2 Timothy
2 Timothi1 Mao"So myid o: ra" khyo" yang Yesu Khristu nho: lagyo: dayaug ngad mung:- Khristu Yesu we' dadang: dalam: za: doe; ra" khyo" ngonhaung" qo" yu: ra" dao:so: byid' to" ra" kaoso' khyo re ta" hau" kyo: nae" qhid' mae" nhao: ke' qhug' yaug ngo Polu wa- 2 Ngo jhid'de; ra" nga" zo: re mugsug' tung" ke' ra". Pho" Mao"So we' ngonhaung" Asang Khristu Yesu wa nhag' myan" ra" jeju- nhag' khyag' shogu: ru we' ngaui pyo: yaug yo: ru nao re byid: vageshao: wo". 3 Ngo wa nga" phug' pho" qe caung da" byid' lo vako" ru we' dakhyo: nhag' lam: gyang: gyang: za: ngo caung: da" byid' na: ra" Mao"So re jeju caung:khin" byid' ra". Myi" re: na" re: nga" akyu" mho' thoe mae ngo nao re khonhae" re: bomyid: beim: zo" re"- yao: re jeju caung" ra". 4 Ngo wa ni" ngug byid jham re myid: beim: byid' ra"- amung: ngo gyai ngaui bau" ru qhug' nae" qhid' mae" ngo wa nao re gyai qhug' nug: ra". 5 Ni" phyid' Lui we' ni" myhi" Uni shid' ma: mae re: bo: ra" ni" nho: din:man" ra" lam khug: myid re ngo myid: beim" na:. Airu" ra" lam khug: myid ni" khug mae re: bo: ein: ngo myid: lam: ra". 6 Ce:mathao mae ni" dao mae ngo lo, kai: byid' au:- nao re Mao"So byid' ra" jeju jhaung qhu" re xo' yang: de; jo, nhao nae" qhid' mae" nao re ngo ta" peim" ke' ra". 7 Pe"mung:ga"re Mao"So ngonhaung" re byid' to" ra" Byo wa ngonhaung" re magyaug: xu: jo, nhao ngad: ra". Ai: atha" yao" Byo wa ngonhaung" re qam: so' we'- jhid'de; myid we'- yao: yao" gaung re qo" khang" ru ngonhaung" re ke' byid' ra". 8 Airu: mung: ngonhaung" wa Asang: khyo re sagse: kham: rumae daqho' wa,- Khristu nho: mathao mae kyam: byu ngad: ra" nga" mathao mae re: daqho' wa,- ai: atha" Mao"So: qam: so' re kham: yu mung: Lau Dao: Gai qhid' mae" dayin dayo: kham zo" rumae bobo wa,- 9 Yao: ngonhaung" re khyad' yu mung: yao" byu qe boe" nae" qhid' mae" khai: yu: ru wa ngonhaung" qo" zaui: so" ra" mau" zo" mathao khyo" yang mangad:- yao" myid: yaung: to" ru we' nhag' myan" ra" jeju mathao khyo" yang ngad: ra". Yao: wa mug: thug' sao mapeim: shimae" Khristu Yesu khyo" yang ce: nhag' myan" ra" jeju ngonhaung" re byid' ra". 10 Ngadqere: ai: rure ngonhaung" khyad' yu: Asang Khristu Yesu joe" li" ra" khyo" yang ana" ngonhaung" re qhu" byid' ava". Yao: wa shid: ru nho: qam so' re pin" pye' mung: Lau Dao: Gai khyo" yang shid maba: ra" kaoso' re qhu" byid' ava". 11 Mao"So wa Lau Dao: Gai re byid: nae" qhid' mae" lagyo: we' mho" pho" khyo" ngore aya: tang" to: byid' ra". 12 Ce: mathao mae ngo wa aijham re dayin dayo: kham zo" na: ru ngad: ra". Ngadqere: ngo wa myid: lam: ru byang" sho' bo: jo, shi"- pe"mung:ga"re ngo wa khag' re myid: lam khug ngha: na: rure ngo ba mung: yao: ngore lam: to" ra" khyo re lo" thao" ra" ba na joe" sho' yao: qo" zam" to: byid' rure ngo nyang" za: ba: ra". 