Ephesians
Ephesu1 Mao"So: myid o: ru we' dakhyo:- Khristu Yesu nho: lagyo: ngad: ra" ngo Polu wa- Ephesu vogaung: mae" Mao"So: byu qe ngad ko" ra"- Khristu khug mae jhaug' zaug za: kaoso' daui: na: ra" mo, re mugsug' tung" ke' ra". 2 Ngonhaung" Pho" Mao"So we' Asang Yesu Khristu wa naonhaung" re nhag' myan" ra" jeju we' ngaui pyo: yaug yo: ru byid: vageshao:- 3 Ngonhaung" Asang Yesu Khristu yao: Pho"- Mao"So re ngonhaung" jeju caung:khin" byid: gelang:- pe"mung:ga"re- Mao"So wa mug: khaung mung"dan: mae Byo we' sin" ra" shaman" jeju ja: khao: ngo" re Khristu we' dadang: dalam: za: ngad: ra" khyo" yang ngonhaung" re shaman" byid' to" ava". 4 Ngonhaung" wa Khristu we' dadang: dalam: za: ngad: ra" khyo" yang yao" qhid' kheim: mae qo mabo mo, we' gyang" lho" ra" mo, boe" nae" qhid' mae" mug:myid maphan" shimae" lhao" re:- Mao"So wa ngonhaung" re khyin: yu: to" ava". 5 Mao"So wa yao" jhid'de; myid mathao mae Yesu Khristu khyo" yang ngonhaung" re yao: zo: toe' nae" qhid' mae"- myid: phyid' khyin: yu: to: gau ngad; ava". Ceru wa yao: o ngaui: ru we' yao" myid: qang: to" ru ngad: ra". 6 Yao" jhid'de; ra" yao: zo: khyo" yang ngonhaung" re aphug' mamho' lo: byid' ra". Mao"So: phungbao byang" jo; ra" nhag' myan" ra" jeju qhid' mae" ngonhaung" wa- Mao"So: jeju re caung:khin" byid: gelang:- 7 Pe"mung:ga"re Khristu shid kham: byid' ra" khyo" yang ngonhaung" wa loe; beim: ru qhug' bam va"- Airu wa qobo khyad' pye' byid: qhug' ru ngad: ra". 8 Ngonhaung" re ai nho" myo: laug sho' byid' ra" Mao"So: nhag' myan" ra" jeju wa- khoqhi" sho' qi" qhang: jo; ra" i? Mao"So wa yao" laba lajhao nyan: pha,jhi" alhab' we' yao: myid: qang: to" ra" mau" zo" re zaui: so" ra". 9 Yao: wa Khristu khyo" yang zaui" pin" nae" yao: myid: phyid' to: gau ngad: ra" no; thao" ra" myid: yaung: to" ra" khyo- ngonhaung" re ba nhao: ava". 10 Ayo, joe" lao" zaui" pin" nae" Mao"So myid: yaung: to" ra" khyo ceru wa Khristu re au: jhaung to: mung:- Mug:gaung we' myidgaung dao mae jo; ra" phan" to" ra" gu: alhab' re daga" za: qhan" zhang: to: nae" ru ngad: ra". 11 Ja: khao: ngo" wa Mao"So myid: yaung: ru we' myid' phyid' to" ru we' dakhyo:- boe" jo; ra". Mao"So wa yao: myid: qang: ru we' dakhyo:- sao qhid' mae" yao: myid: phyid' to: va" rure cao" yang:- ngonhaung" re Khristu we' dadang: dalam: za: boe" nhao mung:- Yao" byu qekhyo" Mao"So wa ngonhaung" re khyin: yu: to" ava". 12 Airumung: Khristu re sao qhid' myid: lao" lo mo, ngad: ra" ngonhaung" wa Mao"So: phung bao re caung:khin" byid: gelang:. 13 Naonhaung" re khyad' yu: ru qhug' nhao: ra" ai: Lau Dao: Gai ga" ra"- dangman" ra" mungdao: re the' gyo" yu gelao"- naonhaung" re: Mao"So: byu qe boe" lo: ako". Naonhaung" Khristu re lam khug mung:- Mao"So wa yao: dao:so: byid' to" ra" Gyang" Lho" Byo naonhaung" re byid' ra" khyo"- Asang ngad: ra" aso: ga" ra" dazid thaung" te' to" ava". 14 Airu: Byo wa Mao"So yao" byu qere byid: nae" ga: dao:so: byid' to" ra" jeju jhaung qhu" re ngonhaung" qo" khae: yu nae" ngad: rure pakham: byid' ru ngad: ra". Ce: khyo Mao"So wa yao" byu qere- jab sho'- loe; beim nhao nae"- ga" rure ngonhaung" myid mae nyhad' tang byid' ra" yao" phungbao re ngonhaung" caung:khin" gelang:- 15 Airumung:- naonhaung" wa Asang Yesu re lam khug: na ko" ra" khyo re we' Mao"So: byu alhab' mo, re jhid'de; na ko" ra" khyo re ngo the' gyo" ra" ba na mae"- 16 naonhaung" mathao mae ngo wa Mao"So re mathang mano: jeju caung:khin" ra". Ngo wa naonhaung" re akyu" beim" mho' byid' na mung:- 17 Naonhaung" wa Mao"So re ba: li" genae" qhid' mae"- pha,jhi" ba nhao: ru we' Mao"So re qhu" byid: nae" yaug ngad: ra" Gyang" Lho" Byo naonhaung" re byid: vashao:- ngonhaung" Asang Yesu Khristu nho: Mao"So- phungbao qi" qhang: jo; ra" Pho" re ngo mho' ra". 