1 Thessalonians
1 Thesaloni1 Polu, Sila, we' Timothi bam wa Pho" Mao"So we' Yesu Khristu nho: byu qe ngad ko" ra" Thesaloni phung: byu qere vhin tung" tung" ke' ra". Nhag' myan" ra" jeju we' ngaui pyo: yaug yo: rure naonhaung" qo" yu vageshao: wo". 2 Ngonhaung" wa naonhaung" alhab' mo; qhid' mae" khonhae" re: Mao"So re jeju caung:khin" byid: mung: ngonhaung" akyu" mho' rumae khonhae" re: naonhaung" qhid' mae" akyu" bomho' byid' ra". 3 Pe"mung:ga"re naonhaung" lam khug: myid re khoru: lo, joe" zaui: so" na ko" rure ngonhaung" Pho" Mao"So: qhid' kheim: mae myid: beim" na: ra". 4 Mao:nhaung: qe we"- Mao"So wa naonhaung" re jhid'de; mung: yao" qhid' mae" boe" genae" qhid' mae" khyin: yu: to: va" rure ngonhaung" ba: ra". 5 Pe"mung:ga"re ngonhaung" wa Ngaui Bau" Lau Dao: Gai re nhad' dao: thoe za: mangad: lo: Gyang" Lho" Byo: qam: so' we' ai: Lau Dao: Gai wa dangman" ru ngad: rure jhaug' za: myid: lam: ru we' ngonhaung" naonhaung" jhao" vin: li" ru ngad:. Ngonhaung" wa naonhaung" we' daga" na: au: naonhaung" akyu" qhid' mae" khoru: kaoso' daui: rure naonhaung" ba: ako". 6 Naonhaung" wa ngonhaung" ave, re we' Asang: ave, re qu" yu: ako". Naonhaung" wa dayin dayo: myo: sho' qhug' kham zo: gesho' ngadqere: Gyang" Lho" Byo: yang byid' ra" ngaui bau" ra" myid we' ai: mungdao: re naonhaung" khae: yu: ako". 7 Airumung: naonhaung" wa Makedoni mung" we' Akhaia mung" mae na ko" ra" phung: byu qe alhab' mo; qhid' mae" ave, qu" yu nae" mo, boe" lo: ako". 8 Pe"mung:ga"re naonhaung" lo, mau" mathao mae Asang: nho: khyo mungdao: wa Makedoni mung" we' Akhaia mung" jao: sho' za: hau" nhao" lo" ru mangad: Mao"So re naonhaung" lam khug ko" ra" khyo- lau thoe re khyi" khao: ngo" khyo hau" nhao" lo" ra". Airumung: naonhaung" re pe" ta" maca" lo:ngad: ra". 9 Ngonhaung" wa naonhaung" jhao" joe" li" au: re naonhaung" khoru: ngonhaung" re lham: khae: yu ko" ra" khyo rere: kao: so' daui: ru we' dangman" ra" Mao"So re caung da" byid: nae" qhid' mae" we' mug:gaung dao mae" yao" yao: Zo: joe" li" nae" qhid' mae" sulho jham re to" pye' mung: Mao"So shad' khyo naonhaung" khoru: phaug' lo ko" ra" khyo rere: ai: byu qe alhab' mo, ta" na: ako". 10 Ai: yao: zo: wa shid: rumae" yao" yang dam: daui: to" li" nhao mung: joe" li" nae" Mao"So: nhag' yo" rumae" ngonhaung" re khyad' yu: ra" yaug Yesu ngad: ra". 1 Mao:nhaung: qe we"- naonhaung" jhao" ngo joe" li" ru wa naonhaung" yao: ba: ako". 2 Ngonhaung" wa Thesaloni vogaung: khyo naonhaung" jhao" majoe" li" shire Philipi vogaung: mae yhin" ru we' maphug' makhyad' roe" ru khoru: qhug' lo: rure naonhaung" ba: ako". Airu: gye kad' ru myo: sho' qhug' ngadqere: ngonhaung" Mao"So wa Yao" Ngaui Bau" Lau Dao: naonhaung" re kho" kyo: byid: nae" qhid' mae" mazag mavae: ra" nhag' lam: ngonhaung" re byid' ra". 