1 Korinthu

1 Korinthu 1

1 Mao"So myid o: ru we' dakhyo: Khristu Yesu nho: lagyo: khyo" khyin: san: to" ru qhug' ra" ngo Polu we' ngonhaung" mao:nhaung: pho" Sostheni mae"- 2 Korinthu vogaung: mae na ko" ra" Mao"So: phung:- Mao"So: gyang" lho" byu qe boe" genae" qhid' mae" khai: yu qhug' ko" ra" mo,- Khristu Yesu we' dagaung dasho: boe" ra" khyo" yang Mao"So: byu qe boe" lo ko" ra" mo, we' ngonhaung" Asang we' yao: bam: Asang ngad: ra" Asang Yesu Khristu re caung:pa" ko" ra" khyi" khao: ngo" mae" byu qere mugsug' tung" ke' ra". 3 Ngonhaung" nho: Pho" Mao"So we' Asang Yesu Khristu mae" nhag' myan" ra" jeju we' ngaui pyo: yaug yo: ru wa naonhaung" we' daga" ngad: jo, vashao: wo"- 4 Mao"So naonhaung" re Yesu Khristu khyo" yang nhag' myan" ra" jeju byid' to: va" ruyang ngo wa khonhae" re: nga" Mao"So re jeju caung:khin" ra". 5 Pe"mung:ga"re naonhaung" wa Khristu we' dagaung dasho: boe" mung: nhad' dao: thoe alhab' mae re: laba lajhao khyo alhab' mae re: khyo khe' khao: ngo" mae na: dai: li" qam: bo: li" avako". 6 Khristu nho: khyo ai: mungdao: wa- naonhaung" khug mae gyai tang sho' agyi: zaug: jo; ava". 7 Airumung: Asang Yesu Khristu myao: thug' li" nae" rure naonhaung" lao" na: ra" au: naonhaung" wa Byo: shaman" jeju daja: rere: malhoe' lo: qo" kham zo" ako". 8 Ngonhaung" Asang Yesu Khristu nho: Ba Na mae re: qobo vhin: ru maqhug' genae" qhid' mae" athao" joe" sho' yao: wa naonhaung" re nyhad' tang byid' li" nae". 9 Yao: Zo: ngad: ra" ngonhaung" Asang Yesu Khristu we' zam" khug: na nae" qhid' mae" naonhaung" re khai: yu: ra" yaug Mao"So wa lam ga" ra" yaug ngad: ra" wo". 10 Nga" mao:nhaung: qe we"- naonhaung" phaung mae phung: jho" kho' ru majo, genae" qhid' mae" naonhaung" jhau: ra" dao: thoe jho" vang" genae" rure ngonhaung" Asang Yesu Khristu nho: kheim: so' khyo" yang naonhaung" alhab' mo; re ngo mho' ke' ra". Danhag' lam:- myid: qang: ru dalam: za: we' mung: bin sho' dadang: dalam: boe" na ge,- 11 Pe"mung:ga"re nga" mao:nhaung: qe we"- naonhaung" phaung mae yao: cao: jho" byo; na ko" ra" khyo re Kaloe nho: yham byu qe daqhae" yang ngore lota" kyo" ako". 12 Ngo ta" nug: ru wa naonhaung" dayaug daja: ta" na: ako". Dayaug wa ngo wa Polu thao cao" yaug ngad:- Gatau dayaug wa- ngo wa Apolo thao cao" yaug ngad:- Dayaug wa ngo wa Petru thao cao" yaug ngad:- amung: gatau dayaug wa ngo wa Khristu thao cao" yaug ngad:- ga: ta" na: ako". 13 Khristu re phung: myo: sho' khyo" kho' sin" to: va" i? Polu wa naonhaung" qhid' mae" pyao: zang dao mae shid kham: byid' ra" i? Naonhaung"wa Polu mang re lao: yang: qid nyhab' kham: yu: avako" i? 14 Krispu we' Gaiu shid' zo: mae" je yang: dayaug rere: ngo qid nyhab' makham byid' ruyang ngo wa Mao"So: jeju re caung:khin" ra". 15 Airumung: nga" mang re lao: yang: qid nyhab' kham: yu va" ga:- khag' re: maqo" ta" ngad: ako". 16 (Stephan re we' yao" yham byu qere re: ngo qid nyhab' kham byid: va"- ngadqere: ngo wa gayaug khag' rere: qid nyhab' kham byid' ein: ngo mamyid: beim: ngad: ra".) 17 Khristu wa qid nyhab' kham byid: nae" qhid' mae" ngore manhao: ke' ngad: ra". Yao: wa ngore Lau Dao: Gai re kho" kyo: nae" qhid' mae" nhao: ke' ra". Pyao: zang dao mae Yesu shid kham" ra" qam: so' akeim maboe" byaug vashao: xao su byu: nho: pha,jhi" dao: re maci lo:- ai: Lau Dao: Gai re kho" kyo: nae" ngore nhao: ke' ru ngad: ra". 18 Pe"mung:ga"re- pyao: zang dao mae Khristu shid kham" ra" khyo we' sin" ra" mungdao: wa- ai: jeim" lo" mo; qhid' mae" pe" lajheim: mabo ngadqere: khyad' yu: ru qhug' ra" ngonhaung" qhid' mae" wa Mao"So: qam: so' ngad: ra". 19 Jham: mugsug' mae Ngo wa pha,jhi" ba: ra" mo; pha,jhi" re phyo' pye' byid: mung: ba jhao: ra" mo; laba lajhao re kye" pye' byid: nae"- ga: ta" to" ra". 20 Airumung:- pha,jhi" ba: ra" yaug khai: mae i? Ba jhao mo, khai: mae i? Ce: mug: myid dao mae" dao: jhau mung ban" qe khai: mae i? Mao"So wa ce: mug: myid: nho: pha,jhi" adu: adae: ngad: rure qhu" byid' ava". 21 Pe"mung:ga"re Mao"So wa xao su byu qe yao: bam: pha,jhi" khyo" yang yao: re maqo" gai: ba genae" qhid' mae" yao: yao" pha,jhi" yang kad' to" ra". Ai: atha"- pe" lajheim: mabo ga: xao su byu: yang jho: pye' ra"- ngonhaung" kho" kyo" ra" mungdao: khyo" yang Mao"So wa lam khug: ra" mo, re khyad' yu nae" qhid' mae" myid: phyid' ava". 22 Yuda byu qe wa mug' pho: ve, lho mho' ako"- Greeg byu qe wa pha,jhi" re qho: ako". 23 Ngonhaung" wa pyao: zang dao mae jin" se' pye' ra" Khristu nho: khyo re kho" kyo" ra". Aimung dao: wa Yuda byu qe: qhid' mae" nhag' lam: tha: nae" ru ngad mung: Taung Bug Byu qe: qhid' mae" wa lajheim: mabo: ra" mungdao: ngad: ra". 24 Ngadqere: Mao"So: yang khai: yu: to: mo, ngad: ra" Yuda byu qe we' Taung Bug Byu qe alhab' mo; qhid' mae" Khristu wa Mao"So: qam: so' we' pha,jhi" ngad: ra". 25 Pe"mung:ga"re Mao"So: adu: adae: ngad nhohab: ru wa xao su byu qe: pha,jhi" tho' je: ra"- Mao"So: qam: nang" ru wa xao su byu qe: qam: o: tho' je: qam: bo: ra". 26 Nga" mao:nhaung: qe we"- Mao"So naonhaung" re khai: yu: ra" au:- naonhaung" pe" ru" mo, ngad ko" rure myid: beim: ge,- Xao su byu shad' khyo" qu" re- naonhaung" mae pha,jhi" ba mo,- kheim: so' qo" ra" mo,- azhao" myhao: ra" mo, wa dajhid' za: ngad: ako". 27 Pha,jhi" ba: ra" mo, qho' phau: genae" qhid' mae" Mao"So wa ce: mug: myid byu qeyang pe" lajheim: mabo ga:- jho: ra" ja: re thaug khyin: yu: ra". Amung: yao: wa qam: so' bo mo, qho' phau: genae" qhid' mae" mug: myid byu qeyang qam: nang" ra" ga: myid: jho: ra" ja: re khyin: yu: ra". 28 Ce: mug: myid: byu qeyang akhyag ngad:- ga: myid: jho: to" ra" mau" re phyo' pye' nae" qhid' mae" mug: myid byu qeyang qu" ngai qu" nyham: ra" ja: qu" ca' qu" jung" ra" ja:- pe" mangad:- ga: myid: jho: ra" mau" re Mao"So khyin: yu: ra". 29 Airumung: Mao"So: qhid' kheim: mae khag' re: phug nae"made, ngad: ra". 30 Ngadqere: Mao"So wa naonhaung" re Khristu Yesu we' dagaung dasho: za: boe" nhao mung: Mao"So wa Khristu re ngonhaung" nho: pha,jhi" boe" nhao: ra". Ngonhaung" wa Yesu khyo" yang Mao"So: yang jo: ra"- ga: sun" yu byid' ru qhug' mung: Mao"So: gyang" lho" ra" byu qe boe" li" ru we' lhoe' ke' byid' ru qhug' bam va". 31 Airumung: Jham: Mugsug' mae ta" to" ru we' dakhyo:- khag' ngadqere: phug nug: ngad: re wa- Mao"So zaui: so: va" ra" mau" zo" mathao mae za: phug: na shao:.

1 Korinthu 2

1 Nga" mao:nhaung: qe we"- Mao"So: no; thao" ra" dangman" ra" Mungdao: re kho" kyo: nae" qhid' mae" ngo naonhaung" jhao" joe" li" au:- dao: zang dao: qi: jham we' myhao: ra" pha,jhi" dao: jham re ci yang: makho" kyo:- 2 Pe"mung:ga"re naonhaung" we' daga" na: jo; au: ngo wa- Yesu Khristu khyo we' yao" pyao: zang dao mae shid kham: ra" khyo mae" je yang:- gatau: khyo alhab' re to" pye' nae" ein: ngo myid: phyid' to: va". 3 Airumung: naonhaung" jhao" joe" li" ra" au: ngo wa qam: nang" ru we' gyaug: nin" zo" re" mungdao: re kho" kyo: mho" shid' ra" au: xao su byu qenho: ba jhao: ra" pha,jhi" mungdao: we' 4 kho" kyo: byid' ru mangad:- Mao"So: Byo: qam: so' bo mung: dangman" ra" khyo sagse: qo" qhu" byid' ra" dao: thoe we' kho" kyo: byid' ru ngad:. 5 Airumung: naonhaung" lam khug: ru wa xao su byu qenho: pha,jhi" mae ngha: ru mangad:- Mao"So: qam: so' mae za: ngha: ru ngad: ra". 6 Ngadqere: ngo wa Mao"So Byo we' sin: yang: zoqao" qe ngad ko" ra" mo, re pha,jhi" mungdao: kho" kyo" ra"- ngadqere: ai: pha,jhi" wa ce: mug: myid: nho: pha,jhi" mangad:- ce: mug: myid re eib: ra" qam: so' bo: ra" mo; pha,jhi" re: mangad: mug: myid re eib: ra" mo; qam: so' wa byo; qeim: lo" nae" ngad: ra". 7 Ngo kho" kyo" ra" pha,jhi" wa xao su byu qe mamyao sho' nyham" to: mung: mug: myid re lhao" re: maphan" shimae" ngonhaung" phungbao qhid' mae" san: to: byid' ra" ai: Mao"So: no; thao" ra" pha,jhi" ngad: ra". 8 Ce: mug: myid re eib ko" ra" zug: qe khag' re:- ce: pha,jhi" re maba ko" ngad: ra". Yao: bam aire ba geyang: ngad: re wa- yao: bam wa ai: phungbao bo: ra" Asang re pyao: zang dao mae jin" se' pye' genae" mangad: 9 Ngadqere: jham: mugsug' mae- Khag' re: mamyao: qu"- magyo" qu"- gai: boe" nae"- ga: khag' re: majho: qu" ra"ja: re yao:- Mao"So wa yao: re jhid'de; ko" ra" mo; qhid' mae" nyhang" jaung: to: byid' ra"- ga: ta" to" ru we' dakhyo: ngad: ra". 10 Ngadqere: Mao"So wa ce: khyo jham re yao" Byo khyo" yang ngonhaung" re qhu" shid' byid' ava"- ai: Byo wa ja: khao: ngo" re paui: qho: na: ra"- Mao"So: no; thao" ra" myid: yaung: to" ra" khyo re lhao" re: paui: qho: ra". 11 Byu dayaug: nho: khyo alhab' re wa- yao" khug mae bo: ra" yao: yao" byo za: aba: ra". Ai we' dakhyo: Mao"So" khyo alhab' re wa Mao"So: Byo za: aba: ra". 12 Ngonhaung" wa ce: mug: myid: yang sang: to" ra" byo re kham: yu: ra" mo, mangad:- ai: atha" Mao"So: yang ngonhaung" re byid' to" ra" jeju alhab' re qo" ba nae" qhid' mae" Mao"So: yang nhao: ke' ra" Byo re qo" kham: yu: ra" mo, ngad va". 13 Airumung:- ngonhaung" wa xao su byu: nho: nyan: pha,jhi" khyo" yang mho" shid' byid' ra" dao" yang ta" kyo: byid' ru mangad:- Byo re qo" khae: yu va" mo, re Byo we' sin" ra" ai: dangman" ra" khyo jham re ta" sho' kyo: byid' rumae Byo khyo" yang mho" shid' byid' na: ru ngad: ra". 14 Byo re maqo" khae: yu: ra" yaug khag' ngadqere: Mao"So: Byo: yang byid' ra" jeju jhaung" qhu" jham re maqo" khae: yu ngad: ra". Airu" yaug wa Byo we' sin" ra" jeju khyo re gaigai: yao: maba: gyo: ngad: ra". Pe"mung:ga"re ai: jeju jham: nho: aphug' re Byo mae apan aqao: to: yang: za: dao: qo" gai: phyid' ruyang ai: gu: wa yao" qhid' mae" pe" lajheim: mabo ngad: ra". 15 Byo re qo" khae: yu: ra" yaug kam" wa ja: Khao: Ngo" nho: aphug' re dao: qo" phyid' ra"- ngadqere: yao: re wa khag' re: dao: maqo" phyid' ngad: ra". 16 Jham: mugsug' mae- Asang: nho: myid re khag' qo" ba byid: nae" i? Yao: re khag' pha,jhi" qo" byid: nae" i? ga: ta" to" ru we' dakhyo:- ngad: ra". Ngadqere: ngonhaung" kam" wa Khristu nho: laba lajhao myid qo" ra" mo, ngad: ra".

