Colossians
Kolose1 Mao"So myid o: ra" khyo" yang Yesu nho: lagyo: ngo Polu we' ngonhaung" mao:nhaung: pho" Timothi wa- 2 Khristu we' dadang: dalam: za: doe; rumae kyid: ra" ngonhaung" mao:nhaung: qe ngad ko" ra" Kolose vogaung: mae" Mao"So: byu qere mugsug' tung" ke' ra". Ngonhaung" nho: pho" Mao"So wa nhag' myan" ra" jeju we' ngaui pyo: yaug yo: ru naonhaung" re shaman" byid: vashao: wo". 3 Ngonhaung" wa naonhaung" qhid' mae" akyu" bao" mho' byid: khao: ngo" khonhae" re: ngonhaung" Asang Khristu nho: yao: pho"- Mao"So re jeju caung:khin" byid' ra". 4 Pe"mung:ga"re Khristu Yesu re naonhaung" lam khug myid bo ko" rure we' Mao"So: byu qere naonhaung" jhid'de; ko" ra" khyo re ngonhaung" the' gyo" bam va". 5 Dangman" ra" mungdao: ngad: ra" Lau Dao: Gai naonhaung" jhao" sao qhid' joe" li" au:- ai: yang byid' ra" myid: lao" khyo re naonhaung" the' gyo" yu: avako". Airumung: naonhaung" lam khug: myid we' jhid'de; myid wa mug:gaung dao mae naonhaung" qhid' mae" shaung: to: byid' ra" naonhaung" myid: lao" khyo mae apan zaug: jo; ra". 6 Mao"So: nhag' myan" ra" jeju khyo re naonhaung" the' gyo" yu ko" ra" ba na mae" aire jhaug' za: ba: kham zo" yu gemung:- ai: Lau Dao: Gai wa naonhaung" mae byo: sin" lo" ru we' dakhyo:- ngaui bau" Lau Dao: Gai wa shaman" jeju byid: yang: mug:myid jao: sho' byo: sin: lo" ra". 7 Naonhaung" wa Mao"So: nhag' myan" ra" khyo re naonhaung" jhid'de; ra" daui daui cao: ngad mung:- ngonhaung" gaung tha" jhaug' zaug za: Khristu mau" zo" re vin vo; yaug ngad: ra" Epaphra mae" zhao: yu: ru ngad: ako". 8 Byo: yang naonhaung" re byid' to" ra" jhid'de; myid khyo re yao: wa ngonhaung" re ta" kyo" ra". 9 Ce: khyo mathao mae ngonhaung" wa naonhaung" khyo re the' gyo: mae" khonhae" re: naonhaung" qhid' mae" akyu" bao" mho' byid' ra". Yao: bam: yang byid' ra" nyan: pha,jhi" alhab' we' laba lajhao we' daga" yao: myid o: rure ba jhao: ra" laba lajhao wa naonhaung" re pyang" byid: vashao:- ngonhaung" wa Mao"So re mho' ra". 10 Airulao" naonhaung" wa Asang o: ru we' dakhyo: kaoso' daui mung:- khonhae" re: yao: re ngaui nhao: ra" mau" zo" re qo" zaui: so" li" genae". Naonhaung" kaoso' daui: ru wa gai: ru aja: ja: re qo" zaui" thug' ke' mung:- Mao"So re ba: jhao" ra" laba lajhao khug mae qi" qhang: li" li" genae". 11 Naonhaung" wa ja: khao: ngo" re nhag' lam: qhang qhang za: qo" zang: qhao" geshao:- yao" phungbao qi" qhang: ra" qam: so' alhab' yang qam: bo nhao vashao:- amung: mug: bo" mung"dan: khug mae yao" byu qe: qhid' mae" Mao"So jhaung qhu" to: byid' ra" naonhaung" gae bam re qo" khae: yu nae" man: qi" ra" mo, boe" nhao: ra" Pho" re ngaui bau: ngaui yao we' jeju caung:khin" byid: geshao. 13 Yao: wa mug: cad' nho: qam: so' khug mae" naonhaung" re khyad' yu mung:- yao" jhid'de; ra" yao: zo" nho: mung"dan: khug khyo gug: gug: za: jhui" vao ye" ava". 14 Ai: yao: zo: khyo" yang ngonhaung" wa loe; beim qhug' ra". Airu wa ngonhaung" qobo jham re khyad' pye' byid' ru ngad: ra". 