3 Ngonhaung" wa shad' nghung" ru we' nhag' lam: kaui myid bo yang: naonhaung" re ta" peim: ta" kyang: byid' ru mangad:- ngonhaung" wa khag' dayaug rere: mhug' pyag' nae" qam: make'. 4 Mao"So wa ngonhaung" re man: qi" ra" mo, ngad: rure ca: myao: ba: to: mung: ai: Lau Dao: Gai re kho" kyo: nae" qhid' mae" lam: to: qhug' va" ruyang Mao"So ngonhaung" re ta" nug: ru we' dakhyo: khonhae" re: ngonhaung" re ta" ra". Ngonhaung" wa byu: yang ngaui nae" rure qam: make'. Ngadqere: ngonhaung" aung khug nhag' lam: re jham" qu" yaug ngad: ra"- Mao"So: yang ngaui nae" rure za: ngonhaung" qam: ke' ra". 5 Ngonhaung" wa khin" dao: majhau. So' kho' obyid: rure ta" nghoe' pye' ra" dao: thoe majhau: rure naonhaung" yao: nyang" ba: ako". Mao"So wa ngonhaung" sagse: ngad: ra". 6 Ngonhaung" wa Khristu nho: lagyo: qe ngad: ra" khyo" ngonhaung" mae" akho: akhang" qo" mho' yu mo, ngad sho' ngadqere:- 7 naonhaung" yang caung:khin" nae" rure su gaje qeyang caung:khin" genae" rure re: khag' yang caung:khin" genae" rure re: ngonhaung" qam: make'. Ngonhaung" wa naonhaung" we' daga" na: au: re- yao: zo: qere gun caung: ra" yao: myhi" we' dakhyo: nau" nhae" za: na: lo va". 8 Pe"mung:ga"re ngonhaung" wa naonhaung" re jhid'de; ruyang Mao"So: lau dao: gai naonhaung" re ba nhao nae" ru za: mangad:- ngonhaung" kaoso' re lhao" re: naonhaung" re gae byid' pye' nae" jin" jin" ngad: ra". Naonhaung" wa ngonhaung" gyai jhid'de; ra" mo, ngad: ako". 9 Mao:nhaung: qe we"- ngonhaung" khoru: mau" zaui" lo: rure we' dug myaung" lo: rure naonhaung" gaigai: yao: myid: beim" ako". Naonhaung" khag' dayaug rere: qo mala: nhao nae" qhid' mae" ngonhaung" wa myi" re: na" re: mau" zaui: zo: mung: Mao"So: Ngaui Bau: Lau Dao: Gai re naonhaung" re kho" kyo" lo va". 10 Lam khug: ra" mo, ngad: ra" naonhaung" re ngonhaung" zam" khug: lo: ra" lo, mau" wa man" ru- jo: ru we' qobo vhin khyo mabo: rure naonhaung" yao: we' Mao"So wa ngonhaung" sagse: ngad: ra". 11 Yao: pho" wa yao: zo: qere qu" gun caung: ru we' dakhyo: ngonhaung" wa naonhaung" yaug khao: ngo" re qu" gun caung: lo: rure naonhaung" ba: ako". 12 Ngonhaung" wa naonhaung" re abang mabyid qam: byid' lo: ra". Naonhaung" re nhag' tang" byid' lo: ra". Yao" mung"dan: khyo qo" vao ye: nae" akhang" we' Yao" phungbao re qo" khae: yu nae" qhid' mae" naonhaung" re khai: yu: ra" Mao"So o ngaui: ra" ave, lo, mau" we' kaoso' daui genae" qhid' mae" ngonhaung" wa naonhaung" re ta" jhan: byid' lo va". 