1 Korinthu 3

1 Nga" mao:nhaung: qe we"- Gai gai: yao: ein: re- ngo wa naonhaung" re Byo re qo" khae: yu vako" ra" mo, re ta" kyo" ru we' dakhyo:- naonhaung" re maqo" gai: ta" kyo: ngad: ra". Ngo wa naonhaung" re ce: mug: myid: we' sin" ra" byu qe we' dakhyo: re:- Khristan lam khug: rumae zoshao doe; na mo, re we' dakhyo: ta" kyo: qo: ra". 2 Naonhaung" wa qao: ra" zo:ve re maqo" zo: shiko" ruyang ngo naonhaung" re zo:ve aqao mazho:- Nug' za: naonhaung" re jhaug' ra". Ana" lhao" re: naonhaung" qao: ra" zo:ve zo: nae" majin" shiko" ngad: ra". 3 Pe"mung:ga"re naonhaung" wa ce: mug: myid: nho: ave, lo, mau" we' dakhyo:- kao so' daui: na: ako". Naonhaung" yao: cao: jho" myid nug' ru we'- naonhaung" yao: cao: myan" myo: jho" byo; na ko" ru ce wa- mug: myid byu: suna azhao" khyo" naonhaung" kao so' daui: na ko" rure sagse: qhu" byid' na: ru mangad: i? 4 Naonhaung" mae" dayaug wa- ngo wa Polu thao cao" yaug ngad:- gatau dayaug wa- ngo wa Apolo thao cao" yaug ngad:- ga: ta" gelao"- naonhaung" wa mug: myid: byu qenho: ave, lo, mau" we' dakhyo: kad' na ko' ru mangad: ge i? 5 Dang za: ta" gelang: ga" re- Polu wa khag' ngad: i? Amung: Apolo wa khag' ngad: i? Nga" shid' zo: wa naonhaung" re lam khug: lo sho' jhui" au: she byid' ra" Mao"So: daui daui okaung tao za: angad: ra". Mao"So: yang nga" shid' zo: re dayaug re daja: kho' byid' ra" mau" re zaui: so" ru shid' yaug ngad: ra". 6 Ngo wa ai: myug: shi: re qho: yaug ngad: ra"- Apolo wa ai: agae re qid sheim: yaug: ngad: ra". Ngadqere: ai: agae re yaug: li" nhao yaug wa Mao"So ngad: ra". 7 Myug: shi: re qho: yaug we' qid sheim" ra" yaug wa akhyag mangad: ngad: ra"- Agae yaug: thug' li" nhao ra"- Mao"So yaug lam: akhyag ngad: ra". 8 Ai: myug: shi: re qho" ra" yaug we' qid sheim" ra" yaug: nho: myid: lao" khyo wa daja: za: ngad: ra". Yao: yao: zaui: so" ra" mau" zo" re cao" yang: Mao"So wa yaug khao: ngo" re jhaung qhu" byid' li" nae". 9 Pe"mung:ga"re nga" shid' zo: wa Mao"So: qhid' mae" mau" zaui: byid' ra" mau" zaui: cao: ngad: ra". Amung: naonhaung" wa Mao"So: yo myid jham ngad: ako"- Naonhaung" wa Mao"So: yham re: ngad: ako". 10 Mao"So: yang ngore byid' ra" jeju jhaung qhu" re ci yang:- ba jhao: ra" yham kad' yaug we' dakhyo: apan aqao: zhaug' to: va". Gatau dayaug wa ai: apan aqao: dao mae xo' zao: ra"- ngadqere: xo' zao: ra" yaug khag' ngadqere: yao: khoru: zao: rure lha" ca" ra". 11 Pe"mung:ga"re Mao"So wa- Yesu Khristu re Date: za: ngad: ra" apan aqao: khyo" zhaug' to: gau ngad va" ruyang apan aqao: gatau dalam: maqo" gai: zhaug' ngad: ra". 12 Ai: apan aqao: dao mae byu daqhae: wa- qhang- mangad: lao"- ngaui- mangad: lao"- daqhae: wa phug' de; ra" laugsin" jham re ci yang: xo' zao: li" genae". Amung: gatau daqhae: wa- sag'- mangad: lao"- mhin: mangad: lao"- khovho jham we' xo' zao: li" genae". 13 Ai: byu qe dayaug we' dayaug: nho: lo, mau" khoru: ngad: rure Khristu joe" li" ra" ba na mae myao: thug' li" nhao nae"- pe"mung:ga"re ai: ba na mae myi: wa byu yaug khao: ngo" nho: lo, mau" re qhu" byid' li" nae" ngad: ra". Ai: myi: wa yaug khao: ngo" nho: lo, mau" re jham" kin: kho' mung: yao: yao" gao: aman" re qhu" byid' li" nae". 14 Ai: apan aqao: dao mae xo' zao: ra" yham vo:- myi: dae re qo" kham: ngad: re wa- yham zhaug' ra" yaug wa aphug' jhaung qhu" qo" khae: yu: li" nae". 15 Byu dayaug yaug: nho: yham nga" pye' ngad: re wa- yao: wa seim" byaug: li" nae"- ngadqere: yao: yao" gaung yao: kam" wa myishae gyo: mae" phao: loe, yaug we' dakhyo:- khyad' yu: ru qhug' li" nae". 16 Naonhaung" wa caung:pa" yham ngad mung:- Mao"So: Byo wa naonhaung" khug mae na: ra" khyo re naonhaung" dang za: ba gau ngad: ako". 17 Airumung: Mao"So: yham re phyo' qheim" pye' ra" yaug khag' re ngadqere:- Mao"So wa yao: re phyo' qheim" pye' li" nae". Pe"mung:ga"re caung:pa" yham wa gyang" lho" ru we' naonhaung" yao" gaung wa yao" yham ngad: ako". 18 Khag' re: yao: yao" gaung re damhug' pyag' ge, Naonhaung" phaung mae" dayaug yaug ce: mug: myid: nho: azhao" khyo" cao" yang: yao: wa pha,jhi" bo yaug ngad:- ga: myid jho: yu: ngad: re wa- yao: gaigai: pha,jhi" bo yaug boe" li" nae" qhid' mae" adu: adae: yaug shi" boe" qo: ra". 19 Pe"mung:ga"re ce: mug: myid byu qe pha,jhi" ngad:- ga: myid: jho: ra" ja: wa Mao"So: qhid' kheim: mae wa adu: adae: ja: ngad: ra". Jham: mugsug' mae Pha,jhi" bo: ra" mo, re Mao"So: yang yao: bam: ba: jhao: rumae yao:- myi" nhao: ra"- ga: ta" ru we' dakhyo: ngad: ra". 20 Alao"- jham: dao: gatau dalam: mae- Pha,jhi" bo: ra" mo, myid: to" ra" ja: pe" phug' made; rure Mao"So ba: ra"- ga: ta" to" ra". 21 Airumung: khag' ngadqere: khyoqhid' au: she byu qe qo" kad' ru we' sin: yang: daphug shao:- Gai gai: yao: ga" re naonhaung" wa ja: khao: ngo" re naonhaung" sang: ako". 22 Polu- Apolo- Petru- mug: myid ceru- kao so' daui: ru we' shid: ru- ana" qae: we' joe" lo nae" ra" qae:- alhab' re naonhaung" sang: ako". 23 Airumung: naonhaung" re sang yaug wa Khristu ngad mung:- Khristu re sang yaug wa Mao"So ngad: ra".

1 Korinthu 4

1 Naonhaung" wa nga" shid' zo: re Mao"So: no; thao" ra" dangman" ra" khyo jham re zam: pyo byid' na: ra" Khristu nho: daui daui mo, ngad: ra" khyo" myid: jho: yu nae" ang: ako". 2 Airu" nho: daui daui yaug mae bo ang: ra" ave, daja: wa- yao" asang re nhag' lam: jhaug' zaug myid bo: ra" ave, ngad: ra". 3 Ana" ngo wa naonhaung" yang- mangad: lao" xao su byu khag' nho: azhao" re cao" yang: ngad ngad dao: kho' ru qhug' nae" ngo dajhid' re: sang: kho: gaung mayug- Ngoyao" gaung re ngoyao: lhao" re: dao: kho' ra" khyo ngo makad'. 4 Nga" aung khug nhag' lam: wa- gyang: gyang: za: ngad: ra"- ngadqere: airu wa ngo qobo gaigai: maqo"- ga: sagse: maqo" kad' qhu" ngad: ra". Asang wa ngore myid' kho' yaug ngad: ra". 5 Airumung: naonhaung" wa ayo, majoe" shire khag' rere: dao: kho' nae" ma- ang ngad: ra". Lo" thao" ra" dao: kho' ru wa Asang joe" li" sho' lao" qo: ra"- yao: wa mug: cad' khug mae nyham" to" ra" ja: re we' byu: aung khug nhag' lam: mae khug' myid: yaung: to" ra" khyo re myao: thug' li" nhao nae". Ailao"- yaug khao: ngo" wa- yao: yao: man: qi" ru we' dakhyo:- Mao"So: yang caung:khin" ru qhug' li" genae". 6 Nga" mao:nhaung: qe we"- dau ang: ra" tarha" re phug' cao" ge,- ga" ra" dao: khyo: lajheim: re ba: zhao: yu genae" qhid' mae" naonhaung" akyu" mathao mae Apolo we' nga" khyo alhab' re ve, so: khyo" bota" ke' ru ngad: ra". Naonhaung" mae" khag' ngadqere: dayaug re nga: yhe' mung: dayaug re maphug' makhyad' dakad' ge,- 7 Khag' yang nao re su gaje tho' je nhao: ra" i? Naonhaung" qo" ra" ja: alhab' wa- Mao"So: yang byid' to" ru mangad: i? Aire naonhaung" qo" gu: alhab' wa Mao"So: jeju jhaung qhu" mangad:' ruru: naonhaung" khoru: qo" gai: phug ko" i? 8 Naonhaung" qo ca" gu: alhab' qo" vako" i? Naonhaung" jo,nho" qo" vako" i? Nga" shid' zo: lhao" re: kho:kham maboe" re naonhaung: kho:kham boe" vako" i? Naonhaung" kho:kham boe" gelao"- nga" shid' zo: re: naonhaung" we' daga" kho:kham bokad' nae" qhid' mae" naonhaung" kho:kham gaigai: boe" genae" rure ngo kao bau: ra". 9 Pe"mung:ga"re Mao"So wa ngonhaung" re mug: lagyo: qe we' myid gaung byu qe alhab' zhaug' qu" genae" qhid' mae" mo, byu qe: qhid' kheim: mae se' pye' nae" dao: phyid' qhug' ko" ra" mo, rere" ru: nyham: thao" ra" jo, qo re byid' to: va" khyo" ngo the' myao: ra". 10 Pe"mung:ga"re ngonhaung" wa Khristu mathao mae adu: adae: mo, ngad: ra"- ngadqere: naonhaung" wa Khristu we' dagaung dasho: za: doe, mung:- pha,jhi" bo mo, ngad: ako". Ngonhaung" wa qam: nang: mo,- naonhaung" wa qam: bo mo,- ngonhaung" wa jung" pye' qhug' mo,- naonhaung" wa nga: yhe' qhug' mo, ngad: ako". 11 Ana" joe" sho' yao: ngonhaung" vae: moe; qid shab' na mung:- mai jad: bau: jad: ve; na:. Ngonhaung" wa be; ru qhug' ru we' damae" damae du" lae" qin" mo, ngad: ra". 12 Ngonhaung" yao" lo; yang yao: qam: ke' myaung: dug mung: mau" khao" zo" bam va"- nhang" ru qhug' lao"- shaman" byid:- yhin" ru qhug' lao"- ngonhaung" zang: kham: bam va". 13 Ngonhaung" maphug' makhyad' kad' ru qhug' lao"- ngonhaung" dao: gai phaug' tau" ra"- ngonhaung" wa ana" joe" sho' yao: myidgaung: nho: basad jham we' maca' majhad' we' dakhyo: ngad: ra". 14 Naonhaung" re qho' phyo' nug yang: ngo ceru: tung" ke' ru mangad:- ngadqere: ngo jhid'de; ra" nga" zo: qere we' dakhyo: mho" nug yang: ngad: ra". 15 Pe"mung:ga"re- naonhaung" Khristan kao so' daui khyo mae khyoqhid' au: she mho" shid' byid: nae" byu tug khyo" na gengadqere: naonhaung" wa pho" dayaug za: qo" ako"- ngo wa ai: Lau Dao: Gai naonhaung" re kho" kyo: byid' ra" khyo" yang naonhaung" re Khristu we' dagaung dasho: za: doe; lo: ra" khyo mae naonhaung" yao: pho" boe" lo: ra". 16 Airumung:- nga" ave, aso: re cao" genae" qhid' mae" naonhaung" re ngo mho' ra". 17 Ce: mathao mae ngo wa- Khristu mae lam ga" ru we' nga" zo: ru: jhid'de; ra" Timothi re naonhaung" jhao" nhao: ke' ra". Yao: wa Yesu Khristu we' dagaung dasho: doe; ra" kao so' daui khyo asag' mae ngo phug' cao" ra" tarha" jham ngad: ra"- khyi" khao: ngo" mae" phung: alhab' re ngo mho" byid' ra" tarha" re naonhaung" re dam: myid: beim: nhao: li" nae". 18 Naonhaung" mae" daqhae: wa- ngo naonhaung" jhao" joe" li" nae" mangad: lo:- ga: myid: jho yang: nga: kad' phug: na: ako". 19 Ngadqere: Asang myid o: ngad: re wa- mataung" myao" re ngo naonhaung" jhao" li" nae"- ailao"- airu: nga: kad' phug: ra" mo; nhad' dao: thoe reza: mangad:- yao: bam: qam: so' rere: ngoyao: myao: ba: yu: li" nae". 20 Pe"mung:ga"re Mao"So: mung"dan: wa nhad' dao: thoe mae bo: ru mangad:- Qam: so' mae bo: ra". 21 Ngo naonhaung" jhao" vose: ci yang: joe" li" nae" o ko" i? Mangad: lao"- jhid'de; nau" nhae" ra" myid khyo" joe" li" nae" o ko" i? Naonhaung" kholam: re o ko" i?

1 Korinthu 5

1 Taung bug byu qe lhao" re: makad' ra" gyo" gyaug sho' ra" gaung sho" ra" gintho' mau" zo" jham naonhaung" phaung mae xo: na ko"- ga: khyag' ta" hau" na ko" rure ngo the' gyo" ra". Yauggai dayaug yao: myhi" nhaung: we' zam" na: ra"- ga" ra" thoe re ngo the' gyo: va". 2 Naonhaung" wa nga: kad' phug: na: ako"- naonhaung" wa kaug' qhui nae" she, ang mung: airu: kad' ra" yaug re naonhaung" phaung mae" phoe' thug' pye' ca" ra". 3 Ngo wa gaung khyao khyo" naonhaung" we' va" kyo: na ngadqere:- nhag' lam: byo khyo" wa- naonhaung" we' daga" ngad: ra". Ngoyao: naonhaung" jhao" joe" na: ra" khyo" ai: qu" ca' qu" yao: ra" lo,mau" kad' ra" yaug re ngonhaung" Asang Yesu mang mae ngo dao: kho' va". 4 Naonhaung" daga" zang" ham: na: au:- ngore: nhag' lam" byo khyo" naonhaung" we' daga" bobo: na: au: re- ngonhaung" Asang Yesu qam: so' we' ai: yauggai re- 5 Yao" gaung byo; qeim: lo" shao: Satan nho: lo, khyo ab: pye' ge,- aimung: Asang: Ba Na mae yao" byo khyad' yu: ru qhug' vashao:- 6 Naonhaung" nga: kad' phug: ru wa magai ngad: ra". Man" dajhid' za" ru wa cin man" phaui: alhab' re baung" je" li" nhao: ra"- ga" ra" dao: khyo: re naonhaung" ba: ako". 7 Naonhaung" bin sho' gyang" shao: li" geshao:- naonhaung" wa man" axug' ngad: ra" qobo re yu: pye' ca" ako".Aimung: naonhaung" wa man" mabo: ra" cin man" phaui: asag' we' dakhyo:- boe" genae". Gai gai: yao: naonhaung" ai we' dakhyo: ngad ko" rure ngo ba: ra". Pe"mung:ga"re ana" ngonhaung" Lai co' Xeim: yao nau" ngad: ra" Yesu re xeim: bin: ngaui" to: byid: va" ruyang ngonhaung" nho: Lai co' Poe re kad' nae" jin" jin" ngad va". 8 Airumung: ai: man" axug' ngad: ra" qobo we' makhyang: mashab: ra" lo, mau" bo: ra" mug we' mangad: lo:- man" mabo: ra" mug ngad: ra" gyang" san: ru we' dangman" ra" mug we' Lai co' Poe kad' gelang:- 9 Gaung sho" ra" gintho' mau" qho: ra" mo, we' naonhaung" mazam" genae" qhid' mae" naonhaung" jhao" ngo vhin tung" tung" ke' va". 10 Ngadqere: ngo wa ce: mug: myid dao mae" gaung sho" nho: gintho' mau" kad' ra" mo,- myo, no, so' kho' mo,- khug' mo,- sulho re caung:pa" ra" Taung bug byu qe we' dazam" ge, ein: ta" nug: ru mangad:- Airu" mo, re jao" pye' nae" ga: lao" wa- naonhaung" wa ce: mug: myid mae" bin sho' thug' lo" ca" genae" ngad: ra". 11 Ngo ta" nug: ru wa- yao: yao" gaung re Khristan mao:nhaung: ngad: ga: ta" mung:- gaung sho" nho: gintho' mau" qho: ra" mo,- myo, no, so' kho' ru- sulho re caung:pa" ru- su re gaui mho: ru- yhid shaug' ya" ru- khug' yaug we' dazam" ge,- ein: ru angad: ra". Airu" yaug we' wa daga" zaung yang: zo:ve lhao" re: dazo: dashaug' ge,- 12 Phung: byu mangad' ra" mo, re dao: kho' nae" ru wa nga" mau" mangad: ngad: ra". Yao: bam re wa- Mao"So yao: dao: kho' li" li" nae"- ngadqere: naonhaung" wa- naonhaung" yao" phung: byu qere dao: kho' ang ko" ra" mangad: i? Jham: mugsug' mae ta" to" ru we' dakhyo:- ai: makhyang" ra" yaug re naonhaung" phaung mae" phoe' pye' ge,

