Acts
Lagyo1 Phug' myao" ra" Theophilu we"- Yesu wa yao" mau" zo" re zaui" qhid: ra" ba na mae" yao: re mug:gaung khyo to' yu: ru qhug' ra" ba na joe" sho' Yesu zaui: so" lo: ru we' mho" shid' lo: ra" khyo alhab' re nga" tung" paug' sao qhid' paug' mae botung" to: va". 2 Yesu wa mug:gaung khyo to' yu: ru maqhug' shimae" yao" lagyo: qe ga:- yao: khyin: yu: to" ra" mo, re yao: wa Gyang" Lho" Byo: qam: so' khyo" yang pin dao: jham byid: co' ra". 3 Yao: shid kham thao byid xe ba gyo: mae yao: wa myo: sho' lhang lagyo: qejhao" yena: qhu" mung:- yao: daui: na: ra" khyo re lam ga" ra" sagse: jham qhu" byid' ra". Lagyo: qe wa Yesu re the' myao mung:- Yesu wa yao: bam re Mao"So: mung"dan: khyo re ta" kyo" ra". 4 Yao: bam zang" ham: na ko" au:- Yesu wa lagyo: qere- Yerusalem vogaung: mae" dathug' lo" ge,- naonhaung" re ta" kyo" to: gau ngad: ra" nga" Pho" dao:so: byid' to" ra" jhaung qhu" re lao" na ge,. 5 Yohan wa qid: yang qid nyhab' byid' ra"- ngadqere: khonho" ba mangad: re naonhaung" wa Gyang" Lho" Byo: yang qid nyhab' byid' rure qhug' li" genae"- ga: amyin" byid' ra". 6 Lagyo: qe wa Yesu we' daga" zang" ham: na ko" au:- yao: bam wa Yesu re Asang we"- Israel byu qere ai: mung"dan: ce: akhyin: mae nao dam: te: byid: nae" i? ga: myid' ako". 7 Yesu wa yao: bam re- Nga" Pho" yao" kheim: so' khyo" yang mhai" so" to" ra" ba na we' yo, khyin: khonhae" ngad: rure naonhaung" ba maqo ngad: ra". 8 Ngadqere: naonhaung" dao mae Gyang" Lho" Byo joe" li" lao"- naonhaung" wa qam: so' byang" lo: li" genae". Amung: naonhaung" wa Yerusalem vogaung:- Yuda mung" geim"- Samari mung" we' myid gaung thao" sho' mae nga" khyo re sagse: kham byid: mo, ngad: li" genae"- ga: ta" ra". 9 Ceru: bin: ta" thao lagyo: qe qu" na: reyao:- Yesu wa mug:gaung khyo to' yu: ru qhug' ra". Ai: thao yao: bam: myo,jao: mae" jham thaui: wa yao: re nghoe' cilo" ra". 10 Lagyo: qe wa Yesu do, lo" na: au:- mug:gaung khyo zhaug' qu" na shiko" au: re mai bau: phyu ve; ra" byu shid' yaug nyag din taung" yao: bam: nhae mae li" ye; ke' gemung:- 11 Galile byu qe we"- naonhaung" ai:tau mae pe"mung: mug:gaung khyo qu" ye; jo; bam ko" i? Naonhaung" mae" mug:gaung khyo to' yu: ru qhug' ra" Yesu wa- naonhaung" myao: na: au: mug:gaung khyo do, lo" ru we' dakhyo:- airu: dam: joe" gyo" li" nae" ngad: ra"- ga: ta" ako". 12 Ai: thao re lagyo: qe wa Yerusalem we' khyoman: agaung: daqi" ko za: jho" va" ra" Zhan:lun: bam mae" Yerusalem khyo dam: phao: lo" ako". 13 Yao: bam wa vomo" khug khyo vao lo" mung:- Yao: bam thang: na: ra" yham- tho' pyae: qe, khyo do, lo" ako". Yao: bam wa Petru- Yaku- Andre- Philib- Thoma- Batholame- Mathe- Alphaeu yao: zo: Yaku- byumyu" jhid' myid qi" ra" Simon we' Yaku yao: zo: Yuda bam ngad: ako". 14 Yao: bam wa Yesu yao: myhi" Mari we' gatau myiqe: qe we' re:- Yesu yao: nhaung: bam we' re:- dazab makyo ham: phaung mung:- akyu" mho' yang: na: ako". 15 Ai: thao mataung" myao" re lam khug: ra" mo, dayo: shid' xe zo: ko zang" ham: na: bam: ako". Ailao" Petru wa to" ye, mung:- 16 Nga" mao:nhaung: qe we"- Yesu re taung" ra" mo, re khyo jhui" ra" yaug Yuda we' sin: yang: Gyang" Lho" Byo wa Davi nhad' dao: thoe khyo" ta" to" ra" jham: dao: jab byang" li" nae" ngad: ra". 17 Pe"mung:ga"re Yuda wa ngonhaung" we' daga" mau" zaui: nae" khyin: yu: to" ra" yaug ngad yang: yao: wa ngonhaung" phung: mae bobo: ra" yaug ngad: ra". 18 (Yao: wa makhyang" ra" lo,mau" khyo" yang the' ra" ngaui: yang yo myid dakhyao: vai: yu mung: ai: yo myid mae atug' khyo" byid: gyo" shid: ra". Yao" vae: dug: baug: go; lo" mung:- au jham alhab' baug: thug' lo" byaug: ra". 19 Yerusalem vogaung: mae na: ra" mo, alhab' wa ai: khyo re the' gyo" ako". Airumung: yao: bam wa ai: yo myid cug' re yao: bam yao" myan" khyo" Akeladama ga: mhang" ako". Akeladama ga" ru wa- Sa: Mug: Myid ga" ru ngad: ra".) 20 Pe"mung:ga"re Caung:khin" paug' mae- Yao" yham wa cae: jhug tag boe" mung: aimae khag' re: mana vageshao:- ga: re:- yao" aya: rere: gatau dayaug yu: pye' vashao:- ga: re: tung" to" ra". 21 Aimung: Asang Yesu wa shid: ru mae" dam: daui: to" li" ra" khyo re ngonhaung" we' daga" sagse: kham nae" byu gatau dayaug ngonhaung" qo: ra". Ai: yaug wa Yohan Qid nyhab' kham byid: mung:- mungdao: kho" qhid: ra" ba na mae" ngonhaung" qhid' kheim: mae" Yesu mug:gaung khyo to' yu: ru qhug'ra" ba na joe" sho' Asang Yesu ngonhaung" we' daga" su" qin" du" qin" na: qin" rumae yo, byang" bobo: ra" yaug ngad ca" ra". 23 Aimung: yao: bam wa Yustu ga: re: mang zo: qo" mung: Barsaba ga: mang: ra" Yoseb we' Mathia tao mae" dayaug yaug re dam: khyin: yu nae" qhid' mae" dao: vhao" ako". 24 Ai: thao re yao: bam wa- Asang we"- Nao wa yaug khao: ngo" nho: nhag' lam: re ba yaug ngad: ra". Yuda wa yao: we' sin" ra" jo, qo khyo ye" lo" nae" to: co' ra" Yuda khu mae lagyo: dayaug khyo" mau" zo" vin vo; nae" qhid' mae" ce shid' yaug mae" khoyaug lam: re nao khyin: yu va" rure ngonhaung" re qhu" byid: la,- ga: akyu" mho' ako". 26 Alao" yao: bam wa ai shid' yaug mae" khyin: yu nae" pha" ce' khyo" ako". Mathia re pha" ce' ang mung: yao: wa ai: lagyo: daxe: dayaug: phaung mae bobo: ra". 1 Pentikoti ba na joe" lao"- lam khug: ra" mo, alhab' wa dajo,qo mae za: zang" ham: na: bam: ako". 2 La qam" hug' ra" thoe we' dau: ra" thoe dathoe mug:gaung mae" nyag din taung" myang: thug' li" mung: yao: bam na: ra" yham geim" mae ai:thoe byang" jo; ra". 3 Ai: thao yao: bam wa nga" byo: sin" jo; ra" myishae jham we' dau: ra" myishae jham wa yao: bam yaug khao: ngo" au: dao mae de; jo; rure myao: ako". 4 Yao: bam alhab' mo, wa Gyang" Lho" Byo byang" mung: ai: Byo: yang qo" jhau nhao: ru we' dakhyo:- gatau myan" aja: ja: jhau: thug' li" ako". 5 Mug: myid dao mae jo; ra" mung"dan: khao: ngo" mae" joe" li" ko" ra" Mao"So re gyaug phug' ra" Yuda byu qe wa Yerusalem vogaung: mae na: bam: ako". 6 Ceru: myang: ra" thoe re the' gyo: gelao"- mo,byu qe zang" ham: li" ako". Yao: bam yaug khao: ngo" wa lam khug: ra" mo, jhau: na: rure yao:yao" myan" khyo" ba: gyo" yu gemung:- mo, byu qe alhab' mo, din: mug' ako". 7 Yao: bam wa mug' hao" byaug gemung:- Ceru: jhau: na: ra" mo, wa Galile byu qe ngad ko" ra" mangad: i? 8 Aire ngonhaung" alhab' mo, wa yao: bam jhau: rure ngonhaung" yao" myan" khyo" ba: gyo" yu: ru wa khoru: i? 9 Ngonhaung" wa Pathia mung"- Media mung"- Elam mung"- Mesopotamia mung"- Yuda mung"- Kapadokia mung"- Pontu mung"- Asia mung"- 10 Phrugi mung"- Pamphulia mung"- Egutu mung"- Kureni nhae mae" Libya mung" khaung: mae" joe" li" ra" mo, ngad: ra". 11 Amung: ngonhaung" mae" daqhae: wa Roma mae" li" ra" Yuda qe we' Yuda caung:pa" thung" khyo" phaug' lo: ra" Taung Bug Byu qe ngad: ra". Alao" ngonhaung" mae" daqhae: wa Krete we' Arebia mung" mae" mo, ngad: ra". Ngadqere: Mao"So zaui" bin va" ra" mau" zo" jham: khyo gyo" yu: ru wa khoru: laug i? ga: ta" ako". 12 Yao: bam alhab' mo, wa mug' hao" byaug gemung:- Ceru wa pe" ru: ga" ru ngad: ra" i? ga: yao: bam yao: cao: jho" myid' ako". 13 Ngadqere: daqhae: wa ai: lam khug: ra" mo, re- Ai: byu qe wa yhid yid mo, ngad: ako"- ga: qi: jung" pye' ako". 14 Ailao" Petru wa lagyo: daxe: dayaug we' daga" to" ye; jo, mung: thoe to' yang:- Mao:nhaung: Yuda byu qe we' Yerusalem vobyu qe alhab' mo, we"- nga" dao: re tae" gyo" yu ge,- ce: khyo we' sin: yang: naonhaung" re ta" kyo: geli". 15 Ce: byu qe wa naonhaung" jho: ru we' dakhyo:- yhid yid mo, mangad: ko" ngad: ra". Ana" ne, kao gug yo, qug za: shi" angad: ra". 16 Ce: khyo wa Lapa Yoela ta" to" ra" khyo ngad: ra". 17 Yoela wa Mao"So ceru: ta" ra"- Ngo wa lo" thao" ra" ba na mae byu yaug khao: ngo" dao mae nga" Byo vhe' sheim: byid: nae"- naonhaung" yauggai zo: qe wa nga" mung dao: re kho" kyo" li" genae". Naonhaung" nho: zolau: qe wa ve, lho myao: li" genae"- amung: naonhaung" nho: mao: zo: qe wa yab mo, myao: li" genae". 18 Ngad va"- ai: ba na mae nga" daui daui mo,- yauggai myiqe: alhab' mo; dao mae lhao" re:- nga" Byo vhe' sheim: byid: nae". Ailao" yao: bam wa nga" mungdao: re ta" hau" li" genae". 19 Ngo wa mug:gaung tho' mae mug' pho: vhe, lho kad' qhu" mung:- o: myid gye, dao mae mug' pho: mau" zo" kad' qhu" nae". Sa: re:- myi: re: thau: ra" myikhug' thaui: jham re: kad' qhu" nae". 20 Phungbao qi" qhang: ra" Asang: Ba Na majoe" li" shimae" ba wa cad' sham: no; lo" mung:- lho" wa sa: ru: ne: lo" byaug: li" nae". 21 Ailao"- bao" thaug' yu nae" qhid' mae" Asang re mho' yaug khag' ngadqere:- khyad' yu: ru qhug' li" nae"- ga: ta" ra". 22 Israel mao:nhaung: qe we"- ce: dao: re tae" gyo" qu" ge,- Nazared mae" vobyu Yesu wa Mao"So: kheim: so' qo" yaug ngad: rure Mao"So wa Yesu nho: lo, khyo" yang kad' ra" mug' pho: ve,lho jham we' mug'pho: mau" zo" jham khyo" yang sagse: qhu" byid' ava". Ce: khyo jham wa naonhaung" phaung mae boe" lai: lo va" ruyang naonhaung" yao: aire ba: ako". 23 Mao"So wa yao: yaung: to" ru we' dakhyo: Yesu re naonhaung" lo, khyo ab byid' pye' nae" myid: phyid' to: gau ngad: ra". Naonhaung" wa qobo jab qe: lo; yang yao: re pyao: zang mae jin" se' pye' nhao: ako". 24 Ngadqere: Mao"So wa yao: re shid: ra" qam: so' mae" lhoe' ke' byid: mung: shid: ru mae" dam: daui: li" nhao: ra". Pe"mung:ga"re shid: ru wa yao: re zaui" lhaung" ci nae" magai: boe" ngad: ra". 25 Yao" khyo we' sin: yang: Davi wa- Ngo wa Asang re yo, khyin: khao: ngo" nga" qhid' kheim: mae the' myao: na: ra" Yao: wa nga" nhae mae na: jo, yang: ngo wa qug: khai" ru qhug' nae" mangad:- 26 Airumung: nga" aung khug mae ngaui bau" ru byang" jo; ru we' nga" nhad' dao: thoe wa ngaui bau: ngaui yao: ru byang" jo; ra". Ngo wa shid ba: ra" ja: byu ngad sho' ngadqere: myid: lao" mung: nhag' lam: myan myan za: daui: na: li" nae". 27 Pe"mung:ga"re nao wa ngo re shid: ra" movo: mug: mae shapye' to: nae" mangad:. Nao wa kyid: ra" ni" daui daui yaug re lab khug mae bab: jo, nhao nae" mangad: ngad: ra". 28 Nao wa ngo re kao so' daui: ru khyo joe" ye" ra" khyodang ceim" shid' byid' ava". Nao wa ngo we' daga" na: ruyang ngo re ngaui bau: nhao: li" nae"- ga: ta" ra". 29 Nga" mao: nhaung: qe we"- Suhau: qi" ra" ngonhaung" phug' pho" kho:kham Davi khyo re de: de: za: ta" kyo: geli"- Yao: wa shid: byaug mung: yao: re naonhaung" nyhab' shaung: pye' avako". Yao" lab wa ana" ba joe" sho' ce: ngonhaung" qhid' kheim: mae yao: jo; ra". 30 Yao: wa lapa ngad mung:- Mao"So: yang yao: re dao:so: byid' to" rure yao: ba: ra". Mao"So wa Davi kho:kham we' dakhyo:- Kho: kham kad' nae" yao" kaung mae" kho:kham thug' li" nhao nae"- ga: jham tang" to" ra". 31 Davi wa joe" lo nae" ba na mae Mao"So pe" kad' nae" rure ba: to: mung:- Meshia shid: ru mae" dam: daui: to" li" nae" ra" khyo re Davi ta" ru wa- Yao: wa shid: ra" movo: mug: mae shapye' to: maqhug' ngad: ra"- Yao" gaung khyao re lab khug mae mabab: lo" nhao ngad: ra"- ga: ta" ra". 32 Mao"So wa ai: Yesu re yao: daui: to" li" nhao: ava"- amung: ngonhaung" wa ce: khyo we' sin: yang: sagse: qe ngad: ra". 33 Yao: wa Yao: Pho" Mao"So: lo,yo shad' mae zaung: jo, nae" tau: to' ke' ru qhug' mung: yao: pho" yang dao:so: byid' to: va" ru we' dakhyo:- yao: pho" mae" Gyang" Lho" Byo qo" khae: yu: ava". Ana" ngonhaung" myao: ru we' the" gyo" ra" ai: gyang" lho" byo re yao: wa ngonhaung" dao mae vhe" sheim: byid' ava". 34 Pe"mung:ga"re Davi wa mug:gaung khyo mado, lo" ngad: ra". Ngadqere: Davi wa- 35 Ni" gye qere ni" khyid zab tao" khyo"- ni" khyid qao: mae ngo mato: byid: byid: wa- nga" lo,yo shad' mae zaung: jo, wa, ga:- ai: Asang wa nga" Asang re ta" ra"- ga: ta" to" ra". 36 Airumung: naonhaung" yang pyao: zang mae jin" se' pye' ko" ra" ai: Yesu wa Mao"So: yang Asang we' Meshia khyo" san: to: va" yaug ngad: rure Israel byumyu" alhab' geim" khyag' za: ba: yu ge, wo"- ga: ta" ra". 37 Mo,byu qe wa ai: dao: re the' gyo: gelao"- yao: bam: nhag' lam: mae qi: sho' gyo" zao" gemung:- Petru we' lagyo: gaje qere- Mao:nhaung: qe we"- ngonhaung" pe" ru: kad' bam nae" i? ga: ta" ako". 38 Petru wa yao: bam re- Naonhaung" alhab' mo, myid tha" pye' ge,- naonhaung" qobo jham khyad' pye' byid' ru qhug' genae" qhid' mae" Yesu Khristu mang mae naonhaung" yaug khao: ngo" qid nyhab' kham: yu ge,. Airu:lao"- Mao"So: jhaung qhu" Gyang" Lho" Byo re naonhaung" qo" khae: yu: li" genae". 39 Pe"mung:ga"re Gyang" Lho" Byo byid: nae" ga" ra" Mao"So: dao:so: wa naonhaung" qhid' mae" re:- naonhaung" nho: myid:zo: qe: qhid' mae" re:- va: mae na ko" ra" ngonhaung" Asang Mao"So yao" yang khai: yu: ra" mo, alhab' qhid' mae" re: byid' to" ra". 40 Ailao" Petru wa gatau: dao: thoe myo: sho' we' yao: bam re ta" peim: ta" kyang: byid: zo" re"- naonhaung" wa ce: makhyang" ra" byu qe: dao mae joe" li" na: ra" qobo dae mae" loe; beim ge,- ga: ta" peim: byid' ra". 41 Mo,byu qemae" myo: sho' mo, wa Petru kho" kyo" ra" mungdao: re lam" yang: Qid nyhab' kham yu gemung:- ai: ba na mae lam khug: ra" mo, sam taung ai: phaung mae laung" lo: ako". 42 Yao: bam wa lagyo: qe: dao: re zhao: yu- daga" za: bozam" khug: na- mug khyoe' phai" ra" khyo re kad'- daga" za: akyu" mho' mung:- yo, khyin: ba na re gan: lo" nhao: ako". 43 Lagyo: qe khyo" yang mug' pho: ve,lho jham we' mug'pho: mau" zo" jham re myo: sho' qhu" byid' ruyang byu yaug khao: ngo" wa gyaug: mug' byaug: ako". 44 Lam khug: ra" mo, wa daga" za: zam" khug: na mung:- yao: bam qo" ra" zai jham re daga" za: jho" ceim" myho" ci yang: na: ako". 45 Yao: bam wa yao: bam: jo, nho" zai yo jham re aung" pye' mung:- ai: ngaui re khoyaug khoru: qo ca" rure cao" yang: yao: bam yao: cao: jho" byid' ako". 46 Yao: bam wa ba khao: ba ngo" Caung:pa" Yham mae ham: phaung yang: yao: bam yao" yham khug mae mug khyoe' phai" mung:- nyham: khyo" ra" nhag' lam: we' ngaui bau: ngaui lho" daga" za: zo:ve zo" ako". 47 Yao: bam wa Mao"So re caung:khin" byid: mung:- byu alhab' mo; qhid' kheim: mae nga: ye; ako". Asang wa khyad' yu: ru qhug' ra" mo, re ba khao: ba ngo" yao: bam: phung: mae laung: byid' ra". 1 Daba re Petru we' Yohan wa myi" thao sam yo, qug mae" akyu" mho' yo, khyin: mae Caung:pa" Yham khyo ye" lo" ako". 2 Yaung" Lho" ga: mhang" ra" Kham: Dung: mae khau: mae" khyid qeim: ra" byu dayaug na: ra". Ai: khyid qeim re Caung:pa" Yham khyo vao ye" lo" ra" mo, mae" ngaui mho' zo: shao: ga: ba khao: ngo" ai: kham: dung: mae yedao: nha: to: to: kad' ako". 3 Ai: khyid qeim wa Petru we' Yohan- Caung:pa" Yham khyo vao li" rure myao lao"- yao: shid' zo: re ngaui mho' ra". 4 Yao: shid' zo: wa ai: khyid qeim yaug re zhaug' qu" mung: Petru wa- Nga" shid' zo: re qu" la,- ga: ta" ra". 5 Airumung: ai: khyid qeim yaug wa yao: shid' zo: mae" ngaui kye' ngaui thao the' nae" laug ga: myid mung: yao: shid' zo: re qu" ra". 6 Petru wa yao: re- Ngo wa ngaui dakye' re: maqo"- ngad qere: ngo qo" ja: nao re ngo byid: nae"- Nazared mae" Yesu Khristu mang we' ngo nao re amyin" byid' ra"- To" ye, mung: khyo su: wa, ga: ta" ra". 7 Ai: thao Petru wa ai: khyid qeim yaug: lo, yo lo, mae zaui: yang: she: to" ke' ra". Ailao" jao"- ai: khyid qeim yaug: khyid we' khyid myo; qam: bo: li" mung: 8 yao: wa byae: to" yang:- yao: yao: za: ye, mung: khyo su" qu" ra". Ai: thao re yao: wa thug' jhu: mung: Mao"So: jeju re caung:khin" zo" re" lagyo: shid' zo: we' daga" Caung:pa" Yham khyo vao ye" lo" ra". 9 Ai: tau mae na: ra" mo, byu qe wa- yao: airu: Mao"So re caung:khin" byid: yang: su" ye" lo" rure myao: ako". 10 Amung: yao: bam wa- yao: re Yaung" Lho" Kham: Dung: mae zaung: jo, yang:- lhaung" mho' zo" na: ra" yaug ngad: rure qu" se" gemung:- yao: mae boe" ra" mau" zo" re yao: bam alhab' mo, mug' hao" byaug: ako". 11 Ai: yaug wa Sholamon Zaung Yham ga: mhang" ra" zaung yham mae Petru we' Yohan shid' zo: na shi" au:- mo,byu qe wa yao: bam jhao" ai: zaung yham khyo tao" ye" lo" ako". 12 Petru wa mo,byu qere myao lao"- Israel mao:nhaung: qe we"- Naonhaung" pe" mung: ceru: mug' ko" i? Naonhaung" pe" mung: nga" shid' zo: re zhaug'qu" ko" i? Ceyaug re khyo qo" su" li" nhao: ru wa nga" shid' zo: yao" qam: so' khyo" yang mangad:- nga" shid' zo" nho: Mao"So: khyo re phug' cao" ra" qam: so' khyo" yang ngad: ein: naonhaung" jho ko" i?. 13 Abraham- Isag we' Yaku nho: Mao"So ngad: ra" ngonhaung" phug' pho" qe: Mao"So wa yao" Daui Daui Yaug Yesu re phungbao byid' to" ava". Ngadqere: ngonhaung" wa yao: re kheim: so' qo" ra" mo; lo, khug khyo ab byid' pye' gemung:- Pilad wa yao: re lhoe' ke' nae" bin: myid: phyid' to: thao re lhao" re:- naonhaung" wa Pilad qhid' kheim: mae yao: re ngag: ha: pye' ako". 14 Yao: wa gyang" lho" ru we' gai: ra" yaug ngad: ra". Amung: naonhaung" wa yao: re ngag: ha: pye' ako". Ai: byu se' ra" yaug re lhoe' ke' byid: nae" Pilad re naonhaung" mho' ako". 15 Naonhaung" wa kao so' asang yaug re se' pye' ako". Ngadqere: Mao"So wa shid: ru mae" yao: re daui: to" li" nhao: ava". Ngonhaung" wa cera" sagse: ngad va". 16 Ai: yao" mang qam: so' we' ce: khyid qeim yaug re qam: ke' byid' ava". Yao" mang re lam khug: ra" khyo" yang naonhaung" myao: ru we' ba: ra" khyo" boe" va" ra". Naonhaung" the' myao: ru we' dakhyo: ai: Yesu re lam khug: ra" myid wa ce: khyid qeim yaug re nyang" za: gai: lo" nhao: ava". 17 Nga" mao: nhaung: qe we"- Naonhaung" we' naonhaung" au: jhaung qe Yesu re kad' lai: lo: ra" mau" wa- maba mabeim: yang: ngad: rure ngo ba va". 18 Mao"So yao" yang san: to" ra" Meshia wa dayin dayo: qug: khai: kham zo: ca" nae" ga:- Mao"So wa ganhae" mae" lapa qe alhab' mo; nhad' dao: thoe khyo" yang ta" hau" to: gau ngad: ra". Amung: Mao"So wa ai: lapa dao: re ceru: boe" ra" khyo" yang jab byang" li" nhao: ra". 19 Airumung: naonhaung" myid tha" ge,- Mao"So jhao" lhang: lo geri:- ailao" yao: wa naonhaung" qobo re khyad' pye' byid' li" nae". 20 Naonhaung" airu: kad' ko" re wa- Asang mae" byo: qam: so' joe" li" nae" yo, khyin: joe" li" mung:- Asang wa naonhaung" qhid' mae" khyin: to: byid: gau ngad: ra" Meshia ga" ra" Yesu re nhao byid' li" nae". 21 Mao"So wa daba: pyad mae" yao" gyang" lho" ra" lapa qe: nhad' dao: thoe khyo" yang ta" to" ru we' dakhyo:- ja: khao: ngo" alhab' asag' dam: kad' ra" yo, majoe" joe" wa- yao: wa mug:gaung dao mae na: jo, ca" ra". 22 Pe"mung:ga"re Moshe wa- naonhaung" nho: Asang Mao"So wa ngo re nhao: ke' ru we' dakhyo:- lapa dayaug naonhaung" re nhao: ke' byid' li" nae". Amung: yao: ta" ra" mung dao: alhab' re naonhaung" phug' cao" ca" genae". 23 Ai: lapa ta" ra" mung dao: re maphug' cao" ra" yaug wa Mao"So: byumyu" mae" kho' khyo" pye' ru qhug' mung:- phyo' qheim" pye' ru qhug' li" nae"- ga: ta" ra". 24 Alao"- Samuela we' yao" thao re thug' li" ra" Mao"So mae" mungdao: qo" ko" ra" lapa qe alhab' mo, re: ce: ba na mae boe" na: ra" khyo jham re lapa pa: lai: lo: avako". 25 Ai: lapa qe: nhad' dao: thoe khyo" yang byid' to" ra" Mao"So: dao:so: jham wa naonhaung" qhid' mae" ngad: ra". Mao"So wa naonhaung" phug' pho" qe we' to" to" ra" dao: thang" mae bobo: ra" mo, re: ngad: ako". Mao"So wa Abraham re- Ngo wa ni" myid:zo: qe khyo" yang myidgaung xao su byu alhab' re shaman" byid: nae"- ga: ta" ra". 26 Airumung: naonhaung" yaug khao:ngo" re makhyang" ra" lo, mau" jham mae" dam: tug' lo nhao: ra" khyo" yang naonhaung" re shaman" byid: nae" qhid' mae" Mao"So wa yao" daui daui yaug re daui: to" li" nhao mung: naonhaung" jhao" yao: re sao qhid' nhao: ke' byid: va" ra"- ga: kho" kyo" ra". 1 Petru we' Yohan wa mo,byu qere airu: kho" kyo" na shiko" au: khinjaung qe daqhae:- Caung:pa" Yham gug: gam zug: qe we' Saduke qe joe" li" ako". 2 Lagyo: shid' zo: wa mo,byu qere- Yesu shid: ru mae" dam: daui: to" li" va" ra" khyo mho" shid' na: ako". Airu wa shid: byaug va" ra" mo, dam: daui: li" nae" ga" ra" dao:- dang: rure sagse: kham byid' ru boe" yang: yao: bam nhag' yo" ako". 3 Airumung: yao: bam wa lagyo: shid' zo: re taung" yu: ako". Ngadqere: mug:cad' lo" na: ruyang thao: ba ne, seim joe" sho' lagyo: shid' zo: re thaung: khug mae lhaung" to" ako". 4 Ngadqere: mungdao: re the' gyo" ra" mo, myo: sho' wa lam" ako". Amung: lam khug: ra" mo, ngo" taung ko myo" laug: li" ra". 5 Thao: ba re Yuda au: jhaung qe lau: de, qe we' jham: tung" pho" qe wa Yerusalem mae zang" ham: ako". 6 Yao: bam wa khinjaung yin" Anna we' Kayapha - Yohan - Alexanda we' gatau Khinjaung Yin" dinkhu: khug mae bobo ko" ra" mo, we' jho" qham: ako". 7 Yao: bam wa lagyo: shid' zo: re yao: bam: qhid' kheim: mae yhe' to: mung:- Ni" shid' zo: wa ceru re ni" shid' zo: khoru: kad' ko" i?- Pe" ja" qam: so'- khag' mang khyo" yang ceru: kad' ko" i? ga: myid' ako". 8 Ailao" Petru wa- Gyang" Lho" Byo byang" jo, mung:- yao: bam re mo,byu qe: au: jhaung qe we' lau: de, qe we"- 9 Khyid qeim yaug re gai kad' byid' ra" khyo we' yao: khoru: gai: shao: lo" byaug: ra" khyo we' sin: yang: nga" shid' zo: myid' ca: qu" ru qhug' ngad: re wa- 10 naonhaung"- yao: re pyao: zang mae jin" se' pye' mung:- Mao"So: yang shid: ru mae" dam: daui: to" li" nhao: ra" ai: Nazared mae" Yesu Khristu mang qam: so' khyo" yang ai: khyid qeim wa nyang" za: gai: shao: lo" byaug mung: cetau naonhaung" qhid' kheim: mae ye; jo; rure naonhaung" alhab' mo, we'- Israel byumyu" qe alhab' ba: yu ge,. 11 Yesu wa naonhaung" yham zhaug' mo, khyin: shalhaui" pye' ra" laug baui wa je: akhyag: thao" ra" laug baui boe" lo: ra"- ga: jham: mugsug' mae ta" to" ra" yaug ngad: ra". 12 Khyad' yu: ru wa yao: dayaug khyo" yang za: gai: qo" yu: ra". Mug:myid geim" mae yao: mae" je yang: ngonhaung" re qo" khyad' yu nae" qhid' mae" Mao"So byid' to" ra" yaug gaje khag' re: mana ngad: ra"- ga: phaug' tau" ra". 13 Yuda tarha" qe,do, mae bobo: ra" mo, wa- Petru we' Yohan shid' zo" nho: vae" ra" myid re myao mung: yao: shid' zo: wa pha,jhi" mabo: ra" yu" yu" byu za: ngad ko" rure ba geyang: mug' hao" byaug: ako". Ai: thao re yao: bam wa Petru we' Yohan shid' zo: wa qhid' phyao: Yesu byin zam" qe ngad: rure myid: beim" ako". 14 Ngadqere: khyid gai: lo" byaug: ra" yaug wa Petru- Yohan we' daga" ai: tau mae ye; jo; rure myao geyang: yao: bam pe" dakheim: re: maqo" ta" ko" ngad: ra". 15 Airumung: yao: bam wa yao: shid' zo: re tarha" qe, do, mae" thug' lo" nhao mung: yao: bam yao: cao: byin phyo: jho" qham: ako". 16 Ceshid' zo: re ngonhaung" pe" ru: kad' zai i?- Yao: shid' zo" yang mug' pho: ve, lho qi: sho' boe" va" rure Yerusalem vogaung: mae" mo, yaug khao: ngo" ba: ako". Ngonhaung" aire maqo" ha: pye' lo: ngad: ra". 17 Ngadqere: mo,byu qe: phaung khyo ce: lau dao: je yang: mabyo: lo" vashao: ai shid' zo: re Yesu mang lao: yang: khonhae" re: khag' rere: madam: ta" genae" qhid' mae" ta" peim: gelang:- ga: ta" to" ako". 18 Airumung: yao: bam wa lagyo: shid' zo: re dam: khai: vhao" yu mung: Yesu mang lao: yang: pe" re: data"- pe" re: damho" shid' ge, ga: yao: shid' zo: re ta" ako". 19 Ngadqere: Petru we' Yohan wa yao: bam re- Mao"So: mho dao: re gyo: zai i? Mangad: lao" naonhaung" mho dao: re gyo: zai i? Mao"So: qhid' kheim: mae kholam: jo: rure naonhaung" yao: yao: dao: phyid' ge, 20 pe"mung:ga"re ngonhaung" wa- ngonhaung" yao: the' myao va" ru we' the' gyo" yu: ra" khyo jham re mata" lo: maqo" na- ga: phaug' tau" ako". 21 Aimung: Yuda tarha" qe, do, mae" mo, wa- yao: shid' zo: re je: yang: qao: ra" khyo" ta" peim: yang: nhao: ke' ako". Pe"mung:ga"re mo, byu qe alhab' mo, wa boe" lai: lo: ra" khyo mathao mae Mao"So re caung:khin" byid' na ko" ruyang- yao: bam wa lagyo: shid' zo: re qobo dae byid: nae" magai: boe" rure ba: qu" ako". 22 Ce: mug' pho: ve, lho boe" yang: gai shao: lo" ra" yaug: apyad wa byid xe zin je ngad: ava". 23 Petru we' Yohan wa yao: shid' zo: re nhao: ke' ge we'- yao: bam: phaung khyo dam: tug' lo mung:- khinjaung qi: qe we' lau: de, au: jhaung qe yao: shid' zo: re ta" ke' ra" dao: jham re yao: bam re lodam: ta" kyo" ako". 24 Lam khug: ra" mo, wa ai re the' gyo: gelao"- yao: bam wa nhag' lam: dadang: za: qhan: mung: akyu" mho' ko" ru wa- Mug:gaung myid gaung qid mung" panglai: we' ai: gu: mae na: ra"- jo; ra" gu: alhab' re phan" phaug' to: yaug Asang we"- 25 Nao wa ni" jeim pho" ngad: ra" ngonhaung" phug' pho" Davi nhad' dao: thoe khyo" Gyang" Lho" Byo: yang ta" ra" au:- Taung bug byumyu" qe wa pe" mung: nhag' jam: yo" na ko" i? Byumyu" alhab' pe" mung: akeim mae pha,jhi" khug' khyug' na: ako" i? 26 Asang we' yao" yang nhao: ke' ra" Meshia re gye kad' nae" qhid' mae" Myidgaung kho:kham qe seim" nyhang" to: mung: Zug: ade, qe daga" za: zang" ham: na: ako"- ga: ta" ra". 27 Pe"mung:ga"re- gaigai: yao:- Herod we' Pontu Pilad wa- Taung bug byu qe we' re:- Israel byu qe we' re:- Nao: yang xau gyad yang: san: to" ra" Meshia Ni" Gyang" Lho" ra" daui daui yaug Yesu re gye kad' nae" qhid' mae" ce: vomo" khug mae jho" qham: avako". 28 Yao: bam wa ni" qam: so' we' ni" myid o: ra" khyo" myid: phyid' to: gau ngad: ra" boe" li" ca" ra" mau" zo" jham ja: khao: ngo" re kad' nae" qhid' mae" airu: zang" ham: ru ngad: avako". 29 Asang we"- ana" yao: bam kyaug' tin" ra" khyo re qu" beim: byid: la,- amung: ni" daui daui mo, re mazag mavae lo: ni" mungdao: re kho" kyo: nhao byid: la,. 30 No gai byid: nae" qhid' mae" ni" lo, yheim" thug' ke' wa, Ni" Gyang" Lho" ra" daui daui yaug Yesu mang khyo" yang mug' pho: we' mug' pho: ve, lho jham boe" thug' li" nhao wa,- ga: mho' ako". 