18 Yao: naonhaung" re khoru" ra" myid: lao" khyo khyo khai: yu: ra" khyo yao" byu qere yao: dao:so: byid' to" ra" mug' pho: shaman" jeju jham wa- khoqhi" sho' qi" qhang: jo; ra" khyo- 19 Lam khug: ra" mo, naonhaung" khug mae khoqhi" sho' qi" qhang: ra" yao" qam: so' yang yao" mau" re zaui" na: rure:- naonhaung" ba genae" qhid' mae" yao" bo" bao re myao nae" naonhaung" aung khug nhag' lam: myid re phung" byid: vashao:- ngo akyu" mho' ra". Ngonhaung" khug mae mau" zaui" na: ra" ce: qam: so' wa- 20 Khristu re shid: rumae" daui: li" nhao mung:- Mug: khaung: mung"dan: dao mae yao" lo, yo shad' mae zaung: jo, nhao: ra" Mao"So: qi" qhang: thao" ra" qam: so' yao: ngad: ra". 21 Ai: mug: khaung: mung"dan: dao mae Khristu wa- mug:gaung re eib: ra" mo,- kheim: so' qo" ra" mo,- phung qam: so' bo: ra" mo, we' asang qe alhab' mo; dao mae au: jhaung khyo" eib: ra". Khristu wa ce: mug: myid pyad qae: mae we' joe" lo nae" pyad qae: mae kheim: so' qo" ra" mo; mang alhab' tho' mae je: myhao: thao" ra" mang qo" yaug ngad: ra". 22 Mao"So wa ja: cao jab alhab' re Khristu nho: khyid vo: qao: mae ke' to: byid: mung: phung" nho: qhid' mae" ja: cao jab alhab' dao mae myhao: thao" ra" Asang au: jhaung khyo" yao: re byid' to" ra". 23 Ai: Phung: wa Khristu nho: gaung khyao ngad mung:- Ja: cao jab alhab' re jab byang" nhao: ra" Khristu wa ai: gaung khyao mae jab byang" jo; ra". 1 Qhid' phyao: naonhaung" wa Mao"So: mho dao: magyo" ru we' qobo shad' lhoe" geyang:- Byo we' sin: yang: ashid ngad: ako". 2 Ai: ayo, mae naonhaung" wa myidgaung dao mae" makhyang" ra" qobo mau" zo" thao naonhaung" cao" lo: ako". Naonhaung" wa mug: le; phyo: mae" qam: so' bo: ra" ai: byo jham re eib: ra" yaug: nho: mho dao: re tae" gyo" lo: avako". Ai: byo wa ana" Mao"So: mho dao: re magyo" ra" byu qere eib zo" na: ra". 3 Gaigai: yao: ganhae" wa ngonhaung" re: yao: bam we' dakhyo: ngad: lo: ra". Gaung sho: shad' khyo" ngonhaung" nho: myid kao bau: ru re cao" yang:- ngonhaung" gaung dau: we' myid nhag' lam: o ngaui kao bau: ru we' dakhyo:- kaoso' daui: lo: ra"- Airumung: ngonhaung" re: azhao: mae" khyo" sun" re su gaje qe we' dakhyo:- Mao"So:nhag' yo" rure kham: yu man" ra" mo, ngad: ra". 4 Ngadqere: Mao"So: nhag' myan" ra" jeju wa- magan: mago" ngad: ru we' ngonhaung" re jhid'de; ra" yao" jhid'de; myid gyai qi" qhang: jo, yang:- 5 ngonhaung" mho dao: magyo: mung: byo mae ngonhaung" shid: jo; ra" au:- Mao"So wa ngonhaung" re Khristu we' daga" kaoso' daui: li" nhao: ra". Naonhaung" wa Mao"So: nhag' myan" ra" jeju khyo" yang khyad' yu: ru qhug' ako". 6 Ngonhaung" wa Khristu we' dadang: dalam: za: doe; ruyang Mao"So wa ngonhaung" re mug:khaung: mung"dan: mae yao: we' daga" eib nae" qhid' mae" Khristu we' daga" daui: to" li" nhao ava". Khristu we' daga" daui: to" li" nhao mung:- Yao: we' daga" mug: khaung: mung"dan: mae eib: na nhao: ra". 7 Yao: ceru re kad' ru wa Khristu Yesu khyo" yang ngonhaung" re jhid'de; myid qhu" byid' rumae yao" nhag' myan" ra" jeju matho' mho losho' qi" qhang: jo; rure thao: qae" mae" mo, alhab' re qhu" byid: nae" qhid' mae" ngad: ra". 8 Pe"mung:ga"re naonhaung" wa lam khug: ra" khyo" yang Mao"So: nhag' myan" ra" jeju khyo" khyad' yu: ru qhug' avako". Aiwa naonhaung" yao" lo, mau" yang mangad:- Mao"So: jeju jhaung qhu" ngad: ra". 9 Naonhaung" yao: qam: ke' yang: qo" yu: ru mangad" rumung:- khag' re: magai: phug ngad: ra". 10 Ngonhaung" wa yao" lo,mau" yang boe" na mo, ngad: ra"- Amung: ngonhaung" wa Khristu we' dadang: dalam: za: doe, yang: Mao"So: yang nyhang" jaung: to: gau ngad: ra"- gai shab: ra" mau" zo" re zaui: so: geshao: ga:- Mao"So wa ngonhaung" re phan" to" ra". 11 Qhid' phyao:- Gaung sho: shad' khyo" ga" re naonhaung" wa taung bug qe ngad ko" rure myid: beim: ge,- �Thung" li re cao" yang: au: qid lhai: khyo re kham: yu: ra" mo, wa naonhaung" re au: qid lhai: khyo makham: yu: ra" mo,- ga: mhang" ako". 