2 Corinthians
2 Korinthu1 Mao"So myid o: ru khyo" yang Khristu nho: lagyo: dayaug ngad: ra" ngo Polu we' ngonhaung" mao:nhaung: pho" Timothi wa- Korinthu vogaung: mae na ko" ra" Mao"So: phung: byu qere we' Akhaia mung" geim" mae" Mao"So: byu qe alhab' re Mugsug' tung" ke' ra". 2 Ngonhaung" pho" Mao"So we' Asang Yesu Khristu wa nhag' myan" ra" jeju we' yaug yo: ru naonhaung" re shaman" byid: vageshao: wo"- 3 Bao" thaug' khyo alhab' re byid' ra" Pho"- nhag' khyag' shogu: ra" Pho"- ngonhaung" Asang Yesu Khristu yao: Pho" ngad: ra" Pho" Mao"So: jeju re caung:khin" gelang:- 4 Ngonhaung" yao: qo" khae: yu va" ra" Mao"So mae" joe" li" ra" bao" thaug' byid' rure ci yang: qug: khai: aja: ja: qhug' ko" ra" mo, re qo" bao" thaug' byid: nae" qhid' mae" Mao"So wa ngonhaung" qug: khai: qhug' ra" khyo alhab' mae bao" thaug' byid' ava". 5 Ngonhaung" wa Khristu kham zo" ra" qug: khai: dayin dayo: myo: sho' re bokham zo" ru we' dakhyo:- Khristu khyo" yang Mao"So nhag' tang" byid' rure re: bokham: yu: bam va". 6 Ngonhaung" wa ai: qug: khai: dayin dayo: re kham zo" ru ngad: re ai:ru wa naonhaung" bao" thaug' byid' ru we' khyad' yu: ra" khyo qhug' yu nae" qhid' mae" ngad: ra". Bao" thaug' byid' rure ngonhaung" qo" kham: yu: ngad: re wa- naonhaung" re: bao" thaug' byid' ru qhug' mung:- aijham ngonhaung" kham zo" ra" qug: khai: dayin dayo: nhag' lam: qhang: ru we' re: qo" zang: kham: ra" qam: so' qo" yu genae". 7 Naonhaung" wa ngonhaung" kham zo" ra" qug: khai: dayin dayo: re bokham zo: vako" ru we' dakhyo:- ngonhaung" qo" kham: yu: ra" nhag' tang" byid' rure re: naonhaung" boqo" kham: yu vako" rure ngonhaung" ba: ra". Airumung: naonhaung" mae ngonhaung" nho: myid: lao" ru wa khonhae" re: gyag maqui: ngad: ra". 8 Mao:nhaung: qe we"- Asia mung" mae ngonhaung" khoru" ra" qug: khai: kham zo" lo: ra" khyo ngonhaung" naonhaung" re ta" peim: kyo: nug: ra". Ngonhaung" dao mae kai" jo; ra" qo wa aiqhi" saung" la: yang: kao so' xo' daui: na nae" lhao" re: matho' the' myid ngad: ra". 9 Ngonhaung" wa shid nae" dao: phyid' qhug' mo, ngad: ra" khyo" yao: yao" gaung re myid: jho: to: va". Ngadqere: ceru: boe" ru wa- ngonhaung" nho: qam: re malam mangha lo:- shid: ra" mo, re daui: to" li" nhao: ra" Mao"So re ngonhaung" lam ngha nae" qhid' mae" boe" ru ngad: ra". 10 Yao: wa airu" ra" gyaug ci" ca" ra" shid gyan nogyan mae" ngonhaung" re khyad' yu: ava". Thao rere: Ngonhaung" re dam: khyad' yu: li" nae". Ngonhaung" wa naonhaung" qhid' mae" akyu" bao" mho' byid' ra" khyo" yang ngonhaung" re joe" lo nae" ayo, mae dam: khyad' yu nae" qhid' mae" yao: mae ngonhaung" myid: lao" na: ra". 11 Amung: ngonhaung" qhid' mae" myo: sho' akyu" bao" mho' byid' ra" thoe re tau: byid: mung: Mao"So wa ngonhaung" re shaman" byid: yang: ngonhaung" qo" kham: yu: ra" shaman" jeju mathao mae byu myo: sho' mo, wa Mao"So: jeju re caung:khin" byid' li" genae". 12 Byu: Pha,jhi" khyo" mangad: lo:- Mao"So: nhag' myan" ra" jeju qam: so' khyo" yang- ngonhaung" ce: mug: myid dao mae kao so' daui: na: au:- je yang: ngonhaung" wa naonhaung" we' zam" khug: na: rumae Mao"So: yang byid' ra" nhag' lam: phyu jao din:man" ru de: de: za: jhau: ra" ave, re cao" yang: ngonhaung" we' zam" khug: na: bam: ra" khyo re ngonhaung" aung khug mae de: de: za: phug nae" khyo jo; ra". 13 Naonhaung" qo" ba: nghe' mung:- ba: gyo" ra" khyo re za: ngonhaung" tung" ke' ra". 14 Ngadqere: ana"- naonhaung" wa ngonhaung" ta" ru dakhyae: dapho za: ba: gyo" ako". Ngadqere: ngonhaung" ta" ra" khyo jab sho' naonhaung" ba: gyo" li" genae" qhid' mae" ngo myid: lao" ra". Aimung: ngonhaung" Asang Yesu Ba Na mae ngonhaung" wa naonhaung" mathao mae qo" phug mo, ngad nae" ru we' dakhyo:- naonhaung" re: ngonhaung" mathao mae qo" phug mo, ngad: li" genae". 15 Ceru re ngo gyai nhag' lam: nyo, beim: mung:- naonhaung" shid' lhang kai" yang: shaman" jeju qo" kham zo: genae" qhid' mae" sao qhid' ngo naonhaung" re li" qhug' nae" qhid mae" byin seim" pye' va". 16 Pe"mung:ga"re- Makedoni mung" khyo ye" lo" zo" mae" naonhaung" re vao: qhug' co' yang:- dam: phao: lo phyao: lodam: vao mung: Yuda mung" khyo lo" ra" nga" gyaung: khyo qhid' mae" naonhaung" mae" bao" thaug' ru mho' nae"- ein: ngo myid: to"- 17 Ceru: seim" to" ra" khyo wa nga" myid atug' akhyug kad' qhu" ru ngad: i? Ngo seim" to" ra" au:- ngoyao" qhid' mae" za: myid yang:- ayo, dalam: mae za: nga" dao: wa ngad:- ga: ta" mung: mangad:- ga: shid' gao ta" ru ngad: i? 18 Gaigai: Mao"So wa dangman" ra" dao: re jhau yaug ngad: ru we' dakhyo:- ngo naonhaung" re byid' ra" dao:so: re: ngad:- mangad: ga" ra" dao: shid' gao mangad:- 19 Pe"mung:ga"re naonhaung" phaung mae ngo yao: we' Sila- Timothi kho" kyo" ra" Mao"So: yao: zo: Yesu Khristu wa- ngad: ru we' mangad' ru ga: dalhang: dae ta" yaug mangad:- yao: wa Mao"So: ngad:- ga" ra" yaug ngad: ra". 20 Pe"mung:ga"re Yao: wa- Mao"So: dao:so: alhab' nho: ngad:- ga" ra" atha" ngad: ra". Airu: mung: Mao"So: phungbao bao: thug' li" nae" qhid' mae" Yesu Khristu re khug ngha yang:- Amen ein: ta" na: ru ngad: ra". 21 Ngonhaung" we' naonhaung" re daga" Khristu we' dadang: dalam: za: kao so' daui nhao: ra" yaug wa- Mao"So yao: yao: ngad: ra". 22 Ngonhaung" re gakai: lai khyin: san: yu mung:- yao" byu qekhyo" dazid thaung" te' to" ra" yaug we' ngonhaung" qhid' mae" yao: zam" to: byid' ra" shaman" jeju alhab' qhid' mae" ama, kham: khyo"- ngonhaung" nhag' lam: khug mae Gyang" Lho" Byo ke' to: byid: yaug re: Mao"So yao: ngad: ra". 23 Ngo Korinthu vogaung: khyo mali" nae" myid: phyid' ru wa- naonhaung" qhid' mae" ku yang: ngad: rure Mao"So nga" sagse: ngad: ra". Yao: wa nga" nhag' lam: re ba byid' ra". 24 Ngonhaung" wa naonhaung" pe" re lam khug ca"- ein: ra" khyo re amyin" byid: nae" qam: ke' na: ru mangad:- naonhaung" wa lam khug: rumae tang tang za: ye; jo, mo, ngad ko" rure ngonhaung" ba: ra". Amung: ngonhaung" wa naonhaung" yao" ngaui bau: khyo qhid' mae" naonhaung" we' daga" mau" zaui" na: ru angad:. 1 Airumung:- naonhaung" nhag' kaug' khyo mathug' nae" qhid' mae" naonhaung" jhao" madam: li" nae" ngo myid: phyid' to: va". 2 Pe"mung:ga"re ngo naonhaung" re nhag' kaug' nhao: ngad: re wa- ngoyang nhag' kaug' nhao: ra" yaug mae" je yang:- ngore khag' yang bau: nhao lo nae" i? 3 Ngo re ngaui bau: nhao nae" ang ko" ra" mo, khyo" yang ngore nhag' makaug' nhao genae" qhid' mae" ai: mugsug' re ngo naonhaung" jhao" tung" vhin: ke' ru ngad: ra". Pe"mung:ga"re ngo bau: lao" wa- naonhaung" alhab' mo, re: bau: genae" rure ngo khyag' ba: ra". 4 Ngo wa gyai qi: sho' myid: qug: myid: ci" ru we' ngug byid myo: sho' gyo" yang:- naonhaung" jhao" mugsug' tung" ke' ru ngad:- ngo myid: qang: ru wa naonhaung" re nhag' kaug' nhao nae" qhid' mae" mangad:- naonhaung" alhab' mo, re ngo khoqhi" sho' jhid'de;- ga" rure naonhaung" re myid: beim: nhao nae" qhid' mae" ngad: ra". 5 Ana" byu dayaug yaug ngore kaug' nhao: ru wa- ngore za: mangad:- naonhaung" alhab' mo, re nang" thao" daja: ja: khyo" yang kaug' nhao: ru ngad: ra". (Ngo ceru: ta" ru wa yao: re qobo la: sho' vhin nug yang: mangad:) 6 Naonhaung" myo: lo bug: yang yao: re airu: qobo dae byid: vako" ru wa- yao" qhid' mae" ga" va" ra". 7 Ana" kam" wa aiyaug gyai nhag' lam: gyoe, sho' makaug' byaug nae" qhid' mae" naonhaung" wa yao: re qobo khyad' pye' byid: mung:- yao: re qam: byid:- nhag' tang" byid: ge,- 8 Airumung: naonhaung" yao: re gaigai: yao: jhid'de; rure yao: re ba nhao genae" qhid' mae"ngo naonhaung" re mho' ke' ra". 