1 John
1 Yohan1 Ngonhaung" wa sao qhid' maqhid mae" jo; jo; ra" kaoso' mungdao: khyo re naonhaung" re tung" vhin: ke' ra". Aimung dao: re ngonhaung" the' gyo: va"- ngonhaung" yao" myo; yang yao: the' myao va"- ngad: va"- ai re ngonhaung" the' myao va"- ngonhaung" yao" lo; yang yao: aire the' tin: va". 2 Ce: kaoso' myao: thug' li" au: ngonhaung" myao: lo: bam va". Airumung: ai: khyo re ngonhaung" jhau mung: Pho" we' daga" na yang: ngonhaung" re qhu" byid' ra" apyad ato: kaoso' khyo we' sin: yang: naonhaung" re ta" hau" kyo: byid' ra". 3 Ngonhaung" wa Pho" we' yao" Yao: Zo: Yesu Khristu we' jho" zam" khug: ra" khyo qo" yu va" rumae naonhaung" re: ngonhaung" we' daga" qo" bobo genae" qhid' mae" ngonhaung" the' myao va" ru we' ngonhaung" the' gyo" yu va" gu: re naonhaung" rere: ta" hau" kyo: byid' ra". 4 Ngonhaung" nho: ngaui bau" ru jab byang" sho' boe" nae" qhid' mae" ce: vhin tung" re ngonhaung" tung" ke' ru ngad: ra". 5 Mao"So wa bo" bao ngad: ru we' yao: mae mug: cad' dajhid' re: mabo ga" ra" ce: mungdao: re yao" Yao: Zo: mae" ngonhaung" the' gyo" yu mung: naonhaung" re ngonhaung" ta" hau" ra". 6 Airumung: ngonhaung" wa yao: we' daga" zam" khug: na: ru ngad: ga: ta" ngadqere: mug: cad' khug mae na: jo; ngad: re wa ngonhaung" wa nhad' dao: thoe we' lo, mau" shid' ja" geim" mae mhug' na mo, ngad: ra". 7 Ngadqere: yao: wa mug: bo" mae na: ru we' dakhyo: ngonhaung" wa mug: bo" mae na: bam: ngad: re ngonhaung" wa yao: cao: jho" zam" khug: na mo, ngad: ra". Amung: yao" Yao: Zo: Yesu Khristu nho: sa" yang qobo ja: khao: ngo" mae" ngonhaung" re kyang" san: pye' byid' ra". 8 Ngonhaung" qobo maqo" ein: ta" bam: ngad: re ngonhaung" wa yao: yao" gaung re mhug' pyag' mo, ngad mung: ngonhaung" khug mae dangman" ru mabo ngad: ra". 9 Ngadqere: ngonhaung" nho: qobo jham re lhang: yu: bam: ngad: re kam" wa yao: wa yao" dao:so: re dang sho' kad' mung: din: vang" ra" khyo" kad' li" li" nae". Yao: wa ngonhaung" nho: qobo jham re khyad' pye' byid: mung: ngonhaung" shad' nghung" ra" qobo jham alhab' rere: kyang" san: pye' byid' li" nae" ngad: ra". 10 Ngonhaung" wa qobo makad' lai: lo ein: ta" bam: ngad: re ngonhaung" wa Mao"So re mhug' hab' khyo" toe' pye' yang: yao" dao: wa ngonhaung" khug mae mabo ngad: ra". 1 Nga" zo: dau qe we"- naonhaung" qobo makad' genae" qhid' mae" ce: vhin tung" naonhaung" re tung" ke' ra". Ngadqere: dayaug yaug qobo kad' yang: ngad: re ngonhaung" gaung tha" Pho" re bobao" goe; mho' byid' ra" byu dayaug qo: ra". Ai: yaug wa din:man: yaug Yesu Khristu ngad: ra". 2 Khristu wa Ngonhaung" qobo jham: qhid' mae" qobo jhin xe' pye' byid: mung: ngonhaung" qobo jham re khyad' pye' byid' ra". Ngonhaung" qobo jham: qhid' mae" za: mangad:- yaug khao: ngo" qhid' mae" re: qobo jhin xe' pye' byid: yaug ngad: ra". 3 Ngonhaung" wa Mao"So: amyin" dao: jham re phug' cao" ngad: re wa yao: re ngonhaung" ba se" rure ngonhaung" zhaug' za: ba: ra". 