12 Ai: ayo, mae naonhaung" wa Khristu we' gao" lin: jo; ako". Naonhaung" wa Taung bug byu qe ngad mung:- Mao"So: yang khyin: yu: to" ra" byumyu" mae mabobo ko" ngad: ra". Yao" byumyu" qere Mao"So byid' to" ra" dao:so: mae zao: to" ra" dao: thang" mae naonhaung" mabobo ngad: ako"- Naonhaung" wa- ce: mug: myid dao mae myid: lao" nae" ru maqo"- Mao"So maqo" lo: na: lo: ako". 13 Ngadqere: ana" kam" wa Khristu we' dadang: dalam: za: doe; na va" ruyang qhid' phyao: Mao"So we' gao" lin: na: lo: ra" mo, naonhaung" wa Khristu shid kham: byid' ra" khyo" yang Mao"So we' te' lo: avako". 14 Pe"mung:ga"re Khristu wa Yuda byu qere we' Taung bug byu qere byumyu" damyu" za: boe" nhao mung:- ngonhaung" re ngaui pyo: yaug yo mang:dae byid' ra". Yao: wa yao" gaung re shid kham: byid: yang:- gyevo qekhyo" byumyu" jho" kho' to: byid' ra" akyo re phyo' khyo" pye' byid' ra". 15 Khristu wa ai: byumyu" shid' ja: re yao: we' dadang: dalam: za: doe, nhao yang: byumyu" asag' daja: re phan" phaug' ke' nae" qhid' mae" Yuda qe: thung" li tarha" jham we' daga"- ai:nho: amyin" dao: jham we' tarha" jham re yu: pye' ava". Ceru: khyo" yang yao: wa shid' shad' geim" re ngaui pyo: yaug yo mang: dae byid' ra". 16 Khristu wa pyao: zang dao mae shid: kham: byid' ra" khyo" yang yao: bam yao: cao: majho" nug: rure yu: pye' byid: yang:- ai: byumyu" shid' ja: re dadang: dalam: doe, nhao mung:- Mao"So jhao" yao: bam re jhui" vao lo: ava". 17 Airumung:- Qhid' phyao: Mao"So we' gao" lin: na: lo: ra" mo, ngad ko" ra" naonhaung" Taung bug byu qere re:- Mao"So we' te' na: lo mo, ngad ko" ra" Yuda byu qere re: Khristu wa joe" li" mung: mang: dae byid' ra" Lau Dao: Gai mungdao: naonhaung" alhab' re kho" kyo: byid' ava". 18 Taung bug byu qe we' Yuda byu qe ngad ko" ra" ngonhaung" alhab' mo, wa- Gyang" Lho" Byo dayaug we' za: Pho" qhid' kheim: khyo qo" vao ye" lo" bam va". 19 Airumung: ana"- naonhaung" Taung bug byu qe wa taung bug lamai: we' bang" vo qe mangad: loko" ngad: ra". Mao"So: mung"dan: byumyu" mae bobo mung: Mao"So: yham byu qe ngad: avako". 20 Naonhaung" re:- lagyo: qe we' lapa qeyang zao: qhid: to" ra" apan aqao: dao mae xo' zao: to: mo, ngad: ako". Khristu yao: wa- ai: yham jheim mae" akhyag: thao" ra" laug baui ngad: ra". 21 Yao: wa yham geim" re gang: tang sho' daga" za: jho" zaui" ci nhao: ra" yaug we' ai: yham re Mao"So re qhaug' byid' to" ra" gyang" lho" ra" Mao"So: yham boe" sho' qi" qhang: li" nhao yaug ngad: ra". 22 Naonhaung" re: Khristu we' dadang: dalam: doe, mung:- su gaje qe alhab' we' daga"- zao: to" rure qhug' gemung:- Mao"So wa Byo khyo" na: ra" jo, qo boe" lo: ako". 1 Ceru: yang naonhaung" Taung bug byu qe: mathao mae Yesu Khristu nho: kyam: byu ngad: ra" ngo Polu wa Mao"So re akyu" mho' ra". 2 Mao"So wa yao" nhag' myan" ra" jeju khyo" yang naonhaung" qhid' mae" ngore ce: mau" byid' to" ra" khyo re naonhaung" the' gyo: gau ngad: ako". 3 Mao"So wa yao" no; thao" ra" myid: yaung: to" ra" khyo ngore de: de: za: qhu" shid' byid' ra". �Ce: khyo we' sin: yang: ngo wa lang" ra" khyo" mugsug' tung" ke' va". 4 Ngo tung" ke' rure naonhaung" nghe' ko" ngad: re wa- naonhaung" wa Khristu nho: no; thao" ra" myid: yaung: to" ra" khyo re ngo ba: gyo" ra" yaug ngad: rure naonhaung" qo" ba: yu: li" genae".� 5 Qhid' phyao: lai: lo: ra" ayo, gu: mae ce: no; thao" ra" myid: yaung: to" rure xao su byu qere maqhu" byid: ngad: ra". Ngadqere:- Ana"- Mao"So wa ai: khyo re- yao" gyang" lho" ra" lagyo: qe we' lapa qere Byo khyo" yang qhu" byid' ava". 6 Ai: no; thao" ra" myid: yaung: to" ru wa Ngaui Bau" Lau Dao: khyo" yang Taung bug byu qe wa Mao"So: shaman" jeju jham re Yuda byu qe we' daga" qo" kham: yu: ako". Yao: bam wa gaung khyao dalam: mae" gaung dau jham za: ngad mung:- Yesu Khristu khyo" yang Mao"So byid' to" ra" dao:so: rere: qo" kham: yu vako" ra"- ga" ru ngad: ra". 