9 Ngo naonhaung" re ai: mugsug' tung" vhin: ke' ru wa- naonhaung" wa ai: jham" qu" rure khoqhi" sho' qo" kham ko" rure re:- nga" mho dao: re phug' cao" nae" khonhae" re: jin" jin" ngad- mangad: ko" rure ngo ba nug yang: tung" ke' ru ngad: ra". 10 Naonhaung" dayaug yaug re yao: shad' ra" qobo khyad' byid: yang: ngad: re ngore: yao: re qobo khyad' byid' ra". Pe"mung:ga"re dayaug yaug re ngo dang za: daja: ja: qobo khyad' byid: qo yang: ngad: re naonhaung" qhid' mae" Khristu nho: qhid' kheim: mae ngo khyad' pye' byid' ra". 11 Airu: kad' ru wa Satan wa ngonhaung" re maaung: pye' nae" qhid' mae" ngad: ra". Pe"mung:ga"re ngonhaung" wa satan" nho: myid: yaung: to" ra" khyo jham re ba: ra". 12 Khristu nho: khyo Lau Dao: Gai re kho" kyo: nae" qhid' mae" Troa vogaung: khyo ngo joe" ye" lo" re- Asang wa ai: mae mau" zo" zaui: so: nae" qhid' mae" khyo kham: phung" to: byid' rure ngo myao: ra". 13 Ngadqere: ngo wa- ngonhaung" mao:nhaung: pho" Titu re mayemyao yang:-gyai myid myo: myid: ci" pye' ra". Airumung: ngo wa- ai: vogaung: mae" mo, re au" to: co' yang: Makedoni mung" khyo xo' ye" lo" va". 14 Ngadqere: Mao"So: jeju re caung:khin" ge, Pe"mung:ga"re Mao"So wa ngonhaung" re Khristu we' dadang: dalam: za: doe, nhao yang:- kyam: byu qekhyo"- Khristu nho: aung doe; poe mae- poe gaung: mae jhui" yan" lhau: ra" kyam: byu qere ru: khonhae" re: ngonhaung" re bojhui" yan" lhau: ra". Mao"So wa Khristu we' sin" ra" laba lajhao re nae pyo" ra" sheim we' dakhyo:- khyi" khao: ngo" mae nae: hau" lo" nhao nae" qhid' mae" ngonhaung" re ci yhung" ra". 15 Pe"mung:ga"re ngonhaung" wa- khyad' yu: ru qhug' ra" mo; phaung mae re:- byaug: lo" ra" mo; phaung mae re:- nae: hau" lo" ra" Khristu yang qhaug' byid' ra" nae pyo" ra" sheim we' dau: ra". 16 Byaug; lo" na: ra" mo; qhid' mae" ai: sheim wa- shid nhao: ra" bab sheim ngad mung:- khyad' yu: ru qhug' ra" mo; qhid' mae"- ai: sheim wa kao so' daui nhao: ra" nae pyo" ra" sheim ngad: ra".Airulao" ceru" ra" lo, mau" re khag' qo" kad' i? 17 Ngonhaung" wa gaje qe myo: sho' we' dakhyo:- Mao"So: mungdao: re gau xoe" ra" xan: re we' dakhyo:- phaga: ga: aung: zo: mo, mangad:- ngonhaung" wa Mao"So: yang nhao: ke' mo, ngad yang:- Khristu nho: daui daui mo, khyo" Mao"So: qhid' kheim: mae Mungdao: re dang dangman: man: za: kho" kyo" ra" mo, ngad:. 1 Ceru: ta" ru wa- ngonhaung" wa ngonhaung" yao" khyo re phug: ru ngad: ra" i? Gaje qe we' dakhyo:- ngonhaung" wa naonhaung" jhao" pakham: mugsug' cili" qo: i? Mangad: lao"- naonhaung" mae" pakham: mugsug' ngonhaung" mho' yu qo: i? 2 Naonhaung" wa byu alhab' mo, ba: nghe' mung: ba: gyo" yu nae" qhid' mae" ngonhaung" aung khug nhag' lam: mae tung" to" ra" ngonhaung" qo" ra" pakham: mugsug' yao: ngad: ako". 3 Mugsug' ceru re Khristu yao: tung" mung:- ngonhaung" lo, khyo" vhin: ke' ru ngad: ra" khyo de: de: za: ngad: ra". Ai: tung" ce' wa mhaug' yang tung" ru mangad:- Kao so' daui: ra" Mao"So: Byo: yang tung" to" ru ngad: ra". Ai: tung" ce' wa laug pye: dao mae tung" to" ra" tung" ce' mangad:- Xao su byu: aung khug nhag' lam: mae tung" to" ra" tung" ce' ngad: ra". 4 Ngonhaung" ceru: ta" ru wa- ngonhaung" wa Khristu khyo" yang Mao"So: khug mae lam: na mo, ngad yang:- ta" ru ngad: ra". 5 Ngonhaung" wa ce: mau" zo" re qo" zaui: so: mo, ngad: ein:- ta" nae" khyo ngonhaung" mae pe" qam: o: mabo ngad: ra". Ngonhaung" qo" ra" qam: o: wa Mao"So byid' ru ngad: ra". 6 Yao: wa ngonhaung" re ai: dao: thang" asag' nho: daui daui mo, boe" nae" qhid' mae" qam: o: byid' to" ra". Ai: dao: thang" asag' wa- tung" to" ra" tarha" mangad:- Byo: nho: tarha" ngad: ra". Ai: tung" to" ra" tarha" wa shid nhao: ra". Byo kam" wa kao so' byid' ra". 7 Laug pye: dao mae kyaung: yang: tung" te' to" ra" tarha" re byid' ra" au:- Mao"So: phungbao bao: thug' li" ra"- ai: bao qhui: ru wa- Moshe nho: myo,nho mae" sham: lo" na sho' ngadqere:- Myo: sho' bao qhui: na shi" ruyang Israel byumyu" qe wa yao: re maqo" zhaug' qu" ngad: ako". Shid nhao: ra" tarha" re byid' ra" au: re lhao"- airu" ra" phungbao we' qam: so' we' ngad: re wa- 8 Byo: nho: lo, mau" we' sin" ra" phungbao wa- khoqhi" sho' je yang: bao nae" i? 9 Byu re dao: phyid' ra" tarha" wa phungbao we' byang" jo; ngad: re wa- khyad' yu: ra" khyo re byid' ra" lo, mau" wa- khoqhi" sho' je yang: phungbao byang" jo, nae" i? 10 Ana" je: bao: thao" ra" phungbao mathao mae lai: lo" ra" yo, mae" gyai bao: ra" phungbao wa byaug: lo" byaug: ava" ein: gai: ta" ra". 11 Pe"mung:ga"re dazab za: kham: ra" ja: mae phungbao bao: ngad: re wa- apyad ato dang: jo; ra" ja: mae wa khoqhi" sho' je yang: phungbao bao nae" i? 12 Ceru" ra" myid: lao" nae" rure ngonhaung" qo" yang:- ngonhaung" wa mazag mavae kad' ru ngad: ra". 13 Ngonhaung" wa Moshe we' madau- Moshe wa yao: myo,nho sham: lo" byaug: rure Israel byu qe mathe' myao genae" qhid' mae" yao" myo,khung: re pha, jad; yang nghoe' ci: ra". 14 Gaigai: yao: yao: bam: nhag' lam: go: to: qhug' ako". Ana" ba joe" sho' ai: dao: thang" axug' re nghe' gelao"- yao: bam: nhag' lam: wa ai: pha, jad: yang nghoe' to: byid' qhug' ako". Khristu we' xo' taui: lao" za:- ai: pha, jad re khyad' pye' byid' ru qhug' ra". 15 Ana" ba joe" sho' lhao" re: Moshe tarha" re yao: bam nghe' khao: ngo"- ai: pha, jad wa yao: bam: nhag' lam: re nghoe' to: byid' ashi"- 16 Jham: Mugsug' mae Moshe we' sin: yang: Asang shad' khyo phaug' lo lao" wa yao" pha, jad wa qhid' pye' byid' ra"- ga: tung" to" ru we' dakhyo: ai: pha, jad re qhid' pye' byid: gai: ra" ja: ngad; ra". 17 Ana" cedau mae Asang ga" ru wa- Byo re ta" ru ngad: ra". Asang: Byo na: ra" jo, qo mae loe, beim khyo jo; ra". 18 Airumung: ngonhaung" alhab' mo, wa- myo,khung: nghoe' re qhid' pye' mung:- Asang: nho: phungbao re tug' bao byid' ra" Byo ngad: ra". Asang mae" byid' ra" phungbao yao: ngonhaung" re je yang: qi" ra" phungbao khyo tha" lo" byaug nhao: ra". 1 Mao"So wa yao" nhag' khyag' shogu: ru we' ce: mau" zo" re zaui: so: nae" akhang" ngonhaung" re ab byid' to: mung: ngonhaung" qam: mashan. 2 Ngonhaung" wa anyham: avho' kad' ra" aqho' aqhid lo, mau" re to"pye' mung:- apyag' asham" lo, mau" rere: ngonhaung" makad' lo:- Mao"So: mungdao: rere: madang maman" ra" khyo" makho" kyo:- ngonhaung" wa Mao"So: qhid' kheim: mae dangman" ra" bo" bao khug mae kao so' daui mung:- byu yaug khao: ngo" yang lam" ra" mo, boe" nae" qhid mae" qam: ke' mung: kao so' daui: ra" 3 Pe"mung:ga"re ngonhaung" kho" kyo" ra" Ngaui Bau" Lau Dao: wa nghoe' nyham" to" ru ngad: re wa- jeim" lo" ra" mo; qhid' mae" za: nghoe' nyham" to" ra". 4 Ce: mug: myid: nho: so ngad: ra" makhyang" ra" Satan" yang yao: bam: nhag' lam: re mug: cad' mae zang" nghoe' to: byid: yang:- yao: bam malam" ko" ru ngad: ra". Satan wa- Mao"So: khyao we' te' za: dau: ra" Khristu phungbao khyo Ngaui Bau" Lau Dao: mae" bao: thug' li" mung:- yao: bam: dao mae zho: bao: jo; ra" bo" bao re yao: bam mamyao genae" qhid' mae" go: nghoe' to: byid' ra". 5 Pe"mung:ga"re ngonhaung" wa- ngonhaung" yao" khyo re kho" kyo" ru mangad:- Yesu Khristu wa Asang ngad: ra" khyo- ngonhaung" wa Yesu mathao mae naonhaung" re daui daui byid: mo, ngad: ra" khyo re ngonhaung" kho" kyo: byid' ra". 6 Mug: cad' khug mae" bo" bao zho: thug' li" nae"- ga: ta" ra" Mao"So wa Khristu nho: myo, khung: mae zho: bao: jo; ra" Mao"So: phungbao: laba lajhao re ba nae" ngonhaung" nhag' lam: khug mae bao nhao: ra" yaug yao: ngad: ra". 7 Ngadqere:- myhao: thao" ra" qam: so' wa- ngonhaung" mae" mangad:- Mao"So mae" ngad: rure qhu" byid: nae" qhid' mae" ce: Byo we' sin" ra" jo,nho" qo" ra" mo, ngonhaung" wa- zhogam: ug' jham we' dau: ra". 