Romans

Roma

1

Yesu Hkristu a mayam hte, kasa aya hta dang da nna, dai chyoi pra ai Chyum laika ni hta 2 Karai Kasang gaw moi moi shi a myihtoi ni e ndat da ai, shi a Kasha a lam ngu ai, Karai Kasang a kabu gara shiga a jaw e san da hkrum ai, ngai Pawlu gaw, 3 Karai Kasang a tsawra ai ni hte, chyoi pra ai masha tai mu ga shaga tawn da ai, Roma mare na yawng hte hpe, ga shana dat nngai. 4 Dai kasha gaw masha labau hku gawn yang, Dawi a aru arat rai nga ai; si mat ai ni kaw na bai hkrung rawt wa ai a majaw, Karai Kasang a Kasha nan shi rai nga ai gaw, chyoi pra rawng ai Wenyi hte aja awa shadan dan nga ai; anhte a Madu Yesu Hkristu nan shi rai nga ai rai nna, 5 shi mying ningsang a marang e, amyu baw shagu dai kamsham ai lam hpe madat mara mu ga she, shi kaw nna chyeju hte kasa aya hpe anhte hkamla lu sagaw ai: 6 Yesu Hkristu e shaga la ai ni rai nga myit dai majaw, nanhte mung dai ni hta lawm nga myit dai. 7 Anhte a Wa Karai Kasang hte, Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 8 Nanhte a kamsham ai gaw mungkan ting chyam hkra kajai gumhkawng wa sai majaw, Yesu Hkristu a jaw e, nanhte mahkra a matu mara, nye a Karai Kasang hpe, ngai shawng shakawn kungdawn nngai. 9 Kaning rai nme law, nye a akyu hpyi ai ga hta e ngai nanhte hpe n sim n sa adum nga nna, 10 Karai Kasang myit ai hku rai yang gaw, ya gade n na yang nanhte hpang de du lu na ahkang lu la n ga, tutnawng e ngai a hpyi nga nngai gaw, Kasha a kabu gara shiga hta, nye a wenyi hte ngai daw nga ai Karai Kasang gaw, nye a sakse rai nga ai. 11 Nanhte ngang hkang nga myit ga, wenyi kumhpa langai ngai nanhte hpe karan jaw lu n ga, nanhte hte hkrum na ngai katu nga nngai: 12 shing ngu made ai gaw, nanhte hte nye a kamsham ai lam a marang e, nanhte hte ngai, shangwi shapyaw ai hkamla lu n ga, ngu ai rai nga ai. 13 Dai hta kaga, hpunau ni e, maigan amyu kaga ni hta akyu hkamla lu nngai hte maren, nanhte hta na mung langai ngai lu la n ga, nanhte hpang de sa du na law law lang a myit lu nga nngai raitimung, ya du hkra hkum shadang ai hkrum nngai hpe, nanhte n chye nga na ngai n ra nngai. 14 Heleni amyu ni, karing karang amyu ni, hpaji rawng ai ni, hpaji n rawng ai ni hte, hka kap ai wa ngai rai nga nngai, 15 Dai rai nna, nanhte Roma ni hpe mung dai kabu gara shiga hkaw tsun dan na, ngai mahtang myit hkut da ni ai. 16 Kaning rai nme law, dai kabu gara shiga hta ngai kaya shara rawng ai n rai: dai gaw shawng nnan e Yuda ni, dai hpang e Heleni masha ni hta kamsham ai ni kadai hpe mung hkyehkrang la shangun lu ai Karai Kasang a atsam rai nga ai. 17 Dai hta kaga, Dinghpring ai wa gaw kamsham ai hte hkrung nga lu na ra ai, nga nna ka da nga ai hte maren, kamsham ai hte lu la nna kamsham ai de ang wa ai, Karai Kasang a dinghpring ai lam hpe, dai hta e shadan dan nga ai. 18 Kaning rai nme law, dai tengman ai lam hpe n ding n man ai hte dip shadang da ai masha ni a tara n hkungga ai hte n ding n man ai amu mahkra a ntsa