7 Mao"So: qam: so' mau" zaui" ra" khyo" ngore byid' ra" Mao"So gakai: lai mung: ra" jeju jhaung qhu" wa ngore Lau Dao: Gai: nho: daui daui yaug boe" lo nhao: ra". 8 Ngo wa Mao"So: byu qe alhab' mo, tho' je yang: ngai: thao" ra" yaug ngad: ra". Ngadqere: Mao"So wa Khristu nho: magan: mago" qo" ra" khyo we' sin" ra" Lau Dao: Gai Taung bug byu qere yekho" kyo: nae" we'- 9 Mao"So: no; thao" ra" myid: yaung: to" ru wa khoru: boe" thug' li" nae" rure mo, byu qere qhu" byid: nae" qhid' mae" ce: gakai: lai ngore byid' ra". Ja: cao jab alhab' re phan" yaug Mao"So wa- yao" no; thao" ra" myid: yaung: to" rure qhid' phyao: lai: lo: ra" qae" mae" nyham" to: byid' ra". 10 Yao: airu: kad' ru wa mug:khaung dao mae eib: ra" mug: lagyo: qe we' kheim: so' qo" ra" mo, wa Mao"So: pha,jhi" laba lajhao akhyo aja: ja: re ai: phung" nho: daui lab: ra" khyo" yang ba: yu genae" qhid' mae" ngad: ra". 11 Mao"So wa yao" apyad ato: myid: qang: to" ru we' dakhyo:- ce:rure ngonhaung" Asang Yesu Khristu khyo" yang zaui" boe" ru ngad: ra". 12 Ngonhaung" wa Khristu we' dadang: dalam: za: doe, mung:- Yao: re ngonhaung" lam khug: ra" khyo" yang Mao"So: qhid' kheim: khyo vae" vae" lam lam za: qo" vao ye" ra". 13 Airumung: naonhaung" qhid' mae" ngo kham zo" ra" qug: khai: mathao mae naonhaung" nhag' lam: mabyo, genae" qhid' mae" ngo mho' ke' ra". Airu: kham zo" ru wa- naonhaung" alhab' mo; qhid' mae" ngad: ra". 14 Ce: khyo mathao mae mug:gaung dao mae we' myid gaung dao mae" ug' khug' dinkhu: alhab' qo" khae: yu: ra" dangman" ra" mang byid' ra". 15 Pho" Mao"So: qhid' kheim: mae ngo pad' thaug' thaug' mung: akyu" mho' ra". 16 Ngo wa yao" phungbao mae" naonhaung" aung khug nhag' lam: qam: bo: li" nae" qhid' mae" yao" Byo khyo" yang naonhaung" re qam: so' byid: vashao:- Ngo Mao"So re akyu" mho' ra". 17 Alao"-naonhaung" lam khug: ru khyo" yang Khristu wa naonhaung" aung khug nhag' lam: khug mae yao" na jo, qo toe' vashao:- ngo akyu" mho' ra". 18 Naonhaung" wa Khristu nho:jhid'de; myid qhang phyao:- lae phyao:- myhao phyao:- no, phyao:- khoqhi" qi" qhang: jo; rure Mao"So: byu qe alhab' mo, we' daga" ba: gyo" ra" qam: so' qo" yu genae" qhid' mae" jhid'de; ra" myid mae naonhaung" apan aqao:- agyi: taui" na geshao:- ngo akyu" mho' ra". 19 Ngad va"- Khristu nho: jhid'de; myid re jab byang" sho' magai: ba: gyo: ngadqere:- yao" jhid' de, myid re naonhaung" ba: li" mung:- Mao"So: jab byang" ra" ave, we' dakhyo: yao:- naonhaung" jab byang" li" geshao:- akyu" mho' ra". 20 Ngonhaung" khug mae mau" zaui" na: ra" yao" nho: qam: so' khyo" yang ngonhaung" mho' yao: ra" ja: we' myid: ra" ja: tho' re je yang: qo" zaui" boe" ra" Mao"So wa- 21 Ai: Phung: mae we' Yesu Khristu mae apyad ato phungbao qi" qhang: jo, vashao: wo"- Amen. 1 Airumung: Asang re caung da" byid: yaug kyam: byu ngad: ra" ngo wa Mao"So: yang naonhaung" re khai: yu: ra" au:- Yao: mhai" to: byid' ra" azhao" re myhi: ra" kaoso' daui khyo mae kaoso' daui genae" qhid' mae" naonhaung" re jhan" ke' ra". 2 Khonhae" re: nhag' lam: nyham: khyo" mung: nau" nhae" ru we' nhag' lam: qhang ge,- dayaug we' dayaug jho" zang: kham byid' ra" khyo" naonhaung" jhid'de; myid re jho" qhu" ge,- 3 Ngaui pyo: yaug yo: ru khyo" yang naonhaung" re dadang: dalam: za: boe" nhao: ra" ai: Byo: yang byid' ra" myid jho" vang" rure nyang" za: zaui" zag: ci ge,. 4 Naonhaung" re Mao"So khai: yu: rumae myid: lao" nae" ru daja: za: mae khai: yu: ru ngad: ru we' dakhyo:- naonhaung" gaung khyao dalam: we' Byo dayaug za: ngad: ra". 5 Asang dayaug za:- lam khug: khyo dalam: za:- qid nyhab' dalam: za: ngad: ra". 