4 Byu dayaug yaug wa Mao"So re ba: ga: ta" ngadqere: yao" amyin" dao: jham re maphug' cao" ngad: re wa airu" ra" yaug wa mhug' hab' ngad mung: yao" khug mae dangman" ru mabo ngad: ra". 5 Mao"So: mungdao: re phug' cao" ra" yaug khag' ngadqere: yao" khug mae" Mao"So: jhid'de; myid wa gaigai: yao: jab byang" sho' qhu" byid' ava". Ngonhaung" wa Mao"So we' dagaung dasho: za: doe; na: rure cekhyo" yang ngonhaung" ba: ra". 6 Yao: wa Mao"So we' dagaung dasho: za: doe; na yaug ngad: ga: ta" ra" yaug khag' ngadqere: Yesu Khristu kaoso' daui: ru we' dakhyo:- kaoso' daui ca" ra". 7 Nga" jhid'de; ra" ba nam qe we"- ngo naonhaung" re tung" vhin: ke' ra" ce: amyin" dao: wa asag' mangad:- ai: aqhid mae" naonhaung" qo" yu: to" ra" amyin" dao: axug' ngad: ra". Ai: amyin" dao: axug' wa naonhaung" gyo" qu" vako" ra" mungdao: ngad: ra". 8 Ngadqere: ngo ana" naonhaung" re tung" ke' ra" amyin" dao: wa Asag' ngad: ra". Pe"mung:ga"re ai: amyin" dao" nho: dangman" ru wa Khristu mae the' myao mung: naonhaung" mae re: the' myao: ra". Pe"mung:ga"re mug: cad' wa lai: lo" byaug mung: mug: bo" agyang" wa zho: bao: na: ava". 9 Yao: wa mug: bo" khug mae na yaug ngad: ga: ta" ngadqere: yao: yao" mao:nhaung: pho" re nghang" ra" yaug wa ana" joe" sho' ai: mug: cad' khug mae na: jo, yaug ngad: ra". 10 Yao: yao" mao:nhaung: pho" re jhid'de; ra" yaug wa mug: bo" khug mae na: ra" yaug ngad: ra". Yao: wa khag' rere: yao" mathao mae qobo shad' nhao nae" mangad:. 11 Ngadqere: yao: yao" mao:nhaung: pho" re nghang" ra" yaug wa mug: cad' khug mae na: jo, yaug ngad: ra". Yao: wa ai: mug: cad' khug mae su" na mung: yao: khai: ye" lo" na: ru maba ngad: ra". Pe"mung:ga"re ai: mug: cad' wa yao: re myo, jid boe" nhao: ra". 12 Nga" zo: dau qe we"- naonhaung" wa Khristu mathao mae naonhaung" qobo jham re khyad' pye' byid: qhug' vako" ruyang ngo naonhaung" re mugsug' tung" ke' ra". 13 Pho" qe we"- naonhaung" wa sao qhid' maqhid mae" na: jo; ra" yaug re ba mo, ngad ko" ruyang ngo naonhaung" re mugsug' tung" ke' ra". Zolau: qe we"- naonhaung" wa ai: Makhyang" ra" Yaug re aung: pye' vako" ruyang ngo naonhaung" re mugsug' tung" ke' ra". 14 Nga" zo: dau qe we"- naonhaung" wa ai: Pho" re ba ko" ruyang ngo naonhaung" re mugsug' tung" ke' ra". Pho" qe we"- naonhaung" wa sao qhid' maqhid' mae" na: jo; ra" yaug re ba ko" ruyang ngo naonhaung" re mugsug' tung" ke' ra". Zolau: qe we"- naonhaung" wa qam: bo ko" ruyang re:- Mao"So: mungdao: wa naonhaung" khug mae kaoso' daui: na: ruyang re:- naonhaung" wa ai: makhyang" ra" yaug re aung: pye' vako" ruyang re: ngo naonhaung" re mugsug' tung" ke' ra". 15 Mug: myid re dajhid'de, ge,- mangad: lao" ai: mug: myid we' sin" ra" ja: re dajhid'de, ge,- naonhaung" ai: mug: myid re jhid'de; ko" ngad: re wa Pho" re majhid'de, ko" ngad: ra". 