1 Timothi

1 Timothi 1

1 Ngonhaung" khyad' yu: Asang Mao"So we' ngonhaung" myid: lao" khyo ngad: ra" Khristu Yesu nho: amyin" khyo" yang Khristu Yesu nho: lagyo: dayaug ngad: ra" ngo Polu wa- 2 Lam khug: rumae nga" zo: gyang" ngad: ra" Timothi re mugsug' tung" ke' ra". Pho" Mao"So we' ngonhaung" Asang Khristu Yesu wa nhag' myan" ra" jeju nhag' khyag' shogu: ru we' ngaui pyo: yaug yo: ru nao re byid: vashao: wo". 3 Ngo Makedoni mung" khyo ye" lo" au: re nao re ngo ta" co' ru we' dakhyo: nao Ephesu vogaung: mae xo' na: jo, nae" rure ngo o: ra". Ai: vogaung: mae mho" shid' khyo apyag' re mho" shid' na ko" ra" mo, byu damyo" na gemung: nao wa yao: bam re ai: khyo thang: pye' genae" qhid' mae" amyin" byid: ca" ra". 4 Jho" ta" ngag nae" rure za: boe" thug' li" nhao: ra" mhomyi: saung: seim jham re ta" ru we' dayao: dayang ngad: ra" byuxag' she' ra" khyo jham re to" pye' genae" qhid' mae" yao: bam re ta" wa,. Lalam lakhug khyo" qo" ba: yu: ra" Mao"So myid: yaung: to" ra" khyo re aijham: yang pe" maqo" zaui: so: byid: ngad: ra". 5 Ceru: amyin" byid' runho: au: qang khyo wa- gyang" lho" ra" aung khug nhag' lam: gyang" san: ra" aung khug nhag' lam: we'- yaung" san: ra" lam khug: myid mae" thug' li" ra" jhid'de; myid re pug: to" ke' nae" qhid' mae" ngad: ra". 6 Byu damyo" wa cekhyo jham mae" phaug' lo" byaug mung: akyu" mabo: ra" ja: mae jho" ta" ngag yang: khyonghung: nghung" byaug: ako". 7 Yao: bam wa Mao"So: tarha" mho" pho" qe boe" nug: ako". Ngadqere: yao: bam wa yao: bam yao" dao: thoe jham re maba: gyo:- mangad: lao"- yao: bam gyai lam lam za: ta" na: ra" khyo jham re maba: gyo: ko" ngad: ra". 8 Ai: kham" to" ra" Tarha" wa jo ang: ra" khyo" ci: ngad: re wa gai: rure ngonhaung" ba: ra". 9 Tarha" jham wa byu gai qe: qhid' mae" khyo" to" ru mangad:- Tarha" shad' lhoe" ra" mo, we' tarha" re tau: lhan" ra" mo; qhid' mae" Mao"So mabo: ra" mo, we' qobo shad' lhoe" ra" mo; qhid' mae"- lam khug khyo re malam" ra" mo,- mangad: lao" Byo we' sin" ra" khyo macao" ra" mo; qhid' mae"- yao: bam: yao: pho" qe- mangad: lao"- yao: myhi" qere se' ra" mo; qhid' mae"- byu se' mo; qhid' mae" 10 gaung sho: gintho' mau" zo" qho: ra" mo; qhid' mae"- yauggai yao: cao:- myiqe: yao: cao: gaung sho: jho" zam" ra" mo; qhid' mae"- byu khug' ra" mo; qhid' mae"- mhug' ra" mo, we' madang maman" ra" sagse: kham: ra" mo, mangad: lao"- gai: ra" mho" shid' khyo we' tug' shai" ra" mo; qhid' mae" Tarha" khyo" to" ru ngad: rure ngonhaung" ba: yu ca" ra". 11 Ai: mho" shid' khyo phungbao we' byang" jo, mung: ta" shid' kyo: nae" ngore lam: to" ra" ngaui lho" ra" Mao"So mae" thug' li" ra" Lau Dao: Gai mae the' myao: ra". 12 Nga" mau" zo" re qo" zaui: so: nae" qhid' mae" ngore qam: o: byid: yaug ngad: ra" ngonhaung" Asang Yesu Khristu re ngo jeju beim: so: caung:khin" ra". Ngo wa lai: lo" ra" ayo, mae yao: re jung" gaui: lo yaug- yhin" lo yaug- roe" lo yaug ngad sho' ngadqere: yao: wa ngore man: qi" yaug ngad: ra" khyo" sun" yu mung:- yao: re caung da" byid: nae" qhid' mae" san: yu: to" ruyang ngo wa yao: re jeju beim: so: caung:khin" ra". Ngadqere: ngo wa lam khug myid mabo shi" ru we' ngo kad' ra" mau" zo" re ngo maba: ruyang Mao"So wa ngore nhag' khyag' shogu: ru byid' ra". 