1 Peter
1 Petru1 Yesu Khristu nho: lagyo: pho" ngo Petru wa Puntiu mung"- Galati mung"- Kapadokia mung"- Asia mung" we' Bithunia mung" khaung: mae yekhug: na: byo: sin" qin" ko" ra" Mao"So: yang khyin: yu: ra" mo, re mugsug' tung" ke' ra". 2 Yesu Khristu: mho dao: re tae" gyo: mung: yao" sa" yang kyang" san: pye' ru qhug' genae" qhid' mae" naonhaung" wa Pho" Mao"So: nho: myid: yaung: to" rure cao" yang: khyin: san: yu: ru qhug' ru we' yao" Byo: yang gyang" lho" ra" byu qe toe' yu: ru qhug' ra" mo, ngad: ako". Nhag' myan" ra" jeju we' ngaui pyo: yaug yo: ru naonhaung" mae byang" jo, vashao: wo". 3 Ngonhaung" wa ngonhaung" Asang Yesu Khristu nho: yao: Pho" Mao"So re jeju caung:khin" gelang:- Yao" nho: qi" qhang: ra" nhag' khyag' shogu: ru mathao mae Yesu Khristu re shid: rumae" dam: daui: to" li" nhao: ra" khyo" yang ngonhaung" re kaoso' daui khyo asag' byid' ra". Ceru wa ngonhaung" re kaoso' daui: ra" myid: lao" khyo ke' pyang" byid' ra". 4 Airumung: ngonhaung" wa yao" byu qe: qhid' mae" Mao"So zam" to: byid' ra" mathao" magan: ra" shaman" jeju jo,nho" re qo" sang: yu nae" myid: lao" bam: ra". Mao"So wa ai jham re mabyo, maqeim masham lo: mug:gaung dao mae naonhaung" qhid' mae" zam" to: byid' ra". 5 Lo" thao" ra" ba na yo, khyin: mae yao: thug' li" nae" jin" jin" ngad: ra" khyad' yu: ra" khyo qo" khae: yu nae" qhid' mae" Mao"So: qam: so' khyo" yang naonhaung" lam: khug: ru mathao mae naonhaung" re gug: gam: to: byid' ra". 6 Naonhaung" wa ju" phyo' jham" qu" ru myo: sho' qhug' geyang: ana" au: dazab daso' nhag' kaug' nhag' ngai: na: jo, qo sho' ngadqere: ce: khyo: mathao mae ngaui bau: ge,. 7 Ai: ju phyo' jham" qu" ru jham wa naonhaung" nho: lam khug: myid agyang" ngad: rure sagse: qhu" byid: nae" qhid' mae" ngad: ra". Byo; qeim: lo" ba: ra" qhang re lhao" re:- myi" yang jham" qu" qhug' ra". Ai we' dakhyo: qhang tho' je: phug' de; ra" naonhaung" lam khug: myid re qo" khae: yu nae" qhid' mae" jham" qu" ru qhug' ca" ra". Ailao" za:- Yesu Khristu myao: thug' li" ra" ba na mae caung:khin" byid' ru- phungbao byid' ru we' phug' te' nga: yhe' byid' ru naonhaung" qo" khae: yu: li" genae". 8 Naonhaung" wa yao: re mamyao: qu" gesho' ngad yang: re: yao: re jhid'de; ako". Ana" naonhaung" wa ana" yao: re mathe' myao gesho' ngadqere: yao: re lam khug: ako". Airumung: naonhaung" wa qi" qhang: ru we' phungbao bo: ra" nhad' dao: thoe khyo" maqo" ta" thug' losho' gyai ngaui bau" ako". 9 Pe"mung:ga"re naonhaung" wa byo khyad' yu: rure qo" khae: yu: ako". Airu wa naonhaung" lam khug: myid mae" thug' li" ra" akyu" ngad: ra". 10 Lapa qe wa ce: khyad' yu: ru we' sin: yang: jhaug' za: qin: yang: qho: ako". Yao: bam wa Mao"So: yang naonhaung" re byid: nae" ra" ce: jeju jhaung qhu" khyo re lapa pa: ako". 11 Yao: bam wa khoyo, mae khoru: boe" li" nae" rure qam: ke' yang: qho: lo: ako". Yao: bam: khug mae na: ra" Khristu nho: Byo wa- ce: ba na ayo, mae Khristu zang: qhao" kham zo: ca" ra" qug: khai: dayin dayo: jham rere:- thao re qo" kham: yu nae" ra" phungbao we' sin: yang: re: ceim" shid' yang: lapa pa: to" ako". 