6 Xao su byu alhab' mo; yao: Pho" ngad: ra" Mao"So re: date: za: ngad: ra"- Yao: wa byu alhab' mo; dao mae Asang kad' na mung:- byu alhab' mo, re ci yang: mau" zaui" na: ru we' byu alhab' mo; khug mae na: jo; ra" yaug ngad: ra". 7 Khristu byid' ra" gakai: lai: ra" jeju jhaung qhu" re dano" no" za: ngonhaung" yaug khao: ngo" qo" khae: yu: bam va". 8 Jham: Mugsug' mae Yao: wa gyai myhao: ra" jo, qo khyo do, lo" ra" au:- Yao: we' daga" kyam: byu myo: sho' re jhui" do, lo" mung:- Yao: wa xao su byu qere jeju jhaung qhu" byid' ra"- ga: ta" to" ra". 9 Ana" ce:- yao: do, lo" ra" ga" ru wa- pe" re ga" ru ngad: ra" i? Airu wa- yao: wa nyham: thao" ra" myid gaung pyae khyo sao qhid' joe" gyo" li" rure ta" ru ngad: ra". 10 Airu: gyo" li" ra" yaug wa mug:gaung myid gaung alhab' mae yao" phungbao we' byang" nhao nae" qhid' mae" mug:gaung pyae myo: sho' khyo lai: do, lo" ra" yaug yao: ngad: ava". 11 Xao su byu qere jeju jhaung qhu" jham gae byid' ra" yaug re: yao: ngad: ra". Yao: wa damyo" re wa lagyo:- damyo" re lapa- damyo" re ngaui bau" lau dao: kho" kyo: mo,- damyo" re Phung: jhui: mo, we' mho" pho" qekhyo" san: to" ra". 12 Yao: ceru: kad' ru wa Khristu nho: gaung khyao re zao: to' nae" qhid' mae" Mao"So: byu alhab' mo, re Khristan: mau" zo" jid: zo" qhid' mae" seim" nyhang" byid' ru ngad: ra". 13 Aimung: ngonhaung" nho: lam khug: myid we' Mao"So: yao: zo: re ngonhaung" ba jhao: ra" khyo mae ngonhaung" alhab' mo, wa- dadang: dalam: za: doe, mung:- Khristu nho: qi" qhang jab byang" ra" azhao" re myhi: ra" qi" qhang: ra" zoqao" qe boe" nae" ngad: ra". 14 Ailao"- ngonhaung" wa Pha,jhi" khyug' yang: su re khyonghung: nghung: nhao: ra" mhug' pyag' ra" mo; mho" shid' dao:- la hug' khoru: hug' re khoru: bang: lhung" khug mae bomyung: qin" ra" zoshao qe we' dau lo nae" mangad:- 15 Ai: atha" ngonhaung" wa dangman" ra" dao: re jhid'de; myid we' jhau mo, boe" mung:- ja: khao: ngo" mae au: ngad: ra" Khristu shad' khyo qi" qhang: li" nae" ngad: ra". 16 Khristu yao" yang eib khang" ra" qao: mae majho" dau: ra" gaung dau jham wa yao: yao: vin vo; ang: ra" mau" re vin vo; gelao"- gaung khyao geim" qi" qhang: li" mung:- jhid' de, myid: yang gang" tang: li" nhao: ra". 17 Airumung: naonhaung" wa Mao"So re maba mo, we' dakhyo:- xo' yang: kaoso' madaui genae" qhid' mae" ngo wa Asang: mang re lao: yang: naonhaung" re ta" peim: byid' ra". Yao: bam myid: ra" khyo jham wa akeim ngad mung:- yao: bam: myid nyan: re: cad' jo; ako". 18 Yao: bam wa maba mabeim: nhag' cad' noyaug ngad mung: nhag' lam: qao ko" ruyang- Mao"So byid' ra" kaoso' daui khyo mae mabo: bo ko" ngad: ra". 19 Yao: bam wa qho' gyaug myid dajhid' re: mabo logeyang:- Yao: bam: gaung re gaung sho: shab' mhin: rumae au: am: mung:- masan masin" ra" mau" zo" aja: ja: re lo, lae vha zaui" ako". 20 Airu wa Khristu we' sin: yang: naonhaung" zhao: yu: ra" khyodang mangad: ngad: ra". 21 Naonhaung" wa Khristu nho: khyo re gaigai: yao: the' gyo" qu" mung:- yao" mho"zo: qe khyo" Yesu nho: dangman" ra" khyo re naonhaung" mho" zhao: yu: avako". 22 Airumung:- qhid' phyao: naonhaung" kad' min" lo ko" ra" ave, xug' jham re yu: pye' ge,. Mhug' pyag' ba: ra" gaung sho: obyid kao bau: ruyang phyo' qheim" pye' ba: ra" kaoso' daui khyo axug' re shapye' pye' ge,- 23 Naonhaung" aung khug nhag' lam: we' myid wa alhab' asag' kad' pye' qo: ra". 24 Mao"So: ve, lho we' dau: ra" khyo" phan" ru qhug' mung: kaoso' daui: ra" khyo mae dang man" rure qhu" byid' ra" dangman" ru we' gyang" lho" ra" ve,khyao asag' re naonhaung" zhaung" ve; yu ca" ra". 25 Airumung:- damhug' loge,- Ngonhaung" alhab' mo, wa- Khristu nho: gaung khyao mae" gaung dau jham ngad: ruyang yaug khao: ngo" wa lam khug: ra" yao" mao:nhaung: pho" re dang: ra" dao: za: ta" na ca" ra". 26 Naonhaung" nhag' yo: gengadqere:- qobo dakad' ge,- ba gyam sho' nhag' dayo: ge,- 27 Satan re jo, qo daqhui" ge,. 