14 Ngonhaung" Asang wa yao" magan: mago" ra" nhag' myan" ra" jeju ngore vhe' sheim: byid: mung: Khristu Yesu we' dadang: dalam: za: doe; rumae ngonhaung" qo" yu: ra" lam khug myid we' jhid'de; myid ngore byid' ra". 15 Khristu Yesu mug: myid dao khyo joe" li" ru wa qobo jab qere khyad' yu nae" qhid' mae" ngad:- ga" ra" dao: wa dangman" ra" dao: ngad mung: jab byang" sho' khae: yu mung: lam" nae" qhid' mae" ngad: ra". Ngo wa ai bam mae" je: xo: thao" yaug ngad:. 16 Ngadqere: thao phyao: Khristu re lam mung: apyad ato kaoso' re qo" khae: yu genae" mo; qhid' mae" ve, so: khyo" Khristu Yesu wa yao" byang" sheim: jo; ra" nhag' lam: qhang qhang zang: kham: rure qobo jab qe alhab' mo, tho' mae je: xo: thao" yaug ngad: ra" ngore qhu" byid: nae" qhid' mae" Mao"So wa ngore nhag' khyag' shogu: ru byid' ra". 17 Apyad ato: kho:kham shid maba: ru we' myo; yang magai: myao: ra" date: za: ngad: ra" Mao"So re apyad ato mae khonhae" re: phug' te' nga: yhe' byid' ru we' phungbao bo: jo, vashao wo"- Amen. 18 Nga" zo: Timothi we"- lai: lo" ra" ayo, mae ni" khyo re lapa pa: to" ra" dao: jham re cao" yang: ngo wa ce: amyin" akhang" nao re byid' to" ra". Nyang" za: khe' zin: nae" qhid' mae" ai: Lapa dao: jham re shae lhae khyo" ci wa,- 19 alao" ni" lam khug: myid re zaui" zag: ci yang: aung khug nhag' lam: gyang: gyang: to: wa,- byu damyo" wa yao: bam: aung khug nhag' lam: ta" ra" khyo re matae" gyo: gemung: yao: bam: lam khug myid re byo; qeim: lo" nhao: ako". 20 Ai bam: phaung mae Humenaeu we' Alexanda tao bobo: ako". Ngo wa yao: shid' yaug re Satan" nho: qam: so' lo, khyo ab byid' pye' ra" khyo" qobo dae byid: va". Ceru wa yao: shid' zo: Mao"So re jung" gaui: ra" dao: majhau genae" rure mho" shid' byid' li" nae".

1 Timothi 2

1 Arumung: byu alhab' mo; qhid' mae" Mao"So re goe; mho' ru- akyu" mho' ru- bobao" mho' yao: ru we' jeju caung:khin" byid' ru kad' genae" qhid' mae" sao qhid' mae ngo nao re jhan" ke' va". 2 Ngonhaung" wa ngaui pyo: yaug yo: ra" Mao"So re gyaug phug' zo" re"- gai ang: ra" ave, lo, mau" we' kaoso' qo" daui nae" qhid' mae" kho:kham qe we' kheim: so' qo" ra" gatau byu gaje qe: qhid' mae" re: akyu" mho' byid: wa,. 3 Ceru" ra" akyu" mho' ru wa gai: ra" khyo ngad mung: ngonhaung" nho: khyad' yu: ra" Mao"So re ngaui nhao: ra" lo, mau" ngad: ra". 4 Mao"So wa byu yaug khao: ngo" khyad' yu: rure qhug' yu genae" ru we' dangman" ra" khyo re ba: lo genae" qhid' mae" yao: o ngaui: ra". 5 Pe"mung:ga"re Mao"So wa date: za: na mung: Mao"So we' byu: agyo: mae mang: dae tae" byid: yaug re: byu ve, vin: ra" Khristu Yesu dayaug za: na: ra". 6 Yao: wa xao su byu alhab' mo, re khyad' yu nae" qhid' mae" yao: yao" gaung re byid' pye' ra". Airu wa ayo, dau lao" byu yaug khao: ngo" khyad' yu qhug' genae" rure Mao"So o ngaui: ra" khyo re sagse: qhu" byid' ru ngad: ra". 7 Arumung: ngo wa lagyo: dayaug khyo" we' Taung bug byu qe: mho" pho" khyo" lam khug khyo we' dangman" ra" khyo mungdao: re ta" hau" kyo: byid: nae" qhid' mae" nhao: ke' ru qhug' ra". Ngo wa mamhug'- ngo wa dangman" rure ta" na:. 