13 Ngo nao re mho" byid' ra" ai: dangman" ra" mungdao: jham re phug' cao" nae" qhid' mae" ve, so: khyo" tang za: zaui" zag: ci mung: Khristu Yesu we' ngonhaung" dadang: dalam: za: doe, yang: qo" yu: ra" ngonhaung" nho: lam khug: myid we' jhid'de; myid mae tang za: zaui" ci wa,. 14 Nao re lam: to" ra" ai: gai: ra" ja: jham re ngonhaung" khug mae na: jo; ra" Gyang" lho" Byo: qam: so' khyo" yang zam" ci wa,- 15 Phugelu we' Heramoge bobo yang: Asia mung" mae" mo, yaug khao: ngo" ngore shapye' to: co' ko" rure nao ba: ra". 16 Asang wa Onesiphuru nho: yham byu qere nhag' khyag' shogu: ru qhu" byid: vashao:- pe"mung:ga"re yao: wa ngore myo: sho' lhang myid pyo: nhao: ra". Yao: wa ngo thaung: laung" rure maqho' ngad: ra". 17 Yao: wa Roma vogaung: khyo joe" li" we' ngore maqhug' re qhug' sho' qho: ra". 18 Asang wa lo" thao" ra" ba na mae yao" nhag' khyag' shogu: ru yao: re qhu" byid: vashao:- Ephesu vogaung: mae yao: khoqhi" sho' ngore caung da" byid: va" rure nao nyang" za: ba: ra". 1 Nao kam" wa nga" zo: we"- Khristu we' ngonhaung" dadang: dalam: za: doe, yang: qo" yu: ra" nhag' myan" ra" jeju khyo" yang qam: bo: jo, wa,- 2 sagse: myo: sho' mo; qhid' kheim: mae ngo kho" kyo: mung: nao wa ngo mae" the' gyo" yu: ra" ai: mho" shid' dao: re su gaje qere qo" mho" shid' nae" ra" lam ga" ra" mo, rere: kai" ab byid: wa,. 3 Nao wa Khristu Yesu nho: jhaug' zaug: ra" gyezo: dayaug khyo" ai: qug: khai: dayin dayo: kham zo" rumae bokham zo: wa,- 4 gye mau" zo" vin vo; na: ra" gyezo: pho" wa yao" gyezug: pho" re ngaui nhao nae" qhid' mae" o mung: gye we' masin" ra" mau" zo" jham mae macao: lhag' zaui: ngad: ra". 5 Jho" tao: poe mae bobo: ra" tao: sab' ra" byu dayaug wa ai: tarha" re maphug' cao" lo: bin: kheim" jhaung qhu" re maqo" ve; yu ngad: ra". 6 Qam: ke' yang: mau" zaui" lo: ra" yo kad' yaug wa gaug zo maui: lam: ameim" re qo" zo: ang: ra". 7 Ngo ta" ra" dao: re myid: qu" wa,- pe"mung:ga"re Asang wa ai: gu: alhab' nao re ba: gyo: nhao: li" nae". 8 Ngo kho" kyo" ra" ai: Lau Dao: Gai mae mho" shid' ru we' dakhyo: shid: rumae" daui: to" li" nhao: ru qhug' ru we' Davi myid:zo: ngad: ra" Khristu Yesu re myid: beim: wa,- 9 ngo wa ai: Lau Dao: Gai re kho" kyo: yang: qug: khai: dayin dayo: kham zo: mung: tarha" shad' lhoe" ra" yaug re we' dakhyo: jao co" yang taui" to: qhug' ra". Ngadqere: Mao"So: mungdao: re wa maqo" taui" to: ngad: ra". 10 Airumung: khyin: yu qhug' ra" mo, wa- Khristu Yesu khyo" yang khyad' yu: rure qo" kham: yu mung: apyad ato: phungbao re qo" kham: yu genae" qhid' mae" ngo wa Mao"So: yang khyin: san: yu qhug' ra" mo; mathao mae ja: khao: ngo" mae zang: kham: ra". 