16 Gaung sho: shab' ru- myo; yang myao mung: kao bau myid: o: ru- ce: mug: myid dao: byu qe mae phug nhao: ra" ja: ru" ra" ce: myid gaung we' sin" ra" ja: daja: re: ai: Pho" mae" joe" li" ru mangad: ngad: ra". Ai: gu: alhab' wa mug: myid mae" thug' li" ru ngad: ra". 17 Mug: myid we' ai: mae na: ra" byu qe kao bau myid: o: ra" ja: alhab' wa lai: lo" na: ra". Ngadqere: Mao"So myid o: rure phug' cao" ra" yaug wa apyad ato kaoso' daui: na: ra". 18 Nga" zo: dau qe we"- lo" thao" ayo, wa jhao" va" ra". Naonhaung" re ta" kyo" to" ra" Khristu nho: Gyevo wa joe" li" nae" ngad: ra". Ana" yao: Khristu nho: gyevo qe myo: sho' mo, thug' joe" na: bam: avako". Airumung: lo" thao" ayo, wa jhao" va" rure ngonhaung" ba: ra". 19 Ai: byu qe wa ngonhaung" nho: phaung mae" mo, mangad: ko" rumung: yao: bam wa ngonhaung" mae" thug' lo" byaug: avako". Yao: bam wa ngonhaung" nho: phaung mae" mo, ngad ko" re wa yao: bam ngonhaung" we' daga" na genae" ngad: ra". Ngadqere: yao: bam mae" dayaug re: ngonhaung" nho: phaung mae" mo, mangad' rure de: de: za: myao: thug' li" nae" qhid' mae" yao: bam wa ngonhaung" mae" thug' lo" byaug: ako". 20 Ngadqere: naonhaung" wa Khristu yang Gyang" Lho" Byo vhe' sheim: byid' ru qhug' avako". Aimung: naonhaung" alhab' mo, wa ai: dangman" rure ba: ako". 21 Ai rumung: ai: dangman" rure naonhaung" maba geyang: ngo naonhaung" re mugsug' tung" ke' ru mangad:- ai: atha" ai: dangman" rure naonhaung" ba ko" ru we' ai: dangman" rumae" mhug' ru khonhae" re: mathug' li" rure re: naonhaung" ba geyang: ngo naonhaung" re tung" ke' ru ngad: ra". 22 Airulao"- mhug' hab' khag' ngad: ra" i? Ai: mhug' hab' wa Yesu re Meshia mangad: ga: ta" ra" yaug ngad: ra". Airu" yaug wa Khristu nho: Gyevo ngad mung: yao: wa yao: Pho" we' yao: Zo: re ngag: ha: pye' ra" yaug ngad: ra". 23 Pe"mung:ga"re yao: Zo: re ngag: ha: pye' yaug wa yao: Pho" rere: ngag: ha: pye' yaug ngad: ra". Airumung: yao: Zo: re khae: yu: ra" yaug wa yao: Pho" rere: khae: yu: ra" yaug ngad: ra". 24 Airumung: sao qhid' maqhid mae" naonhaung" the' gyo" yu ko" ra" ai: mungdao: re naonhaung" aung khug nhag' lam: mae ke' to: ge,- ai: mungdao: re naonhaung" nhag' lam: mae ke' ci ko" ngad: re wa naonhaung" wa yao: Zo: we' re: yao: Pho" we' re: dagaung dasho: za: khonhae" re: doe, yang: kaoso' daui: na: li" genae". 25 Ceru wa Khristu yao: ngonhaung" re byid: nae" dao:so: byid' to" ra" apyad ato: kaoso' ngad: ra". 26 Naonhaung" re mhug' pyag' yu nae" qam: ke' na ko" ra" mo; khyo we' sin: yang: ngo naonhaung" re mugsug' tung" ke' ru ngad: ra". 27 Ngadqere: naonhaung" re kam" wa Khristu wa naonhaung" dao mae yao" Byo vhe' sheim: byid' ava". Naonhaung" dao mae yao" Byo ana: jo, jo, wa naonhaung" re khag' yang re: mho" shid' byid: maqo ngad: ra". Pe"mung:ga"re yao" Byo wa ja: khao: ngo" naonhaung" re mho" shid' byid' ra". Ai: Byo: yang mho" shid' byid' ra" gu: wa dangman" ru ngad mung: shad' nghung" ru mabo ngad: ra". Airumung: Byo: yang mho" shid' ra" khyo re phug' cao" mung: Khristu we' dagaung dasho: za: doe, yang: kaoso' daui: na ge,. 