8 Ngonhaung" wa dazab zab qug: khai" ru qhug' ngadqere: nhag' lam: magyug:- dalhang lhang aug' o: ngadqere:- khonhae" re: nhag' lam: mathao". 9 Gyevo myo: sho' na ngadqere:- ngonhaung" wa khonhae" re: ba nam mamyaung- gyai no sho' qhug' ngadqere:- byo; qeim sho' maqhug'. 10 Yesu wa ngonhaung" gaung dau: mae kao so' daui: na: ru myao: thug' li" nae" qhid' mae" Yesu shid kham" ra" khyo re ngonhaung" nho: shid ba: ra" gaung khyao mae khonhae" re: vin: ci: ra". 11 Yesu wa ngonhaung" nho: ce: shid ba: ra" gaung mae kao so' daui: na: ra" khyo myao: thug' li" nae" qhid' mae" Yesu mathao mae ngonhaung" wa pyad geim" khonhae" re: shid gyan nogyan qhug' ba: ra" mau" mae kao so' dan: pye' yang: kao so' daui: na:. 12 Ngo ta" nug: ru ceru wa- ngonhaung" mae shid: ru wa mau" zaui" na mung:- naonhaung" mae kam" wa- kao so' daui: ru mau" zaui" na: ra". 13 Jham: Mugsug' mae- ngo wa lam" yang: ta" ru ngad:- ga: ta" ru we' dakhyo:- ngonhaung" re: ai: lam khug: myid nho: Byo mae yao" yang ta" ru ngad: ra". 14 Asang Yesu re daui: to" li" nhao: ra" Mao"So wa- ngonhaung" rere: Yesu we' daga" daui: to" li" nhao mung: naonhaung" we' daga" yao" qhid' kheim: khyo jhui" vao lo" nae" rure ngonhaung" ba: ra". 15 Cegu: alhab' wa naonhaung" akyu" qhid' mae" boe" ru ngad: ra". Mao"So: nhag' myan" ra" jeju qo" kham zo" ra" mo, je: myo" laug; li" ru we' dakhyo:- yao: bam wa Mao"So: phungbao re caung:khin" byid' ra" akyu" mho' thoe jham je yang: myo: sho' qhaug' byid' li" genae". 16 Cekhyo mathao mae- ngonhaung" wa khonhae" re: qam: mashan- Ngonhaung" gaung dau: wa- zo" mae" mae" byo; qeim: lo" na ngadqere:- ngonhaung" Byo wa daba we' daba qam: sag' bo: lo: na: ra". 17 Ce:- ta" mathae: ru we' dazab daso' za: ngonhaung" kham zo" ra" qug: khai: wa- ai: qug: khai: tho' qi" qhang: ra" apyad ato: phungbao re je: laug sho' kham zo: nhao: li" nae". 18 Pe"mung:ga"re ngonhaung" wa myo; yang the' myao: ra" ja: jham re nhag' nghae" na: ru mangad:- myo; yang mathe' myao: ra" ja: jham re nhag' nghae" na: ra". Myo; yang the' myao: ra" ja: jham wa dazab daso' qhid' mae" za: ngad: ra". Ngadqere: myo; yang mathe' myao: ra" ja: jham wa apyad ato qhid' mae" ngad: ra". 1 Pe"mung:ga"re- ce: myid gaung mae ngonhaung" na: jo; ra" yham zaung ngad: ra" ngonhaung" gaung khyao byo; qeim: lo" lao"- mug:gaung dao mae Mao"So yao: ngonhaung" na nae" qhid' mae" kad' to: byid' ra" apyad ato: yham ngonhaung" re byid' li" nae" rure ngonhaung" ba: ra". 2 Ana"- ngonhaung" nokyang: kyang" na mung:- mug:gaung dao mae" ngonhaung" gaung khyao yham re qo" zhaung" ve; yu nae" qhid' mae" ngonhaung" gyai kao bau: na: ra". 3 Airu: qo" zhaung" ve; yu lao"- ngonhaung" wa gaung pyad' ngad: nae" mangad:- 4 Ngonhaung" wa ce: myid gaung mae" yham zaung mae na: jo; au:- dayin dayo: nokyang: kyang" na: ra". Airu: ngonhaung" nokyang: kyang" na: ru wa- ce: ngonhaung" myid gaung dao mae" gaung khyao re khyad' pye' nug yang: mangad:- shid ba: ru wa kao so' daui: ra" khyo akhyao khyo tha" lo" ru qhug' nae" qhid' mae" mug:gaung dao mae" gaung khyao re ngonhaung" qo" kham: yu nug yang: ngad: ra". 5 Mao"So wa ceru: tha" lo" nae" qhid' mae" ngonhaung" re nyhang" jaung: to: byid: yaug ngad: ra". Ngonhaung" qhid' mae" yao: qaung" to" ra" ja: alhab' qhid' mae" pakham: byid' ra" khyo" yao: wa ngonhaung" re yao" Byo byid' ava". 6 Airumung: ngonhaung" wa vae" ra" myid khonhae" re: bo: jo; ra"- ce: gaung khyao yham mae ngonhaung" ana: jo, jo, wa Asang na: jo; ra" jo, qo we' va" kyo: na: jo; rure ngonhaung" ba: ra". 7 Pe"mung:ga"re ngonhaung" nho: kao so' daui: na: ru wa- myo; yang myao: ra" ja: re ngha: ru mangad:- lam khug: ra" myid mae ngha: ru ngad: ra". 8 Ngonhaung" wa vae" ra" myid to, ngad: jo, mung: ce: gaung khyao yham re to: co'mung: Asang we' daga" na nae" je yang: o ngaui: ra". 9 Ngonhaung" wa cetau mae na ngadqere:- thoetau mae na ngadqere:- Asang re ngaui nhao nae" qhid' mae" gaja: re tho' ngonhaung" je: o: ra". 10 Pe"mung:ga"re ngonhaung" alhab' mo, wa- yao" yang dao: kho' ru qhug' nae" qhid' mae" Khristu qhid' kheim: mae yeye; jo, qo: ra". Lo, mau" gai: ru magai: rure cao" yang:- yao" voman: yao: man: qi" ra" khyo"- yaug khao: ngo" qo" kham: yu: bam zai ngad:- 11 Ngonhaung" wa Asang re gyaug: ru wa pe" ngad: ga" rure ba mung:- su gaje qere re: ta" ngaug: aung: yu nae" ngonhaung" qam: ke' ra". Mao"So wa ngonhaung" khyo re jab sho' ba: ra". Naonhaung" re: nga" khyo re naonhaung" yao" aung khug mae ba genae"- ein:- ngo myid: lam: ra". 12 Ngo ceru: ta" ru wa- ngonhaung" yao: gai: ra" khyo re naonhaung" re dam: ta" phug: kyo" na: ru mangad:- ngonhaung" dao mae naonhaung" qo" phug nae" akhyo gai ngonhaung" naonhaung" re byid' ru ngad: ra". Airulao"- byu: nho: ave, akyang re maqu" lo:- adao shad' myo,nho re za: qu" yang: phug ko" ra" mo, re dao: qo" tau: byid: genae" ngad: ra". 13 Gaigai: ngonhaung" go va" i? Ngonhaung" go: re wa Mao"So: qhid' mae" go: ru ngad: ra". Ngonhaung" gyang" ru ngad: re wa- naonhaung qhid' mae" ngad: ra". 14 Khristu nho: jhid'de; myid wa ngonhaung" re eib: na: ra"- Byu dayaug yaug wa gaje yaug khao: ngo" qhid' mae" shid kham: byid' re ngonhaung" alhab' boshid va" ga" ra" lajheim: re khyag' za: ngonhaung" ba: ra". 15 Pe"mung: alhab' mo; qhid' mae" Yesu shid kham: byid' ru wa- kao so' daui: ra" mo, wa yao: yao" akyu" qhid' mae" kao so' madaui lo:- yao: bam: qhid' mae" shid kham: mung: dam: daui: to" li" ra" Asang: akyu" qhid' mae" za: kao so' daui genae" qhid' mae" ngad: ra". 16 Airumung:- ngonhaung" wa khag' rere:- xao su byu: azhao" re cao" yang: qu" lo nae" mangad:- ganhae"- Khristu re xao su byu: azhao" re cao" yang: qu" bam va". Ngadqere: airu: dam: qu" lo nae" mangad:- 17 Byu dayaug yaug Khristu we' dagaung dasho: za: doe; byaug lao"- yao: wa byu sag' boe" li" ra". Axug' wa lai: lo" byaug mung:- asag' boe" lo: ra". 18 Ceru alhab' wa- Mao"So: yang kad' ru ngad: ra". Mao"So wa ngonhaung" re gyevo qe ngad: rumae" yao" ba nam qe boe" sho' Khristu khyo" yang ngonhaung" re tha" lo" nhao mung:- gaje qere re: yao" ba nam qe boe" sho' kad' nae" mau" ngonhaung" re byid' ra". 19 Ngonhaung" kho" kyo" ra" mungdao: wa- Mao"So wa Yesu Khristu khyo" yang byumyu" cao jab re yao" ba nam qe boe" nhao: ra"- ga" ru ngad: ra". Mao"So wa yao: bam: qobo re maxam" to: byid: ngad: ra". Yao: bam re khoru: yao" ba nam qe boe" lo nhao: ra" ga" ra" mungdao: re ngonhaung" re byid' to" ava". 20 Airumung:- ngonhaung wa Khristu: nho: lagyo: qe boe" yang: jhau: na: ru ngad: ra". Mao"So yao: yao:- ngonhaung" nhad' dao: thoe khyo" naonhaung" re mho' na: ra". Naonhaung" wa gyevo qe ngad: rumae" Mao"So: ba nam qe boe" lo geri:- ein: Khristu gaung tha" ngonhaung" mho' ra". 21 Khristu wa qobo maqo" yaug ngad: ra". Ngadqere: ngonhaung" wa Khristu we' dadang: dalam: za: doe, mung: Mao"So: din:man" rumae qo" boleim nae" qhid' mae" Mao"So wa- ngonhaung" mathao mae Khristu re ngonhaung" qobo mae boleim nhao: ra". 1 Airumung:- ngonhaung" wa Mao"So: mau" vin vo; na zo" re" Mao"So: nhag' myan" ra" jeju re qo" khae: yu va" mo, naonhaung" re- aire aje amyid dakad' pye' ge,- ein: naonhaung" re gyai mho' ke' ra". 2 Pe"mung:ga"re Ngo nao re nhag' khyag' myid qhu" byid: nae" ayo, joe" au:- ni" mho' yao thoe re tae" gyo: byid: va"- ngo wa nao re khyad' yu nae" ayo, joe" au: rere:- nao re bao" thaug' byid: va" ga: Mao"So ta" ra". Tae" gyo: ge, Mao"So: nhag' khyag' ra" jeju re khae: yu nae" ayo, wa- ana" yao: ngad: ra". Ana" ba wa- khyad' yu: ru gai: qhug' ra" ba na ngad: ra". ga: Mao"So ta" rure gyo: ge, 3 Ngonhaung" mau" zo" re khag' re: qobo qho genae" rure ngonhaung" ma-o mung:- khag' nho: qhid' au: mae re: kaung: kag' ru ngonhaung" mato: byid:. 