11 Ngonhaung" wa yao: we' daga" shid va" ngad: re wa yao: we' daga" re: ngonhaung" kaoso' daui: li" nae". 12 Ngonhaung" wa yao: we' daga" zang: kham: ngad: re wa- yao: we' daga" re: eib: li" nae". Ngonhaung" wa yao: re ha: pye' ngad: re wa- yao: re: ngonhaung" re ha: pye' li" nae". 13 Ngonhaung" jhaug' mazaug ngad yang: re: yao: wa jhaug' zaug yaug ngad: ra". Pe"mung:ga"re yao: wa yao: yao" gaung re maqo" mhug' ngad: ra" ga" ra" ce: dao: wa dangman" ra" dao: ngad: ra". 14 Cekhyo re ni" byu qere ta" peim: byid: wa,- amung: dao: thoe jham we' sin: yang: majho" ta" ngag genae" qhid' mae" Mao"So: qhid' kheim: mae jhaug' za: yao: bam re ta" peim: byid: wa,- Airu" ra" jho" ta" ngag: ra" khyo wa agai maboe" nhao lo:- aire tae" gyo" ra" mo, re byo; qeim: lo" nhao: ra". 15 Yao" mau" zo" mae qho' nae" mabo: ra" mau" vin yaug khyo" re:- Mao"So: dangman" ra" mungdao: re jo jo za: mho" shid' byid: yaug khyo" re:- Mao"So: qhid' kheim: mae nga: ye, sho' naoyao" qam: bo: thao" mae" phin: yang: zaui: so: wa,. 16 Byu re Mao"So we' je: va: sho' za: khe' ke' ra" khyo ngad: ra" Mao"So mabo: ru we' adu: adae: jho" jhau: ra" dao: jham re jao" pye' wa,- 17 airu" ra" mho" shid' khyo wa gaung sho: re zo" pye' ra" ye, bab no we' dau: ra". Airu" khyo re Humenaeu we' Philetu shid' zo: mho" shid' byid' ako". 18 Yao: shid' zo: wa shid: rumae" dam: daui: to" li" ru wa ana" boe" va" ga: ta" ra" khyo" yang dangman" ra" khyo mae" nghung" lo" byaug gemung: lam khug: ra" mo, damyo" nho: lam khug: ra" myid re byo, nhao: ako". 19 Ngadqere: Mao"So zhaug' to" ra" gang" tang: ra" apan aqao: wa maqo" gai: laui: ngad: ra". Ai: apan aqao: dao mae Asang wa yao: sang: ra" gu: re ba mung: Asang: bo: de, yaug ngad: ga: ta" ra" yaug khag' ngadqere: yao: wa magai makhyang" ra" lo, mau" re jao" pye' ra" ga: tung" to" ra". 20 Yham mo" dayham mae keim kang: myo: sho' ja: jo; ra". Daqhae: re wa ngaui we' qhang: yang kad' to: mung:- gatau daqhae: re wa sag' we' zhogam" yang kad' to" ra". Amung: daqhae: re wa mang a- qhid' mae" ci nae" qhid' mae" ngad mung: damyo" re wa ne, qug ci nae" qhid' mae" ngad: ra". 21 Dayaug yaug yao: yao" gaung re ai: makhyang" ra" ja: jham jhad' za: jao" pye' ra" yaug ngad: re wa yao: wa yao" Asang qhid' mae" akyu" bo mung: gai: ra" mau" ja: khao: ngo" qhid' mae" ci nae" qhid' mae" jin" jin" ngad yaug ngad: ruyang yao: wa gakai: lai je: akhyag: ra" myid: yaung: to" rumae ci yhung" ru qhug' li" nae". 