28 Ngad va"- nga" zo: dau qe we"- yao: joe" li" ra" ba na mae yao: re qho' yang: phao: vho' maqo lo: yao" qhid' kheim: mae mazag mavae qo" ye; jo, genae" qhid' mae" yao: we' dadang: dalam: za: doe; na ge,- 29 Khristu wa din:man: yaug ngad: rure naonhaung" ba: ako". Airumung: jo: ra" mau" re kad' ra" yaug khag' ngadqere: yao: wa Mao"So: zo: dau ngad: rure naonhaung" ba: na nae" ngad: ra". 1 Pho" wa ngonhaung" re khoqhi" sho' jhid'de; rure qu" qu" ge,- yao" jhid'de; myid wa gyai qi" qhang: jo; ruyang ngonhaung" wa Mao"So: zo: dau qe ga: mhang" ru qhug' va". Gai gai: yao: ngonhaung" wa Mao"So: zo: dau qe ngad: ra". Ce: khyo: mathao mae myid gaung byu qe ngonhaung" re maba ko" ru wa yao: bam Mao"So re sao qhid' maba geyang: ngad: ra". 2 Nga" jhid'de; ra" ba nam qe we"- ana" ngonhaung" wa Mao"So: zo: dau qe ngad: ra". Ngadqere: ngonhaung" pe" boe" nae" ru de: de: za: maba ngad: ra". Ngadqere: Khristu thug' li" lao" ngonhaung" wa yao: we' dau nae" ngad: rure ngonhaung" ba: ra". Pe"mung:ga"re ngonhaung" wa yao: re yao: the' myao nae" ngad: ra". 3 Khristu mae ce: myid: lao" khyo qo" ra" yaug khao: ngo" wa Khristu wa gyang" san yaug ngad: ru we' dakhyo: yao: yao" gaung re gyang" san sho' kad' yaug ngad: ra". 4 Qobo shad' lhoe" yaug khag' ngadqere: Mao"So kham" to" ra" tarha" re lhoe" ra" qobo qo" ra". Pe"mung:ga"re tarha" re lhoe" ra" khyo wa qobo ngad: ra". 5 Khristu wa qobo jham re yu: pye' byid: nae" qhid' mae" thug' li" va" rure naonhaung" ba: ako". Yao: mae qobo made, ngad: ra". 6 Airumung: Khristu we' dagaung dasho: za: doe, mung: kaoso' daui: ra" yaug wa xo' yang: qobo makad' ngad: ra". Ngadqere: xo' yang: qobo kad' ra" yaug wa Khristu re mamyao: qu" yaug mangad: lao"- maba shi" yaug ngad: ra". 7 Nga" zo: dau qe we"- khag' yang re: naonhaung" re damhug' pyag' nhao: pye' ge,- Khristu wa din:man: yaug ngad: ru we' dakhyo: din:man" ra" mau" zaui: so" ra" yaug khag' ngadqere: din: man" ra" yaug ngad: ra". 8 xo' yang: qobo kad' ra" yaug khag' ngadqere: yao: wa min: yui: nho: byu ngad: ra". Pe"mung:ga"re min: yui wa sao qhid' maqhid' mae" qobo kad' lo yaug ngad: ra". Ai: min: yui: nho: lo, mau" re phyo' pye' nae" qhid' mae" Mao"So: yao: zo: joe" li" ru ngad: ra". 9 Mao"So: zo: dau ngad: ra" yaug khag' ngadqere: xo' yang: qobo makad' ngad: ra". Pe"mung:ga"re Mao"So: ve, khyao wa yao" khug mae bo: jo; ra". Mao"So wa yao" yao: Pho" ngad: ruyang yao: wa xo' yang: qobo maqo" kad' ngad: ra". 10 Ce wa Mao"So: zo: dau qe we' min: yui: nho: zo: dau qe: agyo: mae de: de: za: jho" shai" ra" khyo ngad: ra". Jo: ra" mau" zo" makad' ra" yaug- mangad: lao" yao: yao" mao:nhaung: pho" re majhid'de; ra" yaug wa Mao"So: zo: dau mangad: ngad: ra". 11 Sao qhid' maqhid mae" naonhaung" gyo" yu ko" ra" mungdao: wa- ngonhaung" wa yao: cao: jho" jhid'de; ca" ga" ra" mungdao: ceru ngad: ra". 