31 Yao: bam akyu" bin: mho' gelao" yao: bam phaung: na: ra" jo, qo wa laui" nan" li" ra". Yao: bam alhab' mo, wa Gyang" Lho" Byo we' byang" mung:- Mao"So: mungdao: re vae" vae" za: ta" hau" ako". 32 Lam khug: ra" mo, wa myid aung khug nhag' lam: dakhe' za: ngad: ako". Khag' re: yao: bam sang: ra" jo, nho" re nga" mae" ngad: ga: mata" gelo:- yao: bam qo" ra" gu: alhab' re daga" za: qhan" ci: ako". 33 Lagyo: qe wa Yesu dam: daui: to" li" ra" khyo re qam: so' qi: we' sagse: kham: ako". Mao"So wa yao: bam alhab' mo; dao mae shaman" jeju vhe' sheim: byid' ra". 34 Yao: bam: phung: mae qo ca" ru khag' re: mana ko" ngad: ra". Pe"mung:ga"re- yokhyao: yomyid qo" ra" mo, mangad: lao"- yham qo" ra" mo, wa aung" pye' mung: qo" aung" ra" ngaui re cili" mung:- lagyo: qe: lo, khug mae li" ab byid' ako". 35 Lagyo: qe wa ai: ngaui jham re- yaug khao: ngo" re yao: bam: qo ca" rure cao" yang: gae byid' ako". 36 Alao"- lagyo: qeyang Banaba ga: mhang" ra" (Banaba ga" ru wa qam: byid: yaug ga" ru ngad: ra") Kupru qid gyo: mung" mae khau: ra" Levi amyu" Yoseb wa- 37 yao: qo" ra" yo myid gaung re aung: mung: qo" aung" ra" ngaui jham re lagyo: qejhao" cili" mung: qhaug' byid' ra". 1 Anania ga: mang: ra" byu dayaug we' yao" yham sang myhi" Saphira wa yao: shid' zo: sang: ra" yo myid gaung daqhae: re aung" pye' ako". 2 Ngadqere: yao" yham sang myhi" nho: myid vang" ru we' yo phug' ngaui mae" damyo" re yao: yao" qhid' mae" myho" to: yang: dang: ra" gu: re lagyo: qe: lo, khug khyo yeqhaug' byid' ra". 3 Petru wa Anania we"- Nao wa yo myid gaung phug' ngaui daqhae: re myho" to" ra" khyo" yang Gyang: Lho" Byo re mhug' ava". Ni" gaung pe" mung: Satan re eib nhao: i? 4 Ai: yo myid gaung wa maaung: shi" rere: aire nao sang: ra". Aung" pye' thao rere: ai: yo myid gaung phug' ngaui wa ni" ngaui ngad: ra". Ai re nao pe" mung: airu: kad' nae" myid: phyid' i? Nao wa byu re mhug' ru mangad:- Mao"So re mhug' ru ngad: ra"- ga: yao: re ta" ra". 5 Anania wa ce: dao: re the' gyo: we' dalhang: dae shid: lang" lo" ra". Ai: khyo re the' gyo" ra" mo, alhab' wa gyai gyo" gyaug: ako". 6 Zolau: qe li" yang: Anania mao gaung re pin: dau: yang thab' mung: taung gaung khyo dao: thug' lo" mung: yenyhab' pye' ako". 7 Sam yo, qug ko kyo thao re Anania yham sang myhi" wa pe" boe" va" rure maba lo: joe" vao li" ra". 8 Ailao" Petru wa ni" shid' tao yo myid gaung aung" ra" ngaui cegu: alhab' ngad va" i? Ngo re ta" kyo: la,- ga: yao: re lham: myid' ra". Alao" yao: wa ngad va"- aigu: alhab' ngad va"- ga: phaug' tau" ra". 9 Airumung: Petru wa Ni" yham sang pho" we' ni" shid' zo: wa Mao"So: Byo re jham" qu" nae" qhid' mae" pe" mung: myid jho" vang" yang: myid: phyid' ko" i? Ni" yham sang pho" re yedao: nyhab' pye' ko" ra" mo, wa ana" kham: dung: nhad' mae joe" lo: avako". Yao: bam wa nao rere: taung gaung khyo dao: thug' lo" li" genae"- ga: ta" ra". 10 Ailao" jao" ai: myiqe: wa Petru khyid qao: mae shid: lang" lo" ra". Zolau: qe joe" vao lo: re- ai: myiqe: myhi" shid: jo; rure lomyao mung:- yao: bam wa ai: myiqe: myhi" mao gaung re taung gaung khyo vo; thug' lo" mung: yham sang pho" nhae mae yenyhab' pye' ako". 11 Ai: phung: geim" we' ai: khyo re the' gyo" ra" mo, wa gyai gyo" gyaug: ako". 12 Lagyo: qe: lo, khyo" yang mo,byu qe: phaung mae mug' pho: ve, lho jham myo: sho' we' mug' pho: mau" jham myo: sho' kad' qhu" ako". Lam khug: ra" mo, alhab' wa- Sholamon zaung yham mae daga" za: ham: phaung: na: ako". 13 Mo,byu qe yao: bam re gyai khin" ta" gesho' ngad yang: re:- gaje qe wa khag' re: yao: bam we' mavae" zam" ko" ngad: ra". 14 Ngadqere: Mao"So re lam khug: ra" yauggai- myiqe: qe wa ai: phaung mae je yang: laung" li" ra". 15 Petru su" lai: lo" re no phyo: qo" mo, damyo" mae yao" bao qab khalhao" qab: zao" vashao: ga:- no phyo: qhug' ra" mo, re hau" mo" khyodang jham khyo dao: thug' li" mung:- yab qo jham phaung: thin jham: dao mae li" lhang" to" ako". Yao: bam airu: kad' ko" ru wa lagyo: qe kad' ra" lo, mau" gai jham: nho: ashi: ngad: ra". 16 Yerusalem lhang" gam: vogaung: jham mae" mo,byu qere: no phyo: qhug' ra" mo, makhyang" ra" yui zaung: ra" mo, re jhui" li" ako". Yao: bam alhab' mo, gai shao: lo" byaug: ako". 17 Ailao"- Khinjaung Yin" we' yao" byin zam" qe ngad: ra" Saduke phung: qe wa lagyo: qere gyai myid nug' li" mung:- yao: bam wa lagyo: qere akhyag yu nae" myid: phyid' ako". 18 Aimung: yao: bam wa lagyo: qere taung" yu mung: thaung: khug mae lhaung" to" ako". 19 Ngadqere: ai: myi re Asang: nho: mug: lagyo: dayaug wa thaung: kham: dung: jham re phung" pye' yang:- lagyo: qere taung gaung shad' khyo jhui" thug' lo" mung:- 20 Naonhaung" ye" lo" ge,- Caung:pa" Yham mae yeye; jo, yang: ce: kao so' daui: ra" khyo asag' khyo alhab' re mo,byu qere ta" kyo: ge, ga:- yao: bam re ta" ra". 21 Lagyo: qere: mho dao: gyo: mung:- yao: bam wa ne, kao mug: bo" zo" re Caung:pa" Yham khyo vao ye: yang: mho" shid' byid' ako". Khinjaung Yin" we' yao" nho: byin zam" cao: qe wa Yuda tarha" qe, do, zabphaung kad' nae" qhid' mae" Yuda au: jhaung lau: de, qere khai: zhang" to" ako". Ai: thao yao: bam wa- lagyo: qere yao: bam: qhid' kheim: khyo jhui" vao li" nae" qhid' mae" amyin" byid: yang: thaung: khyo nhao: ke' ako". 22 Ngadqere: gug: gam gyezug: qe joe" ye: ko" re- yao: bam wa thaung: khug mae lagyo: qere maye: myao gelao" tarha" qe, do, phung: khyo dam: tug' lo mung:- 23 Ngonhaung" thaung: khyo joe" ye" re- thaung: kham: dung: wa tang tang za: pyid' to" ru we' zaung" mo, re: kham: dung: re nyang" za: zaung" na ko" rure ngonhaung" yemyao:- ngadqere: ngonhaung" thaung: kham: re yephung" ke' re akhug mae khag' rere: mathe' myao- ga: lau thoe lota" kyo" ako". 24 Khin jaung qi: qe we' Caung:pa" Yham gug: gam gyezug: qe wa ce: dao: re the' gyo: gelao"- ce: lagyo: qe wa pe" boe" vako" laug i? ga: mug' ako". 25 Ai: thao byu dayaug joe" li" mung:- Tae" gyo" qu" ge,- naonhaung" thaung: mae lhaung" to" ra" byu qe wa Caung:pa" Yham mae mo,byu qere mho" shid' na: ako"- ga: yao: bam re ta" ra". 26 Alao" Caung:pa" Yham gug: gam zug: pho" wa yao" gyezo: qe we' thug' ye" lo" mung:- lagyo: qere yedam: jhui" tug' lo: ra". Ngadqere: mo,byu qe yao: bam re laug baui: yang pye' genae" rure gyaug gemung: lagyo: qere maqad maqui" makad' ko" ngad: ra". 27 Yao: bam wa Lagyo: qere jhui" vao li" mung:- Tarha" qe, do, phung: qe: qhid' kheim: mae ye; jo, nhao: ako". Khinjaung Yin" pho" wa lagyo: qere dao: myid: jham myid' ra". 28 Yao: wa- aiyaug: mang re lao: yang: naonhaung" pe" re: mamho" shid' nae" qhid' mae" naonhaung" re ngonhaung" jhaug' za: amyin" byid' to: va"- ngadqere: qu" ge,- Naonhaung" wa Yerusalem vogaung: geim" mae naonhaung" mho" shid' ra" khyo za: byang" sho' kad' to" avako". Amung: naonhaung" wa yao: shid: ra" xao qug: ngonhaung" au: dao mae vhin nug: ako"- ga: lagyo: qere ta" ra". 29 Petru we' lagyo: qe wa- Ngonhaung" wa byu: mho dao: re tho' Mao"So: mho dao: re je: gyo: ca"- ga: phaug' tau" ako". 30 Ngonhaung" phug' pho" qe: Mao"So wa naonhaung" yang pyao: zang mae jin" se' pye' ra" Yesu re shid: ru mae" daui: to" li" nhao: ava". 31 Israel byumyu" re myid tha" nae" we' yao: bam: qobo khyad' pye' byid' ru qhug' nae" qhid' mae" Mao"So wa yao: re khyad' yu yaug we' au: jhaung khyo" yao" lo, yo shad' mae tau: to' to" ava". 32 Ai: khyo jham we' sin: mung: ngonhaung" wa sagse: qe ngad: ra". Mao"So: mung dao: re phug' cao" ra" mo, re byid' ra" Mao"So: jhaung qhu" Gyang" Lho" Byo re: sagse: ngad: ra"- ga: phaug' tau" ako". 33 Tarha" qe, do, phung: mae" mo, cedao: re the' gyo: gelao"- gyai nhag' gyo" yo: gemung:- yao: bam wa lagyo: qere se' pye' nug: ako". 34 Ngadqere: yao: bam mae" mo,byu qe alhab' mo; yang phug' myao" ra" jham: tung" pho" Gamale ga: mang: ra" Pharishe dayaug wa tarha" qe, do, phung: mae" to" ye; li" mung:- 35 Lagyo: qere taung gaung shad' khyo jhui" thug' lo" nae" amyin" byid' ke' yang:- Tarha" qe, do, phung: mae" mo, re- Israel mao:nhaung qe we"- cebam re naonhaung" pe" ru: kad' nae" rure lha" yang: kad' ge,. 36 Pe"mung:ga"re qhid' phyao: mataung" myao" shire Thuda ga: mang: ra" yaug wa yao: yao" gaung re au: jhaung qi: dayaug ngad: ga: ta" mung:- thug' li" ra" au:- byu byid yo ko yao" thao cao" ako". Ngadqere: yao: re se' pye' thao re yao" thao cao" ra" mo, wa dayaug dakhyo byo: sin" lo" byaug gemung: yao" mau" zo" baui" lo" byaug: ra". 37 Ai: thao re gae gaung: japhin: re gaug: yu: ra" yo, gyo: mae Galile byu Yuda thug' li" mung:- mo,byu qere yao" thao cao" genae" qhid' mae" poe: ra". Yao: re: se' pye' ru qhug' mung: yao" thao cao" ra" mo, wa dayaug dakhyo byo: sin" lo" byaug: ako". 38 Airu: mung: naonhaung" re ngo ta" geli"- cebam re naonhaung" akhyag dayu ge,. Yao: bam re sae za: qu" to: ge,- yao: bam yaung: to" ru we' kad' ra" mau" zo" wa xao su byu qemae" qhid: ru ngad: re wa ai wa baui" lo" byaug: li" nae". 39 Ngadqere: ai:gu: wa Mao"So mae" ngad: re wa naonhaung" yao: bam re maqo" gai: aung: pye' genae". Naonhaung" wa Mao"So re gye kad' ru doe; li" genae"- ga: ta" ra". Yuda tarha" qe, do, phung: mae" mo, wa Gamale nho: pha,jhi" byid' rure khae: yu: ako". 40 Yao: bam wa lagyo: qere khai: vhao" yu mung: yao: bam re be, yang:- Yesu mang re lao: mung: khonhae" re: dadam: kho" kyo: ge, ga: yao: bam re amyin" byid' ako". Ai: thao re yao: bam wa lagyo: qere nhao: ke' ako". 41 Lagyo: qe wa Yesu mathao mae qho' phyo' rure kham zo: nae" man" ra" mo, khyo" Mao"So wa yao: bam re sun" yu byid: va" ruyang yao: bam wa ngaui bau" ru we' Yuda tarha" qe,do, mae" thug' lo" ako". 42 Ba khao: ba ngo" Caung:pa" Yham mae re: mo, byu qe: yham mae re: yao: bam wa Yesu wa Meshia ngad: ga" ra" Ngaui Bau" Lau Dao: gai re xo' yang: mho" shid' kho" kyo: byid' ako". 1 Ai: thao mataung" myao" re mho"zo: qe wa myo" laug: li" mung:- Heleni myan" jhau: ra" Yuda qe we' Yuda myan" jhau: ra" Yuda qe: agyo: mae myan" myo: nae" thug' li" ra". Pe"mung:ga"re Heleni myan" jhau: ra" Yuda qe wa- yao: bam: cug' mo" myhi" qere ba khao: ngo" gae byid' ra" zao:kho ngaui o" sho' magae byid: ko"- ga: ta" ako". 2 Airumung: lagyo: qe daxe: shid' yaug wa lam khug: ra" mo, phung: geim" re khai: zhang" yu mung:- Ngonhaung" wa Mao"So: mung dao: re kho" kyo: nae" mau" zo" re qhui" to: mung: Alu ngaui zam: pyo byid' ra" mau" re zaui" ru wa majo ngad: ra". 3 Mao:nhaung: qe we"- Airumung: Gyang" Lho" Byo byang" ru we' pha,jhi" bo: ra" byu nhad' yaug re naonhaung" phaung mae" khyin: yu ge,- ce: mau" zo" re asang kad' yang: zaui: nae" ngonhaung" yao: bam re san: to: nae". 4 Ngonhaung" yao: kam" wa akyu" mho' ru we' kho" kyo" ra" mau" zo" vin vo; ru mae yo, byang" ayo, byid: zai ngad:- ga: ta" ako". 5 Lam khug: ra" mo, phung: geim" wa lagyo: qe ta" rure gyo" ngaui: ako". Ai mung: yao: bam wa lam khug: myid qi" ru we' Gyang" Lho" Byo byang" ra" Stephan ga" ra" yaug- Philib- Prokuru- Nikano- Timon- Parmena we' Nikola- bam re khyin: yu: ako". Nikola wa Antioki vogaung: mae" Yuda caung:pa" thung" khug khyo" phaug' vao lo: ra" Taung bug byu ngad: ra". 6 Phung: byu qe wa ai: khyin: yu: to" ra" mo, re lagyo: qe: qhid' kheim: mae nha: to" ako". Lagyo: qe wa akyu" mho' mung: ai bam: dao mae lo, kai: byid' ako". 7 Aimung: Mao"So: mungdao: wa xo' yang: xo' yang: hau" nhao" lo" ra". Yerusalem mae" mho"zo: qe wa je: je: za: myo" laug: li" mung: khinjaung qi: qe myo: sho' re: lam khug: lo: ako". 8 Stephan wa Mao"So: yang magan: mago" ra" shaman" jeju we' qam: so' byang" sho' byid' to: mung:- mo, byu qe: qhid' kheim: mae mug' pho: ve, lho we' mug' pho: mau" zo" qi: sho' kad' qhu" byid' ra". 9 Ngadqere: Alexanda we' Kureni vogaung: mae" Yuda byu qere: bobo: ra" loe; beim mo; tarha" jung yham phung: mae bobo: ra" mo, daqhae: wa Stephan re ngag: thaug' ako". Yao: bam we' Kiliki- Asia mang: khaung: mae" Yuda qe damyo" wa Stephan we' jho" ta" ngag: ako". 10 Ngadqere: Byo wa Stephan re pha,jhi" qi: byid' to" ruyang Stephan: jhau: ke' ra" dao: re yao: bam maqo" phaug' ko" ngad: ra". 11 Airumung: yao: bam wa byu damyo" daqhae: re khug vag: byid: yang:- ceyaug wa Moshe rere: jung" gaui: ra" dao: jhau: na: ru ngonhaung" the' gyo: va"- ga: ta" nhao: ako". 12 Airu: kad' mung: yao: bam wa mo, byu qe lau: de, au: jhaung qe we' Jham: tung" pho" qere lu" to" li" nhao: ako". Yao: bam wa Stephan re taung" yu mung: tarha" qe, do, phung: qe: qhid' kheim: khyo jhui" yu: to" ako". 13 Ai: thao re yao: bam wa Stephan nho: khyo rere: mhug' yang: sagse: kham: ta" nae" byu daqhae: rere: khai: to" ako". Ai: sagse: qe wa byu ceyaug wa- ai: Gyang" Lho" ra" Caung:pa" Yham re we' Moshe Tarha" re khonhae" re: jung" gaui yang: ta" ra". 14 Nazared mae" Yesu wa ai: Caung:pa" Yham re phyo' pye' mung: Moshe yang ngonhaung" re byid' to" ra" thung" tarha" alhab' re tha" pye' li" nae"- ga: ceyaug ta" rure ngonhaung" the' gyo: va"- ga: sagse: kham: ako". 15 Tarha" qe, do, mae zaung: jo; ra" mo, alhab' Stephan re ceim" zhaug' qu" na ko" re- Stephan nho: myo,khung: wa mug: lagyo" nho: myo,khung: we' dau: rure myao: ako". 1 Khinjaung Yin" wa Stephan re- Ce: qobo zhaug' ra" dao: gaigai: dang: i? ga: myid' ra". 2 Ailao" Stephan wa- Mao:nhaung: qe we' nhag' bo qe we"- Tae" gyo" qu" ge,- ngonhaung" phug' pho" Abraham wa Haran vogaung: khyo maye: na shire Mesopotamia mung" mae na shi" au: phungbao qi" qhang: ra" Mao"So wa yao: re na: qhu" mung:- 3 Mao"So wa yao: re Ni" ba nam ug zo: ni" mung"dan: re to: co' mung:- nao re ngo ceim" shid' nae" ra" mung" khyo ye" lo" wa,- ga: ta" ra". 4 Ai mung: Abraham wa yao" mung"dan: re to: co' mung:- Haran vogaung: mae yena: ra". Abraham nho: yao: pho" shid thao re Mao"So wa- ana" naonhaung" na: jo; ra" ce: mung" khyo Abraham re zaug byaung" na nhao: ra". 5 Ai: ayo, mae Mao"So wa Abraham re ai: mung"dan: mae" mug: myid re yao" sudgan jo,nho" khyo" dalo, maug qhi" lhao" re: mabyid: ngad: ra". Ngadqere: ai: mung"dan: re yao: re we' yao" myid:zo: qere byid: nae" ga:- Mao"So wa dao:so: byid' to" ra". Mao"So ce:dao:so: re byid' ra" au: Abraham wa zo: dau dayaug re: maqo" ngad: ra". 6 Mao"So wa Abraham re- Ni" myid:zo: qe wa taungbug: mung" mae yena mung: jeim kad' ru qhug' ru we' zin lam: byid yo- dayin dayo: yhin" ru qhug' li" genae". 7 Ngadqere:- yao: bam re jeim kad' nhao zo" ra" byumyu" qe: dao mae ngo dao: phyid' nae". Ai: thao re yao: bam wa ai: mung"dan: mae" thug' lo" mung:- ce: jo, qo mae ngo re goe; pa" li" genae"- ga: ta" ra". 8 Ai: thao re Mao"So wa- dao: thang" to" ra" aso: lho khyo" au: qid lhai" ra" khyo Abraham re byid' ra". Airumung: Abraham wa Isag re khau thao she' ba ein: ba Isag re au: qid lhai: khyo kad' byid' ra"- Isag wa yao: zo: Yaku re- Yaku wa lahau: qi" ra" ngonhaung" byumyu" phug' pho" qe ngad: ra" yao: zo: daxe: shid' yaug re au: qid lhai: khyo kad' byid' ra". 9 Yaku yao: zo: qe wa yao: bam: yao: nhaung: Yoseb re myid nug: gemung: Egutu mung" khyo jeim kad' nhao: nae" qhid' mae" Yoseb re aung" ke' ako". 10 Ngadqere: Mao"So wa yao: we' daga" ngad mung:- yao: re qug khai: qug: khai: ru alhab' mae" loe, nhao: ra". Mao"So wa Yoseb re Egutu kho:kham qhid' kheim: mae myo,nho nga: lao: qo" nhao: ru we' pha,jhi" byid: mung:- Egutu kho:kham wa Yoseb re mung"dan: geim" dao mae re: kho:kham kho" geim" rere: zug: kad' nhao: ra". 11 Ailao" Egutu mung" we' Khanan mung" khaung: geim" mae bao" khug' qi: zang thug' li" mung:- qug: khai: qhug' ko" ra". Ngonhaung" phug' pho" qere: zo:ve gan: byaug yang: zo:ve maqo" qho loko" ngad: ra". 12 Yaku wa Egutu mung" mae gaug zo jo;- ga" ra" thoe re the' gyo: lao"- yao: wa ngonhaung" phug' pho" qe ngad ko" ra" yao: zo: qere sao qhid' lhang Egutu mung" khyo nhao: ke' ra". 13 Shid' lhang ein: lhang re Yoseb wa yao: mao: bam re yao: khag' ngad: rure ta" kyo" ra". Alao" Egutu kho:kham pho" wa Yoseb yham byu qe: khyo re ba: li" ra". 14 Aimung: Yoseb wa yao: pho" Yaku re- yham byu nhad' xe: ngo" yaug geim" alhab' Egutu mung" khyo zaug byaung" li" genae" qhid' mae" dao: pyang: ke' ra". 15 Alao" Yaku wa Egutu mung" khyo yebyaung" na mung:- aimae yao: yao: we' yao: zo: qe yeshid: pye' ako". 16 Yao: bam: mao gaung jham re Shekhem khyo dao: lo mung:- Hamo yao: zo: bam mae" Abraham ngaui byid: yang: vai: yu: ra" lab mae lonyhab' ako". 17 Mao"So wa Abraham re byid' to" ra" dao:so: jab byang" nae" ba na joe" li" na lao"- Egutu mung" mae na: ra" ngonhaung" amyu" wa qi: sho' je" li" ko" ra". 18 Lo" thao" mae Yoseb re maba mase" ra" kho:kham dayaug Egutu mung" mae kho:kham kad' ra". 19 Ai: kho:kham pho" wa ngonhaung" phug' pho" qere pha,jhi" khyug' yang: yao: bam re yhin" ra". Yao: bam: zonau" qere shid nae" qhid' mae" yham taung gaung khyo maqad maqui" yeshapye' to: nhao: ra". 20 Ce: yo, mae gyai yaung" ra" zonau" Moshe wa khau: li" ra". Yao: re yham mae lho" mo" sam khye' khau: to: mung:- 21 Moshe wa yao" yham mae" taung gaung khyo shapye' pye' ru qhug' lao" kho:kham myiqe: zo: wa yao: re yao: zo: khyo" khau: qhi" yu: ra". 22 Aimung: Moshe wa Egutu byu qe: pha,jhi" alhab' re mho" zhao: yu mung: nhad' dao: thoe qam: lo, mau" bo: ra" yaug boe" li" ra". 23 Moshe apyad byid xe zin ngad lao"- yao: wa yao" Israel mao:nhaung: qe khoru: qug: khai: qhug' na ko" rure qu" nae" qhid' mae" myid: phyid' ra". 24 Yao: wa Israel byu dayaug re Egutu byu dayaug: yang yhin" na: rure yethe' myao mung: Egutu byu re yese' pye' yang: lage, bao" phaug' byid' ra". 25 (Yao: bam Israel byumyu" qe: loe; beim nae" khyo mae Mao"So wa yao: re cili" nae"- ga" rure yao" byu qe ba: gyo: genae" ga:- Moshe myid: jho: ra". Ngadqere: ai re yao: bam maba: gyo: ko" ngad: ra".) 26 Ai: thao: ba re Israel byumyu" shid' zo: myan" myo: mung: jho" se' na ko" rure Moshe yemyao mung:- yao: shid' zo: re mo, byo, kao: yang:- tae" gyo" qu" ge,- ni" shid' zo: wa Israel mao:nhaung: yao: cao: angad: re pe" mung: airu: jho" se' na ko" i? ga: yeta" ra". 27 Ngadqere: byin cao: pho" re mo, byo, o: lhaung: ra" yaug wa Moshe re deim" qhui" pye' mung:- nga" shid' zo" mau" re dao: kho' nae" qhid' mae" nao re khag' yang zug: we' Tarha" agyi kad' nhao: to" i? 28 Nao wa Egutu byu dayaug re ayenhe' se' pye' ru we' dakhyo: ngo rere: nao se' pye' nug: i? ga: Moshe re myid' ra". 29 Moshe ce: dao: re the' gyo: lao"- yao: wa Egutu mung" mae" phao: thug' lo" mung:- Midian mung" mae yephao: na: ra". Yao: wa ai: mung" mae yauggai zo: shid' yaug re myhung: ra". 30 Zin lam: byid xe zin lai: lo" thao re Sina bam nhae din"pyad' yo mae myi: nga" na: ra" thao" paung" mae mug: lagyo: dayaug wa Moshe re na: qhu" byid' ra". 31 Moshe wa ai re the' myao yang:- mug' hao" byaug mung: nyang" za: yequ" nae" ga: ai: thao" paung" khyo qui" ye" lo" ra". 32 Ngadqere: yao: wa- Ngo wa naonhaung" phug' pho" qenho: Mao"So- Abraham nho: Mao"So Isag nho: Mao"So Yaku nho: Mao"So ngad: ga" ra" Asang: nho: thoe re yethe' gyo" ra". Alao" Moshe wa gyaug: nin" mung: mavae" qu" ngad: ra". 33 Asang wa yao: re- Ni" khyid zhaung: khyad' pye' wa,- pe"mung:ga"re nao ye; jo; ra" jo, qo wa gyang" lho" ra" myid gaung ngad: ra". 34 Nga" byumyu" qe Egutu mung" mae dayin dayo: qug: khai: kham zo" na: rure ngo the' myao va"- ngo wa yao: bam: nokyang: thoe re the' gyo: va". Aimung: yao: bam re khyad' yu nae" ein: ngo joe" li" ru ngad:- ana" li" wa, nao re ngo Egutu mung" khyo nhao: ke' nae"- ga: ta" ra". 35 Moshe wa Israel byumyu" qeyang ngag: ha: pye' va" byu dayaug ngad: ra". Nao wa ngonhaung" dao mae agyi kad' nae" we' dao: kho' nae" tarha" zug: khag' yang kad' nhao: to" ra" i? ga: yao: bam yao: re myid' ako". Moshe wa myi: nga" na: ra" thao" paung" mae yao: re na: qhu" byid' ra" mug: lagyo" yang bao" thaug' byid' ru we' Israel byu qere eib nae" we' yao: bam re loe; beim nhao nae" qhid' mae" Mao"So: yang nhao: ke' ra" yaug ngad: ra". 36 Yao: wa Egutu mung" mae re: tham: ne mae re:- din"pyad' yo mae re:- zin lam: byid xe mug' pho: ve, lho we' mug' pho: mau" jham kad' qhu" yang: Israel byumyu" qere Egutu mung" mae" jhui" thug' lo" ra". 37 Moshe wa- Mao"So wa ngo re nhao: ke' ru we' dakhyo: lapa dayaug re naonhaung" jhao" nhao: ke' byid' li" nae". Yao: wa naonhaung" yao" byumyu" mae" ngad: li" nae"- ga: Israel byumyu" qere ta" ra" yaug ngad: ra". 38 Yao: wa din"pyad' yo mae Israel byumyu" qe we' daga" ham: na yang: ai: mae ngonhaung" phug' pho" qe we' re: Sina bam dao mae yao: we' dao: jhau: ra" mug: lagyo: we' daga" na: lo yaug ngad mung: ngonhaung" re au: qid lhai: byid: nae" kao so' daui: ra" Mao"So: mung dao: re qo" khae: yu: ra" yaug re: ngad: ra". 39 Ngadqere: ngonhaung" phug' pho" qe wa yao" mho dao: re ngag: pye' ako". Yao: bam wa Moshe re ngag: pye' mung: Egutu mung" khyo tug' lo" nug: ra" myid bo: ako". 40 Aimung: yao: bam wa Arun re- Ngonhaung" re au: jhui" she nae" ra" so jham re ngonhaung" qhid' mae" kad' byid: la,- ngonhaung" re Egutu mung" mae" jhui" thug' lo: ra" Moshe ga" ra" yaug pe" boe" byaug: rure ngonhaung" maba lo:- ga: ta" ako". 41 Amung: yao: bam wa- nung: jaung lo: lho dalam: sheim: mung:- Ai: sulho re zho: byid: yang: poe kad' caung:khin" byid' ako". 42 Aimung: lapa qe: tung" paug' mae Israel byumyu" qe we"- Din" pyad' yo mae zin lam: byid xe geim" naonhaung" ngaui" xeim: gug'nyhug' jham se' yang: xeim: ngaui" byid: ko" ru wa ngo re byid' ru mangad: ko" ngad: ra". 43 Naonhaung" yao: goe; pa" nae" kad' to" ra" solho jham ngad: ra"- Moleg so phan we' naonhaung" nho: Rephan ga" ra" kyi solho re naonhaung" dao: qin" ako". Amung: ngo wa naonhaung" re Babelon lai sho' taung" jhui" lo" nhao: ke' nae"- ga: tung" to" ru we' dakhyo: Mao"So yao: bam mae" myo,khung: phaug' lo" mung: mug:gaung mae" kyi jham re goe; pa" genae" qhid' mae" yao: bam re shapye' pye' va"- ga: ta" to" ra". 44 Ngonhaung" phug' pho" qe wa din"pyad' yo mae yao: bam we' daga" Mao"So bobo: rure sagse: qhu" byid' ra" Zaung re qo" yu: ako". Moshe re Mao"So ta" ra" akhyao we' dakhyo:- ai: zaung re kad' ako". 45 Thao re yao: bam: yao: pho" qemae" ai: zaung re xo' khae: yu: ra" ngonhaung" phug' pho" qe wa- Mao"So: yang khe' pye' ra" byumyu" qe: mung"dan: khyo Yoshu we' daga" vao ye" lo" ko" ra" au: re ai: zaung re dao: ye" lo" ako". Ai: zaung wa Davi pyad joe" sho' ai: mung"dan: mae jo; jo; ra". 46 Davi kho:kham wa Mao"So: qhid' kheim: mae myo,nho qo" mung: Yaku nho: Mao"So na: jo, nae" jo, qo kad' nae" qhid' mae" Mao"So re akhang" lhaung" mho' ra". 47 Mao"So: qhid' mae" yham kad' yaug wa Sholamon kho:kham angad: ra". 48 Ngadqere: myhao: thao" ra" Mao"So wa byu: lo; yang kad' ra" yham khug mae mana ngad: ra". Ai: khyo re lapa pho" wa Mug:gaung wa nga" zaung tao"- 49 ngad mung:- myid gaung wa nga" khyid zab tao" ngad: ra". Nao nga" qhid' mae" pe" ru" ra" yham qo" kad' byid: nae" i? Nga" qhid' mae" na jo, qo khotau mae ngad: ra" i? 50 Ai: gu: alhab' re ngoyao: phan" to" mangad: i?- ga: Asang ta" ra"- ga: ta" to" ru we' dakhyo: ngad: ra". 51 Stephan wa xo' yang:- Naonhaung" nhag' lam: gyai qao: ako". Naonhaung" nhag' lam: aung khug mae Mao"So mabo ko" ngad: ra". Mao"So: mung dao: re mathe' gyo" ra" nojid mo, ngad: ako". Naonhaung" wa naonhaung" phug' pho" qe we' dakhyo: Gyang" Lho" Byo re khonhae" re: ngag: pye' mo, ngad: ako". 52 Naonhaung" phug' pho" qeyang mayhin" qu" ra" lapa khoyaug na: ra" i? Yao: bam wa Mao"So: din:man" ra" daui daui yaug joe" lo nae" ga" rure ta" hau" kyo" ra" Mao"So: lagyo: qere se' pye' ako". Ana" naonhaung" wa ai: yaug re ab byid' pye' mung: se' pye' avako". 53 Naonhaung" wa mug: lagyo: qe:nhad' thoe khyo" yang Mao"So: tarha" re qo" khae: yu: ra" mo, ngad: ako". Ngadqere: naonhaung" ai re maphug' cao" ko" ngad: ra"- ga: ta" ra". 54 Yuda Tarha" Qe, Do, Phung: mae" mo, wa ai: dao: re the' gyo: gelao" yao: bam nhag' lam: zab zab zhau: li" sho' gyo" yo: mung:- Stephan re zaui kyag' kyag' yang: zhaug' qu" na: bam: ako". 55 Ngadqere: Stephan wa Gyang" Lho" Byo byang" jo, mung:- mug:gaung khyo tau: qu" ke' re Mao"So: phungbao we' Yesu wa Mao"So: lo, yo shad' mae ye; jo; rure myao: ra". 56 Ailao" Stephan wa- Qu" ge, Mug:gaung bung" li" mung: Byu: Yao: Zo: wa Mao"So: lo, yo shad' mae ye; jo; rure ngo the' myao va"- ga: ta" ra". 57 Yao: bam wa zag: hug' mung: yao: bam yao" nokhye' re lo; yang jhid' pye' yang: alhab' mo, dalhang: dae Stephan jhao" tao" ye" lo" mung:- 58 Yao: re vogaung: taung gaung khyo deim" geim: thug' lo" mung: laug baui: yang yepye' ako". Sagse: qe wa yao: bam: adao: bau: qhang jham re Sholu ga: mang: ra" Zolau: pho" re zam: nhao: ako". 59 Yao: bam airu: Stephan re laug baui: yang pye' na ko" au:- Stephan wa Asang Yesu we"- Nga" byo re khae: yu byid: la, ga:- Asang re mho' yao: ra". 60 Yao: wa pad' thaug' thaug' yang: thoe qi: we' Asang we"- yao: bam: qobo re daxam" to: byid: wa, wo"- ga: hug' ra". Ce: dao: bin: ta" lao" Stephan kao gyo" lo" ra". 1 Sholu wa Stephan re se' ru mae bomyid vang" ra". Ai: ba mae Yerusalem mae na: ra" lam khug: ra" phung: byu qe wa dayin dayo: yhin" ru qi: sho' qhug' ako". Lagyo: qemae" je yang: lam khug: ra" mo, alhab' wa Yuda mung" we' Samari mung" khaung: khyo gam: sho' phao: byo: sin" lo" ako". 2 Lam khug: myid kao bau: ra" mo, daqhae: wa Stephan re yenyhab' shaung: pye' mung: yao" mathao mae gyai kaug' ngug: ako". 3 Ngadqere: Sholu wa phung: re phyo' qheim" pye' nae" qhid' mae" qam: ke' ra". Yao: wa dayham bin dayham khyo cao" vao ye: mung:- lam khug: ra" mo, myiqe: yauggai alhab' re yeshe: khyad' thug' yu yang: yao: bam re thaung: mae lhaung" to" ra". 