e, Karai Kasang a masin pawt ai myit gaw, lamu de nna danpru nga ai: 19 kaning rai law nga yang, Karai Kasang gaw shanhte hpe madun dan manu ai majaw, Karai Kasang hpe chye chyang mai ai lam gaw, shanhte hta e dan leng wa sai. 20 Shabyin da ai arai ni hpe tau yu yang, ginding aga lat kaw nna shi a marai nsam ngu ai, htani htana atsam hte Karai Kasang shingyan gaw, leng leng a dan nga ai; dai rai nna, shanhte a mara raw na lam htum mat malu ai. 21 Shanhte Karai Kasang hpe chye chyang ninglen, Karai Kasang hpe shagrau sha-a ang ai hte maren, n shagrau n sha-a ma ai hte, shakawn kungdawn mung n rai ma ai; shanhte a myit mang ai lam gaw, kaman lila sha rai mat malu ai rai nna, shanhte a n gring ai myit gaw, sin mak mat malu ai. 22 Hpaji byeng-ya la rawng ai ni nsan nhtawm, shanhte angawk angak rai nga ma ai rai nna, 23 hten mat n chye ai Karai Kasang a arawng sadang hpe, hten mat chye ai masha a, awu a, lagaw mali tu ai ashu ashan a, gumrawt hkawm ai baw a sumla hkrang hte galai kau da mu ai. 24 Dai rai nna, tinang a hkum hkrang a arawng hpe shada da e shayuk kau hkra, tinang kraw lawang a kayut ai hku hkan let, awu asin re ai de rai mat wa mu ga, Karai Kasang gaw shanhte hpe nawng kau mu ai; 25 kaning rai nme law, Karai Kasang a tengman ai lam hpe masu matsa ai hte shanhte galai kau mu ai rai nna, Hpan wa Ningsang hpe shinggan kau nna, hpan tawn da sai arai ni hpe mahtang nawku nna dawjau ma ai: Hpan wa Ningsang chyawm gaw htani htana e a nga ai law. Amen. 26 Shingrai ma ai majaw, Karai Kasang gaw shanhte hpe kaya kahpa re ai ngang kayut ai de nawng kau mu ai: shanhte a numsha ni pyi, hking madung hpe kau da nna, dai hte nhtan shai ai hku galaw hkat ma ai; 27 dai hte maren lasha ni mung numsha hte kanawn ai hking madung hpe kau da nna, tinang a ngang kahtet ai hta shada da kayut katu tam let, lasha hte lasha masai marai re ai amu maw hkat nhtawm, shanhte a shut hpyit ai hte ging dan ai yubak shabrai hpe, tinang dai hkamla ma ai. 28 Bai, Karai Kasang hpe chye chyang na man ya e n gawn n sawn di mu ai majaw, n hpru n mai re ai amu galaw mu ga, Karai Kasang gaw shanhte hpe tuk shamak ai myit hta nawng kau mu ai rai nna, 29 shanhte gaw n ding n hpring ai amyu myu hte, n hkru n hkra ai, nammak lawhpa ai, n ju n yawt ai hte hpring ma ai; manawn masham ai, masha sak gyam ai, gasat gala ai, hkalem hkalam ai, kyang laban ai mung chyat rai nga malu ai: 30 kadum kahte ai ni, bawlaw ai ni, Karai Kasang hpe ndawng ai ni, mayang yu ai ni, gumrawng gumtawng ai ni, grang dakat ai ni, kajam galam shabyin ai ni, kanu kawa a ga n madat ai ni, 31 myit n gring ai ni, ga shaka lai ai ni, nja nhpra myit n rawng ai ni hte matsan dum n chye ai ni, shanhte rai nga ma ai: 32 shingrai galaw ai ni gaw si ging nga ma ai, nga nna Karai Kasang a matsun maroi ga nga nga sai hpe, shanhte chye ma timung, shanhte hkum nan dai hte hpe galaw ma ai hta n-ga, dai hku hkan galaw ai ni hpe mung, awlaw ma ai.