13 Naonhaung" wa khonhae" re: Mao"So re jeju caung:khin" na: ra" khyo gatau dalam: jo; ra". Airu wa ngonhaung" li" kho" kyo" ra" Mao"So: mungdao: re xao su byu: nho: mungdao: khyo" mangad:- gaigai: yao: Mao"So: mungdao: ngad: ra" khyo" lham: gyo" yu mung:- lham: khae: yu geyang: ngad: ra". Aiwa gaigai: yao: Mao"So: mungdao: ngad: ra". Pe"mung:ga"re Mao"So wa lam khug: ra" mo, ngonhaung" phaung mae mau" zaui" na yang: ngad: ra". 14 Mao:nhaung: qe we"- ngonhaung" mae bo: ra" khyo wa Yesu Khristu byu qe ngad: ra" Yuda mung" mae" Mao"So: phung: jham mae bo: ru we' dakhyo: yao: bam re:- 15 Asang Yesu re we' lapa qere se' pye' mung: ngonhaung" re yhin" lo mo, ngad: ra" Yuda byu qeyang yhin" rure kham zo" lo: ako". Yao: bam wa Mao"So re khoqhi" sho' mangaui nhao mo, ngad: avako" i? 16 Yao: bam wa Taung bug byu qere khyad' yu: ru qhug' nhao: ra" ai: mungdao: re Taung bug byu qere ngonhaung" kho" kyo" ra" mau" zo" re lhao" re: tam" pye' nae" qam: ke' ako". Ceru: kad' ko" ra" khyo" yao: bam wa khonhae" re: shad' lhoe" lo ko" ra" qobo jham mae" lo" thao" mae" qobo re zaui" pyang" pye' avako". Airumung: ana" lo" thao" mae Mao"So: nhag' yo" ru wa yao: bam: au: dao mae joe" jo; ava". 17 Mao:nhaung: qe we"- ngonhaung" wa naonhaung" we' dazab zo: jho" gao" na: bam: au:- gaung dau: za: jho" gao" na: ru ngad: ra". Ngonhaung" aung khug nhag' lam: mae wa naonhaung" re myid: beim" na:. Ngonhaung" wa naonhaung" re gyai myid yang: naonhaung" re dam: qhug' myao nae" qhid: mae" gyai qam: ke' bam va". 18 Ngonhaung" wa naonhaung" jhao" dam: joe" li" nug: ra". Ngoyao: re: naonhaung" jhao" dam: joe" li" nae" ein: myo: sho' lhang qam: ke' yang: seim" qu" va". Ngadqere: Satan wa ngonhaung" khyo re kaung: kag' pye' byid' ra". 19 Ngonhaung" Asang Yesu dam: joe" li" nae" ra" au:- ngonhaung" wa dang za: yao" qhid' kheim: mae ngonhaung" nho: myid: lao" khyo- ngonhaung" nho: ngaui bau: khyo we' ngonhaung" nho: aung doe; ru we' sin: yang: phug nae" akhyo ngad: ako". Ngonhaung" re phug nhao: ra" mo,- myid: lao" nhao: ra" mo, ngaui bau: nhao: ra" mo, mae naonhaung" re: bobo: ako". 20 Gaigai: yao: naonhaung" wa ngonhaung" nga: ye, jao: we' ngaui bau: khyo ngad: ako". 1 Lo" thao" mae ngonhaung" wa mathan" zang" na loyang: ngonhaung" yao: za: Athen vogaung: mae thang: gyo" co' nae" myid: phyid' mung:- 2 Khristu nho: khyo Ngaui Bau" Lau Dao: Gai re kho" kyo" ra" mau" zo" mae ngonhaung" we' daga" Mao"So: mau" vin yaug ngad: ra" ngonhaung" mao:nhaung: pho" Timothi re naonhaung" jhao" ngonhaung" nhao: ke' va". 