1 Korinthu 6

1 Naonhaung" mae" Khristan mao:nhaung: dayaug yaug wa- Khristan yao: cao: we' mung khyo jho" ta" nae" bo: ngad: re pe"mung: Mao"So: byu qere mata" sho' nhao lo:- ai: Khristan mangad: ko" ra" tarha" zug: qe: qhid' kheim: khyo yao: vae" ye" ra" i? 2 Mao"So: byu qe wa mug: myid re dao: kho' nae" ngad: rure naonhaung" maba ko" i? Airu: mug: myid re dao: kho' genae" ra" mo, naonhaung" wa ngai: ra" mung mau" re lhao" dao: maqo" kho' ko" i? 3 Ngonhaung" wa mug: lagyo: jham re dao: kho' nae" ngad: rure naonhaung" maba ko" i? Airumung: ce: pyad mae" mung mau" re khoqhi" je yang: dao: qo" kho' genae" i? 4 Airu" mung mau" bo: thug' li" lao"- Khristan phung: mae mang maqo" thao" ra" mo; yang ta" sho' vhang" nae" qhid' mae" aijham re ciye: genae" i? 5 Naonhaung" qhid' nae" aqho' axag' ngad: ra". Khristan mao:nhaung: yao: cao" agyo: mae mung mau" bo: thug' li" lao"- aire ta" kho' byid: nae" pha,jhi" bo: ra" byu dayaug khalhao" naonhaung" phaung mae gaigai: yao: qo" ko" mangad: i? 6 Ai: atha" Yesu re malam khug: ra" tarha" zug: pho" yang dao: kho' byid: nae" qhid' mae" Khristan mao:nhaung: yao: cao: yung" jho" do, genhaung i? 7 Airu: naonhaung" yung" jho" do, ko" ru yao: Khristan qenho: ave, lo, mau" re naonhaung" gyoe; gyo" lo" nhao: ru ngad: ako". Ai: atha" matarha" ra" khyo kad' rure kham zo" ru wa- naonhaung" qhid' mae" je: gai: ra" mangad: i? Lhad' zo: qhug' ru wa naonhaung" qhid' mae" je: magai: i? 8 Airu: kham zo: nae" atha" naonhaung" wa Khristan mao:nhaung: yao: cao: yao: lhao" re: matarha" ru kad' mung: jho" lhad' zo" na: ako". 9 Makhyang" ra" mo, wa Mao"So: mung"dan: re maqo" sang genae" rure- naonhaung" jhaug' za: ba: ako". Aimung: naonhaung" gaung re dapyag' vhan" ge,- Gaung sho" nho: gintho' mau" cao" mo,- sulho re caung:pa" ra" mo,- su: myi: shad' mo,- yauggai yao: cao: myiqe: yao: cao: gaung sho: jho" zam" ra" mo,- 10 Khug' mo,- myo, no, so' kho' ra" mo,- yhid shaug' ya: mo,- su re gaui mho mo,- khug' hab' qe- khag' ngadqere: Mao"So: mung"dan: re qo" sang genae" mangad:. 11 Naonhaung" mae" damyo" wa airu" ra" mo, ngad: lo: ako"- ngadqere: naonhaung" wa qobo kyang" shao: pye' ru qhug' avako". Mao"So re qhaug' byid' to: va" mo, ngad: ako"- naonhaung" wa Asang Yesu Khristu nho: mathao mae re: ngonhaung" Mao"So: Byo mathao mae re: jo: ra" mo, ngad:- ga: Mao"So: yang sun" yu byid' ru qhug' va" mo, ngad: ako". 12 Naonhaung" mae" dayaug yaug wa- ngo wa pe" ja: kad' nae" akhang" re: qo" yaug ngad:- ga: ta" li" nae". Ngadqere: ja: khao: ngo" wa ni" qhid' mae" akyu" mabo ngad: ra"- ngo pe" ja: kad' ngadqere: maqo ein: qo" ta" ngadqere:- nga" gaung re ngo kad' ra" mau" daja: ja" nho: jeim doe, nhao nae" mangad:. 13 Gatau dayaug wa- zo:ve wa vae: dug' qhid' mae" ngad mung: vae: dug: wa zo:ve: qhid' mae" ngad: ga: ta" li" nae". Ngad: ra"- ngadqere: Mao"So wa ai shid' ja" geim" re jeim" lo" nhao nae"- Gaung khyao wa gaung sho" ra" gintho' mau" cao" nae" qhid' mae" mangad:- Asang re caung da" byid: nae" qhid' mae" ngad: ra". Asang wa ai: gaung khyao qo ca" ra" gu: re bao" thaug' byid: yaug ngad: ra". 14 Mao"So wa- Asang re shid: rumae" dam: daui: to" li" nhao: ru we' dakhyo:- yao: wa ngonhaung" rere: yao" qam: so' khyo" yang dam: daui: to" li" nhao: li" nae". 15 Naonhaung" gaung khyao jham wa- Khristu nho: gaung khyao: nho: gaung dau jham ngad ko" rure naonhaung" ba: ako". Ngo wa Khristu nho: gaung khyao- gaung dau dalam: re yu: yu mung:- shava myhi" nho: gaung khyao- gaung dau kad' pye' byid: nae" i? Dajhid' re: magai: boe" ngad: ra". 16 Yao" gaung khyao re shava myhi" we' zam" khug: ra" yaug wa gaung sho: khyo" yang ai: shava myhi" we' dagaung dasho: za: boe" rure naonhaung" ba ko" mangad: i? Jham: mugsug' wa- yao: shid' zo: wa dagaung dasho: za: doe; li" genae"- ga: de: de: za: ta" to" ra". 17 Ai: Asang we' zam" khug: ra" yaug wa- byo khyo" yang ai: Asang we' dagaung dasho: za: boe" lo: ra". 18 Gaung sho" nho: gintho' mau" re jao" pye' ge,- Byu kad' ra" qobo myo: sho' wa byu: gaung khyao re mazao" ngad: ra". Ngadqere: gaung sho" nho: gintho' mau" cao" ra" yaug wa yao: yao" gaung khyao re qobo de, nhao: ra" yaug ngad: ra". 19 Naonhaung" gaung khyao wa- Mao"So: yang byid' to: mung: naonhaung" khug mae na: jo; ra" Gyang" Lho" Byo: nho: yham mo" ngad ko" rure naonhaung" maba ko" i? Naonhaung" wa naonhaung" yao" gaung khyao re masang ko" ngad: ra"- Mao"So she, asang: ra". 20 Yao: wa naonhaung" re aphug' byid: yang: vai: yu: to" ra". Airumung: naonhaung" gaung khyao re Mao"So: phungbao bao: thug' li" nae" qhid' mae" ci yhung" na ge,.

1 Korinthu 7

1 Ana"- naonhaung" mugsug' tung" yang: myid' ke' ra" khyo jham we' sin: yang: yauggai wa myi: mayu: ru wa gai ru ngad: ra". 2 Ngadqere: gaung sho" gintho' mau" yao: xo: jo; ruyang yauggai yaug khao: ngo" wa yham sang myhi" qo" ca" mung: myiqe: yaug khao: ngo" re: yham sang pho" qo" ca" ra". 3 Yauggai wa yao" yham sang myhi" we' gaung sho: zam" mung:- myiqe: re: ai we' dakhyo: yao" yham sang pho" we' airu: gaung sho: zam" na qo: ra". Airumung: dayaug we' dayaug qo: rumae yao: cao: nhag' jho" dag nhao byid: qo: ra". 4 Yham sang myhi" wa yao: yao" gaung re yao: masang ngad: ra". Yao" yham sang pho" yaug asang: ra". Ai we' dakhyo:- yham sang pho" re: yao: yao" gaung re yao: masang ngad: ra"- yao" yham sang myhi" yaug asang: ra". 5 Naonhaung" wa akyu" mho' rumae ayo, byid: nae" qhid' mae" sao qhid' mae" jho" myid vang" to" ra" ayo, gyo: mae" lai yang: gaung sho: jho" zam" nae" yao: cao: dajho" ha ge,- ngadqere: akyu" mho' ra" yo, khyin: gan lao" wa- azhao: mae" ru: dam: jho" zam" ge,. Alao" za: naonhaung" yao" gaung re maqo" zang: geyang: Satan yang ju" phyo' rumae gyo" vao lo" nae" khyo mae" naonhaung" qo" loe, genae". 6 Ngo naonhaung re ceru: ta" ru wa- amyin" byid' ra" khyo" ta" ru mangad:- Akhang" byid' ru za: angad:- 7 Gai gai: yao: ga" re ngo wa- naonhaung" alhab' mo, re ngo we' dakhyo: za: boe" nhao nug: ra". Ngadqere: byu dayaug we' dayaug wa Mao"So: lo, mae" gatau tau: jeju jhaung qhu" dayaug daja: ja: qo" yu: ra". 8 Ai: dinkhu: mate: mo, re we' cug' mo" qere ngo ta" ru wa- ngo we' dakhyo: dayaug za: qo" na: ru wa naonhaung" qhid' mae" je: gai: ako". 9 Ngadqere: naonhaung" maqo" zang: ko" ngad: re wa lo, xo' mung: na ge,- Shab' mhin: na: rutho' mae lo, xo' ru wa je: gai: ra". 10 Lo, xo' to: va" mo; qhid' mae" ngo yao" amyin" dao: mangad:- Asang: nho: amyin" dao: daja: ja: ngo qo" ra". Yham sang myhi" wa yham sang pho" we' magai: gao: ngad: ra". 11 (Gao" lin: na: ngad: re wa yao: yao: za: xo' na: jo, ca" ra"- Mangad: lao"- yao" yham sang pho" we' dam: jho" vang" mung: zam: na ca" ra". Yham sang pho" re: yham sang myhi" re magai: kao" pye' ngad: ra".) 12 Gaje qere �Asang ta" ru mangad: lo:- ngoyao: khyo"� ta" ru wa- Khristan phung: byu dayaug wa malam makhug: ra" yham sang myhi" qo" mung: ai: yham sang myhi" wa yao: we' xo' mung: zam" na nug yang: ngad: re wa- yham sang pho" wa yao: re magai: kao" pye'- ga" ru ngad: ra". 13 Amung: Khristan phung: byu myiqe: dayaug wa- malam makhug: ra" yauggai dayaug we' lo, xo' lo" mung:- ai: yham sang pho" wa yao: we' xo' yang: zam" na nug yang: ngad: re wa- yao" yham sang myhi" wa yao: re magai: kao" pye' ngad: ra". 14 Pe"mung:ga"re ai: malam makhug: ra" yham sang pho" wa Khristan ngad: ra" yao" yham sang myhi" we' zam" khug: ra" khyo" yang- Mao"So khae: yu man" ra" yaug boe" lo: ra". Malam khug: ra" yham sang myhi" wa- Khristan ngad: ra" yao" yham sang pho" we' zam" khug: ra" khyo" yang Mao"So khae: yu man" ra" yaug boe" lo: ra". Ceru: mangad: re wa- yao: bam: myid:zo: qe wa Mao"So mabo: ra" mo, re" ru: boe" genae"- ngadqere: ana"- yao: bam wa Mao"So khae: yu man: mo, boe" lo: ako". 15 Ngadqere: malam makhug: ra" yham sang myhi"- mangad: lao"- yham sang pho" wa- Khristan phung: byu ngad: ra" yham sang myhi"- mangad: lao"- yham sang pho" we' gao: nug: ngad: re wa- yao: re kao" pye' ge,- Khristan: phung: byu ngad: ra" yham sang myhi"- mangad: lao"- yham sang pho" wa- ce: khyo re galin: gago: qo" kad' ra" akhang" jo; ra". Mao"So wa- yaug yo za: na nae" qhid' mae" naonhaung" re khai: yu: to: va" ra". 16 Khristan phung: byu ngad: ra" yham sang myhi" nao we"- nao wa naoyao" yham sang pho" re maqo" khyad' yu nae"- ein: khoru: qo" ta" i? Khristan phung: byu ngad: ra" yham sang pho" nao we"- nao wa naoyao" yham sang myhi" re maqo" khyad' yu nae" ein:- khoru: qo" ta" i? 17 Byu yaug khao: ngo" wa- Asang: yang yao: re byid' to" ra" jhaung qhu" we' dakhyo:- Mao"So yao: khai: yu: ra" au: yao: khoru: ngad: re airu: xo' yang: kao so' daui qo: ra". Ceru wa phung: alhab' re ngo mho" byid' ra" tarha" ngad: ra". 18 Au: qid lhai: kham: au: mae" Mao"So khai: rure khae: yu va" yaug ngad: re wa- yao: wa ai: au: qid lhai" dae jho: jham byaug nae" qhid' mae" qam: dake'. Amung: au: qid lhai: khyo makham: yu loza: Mao"So khai: rure khae: yu va" ngad: re wa- yao: wa au: qid lhai: khyo kham: yu maqo ngad: ra". 19 Pe"mung:ga"re au: qid lhai: khyo re kham: yu makham: yu: ru wa pe" akhyag mangad: ngad: ra". Mao"So: amyin" dao: jham re phug' cao" ru za: akhyag ngad: ra". 20 Byu yaug khao: ngo" wa Mao"So khai: rure yao: khae: yu: ra" au: re yao: ngad: na: ru we' dakhyo: na: jo, qo: ra". 21 Mao"So nao re khai: yu: ra" au:- nao wa su: jeim ngad: i? Pe" maca"- ngadqere: ai: su: jeim mae" nao loe; beim nae" agu jo; ngad: re wa aire ci yhung: wa,- 22 Pe"mung:ga"re Asang: yang khai: yu qhug' ra" jeim wa- Asang: yang jeim mae" lhoe' ke' byid: yaug ngad: ra"- ai we' dakhyo: jeim mangad' ra" yaug Khristu yang khai: yu qhug' ra" yaug wa Khristu nho: jeim ngad: ra". 23 Mao"So wa naonhaung" re aphug' byid: yang: vai: yu: to" ra"- Airumung: byu: jeim dadoe, loge,. 24 Nga" mao:nhaung: qe we"- naonhaung" yaug khao: ngo" wa- Asang: yang khai: yu qhug' ra" au: re ngad: ra" ave, ayaug: we' dakhyo: Mao"So we' zam" khug yang: na: jo, qo: ra". 25 Ana" lo, maxo' ra" mo, we' sin: yang: naonhaung" tung" ke' ko" ra" khyo re- Asang mae" amyin" dao: maqo" to: ngadqere: Asang: nho: nhag' myan" ra" jeju khyo" yang lam ga" ra" byu dayaug ngad: ru we' dakhyo:- ngo myid: thug' ra" khyo re ta" ke' ra". 26 Ana" thaung" qhug' na: ra" qug' khai: qug: khai: jham re beim: yang: ta" gelang: ga" re yauggai dayaug wa ana" yao: na: ra" khyo" na: jo; re wa je: gai nae" ein:- ngo myid: ra". 27 Nao yham sang myhi" qo" va"yaug ngad: i? Ailao" wa yham sang myhi" re dashapye' pye'. Nao lo, maxo' shi" yaug ngad: i? Aire wa yham sang myhi" daqho lo:- 28 Ngadqere: nao lo, xo' ru wa pe" qobo shad' ru mangad: ngad: ra"- aimung: lo, maxo' shi" ra" myiqe: dayaug- lo, xo' ngad: re yao: pe" qobo mashad' ngad: ra". Ngadqere:- dinkhu: te: lo, xo' ra" mo, wa qug: khai: rure thaung" qhug' li" genae". Ngo wa naonhaung" re airu: mathaung" qhug' nhao nug ngad: ra". 29 Nga" mao:nhaung: qe we"- ngo ta" nug: ru wa ceru: ngad: ra". Ayo, myo: sho' madang lo" ruyang ana" mae" thoegu: myi: qo" ra" mo, wa- myi: maqo" ra" mo, ru: na qo: ra". 30 Ngug: ra" mo, wa nhag' makaug' mo, ru:- Qi: ra" mo, wa mabau: mo, ru:- Zai vai: ra" mo, wa yao: bam vai: ra" zai re masang: ra" mo, ru:- 31 Myid gaung: jo,nho" zai yo we' phaga: kad' zo: mo, wa ai: yang phaga: makad' zo: mo, re" ru:- na qo: ra". Pe"mung:ga"re ana" ru" ra" mug: myid wa ana" re" ru:- myao" sho' jo; jo, lo nae" mangad: lo:ngad: ra". 32 Ngo wa naonhaung" re myid: qug: myid: ci" rumae" loe; beim nhao nug: ra". Myi: mayu: ra" yaug wa Asang re ngaui bau: nhao nae" qhid' mae" qam: ke' na: ruyang yao: wa Asang: mau" zo" mae nhag' zaug: jo; ra" 33 Ngadqere: myi: yu: ra" yaug wa- yao" yham sang myhi" re ngaui bau: nhao nug: ruyang yao: wa myid gaung we' sin" ra" khyo mae nhag' lam: zaug: jo; ra". 34 Airumung: yao: wa nhag' lam: shid' gao boe" jo; ra". Lo, maxo' ra" myiqe:- mangad: lao"- zomyi: gyang" ngad yaug wa- Mao"So re yao" gaung dau: we' byo shid' ja" geim" re qhaug' byid: nug: ruyang yao: wa Asang: mau" zo" mae nhag' zaug: jo; ra". Ngadqere: lo, xo' va" ra" myiqe: wa yao" yham sang pho" re ngaui bau: nhao nug: ruyang yao: wa- myid gaung we' sin" ra" khyo jham mae nhag' lam: zaug: jo; ra". 35 Ngo ceru: ta" ru wa ngo naonhaung" re bao" nug yang: ta" ru ngad: ra". Ngo wa naonhaung" re zaui" zag: ci nug yang: ta" ru mangad:- ai: atha" naonhaung" re jo ang: ra" khyo" zaui: so: genae" qhid' mae" we' Asang: mau" zo" qhid' mae" naonhaung" gaung dau: alhab' bin sho' qhaug' byid: yang: caung da" byid: genae" rure ngo o yang: ta" ru ngad: 36 Bin: jho" mho' to: yang: lo, maxo' nae" qhid' mae" shid' zo" myid vang" to" ra" khyo we' sin: yang: yauggai yaug wa- myiqe: nau" dao mae to" ra" yao" ave, wa majo maang: ra" khyo" ngad:- ga: yao: myid: li" yang: ngad ngad- gaung sho: we' sin: mung: zang: yang: ngad ngad- lo, xo' ca"- ga: yao: myid: jho yang: ngad: re yao: myid: o: ru we' dakhyo: yao: shid' zo: wa lo, xo' vageshao:- ceru mae qobo maboe" ngad: ra". 37 Ngadqere: yauggai yaug wa- khag' yang re: majhan: lo: lo, maxo' nae"- ga: yao: yao" nhag' lam" yang tang za: myid: phyid' yang:- yao: yao" nhag' lam: re nyang" za: qo" zang: mung:- yao: yao" nhag' lam: mae myid: phyid' to: gau ngad: re wa yao: ai: myiqe: nau" re lo, maxo' nae" kad' ru wa gai: ru ngad: ra". 38 Airumung: lo, xo' ra" yauggai wa- gai: ra" khyo re kad' ra". Ngadqere: lo, maxo' ra" yaug wa je: gai: ra" khyo re kad' ra". 39 Myhi" zang dayaug wa yao" yham sang pho" za: adaui: na na wa- din khu: dao mae taui" to" ru qhug' ra". Ngadqere: yao" yham sang pho" shid: byaug yang: ngad: re wa- yao: nug: ra" yaug khag' jhao" ngadqere: yham gai: qo" lo" ra". Ngadqere: Khristan phung: byu yauggai we' za: lo, gai: xo' ra". 40 Ngadqere: yao: wa lo, madam: xo' lo:- airu: yao: na: jo; ngad: re wa- je: ngaui pyo" li" nae"- ceru wa ngo myid: jho: ra" khyo ngad: ra". Ngo re:- Mao"So: Byo qo" yaug ngad:- ein: myid: lam: ra".