12 Lapa qe yao: bam zaui: so" ra" mau" zo" wa yao: bam yao" akyu" qhid' mae" mangad:- naonhaung" qhid' mae" ngad: ra" khyo re Mao"So wa ai: lapa qere qhu" byid' ra". Yao: bam ta" lai: lo ko" ra" khyo jham re yao: mug: gaung mae" nhao: ke' ra" Gyang" Lho" Byo qam: so' khyo" yang lau dao: gai re ta" hau" qin" mo, ngad ko" ra" lagyo: qe: nhad' thoe mae" ana" naonhaung" the' gyo" yu: avako". Ai: khyo jham we' sin: yang: mug: lagyo: qe lhao" re: ba: gyo" yu nug: ako". 13 Airumung: ave, lo, mau" we' kaoso' daui nae" qhid' mae" naonhaung" myid re jin" jin" seim" ci ge,- Yesu Khristu myao: thug' li" ra" ba na mae naonhaung" qo" khae: yu nae" ra" shaman" jeju re aung khug nhag' lam: alhab' we' lha" yang: myid: lao" na ge,- 14 Mao"So: mho dao: re phug' cao" ge,- Naonhaung" maba mabeim: shi" au:- kaoso' daui: qu" ra" ai: kao bau myid o: ra" ja: jham: yang naonhaung" kaoso' daui khyo re dakhang" nhao ge,- 15 Naonhaung" re khai: yu: ra" yaug Mao"So wa gyang" lho" yaug ngad: ru we' dakhyo:- naonhaung" zaui: so" ra" lo, mau" alhab' mae gyang" lho" ge,- 16 Ngo wa gyang" lho" yaug ngad yang: naonhaung" re: gyang" lho" ge,- ga: jham: mug sug' mae ta" to" ra". 17 Yaug khao: ngo" re myo, nho nga: lao: makhyin lo:- yao: yao" lo, mau" ave, re cao" yang: dao: kho' byid' ra" Mao"So re naonhaung" akyu" mho' gelao"- naonhaung" wa yao: re Pho" we"- ga: mho' yao: ako". Airu mung: ce: myid gaung dao mae kaoso' daui: na qo shi" ra" ayo, gu: mae yao: re gyaug phug' ge,. 18 Pe"mung:ga"re naonhaung" phug' pho" qeyang to: byid: co' ra" aphug' made; ra" kaoso' khyo lo, mau" mae" pe" aphug' yang naonhaung" re loe; beim nhao: ra" khyo re naonhaung" ba: ako". Airu wa ngaui qhang ru" ra" byo; qeim: lo" ba: ra" ja: mangad: 19 Aiwa pe" qo mabo no made; ra" Yao Nau" we' daui: ra" phug' de; ra" Khristu nho: kaoso' sa: re xeim: ngaui" byid' ru ngad: ra". 20 Yao: wa ce: mug:myid maphan" shimae" Mao"So: yang khyin: san: to: qhug' yaug ngad mung: ai: naonhaung" akyu" mathao mae ai: lo" thao" ra" ba na jham mae myao: thug' li" nhao: ra". 21 Naonhaung" wa yao: re shid: rumae" dam: daui: to" li" nhao mung:- phungbao ab byid' ra" Mao"So re yao: khyo" yang lam khug: ako". Airumung: naonhaung" lam khug: myid we' myid: lao" ru wa Mao"So mae zaug: jo; ra". 22 Ana" naonhaung" wa dangman" ra" khyo re phug' cao" ko" ruyang naonhaung" yao" gaung re kyang" san: pye' va" rumung: naonhaung" lam khug: ra" mao:nhaung: qere din:man" ra" jhid'de; myid naonhaung" aung khug myid alhab' we' qo" jhid'de; avako". Airumung: naonhaung" yao: cao: aung khug nhag' lam: alhab' we' kyid kyid ein: jho" jhid'de; ge. 23 Pe"mung:ga"re shid ba: ra" yaug mangad:- shid maba: ra" yaug ngad: ra" Asang: yao" zo: dau qekhyo" naonhaung"kaoso' daui: na mung: apyad ato dang: jo; ra" Mao"So: mungdao" yang dam: khau: li" va" mo, ngad: ako". 24 Jham: mugsug' mae xao su byu qe alhab' wa mhin: zo: we' dau mung: yao: bam: phungbao alhab' re: seyo: bin: bu" we' dau: ako". Ai: mhin: zo: wa mai: jhoe' lo" mung: bin: bu" jham re: shu: gyo" lo" ako". 25 Ngadqere: Asang: mungdao: wa apyad ato dang: jo; ra" ga: ta" ko" ru we' dakhyo: ngad: ra". Ai: mungdao: wa naonhaung" re kho" kyo" ra" ai: Lau Dao: Gai ngad: ra". 