3 Naonhaung" mae" khag' dayaug re: ai: yhin" ru jham: mathao mae naonhaung" lam khug: myid malab malaui: geshao: nyhad' tang byid: nae" we' naonhaung" re qam: byid: nae" qhid' mae" ngonhaung" wa yao: re nhao: ke' ru ngad: ra". Airu" ra" yhin" rure ngonhaung" kham zo" ru wa ngonhaung" qhid' mae" Mao"So myid o: ra" khyo ngad: rure naonhaung" yao: ba: ako". 4 Pe"mung:ga"re ngonhaung" wa yhin" rure kham zo: ca" nae" ngad: rure ngonhaung" we' daga" na: au: mae" gau: qhid' khae" yang: ngonhaung" naonhaung" re ta" va". Airuyao: boe" lo va" rure naonhaung" yao: nyang" za: ba: ako". 5 Aimung: yang: ngo wa Timothi re naonhaung" jhao" nhao: ke' ru ngad: ra". Ngo wa mathan" zang" na loyang: naonhaung" lam khug myid khoru: ngad: na ko" rure ba nug mung: yao: re ngo nhao: ke' ru ngad: ra". Ai: yui wa ngonhaung" re ju" phyo' yu: pye' mung: ngonhaung" qam: ke' lo: ra" mau" zo" alhab' aje amyid boe" pye' nae" laug ein: ngo myid: ci" ra". 6 Ana" Timothi wa naonhaung" mae" dam: tug' joe" lo mung: naonhaung" lam khug: myid we' jhid'de; myid we' sin" ra" lau dao: ngonhaung" jhao" vin: lo byid' ra". Naonhaung" wa ngonhaung" re khonhae" re: kao bau myid: beim" na gemung: naonhaung" re ngonhaung" khoqhi" sho' myao nug: na: ru we' dakhyo: naonhaung" re: ngonhaung" re myao nug na ko" ra" khyo re Timothi wa ngonhaung" re lo:ta" kyo" ra". 7 Arumung: mao:nhaung: qe we"- Ngonhaung" wa qug:khai" ru we' dayin dayo: kham zo" na: au: naonhaung" lau thoe re the' gyo: lao"- ngonhaung" wa qam: sag' qo" yu: bam va". Naonhaung" nho: lam khug: myid wa ngonhaung" re qam: qo" yu nhao: ra". 8 Pe"mung:ga"re naonhaung" wa Asang: khug mae tang za: ye; jo, ko" ngad: re wa ana" gaigai: yao: ngonhaung" so' qo" she: ra". 9 Ana" ngonhaung" wa naonhaung" mathao mae ngonhaung" Mao"So re jeju caung:khin" ra". Naonhaung" mathao: yang yao" qhid' kheim: mae ngonhaung" qo" yu: ra" ngaui bau" ru qhid' mae" Mao"So re jeju caung:khin" ra". 10 Naonhaung" we' gaung dau: myo, nho jho" qhug' myao mung: naonhaung" lam khug: ra" khyo mae qo ca" shiko" ra" gu: re li" qo" bao" thaug' byid: nae" qhid' mae" ngonhaung" wa myi" re: na" re: aung khug nhag' lam: alhab' we' Mao"So re akyu" mho' ra". 11 Ngonhaung" Pho" Mao"So yao: we' ngonhaung" Asang Yesu wa naonhaung" jhao" li" nae" qhid' mae" ngonhaung" re khyo qid nyhang" byid: vashao:. 12 Asang wa yao: cao: jho" jhid'de; ra" naonhaung" jhid'de; myid re we' su alhab' re jhid'de; ra" naonhaung" jhid'de; myid re je: myo" li" nhao mung: naonhaung" re ngonhaung" jhid'de; ra" myid qhi" qi" qhang: li" nhao vashao:. 13 Ce:khyo" yang yao: wa ngonhaung" re qam: bo nhao: li" nae"- ngonhaung" Asang Yesu wa yao" gyang" lho" ra" mo, alhab' we' daga" joe" li" ra" au: ngonhaung" Pho" Mao"So: qhid' kheim: mae ngonhaung" wa qobo vhin khyo mabo: ru we' gyang" lho" ra" mo, boe" li" li" genae". 