8 Ngo wa yauggai qere caung:pa" phaung khao: ngo" mae akyu" mho' genae" rure o: ra". Mao"So re qhaug' byid: to: va" yauggai qe wa nhag' yo" ru we' jho" ta" ngag: ru mabo lo: yao: bam: lo, re tau yang: akyu" mho' genae" rure ngo o ngaui: ra". 9 Myiqe: qere: xae nag au: zaung shaung: ru- mangad: lao" qhang zai jham- palhe" jham- mangad: lao" phug' de; ra" ve, mai ve,bau: jham: yang gaung mashaung lo:- ave, de, de, za: ve,mai ve,bau: re dau yaung" ra" khyo" shaung ve; genae" rure ngo o: ra". 10 Mao"So re caung:pa" ra" myiqe: qe ngad: ru we' dakhyo:- dau ang: ra" khyo" dau shab: ra" lo, mau" we' yao: yao" gaung re shaung: ci geshao:. 11 Myiqe: qe wa nhag' lam: nyham: khyo" ra" myid we' sae za: na yang: zhao: yu qo: ra". 12 Mho" shid' nae" mangad: lao" yauggai qere eib khang" nae" rure ngo wa myiqe: qere akhang" mabyid:- yao: bam wa sae za: na qo: ra". 13 Pe"mung:ga"re Adam: wa sao qhid' phan" to: qhug' mung:- Eva wa thao re phan" to: qhug' ra". 14 Mhug' pyag' qhug' yaug wa Adam: mangad: ngad: ra". Ai: myiqe: yaug lam: mhug' pyag' ru qhug' mung: Mao"So: tarha" re shad' lhoe" pye' ra". 15 Ngadqere: yao: wa ave, de, de, za: lam khug: ru jhid'de; ru we' gyang" lho" rumae xo' yang: kaoso' daui: ngad: re wa myiqe: qe wa zo: dau myhung: ra" khyo" yang khyad' yu: ru qhug' li" genae".

1 Timothi 3

1 Phung: au: jhaung boe" nug: ra" myid kao bau: ra" yaug wa gai shab: ra" mau" zo" re kao bau yaug ngad: ra"- ga" ra" dao: khyo: wa dangman" ra" dao: ngad: ra". 2 Phung: au: jhaung kad' yaug wa qobo mabo: ra" yaug- yham sang myhi" dayaug za: qo" yaug- yhid mayid yaug- yao: yao" gaung re qo" khang" yaug- ave, de, yaug- bang" da" nug yaug- mho" shid' byid: ngau: bo yaug ngad ca" ra". 3 Yao: wa yhid ya:- byu qan yaug magai: ngad ngad: ra". Nau" nhae" ru we' ngaui pyo: yaug yo: rure kao bau yaug ngad qo: ra". Yao: wa ngaui qhang re au: am: yaug magai: ngad ngad: ra". 4 Yao: wa yham byu qere nyang" za: qo" eib khang" yaug ngad mung: yao" zo: dau qeyang phug' myao: taung" mho dao: gyo: byid' ra" yaug ngad qo: ra". 5 Pe"mung:ga"re yao: yao" yham byu qere khoru: eib khang" nae" maba: ra" yaug wa Mao"So: phung: re khoru: qo" gun caung nae" i? 6 Yao: wa ngad beim: myid bo: thug' li" mung: Satan re"ru: dao: phyid' ru maqhug' nae" qhid' mae" yao: wa lam khug: rumae zoqao" ngad qo: ra". 7 Yao: wa jung" gaui: pye' ru maqhug' nae" we' Satan nho: lha" khug khyo magyo" vao nae" qhid' mae" yao: wa phung: taung gaung shad' mae" byu qeyang phug' myao: byid: qhug' ra" yaug ngad qo: ra". 8 Phung: tau qe re: nhag' lam: din:man" ru we' gai: ra" ave, de, mo, ngad qo: ra". Yao: bam wa sabyi qang: re au: maam: mo,- mangad: lao" ngaui qhang re so' kho' myid mabo mo, ngad ca" ra". 9 Yao: bam wa ai: qhu" byid' to: va" ra" dang"man" ra" lam khug khyo re aug khug nhag' lam: qang: qang: za: zaui" zag: ci mo, ngad qo: ako". 10 Yao: bam wa sao qhid' jham" qu" rure kham: yu mung: yao: bam re qobo vhin nae" khyo pe" mabo ngad: re wa phung: tau mau" re vin vo, caung da" byid: vageshao:. 11 Yao: bam: yham sang myhi" qere: ave, gai mo, ngad qo: ra". Gaui mho- lau hab' mo, magai: ngad ngad: ra". Yao: bam wa yhid mayid: ru we'- ja: khao: ngo" mae nhag' lam: jao lam ga" mo, ngad qo: ra". 