1 Airumung: naonhaung" wa makhyang: mashab: ra" khyo alhab'- mhug' pyag' ru- geim kad' ru- myid nug' ru we' maphug' makhyad' shad' ra" dao: jham re to" pye' ge,- 2 Nau" nin" qe wa Byo we' sin" ra" nug' agyang" re khonhae" re: moe, shab' na: ru we' dakhyo: ngad ge,. Ai: nug' re shaug' yang: naonhaung" qi" qhang: li" ru we' khyad' yu: ru qhug' ge,- 3 Jham: mugsug' mae Asang wa khoqhi" nhag' khyag' shogu: myid bo yaug ngad: rure naonhaung" yao: ba: avako"- ga: ta" ru we' dakhyo: ngad: ra". 4 Asang jhao" lo geri:- ai: Asang wa byu: yang aphug' made,- ga: ngag: ha: pye' gengadqere: phug' de;- ga: Mao"So: yang khyin: yu: ra" kaoso' daui: ra" laug zang ngad: ra". 5 Naonhaung" wa kaoso' daui: ra" laug jham khyo" lo geri:- Amung: naonhaung" yao" gaung re byo we' sin" ra" yham mo" zhaug' ra" yham vo: boe" ge,- ai: yham mo" mae naonhaung" wa Mao"So khae: yu man" ra" byo we' sin" ra" xeim: re Yesu Khristu khyo" yang qhaug' byid' ra" gyang" lho" ra" khinjaung amyu" qekhyo" aimae caung da" byid' li" genae". 6 Pe"mung:ga"re Jham: mugsug' mae- Ngo wa phug' de; ra" laug zang dazang re khyin: yu mung: aire Ziun bam dao mae Ajheim mae" laug zang khyo" Ngo to" to: va"- Yao: re lam khug: ra" yaug khag' ngadqere: Khonhae" re: nhag' lam: mathao" magyug: nae" ga: ta" ra". 7 Ce: laug zang wa lam khug: ra" mo; qhid' mae" gyai aphug' de; ra". Ngadqere: malam khug: ra" mo; qhid' mae" kam" wa- yham zhaug' ra" mo; yang akyu" mabo ga: khyin: pye' ko" ra" laug zang wa Alhab' tho' mae phug' de; ra" laug zang boe" lo: ra"- ga: ta" to" ra". 8 Alao" gatau jham: mugsug' mae Ce: laug zang wa byu qere tha" thaung: nhao mung: gyang: lang" lo" nhao: ra" laug baui ngad: li" nae"- ga: ta" to" ra". Yao: bam wa mungdao: re malam" geyang: khyid au: the' thaung" ako". Airu wa yao: bam: qhid' mae" Mao"So myid o: ra" khyo ngad: ra". 9 Ngadqere: naonhaung" wa khyin: yu qhug' ra" byumyu" qe ngad: ako". Kho:kham: nho: khinjaung qe- gyang" lho" ra" byumyu" Mao"So sang: ra" byumyu" ngad: ako"- Naonhaung" re mug: cad' khug mae" khai: thug' yu mung: yao" mug' pho: bo" bao shad' khyo khai: vhao" yu: ra" Mao"So: mug' pho: lo, mau" jham re ta" hau" kyo: nae" qhid' mae" khyin: san: yu: ru ngad: ra". 10 Qhid' phyao: naonhaung" wa Mao"So: byumyu" mangad: ko" ngad: ra". Ngadqere: ana" naonhaung" wa- yao" byumyu" ngad: avako". Qhid' phyao: naonhaung" wa Mao"So: nhag' khyag' shogu: rure maba ko" ngad: ra". Ngadqere: ana" naonhaung" wa yao" nhag' khyag' shogu: rure qo" khae: yu: avako". 11 Nga" ba nam qe we"- naonhaung" myid nhag' lam: we' khonhae" re: gye jho" khe' na: ra" gaung sho: myid o kao bau: ra" khyo re dacao" ge,- ein: ce: mug: myid dao mae bang" vo qe we' dazab lhau" khug: na: ra" mo, we' dakhyo: ngad ko" ra" naonhaung" re ngo mho' ke' ra". 12 Mao"So re malam khug: ra" mo; yang magai makhyang" ra" mau" kad' mo, ngad: ako" ga: naonhaung" re qobo zhaug' na ko" au:- naonhaung" wa ai: Mao"So re malam khug: ra" mo; phaung mae naonhaung" ave, lo, mau" gyai gai sho' kad' qo: ra". Alao" yao: bam wa naonhaung" gai: ra" ave, lo, mau" jham re qu" ngaui: khae: yu mung: Mao"So joe" li" ra" ba na mae yao: re caung:khin" li" genae". 