2 Petru
2 Petru 1
1 Yesu Khristu nho: daui daui yaug we' lagyo: ngad: ra" ngo Simon Petru wa- ngonhaung" Mao"So we' ngonhaung" khyad' yu: Asang Yesu Khristu nho: din: man" ra" khyo" ngonhaung" we' dakhyo: phug' de; ra" lam khug: myid qo" yu: to: ko" ra" mo, re mugsug' tung" vhin: ke' ra". 2 Pho" Mao"So we' ngonhaung" Asang Yesu re ba jhao: ra" naonhaung" laba lajhao khyo" yang nhag' myan" ra" jeju we' ngaui pyo: yaug yo: ru wa byang" sho' naonhaung" qo" kham zo: vageshao: wo". 3 Yao: yao" phungbao re we' gai shab: rure qo" bokham zo: nae" qhid' mae" ngonhaung" re khai: yu: ra" yaug: nho: laba lajhao khyo" yang Mao"So: phung qam: so' wa dangman" ra" caung:pa" thung" lam khug: khyo mae kaoso' daui nae" qhid' mae" ngonhaung" re qo ca" ra" ja: cao jab byid' to" ra". 4 Ceru:- yao: wa dao:so: byid' to" ra" gyai qi" qhang mung: phug' de; ra" jeju jhaung qhu" dao:so: ngonhaung" re byid' to" ra". Ai: jeju jhaung qhu" khyo" yang ce: mug: myid dao mae" byo; qeim: lo" ba: ra" gaung sho: shab' ra" khyo mae" naonhaung" phao: loe, mung: Mao"So: ve, khyao re naonhaung" qo" bokham: yu: ako". 5 Ce: khyo mathao mae naonhaung" wa gai: boe" thao" mae" qam: ke' yang: naonhaung" lam khug: myid mae gai shab: ra" lo, mau"- gai shab: ra" lo, mau" mae laba lajhao- 6 naonhaung" laba lajhao mae yao: yao" gaung re qo" khang" ru- naonhaung" yao" gaung re qo" khang" rumae zang: qhao" ru- naonhaung" zang: qhao" rumae Mao"So: khyo re phug' cao" ru. 7 Naonhaung" nho: Mao"So: khyo re phug' cao" rumae mao:nhaung: jhid' kao myid- naonhaung" mao:nhaung: jhid' kao myid mae jhid'de; myid laung" ke' byid: ge,- 8 aijham wa naonhaung" qo" ca" ra" ja: jham ngad mung:- aijham re naonhaung" magan: mago" qo" yu: to: ko" ngad: re wa ai: gao: jham wa naonhaung" Asang Yesu Khristu re ba jhao: ra" naonhaung" laba lajhao mae naonhaung" re lo, mau" zaui" thug' li" nhao mung:- zao" sho' akyu" byid' li" nae". 9 Aijham maqo" ra" yaug wa va: sho' mamyao: ra" myo, qeim myo,jid yaug ngad mung: lai: lo" ra" ayo, mae yao" qobo jham kyang" san: pye' byid: qhug' ra" khyo re to" myhid' pye' ra". 10 Airumung: nga" mao:nhaung: qe we"- naonhaung" re Mao"So khai: yu: ru we' khyin: yu: rure gang" tang nhao nae" qhid' mae" je yang: qam: ke' ge,- naonhaung" airu: kad' re wa naonhaung" wa khonhae" re: naonhaung" yao" lam khug: myid re shapye' genae" mangad:. 11 cekhyo" yang naonhaung" wa ngonhaung" Asang we' khyad' yu: ra" Asang Yesu Khristu nho: apyad ato: mung"dan: khug khyo qo" vao ye nae" qhid' mae" akho: akhang" jab byang" sho' qo" khae: yu: li" genae". 12 Airumung: naonhaung" wa ai:gu: re ba gau ngad: ru we' naonhaung" qo" khae: yu: to: vako" ra"- ai: dangman" rumae tang za: apan zaug: jo, vagesho' ngadqere: ngo wa ai: khyo jham we' sin: yang: khonhae" re: naonhaung" re ta" peim: ta" kyang: nug: ra". 13 Ngo kaoso' daui: na shi" gyo: mae ai: khyo jham re naonhaung" myid: beim" na gesho' naonhaung" re lhau: zhung" ke' byid: nae" ru wa ngo kad' ang: ru ngad: ein: myid: jho: ra". 