ako". 29 Ai: ayo, mae gaung sho: khyo" cao" yang:- khau: li" ra" yaug wa- Mao"So: Byo khyo" khau: li" ra" yaug re yhin" ra". Ana" re: ai we' dakhyo: za: ngad: ra". 30 Ngadqere: Jham: Mugsug' mae pe" ru: ta" ra" i? Ai: jeim myhi" we' yao: zo: re khe' ke' wa,- pe"mung:ga"re jeim myhi" yao: zo: wa jeim myhi" mangad' ra" yaug: yao: zo: we' daga" yao: pho" nho: jo,nho" ma re qo" kham: yu nae" mangad:- ga: ta" to" ra". 31 Airumung: nga" mao:nhaung: qe we"- ngonhaung" wa jeim myhi" yao: zo: qe mangad:- jeim myhi" mangad' ra" yaug: yao: zo: qe ngad: ako". 1 Khristu wa ngonhaung" re loe; beim nhao va" ruyang- ngonhaung" wa loe; beim khyo qo" bam va". Airumung: loe, beim: ra" byu qekhyo" ye; jo, mung:- naonhaung" yao" gaung re jeim dadam: boe" nhao ge,- 2 Tae" gyo: ge,- naonhaung" yao" gaung mae au: qid lhai: khyo dam: kham: yu: ngad: re wa- Khristu wa naonhaung" qhid' mae" dajhid' re: pe" akyu" mabo ga" ra" khyo" ngad: ra"- ein: ngo Polu naonhaung" re ta" va". 3 Yao: yao" gaung mae au: qid lhai: khyo re kham: yu: ra" yaug wa- kham" to" ra" Tarha" alhab' re phug' cao" nae" qo bo: ra" yaug ngad: rure ngo dalhang dam: paug' yang: ta" peim: byid' ra". 4 Kham" to" ra" Tarha" re phug' cao" ra" khyo" yang din:man" ra"- ga: Mao"So: yang sun" yu byid' rure qhug' nug: ra" mo, naonhaung" wa- Khristu we' gao" byaug: avako". Naonhaung" wa Mao"So: nhag' myan" ra" jeju taung gaung shad' khyo na: ra" mo, ngad: ako". 5 Ngonhaung" kam" wa- ngonhaung" Mao"So: Byo: nho: lam khug: rumae mau" zaui" na: ra" qam: so' khyo" yang din:man" ra"- ga: Mao"So: yang sun" yu byid' ru qhug' li" nae" rure ngonhaung" myid: lao" ru ngad: ra". 6 Pe"mung:ga"re ngonhaung" wa Khristu we' dadang: dalam: za: doe, lao" wa- au: qid lhai: khyo kham: yu: ru- makham: yu: ru wa- pe" akhyag mangad: ngad: ra"- Akhyag wa- jhid'de; myid khyo" lo, mau" zaui" qhu" ra" lam khug: myid ngad: ra". 7 Naonhaung" wa gyai aung doe; ra" khyo" kao so' daui: lo: avako". Ai: dangman" ra" khyo re phug' cao" rumae" naonhaung" re khag' yang tam" pye' ra" i? Yao: wa naonhaung" re khoru: ju" phyo' ngaug: yu: ra" i? 8 Ai: ju" phyo' ru wa naonhaung" re khai: yu: ra" Mao"So khyo" yang boe" nhao: ru mangad: ngad: ra". 9 Cin man" dabam geim" re bai" li" nhao nae" qhid' mae" man" dajhid' za: aqo: ra"- ga: ta" ko" ra" dao: khyo: we' dakhyo: ngad: ra". 10 Ngadqere: ngo wa ana" ba joe" sho' naonhaung" re myid: lam: na shi". Ngonhaung" wa Asang we' dadang: dalam: za: doe; na: ruyang naonhaung" wa shai" ra" khyo gatau re khae: yu genae" mangad:- ein: ngo myid: lam: ra". Ngadqere: naonhaung" re khin jang kad' ra" yaug khag' ngadqere: yao: wa Mao"So: yang byid' ra" qobo dae re qhug' kham zo" li" nae". 