4 Jo, qo khao: ngo" khyo byo: sin" lo" ra" lam khug: ra" mo, wa- joe" ra" jo, qo khao: ngo" mae mung dao: re cao" kho" kyo" ako". 5 Philib wa Samari mung" mae" vomo" khyo ye: mung: ai: vobyu qere Meshia khyo we' sin: yang: yekho" kyo" ra". 6 Mo, byu qe wa Philib ta" ra" dao: re tae" gyo: yang:- yao: kad' qhu" ra" mug' pho: ve, lho jham re myao gelao"- yao: bam wa nhag' lam: zaug zaug za: yao" mung dao: re tae" gyo" yu: ako". 7 Makhyang" ra" yui jham wa mo, byu qe myo: sho' mae" gyi: hug' yang: phao: thug' lo" ko" ra". Amung: gaung jam: shid mo, myo: sho' we' khyid qeim mo, myo: sho' mo, gai shao: lo" byaug: ako". 8 Ai mung: vomo" khug mae" byu qe gyai ngaui bau" ako". 9 Ai: vogaung: mae Simon ga: mang: ra" byu dayaug wa yao" vha" ra" pha,jhi" yang Samari byu qere mug' nhao: ra". 10 Simon yao: yao" gaung re gyai boe" yaug ngad: ga: phug: ta" to: yang: byu angai aqi: alhab' mo, yao" dao: re nhag' lam: zaug zaug za: tae" gyo" ako". Yao: wa qi" ra" qam: so' ga" ra" Mao"So: qam: so' qo" yaug ngad: ra" ga: yao: bam ta" ako". 11 Yao: wa yao" vha" ra" pha,jhi" yang yao: bam re mug' nhao: lo: ru myao" va" ru: yang yao: bam wa airu: yao: re nhag' lam: zaug zaug za: tae" gyo" ako". 12 Ngadqere: Mao"So: mung"dan: Lau Dao: Gai we' Yesu Khristu khyo we' sin: yang: Philib kho" kyo" ra" mung dao: re yao: bam lam" gemung:- yao: bam wa myiqe: yauggai alhab' mo, Qid nyhab' kham yu: ako". 13 Simon yao: re: lam" mung: Qid nyhab' kham bin: kham: yu thao re Simon wa Philib thao cao" mung:- Philib kad' ra" mug' pho: ve, lho jham re we' mug' pho: mau" jham re the' myao lao"- yao: wa gyai mug' hao" byaug: ra". 14 Yerusalem mae na: ra" lagyo: qe wa Samari byu qe Mao"So: mung dao: re khae: yu vako" ra" ga" ra" thoe re the' gyo: gelao"- yao: bam wa Petru we' Yohan shid' zo: re yao: bam jhao" nhao: ke' ako". 15 Yao: shid' zo: joe" ye: gelao:- lam khug: ra" mo, Gyang" Lho" Byo qo" khae: yu genae" qhid' mae" yao: shid' zo: wa yao: bam: qhid' mae" akyu" mho' byid' ako". 16 Pe"mung:ga"re yao: bam dayaug: dao mae re: Gyang" Lho" Byo majoe" gyo" li" shi: ngad: ra". Yao: bam wa Asang Yesu mang mae qid nyhab' kham: yu: to" ru shi" za: angad ko" ra". 17 Aimung: Petru we' Yohan shid' zo: wa yao: bam: dao mae yao: shid' zo" lo, kai: byid: mung:- yao: bam wa Gyang" Lho" Byo qo" khae: yu: ako". 18 Lagyo: shid' zo" lo, yao: bam: dao mae kai: byid: lao"- lam khug: ra" mo, Gyang" Lho" Byo qo" khae: yu ko" rure Simon the' myao lao"- yao: wa Petru we' Yohan shid' zo: re ngaui byid: mung:- 19 Nga" lo, kai: byid' ra" yaug khag' ngadqere: Gyang" Lho" Byo qo" khae: yu nae" qhid' mae" ai: qam: so' ngo rere: byid: gela, ga:- mho' ra". 20 Ngadqere: Petru wa yao: re- Nao wa Mao"So: jhaung qhu" re ngaui: yang qo" vai nae" ga: myid: jho: na: ruyang- nao we' ni" ngaui wa myiqid tham: khyo vao ye: geshao: ga: phaug' tau" ra". 21 Ni" nhag' lam: wa Mao"So: qhid' kheim: mae madin" ruyang ngonhaung" mau" zo" mae maqo" bo ngad: ra". 22 Aimung:- ce: makhyang" ra" lo, mau" mae" myid tha" wa,- airu: myid: jho: shad' ra" qobo re khyad' pye' byid: nae" qhid' mae" Asang re akyu" mho' wa,- 23 pe"mung:ga"re nao wa myid nug: myid khyad' ru xo sho' we' qobo: yang taui" jab: to" ra" byu dayaug ngad: rure ngo qu" myao: ra"- ga: ta" ra". 24 Simon wa Petru we' Yohan shid' zo: re- Ni" shid' zo: ta" ra" gu: pe" daja: re: nga" au: dao mae majoe" li" vashao:- nga" qhid' mae" Mao"So re akyu" bao" mho' byid: gela,- ga: ta" ra". 25 Yao: shid' zo: wa Yesu khyo we' sin: yang: sagse: kham: kyo: mung: Asang: mung dao: re bin: kho" kyo: lao"- Petru we' Yohan wa Yerusalem khyo dam: phao: lo" ako". Yao: shid' zo: wa phao khyo mae jo; ra" Samari vogaung: jham myo: sho' mae Lau Dao: Gai cao" kho" kyo" lo: ako". 26 Asang: Mug: Lagyo: dayaug wa Philib re- To" wa,- Yerusalem mae" Gaza khyo joe" ra" khyo khyo" qid bang: shad' khyo ye" lo" wa,- ga: ta" ra". (Ce: khyodang wa din"pyad' yo khyodang ngad: ra".) 27 Ai mung: Philib wa to" ye" lo" ra". Ana" Ethiopia mung"dan: re eib: na: ra" kho:kham myhi" Kandake nho: jo, nho" alhab' re zam" ra" au: jhaung: zug: pho"- unug re: ngad: ra" Ethiopia zug: pho" dayaug wa yao" yham khyo phao: lo" na: ra". Yao: wa Yerusalem khyo ye: mung: Mao"So re ye:caung:pa" bin yang: yao" myao: lhin" dao mae zaung: jo, mung: lapa Esaia jham: paug' re nghe' na: ra". 29 Gyang" Lho" Byo wa Philib re ai: myao: lhin" khyo te' te' ye" lo" wa, ga: ta" ra". 30 Philib tao" ye" lo" re ai: zug: pho" wa lapa Esaia jham: paug' mae" jham: dau re nghe' na: rure yao: yethe' gyo: mung:- Philib wa ai: zug: pho" re- Nao nghe' na: ra" jham: dao: re nao ba: gyo" i?- ga: myid' ra". 31 Ai: zug: pho" wa Lajheim: pheim: kyo: yaug mana re- ngo khoru: qo" ba: gyo: nae" i?- ga: tau: mung:- myao: lhin" khug khyo do, li" mung: yao: we' daga" li" zaung nae" qhid' mae" Philib re lhaung: ra". 32 Yao: nghe' na: ra" jham dau wa- Se' pye' nae" yao re we' dakhyo:- Yao: re jhui" she: ye" lo" ako". Yao mug' qaug: ra" au: sae za: tae" to" ra" yao nau" we' dakhyo:- yao: wa dao: dakheim: re: majhau ngad: ra". 33 Yao: wa nyham: khyo" pye' ru qhug' mung:- madin: man" ra" khyo" dao: kho' ru qhug' ra". Yao" kao so' re myid gaung dao mae" yu: pye' byid: yang: yao" myid:zo: byuxag' re khag' re: maqo" she' ngad: ra"- ga" ru ngad: ra". 34 Ailao" ai: zug: pho" wa Philib re- Lapa pho" wa khoyaug: khyo re ta" ru ngad: ra" i?- Yao: yao" khyo re i?- Mangad: lao" gatau dayaug: khyo re ta" ru ngad: ra" i?- ngo re ta" kyo: la, ga: ta" ra". 35 Ai: thao Philib wa- ai: jham: dau mae" qhid mung: Yesu khyo we' sin: yang: Ngaui Bau" Lau Dao: Gai yao: re kho" kyo: byid' ra". 36 Yao: shid' zo: airu: su" gyo" lo ko" au: qid jo; ra" jo, qo khyo joe" lo: ako". Ailao" ai: zug: pho" wa- Qu" wa, cetau mae qid jo; ra"- Ngo qid nyhab' kham: yu nae" ru mae kham" to: nae" pe" ja: jo; ra" i?- ga: myid' ra". 37 (Philib wa yao: re nao wa Yesu Khristu re ni" nhag' lam: aung khug alhab' we' lam va" ngad: re wa nao Qid nyhab' kham gai: kham: yu: ra" ga: ta" ra". Ailao" ai: zug: pho" wa- Yesu Khristu wa Mao"So: Yao: Zo: ngad: rure ngo lam" ra"- ga: tau" ra".) 38 Ailao" ai: zug: pho" wa myao: lhin" re thang nae" amyin" byid: mung:- yao: shid' zo" geim" qid khyo gyo" ye: mung:- Philib wa ai: zug: pho" re qid nyhab' kham: byid' ra". 39 Yao: shid' zo: qid mae" do, lo lao"- Asang: Byo wa Philib re jhui" lo" byaug: ra". Ai: zug: pho" wa Philib re madam: myao lo:ngad: ra". Yao: wa ngaui bau" ru we' yao" gyaung: khyo mae dam: xo' phao: lo" ra". 40 Philib wa Azotu vogaung: mae lo" joe" rure myao: ra". Amung: yao: wa Kesarea khyo ye" lo" ra" gyaung: khyo cao" yang: vogaung: khao: ngo" mae Ngaui Bau" Lau Dao: Gai re cao" kho" kyo: byid' ra". 1 Ai: gyo: re Sholu wa Asang: thao cao" ra" mo, re se' da be, khyad' kad' nae" qhid' mae" kyaug' na: ra". Yao: wa Khinjaung Yin" jhao" ye: mung:- 2 Asang: nho: khyo re phug' cao" na: ra" yauggai myiqe: qere myao: ngad: re- yao: bam re taung" yu mung:- Yerusalem khyo dam: jhui" tug' lo nae" qhid' mae" khinjaung pho" jhao" ye: mung:- Damasku vogaung: mae" Yuda tarha" jung yham jham khyo bang" se" byid' ra" akho: akhang" mugsug' re mho' yu: ra". 3 Sholu Damasku vogaung: nhae mae joe" ye" lo" au: nyag din taung" mug:gaung mae" bo" bao wa avai: ayae mae bao: thug' li" ra". 4 Sholu wa myid gaung khyo gyang: goe; lo" ra". Ai: thao yao: wa Sholu- Sholu- nao ngo re pe" mung: yhin" i? ga" ra" thoe dathoe re the' gyo" ra". 5 Sholu wa Asang we"- Nao khag' ngad: i? ga: myid' ra". Ai: thoe wa- Ngo wa nao yhin" na: ra" yaug Yesu ngad:- 6 Ngadqere: to" mung: vogaung: khyo vao ye" lo" wa,. Ai mae nao kad' ca" ra" khyo re nao re ta" kyo" li" nae"- ga: ta" ra". 7 Sholu we' daga" gyaung: su" na: ra" mo, wa dao: dakheim: re: majhau lo: thang: jo; ako". Yao: bam wa thoe re the' gyo: gengadqere: khag' dayaug rere: mathe' myao ko" ngad: ra". 8 Sholu wa myid gaung mae" to" li" mung:- yao" myo, phung" ke' ra"- ngadqere: pe" rere: mayao lo:ngad: ra". Amung: Sholu re lo, mae" she yang: Damasku vogaung: khyo jhui" vao ye" lo" ako". 9 Sholu wa sam ba lam: lam: myo, mamyao ngad: ra". Ai: ba na gyo: mae yao: wa pe" re: mazo: mashaug' lo: na: jo; ra". 10 Damasku vogaung: mae Anania ga: mang: ra" lam khug: ra" byu dayaug na: ra". Qhu" lho mae Asang wa yao: re Anania we" ga: ta" re- Anania wa Asang we"- ngo cemae na: wo"- ga: tau" ra". 11 Ailao" Asang wa yao: re- To" mung:- Khyodin: thaung:- ga" ra" hau" mo" khyodang khyo ye" lo" wa,- amung: Yuda nho: yham mae Tarshu vobyu Sholu ga" ra" yaug re yeqho: myid: wa,- yao: wa akyu" mho' yang: na: ra". 12 Yao: wa qhu" lho mae- Anania ga" ra" byu dayaug vao li" mung: yao: myo, dam: myao: li" nae" qhid' mae" yao" au: mae lo, kai: byid' rure myao: ava"- ga: ta" ra". 13 Ailao" Anania wa- Asang we"- Ceyaug wa Yerusalem vogaung: mae na: ra" au: ni" byu qere qu" gyaug qu" lhaung yhin" lai: lo: ra"- ga" ra" lau dao: re byu myo: sho' mo; nhad' mae" the' gyo: va". 14 Ai: tho' mago"- nao re caung:pa" ra" mo, alhab' re taung" yu nae" qhid mae" khinjaung qi: qemae" kheim: so' mugsug" vin yang: ce: Damasku vogaung: khyo joe" li" ra" yaug ngad: ra"- ga: ta" ra". 15 Asang wa Anania re- Ye" lo" wa,- pe"mung:ga"re yao: wa taung bug qere re: kho:kham qere we' Israel amyu" qere re: nga" mang cao" ta" hau" kyo: nae" we' ngo re caung da" nae" qhid' mae" ngo khyin: yu: to: yaug ngad: ra". 16 Nga" mang mathao mae yao: dayin dayo: kham zo: ca" ra" gu: alhab' re yao: re ngo qhu" byid: nae"- ga: ta" ra". 17 Airumung: Anania wa Sholu na: ra" yham khyo vao ye: yang:- Sholu dao mae yao" lo, yekai: byid: mung: Mao:nhaung: pho" Sholu we"- nao ce: vogaung: khyo li" na: ra" au: khyodang mae nao re qhu" byid' ra" Asang Yesu yao" yang yao: ngore nhao: ke' ru ngad: ra". Yao: wa nao myo, dam: myao: li" nae" qhid' mae" we' Gyang" Lho" Byo byang" vashao:- ga: ngo re nao jhao" nhao: ke' ru ngad: ra"- ga: yao: re ta" ra". 18 Ailao" jao" yao:- Sholu nho: myo, jid' mae" ngokye' ru" ra" akye' jham qid' gyo" lo" mung:- yao: wa myo, dam: myao: li" ra". Alao" yao: wa to" li" mung:- Qid nyhab' kham yu: ra". 19 Ai: thao yao: wa zo:ve dam: zo: mung: qam: dam: byang" li" ra". 20 Sholu wa Damasku vogaung: mae lam khug: ra" mo, we' daga" dayo, zo: na: jo; ra". Yao: wa Yuda tarha" jung yham jham khyo din: za: ye: mung:- Yesu wa Mao"So: Yao: Zo: ngad: ra"- ga" rure kho" kyo" ra". 21 Yao" dao: re the' gyo" ra" mo, alhab' wa gyai mug' hao" byaug: ru we' Byu ceyaug wa Yerusalem vogaung: mae ai: Yesu ga" ra" yaug re caung:pa" ko" ra" mo, re lhaung" se' ra" yaug ngad: ra" mangad: i? Ai bam re taung" yu yang: khinjaung qi: qejhao: jhui" lo" nae" qhid' mae" ce: vogaung: khyo joe" li" yaug mangad: i?- ga: ta" ako". 22 Ngadqere: Sholu wa kho" kyo" ru mae je yang: qam: bo: li" mung:- Yesu wa Meshia ngad: ra"- ga" rure sagse: we' khyag' khyag' kho" kyo: byid' ruyang Damasku vogaung: mae na: ra" Yuda byu qe wa yao" dao: re maqo" phaug' ko" ngad: ra". 23 Myo: sho' ba lai: lo" thao re- Yuda byu qe wa Sholu re se' nae" qhid' mae" pha,jhi" khyug' ako". 24 Ngadqere: ai re Sholu ba: pye' ra". Yuda byu qe wa Sholu re se' pye' nae" qhid' mae" vogaung: kham: dung: mae myi" re: na" re: lham: na: ako". 25 Ngadqere: damyi re Sholu nho: mho"zo: qe wa yao: re jhui" yu mung:- gyan khug mae zaung nhao yang: vang khinqae bao: zo: kham: khyo" yao: re shoe' khyo" ke" ako". 26 Sholu wa Yerusalem vogaung: khyo joe" ye: lao"- mho"zo: qe we' zam" khug nae" qhid' mae" qam: ke' ra". Ngadqere: yao: bam wa yao: wa mho"zo: dayaug ngad va" ga" rure malam" gemung:- yao: bam alhab' mo, Sholu re gyaug: ako". 27 Ai: thao re Barnaba wa Sholu re lagyo: qejhao" jhui" ye: mung:- khyodang mae Sholu Asang khoru: qhug' ra" khyo rere: Asang Sholu re khoru: dao: jhau va" rure re:- Sholu wa Damasku vogaung: mae Yesu mang re lao: yang: khoru: mazag mavae kho" kyo" lo: ra" khyo jham rere: lagyo: qere ta" kyo" ra". 28 Airumung: Sholu wa lagyo: qe we' daga" ye: daga" na mung:- Yerusalem vogaung: mae lagyo: qe we' daga" Asang: mang re lao: yang: mazag mavae cao" kho" kyo" ra". 29 Sholu wa Greeg myan" jhau: ra" Yuda byu qe we' re: jho" ta" ngag: ra". Yao: bam kam" wa Sholu re se' pye' nae" seim" ako". 30 Cekhyo re- lam khug: ra" phung: byu qe ba gelao"- yao: bam wa Sholu re Kesarea vogaung: khyo jhui" ye" lo" mung: aimae" Tarshu khyo yao: re nhao: ke' ako". 31 Aimung: Yuda mung" Galile mung" we' Samari mung" khaung: geim" mae" phung: qe wa yhin" ru maqhug' lo: dayo, zo: yaug yo za: qo" na: ako". Phung: wa Asang re gyaug phug' ru we' kao so' daui mung:- Gyang" Lho" Byo bao" thaug' ruyang phung: qam: bo: lo: ru we' phung: byu qe je yang: myo" laug: li" ako". 32 Petru wa jo, qo khyi" khao: ngo" khyo cao" du" kam" qin" mung: dalhang mae Luda vogaung: mae na: ra" Mao"So: byu qejhao" dalhang yedu" kam: co' ra". 33 Ai: vogaung: mae gaung jam: shid mung: she' zin lam: lam: yab qo mae" maqo" to" lo" ra" Ainea ga: mang: ra" byu dayaug re Petru myao: ra". 34 Ailao" Petru wa ai: gaung jam: shid yaug re- Ainea we"- Yesu Khristu wa nao re gai byid' ava"- To" mung:- ni" yab qo nyhang" wa,- ga: ta" ra". Ailao" jao" Ainea wa to" li" ra". 35 Luda vogaung: mae we' Sharon vogaung: mae na: ra"- mo, byu qe alhab' wa Ainea re myao gelao"- Asang: shad' khyo phaug' lo: ako". 36 Yopa vogaung: mae Tabitha ga: mang: ra" lam khug: ra" myiqe: dayaug na: ra". (Yao" mang wa Greeg myan" khyo" Dorka ga" ru ngad mung:- Dorka ga" ru wa Xe' ga" ru ngad: ra".) Yao: wa khonhae" re: gai: ra" mau" zo" kad' na mung:- myaung sho" ra" mo, re bao" thaug' na: ra" myiqe: ngad: ra". 37 Ai: ayo, mae yao: wa no mung: shid: lo" ra". Yao" mao gaung re cid' shaung: pye' mung: tho' pyae: qe, mae mhao" to" ako". 38 Yopa vogaung: wa Luda vogaung: we' mataung" jho" va: ngad: ra". Amung: Yopa vogaung: mae na: ra" lam khug: ra" mo, wa Luda vogaung: mae Petru joe" na: ra" ga" ru the' gyo: gelao"- yao: bam wa byu shid' yaug re Petru jhao" nhao: ke' mung:- Ngonhaung" jhao" phyad phyad li" la, ga"- ga: ta" nhao: ke' ako". 39 Airumung: Petru wa to" mung: ai shid' zo: we' daga" cao" ye" lo" ra". Petru joe" ye: lao"- yao: bam wa Petru re tho' pyae: qe, khyo jhui" do, lo" ako". Cug' mo" qe alhab' wa ngug yang: Petru lhang" gam: mae zang" ham: na mung:- Dorka yao: daui: na shi" au: re khyab' to: co' ra" mai bau: jham alhab' re Petru re ci: qhu" ako". 40 Ailao" Petru wa yao: bam alhab' mo, re taung gaung khyo thug' lo" nhao mung: pad' thaug' thaug' yang: akyu" mho' ra". Ai: thao re mao gaung shad' khyo lhang: lo mung:- Tabitha we" to" wa,- ga: ta" ra". Dorka wa myo, phung" ke' mung:- Petru re the' myao lao" yao: wa to" zaung: ra". 41 Petru wa yao" lo, yheim" ke' mung: yao: re she: to" ke' ra". Ai: thao Petru wa cug' mo" qe we' daga" lam khug: ra" mo, alhab' re khai: yu yang: Dorka re adaui yao: bam re ab byid' ra". 42 Ce: lau dao: wa Yopa vogaung: geim" byang" sho' hau" nhao" lo" mung:- byu myo: sho' mo, Asang re lam" ako". 43 Petru wa Yopa vogaung: mae shoqid mau" kad' ra" Simon ga: mang: ra" yaug we' daga" myo: sho' ba thang: na: ra". 1 Kesarea vogaung: mae Itali tab ga" ra" Roma gyetab datab re eib: ra" gyezug: pho" Koneliu ga: mang: ru dayaug na: ra". 2 Yao: wa Mao"So: khyo re kao bau yaug ngad mung:- yao: we' yao" yham khug: byu alhab' mo, wa Mao"So re caung:pa" ako". Yao: wa myaung sho" ra" Yuda qere myo: sho' bao" thaug' byid: mung: Mao"So re abang mabyid akyu" mho' na: ra". 3 Daba mae" myi" thao sam yo, qug ko re Mao"So: mug: lagyo: dayaug wa yao: jhao" li" mung:- Koneliu we"- ga: yao: re li" khai: rure qhu" lho mae de: de: za: the' myao: ra". 4 Yao: wa gyaug: ru we' ai: mug: lagyo: re zhaug' qu" mung:- Nhag' bo we"- ai wa pe" ngad: i?- ga: myid' ra". Mug: lagyo: wa yao: re- Mao"So wa ni" akyu" mho' thoe re we' ni" aung lam Alu: gae byid' rure ngaui mung:- ni" mho' thoe re tau: byid: nae" jin" jin" ngad: ra". 5 Amung: ana"- Yopa vogaung: khyo byu nhao: ke' mung: Simon Petru ga: mang: ra" yaug re yekhai: jhui" yu nhao wa, 6 yao: wa panglai: yae mae" shoqid mau" kad' ra" Simon ga: mang: ra" yaug: yham mae thang: na: ra"- ga: ta" ra". 7 Mug: lagyo: phao: lo" byaug thao re Koneliu wa yao" yham mae" daui daui o:kaung shid' yaug re we' Mao"So: khyo re kao bau: ra" yao" kao lhaug' gyezo: pho" dayaug re khai: yu mung:- 8 boe" lai: lo" ra" khyo alhab' yao: bam re ta" kyo: yang:- yao: bam re Yopa vogaung: khyo nhao: ke' ra". 9 Ai: thao: ba re yao: bam ye" lo" mung:- Yopa vogaung: nhae khyo joe" ye" lo" na: ako". Ba khaung tau yo, ko re Petru wa akyu" mho' nae" qhid' mae" yham khaung dao: pyae khyo do, lo" ra". 10 Yao: wa vae: moe' li" mung:- zo:ve zo: nug: li" ra". Zo: ve nyhang" jaung: na: ra" au:- yao: wa qhu" lho dalam: re myao: ra". 11 Ai: qhu" lho mae mug:gaung bung" li" mung:- byid khyug geim" mae" zaui" ci: ra" mai pho' we' dau: ra" ru daja: myid gaung khyo shoe' khyo" ke' byid' rure yao: myao: ra". 12 Ai: khug mae byid khyid de; ra" gug'nyhug' ja: cao jab- yoe" du" lhau: ra" gug'nyhug' ja: cao jab we' ngho' jhid' ngho' zo: ja: cao jab alhab' bo: ra". 13 Ailao" Petru we"- To" yang: se' zo: wa,- ga: thoe dathoe jhau: thug' li" ra". 14 Ngadqere: Petru wa Asang we"- dajhid' re: magai: boe" ngad: ra". Ai: maca' majhad' ja: ngo khonhae" re: mazo:- ga: tau" ra". 15 Ai: thoe wa- Mao"So: yang san sin" ra" ga" rure masan masin" ein: nao data" wa,- ga: dam: jhau: thug' li" ra". 16 Sam lhang airu: boe" mung:- thao re ai: rure mug:gaung khyo dam: to' yu: pye' ra". 17 Petru wa ce: qhu" lho: lajheim: re myid: mug' na shi" au:- Koneliu yang nhao: ke' ra" mo, wa Simon yham re qho: myid' yu yang:- yao: bam wa yham kheim: kham: dung: mae lo: ye; jo; ako". 18 Yao: bam wa- Simon Petru ga: mang: ra" bang" vo dayaug mana i? ga: yao yang: myid' ako". 19 Petru ai: qhu" lho we' sin: mung: myid: qu" na: shi" au:- Gyang" Lho" Byo wa yao: re- Qu" wa,- cetau mae byu sam yaug wa nao re qho: na: ako". 20 Aimung: seim" nyhang" yang: gyo" lo" wa,- pe"mung:ga"re ngoyang nhao: ke' ru ngad mung:- aug' o: myid mabo lo:- yao: bam: thao cao" ye" lo" wa,- ga: ta" ra". 21 Airumung: Petru wa- gyo" lo" mung:- yao: bam re Naonhaung" qho: na: ra" yaug wa ngo ngad:- naonhaung" pe" mung: joe" li" ko" i? ga: myid' ra". 22 Yao: bam wa- Ngonhaung" re gyezug: pho" Koneliu yang nhao: ke' ru ngad:- Yao: wa byugai dayaug ngad mung:- Mao"So re caung:pa" ra" yaug ngad: ru we' Yuda byu qe alhab' yang phug' myao" ra" yaug ngad: ra". Ni" mung dao: re yao: qo" tae" gyo" yu nae" qhid' mae" mug: lagyo: dayaug wa nao re yao" yham khyo khai: yu nae" yao: re ta" ra"- ga: ta" ako". 23 Ailao" Petru wa yao: bam re khai: vhao" yu mung:- Ai: myi yab genae" qhid' mae" yao: bam re lhaung: ra". Thao: ba re yao: wa seim" jin" yu mung: yao: bam we' daga" cao: lo" ra". Yopa vogaung: mae na: ra" lam khug: ra" mo, daqhae: re: Petru we' daga" cao" ye" lo" ako". 24 Ai: thao: ba re yao: wa Kesarea khyo joe" ye" ra". Aimae Koneliu wa yao" amyu" ba nam zo: qe we' yao: khai: to" ra" ba nam qe we' daga" Petru re lao" na: ra". 25 Petru joe" vao lo lao"- Koneliu wa yao: re yetug: yu mung: Petru: khyid qao: mae goe; gyo" lo" mung: yao: re goe; pa" ra". 26 Ngadqere: Petru wa- To" ye, wa,- Ngoyao: re: byu za: angad:- ga: ta" mung:- yao: re she: to" ke' ra". 27 Petru we' Koneliu jho" jhau zo" re" yham khug khyo vao lo" ko" re yham khug mae- mo, byu qe myo: sho' mo, zang" ham: na: rure Petru lo" myao: ra". 28 Petru wa yao: bam re- Yuda byu dayaug wa Taung bug byu qe we' daga" magai: na magai: zam" khug ga:- yao" caung:pa" thung" khyo" yang tam" to" rure naonhaung" yao: nyang" za: ba gau ngad: ako". Ngadqere:- khag' re ngad qere: caung:pa" thung" khyo mae masan masin" ru mangad: lao"- maca' majhad' ru ngad: ra" ga: magai: myid: rure Mao"So wa ngo re qhu" byid' ava". 29 Airumung:- nao ngo re khai nhao: ke' ra" au:- ngo wa pe" maha lo: cao" li" va"- amung: nao ngo re khai nhao: ke' ra" khyo re ta" kyo: la,- ga: ta" ra". 30 Ailao" Koneliu wa- Lai: lo" ra" sam ba mae myi" thao sam yo, qug ko re ngo wa yham khug mae akyu" mho' yang: na: au: nyag din taung"- bao qhui: ra" mai bau: ve; ra" byu dayaug nga" qhid' au: mae li" ye; jo, mung:- 31 Koneliu we"- Ni" akyu" mho' thoe re Mao"So the' gyo" ava"- ni" aung lam Alu: gae byid' ra" mau" zo" jham rere: the' myao: ava". 32 Airumung: Yopa vogaung: khyo byu nhao: ke' yang: Simon Petru ga" ra" yaug re khai nhao: ke' wa,. Yao: wa panglai: yae mae" shoqid mau" kad' ra" Simon ga: mang: ra" yaug: yham mae bang" na: ra"- ga: ngo re ta" ra". 33 Airumung: ngo wa ailao" jao" nao jhao" byu nhao: ke' ra". Nao joe" li" mung: gyai gai va"- yao: nao re ta" nhao: ke' ra" mung dao: alhab' re tae" gyo" yu nae" qhid' mae" Mao"So: qhid' kheim: mae ana" ngonhaung" alhab' mo, cetau mae lao" na: bam va"- ga: ta" ra". 34 Ailao" Petru wa- Mao"So wa yaug khao: ngo" re myo, nho nga: lao: makhyin lo: dakhyo: za: kad' rure ngo ana" dang za: ba va". 35 Pe" ja" byumyu" ngadqere: yao: re caung:pa" mung: din: man" ra" khyo re phug' cao" ra" yaug re wa Mao"So khae: yu: ra". 36 Alhab' mo; Asang ngad: ra"- Asang Yesu Khristu khyo" yang Israel byumyu" qere Mao"So ta" hau: byid' ra" ngaui pyo: yaug yo: ra" Lau Dao: Gai mung dao: re naonhaung" ba: ako". 37 Yohan wa yao: Qid nyhab' kham mung dao: re bin: kho" kyo: thao Galile mung" mae" qhid mung: Israel mung"dan: geim" jao: sho' boe" lo: ra" mau" zo" khyo re naonhaung" ba: ako". 38 Amung: Nazared mae" Yesu re Mao"So wa Gyang" Lho" Byo we' qam: so' khoru: vhe' sheim: byid' ra" khyo rere: naonhaung" ba: ako". Pe"mung:ga"re Mao"So wa yao: we' daga" ngad mung:- yao: wa jo, qo khyi" khao: ngo" khyo cao" du" qin" yang: gai: ra" mau" zo" re kad' mung:- yui: qam: so' qao: mae na: ra" mo, alhab' re cao" gai byid' ra". 39 Yerusalem vogaung: mae we' Israel mung"dan: geim" Yesu kad' ra" lo, mau" alhab' we' sin: yang:- ngonhaung: wa sagse: qe ngad:. Ai: thao yao: bam wa Yesu re pyao: zang mae jin" se' pye' ako". 40 Ngadqere: sam ba kyo thao re Mao"So wa yao: re shid: ru mae" daui: to" li" nhao mung: yaug khao:ngo" re mangad: lo:- 41 Sagse: qe ga:- Mao"So: yang khyin: to" ra" mo,- yao: dam: daui: to" li" thao yao: we' daga" zo: shaug' ra" ngonhaung" re za: qhu" byid' ra". 42 Yao: wa byu alhab' mo, re Ngaui Bau" Lau Dao: kho" kyo: byid: nae" we' yao: wa kao so' daui: na: ra" mo, re dao: kho' nae" qhid' mae" Mao"So: yang san: to" ra" tarha" agyi ngad: rure sagse: kham byid: nae" qhid' nae" ngonhaung" re yao: amyin" byid' to" ra". 43 Yao: re lam: ra" mo, yaug khao: ngo" wa yao" mang kheim: so' khyo" yang qobo khyad' pye' byid' ru qhug' li" nae" ga:- yao" khyo we' sin: mung: lapa qe alhab' mo, ta" ako"- ga: ta" ra". 44 Airumung: Petru jhau: na shi" au:- yao" mungdao: re tae" gyo" na ko" ra" byu alhab' mo; dao mae Gyang" Lho" Byo joe" gyo" li" ra". 45 Taung bug byu qe: dao mae re: Mao"So wa yao" Gyang" Lho" Byo jhaung qhu" re vhe' sheim: byid' ruyang- Yopa vogaung: mae" Petru we' daga" joe" li" ko" ra" Yuda byumyu" lam khug: ra" mo, wa mug' hao" byaug: ako". 46 Pe"mung:ga"re yao: bam wa myan" aja: ja: jhau mung:- Mao"So nho: qi" qhang: ra" khyo qi: sho' caung:khin" byid' na: rure yao: bam the' gyo: yang:- ngad: ra". 47 Ailao" Petru wa- Cebam wa ngonhaung" we' dakhyo:- Gyang" Lho" Byo re qo" khae: yu: avako". Amung: yao: bam qid: yang qid nyhab' kham: yu nae" rure khag' qo" tam" ko" i?- ga: ta" thug' ke' ra". 48 Aimung: Petru yao: bam re Yesu Khristu mang mae qid nyhab' kham: yu genae" qhid' mae" amyin" byid' ra". Ai: thao re yao: bam wa Petru re yao: bam we' daga" dayo, zo: thang: na nae" qhid' mae" mho' ako". 1 Taung bug byu qere:- Mao"So: mungdao: re khae: yu vako" ra"- ga" rure lagyo: qe we' Yuda mung" geim" mae na: ra" lam khug: ra" mo, the' gyo" ako". 2 Petru Yerusalem vogaung: khyo joe" lo lao"- Taung bug byu qe au: qid lhai" ra" thung" re kham: yu ca" ga: ngaui: ra" mo, wa Petru re- 3 Nao wa au: qid malhai" ra" Taung bug byu qe: yham khyo lae" ye: mung: yao: bam we' lhao" re: daga" zo: shaug' ra"- ga: qobo vhin: ako". 4 Airumung: Petru wa boe" lo: ra" khyo re aqao: mae" athao jao: sho' yao: bam re ta" kyo" ra". 5 Ngo wa Yopa vogaung: mae akyu" mho' na: au:- qhu" lho dalam: re the' myao:- byid khyug geim" mae zaui" ci: ra" mai pho' we' dau: ru daja: mug:gaung mae" shoe' khyo" ke' byid' rure ngo myao:. Ai: ru wa nga" nhae mae thang: jo; ra". 6 Ai: khug khyo ngo nyang" za: qu" ke' re mai" ru we' kyao: ra" byid khyid de; ra" gug'nyhug' jham- yoe" du" lhau: ra" gug'nyhug' jham- ngho' jhid' ngho' zo: alae" jham re ngo myao:. 7 Ai: thao re- Petru we" to" wa,- Se' zo: wa,- ga: jhau: ra" thoe re ngo the' gyo". 8 Ngadqere: ngo wa- Asang we" dajhid' re: magai: boe"- ai: caung:pa" thung" khyo" maca' majhad' ra" ja: mangad: lao"- masan masin" ra" zo:ve re ngo khonhae" re: mazo" qu" ein: phaug' tau". 9 Ai: thao wa- Mao"So: yang san sin" ra" gu: rere: masan masin" ein: nao data" wa, ga: mug:gaung mae" dam: jhau: thug' li" ra". 10 Sam lhang airu: boe" mung: thao re- ai: rure mug:gaung khyo dam: to' yu: pye' ra". 11 Ai: au: re yao: Kesarea vogaung: mae" ngo jhao" nhao: ke' ra" byu sam yaug ngo na: jo; ra" yham khyo joe" li" ako". 