28 Khug' zo" qu" ra" yaug wa khug' zo" ra" mau" zo" re thang: pye' mung:- myaung sho" ra" mo, re qo" bao" thaug' byid: nae" qhid' mae" we' yao: yao" gaung re kaoso' khau nae" qhid' mae" din: din: man: man: za: yao" lo; yang mau" zaui: vashao:. 29 Su re nhag' no nhao: ra" dao: qeim dajhau ge,- su re akyu" byid' ra" dao:- qo ca" ru mae bao" thaug' tau: to' byid' ra" dao: jham re za: jhau ge,. Ailao" za:- naonhaung" dao: re gyo" yu: ra" mo; qhid' mae" akyu" bo: li" nae". 30 Amung:- Mao"So: Gyang" Lho" Byo re dakaug' nhao ge,- pe"mung:ga"re ai: Byo wa- naonhaung" re Mao"So sang: ra"- ga" ra" aso: dazid ngad mung:- lo" thao" ba na joe" li" lao"- Mao"So wa naonhaung" re loe; beim nhao nae"- ga" ra" pakham: aso: re: ngad: ra". 31 Airumung:- nhag' no: jo; ru- nhag' yo" ru- nhag' lam: lang" ru- zag: shad' ru- su re roe" ru- su re nghang" ra" ja:- alhab' re shapye' pye' ge,. 32 Amung:- naonhaung" yao: cao: jho" jhid'- jho" nhag' khyag' na ge,- Mao"So wa Khristu khyo" yang naonhaung" qobo re khyad' byid: va" ru we' dakhyo:- naonhaung" yao: cao: re: dayaug we' dayaug: qobo re jho" khyad' byid: ge,. 1 Naonhaung" wa Mao"So: jhid'de; ra" zo: dau qe ngad ko" ruyang yao: we' dau sho' qam: ke' qo: ako". 2 Khristu wa ngonhaung" re jhid'de; mung:- ngonhaung" qhid' mae" yao" kaoso' re Mao"So ngaui: ra" sheim nae pyo" ra" ngaui" xeim: khyo" xeim: ngaui" byid' ru we' dakhyo:- naonhaung" kaoso' daui: ra" khyo mae re:- jhid'de; myid: yang khyo shid' khang" ra" khyo" kaoso' daui ge,. 3 Naonhaung" wa Mao"So: byu qe ngad ko" ruyang gaung sho: gintho' mau" zo" maqu" dau: ra" ave,- aja: ja: we' so' kho' obyid: ru we' sin: yang:- naonhaung" phaung gaung: mae ta" lhao" data" thug' ge,. 4 Dao: co' dao: qeim- ako" asho: dao:- nghin" she' dao: jham re: naonhaung" majhau ang ko" ngad: ra". Mao"So: jeju re caung:khin" byid' ra" dao: za:- naonhaung" jhau ang: ako". 5 Gaung sho" nho: gintho' mau" zaui" ra" yaug- maqu" dau: ra" ave,- so' kho' obyid: ra" yaug- khag' ngadqere: Khristu we' Mao"So: mung"dan: re khonhae" re: maqo" khae: yu nae" ru re naonhaung" nyang" za: ba: ako". (so' kho' obyid: ru wa solho re goe; pa" ru daja: ngad: ra") 6 Dao: je dao: keim: yang naonhaung" re khag' damhug' pyag' nhao ge,. Ai: mathao mae Mao"So: mho dao: re matae" gyo" ra" mo; au: dao mae Mao"So: nhag' yo" ru joe" li" li" nae". 7 Airumung: naonhaung" wa airu" mo, we' dajhid' re: dazam" ge,- 8 Naonhaung" yao: re: qhid' phyao: wa mug: cad' khug mae na: lo mo, ngad: ako". Ngadqere: ana" naonhaung" wa Asang: nho: byu qe boe" lo vako" ruyang mug: bo" khug mae ngad: avako". Airumung: mug: bo" khug mae" byu qe we' dakhyo:- naonhaung" re: kaoso' daui ge,. 9 Pe"mung:ga"re mug: bo" wa- gai shab: ru aja: ja:- din:man" ru- dangman" ru- jham re myo" laug: li" nhao: ra". 10 Asang o ngaui: ru pe" ja: ngad: rure qam: ke' yang: zhao: yu ge,. 11 Mug: cad' khug mae na ko" ra" mo, kad' ko" ra" lo,mau" jham re macao" kad' lo:- ai: lo, mau" jham re mug: bo" shad' khyo phoe' qhu" byid: ge,. 12 (Yao: bam anyham: avho' mae kad' ko" ra" ai: lo,mau" jham re ta" nae" lhao" re:- gyai yao: aqho' axag' ngad: ra".) 13 Ja: khao: ngo" wa bo" bao shad' khyo ci thug' qhu" byid' ru qhug' lao"- yao: bam yao" lo, mau" ave, gyang" wa- de: de: za: myao: thug' li" ra". 14 Pe"mung:ga"re de: de: za: ci: qhu" to" ra" ja: pe" ngadqere:- bo" bao boe" lo: ra". Airumung: yab: jo; ra" yaug we"- To" wa,- Shid: rumae" daui: to" li" wa,- Khristu wa nao re bao byid' li" nae"- ga: ta" to" ra". 15 Airumung: naonhaung" khoru: kaoso' daui ko" ra" khyo re ku yang: lha" ge,- adu: adae: mung mo, re" ru: mangad:- Pha,jhi" bo: ra" mo, re" ru:- kaoso' daui ge,. 16 Ce: ayo, ba na jham wa makhyang" ra" ayo, ba na jham ngad: ruyang naonhaung" qo" ra" akho: akhang" khao: ngo" re akyu" bo: ra" khyo" ci ge,. 