12 Phung: tau pho" wa yham sang myhi" dayaug za: qo" yaug ngad mung:- yao" zo: dau qere we' yao" yham byu qere nyang" za: qo" eib khang" yaug ngad qo: ra". 13 Yao: bam yao" mau" zo" re nyang" za: aung doe, sho' vin vo; ra" phung: tau qe wa- nga: ye, mung: Khristu Yesu khug mae yao: bam: lam khug: ra" khyo re mazag mavae qo" ta" hau" ako". 14 Ngo wa nao jhao" ce: vhin tung" re tung" ke' ra" ayo, mae- mataung" myao" re nao jhao" li" qhug' nae" rure ngo myid: lao" ra". 15 Ngadqere: ngo myao" na yang: ngad: re wa kaoso' daui: na: ra" Mao"So: phung: ngad mung: dangman" ru: nho: zang baung: we' apan aqao: ngad: ra" Mao"So: yham byu qe ngonhaung" khoru: na ye; ang: ra" khyo re ce: vhin tung" wa nao re ba nhao: li" nae". 16 Ngonhaung" lam: ra" caung:pa" thung" wa gyai no; thao" ru ngad: rure khag' dayaug re: maqo" ha: pye' ru wa o mae ta" ru we' dakhyo: ngad: ra". Yao: wa xao su byu: ve, vin yang: po" li" mung: Byo: yang jo: ra" yaug ngad: ga: qhu" byid: qhug' yaug ngad: ra". Mug: lagyo: jham: yang re: yao: re myao: avako". Yao" khyo re byumyu" cao jab: phaung mae kho" kyo: byid: mung:- Mug: myid jao: sho' mae" mo, yao: re lam" avako". Yao: wa mug:gaung khyo to' yu: ru qhug' ava".

1 Timothi 4

1 Ai: atha" yao: bam wa je yang: lhao" re: ai bam re caung da" byid' na vageshao:- pe"mung:ga"re yao: bam zaui: so" ra" mau" zo" akyu" re qo" khae: yu: ra" mo, wa yao: bam jhid'de; ra" lam khug: ra" mao:nhaung: qe ngad: ako". 2 Airu" ra" mho" shid' khyo jham wa jo, to' laung: yang phad' khyad' pye' re sho: shid: jo; ru we' dakhyo: aung khug nhag' lam: shid: jo; ra" mhug' pyag' ra" mo; yang mho" pyo: ke' ra" mho" shid' khyo ngad: ra". 3 Airu" ra" mo, wa ug' khug' dinkhu: de: lo, xo' xo' ra" khyo we' zo:ve daqhae: re zo: shaug' ru wa shad' ra" khyo ngad:- ga: mho" shid' byid' ako". Ngadqere: lam khug: ra" mo, we' dangman" ra" khyo re ba va" mo, wa jeju caung: akyu" mho' yang: zo: shaug' nae" qhid' mae" ai: zo:ve jham re Mao"So phan" to" ra". 4 Mao"So phan" to" ra" ja: khao: ngo" wa gai: ru ngad mung: pe" ja: rere: ngag: jao" pye' nae" made, ngad: ra". Ngadqere: ja: khao: ngo" re jeju caung: yang: kham: yu qo: ra". 5 Pe"mung:ga"re Mao"So: mungdao" yang we' akyu" mho' ru wa ai: rure Mao"So: yang khae: yu man" ru boe" nhao: ra". 6 Nao wa ce: mho" shid' khyo jham re mao:nhaung: qere mho" byid: yang: ngad: re wa nao phug' cao" ra" dangman" ra" mho" shid' khyo we' lam khug: khyo: nho: mungdao: jham nao yao" gaung re byo zo:ve khau: ra" khyo" yang Khristu Yesu nho: gai: ra" daui daui yaug dayaug nao boe" lo: li" nae". 7 Ngadqere: ta" nae" maman" ra" Mao"So mabo: ra" mhomyi: saung: seim jham re jao" pye' wa,- Mao"So bo: ra" kaoso' daui khyo: qhid' mae" naoyao" gaung re zhao: min" yu wa,. 8 Gaung khyao we' sin: yang: zhao: min" yu: ru wa akyu" dajhid' bo: ra". Ngadqere: Byo we' sin: yang: zhao: min" yu: ru wa khyo khe' khao: ngo" mae akyu" bo nhao: ra". Pe"mung:ga"re airu wa ana" pyad- joe" lo nae" pyad qhid' mae" kaoso' re byid: nae" ngad: ra". 9 Ceru wa dangman" ra" dao: ngad mung: jab byang" sho' khae: yu mung: lam" tho' ra" dao: ngad: ra". 