13 Asang: mathao mae kheim: so' qo" ra" xao su byu yaug khao: ngo" yang eib: ra" qao: mae na ge,- Khosin" pho" re kheim: so' ajhaung apan qo" yaug ngad: khyo"- 14 mang: zug: pho" qe wa makhyang" ra" mau" kad' mo, re qobo dae byid: mung: gai shab: ra" mau" kad' mo, re wa caung:khin" nae" qhid' mae" Khosin" pho" yang mau" byid' to: qhug' yaug ngad: ra" khyo" khae: yu ge,. 15 Pe"mung:ga"re naonhaung" zaui: so" ra" gai: ra" mau" zo" jham khyo" yang pe" maba: ra" dao: jhau: ra" byugo qe: nhad' dao: thoe re pyid' pye' byid: nae" rure Mao"So o: ra". 16 Naonhaung" wa loe; beim: na mo, we' dakhyo: kaoso' daui ge,. Ngadqere: naonhaung" loe; beim: rure makhyang" ra" mau" daja: ja: re nghoe' pye' nae" qhid' mae" daci ge,- Mao"So: jeim qe we' dakhyo: kaoso' daui: na ge,. 17 Yaug khao: ngo" re phug' myao: ge,- lam khug: ra" naonhaung" mao:nhaung: qere jhid'de; ge,- Mao"So re gyaug ge,- amung: khosin" pho" re phug' myao: ge,. 18 Daui daui mo, we"- naonhaung" Asang qeyang eib: ra" qao: mae na mung: nhag' ba: khyag' ru we' ba: myid nhag' bo mo, reza: mangad:- ayo: athin mung: ra" mo, rere: gyai phug' myao: byid: ge,- 19 Naonhaung" wa Mao"So: myid o: rure ba gemung: makham zo: man" ra" qug: khai: jham dayin dayo: zang: qhao" yang: naonhaung" kham zo: ko" re wa ce: mathao mae Mao"So wa naonhaung" re shaman" byid' li" nae". 20 Pe"mung:ga"re naonhaung" wa yao: yao: kad' shad' ra" qobo qhid' mae" kham zo: nae" man: qi" ra" qobo dae jham re zang: qhao" kham zo: yang: ngad: re wa pe" khin" nae" de; ra" i? Ngadqere: jo: rure kad' yang: qug: khai: khyag' qhui: rure naonhaung" kham zo: yang: ngad: re wa Mao"So wa ai: qhid' mae" naonhaung" re shaman" byid' li" nae". 21 Ceru: kad' genae" qhid' mae" Mao"So wa naonhaung" re khai: yu: to" ru ngad: ra". Khristu yao: yao: re: naonhaung" qhid' mae" qug: khai: khyag' qhui: ru kham zo" lo mung: yao" khyid khu re naonhaung" qo" cao" gesho' ga: naonhaung" re azung aso: to: byid: co' ra". 22 Yao: wa qobo mashad' ngad: ra". Yao" nhad' mae" mhug' ra" dao: thoe khag' khonhae" mathe' gyo" qu" ngad: ako". 23 Yao: maphug' makhyad' roe" ru qhug' lao"- yao: madam: tug' roe" ngad: ra". Yao: qug: khai: dayin dayo: kham zo: lao" re: yao: makyaug' nhin" ngad: ra". Din:man" ra" khyo" dao: kho' yaug ngad: ra" Mao"So: lo, mae kam" wa yao" khyo alhab' re myid: lam: to" ra". 24 Ngonhaung" wa qobo we' sin: yang: shid mung: din: man" ra" khyo" kaoso' daui nae" qhid' mae" Khristu yao: yao: ngonhaung" qobo jham re yao" gaung mae pyao: zang dao mae vin: pye' byid' ra". Naonhaung" wa yao" dae mathao: yang gai: shao: lo" qhug' avako". 25 Naonhaung" wa khyonghung: nghung" lo" byaug ko" ra" yao jham we' dau: lo" ako". Ngadqere: ana" naonhaung" wa yao zam: yaug we' naonhaung" alo zo: re lhaug' zaung" yaug jhao" dam: jhui" tug' lo byid' ru qhug' avako". 1 Ai we' dakhyo: yham sang myhi" qe we"- naonhaung" yham sang pho" qeyang eib khang" ra" qao: mae na ge,- ailao" za: naonhaung" yham sang pho" qemae" Mao"So: mungdao: re malam khug mo, dayaug yaug bo gengadqere: naonhaung" lo,mau" wa yao: bam re ai: mung dao: re lam khug: lo nhao: li" genae". 2 Naonhaung" wa nhad' dao: thoe dakheim: ta" qo genae" mangad:. Pe"mung:ga"re yao: bam wa naonhaung" khoqhi" sho' yaung" gyang" ra" khyo re we' khoqhi" sho' Mao"So re gyaug phug' ra" naonhaung" lo, mau" jham re the' myao: li" genae". 