2

1 Dai rai nna, masha kaga hpe jeyang ai wa e, na a mara raw na lam htum mat salit dai; kaning rai nme law, nang hkum jeyang nga nhtawm me dai amu hpe nan galaw ndai majaw, masha kaga hpe jeyang ai shaloi jang, na hkum hpe mahtang nang dawdan kau da wu ai. 2 Shingrai galaw ai ni a ntsa e Karai Kasang a tara dara ai lam gaw, tengman ai lam hte maren rai nga ai, anhte chye nga ga ai. 3 Shingrai galaw ai ni hpe jeyang nga nhtawm, tinang nan hkan galaw ai wa e, Karai kasang a tara dara ai hta, lawt lu na re ai, nang nawn da wu ni? 4 Karai Kasang a chyeju gaw myit malai lu hkra nang hpe woi awn wa nitdai hpe n chye n dum let, shi a n taw n tsang ai chyeju mung, myit sharang ai hte myit galu kaba ai hpe mung, nang n kaw n law a di da wu ni? 5 Gaja wa, na a ja la ai hte malai n lu ai myit majaw, Karai Kasang a pawt bu ngu ai, dingman ai tara dara na danpru ai nhtoi e hkam na madawng hpe, nang mahkawng da ndai. 6 Karai Kasang gaw langai hte langai hpe, tinang a bungli hte maren nhtang jaw na ra ai: 7 kaja ai bungli galaw let, shakut sharang nna hpung shingkang ma, arawng sadang ma, n hten n mat ai ma, tam ai ni hpe, htani htana asak jaw na ra ai; 8 ndang kalang nga nna tengman ai ga hpe n madat ai wa mi, n ding n man ai madat mara ai ni hpe mahtang, pawt bu nna sindawng katawt ai hte arip na maru ai; 9 Yuda masha nan raitimung, Heleni masha raitimung, n hkru n hkra re ai bungli hpe shachyen ai shinggyim masha ni yawng a ntsa e, tsinyam tsindam hte sharung shayawt ai gaw, rai nga u ga; 10 bai, Yuda masha hpe nan raitimung, Heleni masha hpe raitimung, kaja ai bungli shachyen ai ni nlang hte hta hpung shingkang, arawng sadang hte ngwi pyaw ai gaw, rai nga u ga: 11 kaning rai nme law, Karai Kasang gaw masha a myiman lata nga ai n rai. 12 Dai jep ai tara hpe garai n chye ai yubak galaw ai ni kadai mung, jep ai tara hta htenbya hkrum na ma ai n rai; jep ai tara npu e yubak galaw ai ni mahtang gaw, jep ai tara hta tara dara ai hkrum na mara ai: 13 dai jep ai tara hpe na yu ai majaw sha Karai Kasang a man e dinghpring lu ai n rai; dai tara hkan galaw ai ni hpe mahtang gaw, dinghpring ai ngu na maru ai. 14 Kaning rai nme law, jep ai tara hpe n lu ai maigan amyu ni, dai tara a daju hpe chye chyalu hte galaw nga ma ai shaloi e, jep ai tara n lu timung, tinang dai tinang a matu tara tai wa masalu ai: 15 shanhte a myit nsam dai tara a lam hpe sakse hkam ya nna, shanhte a myit mang ai hku shada da mara shagun ai hte mara raw hkat ma ai majaw, dai jep ai tara a ningli shanhte a kraw lawang hta ka da nga sai hpe, madun dan ma ai: 16 shingrai, nye a kabu gara shiga hte maren, Karai Kasang gaw Yesu Hkristu a lata hte, masha ni a n dan n leng ai lam hte hpe tara dara na nhtoi hta e rai na ra ai. 17 Nang mahtang Yuda masha mying ai wa rai nga nna, dai jep ai tara hpe machyu nga ai hte, Karai Kasang a marang e gumrawng nga nna, 18 shi a shawang myit chye ya ai hte, dai tara a sharin achyin lu la ai majaw, lam kaga ga hpe chye ginhka nna, 19 myikyaw ai ni a lam woi ai wa, nsin e lup nga ai ni a nhtoi, 20 n gring ai ni a hpareng wa, ma kaji ni a sara ngai rai nga nngai myit la nna, dai jep ai tara hta e chye chyang ai hte tengman ai a kasi lu ai wa nang e, 21 masha kaga hpe sharin achyin ai wa mi, nang hkum hpe gaw n sharin achyin nga n ni? lagu lagut n mai, nga nna hkaw tsun nhtawm, nang nan lagu n ni? 22 masha numshaw na n mai, nga da nhtawm, tinang dai numshaw nga n hka? gawng ngu sumla hpe matsat ai wa e, nawku htingnu nang hpya la nga n ni? 23 dai jep ai tara a marang e gumrawng ninglen, tara hpe tawt lai ai hte, nang Karai Kasang hpe jahpoi n ni? 24 Kaning rai nme law, Karai Kasang a amying ningsang gaw, nanhte a majaw maigan amyu ni hta shatan nhkan hkrum nga ai, nga nna laika hta ka da ai hte maren rai nga ai. 25 Dai jep ai tara hpe hkan shatup yang gaw, matu gadoi hkam ai mahtang akyu nga ai; raitimung, tara hpe tawt lai ai wa nang rai nga n yang gaw, na a matu gadoi ai amu gaw, n gadoi ai bai tai nga ai. 26 Matu gadoi n hkam ai wa, jep ai tara a dinghpring ai lam hpe hkan shatup a yang gaw, shi a n gadoi ai hpe gadoi ai zawn nawn ya na wu ai n rai ni? 27 Hkumshan a gadoi n hkam timung, tara hpe hkan galaw ai wa gaw, laika hku hkan nna matu gadoi hkam ninglen, tara hpe tawt lai ai wa nang hpe, tara dara na rin dai. 28 Kaning rai nme law, shinggan maga sha Yuda re ai wa, Yuda masha majing n rai; hkumshan a matu gadoi ai mung gadoi ai majing n rai; 29 kraw kata e Yuda wa rai nga ai mahtang gaw, Yuda masha majing rai nga ai: dai gadoi ai mung, laika hku hte sha n rai, wenyi hta na kraw lawang e byin nga ai rai nna, de a shakawn kungdawn ai gaw shinggyim masha kaw na n rai, Karai Kasang kaw na sha pru nga ai.