15 Khristu wa myo; yang magai: myao: ra" Mao"So: gaung khyao we' dau: ra" myo; yang gai: myao: ra" khyao dau ngad: ra". Yao: wa zoqhid' ngad mung: phan" to" ra" ja: alhab' tho' mae qi" qhang: thao" ra" yaug ngad: ra". 16 Pe"mung:ga"re Mao"So wa yao: zo: khyo" yang mug:gaung we' myidgaung jo; ra" gu: alhab' we' myo; yang gai: myao: ru we' myo; yang magai: myao: ra" ja: alhab' Byo qam: so' jham- Asang zug: we' kheim: so' qo" mo, rere: bophan" to" ra". Mao"So wa mug: kin myid kin alhab' geim" re yao: zo: khyo" yang phan" to: mung: yao: zo" qhid' mae" phan" to" ra". 17 Khristu wa ja: cao jab majo, shimae" na: jo, yaug ngad: ra". Ja: cao jab wa Khristu we' dadang: dalam: za: doe; jo, mung:- yao: bam we' dau ga" ra" jo, qo qo" avako". 18 Khristu wa yao" gaung khyao ngad: ra" ai: phung" nho: au: ngad: ra". Yao: wa zoqhid' ngad mung: yao: dayaug za: cao jab alhab' au: dao mae qo" na nae" qhid' mae" shid: rumae" dam: daui: to" li" nhao: ru qhug' ra". 19 Pe"mung:ga"re Mao"So yao: yao: myid: phyid' ru khyo" yang- yao: zo: wa Mao"So: ve, yaug: byang" sho' kham: yu: to" ra". 20 Airumung: Mao"So wa yao: zo: khyo" yang mug: kin we' myid kin alhab' geim" re yao: we' dam: jho" nyang: lo nhao nae" qhid' mae" myid: phyid' ra". Mao"So wa yao" yao: zo: pyao: zang dao mae shid kham: ra" khyo" yang mang: dae mau" kad' mung:- myidgaung we' aimae jo; ra" gu: alhab' re yao: we' dam: jho" nyang nhao: ra". 21 Lai: lo" va" ayo, mae naonhaung" wa Mao"So mae" va" na: ra" mo, ngad: lo ko" ru we' makhyang" ra" myid lo,mau" re kad' cao" geyang: naonhaung" wa Mao"So: gyevo qe boe" qu" avako". 22 Ngadqere: ana" Mao"So wa yao: zo" nho: gaung khyao shid: kham byid' ra" khyo" yang naonhaung" re yao" ba nam kad' yu: ava". Naonhaung" re gyang" lho" yaung" shab: ru we' yug: no made, lo: yao" qhid' kheim: khyo qo" vao ye: genae" qhid' mae" airu: kad' ru ngad: ra". 23 Naonhaung" wa gang" tang: ra" aqao: apan mae xo' yang: tang za: ye; jo, qo: ako". Naonhaung" wa ai: Ngaui Bau: Lau Dao: Gai re the' gyo" yu ko" au:- qo" yu ko" ra" ai: myid: lao" ru khyo mae" naonhaung" yao" myid re dalaui: nhao ge,- ngo Polu wa mug:myid byu yaug khao: ngo" re bin: kho" kyo: byid: va" ra" Lau Dao: Gai ceru: nho: daui daui yaug boe" lo: ra". 24 Ana" ngo wa naonhaung" qhid' mae" ngo qug: khai: kham zo" ruyang ngaui bau" ra". Yao" gaung khyao ngad: ra" phung" nho: gaung tha" qug: khai: kham zo: nae" dang: jo, shi" ra" Khristu nho: qug: khai: kham zo" rure nga" gaung khyao mae qug: khai: kham zo" ra" khyo" yang bobao" pin" byid' na: ru ngad: ra". 25 Naonhaung" akyu" qhid' mae ce: mau" zo" re zaui so: nae" qhid' mae" Mao"So: yang daui daui byid: yaug khyo" yang ngore san: to: byid' ra". Nao re byid' to" ra" mau" zo" wa yao" mungdao: re bin sho' ta" hau" kyo: nae" ru ngad: ra". 26 Yao: wa ai: no; thao" ra" mungdao: re lai: lo: ra" pyad gu: mae byu alhab' mo, re maba nhao lo: nyham" to" lo ngadqere: ana" wa yao" byu qere ai: mungdao: qhu" byid' ava". 