4 Airu: kad' nae" atha"- sho: jhin: ru- aqug: akhai: qhug' ru- qug: khai: qhug' ru jham re nhag' lam: qhang qhang za: zang: qhao" ra" khyo" yang ja: khao: ngo" mae ngonhaung" wa Mao"So: daui daui mo, ngad: rure qhu" byid' na: ra". 5 Ngonhaung" wa- be; ru- thaung: lhaung" ru- qhug' mung:- mo, thaui: mo, yaug kad' ru qhug' lo va". Ngonhaung" wa matu" maka" mau" zaui: ca" ru we'- mayab macam:- mazo: mashaug' na: lo: ra". 6 Gyang" san: ru- laba lajhao ba: ru- nhag' lam: qhang: ru- nhag' khyag' ru khyo" yang re: Gyang" Lho" Byo khyo" yang re:- ngonhaung" nho: dangman" ra" jhid'de; myid khyo" yang re:- ngonhaung" kho" kyo" ra" dangman" ra" mungdao: khyo" yang re:- 7 Mao"So: qam: so' khyo" yang re:- ngonhaung" wa Mao"So: daui daui mo, ngad: rure qhu" byid' lo va". Ngonhaung" wa gyekhe' rumae re:- ngonhaung" yao" gaung re gug: gam: rumae re:- din:man" ru wa ngonhaung" nho: shae lhae ngad: ra". 8 Ngonhaung" wa phug' te' nga: yhe' rure:- maphug' makhyad' kad' rure re: qhug' ra". Gaui mho: rure re: caung:khin" rure re: qhug' ra"- ngonhaung" re mhug' hab' qekhyo" jho gengadqere:- ngonhaung" wa dangman" ra" dao: re jhau: ra". 9 Khag' yang maba mabeim: mo, ru" ru ngadqere: alhab' yang ba: ra" mo, ngad: ra". Shid: lo" na mo, ru: ngadqere:- naonhaung" myao: ru we' dakhyo:- kao so' daui: na mo, ngad: ra". Qobo dae byid' rure kham zo: sho' ngadqere:- se' pye' ru maqhug'- 10 Kaug' ru qhug' sho'ngadqere- khonhae" re: ngaui bau" na: ra". Ngonhaung" wa myaung sho: nhohab ngadqere:- byu myo: sho' re qo" nhao mo, ngad: ra". Pe" maqo" nhohab ngadqere:- ja: khao: ngo" re sang mo, ngad: ra". 11 Korinthu vogaung: mae" jhid'de; ra" ba nam qe we"- ngonhaung" wa de: de: za: naonhaung" re ta" kyo: va". Naonhaung" qhid' mae" ngonhaung" aung khug nhag' lam: lae lae za: phung" to: byid: va". 12 Ngonhaung" aung khug nhag' lam:re naonhaung" qhid' mae" pyid' pye' ru mangad:- naonhaung" lam: kam" wa- ngonhaung" qhid' mae" pyid' pye' avako". 13 Ana"- ngo wa naonhaung" re nga" zo: dau qere we' dakhyo:- ta" geli". Naonhaung" qhid' mae" ngonhaung" qhu" byid' ra" jhid'de; myid aire yao: naonhaung" re qhu" byid: gela,- naonhaung" aung khug nhag' lam: re lae lae phung" to: ge,. 14 Malam khug: ra" mo, we' qham yang: yao: bam we' dakhyo: za: ngad: ra" khyo" mau" dazam" zaui: ge,- pe"mung:ga"re airu: mau" magai: zaui: ngad: ra". Jo: ru we' shad' ru wa khoru: byin zam" gai: boe" nae" i? Mug: bo" we' mug: cad' khoru: qo" gai: zam" na nae" i? 15 Khristu we' Satan khoru: myid gai: jho" vang" nae" i? Lam khug: ra" yaug wa malam khug: ra" yaug we' dakhyo: za: dau: ra" khyo pe" jo; ra" i? 16 Mao"So: yham wa so sulho jham we' khoru: qo" jho" nge, nae" i? Pe"mung:ga"re ngonhaung" wa kao so' daui: na: ra" Mao"So: yham ngad: ra". Mao"So wa- Ngo wa- nga" byu qe: phaung mae nga" yham kad' mung:- Yao: bam we' daga" na: jo, nae"- Ngo wa yao: bam: Mao"So boe" mung:- Yao: bam wa nga" byumyu" qe ngad: li" genae"- ga: ta" ru we' dakhyo: ngad: ra". 17 Airumung: Mao"So wa- naonhaung" yao: bam: phaung mae" thug' lo" ca"- Yao: bam we' naonhaung" gao" pye' ge:- Masan masin" ra" ja: pe" re: dakad' ge,- Ailao" ngo naonhaung" re khae: yu nae". 18 Ngo wa naonhaung" yao: Pho" ngad nae"- Amung: naonhaung" wa nga" yauggai zo: myiqe: zo: qe ngad: li" genae"- ga: Qam: bo: thao" ra" Mao"So ta" ra"- ga: ta" ra". 1 Ngo jhid'de; ra" ba nam qe we"- ce: dao:so: jham alhab' wa- ngonhaung" qhid' mae" ngad: ra". Airumung: ngonhaung" yao" gaung dau: re we' Byo re masan masin" boe" nhao: ra" maca' majhad' ja: khao: ngo" re kyang" san: pye' mung:- Mao"So re gyaug phug' ra" khyo"- gyang" lho" thao" ra" khyo mae su" na gelang:- 2 Naonhaung" aung khug nhag' lam: mae ngonhaung" re khae: yu gela,- ngonhaung" wa khag' rere: mashad' qu"- khag' rere: byo; qeim sho' ngonhaung" makad' qu"- khag' mae" re: matarha" ra" khyo" ngonhaung" gau pai: macab' zo" qu". 3 Naonhaung" re dao: phyid' nae" qhid' mae" ngo ce ta" ru mangad:- pe"mung:ga"re- qhid' phyao: ngo ta" va" ru we' dakhyo:- ngonhaung" wa khonhae" re:- naonhaung" we' shid ngadqere: daga"- daui ngadqere: daga" ngad sho'naonhaung" re gyai jhid'de; yang: ngad:. 4 Ngo wa naonhaung" re gyai lam: ra". Amung: naonhaung" mathao mae ngo gyai phug: na:- ngo wa qug: khai: aja: ja: qhug' sho' ngadqere: qam: byang" jo, mung:- matho' ta" losho' ngaui bau" na: ra". 5 Ngonhaung" wa Makedoni mung" khyo joe" ye: thao re lhao" re:- ngonhaung" dugno: yo, maqo" ngad: ra". Khyi" khao: ngo" mae qug: khai: sho: jhin: ru- su gaje qe we' myan" myo: jho" byo; ru- aung khug nhag' lam: mae gyaug ci" ru jham we' thaung" qhug' ra". 6 Ngadqere: nhag' lam: thao" mo, re qam: byid' na: ra" Mao"So wa- Titu re ngonhaung" jhao" joe" li" nhao: ra" khyo" ngonhaung" re qam: qo" nhao: ra". 7 Yao: joe" li" ruyang za: ngonhaung" re qam: qo" nhao: ru mangad:- naonhaung" khoru: yao: re qam: byid' ke' ko" ra" lau thoe rere: the' gyo: yang:- ngonhaung" re qam: qo" nhao: ra". Naonhaung" ngore khoru: myao nug ko" ra" khyo- naonhaung" khoru: myid qo" tha" ko" ru- naonhaung" khoqhi" ngore qhaung: yu nug ko" ra" khyo jham re Titu wa ngonhaung" re lota" kyo: mung:- ana" ngo wa je yang: ngaui bau" ra". 8 Ai: nga" mugsug' yang naonhaung" re nhag' kaug' nhao sho' ngadqere:- ngo wa ai: mugsug' re tung" yang: nhag' makaug' ngad: ra". Ai: mugsug' yang naonhaung" re dazab zo: nhag' kaug' nhao: rure ngo myao: au:- ngo nhag' kaug' ngadqere:- 9 Ana" wa- ngo ngaui bau: va"- ai:ru wa naonhaung" re ngo nhag' kaug' nhao: ruyang mangad:- naonhaung" nhag' kaug' ru wa naonhaung" nhag' lam: re tha" pye' nhao: ruyang ngo ngaui bau" ru ngad: ra". Ai: nhag' kaug' rure Mao"So: yang ci: ra"- ngonhaung" wa naonhaung" re pe" re: mano nhao ngad: ra". 10 Pe"mung:ga"re Mao"So: yang ci: ra" nhag' kaug' ru wa khyad' yu: rure qo" yu nhao: ra" myid tha" rure boe" nhao: ra". Airumung: aimae nhag' kaug' ru majo, ngad: ra". Ngadqere: xao su byu: myid khyo" za: nhag' kaug' ru wa- shid nhao: ra". 11 Ce: naonhaung" nhag' kaug' rure Mao"So khoru: ci yhung" rure qu" ge,- ai: ruyang naonhaung" re nhag' lam: to" nhao: ru- naonhaung" qobo maqo" rure qhu" byid: nae" khoqhi" kao bau: na: ra" khyo- nhag' jam: yo" ru- nhag' lam: lha" na: ru- kham zo" ra" myid aja: ja: thaung" qhug' ru lam khug: myid kao bau nhao: ru wa qobo qo" yaug re qobo dae byid: nae" jin" jin" ngad nhao: ra" khyo jham naonhaung" re boe" nhao: ra". Ja: khao: ngo" mae naonhaung" qobo maqo"- ga" ra" khyo re naonhaung" yao" gaung yao: qhu" byid' avako". 12 Ai: mugsug' re ngo airu: tung" ke' sho' ngadqere:- shad' ra" mau" kad' yaug: mathao: yang re: mangad:- shad' ra" mau" re kham zo" ra" yaug: mathao mae re: mangad: ngad: ra"- ai: atha" naonhaung" wa ngonhaung" re khoqhi" jhid'de; kao bau: na ko" rure qhid' kheim: mae naonhaung" yao: de: de: nyang" za: myao nae" qhid' mae" myid yang: tung" ke' ru angad: ra". 13 Ceru: mung: ngonhaung" qam: qo" bam va". Ngonhaung" wa qam: qo" ru za: mangad:- naonhaung" alhab' mo, Titu re khoru: bau: nhao gemung:- ai:ru: mathao mae yao: khoqhi" ngaui bau" ra" khyo- ngonhaung" ba: yu yang: ngonhaung" re: khoqhi" sho' ngaui bau" na: bam: i? 14 Ngo wa Titu re naonhaung" khyo phug: kyo: va". Naonhaung" re: ai: mathao mae ngore qho' maphyo' ko" ngad: ra". Ngonhaung" wa khonhae" re: naonhaung" re dang: ra" dao: za: jhau: lo: ra". Ai we' dakhyo:- ngonhaung" yang Titu re naonhaung" khyo phug: kyo" to" ru we' dakhyo: dang: rure sagse: qhu" byid' avako". 