3 Naonhaung" gaung yaung" nae" qhid' mae" adao: pyae xae kyo' nag: shaung: ru- mangad: lao"- qhang laug zai ci: ru- mangad: lao"- ve,mai ve,bau: shaung ve; ru khyo" dashaung ge,. 4 Ai: atha" naonhaung" gaung yaung" shab: ru wa naonhaung" yao" nhag' kao" mae bo: ra" khonhae" re: yaung" jo; ra" nau" nhae" ru we' xam: mag: ra" nhag' lam: mae bo: jo; ra". Ai: ru wa Mao"So: qhid' kheim: mae phug' de; thao" ra" ja: ngad: ra". 5 Pe"mung:ga"re yao: bam: myid: lao" rure Mao"So: lo, mae ke' to: mung: yao: bam yao" yham sang pho" qeyang eib khang" ra" qao: mae na yang: caung:pa" thung" re phug' cao" lai: lo ko" ra" myiqe: we' dakhyo:- yao: yao" gaung re shaung kin kad' ako". 6 Sarah wa airu" yaug ngad: ra". Yao: wa Abraham nho: mho dao: re tae" gyo: mung: yao" asang ga: Abraham re mhang" ra"- naonhaung" wa pe" rere: magyaug lo: gai: ra" mau" zo" re zaui: so: ko" ngad: re wa naonhaung" wa yao" myiqe: zo: qe ngad: ako". 7 Ai we' dakhyo: yham sang pho" qe we"- naonhaung" yham sang myhi" qere naonhaung" tho' qam: nang" ra" mo, ngad: ra" khyo" yao: bam: qhid' mae" bomyid byid: yang: naonhaung" yham sang myhi" qe we' zam" khug: na ca" ra". Yao: bam re phug' myao: taung" zam" khug ge,- Pe"mung:ga"re yao: bam re: Mao"So: kaoso' jhaung qhu" re naonhaung" we' daga" qo" khae: yu: li" genae". Naonhaung" akyu" mho' thoe re pe" yang re: makaung: kag' nae" qhid' mae" ceru: kad' ge,. 8 Lo" thao" ta" nug: ru wa aitho' mago"- naonhaung" alhab' wa nhag' lam: dalam: we' kham zo" ra" myid daja: za: ngad ca" ra". Yao: yao" mao:nhaung: qe we' dakhyo: yao: cao: jho" jhid'de; ge,- yao: cao: jho" nhag' khyag' ru we' jho" nyham: khyo" yang: na ge,. 9 Makhyang" rure makhyang" ruyang- mangad: lao" nhang" rure nhang" ruyang dadam: phaug' ge,- airu: kad' nae" atha"- dam: tug' shaman" byid: ge,- pe"mung:ga"re ai: shaman" jeju wa Mao"So naonhaung" re khai: yu: ra" au:- naonhaung" re byid: nae" qhid' mae" dao:so: byid' to" ra" shaman" je" ju" ngad: ra". 10 Jham: mugsug' mae Kaoso' daui: rure jhid'de; mung:- gai: ra" ba na yo, khyin: jham re myao nae" kao bau: ra" yaug khag' ngadqere: makhyang: mashab: ra" dao: majhau nae" we' mhug' dao: mata" nae" qhid' mae" zaui" ci qo: ra". 11 Yao: wa makhyang" rure to" pye' mung: gai: ra" mau" kad' ca" ra". Yao: wa ngaui pyo: yaug yo: ru qhid' mae" Yao" aung khug nhag' lam: alhab' we' qam: ke' ca" ra". 12 Pe"mung:ga"re Asang wa din:man" ra" mo, re lhaug' caung byid: mung: yao: bam: akyu" mho' thoe jham re tae" gyo: byid' ra". Ngadqere: makhyang" ra" mau" kad' mo, re wa Yao: ngag: thaug' pye' ra"- ga: ta" ru we' dakhyo: ngad: ra". 13 Naonhaung" wa gai: ra" mau" kad' nae" kao bau: na ko" ngad: re wa naonhaung" re dae khag' qo" te' genae" i? 14 Ngadqere: naonhaung" wa jo: rure kad' yang: ai: mathao mae qug: khai: kham zo: yang: ngad ko" re wa- naonhaung" ngaui lho" ko" ra". Naonhaung" khag' rere: dagyaug ge,- Pe" re: damyid: ci" ge, 15 Naonhaung" aung khug nhag' lam: mae Khristu re phug' myao: mung: Asang khyo" phug' te' nga: yhe' ge,- Naonhaung" qo" khae: yu: ra" myid: lao" ru khyo re li" myid' ra" yaug khag' re ngadqere: ayo, makhyin lo: ta" sho' kyo: nae" qhid' mae" jin" jin" kad' na ge,. 