1 Alao" ngonhaung" mao:nhaung: qe we"- Mao"So re o ngaui nhao nae" qhid' mae" ngonhaung" khoru: kaoso' daui ang: ra" khyo re ngonhaung" mae" naonhaung" zhao: yu: avako". Gaigai: yao: ga" re naonhaung" airu: kaoso' daui: lo: avako". Ai: tho' je: ra" khyo" kaoso' daui genae" qhid' mae" ana" ngonhaung" wa Asang Yesu mang mae naonhaung" re jhan" ke' ra". 2 Pe"mung:ga"re Asang Yesu nho: kheim: so' khyo" yang ngonhaung" wa naonhaung" re mho" shid' ra" khyo jham re naonhaung" ba: ako". 3 Mao"So wa naonhaung" re gyang"lho" mo, boe" genae" rure we' gaung sho: shab' ra" gintho' mau" zo"mae" jab byang" sho' loe; beim mo, boe" genae" qhid' mae" o ngaui: ra". 4 Yauggai yaug khao: ngo" wa gyang" lho" ru we' phug' de, nga: ye; ra" khyo" yao" yham sang myhi" we' khoru: zam" na nae" rure ba qo: ra". 5 Mao"So re maba macaung:pa" ko" ra" mo, we' dakhyo: gaung sho: shab' ra" myid re cao" yang: magai: daui ngad: ra". 6 Airumung: cekhyo mae byu khag' ngadqere: yao" Khristan mao:nhaung: pho" re qobo magai: shad'- mangad: lao"- yao" qam: nyaug re magai: khyug' zo: ngad: ra". Asang wa ceru: kad' mo, re qobo dae byid: nae" ngad: ra" khyo ngonhaung" wa naonhaung" re qao qao za: ta" peim: byid: va". Ngonhaung" wa ce: khyo re qhid' phyao: mae" naonhaung" re ta" to: gau ngad: ra". 7 Mao"So wa gaung sho: shab' ra" gintho' mau" zo" mae kaoso' daui nae" qhid' mae" ngonhaung" re khai: yu: ru mangad:. Gyang" lho" rumae kaoso' daui nae" qhid' mae" khai: yu: ru ngad: ra". 8 Airumung: ce: mho" shid' ra" khyo re ngag: pye' ra" yaug khag' ngadqere: byu re ngag: pye' ru mangad:- yao" Gyang" Lho" Byo ngonhaung" re byid: yaug ngad: ra" Mao"So re ngag: pye' ra" yaug ngad: ra". 9 Naonhaung" nho: lam khug: ra" mao:nhaung: qere jhid'de; nae" khyo we' sin: yang: naonhaung" re tung" ke' maca" ngad: ra". Naonhaung" yao: cao: khoru: jho" jhid'de; ca" ra" khyo Mao"So: yang mho" shid' byid' rure naonhaung" yao: zhao: yu: to" avako". 10 Naonhaung" wa ai we' dakhyo: yao:- Makedoni mung" geim" mae na ko" ra" mao:nhaung: qe alhab' mo, re jhid'de; avako". Airumung: mao:nhaung: qe we"- ai: tho' je: gai sho' kad' genae" qhid' mae" ngonhaung" naonhaung" re mho' ke' ra". 11 Qhid' phyao: ngonhaung" naonhaung" re ta" lo: ru we' dakhyo:- naonhaung" kao bau myid qang: ru wa yaug yo: ra" khyo" kaoso' daui nae" we' su: khyo re mabokaung: kag' lo: naonhaung" vae: dug: naonhaung" yao: qo" khau nae" qhid' mae" kao bau myid: qang ge,- 12 Cekhyo" yang naonhaung" wa malam khug: ra" mo; yang phug' myao: byid' rure qo" khae: yu: li" genae". Ailao" naonhaung" wa naonhaung" qo ca" ra" gu: qhid' mae" khag' rere: khug ngha ca" genae" mangad:. 