15 Naonhaung" alhab' yao" dao: re tae" gyo: genae" jin" jin" ngad: na ko" rure re:- naonhaung" wa khoqhi" gyaug: nin" ru we' yao: re lham: tug: khae: yu ko" rure re:- yao: myid: beim: yang: naonhaung" re jhid'de; ra" yao" jhid'de; myid je yang: qi" qhang: li" ra". 16 Ngo wa naonhaung" re jab byang" sho' qo" lam va" ruyang gyai ngaui bau" ra". 1 Mao:nhaung: qe we"- Makedoni mung" mae" phung: jham re Mao"So byid' ra" nhag' myan" ra" jeju khyo re ngonhaung" wa naonhaung" re ba nhao nug: ra". 2 Yao: bam wa khyag' qhui: ru jham: yang dae xo sho' jham" qu" ru qhug' lai: lo: ako". Ngadqere: yao: bam wa gyai myaung sho" na ngadqere: gyai ngaui bau: zo" re" Alu: ngaui maqhag' losho' ke' avako". 3 Yao: bam qo" ke' ra" qhi" Alu: ke' avako". Ai: tho' lhao" re: je yang: Alu: ke' vako" ra" khyo re ngo naonhaung" re sagse: qo" kham: ra". 4 Yao: bam Yuda mung" mae" Mao"So: byu qere bao" thaug' byid' ra" mau" zo" mae bobo nae" akhang" qo" yu nae" qhid' mae" yao: bam yao" myid khyo" yang- ngonhaung" re kyid kyid ga: mho' ako". 5 Yao: bam wa ngonhaung" myid: to" ru tho' je yang: Alu: ke' ko" ra". Sao qhid' yao: bam yao" gaung dau: Asang re qhaug' byid' ako". Ai: thao re Mao"So myid o: ra" khyo"- yao: bam yao" gaung dau: re ngonhaung" re bao" thaug' ra" mau" mae re: qhaug' byid' ako". 6 Aimung: ce: mau" zo" re zaui" qhid: lo: ra" Titu wa- ce: jhid'de; aung lam Alu: mau" zo" re xo' yang: naonhaung" aung lam Alu: byid' ra" mau" re bin sho' naonhaung" re bao" thaug' byid: nae" qhid' mae" ngonhaung" yao: re jhan" na: ru ngad:. 7 Naonhaung" wa lam khug: rumae- dao: jhau: rumae- laba lajhao ba: rumae- su re bao" thaug' nae" kao bau: rumae- ngonhaung" re jhid'de; rumae gyai qo" mo, ngad: ako". Airumung:- ce: jhid'de; myid aung lam Alu: ke' ra" mau" zo" mae re:- mabyag maqhag' lo: Alu: ke' ra" mo, boe" nhao nug: ra". 8 Amyin" byid' ra" khyo" ta" ru wa mangad:- ngadqere: ngo wa su gaje qenho: Alu: ke' ru khoqhi" kao bau: ra" khyo re ta" kyo: yang: naonhaung" jhid'de; myid khoqhi" ngad: rure ba nae" qhid' mae" ta" ru ngad: ra". 9 Ngonhaung" wa Asang Yesu Khristu nho: nhag' myan" ra" jeju re ba: ako". Yao" myaung sho" ru khyo" yang naonhaung" re qo" nhao nae" qhid' mae" yao: wa qo" yaug ngadqere:- naonhaung" mathao mae yao: yao" gaung re myaung sho: yaug boe" na ge,- 10 Nga" myid khyo" ta" gelang: ein: re- naonhaung" anhag' mae" zaui" qhid: to: ko" ra" mau" zo" re ana" zaui" pin" ko" re je: gai: ra". Naonhaung" wa ai: mau" zo" re sao qhid' zaui" qhid: ru za: mangad:- nug kao bau: ra" myid bo: ra" sao qhid' mae" phung: jham ngad: ako". 11 Airumung:- ai: mau" zo" re xo' yang: zaui" pin" pye' ge,- naonhaung" ai: mau" zo" re myid: yaung: ra" au: re nhag' lam: to" ko" ru we' dakhyo:- zaui" pin" nae" re: kao bau ge,- naonhaung ana" qo" to" rure cao" yang: zaui: so" ye: ge, 12 Naonhaung"- Alu: ke' nae" myid kao bau ko" re wa- Mao"So wa naonhaung" maqo" ke' ko" rure cao" yang: mangad:- naonhaung" qo" ke' ra" qam: re cao" yang: ke' byid' ra" Alu: jhaung qhu" re khae: yu byid' li" nae". 13 Ngowa naonhaung" dao mae qola: kai: byid: yang:- su gaje qere bao" thaug' ru qo" nhao mae" qhid' mae" kad' na: ru mangad:- naonhaung" wa ana" au: magan: mago" qo" ko" ruyang ai: qo ca" ra" mo, re naonhaung" bao" thaug' byid: ang: ako". Ailao"-naonhaung" qo ca" ra" au: re yao: bam: qo" ru wa naonhaung" re bao" thaug' byid' li" genae"- ceru: kad' mung: shid' shad' geim" nyang nyang za: boe" nhao: ra". 15 Jham: Mugsug' mae- myo: sho' gaug: zhang: yu yaug re: myo: sho' maqo"- dajhid' za: gaug; zhang: yu yaug re: gyai malaug lo: mamung ga:- tung" to" ru we' dakhyo: ngad: ra". 16 Naonhaung" re bao" thaug' byid: nae" ngonhaung" nhag' lam: to" ru we' dakhyo:- Titu rere: nhag' lam: to" nhao: ra" Mao"So: jeju re caung:khin" ra". 17 Titu wa ngonhaung" nhao: ra" dao: re khae: yu: ru za: mangad:- naonhaung" re bao" thaug' byid: nae" gyai kao bau mung:- naonhaung" jhao" ye: nae" qhid' mae" yao: yao" myid: yang myid: phyid' yaug ngad: ra". 18 Ngaui Bau" Lau Dao: re kho" kyo" ra" mathao mae phung: khao: ngo" yang gyai phug' myao: byid' ru qhug' ra" mao:nhaung: pho" dayaug re Titu we' daga" naonhaung" jhao" ngonhaung" nhao: ke' ra". 19 Ai: tho' mago" mao:nhaung: pho" wa- Mao"So: phungbao bao: li" nae" qhid' mae" we' ngonhaung" bao" thaug' byid: nug: ra" myid re ba nhao nae" qhid' mae" ce: jhid'de; aung lam Alu: ngaui khyui: ra" mau" zo" zaui: so" rumae ngonhaung" we' daga" gyaung: su" qin" nae" phung: jham: yang khyin: san: to" ra" yaug ngad: ra". 20 Mabyag maqhag' lo: qhaug' byid: ko" ra" ce: Alu: jhaung qhu" jham re zam: pyo: ra" mau" zo" mae khag' yang re: qobo vhin jung" gaui: pye' ru maqhug' nae" qhid' mae" ngonhaung" gyai lha" yang: zaui: so" na:. 21 Ngonhaung" au: qang khyo wa- Mao"So: qhid' kheim: mae za: mangad:- Byu: qhid' kheim: mae re: jo: ra" lo, mau" re za: kad' nae" ru ngad: ra". 22 Airumung ngonhaung" wa- yao: shid' zo: we' daga" ngonhaung" mao:nhaung: pho" dayaug rere: bonhao: ke' ra". Ngonhaung" wa yao: re myo: sho' lhang jham" qu" mung:- khonhae" re: bao" thaug' mau" zo" mae gyai nhag' lam: to" yaug ngad: rure ngonhaung" ba: ra". Ana" yao: ngonhaung" re myid: lam: ru je: qi" li" va" rumung: bao" thaug' nae" myid je: kao bau: li" ra". 23 Titu nho: khyo we' sin: yang: ta" gelang: ein: re- yao: wa nga" mau" vin cao: we' naonhaung" re bao" thaug' byid' ra" mau" zo" mae ngo we' daga" mau" zaui: cao: ngad: ra". Yao: we' daga" bocao ko" ra" mao:nhaung: gatau shid' yaug wa- phung: jham: nho: gaung tha" lagyo: tao ngad mung:- Khristu nho: phungbao re bao: thug' li" nhao ko" ra" byu shid' zo: re: ngad: ako". 24 Naonhaung" khyo re ngonhaung" phug: ta" na: ra" khyo dang: rure- phung: jham alhab' dang za: ba: lo genae" qhid' mae" yao: bam re naonhaung" jhid'de; myid qhu" byid: ge,. 1 Yuda mung" mae" Mao"So: byu qere bao" thaug' ra" khyo re ngo naonhaung" re mugsug' tung" ke' maqo ngad: ra". 2 Pe"mung:ga"re naonhaung" wa bao" thaug' byid: nae" o nug kao bau mo, ngad ko" rure ngo ba:. Amung: ngo wa naonhaung" khyo re Makedoni byu qere phug: kyo: byid: va". Akhaia mung" mae" mao:nhaung: qe wa anhag' mae" lhao" re: Alu: ke' nae" qhid nae" jin" jin" nyhang" jaung: to" avako"- ein: yao: bam re ngo ta" va". Naonhaung" byid: nug kao bau: ra" myid wa yao: bam myo: phyao: re kao bau myid lhau: zhung" to" ke' byid' ra". 3 Naonhaung" khyo ngonhaung" phug: ta" ra" dao: jham akeim maboe" nae" qhid' mae" ce: mao:nhaung: qere naonhaung" jhao" nhao: ke' ru ngad: ra". Ngo ta" to: va" ru we' dakhyo:- naonhaung" bao" thaug' byid' ra" Alu: ngaui re jin" jin" seim" nyhang" to: genaeva"- 4 Ngadqere: Makedoni byu damyo" ngo we' daga" bocao: li" mung:- naonhaung" jin" jin" makad' to: ko" rure li" myao ko" ngad: re wa- naonhaung" khoqhi" qho' thug' genae" rure za: data" shi:ge,- naonhaung" re ngonhaung" yang khoqhi" myid: lam: pye' yang: khoqhi" sho' qho' thug' nae" i? 5 Airumung: naonhaung" dao:so: byid' to" ra" Alu: ngaui jhaung qhu" re qo" nyhang" jin" to: genae" qhid' mae" ce: mao:nhaung: qere gau: qhid' khae" yang:- naonhaung" jhao" ye: nhao: ke' ca"- ein: ngo myid: ra". Ngo joe" li" ra" au:- ai: Alu: ngaui wa jin" jin" bin: zhang: to: gau ngad: li" nae". Amung: naonhaung" wa ai: Alu: ngaui re jhan: qhug' yang: byid' ra" khyo" mangad:- naonhaung" yao: myid nug kao bau yang: byid: ko" ru ngad: ga" ru wa- de: de: za: ngad: li" nae". 