1 Korinthu 8

1 Ana"- sulho jham re kug' byid' ra" zo:ve we' sin: yang: naonhaung" tung" ke' ko" ra" khyo re pheim: kyo: byid: nae". Ngonhaung" alhab' wa laba lajhao bo mo, ngad:- ga: yao: bam ta" ko" ra" dao: gaigai: dang: ra". Ngadqere: airu" laba lajhao wa byu re ngad beim: phug: li" nhao: ra". Jhid' de; myid kam" wa byu re gang" tang qi" qhang nhao: ra". 2 Byu dayaug yaug wa daja: ja: re ba beim" ra" myid bo: ngad: re yao: wa gaigai: yao: ba ca" ru we' dakhyo: maba shingad: ra". 3 Ngadqere: Mao"So re jhid'de; ra" yaug re wa Mao"So: yang yao: re ba nhao: ra". 4 Airumung: sulho jham re kug' byid' ra" zo:ve re zo" ra" khyo we' sin: yang: ta" re- sulho ga" ru wa gaigai: yao: mana majo; ra" daja" ja" sulho za: ngad: rure re: Mao"So wa date: za: ngad mung: yao: mae" je yang: gatau mana: rure re: ngonhaung" ba: ra". 5 Mug:gaung we' myidgaung mae so jham ga: sun" to: mo, na mung: so jham myo: sho' we' asang jham myo: sho' na gesho' ngadqere:- 6 ngonhaung" qhid' mae" wa Pho" ga" ra" Mao"So date: za: ngad: ra". Yao: wa ja: khao: ngo" re Phan" Yaug ngad: ra". Yao" qhid' mae" ngonhaung" kao so' daui: na: bam:. Ngonhaung" wa Yesu Khristu ga" ra" Asang dayaug za: aqo". Ai: Asang: yang ja: khao: ngo" alhab' wa phan" to: qhug' mung: yao: khyo" yang ngonhaung" kao so' qo" daui: na: bam: ru ngad: ra". 7 Ngadqere: yaug khao: ngo" ce: dangman" ra" khyo re maba ko" ngad: ra". Byu damyo" wa sulho re caung:pa" rumae min" jo, gemung: ana" joe" sho' zo:ve re zo: gelao"- ai wa sulho re kug' byid' ra" zo:ve ngad:- ga: myid yang: zo" na: ako". Yao: bam: aung khug: nhag' lam: qam: nang: geyang: yao: bam re zo:ve khyo" yang ai wa masan masin" boe" nhao:- ga: myid: ako". 8 Zo: ve wa Mao"So we' ngonhaung" zam" khug: ra" khyo re je: gai: li" nhao nae" mangad:- ngonhaung" mazo: ngadqere: Mao"So we' ngonhaung" zam" khug: ra" khyo byo; lo" nae" mangad:- ngonhaung" zo: ngadqere: gatau pe" akyu" je: qo" nae" mangad:. 9 Ngadqere: ngonhaung" nho: galin: gago: zo: shaug' ra" lo, mau" wa- lam khug: ra" khyo mae qam: nang" ra" mo, re qobo mashad' nghung: nhao nae" qhid' mae" lha" ge,- 10 Ce:khyo we' sin: yang: aung khug nhag' lam: qam: nang" ra" byu dayaug yaug wa- Ba Jhao Myid ga" ru qo" ra" nao re sulho re kug' byid' ra" phan yham mae zo:ve zo: shaug' na: rure yao: qe the' myao: ngad: re- ni" lo, mau" wa yao: re sulho re kug' byid' ra" zo:ve re vae" zo: nhao: li" nae" mangad: i? 11 Ailao" ni" laba lajhao mathao mae Khristu shid kham: byid' ra" lam khug: myid mae qam: nang" ra" ni" mao:nhaung: pho" wa byo; qeim: lo" ru qhug' li" nae". 12 Aimung: naonhaung" wa Khristan mao:nhaung: qere qobo shad' lhoe" ru we' qam: nang" ra" yao: bam: aung khug: nhag' lam: rere: dae te' byid: gemung:- Khristu re shad' ra" mo, naonhaung" boe" genae". 13 Airumung: zo:ve: mathao: yang nga" mao:nhaung: pho" re qobo shad' nhao yang: ngad: re wa- nga" mao:nhaung: pho" qobo mashad' vashao:- ngo wa ana" mae" khonhae" re: sho: mazo: lo nae".

1 Korinthu 9

1 Ngo wa ngoyao: nug: khyo" qo" na yaug mangad: i? Ngo wa lagyo: dayaug mangad: i? Ngonhaung" Asang Yesu re myao: qu" va" yaug mangad: i? Naonhaung" wa ngo Asang: mau" zo" re zaui" rumae" thug' li" ra" ashi: jham mangad: ge i? 2 Gaje qeyang ngore lagyo: dayaug khyo" makhae: yu gesho' ngadqere: naonhaung" wa ngore gaigai: yao: khae: yu genae" mangad: i? Pe"mung:ga"re naonhaung" Asang we' dagaung dasho: za: doe, yang: kao so' daui: na ko" ru wa naonhaung" gaung yao: ngo lagyo: ngad: ra" sagse: ngad: ra". 3 Su bam ngore qobo zhaug' yang: ta" gelao"- ngo ceru: ta" vha: yu: ra". 4 Nga" mau" zo" mathao mae ngo wa zo:ve shaug' pho: re khae: yu nae" akhang" majo, i? 5 Ngo wa Lagyo: gaje qe- Asang: nho: yao: nhaung: qe we' Petru nho: lag re cao" mung: lam khug: ra" yham sang myhi" jhui: yang: du" qin" nae" akhang" maqo" i? 6 Mangad: lao" Baraba we' nga" shid' zo: za: ve:dug: khau mau" kad' zo" ra" khyo" mau" vin qo: i? 7 Gyezo: khoyaug yao: yao" zokho zo: yang: gye mau" kad' qu" i? Khyae kad' zo: byu khoyaug yao: yao" khyae mae" sabyi shi: maphyo' zo: lo: na: i? Yao zam: zo: byu khoyaug yao: yao: zam" ra" yao mae" nug' mashaug'lo: na: i? 8 Ce: yu" yu" dao: tau" jham we' za: ta" pin" gai: ru mangad:- pe"mung:ga"re kham" to" ra" tarha" re: dakhyo: za: ta" to" ra". 9 Moshe kham" to" ra" tarha" mae gaug nao" ra" nung: lo" nhad' re gyan dazhaung: byid:- ga" rure ngonhaung" qhug' nghe' ra". Ana"- Mao"So wa nung: lo: jham: khyo re myid: ci" ra" i? 10 Yao: airu: ta" ru wa- gaigai: ngonhaung" qhid' mae" ta" ru mangad: i? She, angad: wo"- ai wa ngonhaung" qhid' mae" tung" to: byid' ru ngad: ra". Yo phaug' yaug we' gaug yad: yu yaug wa yao: yao" gae bam gaug re qo" yu nae" myid: lao" zo" re" mau" zaui: qo: ra". 11 Ngonhaung" wa naonhaung" phaung mae byo we' sin" ra" myug: shi: re sin: va". Aimung:- ngonhaung" wa naonhaung" mae" gaung sho: khau nae" zokho re jham" yu: ngad: re wa- ngonhaung" saung" xo: ru ngad: i? 12 Su gaje qe- ce: akho: akhang" re naonhaung" mae" qo" yu ko" ngad: re wa- ngonhaung" wa akho: akhang" je yang: lhao" qo" yu ang: mangad: i? Ngadqere: ngonhaung" wa ai: akho: akhang" re maci yhung:- ai: atha" Khristu nho: khyo Lau Dao: Gai byo: sin" lo" nae" ra" khyo mae kaung: kag' ru majo, vashao:- ein: ngonhaung" wa ja: khao: ngo" re zang: kham: lo: bam va". 13 Caung:pa" Yham mae mau" zaui" ra" mo, wa yao: bam: zo:ve re Caung:pa" Yham mae" qo" yu mung:- phan mae xeim: ngaui" byid' ra" mo, wa- ai: xeim: mae" yao: bam: gae bam qo" yu ko" rure naonhaung" dang za: ba: ako". 14 Ai we' dakhyo:- ai: Ngaui Bau" Lau Dao: Gai re kho" kyo" ra" mo, wa- Ngaui Bau" Lau Dao: khyo" yang yao: bam: kao so' khau nae" qo" yu ca"- ga: Asang amyin" byid' to: co' ra". 15 Ngadqere: ngo wa- ai: akho: akhang" jham daja: rere: mayu lo: airu" akho: akhang" jham re mho' yu nae" qhid' mae" ana" ce: mugsug' re tung" ke' ru mangad:- Airu: kad' nae" tho' shid: ru wa nga" qhid' mae" je: gai: ra". Khag' re: nga" khyo re akeim qo" kad' pye' nae" mangad:. 16 Ngo wa ai: Ngaui Bau" Lau Dao: re kho" kyo" ra" mathao mae za: phug nae" akho: akhang" ngo maqo" ngad: ra"- aire kad' nae" wa amyin" we' ngo khae: yu: to" ru ngad:. Ai: Ngaui Bau" Lau Dao: re ngo makho" kyo: ngad: re wa ngo khoqhi" byuxa: vaqoe, qhug' nae" i? 17 Ce: mau" zo" re ngoyao" myid: yang zaui" ru ngad: re wa- aphug' re qo" myid: lao" nae" ngad: ra". Ngadqere: ngo yao" myid: yang zaui" ru mangad: re wa Mao"So ngore lam mung: ab: to: byid' ruyang- qo khyo" ngo zaui: so" ra". 18 Aire ngo pe" aphug' qo" yu nae" i? Ai: aphug' wa- Ngaui Bau" Lau Dao: re kho" kyo" ra" mau" zo" qhid' mae" akho: akhang" pe" mayu lo:- Lau Dao: Gai re aphug' mayu lo: qo" kho" kyo: byid' ra" akhang" ngad: ra". 19 Ngo wa loe; na: ra" byu dayaug ngad:- Khag' jeim re: mangad:. Ngadqere: gai: boe" ra" qhi" byu myo: sho' mo, re qo" ge; aung: yu nae" qhid' mae" byu yaug khao: ngo" nho: jeim ngo kad' ra". 20 Yuda byu qe: phaung mae mau" zo" vin vo; ra" au:- yao: bam re qo" ge; aung: yu nae" qhid' mae" ngo wa Yuda byu dayaug we' dakhyo: na ye; ra". Ngoyao" gaung wa Moshe nho: tarha" re phug' cao" yang: kao so' daui yaug mangad:- ngadqere: ai: tarha" re phug' cao" ra" mo, re qo" ge; aung: yu nae" qhid' mae" tarha" re phug' cao" yaug we' dakhyo: na ye; ra". 21 Ai we' dakhyo:- Taung Bug Byu qe: phaung mae mau" zo" vin vo; na: ra" au:- ai: Taung Bug Byu qere qo" ge; aung: yu nae" qhid' mae" Yuda tarha" re maphug' cao" lo:- Taung Bug Byu dayaug we' dakhyo: na ye; ra". Ceru: ta" ru wa ngo wa Mao"So: tarha" re maphug' cao"- ein: ta" ru mangad:- ngo wa gaigai: yao: Khristu nho: tarha" re phug' cao" yaug ngad:. 22 Lam khug: rumae qam: nang" ra" mo; phaung mae ngad lao"- yao: bam re qo" ge; aung: yu nae" qhid' mae" qam: nang" ra" dayaug we' dakhyo: na ye; ra". Airumung: byu damyo" re yao: bam mae" gai: boe" ra" khyo khyo" qo" khyad' yu nae" qhid' mae" ngo wa byu alhab' mo; phaung mae yao: bam: khyo aja: ja: khyo" na ye; ra". 23 Ai: Ngaui Bau" Lau Dao" nho: shaman" jeju re qo" khae: yu nae" qhid' mae" Ngaui Bau" Lau Dao" nho: mathao mae ngo cegu: alhab' re kad' ru ngad:. 24 Jho" tao: poe mae byu myo: sho' mo, tao: gengadqere: tao" aung: ra" jhaung qhu" re dayaug za: qo" yu: rure naonhaung" nyang" za: ba: ako". Airumung: naonhaung" re: jhaung qhu" re aqo" yu nae" qhid' mae" tao: ge,- 25 Jho" tao: poe vao nae" qhid' mae" min: sho' kad' na: ra" sab' jhi mo, yaug khao: ngo" wa byo; qeim: lo" ba: ra" bin: kheim" re qo" zhaung" yu nae" qhid' mae" sab' jhi mo; nho: thin: ra" tarha" re phug' cao" ako". Ngonhaung" kam" wa apyad ato mabyo, maqeim: ra" bin: kheim" re qo" zhaung" yu nae" qhid' mae" kad' na: ru ngad:- 26 Airumung: ngo wa bin: zang khyo din: din: za: tao" ra". Aimung: ngo wa jho" thaung: poe mae lo, zhab' aje amyid mathaung" pye' ra" jho" thaung: poe vao: ra" sulhe: yaug we' dau: ra". 27 Ngo wa su gaje qere ai: mai jho" qhi" ra" poe mae vao nae" qhid' mae" khai: to: mung:- ngoyao: wa ai: jho" lhoe" poe mae maqo" vao: ra" yaug maboe" nae" qhid' mae" ngoyao" gaung re qao sho' kad' mung: bin sho' zang: yang jao" to: va".