12 Ngonhaung" wa Ka-in: we' magai: dau ngad: ra". Yao: wa ai: makhyang" ra" yaug we' sin" ra" yaug ngad mung: yao" yao: nhaung: Abela re se' pye' ra". Ka-in wa pe"mung: yao: re se' ra" i? Yao" lo, mau" wa shad' mung: yao: nhaung" nho: lo, mau" wa jo: ruyang ngad: ra". 13 Airumung: nga" mao:nhaung: qe we"- myid gaung byu qeyang naonhaung" re nghang: ko" re damyid: mug' ge,. 14 Ngonhaung" wa ngonhaung" yao" mao:nhaung: qere jhid'de; va" ruyang shid: rure to" pye' co' yang: kaoso' daui: ra" khyo lai: vao: ye: va" ra" khyo re ngonhaung" ba: ra". Jhid' de; myid mabo: ra" yaug khag' ngadqere: shid: runho: qam: so' khug mae na: jo; ashi". 15 Yao" mao:nhaung: pho" re nghang" ra" yaug khag' ngadqere: byu se' yaug ngad: ra". Amung: byu se' yaug mae apyad ato: kaoso' mabo: rure naonhaung" ba: ako". 16 Khristu wa ngonhaung" qhid' mae" yao" kaoso' re byid' pye' va" ruyang ngonhaung" wa jhid'de; myid pe" ngad: rure ba: bam va". Airumung: ngonhaung" re: ngonhaung" nho: kaoso' re ngonhaung" mao:nhaung: qe: qhid' mae" byid' pye' ang: ra". 17 Jo,nho" qo" ra" byu dayaug wa yao" mao:nhaung: pho" myaung sho" na: rure the' myao ngadqere: nhag' maqu" khyag' ra" yaug wa Mao"So re jhid'de; ga: khoru: qo" ta" nae" i? 18 Nga" zo: dau qe we"- ngonhaung" nho: jhid'de; myid wa nhad' dao: thoe za: magai: ngad ngad: ra". Lo, mau" khyo" qhu" byid' ra" dangman" ra" jhid'de; myid ngad qo: ra". 19 Airu: mung: ce: khyo" yang ngonhaung" wa dangman" ru we' sin" ra" mo, ngad: rure ba nae" ngad: ra". Mao"So: qhid' kheim: mae re: lam lam za: qo" ye; li" nae". 20 Ngonhaung" nho: aung khug nhag' lam" yang ngonhaung" re dao: phyid' yang: ngad: re wa Mao"So wa ngonhaung" nho: aung khug: nhag' lam: tho' je: qi: yaug ngad: ru we' ja: khao: ngo" re ba yaug ngad: rure ngonhaung" ba: ra". 21 Airumung: nga" jhid'de; ra" ba nam qe we"- ngonhaung" nho: aung khug: nhag' lam" yang ngonhaung" re dao: maphyid' yang: ngad: re wa ngonhaung" wa Mao"So: qhid' kheim: mae mazag mavae: myid qo" li" nae" ngad: ra". 22 Ngonhaung" wa yao" amyin" dao: jham re phug' cao" mung: yao" nga:ye; ra" mau" zo" re kad' mo, ngad: ruyang ngonhaung" mho' yao: ra" ja: pe" ngadqere: yao" lo, mae" qo" khae: yu nae" ngad: ra". 23 Mao"So: amyin" dao: jham wa Yao" yao: Zo: Yesu Khristu re ngonhaung" lam" mung: Khristu yao: ngonhaung" re amyin" byid' to: co' ru we' dakhyo: yao: cao: jho" jhid'de; qo: ra" ga" ru ngad: ra". 24 Mao"So: amyin" dao: jham re phug' cao" ra" yaug wa Mao"So we' dagaung dasho: doe, yang: kaoso' daui yaug ngad mung: Mao"So re: yao: we' dagaung dasho: za: doe, yang: na: ra". Mao"So: yang ngonhaung" re byid' to" ra" khyo" yang Mao"So wa ngonhaung" we' dagaung dasho: za: doe; na: rure ngonhaung" ba: ra". 1 Nga" Jhid' de; ra" ba nam qe we"- Byo re qo" khae: yu yang: ngad: ga: ta" ra" mo, alhab' re dalam" ge,- ngadqere: yao: bam qo" khae: yu: to" ra" byo wa Mao"So mae" joe" li" ru ngad mangad: rure jham" qu" ge,- pe"mung:ga"re lapa pyag' qe myo: sho' wa khyi" khao: ngo" khyo thug' ye" lo" byaug: avako". 