12 Gyang" Lho" Byo wa dajhid' re: maaug' o: lo: yao: bam: thao cao" ye" lo" nae" ngo re ta" ra". Yopa vogaung: mae" ai: lam khug: ra" byu khyaug' yaug re: ngo we' daga" Kesarea vogaung: khyo bocao" li" ako". Ngonhaung" alhab' mo, wa Koneliu yham khyo vao ye". 13 Korneli wa- yao" yham khug mae mug: lagyo: dayaug li" ye; jo; rure the' myao: ra" khyo rere:- ai: mug: lagyo: pho" wa- Yopa vogaung: khyo byu nhao: ke' yang: Simon Petru ga: mang: ra" yaug re yekhai: jhui" yu wa,. 14 Ai: yaug wa nao we' ni" yham khug: byu qe khyad' yu: ru qhug' nae" ra" mungdao: re kho" kyo" li" nae" ga: yao: re ta" ga" rure re: ngonhaung" re ta" kyo" ra". 15 Amung: ngo dao: jhau: qhid we' Gyang" Lho" Byo wa qhid' phyao: ngonhaung" dao mae joe" gyo" li" ru we' dakhyo: yao: bam: dao mae re: joe" gyo" li" ra". 16 Ailao"- Yohan wa qid: yang qid nyhab' kham: byid' ra"- ngad qere: naonhaung" wa Gyang" Lho" Byo: yang qid nyhab' kham: yu: li" genae"- ga: Asang ta" ra" dao: re ngo myid: beim" li" ra". 17 Asang Yesu re ngonhaung" lam lao"- Mao"So ngonhaung" re byid' ra" jhaung qhu" wa ai: Taung bug byu qere re: byid' ru wa de: de: za: ngad: ra". Airumung:- ngo wa pe" ru" yaug ngad yang: Mao"So re qo" tam" nae" i? ga: ta" ra". 18 Yao: bam wa ai: dao: re the' gyo: gelao"- Petru re yao: bam qobo vhin: ru thang: pye' mung:- Mao"So re caung:khin" mung:- Mao"So wa Taung bug byu qere re: myid tha" yang: kao so' qo" daui: na nae" akho: akhang" byid' to: vanhaung ga: ta: ako". 19 Lam khug: ra" mo, wa- Stephan re se' ru mae" boe" li" ra" yhin" ru mathao mae phao: byo: sin" lo" ko" ra". Yao: bam daqhae: wa- Phoenikia- Kupru we' Antioki vogaung: jham khyo byo: sin" lo" mung:- ai: mungdao: re Yuda byu qere za: ta" kyo" ako". 20 Ngadqere: ai: lam khug: ra" mo, mae" Kupru we' Kureni mung" mae na: ra" mo, daqhae: wa Antioki vogaung: khyo joe" ye: mung:- Taung bug byu qere re: Asang Yesu ngaui bau" lau dao: re yekho" kyo" ako". 21 Asang: nho: qam: so' yao: bam we' daga" ngad: ruyang- byu myo: sho' mo, lam mung:- Asang jhao" phaug' lo: ako". 22 Ce: lau thoe re Yerusalem vogaung: phung: byu qe the' gyo: gelao" yao: bam wa Barnaba re Antioki vogaung: khyo nhao: ke' ako". 23 Barnaba wa Antioki vogaung: khyo joe" ye: mung:- mo, byu qere Mao"So khoru: shaman" byid' to: va" rure yethe' myao lao" qu" ngaui bau: mung:- Asang re yao: bam: aung khug nhag' lam: mae tang tang zaui" ci mung: vin tang: za: phug' cao" na genae" qhid' mae" yao: bam alhab' mo, re qam: byid' ra". 24 Barnaba wa byugai ngad: ru we' Gyang: Lho" Byo byang" mung: lam khug: myid qi" ra" yaug ngad: ruyang byu myo: sho' mo, re Asang shad' khyo phaug' lo nhao: ra". 25 Ai: thao re Barnaba wa Sholu re yeqho: yu nae" qhid' mae" Tarshu vogaung: khyo ye" lo" ra". 26 Yao: wa Sholu re yeqho: myao lao"- Antioki vogaung: khyo jhui" lo mung:- yao: shid' zo: wa dazin: geim" ai: phung: byu qe we' zam" khug: na mung: yang: byu myo: sho' mo, re mho" shid' byid' ako". Aimung: lam khug: ra" mo, re Khristan qe ga: sao qhid' mhang" byid' ru wa Antioki vogaung: mae ngad: ra". 27 Ai: ayo, gyo: re lapa qe daqhae: wa Yerusalem vogaung: mae" Antioki vogaung: khyo ye" ako". 28 Yao: bam mae" Agabu ga: mang: ra" yaug wa to" ye, mung:- Byo qam: so' khyo" yang myid gaung dao geim" mae bao" khug' no, khug' li" zai ngad: ra"- ga: lapa pa: ra". (Ai: bao" khug' no, wa Roma Khosin" Klaudiu- pyad mae gaigai: joe" lo: ra".) 29 Mho"zo: qe wa yao: bam yaug khao: ngo" qo" gai: boe" ra" qhi" Yuda mung" mae na: ra" yao: bam: lam khug: ra" mao:nhaung: qere bao" thaug' ru vhin: ke' byid: nae" qhid' mae" myid: phyid' ako". 30 Ai: thao yao: bam wa bao" thaug' ngaui re Barnaba we' Sholu lo, khyo" phung: lau: de, qe: lo, khug khyo vhin: ke' ako". 1 Ai: ayo, mae Herod kho:kham wa phung: byu qe daqhae: re yhin" qhid: li" ra". 2 Yao: wa Yohan yao: mao: Yaku re shae: yang se' pye' nhao: ra". 3 Airu: kad' rure Yuda byu qe qu" ngaui ko" rure Herod myao lao" yao: wa Petru rere: taung" yu: ra". (Ceru: boe" ru wa Man" Make' Mug Poe ba na gyo: mae ngad: ra".) 4 Herod wa Petru re bin: taung" yu lao"- thaung: khug mae lhaung" to: mung: gyezo: byid yaug bo: ra" gyezo: phung: byid phung: re zaung" nhao: to" ra". Herod wa Petru re Lai co' Poe baui: thao re mung" byu qe: qhid' kheim: mae dao: phyid' nae" seim" to" ra". 5 Airumung: Petru wa thaung: khug mae laung" jo; ra". Ngadqere: phung: byu qe wa Petru qhid' mae" Mao"So re qam: ke' yang: akyu" mho' na: ako". 6 Herod wa Petru re mung" byu qe: qhid' kheim: khyo jhui" thug' ye: nae" ra" qhid' myi re Petru wa gug: gam gyezo: shid' yaug: agyo: mae yab: myhid' jo; ra". Yao: re jao co: shid' khe' yang taui" to" ako". Thaung: kham: dung: mae re: gug: gam gyezo: qe zaung" na: bam: ako". 7 Asang: mug: lagyo: dayaug wa nyag din taung" Petru nhae mae li" ye; ke' mung:- thaung: qe, geim" mae bao: jo; ra". Ai: mug: lagyo: wa Petru re lo, sin mae zaui: yang: nhug' mung:- phyad phyad to" wa, ga: ta" ra". Ailao" jao" Petru lo, mae" jao co: taui: jham beim: gyo" lo" ako". 8 Ai: thao re mug: lagyo: wa- Phyid' cui: cui: mung: khyid zhaung: zhaung: wa,- ga: ta" ra". Petru re: mug: lagyo: ta" ru we' dakhyo: kad' ra". Alao" mug: lagyo: wa- Ni" bau: qhang gaug: ve, yang: nga" thao cao" wa,- ga: ta" ra". 9 Petru wa thaung: qe, mae" thug' mung:- yao" thao cao" ye" lo" ra". Ngadqere: Petru wa mug: lagyo: kad' na: ra" mau" zo" wa gai gai: yao: ngad: ga" rure yao: maba ngad: ra". Yao: wa qhu" lho myao: ru ngad: ga: jho: ra". 10 Yao: shid' zo: wa zaung" ra" jo, qo sao qhid' lam: we' shid' lam: ein: lam: re lai: thug' lo" mung:- vogaung: khyo joe" ra"- jo, to' kham: dung: khyo joe" thug' lo" ako". Ai: kham: dung: wa yao: za: bung" lo" ra". Yao: shid' zo: wa ai: khyo thug' lo" mung:- hau" mo" khyo dakhe' mae su" lo" na ko" au:- ai: mug: lagyo: wa nyag din taung" Petru mae" gao" lo" byaug: ra". 11 Ai: thao re Petru wa yao: mae boe" ra" khyo re beim" li" mung:- Mao"So wa yao" mug: lagyo: re nhao: ke' yang: Herod lo, mae" re:- Yuda byumyu" qe: myid: lao" na: ra" ja: alhab' mae" re: ngo re khyad' yu va" rure dang za: ngo ana" ba va"- ga: ta" ra". 12 Yao: khoru: boe" lai: lo: rure nyang" za: beim" li" lao"- yao: wa Yohan Marku yao: myhi" Mari yham khyo vao ye" lo" ra". Ai: yham mae byu myo: sho' mo, daga" za: ham: phaung: na mung: akyu" mho' na: ako". 13 Petru wa taung gaung shad' mae" kham: re lo" ko' ke' ra". Alao" Rhode ga: mang: ra" daui daui okaung myiqe: nau" wa kham: phung" byid: nae" qhid' mae" ye" lo" ra". 14 Yao: wa Petru thoe re gyo" xam: mung:- gyai ngaui bau: yang: kham: maphung" byid: shilo:- yham khug khyo dam: tug' vao lo" mung:- Taung gaung mae Petru ye; jo; ra"- ga: lo" ta" kyo" ra". 15 Yao: bam wa nao go: ava"- ga: ta" ako". Ngadqere: yao: wa dang yao: ngad: ga: kyid kyid ga: ta" ra". Airu: mung: yao: bam wa yao: re Ai wa Mug: Lagyo: ngad nae"- ga: tau" ako". 16 Petru wa mathang lo: kham: ko' na: ra". Lo" thao" mae yao: bam wa kham: yephung" ke' mung:- yao: bam Petru re myao gelao"- mug' hao" byaug: ako". 17 Petru wa yao: bam re sae za: na genae" qhid' mae" lo, tu" tu" mung:- Asang wa yao: re thaung: khug mae" khoru: jhui" thug' lo: ra" khyo re yao: bam re ta" kyo" ra". Alao" Petru wa Ce: khyo re Yaku we' lam khug: ra" mo, gaje qere re: ta" kyo: ge, ga: ta" mung:- yao: wa ai: tau mae" gatau khyo thug' ye" lo" ra". 18 Ne, kao mug: bo" li" lao" thaung: yham zaung" ra" gug: gam gyezo: qe wa- Petru khai: lo" byaug va" laug i? ga: mo, thaui: mo, yaug gyaug: nin" na: ako". 19 Herod kho:kham wa Petru re qho nae" qhid' mae" amyin" khyo" ke' ra". Ngadqere: yao: bam wa Petru re maqho: myao ko" ngad: ra". Airumung: Herod kho:kham wa ai: gug: gam gyezo: qere myid: ca: qu" mung: yao: bam re se' pye' nae" qhid' mae" amyin" khyo" ke' ra". Ai: thao re Herod kho:kham wa Yuda mung" mae" thug' lo" mung: Kesarea vogaung: mae dayo, kho yena: ra". 20 Herod wa Ture we' Sidon vogaung: byu qere gyai nhag' yo" ra". Aimung: ai vogaung: shid' lam: mae" mo, wa daphung: za: kad' mung: kho:kham pho" jhao" ye" lo" ako". Yao: bam wa kho:kham kho" geim" re eib: ra" Blastu re yao: bam re bao" thaug' yu nae" sao qhid' re yemho' ako". Ai: thao re yao: bam wa Herod jhao" vao ye: mung:- ngaui pyo: yaug yo khyo yemho' ako". Pe"mung:ga"re yao: bam: mung"dan: wa kho:kham mung"dan: mae" zao:kho qo" yu: na geyang: ngad: ra". 21 Herod wa dang: to" ra" ba na mae yao" kho:kham mai bau: re ve; pye' mung: yao" kho:kham tao" khau" dao mae zaung: jo, yang: mung" byu qere dao: jhau: ra". 22 Alao" mung" byu qe wa Ce: jhau thoe wa xao su byu: jhau thoe mangad:- So jhau thoe angad: ra"- ga: hug' ta" ako". 23 Herod kho:kham wa Mao"So re nga: mayhe' byid' ruyang aijao" yao: Asang: mug: lagyo: wa yao: re be; lhang" ke' ra". Yao: wa laug daung: jham: yang zo" se' pye' ru qhug' ra". 24 Mao"So: mung dao: wa xo' byo: sin" lo" mung:- lam khug: ra" byu je: myo" laug: li" ra". 25 Barnaba we' Sholu wa yao: shid' zo: mau" zo" bin: zaui: lao" Yohan Marku re jhui: yang: Yerusalem mae" dam: phao: lo" ako". 1 Antioki vogaung: mae" phung: khug mae lapa qe daqhae: we' mho" pho" qe daqhae: bobo: ako". Ai bam wa Barnaba Nigara ga" ra" Simon- Kureni byu Lukai mung" zug: pho" Herod we' daga" na: lo: ra" Manaen we' Sholu bam ngad: ako". 2 Yao: bam wa Asang re caung:pa" yang: zo:ve jao" yang: na ko" au:- Gyang" Lho" Byo wa yao: bam re Barnaba we' Sholu shid' zo: re nga" mau" vin vo, nae" qhid' mae" gatau khyin: san: to: ge,- ga: ta" ra". 3 Alao" yao: bam wa zo:ve jao" yang: akyu" mho' mung:- yao: shid' zo" dao mae yao: bam: lo, kai: byid: yang: mau" zo" vin vo, nae" qhid' mae" yao: shid' zo: re nhao: ke' ako". 4 Airu: Gyang: Lho" Byo: yang nhao: ke' ru we' dakhyo: Barnaba we' Sholu wa Seleukia vogaung: khyo ye" lo" mung: ai: vogaung: mae" Kupru gagyo: kao" khyo lha we' gau" ye" lo" ako". 5 Yao: shid' zo: wa Salami vogaung: khyo joe" ye: gelao"- Tarha" jung yham mae Mao"So: mungdao: re kho" kyo: byid' ako". Yao: shid' zo: re bao" thaug' byid: nae" Yohan Marku re jhui" ye" ako". 6 Yao: shid' zo: wa ai: gagyo: kao" re gau" lai: ye: mung:- Papho vogaung: khyo joe" ye" ako". Ai: vogaung: mae Yuda byu lapa apyag' ngad mung:- Vha" Ba: Ra" Yesu ga: mang: ra" byu dayaug re the' myao: ako". 7 Yao: wa ai: gagyo: kao" mae" mung" zug: pho" Sergiu Polu nho: byin cao: pho" ngad: ra". Mung" zug: pho" wa nhag' lam: suzo: du" ra" yaug ngad: ra". Ai: mung" zug: pho" wa Mao"So: mungdao: re tae" gyo: nug: ruyang Barnaba we' Sholu shid' zo: re yao" qhid' kheim: khyo khai: vhao" yu: ra". 8 Ngadqere: Greeg myan" khyo" Eluma ga: mang: ra" vha" yaug wa Yesu khyo re mung" zug: pho" malam" vashao: ga:- Barnaba we' Sholu shid' zo: re ngag: thaug' ra". 9 Airumung: Polu ga: re: mang: ra" Sholu wa Gyang" Lho" Byo we' byang" mung:- yao: wa ai: vha" yaug re din: din: za: zhaug' qu" to: yang:- 10 Yui Satan" nho: yao: zo: we"- nao wa din: man" ru we' gai: ra" ja: alhab' nho: gyevo apyag' asham" aja: ja: we' to, za: byang" jo; ra" yaug ngad: ra". Nao wa khonhae" re: Asang: nho: dangman" ra" khyo re mhug' pyag' dao: boe" sho' kad' na yaug ngad: ra". 11 Ana" yao: Mao"So: lo, wa ni" dao mae joe" li" mung:- Ni" myo, jid: lo" byaug: li" nae"- nao wa dayo, ko ba bao re mathe' myao nae" ga: ta" ra". Ailao" jao" Eluma wa myo, jid: lo" byaug mung: dayaug yaug: yang yao" lo, mae" she yang: jhui" yu geshao: ga: soe' qho: qin" ra". 12 Mung" zug: pho" wa airu: boe" rure myao lao" Yesu re lam" ra". Pe"mung:ga"re Asang: khyo we' sin: yang: mho" shid' byid' rure yao: wa xo sho' mug' hao" byaug: ra". 13 Polu we' yao" byin cao: qe wa Papho vogaung: mae" lha jui: yang: Pamphulia mung" mae" Perga vogaung: khyo joe" ye" ako". Yohan Marku wa ai: vogaung: mae" yao: bam re to: co' mung:- Yerusalem khyo dam: tug' phao: lo" ra". 14 Yao: bam wa Perga mae" xo' ye" lo" mung: Pisidia mung" mae" Antioki vogaung: khyo joe" ye" ako". Yao: bam wa Dugno: Ba mae Yuda tarha" jung yham khug khyo vao ye: mung:- yezaung: jo; ako". 15 Moshe tarha" we' lapa qe: tung" paug' re bin: nghe' lao"- tarha" jung yham agyi qe wa- Mao:nhaung: qe we' mo, byu qere qam: byid: nae" mungdao: naonhaung" qo" ko" ngad: re wa li" ta" geri: ga: byu nhao: ke' yang: ta" nhao: ra". 16 Alao" Polu wa to" ye, mung:- lo, tu" tu" yang:- Israel byumyu" qe we"- cemae na ko" ra" Mao"So re caung:pa" ko" ra" Taung bug byu qe we"- tae" gyo: ge,- 17 Israel byumyu" qe: Mao"So wa ngonhaung" phug' pho" qere khyin: yu mung:- Egutu mung" mae yao: bam bang" vo khyo" na ko" ra" gyo: mae byumyu" qi: boe" li" nhao: ra". Mao"So wa yao" qam: so' mo" we' yao: bam re Egutu mung" mae" jhui" thug' lo mung:- 18 Din" pyad' yo mae byid xe zin lam: lam: Mao"So wa yao: bam: dao mae zang: kham byid' ra". 19 Yao: wa Khanan mung" mae na: ra" byumyu" nhad' myu" re phyo' sin" pye' mung: ai: mung"dan: re yao" byumyu" qere sang nhao: ra". 20 Ceru: boe" sho' zin lam: byid yo: ngo" xe zin myao" ra". Ceru: bin: boe" thao re Mao"So wa Lapa Samuela pyad joe" sho' yao: bam re tarha" agyi jham byid' to" ra". 21 Amung: yao: bam kho:kham mho' gelao"- Mao"So wa yao: bam re Benyamin amyu" kaung mae" Kisha yao: zo: Sholu re san byid' ra". Sholu wa yao: bam: kho:kham byid xe zin kad' ra". 22 Ai: thao Mao"So wa Sholu re khyo" pye' mung:- Davi re yao: bam: kho:kham dam: kad' nhao: ra". Mao"So wa Davi we' sin: yang:- Yese yao: zo: Davi wa ngo o: ra" yaug ngo zaui: nhao: ra" mau" alhab' re zaui: nae" yaug ngad: rure ngo myao va"- ga: ta" ra". 23 Mao"So wa yao" dao:so: byid' to" ru we' dakhyo:- Davi myid:zo: qemae" ngad: ra" Yesu re Israel byumyu" qe: khyad' yu yaug boe" li" nhao: ra". 24 Yesu yao" mau" zo" re maqhid shire Yohan wa Israel byumyu" alhab' mo, re yao: bam: qobo mae" myid tha" lo mung: qid nyhab' kham: yu genae" qhid' mae" kho" kyo: byid' ra". 25 Amung: Yohan wa yao: re nhao: to" ra" mau" zo" re bin: zaui" lo" na lao"- mo, byu qere Ngo khag' ngad: ra" ein: naonhaung" jho ko" i? ngo wa ai: naonhaung" lao" na: ra" yaug mangad:- Yao: wa nga" thao mae joe" li" zai ngad: ra". Ngo wa yao" khyid zhaung: re khyad' byid: nae" lhao" re: maman: qi" ngad: ra"- ga: ta" ra". 26 Abraham myid:zo: qe ngad: ra" nga" mao: nhaung: Israel byumyu" qe we"- Cemae na: ra" Mao"So re caung:pa" ko" ra" Taung bug byu qe we'- ce: khyad' yu: ra" khyo mungdao: re Mao"So wa ngonhaung" jhao" vhin ke' ava". 27 Yerusalem mae na: ra" mo, we' yao: bam: au: jhaung qe wa- Yesu wa khyad' yu: ra" yaug ngad: rure maba- Dugno: Ba ba khao: ngo" yao: bam nghe' ra" lapa qe: jham: dao: jham rere: yao: bam maba: gyo: ko" ngad: ra". Ngadqere: yao: bam wa Yesu re dao: phyid' ra" khyo" lapa qe: jham: dao: jham re jab byang" li" nhao: ra". 28 Yao: bam wa yao: re shid man" ra" qobo dae dao: phyid' nae" akhyo mamyao gengadqere: yao: re se' pye' nae" qhid' mae" yao: bam wa Pilad re mho' ako". 29 Yao: bam wa yao: we' sin: yang: jham: mug sug' mae bo: ru we' dakhyo: alhab' yao: re bin: kad' gelao"- yao: bam wa yao: re pyao: zang dao mae" khyo" yu mung: lab dalam: khug mae yeke' to" ako". 30 Ngadqere: Mao"So wa yao: re shid: rumae" daui: to" li" nhao mung:- 31 Galile mung" mae" Yerusalem vogaung: khyo yao: we' daga" ye" lo" ko" ra" mo, re yao" khyo re sagse: kham byid' ra" sagse: qe ngad: ako". 32 Caung: khin" mugsug' aqi: shid' lam: mae- Nao wa nga" Zo: ngad: ra"- ana" ba ngo wa ni" Pho" boe" lo va"- ga: tung" to" ru we' dakhyo:- Mao"So wa Yesu re daui: to" li" nhao: ra" khyo" yang ngonhaung" phug' pho" qere byid' to" ra" dao:so: wa yao: bam: myid:zo: qe ngad: ra" ngonhaung" re zaui: byid' ava". Amung: ngonhaung" wa ce: lau dao: gai re naonhaung" re ta" kyo: nae" qhid' mae" ce: jo, qo khyo joe" li" ru ngad: ra". 34 Yao: khonhae" re: madam: shid lo nae"- ga" rure shid: rumae" Yao: re dam: daui: to" li" nhao: ru we' sin: yang: Mao"So wa- Ngo Davi re byid: nae" ein: dao:so: byid: to" ra" gyang" lho" ru we' gang" tang: ra" shaman" jeju ngo naonhaung" re byid: nae"- ga: ta" ra". 35 Gatau caung:khin" dalam: mae re:- Nao wa dao:so: dang: ra" ni" daui daui yaug re lab khug mae bab: qeim: lo" nhao nae" mangad:- ga: ta" to" ra". 36 Davi wa yao: daui: na: ra" gu: mae Mao"So myid: yaung: to" ra" mau" zo" jham re zaui: so: mung:- shid: lo" byaug: ra". Yao: wa yao" phug' pho" qe: lab nhae mae nyhab' shaung: pye' ru qhug' mung:- yao" mao gaung wa lab khug mae bab: qeim: lo" byaug: ra". 37 Ngadqere: Mao"So: yang shid: rumae" dam: daui: to" li" nhao: ra" yaug wa airu: maba: qeim: lo" ngad: ra". 38 Airumung:- nga" Israel mao: nhaung: qe we"- ai: Yesu khyo" yang qobo khyad' byid' ru qhug' ra" khyo we' sin: mung:- naonhaung" re kho" kyo" na: rure- Yesu re lam: ra" mo, alhab' wa Moshe tarha" yang maqo" lhoe' ke' ra" qobo alhab' mae" qo" loe, beim: ra" khyo rere: naonhaung" re ngonhaung" ba nhao nug: ra". 40 Aimung:- Qu" ge,- Jung" gaui mo, we"- mug' yang: shid: lo" ge,- pe"mung:ga"re ana" ba ngo kad' nae" mau" zo" dalam: re dayaug yaug: yang naonhaung" re ta" sho' kyo: byid: sho' ngadqere: naonhaung" ai re lam" genae" mangad:- ga: lapa qe ta" to" ra" jham: dao: wa naonhaung" mae maboe" li" nae" qhid' mae" lha" ge,- ga: kho" kyo: ra". 42 Polu we' Barnaba shid' zo: wa tarha" jung yham mae" thug' lo" na ko" au: mo, byu qe wa- thao: Dugno: Ba mae re: dam: li" mung: ai: khyo we' sin: yang: li" dam: kho" kyo: byid: nae" qhid' mae" yao: shid' zo: re mho' ako". 43 Ham phaung mae"- mo, byu qe byo: lo" gethao re Yuda byu qe myo: sho' mo, we' Yuda caung:pa" thung" shad' khyo phaug' vao lo vako" ra" Taung bug byu qe myo: sho' mo, wa Polu we' Barnaba thao cao" ako". Polu we' Barnaba shid' zo: wa Mao"So nhag' myan" ra" khug mae xo' yang: kao so' daui: na genae" qhid' mae" yao: bam re qam: byid: dao: ta" ako". 44 Ai: thao Dugno: Ba mae Mao"So: mungdao: re tae" gyo: nae" qhid' mae" vobyu alhab' ein nae" qhi" joe" li" ako". 45 Yuda byu qe wa ai: mo, byu qere li" the' myao gelao"- yao: bam wa myid nug: gemung: Polu kho" kyo" ra" mungdao: re ngag mung: yao: re maphug' makhyad' roe" yang: ta" ako". 46 Ngadqere: Polu we' Barnaba shid' zo: wa je yang: mazag mavae- Mao"So: mungdao: naonhaung" re shi" sao qhid' ta" kyo: nae" wa khyo ang: ra". Ngadqere: naonhaung" wa ai: mungdao: re ha: pye' mung:- ai: apyad ato: kao so' we' maman: qi" ga: naonhaung" yao: yao: dao: phyid' yu gemung: nga" shid' zo: wa naonhaung" re to: co' mung: Taung bug qejhao" ye" lo" zai ngad:- 47 pe"mung:ga"re Asang wa ngonhaung" re Myidgaung dao mae na: ra" mo, alhab' khyad' yu: ru qhug' yu genae" qhid' mae" naonhaung" re Taung bug qe: qhid' mae" bo" bao boe" nhao va"- ga: amyin" byid' to" ra"- ga: ta" ako". 48 Taung bug byu qe wa ce: dao: re the' gyo: gelao"- gyo" ngaui ko" ru we' Mao"So: mung dao: re caung:khin" byid' ako". Apyad ato kao so' qo" yu nae" qhid' mae" khyin: yu: to: qhug' va" mo; gu: Yesu re lam khug: lo: ako". 49 Mao"So: mungdao: wa ai: mung" geim" mae hau" nhao" lo" ra". 50 Ngadqere: Yuda qe wa Mao"So re caung:pa" mo, ngad: ra" byuna azhao" myhao: ra" Taung bug byu myiqe: qere we' ai: vogaung: mae" au: jhaung kad' mo, re lhau: zhung" to" ke' ako". Alao" yao: bam wa Polu we' Barnaba shid' zo: re yhin" mung: yao: shid' zo: re yao: bam: mung" mae" khe' thug' ke' ako". 51 Polu we' Barnaba shid' zo: wa yao: bam re ngag: ha: pye' ra" ave, khyo" yao: shid' zo" khyid vo: mae" phalhug jham re ko: khyo" co' mung:- Ikoni vogaung: khyo ye" lo" ako". 52 Antioki vogaung: mae na: ra" lam khug: ra" mo, wa gyai ngaui bau" ru we' gyang" lho" Byo we' byang" jo; ako". 1 Ikoni vogaung: mae re: gatau vogaung: mae we' dakhyo: boe" ra". Polu we' Barnaba shid' zo: wa Ikoni vogaung: mae re: tarha" jung yham khug khyo vao ye: mung: ai we' dakhyo: kho" kyo: gelao" Yuda byu qe myo: sho' mo, we' Taung bug byu qe myo: sho' mo, wa Yesu re lam: lo: ako". 2 Ngadqere: malam ko" ra" Yuda byu qe wa Taung bug byu qere lhau: zhung" to" ke' mung: lam khug: ra" mo, re gye doe, nhao: ako". 3 Polu we' Barnaba shid' zo: wa ai: vogaung: mae dajhid' myao" sho' thang: na mung:- Asang: khyo re mazag mavae ta" kyo" ako". Asang wa yao: shid' zo" lo, khyo" yang mug: pho" mau" zo" jham we' mug' pho: ve, lho jham re kad' qhu" nae" qam: so' byid: mung:- yao" nho: nhag' myan" ru we' sin" ra" mungdao: wa dangman" ru ngad: rure sagse: qhu" byid' ra". 4 Ai: vogaung: byu qe wa shid' phung: jho" kho' lo" mung:- damyo" wa Yuda byu qe shad' khyo de, mung: damyo" wa lagyo: shid' zo: shad' khyo de; ako". 5 Aimung: taung bug byu qe Yuda byu qe we' yao: bam: au: jhaung qe wa- lagyo: shid' zo: re yhin" nae" we' laug baui: yang pye' nae" qhid' mae" myid: phyid' ako". 6 Lagyo: shid' zo: wa ai: khyo re ba gelao"- Lukaonia mung"- Lustra vogaung: we' Derbe vogaung: avai: ayae jo, qo jham khyo phao: ye" lo" ako". 7 Yao: shid' zo: wa ai: jo, qo khaung: mae Lau Dao: Gai re kho" kyo" ako". 8 Lustra vogaung: mae khau: mae" khyid qeim mung: khyo khonhae" re: maqo" su" ra" byu dayaug na: ra". 9 Yao: wa zaung: jo, mung: Polu kho" kyo" ra" mungdao: re tae" gyo" na: ra". Polu wa ai: yaug wa yao: gai shao: lo" nae" qhi" lam khug myid bo yaug ngad: rure ba: qu" mung:- Polu wa ai: khyid qeim yaug re zhaug' qu" to: mung:- 10 To" mung: din: za: ye, wa,- ga: ai: yaug re thoe qi: we' ta" ke' ra". Alao"- ai: khyid qeim yaug wa byae: to" li" mung:- khyo su" qin" ra". 11 Mo, byu qe wa Polu kad' ru re the' myao gelao"- yao: bam wa yao: bam: Lukaonia myan" khyo" So jham wa byu doe, mung:- ngonhaung" jhao" joe" gyo" li" va" ra"- ga" zag: hug' ako". 12 Yao: bam wa Barnaba re Zeu au: she yang: kho" kyo: yaug ngad mung: Polu re wa Herma ga: mhang" byid' ako". 13 Ai: vogaung: taung gaung mae jo; ra" Zeu so yham mae" khinjaung pho" wa nung: jaung lo: we' bin: kheim" jham re vogaung: kham: zang khyo cili" ra". Pe"mung:ga"re yao: we' mo, byu qe wa Lagyo: shid' zo: re xeim: ngaui" byid: nug: ako". 14 Yao: bam airu: xeim: ngaui" byid: nae" seim" na ko" rure Polu we' Barnaba shid' zo: the' gyo: gelao"- yao: shid' zo: wa yao: shid' zo" mai bau: lao" cad' pye' yang: mo, byu qe: phaung gaung: khyo tao" vao ye" lo" mung:- 15 Byu naonhaung" we"- pe" mung: naonhaung" ceru: kad' na ko" i? Nga" shid' zo: wa naonhaung" we' dakhyo:- xao su byu za: angad:- ai: akyu" mabo: ra" ja: jham re caung:pa" byid' rumae mug:gaung we' myidgaung- qid panglai: we' aijham: khug mae na: ra"- jo; ra" ja: alhab' re phan" to" ra"- daui: na: ra" Mao"So shad' khyo phaug' lo genae" qhid' mae" ai: Lau Dao: Gai re naonhaung" re ta" hau" kyo: byid: nae" qhid' mae" nga" shid' zo: cekhyo joe" li" ru ngad:. 16 Lai: lo" ra" pyad mae" Mao"So wa xao su byu alhab' re yao: bam yao: o: ra" khyo: kad' nae" akhang" byid' to" ra". 17 Ngadqere: Mao"So wa yao: na: jo; rure khonhae" re:- gai: ra" mau" zo" kad' ra" khyo"- sagse: qhu" byid' na: ra". Yao: yao" ayo, mae yao: wa mug:gaung mae" mug: qu: li" nhao mung:- gaug zo maui: lam: re mhang" li" nhao: ra" ve, vo: re byid' to: mung: naonhaung" re zo:ve byid: yang: naonhaung" nhag' lam: re ngaui bau" ru we' byang" sheim: jo, nhao: ra"- ga: zag: hug' yang: ta" ako". 18 Lagyo: shid' zo: airu: zag: hug' ta" re lhao" re:- yao: shid' zo: re xeim: ngaui" byid: nae" seim: ko" ra"- mo, byu qere lagyo: shid' zo: wa maqo" tam" pye' sho' ngad: ra". 19 Pasidia mung" Antioki vogaung: we' Ikoni vogaung: mae" Yuda byu qere yao: bam shad' khyo li" qo" ngaug: te' yu: ako". Ai: thao yao: bam Polu re laug baui: yang pye' mung:- shid va" ga: jho mung: vogaung: taung gaung khyo yeshe: thug' to" ako". 20 Ngadqere: yao" avai: ayae mae lam khug: ra" mo, yao: re li" lhang" gam" na gelao"- yao: wa to" li" mung:- vogaung: khug khyo dam: vao lo" ra". Ai: thao: ba re Polu we' Barnaba shid' zo: wa Derbe vogaung: khyo ye" lo" ako". 21 Polu we' Barnaba shid' zo: wa lau dao: gai re Derbe vogaung: mae kho" kyo: byid: mung:- byu myo: sho' mo, mho"zo: qe boe" lo: ako". Ai: thao re yao: shid' zo: wa Lustra vogaung:- Ikoni- Pasidia mung" mae" Antioki vogaung: khyo dam: tug' lo" ako". 22 Yao: shid' zo: wa lam khug: ra" mo, re qam: byid: yang: lam khug: ra" khyo mae din: za: ye; jo, genae" qhid' mae" we' yao: bam re ta" peim: ta" kyang: byid: mung: ngonhaung" wa- Mao"So: mung"dan: khyo vao ye: nae" qhid' mae" qug: khai" ru myo: sho' ja: re lai: phyid' ye: ca" ra"- ga: kho" kyo" ako". 23 Yao: shid' zo: wa phung: khao: ngo" mae phung: lau: de, qe san: to: mung: yao: bam lam khug: na: ra" Asang: lo, khug mae zo:ve jao" yang: akyu" bin: mho' yang: ai bam re qhaug' byid' ako". 24 Yao: shid' zo: wa Pisidia mung" khyo" lai: jao" lo" mung:- Pamphulia mung" khyo joe" ye" lo" ako". 25 Yao: shid' zo: wa Perga vogaung: mae mung dao: kho" kyo: mung: ai: thao re yao: shid' zo: wa Atali vogaung: khyo ye" lo" ako". 26 Yao: shid' zo: wa ai: vogaung: mae" lha jui: yang: Antioki vogaung: khyo dam: tug' lo: ako". Ai wa ana" yao: shid' zo: bin: kad' vako" ra" mau" zo" re zaui" qhid nae"- Mao"So nhag' myan" ra" jeju mae yao: shid' zo: re qhaug' byid' ra" jo, qo ngad: ra". 27 Yao: shid' zo: wa Antioki vogaung: khyo joe" lo gelao"- phung: byu qere khai: zhang" yu mung:- yao: shid' zo: khyo" yang Mao"So khoru: mau" zaui" ra" khyo alhab' re we' Mao"So wa Taung bug byu qere Yesu re lam: lo genae" qhid' mae" khoru: phungbao byid: va" ra" khyo alhab' rere: yao: bam re ta: kyo" ako". 