14 Pe"mung:ga"re ngonhaung" Asang Yesu Khristu yang ngore de: de: za: ta" to: gau ngad: ru we' dakhyo:- ngo wa khomyhao" makyo re ce: shid ba: ra" gaung khyao re qhid' pye' co' nae" ngad: rure ngo ba: ra". 15 Airumung: ngo shid thao re naonhaung" wa khonhae" re: ai: khyo jham re myid: beim" na genae" qhid' mae" gai: boe" ra" qhi" ngo bao" thaug' byid: nae". 16 Phung qam so' we' ngonhaung" Asang Yesu Khristu joe" li" ra" khyo naonhaung" re ba nhao: rumae ngonhaung" wa ta" yu: ra" mhomyi: re ngha yang: ta" ru mangad:- yao" qi" qhang: ra" phung qam: so' re ngonhaung" yao" myo; yang yao: the' myao: ra" mo, ngad: ra". 17 Yao: wa Pho" Mao"So: yang phug' te' nga: yhe' byid' ru qhug' mung:- Myhao: Thao" ra" Phungbao khug mae"- ceyaug wa ngo o ngaui mung: jhid'de; ra" nga" zo: ngad: ga: jhau thoe yao: jhao" joe" li" au:- ngonhaung" wa aitau mae na: lo mo, ngad: ra". 18 Ngonhaung" wa yao: we' daga" ai: Gyang" Lho" ra" bam dao mae na: jo; au:- mug:gaung mae" joe" li" ra" ce: thoe re ngonhaung" yao" nokhye' yang yao: the' gyo" lo: va". 19 Airumung: ngonhaung" wa Lapa qeyang ta" hau" lo" ra" mungdao: re je yang: myid: lam: ra"- ai: mungdao: re phug' cao" ge,- pe"mung:ga"re ai wa mug: bo" li" sho' mug: cad' yo mae bao byid' ra" myibaung: we' dau mung: naonhaung" aung khug nhag' lam: mae bao byid' ra" bo" myhung we' dau: ra". 20 Ngadqere: alhab' tho' mae Jham: Mugsug' mae bo: ra" lapa dao: re khag' ngadqere: yao: yao" myid khyo" lajheim: maqo" phaug' ta" rure naonhaung" beim: ge,- 21 pe"mung:ga"re pe" lapa mungdao: re: byu myid: o: ra" khyo" yang khonhae" re: mathug' li" qu" ngad: ra". Ngadqere: Gyang" Lho" Byo: yang jaung" ra" byu qe wa Mao"So mae" mungdao: re yao: bam ta" ako".
2 Petru 2
1 Ganhae" byu qe: phaung gaung: mae lapa apyag' qe po" thug' lai: lo ko" ru we' dakhyo: naonhaung" phaung gaung: mae re: mho" pho" apyag' qe po" thug' li" li" genae". Yao: bam wa byo; qeim: lo" nhao: ra" madangman" ra" mho" shid' khyo jham vin: li" mung: yao: bam re khyad' yu: ra" Asang re ngag: ha: pye' li" genae". Airumung: yao: bam wa yao: bam yao" dao mae nyag din taung" byo; qeim: lo" nhao: li" genae". 2 Airu: ngad sho' ngadqere: byu myo: sho' mo, wa ai bam: gaung sho" ra" gintho' mau" zo" khyo mae bocao" lo" li" genae". Yao: bam kad' ra" lo, mau" mathao mae su gaje qe wa ai: dangman" ra" Khyo re ta" phoe: pye' li" genae". 3 Ai: mho" pho" apyag' qe wa yao: bam: so' kho' o: byid: rure cao" mung: naonhaung" re mhomyi: mhug' ta" mung: gau pai: qho: yu: li" genae". Ganhae" ayo, mae" yao: bam re dao: kho' nae" Tarha" Zug: Pho" wa jin" jin" ngad: jo; ava". Yao: bam re Phyo' Pye' Nae" Yaug wa gyang: gyang: za: so" na: ra". 4 Mao"So wa qobo shad' lhoe" ra" mug: lagyo: jham re lhao" re: matang" to: lo: yao: bam re myiqid tham: khyo pye' zaui: pye' ra". Yao: bam wa ai: mug: cad' yo mae jao co" yang taui" to: qhug' Mung dao: Kho' ra" Ba Na re lao" na: bam nhao: ra". 