2 Thesaloni

2 Thesaloni 1

1 Polu- Sila we' Timothi bam wa ngonhaung" Pho" Mao"So we' Asang Yesu yang sang: ra" mo, ngad ko" ra" Thesaloni phung: byu qere mugsug' tung" vhin: ke' ra". 2 Ngonhaung" pho" Mao"So we' Asang Yesu Khristu wa nhag' myan" ra" jeju we' ngaui pyo: yaug yo: ru naonhaung" re byid: vageshao: wo". 3 Ngonhaung" mao:nhaung: qe we" Ngonhaung" wa yo, khyin: khao: ngo" mae naonhaung" qhid' mae" Mao"So re jeju caung:khin" na: bam ca" ra". Airu: jeju caung:khin" byid' ru wa ngonhaung" qhid' mae" ang: ra" mau" ngad: ra". Pe"mung:ga"re naonhaung" lam khug: myid wa je: qi" li" ru we' gaje qere jhid'de; ra" naonhaung" yaug khao: ngo" nho: jhid'de; myid wa je: qi"qhang: li" na: ruyang ngad: ra". 4 Ce: mathao mae Mao"So: phung: jham mae bo ko" ra" naonhaung" khyo we' sin: yang: ngonhaung" yao: phug: ta" na va". Naonhaung" thaung" qhug' na ko" ra" yhin" ru we' qug: khai: khyo alhab' re xo' yang: naonhaung" khoru: zang: qhao" ko" ru we' lam khug: na: ko" rure ngonhaung" yao: phug: ta" na: bam va". 5 Cegu: alhab' wa Mao"So: dao: kho' ru wa din: vang" rure qhu" byid: mung: ai: mathao khyo" naonhaung" wa yao" mung"dan: mae man: qi" ra" mo, boe" li" genae". Naonhaung" wa ai: mung"dan: qhid' mae" qug: khai: kham zo" na: ako". 6 Mao"So wa jo: ra" khyo" kad' li" nae"- yao: wa ngonhaung" re qug: khai: nhao: ra" mo, re qug: khai: kham zo: nhao: li" nae". 7 Qug: khai: qug: khai: kham zo" na ko" mo, naonhaung" re we' daga" ngonhaung" rere: myaung: ngho" ru byid' li" nae". Asang Yesu wa yao" qam: bo: ra" mug: lagyo: qe we' daga" myishae we' mug:gaung mae" thug' li" ra" au:- 8 Mao"So wa yao: re ngag: pye' mo, we' ngonhaung" Asang Yesu Khristu nho: khyo Lau Dao: Gai re matae" gyo" ra" mo, re qobo dae byid' li" nae". 9 Yao: wa yao" byu alhab' mo; yang byid' ra" phug' te' nga: yhe' rure khae: yu nae" ra" ba na mae joe" li" au: yao: bam wa Asang: qhid' kheim: mae" re: yao" qam: so' bo: ra" phungbao mae" re: kao" pye' ru qhug' mung: apyad ato byo; qeim: ra" qobo dae kham zo" li" genae". Naonhaung" wa ngonhaung" ta" ra" dao: re lam" vako" ruyang ai: Asang re phungbao byid' ra" mo; phaung mae naonhaung" re: bobo: li" genae". 11 Ai: mathao mae ngonhaung" wa khonhae" re: naonhaung" qhid' mae" akyu" mho' ra". Naonhaung" re yao: khai: yu: to" ra" kaoso' daui khyo we' man: qi" ra" mo, boe" nhao nae" qhid' mae" ngonhaung" nho: Mao"So re ngonhaung" akyu" mho' ra". Yao: wa gai shab: rure naonhaung" kao bau: ra" gu: alhab' re we' naonhaung" lam khug mau" zo" re yao" qam: so' khyo" yang jab byang" byid: vashao:. 12 Airu: ngonhaung" Mao"So we' ngonhaung" Asang Yesu Khristu nho: nhag' myan" ra" jeju khyo" yang ngonhaung" Asang Yesu mang wa naonhaung" mathao mae phungbao bao: li" mung: yao" mathao mae naonhaung" re: phungbao bao: li" genae".