28 Yao: shid' zo: wa ai: vogaung: mae lam khug: ra" mo, we' daga" myao" sho' thang: na: ako". 1 Byu daqhae: wa Yuda mung" mae" Antioki vogaung: khyo joe" li" mung: lam khug: ra" mo, re- Naonhaung" wa Moshe ta" to" ra" Tarha" we' dakhyo: au: qid lhai: khyo makad' ko" re wa khyad' yu: ru magai: qhug' ngad: ra"- ga: yemho" shid' ako". 2 Polu we' Barnaba shid zo: wa ce: khyo we' sin: yang: yao: bam we' gyai jho" ta" ngag: ako". Aimung:- Polu we' Barnaba shid' zo: we' gatau damyo" wa ce: khyo we' sin: yang: lagyo: qe we' phung: lau: de, qe we' jho" ta" qham nae" qhid' mae" Yerusalem vogaung: khyo ye: nae" qhid' mae" myid: phyid' ako". 3 Phung: byu qe wa yao: bam re yedai" ke' ako". Yao: bam wa Phoenikia mung" we' Samari mung" khyo" su" lai: lo" zo" re"- Taung bug byu qe khoru: Mao"So shad' khyo phaug' lo ko" ra" khyo re ai: khaung: mae" mo, rere: zhao: kyo" ako". Ce: lau dao: wa lam khug: ra" mo, alhab' re gyai gyo" ngaui bau: nhao: ra". 4 Yao: bam Yerusalem vogaung: khyo joe" ye: gelao"- aimae" phung: byu qe we' daga" lagyo: qe we' phung: lau: de, qe wa yao: bam re lham: tug: yu: ako". Alao" Polu wa yao: bam: lo, khyo" Mao"So khoru: mau" zo" zaui" na: ra" khyo alhab' re yao: bam re zhao: kyo" ra". 5 Ngadqere: Pharishe qe: phung: mae bobo: ra" lam khug: ra" mo, damyo" wa to" ye, mung:- Taung bug byumyu" qe wa au: qid lhai: khyo kham: yu ca". Amung: Moshe Tarha" re phug' cao" nae" yao: bam re ta" ca"- ga: ta" ako". 6 Ai mung: lagyo: qe we' phung: lau: de, qe wa ce:khyo re myid: qu" nae" qhid' mae" zabphaung kad' ako". 7 Dazab myao" sho' bin: jho" ta"- bin: jho" myid: gethao re- Petru wa to" ye, mung: Nga" mao: nhaung: qe we"- Taung bug byumyu" qe the' gyo: mung: lam genae" qhid' mae" Mao"So wa daba myao" mae" Taung bug byu qere lau dao: gai yekho" kyo: nae" qhid' mae" ngo re naonhaung" phaung mae" khyin: yu: to: va" rure naonhaung" ba: ako". 8 Byu yaug khao: ngo" nho: nhag' lam: aung khug re ba: ra" Mao"So wa ngonhaung" re gyang" Lho" Byo byid: va" ru we' dakhyo: Taung bug byu qere re: Gyang" Lho" Byo byid' ra" khyo" yang yao: bam rere: o ngaui: ra" khyo re qhu" byid' ava". 9 Mao"So wa ngonhaung" we' Taung bug qe: agyo: mae gatau makho' to: ngad: ra". Yao: bam yao: re: lam khug ko" ruyang Mao"So wa yao: bam: qobo alhab' re khyad' pye' byid' ava". 10 Aimung: ngonhaung" phug' pho" qere: maqo" vin- ngonhaung" yao: re: maqo" vin vo' ra" qo re lam khug: ra" mo; dao mae vhin byid' ra" khyo" yang ana" naonhaung" pe" mung: Mao"So re lag yu: qu" nug ko" i? 11 Ngonhaung" re: yao: bam we' dakhyo: lam" mung:- Asang Yesu nho: nhag' myan" ra" khyo" yang khyad' yu: ru qhug' va"- ga: ta" ra". 12 Barnaba we' Polu shid' zo: wa- yao: shid' zo" lo, khyo" yang Taung bug byu qe: phaung gaung: mae Mao"So kad' qhu" ra" mug' pho: mau" zo" jham we' mug' pho: ve, lho jham: khyo re ta" kyo: byid' na: au: zab phaung: na: ra" mo, alhab' wa sae za: tae" gyo" na: ako". 13 Yao: shid' zo: bin: jhau lao"- Yaku re: Nga" mao: nhaung: qe we"- nga" dao: re tae" gyo: ge,. 14 Mao"So wa Taung bug byu qe: phaung mae" damyo" re yao" amyu" boe" nae" qhid' mae" khyin: yu: ra" khyo" yang Taung bug byu qere yao: gun caung: ra" khyo re sao qhid' khoru: qhu" byid: va" ra" khyo re Simon ta" sho' kyo" ava". 15 Lapa qe ta" to" ra" mungdao: jham we' re: ceru wa alhab' jho" zhaung" ra". 16 Jham: mug sug' mae Ce: thao re ngo dam: tug' li" mung: Davi nho: mung"dan: re dam: te: byid: nae"- byo; qeim: jo; rure ngo dam: nyhang" kad' nae". Amung: ai re qam: dam: bo: li" nhao nae". 17 Ailao" dang: jo; ra" byu alhab' wa nga" amyu" qe boe" nae" qhid' mae" ngo mang mhang" yu: ra" Taung bug byu qe alhab' mo, wa ngo jhao" joe" li" li" genae"- ga: ta" ra". 18 Ceru re daba ganhae" gaco' mae" ba nhao: na: ra" Asang wa ceru: ta" ra"- ga: ta" ra". 19 Yaku xo' yang: ta" ru wa Mao"So shad' khyo phaug' lo ko" ra" Taung bug byu qere ngonhaung" aqug: akhai: magai: kad' nhao ngad: ra". 20 Ai: atha" So sulho re ngaui" byid: yang: caung:pa" thung" khyo" masan masin" ngad: ra" zo:ve re mazo: genae"- gintho' zaung: ru makad' nae"- lang zang: nai: se' ra" gug'nyhug' sho: we' sa: re mazo: genae" qhid' mae" kam" wa mugsug' tung" mung: yao: bam re kyo" ke' gai: ra" ein: ngo myid: ra". 21 Pe"mung:ga"re Moshe Tarha" re Dugno: Ba khao: ngo" mae tarha" jung yham mae daba ganhae" mae" nghe' na gemung:- vogaung: khao: ngo" mae yao" tarha" re kho" kyo" na: avako"- ga: ta" ra". 22 Ailao" lagyo: qe phung: lau: de, qe we' phung: byu qe alhab' mo, wa jho" qham mung: yao: bam mae" byu damyo" re khyin: yu yang: Polu we' Barnaba shid' zo: we' daga" Antioki vogaung: khyo nhao: ke' nae" qhid' mae" myid: phyid' ako". Ai mung: yao: bam wa lam khug: ra" mo, alhab' yang phug' myao" ra" Barnaba ga: mang: ra" Yuda we' Sila shid' zo: re khyin: yu mung:- yao: shid' zo" lo, mae vhin tung" dakhye' tung" vhin: ke' ako". 23 Ai: vhin tung" mae- Naonhaung" mao: nhaung: qe ngad: ra"- ngonhaung" lagyo: qe we' phung: lau: de, qe wa- Antioki vogaung: we' Suri mung" Kiliki mung" mae na ko" ra" Taung bug byu mao: nhaung" qere au" ke' ra". 24 Ngonhaung" phung: mae daqhae: wa ngonhaung" yang pe" re: mapyang: ke' ru naonhaung" jhao: joe" li" mung: myid: qug: nae" dao: aja: ja: ta" yang: naonhaung" re qug: khai: jham re boe" nhao ko" ra" ga" thoe re ngonhaung" the' gyo: va". 25 Aimung: ngonhaung" wa jho" qham yang:- lagyo: kad' nae" byu damyo" re khyin: yu mung: naonhaung" jhao" nhao: ke' nae" qhid' mae" alhab' mo, jho" myid vang" bam va". 26 Yao: bam wa ngonhaung" Asang Yesu Khristu mau" zo" qhid' mae" yao: yao" kao so' re lhao" o: mabyid lo: zaui: so" lo ko" ra" ngonhaung" jhid'de; ra" Barnaba we' Polu shid' zo: we' daga" naonhaung" jhao" cao: li" li" genae". 27 Aimung: ngonhaung" wa Yuda we' Sila shid' zo: re naonhaung" jhao" nhao: ke' ra". Yao: shid' zo: wa vhin tung" mae ngonhaung" tung" to" ra" gu: re yao: shid' zo" nhad' yang re: naonhaung" re ta" kyo" li" genae". 28 So sulho re ngaui" byid: va" ra" zo:ve- sa: we' lang zang: nai: se' ra" gug'nyhug' sho: dazo: ge,- Gin tho' zaung: ra" mau" zo" re dakad' ge, ein: ru mae" je yang: naonhaung" re qo gatau mavhin nae" qhid' mae" Gyang" Lho" Byo mae ngonhaung" myid jho" vang" va". 29 Naonhaung" ai: rure jao" pye' gelao" wa- qao" zin" vageshao:- ga: tung" ke" ako". 30 Alao"- lagyo: qere airu: nhao: ke' mung: lagyo: qe wa Antioki khyo ye" lo" mung: lam khug: ra" mo, alhab' re khai: zhang" yu yang: yao: bam re ai: vhin tung" phoe' byid' ako". 31 Ai: vhin tung" re yao: bam bin: nghe' gelao"- ai: qham: phyid' ra" mung dao: mathao mae yao: bam wa gyai ngaui bau" ako". 32 Yuda we' Sila shid' zo: wa lapa ngad mung: lam khug: ra" mo, re myao" sho' qam: byid: mung dao: ta" peim: ta" kyang: byid' ako". 33 Yao: shid' zo: wa ai: vogaung: mae dayo, zo: thang: na mung: ai: thao re lam khug: ra" mo, wa- yao: shid' zo: re yaug yo za: au" yang: dam: nhao: ke' ako". Yao: shid' zo: re nhao: ke' ra" mo, jhao" dam: tug' lo" ako". 34 Ngadqere: Sila wa ai: mae thang: na nae" myid: phyid' ra". 35 Polu we' Barnaba shid' zo: wa Antioki vogaung: mae dayo, zo: na mung:- Mao"So: mungdao: re gaje qe we' daga" mho" shid' kyo: byid' ako". 36 Dayo, kyo thao re Polu wa Barnaba re Mao"So: mung dao: re ngonhaung" kho" kyo: co' va" ra" vogaung: khao: ngo" mae mao: nhaung: qe khoru: ngad ko" laug yekam" qu" nae" qhid' mae" nga" shid' zo: yao: bam jhao" dam: tug' ye" lo" lang:- ga: ta" ra". 37 Barnaba wa yao: shid' zo: we' daga" Marku ga" ra" Yohan re jhui: nug: ra". 38 Ngadqere: Polu wa yao: shid' zo" nho: sasana mau" mae thao" sho' mabo: zaui: lo:- yao: shid' zo: re to: co' mung: Pamphulia vogaung: mae" dam: tug' phao: lo" yaug ngad: ruyang Marku re jhui: nae" magai ga: myid: ra". 39 Yao: shid' zo: wa ce:khyo we' sin: yang: qi: sho' jho" ngag mung: jho" gao" lo" ko" ra". Alao" Barnaba wa Marku re jhui: yang: Kupru qid gagyo: kao" khyo lha jui: mung: ye" lo" ko" ra". 40 Polu wa Sila re khyin: yu mung: lam khug: ra" mo, wa Polu re Asang: nhag' myan" ru mae bin: qhaug' byid: gethao to" lo" ra". 41 Aimung: Polu wa Suri mung" we' Kiliki mung" khyo" lai: jao" ye: mung: phung: byu qere lam khug: myid nyhad' tang byid' ra". 1 Polu wa Derbe we' Lustra vogaung: khyo ye" lo" ra". Lustra vogaung: mae Timothi ga" ra" Khristan byu dayaug na: ra". Yao: myhi" wa Yuda byumyu" Khristan ngad mung: yao: pho" wa Greeg byu ngad: ra". 2 Timothi wa Lustra vogaung: we' Ikoni vogaung: mae na ko" ra" lam khug: ra" mo, alhab' yang khin" ko" ra" yaug ngad: ra". 3 Polu wa Timothi re yao: we' daga" jhui" qin" nug yang: yao: re au: qid lhai" ra" thung" kad' byid' ra". Pe"mung:ga"re yao: pho" wa Greeg byu ngad: rure ai: khaung: mae" mo, ba geyang:- Polu airu: kad' byid' ru ngad: ra". 4 Yao: bam wa vogaung: jham khyo lai: jao" ye: mung:- Yerusalem vogaung: mae na: ra" lagyo: qe we' phung: lau: de, qeyang qham: phyid' to" ra" lam khug: ra" mo, phug' cao" nae" tarha" re yao: bam re byid: mung:- ai: tarha" jham re phug' cao" nae" ta" ako". 5 Airumung: phung: byu qe wa ai: lam khug: ra" khyo mae je: gang" tang: li" mung:- ba khao: ngo" phung: byu qe myo" laug: li" ako". 6 Alao"- Gyang" Lho" Byo yao: bam re Asia mung" khaung: mae mung dao: kho" kyo: byid: nae" akhang" mabyid' ruyang yao: bam wa Phrugi mung" we' Galile mung" khaung: khyo" su" lai: ye" lo" ko" ra". 7 Yao: bam wa Musia mung" mug: kyo: khyo joe" ye: gelao"- Bithunia mung" khyo ye" lo" nae" seim" ako". Ngadqere: Yesu nho: Byo wa yao: bam re akhang" mabyid: ngad: ra". 8 Aimung: yao: bam wa Musia mung" re lai: ye" lo" mung: Troa vogaung: khyo joe" ye" ako". 9 Polu wa myi" re qhu" lho mae Makedoni byu dayaug wa ye; jo, yang:- Makedoni mung" khyo gau" li" mung: ngonhaung" re li" bao" yu la,- ga: mho' na: rure yao: myao: ra". 10 Polu ce: qhu" lho re bin: myao we' ai jao"- ngonhaung" Makedoni mung" khyo ye" lo" nae" qhid' mae" nyhang" seim" bam va"- Pe"mung:ga"re Makedoni mung" mae na ko" ra" mo, re lau dao: gai kho" kyo: byid: nae" qhid' mae" Mao"So wa ngonhaung" re khai: yu: ru ngad va" ein: ngonhaung" myid: jho yang: ngad: ra". 11 Amung: ngonhaung" wa lha khyo" Troa mae" Samothrake qid gyo: kao" khyo din: za: gau" phyid' ye" lo" mung:- Thao: ba re Neapoli vogaung: khyo joe" ye" lo" bam va". 12 Ngonhaung" wa ai: vogaung: mae" Roma qe eib: ra" Makedoni mung" nho: vomo" ngad: ra" Philipi vogaung: khyo taung khyo" ye" lo" va". 13 Dugno: Ba mae ngonhaung" wa- Yuda byu qe zang" ham yang: akyu" mho' ra" jo, qo jo, nae" ein: myid: jho: ra" vogaung: taung gaung qid yae khyo thug' ye" lo" mung:- yezaung: jo, yang:- aimae zang" ham: li" ko" ra" myiqe: qere kho" kyo: byid' bam va". 14 Ai bam: phaung mae Thuatira vogaung: mae" Pin: ne phaga: kad' ra" Ludia ga: mang: ra" myiqe: dayaug bobo: ra". Yao: wa Mao"So re caung:pa" ra" myiqe: dayaug ngad mung: Polu kho" kyo" na: ra" mung dao: re nhag' lam: myid zaug zaug za: tae" gyo" yu nae" qhid' mae" Asang wa yao" nhag' lam: myid kham: re phung" byid' ra". 15 Yao: we' yao" yham byu qe Qid nyhab' kham bin: kham: yu thao re Ludia wa- Ngo wa Asang re gaigai: yao: lam khug: ra" ein: naonhaung" myid: lam ko" ngad: re wa nga" yham khyo bang" li" khug: na geri:- ga: ngonhaung" re lhaung: ra". Aimung: yao: wa ngonhaung" re qo" ngaug: aung: yu: ra". 16 Daba na mae ngonhaung" wa ai: akyu" mho' jo, qo khyo ye" lo" na: au:- makhyang" ra" yui vao: jaung" mung:- geim phan" qo" phan" ra" jeim myhi" dayaug we' ngonhaung" jho" qhug' bam:- yao: wa geim phan" phan" yang: jeim sang re ngaui myo: sho' kaung byid' na: yaug ngad: ra". 17 Yao: wa Polu we' ngonhaung" thao mae cao" mung:- Cebam wa myhao: thao" ra" Mao"So: daui daui mo, ngad: ako"- yao: bam wa ngonhaung" khoru: khyad' yu: ru qo" yu nae" khyo re ta" hau" kyo" ra" mo, ngad: ako"- ga: zag: hug' ra". 18 Ai: myiqe: nau" wa airu: myo: sho' ba kad' na: ruyang Polu wa nhag' gyai yo" li" mung:- lhang: lo yang: Yesu Khristu mang re lao: mung:- ngo nao re amyin" byid: li"- yao" khug mae" phao: thug' lo" wa,- ga: ai: makhyang" ra" yui re ta" ke' ra". Ailao" jao" ai: yui wa myiqe: nau" khug mae" phao: thug' lo" byaug: ra". 19 Ai: myiqe: nau: nho: jeim sang wa yao: ngaui qho khyo jid' byaug va" rure ba lao"- yao: bam wa Sila we' Polu shid' zo: re taung" yu mung:- gai jao: mae na ko" ra" kheim: so' qo" ra" mo, jhao" jhui" she: khyad' ye" lo" ako". 20 Yao: bam wa- yao: shid' zo: re Roma zug: qe: qhid' kheim: khyo jhui" vao ye: mung:- Ceshid' yaug wa Yuda byu qe ngad mung:- yao: shid' yaug wa ngonhaung" vogaung: byu qere aqug: akhai: boe" nhao: na: ako". 21 Ngonhaung" tarha" re gye doe, nhao: ra" thung" li jham re yao: shid' zo: mho" shid' na: ako". Ngonhaung" wa Roma mung" byu qe ngad mung:- ce: thung" li jham re maqo" khae: yu maqo" phug' cao"- ga: ta" ako". 22 Ailao"- mo, byu qere: ai bam: thao bode, mung: Polu we' Sila re gye kad' mung: lhe" ako". Airumung: zug: qe wa Polu we' Sila shid' zo: re mai bau: lao" khyad' pye' byid: yang: qam thaung" yang be, nae" qhid' mae" amyin" byid' ke' ako". 23 Airu: yao: shid' zo: re dae xo sho' bin: be, gethao re thaung: khug mae yelhaung" to" ako". Yao: shid' zo: re tang za: pyid' lhaung" to: nae" qhid' mae" yao: bam: thaung: agyi pho" re amyin" khyo" to" ako". 24 Thaung: agyi pho" wa ai: amyin" re qo" yu lao"- yao: shid' zo: re thaung: yham akhug qe, mae ke' mung: khyid kyam: ke' yang: lhaung" to" ra". 25 Gae gaung: myi: ko re- Polu we' Sila shid' zo: wa- akyu" mho' mung: Mao"So re caung: nghaui" na: ako". Thaung: byu gaje qe wa ai re tae" gyo: yang: na: ako". 26 Alao" nyag din taung" myid lab: qi: sho' lab' li" mung:- thaung: yham apan laui" nan" li" ra". Ailao" jao"- kham: dung: alhab' bung" li" mung:- thaung: byu qe alhab' mo, mae" jao cao: taui: jham gyad: gyo" lo" byaug: ra". 27 Thaung: agyi pho" wa yab: jo; ru mae" so" li" mung: thaung: yham kham: dung: jham bung" jo; rure li" the' myao lao"- yao: wa thaung: byu qe alhab' mo, phao: thug' lo" byaug va" ga: myid: jho yang:- yao" shae pyang: she: yu mung: yao: yao: thug' shid nae" seim" ra". 28 Ngadqere: Polu wa- yao" thoe myhao: thao" mae" zag: hug' mung:- Nao yao" gaung re pe" dakad' wa,- ngonhaung" alhab' mo, cetau mae ana: bam:- ga: ta" ra". 29 Thaung: gyi pho" wa myi:dam mho' yu mung: tao" vao li" yang:- Polu we' Sila shid' zo" khyidqao: mae ko, ko, nin" ru li" goe; ra". 30 Ai: thao re yao: wa yao: shid' zo: re taung gaung khyo jhui" thug' lo mung: Nhag' bo shid' zo: we"- ngo khyad' yu: ru qhug' nae" qhid' mae" pe" ja: kad' ca" i? ga: myid' ra". 31 Yao: shid' zo: wa- Asang Yesu re lam wa,- Ailao" nao we' ni" yham khug: byu qe alhab' mo, khyad' yu: ru qhug' genae"- ga: phaug' tau" ako". 32 Ai: thao re yao: shid' zo: wa yao: re we' yao" yham byu qe alhab' mo, re Asang: mung dao: kho" kyo" ako". 33 Ai: myi re yao:- thaung: gyi pho" wa yao: shid' zo: re jhui" yu mung:- yao: shid' zo" dae khu jham re cid' san: pye' byid' ra". Yao: we' yao" yham byu qe alhab' mo, wa ai jao" yao: qid nyhab' kham: yu: ako". 34 Ai: thao re yao: wa Polu we' Sila shid' zo: re yao" yham khyo jhui" lo" mung: zo:ve da" zho" ra". Thaung: gyi pho" we' yao" yham byu qe wa Mao"So re qo" lam va" ruyang gyai ngaui bau" ako". 35 Thao: ba ne, kao re Roma kheim: so' qo" ra" mo, wa pya: da: zug: pho" qere ai shid' zo: re lhoe' ke' wa, ga" ra" amyin" we' daga" nhao: ke' ako". 36 Airumung: ai: thaung: agyi pho" wa Polu re zug: qe wa nao we' Sila re lhoe' ke' nae" amyin" khyo" ke' avako". Airumung: ni" shid' zo: yaug yo za: phao: lo" ge,- ga: ta" ra". 37 Ngadqere: Polu wa- ai: pya:da: zug: qere- Nga" shid' zo: wa Roma mung"dan: byu qe ngad:- yao: bam wa nga" shid' zo: re pe" qobo maqo" ceim: gelo:- mo, byu qe: qhid' kheim: mae qam thaung" yang be, yang: thaung: khug mae lhaung" ke' geli"- amung: ana" ngad lao" wa- yao: bam wa nga" shid' zo: re sae za: nhao: ke' nug genhaung i? Khai: mae" gai nae"- Roma zug: qe yao: bam yao: cekhyo li" mung: nga" shid' zo: re li" phoe' yu geshao:- ga: ta" ra". 38 Pya:da: zug: qe wa ai: dao: re Roma zug: qere lo" ta" kyo" ako". Yao: bam wa Polu we' Sila shid' zo: wa Roma mung" byu ngad: ko" rure the' gyo: gelao"- gyo" gyaug: ako". 39 Ailao: yao: bam wa ye: mung: Polu we' Sila shid' zo: re thaung: khug mae" yejhui" thug' yu mung:- ai: vogaung: mae" phao: lo" nae" qhid' mae" yao: shid' zo: re mho' ako". 40 Polu we' Sila shid' zo: wa thaung: mae" thug' lo" mung: Ludia nho: yham khyo ye" lo" ako". Ai mae lam khug: ra" mo, we' jho" qhug' mung:- yao: bam re qam: byid: dao: bin: ta" lao"- yao: shid' zo: wa- ai: vogaung: mae" thug' lo" ako". 1 Polu we' Sila shid' zo: wa Ampipholi we' Apoloni vogaung: re su" lai: ye" lo" mung: Thesaloni vogaung: khyo joe" ye" ako". Ai: vogaung: mae Yuda tarha" jung yham dalam: jo; ra". 2 Polu wa yao: khonhae" re: lhaung" kad' ru we' dakhyo:- Yuda tarha" jung yham khyo ye" ra". Ai: mae Dugno: Ba sam ba geim" jham: mugsug' re cao" yang: mo, byu qe we' jho" ta" keim" mung:- 3 Meshia wa dayin dayo: kham zo: ca" nae" khyo we' shid: rumae" dam: daui: to" li" nae"- ga" ra" khyo re jham: mugsug' re ceim" shid' yang: phyid' phyid' kho' kho' za: yao: bam re ta" sho' kyo" ra". Polu wa- Naonhaung" re ngo ta" kyo" na: ra" ce: Yesu wa Meshia yao: ngad: ava"- ga: ta" ra". 4 Yao: bam mae" damyo" wa lam" gemung:- Polu we' Sila shad' khyo de; ako". Mao"So re caung:pa" ko" ra" Greeg byu qe myo: sho' mo, we' akhyag: ra" myiqe: au: jhaung qe myo: sho' mo, re: yao: shid' zo: shad' khyo bode; lo: ako". 5 Ngadqere: Yuda byu qe wa myid nug: gemung:- khyodang khaung: mae" byujad: byugao: jham re khai: zhang" yu mung: byu phung: dalam: kad' yu: ako". Yao: bam vogaung: geim" re lhau: zhung" ke' gemung:- Yason ga: mang: ra" yaug: yham khyo yelhe: yang:- Polu we' Sila shid' zo: re mo, byu qe: qhid' kheim: khyo she: khyad' thug' yu nae" qhid' mae" yepoe: ako". 6 Yao: bam maqho: myao gelao"- yao: bam wa Yason we' lam khug: ra" mo, damyo" re ai: vogaung: mae" kheim: so' qo" ra" mo; qhid' kheim: khyo she: khyad' li" mung:- Cebam wa jo, qo khyi" khao: ngo" mae qug: khai: boe" nhao: lo mo, ngad: ako". Ana" ngonhaung" vogaung: khyo re: joe" lo: avako". Yason wa yao" yham mae yao: shid' zo: re khae: yu: to" ra". 7 Yao: bam alhab' wa Yesu ga" ra" kho:kham dayaug na:- ga: ta" mung: Kho:sin" tarha" jham re shad' lhoe" na: ako"- ga: zag: hug' ako". 8 Ce: dao: re the' gyo: gelao" mo, byu qe we' vogaung: mae" kheim: so' qo" ra" mo, wa gyai yhai: li" ako". 9 Kheim: so' qo" ra" mo, wa Yason we' gaje qere pakham: ngaui khyug' nhao mung: yao: bam re nhao: ke' ako". 10 Mug: cad' lo we' lam khug: ra" mo, wa Polu we' Sila shid' zo: re Beria vogaung: khyo nhao: ke' ako". Ai: vogaung: khyo joe" ye: gelao"- yao: shid' zo: wa Yuda tarha" jung yham khyo ye" ako". 11 Beria vobyu qe wa Thesaloni vobyu qe tho' je yang: suzo: du: mo, ngad: ako". Yao: bam wa mung dao: re nhag' lam: zaug zaug za: tae" gyo" yu mung:- Polu kho" kyo" ra" mung dao: dang madang: rure ba nae" qhid' mae" ba khao: ngo" jham: mugsug' re nghe' xeim: yu: ako". 12 Yao: bam mae" myo: sho' mo, lam" ako". Byuna azhao" myao: ra" Greeg myiqe: qe myo: sho' mo, we' Greeg yauggai myo: sho' mo, re: lam" ako". 13 Ngadqere: Polu wa Beria vogaung: mae re: Mao"So: mungdao: re kho" kyo" na: ra"- ga" thoe re Thesaloni vogaung: mae" Yuda byu qe the' gyo: gelao"- yao: bam Beria vogaung: khyo joe" li" mung:- mo, byu qere lu" to" li" nae" poe: ako". 14 Lam khug: ra" mo, wa ailao" jao"- Polu re panglai: qid yae joe" sho' yedai" ke' ako". Ngadqere: Sila we' Timothi shid' zo: wa Beria vogaung: mae thang: na: ako". 15 Polu re yedai" ke' ko"mo, wa- Athen vogaung: joe" sho' Polu we' daga" cao" ye: mung:- Sila we' Timothi shid' zo: re gai: boe" ra" qhi" phyad za: yao: jhao" cao" li" nhao ge,- ga: Polu pyang: ke' ra" dao: vin yang: Beria vogaung: khyo dam: phao: lo" ako". 16 Polu wa Athen vogaung: mae Sila we' Timothi re lao" na: au:- yao: wa ai: vogaung: geim" mae solho za: byang" sheim: jo; rure myao mung:- yao" nhag' lam: mae gyai mamyan ngad: ra". 17 Amung: Polu wa Yuda tarha" jung yham mae Yuda byu qe we' re:- Mao"So re caung:pa" ra" Taung bug byu qe we' re:- ba khao: ngo" shava gai jao: mae su" lai: qin" ra" mo, byu qe we' re:- jho" ta" keim" ako". 18 Epikuri we' Stoi myid pha,jhi" mho" pho" qe daqhae: re: Polu we' gyai jho" ta" ngag: ako". Yao: bam mae" damyo" wa ce: ba pyad' pyad' yaug pe" re ta" nug: na: laug- ga: ta" mung: gatau damyo" wa- Gatau: byumyu" qenho: so jham: khyo re ta" na sam" ra"- ga: tau" ako". Yao: bam ceru: ta" ko" ru wa- Yesu khyo re we' dam: daui: to" li" ra" khyo re Polu kho" kyo: yang: ngad: ra". 19 Amung: yao: bam wa Aripagu bug gaung- vogaung" nho: tarha" yung" qhid' kheim: khyo Polu re jhui" do, ye: mung:- Nao ta" na: ra" ce: mho" shid' khyo asag' we' sin: yang: ngonhaung" ba nug: ra". 20 Nao mho" shid' ra" khyo jham daqhae: wa ngonhaung" qhid' mae" dao: bang" ru: ga" ra". Aijham: lajheim: re ngonhaung" ba nug: ra"- ga: ta" ako". 21 (Pe"mung:ga"re Athen vobyu qe we' ai: mae na ko" ra" gatau: mung"dan: byu qe wa lau dao: asag' jham: khyo re ta" yang:- tae" gyo: yang: yao: bam: yo, khyin: jham re zai" lhai: ke' nug: ako".) 22 Polu wa vogaung" tarha" yung" qhid' kheim: mae ye; jo, yang:- Athen vobyu qe we"- naonhaung" wa caung:pa" thung" re gyai kao bau mo, ngad ko" rure khyo khao: ngo" re qu" yang: ngo ba: yu va". 23 Pe"mung:ga"re Ngo naonhaung" nho: vogaung: khug mae su" qin" mung: naonhaung" caung:pa" ko" ra" jo, qo jham re cao" qu" au:- Ngonhaung" maba: ra" Mao"So: qhid' mae"- ga: tung" te' to" ra" phan dalam: re ngo the' myao va". Airu: naonhaung" maba lo:- caung:pa" na ko" ra" Mao"So: khyo- ngo ana" naonhaung" re ta" kyo: geli". 24 Mug: myid we' ai: mae na: ra"- jo; ra" gu:- alhab' re phan" to" ra" Mao"So wa mug:gaung we' myid gaung: Asang ngad mung:- byu: lo; yang kad' to" ra" Caung:pa" Yham khug mae mana ngad: ra". 25 Ai: Asang yao: yao:- yaug khao: ngo" re kao so' we' so' she: ru we' gatau qo ca" ra" gu: alhab' re byid' to: yaug ngad: ruyang daja: ja: qo ca" ra" yaug reru: yao: re byu: lo; yang caung da" byid: maca" ngad: ra". 26 Mao"So wa xao su byu dayaug re shi" phan" mung: ai: yaug mae" byumyu" cao jab na: thug' li" nhao yang: myid gaung geim" mae na nhao: ra". Yao: bam na nae" qhid' mae" yo, khyin:- zin na we' jo, qo- mug: kyo: jham re gau: qhid' khae" yang: kyo: so" to: byid' ra". 27 Mao"So ceru: kad' to" ru wa- yao: bam yao: re qho mung:- yao: re myao: re myao ga: yao: re soe' qho: qin" genae" qhid' mae" ngad: ra". 28 Byu dayaug ta" to" ru we' dakhyo"- ngonhaung" wa yao: mae kao so' daui: na:- lab: na mung: na: jo; bam:- ga: ta" ra". Naonhaung" re: yao" myid:zo: qe ngad:- ga: dao: zham" zham" to: ko" ra". 29 Ngonhaung" wa Mao"So: zo: dau qe ngad: ruyang Mao"So wa byu: lo, mau" pha,jhi" yang kad' to" ra" qhang- ngaui sulho- laug sulho we' dau: ein: ra" khyo" magai: jho ngad: ra". 30 Mao"So wa xao su byu qe yao: re maba mabeim: lo: na: lai: lo: ra" ba na yo, khyin: gu: alhab' re qu" lhai: ke' byid' ava". Ngadqere: ana" wa- khyi" khao: ngo" mae" xao su byu qe alhab' mo, re yao: bam: makhyang" ra" mau" zo" jham mae" myid tha" genae" qhid' mae" amyin" byid: va" ra". 31 Pe"mung:ga"re yao: khyin: yu: to" ra" yaug: lo, khyo" yang yao: wa mug: myid geim" re din: nyang: ra" khyo" dao: kho' nae" ba na re mhai" so" to" ava". Ce: khyo we' sin: mung: gaigai: yao: boe" nae" ngad: rure yaug khao: ngo" re sagse: qhu" byid' ra" khyo" yao: re shid: rumae" daui: to" li" nhao: ra"- ga: ta" ra". 32 Yao: bam wa shid: rumae" dam: daui: to" li" ra" khyo we' sin: yang: Polu ta" rure the' gyo: gelao"- Yao: bam mae" damyo" wa Polu dao: re qi: jung" pye' byid' ako". Ngadqere: damyo" wa- Ce: khyo we' sin: yang: nao ta" rure ngonhaung" dam: gyo: nug shi"- ga: ta" ako". 33 Aimung: Polu wa ai: phaung mae" phao: lo" ra". 34 Byu damyo" wa Polu thao cao" mung: Yesu re lam: lo: ako". Aibam mae" Dionusiu ga: mang: ra" Aripagu tarha" yung" phung: mae bobo: ra" tarha" agyi pho"- Damari ga: mang: ra" myiqe: dayaug we' byu gaje qere: bobo: ako". 1 Ai: thao re Polu wa- Athen vogaung: mae" thug' lo" mung: Korinthu vogaung: khyo joe" ye" lo" ra". 2 Ai: vogaung: mae Pontu mung" byu Akula ga: mang: ra" Yuda byu dayaug we' Yao" yham sang myhi" Priskila shid' tao we' yejho" qhug' ra". Yuda byumyu" qe alhab' mo, Roma vogaung: mae" thug' lo" ca"- ga: Roma Kho:sin" Klaudiu amyin" khyo" ke' ruyang yao: shid' tao wa mataung" myao" shire Itali mung" mae" joe" li" ru shid' tao ngad: ako". 3 Polu wa yao: shid' tao jhao" yena mung: mau" daga" yebo: cao: zaui" ra". Pe"mung:ga"re Polu re: yao: shid' tao we' dakhyo: mug: go pin: zaung kad' zo: yaug ngad: ra". 4 Polu wa Dugno: Ba khao: ngo" Yuda tarha" jung yham mae Yuda byu qe we' Greeg byu qe we' jho" ta" keim" mung:- yao: bam lam khug: lo gesho' ta" ngaug: yu: ra". 5 Sila we' Timothi shid' zo: Makedoni mung" mae" joe" li" gelao"- Polu wa yao" ayo, alhab' re mung dao: kho" kyo" rumae za: qam: ke' pye' mung:- Yesu wa Meshia ngad: ra"- ga: Yuda byu qere sagse: kham byid' ra". 