27 Mao"So myid: yaung: to" ra" khyo wa byu alhab' mo, qhid' mae" jaung: to" ra" magan: mago" ru we' phungbao bo: ra" no; thao" ra" mungdao: khyo re yao" byu qere qhu" byid: nae" qhid' mae" ngad: ra". Ai: no; thao" ra" mungdao: wa naonhaung" khug mae Khristu na: jo; ga" ru ngad: ra". Aimung: naonhaung" wa Mao"So: phungbao mae qo" bokham: yu genae"- ga" ru ngad: ra". 28 Airumung: ngonhaung" wa byu yaug khao: ngo" re Khristu nho: khyo kho" kyo: byid' ra". Yaug khao: ngo" re Khristu mae zoqao" khyo" Mao"So: qhid' kheim: khyo qo" jhui" vao ye: nae" qhid' mae" nyan: pha,jhi" bo: ra" gu: alhab' we' yao: bam re ta" peim: ta" kyang: yang: yao: bam re mho" shid' byid' ra". 29 Ce: mau" zo" re qam: ke' yang: qo" zaui: so" ru wa Khristu yang byid' ra" qi" qhang: ra" qam: so' yang ngad: ra". Ai: qam: so' wa ngo mae bo: jo, mung: mau" zaui" na: ra". 1 Ngo wa naonhaung" qhid' mae" re:- Ladoki vobyu qe: qhid' mae" we' ngore mamyao maba: ra" gatau alhab' mo; qhid' mae" re: khoqhi" sho' qam: ke' yang: mau" zaui" lo: rure naonhaung" re ngo ta" kyo: geli". 2 Ngo ceru: kad' ru wa yao: bam qam: zaug qam: qo" mung: jhid'de; myid mae yao: cao: nhag' jho" de; jo, genae" qhid' mae" ngad: ra". Alao" yao: bam wa dangman" ra" laba lajhao mae" thug' li" ra" lam ga" ru jab byang" sho' qo" yu: li" genae". Cekhyo" yang Mao"So: no; thao" ru ngad: ra" Khristu re yao:- yao: bam ba: li" genae". 3 Khristu wa Mao"So: nyham" to" ra" jo,nho" ngad: ra" pha,jhi" we' laba lajhao alhab' re phung" nae" ra" kham: thug' ngad: ra". 4 Airumung: ngo naonhaung" re ta" kyo: geli"- Khonho" jo nhohab ngad: ra" mhug' pyag' ra" dao: jham: yang khag' yang re: naonhaung" re damhug' pyag' nhao ge,- 5 Pe"mung:ga"re ngo wa gaung dau: khyo" naonhaung" we' mana ngadqere: myid mae wa naonhaung" we' daga" na: ra". Naonhaung" wa Khristu mae naonhaung" lam khug: rumae dadang: dalam: za: doe, yang: tang za: ye; jo, ko" rure ngo myao yang: ngaui bau" ra". 6 Naonhaung" Khristu Yesu re Asang khyo" khae: yu vako" ruyang yao: we' dadang: dalam: za: kaoso' daui ge, 7 naonhaung" wa mho" shid' byid: qhug' vako" ru we' dakhyo: Asang: khug mae agyi: no, sho' cin" mung: yao" dao mae yao: yao" kaoso' daui khyo re zao: to' yang: naonhaung" lam khug: myid re je yang: qam: bo: li" nhao ge,- jeju beim: so" ra" myid byang" jo, nhao ge,. 8 Airumung: Khristu mae" mangad: lao"- byu: yang xo' mho" gyo" lo: ra" thung" li mae" we' mug: kin re eib: ra" byo jham mae" re:- joe" li" ra" aphug' made; ra" xao su byu: nho: pha,jhi" khyo" yang naonhaung" re khag' yang re:- jeim matoe' nae" rure lha" yang: na ge,- 9 pe"mung: ga" re Khristu nho: xao su gaung khyao kaoso' daui: rumae Mao"So: ve, khyao byang" sho' bo: jo; ra". 10 Naonhaung" wa yao: we' dadang: dalam: za: doe, mung: jab byang" ra" kaoso' daui khyo re qo" yu: avako". Yao: wa byo agyi zug: we' kheim: so' qo" mo, alhab' dao mae eib: ra" yaug ngad: ra". 