1 Korinthu 10

1 Nga" mao:nhaung: qe we"- Moshe thao cao" ko" ra" ngonhaung" phug' pho" qe khoru: boe" lai: lo ko" ra" khyo re ngo naonhaung" re myid: beim: nhao nug: ra". Yao: bam wa jham thaui" yang khyoqhid' au: she gug: gam byid' ra" qao: mae su: mung:- yao: bam alhab' mo, ai: Tham: Ne khyo" pe" maqo lo: qo" lai: phyid' lo" ako". 2 Yao: bam alhab' mo, wa- jham thaui: we' Tham: Ne mae Moshe nho: mho"zo: qekhyo" qid nyhab' kham: yu: ako". 3 Yao: bam alhab' mo, wa byo zo:ve daja: re za: zo: mung:- byo shaug' pho: daja: re za: shaug' lo: ako". 4 Yao: bam we' daga" su: mo, alhab' wa- byo we' sin" ra" laung: mo" baui mae" qid shaug' ako"- ai: laung: mo" baui wa Khristu yao: ngad: ava". 5 Ngadqere: yao: bam mae" myo: lo bug re Mao"So ma- o mangaui mung:- yao: bam wa din"pyad' yo mae shid: myi" sin" lo" ako". 6 Ana"- cejham alhab' wa yao: bam we' dakhyo:- makhyang" ra" mau" jham re kao mabau: nae" qhid' mae" we' yao: bam mae" damyo" we' dakhyo:- sulho re macaung:pa" nae" qhid' mae" ngonhaung" re ta" peim: byid' ra" ve, so: ngad: ra". 7 Yao: bam sulho re caung:pa" ko" ru we' dakhyo:- ngonhaung" wa sulho re macaung:pa" nae" qhid' mae" re:- ngonhaung" re ta" peim: byid' ra" ve, so: ngad: ra". Byu jham wa zo: shaug' zaung: jo, mung:- shaug' yid: to" li" yang: go" pyo: mung: gaung sho: jho" zam" ako"- ga: jham: mugsug' mae tung" to" ru we' dakhyo: ngad: ra". 8 Ngonhaung" wa yao: bam mae" damyo" re" ru: gaung sho" nho: gintho' mau" magai: cao" ngad: ra". Daba na mae za: yao: bam mae" byu shid' tug: sam taung gyang: shid: lo" byaug: ako". 9 Ngonhaung" wa yao: bam mae" damyo"- Moshe re jham" qu" ko" ru we' dakhyo:- Asang re lag magai: yu: qu" ngad: ra"- yao: bam wa lhao maui: yang thoe" se' pye' ru qhug' ako". 10 Ngonhaung" wa yao: bam mae" damyo" re" ru: magai: nyhung ngad: ra". Yao: bam wa Shid: ru: Lagyo: Pho" lo; yang se' pye' ru qhug' ako". 11 Yao: bam mae boe" lo: ja: ai: gu: alhab' wa gaje qe: qhid' mae" ve, so: ngad mung:- ai: gu: wa ngonhaung" re ta" peim: byid' ra" khyo" tung" to" ru ngad: ra". Pe"mung:ga"re ngonhaung" wa- lo" thao" ba na jhao" li" na: ra" ayo, mae kao so' daui: na: bam yang: ngad: ra". 12 Tang za: ye; jo, yaug ngad:- ga:- myid: jho: ra" yaug khag' ngadqere: yao: magyang: lang" lo" nae" qhid' mae" lha" qo: ra". 13 Naonhaung" thaung" qhug' ko" ra" jham" qu" ra" ja: wa- byu alhab' mo, thaung" qhug' qu" ra" jham" qu" ra" ja: za: angad: ra". Mao"So wa yao: yao" dao:so: re jhaug' zaug yaug ngad mung:- naonhaung" qo" kham: ra" qam: tho' je yang: yao: naonhaung" re jham" qu" ru qhug' nhao nae" mangad:- naonhaung" jham" qu" ru qhug' ra" ba na mae- yao: wa naonhaung" re qo" zang: qhao" nae" qam: o: byid' li" nae"- Airumung: ai: jham" qu" rumae"- naonhaung" loe; beim nae" pyi" phung" byid'li" nae". 14 Airumung: nga" jhid'de; ra" ba nam qe we"- Sulho re caung:pa" ra" khyo re jao" pye' ge,. 15 Ngo wa naonhaung" re pha,jhi" bo: ra" mo, re we' dakhyo:- ta" na: ru ngad:- ngo ta" na: ra" dao: re naonhaung" yao: gyo" kho' yu ge,- 16 Ngonhaung" wa Asang: myi" xeim zo: poe keim re jeju caung:khin" yang: aimae" ngonhaung" shaug' lao"- ngonhaung" wa Khristu sa: mae zam" khug: na: ru ngad: ra". Aimung: ai: mug re phai" yang: ngonhaung" zo: lao" re:- ngonhaung" wa Khristu nho: gaung we' zam" khug: ru ngad: ra". 17 Mug wa dakhai" za: ngad mung:- ngonhaung" alhab' mo, wa myo: sho' ngadqere: ai: mug dakhai" mae za: zam" khug: na: ruyang- ngonhaung" wa dagaung dasho: za: ngad: ra". 18 Israel byumyu" qere myid: qu" ge,- Ngaui" byid' ra" xeim: sho: zo" ra" mo, wa- ai: phan dao mae Mao"So re ngaui" byid' rumae bobo: ako". 19 Airumung:- sulho- mangad: lao" sulho re kug' byid' ra" zo:ve wa akhyag ngad: ein: ngo ta" nug: ra" i? 20 Airu: mangad:- ngo ta" na: ru wa Mao"So re malam khug: ra" mo; phan mae kug' byid' ra" xeim: jham wa yui jham re kug' byid' ra" xeim: jham ngad mung:- Mao"So re ngaui" byid' ra" xeim: jham mangad: ein: rure ngo ta" nug: ru ngad: ra". Ngo naonhaung" re yui jham we' zam" khug: ra" mo, maboe" nhao nug- 21 Naonhaung" wa Asang: nho: sabyi keim we' yui: nho: keim re daga" za: magai: shaug' ngad: ako"- amung: naonhaung" wa Asang: nho: zojaung: mae we' yui: zojaung: mae daga" za: magai: zo: ngad: ra". 22 Ngonhaung" wa Asang re myid nug: nhao nae" i? Ngonhaung" wa Asang tho' je: qam: bo mo, ngad: ein: myid nae" i? 23 Byu: tarha" dao: wa- ngonhaung" pe" ja: re: gai: kad'- ga: ta" ako". Aiwa dang: ra". Ngadqere: ja: khao: ngo" wa gai: ru mangad: ngad: ra". Ngonhaung" wa pe" ja: re: gai: kad' ra" akhang" qo" ngadqere:- ja: khao: ngo" wa ngonhaung" re akyu" mabyid: ngad: ra". 24 Khag' ngadqere: yao: yao" akyu" re za: daqho ge,- Su gaje: qhid' mae" kam" wa qho ge, 25 Gai jao: mae aung" to" ra" pe" ja" sho: re ngadqere: naonhaung" galin: gago: gai: zo" ako". Naonhaung" nho: aung khug nhag' lam: aug' o: yang: aire damyid: daca ge, 26 Pe"mung:ga"re jham: mugsug' mae- Myid gaung we' aimae" ja: khao: ngo" wa ai: Asang: nho: ngad: ra" ga: ta" to" ra". 27 Malam khug: ra" byu dayaug yaug: yang naonhaung" re zo: poe khai mung: naonhaung" ye: nae" myid: phyid' gelao" wa- ye: ge,. Naonhaung" qhid' kheim: mae da" byid' ra" gu: alhab' re zo: ge,- naonhaung" myid aug' o: yang: dao: myid: pe" damyid: daca ge,- 28 Ngadqere: dayaug yaug wa- Ce: sho: wa sulho re kug' byid' ra" sho: ngad: ra"- ga: ta" lao" wa- airu: ta" kyo: byid' ra" yaug: mathao mae we' aung khug nhag' lam: aug' o: myid mazai" qheim" byid: shao:- ai: sho: re dazo: ge,. 29 Airu wa naonhaung" aug' o: myid re ta" ru mangad:. Gatau dayaug: nho: aug' o: myid re ta" ru ngad: ra". Naonhaung" mae" dayaug yaug wa- aire nga" galin: gago: akhang" re gatau dayaug: nho: aug' o: myid: yang pe"mung: kham" pye' ang nae" i? ga: myid: ba: ra". 30 Ngo wa nga" zo:ve qhid' mae" Mao"So: jeju re caung:khin" yang: zo" ra". Pe"mung: yang: ngo jeju caung:khin" ra" zo:ve we' sin: yang: ngore gaui mho nae" de; i? ga: myid' li" nae". 31 Gai va"- naonhaung" wa zo: ngadqere:- shaug' ngadqere:- pe" kad' ngadqere: Mao"So: phungbao qhid' mae" kad' ge,- 32 Yuda byu qere ngadqere:- Taung Bug Byu qere ngadqere:- Mao"So: phung: re ngadqere:- aqug: akhai: maboe" nhao lo: kao so' daui ge,- 33 Ngo kad' ru we' dakhyo: cao" kad' ge,- ai ru: ngo wa byu jham khyad' yu: ru qhug' genae" qhid' mae" ngo kad' ra" mau" zo" alhab' mae nga" akyu" re mamyid lo:- alhab' mo; akyu" re myid yang: yaug khao: ngo" re ngaui nhao va".

1 Korinthu 11

1 Airumung: ngo wa Khristu lag re qu" yu: ru we' dakhyo:- naonhaung" wa ngore lag qu" yu ge,. 2 Naonhaung wa ngore khonhae" re: myid: beim: mung:- ngo ab byid: co' ra" ai: mho" shid' khyo re phug' cao" na ko" ruyang- ngo naonhaung" re khin" ra". 3 Khristu wa yauggai yaug khao: ngo" nho: au: jhaung- yham sang pho" wa yao" yham sang myhi" nho: au: jhaung- Mao"So wa Khristu nho: au: jhaung ngad:- ga" rure kam" wa ngo naonhaung" re ba: gyo: nhao nug: ra". 4 Airumung: caung:pa" ra" yo, khyin: mae yao" au: re nghoe' ci yang: akyu" mho'- mangad: lao"- mungdao: ta" ra" yauggai wa- Khristu re qho' phyo' ra" yaug ngad: ra". 5 Amung: caung:pa" yo, khyin: mae- yao" au: re manghoe' lo: akyu" mho'- mangad: lao"- mungdao: ta" ra" myiqe: wa- yao" yham sang pho" re qho' phyo' ra" yaug ngad: ra". Yao: wa au: daung: myhaug' ci: ra" myiqe: we' pe" mashai" ngad: ra". 6 Myiqe: wa yao" au: re manghoe' nae" ngad: re wa- yao" xae re myhaug' pye' ca" ra". Amung: myiqe: wa yao" au: myhaug pye' ru- yao" xae phyid' pye' ru wa yao" qhid' mae" qho' ja: ngad: re wa- yao" au: re nghoe' ci qo: ra". 7 Yauggai wa Mao"So: khyao dau sulho we' phungbao- bao tang" ngad: ruyang yao" au: re nghoe' nae" madau ngad: ra". Myiqe: kam" wa yauggai: phungbao- bao tang" ngad: ra". 8 Pe"mung:ga"re yauggai wa myiqe: mae" phan" to" ru mangad:- Myiqe: re kam" wa yauggai mae" phan" to" ru ngad: ra". 9 Alao"- yauggai wa myiqe" nho: mathao mae phan" to" ru mangad:- Myiqe: kam" wa yauggai: mathao mae phan" to" ru ngad: ra". 10 Airumung: mug: lagyo: qe: mathao mae myiqe: wa yao" yham sang pho" eib: ra" kheim: so' qao: mae na: rure qhu" byid: nae" qhid' mae" yao" au: re nghoe" ci qo: ra". 11 Ngadqere: Asang mae zam" khug: na: ra" ngonhaung" kao so' daui khyo mae yauggai wa myiqe: re ngha yang: na ca" ruwe' dakhyo:- myiqe: re: yauggai re ngha yang na ca" ra". 12 Pe"mung:ga"re myiqe: re wa yauggai mae" phan" to" ru we' dakhyo:- yauggai wa myiqe" yang khau: ru ngad: ra". Ja: khao: ngo" re boe" jo, nhao: ra" yaug kam" wa Mao"So ngad: ra". 13 Myiqe: wa yao" au: re manghoe' cilo:- caung:pa" phaung mae Mao"So re akyu" mho' nae"- dau nae" madau nae"- ein: rure naonhaung" yao: myid: kho' yu ge,- 14 Xae qhang to" ru wa yauggai: qhid' mae" myo, nho nga: lao: sham: ra" khyo ngad: rure re:- 15 ngadqere: myiqe" qhid' mae" kam" wa xae qhang to" ru wa yaung" shab: ru ngad: ra" ga: azhao: mae" naonhaung" re mho" byid' to" ra". Xae qhang: ru wa myiqe: re au: nghoe' khyo" byid' to" ru ngad: ra". 16 Ce: khyo we' sin: yang: ngag nug: ra" byu dayaug yaug na: ngad: re wa- ngo wa yao: re- ngonhaung" re:- Mao"So: phung: jham re:- caung:pa" rumae airu: au: nghoe' ra" thung" mae" je yang: gatau: nho: thung" majo,- ein: za: ta" nae" ngad: ra". 17 Ngadqere: o mae" mho" shid' khyo jham mae naonhaung" re makhin" nae"- pe"mung:ga"re naonhaung" caung:pa" ra" phaung wa agai tho' aqeim re je: boe" nhao: na geyang: ngad: ra". 18 Sao qhid' maqhid khyo"- naonhaung" phung: ham phaung jham mae majho" vang" ra" aqug: akhai: bo: rure ngo the' gyo" ra". 19 (naonhaung" mae" jo: ra" mo, khag' ngad ko" ru de: de: za: myao: thug' li" nae" qhid' mae" ai: phung: jho" kho' ru wa naonhaung" phaung mae boe" thug' li" ca" ra".) 20 Naonhaung" daga" zang" ham: phaung: na ko" au:- Asang: nho: myi" xeim zo: poe re zo: nae" qhid' mae" phaung: na ko" ru mangad: ko" ngad: ra". 21 Pe"mung:ga"re naonhaung" zo" ra" ayo, mae- yaug khao: ngo" nug yaug nug: khyo" yao: yao" myi" xeim re zo: mung:- vae: moe; mo, wa moe;- shaug' yid mo, wa shaug' yid mung: na: ako". 22 Naonhaung" airu: zo: shaug' nae" qhid' mae" yao: yao" yham maqo" ko" i? Mangad: lao"- Mao"So: phung: re maphug' makhyad' kad' mung:- myaung sho" ra" mo, re qho' phyo' nug ko" i? Cekhyo we' sin: yang: ngo naonhaung" re pe" ru: ta" li" nae" rure myid: lao" ko" i? Ngo naonhaung" re khin" nae" i? Gaigai: yao: ngo makhin". 23 Pe"mung:ga"re ngo naonhaung" re ab byid' ru wa- Asang mae" ngo khae: yu: ra" mho" shid' khyo ngad: ra". Asang Yesu wa ab: pye' ru qhug' ra" myi re mug yu: yu mung:- 24 Mao"So re jeju bin: caung: lao"- khyoe' phai" yang:- ce wa naonhaung" qhid' mae" byid' pye' ra" nga" gaung ngad: ra". Ngo re myid: beim: nae" qhid' mae" ceru kad' ge,- ga: ta" ra". 25 Ai we' dakhyo: myi" xeim bin: zo: thao re yao: wa keim re yu: yu mung:- ce: keim wa- nga" sa" yang dazid thaung" te' to" ra" Mao"So: dao: thang" asag' ngad: ra"- naonhaung" ai: re shaug' khao: ngo" ngore myid: beim: nae" qhid' mae" ceru: kad' ge,- ga: ta" ra". 26 Naonhaung" ce: mug re zo: mung:- ce: keim mae" shaug' khao: ngo" Asang: nho: shid kham: byid' ra" khyo re yao: dam: joe" li" ra" yo, joe" sho' naonhaung" ta" hau: byid' ako". 27 Airumung: khag' ngadqere: maman: maqi" lo:- Asang: mug re zo: mung:- Asang: keim mae" sabyi qang: re shaug' ngad: re wa- yao: wa Asang: nho: gaung re we' sa: re shad' lhoe" ra" yaug ngad: ra". 28 Airumung: yaug khao: ngo" wa yao: yao" gaung re shi" sao qhid' ca: qu" yang: mug re zo: mung: ai: sabyi'qang: re shaug' vageshao:- 29 Pe"mung:ga"re mug re zo: mung: sabyi qang: re shaug' ra" au: Asang: gaung lajheim: re maba: kho' lo:- zo: shaug' ra" yaug wa- yao: yao" gaung re dao: kho' ra" khyo" zo: shaug' ra" yaug ngad: ra". 30 Airumung: naonhaung" mae" myo: sho' wa qam: nang" ru we' no phyo: qhug' mung:- myo: sho' mo, wa shid: byaug: ako". 31 Ngonhaung" wa yao: yao" gaung re shi" sao qhid' ca: qu" ngad: re wa- Mao"So: yang dao: kho' ru maqhug' genae" ngad: ra". 32 Ngadqere: dao: kho' qhug' ru we' Asang: yang qobo dae byid' ru qhug' ru wa myid gaung: byu qe we' daga" ngonhaung" dao: phyid' ru maqhug' nae" qhid' mae" ngad: ra". 33 Airumung:- nga" mao:nhaung: qe we"- naonhaung" wa Asang: nho: Myi" Xeim zo: nae" qhid' mae" ham: phaung gelao"- naonhaung" yao: cao: jho" lao" ge,- 34 Naonhaung" ham: phaung: na gelao"- Mao"So: dao: kho' ru naonhaung" maqhug' genae" qhid' mae" vae: moe' ra" yaug wa yao: yao" yham mae zo" yu vashao:- gatau: khyo jham we' sin: yang: wa ngo joe" li" lao" za: li" sho' nae".