6 Yao: bam wa yao: re maphug' makhyad' ngag: ta" gelao"- Polu wa yao" mai bau: jham mae" badan jham re ko: khyo" pye' mung:- Naonhaung" jeim" byaug ko" re wa naonhaung" yao" qo za: angad lo"- nga" au: dao mae pe" qo majo, lo:- ana" ba mae" thoegu: ngo wa Taung bug byu qere mung dao: kho" kyo: nae" ye" lo" naeva"- ga: ta" ra". 7 Alao" Polu wa yao: bam mae" thug' lo" mung:- Mao"So re caung:pa" ra" Titu Yustu ga: mang: ra" Taung bug byu dayaug: yham mae yethang: na: ra". Ai: yaug: yham wa Yuda tarha" jung yham we' te' te' ngad: ra". 8 Amung: tarha" jung yham agyi pho" Krispu we' yao" yham byu qe alhab' mo, wa Asang re lam khug: lo: ako". Korinthu vobyu qe myo: sho' mo, re: ai: mung dao: re the' gyo: gelao" lam" mung: qid nyhab' kham: yu: ako". 9 Damyi re Polu wa qhu" lho dalam: re myao: ra". Ai: qhu" lho mae Asang wa Polu re dagyaug wa,- xo' yang: kho" kyo: wa,- qam: dashan wa,- pe"mung:ga"re ngo wa nao we' daga" ngad:. 10 Nao re khag' re: dae maqo" te' genae"- Ce: vogaung: mae ngo re lam khug nae" mo, myo: sho' na: bam: ako"- ga: ta" ra". 11 Airumung: Polu wa ai: vogaung: mae dazin: lho" khyaug' khye' na: na mung:- mo, byu qere Mao"So: mungdao: kho" kyo" ra". 12 Ngadqere: Galio ga" ra" yaug Akhaia mung" zug: boe" li" lao"- Yuda byu qe wa zang" phaung mung: Polu re taung" yu yang: tarha" yung" khyo jhui" ye" ako". 13 Yao: bam wa ceyaug wa tarha" we' majho" zhaung" ra" khyo" Mao"So re caung:pa" nae" qhid' mae" mo, byu qere jhui" poe: na: ra" yaug ngad: ra"- ga: ta" ako". 14 Polu phaug' tau: nae" seim" we'- Galio wa Yuda byu qere gaigai: yao: ce: mau" zo" wa makhyang" ra" mau" zo"- mangad: lao"- shad' lhoe" ra" mau" zo" ngad: re wa- ngo wa naonhaung" qobo zhaug' ra" khyo re nyang" za: tae" gyo: byid: zai ngad: ra". 15 Ngadqere: ce: mau" zo" wa myan" dao: thoe we' mang we' naonhaung" yao" tarha" we' sin: yang: za: jho" ta" ngag: ra" khyo ngad: ruyang naonhaung" yao: nyhang" yu ca" ako". Ceru" ra" mau" zo" mae ngo wa tarha" agyi makad' nae"- ga: Yuda byu qere ta" ra". 16 Amung: yao: wa yao: bam re tarha" yung" mae" khe' thug' ke' ra". 17 Yao: bam wa Tarha" jung yham agyi pho" Sostheni re taung" yu mung: tarha" yung" qhid' au: mae be; ako". Ngadqere: Galio wa ai re pe" shui manho ngad: ra". 18 Polu wa Korinthu vogaung: mae lam khug: ra" mo, we' daga" myo: sho' ba thang: na shi" ra". Ai: thao yao: bam re au" co' mung:- lha khyo" Priskila we' Akula shid' tao we' daga" Suri mung" khyo gau" ye" lo" ako". Kenkhrea vogaung: mae" qid sang pho mato" shire Polu wa Mao"So re jham tang" to: va" ruyang yao" au: xae qaug: pye' ra". 19 Yao: bam Ephesu vogaung: khyo joe" ye: gelao"- Polu wa Priskila we' Akula shid' tao re ai: vogaung: mae nha: to: co' ra". Amung: yao: wa Yuda tarha" jung yham khyo ye: yang: Yuda byu qe we' dao: yejho" jhau: ra". 20 Mo, byu qe wa myao" sho' thang: na nae" qhid' mae" Polu re mho' ako"- Ngadqere: yao: maqad ngad: ra". 21 Mao"So myid o: ru ngad: re wa naonhaung" jhao" dam: li" shinae"- ga: yao: bam re ta" ra". Amung: Polu wa Ephesu vogaung: mae" lha gau: mung: to" lo" ra". 22 Polu wa Kesarea vogaung: khyo gau" joe" ye: lao"- Yerusalem vogaung: khyo ye" lo" mung: phung: byu qere ye: au" co' yang:- Antioki vogaung: khyo ye" lo" ra". 23 Ai: vogaung: mae dayo, zo: yethang: na mung: aimae"- yao: wa Galati mung" we' Phrugi mung" khaung: khyo" lai: jao" ye: mung: lam khug: ra" mo, re nyhad' tang byid' ra". 24 Ai: yo, mae Alexanda vobyu Apolo ga: mang: ra" Yuda byu dayaug wa Ephesu vogaung: khyo joe" ye" ra". Yao: wa dao: jhau gai yaug we' jham: mugsug' gyai ba jhao: ra" byu dayaug ngad: ra". 25 Yao: wa Asang: khyo re zhao: yu: to: va" yaug ngad mung: Yesu nho: khyo we' sin: yang: akhyo: jo jo za: gyai kao bau taung" kho" kyo" ra". Ngadqere: yao: wa Yohan nho: Qid nyhab' kham khyo re shi" ba: ra". 26 Yao: wa Yuda tarha" jung yham mae mazag mavae kho" kyo" ra". Priskila we' Akula shid' tao yao" mungdao: re the' gyo: gelao"- Apolo re ai shid' tao: yham khyo khai: yu mung:- Mao"So: khyo re je yang: jo jo za: yao: re ta" sho' kyo: byid' ako". 27 Apolo wa Akhaia mung" khyo ye" lo" nae" myid: phyid' ra"- Aimung:- Ephesu vogaung: mae" lam khug: ra" mo, wa Akhaia mung" mae na ko" ra" lam khug: ra" mo, jhao" Apolo re lham: khae: yu nae" qhid' mae" jhan: byid' ra" bang" se" vhin tung" tung" yang: yao: re bao" thaug' byid' ako". Yao: wa Akhaia mung" khyo joe" ye: lao"- Mao"So: nhag' myan" ra" khyo" yang lam khug: lo ko" ra" byu myo: sho' mo, re gyai yebao" thaug' byid' ra". 28 Pe"mung:ga"re Yesu wa Meshia yao: ngad va"- ga" rure jham: mugsug' mae" sagse: jham re khyag' khyag' za: ceim" shid' byid: mung: mo, byu qe: qhid' kheim: mae Yuda byu qere ta" aung: pye' ra". 1 Apolo wa Korinthu vogaung: mae na: jo; au:- Polu wa xo' yang: ai: mung" gaung: cao" yang: su" lai: lo" mung: Ephesu vogaung: khyo joe" lo: ra". Ai: vogaung: mae yao:- yao: wa lam khug: ra" mo, damyo" re yemyao mung:- 2 yao: bam re Naonhaung" wa lam khug: ra" mo, boe" lo gelao"- Gyang" Lho" Byo qo" khae: yu vako" i?- ga: myid' ra". Yao: bam wa Gyang" Lho" Byo na: ga" rure lhao" re: ngonhaung" mathe' gyo" qu"- ga: tau" ako". 3 Alao" Polu wa- Aire naonhaung" pe" ja" qid nyhab' kham: yu ko" i?- ga: myid' ra". Yao: bam wa Yohan nho: Qid nyhab' kham re kham: yu:- ga: tau" ako". 4 Polu ta" ru wa- Yohan wa myid tha" ru we' sin" ra" qid nyhab' kham re byid' ra". Yao" thao mae joe" li" ra" yaug Yesu re lam" genae" qhid' mae" ta" ra". 5 Ce: dao: re yao: bam the' gyo: gelao"- yao: bam wa Asang Yesu mang mae qid nyhab' kham: yu: ako". 6 Polu lo, yao: bam: dao mae kai: byid: lao"- Gyang" Lho" Byo wa yao: bam: dao mae joe" li" mung:- yao: bam wa myan" abang" jhau: li" gemung: Mao"So: mungdao: rere: lapa pa mung: ta" ako". 7 Yao: bam wa yauggai daxe: shid' yaug ko ngad: ako". 8 Polu wa lho" mo" sam khye' geim" Yuda tarha" jung yham khyo man: man: ye: mung: mo, byu qe we' mazag mavae jho" ta" ngag mung:- Mao"So: mung"dan: khyo re ba: khae: yu genae" qhid' mae" yao: bam re kho" kyo: byid' ra". 9 Ngadqere: yao: bam mae" damyo" wa nhag' lam: qao mung: malam" ko" ngad: ra". Amung: yao: bam wa mo, byu qe alhab' mo; qhid' kheim: mae Asang: khyo re magai: ra" khyo" ta" phoe: pye' ako". Airumung: Polu wa lam khug: ra" mo, re jhui: mung: yao: bam mae" thug' lo" mung: Turannu ga" ra" yaug: pha,jhi" jung yham mae ba khao: ngo" mungdao: jho" ta" keim" ra" phaung kad' ra". 10 Ceru: shid' zin lam: lam: kad' mung: Asia mung" mae na ko" ra" Yuda byu qe we' Taung bug byu qe alhab' mo, wa Asang: mung dao: re the' gyo" ako". 11 Mao"So wa Polu khyo" yang gakai: lai: ra" mug' pho: ve, lho jham re kad' qhu" byid' ra". 12 Polu ci: ra" pha, jad we' gacoe: jham re za: lhao" re: no phyo: qhug' ra" mo, we' yui vao: jaung" ra" mo, jhao" ciye: lao"- no phyo: qhug' ra" mo, wa gai: shao: lo" mung:- yui jham re: yao: bam vao: jaung" ra" mo, mae" phao: thug' lo" ako". 13 Yui jham re cao" khe' thug' qin" ko" ra" Yuda byu qe damyo" re: yui jham re khe' thug' pye' nae" qhid' mae" Asang Yesu mang re lao: yang: kad' qu" ako". Yao: bam wa Polu kho" kyo" ra" Yesu mang re lao: yang: nao re ngo amyin" byid: li"- ga: makhyang" ra" yui jham re ta" ako". 14 Yuda Khinjaung Yin" Skeva nho: yauggai zo: tao ho' nhad' yaug re: ai ru: kad' ako". 15 Ngadqere: makhyang" ra" yui wa yao: bam re- Yesu re ngo ba:- Polu rere: ngo ba: naonhaung" lam: wa- khag' ngad ko" i?- ga: myid' ra". 16 Ai: yui vao: jaung" ra" yaug wa- yao: bam re se' da: be, khyad' kad' yang: yao: bam alhab' re aung: pye' ra". Yao: bam wa dae de' ru we' gaung pyad' ai: yham mae" tao" phao: lo" ako". 17 Ephesu vogaung: mae na ko" ra" Yuda byu qe we' Taung bug byu qe alhab' wa ai: khyo re the' gyo: gelao"- yao: bam alhab' mo, gyaug mung: Asang Yesu mang re je yang: caung:khin" byid' ako". 18 Lam khug: ra" mo, myo: sho' re: joe" li" mung:- yao: bam kad' shad' lo: ra" khyo jham re mo, byu qe: qhid' kheim: mae de: de: za: lhang: yu: ako". 19 Vha" zo" ra" mo, myo: sho' wa yao: bam: mugsug' paug' jham zhang: cili" mung: mo, byu qe: qhid: kheim: mae li" ngha" pye' ako". Ai: mugsug' paug' jham: gau jho re sun" qu" re ngaui thang: the: ngo" tug kye' man" ra". 20 Ce: khyo" yang Asang: mungdao: wa qam: so' thin: ra" khyo" hau" nhao" je" lo" mung: je yang: qi" qhang: lo" ra". 21 Cejham bin: boe" thao re Polu wa Makedoni mung" we' Akhaia mung" khyo su" lai: ye" lo" mung: Yerusalem khyo ye" lo" nae" qhid' mae" myid: phyid' to" ra". Yao: wa Ngo ai: vogaung: khyo bin: joe" ye: thao Roma vogaung: khyo re: ngo yejoe" qu" ca"- ga: ta" ra". 22 Airumung: Polu wa- yao: re bao" thaug' ko" ra" Timothi we' Erastu re Makedoni mung" khyo nhao: ke' mung: yao: wa Asia mung" mae dayo, dataung thang: na: jo; ra". 23 Ai: yo, re Asang: khyo mathao: yang Ephesu vogaung: mae qug: khai: gyai qi: sho' boe" thug' li" ra". 24 Demetri ga: mang: ra" jang kham" ngaui be, su dayaug wa- Atemi so myhi" nho: ngaui yham khyao anau" jham re kad' mung:- yao" mau" zo" yang lo, mau" zaui: mo, re ngaui gyai qo" nhao: ra". 25 Aimung: yao: wa yao" mau" zo" mae lo, mau" zaui" ra" mo, gatau alhab' mo, re khai: zhang" yu mung:- Byin cao: qe we"- ngonhaung" wa ce: lo, mau" kad' zo: yang: na: qo" na: dai: na: bam: rure naonhaung" yao: ba gau ngad: ako". 26 Ana" wa ce: Polu ga" ra" yaug pe" kad' na: ra" khyo re naonhaung" yao: the' gyo: the' myao: na: avako". Yao: wa byu: lo; yang kad' ra" so sulho jham wa So mangad: ga: ta" mung: ce: Ephesu vogaung: mae" mo, re we' Asia mung" geim" mae na: ra" mo, alaug alhab' re lam" gesho' ta" aung: yu: ava". 27 Airumung: ce: ngonhaung" mau" zo" re mang zai" qheim" pye' nae" gyaug ca" ra". Ai za: mangad: qi" qhang: ra" so myhi" Atemi nho: so yham wa pe" mangad: lo nae". Alao" Asia mung" mae" mo, alhab' we' mug: myid geim" yang ceim" goe; pa" ra" so myhi" nho: qi" qhang: rure phoe: lo" byaug nhao: li" nae"- ga: ta" ra". 28 Ai: dao: jham re the' gyo: gelao"- ai: lo, mau" kad' zo: mo, wa nhag' yo" li" gemung: Ephesu vogaung: byu qe:nho: Atemi wa qi" qhang: ra" wo"- ga: zag: hug' ako". 29 Ai: mo, thaui: mo, yaug yhai: ru wa davo geim" mae je" lo" mung: byu jham wa Polu we' gyaung: su: byin cao: ngad ko" ra" Makedoni mung" byu Gaiu we' Aristaku shid' zo: re taung" yu mung: poe go" jao: khyo phyad za: jhui" vao ye" lo" ako". 30 Polu yao: yao: wa mo, byu qe: qhid' kheim: khyo ye: nug: ra". Ngadqere: lam khug: ra" mo, wa yao: re maye: nhao ko" ngad: ra". 31 Polu yao" ba nam qe ngad ko" ra" mung"dan: kheim: so' qo" ra" mo, damyo" re: poe go" jao: mae mayena: qhu" nae" qhid' mae" byu nhao: ke' mung: Polu re mho' ke' ako". 32 Ai: ayo, mae mo, byu qe wa- mo, thaui: mo, yaug yhai: na: bam mung: mo, byu qe wa damyo" daja: ga: hug' na: bam: ako". Yao: bam mae" myo: sho' mo, wa yao: bam pe" mung: zang" ham: na: rure lhao" re: maba ngad: ako". 33 Yuda byu qe wa Alexanda re mo, byu qe: qhid' au: khyo ye: nhao: ke' ko" ruyang mo, byu qe damyo" wa- Alexanda re mo, thaui: mo, yaug yhai: li" ra" khyo we' sin: yang: ngad nae"- ga: jho: ako". Alao"- Alexanda wa mo, byu qere sae za: na genae" qhid' mae" lo, tu" tu" mung: yao: mashad' rure ta" qid' yu nae" qhid' mae" qam: ke' ra". 34 Ngadqere: yao: wa Yuda byu ngad: rure mo, byu qe ba: qu" gelao" Ephesu vogaung: nho: Atemi wa qi" qhang: ra" wo"- ga: yo, qug shid' lam: yao: bam alhab' daga" zag: hug' ako". 35 Lo" thao" mae vogaung: jere" pho" wa- mo, byu qere sae za: na nhao mung:- Ephesu vobyu qe we"- Ephesu vogaung: wa qi" qhang: ra" Atemi so yham re we' mug:gaung mae" gyo" li" ra" gyang" lho" ra" laug zang re zam" na: ra" vogaung: ngad: rure yaug khao: ngo" ba: ako". 36 Khag' re: ce: khyo re maqo" ha: pye' ngad: ra". Airumung: naonhaung" wa sae za: na: re gai: ra". Daja: ja: re mamyid: qu" lo: kad' nae" maang ngad: ra". 37 Naonhaung" wa- ce shid' zo: re- so yham re lhad' zo" rure: mangad:- Naonhaung" so myhi" re ta" phoe byid' rure: mangad: ko" rure ce: jo, qo khyo jhui" li" ako". 38 Demetri we' yao" lo, mau" zaui: mo, wa dayaug yaug re qobo zhaug' nug ko" ngad: re wa tarha" yung" phung" to" ru we' kheim: so' qo" ra" mo, re: na: ako". Tarha" yung" mae qobo gai: zhaug' ra". 39 Ngadqere: naonhaung" ai: tho' mae" jeyang: daja: ja: ta" nug ko" re wa- vobyu qe tarha" vao phaung: ra" zabphaung mae ta" phyid' yu ca" nae" ngad: ra". 40 Pe"mung:ga"re ana" ba boe" ra" mo, thaui: mo, yaug yhai: ra" mau" zo" mathao mae ngonhaung" re qobo zhaug' genae" rure gyaug ca" ra". Ceru: mo, thaui: mo, yaug yhai: ra" khyo pe" mung: boe" rure ceim" shid' nae" we' sho' kyo: nae" akhyo jhaug' za" ru ngonhaung" maqo"- ga: ta" ra". 41 Cedao: bin: ta" thao re yao: wa- mo, byu qere phao nhao: ke' ra". 1 Ai: mo, thaui: mo, yaug yhai: ru tae" lo" thao re Polu wa lam khug: ra" mo, re khai: zhang" yu mung: qam: byid: dao: ta" ra". Ai: thao yao: bam re au" co' mung: Makedoni mung" khyo ye" lo" ra". 2 Ai: mung" khaung: khyo" su" lai: ye" lo" mung:- lam khug: ra"- mo, byu qere qam: byid: mung: dao: myo: sho' ta" ra". Ai: thao re yao: wa Akhaia mung" joe" ye: mung:- 3 Ai: mae lho" mo" sam khye' yethang: na: ra". Yao: wa Suri mung" khyo ye" lo" nae" seim" na: au:- Yuda byu qe yao: re se' nae" pha,jhi" khug' khyug' yang: kung" na ko" ra" khyo re yao: ba lao"- Polu wa Makedoni mung" khyo" dam: tug' phao: lo nae" myid: phyid' pye' ra". 4 Beria vobyu Purhu nho: yao: zo: Sopata- Thesaloni vogaung: mae" Aristaku we' Sekundu- Derbe vogaung: mae" Gaiu Asia mung" mae" Tukhiku we' Trophimu we' Timothi bam wa yao: we' daga" bocao: ye" lo" ako". 5 Yao: bam wa qhid' khyo ye" lo" mung:- Troa vogaung: mae ngonhaung" re yelao" na: ako". 6 Ngonhaung" wa Man" make' ra" mug Poe baui: thao re Philipi vogaung: mae" lha jui: yang: ngo" ba thao Troa vogaung: mae yao: bam we' lojho" qhug' mung: ai: vogaung: mae ngonhaung" wa dalaban thang: na: bam va". 7 Ngonhaung" wa ban thug' khyaug' ba myi" thao re zam" khug: ra" myi" xeim zo: nae" qhid' mae" zang" ham: na: bam:- Polu wa thao: ba to" lo" nae" ngad mung: gae gaung: myi: joe" sho' phung: byu qere kho" kyo" na: ra". 8 Ngonhaung" zabphaung: na: ra" tho' pyae: qe, mae myikaug' myo: sho' te' to" ako". 9 Utukhu ga: mang: ra" zolau: wa bao: zo: kham: mae zaung: jo; ra". Polu dao: xo' yang: dao: jhau: na: au: Utukhu wa yab nghoe" nghoe" yang: yab: mo; lo" mung:- yao: wa lo" thao" re sam pyae myhao: ra" yham dao mae" myid gaung khyo yab: byid: gyo" lo" ra". Yao: bam yao: re lo" tau: vo; qu" ko" re Utukhu wa shid: byaug: ava". 10 Ngadqere: Polu wa myid gaung khyo gyo" lo" mung:- Utukhu re lo" po: ci yang: yao: wa Dasang: kho: ge,- Yao: kao so' daui: na: ashi" ga: ta" ra". 11 Polu wa yham dao khyo dam: do, lo" mung: mug re khyoe' phai" yang: zo" ra". Polu wa mug: bo" sho' yao: bam we' dao: jhau: ra"- ai: thao re ai: vogaung: mae" to" lo" ra". 12 Lam khug: ra" mo, wa kao so' daui: ra" zolau: re yham khyo jhui" lo" mung: nhag' lam: yaug yo: ru myo: sho' qhug' ako". 13 Ngonhaung" wa lha khyo qhid' ye" lo" mung: Asu vogaung: mae Polu re lham: jhui" zhaung: yu nae" seim" to: yang:- Asu vogaung: khyo gau" ye" lo" bam:- Pe"mung:ga"re Polu yao: wa taung khyo" ai: vogaung: khyo ye: nae" seim" to: yang: ngonhaung" re ceru: kad' nae" ta" to" ra". 14 Asu vogaung: mae yao: ngonhaung" re li" qhug' lao"- ngonhaung" wa yao: re lha mae jhui" zhaung: yu mung: Mitulene khyo gau" ye" lo" bam va". 15 Ngonhaung" wa ai: tau mae" gau" ye" lo" mung: thao: ba re Ki- u gagyo: kao" tau" te' jo, qo khyo joe" ye: mung: thao: ba re Samo qid gyo: kao" khyo joe" ye: mung: thao: ba re Miletu vogaung: khyo joe" ye" lo" bam va". 16 Polu wa Asia mung" mae ayo, ba na mazai" gan nug mung: Ephesu vogaung: nhae khyo" gau" lai: lo" nae" myid: phyid' to" ra". Gai: boe" ngad: re wa Pentikoti poe mae myhi sho' Yerusalem vogaung: khyo joe" ye: nae" yao: hin: na: ra". 17 Polu wa Miletu vogaung: mae" Ephesu vogaung: khyo byu nhao: ke' mung: phung: lau: de, qere yao: jhao" li" genae" qhid' mae" khai nhao: ke' ra". 18 Yao: bam joe" li" gelao"- Polu wa yao: bam re- Ngo Asia mung" khyo sao qhid' joe" lo: ra" ba na mae" naonhaung" we' daga" ngo khoru: na: lo: ra" khyo re naonhaung" ba: ako". 19 Yuda byu qeyang pha,jhi" khug' khyug' mung: kad' ra" mau" mathao mae qug: khai: qhug' na: ra" gyo: mae nhag' lam: nyham: khyo" mung: ngug byid ngug nhe' gyo" yang: Asang: nho: daui daui yaug khyo" ngo mau" zaui" lai: lo va". 20 Mo, byu qe: qhid' kheim: mae we' naonhaung" yham jham mae ngo kho" kyo: mho" shid' byid' ra" au: naonhaung" qhid' mae" akyu" bo: ra" dao: dakheim: rere: ngo matang" to" ru re naonhaung" ba: ako". 21 Yao: bam qobo mae" myid tha" pye' yang: Mao"So shad' khyo phaug' lo genae" we' Asang Yesu re lam: lo genae" qhid' mae" ngo wa Yuda qe we' Taung bug byu qere dakhyo: za: qam: ke' yang: ta" peim" lo va". 22 Ana"- ngo wa Gyang" Lho" Byo: mho dao: re gyo: yang: Yerusalem khyo ye" lo" zai ngad:- Ai: vogaung: mae ngo pe" yeboe" nae" rure ngo maba. 23 Thaung: laung" ru we' qug: khai: ru wa ngo re lao" na: ako"- ga: vogaung: khao: ngo" mae Gyang" Lho" Byo wa ngo re ta" peim" to" rure za: ngo ba: ra". 24 Ngadqere: nga" kao so' re ngo pe" o: mabyid. Ngo wa dang: to" ra" mau" zo" zaui" pin" nae" we' Asang Yesu yang ngo re byid' to" ra" mau" zo" ngad: ra" Mao"So: nhag' myan" ra" khyo Lau Dao: Gai re ta" hau" kyo" ra" mau" zo" re kyab' sho' zaui: nae" rure za: kao bau: ra". 25 Ngo wa Mao"So: mung"dan: khyo naonhaung" jhao" cao" kho" kyo" qin" va". Ana" wa naonhaung" mae" khag' re: ngo re khonhae" re: dam: qhug' myao logenae" mangad' rure ngo ba:. 26 Airumung: naonhaung" mae" dayaug yaug kao so' jeim" lo" ngad: re nga" au: dao mae qo mabo: rure ana" ba ngo naonhaung" re jhaug' za: ta" geli". 27 Pe"mung:ga"re ngo wa Mao"So myid: yaung: to" ra" khyo alhab' re pe" re: matang" to: lo: naonhaung" re ngo hau" kyo: byid: va". 28 Airumung: naonhaung" yao" gaung re we' Gyang" Lho" Byo: yang naonhaung" lo, mae ab byid' to" ra" yao kyaung" re qu" gun caung: na ge,- yao: zo" nho: sa" yang yao: sang: ra" phung: kad' yu: ra" Mao"So: phung: re lhaug' zaung" ra" yao lhaug' mo, doe; na ge,- 29 ngo thug' lo" thao re makhyang" ra" zag ne jham naonhaung" phaung gaung: khyo vao li" mung: yao kyaung" re phyo' zo" pye' li" genae" rure ngo ba:. 30 Naonhaung" phung: mae" yao:- byu damyo" wa mhug' pyag' dao: ta" mung: lam khug: ra" mo, re yao: bam: thao khyo jhui" pyag' lo" li" nae" ba na joe" lo: li" nae". 31 Airumung: ngo naonhaung" yaug khao: ngo" re sam zin lam: lam: myi" re: na" re: ngug byid ngug nhe' myo: sho' gyo" yang: kho" kyo: mho" shid' byid' rure myid: beim: mung: lha" yang: na ge,. 32 Ana" ngo wa naonhaung" re Mao"So gun caung: ra" lo, khug mae re: naonhaung" re tau: to' qi" qhang: li" nhao: ra" Mao"So: nhag' myan" ra" mung dao: mae re: ngo ab byid' ra". Mao"So wa yao" byu qe alhab' re byid: nae" jaung: to" ra" shaman" jeju jham naonhaung" re byid' li" nae" 33 Amung: ngo wa khag' ngaui qhang mai bau: rere: myo, manyad: qu". 34 Ce: nga" lo; yang yao: mau" zaui: mung:- ngo yao: we' nga" mau" zaui: byin cao: qe qo ca" ci qo: ra" gu: alhab' re qho: ci: lo: rure naonhaung" yao: ba gau ngad: ako". 35 Ngonhaung" wa mau" zaui: qam: ke' mung: qam: nang" ra" mo, re bao" thaug' ca" ein: ra" khyo re naonhaung" re gaigai: yao: ai ru: kad' qhu" va". Alao" Asang Yesu yao:- kham: yu: ru tho' byid' ru wa je: yang: ngaui lho" ra"- ga: ta" co' ra" dao: re myid: beim: ge,- ga: ta" ra". 36 Polu wa ai ru: bin: ta" lao"- yao: bam we' daga" pad' thaug' thaug' yang: akyu" mho' ra". 37 Yao: bam alhab' mo, ngug zo" re" Polu re po yang: bobaug baug mung: au" ke' ako". 38 Polu wa thao phyao: yao: re yao: bam madam: the' myao lo: genae"- ga: ta" ruyang yao: bam wa je yang: nhag' kaug' ako". Airumung: yao: bam wa yao: we' daga" lha khyo ye" lo" ako". 1 Ngonhaung" wa yao: bam re au" co' mung: lha khyo" din: za: gau" ye" lo" re Kosa gagyo: kao" khyo ye" lo" bam va". Ai: thao: ba re ngonhaung" wa Rhode gagyo: kao" khyo joe" lo mung:- ai: tau mae" Patara vogaung: khyo joe" lo: bam va". 2 Ai: vogaung: mae Phoenikia mung" khyo gau" ye: nae" ra" lha dakhye' re ngonhaung" myao mung: ai: lha dao mae yedo; zaung mung: gau" ye" lo" bam va". 3 Ngonhaung" wa Kupru gagyo: kao" re lo" the' myao lao"- ai: gagyo: kao" mug: thao shad' khyo" gau" gyo" lo" mung:- Suri mung" khyo gau" ye" lo" bam va". Gai xan: jham re khyo" nae" qhid' mae" Ture vogaung: gau: khung: mae lothang: bam va". 4 Ngonhaung" wa ai: vogaung: mae lam khug: ra" mo, damyo" re lothe' myao mung: yao: bam we' dalaban lothang: na: bam va". Ai: lam khug: ra" mo, wa Gyang" Lho" Byo: qam: so' khyo" yang Polu re Yerusalem khyo maye: nae" qhid' mae" ta" ako". 5 Ngadqere: yao: bam we' qo" thang: na: ra" ayo, ba na gan lao"- ngonhaung" wa ai: tau mae" thug' mung: xo' ye" lo" bam va". Yao: bam alhab' mo, wa yao: bam: yham sang myhi" bam- yao: bam: zoshao qe we' daga" vogaung: taung gaung qid yae joe" sho' ngonhaung" re li" dai" ke' ako". Ai: tau mae ngonhaung" alhab' mo, pad' thaug' thaug' yang: akyu" mho' bam va". 6 Ai: thao ngonhaung" wa dayaug we' dayaug yao: cao: jho" bin: au" lao"- ngonhaung" wa lha khug khyo yedo; zaung mung: yao: bam wa yham khyo dam: tug' phao: lo" ako". 7 Ngonhaung" wa Ture vogaung: mae" xo' yang: gau" ye" lo" mung:- Ptolemai vogaung: khyo joe" lo: bam va". Ngonhaung" wa ai: vogaung: mae" lam khug: ra" mo, re bang" se" lo, zaui: zaui: mung:- yao: bam we' daba yethang: na: bam va". 8 Ai: thao: ba re ngonhaung" wa ai: vogaung: mae" to" lo" mung:- Kesarea vogaung: khyo joe" lo: bam va". Ngonhaung" wa Yerusalem vogaung: mae bao" thaug' mo, khyo" byu nhad' yaug khyin: yu: to" rumae" dayaug ngad mung: ngaui bau" lau dao: gai kho" kyo: yaug ngad: ra" Philib yham mae yethang: bam va". 9 Philib wa yham maqo" shiko" ra" myiqe: zo: byid yaug qo" ra". Yao: bam wa Mao"So: mung dao: re ta" hau" kyo: mo, ngad: ako". 10 Ngonhaung" ai: yham mae myao" sho' thang: na thao re Yuda mung" mae" Agabu ga: mang: ra" lapa dayaug joe" lo: ra". 11 Yao: wa ngonhaung" jhao" joe" li" mung:- Polu nho: phyid' cui: re yu: yu mung: ai: yang yao" khyid lo, jham re taui" ra". Amung: yao: wa Ce: phyid' cui: sang re Yuda byu qe:yang Yerusalem vogaung: mae ceru: taui: mung: yao: bam wa yao: re Taung bug byu qe: lo, khyo ab byid' pye' li" genae"- ga: Gyang" Lho" Byo ta" ra"- ga: ta" ra". 12 Ce: dao: re ngonhaung" the' gyo: lao"- ngonhaung" we' ai: tau mae na mo, damyo" wa Polu re Yerusalem vogaung: khyo maye: nae" qhid' mae" ceim" mho' bam va". 13 Ngadqere: Polu wa Naonhaung" pe" mung: ceru: ngug mung: nga" nhag' lam: re sho:byo, nhao: na ko" i? Ngo wa Asang Yesu mathao mae Yerusalem vogaung: mae taui" ru qhug' nae" ruza: mangad:- shid nae" lhao" re: jin" jin" ngad va"- ga: tau" ra". 14 Ngonhaung" wa yao: re no: vao sho' maqo" ta" lomung: Mao"So o: ra" khyo" za: ngad vashao: ein: ta" mung: sae za: na: pye' bam va". 15 Dayo, zo: kyo thao re ngonhaung" nho: zai jham re seim" nyhang" mung: Yerusalem khyo ye" lo" bam va". 16 Kesarea vogaung: mae" mho"zo: qe damyo" re:- ngonhaung" we' daga" cao" li" mung: no' mae" lam khug: ra" phung: byu boe" na va" ra" Kupru gagyo: kao" mae" Mnason ga: mang: ra" yaug: nho: yham khyo yethang nae" qhid' mae" ngonhaung" re jhui" vao ye" ako". 17 Yerusalem vogaung: khyo ngonhaung" joe" ye: lao"- lam khug: ra" mo, wa ngaui ngaui bau: bau: za: ngonhaung" re lham: tug: yu: ako". 18 Ai: thao: ba re Polu wa ngonhaung" we' daga" Yaku re yeqhug' ra". Phung: lau: de, qe alhab' mo, re: ai: tau mae na: bam: ako". 19 Polu wa yao: bam re bang" se" dao: ta" mung:- yao: zaui: so" ra" mau" zo" khyo" yang Taung bug byu qe: phaung mae Mao"So kad' va" ra" mau" zo" jham ja: khao: ngo" re jab sho' lau thoe ta" kyo" ra". 20 Polu ta" ra" lau thoe re bin: the' gyo: gethao re- yao: bam alhab' mo, wa Mao"So re caung:khin" byid' ako". Ai: thao yao: bam wa- Polu re Mao:nhaung: Polu we"- Yuda byu qemae" lam khug: lo: ra" mo, khonho" taung ngad: rure we' yao: bam alhab' mo, wa kham" to" ra" Tarha" re khoqhi" sho' phug' cao" nae" kao bau mo, ngad ko" rure nao ba: myao gau ngad: ra". 21 Nao wa Taung bug mung"dan: mae na ko" ra" Yuda byu alhab' mo, re yao: bam: myid:zo: qere au: qid lhai: khyo makad' genae" we' Yuda byu qe: thung" li jham re macao" genae" qhid' mae" ta" mung:- Moshe Tarha" re to" pye' genae" qhid' mae" nao mho" shid' lo: ra"- ga" rure yao: bam the' gyo" ci: avako". 22 Ana" pe" ru: kad' nae" i? Nao joe" lo va" ra"- ga" rure yao: bam gaigai: the' gyo: genaeva". 23 Airumung: ngonhaung" wa nao re ceru: kad' nhao nug: ra". Ngonhaung" tau mae Mao"So re dao:so: to" ra" byu byid yaug na: ako". 24 Yao: bam re jhui" lo" mung: kyang" san: ra" khyo re yao: bam we' daga" lo" kad' wa,- yao: bam au: qo" myhaug' pye' genae" qhid' mae" yao: bam: kyang" san: ra" khyo kad' ru mae gyo" ang: ra" aphug' re nao bobyid: wa,- ceru: kad' ruyang ni" khyo we' sin: yang: yao: bam the' gyo" ra" lau dao: jham wa madang nhaung ga" rure we' naoyao: yao: re: Moshe kham" to" ra" Tarha" re phug' cao" na yaug ngad nhaung ga" rure yaug khao: ngo" ba: li" genae". 