11 Naonhaung" wa Khristu we' dadang: dalam: za: doe, yang: au: qid lhai" khyo re kham: yu: lai: lo: ako". Aiwa byu: yang byid' ra" au: qid lhai: khyo mangad: lo:- ce: qobo kad' kao bau: ra" qam: so' mae" loe; beim nhao: ru ngad: ra" Khristu yang byid' ra" au: qid lhai: khyo re kham: yu: ako". 12 Pe"mung:ga"re naonhaung" qid nyhab' kham: yu ko" au: naonhaung" wa Khristu we' daga" nyhab' shaung: pye' qhug' ako". Amung: shid: rumae" Khristu re daui: to" li" nhao: ra" Mao"So: qam: so' mau" re naonhaung" lam khug ko" ra" khyo" yang naonhaung" re qid nyhab' kham: yu: ra" khyo" Khristu we' daga" daui: to" li" nhao: ru qhug' avako". 13 Naonhaung" wa qhid' phyao: lai: lo: ra" ayo, mae naonhaung" qobo jham: mathao mae we' kham" to" ra" tarha" maqo" ra" Taung bug byu qe ngad ko" ruyang byo we' sin: yang: ashid qe ngad: lo: ako". Ngadqere: Mao"So wa naonhaung" re ana" Khristu we' daga" kaoso' daui: li" nhao: ava". Ngonhaung" qobo jham alhab' re Mao"So wa khyad' pye' byid: mung:- 14 yao: wa ngonhaung" re qobo xam" to" ra" jhin japhin: rere: ai we' sin" ra" thung" tarha" rere: pyao: zang dao mae ze,jin" yang: be; jin" ru qhug' mung: alhab' re bin sho' sad' pye' ava". 15 Ai: pyao: zang dao mae Khristu wa Byo we' sin: yang: eib: ra" zug: qe we' kheim: so' qo" ra" mo; qam:so' re qab: pye' byid: mung:- yao" aung doe; poe jin: yan" qin" rumae kyam: byu qekhyo" yao: bam re jhui" qin" yang: mo, byu qere qhu" byid' ra". 16 Airumung: zo: shaug' we' poe ba na jham mangad: lao"- lho" xin: ba na mangad: lao"- Dugno: Ba we' sin: yang: naonhaung" qhid' mae" khag' rere: thung" tarha" dakad' nhao ge,. 17 Airu" ra" ja: jham wa joe" lo nae" ayo, mae" qab bao za: angad: ra". Gaigai: yao: ngad: ra" khyo ajhaung wa Khristu ngad: ra". 18 Nhag' lam: re shad' ra" khyo" deim" cam" nae" qhid' mae" we' mug: lagyo: jham re caung:pa" ra" khyo cao" ca" ga: ta" mung:- gakai: lai mung: ra" ve, lho jham re the' myao yang:- yao: yao" gaung re myhao: thao" ra" khyo" ta" yu: ra" mo; yang naonhaung" re dao: daphyid' nhao ge,- airu" ra" yaug wa yao: yao" xao su byu khyo" za: myid: ruyang aje mae nhag' lam: myid myo" na: ra". 19 Yao: wa gaung khyao: nho: au: ngad: ra" Khristu re mazaui" ci ngad: ra". Akhyao axag' jham we' shoqug: shoqe jham: yang jho" xo' de; jo; ra" gaung khyao geim" wa au: ngad: ra" Khristu khyo" yang zo:ve khau byid: mung:- Mao"So o ngaui: ru we' dakhyo: qi" qhang: li" ra". 20 Naonhaung" wa Khristu we' daga" shid gemung: mug:kin re eib: ra" byo jham: lo, mae" lhoe' ke' qhug' va" mo, ngad: ako". Aire naonhaung" wa pe"mung: ce: mug:myid we' sin" ra" mo, we' dakhyo: kaoso' daui ko" i? 21 Pe"mung:yang: ceru re dazaui: wa,- airu re datau" qu"- aijham re datin: wa,- ga" ra" tarha" jham re phug' cao" na ko" i? 22 Ai: thung" Tarha" jham alhab' wa dalhang ci thao re magai: ci: byaug: ra" zai jham we' sin" ra" khyo jham ngad: ra". Ai: Tarha" jham wa byu: yang kad' to" ra" thung" Tarha" jham we' mho" shid' khyo jham za: angad: ra". 