3

1 Dai rai yang gaw, Yuda wa kaning rai grau nga a ta? matu gadoi hkam ai mung, hpa akyu nga a ta? 2 Lam shagu hta akyu grai nga ai. Shawng na mahtang, Karai Kasang a shingran ga shanhte hkamla lu ma ai. 3 Rai taw gaw? shanhte hta na nkau mi n kam n sham dam ma yang gaw, shanhte a n kam n sham ai gaw, Karai Kasang a sadi sahka hpe shabai lu na kun? 4 Shing n rai law: Na a ga hta nang dinghpring nga n ga hte, Tara dara na du yang, nang awng wa n ga, nga nna laika hta rawng nga ai hte maren, masha yawng masu matsa ai ni tai wa timung, Karai Kasang gaw tengman nga u ga. 5 Ya, anhte a n ding n hpring ai gaw, Karai Kasang a dinghpring ai hpe shapraw shadan dat a yang gaw, anhte kaning ngu tsun na rai ta? pawt bu ari jaw ai Karai Kasang gaw n ding n hpring na, n rai ni? ( shing nga ai gaw, masha a hku hkan nna sha tsun nngai; ) 6 shing n rai law; rai dam yang, Karai Kasang gaw mungkan ga hpe kaning rai tara dara lu na rai ta? 7 Bai, nye a masu matsa ga hte Karai Kasang a tengman ai lam grau nna arawng sadang jat wa a yang gaw, yubak kap ai wa zawn jeyang ai hpe, ngai hpa rai naw hkrum nga n ta? 8 Mai kaja ai pru u ga n kaja ai galaw ga, nga nna nkau mi anhte hpe shatan nhkan let deng ma ai hte maren, galaw mai na n rai ni? shing nga ai ni mahtang gaw dawdan ging ma ai. 9 Shaloi kaning kun? Anhte je jan nga ga ni? N rai law; kaning rai nme law, Yuda ni raitimung, Heleni ni raitimung, yawng yubak kap ai ni rai nga ma ai hpe, anhte shawng de kadeng dan saga ai. 10 Laika hta mung, Dinghpring ai wa n nga ai, langai mi pyi n nga ai. 11 Chye chyang ai wa n nga ai, Karai Kasang hpe tam ai wa mung n nga ai; 12 Yawng dam mat wa masai, Shanhte rau hpawn asung n shang ai ni tai mat ma ai. Kaja ai amu kadai mung n galaw ma ai, Gaja wa, langai mi muk n galaw nga ai. 13 Shanhte a mayu gaw hpaw nga ai lup rai nga malu ai; Shanhte a shinglet hkalem chye nga ai, Pu htum a tuk shanhte a nten npu e rawng nga ai; 14 Shanhte a n-gup matsa mawa hte kajet kaje hkrai hpring nga malu ai; 15 Asai shapraw na shanhte a lagaw larau nga ai hte, 16 Shanhte a lam gaw jahten shaza ai hte nni nkri rai nga ai rai nna, 17 Ngwi pyaw ai lam hpe shanhte n chye ma ai: 18 Karai Kasang hpe hkrit kamyin ai lam, shanhte a myiman e n rawng malu ai, nga nna ka da nga ai. 19 N-gup yawng mayawng hpe sha-ip kau lu nna, mungkan ting hte gaw Karai Kasang a man e mara rawng ai tai nga mu ga, jep ai tara hta tsun matsun hte, jep ai tara npu e nga ai ni hpe a tsun nga ai gaw, anhte chye nga ga ai: 20 kaning rai nme law, dai jep ai tara hte yubak lam hpe chye ginhka lu ai majaw, jep ai tara a magam bungli hku hte shi a man e kadai