2 Thesaloni 2

1 Nga" mao:nhaung: qe we"- ngonhaung" Asang Yesu dam: joe" li" nae" khyo ngonhaung" yao: we' daga" zang" ham: na nae" ra" khyo we' sin: yang: ngo ta" nug: ru wa- 2 ai: Asang: ba na bin: joe" va"- ga: ta" ko" ra" dao" yang ngonhaung" nhag' lam: gyai laui laui za: athaui: anhaung" maboe" genae" we' nhag' lam: mamyan: makhyad' maboe" genae" qhid' mae" ngo naonhaung" re mho' ke' ra". Ce: dao: wa ngonhaung" lapa pa: au: ta" ra" dao: ngad:- mangad: lao"- tarha" kho" ra" dao:- mangad: lao" ngonhaung" vhin tung" mae botung" ke' ra" dao: ngad: ga: myid: jho: re myid: jho vako" laug? 3 Naonhaung" re pe" khyo" re: khag' yang re: damhug' pyag' nhao ge,- pe"mung:ga"re Mao"So re lo" thao" gye kad' tau: lhan" ru maboe" shire we' myiqid tham: khyo gyo" nae" yaug ngad: ra" ai: Makhyang" Ra" Yaug mathug' li" li" wa ai: ba na joe" li" nae" mangad:. 4 Yao: wa so ga: mhang" ra" gu: alhab' re mangad: lao"- caung:pa" ra" ja: alhab' re gye kad' mung: aijham: tho' mae yao: yao" gaung re je: qi: yaug ga: kham: yu: li" nae". Yao: wa Mao"So: Caung:pa" Yham khug mae lhao" re: yevao: zaung: jo, mung: Mao"So ngad:- ga: ta" li" nae". 5 Ngo naonhaung" we' daga" na shi" au: cegu: alhab' re ngo naonhaung" re ta" va" rure naonhaung" mamyid: beim: ge i? 6 Ana" ceru: boe" nae" ngadqere: maboe" nhao shilo: tam" to" ru daja: ja: jo; ra". Ai: ja: pe" ngad: rure naonhaung" ba: ako". Airumung: ai: Makhyang" Ra" Yaug wa ayo, dau lao" thug' li" li" nae". 7 Ai: mug: pho: makhyang: mashab: ru wa boe" na: jo, gau ngad: ava". Ngadqere: tam" to" ra" yaug re mayu: pye' pye' wa ai: boe" li" nae" ra" khyo wa boe" li" nae" mangad:. 8 Ailao" ai: Makhyang: Mashab: Ra" Yaug wa myao: thug' li" li" nae". Ngadqere: Asang Yesu joe" li" lao" yao: wa aiyaug re yao" nhad' mae" so' yang se' pye' mung: yao" bao qhui: ra" bag bao: yang phyo' qheim" pye' li" nae". 9 Ai: Makhyang: Mashab: Ra" Yaug wa Satan" nho: qam: o: we' joe" li" mung: mug' pho: ve, lho apyag' aja: ja: re kad' qhu" ru we' mug' pho: mau" zo" jham re zaui" qhu" li" nae". 10 Amung: ai: shid: jeim" lo" nae" ra" mo, re makhyang: mashab: ra" mhug' pyag' ru ja: khao: ngo" ci yang: mhug' pyag' li" nae". Yao: bam wa khyad' yu: ru qhug' nae" qhid' mae" ai: dangman" rure jhid'de; kao bau taung" malham: pang" yu ko" ruyang shid: jeim" lo" li" genae". 11 Yao: bam ai: mhug' pyag' ra" dao: re lam" geshao: ga:- Mao"So wa yao: bam: khug mae mau" zaui: nae" qhid' mae" shad' nghung" ra" qam: so' re nhao: ke' ra". 12 Dangman" rure malam" lo:- qobo khug mae na: ngaui: ra" mo, alhab' wa dao: phyid' ru qhug' li" genae". 13 Mao:nhaung: qe we"- Asang re jhid'de; mo, ngad ko" ra" naonhaung" mathao mae ngonhaung" yo, khyin: khao: ngo" Mao"So re jeju caung:khin" na: bam ca" ra". Pe"mung:ga"re Byo: nho: qam: so' khyo" yang naonhaung" re yao" gyang" lho" ra" byu qe boe" nhao nae" we' dangman" rure naonhaung" lam khug: ra" myid khyo" yang naonhaung" khyad' yu: ru qhug' genae" qhid' mae" Mao"So wa aqhid mae" ngonhaung" re khyin: san: yu: ra". 14 Mao"So wa ngonhaung" kho" kyo" ra" lau dao: gai khyo" yang re: Mao"So wa cekhyo mae naonhaung" re khai: yu: to" ra". Yao: wa ngonhaung" Asang Yesu Khristu nho: phungbao gae bam re naonhaung" qo" sang: yu geshao: ga: naonhaung" re khai: yu: ra". 15 Airumung: mao:nhaung: qe we"- ngonhaung" kho" kyo: yang: re:- ngonhaung" vhin tung" khyo" yang re: naonhaung" re ngonhaung" mho" shid' lo: ra" ai: dangman" ra" khyo jham re jhaug' za: zaui" zag: ci yang: tang za: ye; jo, ge,. 16 Ngonhaung" Asang Yesu Khristu yao: we' ngonhaung" re jhid'de; mung:- yao" nhag' myan" ra" jeju mae magyid mayeim: ra" mazag mavae: myid we' gang" tang: ra" myid: lao" khyo re ngonhaung" re byid' ngonhaung" pho" Mao"So wa- 17 naonhaung" khonhae" re: gai: ra" dao: jhau nae" we' gai: ra" mau" re zaui: so: nae" qhid' mae" naonhaung" re mazag mavae: myid we' qam: so' ke' byid: vageshao: wo".