1 Korinthu 12

1 Ana" nga" mao:nhaung: qe we"- naonhaung" tung" ke' ko" ra" Gyang" Lho" Byo: nho: jeju jhaung qhu" jham: khyo we' sin: yang: dangman" ra" khyo ngo naonhaung" re ba nhao nug: ra". 2 Naonhaung: wa Khristan: phung: byu maboe" shigere lai aja: ja: khyo" khyonghung: nghung: mung:- kao so' mabo: ra" sulho jham re caung:pa" lo ko" rure naonhaung" yao: ba gau ngad: ako". 3 Mao"So: Byo: yang au: jhui" she: ru qhug' ra" yaug khag' ngadqere: Asang Yesu wa nhang: kheim: zao" vashao: ga: ta"nae" mangad:- amung: Gyang" Lho" Byo: yang khyo shid'ru qhug' ra" yaug za: mangad: re Yesu wa Asang ngad: ra" ga:- khag' re: maqo" lhang: yu ngad: ra". 4 Byo: nho: jeju jhaung qhu" aja: ja: jo; ra". Ngadqere: ai: jeju jhaung qhu" jham alhab' re Byo dagaung: yang za: byid' ru ngad: ra". 5 Caung da" byid' ra" mau" aja: ja: ngadqere:- caung da" byid: nae" ra" Asang wa dayaug za: ngad: ra". 6 Mau" zo" vin vo, nae" qam: o: aja: ja: bo ngadqere:- yao: yao" mau" zo" re vin vo, nae" qhid' mae" byu yaug khao: ngo" re yao: we' yao:- qam: o: byid' ra" yaug wa Mao"So dayaug za: ngad: ra". 7 Byu myo: sho' nho: akyu" qhid' mae" yaug khao: ngo" mae Byo na: jo; ra" khyo re- khyo dakhe' khe' khyo" qhu" byid' na: ra". 8 Amung: Byo wa dayaug re- nyan: pha,jhi" byang" ra" mung: dao:- ai: Byo yao: gatau dayaug re laba lajhao we' byang" ra" mungdao:- byid' to" ra". 9 Ai: date: za: ngad: ra" Byo dagaung: yang dayaug re Mao"So re wa lam khug: ra" myid- gatau dayaug re wa no phyo: re gai byid: nae" qam: so' byid' ra". 10 Byo wa dayaug re- mug' pho: ve, lho mau" jham re qo" zaui" qhu" ra" qam: so'- gatau dayaug re wa Mao"So: mungdao: re kho" kyo" ra" jeju jhaung qhu"- dayaug re wa- ai: jeju jhaung qhu" jham wa ai: Byo mae" joe" li" ru ngad- mangad' rure ba: kho' ta" ra" qam: so' byid' to" ra". Gatau dayaug re wa myan" aja: ja: ba: jhau: ra" qam: so'- dayaug re wa myan" aja: ja: re qo" pheim: sho' kyo" ra" qam: so' re byid' to" ra". 11 Ngadqere: ce: qam: so' alhab' re byid' ra" yaug wa- date: za ngad mung: Byo dagaung za: ngad: ra". Byo wa yao: myid: o: ru we' dakhyo:- yaug khao: ngo" re yao: we' yao: jho" shai" mung:- jeju jhaung qhu" jham re byid' ra". 12 Khristu wa gaung dau jham myo: sho' de; ra" gaung khyao we' dau: ra". Byu: gaung khyao wa gaung dau jham myo: sho' ngadqere: dagaung za: ngad: ra". 13 Ai we' dakhyo:- ngonhaung" alhab' wa Yuda byu ngadqere:- Taung Bug byu ngadqere:- jeim ngadqere:- jeim mangad: yaug ngadqere:- dagaung dasho: za: boe" nae" qhid' mae" Byo dagaung mae qid nyhab' kham: yu va" mo, ngad: ra". Ngonhaung" alhab' wa ai: Byo dagaung re za: qid shaug' ru we' dakhyo: khae: yu va" mo, ngad: ra". 14 Pe"mung:ga"re gaung khyao wa gaung dau dalam: we' za: kad' to" ru mangad:- Gaung dau jham myo: sho' we' kad' to" ru ngad: ra". 15 Khyid wa- ngo wa lo, mangad: yang: gaung we' ngo pe" masin: ga:- ta" ngadqere: airu: ta" yang: gaung we' masin" byaug: ru mangad:- 16 No: khye' wa- ngo wa myo,jid' mangad: yang: gaung khyao we' pe" masin:- ga: ta" ngadqere:- airu: ta" yang: gaung khyao we' masin" byaug: ru mangad:- 17 Amung: gaung geim" myo,jid' za: ngad: re wa- khoru: qo" gyo: nae" i? Alao"- gaung geim" no:khye' za: ngad: rere: sheim khoru: qo" nae: gyo: nae" i? 18 Ngadqere: ana" Mao"So wa yao: myid o: ru we' dakhyo:- gaung khyao mae jho" shai" ra" gaung dau khao: ngo" re te' to: byid' ra". 19 Alhab' wa gaung dau daja: za: ngad: re wa- gaung khyao qo" boe" nae" mangad:. 20 Ana" wa gaung dau jham myo: sho' ngadqere: gaung khyao wa dagaung za: ngad: ra". 21 Aimung:- myo,jid' wa lo, re ngo nao re maci qo ein: magai: ta"- au: ngadqere: khyid re ngo nao re maci qo ein: magai: ta" ngad: ra". 22 Airu: ta" nae" atha" qam: je: nang" ra" ga: qu" jho: ra" gaung dau jham wa- mabobo re magai: ra" gaung dau jham ngad: ako". 23 Akhyag mataung" ngad ein: ngonhaung" myid: jho: ra" gaung dau jham re ngonhaung" wa je yang: gun caung: ra". Madau mayaung" ra" gaung dau jham re ngonhaung" je yang: nyhang" shaung: ra". 24 Dau yaung" ra" gaung dau jham re kam" wa nyhang" shaung maca" ngad: ra". Ai: phug' de, nga: maye; ra" gaung dau jham je yang: phug' de, nga: ye, nae" qhid' mae" Mao"So yao: yao: ai: gaung dau jham re airu: nyhang" jaung: to" ra". 25 Airumung: gaung khyao mae nao- ngo ga: jho" kho' ru mabo lo:- gaung dau jham alhab' wa- yao: cao: dakhyo: za: jho" gun caung: na: ako". 26 Gaung dau dalam: dayin dayo: no kham zo: lao"- gatau: gaung dau jham alhab' re: dakhyo: za: ai we' daga" dayin dayo: no: rure bokham zo" ako". Gaung dau dalam: caung:khin" ru qhug' lao"- gatau: gaung dau jham alhab' re:- ai we' dakhyo: za: bongaui bau" ako". 27 Naonhaung" alhab' wa Khristu nho: gaung khyao ngad mung:- yaug khao: ngo" wa- ai: gaung khyao: nho: gaung dau jham ngad: ako". 28 Mao"So wa Phung: khug mae da ein nae" rumae- lagyo: qe- shid' ein nae" rumae lapa qe- sam ein nae" rumae mho" pho" qere- ai:thao mug' pho: ve, lho qo" zaui: mo,- no phyo: gai byid' ra" qam: so' qo" ra" mo,- su re bao" thaug' byid: ba: ra" mo,- su re khyoqhid' au: ba: she mo,- myan" aja: ja: ba: jhau: ra" mo, alhab' re yao" jo, qo mae yao: san: to: byid' ava". 29 Yao: bam wa alhab' mo, lagyo: qe mangad:- Alhab' mo, lapa qe mangad:- Alhab' mo, mho" pho" qe mangad:- Alhab' mo, mug' pho: ve, lho mau" qo" zaui: mo, mangad:- 30 Alhab' wa no phyo: gai byid' ra" qam: so' qo" mo, mangad:- Alhab' wa myan" aja: ja: ba: jhau: ra" mo, mangad:- Myan" aja: ja" lajheim: re ba: phaug' kyo: mo, mangad: ko" ngad: ra". 31 Airumung: je: akhyag: ra" jeju jhaung qhu" jham re kam" wa nhag' nghae" na ge,- Ngadqere: alhab' tho' je: ra" khyo dalam: ngo naonhaung" re ta" kyo: shinae".

1 Korinthu 13

1 Ngo wa byu: myan" jham we' mug: lagyo: qenho: myan" jham re qo" jhau ngadqere:- jhid'de; myid mabo ngad: re wa ngo wa- thoe myang: ra" mao"- mangad: lao" jhe' cang" we' dakhyo: za: ngad: ra". 2 Ngo wa lapa qo" pa mung: laba lajhao alhab' we' no; thao" ra" ja: alhab' re ba: ru we' bam re qo" qhui" pye' sho' ra" lam khug: myid bo sho' ngadqere:- jhid'de; myid mabo re wa- ngo wa pe" mangad:- 3 Ngo wa ngo qo" ra" jo,nho" alhab' su re gae byid' pye' mung: nga" gaung khyao re lhao" re: ngha" pye' nae" qhid' mae" ab: pye' sho' ngadqere:- jhid'de; myid mabo re wa akyu" mabo ngad: ra". 4 Jhid' de; myid wa nhag' lam: qhang mung:- su re nhag' khyag' ba: ra". Jhid' de; myid wa myid nug' ra" myid mabo ngad: ra"- maphug ngad: ra"- ngad beim" ra" myid mabo ngad: ra". 5 Jhid' de; myid wa yao: myid: rumae" maqhui: makad' ngad: ra". Yao: yao" akyu" maqho ngad: ra"- nhag' yo: nhag' gyid' makad' ngad: ra"- su: qobo re maxam" to: ngad: ra". 6 Jhid' de; myid wa makhyang" rumae mabobau: ngad: ra"- ngadqere: dangman" rumae bobau" ra". 7 Jhid' de; myid wa khonhae" re: qam: mashan ngad: ra"- khonhae" re: lam khug: na: ra"- khonhae" re: myid: lao" na: ra"- khonhae" re: nhag' lam: qhang: ra". 8 Jhid' de; myid wa apyad ato ngad: ra". Lapa qo" pa: ru wa dayo, daban: za: ngad: ra". Myan" aja: ja: re qo" jhau: rure: thang: lo" byaug: li" nae"- Pha,jhi" laba lajhao re: baui" lo" li" nae". 9 Pe"mung:ga"re ngonhaung" nho: pha,jhi" laba lajhao we' lapa qo" pa: ru wa majab byang" ngad: ra". 10 Ngadqere: ai: jab byang" ru joe" li" lao"- ai: atam" adau za: ngad: ru wa byaug: li" nae". 11 Ngo zoshao ngad shi" au:- Zoshao we' dakhyo: jhau: ra". Zoshao we' dakhyo: kham zo" ra"- zoshao we' dakhyo: myid: ra". Ana" ngo lau: de, boe" lo lao"- ngo wa zoshao: ave, akyang re shapye' pye' ra". 12 Ana" ngo wa bao tang" mae thab thab mung: myao: ra" bao lho re myao: ru we' dakhyo: za: myao: ra". Ngadqere: azhu" lao" wa- myo,khung: zhaug' za: qo" myao: li" li" nae". Ana" ngo ba: ru wa atam" adau za: ngad: ra"- azhu" lao" wa- Mao"So wa jab byang" sho' ngore ba: ru we' dakhyo: ngore: jab byang" sho' ba nae". Ana" ngonhaung" myao: ruwa gyid: bao tang" mae" phabao re qab qab za: the' myao: ru we' dau: ra" ai: au: ngonhaung" wa myo, khung: te' jho" zhaug' qu" myao nae". 13 Ana"- lam khug: myid- myid: lao" myid- jhid'de; myid ga" ra" gang" tang: jo; ra" ce: sam ja: jo; rumae" je: qi" thao" ru wa jhid'de; myid ngad: ra".