10 Ngonhaung" wa ngonhaung" nho: myid: lao" rure byu alhab' mo; khyad' yu: Asang ngad: ru we' je yang: lam khug: ra" mo; khyad' yu: Asang ngad: ra" kaoso' daui: ra" Mao"So: khug mae ngonhaung" to" to: va" ruyang ngonhaung" wa qam: ke' yang: mau" zaui" ra". 11 Ce: pyang dao: jham mae" mho" shid' khyo jham yao: bam re mho" byid: wa, 12 nao wa zolau: ngad: ruyang khag' yang re: nao re daqu" ngai nhao wa,- ni" dao: jhau: rumae- ni" lo, mau" mae- ni" jhid'de; rumae- ni" lam khug: khyo mae- ni" gyang" san: rumae lam khug: ra" mo; qhid' mae" ve, so: gai boe" nhao wa,. 13 Ngo joe" li" sho' mo, byu qe: qhid' kheim: mae jham: mugsug' nghe' mung: kho" kyo: byid: yang:mho" shid' byid: mung: ni" yo, khyin: we' ni" qam: o: re byid: yang: qam: ke' na wa,- 14 Lapa qeyang ta" thug' mung: phung: lau: de, qe ni" dao mae lo, kai: byid' ra" au:- nao re byid' to: qhug' ra" ni" khug mae bo: ra" Byo we' sin" ra" jeju jhaung qhu" re pe" shui manho lo: dakad' wa,. 15 Byu alhab' mo; yang ni" nho: qi" qhang aung doe; li" ra" khyo re myao genae" qhid' mae" ai: khyo jham re naoyao: kao bau qam: zaug taung" lo, qaung: kad' cao" wa,- 16 naoyao" gaung re lha" yang: na mung: ni" mho" shid' khyo rere: lha" wa,- ai: khyo jham re nao xo' yang: kad' cao" na: ngad: re wa naoyao" gaung re we' ni" mungdao: re gyo" ra" mo, alhab' re khyad' yu: li" nae".

1 Timothi 5

1 Phug' mao: qere daqeim wa,- ngadqere: yao: bam re ni" pho" re we' dakhyo: ta" peim: ta" kyang: wa,- ni" o mae" zolau: qere ni" nhaung: bam re we' dakhyo:- 2 phyid' mao: qere ni" myhi" bam re we' dakhyo: ni" o mae" zomyi: qere ni" nhae: mo" bam re we' dakhyo:- gyang" san: ra" myid we' zam" khug wa,. 3 Gaigai: yao:- yao: yao: za: ngad: ra" cug' mo" myhi" qere gun caung wa,. 4 Ngadqere: ai: cug' mo" myhi" wa yauggai myiqe: zo:- mangad: lao"- yao: myid: qe qo" yang: ngad: re wa yao: bam wa yao: bam yao" ug' khug' dinkhu: we' sin" ra" yao: bam: caung:pa" thung" qo jham re shi" sao qhid' lo, joe" kad' zhao: yu ang: ako". Cekhyo" yang yao: bam: myhi" pho" qe we'phug' phyid' qere jeju dam: tug' byid' ako". Pe"mung:ga"re ai: mau" zo" wa Mao"So o ngaui: ra" mau" zo" ngad: ra". 5 Yao: dayaug za: ngad mung: yao: re gun caung nae" mana: ra" cug' mo" wa yao" myid: lao" khyo Mao"So mae to: mung: mathang mano: akyu" mho' ru we' Mao"So: yang bao" thaug' byid: nae" rure myi" re: na" re: mho' yao: ra". 6 Ngadqere: akyang qeim mung: pyo: khyo cao" na: ra" cug' mo" myhi" wa yao: daui: na sho' ngadqere: shid: jo, gau ngad: ava". 7 Yao: bam re khag' yang re: qobo vhin khyo made, nae" qhid' mae" cekhyo jham re yao: bam re ceim" shid' byid: wa,. 8 Ngadqere: byu dayaug yaug wa yao: yao" ba nam ug zo: qere we'- je yang: yao: yao" ug khug' dinkhu: byu qere magun caung yaug ngad: re wa yao: wa ai: lam khug: ra" khyo re ha: pye' ra" yaug ngad mung: malam khug yaug tho' je: magai yaug ngad: ra". 9 Apyad khyaug' xe zin majoe" shi" ra" cug' mo" khag' rere: cug' mo" japhin: mae dake' ge,- yao: wa dalhang za: lo, xo' qu" yaug ngad ca" ra". 