13 Mao:nhaung: qe we"- Myid: lao" khyo maqo" ra" mo, we' dakhyo:- naonhaung" makaug' genae" qhid' mae" ngonhaung" wa shid: byaug va" mo; khyo we' sin: yang: dangman" ra" khyo naonhaung" re ba nhao nug: ra". 14 Yesu wa shid mung: dam: daui: to" li" rure ngonhaung" lam" ra". Airumung: Mao"So wa- Yesu re lam mung: shid: byaug: ra" mo, rere: Yesu we' daga" dam: tug' jhui" yu: li" nae" ga" rure ngonhaung" lam" ra". 15 Ana" ngonhaung" naonhaung" re mho" shid' na: ru wa Asang: nho: mho" shid' dao: ngad: ra". Asang joe" li" ba na mae kaoso' daui: na mo, ngonhaung" wa ai: shid: lo" byaug ko" ra" mo; qhid' khyo ze: ye: genae" mangad:- 16 Amyin" byid' ra" hug' thoe- mug: lagyo" nho: thoe- Mao"So: labo" mad thoe thug' li"li" nae". Alao" Asang yao:- mug:gaung mae" gyo" li" li" nae"- Khristu re lam" mung: shid: lo" ko" ra" mo, wa sao qhid' dam: daui: to" li" genae". 17 Ai: thao ai: ayo, mae kaoso' daui: na: ra" mo, ngonhaung" wa mug: le; phyo: mae Asang we' jho" qhug' nae" qhid' mae" yao: bam we' daga" jham thaui: mae to' yu: ru qhug' nae" ngad:. Airumung ngonhaung" wa Asang we' daga" khonhae" re: qo" na: jo; li" nae". 18 Airumung: ce: dao: jham: yang naonhaung" yao: cao: nhag' jho" tang" byid: ge,. 1 Mao:nhaung: qe we"- Asang joe" li" nae" ba na yo, khyin: khyo we' sin: yang: naonhaung" re tung" ke' maqo ngad: ra". 2 Pe"mung:ga"re Asang: Ba Na wa myi" re khug' hab' li" ru we' dakhyo: joe" li" nae" ngad: rure naonhaung" yao: jhaug' za: ba: ako". 3 Ja: khao: ngo" yaug yo cae: tae" ru we' gug: gug: za: ngad: ga: byu qe ta" au: qug: khai: gyaug ci" ru wa nyag din taung"- yao: bam: dao mae joe" li" nae". Aiwa gaung la" ra" myiqe: nyag din taung" zo:khau no no: li" ru we' dakhyo: joe" lo: li" nae". Byu jham wa qo" phao: loe, genae" mangad:. 4 Ngadqere: mao:nhaung: qe we"- naonhaung" wa mug: cad' khug mae na mo, mangad: ko" ngad: ra". Amung: ai: ba na wa khug' hab' we' dakhyo: nyag din taung" naonhaung" jhao" joe" li" nae" mangad:. 5 Naonhaung" alhab' mo, wa mug: bo" yao: zo: qe- na" nho: yao: zo: qe ngad: ako". Ngonhaung" wa myi" we' sin" ra" mo, re:- mug: cad' we' sin" ra" mo, re: mangad:. 6 Airu: mung: ngonhaung" wa su gaje qe we' dakhyo: magyang: maso: yab: jo, nae" maang ngad: ra". Ngonhaung" wa gyang: gyang: za: so" na yang: lha" na qo: ra". 7 Byu qe wa myi" re yab: myhid' ako". Yao: bam wa myi" re yhid yid: ako". 8 Ngadqere: ngonhaung" wa na" we' sin" ra" mo, ngad: ra". Amung: ngonhaung" wa gyang: gyang: za: ngad qo: ra"- ngonhaung" wa lam khug: ru we' jhid'de; myid re qao nghoe' khyo" ve; ci mung: ngonhaung" nho: khyad' yu: ru qhug' nae" myid: lao" rure jo, to' maug we' dakhyo: zhaung" ci gelang:. 