22 Amung: ve, qae" myid shab' kao bau: rure jao" pye' wa,- gyang" san: ra" nhag' lam: we' bao" thaug' byid: nae" qhid' mae" Asang re mho' yao: ra" mo, we' daga" din:man" ru- lam khug: ru- jhid'de; ru we' ngaui pyo: yaug yo: rure qam: ke' yang: qho wa,- 23 ngadqere: adu: adae" ru we' nhag' cad' noyaug mung: ra" jho" ta" ngag: ra" khyo jham re jao" pye' wa,- ai: jham wa myan" myo: jho" byo, yang: thang ja: ngad: rure nao ba gau ngad: ra". 24 Asang: nho: daui daui yaug wa myan" myo: jho" byo, magai: ngad ngad: ra". Yao: wa byu alhab' mo, re nhag' khyag' mung: gai: ru we' nhag' lam: qhang: ra" mho" pho" ngad qo: ra". 25 Yao" gyevo qere mho" shid' ra" au: nau" nhae" yaug re: ngad qo: ra". Pe"mung:ga"re Mao"So wa yao: bam re myid tha" lo mung: dangman" rure ba: lo genae" qhid' mae" akho: akhang" agu gai: byid' re byid' li" maba. 26 Airumung: yao: bam beim: so" li" mung: yao: bam re taung" to: yang: yao" myid o: ra" khyo re phug' cao" nhao: ra" Satan yui: nho: lha" mae" loe; beim: lo: li" genae". 1 Lo" thao" ba na jham mae qug' ra" ayo, ngad nae" rure myid: beim: wa,- 2 byu qe wa yao: yao" qhid' mae" za: myid mo,- so' kho' mo,- phug: ru we' ngad beim: mo,- ngad: li" genae"- yao: bam wa maphug' makhyad' roe" mo,- yao: bam: myhi" pho" qe: mho dao: magyo: mo,- jeju maba: beim: mo,- Mao"So malam mo,- ngad: li" genae". 3 Yao: bam wa nhag' khyag' myid mabo mo,- nhag' mashid qad mo,- gaui mho lau mho mo,- se' da: be, khyad' kad' mo,- byuqan qe ngad: li" genae". 4 Yao: bam wa gai: rure nghang" ra" mo, ngad: li" genae". Yao: bam wa lam maga" aphaug' alhag' kad mo,- mamyid: qu" lo: kad' mo,- ngad beim: myid qi" ra" mo, ngad: li" genae". Yao: bam wa Mao"So re tho' mug: myid pyo: khyo re je: jhid'de; mo, ngad: li" genae". 5 Yao: bam wa adao shad' mae ngonhaung" nho: caung:pa" thung" mang vin mo, ngad: li" genae". Ngadqere: ai: caung:pa" thung" nho: qam: so' aman" re yao: bam ha: pye' li" genae"- Airu" ra" mo, re jao" pye' wa,- 6 yao: bam mae" damyo" wa su: yham jham khyo vao ye: mung: yao: bam: qobo qo: yang nhai" to: qhug' ru we' myid o kao bau: ru ja: khao: ngo" re cao" kad' na ko" ra"- 7 ai: qam: nang" ra" myiqe: qere eib: yu: pye' ako". Ai: myiqe: qe wa khonhae" re: mho" zhao: yu nae" qam: ke' na gengadqere: dangman" ra" khyo re khonhae" re: maqo" gai: ba: yu ko" ra" mo, ngad: ako". 8 Yanne we' Yambre shid' zo: wa Moshe re gye kad' ko" ru we' dakhyo:- ai: byu qere: dangman" rure gye kad' ako". Yao: bam myid: sun" qu" ga" ru mabo mung: lam khug: ra" myid byo; qeim: lo" ra" mo, ngad: ako". 9 Ngadqere: yao: bam wa gyai qi: sho' mau" maqo" kad' genae"- pe"mung:ga"re yao: bam khoru: go: joe; rure yaug khao: ngo" the' myao: li" genae". Airu wa Yanne we' Yambre shid' zo: mae boe" ru we' dakhyo: yao: ngad: ra". 