10 Amung: gai: ra" lo, mau" qhid' mae" mang qi" ra" yaug ngad ca" ra". Yao" zo: dau qere nyang" za: khau: qhi" lo yaug- bang" da" lo yaug- Khristan mao:nhaung: qere khyid cid' byid' lo yaug- qug: khai: qhug' ra" mo, re bao" thaug' lo: ra" yaug- gai shab: ra" mau" zo" re kao bau taung" zaui: so" lo yaug ngad ca" ra". 11 Ngadqere: apyad ngai: ra" cug' mo" myhi" qere cug' mo" myhi" japhin: mae dake' ge,- pe"mung:ga"re yao: bam gaung sho: myid kao bau: ruyang ug' khug' dinkhu: vai" nug gelao"- yao: bam wa Khristu mae" phaug' lo" byaug: ako". 12 Airumung: Asang re sao qhid' byid' to" ra" yao: bam: dao:so: re phyo' pye' gemung: qobo qo" mo, boe" lo: ako". 13 Yao: bam wa dayham mae" dayham khyo lae" lhau mung: yao: bam: yo, khyin: re mageim: na: pye' ba: ako". Ai: tho' je: xo: ru wa yao: bam wa gaui mho lau hab' mung: su: khyo re kaung: kag' ru we' yao: bam majhau ang: ra" dao: jhau ba: ako". 14 Airumung: ngonhaung" gyevo qe wa ngonhaung" khyo we' sin: yang: magai makhyang" ra" dao: jhau nae" agu maqo" genae" qhid' mae" apyad ngai: ra" cug' mo" qe wa ug' khug dinkhu: vai"- zo: dau khau mung: yao: bam: yham khug: dinkhu: re gun caung yang: na genae" rure ngo je yang: o ngaui: ra". 15 Pe"mung:ga"re cug' mo" qe damyo" wa khyonghung: nghung" byaug mung: Satan" nho: thao cao" byaug: avako". 16 Ngadqere: Khristan myiqe: dayaug yaug yao" yham byu qe mae" cug' mo" qe bo yang: ngad: re wa yao: wa ai bam re gun caung byid: qo: ra". Phung: re qo magai: la: nhao ngad: ra". Ailao" yao: yao: za: ngad: ra" cug' mo" qere phung" yang qo" gun caung byid: nae" ngad: ra". 17 Au: jhaung qekhyo" mau" nyang" vin vo; ko" ra" phung: lau: de, qe wa aphug' shid' zhao" kham: yu man" ra" mo, ngad: ako" ein: myid: yu qo: ra". Je yang: mungdao: kho" kyo" ra" mau" zo" we' mho" shid' byid' ra" mau" zo" re qam: ke' yang: zaui: so" ra" mo, wa airu" ra" aphug' re kham: yu man" ako". 18 Pe"mung:ga"re jham: mugsug' mae nao gaug nao" ra" au: re ci: ra" nung: jaung lo" nhad' re gyan dazhaung: byid:- amung: mau" zaui: yaug wa yao" mau" zaui: phug' re khae: yu man" ra" ga: ta" ra". 19 Sagse: shid' yaug- mangad: lao"- ai tho' je: ra" sagse: qeyang mata" re wa- phung: lau: de, pho" re qobo zhaug' ta" ra" dao: re dabotae" gyo: wa,. 20 Gaje dang: ra" mo, gyaug geshao:- qobo shad' ra" yaug re mo, byu qe: qhid' kheim: mae qeim: mho" wa,. 21 Cekhyo jham re nao wa khag' rere: myo, nho nga: lao: makhyin- khag' bo: made, lo: nao zaui so: phug' cao" na vashao: Mao"So: qhid' kheim:- Khristu Yesu qhid' kheim:- gyang" lho" ra" mug: lagyo: jham: qhid' kheim: mae ngo wa nao re no: mae lao: yang: ta" ra". 22 Khag' rere: lo, dahin: kai: byid: wa,- Su gaje qe qobo kad' rumae dacao: bo wa,- naoyao" gaung gyang: gyang: za: na wa,. 23 Nao wa dazab makyo vae: dug: no no mung: ruyang qid za: dashaug' wa,- zo:ve pyag' rumae bao" byid: nae" sabyi qang: rere: dajhid' jhid' boshaug' wa,. 24 Byu damyo" nho: qobo jham wa de: de: za: the' myao mung: yao: bam: qobo jham wa- dao: kho' nae" yao: bam: gau: qhid' mae de" thug' jo; ra". Ngadqere: gatau damyo" nho: qobo jham wa thao re za: myao: thug' li" ba: ra". 25 Ai we' dakhyo: gai: ra" lo, mau" jham re wa de: de: za: the' myao mung:- airu: de: de: za: mamyao: ra" ja: rere: maqo" gai: nyham" to: ngad: ra".