16 Ngadqere: aire nau" nhae" za: phug' myao: zo" re" sho' kyo: ge,- naonhaung" wa Khristu nho: thao cao" mo, ngad: ra" khyo" naonhaung" gai: ra" lo, mau" re ta" phoe mung: maphug' makhyad' roe" dao: ta" ra" mo, qho' geshao:- naonhaung" aung khug nhag' lam: re gyang: gyang: za: to: ge,- 17 amung: ce: khyo wa Mao"So: khyo ngad: re wa makhyang" ra" mau" kad' nae" tho' gai: ra" mau" kad' yang: qug: khai: kham zo: nae" ru wa je: gai: ra". 18 Pe"mung:ga"re Khristu wa qobo qo" ra" mo; qhid' mae" dalhang: dae za: bin sho' shid kham: pye' ava". Naonhaung" re Mao"So jhao" jhui" ye: byid: nae" qhid' mae" qobo jab: qe:ra" gaung tha" byugai yaug shid: kham: byid' ra". Yao: wa gaung khyao se' pye' qhug' ngad qere: Byo mae kaoso' daui: na: ra". 19 Ai: Byo khyo" yang yao:- Khristu wa thaung: laung" jo, ko" ra" byo jham re yekho" kyo: byid' ra". 20 Ai: byo jham wa Noa yao" qid sang pho re zhaug' na: ra" ba na gyo: mae nhag' lam: qhang qhang za: yao: lao" na: au: Mao"So: mho dao: re matae" gyo: ko" ra" mo; byo jham ngad: ako". Qid: yang khyad' yu qhug' ra" mo, wa qid sang pho dao mae dajhid' za: ngad mung: alhab' wa she' yaug za: ngad: ako". 21 Airu wa ana" naonhaung" re khyad' yu: ra" qid nyhab' re ceim" shid' ra" ve, so: ngad: ra". Airu: qid nyhab' kham: yu: ru wa gaung khyao mae de; ra" abe, alhau: qhid' re cid' shao: pye' ru mangad:- Aung khug nhag' lam: gyang: gyang: we' Mao"So re dao:so: to" ra" khyo ngad: ra". Yesu Khristu shid: rumae" dam: daui: to" li" ru khyo" yang ai: qid nyhab' kham: yu: ru wa naonhaung" re khyad' yu: ra". 22 Yesu Khristu wa mug:gaung khyo do, lo" byaug mung: Mao"So: lo, yo shad' mae na: jo, yang: mug: lagyo: alhab' mug:gaung: kheim: so' qo" ra" mo, we' phung qam: so' qo" mo, mae eib: na: ra". 1 Khristu wa gaung khyao qug: khai: dayin dayo: kham zo" lo: ruyang- naonhaung" re: yao: myid: ru we' dakhyo: kham: yu mung: naonhaung" yao" gaung re qam: bo nhao qo: ako". Pe"mung:ga"re gaung khyao qug: khai: dayin dayo: kham zo" ra" yaug khag' ngadqere: qobo khug mae mabo: cao: bo loyang: ngad: ra". 2 Airumung: ana" mae" thoegu:- myidgaung dao mae kaoso' daui nae" dang shi" ra" ayo, mae xao su byu qe: kao bau myid: o: ra" ja" yang khang" ra" khyo re macao" lo:- Mao"So: yang khang" ra" khyo mae naonhaung" kaoso' daui qo: ako". 3 Naonhaung" wa lai: lo" ra" ayo, gu: mae malam khug: ra" tarha" Taung bug byu qe we' dakhyo: kad' yang: myao" sho' na: lo: avako". Naonhaung" kaoso' daui khyo mae ave, made, kad' ru- shab' ru- yhid shaug' yid: ru- pyo: poe kad' ru- yhid shaug' poe kad' ru we' qu" ca' taung" ra" so alho jham re goe; pa" ra" khyo jham re kad' lo: ako". 4 Ana" naonhaung" wa yao: bam we' daga" kyao: ru we' nug: khyo: kaoso' daui: rumae mabo: bo gelao"- malam makhug: ra" Taung bug byu qe wa mug' gemung: yao: bam wa naonhaung" re jung" gaui: ako". 5 Ngadqere: yao: bam wa kaoso' daui: ra" mo, re we' shid: ra" mo, re dao: kho' nae" jin" jin" ngad: ra" Mao"So re yao: bam yao" khyo we' sin: yang: japhin: qhu" byid: qo: li" genae". 