2 Mao"So: byo ngad mangad: rure naonhaung" ba genae" ra" khyo wa ceru: ngad: ra". Yesu Khristu wa xao su byu ve, vin yang: joe" li" yaug ngad: ra" khyo re lhang: yu: ra" Byo wa Mao"So mae" joe" li" ra" Byo ngad: ra". 3 Ngadqere: ceru re ha: pye' ra" yaug wa Mao"So mae" joe" li" ra" Byo re qo" khae: yu: ra" yaug mangad: ngad: ra". Yao: qo" yu: to" ra" byo wa Khristu nho: Gyevo pho" mae" joe" li" ra" byo ngad: ra". Ai: byo joe" li" nae" rure naonhaung" the' gyo" to: gau ngad: ako". Ai: byo wa ana" ce: mug: myid dao mae joe" na: ava". 4 Nga" zo: dau qe we"- naonhaung" wa Mao"So: byu qe ngad gemung: lapa apyag' qere aung: pye' avako". Pe"mung:ga"re naonhaung" khug mae na: ra" Byo wa ai: mug: myid byu qe: khug mae na: ra" byo tho' qam: so' je: bo yaug ngad: ra". 5 Lapa apyag' qe wa mug: myid we' sin" ra" khyo re ta" ako". Mug: myid wa yao: bam re tae" gyo: byid' ra". Pe"mung:ga"re yao: bam wa mug:myid byu qe ngad: ako". 6 Ngadqere: ngonhaung" wa Mao"So: byu qe ngad: ra". Mao"So re ba: ra" yaug khag' ngadqere: ngonhaung" ta" ra" dao: re tae" gyo" ra"- Mao"So: byu mangad: ra" yaug khag' ngadqere: ngonhaung" nho: dao: re matae" gyo: ngad: ra". Airumung: ceru re qu" yang: dangman" runho: Byo we' shad' runho: byo khoru: jho" shai" rure ngonhaung" qo" ba: kho' ta" ra". 7 Jhid' de; ra" ba nam qe we"- ngonhaung" yao: cao: jho" jhid'de; gelang:- pe"mung:ga"re jhid'de; myid wa Mao"So mae" joe" li" ru ngad: ra". Jhid' de; myid bo: ra" yaug khag' ngadqere: Mao"So: zo: dau ngad mung: yao: wa Mao"So re ba yaug ngad: ra". 8 Jhid' de, myid mabo: ra" yaug wa Mao"So re maba ngad: ra". Pe"mung:ga"re Mao"So wa jhid'de; myid ngad: ra". 9 Ngonhaung" wa yao: Zo: khyo" yang kaoso' qo" yu nae" qhid' mae" Mao"So wa yao" zote: Zo: re mug: myid khyo nhao: ke' byid' ra" khyo" yang yao" jhid'de; myid ngonhaung" re qhu" byid' ava". 10 Jhid'de; myid ga" ru wa ceru ngad: ra". Ngonhaung" wa Mao"So re sao qhid' jhid'de; ru mangad:- Mao"So wa ngonhaung" re jhid'de; mung: ngonhaung" qobo jham re khyad' pye' byid: nae" qhid' mae" yao" yao: Zo: re nhao: ke' byid' ru ngad: ra". 11 Jhid'de; ra" ba nam qe we"- Mao"So wa ngonhaung" re ceqhi" jhid'de; yang: ngad: re wa ngonhaung" re: yao: cao: jho" jhid'de; nae" ngad: ra". 12 Mao"So re khag' khonhae" re: mamyao: qu" ngad: ra". Ngadqere: ngonhaung" wa yao: cao: jho" jhid'de; ngad: re wa Mao"So wa ngonhaung" we' dagaung dasho: za: kaoso' daui mung: yao" jhid'de; myid wa ngonhaung" khug mae jab byang" nhao: ra". 13 Mao"So wa ngonhaung" re yao" Byo byid' to: va" ruyang ngonhaung" wa Mao"So we' dagaung dasho: za: kaoso' daui: na: rure we' yao: re: ngonhaung" we' dadang: dalam: za: kaoso' daui: na: rure ngonhaung" jhaug' za: ba: ra". 14 Yao: Pho" wa yao" yao: Zo: re mug: myid byu qenho: Khyad' Yu: Asang boe" nhao nae" qhid' mae" nhao: ke' ra" khyo re ngonhaung" the' myao yang: ai: khyo re su gaje qere re: ngonhaung" ta" kyo: byid' ra". 