23 Ai: thung" Tarha" kad' thug' ke' ra" mo, wa mug: lagyo: qere caung:pa" ca"- ga: maqad maqui" ta" ra" mo,- nhag' lam: re shad' ra" khyo" deim " cam"- mhug' ra" khyo cao" ra" mo,- yao: yao" gaung dau: re dae xo sho' yhin" yu: ra" mo, ngad mung:- pha,jhi" re apan aqao: to: yang: kad' ru ngad nhohab ngadqere: aijham wa gaung sho: myid kao bau: ra" khyo jham re zaui" tam" nae" rumae pe" aphug' mabo ngad: ra". 1 Naonhaung" wa Khristu we' daga" dam: daui: to" li" nhao: ru qhug' vako" ruyang Khristu wa yao" zaung tao" dao Mao"So: lo, yo shad' mae zaung: jo; ra" jo, qo mug:gaung: mung"dan: mae" zai jham re naonhaung" nhag' nghae" na ge- 2 myidgaung dao mae jo; ra" zai jham re nhag' manghae: lo:- mug:gaung dao mae" zai jham re naonhaung" nhag' nghae" na ge,- 3 pe"mung:ga"re naonhaung" wa shid: byaug va" mo, ngad gemung: naonhaung" kaoso' wa Mao"So: khug mae Khristu we' daga" shaung: to: byid' ra". 4 Naonhaung" nho: kaoso' agyang" wa Khristu ngad mung: yao: na: thug' li" lao"- naonhaung" re: yao: we' daga" za: na: thug' li" yang: yao" phungbao re bokham: yu: li" genae". 5 Airumung: naonhaung" wa gaung sho" nho: gintho' mau" zo" jham- mashab mayaung" ra" lo, mau"- gaung sho: shab' ru- makhyang" ra" lo, mau" kad' nae" kao bau: ru- (so' kho' ru wa solho re caung:pa" ra" akhyao daja: ngad: ra") jham ru" ra" naonhaung" khug mae mau" zaui" na: ra" gaung sho: kao bau myid o: ru jham re se' pye' ca" ako". 6 Airu"ra" khyo jham: mathao mae yao" mho dao: re matae" gyo" ra" mo; dao mae Mao"So: nhag' yo" ru joe" li" li" nae". 7 Qhid' phyao: naonhaung" wa airu" ra" khyo jham: yang naonhaung" kaoso' daui khyo re eib: na: au: airu" ra" gaung sho: kao bau myid o: rure cao" yang: naonhaung" kaoso' daui: lo: ako". 8 Ngadqere: ana" naonhaung" wa nhag' yo: nhag' gyid' ru- su re qu" roe" pyi qho: ru- kheim: co' jhau: ru jham re naonhaung" nhad' mae" khonhae" re: dathug' nhao ge, 9 Yao: cao: dajho" mhug' ge,- pe"mung:ga"re naonhaung" wa magai: ra" ave, we' daga" byu xug' re khyad' pye' mung: byu sag' re ve; yu: avako". 10 Ce: byu sag' naonhaung" re phan" to: yaug Mao"So wa naonhaung" re je: jab byang" sho' ba jhao: li" genae" qhid' mae" yao" gaung khyao we' je: dau sho' asag' dam: byao: yu: ra". 11 Ai: byu sag' boe" rumae Taung bug byu qe we' Yuda byu qe au: qid lhai: khyo re kham: yu: ra" mo, we' aire makham: yu: ra" mo, Taung bug byu qe- byu jam: qe- jeim qe we' jeim mangad: ra" mo; agyo: mae pe" jho" shai" ru majo, lo:ngad: ra". Khristu wa alhab' ngad mung: alhab' mae Khristu ngad: jo; ra". 12 Naonhaung" wa Mao"So: byu qe ngad: ako". Yao: naonhaung" re jhid'de; mung: yao" qhid' mae" khyin: san: yu: to" ra" mo, ngad: ako". Airumung: naonhaung" yao" gaung re su: qhid' mae" jhid'de; sho: bono: ru- nhag' khyag' nhag' lam: nyham: khyo" ru nau" nhae" ru we' nhag' lam: qhang: ru jham re mai bau: we' dakhyo: ve; ci ge,. 13 Naonhaung" yao: cao: qobo jho" vhin nae" de, gelao"- dayaug we' dayaug jho" zang: kham yang: qobo jho" khyad' byid: ge,- Asang naonhaung" re qobo khyad' byid: va" ru we' dakhyo:- naonhaung" yao: cao: qobo jho" khyad' byid: ge,. 