2 Thesaloni 3

1 Ngonhaung" mao:nhaung: qe we"- Asang: mungdao: wa ngonhaung" phaung mae we' dakhyo: xo' yang: phyad phyad byo: lo" mung:- phungbao bao nae" qhid' mae" ngonhaung" re akyu" bao" mho' byid: gela, ein: lo" thao" khyo" pyang: ke' ra". 2 Mao"So wa ngonhaung" re magai mashab: ra" mo, we' makhyang" ra" mo; lo, mae" khyad' yu nae" qhid' mae" re: akyu" bao" mho' byid: gela,- pe"mung:ga"re byu yaug khao: ngo" wa ai: mungdao: re malam ko" ngad: ra". 3 Ngadqere: Asang wa lam ga"- kyid yaug ngad mung: yao: wa naonhaung" re qam: bo nhao: ru we' ai: Makhyang" Ra" Yaug mae" gug: gam byid' li" nae". 4 Asang wa ngonhaung" re naonhaung" dao mae myid: lam: to: nhao: ra". Amung ngonhaung" ta" rure zaui: so" na mung: xo' yang: re: zaui: so" li" genae" rure ngonhaung" khyag' za: myid: lam va". 5 Asang wa Mao"So: jhid'de; myid re je yang: no, sho' ba: gyo" yu nae" we' Khristu byid' to" ra" zang: qhao" myid re qo" yu sho' naonhaung" re khyo qhid' au: she byid: vashao: wo". 6 Mao:nhaung: qe we"- Anoe" ashoe kaoso' daui: na ko" ra" mo, mao:nhaung: qe alhab' mo, we' ngonhaung" mho" shid' ra" dao: re matae" gyo" ra" mo, alhab' we' majho" zam" khug genae" qhid' mae" ngonhaung" wa Asang Yesu Khristu nho: mang mae naonhaung" re amyin" byid' ke' ra". 7 Ngonhaung" mau" zaui" lo: ru we' dakhyo: naonhaung" re: mau" zaui: ang ko" rure naonhaung" yao: nyang" za: ba: ako". Ngonhaung" wa naonhaung" we' daga" na: au: anoe" ashoe kaoso' daui: lo mo, mangad:. 8 Ngonhaung" wa aphug' mabyid: lo: khag' dayaug: nho: bao" thaug' zai re: makhae: yu: lo- Airu: khae: yu nae" atha" ngonhaung" wa qam: ke' yang: mau" zaui" bam va". Naonhaung" mae" khag' dayaug re: ngonhaung" qhid' mae" qo mala: nae" khyo" ngonhaung" wa myi" re: na" re: qam: ke' yang: mau" zaui" lo: bam va". 9 Ngonhaung" ceru: kad' lo: ru wa ngonhaung" re bao" thaug' byid: nae" rure mho' yu nae" ngonhaung" mae akho: akhang" maqo" yang: mangad:- ngonhaung" ceru: kad' ru wa naonhaung" cao" nae" qhid' mae" ve, so: doe, shao: ein: airu: kad' lo: ru ngad: ra". 10 Ngonhaung" wa naonhaung" we' daga" na: au: mau" manug: khao" ra" yaug wa vae: mazo: vashao: ein: naonhaung" re lhaung" ta" va". 11 Ngonhaung" ceru: ta" ru wa naonhaung" phaung mae anoe" ashoe kaoso' daui: ra" mo, we' su gaje: mau" zo" mae za: bocao: be; baung: mung: pe" makad' mo, na ko" rure ngonhaung" the' gyo" ruyang ngad: ra". 12 Airu" ra" mo, wa sae za: na mung: mau" khao" zo: genae" qhid' mae" Asang Yesu Khristu mang mae ngha yang: ngonhaung" ta" peim: ta" kyang" ke' ra". 13 Ngadqere: mao:nhaung: qe we"- gai shab: ra" mau" zo" zaui: so" rumae damyaung: dadug ge,- 14 Naonhaung" ce: vhin tung" mae botung" ke' ra" mungdao: re matae" gyo" ra" byu dayaug yaug na: re na nae". Airu: na yang: ngad: re wa yao: qho' ne phyi qhug' vashao:. Yao: re xam" to: mung: dazam" khug ge,- 15 ngadqere: gyevo we' dakhyo: wa yao: re dakad' ge,- Gyevo ru: kad' nae" atha"- mao:nhaung: dayaug re we' dakhyo: yao: re ta" peim: ta" kyang: ge,. 16 Ngonhaung" nho: ngaui pyo: yaug yo: ru ajhaung ngad: ra" Asang yao: yao: yo, khyin: khao: ngo"- khyo khe' khao: ngo" mae ngaui pyo: yaug yo: ru naonhaung" re byid: vashao: wo". Asang wa naonhaung" alhab' mo, we' daga" ngad vashao: wo". 17 Ce: vhin tung" re nga" lo; yang yao: tung" ru ngad:. Tung" yaug Polu. Vhin tung" khao: ngo" mae nga" mang ceru: tung" ra"- ceru: ngo lhaung" tung" va". 18 Ngonhaung" Asang Yesu Khristu nho: nhag' myan" ra" jeju wa naonhaung" alhab' mo; we' daga" ngad: jo, vashao: wo".