17 Airumung: dago dapyan ge,- Asang naonhaung" re pe" ja: kad' nhao nug: rure qam: ke' yang: pha: qho ge,. 18 Yhid dashaug' yid ge,- Aiwa naonhaung" re byo; qeim: lo" nhao: li" nae". Ai: atha" Gyang" Lho" Byo we' byang" jo, ge,- 19 caung:khin" dao:- nghaui" caung: dao:- caung:pa" ru we' sin" ra" nghaui" caung: dao jham we' naonhaung" yao: cao:- jho" jhau mung:- naonhaung" aung khug nhag' lam: mae Asang re jeju caung:khin" zo" re"nghaui"caung: dao: we' caung:khin" dao: khyo" nghaui" caung: khin" na ge,. 20 Naonhaung" wa Yesu Khristu mang a re lao: yang:- ja: khao: ngo" qhid' mae" khonhae" re: Pho" Mao"So re jeju caung:khin" ge,. 21 Naonhaung" wa Khristu re phug' myao: mo, ngad ko" ruyang- dayaug myid o: rure dayaug myid jho" cao" byid: ge,. 22 Yham sang myhi" qe we"- Asang eib khang" ru re kham: yu ko" ru we' dakhyo:- naonhaung" yham sang pho" qe: eib khang" rure kham: yu ge,. 23 Pe"mung:ga"re Khristu wa ai: Phung: dao mae kheim: so' qo" yaug ngad: ru we' dakhyo: yham sang pho" wa yham sang myhi" dao mae kheim: so' qo" yaug ngad: ra". Khristu yao: yao: wa- yao" gaung khyao ngad: ra" ai: Phung" nho: khyad' yu: ra" Asang ngad: ra". 24 Airumung: Phung: wa Khristu eib khang" ru kham: yu: ru we' dakhyo:- yham sang myhi" qere: yao: bam: yham sang pho" qeyang eib khang" rure bin sho' kham: yu ca" ra". 25 Yham sang pho" qe we"- Khristu wa ai: Phung: re jhid'de; mung: ai: Phung" qhid' mae" yao" kaoso' re byid' pye' ru we' dakhyo:- naonhaung" yham sang myhi" qere jhid'de; ge,. 26 Khristu yao" kaoso' re byid' pye' ru wa ai: Phung: re qid mae bin: cid' san: pye' lao"- yao" mungdao" yang Mao"So re qhaug' byid: mung:- 27 ai: Phung: wa gyang" san: ru we' pe" maqo: ru- abe, alhau: pe" khu madung- anyhaung ajhoe' mabo- majab byang" ru pe" mabo lo:- yaung" lho" ru we' Khristu yao: re qhaug' byid: nae" qhid' mae" ngad: ra". 28 Yauggai qe wa yao: bam yao" gaung re yao: bam jhid'de; ru we' dakhyo- yao: bam: yham sang myhi" qere jhid'de; qo: ako". Yham sang myhi" re jhid'de; ra" yaug wa- yao: yao" gaung re jhid'de; ra" yaug ngad: ra". 29 (Khag' re: yao: yao" gaung re nghang" ra" yaug mana ngad: ra". Nghang: nae" atha"- Khristu wa ai: Phung: re zo:ve: yang khau mung: gun caung: ru we' dakhyo:- aiyaug wa yao" gaung re zo:ve: yang khau mung: gun caung: ra". 30 Pe"mung:ga"re ngonhaung" wa Khristu nho: gaung khyao mae" gaung dau jham ngad: ra".) 31 Jham: Mugsug' mae ce: khyo mathao mae yauggai wa yao: pho" we' yao: myhi" re to: co' yang:- yao: yao" yham sang myhi" we' yezam" khug mung: yao: shid' zo: wa- dagaung dasho: za: boe" byaug: li" genae"- ga: ta" ra". 32 Ce: Jham: dao: mae gyai no; thao" ra" dang man" ra" khyo re qhu" byid' ru ngad mung:- Khristu we' Phung: re qang yang:- ta" ru ngad: ra" khyo" ngo ba: gyo" ra". 33 Ngadqere: naonhaung" yaug khao: ngo" rere: qang yang: ta" ru ngad: ra". Yham sang pho" yaug khao: ngo" wa- yao" yham sang myhi" re yao: yao" gaung re we' dakhyo:- jhid'de; ca" ra". Amung: yham sang myhi" yaug khao: ngo" wa yao: yao" yham sang pho" re phug' myao: ca" ra". 1 Zo: dau qe we"- Naonhaung" nho: myhi" pho" qe: mho dao: re tae" gyo: ge,. Pe"mung:ga"re airu wa Khristan: Phung: byu qe zaui: ang: ra" mau" zo" ngad: ra". 2 Nao- na: qo" na: dai mung:- ai: mung"dan: mae kao qhang sho' qo" na nae" qhid' mae" ni" myhi" we' ni" pho" tao re phug' myao: wa,- 3 ga" ra" amyin" dao: wa- sao qhid' mae" dao: thang" bo: ra" amyin" dao: ngad: ra". 4 Myhi" pho" qe we"- Naonhaung" nho: zo: dau qere nhag' dazai" yho: ge,- Ai: atha" yao: bam re Khristan: tarha" we' dakhyo:- mho" shid' mho" peim: byid: mung:- khau: qhi: ge,- 5 Jeim qe we"- Khristu nho: mho dao: re tae" gyo" ru we' dakhyo:- gyaug: nin" zo" re" nhag' lam: dapyae za: vin mung:- naonhaung" asang qe: mho dao: re tae" gyo: ge,. 