14 Airumung: aijham alhab' dao mae alhab' re jab byang" sho' dadang: dalam: za: myag: dang" to" ra" jhid'de; myid re laung" ci ge, 15 pe"mung:ga"re Mao"So wa gaung khyao dalam: khyo za: ai: ngaui pyo: yaug yo: rure qo" khae: yu geshao: ga:- naonhaung" re khai: yu: to" ra". Airumung: jeju caung:khin" ge,- 16 magan: mago" jab byang" ra" Khristu nho: mungdao: re naonhaung" aung khug mae na: jo, nhao ge,- nyan: pha,jhi" alhab' we' yao: cao: jho" mho" shid' mung: jho" ta" kyang" na ge, caung:khin"nghaui"caung: we' gyang" lho" ra" nghaui" thoe jham re nghaui" zo" re" naonhaung" aung khug nhag' lam: mae jeju beim: so" ra" nhag' lam" yang Mao"So re caung:khin" ge,. 17 Airumung: naonhaung" kad' ra" mau" zo" mangad: lao"- jhau: ra" dao: thoe ja: khao: ngo" mae Asang Yesu mang re lao: yang: kad' ge,- yao: khyo" yang Mao"So re jeju caung:khin" ge,. 18 Yham sang myhi" qe we"- naonhaung" yham sang pho" qe eib: ra" qao: mae na ge,- pe"mung:ga"re airu wa Khristan qekhyo" naonhaung" kham: yu ang: ra" khyo ngad: ra". 19 Yham sang pho" qe we"- naonhaung" yham sang myhi" qere jhid'de; mung: yao: bam re ayo: athin dakad' ge,- 20 Zo: dau qe we"- naonhaung" myhi" pho" qe: mho dao: re tae" gyo" ru wa Khristan qe: qo ngad: ra"- pe"mung:ga"re airu wa Mao"So o ngaui: ra" khyo ngad: ra". 21 Myhi" pho" qe we"- naonhaung" zo: dau qere pyi daqho ge,- Mangad: re yao: bam nhag' lam: gyug qam: shan: li" genae". 22 Jeim qe we"- naonhaung" jeim sang qe: dao: re ja: khao: ngo" mae mho dao: gyo: ge,- yao: bam: yang ngaui genae" rure o yang: za: yao: bam qu" na myao: na: au: mho dao: gyo" ru mangad: lo:- Asang re naonhaung" gyaug phug' ra" khyo" nhag' lam: din: din: za: yao: bam: mho dao: re tae" gyo: ge,. 23 Pe" mau" zaui: gengadqere: byu: qhid' mae" zaui: byid' ra" khyo" mangad:- Asang re zaui: byid' ra" khyo" naonhaung" aung khug nhag' lam: alhab' we' qam: zaug thag zaui: so: ge,- 24 Asang wa yao" byu qe: qhid' mae" zam" to" ra" mo, re jhaung qhu" khyo" naonhaung" re byid' li" nae" rure naonhaung" beim: ge,- pe"mung:ga"re Khristu wa naonhaung" caung da" byid' ra" jeim sang agyang" ngad: ra". 25 Makhyang" ra" mau" kad' ra" yaug wa yao: kad' ra" makhyang" ra" mau"zo" aphug' qobo dae re qhug' kham zo" li" nae". Pe"mung:ga"re Mao"So wa khag' rere: myo, nho makhyin lo: dao: kho' ra". 1 Asang qe we"- naonhaung" jeim qere din: vang" Tarha" nyang: ra" khyo" zam" khug: na ge,- naonhaung" re: mug:gaung dao mae Asang qo" mo, ngad ko" rure myid: beim: ge,- 2 Akyu" mho' qam: ke' ge,- Akyu" mho' zo" mae" so: so: za: na mung: Mao"So re jeju caung:khin" na ge,- 3 Khristu nho: no; thao" ra" yao" mungdao: khyo re kho" kyo: nae" agu gai Mao"So ngonhaung" re byid' li" nae" qhid' mae" naonhaung" akyu" mho' au: ngonhaung" qhid' mae" re: akyu" bomho' byid: gela,- ce: mathao mae ngo ana" thaung: laung" jo; ra". 4 Airumung: mungdao: kho" kyo" rumae ngo ta" ang: ru we' dakhyo: sho' sho' de: de: qo" kho" kyo: nae" qhid' mae" akyu" bao" mho' byid: gela,. 