11 Ngadqere: nga" mao:nhaung: qe we"- ngo wa au: qid lhai: khyo re kham: yu qo: ra"- ein: xo' yang: kho" kyo" na: ngad: re wa- pe"mung: ngo yhin" ru qhug' na shi" ra" i? Airu: kho" kyo" ru dang: ngad: re wa- Khristu nho: pyao: zang khyo re ngo kho" kyo" ru wa- qug: khai: pe" boe" nhao nae" mangad:- 12 Naonhaung" re khin jang kad' ra" mo, wa- au: qid lhai: khyo re za: makham: yu lo:- yao: bam yao" gaung re zhe' pye' ko" re wa khoqhi" je: gai genae" i? 13 Nga" mao:nhaung: qe we"- naonhaung" loe; beim: ru qo" yu genae" qhid' mae" naonhaung" re khai: yu: to" ru ngad: ra". Ngadqere: ce: loe; beim khyo re naonhaung" gaung sho: myid o: rure cao" yang: daci ge,- ai: atha" jhid'de; myid we' naonhaung" yao: cao: jho" caung da" byid: ge,- 14 Pe"mung:ga"re naoyao" gaung re jhid'de; ru we' dakhyo:- ni" yham kyo: cao: re jhid'de; wa,- ga" ra" amyin" dao: dalam: re phug' cao" ru wa- kham" to" ra" Tarha" dao: alhab' re phug' cao" ru we' daqi" za: ngad: ra". 15 Ngadqere: naonhaung" wa seyo: gug'nyhug' jham we' dakhyo:- yao: cao: jho" bin: mung: dae jho" te' na ko" ngad: re wa- lha" ge,- mangad: lao" wa- naonhaung" yao: cao: dayaug we' dayaug jho" phyo' yang: alhab' shid: dam: genae". 16 Ngo ta" ru wa ceru: ngad: ra"- naonhaung" wa Byo: yang khyo shid' ra" khyo" kao so' daui ge,. Ailao"- gaung sho: myid: o: ra" khyo re naonhaung" nhag' dag genae" mangad:. 17 Pe"mung: ga re gaung sho: shad' khyo" o: ru wa- Mao"So: Byo o: rure gye kad' ra". Gaung sho: shad' khyo" o: ru we' Mao"So: Byo o: ru wa- yao: cao: gyevo ngad: ako". Airumung: naonhaung" kad' nug: ra" ja: re naonhaung" maqo" kad' ko" ngad: ra". 18 Byo: yang naonhaung" re khyoqhid' au: she byid' ngad: re wa- naonhaung" wa kham" to" ra" Tarha" qao: mae mana loko" ngad: ra". 19 Gaung sho" nho: mau" zo" wa- de: de: za: ngad: ra"- aijham wa- gaung sho: gintho' mau" zo"- maca' majhad' ru- maqu" dau: ra" ave,- 20 So alho re caung:pa" ru- mandan: vha" ru- manug thug: ru- myan" myo: jho" byo; ru- myid nug' ru- nhag' jam: yo" ru- yao: yao" qhid' mae" so' kho' ru- myid majho" vang" ru- phung: jho" kho' ru- 21 myo, no, obyid: ru- yhid yid: ru- zo: pyo: shaug' pyo" ru we' aijham we' dau: ra" lo, mau" jham ngad: ra". Qhid' phyao: ta" peim: va" ru we' dakhyo:- ana" re: ngo naonhaung" re dam: ta" peim: byid: geli". Airu: kad' mo, wa- Mao"So: mung"dan: re maqo" sang: yu: li" genae". 22 Ngadqere:- Mao"So: Byo: yang zaui: nhao: ra" ashi: wa- jhid'de; ru- ngaui bau" ru- ngaui pyo: yaug yo: ru- nhag' lam: qhang: ru- nhag' khyag' ru- gai shab; ru- vin tang: jhaug' zaug: ru. 23 Nhag' lam: nyham: ru we' yao: yao" gaung re qo" khang" ru jham ngad: ra". Ai: gu: re ngag: tam" pye' nae" pe" Tarha" re: majo, ngad: ra". 24 Yesu Khristu re Asang khyo" lhang: yu: ra" mo, wa- yao: bam: gaung sho: myid we' gaung sho: shad' khyo" kao bau myid o: ru jham alhab' re pyao: zang dao mae bojin" se' pye' avako". 25 Ai: Mao"So: Byo wa naonhaung" re kao so' byid' to" ava"- amung: yao: wa ngonhaung" nho: kao so' daui khyo rere: khang" byid: qo: ra". 26 Ngonhaung" wa ngad beim" ra" myid magai: bo- yao: cao: pyi magai: qho- yao: cao: magai: jho" myid nug: ngad: ra". 1 Nga" mao:nhaung: qe we"- dayaug yaug wa qobo daja: ja: shad' na: rure naonhaung" the' myao geyang: ngad: re- Byo qam: so' bo: ra" mo, naonhaung" wa- nau" nhae" za: yao: re jo: ra" shad' khyo jhao" byid: ge, Naonhaung" yao: re: ju" phyo' ra" khyo magyo" vao lo" genae" qhid' mae" lha" na ge,- 2 dayaug: qo re dayaug yao: cao: jho" bao" vin vo; byid: mung:ceru: naonhaung" wa- Khristu nho: tarha" re phug' cao" na ge,- 3 byu dayaug yaug wa gaigai: yao: ga" re yao: pe" akhyag yaug mangad' rure- akhyag yaug ngad: ra" khyo" myid: jho: re- yao: wa yao: yao" gaung re mhug' pyag' ra" yaug ngad: ra". 