1 Korinthu 14

1 Airumung: naonhaung" wa jhid'de; myid bo nae" qhid' mae" qam: ke' ge,- Byo: nho: jeju jhaung qhu" jham re kao bau obyid: na ge,- Je yang: Mao"So: mungdao: re hau" kyo" ra" Byo: jhaung qhu" re qo" yu nae" qhid' mae" kao bau obyid ge,- 2 Gakai: lai myan" aja: ja: jhau: ra" yaug wa- byu re jhau: ru mangad:- Mao"So re jhau: ru ngad: ra". Yao: jhau: rure khag' maba: gyo: ngad: ra". Yao: wa Byo: nho: qam: so' khyo" yang no; thao" ra" dangman" ra" khyo re jhau: na: ra". 3 Mao"So: mungdao: re ta" hau" ra" yaug wa su re bao" thaug' byid' ra" dao:- qam: byid' ra" dao:- nhag' tang" ra" dao: re jhau: ra". 4 Gakai: lai myan" aja: ja: re jhau: ra" yaug wa- yao: yao" gaung re za: bao" thaug' byid' ra". Ngadqere: lapa pa: ra" yaug wa- ai: phung: geim" re bao" thaug' byid' ra". 5 Ngo wa naonhaung" alhab' mo; gakai: lai myan" aja: ja: qo" jhau genae" rure myid: o: ra". Ngadqere: naonhaung" lapa qo" pa genae" rure ngo je: myid: o: ra". Pe"mung:ga"re gakai: lai ra" myan" aja: ja: jhau: ra" yaug wa- Phung: geim" re bao" thaug' byid: nae" qhid' mae" yao: jhau: ra" dao: lajheim: re pheim: kyo: byid: nae" byu mana ngad: re wa- ai: lapa qo" pa: ra" yaug jhau: ru wa gakai: lai myan" jhau: ru tho' akyu" je: qi" ra". 6 Airumung:- nga" mao:nhaung: qe we"- ngo wa naonhaung" jhao" joe" li" yang: gakai: lai: ra" myan" dao: li" jhau: kyo" ngad: re wa pe" akyu" bo nae" i? Ngo ta" ra" dao: wa Mao"So: yang qhu" byid' ra" dao:- laba lajhao dao:- Byo: yang jaung" yang: ta" ra" mungdao:- mho" shid' ra" mungdao: mabo re wa dajhid' re: akyu" mabo ngad: ra". 7 Khalhao:- tang: ru" ra" kao mabo: ra" zai jham re qu" ge,- aijham mae" thoe boe" boe" za: mamyang: thug' li" re wa khoyaug ai: tang:- khalhao: thoe re qo" kho' nae" i? 8 Ailao"- labo" re mad: ra" yaug re: thoe boe" boe" za: mamad ngad: re wa- gyekhe' poe vao nae" qhid' mae" khoyaug seim" nyhang" nae" i? 9 Ai we' dakhyo: nao gakai: lai myan" dao: jhau: rumae boe" boe" za: majhau re wa- nao pe" ta" na: rure khag' khoru: gai: ba: gyo: nae" i? Ni" dao: wa pe" lajheim: mathug' ngad: ra". 10 Mug: myid dao mae majho" zhaung" ra" myan" dao: myo: sho' ja: jo, ngadqere:- khoja" myan" re: lajheim: mabo: ru majo, ngad: ra". 11 Ngo maba: gyo" ra" myan" re jhau: ra" yaug wa- nga" qhid' mae" taung bug byu ngad mung:- ngore: yao" qhid' mae" taung bug byu ngad: li" nae"- ngad: ra". 12 Naonhaung" wa Byo: nho: jeju jhaung qhu" re qo" khae: yu nae" gyai kao bau mo, ngad ko" ruyang ai: phung: qi" qhang: li" nae" rure qo" bao" thaug' byid' ra" jeju jhaung qhu" jham re qo" yu nae" qhid' mae" qam: je: ke' ge,- 13 Airumung: gakai: lai myan" dao: re qo" jhau: ra" yaug wa- yao: jhau: ra" dao: lajheim: re qo" pheim: kyo: nae" jeju jhaung qhu" re qo" khae: yu nae" qhid' mae" akyu" mho' ca" ra". 14 Pe"mung:ga"re ngo wa gakai: lai myan" dao: khyo" akyu" mho' ra" au:- nga" byo wa gaigai: yao: akyu" mho' ra"- ngadqere: nga" laba lajhao myid wa mabo: bo ngad: ra". 15 Airulao"- ngo khoru: kad' nae" i? Nga" byo we' akyu" mho' re- nga" myid we' re: akyu" mho' nae" ngad: ra". Nga" byo we' Nghaui"caung: re- nga" myid we' re: nghaui"caung: nae" ngad: ra". 16 Naonhaung" wa byo khyo" yang za: jeju caung: akyu" mho' ko" re wa- ai: phaung mae bobo: ra" yu" yu" byu dayaug wa- naonhaung" pe" ta" na ko" rure yao: maba lo:- naonhaung" jeju caung: akyu" mho' ra" dao: re Amen- ga: khoru: qo" bota" nae" i? 17 Naonhaung" Mao"So re jeju caung: akyu" mho' ra" dao: wa gyai gai sho' ngadqere:- su gaje qe: qhid' mae" dajhid' re: akyu" mabo ngad: ra". 18 Ngo wa gakai: lai myan" dao: myo: sho' ja: re naonhaung" tho' je yang: qo" jhau: ruyang Mao"So: jeju re caung:khin" ra". 19 Ngadqere: phung: caung:pa" phaung mae gakai: lai: myan" dao: thoe taung khyo" jhau nae" tho' su gaje qere qo" mho" shid' nae" qhid' mae" qo" gai: ba: gyo" ra" mho" shid' dao: ngo" kheim: re ngo je: jhau nug: ra". 20 Nga" mao:nhaung: qe we"- naonhaung" wa myid: qu" ra" khyo mae zoshao we' dakhyo: daboe" ge,. Makhyang" ra" khyo mae wa zoshao qe we' dakhyo: boe" mung:- myid: qu" ra" khyo mae kam" wa- lau: de, zo:qao" qe we' dakhyo: boe" ge,- 21 Jham: Mugsug' mae- Ngo wa nga" byu qere- gakai: lai: myan" dao: khyo" jhau nae"- Taung bug byu qe: nhad' khyo" jhau nae"- Airu: kad' re lhao" re: nga" byu qe wa- Nga" dao: re tae" gyo: genae" mangad:- ga: Asang ta" ra"- ga: tung" to" ra". 22 Aimung: gakai: lai myan" dao: qo" jhau: ra" jeju jhaung qhu" wa- malam khug: ra" mo; qhid' mae" ve, so: ngad mung:- lam khug: ra" mo; qhid' mae" mangad: ngad: ra". Mao"So: mungdao: re ta" hau" ra" jeju jhaung qhu" kam" wa- malam khug: ra" mo; qhid' mae" mangad:- lam khug: ra" mo; qhid' mae" ve, so: ngad: ra". 23 Aimung: phung: geim" mae" phung: byu qe zang" ham: na yang:- yaug khao: ngo" mae gakai: lai myan" dao: jhau: na ko" au:- yu" yu" byu qe damyo"- mangad: lao"- malam khug: ra" mo, damyo"- vao li" ko" re wa- naonhaung" alhab' re ago qe ga: mata" genae" i? 24 Ngadqere: yaug khao: ngo" wa- Mao"So: mungdao: kho" kyo: ko" au:- malam khug: ra" byu dayaug yaug- mangad: lao"- yu" yu" byu dayaug vao li" re- mungdao: gyo" yu: ra" mathao mae- yao: yao: qobo qo" yaug ngad: rure ba: beim" li" nae" ngad: ra". Yao: gyo" yu: gu: alhab' wa yao: re beim: nhao: li" nae". 25 Yao" aung khug: nhag' lam: mae nyham" to" ra" khyo alhab' myao: thug' li" nae"- aimung:- yao: wa- Mao"So wa ce: naonhaung" phaung gaung: mae dang yao: na nhaung- ga: tau" lhang: yu yang:- goe; gyo" mung: Mao"So re caung:pa" li" nae" ngad: ra". 26 Nga" mao:nhaung: qe we"- naonhaung" Mao"So re caung:pa" nae" zang" ham: na gelao"- dayaug wa caung:khin" dao:- gatau dayaug wa mho" shid' dao:- dayaug wa Mao"So mae" qhu" lho byid' ra" mungdao:- gatau dayaug wa gakai: lai myan" dao: re jhau- dayaug wa ai: dao: jham: lajheim: re pheim: kyo" ra" dao: jham re jhau yang: caung:pa" genae" rure ngo ta" nug: ru ngad:- Kad' ra" khyo ja: khao: ngo" wa ai: phung: re bao" thaug' akyu" byid' ru ngad ca" ra". 27 Dayaug yaug gakai: lai myan" dao: jhau nae" lao" shid' yaug- mangad: lao"- sam yaug mae" malai lo:- dayaug: thao dayaug jhau mung:- gatau dayaug wa ai: myan" dao: lajheim: re pheim: kyo: vashao:- 28 Ngadqere: ai: phung: mae myan" dao: re qo" pheim: kyo" ra" yaug mabo ngad: re wa- lag lai" myan" dao: jhau: ra" yaug wa sae za: na mung:- yao: yao: za: jhau yang:- Mao"So we' jhau: na vashao:- 29 Shid' yaug mangad: lao"- sam yaug Mao"So: mungdao: ta" mung:- gaje qe wa yao: bam pe" ta" na: rure gyo" kin: na vageshao:- 30 Ngadqere: ai: ham phaung mae zaung: jo; ra" byu dayaug yaug Mao"So mae" mungdao: qo" khae: yu: ngad: re azhao sao qhid' jhau: na: ra" yaug wa thang vashao:- 31 Yaug khao: ngo" wa zhao: yu: rumung:- qam: qo" genae" qhid' mae" naonhaung" alhab' mo; dayaug: thao dayaug Mao"So: mungdao: ta" kyo: ge,. 32 Mungdao: kho" kyo" ra" jeju jhaung qhu" wa- mungdao: ta" ra" yaug: nho: eib: ra" qao: mae ngad: jo, ca" ra". 33 Pe"mung:ga"re Mao"So wa ngonhaung" re abyi asin: boe" nhao nug yaug mangad:- Jho" nyang: rure we' yaug yo: rure o yaug ngad: ra". Mao"So: phung: alhab' mae phug' cao" ra" lai we' dakhyo:- 34 Myiqe: qe wa caung:pa" phaung mae sae za: na: jo, vageshao:- yao: bam wa dao: jhau nae" akhang" maqo" ngad: ako". Yuda byu qe: tarha" mae ta" to" ru we' dakhyo:- yao: bam wa au: she mo, magai: boe" ngad: ako". 35 Yao: bam daja: ja" khyo re ba nug geyang: ngad: re wa- yham mae yao: bam: yham sang pho" qere myid' yu vageshao:- pe"mung:ga"re myiqe: dayaug phung" nho: phaung mae dao: jhau: ru wa aqho' axag' ngad: ra". 36 Mao"So: mungdao: wa naonhaung" jhao" mae" sao qhid' thug' li" ru ngad: ra" i? Mangad: lao"- ai wa naonhaung" jhao" za: joe" li" ru ngad: ra"i? 37 Khag' ngadqere: yao: yao" gaung re Mao"So: lagyo: ngad:- ga: myid: jho: ra" yaug- mangad: lao"- Byo: nho: jeju jhaung qhu" re qo" yaug ngad:- ga: myid: jho: ra" yaug ngad: re wa- ngo wa ce: vhin tung" re Mao"So: amyin" khyo" tung" ke' ru ngad:- ga" rure ba beim: vashao:- 38 Ngadqere: yao: wa ce: mugsug' re pe" xan: masun: ngad: re wa yao: ta" rure datae" gyo: ge,- 39 Amung: nga" mao:nhaung: qe we"- Mao"So: mungdao: ta" hau" rure naonhaung" nhag' lam: mae kao bau obyid: na ge,. Alao"- gakai: lai myan" dao: re jhau: rure re: datam" pye' ge,- 40 Ja: khao: ngo" re nyang: vang" ru we' dau: ra" khyo" phug' cao" na ge,.