6 Asang qe qu" na ko" au: yao: bam o ngaui nae" khyo" za: makad' lo:- Khristu nho: jeim qe ngad: ru we' dakhyo:- Mao"So o ngaui: ra" khyo" naonhaung" aung khug nhag' lam: alhab' we' caung da" byid: ge,. 7 Byu re caung da" byid' ra" khyo" za: mangad:- Asang re caung da" byid' ra" khyo"- naonhaung" mau" zo" re bau: bau: za: vin vo; ge,- 8 Asang wa jeim re ngadqere:- jeim mangad: yaug re ngadqere:- yaug khao: ngo" re yao: zaui: so" ra" gai: ra" mau" zo" qhid' mae" jhaung qhu" byid: nae" ngad: rure myid: beim: ge,- 9 Asang qe we"- Naonhaung" re: ai we' dakhyo:- naonhaung" jeim qere zam" khug ge,- kyaug' nhin" ra" dao: re thang: pye' ge,- Naonhaung" we' naonhaung" jeim qe wa mug:gaung dao mae Asang dayaug za: ngad mung:- ai: Asang wa yaug khao: ngo" re mai qhi" yang: dao: kho' ra" yaug ngad: rure naonhaung" myid: beim: ge,. 10 Asang we' dadang: dalam: za: doe, mung:- yao" qam: bo: thao" ra" qam: so' khyo" yang naonhaung" qam: bo: jo, genae" qhid' mae" dao: pin" khyo" ngo ta" nug: ra". 11 Yui: yang mhug' pyag' ra" makhyang" ra" pha,jhi" khyug' rure naonhaung" qo" thaug' kham" pye' genae" qhid' mae" Mao"So byid' ra" gyekhin alhab' re yu: ve; ci ge,. 12 Pe"mung:ga"re naonhaung" wa xao su byu qe we' gye jho" khe' na: ru mangad:- mug:gaung mae" makhyang" ra" byo jham we' re:- zug: qe we' re: kheim: so' qo" ra" mo, we' re:- ce: mug: cad' myid gaung re eib: ra" mo, we' re:- gye jho" khe' na: ru ngad: ra". 13 Airumung:- Mao"So: gyekhin re yu: ve, ge,- makhyang" ra" ba na joe" lo lao"- naonhaung" wa gyevo qere qo" thaug' kham" pye' li" genae". Gye bin: khe' aung: pye' thao rere:- naonhaung" wa tang za: qo" ye; jo; li" genae". 14 Amung: naonhaung" phyid' dam: mae dangman" ru ga" ra" phyid' cui: re tang za: cui" ci mung:- dinman" ru ga" ra" qao nghoe' re nghoe' ci yang:- 15 ngaui pyo: yaug yo: runho: Lau Dao: Gai re kho" kyo: nae" jin" jin" ngad: ra" khyid zhaung: re zhaung" ci ge,. 16 Lam khug: ru ga" ra" go re khonhae" re: zaui" ci ge,- Naonhaung" wa ai: go: yang makhyang" ra" yaug ngad: ra" yui: yang bag: ke' ra" myishae de; ra" myo: jham alhab' re qo" se' pye' li" genae". 17 Khyad' yu: rure khae: yu: ru ga" ra" jo,to' maug re zhaung: mung:- Byo: yang byid' ra" Mao"So: mungdao: ga" ra" shae pyang: re yu: vin: ci ge,- 18 Mao"So: yang bao" thaug' byid' rure qo" kham: yu genae" qhid' mae" khonhae" re: akyu" mho' na ge,- Byo: yang khyoqhid' au: she: ru we' dakhyo:- yo, gin khao: ngo" mae akyu" mho' ge,- beim: so: lha" na mung:- qam: dashan ge,- Mao"So: byu qe alhab' qhid' mae" khonhae" re: akyu" bao" mho' byid' na ge,- 19 Ngo mungdao: kho" kyo" ra" au: re- Mao"So wa ngore mungdao: byid: nae" qhid' mae" we' ngo wa Ngaui Bau" Lau Dao" nho: no; thao" ra" lajheim: re mazag mavae qo" pheim: kyo: byid: nae" qhid' mae"- nga" qhid' mae" re: akyu" bao" mho' byid: gela,. 20 Ngo wa ana" thaung: laung" jo, ngadqere:- ce: Ngaui Bau" Lau Dao: mathao mae ngo wa lagyo: dayaug ngad: ra". Ngo wa ai: Ngaui Bau" Lau Dao: khyo re kho" kyo: ang: ru we' dakhyo:- vae" vae" za: kho" kyo: nae" qhid' mae" akyu" bao" mho' byid: gela,. 21 Ngo khoru: ngad: na: rure naonhaung" qo" ba: yu geshao:- ai: Asang: mau" vin rumae vin tang: kyid yaug ngad: ra" ngonhaung" jhid'de; ra" mao:nhaung: pho" Tukhiku wa- naonhaung" re nga" khyo alhab' jab jab za: li" ta" kyo" li" nae". 22 Aimung:- ngonhaung" alhab' mo; khyo re naonhaung" re ta" kyo: nae" qhid' mae" we' naonhaung" re qam: byid: nae" qhid' mae" ngo wa yao: re naonhaung" jhao" nhao: ke' ru ngad: ra". 23 Pho" Mao"So we' Asang Yesu Khristu wa Khristan: Phung: byu qe alhab' mo, re- ngaui pyo: yaug yo: ru- jhid'de; ru we' lam khug: ru shaman" byid: vashao:- 24 Mao"So: nhag' myan" ra" jeju wa khonhae" re: mabyo, maqeim: ra" jhid'de; myid we' Asang Yesu Khristu re jhid'de; na ko" ra" mo; dao mae jo, jo, vashao: wo".
|