3 Yohan

3 Yohan 1

1 Ngo lau: de, pho" wa- dang za: jhid'de; ra" nga" jhid'de; ra" Gaiu re mugsug' tung" ke' ra". 2 Nga" jhid'de; ra" ba nam pho" we"- ja: khao: ngo" mae nao na gai ye; gai nae" qhid' mae" we' gaung dau: qao" zin" nae" qhid' mae" ngo akyu" mho' byid' ra". Nao wa Byo mae qao" zin" rure ngo ba:. 3 Nao wa khonhae" re: ai: dangman" rumae kaoso' daui: ru we' dakhyo: Khristan mao:nhaung: qe damyo" ngojhao" joe" li" ko" au: nao wa dangman" rumae khoqhi" sho' kyid: ra" khyo ngore li" ta" kyo: geyang: ngo gyai ngaui bau" ra". 4 Nga" zo: dau qe wa ai: dangman" ra" khyo mae kaoso' daui: na ko" ra" ga" rure the' gyo: yang: ngo ngaui bau" ra" tho' je yang: ngore ngaui bau: nhao: ru pe" majo, lo:ngad: ra". 5 Nga" jhid'de; ra" ba nam pho" we"- nao wa Khristan mao:nhaung: qe: qhid' mae" mau" zaui: byid' rumae nao yao: maba mase" ra" Khristan mao:nhaung: qere lhao" re: gyai kyid kyid za: zaui: so: byid: yaug ngad: ra". 6 Yao: bam wa ni" jhid'de; ra" gyaung: khyo mae xo' yang: qo" ye" lo" genae" qhid' mae" yao: bam re bao" thaug' byid' ke' wa,- 7 pe"mung:ga"re yao: bam wa malam khug: ra" mo, mae" bao" thaug' ru daja: re: makhae: yu lo:- Khristu nho: mau" zo" zaui: so: nae" qhid' mae" gyaung: su" lo" mo, ngad: ako". 8 Airumung: ngonhaung" Khristan phung: byu qe wa byu cebam re bao" thaug' byid: ca" ra". Airulao" ngonhaung" wa dangman" ra" khyo qhid' mae" mau" zaui" ra" mo; mau" zaui: cao: qe qo" boboe" nae" ngad: ra". 9 Ngo wa Phung: re vhin tung" alang" dakhye' tung" ke' ra". Ngadqere: ai: phung: au: jhaung kad' nug: ra" Diotrephe wa ngo ta" ke' ra" dao: re pe" matae" gyo: ngad: ra". 10 Airumung: ngo joe" li" lao" yao: kad' lai: lo: ra" lo, mau" ja: khao: ngo" re ngo ta" thug' nae". Yao: wa ngonhaung" khyo we' sin: yang: gyai lhaung: ra" khyo" mhug' ta" to" ra". Ai za: malaug lo: yao: wa Khristan mao:nhaung: qe joe" li" ko" au:- yao: bam re malham: khae: yu nae" ngad: ra". Lham: khae yu nug mo, re lhao" re: tam" pye' mung: yao: bam rere: ai: Phung: mae" khe' thug' pye' nae" qam: ke' ra". 11 Nga" jhid'de; ra" ba nam pho" we"- magai: ra" ja: re ave, daqu" yu wa, gai: ra" ave, qu" yu wa,- gai: ru kad' ra" yaug wa Mao"So shad' de; ra" yaug ngad: ra". Magai: ru kad' ra" yaug wa Mao"So re maba mamyao yaug ngad: ra". 12 Byu yaug khao: ngo" Demetri re khin" ako". Dangman" ru wa yao" khyo re sagse: kham byid' ra". Ngonhaung" re: yao" khyo re sagse: bokham byid: mung: ngonhaung" ta" ra" dao: dang: rure naonhaung" ba: ako". 13 Ngo wa naonhaung" re ta" nae" khyo myo: sho' qo" ra". Ngadqere: mugsug' khye' mae tung" cid' mhaug' yang za: manug: tung". 14 Mataung" myao" re nao we' qhug' nae" rure ngo myid: lao" na:. Ailao" nga" shid' zo: myo,khung: te' qo" jho" jhau nae" ngad: ra". 15 Ngaui pyo: yaug yo: ru wa nao we' daga" ngad: jo, vashao: wo". Ni" ba nam qe alhab' mo, nao re au" ke' ako". Ngonhaung" nho: ba nam alhab' rere: gaung dau: nghe' yang: cao" au" byid: wa,.