5 Mao"So wa ganhae" gaco' mae" mug: myid rere: matang" to: ngad: ra". Mao"So malam: ra" mug:myid byu qere daqid shi: byid' ra"- din: man" ra" khyo re kho" kyo" ra" Noa re we' gatau nhad' yaug reza: Mao"So khyad' yu: ra". 6 Mao"So wa Sodom we' Gomora shid' vo re dao: phyid' mung: yao: bam re myi" yang ngha" pye' ra". Cekhyo" yang Mao"So re malam: ra" mo, qobo dae khoru: qhug' kham zo: genae" ngad: rure ve, so: khyo" kad' qhu" ra". 7 Tarha" maci: ra" mo; nho: gaung sho: gintho' lo, mau" mathao: yang myid: qug: nhag' lam: thao" na: ra" byugai Lod re wa Mao"So khyad' yu: ra". 8 Ai: byugai pho" wa yao: bam: phaung mae na mung: ba khao: ba ngo" yao: bam: magai: lo, mau" re the' myao- the' gyo: yang: yao: wa nhag' lam: myid qug: myid ci" dayin dayo: kham zo" na: ra". 9 Airumung: Mao"So: khyo re phug' cao" ra" mo, re yao: bam thaung" qhug' na: ra" jham" qu" rumae" khoru: khyad' yu nae" khyo re Asang ba: ru we' yao: bam: gaung sho: shab' ra" maca' majhad' lo, mau" re cao" mung: Mao"So: kheim: so' re maphug' makhyad' kad' ko" ra" mo, rere: Dao: Kho' Ba Na qhid' mae"- 10 qobo byid: yang: khoru: zam" to: nae" rure yao: ba: ra". Ai: mho" pho" apyag' qe wa vae" ru we' nhag' lam: qi: ngad beim: mung: phungbao qi" ra" mug: tho' mae" mo, re maphug' myao: lo:- ai: atha" maphug' makhyad' kad' ako". 11 Ai: mho" pho" apyag' qe tho' qam: so' phung qab je: bo: ra" mug: lagyo: qe lhao" re: yao: bam re Asang: qhid' kheim: mae maphug' makhyad' dao: mata"- qobo mazhaug' ko" ngad: ra". 12 Ai: byu qe wa taung" yu qhug' mung: se' pye' nae" qhid' mae" xao" li" ra" seyo: gug'nyhug' jham we' dakhyo:- azhao: mae" ba gau myid: yang jhan" ako". Yao: bam maba: gyo" ra" ja: alhab' re gye kad' yang: jung" pye' ako". Yao: bam wa gug'nyhug' jham we' dakhyo:- jeim" lo" li" genae". 13 Yao: bam su re dayin dayo: no nhao: ru we' dakhyo:- yao: bam re: airu: dayin dayo: no kham zo" li" genae". Na" gaung na" yao mae yao: bam: gaung sho: shab' ra" o nug: rure nhag' dag nhao nae" lo, mau" kad' ru wa yao: bam: pyo: khyo ngad: ako". Yao: bam wa naonhaung" we' li" bozo: shaug' na yang: aqho' aqhid maphug' makhyad' kad' ako". Yao: bam wa apyag' asham" khyo mae pyo: thoe gyo: mo, ngad: ako". 14 Yao: bam wa gaung sho: gintho' mau" kad' nug: ra" myiqe: qere za: qu" ako". Yao: bam: qobo: nho: shad' nghung" ra" myid khonhae" re: masham ko" ngad: ra". Yao: bam wa qam: nang" ra" byu qere lha" mae myi" nhao: ako". Yao: bam: nhag' lam: wa so' kho' obyid: ru qhid' mae" mho" zhao: yu: ci: ako". Yao: bam wa Mao"So: nhang: kheim: zao" mo, ngad: ako". 15 Yao: bam wa khyodin: re to" pye' co' geyang: khyonghung: nghung" lo" byaug: avako". Yao: bam wa madin: maman: kad' yang: qo" ra" aphug' ngaui re jhid'de; yaug ngad: ra" Beo nho: yao: zo: Balam: nho: khyo re cao" avako". 16 Balam: wa yao" qobo mathao mae qeim: ru qhug' ra". Yao" lo ze wa byu: myan" jhau: thug' li" mung: ai: lapa: nho: adu: adae: mau" zo" re tam" pye' ra". 