9 Mao"So wa yao: nhag' yo" rure kham zo: geshao: ga:- ngonhaung" re khyin: san: yu: ru mangad:- ngonhaung" Asang Yesu Khristu khyo" yang khyad' yu: rure qo" sang: yu geshao: ga: khyin: san: to" ru ngad: ra". 10 Yao: joe" li" ra" au: ngonhaung" wa daui: na ngadqere:- shid: jo, ngadqere: yao: we' daga" kaoso' daui: na nae" qhid' mae" shid kham: byid' ra". 11 Airu: mung: naonhaung" ana" kad' na vako" ru we' dakhyo: naonhaung" yao: cao: qam: jho" byid:- jho" bao" thaug' byid: ge,. 12 Ngonhaung" mao:nhaung: qe we"- naonhaung" phaung mae mau" zaui: mung: naonhaung" re khyoqhid' au: she: ra" mo, we' Khristan kaoso' daui khyo re mho" shid' byid: ko" ra" mo, re naonhaung" phug' myao: genae" qhid' mae" ngonhaung" mho' ke' ra". 13 Yao: bam zaui: so" ra" mathao mae yao: bam re myo: sho' phug' myao: byid: mung: jhid'de; na ge,. Naonhaung" yao: cao: jho" vang" yang: yaug yo za: na ge,. 14 Mao:nhaung: qe we"- Mau" zaui: noe" mo, re ta" peim: ta" kyang: byid: ge,- gyaug hab' qere qam: byid: ge,- qam: nang: mo, re qam: byid: ge,- yaug khao: ngo" dao mae nhag' lam: qhang ge,. 15 Khag' re: magai: rure magai: ruyang madam: phaug' byid: nae" qhid' mae" lha" ge,- yao: cao: we' byu alhab' mo; qhid' mae" gai: ra" lo, mau" zaui: so: nae" qhid' mae" khonhae" re: myid: qang: to: ge,. 16 Khonhae" re: ngaui bau" na ge,. 17 Mathang mano: akyu" mho' ge, 18 boe" ra" ayaug: khao: ngo" mae jeju caung:khin" byid: ge,. Ceru wa Yesu Khristu we' dadang: dalam: za: doe, mung: naonhaung" kaoso' daui: rumae" Mao"So o: ra" ru ngad: ra". 19 Gyang" Lho" Byo myi: de; ru dase' pye' ge,. 20 Gyang" Lho" Byo vao: jaung" yang: ta" ra" mungdao: re maphug' makhyad' dakad' ge,. 21 Ja: khao: ngo" re ca: qu" ge, 22 gai: ra" ja: re kham: yu phug' cao" mung: makhyang" ra" ja: alhab' re jao" pye' ge,. 23 Naonhaung" re ngaui pyo: yaug yo: ru byid' ra" Mao"So wa jab byang" sho' naonhaung" re gyang" lho" nhao vashao:- ngonhaung" Asang Yesu Khristu joe" li" ra" au: re naonhaung" byo alo zo: gaung khyao geim" re qobo vhin nae" mabo losho' lhaug' zam: byid: vashao:- 24 Naonhaung" re khai: yu: ra" yaug wa ai: mau" re kad' byid' li" nae". Pe"mung:ga"re yao: wa lam ga" kyid yaug ngad: ra". 25 Mao:nhaung: qe we"- ngonhaung" qhid' mae" re: akyu" bao" mho' byid: gela,. 26 Lam khug: ra" mao:nhaung: alhab' mo, re mao:nhaung: jhid'de; myid we' au" byid: gela,. 27 Ngo wa vhin tung" ce:rure lam khug: ra" mo, alhab' re nghe' kyo: genae" qhid' mae" Asang: yang byid' to" ra" kheim: so' khyo" yang naonhaung" re tung" jhan" ke' ra". 28 Ngonhaung" Asang Yesu Khristu nho: nhag' myan" ra" jeju wa naonhaung" we' daga" ngad: jo, vashao: wo".
|