15 Yesu wa Mao"So: yao: Zo: ngad: ra" ga: ta" lhang: yu: ra" yaug khag' ngadqere: yao: wa Mao"So we' dagaung dasho: za: kaoso' daui yaug ngad mung: Mao"So re: yao: we' dagaung dasho: za: kaoso' daui: ra". 16 Mao"So: yang ngonhaung" re byid' to" ra" jhid'de; myid re ngonhaung" yao: ngonhaung" ba mung: lam: ra". Mao"So wa jhid'de; myid ngad: ra". Jhid'de; myid khug mae kaoso' daui: ra" yaug khag' ngadqere: yao: wa Mao"So we' dagaung dasho: za: na mung: Mao"So re: yao: we' dagaung dasho: za: na: ra". 17 Ai: dao: kho' ra" Ba Na mae ngonhaung" mazag mavae ngad nae" qhid' mae" jhid'de; myid wa ngonhaung" khug mae jab byang" nhao: ra". Pe"mung:ga"re ce: mug: myid dao mae ngonhaung" kaoso' daui: ra" khyo wa Khristu nho: kaoso' daui khyo we' dakhyo: za: ngad: ruyang ai: vae" ra" myid re ngonhaung" qo" yu: li" nae". 18 Jhid'de; myid mae gyaug: ru mabo ngad: ra". Jab byang" ra" jhid'de; myid wa gyaug ci" ru alhab' re khe' thug' pye' ra". Airumung: gyaug: ra" yaug khag' mae re: jhid'de; myid majab byang" ngad: ra". Pe"mung:ga"re gyaug myid wa qobo dae byid' ru we' sin" ru ngad: ra". 19 Mao"So wa ngonhaung" re sao qhid' jhid'de; yang: ngonhaung" jhid'de; ru ngad: ra". 20 Byu dayaug yaug- yao: wa Mao"So re jhid'de; yaug ngad: ga: ta" ngadqere: yao: yao" mao:nhaung: pho" re nghang" ngad: re wa yao: wa mhug' hab' ngad: ra". Pe"mung:ga"re yao: myao: ra" yao" mao:nhaung: pho" re yao: majhid'de, ngad: re wa yao: mamyao: qu" ra" Mao"So re yao: khoru: magai: jhid'de; ngad: ra". 21 Khristu ngonhaung" re byid' to" ra" amyin" dao: wa- Mao"So re jhid'de; ra" yaug khag' ngadqere: yao: yao" mao:nhaung: pho" rere: jhid'de; ca" ga" ru ngad: ra". 1 Yesu re Meshia ngad: ga: lam" ra" yaug khag' ngad qere: Mao"So: yao: zo: ngad: ra". Yao: pho" re jhid'de; ra" yaug khag' ngad qere: ai: yao: Zo: rere: jhid'de; ra". 2 Mao"So re jhid'de; mung: yao" amyin" dao: jham re phug' cao" ra" khyo" yang ngonhaung" wa Mao"So: zo: dau qere jhid'de; ra" khyo re ngonhaung" ba: ra". 3 Pe"mung:ga"re ngonhaung" Mao"So re jhid'de; ga" ru wa yao" amyin" dao: jham re phug' cao" ru ngad: ra". Yao" amyin" dao: jham wa ngonhaung" qhid' mae" gyai mataung" qug: ngad: ra". 4 Pe"mung:ga"re Mao"So: zo: dau yaug khao: ngo" wa mug: myid re qo" aung: pye' ra". Ngonhaung" wa ai: mug:myid re ngonhaung" nho: lam khug: myid khyo" yang aung: pye' ra". 5 Ai: mug: myid re khag' qo" aung: pye' ra" i? Yesu wa Mao"So: yao: Zo: ngad: ga: lam" ra" yaug za: qo" aung: pye' ra". 6 Yesu Khristu wa yao" nho: Qid nyhab' kham: yu ra" qid we' yao" nho: shid: ra" sa: we' joe" li" ra" yaug ngad: ra". Yao: wa qid khyo" yang za: joe" li" ru mangad:- qid we' sa: shid' ja: geim" we' joe" li" yaug ngad: ra". Ce:ra" khyo dangman" rure Byo yao: yao: sagse: kham byid' ra". Pe"mung:ga"re ai: Byo wa dangman" ru ngad: ra". 