6 Myug: shi: dajhid' za: sin" ra" yaug wa- dajhid' za: qo" jham" yu: li" nae". Myug: shi: myo: sho' sin" ra" yaug wa- ashi: myo: sho' qo" jham" yu: li" nae" ngad: rure myid: beim: ge,- 7 Airumung: yaug khao: ngo" wa- yao: yao" aung khug mae myid: phyid' to" ru we' dakhyo:- Alu: byid: qo: ra". Amyid: avho: myid we' re:- byid: nae" qo bo: ga" ra" myid we' re:- Alu: magai: byid: ngad: ra". Pe"mung:ga"re Mao"So wa ngaui bau" ra" myid we' Alu: byid' ra" yaug re jhid'de; ra". 8 Mao"So wa ngonhaung" qo ca: gu: alhab' mae jan" sho' qo" byid: yaug ngad: ruyang naonhaung" qo ca" ra" ja: khao: ngo" qhid' mae" khyao qo" na: ru za: mangad:- gai: ra" khyo khe' khao: ngo" mae byid: nae" qhid' mae" re: laug sho' qo" li" genae". 9 Jham: Mugsug' mae Yao: wa myaung sho" ra" mo, re mabyag maqhag' lo:- gae byid' ava". Yao" nhag' khyag' shogu: ru wa- apyad ato dang: jo; ra"- ga: ta" to" ra". 10 Myug: shi: sin" ra" yaug re myug: shi: we' zo:ve byid' ra" yaug Mao"So wa- naonhaung" qo ca" ra" myug: shi: alhab' rere:- byid: mung: aire yaug: qi" li" nhao: li" nae". Naonhaung" nho: byid: nug kao bau: ra" mau" zo" mae" ashi: myo: sho' qo" jham" yu nhao: li" nae". 11 Naonhaung" wa ayo, khao: ngo" mae- byid: nug kao bau taung" qo" gae byid: genae" qhid' mae" Mao"So wa naonhaung" re khonhae" re:- qo" nhao: li" nae". Ailao"- ngonhaung" lo, mae" naonhaung" Alu: jhaung qhu" re lham: qo" khae: yu ko" ra" mo, myo: sho' wa- Mao"So re jeju caung:khin" byid' li" genae". 12 Pe"mung:ga"re naonhaung" ce: mau" zo" re zaui: so" na ko" ra" ce: mau" wa- qo ca" na ko" ra" Mao"So: byu qere bao" thaug' byid' ru za: mangad:- Mao"So: jeju re caung:khin" byid' ra" thoe rere: byang" sheim: li" nhao: ra". 13 Naonhaung" bao" thaung' byid' ra" ce: mau" zo" re qu" yang:- byu myo: sho' wa naonhaung" lhang: yu ko" ra" Khristu nho: khyo Ngaui Bau" Lau Dao: re jhaug' zaug za: phug' cao" na ko" ruyang re:- yao: bam re we' gaje yaug khao: ngo" re naonhaung" byid: nug kao bau taung" gae byid: ko" ra" mau" zo" mathao mae Mao"So: jeju re caung:khin" byid' li" genae". 14 Naonhaung" wa gakai: lai mung: Mao"So: nhag' myan" ra" jeju re qo" kham zo: geyang: yao: bam wa naonhaung" re gyai jhid'de; kao taui" ra" myid we' naonhaung" re akyu" mho' byid' li" genae". 15 Aphug' matho' ta" ra" yao" jeju jhaung qhu" mathao mae Mao"So re ngonhaung" caung:khin" byid: gelang:- 1 Naonhaung" we' daga" ngad: au: re nhag' lam: khyo" mung: va" ra" jo, qo mae" ngad lao" wa gyai thin: ra" yaug ngad: ra" ga: ta" ko" yaug Ngo Polu wa naonhaung" re mho' ke' ra". 2 Ngo joe" li" lao" gyai thin: ra" yaug maboe" qo nae" qhid' mae" Khristu nho: nau" nhae" ra" myid we' ngo naonhaung" re mho' ke' ra". Pe"mung:ga"re- mug: myid: nho: ave, lo, mau" khyo" zaui: so" na mo, ngad: ako"- ga: ta" ko" ra" mo, re thin: ra" khyo" ngo qo" kad' yang: ngad: ra". 3 Ngonhaung" mug: myid dao mae kao so' daui: na: bam: ru wa dang: ra". Ngadqere: ngonhaung" wa- mug: myid: gaung sho" ra" ave, re cao" yang: mang: khe' na: ra" mo, mangad:- 4 Ngonhaung" mang: khe' rumae ci: ra" shae lhae wa- mug: myid dao: nho: shae lhae jham mangad:- gyetab jham re qo" phyo' pye' ra" Mao"So: qam: so' bo: ra" shae lhae jham ngad: ra". 5 Ngonhaung" wa madang maman" ra" jho" ta" ngag: ra" khyo jham rere:- Mao"So: laba lajhao re kaung: kag' tam" to" ra" ngad beim: phug: ru alhab' rere:- phyo' pye' va". Myid: yaung: to" ra" gu: ja: khao: ngo" re- taung" lhaung" pye' mung:- Khristu mho dao: re tae" gyo: nhao: ra". 6 Naonhaung" wa ngonhaung" dao: re jab byang" sho' mho dao: gyo: phug' cao" vako" rure ba lao"- ngonhaung" wa mho dao: magyo: tau: lhan" ra" mo, re qobo dae byid: nae" jin" jin" ngad: li" nae". 7 Naonhaung" wa adao: pyae reza:- qu" mo, ngad: ako". Naonhaung" phaung mae yao: yao" gaung re Khristu nho: byu ngad:- ga: myid: lam: to" ra" byu dayaug yaug bo: i? Bo: ngad: re wa- yao: Khristu nho: byu ngad: ru we' dakhyo:- ngonhaung" re: Khristu nho: byu qe ngad: ga" rure yao: myid: beim: vashao:- 8 Pe"mung:ga"re Asang: yang ngonhaung" re byid' to" ra" kheim: so' we' sin: yang:- ngo gyai phug: ta" sho' ngadqere:- ngo wa maqho'- ai: kheim: so' wa naonhaung" re phyo' pye' nae" qhid' mae" mangad:- ai wa naonhaung" re tau: to' byid: nae" qhid' mae" ngad: ra". 9 Nga" vhin tung" mugsug' jham: yang naonhaung" re kyaug' nae" seim" na: ruru:- lajheim: thug' nae" rure ngo ma-o ngad: ra". 10 Byu damyo" wa- Polu nho: vhin tung" jham wa- thin mung: qam: bo: ra" dao: thoe bo: ra" mugsug' jham ngad: ra". Ngadqere: ngonhaung" we' daga" na: au:- yao: wa qam: nang: yaug ngad: ru we' yao" dao: jham wa pe" mangad: ngad: ra"- ga: ta" li" genae". 11 Ngonhaung" wa va: mae na: au: vhin tung" mae tung" zaui: to" ru we' dakhyo:- ai: khyo ngonhaung" yao" gaung yao: joe" li" lao" re: ai: vhin tung" mae bo: ru we' mashai" lo:- lo, mau" zaui: so: nae" ngad: rure airu: ta" ra" mo, ba: gyo" to: geshao:- 12 Ngonhaung" wa yao: bam yao" gaung re gyai ta" phug ta" myhao: ra" byu qe: azhao" mae bobo nae" re: ngonhaung" gaung re yao: bam we' dau tau" nae" re: mavae" ngad: ra". Yao: bam wa yao" bam yao: kad' yu: ra" aka" yang:- yao: bam: yao" gaung re ka" mung:- yao: bam so" to" ra" azhao" yang yao: bam yao" gaung re dao: phyid' mo, ngad: ako". Yao: bam khoqhi" go: ako" i? 13 Ngonhaung" kam" wa akyo lai sho' maphug nae". Mao:So: yang zaui: so: nae" tu" ka" to: byid' ra" akyo qho" gu: mae za: ngonhaung" phug: ra". Naonhaung" phaung mae ngonhaung" zaui" ra" ai: mau" mae bobo: ra". 14 Naonhaung" wa Mao"So: yang tu" ka" to: byid' ra" akyo qho" mae bobo mo, ngad geyang:- Khristu nho: khyo Lau Dao: Gai re naonhaung" jhao" ngonhaung" vin: li" au:- ngonhaung" kyodam: lai: ru mangad: ngad: ra". 15 Airumung: ngonhaung" wa- Mao"So: yang ngonhaung" qhid' mae" tu" ka" to: byid' ra" mau" zo" alhaung" nho: taung gaung mae su gaje qe zaui" to" ra" mau" mae phug mo, mangad:. Ai: atha" ngonhaung" wa- naonhaung" lam khug: myid qi" qhang: li" mung: khonhae" re:- Mao"So: yang ngonhaung" re tu" ka" to: byid' ra" akyo qho" gu: mae naonhaung" phaung mae mau" zo" qi: sho' je yang: qo" zaui: so: nae" rure nhag' anghae" na:. 16 Ai: thao- ngonhaung" wa naonhaung" na jo, qo re lai: to: co' yang:- gatau: mung"dan: jham mae Lau Dao: Gai re qo" kho" kyo: byid: nae" ngad: rumung: su gaje qe: mau" zaui: jao: mae bin: zaui" to: va" ra" mau" zo" mathao mae maphug nae". 17 Ngadqere: Jham: Mugsug' mae- phug nug: ra" yaug wa Asang zaui" to: va" ra" lo, mau" mathao mae za:- phug vashao:- ga: ta" to" ra". 18 Pe"mung:ga"re- Mao"So: qhid' kheim: mae myo, nho qo" yaug wa- yao: yao" gaung re phug: ra" yaug mangad:- Asang: yang phug: ra" yaug lam: ngad: ra". 1 Ngo dajhid' zo: go: rure naonhaung" zang: kham byid: genae" rure ngo o: ra". Jeju khyo" zang: kham byid: gela,- 2 Mao"So ngonhaung" dao mae myid qu" nug' ru we' dakhyo: naonhaung" dao mae myid qu" nug' ra". Naonhaung" wa Khristu ga" ra" yauggai dayaug we' za: lo, xo' nae" qhid' mae" ngo mho' to: byid: va" ra" zomyi: gyang" we' dau: ako". 3 Eva wa lhao maui: nho: mhug' pyag' ra" pha,jhi" yang mhug' pyag' ru qhug' ru we' dakhyo:- naonhaung" re: nhag' lam: qeim: li" mung: Khristu re bin sho' jhid'de; kao taui" ru we' gyang" lho" ra" myid shapye' pye' geli" nae" rure ngo myid: ci" na:. 4 Pe"mung:ga"re dayaug yaug naonhaung" jhao" joe" li" mung: ngonhaung" makho" kyo" qu" ra" Yesu gatau dayaug: nho: khyo li" kho" kyo: byid' rure naonhaung" ngaui ngaui bau: bau: za: zang: kham yang: khae: yu: ako". Amung: naonhaung" wa ngonhaung" mae" qo" khae: yu ko" ra" Ngaui Bau" Lau Dao: we' dajhid' re: madau: ra" ngaui Bau" Lau Dao: we' Gyang" Lho" Byo mangad' ra" byo gatau re naonhaung" khae: yu: ako". 