25 Ngadqere: lam khug: lo ko" ra" Taung bug byu qe: qhid' mae" kam" wa- so solho re ngaui" byid' ra" zo:ve we' sa:- lang nhag' se' ra" gug'nyhug' sho: we' gintho' zaung: ra" khyo re jao" pye' genae" qhid' mae" ngonhaung" myid: phyid' yang: yao: bam re vhin tung" dakhye' tung" vhin: ke' bam va"- ga: ta" ako". 26 Airumung: Polu wa thao: ba re ai: byu byid yaug re jhui" yu mung: yao: bam we' daga" kyang" san: ra" khyo re kad' yu: ra". Ai: thao re yao: wa Caung:pa" Yham khyo vao ye: mung: kyang" san: ra" khyo kad' ra" ayo, ba na khoyo, gan zai ngad: rure we' yao: bam yaug khao: ngo" qhid' mae" ngaui" xeim: ngaui" byid: nae" khoyo, ngad nae" rure ta" kyo" to: co' ra". 27 Ngadqere: ba na nhad' ba byang" li" na lao"- Asia mung" mae" Yuda byu qe damyo" wa Polu re Caung:pa" Yham mae the' myao: ako". Yao: bam wa mo,byu phung: mo" geim" re lhau: pug: to" ke' mung: Polu re taung" yu: ako". 28 Yao: bam wa Israel byu qe we"- bao" yu gela,- byu ceyaug wa khyi" khao: ngo" cao" du" qin" yang: yaug kho: ngo" re Israel byumyu" rere: Moshe nho: Tarha" rere:- ce: Caung:pa" Yham rere:- gye kad' yang: mho" shid' byid' qin" yaug ngad: ra". Amung: ana" re: yao: wa Caung:pa" Yham khyo Taung bug byu damyo" re jhui" vao li" mung:- ce: Gyang" Lho" ra" jo, qo re masan masin" kad' pye' ava"- ga: zag: hug' ako". 29 (Yao: bam ceru: ta" ko" ru wa- Polu re Ephesu vobyu Trophimu ga" ra" yaug we' daga" vogaung: khug mae yao: bam the' myao geyang: ai: yaug re Caung:pa" Yham khyo jhui" vao li" ru ngad:- ga: yao: bam jho geyang: ngad: ako".) 30 Vogaung: geim" mae- mo, thaui: mo, yaug boe" li" yang:- mo, byu qe alhab' mo, wa tao" zang" li" mung:- Polu re zaui: yang: Caung:pa" Yham taung gaung shad' khyo she: khyad' thug' lo" ako". Ailao" jao" Caung:pa" Yham kham: dung: jham re pyid' pye' ako". 31 Airu: mo, byu qe Polu re se' pye' nae" seim" na ko" au:- Yerusalem vogaung: geim"- mo, thaui: mo, yaug lu" na: ako"- ga" ra" lau thoe re Roma gyezug: mo" re lo" ta" kyo" ako". 32 Ailao" jao"- gyezug: mo" wa gyezug: qe damyo" we' gyezo: qere jhui: mung:- mo, byu qe na ko" ra" jo, qo khyo tao" ye" lo" ra". Mo, byu qe wa gyezug: mo" we' gyezo: qere lham: myao gelao"- yao: bam wa Polu re be; ru thang: pye' ako". 33 Gyezug: mo" wa Polu jhao" ye" lo" mung:- taung" yu yang: jao cao: shid' khe' yang taui" to: nae" qhid' mae" amyin" khyo" ke' ra". Ai: thao re gyezug: mo" wa Ceyaug khag' ngad: ra" i?- Yao: pe" kad' shad' va" ra" i?- ga: myid' ra". 34 Mo, byu qe wa daphung: daja: ga: zag: hug' ako". Airu: hug' yhai: na ko" ruyang gyezug: mo" wa boe" lo: ra" khyo re khyag' za: maqo" ba mung:- yao" byu qere Polu re gyetab khyo jhui" lo" genae" qhid' mae" amyin" byid' ke' ra". 35 Yao: bam gyetab zam thao joe" lao"- mo, byu qe se' da: be, khyad' kad' li" ko" ruyang gyezo: qe wa Polu re yao: bam: lo, phyo: mae vo; do, lo" ako". 36 Mo, byu qe wa- yao: re se' pye' ge,- ga: yao" thao cao" li" mung: zag: hug' ako". 37 Gyetab khug khyo Polu re jhui" vao lo" nae" ngad lao"- Polu wa gyezug: mo" re Nao re ngo dao: shid' dakheim: gai: jhau nae" i? ga: ta" ra". Ailao" gyezug: mo" wa- Nao Greeg myan" ba: jhau: i? 38 Amung: mataung" myao" shi:re geimlau to" mung: gyezo: byid taung re au: jhaung kad' yang: din"pyad' yo khyo jhui" ye" lo" ra" ai: Egutu byu mangad: i?- ga: Polu re myid' ra". 39 Polu wa- Ngo wa Kiliki mung" Tarshu vogaung: mae khau: ra" Yuda byu dayaug ngad:- Akhyag: ra" vogaung: qi: mae" vobyu dayaug ngad:- jeju we' mo, byu qere dao: jhau nae" akhang" byid: la,- ga: ta" ra". 40 Gyezug: mo" wa yao: re akhang" byid' ra". Airumung: Polu wa zam thao au: mae ye; jo, mung: mo, byu qere sae za: na genae" qhid' mae" lo, tu" tu" ra". Mo, byu qe tae" lo" gelao"- Polu wa yao: bam re Hebre myan" khyo"- 1 Myhi" pho" mao:nhaung: qe we"- ngo naonhaung" qhid' kheim: mae ta" qid' yu: ra" dao: re tae" gyo" yu ge,- ga: ta" ra". 2 Yao: bam wa Hebre myan" khyo" yao: bam re jhau: rure the' gyo: gelao" je yang: tae" lo" ko" ra"- alao" Polu wa xo' yang:- 3 Ngo wa Kiliki mung" Tarshu vogaung: mae khau: li" ra" Yuda byu dayaug ngad:- ngadqere: ce: Yerusalem vogaung: mae Gamale nho: jung nau" dayaug khyo" na: qi" li" yaug ngad:- ngonhaung" phug' pho" qe: Tarha" khug mae thin: ra" khyo" mho" shid' rure ngo kham: yu: lo va". Ana" ba cemae na ko" ra" naonhaung" alhab' mo, we' dakhyo:- ngo re: Mao"So: qhid' mae" kao bau: lo yaug ngad:. 4 Ngo wa Khyo ce:khe' re cao" ra" mo, re shid sho' yhin" lo: ra" byu dayaug ngad:. Ngo wa yauggai myiqe: qere taung" yu mung: thaung: lhaung" lo yaug ngad:- 5 Ngo ta" na: ra" dao: thoe dang: rure Khinjaung Yin" pho" we' Tarha" Qe, Do, geim" mae" mo, sagse: qo" kham: ako". Ngo wa yao: bam: lo, mae" Damasku vogaung: mae na ko" ra" Yuda mao: nhaung: qere tung" vhin: ke' ra" mug sug' re khae: yu mung: ai: mae na ko" ra" mo, re qobo dae byid: nae" taung" yu mung: Yerusalem vogaung: khyo taui" she: lo nae" qhid' mae" ngo wa Damasku vogaung: khyo ye" lo" va". 6 Ngo airu: ye" lo" na: au:- Damasku vogaung: khyo jhao" li" lao" ba khaung tau ayo, ko re mug:gaung mae" bao qhui: ra" bo" bao dalam: wa nyag din taung" nga" avai: ayae mae bao: li" ra". 7 Alao" ngo wa myid gaung khyo gyang: lang" lo" mung:- Sholu- Sholu- Nao ngo re pe" mung: yhin" ra" i?- ga: ngo re jhau: ra" thoe re the' gyo: va". 8 Ngo wa- Asang we"- Nao khag' ngad: i?- ein: myid' ke' lao"- yao: wa- Ngo wa nao yhin" na: ra" Nazared mae" Yesu ngad:- ga: ngo re ta" ra". 9 Ngo we' daga" ngad: ra" mo, wa ai: bo" bao re the' myao gengad yang: re: ngo re dao: jhau: na: ra" yaug: thoe mathe' gyo: ko" ngad: ra". 10 Alao"- ngo wa Asang we"- ngo pe" ru: kad' zai i?- ein: myid' ke' lao" Asang wa- To" mung: Damasku vogaung: khug khyo vao ye" lo" wa,- nao kad' nae" qhid' mae" Mao"So san: to" ra" mau" zo" alhab' ai: vogaung: mae nao re ta" kyo" li" genae"- ga: ngo re ta" ra". 11 Ai: bao qhui: ra" bo" bao: yang ngo wa myo, jid: lo" byaug mung: nga" byin cao: qe wa ngo re lo; yang she mung: Damasku vogaung: khug khyo jhui" she: vao ye: ko" ra". 12 Ngonhaung" Tarha" re phug' cao" yaug we' Mao"So: khyo re kao bau yaug ngad mung: ai: vogaung: mae na ko" ra" Yuda byu qe alhab' mo; yang re: phug' myao: ko" ra" Anania ga:- mang: ra" byu dayaug wa ngo jhao" li" ra". 13 Yao: wa nga" nhae mae li" ye; jo, mung:- Mao:nhaung: pho" Sholu we"- ni" myo, dam: myao: li" vashao:- ga: ta" ra". Ailao" jao"- nga" myo, dam: myao: li" mung: yao: re qu" ke' re- 14 Anania wa- Nao wa ngonhaung" phug' pho" qe: Mao"So: myid o: ra" khyo re ba nae" re:- Mao"So: din:man" ra" daui daui yaug re the' myao nae" re:- yao" jhau thoe re the' gyo: nae" qhid' mae" re:- Mao"So wa nao re khyin: yu: to" ava". 15 Pe"mung:ga"re nao wa nao yao: the' myao va" ra" khyo we' the' gyo: va" ra" dao: re byu yaug khao: ngo" re ta" kyo: byid: nae" ai: Asang: qhid' mae" sagse: boe" lo: li" nae". 16 Nao ana" pe" mung: yam" na: i? To" mung: qid nyhab' kham: yu wa,- ni" qobo cid' shao: pye' ru qhug' nae" qhid' mae" Asang re akyu" mho' wa,- ga: ngo re ta" ra". 17 Ngo wa Yerusalem khyo dam: joe" lo mung:- Caung:pa" Yham mae akyu" mho' yang: na: au:- qhu" lho dalam: re ngo myao:- 18 Ai: qhu" lho mae Asang re ngo the' myao mung:- Yao: wa ngo re- Nao Yerusalem vogaung: mae" phyad za: thug' lo" wa,- Pe"mung:ga"re ce: vogaung: mae" mo, byu qe wa nga" khyo we' sin: yang: nao sagse: kham: ra" dao: re makhae: yu genae"- ga: ta" ra". 19 Alao" ngo wa Asang we"- ngo wa tarha" jung yham jham khyo vao ye: mung: Nao re lam khug: ra" mo, re taung" yu yang: be, yaug ngad: rure yao: bam ba: ako". 20 Amung: ni" sagse: pho" Stephan re se' ra" au: rere: ngoyao: re: aimae na mung: bocao: myid vang" ru we' yao: re se' ra" mo; mai bau: jham re bo:zam: byid' lo va"- ein: phaug' tau" ke'. 21 Alao" Asang wa- Ye" lo" wa,- pe"mung:ga"re ngo nao re Taung bug byu qe na: ra"- va" ra" mung" khyo nhao: ke' nae"- ga: ta" ra"- ga: ta" ra". 22 Mo, byu qe wa ceru: ta" ru joe" sho' tae" gyo" yu: ako". Ngadqere: ai: thao re yao: bam wa yao: re yu: pye' ge,- Se' pye' ge,- yao: wa daui: na nae" maman: ngad: ra"- ga: yao: bam: thoe myhao: thao" mae" zag: hug' to" li" ako". 23 Yao: bam wa zag: hug' ru we' yao: yao" mai bau: jham re vhag' mung:- phalhug gag: sin: yang: na: ako". 24 Ailao"- Roma gyezug: mo" wa Polu re gyetab khug khyo jhui" vao lo" mung:- yao: re ceru: Yuda byu qe gye kad' yang: zag: hug' na ko" ra" khyo ba nae" qhid' mae" Polu re be, yang: myid: nae" qhid' mae" yao" byu qere amyin" byid' ke' ra". 25 Yao: bam Polu re be, genae" ga: taui: gelao"- Polu wa ayae mae ye; jo; ra" gyezug: pho" re- Roma mung"dan: byu dayaug re qobo mamyid' ca: qu" lo: be, nae" qhid' mae" tarha" vao: i? ga: myid' ke' ra". 26 Ce: dao: re gyezug: pho" the' gyo: lao"- yao: wa gyezug: mo" jhao" ye" lo" mung:- Zug: mo" we"- Nao pe" nam kad' na: ru ngad: i? Byu ceyaug wa Roma mung"dan: byu dayaug ngad:- ga: ta" ra". 27 Airumung: gyezug: mo" wa- Polu jhao" lo mung: yao: re- Nao Roma mung"dan: byu ngad: i? ngo re ta" kyo: la,- ga: myid' ra". Polu wa ngad: ga: tau" ra". 28 Gyezug: mo" pho" wa- Ngo wa ngaui myo: sho' byid: yang: Roma mung"dan: byu boe" lo yaug ngad:- ga: ta" lao"- Polu wa ngo wa khau: li" mae" boe" va"- ga: tau" ra". 29 Ailao" jao"- yao: re myid' ca: qu" nae" ga: seim" mo, wa naung zad: zad' lo" ako". Gyezug: mo" wa Polu wa Roma mung"dan: byu ngad: ga" rure ba lao"- yao: re jao co: vhe' shad' va" ruyang gyaug: din: pye' ra". 30 Gyezug: mo" wa Polu re Yuda byu qe pe" khyo" yang qobo zhaug' ko" ra" khyo re khyag' za: ba nug: ra". Airumung: yao: wa thao: ba re Polu re taui" to" ra" jao co: pheim: pye' nhao mung: khinjaung qi: qe we' Yuda tarha" qe, do, phung: mae bo: ra" mo, alhab' re zang" ham: na genae" qhid' mae" amyin" khyo" ke' ra". Ai: thao re yao: wa Polu re jhui" lo mung: yao: bam: qhid' kheim: mae yhe' to" ra". 1 Polu wa Yuda Tarha" qe, do, geim" mae" mo, re zhaug' qu" mung:- Nga" mao: nhaung: Israel byu qe we"- ana" ba joe" sho' ngo wa Mao"So: qhid' kheim: mae nhag' lam: gyang: gyang: za: kao so' daui: lo va"- ga: ta" ra". 2 Khinjaung Yin" Anania wa Polu nhae mae ye; jo; ra" mo, re- Polu nhad' re be, byid: nae" qhid' mae" amyin" byid' ra". 3 Alao"- Polu wa- Laug phyu gyad: to" ra" khinqae we"- Mao"So nao re gaigai: yao: be; li" nae"- nao wa ai: Tarha" we' dakhyo: ngo re dao: kho' nae" qhid' mae" ai: mae zaung: jo, sho' ngadqere: Tarha" re shad' lhoe" mung:- ngo re be, nae" amyin" byid' ra" ga: ta" ra". 4 Polu nhae mae te' na: ra" mo, wa Polu re Nao wa Mao"So: Khinjaung Yin" re roe" dao: jhau: ra"- ga: ta" ako". 5 Alao" Polu wa Mao:nhaung: Israel byu qe we"- yao: Khinjaung Yin" ngad: rure ngo maba ga: tau" ra". Jham: mugsug' mae ni" byumyu" re zug: kad' ra" yaug re magai: ra" khyo" magai: jhau- ga: ta" to" ra"- ga: phaug' tau" ra". 6 Polu wa- Tarha" Qe, Do, phung: mae bobo: ra" mo, mae" damyo" wa Pharishe qe ngad mung:- damyo" wa Saduke qe ngad ko" rure myao lao"- Mao:nhaung: Israel byu qe we"- ngo wa Pharishe dayaug ngad mung: Pharishe dayaug: yao: zo: re: ngad:- shid: rumae" dam: daui: to" li" nae" rure ngo myid: lao" na: ra" khyo mathao: yang ngo wa cetau mae myid' ca: qu" ru qhug' na: ru ngad: ra"- ga: tarha" qe, do, mae hug' ra". 7 Polu ce: dao: ta: ke' we'- Pharishe qe we' Saduke qe wa jho" ta" ngag: byo; thug' li" gemung: tarha" qe, do, phung: wa shid' phung: jho" kho' lo" ako". 8 (Pe"mung:ga"re Saduke qe wa byu wa shid: rumae" dam: daui: to" li" ru majo,- mug: lagyo: qe ga" ru mana- byo jham re: mana- ga: ta" mo, ngad: ako". Ngadqere: Pharishe qe wa ai sam ja" geim" jo;- na: ga: lam: ako".) 9 Hug' ra" thoe wa je: qi" li" mung:- Pharishe qe: shad' khyo bobo: ra" jham: tung" pho" qe daqhae: wa- to" ye; li" mung:- byu ceyaug mae pe" shad' ru ngonhaung" mamyao- Byo: yang la, mangad: lao"- mug: lagyo" yang la,- yao: re gaigai: yao: jhau: ru ngad: re gai: ngad naeva"- ga: ta" ako". 10 Airu: jho" ta" ngag: ra" khyo je: xo: li" mung: Polu re adau atam" kad' pye' li" genae" rure gyezug: pho" gyaug: ra". Airumung: yao: wa yao" gyezo: qere mo, phaung khyo gyo" ye: yang: Polu re yao: bam: lo, mae" yejhui" yu mung: gyetab khug khyo jhui" lo genae" qhid' mae" amyin" khyo" ke' ra". 11 Ai: myi re Mao"So wa Polu nhae mae li" ye; jo, mung:- Dagyaug- Nao wa ce: Yerusalem vogaung: mae nga" khyo re sagse: qo" kham byid' ava". Ai we' dakhyo:- Roma vogaung: mae re: sagse: kham byid: ca" shi:nae" ga: ta" ra". 12 Thao: ba ne, kao re Yuda byu qe daqhae: wa jho" qham mung: pha,jhi" khyug' ako". Yao: bam wa Polu re maqo" se' pye' pye' wa pe" re: mazo: mashaug' nae"- ga: jham tang" to" ako". 13 Ceru: pha,jhi" khyug' ra" mo, wa byid xe zo: je ngad: ako". 14 Ai: thao re- yao: bam wa khinjaung qi: qe we' lau: de, au: jhaung qejhao" ye: mung: Ngonhaung" wa Polu re maqo" se' se' wa pe" re: mazo: mashaug' nae" ein: gyai ein: jham tang" to" bam va". 15 Airumung:- ngonhaung" we' Tarha" Qe, Do, Phung: qe wa Polu khyo re je yang: ba nug geim kad' yang: Polu re naonhaung" jhao" jhui" gyo" lo nae" qhid' mae" Roma gyezug: pho" re dao: pyang: ke' ge,- Naonhaung" jhao" yao: majoe" gyo" lo shire ngonhaung" wa yao: re se' nae" qhid' mae" jin" jin" lao" na: bam nae"- ga: yeta" ako". 16 Ngadqere: ai: pha,jhi" khyug' to" ra" khyo re Polu yao: nhae: mo" nho: yauggai zo: the' gyo: mung:- yao: wa gyetab khyo vao ye: yang: Polu re yeta" kyo" ra". 17 Airumung: Polu wa- gyezug: pho" dayaug re khai: yu mung:- Ce: zolau: re gyezug: jhao" jhui" ye: wa,- Gyezug: pho" re ta" kyo: nae" daja: yao: qo" ra"- ga: ta" ra". 18 Gyezug: pho" ai: zolau: re jhui" yu yang: gyezug: mo" jhao" jhui" vao ye: mung:- Thaung: byu Polu wa ngo re khai: yu yang: ce: zolau: nau" re nao jhao" jhui" li" nhao: ra". Pe"mung:ga"re zolau: pho" wa nao re ta" kyo: nae" dao: daja: qo" ra"- ga: ta" ra". 19 Alao" gyezug: mo" wa yao: re lo, mae" she yang: dadug khyo jhui" ye: mung:- Nao ngo re pe" ja: ta" kyo: nug: i?- ga: myid' ra". 20 Ailao"- ai: zolau: pho" wa- Yuda kheim: so' qo" ra" mo, wa- Polu khyo re je yang: ba nug geim kad' gemung: yang:- ne, kao Polu re Tarha" Qe, Do, khyo jhui" gyo" lo nae" qhid' mae" nao zug: mo" re mho' nae" ga:- jho" qham: myid vang" to" avako". 21 Yao: bam: dao: re datae" gyo: wa,- pe"mung:ga"re byu byid' xe zo: je wa khyole; mae vho' jo, mung:- yao: re lao" na: li" genae". Yao: bam wa Polu re za: maqo" se' pye' pye' wa pe" re: mazo: mashaug' nae" ga: jham tang" to" avako". Ana" yao: bam wa Polu re se' nae" nyhang" jin" to: mung: ni" dao: phyid' reza: lao" na: bam: ako"- ga: ta" ra". 22 Gyezug: mo" wa- Nao ngo re ceru: li" ta" kyo" ra" khyo re khag' rere: data" kyo: ga: ta" mung: ai: zolau: pho" re phao nhao: ke" ra". 23 Ai: thao re gyezug: mo" wa- yao" gyezug: shid' zo: re khai: yu mung:- Kesarea vogaung: khyo ye: nae" qhid' mae" gyezo: shid' yo- myao: jui: byu nhad' xe- lhae ci gyezo:- shid' yo- ana" myi gug yo, qug re to" nae" seim" jin" to: ge, 24 Amung: Polu zaung nae" myao: re nyhang" byid: mung: mang: zug: pho" Felig jhao" joe" sho' gug: gug: za: yedai" ge,- ga: ta" ra". 25 Alao"- gyezug: mo" pho" wa- ceru: ga: vhin tung" dakhye' tung" mung: byid' ke' ra". 26 Phug' myao" tho' ra" mang: zug: pho" Felig re Klaudiu Lusia au" ke' ra". 27 Yuda byu qe wa byu ceyaug re taung" yu mung: se' pye' nae" seim" ako". Yao: wa Roma mung"dan: byu ngad: rure ngo ba mung: ngo wa nga" gyezo: qe we' ye: mung: yao: re yekhyad' yu: to: va". 28 Ngo wa- yao: re Yuda byu qe pe" qobo zhaug' ko" ra" khyo re ba nug yang: yao: re Yuda Tarha" Qe, Do, khyo jhui" gyo" ye: va". 29 Yao: re qobo zhaug' ra" khyo wa yao: bam yao" tarha" we' sin: yang: qobo zhaug' ru ngad mung:- yao: wa shid man" ra" qobo- mangad: lao" thaung: lhaung" ke' man" ra" qobo yao: pe" daja: rere: mashad' rure ngo myao:. 30 Amung: yao: re se' pye' nae" qhid' mae" pha,jhi" khug' khyug' na ko" ra" khyo re ngo re ta" kyo: gelao"- yao: re nao jhao" dai" ke' nae" ai jao" yao: ngo myid: phyid' va". Amung: yao: re qobo zhaug' ko" ra" mo, rere: ni" qhid' kheim: mae yejho" ta" genae" qhid' mae" yao: bam re ngo ta" ke' va"- ga: tung" ke' ra". 31 Gyezo: jham re: amyin" we' dakhyo: kad' ako". Yao: bam wa Polu re yejhui" yu mung: ai: myi reyao:- Antipatri vogaung: joe" sho' yedai" ke' ako". 32 Ai: thao: ba re khyid tab gyezo: jham wa gyetab khyo dam: tug' lo mung:- myao: tab gyezo: qe wa Polu we' daga" ye" lo" nae" qhid' mae" nha: to: co' ako". 33 Ai: myao: tab gyezo: qe wa Polu re Kesarea vogaung: joe" sho' yedai" mung:- mang: zug: pho" lo, mae ai: vhin tung" re yedai" yang:- Polu re ye: ab byid' ako". 34 Mang: zug: pho" wa ai: vhin tung" re nghe' mung: Polu re- Nao kho:mung" mae" ngad: i?- ga: myid' ra". Mang: zug: pho" wa- Polu re Kiliki mung" mae" ngad: rure ba lao"- 35 Yao: wa- Nao re qobo zhaug' ko" ra" mo, joe" li" gelao"- ngo wa ni" nho: mau" re gyo: byid: nae"- ga: ta" ra". Ai: thao re mang: zug: pho" wa- Herod kad' ra" yham mo" khug mae zaung" ra" gug: gam gyezo: qe we' daga" Polu re nha: to: nae" amyin" byid' ke' ra". 1 Ai: thao- ngo" ba re Khinjaung Yin" Anania wa- lau: de, au: jhaung qe daqhae: we' daga" tarha" zug: Tertulu ga" ra" yaug re jhui: mung: Kesarea vogaung: khyo ye" lo" ra". Yao: bam wa Felig qhid' kheim: khyo vao ye: mung:- Polu re qobo zhaug' ra" khyo re ye:kug: ako". 2 Ailao" Polu re khai: vhao" yu mung:- Tarha" zug: pho" Tertulu qobo zhaug' dao: ta" ru wa- Phug' myao: tho' ra" zug: pho" Felig we"- pha,jhi" kung: ra" ni" au: she: ra" aqab mae ngonhaung" wa zin na myao" sho' ngaui pyo: yaug yo za: qo" na: bam va"- Nao wa ngonhaung" mung"dan: qhid' mae" qo ca" ra" gai: ra" mau" zo" myo: sho' re kad' byid' na yaug ngad: ra". 3 Amung: ngonhaung" wa ceru re jo, qo khyi" khao: ngo" mae khonhae" re: kham: yu mung:- nao re jeju gyai beim: so" na:- 4 Ngo wa zug: pho" ni" yo, khyin: re myo: sho' mayu nug. Airumung: lang" ra" khyo" ngonhaung" ta" ra" dao: re tae" gyo: byid: nae" qhid' mae" mho' ra". 5 Byu ceyaug wa aqug: akhai: boe" nhao yaug ngad: ru we' mug: myid geim" mae" Yuda byu qere mo, thaui: mo, yaug boe" nae" poe yaug ngad mung: Nazared phung: mae" au: jhaung dayaug ngad: rure ngonhaung" the' myao va". 6 Yao: wa Caung:pa" Yham rere: masan masin" boe" nhao nae" seim" na: ruyang ngonhaung" yao: re taung" yu: ru ngad:. 8 Asang nao yao: byu ceyaug re myid' ca: qu" re wa- Ngonhaung" yao: re qobo zhaug' ra" khyo alhab' nao yao: the' gyo" li" nae"- ga: ta" ra". 9 Yuda byu qe wa ce: dao: alhab' dang: ra"- ga: ceim" ta" ako". 10 Alao" ai: mang: zug: pho" wa lo, tu" tu" yang: Polu re dao: jhau nhao: ke' ra". Polu wa Zug: pho" nao wa ce: byumyu" qe: dao mae zin na myo: sho' dao: kho' yang: na: lo: rure ngo ba:. Amung: ngo wa ni" qhid' kheim: mae ngo yao" gaung re qo" ta" vha: yu yang: gyai ngaui bau" ra". 11 Ngo wa Yerusalem vogaung: khyo Mao"So re caung:pa" nae" qhid' mae" ye" ru ana" daxe: shid' ba maje shi" rure zug: pho" naoyao: qo" gai: qin" yu: ra". 12 Ngo wa Caung:pa" Yham mae dayaug we' re: jho" ta" ngag: na: rure aimae na: ra" mo, mamyao ko" ngad: ra". Ai: tho' mago" Yuda tarha" jung yham mae re: vogaung: khug mae re: mo, byu qe lu" to" li" nhao nae" qhid' mae" poe: na: rure: yao: bam mathe' myao ko" ngad: ra". 13 Yao: bam wa ana" ni" qhid' kheim: mae qobo zhaug' na ko" ra" khyo rere: sagse: maqo" ceim" shid' ko" ngad: ra". 14 Yao: bam shad' nghung" ra"- ga: jho ko" ra" khyo khyo" yang ngonhaung" phug' pho" qe Mao"So re caung:pa" ra" khyo celam: re wa ni" qhid' kheim: mae ngad va" ein: ngo tau" yu: ra". Ngadqere: ngo wa Moshe kham" to" ra" Tarha" dao: alhab' re we' Lapa qe: jham: paug' mae tung" to" ra" gu: alhab' rere: ngo lam: ra". 15 Ngo wa yao: bam we' dakhyo:- xao su byu qe alhab' mo, wa gai: ra" mo, magai: ra" mo, alhab' dakhyo: za: shid: rumae" dam: daui: to" li" nae" ngad: ein:- Mao"So mae myid: lao" na yaug ngad:. 16 Airumung: ngo wa Mao"So: qhid' kheim: mae re: byu: qhid' kheim: mae re:- nhag' lam: gyang: gyang: za: ngad nae" qhid' mae" khonhae" re: gai: boe" qhi" qam: ke' na: ru ngad:. 17 Ngo wa Yerusalem vogaung: mae" thug' lo: ru myo: sho' zin ngad thao re- nga" byumyu" qe: qhid' mae" Alu: ngaui vin: ye: nae" qhid' mae" we' Mao"So re xeim: ngaui" byid: nae" qhid' mae" ai: vogaung: khyo joe" lo va". 18 Yao: bam wa ngo kyang" san: ra" khyo bin: kad' thao- Caung:pa" Yham mae xeim: ngaui" byid' na: au: re- ngo re the' myao: ako". Ai: au: re ngo we' daga" mo, byu qe- mo, thaui: mo, yaug pe" maboe" ngad: ra". 19 Ngadqere: ai: tau mae Asia mung" mae" joe" li" ra" Yuda byu qe daqhae: na: ako". Yao: bam ngore qobo zhaug' nae" daja: ja: jo, ko" ngad: re wa yao: bam yao" gaung yao: ni" qhid' kheim: khyo vao li" mung: yao: bam: qobo zhaug' ra" khyo re li" ta" genae" ang: ra". 20 Mangad: lao" re:- ana" cemae na ko" ra" byu qe ana" gyo: ngo wa Tarha" Qe, Do, phung: qhid' kheim: mae ye; jo; ra" au:- yao: bam ngo re pe" ja" qobo myao ko" ngad: re wa- ai re ta" vageshao:- 21 Ai: phaung mae yao: bam: qhid' kheim: mae ngo ye; jo; au: ana" ba ngo wa- shid: ra" mo, dam: daui: to" li" ko" ra" ga" ra" lam khug: ra" khyo mathao mae ngo dao: kho' ru qhug' na: ra"- ein: ru kam" wa ngo hug' ta" va"- ga: ta" ra". 22 Ai: thao re Felig wa ai: khyo we' sin: yang: nyang" za: ba: to: yaug ngad mung: myid' ca: qu" ra" khyo re thang: pye' ra". Alao" yao: wa gyezug: mo" Lusia joe" lo lao"- ngo naonhaung" mau" re dao: phyid' byid: nae"- ga: yao: bam re ta" ra". 23 Amung: mang: zug: pho" wa Polu re zaung" ngadqere: gyai ajhe' ajhin: mangad: lo:- yao" ba nam byin cao: qe:yang yao: qo ca" ra" gu: re li" caung da" byid: ko" rure akhang" byid: nae" qhid' mae" gyezug: pho" re amyin" byid: ke' ra". 24 Dayo, kyo thao re Felig wa Yuda myiqe: Drusila ga: mang: ra" yao" yham sang myhi" we' daga" joe" li" ra". Yao: wa Polu re khai: yu nhao mung: Yesu Khristu re lam khug: ra" khyo we' sin: yang: Polu kho" kyo" ra" mung dao: re tae" gyo" yu: ra". 25 Ngadqere: Polu wa gai shab: ra" khyo- yao: yao" gaung re khang" ra" khyo- joe" li" nae" ra" dao: kho' ra" ba na we' sin" ra" khyo re kho" kyo: byid: lao"- Felig wa gyaug: li" mung:- Ana" nao lo" se,- thao phyao: agu yo" lao"- ngo nao re dam: khai nae"- ga: ta" ra". 26 Polu wa yao: re khug vag: byid' li" maba ga:- myid: lao" mung:- Felig wa Polu re dazab: makyo khai: yu nhao mung: dao: jhau: ra". 27 Ai: thao shid' zin lao"- mang: zug: pho" Felig khu mae Poku Festu ga: yaug mang: zug: dam: tha" kad' ra". Felig wa Yuda byu qere myo, nho qo" nhao nug mung: yao: wa- Polu re thaung: mae nha: to: co' ra". 1 Festu wa ai: mung" khyo joe" lo thao sam ba re yao: wa Kesarea vogaung: mae" Yerusalem vogaung: khyo ye" lo" ra". 2 Khin jaung qi: qe we' Yuda lau: de, au: jhaung qe wa Polu re qobo zhaug' ra" khyo myo: sho' li" ta" kyo" ako". 3 Yao: bam wa Polu re khyole; mae lham: khug' se' pye' nae" pha,jhi" khyug' to: gemung:- yao: bam re jeju kad' ra" khyo" Polu re Yerusalem vogaung: khyo jhui" li" byid: nae" qhid' mae" Festu re mho' ako". 4 Festu wa yao: bam re- Polu wa Kesarea vogaung: mae thaung: laung" jo; ra". Mataung" myao" re ngo yao: re: ai: khyo dam: tug' phao: lo" zai ngad:. 5 Airumung: naonhaung" au: jhaung qe wa ngo we' daga" cao" li" mung:- Polu yao: daja: ja: shad' va" ngad: re wa- yao: re qobo li" zhaug' vageshao:- ga: tau" ra". 6 Festu wa yao: bam we' daga" ba na she' ba la, daxe ba la, thang: na mung:- Kesarea vogaung: khyo phao: lo" ra". Ai: thao: ba re yao: wa dao: kho' ra" tarha" yung" mae zaung: jo, mung:- Polu re jhui" vao lo nae" qhid' mae" amyin" byid' ke' ra". 7 Polu joe" vao lo lao"- Yerusalem mae" joe" li" ko" ra" Yuda byu qe wa- Polu re lhang" gam" to: mung:- Polu re yao: bam sagse: maqo" ceim" shid' ra" gyai qi" ra" qobo jham myo: sho' ja: zhaug' ako". 8 Ngadqere: Polu wa- Ngo wa Yuda byu qe: tarha" rere: Caung:pa" Yham rere: Roma Kho:sin" rere: qobo shad' ru daja: re: makad' ga: yao: yao" gaung re ta" vha: yu: ra". 9 Ngadqere: Festu wa Yuda byu qere myo, nho kad' nug mung:- Polu re- Nao wa Yerusalem vogaung: khyo lo" mung: nga" qhid' kheim: mae ce: qobo zhaug' ra" khyo jham re myid' ca: qu" nae" nug: i?- ga: myid' ra". 10 Alao" Polu wa- Ngo wa ai: mae ngo re dao: kho' ang: ra" Kho:sin" pho" nho: dao: kho' ra" tarha" yung" mae ye; jo, va". Nao yao: nyang" za: ba: ru we' dakhyo:- ngo wa Yuda byu qere pe" qobo mashad' qu"- 11 Ngo wa tarha" re shad' lhoe" mung: shid man" ra" qobo qo" yaug ngad: re wa- loe; beim nae" qhid' mae" ngo mamho' ngad: ra". Ngadqere: yao: bam ngo re qobo zhaug' ko" ra" khyo jham madang: ru ngad: re wa loe; beim nae" qhid' mae" ngo mamho' ngadqere: yao: bam: lo, khyo ngo re khag' re: maqo" ab byid: ngad: ra". Ngo re kho:sin" pho" qhid' kheim: khyo lhai: to' ke' byid: nae" mho' ra"- ga: ta" ra". 12 Alao" Festu wa yao" pha,jhi" byid: lau: de, qe we' bin: jho" qham thao re Nao kho:sin" pho" jhao" lhai: to' ke' byid: nae" mho' va" rumung: kho:sin" pho" jhao" nao ye: ca" li" nae"- ga: tau" ra". 13 Dayo, kyo thao re- kho:kham Agripa we' Bernike shid' zo: wa zug: pho" Festu re bang" se" tug: yu nae" qhid' mae" Kesarea vogaung: khyo joe" lo: ako". 14 Ai: vogaung: mae yao: bam myo: sho' ba na thao re- Festu wa Polu khyo we' sin: yang: kho:kham pho" re zhao: kyo" ra". Festu wa kho:kham pho" re cemae Felig yang lhaung" to: co' ra" thaung: byu dayaug na: ra". 