17 Ai: byu jham wa kin" kyaug' lo" byaug: ra" qid thug'- la qam" yang hug' tao" pye' ra" jham thaui: we' dau: ako". Mao"So wa yao: bam: qhid' mae" no; thao" ra" mug: cad' khug mae jo, qo jaung: to: byid' ra". 18 Yao: bam wa ngad beim" ru we' ako" asho: dao: ta" ako". Shad' nghung" ra" khyo" kaoso' daui: ra" mo; phaung mae" ana" za: phao: loe; thug' lo mo, re gaung sho" ra" gintho' mau" zo" re cao" qhu" yang: khyonghung: nghung: nhao: ako". 19 Yao: bam yao: lhao" re: byo; qeim: jeim" lo" ba: ra" ave, lo, mau" nho: jeim doe; na geyang: yao: bam re loe; beim nhao nae" dao:so: byid' ako". Pe"mung:ga"re byu wa yao: yao: re aung: nghoe' to" ra" ja: alhab' nho: jeim doe; na yang: ngad: ra". 20 Byu qe wa ngonhaung" Asang we' khyad' yu: ra" Asang Yesu Khristu re yao: bam ba jhao: ra" khyo" yang mug:myid dao: nho: maca' majhad' ra" qam: so' mae" phao: loe, gethao re ai: maca' majhad' yang dalhang dam: myhi" ru qhug' mung: aijham: yang dam: nghoe' pye' yang: ngad: re wa airu" ra" mo; thao mae" ayaug: wa sao qhid' mae" ayaug: tho' je: xo: lo" ra". 21 Din: man" ra" khyo re ba: yu thao re yao: bam qo" khae" yu: to" ra" gyang" lho" ra" amyin" dao: re to" pye' co' ru tho'- ai: din: man" rure khonhae" re: manhae" ba: ru wa yao: bam: qhid' mae" je: gai: ra". 22 Lakha: wa yao: daug: phoe" pye' va" rure dam: zo: ba ra". Amung: bin: cid' san: pye' va" vo, wa tham: bab: bam mae dam: lhau: ba: ra" ga" ra" dao: zham" dangman" rure yao: bam mae boe" ra" mau" zo" yang qhu" byid' ra".
2 Petru 3
1 Nga" jhid'de; ra" ba nam qe we"- ana" ce: vhin tung" wa ngo naonhaung" re shid' lhang ein: lhang tung" vhin: ke' ra" mugsug' ngad: ra". Vhin tung" shid' lam" geim" mae cejham: khyo we' sin: yang naonhaung" re ta" peim: byid' ra" khyo" yang naonhaung" myid mae san sin" ra" khyo" ba: myid genae" qhid' mae" ngo qam: ke' yang: ta" ru ngad: ra". 2 Gyang" Lho" ra" lapa qeyang ganhae" ta" to: co' ko" ra" mungdao: jham re we' naonhaung" lagyo: qeyang byid' to: co' ra" Asang we' khyad' yu: ra" Asang: amyin" dao: re naonhaung" re ngo myid: beim: nhao nug: ra". 3 Ai: lo" thao" ra" ba na mae yao: bam yao" gaung sho: shab' ra" khyo: yang khang" mung: kaoso' daui: ra" byu qe na: thug' li" genae" ngad: rure naonhaung" sao qhid' ba: to: ca" ako". Yao: bam wa naonhaung" re jung" gaui mung:- 4 yao: wa dam: li" nae" ga: dao:so: byid' to: co' ra" mangad: i? Yao: khai: mae ngad: i? Ngonhaung" phug' pho" qe wa shid: byaug avako". Ngadqere: ja: khao: ngo" wa ana" joe" sho' mug:myid re phan" to" ra" au: we' dakhyo: za: ngad: ra"- ga: naonhaung" re myid' li" genae. 5 Ganhae" Mao"So wa amyin" byid: mung: mug:gaung we' myid gaung re phan" to" ru we' myid gaung re qid: yang kyae yang: qid khug mae" thug' li" nhao mung:- 6 ganhae" mae" ai: mug: myid xug' rere: qid: yang yao: daqid shi: yang nhai" pye' ra" khyo re yao: bam wa thaug yao: maba geim kad' ako". 7 Ngadqere: ana" jo; jo; ra" mug:gaung we' myid gaung re myi" yang ngha" pye' nae" qhid' mae" azhao: mae" Mao"So: amyin" dao" yang tang" to: byid' ra". Mao"So: khyo macao" ra" mo, dao kho' qhug' ru we' phyo' pye' qhug' ra" ba na joe" sho' aijham re zam" to" ra". 