10 Ngadqere: nao wa nga" mho" shid' khyo nga" ave, lo, mau"- nga" kaoso' daui: ra" au: qang khyo jham re phug' cao" ava". Nao wa nga" lam khug: ra" khyo nga" nhag' lam: qhang: ru- nga" jhid'de; myid- nga" zang: kham: ra" khyo- ngo yhin" ru qhug' ru jham- 11 ngo kham zo" ra" qug: khai: jham re myao: ava". Antioki- Ikoni- Lustra vogaung: jham mae qu" gyaug qu" lhaung: ra" yhin" ru jham re ngo zang: kham: lo: ra" khyo alhab' re nao ba: ra". Ngadqere: Asang wa aijham alhab' mae" ngore khyad' yu: ra". 12 Khristu Yesu we' dadang: dalam: za: doe, mung: Mao"So: khyo re phug' cao" ra" yaug khao: ngo" wa yhin" ru qhug' li" genae". 13 Makhyang" ra" mo,- geim kad' pyag' ra" mo, wa magai: ru je: xo sho' kad' li" mung: su gaje qere mhug' pyag' mung: yao: bam yao: mhug' pyag' li" genae". 14 Ngadqere: nao kam" wa- nao zhao: yu mung: jhaug' za: lam" ra" dangman" khyo re xo' yang: tang za: zaui" zag: ci wa,- ni" mho" pho" qe khag' ngad ko" rure nao ba: ra". 15 Khristu re lam khug: ra" khyo" yang khyad' yu: ru qhug' sho' nao re pha,jhi" qo" byid' ra" gyang" lho" ra" jham: mugsug' jham re zoshao: mae" nao ba va" rure myid: beim: wa,- 16 Mao"So: mau" vin yaug wa- jab byang" sho' qo" zaui: yaug ngad: li" mung: gai shab: ra" mau" ja: khao: ngo" re qo" zaui: so: nhao nae" qhid' mae"- 17 Mao"So: yang jaung" yang: tung" to" ra" Jham: mugsug' alhab' wa dangman" rure mho" shid' ru- qeim: mho" ru- shad' rure mho" kyang" ru- jo: ra" kaoso' daui khyo qhid' mae" mho" shid' byid' ru qhid' mae" akyu" bo: ra". 1 Shid: ra" mo, re we' daui: na: ra" mo, re dao: kho' nae" ra" Khristu Yesu we' Mao"So: qhid' kheim: mae yao: wa Kho:kham khyo" eib nae" joe" li" na: ruyang- 2 yo, khyin: dau ngadqere: madau ngadqere: ai: mungdao: re qam: ke' yang: kho" kyo: nae" qhid' mae" ngo nao re qam: ke' yang: jhan" ke' ra". Kho" kyo" ra" au:- qobo ceim" shid' yang: qeim: mho" wa,- qam: byid: wa,. Nhag' lam: qhang qhang za: mho" shid' byid: wa, 3 byu qe wa jo yang: gai: ra" mho" shid' khyo re manug: tae" gyo: lo:- yao: bam yao" myid o kao bau: rure cao" yang: yao bam: no: mae phan: sho' tae" gyo: nug: ra" dao: jham re mho" shid' byid' ra" mho" pho" myo: sho' qho genae" ayo, joe" lo: li" nae". 4 Yao: bam wa dangman" ra" dao: re tae" gyo: nae" qhid' mae" ngag: pye' mung:- mhomyi: saung: seim jham re tae" gyo" li" genae". 5 Ngadqere: nao wa ve, yaug: aja: ja: mae naoyao" gaung re qang: za: khang" wa,- qug: khai: re zang: kham wa,- Lau Dao: Gai kho" kyo" ra" mau" zo" re zaui: so: wa,- Mao"So: daui daui yaug khyo" nao yao" qo alhab' re zaui: so" na wa,. 6 Ngo kam" wa xeim: re we' dakhyo: ngaui" byid: qhug' nae" ayo, joe" ava"- ce: mug: myid mae" thug'lo" nae" yo, khyin: joe" li" na: ava". 