15 Ngo Yerusalem vogaung: khyo joe" ye" ra" au:- Yuda khinjaung qi: qe we' lau: de, au: jhaung qe wa yao: re qobo zhaug' mung: yao: re dao: phyid' byid: nae" qhid' mae" ngo re mho' ako". 16 Ngadqere: ngo wa yao: bam re qobo zhaug' ru qhug' ra" yaug wa yao: re qobo zhaug' ko" ra" khyo we' sin: yang: yao: yao" gaung re ta" vha: ra" dao: jhau nae" akhang" mabyid: lo: khag' rere: qobo qo" ein: ab byid' ke' nae" qhid' mae" ngonhaung" Roma thung" tarha" mae majo, ein: ta" co' va". 17 Airumung: yao: bam ce: vogaung: khyo joe" li" gelao"- ngo wa akhyin: mazai" kan" lo:- thao: ba re yao:- dao: kho' ra" tarha" yung" mae zaung: jo, mung: ai: yaug re khai: jhui" vao lo nae" amyin" byid' ke' va". 18 Yao" nho: gyevo qe wa to" ye, mung:- yao: re qobo zhaug' ako". Ngadqere: yao: bam wa ngo myid: jho: ra" makhyang" ra" qobo jham yao: re mazhaug' ko" ngad: ra". 19 Yao: bam wa yao: bam yao" caung:pa" thung" we' sin: yang: shid: byaug va" ra" Yesu ga: mang: ra" yaug we' sin: yang: za: yao: we' jho" ta" ngag: na: ru ngad: ako". Polu wa Yesu daui: na:- ga: ta" ra". 20 Ngo wa ce: mau" zo" we' sin: yang: khoru: mha" yu nae" rure matho' ba loyang:- Yerusalem vogaung: khyo ye: mung: ai: qobo zhaug' ko" ra" khyo re myid' ca: qu" rure yekham: yu nug: i?- ein: ngo yao: re myid'. 21 Ngadqere: Polu wa kho:sin" pho" jhao" lhai: to' ke' byid: nae" mho' ra". Yao: wa airu: lhaung" to: mung: kho:sin" pho" yao: dao: phyid' vashao:- ga: ta" ra". Airumung: yao: re kho:sin" pho" jhao" dai" ke' ra" yo, joe" sho' yao: re lhaung" to: nae" qhid' mae" ngo amyin" byid' to: va"- ga: ta" ra". 22 Ailao" Agripa wa Festu re Ai: yaug: dao: re ngo yao: re: tae" gyo: nug: ra"- ga: ta" ra". Festu wa nao ne,kao yao" dao: re the' gyo" li" nae"- ga: tau" ra". 23 Thao: ba re Agripa we' Bernike wa gyai gyag: ra" khin khyo" gyezug: qe we' vogaung: mae" au: jhaung qe we' daga" shava phaung phaung: ra" yham mo" khug khyo vao lo: ako". Amung: Festu amyin" byid' ke' lao"- Polu re jhui" vao lo ko" ra". 24 Alao" Festu wa kho:kham Agripa we' cetau mae phaung: na ko" ra" mo, alhab' we"- Yerusalem vogaung: we' ce: vogaung: mae na ko" ra" Yuda byu qe qobo zhaug' yang: ngo re li" ta" kug: to: ko" ra" yaug wa ceyaug ngad: ra"- ga: ta" ra". Alao" yao: bam wa- Yao: re adaui nha: to: nae" maang ga: ta" ako". 25 Ngadqere: yao: wa shid man" ra" qobo pe" kad' shad' rure re: ngo mamyao- amung: yao: wa kho:sin" pho" jhao" to' ke' byid: nae" qhid' mae" mho' ruyang ngo wa yao: re dai" ke' nae" myid: phyid' to" ru ngad:. 26 Ngadqere: ngo wa Roma kho:sin" pho" re yao" nho: mau" we' sin: yang: nyang" za: mugsug' tung" mung: sho' kyo: nae" pe" re: majo,- airumung: ngo wa yao: re naonhaung" qhid' kheim: khyo jhui" lo: ru ngad: ra". Yao: re kho:kham pho" bin: myid' ca: qu" lao"- ngo wa kho:sin" pho" jhao" mugsug' tung" vhin: ke' nae" khyo dakheim: daqo: qo" nae" qhid' mae" je yang: kho:kham Agripa qhid' kheim: khyo jhui" lo: ru ngad: ra". 27 Pe"mung:ga"re thaung: byu dayaug re dai" ke' re yao: re qobo zhaug' ra" khyo jhaug' za: ceim" shid' mung: matung" ke' re wa- khyo majo nae" ein: ngo jho: ra"- ga: ta" ra". 1 Agripa wa Polu re nao yao" gaung re ta" vha: yu: ra" dao: jhau nae" akhang" qo" ra"- ga: ta" ra". Alao" Polu wa yao" lo, re yheim" ke' mung:- yao: yao" gaung re ta" vha: yu: ra". 2 Kho:kham Agripa we"- Ngo wa Yuda byu qe qobo zhaug' ko" ra" khyo alhab' re ana" ba ni" qhid' kheim: mae ngo yao" gaung re qo" ta" vha: yu: ru wa nga" qhid' mae" gyai qi" ra" akho: akhang" ngad: ra" ein:- ngo myid: ra". 3 kho:kham nao wa- Yuda byu qe: thung" li jham we' jho" ta" ngag: ra" khyo jham alhab' re nyang" za: ba yaug ngad: ra". Airumung: nga" dao: thoe re nhag' lam: qhang qhang za: tae" gyo" yu byid: nae" qhid' mae" ngo mho' ra". 4 Ngo wa zoqae: yo, mae" khoru: kao so' daui: lo va" rure Yuda byu alhab' ba: ako". Ngo wa sao qhid' dau re ngo yao: khau: li" ra" mung" mae na mung:- ai: thao re Yerusalem vogaung: mae nga" pyad dapyad geim" na: lo: rure yao: bam ba: ako". 5 Aqhid mae" ngo wa ngonhaung" caung:pa" thung" mae" je: qao: ra" Pharishe phung: vao byu dayaug khyo" kao so' daui: lo yaug ngad: rure yao: bam khoru" rere: ba: to: gau ngad gemung: nga" khyo rere: yao: bam sagse: kham nug ko" ngad: re wa yao: bam qo" kham: ako". 6 Mao"So: yang ngonhaung" phug' pho" qere byid' to" ra" dao:so: re ngo myid: lao" na: ruyang ana" ngo wa ce: jo, qo mae ye; jo, mung: myid' ca: qu" ru qhug' na: ra". 7 Daxe: shid' kaung mae" ngonhaung" byumyu" qe wa ai: dao:so: re qo" khae: yu nae" myid: lao" mung: myi" re: na" re: Mao"So re caung:pa" ako". Kho:kham Pho" we"- ce: myid: lao" ra" khyo mathao mae ngo wa Yuda byu qeyang qobo zhaug' ru qhug' na: ru ngad: ra". 8 Mao"So: yang sushid re daui: to" li" nhao: rure magai: lam" ein: cetau mae na: ra" Yuda byu qe naonhaung" pe" mung: jho ko" i? 9 Ngo yao: re: Nazared mae" Yesu mang re gye kad' ra" mau" zo" re ngo qo" kad' ra" ja: alhab' re kad' ang: ein: myid: jho: lo yaug ngad:- 10 Ngo wa Yerusalem vogaung: mae airu: yao: kad' lai: lo va"- ngo khinjaung qi: qemae" kheim: so' yu: ci yang: Mao"So: byu qere thaung: taui" lhaung" mung: yao: bam re se' pye' nae" dao: kho' rumae re: myid vang" lo, botau: lo va". 11 Yuda tarha" jung yham mae re: yao: bam re myo: sho' lhang qobo dae byid: mung:- yao: bam: lam khug: ra" khyo re ha: pye' genae" qhid' mae" ngo gyai qam: ke' va". Ngo wa yao: bam re nhag' saung" yo: mung: gatau: mung"dan: mae" vogaung: jham khyo lhao" re: ye: mung: yao: bam re yeyhin" qu" va". 12 Airu: kad' nae" qhid' mae" ngo wa khinjaung yin" qemae" kheim: so' amyin" yu: ci mung: Damasku vogaung: khyo ye" lo" va". 13 Khyole; mae ye" lo" na: au:- na" gaung ba khaung tau yo, re kho:kham pho" we"- ba tho' je: zho: ra" bo" bao dalam: mug:gaung mae" bao: thug' li" mung:- nga" lhang" gam: mae we' ngo we' daga" ngad: ra" mo; lhang" gam: mae zho: jo; rure ngo the' myao:. 14 Ngonhaung" alhab' mo, wa myid gaung khyo gyang: lang" lo" bam mung: Hebre myan" khyo" Sholu- Sholu- Nao ngo re pe" mung: yhin" na: i? Nung: jaung lo: wa yao: re be, nae" yao" asang: nho: vose: zau: au: mae khyid pag' pag' yu: ru we' dakhyo:- nao wa ngo re gye kad' yang: nao yao" gaung re nao yao: no nhao: ra"- ga: ngo re jhau: ra" thoe the' gyo". 15 Alao"- ngo wa Asang we"- Nao khag' ngad: i? ein: myid' ke'- Asang wa- Nao yhin" na: ra" Yesu ngad:- ga: tau" ra". 16 Ngadqere: to" mung: ye; jo, wa,- nao re nga" daui daui yaug khyo" san: to: nae" qhid' mae" nga" gaung nao re qhu" byid: va". Ana" ba nao ngo re pe" nam qhu" byid: va" ra" khyo re we' thao phyao: ngo nao re qhu" byid: nae" ra" khyo re nao wa su gaje qere sagse: kham byid: ca" nae" ngad: ra". 17 Ngo wa Israel byu qe: lo, mae" re:- nao re ngo nhao: ke' nae" ra" Taung bug byumyu" qe: lo, mae" re: nao re khyad' yu nae". 18 Nao wa yao: bam: myo, re bung" li" nhao mung:- yao: bam re mug: cad' khug mae" mug: bo" khug khyo re:- Satan" ra" qam: so' yang eib: na: ra" khug mae" Mao"So: qam: so' yang eib: ra" khug khyo re:- phaug' lo nhao: li" nae". Amung: yao: bam wa ngo re lam khug: ra" khyo" yang yao: bam: qobo jham re khyad' pye' byid' ru qhug' mung:- Mao"So khyin: yu: to" ra" mo; phaung mae bo:qo" bo mo, boe" li" genae"- ga: ta" ra". 19 Airumung: kho:kham Agripa we"- Ngo wa mug:gaung mae" qhu" byid' ra" qhu" lho re mangag: pye'- 20 Ngo wa sao qhid' mae Damasku vogaung: mae- Yerusalem vogaung: mae- ai: thao re Yuda mung" geim" mae we' Taung bug byu qere yao: bam: qobo mae" myid tha" lhang: lo mung: Mao"So shad' khyo phaug' lo yang:- yao: bam myid tha" va"- ga" rure qhu" byid' ra" lo, mau" ave, zaui: so: ca" ein: ngo cao" kho" kyo: byid: va". 21 Ce: khyo mathao mae Yuda byu qe wa- ngo Caung:pa" Yham mae na: jo; au: li" taung" yu mung: ngo re se' pye' nae" seim" ako". 22 Ngadqere: ana" ba joe" sho' Mao"So ngo re bao" thaug' byid: yang: cemae ye; jo, mung: aqi: angai maein yaug khao: ngo" alhab' re sagse: qo" kham byid' na: ru ngad: ra". 23 Meshia wa dayin dayo: kham zo: ca" nae"- amung: yao: wa shid: ru mae" sao qhid' daui: to" li" yaug ngad: ru we' khyad' yu: ra" bo" bao re Yuda byu qere we' Taung bug byu qere ta" hau" kyo: byid' li" nae"- ga: Moshe we' lapa qe ta" to: co' ko" ru we' dakhyo: za: ngo kho" kyo: va"- ga: ta" ra". 24 Polu ceru: yao" gaung re ta" vha: na: au:- Festu wa Polu we"- Nao go: ava"- nao wa pha,jhi" saung" zhao: ba: yu mung: go: byaug vanhaung ga: hug' ta" ra". 25 Alao"- Polu wa Myhao: thao" ra" zug: pho" we"- Ngo wa mago- ngo wa dangman" ra" khyo re gyang: gyang: za: ta" na: ru ngad:. 26 kho:kham Agripa we"- Ai: khyo jham re nao ba: ruyang ngo wa ni" qhid' kheim: mae mazag mavae lo: jhau: na: ru ngad: ra". Pe"mung:ga"re ce: mau" zo" wa- ajheim ajhe' mae anyham: avho' boe" ra" khyo mangad: yang: ai: khyo alhab' re kho:kham pho" nao yao: ba: to: gau ngad naeva"- ein: ngo myid: lam: ra". 27 kho:kham Agripa we"- Lapa qe: jham: dao: jham re nao lam" i?- Nao lam" rure ngo ba:- ga: ta" ra". 28 Alao" Agripa wa Polu re Dazab daso' gyo: mae za: lhao" re: nao ngo re Khristan phung: byu qo" toe' yu nae" ein: nao jho: i?- ga: ta" ra". 29 Polu wa dazab daso' za: ngad ngad- myao" sho' ngad ngad akhyag mangad:- kho:kham pho" nao we' daga" ana" ba nga" dao: re tae" gyo" na ko" ra" mo, alhab' wa ce: nga" jao co: taui: mae" je yang:- ngo we' dakhyo: boe" lo genae" qhid' mae" Mao"So re ngo akyu" mho' ra"- ga: phaug' tau" ra". 30 Ai: thao re- kho:kham pho"- mang: zug: pho"- Bernike we' gatau alhab' mo, wa to" ye, mung:- 31 Yao: bam wa ai: jo, qo mae" thug' lo" gethao re- Byu ceyaug wa shid man" ra" qobo- mangad: lao"- thaung: laung" nae" qobo pe" re: mashad' ngad: ra"- ga: yao: cao: jho" ta" ako". 32 Agripa wa Festu re byu ceyaug wa Khosin"" pho" jhao" lhai: to' ke' byid: gela, ga: yao: mamho' to: ngad: re wa yao: re gai: pheim: nhao: ke' ra"- ga: ta" ra". 1 Ngonhaung" re Itali mung" khyo qid sang pho khyo" dai" ke' nae" qhid' mae" bin: myid: phyid' lao"- Polu we' gatau thaung: byu daqhae: re Khosin"" pho" gyetab ga" ra" Roma gyetab dalam: mae" gyezug: pho" Yuliu lo, khyo yao: bam ab byid' ke' ako". 2 Ngonhaung" wa Asia mung" tham: yae gau: khung: jham khyo gau" ye" lo" nae" seim" na: bam:. Adramutium mae" qid sang pho dao mae yedo; zaung yang: gau" ye" lo" bam va". Thesaloni vogaung: mae" Makedoni byu Aristaku wa ngonhaung" we' daga" ngad: ra". 3 Ai: thao: ba ngonhaung" wa Sidon vogaung: khyo joe" ye" lo" bam va". Yuliu wa Polu re nhag' khyag' ruyang Polu re yao" ba nam byin cao: qejhao" ye:qhug' mung: yao: qo ca" ra" gu: re ba nam qe:yang da" byid: rure kham: yu nhao: ra". 4 Ngonhaung" aimae" to" lo" re la mayo" mung: Kupru gagyo: kao" yang la go: ra" shad' khyo" gau" ye" lo" bam va". 5 Kiliki mung" we' Pamphulia mung" we' tau" te' panglai: tham: re gau" phyid' ye" lo" mung:- Lukia mung" mae" Mara vogaung: khyo joe" ye" lo" bam va". 6 Gyezug: pho" wa ai: vogaung: mae Itali mung" khyo ye" lo" nae" Alexanda vogaung: mae" qid sang pho re ye:myao mung:- yao: wa ngonhaung" re ai: dao khyo do; zaung nhao: ra". 7 Ngonhaung" wa myao" sho' ba yin yin za: gau" ye" lo" mung: aqug: akhai: gyai qhug' ru we' lo" thao" re wa Kidu vogaung: tau" te' khyo joe" ye" lo" bam va". La mayo" ruyang qhid' au: khyo maqo" xo' gau" ye: mung: ngonhaung" wa Salmone akhyug nhae khyo" gau" phyid' lai: ye: yang:- Krete gagyo: kao" yang la go: ra" khyo" gau" ye" lo" bam va". 8 Gagyo: kao" qid yae te' te' khyo" gau" ye" lo" re aqug: akhai: gyai qhug' ru we' Lasea vogaung: mae" mataung" va" ra" Gug' Ra" Gau: Khung:- ga" ra" jo, qo khyo joe" ye" lo" bam va". 9 Ngonhaung" wa ai: jo, qo mae myao" sho' ba thang: na: bam mung: Zo: Ve Jao" ra" Poe ba na lhao" re: lai: lo" byaug va" ruyang qid sang pho khyo" gyaung: su: nae" gyaug qo: ra" ayo, joe" lo: ra". Airumung: Polu wa yao: bam re lau: de, zokho' qe we"- ngonhaung" cemae"- 10 Xo' gau" ye" lo" re wa gyaug ca" nae"myao:- qid sang pho we' gai xan: jham jeim" byaug: ru we' ngonhaung" kao so' lhao" re: jeim" lo" nae" khyo jo; rure ngo myao:- ga: pha,jhi" byid: ta" peim" ra". 11 Ngadqere: gyezug: pho" wa Polu ta" ra" dao: re tho' qid sang pho khang" yaug we' qid sang pho asang ta" ra" dao: re je: lam" ra". 12 Ai: gau: khung: wa gyo, yo, lai sho' thang: na nae" qhi" magai: ruyang byu myo: sho' wa ai: gau: khung: mae" to" mung:- gai: boe" ngad: re- Phoenig vogaung: khyo joe" sho' qam: ke' gau" ye" lo" mung:- ai: vogaung: mae gyo, yo, gu: re yethang: na nug: ako". Phoenig gau: khung: wa Krete gagyo: kao" mae ngad mung: ba vao mug:thao shad' we' ba vao mug: am: shad' khyo myo, nho qhang: to" ra" gau: khung: ngad: ra". 13 Mug:thao shad' mae" la cae: hug' lo lao"- qid sang pho gau: mo, wa yao: bam myid: yaung: to" ru we' dakhyo: qo" kad' nae" myid: jho gemung: yao: bam wa jo, to' nghoe: re she: to' yu mung: qid sang pho re Krete gagyo: kao" ayae khyo" cao" yang: qo" te' ra" qhi" te' mung: gau" ye" lo" ako". 14 Ngadqere: mamyao" shire Ba Thug' mug: am: La Qam" ga: mhang" ra" gyai qam: bo: ra" la qam" wa gagyo: kao" taung gaung shad' khyo" hug' gyo" lo: ra". 15 Ai: la qam" wa qid sang pho re lo:deim: mung:- qid sang pho wa la qam" re maqo" lham: thaug' qhao" ruyang ngonhaung" wa qam: ke' ru thang: pye' mung: la: yang deim" lo" ra" khyo cao: myung: lo" bam va". 16 Kauda ga" ra" gagyo: kao" ngai mug:thao shad' khyo lai: joe" ye: lao"- la qam" dae mae" dajhid' zo: ago aqab qo" yu: bam va". Ai: tau mae qid lha mabyo; qeim: lo" nae" qhid' mae" aqug: akhai: qo" zaui" tam" ci: bam va". 17 Yao: bam wa ai: lha re qid sang pho dao khyo she: to' yu mung: taui: jham: yang qid sang pho we' tang za: taui" te' ako". Yao: bam wa Surti ga" ra" ma dam: mae qid sang pho lo" kai" jo, nae" rure gyaug gemung:- qid sang pho pin: lung: jham re o khyo khyo" yu mung: la: yang deim" ra" khyo bocao: myung: lo" ako". 18 Thao: ba rere: la qam" xo' yang: hug' na: ruyang yao: bam wa qid sang pho dao mae" aung: xan: jham daqhae: re phoe' khyo" pye' ako". 19 Airumung: ai: thao: ba re yao: bam wa qid sang pho we' sin" ra" zai jham rere: phoe' khyo" pye' ako". 20 Ngonhaung" wa myo: sho' ba- ba we' kyi jham re mathe' myao. La qam" wa xo' yang: gyai thin: ra" khyo" hug' na: ra". Airumung: lo" thao" re ngonhaung" wa kao so' loe; beim nae" khyo majo, lo: ein: myid qam: shan: pye' bam va". 21 Qid sang pho zaung: ra" mo, wa zo:ve mazo: lo: ba na myo: sho' na gethao re Polu wa yao: bam: qhid' kheim: mae to" ye, mung:- Lau: de, zokho' qe we"- naonhaung" nga" dao: re tae" gyo: mung: Krete gagyo: kao" mae" magau" lo ngad: re wa ngonhaung" wa ceru: seim" ru we' byo; qeim: ru qhug' bam nae" mangad:- ngad: ra". 22 Ngadqere: nhag' dangai ge,- naonhaung" khag' dayaug re: kao so' majeim: genae"- qid sang pho za: seim" byaug: li" nae". 23 Pe"mung:ga"re nga" Asang ngo caung:pa" na: ra" Mao"So: mug: lagyo: dayaug wa amyi ngojhao" joe" li" mung:- 24 Polu we"- dagyaug wa,- nao wa khosin" pho" qhid' kheim: mae qo" ye; jo; li" nae". Mao"So wa nao re nhag' khyag' gai kad' mung: nao we' daga" qid sang pho zaung: lo ko" ra" mo, re kao so' loe; beim nhao: li" nae"- ga: ta" ra". 25 Airumung: lau: de, zokho' qe we"- Nhag' dangai ge,- pe"mung:ga"re ngo re li" ta" to: va" ru we' dakhyo: boe" lo: li" nae"- ein: ngo wa Mao"So re lam khug: na:. 26 Ngadqere: ngonhaung" nho: qid sang pho wa gagyo: kao" dalam: mae lo" hug' kai" to" ru qhug' li" nae"- ga: ta" ra". 27 Daxe: byid myi ein: myi re ngonhaung" qid sang pho wa panglai: tham: mo" mae" la qam" yang deim" ra" shad' khyo bocao: myung: qin" ra". Myi" gae gaung: myi: ko re ngonhaung" wa qid yae dajo, qo khyo te' na: kyi: ga: qid sang pho khang" mo, myid: ako". 28 Airumung: yao: bam wa qid ka" qu" ako". Shid' xe ye, no; rure myao: to" ako". Thao dazab kyo thao re dam: ka" qu" ko" re daxe: ngo" ye, za: no; rure myao: ako". 29 Yao: bam wa laug zang we' qid sang pho lo" thaung: nae" rure ci" gemung: qid sang pho dao mae" jo, to' nghoe: byid lam: khyo" ke' mung:- mug: phyad bo" li" sho' ga: akyu" mho' ako". 30 Ai: thao re sang pho kau: mo, wa qid sang pho qhid' au: mae" lha ngai re she: khyo" ke' yang: qid sang pho qhid' au: mae" jo, to' nghoe: jham daqhae: re khyo" ke' geim kad' mung: yao: bam wa qid sang pho mae" phao: loe; lo" nae" seim" ako". 31 Ngadqere: Polu wa gyezug: pho" we' gyezo: qere ai: qid sang pho kau: mo, wa ce: qid sang pho dao mae mana: jo, lo: gelao" wa- naonhaung" kao so' loe; beim nae" myid: lao" khyo majo, lo:nae"- ga: ta" ra". 32 Ai mung: gyezo: qe wa lha ngai re taui" ra" taui: jham re zhe' phyid' pye' mung: lha re myhung: ke' ako". 33 Mug: bo" zo" re Polu wa yao: bam alhab' mo, re zo:ve zo: genae" qhid' mae" poe mung:- Naonhaung" wa khoru: boe" nae" laug- ga: zo:ve pe" re: mazo: lo: lao" na ko" ru wa ana" daxe: byid ba lam: lam: ngad: ava". 34 Airumung: naonhaung" kao so' qo" daui: na genae" qhid' mae" zo:ve daja: ja: zo: ge,- naonhaung" au: dao mae" xae dakhe' lhao" re: mabyaug nae"- ga: ta" ra". 35 Ce: dao: bin: ta" thao re Polu wa mug daqhae: re yu: yu mung: yao: bam alhab' mo; qhid' kheim: mae Mao"So: jeju re caung: byid: yang: khyoe' phai" mung: zo" ra". 36 Alao"- yao: bam alhab' mo, re: qam: qo" li" mung:- yao: bam yaug khao: ngo" re: zo:ve zo" ako". 37 Qid sang pho dao mae ngonhaung" wa byu alhab' shid' yo: nhad' xe: khyaug' yaug ngad:- 38 Yao: bam yaug khao: ngo" bin: zo" gyi: thao re- qid sang pho seim: nae" qhid' mae" yao: bam wa jung: cin alhab' re panglai: khyo vo; khyo" pye' ako". 39 Mug: bo" lao"- qid sang pho kau: mo, wa yao: bam kho:tau joe" na ko" rure maxam: ngad: ako". Ngadqere: yao: bam wa gyagao: yo khyo sang pho ye:gau" de, nae" myid: phyid' ako". 40 Airumung: yao: bam wa jo, to' nghoe: jham re panglai: khug khyo zhe' phyid' zaui: ke' mung:- ai: au: yao: je, khao: jham mae" taui: jham rere: pheim: pye' ako". Ai: thao re yao: bam wa sang pho qhid' au: shad' mae" pin: lung: jham re to' ke' mung: gyagao: yo khyo khang" lo: ako". 41 Ngadqere: sang pho wa ma dam: mae lothaung: mung: loqe" jo; ra". Qid sang pho au: maqo" lab: ru we' sang pho thao shad' khyo wa qid bang: lhung" jham: yang lobe, ko" ruyang adau dau byo; sin" lo" na: ra". 42 Alao"- gyezo: qe wa- thaung: byu qe qid qhe' qhe' yang: phao: loe; lo" genae" rure sang: kho: gemung:- thaung: byu qe alhab' re se' pye' nae" seim" ako". 43 Ngadqere: gyezug: pho" wa- Polu re khyad' yu nug yang:- yao: wa gyezo: qere airu: makad' genae" qhid' mae" tam" pye' ra". Airumung: gyezug: pho" wa qid qhe' ba: qhe' ko" ra" mo, re shi" sao qhid sang pho dao mae" byae: gyo" nhao mung: gyagao: yo khyo qhe' de; lo" nhao: ra". 44 Amung: dang: ra" mo, damyo" re sag' pye: re we' damyo" re wa sang pho byo, mae" adau jham re zaui: mung: qhe' de; ye: genae" qhid' mae" amyin" byid' ke' ra". Ngonhaung" alhab' wa airu: gyagao: khyo pe" maqo lo: joe" de; ye" bam va". 1 Ngonhaung" wa gyagao: yo taung gaung khyo nyang" za: joe" ye: lao" za: ai: gagyo: kao" wa Malta ga" ru ngad: rure ngonhaung" ye: ba: bam va". 2 Ai: gagyo: kao" mug: mae" byu qe wa ngonhaung" re gyai nhag' lham: khyag' ako". Mug: qu mung: gyo; ruyang yao: bam wa myi: mad mung: ngonhaung" alhab' mo, re bang" lham: tug: yu: ako". 3 Alao" Polu wa thao: kyao: dadang: gaug: yu mung: myi:khyeim" mae ngha" ke' ra". Myiso' laung: li" lao"- ai: thao: dang: khug mae" lhao maui yoe" thug' li" mung:- Polu nho: lo, mae thoe" zhaung' ci yang: de; jo; ra". 4 Airu: Polu nho: lo, mae lhao maui de; lao" jo; rure ai: mug: mae" byu qe the' myao gelao"- Byu ceyaug wa byu se' yaug ngad yao: ngad: ra"- qid panglai: mae" loe; lo ngadqere: dangman" ra" tarha" wa yao: re daui: na nae" akhang" mabyid: nhaung- ga: yao: cao: jho" ta" ako". 5 Ngadqere: Polu wa yao" lo, mae" lhao maui re myikhyeim" khug khyo ko: ngha" zaui: ke' mung: pe" maqo lo: na: jo; ra". 6 Yao: bam wa Polu re gaung geim" qae" li" nae"- mangad: lao"- dalhang: dae shid: lang" lo" li" nae"- ga: zhaug' qu" na: bam: ako". Ngadqere: yao: bam airu: gyai myao" sho' zhaug' qu" na gengad yang: re: Polu wa pe" re: maqo: li" rure myao gelao"- yao: bam wa myid lhai" pye' mung- Ce:yaug wa So ngad: ra"- ga: ta" ako". 7 Aimae" mataung" va" rumae gagyo: kao" mug: agyi pho" Publiu sang: ra" yo myid dajhid' jo; ra". Ai: agyi pho" wa ngonhaung" re nyang" za: bang" lham: tug: yu mung: sam ba geim" bang" da" byid' ra". 8 Publiu nho: yao: pho" wa noqam" we' vae: ne no mung: yab qo mae no: lang" jo; ra". Alao" Polu wa ai: yaug: qe, khyo vao ye: yang: akyu" mho' mung:- ai: yaug: dao mae yao" lo, kai: byid: yang: yao: re gai byid' ra". 9 Ceru: bin: boe" thao re ai: gagyo: kao" mug: mae" no phyo: qhug' ra" mo, geje alhab' mo, re: Polu jhao" li" mung: yao: bam gai: shao: lo" ako". 10 Yao: bam wa ngonhaung" re jhaung qhu" myo: sho' byid' ako". Ngonhaung" dam: gau" lo" nae" seim" lao" re:- ngonhaung" gyaung: khyo mae qo ca" ra" zao:kho jham re sang pho dao mae ke' byid' ako". 11 Lho" mo" sam khye' kyo thao re ai: gagyo: kao" mae gyo, yo, lo:khug: na: ra" Alexanda vogaung: mae" So zo:zam ga: mang: ra" sang pho dao khyo yedo; zaung yang: gau" ye" lo" bam va". 12 Ngonhaung" wa Surakuse vogaung: khyo joe" ye" lo" mung: ai: vogaung: mae sam ba yethang: na: bam va". 13 Ai: vogaung: mae" ngonhaung" dam: xo' gau" ye" lo" re Rhegium vogaung: khyo joe" ye" lo" bam va". Thao: ba re mug:thao la hug' lo mung: shid' ba thao re Puteoli vogaung: khyo joe" ye" lo" bam va". 14 Ngonhaung" wa ai: vogaung: mae lam khug: ra" mo, damyo" re ye:myao mung: yao: bam wa- ngonhaung" re yao: bam we' daga" dalaban thang: na nae" qhid' mae" mho' ako". Ai: thao re ngonhaung" wa Roma vogaung: mo" khyo ye" lo" bam va". 15 Roma vogaung: mae" lam khug: ra" mo, wa ngonhaung" khyo re the' gyo: gemung: Api gai jao: joe" sho' we' bang" khug yham sam lam:- ga" ra" jo, qo khyo joe" sho' joe" li" mung: li" tug: yu: ako". Polu wa yao: bam re myao lao"- yao: wa Mao"So: jeju re caung:khin" mung: myid qam: qi: sho' bo: li" ra". 16 Ngonhaung" wa Roma vogaung: khyo joe" ye" lo" bam lao" Polu wa zaung" ra" gyezo: dayaug we' yao: yao: za: na nae" akhang" qo" ra". 17 Sam ba thao re Polu wa ai: vogaung: mae" Yuda lau: de, au: jhaung qere khai: yu: ra". Yao: bam zang" li" gelao"- Nga" Israel mao: nhaung: qe we"- ngo wa ngonhaung" byumyu" qere re:- ngonhaung" phug' pho" qemae" xo' khae: yu: ra" thung" li jham rere:- shad' lhoe" yang: pe" daja: re: makad' ngadqere: Yerusalem vogaung: mae ngo re thaung: lhaung" mung: Roma byu qe: lo, khyo ab byid' pye' ako". 18 Ngo re bin: myid' ca: qu" gethao re shid man" ra" qobo ngo pe" daja: re: mashad' rure yao: bam myao geyang:- Roma byu qe wa ngo re pheim: ke' nug: ako". 19 Ngadqere: Yuda byu qe airu re ngag: thaug' ko" ra" au: ngo yao" byu qere pe" qobo zhaug' nae" majo, ngadqere:- ngo wa Khosin"" pho" jhao" lhai: ke' byid: genae" qhid' mae" mho' va". 20 Airumung: ngo wa naonhaung" we' jho" qhug' jhau nae" qhid' mae" khai: yu: ru ngad: ra". Ngo ceru: jao co" yang taui" ru qhug' ru wa Israel byumyu" qe myid: lao" na ko" ra" yaug: mathao mae ngad: ra"- ga: ta" ra". 21 Alao" yao: bam wa Ngonhaung" wa ni" khyo we' sin: yang: Yuda mung" mae" vhin tung" dakhye' daqo: re: maqhug' yu- amung: aimae" ngonhaung" byu qe dayaug re: joe" li" mung: ni" khyo re magai: ra" lau dao: mali" ta" ko" ngad: ra". 22 Pe"mung:ga"re ce: nao bobo: ra" phung: qe khyi" khao: ngo" mae"- mo, byu qe ngag: thaug' ko" rure ngonhaung" ba:- ngadqere: nao myid: ra" khyo rere: ngonhaung" tae" gyo: nug: ra"- ga: ta" ako". 23 Airumung: yao: bam wa Polu we' ba na jho" dang: yu: ako". Jho" dang: to" ra" ba na mae Polu thang: na: ra" jo, qo khyo byu myo: sho' mo, joe" li" ako". Polu wa ne, kao mae" mug: cad' sho' yao: bam re Mao"So: mung"dan: we' sin" ra" mung dao: jham mho" kyo: byid: mung: Moshe Tarha" mae" we' lapa qe: jham: dao: jham re ngha yang: Yesu khyo re yao: bam lam" li" gesho' kho" kyo" ra". 24 Yao: bam mae" damyo" wa Polu ta" rure lam" ako". Ngadqere: damyo" wa malam" ko" ngad: ra". 25 Airumung: yao: bam yao: cao: majho" vang" lo: thug' lo" na ko" au: Polu ta" ru wa Gyang: Lho" Byo wa Lapa Esaia nhad' khyo" naonhaung" phug' pho" qere ta" ra" dao: wa gyai yao: jo: ra". 26 Yao: ta" ru wa- Nao wa ai: byumyu" qejhao" ye: mung: ta" kyo: wa,- Naonhaung" wa tae" gyo: gengadqere: maba: gyo: genae"- naonhaung" qu" gengadqere: mamyao genae". 27 Pe"mung:ga"re ce: byumyu" qe: nhag' lam: wa nhag' cad' cad' jo, mung:- yao: bam: nokhye' jham wa jid' jo; ru we' yao: bam: myo, jham cam" ci geyang: ngad: ako". Airu: mangad: ko" re wa yao: bam: myo, jham wa myao mung:- yao: bam: nokhye' jham wa the' gyo: yang: yao: bam: nhag' lam: mae ba: gyo: gemung: yao: bam wa ngo shad' khyo phaug' lo: li" genae"- ga: Mao"So ta" ra". Alao" ngo wa yao: bam re gai byid: nae" ga" ru ngad: ra"- ga: ta" ra". 28 Alao"- Polu wa dao: pin" khyo"- Mao"So: khyad' yu: ra" khyo mung dao: re Taung bug byu qe khyo byid' pye' mung: yao: bam wa ai: mung dao: re tae" gyo" yu: li" genae" rure naonhaung" ba: to: ge,- ga: ta" ke' ra". 30 Polu wa shid' zin lam: lam: yao: ngho" na: ra" yham mae na yang:- yao: jhao" li" ra" mo, alhab' re bang" lham: tug: yu mung:- 31 Yao: wa Mao"So: mung"dan: khyo re kho" kyo" ru we' Asang Yesu khyo re mazag mavae galin: gago:- mho" shid' kho" kyo" na: ra".
|