4 Yaug khao: ngo" wa yao: yao" lo, mau" re kin: kho' qu" qo: ra". Ai: lo, mau" gai yang: ngad: re wa- gatau dayaug: nho: lo, mau" we' dau tau" qu" maqo lo:- yao: yao" lo, mau" mae qo" phug: li" nae". 5 Pe"mung:ga"re yaug khao: ngo" wa yao: yao" qo re vin vo; qo: ra". 6 Khristan: mungdao: re mho" zhao: yu: ra" yaug wa- yao" mho" pho" re gai: ra" ja: alhab' yang bao" thaug' byid: qo: ra". 7 Naonhaung" damyid: nghung: ge,- Mao"So re khag' re: maqo" mhug' ngad: ra". Byu wa yao: sin" ke' ra" ja: re yao:- ashi: jham" yu: li" nae". 8 Gaung sho: myid o: rumae sin" ra" yaug wa- yao: ai: gaung sho: mae" shid: rure qo" jham" yu: li" nae". Byo myid o: rumae sin" ra" yaug kam" wa- ai: Byo mae" apyad ato: kao so' re qo" jham" yu: li" nae". 9 Ngonhaung" wa gai: ra" mau" zo" zaui: so: nae" qhid' mae" mamyaung: madug gejhao"- pe"mung:ga"re airu: ngonhaung" qam: mashan- nhag' lam: magyug: yang: ngad: re wa- ayo, joe" li" lao"- ngonhaung" wa ashi: qo" jham" yu nae" ngad: ra". 10 Airumung:- ngonhaung" wa agu qo" khao: ngo"- byu yaug khao: ngo" re gai: ra" mau" zo" zaui: byid: qo: ra". Je yang: wa- lam khug: ra" ngonhaung" yham khug: byu qere zaui: so: byid: gelang: 11 Ngoyao" lo; yang yao: khoqhi" qi" ra" tung" ce' jham we' ngo naonhaung" jhao" tung" ke' rure qu" qu" ge,- 12 Naonhaung" re au: qid lhai: khyo re kham: yu genae" qhid' mae" qam: ke' yang: maqad maqui" deim" zag: jhan" na ko" ra" mo, wa- adao: pyae myao: ra" ja: re langa: kad' phug: qhu" nug mo, ngad: ako". Ngadqere: yao: bam wa- Khristu nho: pyao: zang khyo: mathao mae yhin" ru maqhug' genae" qhid' mae" airu: kad' ru ngad: ako". 13 Ai: au: qid lhai: khyo re kham: yu ko" ra" mo, lhao" re:- Kham" to" ra" Tarha" re maphug' cao" ngad: ako". Naonhaung" au: qid lhai: khyo re kham: yu: rumae yao: bam qo" phug nae" qhid' mae" yao: bam wa- naonhaung" re au: qid lhai: khyo kham: yu nhao nug: ako". 14 Ngadqere: ngo kam" wa- ngonhaung" Asang Yesu Khristu nho: pyao: zang khyo we' sin: yang: za: ngo phug nae" ngad: ra". Pe"mung:ga"re yao" pyao: zang khyo" yang mug: myid wa nga" qhid' mae" shid: jo, mung: ngore: mug: myid: qhid' mae" shid va". 15 Byu dayaug wa au: qid lhai: khyo kham: yu: ru makham: yu: ru pe" akhyag mangad:- byusag' boe" ru za: akhyag ngad: ra". 16 Yao: bam: kao so' daui: rumae ce:khyo re phug' cao" ra" mo; dao mae re:- Mao"So: byu qe alhab' mo; dao mae re:- ngaui pyo: yaug yo: ru we' nhag' khyag' shogu: ru wa- yao: bam alhab' we' daga" ngad: jo, vashao: wo"- 17 Dao: pin" khyo" ta" nug: ru wa ana" mae"- khag' yang re: ngore qug: khai: mabyid: lo: vashao:- pe"mung:ga"re nga" gaung mae de; ra" dae jho: jham wa- ngo Yesu nho: jeim pho" ngad: rure sagse: qhu" byid' na: ra". 18 Nga" mao:nhaung: qe we"- ngonhaung" Asang Yesu Khristu nho: nhag' myan" ra" jeju wa- naonhaung" alhab' mo, we' daga" ngad: jo, vashao: wo"- Amen.
|