5 Ngo wa naonhaung" tho' kai mae" lagyo: qi: qe ga: mhang" ko" ra" mo, tho' mae dajhid' re: je: ngai yaug ngad:- ein: khyo" ngo mamyid: jho- 6 Ngo wa dao: jhau: rumae vae" yaug- lhe: yaug mangad: sho' ngadqere:- laba lajhao khyo mae wa- ba jhao yaug ngad: ra". Ngonhaung" wa yo, khyin: khao: ngo" mae we' khyo khe' khao: ngo" mae ce: khyo re de: de: za: naonhaung" re ba nhao va". 7 Ngo wa naonhaung" re nga: ye, nhao nae" qhid' mae" ngo yao" gaung re nyham: khyo" pye' mung:- naonhaung" re Mao"So: khyo Ngaui Bau" Lau Dao: pe" aphug' mamho' lo:- kho" kyo" lo: ra". Ceru: kad' ru wa ngo shad' ra" i? 8 Naonhaung" phaung mae ngo mau" zaui" na: au:- gatau: phung: jham: yang ngore bao" thaug' byid' ako". Amung ngo wa naonhaung" re bao" thaug' byid: nae" qhid' mae" ai: phung: jham mae" lhad' zo" na: ra" ein: gai: ta" ra". 9 Amung: ngo naonhaung" we' daga" na: ra" gyo: mae- ngaui qhang qo ca" ra" au:- bao" thaug' byid: genae" qhid' mae" ngo naonhaung" re phabau mapau"- Makedoni mung" mae" joe" li" ko" ra" mao:nhaung: qe wa ngo qo ca" ra" gu: alhab' re vin: li" byid' ako". Lai: lo" ra" yo, mae we' dakhyo:- joe" lo nae" ayo, mae re:- ngo wa khonhae" re: naonhaung" re qola: mavin nhao nae". 10 Nga" khug mae bo: ra" Khristu nho: dangman" ru we' ngo ceru: phug: rure Akhaia mung" jao: sho' mae khag' re: qo" tam" pye' genae" mangad:- ein: ngo dao:so: byid' ra". 11 Ngo wa naonhaung" re majhid'de, yang: ceru: ta" ru ngad: ra" i? Ngo naonhaung re jhid'de; ra" khyo re Mao"So ba: ra". 12 Ngonhaung" zaui: so" ru we' dakhyo:- yao: bam re: zaui: so"- ga: ai: gatau lagyo: jham phug: ta" nae" agu maqo" genae" qhid' mae" ngo wa ana" kad' na: ru we' dakhyo:- xo' yang: kad' ye" lo" nae". 13 Yao: bam wa lagyo: aman" qe mangad:- lagyo: apyag' qe ngad: ako". Yao: bam yao" gaung re Khristu nho: lagyo: aman" qe we' dakhyo:- aqid ve, geim kad' mung:- mhug' pyag' ra" mau" zo" zaui: so: mo, ngad: ako". 14 Aiwa mug' nae" khyo mabo ngad: ra"- Satan lhao" re: bo" bao: nho: mug: lagyo: we' dau sho' yao: yao" gaung re geim qo" kad' ra". 15 Airumung:- yao" daui daui mo, wa- din:man" ru: daui daui mo, we' dau sho' yao: bam yao" gaung re geim kad' ko" ru wa gyai mug' nae" made, ngad: ra". Lo" thao" mae ai geim" yao:- yao: bam: lo, mau" we' man: qi" ra" aphug' re qo" khae: yu: li" genae". 16 Khag' re: ngore ago dajho gela,- ein: ngo dam: paug' ta" ra". Ngadqere: naonhaung" ngore ago jho geyang: ngad lao" re:- ngo dajhid' dathao qo" phug nae" qhid' mae" nang" thao" ago dayaug khyo" ngore khae: yu shi: gela,- 17 Ngo ana" phug: ta" na: ru wa- Asang ta" nhao: ra" khyo" mangad: lo:- ago dayaug we' dakhyo: ngo phug: ta" na: ru ngad: ra". 18 Byu myo: sho' mo, wa xao su byu qenho: qam: so' lo, mau" re cao" yang: phug ko" ruyang ngore: airu: phug nae". 19 Naonhaung" wa gyai pha,jhi" ba mo, ngad gemung: ago qere ngaui ngaui bau: bau: za: zang: kham byid' ako". 20 Naonhaung" wa- naonhaung" re amyin" byid: yam" zo" ra" yaug naonhaung" amag re khyug' zo" ra" yaug- naonhaung" re kung" zo" ra" yaug- naonhaung" re qu" nyham: ra" yaug- naonhaung" myo,khung: re pyo' yaug- re naonhaung" zang: kham byid' ako". 21 Qho' ru we' naonhaung" re ta" geli". Ngonhaung" wa aijham re kad' nae" gyai mavae" ra" gyaug hab' qe ngad: ra". Ngadqere: dayaug yaug daja: ja" khyo we' sin: mung: vae" phug: ngad: re wa- ngore: airu: vae" phug nae" ngad: ra". Ngo wa ceru re ago dayaug we' dakhyo: ta" na: ru ngad: ra". 22 Yao: bam wa Hebre vo qe ngad: ako" i? Ngo re: ai we' dakhyo: ngad:- yao: bam Israel byu qe ngad: ako" i? Ngo re: ai we' dakhyo: ngad:- yao: bam wa Abraham: nho: myid:zo: qe ngad: ako" i? Ngo re: ai we' dakhyo: ngad: ra". 23 Yao: bam wa Khristu nho: daui daui mo, ngad: ako" i? Ago yaug ru: ngo ta" na: ra". Ngadqere: ngo wa yao: bam tho' je: gai: ra" daui daui yaug ngad: ra". Ngo wa mau" je yang: zaui" lo yaug ngad: ra". Ngo wa je: myo: sho' lhang thaung: taung" lhaung" ru qhug' lo yaug ngad: ra"- ngo wa be; rure je: myo: sho' lhang qhug' lo yaug ngad: ra". Je: myo: sho' lhang alaug laug shid: ru qhug' lo yaug ngad: ra". 24 Ngo wa Yuda byu qeyang sam xe: gug dae dae mung: be; rure ngo" lhang qhug' lo: ra" yaug ngad: ra". 25 Roma byu qeyang sam lhang taui" be; ru qhug' lo: ra". Amung: laug baui: yang pye' ru dalhang qhug' lo: ra". Ngo wa qid sang pho qeim: rumae sam lhang bobo: lo mung:- qid tham: dao mae shid' xe: byid yo, qug myung: lhau: ru dalhang qhug' lo: ra". 26 Nga" gyaung: khyo myo: sho' mae qid gyui gyui yang: qhug' ra" shid gyan nogyan- damya, qhug' ra" shid gyan nogyan- nga" mao:nhaung: Israel byumyu" qe: lo, mae qhug' ra" shid gyan nogyan- Taung bug byu qe: lo, mae qhug' ra" shid gyan nogyan- vomo" jham mae qhug' ra" shid gyan nogyan- seyo segae: mae qhug' ra" shid gyan nogyan- panglai: qid tham: dao mae qhug' ra" shid gyan nogyan- ba nam apyag' qeyang kad' ra" shid gyan nogyan jham re ngo qhug' lai: lo: ra". 27 Mau" zo" re dug myaung: taung" zaui" lo va". Dazab makyo yab maqhug' zo" ru- vae: moe; qid shab' ru thaung" qhug' lo: ra"- Dazab makyo zo:ve gyi: sho' maqo" zo:- khug ngha nae" jo, qo majo,- mai bau: gug: sho' maqhug' ve; lo ngad: ra". 28 Khag' mata" thug' ru qug: khai: khyag' qhui: ra" gatau myo: sho' ja: tho' mago"- ngo wa ba khao: ngo" Phung: jham alhab' qhid' mae" sang: kho: myid: ci" ruyang nhai" bam" to" ru qhug' na: ra". 29 Dayaug yaug qam: nang: yang: ngad: re- ngo re: qam: nang" ra"- dayaug yaug qobo: yang ju" phyo' rure- ngo wa gyai gaung yug myid: ci" byid' ra". 30 Ngo phug ca" ngad: re wa- ngoyao" gaung yao: qam: khonho" nang" ra" khyo re ceim" shid' yang: ngo phug nae". 31 Ngo mamhug' rure Asang Yesu nho: Pho" ngad: ra" Mao"So ba: ra". Yao" mang wa- apyad ato mae ngaui lho" vashao: wo". 32 Ngo Damasku vogaung: mae na: au:- kho:kham Areta nho: mung" zug: pho" wa- ngore taung: nae" qhid' mae" vomo" kham: dung: mae gyezo: qere zaung" nhao: to" ra". 33 Ngadqere: ngore gyan khug mae ke' mung:- vang bao: zo: kham: khyo"- shoe' khyo" ke' byid: geyang: ngo wa- ai: mung" zug: pho" lo, mae" loe; beim: lo va". 1 Phug: ru wa akyu" mabo ngadqere:- ngo phug ca" shi" ra". Ana"- ngo wa Asang: yang qhu" byid' ra" ve, lho jham we' qhu" lho jham: nho: khyo re ta" nae". 2 Lai: lo" va" ra" daxe: byid zin mae Khristan phung: byu dayaug wa- myhao: thao" ra" mug:gaung pyae gye, khyo jhui" do, lo" ru qhug' ra" khyo re ngo ba: ra". (Ceru wa gaigai: yao: boe" ru ngad: laug? Mangad: lao"- yao: wa ve, lho re the' myao: ru ngad: laug- ngo nyang" maba- Mao"So za: ba: ra".) 3 Ai: yaug wa Pharadisu khyo jhui" do, lo" ru qhug' mung:- yao: wa byu: nhad' dao: thoe 4 khyo" maqo" ta" ra" dao:- byu: nho: thoe we' maqo" ta" thug' ra" dao: thoe jham re the' gyo" rure ngo ba: ein: ra" khyo re ngo dam: paug' ta" ra". (Ceru wa gaigai: yao: boe" ru ngad: laug? Mangad: lao"- yao: wa- ve, lho re the' myao: ru ngad: laug- ngo nyang" maba- Mao"So za: ba: ra".) 5 Airumung: byu ceyaug: khyo we' sin: yang: wa- ngo phug nae". Ngadqere: ngoyao" khyo we' sin: yang: wa- ngoyao: khoqhi" qam: nang: yaug ngad: rure qhu" byid' rumae" je yang:- pe" maphug nae". 6 Ngo phug nug yang: ngadqere: ngo ago doe, nae" mangad:- pe"mung:ga"re ngo wa dangman" ra" dao: re ta" na: ru ngad nae"- khag' ngadqere: nga" khyo re yao: ngo kad' rumae the' myao: ru we' ngo ta" rumae the' gyo" yu: ru tho' matag: myao: to: nhao nug yang: ngo wa maphug nae". 