6 Ce: mathao mae Ngaui Bau: Lau Dao: wa shid: ra" mo, rere: kho" kyo: byid' ra". Ai: shid: ra" mo, wa yao: bam: gaung khyao we' kaoso' daui: na shiko" gu:- byu yaug khao: ngo" we' dakhyo: dao: phyid' ru qhug' ako". Ai: Ngaui Bau" Lau Dao: yao: bam re kho" kyo" ra" khyo wa yao: Byo kaoso' mae Mao"So kaoso' daui: na: ru we' dakhyo:- yao: bam kaoso' qo" daui: na nae" qhid' mae" ngad: ra". 7 Cao jab alhab' qhid' mae" lo" thao" ba na jhao" li" ava". Airumung: naonhaung" wa akyu" qo" mho' na genae" qhid' mae" naonhaung" yao" gaung re khang" mung: so: so: za: gyang" na ge, 8 Alhab' tho' mae je: akhyag: ra" khyo wa yao: cao: kyid za: jho" jhid'de; ge,- pe"mung:ga"re jhid'de; myid wa qobo myo: sho' re qo" nghoe' byid' ra". 9 Naonhaung" wa manyhung lo:- yao: cao: bang" jho" da" byid: ge, 10 yaug khao: ngo" wa Mao"So: jeju jhaung qhu" aja: ja: re zam: pyo yaug we' dakhyo: Mao"So: lo, mae" yao: qo" khae: yu: to" ra" gakai: lai: ra" jeju jhaung qhu" re su gaje qenho" gai: ra" khyo qhid' mae" ci yhung: qo: ra". 11 Tarha" kho" kyo" ra" yaug khag' ngadqere: Mao"So: mungdao: re kho" kyo: ca" ra". Caung da" byid' yaug wa Mao"So yao: re byid' to" ra" qam o: we' caung da" byid: ca" ra". Ailao" za: ja: cao jab alhab' mae Yesu Khristu khyo" yang Mao"So re qo" caung: khin" li" nae". Yesu Khristu wa apyad ato mae phungbao we' qam: so' bo: jo; ra". A men. 12 Nga" jhid'de; ra" ba nam qe we"- Ana" naonhaung" re jham" qu" ra" qug: khai: dayin dayo: xo sho' kham zo" na ko" ra" khyo re damug' ge,. Naonhaung" mae maboe" qu" ra" ja: boe" sho' ngadqere: damug' ge,- 13 Khristu nho: qug: khai: dayin dayo: re naonhaung" qo" bokham zo" na ko" ruyang kam" wa ngaui bau: ge,- ailao" za: Khristu nho: phungbao myao: thug' li" au: naonhaung" wa gyai ngaui bau" ru qhug' li" genae". 14 Naonhaung" wa Khristu nho: thao cao" mo, ngad geyang: maphug' makhyad' kad' ru qhug' ko" ngad: re wa naonhaung" wa ngaui lho" ko" ra". Pe"mung:ga"re Mao"So: Byo ngad: ra" phungbao byang" jo; ra" Byo wa naonhaung" dao mae na: jo; ru ngad: ra". 15 Naonhaung" mae" dayaug yaug byu se' yaug mangad: lao"- khug' yaug mangad: lao"- yug: qo" yaug mangad: lao"- su gaje qe: khyo mae bocao: kaung: kag' yaug ngad: ruyang qug: khai: dayin dayo: dakham zo: nhao ge,. 16 Ngadqere: naonhaung" wa Khristan phung: byu qe ngad geyang: qug: khai: dayin dayo: kham: zo: ko" ngad: re wa ai: mathao mae daqho' ge,- naonhaung" wa Khristu nho: mang re vin ko" ruyang Mao"So re jeju caung: khin" ge,. 17 Dao: kho' nae" qhid' mae" ayo, joe" ava". Mao"So: byu qe sao qhid' dao: kho' ru qhug' qo: ako". Naonhaung" mae" dao: kho' qhid: ngad: re wa Mao"So mae" thug' li" ra" lau dao: gai re malam" ko" ra" mo; qhid' mae" khoru: boe" thao" nae" laug i? 18 Jham: mugsug' mae Din:man" ra" byu qe: qhid' mae" khyad' yu: ru qhug' nae" qug' ra"- aire Mao"So re malam: ra" qobo jab qe wa pe" boe" genae" i? ga: tung" to" ru we' dakhyo: ngad: ra". 19 Airumung: Mao"So myid o: ra" khyo" yang qug: khai: dayin dayo: kham zo: ko" ra" mo, wa- yao: bam: gaung re dao:so: zaung yaug ngad: ra". Yao: bam: phan" Asang re yao: bam yao" gaung ab byid: mung:- gai shab: ra" ave, lo,mau" re xo' kad' na vageshao:. 