7 Sagse: sam ja: jo; ra". 8 Ai jham wa Byo- Qid we' Sa: jham ngad: ako". Ai: sagse: sam ja: gu: alhab' wa sagse: daja: re za: kham: ako". 9 Byu: nho: sagse: dao: re ngonhaung" lam" ra". Ngad qere: Mao"So: sagse: dao: wa je yang: lam ga" ra". Mao"So: sagse: kham: ra" khyo wa yao" yao: Zo" nho: khyo we' sin: yang: ngad: ra". 10 Airumung: Mao"So: yao: Zo: re lam" ra" yaug khag' ngad qere: yao: yao" nhag' lam: khug mae ce: sagse: kham: ru bo: jo; ra". Ngad qere: Mao"So re malam: ra" yaug wa Mao"So re mhug' hab' ga: jho: ra". Pe"mung:ga" re yao: wa yao: Zo" nho: khyo we' sin: yang: Mao"So ta" to" ra" dao: re malam" yang: ngad; ra". 11 Ai: sagse: dao: wa Mao"So wa ngonhaung" re apyad ato: kaoso' byid' to: mung:- Yao" nho: yao: Zo: wa ai: kaoso' nho: ajhaung ngad: ra". 12 Yao: Zo: re qo" yaug khag' ngad qere: kaoso' re qo" yaug ngad: ra". Mao"So: yao: Zo: re maqo" ra" yaug wa kaoso' maqo" ngad: ra". 13 Mao"So: yao: Zo: re lam" ko" ra" mo, naonhaung" wa apyad ato: kaoso' re qo" yu vako" ra" khyo re naonhaung" ba genae" qhid' mae" ngo wa naonhaung" re ce: mugsug' tung" vhin: ke' ru ngad: ra". 14 Yao" myid o: rure cao" yang: ngonhaung" wa yao: re daja: ja: mho' yang: ngad: re yao: ngonhaung" re tae" gyo: byid: nae" ngad: rure ngonhaung" jhaug' za: ba: ruyang ngonhaung" wa Mao"So: qhid' kheim: mae mazag mavae qo" vao ye" ra". 15 Ngonhaung" yao: re khonhae" mho' ngad qere: yao: tae" gyo: byid' ra". Cera" khyo dang: rure ngonhaung" ba: ruyang yao: mae" ngonhaung" mho' ra" ja: ngonhaung" re byid' li" nae" rure re: ngonhaung" ba: ra". 16 Mao: nhaung: dayaug shid man" ra" qobo mangad' ra" qobo shad' rure nao myao: re nao wa yao" qhid' mae" Mao"So re akyu" bao" mho' byid: qo: ra". Mao"So wa yao: re kaoso' byid' li" nae". Ceru wa shid man" ra" qobo mangad: lo: qobo shad' ra" mo; qhid' mae" za: ngad: ra". Ngad qere: shid man" ra" qobo ga" ru jo; ra". Shid man" ra" qobo shad' ra" mo; qhid' mae" akyu" bao" mho' byid: ca" ein: ta" ru mangad:- 17 Shad' nghung" ra" lo, mau" alhab' wa qobo ngad: ra". Ngad qere: shid man" ra" qobo mangad: ra" qobo ga" ru jo; ra". 18 Mao"So: zo: dau ngad yaug wa xo' yang: qobo makad' rure ngonhaung" ba: ra". Pe"mung:ga"re Mao"So: yao: Zo: wa yao: re gug: gam byid: yang: makhyang" ra" yaug wa yao: re dae maqo" te' ngad: ra". 19 Mug: myid geim" wa ai: makhyang" yaug: yang eib: ra" qao: mae ngad: jo, sho' ngad qere: ngonhaung" wa Mao"So: byu qe ngad: rure ngonhaung" ba: ra". 20 Dang man" ra" Mao"So re ngonhaung" ba nae" qhid' mae" Mao"So: yao: Zo: wa joe" li" mung: ba: gyo" ra" laba lajhao re byid: yaug ngad: rure ngonhaung" ba: ra". Ngonhaung" wa dangman" ra" Mao"So we' dagaung dasho: doe; na: ra". Ai wa Yao" yao: Zo: Yesu Khristu we' ngonhaung" dagaung dasho: za: doe; na: ru ngad: ra". Ceru wa dangman" ra" Mao"So ngad mung: ce wa apyad ato kaoso' ngad: ra". 21 Nga" zo: dau qe we"- so apyag' jham re jao" pye' ge,.
|