1 Timothi 6

1 Jeim ngad: ra" mo, wa yao: bam: asang qere phug' myao: byid: man: qi" ra" mo, khyo" myid: jho: yu qo: ra". Ailao" za: Mao"So: mang a re we' ngonhaung" mho" shid' ra" khyo re khag' dayaug: yang re: majung" genae". 2 Khristan phung: byu asang qo" ra" jeim qe wa- yao: bam wa yao: bam: mao:nhaung: qe ngad: ein: khyo" yang yao: bam re maphug' makhyad' dakad' ge,- ai: atha" yao: bam wa je yang: lhao" re:- ai bam re caung da" byid' na vageshao:. Pe"mung:ga"re yao: bam zaui: so" ra" mau" zo" akyu" re qo" khae: yu: ra" mo, wa yao: bam jhid'de; ra" lam: khug: ra" mao:nhaung: qe ngad: ako". Nao wa cekhyo jham re mho" shid' byid: mung: kho" kyo" na qo: ra". 3 Tug' shai" ra" mho" qhid khyo re mho" shid' byid' ra" yaug khag' ngadqere: ngonhaung" Asang Yesu Khristu nho: dangman" ra" mungdao: jham we' ngonhaung" caung:pa: thung" nho: mho" shid' ra" dao: jham we' majho" zhaung" ra" yaug wa- 4 Yao: yao" gaung re ngad beim: mung: pe" maba yaug ngad: ra". Yao: wa dao: kheim: jham: lajheim: we' sin: yang: jho" ta" ngag nae" we' ta" byo, nae" kao bau yaug ngad: ra". Ceru wa myid nug' ru- jho" ta" ngag: ru- su re ta" phoe: ru- makhyang" ra" khyo" su re myid: jho: ru we' adu: adae: mo, we' abang mabyid jho" ngag: byo; ru jham re boe" nhao: ra". 5 Ceru" ra" mo, wa nhag' lam: atug' akhyug: ru ngad gemung: dangman" ra" khyo re maba mabeim" ra" mo, ngad: ako". caung:pa" thung" wa jo,nho" qo" li" nae" khyo ngad: khyo" yao: bam myid: jho: yu: ako". 6 Gai va"- yao: wa yao: qo" ra" gu: mae nhag' shid nhag' dag: na: ngad: re wa caung:pa" thung" wa byu re jo,nho" gyai qo" li" nhao: ra". 7 Ngonhaung" wa mug: myid dao khyo pe" ci: li" i? Pe" maci: li". Ngonhaung" wa mug: myid dao mae" pe" qo" ciphao: lo" i? Pe" maqo" ciphao: lo". 8 Aimung: ngonhaung" wa zo:ve we' ve,mai ve,bau: qo" yang: ngad: re wa- ngonhaung" qhid' mae" ga" va" ra". 9 Ngadqere: jo,nho" qo" nug: ra" mo, wa ju" phyo' rure qhug' mung: gyai adu: adae" ru we' shid gyan nogyan boe" nhao: ra" kao bau obyid: ra" lha" mae myi" pye' ako". Airu" ra" kao bau obyid myid wa yao: bam re byo; qeim: lo" ru khyo lao" khyo" pye' va" ra". 10 Pe"mung:ga"re ngaui qhang re jhid'de; kao bau obyid: ru wa makhyang" ra" ja: alhab' nho: ajhaung ngad: ra". Byu damyo" wa saung" qo" nug kao bau obyid geyang:- lam khug: ra" khyo mae" yao: bam khyonghung: nghung" lo" byaug mung: kaug' qhui: ru myo: sho' yang yao: bam: nhag' lam: re khyoe' pye' avako". 11 Ngadqere: Mao"So: byu we"- nao kam" wa- ai: khyo jham alhab' re jao" pye' wa,- din: vang" ru- Mao"So: khyo re kao bau: ru- lam khug: ra" khyo- jhid'de; ru- zang: kham: ru we'- nau" nhae" ru jham re qo" yu nae" qhid' mae" qam: ke' na wa,. 