5 Naonhaung" qo" yu: ra" agu gai alhab' re gai yo" ra" khyo" ci yhung: mung: malam khug: ra" mo, re pha,jhi" bo bo za: zam" khug: na ge,. 6 Naonhaung" dao: thoe wa khonhae" re: gyo" ngaui taung" ngad mung: gyo: nug dataung" ngad qo: ra". Yaug khao: ngo" re jo jo za: khoru: phaug' tau: nae" rure naonhaung" ba: to: ca" ra". 7 Asang: mau" mae jhaug' zaug yaug we' ngonhaung" mau" vin cao: ngad: ra" ngonhaung" jhid'de; ra" mao:nhaung: pho" Tukhiku wa ngo we' sin" ra" lau dao: alhab' re ta" kyo: byid' li" nae". 8 Ngonhaung" khoru: boe" na: ra" khyo re naonhaung" re lau dao: ta" kyo: yang: naonhaung" re ngaui bau: nhao nae" qhid' mae" ngo wa yao: re naonhaung" jhao" nhao: ke' ra". 9 Aimung: naonhaung" byu ngad: ra" naonhaung" jhid'de; ru we' jhaug' zaug: ra" mao:nhaung: pho" Onesimu re: yao: we' bocao: lo: li" nae". Yao: shid' zo: wa cetau mae boe" na: ra" khyo ja: khao: ngo" naonhaung" re li" ta" kyo" li" genae". 10 Ngo we' daga" thaung: laung" cao: Aristaku wa naonhaung" re au" ke' ra". Amung: Barnaba yao: ug Marku re:- naonhaung" re au" ke' ra". (Marku naonhaung" jhao" joe" li" re yao: re bang" lham: tug: yu nae" pyang: ke' ra" dao: re naonhaung" the' yu: to: gau ngad: ako".) 11 Yustu ga: re: mhang" ra" Yoshu re:- naonhaung" re au" ke' ra". Yuda thung" mae" phaug' lo ko" ra" Khristan qemae" Mao"So: qhid' mae" ngo we'daga" mau" zaui" na mo, wa ce sam yaug za: ngad: ako". Yao: bam wa ngore myo: sho' bao" thaug' lo mo, ngad: ako". 12 Aimae" naonhaung" phung: byu ngad mung: Khristu Yesu nho: daui daui yaug ngad: ra" Epaphra re: naonhaung" re au" ke' ra". Yao: wa naonhaung" qhid' mae" qam: zaug thag akyu" bao" mho' byid' na: ra". Naonhaung" wa Mao"So myid: o: ra" khyo mae re:- jab byang" sho' mho dao: gyo: mung: lam khug: myid gang" tang: ru we' zoqao" khyo" tang za: qo" ye; jo, genae" qhid' mae" naonhaung" qhid' mae" Mao"So re akyu: bao" mho' byid' ra". 13 Yao: wa naonhaung" qhid' mae" re:- Ladoki vogaung: we' Herapoli byu qe: qhid' mae" re:- gyai qam: ke' yang: mau" zaui" lo yaug ngad: ra" khyo re ngo yao: sagse: qo" kham: ra". 14 Ngonhaung" gyai jhid'de; ra" mocid' sara Luka we' Dema shid' zo: re:- naonhaung" re au" ke' ako". 15 Ladoki vogaung: mae" lam khug: ra" mao:nhaung: qere we' Numpha we' yao" yham mae ham: phaung yang: caung:pa" na ko" ra" phung: byu qere ngonhaung" au" ke' ra" khyo re kai" yang: ta" kyo: byid: gela,. 16 Ce: vhin tung" re naonhaung" bin: nghe' gelao" Ladoki phung: byu qere re:- nghe' nhao ge,- Ladoki phung: byu mao:nhaung: qe: lo, khyo" kai" vhin: ke' geli" nae" ra" vhin tung" rere: naonhaung" nghe' ge,- 17 yao: re byid' to" ra" Asang: mau" zo" re bin kyab' sho' zaui: wa,- ga" ein:- Arkhipu re ta" ge,. 18 Ce: vhin tung" re nga" lo; yang yao: tung" ru ngad:- tung" yaug Polu. Ngo thaung: laung" jo; rure dato" myhid' ge,- Mao"So: nhag' myan" ra" jeju wa naonhaung" we' daga" ngad: jo, vashao: wo".
|