8 Ngadqere: nga" jhid'de; ra" mao:nhaung: qe we"- Asang: nho: qhid' kheim: mae daba wa zin na dataung we' dakhyo: zin na dataung wa daba za: ngad: rure dato" myhid' ge,. 9 Damyo" myid: jho ko" ru we' dakhyo:- Mao"So wa yao: dao:so: byid' to" rure kad' nae" mayam" ngad: ra"- ai: atha" yao: wa naonhaung" re nhag' lam: qhang qhang to: byid' ra". Pe"mung:ga"re yao: wa naonhaung" dayaug rere: jeim" lo" byaug genae" rure yao: mangaui ngad: ra". Byu alhab' mo, re yao: bam: qobo jham mae" phaug' lo genae" rure kam" wa yao: o: ra". 10 Asang: Ba Na wa khug' hab' we' dakhyo: joe" li" nae". Ai: Ba Na mae mug:gaung wa- lao thao wa shau ga: myang yang: byaug: lo" li" nae". Mug:gaung mae" ba kyi lho" mo" jham wa nga" jeim" lo" byaug; li" genae"- mug:myid dao mae" ja: khao: ngo" wa baui" byaug; lo" li" genae". 11 Ai: ja: cao jab alhab' wa cekhyo" byo; qeim: lo" li" genae" ngad mung: naonhaung" wa khoru" ra" mo, ngad ca" ko" i? Naonhaung" wa Mao"So: Ba Na re lao" na mung: ai: ba na phyad joe" li" nae" qhid' mae" gai: boe" ra" qhi" qam: ke' na ko" au:- 12 naonhaung" kaoso' daui khyo wa gyang" lho" ru we' Mao"So re qhaug' byid' to: qo: ako". Ai: Ba Na mae mug:gaung wa nga" jeim" lo" byaug: li" nae"- mug:gaung mae" ba kyi lho" mo" jham wa laung so' yang kao: yhug' pye' ru qhug' li" genae". 13 Ngadqere: ngonhaung" wa Mao"So: dao:so: byid' to" ra" din: man" mo, na nae" yham jo; ra" mug:gaung sag' we' myid gaung sag' re lao" na: bam: ra". 14 Airumung: nga" ba nam qe we"- ai: Ba Na re naonhaung" lao" na ko" au:- Mao"So: qhid' kheim: mae gyang" san: ru we' qo mabo lo: yao: we' mang: dae yaug yo nae" qhid' mae" gai: boe" ra" qhi" qam: ke' ge,- 15 Ngonhaung" jhid'de; ra" mao:nhaung: pho" Polu wa Mao"So byid' ra" nyan: pha,jhi" re ci yang: naonhaung" re mugsug' tung" ke' ru we' dakhyo: ngonhaung" Asang: nhag' lam: qhang: ru wa naonhaung" khyad' yu: ru qhug' genae" qhid' mae" akho: akhang" agu byid' na: ru ngad: ra" khyo re ba: yu ge,- 16 Polu wa cekhyo we' sin: yang: yao: tung" vhin: ke' ra" vhin tung" alhab' mae ce: khyo" tung" to" ra". Polu vhin tung" jham mae ba: gyo: qug' ra" khyo jham daqhae: bo mung: adu: adae: mo, we' lam khug: myid maqo" ra" mo, wa aijham re gatau: Jham: dau jham we' dakhyo: lajheim: shad' ra" khyo" ta" pye' ako". Airumung: yao: bam wa yao: bam yao" gaung re phyo' qheim" yu: ako". 17 Ngadqere: nga" ba nam qe we"- ce: khyo re naonhaung" ba gau ngad: ako". Airumung: naonhaung" wa tarha" macao" ra" byu qe shad' ra" khyo" yang naonhaung" re majhui" nghung" lo" genae" qhid' mae" we' gang" tang: jo; rumae" magyang: lo" genae" qhid' mae" naonhaung" lha" ge,. 18 Ngadqere: ngonhaung" Asang we' khyad' yu: Asang Yesu Khristu nho: nhag' myan" ra" jeju we' laba lajhao mae xo' yang: qi" qhang: li" ge,- Asang wa ana" mae" apyad ato phungbao qi" qhang: jo, vashao: wo"- Amen.