7 Ngadqere: ngo the' myao: ra" mug' pho: ve, lho jham myo: sho' mathao mae ngad beim: phug: ra" myid mabo: li" nae" qhid' mae" ngo wa gaung sho: dayin dayo: khai" no: ra" nodae daja: re kham zo" na: ra". Ai: nodae wa Satan" nho: lagyo: khyo" ngore be; na mung:- nga" nho: ngad beim: phug: ra" myid re tam" to: byid' ra". 8 Ce: nodae re yu: pye' byid: nae" qhid' mae" ngo wa Mao"So re sam lhang khyo" yang: akyu" mho' qu" va". 9 Ngadqere: Mao"So wa- nga" nhag' myan" ra" jeju wa nao qo ca" ra" gu: alhab' qhid' mae" ga" laug: ra". Nao qam: nang" ra" au: nga" qam: so' wa- qam: bo: thao" ru ngad: ra"- ga: phaug' tau" ra". Airumung: nga" au: dao mae Khristu nho: qam: so' yang gug: gam byid' rure qo" kham: yu nae" qhid' mae" nga" nho: qam: nang" rure ngo gyai ngaui bau: yang: phug: ra". 10 Ngo wa Khristu nho: mathao mae- qam: nang" ru- roe" ru- dayin dayo" ru- yhin" ru- qug: khai: jham qhug' rumae nhag' shid nhag' dag: ra". Pe"mung:ga"re ngo qam: nang" ra" au:- ngo wa qam: bo: jo; ra". 11 Ngo wa ago we' dakhyo: kad' na: ra"- naonhaung" wa ngore ago doe, nhao: na: ako". Naonhaung" wa nga" bo: de, ang: ra" mo, ngad: ako"- pe"mung:ga"re ngo wa pe" mangad: sho' ngadqere:- naonhaung" lagyo: qi: qekhyo" jho: to" ra" mo, tho' dajhid' re: ngai nyham yaug mangad:- 12 Ngo wa lagyo: dayaug ngad: ra" khyo re mug' pho: ve, lho jham- mug' pho: mau" zo" jham myo: sho' re naonhaung" phaung gaung: mae nhag' lam: qhang qhang za: zaui" qhu" mung:- sagse: qhu" byid' lo va". 13 Ngo wa naonhaung" re ngaui qhang we' sin" ra" bao" thaug' khyo re qo mala: nhao: rumae" je yang:- gatau: Phung: jham: o mae khyo" yang: naonhaung" re zam" khug: lo: ra" i? Ceru: naonhaung" dao mae matarha" ra" khyo" kad' rure jeju khyo" ngore qobo khyad' byid: gela,. 14 Ana" ngo wa sam lhang ein: lhang naonhaung" jhao" li" qhug' nae" jin" jin" ngad va". Naonhaung" re ngo pe" re: qo mabyid: nae". Ngo wa naonhaung" ngaui qhang re o yang: mangad:- naonhaung" re o yang: ngad: ra". Myid:zo: qe wa myhi" pho" qe: qhid' mae" ngaui qhang qaung" to: byid: nae" maang ngad: ra". Myhi" pho" qe kam" wa yao: bam: myid:zo: qe: qhid' mae"- ngaui qhang qaung" to: byid: ang: ako". 15 Ngo wa naonhaung" re bao" thaug' nae" qhid' mae" ngo qo" ra" ja: alhab' re we' ngoyao" gaung dau: qam: o: alhab' rere: ngaui bau: za: ci yhung" pye' nae". Ngo naonhaung" re gyai jhid'de; re- naonhaung" ngore nang" ra" khyo" jhid'de; genae" i? 16 Airumung: ngo wa naonhaung" re qo mala: nhao lo" ra" khyo re naonhaung" khae: yu genae" za: ngad:. Ngadqere: dayaug yaug wa- ngore nhag' lam: sham" yaug- naonhaung" re mhug' pyag' zo: yaug ngad: ra"- ga: ta" li" nae". 17 Aire khoru: mhug' pyag' lo: ra" i? Naonhaung" jhao" ngo nhao: ke' ra" lagyo: qe khoyaug: lo, khyo" naonhaung" anyaug re khyug' zo" ra" i? 18 Ngo wa Titu re naonhaung" jhao" ye: nae" qhid' mae" xo sho' mho' mung: Khristan mao:nhaung: dayaug rere: yao: we' daga" ngo nhao: ke' ra". Titu wa naonhaung" anyaug re khyug' zo" lo: ra" ein:- ta" genae" i? Yao: we' ngo wa nhag' lam: lo, mau" daja: za: we' mau" zaui: so" na: ru mangad: i? 19 Ngonhaung" wa naonhaung" qhid' kheim: mae dayao: dayang ngonhaung" yao" gaung re ta" qid' na: ru ngad: ako" ga:- naonhaung" jho: re jho genae". Airu: mangad:- ngonhaung" wa Mao"So: qhid' kheim: mae Khristu ngonhaung" re ta" nhao nug: ru we' dakhyo:- ta" na: ru ngad:- Jhid'de; ra" ba nam qe we"- ngonhaung" zaui: so" lo: ra" gu: ja: khao: ngo" wa naonhaung" re bao" thaug' byid: nae" qhid' mae" angad:. 20 Ngo naonhaung" jhao" joe" li" lao"- ngo o ngaui: ru we' shai" yang: naonhaung" re li" myao nae" ru we'- naonhaung" o ngaui: ru we' shai" yang: ngore naonhaung" the' myao genae" rure ngo gyai myid: ci" na: lhe". Ngo wa- jho" myan" myo" ru- myid nug' ru- nhag' yo" ru- yao: yao" akyu" qho: ru- maphug' makhyad' kad' ru- gaui mho: ru- ngad beim" ru- mo, thaui: mo, yaug boe" ru jham re myao nae" rure myid: ci" na: ra". 21 Thao dalhang naonhaung" jhao" dam: li" re- nga" Mao"So wa naonhaung" qhid' kheim: mae ngore qho' nhao nae" laug. Amung: lai: lo" ra" ayo, mae qobo shad' lhoe" ra" mo, myo: sho' wa ana" joe" sho' yao: bam: myid matha" lo:- gaung sho: jho" zam" ra" mau" zo"- gintho' zaung: ra" mau" zo" we' qhae ka ka: ra" qobo mae nab: shid: jo; ra" mo; qhid' mae" ngo ngug byid gyo" nae" we' myid: gyaug myid: ci" na:. 1 Ana" ngo wa- sam lhang ein: lhang naonhaung" jhao" joe" li" nae" ngad:- Jham: Mugsug' mae ta" ru we' dakhyo:- qobo zhaug' ra" mung- pe" ja" mung mae ngadqere:- Sagse: shid' yaug we' sam yaug; nhad' mae" thug' ra" dao: thoe: yang jao dang yu ca" ra". 2 Shid' lhang ein: lhang ngo naonhaung" jhao" li" co' au:- thao: lhang ngo naonhaung" jhao" dam: joe" li" re wa- khag' rere: matang" to: lo: qobo dae byid: nae"- ein: qhid' phyao: qobo shad' lhoe" ra" mo, re we' gatau alhab' mo; re ta" peim" to: gau ngad va". Ana" re: ai we' dakhyo:- ngo wa va: mae" naonhaung" re dam: paug' yang: ta" peim" ke' nae". 3 Khristu wa nga" nhad' dao: thoe: khyo" yang dao: jhau: na: ra" ga" ra" naonhaung" o: ra" sagse: alhab' naonhaung" qo" li" genae"- Khristu wa naonhaung" re mho" shid' ra" au:- qam: nang: yaug mangad: ngad: ra". Ai: atha" yao: wa naonhaung" phaung mae yao" qam: so' qhu" byid' ra". 4 Pe"mung:ga"re yao: wa qam: nang: zo" re" pyao: zang dao mae jin" se' pye' ru qhug' sho' ngadqere:- Mao"So: qam: so' khyo" yang yao: wa kao so' daui: na: ra". Ngonhaung" re: yao: we' dadang: dalam: za: ngad: jo, mung:- qam: nang" ra". Ngadqere: naonhaung" we' ngonhaung" daga" zam" khug: rumae Khristu kao so' daui: khyo mae bo: ra" Mao"So: qam: so' khug mae ngonhaung" boqhug' leim nae" ngad: ra". 5 Naonhaung" wa lam khug: rumae kao so' daui: na mo, ngad: la, mangad: la,- naonhaung" yao" gaung re nyang" za: jham" qu" mung: ca: qu" ge,- naonhaung" khug mae Khristu na: jo; rure- naonhaung" gaigai: yao: ba ko" i? Airu: mangad: re wa- naonhaung" jham" qu" rumae alhab' seim" byaug: ra" lajheim: thug' jo; ra". 6 Ngonhaung" wa- ai: jham" qu" rumae seim" mo, mangad' rure naonhaung" ba genae"- ein: ngo myid: lam: ra". 7 Naonhaung" pe" mashad' genae" qhid' mae" ngonhaung" wa- Mao"So re akyu" mho' ra". Airu: akyu" mho' ru wa- ngonhaung" wa jham" qu" rumae aung doe, mo, ngad: rure qhu" byid: nae" qhid' mae" mangad:- ngonhaung" wa jham" qu" rumae seim" ra" mo, we' dau nhohab ngadqere: naonhaung" wa jo: rure qo" zaui: so: genae" qhid' mae" ngad: ra". 8 Pe"mung:ga"re ngonhaung" wa dangman" ru we' shai" yang:- daja: re: maqo" kad'- ai: dangman" rure za: ngonhaung" qo" kad' ra". 9 Ngonhaung" qam: nang: mung: naonhaung" qam: bo gelao"- ngonhaung" wa ngaui bau" ra". Aimung:- naonhaung" wa jab byang" mo, boe" li" genae" qhid' mae" ngonhaung" akyu" mho' ra". 10 Ngo joe" li" lao"- Asang: yang ngore byid' to" ra" kheim: so' re ci yang:- gyai thin: ra" khyo" mali" mho" qo nae" qhid' mae" ngo wa- ce: mugsug' re naonhaung" we' jho" va" na shi" au: mae" tung" ke' ru ngad: ra". Asang ngore byid' to" ra" kheim: so' wa- naonhaung" re phyo' qheim" pye' nae" qhid' mae" mangad:- zao: to' ke' byid: nae" qhid' mae" ngad: ra". 11 Nga" mao:nhaung: qe we"- airu: va" lhe"- qao" zin" na geshao:- jab byang" mo, boe" sho' qam: ke' ge,- nga" nho: mho' ra" dao: re tae" gyo: ge,- naonhaung" yao: cao: jho" vang" ge,- ngaui pyo: yaug yo za: na ge,- jhid'de; ru we' ngaui pyo: yaug yo: ra" Mao"So wa- naonhaung" we' daga" ngad: jo; li" nae". 12 Naonhaung" yao: cao: mao:nhaung: jhid'de; myid we' jho" au" ge, Mao"So: byu qe alhab' mo, wa- naonhaung" re au" ke' ako". 13 Asang Yesu Khristu nho: nhag' myan" ra" jeju- Mao"So: jhid'de; myid we' Gyang" Lho" Byo: nho: zam" khug: ru wa- naonhaung" alhab' mo, we' daga" ngad: jo, vashao: wo".
|