12 Lam khug: ra" khyo we' sin" ra" jho" tao: poe mae naoyao" qam: bo: thao" ra" qhi" qam: ke' yang: tao: wa,- amung: apyad ato: kaoso' re qo" zaui" yu sho' kad' wa,- ai: qhid' mae" Mao"So nao re khai: yu: ra" au:- nao wa sagse: myo: sho' mo; qhid' kheim: mae ni" lam khug: ra" khyo re jhaug' za: ta" lhang: yu: ava". 13 Ngonhaung" Asang Yesu Khristu joe" thug' li" nae" ba na joe" sho' nao re byid' to" ra" amyin" jham re phug' cao" mung: qo mabo lo: kyid kyid za: zaui: so: nae" qhid' mae" ja: cao jab alhab' re kaoso' byid' ra" Mao"So: qhid' kheim: mae re: Pontiu Pilad qhid' kheim: mae yao" lam khug: ra" khyo re jhaug' za: ta" lhang: yu: ra"- Khristu Yesu qhid' kheim: mae re: ngo nao re amyin" byid' ra". 15 Ngaui lho" ru we' date: za: ngad: ra" zug: kho:kham qe: kho:kham- Asang qe: Asang ngad: ra" Mao"So: yang dau ang: ra" yo, khyin: mae Khristu nho: na: thug' li" rure boe" nhao: li" nae". 16 Yao: dayaug za: shid maba ngad: ra"- yao: wa khag' re: maqo" te' ye" ra" mug: bo" khug mae daui: na: ra". Yao: re khag' re: mamyao: qu" ngad: ra". Yao: re khag' re: maqo" gai: myao ngad: ra". Yao: mae phungbao we' apyad ato kheim: so' bo: jo, vashao: wo"- Amen. 17 Cepyad mae jo,nho" qo" ra" mo, re ngad beim: myid mabo genae" qhid' mae" ta" peim: byid: wa,- yao: bam myid: lao" ru wa airu" ra" byo; qeim: lo" ba: ra" jo,nho" qo" rumae mato: lo:- ngonhaung" myid pyo: nae" qhid' mae" ja: khao: ngo" re mabyag maqhag' lo: byid' ra" Mao"So mae to: genae" qhid' mae" amyin" byid: wa,. 18 Yao: bam re gai: ra" mau" zaui: nae" we' gai: ra" mau" zaui: so" rumae jo,nho" qo" mo, boe" nae"- byag qhag' ra" myid mabo lo:- su gaje qere gae: myho" byid: ba nae" jin" jin" ngad genae" qhid' mae" yao: bam re amyin" byid: wa,. 19 Ceru: kad' ra" khyo" yang yao: bam wa- joe" lo nae" pyad qhid' mae" gang" tang: ra" jo,nho" ngad nae" ra" jo,nho" jham re yao: bam yao" qhid' mae" qaung" to" ru ngad: li" nae". Ailao" dangman" ra" kaoso' ngad: ra" kaoso' re yao: bam qo" khae: yu: li" genae". 20 Timothi we"- nao re lam: to" ra" mau" zo" re nyang" za: zaui" zag ci wa,- dao: qeim dao: co' jhau: ru we' byu damyo" yang shad' nghung" ra" khyo" laba lajhao ga: mhang" ko" ra" khyo we' sin: yang: adu: adae: jho" ta" ngag: rure jao" pye' wa,. 21 Pe"mung:ga"re byu damyo" wa ai: laba lajhao re qo" yu: to: mo, ngad: ga: khyag' khyag' ta" ako". Ai: mathao khyo" yang lam khug: khyo mae yao: bam khyonghung: nghung" lo" byaug: avako". Mao"So nhag' myan" ra" jeju wa naonhaung" alhab' we' daga" ngad: jo, vashao: wo".