7 Ngo wa jho" tao: poe mae ngoyao" qam: bo: ra" qhi" tao: va". Ngo wa khyo thao" sho' tao: va". Lam khug: ru we' dakhyo: ngo kaoso' daui va". 8 Ana" wa din:man" ra" khyo" kaoso' daui: ra" mo, re byid' ra" aung doe; jhaung qhu" wa ngore lao" na: ra". Din:man" ra" tarha" zug: ngad: ra" Asang wa dao: kho' ra" ba na re ai: jhaung qhu" ngore byid' li" nae". Ngo re za: mangad: Asang joe" li" re jhid'de; kao bau myid we' lao" na ko" ra" mo, alhab' rere: byid' li" nae". 9 Ngo jhao" phyad qo" joe" li" nae" gai: boe" ra" qhi" qam: ke' wa,- 10 Dema wa ana" ce: mug: myid qae: re jhid'de; yang: ngore shapye' co' mung: Thesaloni vogaung: khyo ye" lo" byaug: ra". Kreken wa Galati khyo ye" lo" byaug mung: Titu wa Dalmati khyo ye" lo" byaug: ra". 11 Luka dayaug za: ngo we' daga" na: ra". Marku re qho: yu mung: nao we' daga" jhui" li" byid: la,- pe"mung:ga"re yao: wa nga" mau" zo" re qo" bao" thaug' byid: yaug ngad: ra". 12 Tukhiku re ngo Ephesu vogaung: khyo ye: nhao: ke' va". 13 Nao li" lao" Troa vogaung: mae Karpu nho: lo, mae ngo to: co' ra" nga" bau: qhang we' mugsug' paug' jham je yang: shoqid mugsug' paug' jham rere: boyu: vin: li" byid: la,. 14 To' be, zo: yaug ngad: ra" Alexanda wa ngore qug: khai: gyai byid: va"- yao: kad' lo: rure cao" yang: Asang wa lage, phaug' byid: shao:- 15 nao yao: aiyaug rere: lha" na wa,- pe"mung:ga"re yao: wa ngonhaung" nho: mungdao: re gyai aqan alan gye kad' yaug ngad: ra". 16 Sao qhid' lhang ngo myid' ca: qu" qhug' ra" au: nga" shad' mae ye, mung: khag' re: mabao" ta" byid: ko" ngad: ra". Alhab' mo, ngore phao: cug' to: co' ako". Mao"So wa yao: bam re qobo dae mabyid: vashao: wo". 17 Ngadqere: ngo wa Taung bug byu qe alhab' mo; the' gyo: gesho' jab byang" ra" mungdao: re qo" kho" kyo: nae" qhid' mae" Asang wa ngo we' daga" na mung: ngore qam: o: byid: ra". Amung: ngo wa shid nae" dao: phyid' rumae" khyad' yu: ru qhug' va". 18 Asang wa makhyang" ra" ja: alhab' mae" ngore khyad' yu mung: yao" mug: khaung: mung"dan: mae gug: gug: za: jhui" vao lo" li" nae". Asang wa apyad ato khonhae" re: phungbao bao: jo, vashao: wo"- Amen. 19 Priskila we' Akula shid' tao we' Onesiphuru nho: yham byu qere ngo au" ke' ra". 20 Erastu wa Korinthu vogaung: mae thang: na: ra". Trophimu wa no yang: Miletu vogaung: mae ngo nha co' va". 21 Gyo, yo, majoe" shimae" nao qo" joe" li" sho' qam: ke' wa,- Eubulu- Puden- Linu- Klaudia bam we' gatau Khristan mao:nhaung: qe wa naonhaung" re au" ke' ako". 22 Asang wa ni" byo we' daga" ngad vashao: wo"- Mao"So: nhag' myan" ra" jeju wa naonhaung" alhab' we' daga" ngad: jo, vashao: wo".
|