1 Korinthu 15

1 Nga" mao:nhaung: qe we"- ngo naonhaung" re kho" kyo: byid: yang: naonhaung" khae: yu mung: gang: gang: tang tang khyo" lam khug:lo ko" ra" ai: Lau Dao: Gai re ngo naonhaung" re dam: myid: beim: nhao nug: ra". 2 Aiwa ngo naonhaung" re kho" kyo" ra" mungdao: ngaui bau" lau dao: ngad: ra"- naonhaung" wa ai: ngaui bau" lau dao: re tang za: zaui" ci ko" ngad: re wa- ai: khyo" yang naonhaung" khyad' yu: ru qhug'li" genae". Airu: mangad: re wa naonhaung" lam khug: ru wa akeim za: ngad: ra". 3 Ngo wa ngoyao: qo" khae: yu: ra" akhyag: thao" ra" khyo re naonhaung" jhao" kai" byid' ke' ru ngad: ra". Airu wa Jham: Mugsug' mae tung" to" ru we' dakhyo:- Khristu wa ngonhaung" qhid' mae" shid kham: byid: va" ra". 4 Yao: wa nyhab' shaung: pye' ru qhug' mung:- Jham: Mugsug' mae tung" to" ru we' dakhyo:- sam ba thao re yao:wa dam: daui: to" li" nhao: ru qhug' ava". 5 Yao: wa Petru re na: qhu" mung:- ai: thao lagyo: daxe: shid' yaug re na: qhu" byid' ra". 6 Ai: thao yao: wa yao" thao cao" ko" ra" mo, byu ngo" yo zo: re dalhang: dae na: qhu" byid' ra". Ai bam mae" myo: phyao: ana" ba joe" sho' daui: na: ashiko". Daqhae: kam" wa shid: byaug: avako". 7 Amung: ai: thao re Yaku re yao" gaung na: qhu" mung:- ai: thao lagyo: qe alhab' mo; re na: qhu" byid' ra". 8 Lo" thao" mae ba na mange; ru khau: li" ra" yaug we' dau: ra" ngo rere: na: qhu" byid' ra". 9 Pe"mung:ga"re ngo wa lagyo: qe alhab' mae ngai: thao" ra" yaug ngad: ra". Mao"So: phung: re yhin" lo yaug ngad: ruyang ngo wa lagyo: ein: mhang" nae" lhao" re: man: qi" yaug mangad:- 10 Ngadqere: Mao"So: jeju khyo" yang ngo wa ana" ru: boe" na: ru we' yao: ngore byid' ra" nhag' myan" ra" jeju wa- aje amyid maboe" pye' ngad: ra". Ngo wa lagyo: gaje qe tho' qam: ke' yang: mau" zaui: so" ra"- Airu: qo" zaui: so" ru wa- ngoyao" qam: so' khyo" yang mangad:- Mao"So: nhag' myan" ra" jeju khyo" yang za: ngad: ra". 11 Airumung: ngokhyo" ngad: re ngad- lagyo: gaje qe yao: bam khyo" ngad: re ngad- ngonhaung" alhab' mo, kho" kyo" ru wa- ceru ngad: ra". Naonhaung" re: ce: rure lam" avako". 12 Ana" Khristu wa shid: rumae" dam: daui: to" li" ra" khyo re ngonhaung" mungdao: kho" kyo" na: re- naonhaung" mae" daqhae: wa- shid: ra" mo, dam: daui: to" li" nae" khyo majo,- ga: khoru: mung: ta" na ko" i? 13 Ai: khyo gaigai: dang: ngad: re wa Khristu wa shid: rumae" dam: daui: to" li" nhao ru maqhug' shingad: ra". 14 Yesu wa shid: rumae" dam: daui: to" li" nhao: ru maqhug' shingad: re wa- ngonhaung" kho" kyo: nae" pe" majo; ru we' naonhaung" lam" nae" re: pe" majo, ngad: ra". 15 Aitho' mago" shid: ra" mo, wa dam: daui: to" li" nhao: ru majo, ga" ra" dao: dang: ngad: re wa- Mao"So wa Khristu re shid: rumae" dam: daui: to" li" nhao nae" mangad:- Airumung: Mao"So wa Khristu re shid: rumae" dam: daui: to" li" nhao ava" ga:- kho" kyo: mo, ngonhaung" wa Mao"So: khyo re mhug' ta" ra" mo, ngad: ru de: de: ngad: ra". 16 Pe"mung:ga"re shid: ra" mo, dam: daui: to" li" nhao: ru maqhug' ngad: re wa- Khristu re: dam: daui: to" li" nhao: ru qhug' nae" mangad:. 17 Khristu wa dam: daui: to" li" nhao: ru maqhug' ngad: re wa- naonhaung" lam khug: rure: shad' nghung" ru we' naonhaung" wa naonhaung" yao" qobo khug mae nab; jo; ashiko". 18 Ailao"- Khristu re lam khug yang: shid: lo" byaug ra" mo, re: jeim" byaug va" ga" ra" lajheim: thug' ra". 19 Ngonhaung" wa- ana" ce: pyad mae za: Khristu khug mae myid: lao" nae" khyo qo" bam: ngad: re wa- mug: myid dao mae" byu gaje yaug khao: ngo" tho' mae jeyang: sho: jhin: ra" mo, ngad: ra". 20 Ngadqere: dangman" ru wa- Khristu wa shid: rumae" dang za: dam: daui: to" li" nhao: ru qhug' ava"- amung: Khristu mae yab; pyo" jo; ra" mo, re: dam: daui: to" li' nae" ngad:- ga" rure pakham: qo" nhao: ra". 21 Pe"mung:ga"re shid: ru wa byu dayaug: mathao mae boe" li" ru we' dakhyo:- byu dayaug: mathao mae shid: rumae" dam: daui: to" li" ru boe" li" ra". 22 Byu alhab' mo; wa Adam: we' dadang: dalam: za: doe, geyang:- shid ko" ru we' dakhyo:- Khristu we' dadang: dalam: za: doe, ko" ra" khyo" yang alhab' mo; wa shid: rumae" dam: daui: to" li" nhao: ru qhug' li" genae". 23 Ngadqere: yaug khao: ngo" wa yao: yao" agu ang: ra" khyo" daui: to" li" nhao: ru qhug' li" genae". Khristu wa sao qhid' mae daui: to" li" mung:- ai: thao re Khristu dam: joe" li" ra" ba na mae wa yao: we' sin" ra" yao" byu qe dam: daui: to" li" genae" ngad: ra". 24 Ai: thao re- lo" thao" ba na joe" li" li" nae". Ailao"- Khristu wa eib: na: ra" byo jham alhab'- kheim: so' qo" ra" mo, alhab'- qam: so' bo: ra" mo, alhab' re aung doe; pye' mung:- Mung"dan: re Mao"So: lo, khyo ab byid' li" nae". 25 Pe"mung:ga"re Mao"So wa gyevo alhab' re aung: pye' yang:- yao: bam re Khristu nho: khyid vo: qao: mae to: byid' ra" ba na joe" sho' Khristu eib: na ca" ra". 26 Lo" thao" khyo" aung: pye' nae" ra" gyevo wa- shid: ru ngad: ra". 27 Pe"mung:ga"re- jham: mugsug' mae Mao"So wa ja: khao: ngo" re yao" khyid qao: mae ke' to: byid' ra"- ga: bo: ra". Ja: khao: ngo" ga" ra" dao: mae- ja: khao: ngo" re Khristu khyid qao: mae ke' byid' ra" Mao"So yao: yao: mabobo: ru wa de: de: za: ngad: ra". 28 Ngadqere: ja: khao: ngo" re Khristu eib: ra" qao: mae to: byid: thao re Yao: Zo: yao: yao: re: ja: khao: ngo" re yao" khyid qao: mae ke' byid' ra" Mao"So: qao: mae na mung:- Mao"So wa alhab' dao mae bin sho' eib: na: li" nae". 29 Shid: ra" mo; qhid' mae" gaung tha"- qid nyhab' kham: yu: ra" mo; khyo wa khoru i? Pe" akyu" qo" nae" qhid' mae" yao: bam myid: lao" yang:- airu: kad' ako" i? Su daqhae: ta" ko" ru we' dakhyo:- shid: ra" mo, wa madam: daui: to" li" lo genae"- ga" ra" dao: dang: ngad: re wa- shid: ra" mo; qhid' mae" gaung tha"- yao: bam pe"mung: qid nyhab' kham: yu ko" laug i? 30 Ngonhaung" yao: ngonhaung" re qu" gelang: ga" re pe"mung: yo, qug khao: ngo" mae- kao so' re dan: pye' yang: shid gyan nogyan re thaung" qhug' na zo" re" qam: ke' na geli" i? 31 Nga" mao:nhaung: qe we"- ngo wa shid ru we' ba khao: ba ngo" thaung" qhug' na: ra". Ngonhaung" Asang Khristu Yesu we' dadang: dalam: za: doe; ra" kao so' daui khyo mae ngo naonhaung" mathao mae qo" phug: ruyang cedao: ta" ru ngad: ra". 32 Ngo wa byu xao su: shad' khyo" ta" gelang: ga" re- Ephesu vogaung: mae gug'nyhug' lae" we' ngo jho" se' ru wa- pe" akyu" bo nae" i? Shid: ra" mo, madam: daui: to" li" nae" ngad: re wa- dao: khyo: we' dakhyo:- Zo: gelang:- shaug' gelang:- ngonhaung" ne, mo" ba shid zai ngad:- 33 Damyid: nghung: ge,- magai ra" byin cao: qe wa gai: ra" ave, akyang re phyo' qheim" pye' byid' ako". 34 Dam: beim: so: ge,- Qobo lo, mau" jham re thang: pye' ge,- naonhaung" mae" damyo" wa Mao"So re maba ngad: ako". Naonhaung" gyo" qho' geshao:- ein: ngo ceru: ta" ru ngad: ra". 35 Dayaug yaug wa- Aire- shid: ra" mo, khoru: qo" dam: daui: to" li" nae" i? Yao: bam khoru" ra" gaung khyao we' ngad genae" i? ga: myid' li" nae". 36 Ago we"- myid gaung mae nao qho" ke' ra" myug: shi: wa- maqeim: lo" byaug: re wa maqo" yaug: thug' li" ngad: ra". 37 Nao qho" ke' ra" myug: shi: wa- jung: gaug shi:- mangad: lao"- gatau qhovo: shi: daja: ja: za: ngad: ra"- thao re yaug: li" nae" ra" agae re yao: nao maqho: ngad: ra". 38 Mao"So wa ai: myug: shi: re yao: myid: o: ra" agae azang byid' ra". Yao: wa myug: shi: ce' khao: ngo" re yao: we' dau: ga" ra" agae azang byid' ra". 39 Gaung sho: bo yang: daui: na: ra" ja: na mana alhab' wa sho: daja: za: mangad: ngad: ako". Xao su byu qe: sho: daja:- gug'nyhug' jham: sho: daja:- ngho' jham: sho: daja:- ngo: sho: wa gatau daja: ngad: ra". 40 Amung:- mug:gaung we' sin" ra" gaung khyao jham we' myid gaung we' sin" ra" gaung khyao jham ga:- jo; ra". Mug:gaung we' sin" ra" gaung khyao jham: yaung" shab: ru we' myid gaung we' sin" ra" gaung khyao jham yaung" shab ru majho" dau ngad: ako". 41 Ba yaung" shab: ru dakhyo"- lho" yaung" shab: ru daja:- kyi jham: yaung" shab: ru wa gatau daja: ngad: ra". Kyi jham: phaung mae lhao" re:- dace' we' dace' yaung" shab: ru majho" dau ngad: ako". 42 Shid: ra" mo, dam: daui: to" li" nhao: rumae re:- ce we' dakhyo: ngad: li" nae". Gaung khyao wa nyhab' pye' ru qhug' ra" au:- shid ba: ra" gaung khyao ngad: ra". Dam: daui: to" li" nhao: ru qhug' lao" wa- shid maba: ra" gaung khyao ngad: li" nae". 43 Nyhab' ke' ra" au: wa- qu" cae: qu" yao ngad: ru we' qam: nang" ra". Dam: daui: to" li" nhao lao" wa- yaung" shab: ru we' qam: bo: ru ngad: li" nae". 44 Nyhab' ke' ra" au: wa- gaung sho: gaung khyao ngad: ra". Dam: daui: to" li" lao" wa- byo gaung khyao ngad: li" nae". Gaung sho: gaung khyao jo; ru we' dakhyo:- byo gaung khyao re: jo, nae" ngad: ra". 45 Pe"mung:ga"re jham: mugsug' mae- sao qhid' mae" byu Adam: wa kao so' daui: ra" byu boe" li" ra"- ga: ta" to" ra". Thao mae" Adam: wa kao so' byid' ra" Byo ngad: ra". 46 Byo we' sin" ra" gaung khyao shi" sao qhid' boe" ru mangad:- gaung sho: we' sin" ra" gaung khyao shi" sao qhid' boe" mung:- thao re byo we' sin" ra" gaung khyao boe" ru ngad: ra". 47 Sao qhid' Adam re wa myid zhai" yang phan" to: mung:- myid gaung mae" li" ra". Thao mae" Adam wa mug:gaung: mae" li" yaug ngad: ra". 48 Ai: myid gaung we' sin" ra" byu qe wa- myid zhai" yang phan" to" ra" yaug we' dau: ako". Mug:gaung we' sin" ra" byu qe wa- mug:gaung mae" li" ra" yaug we' dau: ako". 49 Ngonhaung" wa myid zhai" yang phan" to" ra" yaug we' dau: ra" akhyao re zhaung" ve; ci: ru we' dakhyo:- mug:gaung mae" li" ra" yaug we' dau: ra" akhyao rere: ngonhaung" zhaung" ve; cili" nae" ngad: ra". 50 Mao:nhaung: qe we"- ngo naonhaung" re ta" geli". Sho: we' sa: wa Mao"So: mung"dan: re maqo" sang: yu ngad: ra". Shid: qeim: lo" ba: ra" akhyao wa shid: qeim: lo" maba: ra" akhyao re maqo" sang: yu ngad: ra". 51 Ce: no; thao" ra" dangman" ra" khyo re tae" gyo" yu ge,- ngonhaung" alhab' wa- mashid nae"- 52 Lo" thao" ra" labo" myang: thug' li" lao"- damyo, nyag mae ngonhaung" alhab' mo, wa tha" lo" byaug nae" ngad: ra". Pe"mung:ga"re ai: labo" thoe myang: thug' li" lao"- shid: ra" mo, wa dam: daui: to" li" nhao: ru qhug' mung:- khonhae" re: madam: shid logenae". Ngonhaung" alhab' wa tha" lo" byaug nae" ngad: ra". 53 Pe"mung:ga"re bab: qeim: lo" ba: ru wa- maba: bab: qeim: lo" ru khyo- shid ba: ru wa- maba: shid: ru khyo tha" lo" li" nae". 54 Bab: qeim: lo" ba: ru wa- maba: bab: qeim: lo" ru khyo- shid ba: ru wa- shid: maba: ru khyo tha" lo" byaug lao"- shid: ru wa aung doe; ruyang myug: pye' ru qhug' ava"- ga: ta" ra" jham: dao: jab byang" lo: li" nae". 55 Shid: ru we"- ni" aung doe; ru wa khai: mae i? Shid: ru we"- ni" daug wa khai: mae ngad: ra" i? 56 Shid: ru: nho: daug wa qobo ngad: ra". Qobo wa kham" to" ra" tarha" mae" qam: so' qo" yu: ra". 57 Ngadqere: Asang Yesu Khristu khyo" yang ngonhaung" re aung doe; ru byid' ra" Mao"So: jeju wa qi" qhang: jo; ra" wo". 58 Airumung: nga" jhid'de; ra" mao:nhaung: qe we"- gang: tang za: ye; jo, ge,- Asang: nho: mau" zo" re vin vo; ru wa- aje amyid mangad' rure beim: mung:- Asang: qhid' mae" khonhae" re: qam: ke' na ge,.

1 Korinthu 16

1 Ana"- Yuda mung" mae na ko" ra" Mao"So: byu qere bao" thaug' nae" qhid' mae" Alu: ngaui khyui nae" ru we' sin: yang: Galati mung" mae" phung: jham re ngo pyang: to: co' ru we' dakhyo:- naonhaung" re: kad' ge,- 2 Ngo joe" li" ra" au: re Alu: ngaui khyui: zhang" yu maqo nae" qhid' mae"- Laban ba- ba khao: ngo" mae naonhaung" yaug khao: ngo" wa- yao: yao" vao ngaui myo" ru- nang" rure cao" yang: Alu: ngaui qaung" to: lao: ge,- 3 Ngo joe" li" lao"- bang" se" mugsug' tung" yang: naonhaung" san: to" ra" mo, re naonhaung" byid' ra" Alu: ngaui jhaung qhu" jham re Yerusalem khyo dai" nhao: ke' nae". 4 Ngo yao: ye" lo" nae" qhid' mae" ang yang: ngad: re wa- yao: bam ngo we' daga" qo" ye" lo" li" genae". 5 Ngo wa Makedoni mung" khyo" naonhaung" jhao" joe" li" nae". Pe"mung:ga"re ngo Makedoni mung" khaung: khyo" kho' lai: ye" lo" ca" ra". 6 Ngo wa naonhaung" we' dayo, daban: ko qo" na maba. Gyo, yo, geim" ngad: re ngad nae". Ai: thao re ngo dam: xo' ye" lo" nug: ra" jo, qo khyo ye" lo" ra" gyaung: khyo qhid' mae" naonhaung" ngore qo" bao" thaug' ke' li" genae". 7 Ngo wa- naonhaung" we' su" lai: lo" zo" dazab zo: za: jho" qhug' nae" manug. Mao"So qad: ngad: re ngo naonhaung" we' daga" dayo, daban: ko qo" na nae" rure ngo myid: lao" ra". 8 Ana" wa ngo- ce: Ephesu vogaung: mae Pentikoti poe joe" lo sho' thang: na nae". 9 Ce: vogaung: mae ngore gye kad' ra" mo, myo: sho' na yang: re:- mau" zo" zaui: so: nae" qhid' mae" gaigai: yao: gyai qi" ra" agu gai jo; ra". 10 Timothi naonhaung" jhao" joe" li" yang: ngad: re lalam lanyoe: lham: tug: yu ge,- pe"mung:ga"re yao: re: ngo we' dakhyo:- Asang: mau" zo" re vin vo; yaug ngad: ra". 11 Yao: re khag' re: daqu" ngai ge,- yao: ngojhao" yaug yo za: dam: qo" tug' joe" lo nae" qhid' mae" naonhaung" wa yao" gyaung: khyo re bao" thaug' byid: ge,- pe"mung:ga"re yao: wa- mao:nhaung: qe we' dam: tug' joe" lo nae" rure ngo myid: lao" na: ra". 12 Ana"- mao:nhaung: pho" Apolo khyo we' sin: yang:- ngo wa yao: re gatau: mao:nhaung: qe we' daga" naonhaung" jhao" li" qhug' nae" qhid' mae" re: khyao ta" jhan: va". Ngadqere:- ana" au: ye: maang shi:- ga: yao: myid: ra". Thao re agu ang lao" yao: li" li" nae". 13 Lha" yang: na ge,- lam khug: myid mae tang za: ye; jo, ge,. Mazag mavae myid bo ge,. Qam: bo ge,. 14 Naonhaung" nho: mau"zo" alhab're jhid'de; myid we'zaui: so: ge,- 15 Naonhaung" wa Stephan: we' yao" yham byu qere ba: ako". Yao: bam wa Akhaia mung" mae" sao qhid' phaug' lo: ra" Khristan phung: byu qe ngad mung:- Mao"So: byu qere caung da" ra" mau" zo" re zaui: so: nae" qhid' mae" yao: bam yao" gaung re qhaug' byid' to" ra" mo, ngad: ako". 16 Nga" mao:nhaung: qe we"- naonhaung" wa airu" ra" byu qe- jhui" au: she: ra" qao: mae re:- yao: bam we' daga" mau" bovin vo; ra" mo; qao: mae re: na mung: yao: bam: ceim" shid' ra" khyo mae phug' cao" genae" qhid' mae" ngo naonhaung" re mho' ke' ra". 17 Ngo wa Stephan- Fotunatu- Akhaiku bam joe" lo gemung: ngaui bau" ra". Yao: bam wa naonhaung" maqo" kad' ra" ja: kad' byid' ako". 18 Yao: bam wa naonhaung" re bau: nhao: ru we' dakhyo:- ngo rere: bau: nhao: ako". Airu" mo, wa phug' te' byid: nae" man: qi" ra" mo, ngad: ako". 19 Asia mung" khaung: mae" phung: jham naonhaung" re au" ke' ako"- Akula we' Priskila tao we' yao: shid' tao: yham mae caung:pa" ham: phaung: na ko" ra" phung: byu qere:- Khristan jhid'de; myid we' au" ke' ako". 20 Cetau mae na ko" ra" mao:nhaung: qe alhab' mo, re: au" ke' ako". Naonhaung" yao: cao: gyang" lho" ra" bobaug baug: ra" lai we' jho" au" ge,- 21 Ngo Polu wa- ngoyao" lo; yang yao: Polu mae" au" dao: ein: tung" ke' ra". 22 Asang re majhid'de; ra" yaug khag' ngadqere:- yao" au: dao mae nhang: kheim: zao" vashao:- Marana tha- Ngonhaung" Asang we" joe" li" ri:- 23 Asang Yesu nho: nhag' myan" ra" jeju wa- naonhaung" we' daga" ngad: jo, vashao:- 24 Nga" jhid'de; myid wa- Yesu Khristu khug mae naonhaung" alhab' we' daga" ngad: jo, vashao: wo". Amen.