1 Ngoyao: re: phung: lau:de, dayaug ngad: ra". Ngo wa mao:nhaung: phaung mae" phung: lau: de, qere mho' ke' ra". Ngo wa Khristu nho: qug: khai: dayin dayo: kham zo" rure myo, myao sagse: dayaug ngad mung:- myao: thug' li" nae" ra" phungbao re bokham zo: nae" ra" yaug ngad: ra". 2 Naonhaung" re Mao"So ab byid' to" ra" yao kyaung" re manug masho: myid we' mangad: lo: Mao"So o: ru we' dakhyo: kao bau taung" gun caung lhaug' zaung" genae" qhid' mae" yao zam: mo, naonhaung" re ngo mho' ke' ra". Aphug' jhaung qhu" qhid' mae" za: mangad:- gaigai: yao: kao bau: ra" myid we' naonhaung" mau" zo" re vin vo; ge,- 3 Naonhaung" re ab byid' ra" mo; dao mae eib zo: nae" qam: dake' ge,- yao kyaung" qhid' mae" ve, so: gai kam" wa qhu" byid: ge,- 4 Yao zam: Au: jhaung Pho" thug' joe" li" lao"- bao qhui: ru khonhae" re: masham nae" ra" phungbao ba maug: re naonhaung" qo" khae: yu: li" genae". 5 Ai we' dakhyo: apyad ngai: ra" mo, naonhaung" lau: de, qe: qao: mae na ge,- yao: cao: jho" caung da" byid: nae" qhid' mae" naonhaung" alhab' mo, wa nhag' lam: nyham: khyo" ru ga" ra" qhid' go pin: cug' re thab' ci ge,- pe"mung:ga"re jham: mugsug' mae Mao"So wa ngad beim" ra" mo, re tam" pye' mung:- nhag' lam: nyham: khyo" ra" mo, re kam" wa jeju byid' ra" ga: ta" to" ru we' dakhyo: ngad: ra". 6 Airumung: Mao"So wa yao" ayo, gai mae naonhaung" re tau: to' byid: nae" qhid' mae" Mao"So: qam: so' bo: ra" lo, qao: mae naonhaung" yao" gaung re nyham: khyo" yang: na ge,- 7 Mao"So wa naonhaung" re gun caung yaug ngad: ruyang naonhaung" myid: qug: myid: ci" ru jham alhab' re yao" lo, mae qhaug' to: byid: ge, 8 Gyang: so: za: na ge,- lha" yang: lhaug' na ge,- naonhaung" gyevo Satan wa dayaug yaug re qo" myug: pye' nae" qhid' mae" khang khyi we' dakhyo: kyid' qho: lhang: qin" ra". 9 Naonhaung" lam khug: myid re tang za: zaui" ci mung: ai: Satan re thaug' ngho' pye' ge,- pe"mung:ga"re mug: myid: dao mae" naonhaung" nho: Khristan mao:nhaung: qere: ai: qug: khai: qug: khai: khyo daja: reza: kham zo" lo ko" ru naonhaung" ba: ako". 10 Ngadqere: naonhaung" wa dazab zo: qug: khai: qug: khai: rure bin: kham zo: gethao re nhag' myan" ra" jeju alhab' bo: ra" Mao"So- Khristu we' dadang: dalam: za: doe, nhao yang: apyad ato: phungbao re kham zo: nhao nae" qhid' mae" naonhaung" re khai: yu: ra" Mao"So wa naonhaung" re jab byang" nhao mung: nyhad' tang byid' ru we' qam: bo nhao yang: gang" tang: ra" apan aqao: byid' li" nae". 11 Yao: wa apyad ato khonhae" re: phung qam: so' bo: jo, vashao: wo"- A men. 12 Ngo wa vhin tung" lang" zo: re Khristu mae mao:nhaung: dayaug khyo" ngo myid: lam: ra" Sila yang bao" thaug' byid: yaug naonhaung" re tung" vhin: ke' ru ngad: ra". Ngo wa naonhaung" re qam: byid: nug: ru we' ceru wa dangman" ra" Mao"So: nhag' myan" jeju ngad: rure sagse: kham: kyo: nae" qhid' mae" tung" ke' ru ngad: ra". Ai: jeju mae tang za: ye; jo, ge,- 13 Mao"So: yang khyin: san: yu: to" ra" Babelon vogaung: mae" phung: byu qere: naonhaung" re au" ke' ako". Ai we' dakhyo: nga" zo: Marku re: naonhaung" re au" ke' ra". 14 Naonhaung" yao: cao: dayaug we' dayaug Khristan jhid'de; myid we' bobaug jho" baug yang: jho" au" ge,. Ngaui pyo: yaug yo: ru wa Khristu yang sang: ra" mo, ngad: ra" naonhaung" alhab' we' daga" ngad: jo, vashao: wo".
|