mung dinghpring ai kaw n du lu ma ai. 21 Ya chyawm gaw, dai jep ai tara n lawm timung, jep ai tara hte myihtoi ni a laika sakse hkam ya ai Karai Kasang a dinghpring lu ai lam langai mi danpru wa sai; 22 dai gaw Yesu Hkristu hta kamsham ai a majaw, kamsham ai ni nlang hte a matu mara Karai Kasang a dinghpring lu ai lam rai nga ai: lachyen lahka chyawm gaw hpa mung n nga lu ai. 23 Kaning rai nme law, yawng yubak galaw ma ai hte, Karai Kasang a arawng sadang hpe dumhprut kau nna, 24 jahpu n ya ai sha, shi a chyeju hte, Yesu Hkristu a htingrai htingra ya ai a gawp e, dinghpring ai gaw du lu na ma ai. 25 Karai Kasang gaw myit sharang nga nna moi shawng na yubak mara ni hpe shalai dat kau ai majaw, shi a dinghpring ai lam hpe shadan dan u ga; 26 rai sa, ndai prat e shi a dinghpring ai lam hpe shadan dan na hte, Yesu hta kamsham ai wa hpe dinghpring shangun let, shi hkum nan dinghpring nga u ga she, Yesu a asai hta kamsham na marang e, shi gawng malai hkungga tai na, Karai Kasang gaw shi hpe shapraw dat wu ai. 27 Dai rai yang gaw, gumrawng shara kanang nga a ta? Dai gaw ban shadang mat sai. Gara tara hte ban shadang mat a ta? magam bungli tara hte rai kun? n rai law, kamsham ai tara hte ban shadang mat sai. 28 Kaning rai nme law, tara a magam bungli n lawm ai sha, kamsham ai hte sha masha gaw dinghpring lu ai, anhte sawn nawn ga ai. 29 Dai n rai yang gaw, Karai Kasang gaw Yuda ni a Karai Kasang sha rai nga a ni? maigan ni a Karai Kasang mung shi rai nga ai, n rai ni? 30 Rai sa, matu gadoi hkam ai ni kamsham ai hte, matu gadoi n hkam ai ni kamsham ai a marang e, dinghpring shangun ai Karai Kasang gaw langai sha rai nga a yang gaw, maigan ni a Karai Kasang mung, shi rai nga ai. 31 Dai rai yang gaw, kamsham ai hte anhte dai jep ai tara hpe gum-yu shatai kau sagaw ni? shing n rai law; anhte dai tara hpe shangang shagrin ga ai.

4

1 Dai she rai yang gaw, anhte a wa daju Abraham gaw, gawng shing-yan a atsam hte hpa akyu mu la a ta? 2 Abraham gaw magam bungli hte dinghpring ai lu la a yang gaw, gumrawng gumtawng shara nga lu timung, Karai Kasang a man e n rai. 3 Dai Chyum Laika mahtang gaw kaning nga a ta? Abraham gaw Karai Kasang hpe kamsham nga ai rai nna, dai hpe dinghpring ai rai nga ai, shi a matu ngu ya wu ai, nga ai. 4 Magam bungli shachyen ai wa chyawm gaw, chyeju hku hte shabrai lu la ai n rai, hkam ging ai majaw sha lu la lu ai. 5 Magam bungli n shachyen ai sha, tara tawt lai ai ni hpe dinghpring lu shangun ai madu hpe kamsham nga ai wa gaw, shi a kamsham ai hpe gaw, dinghpring ai, ngu ya wu ai. 6 Dai hte maren, Karai Kasang gaw magam bungli hpe n tau yu ai sha, dinghpring ngu ya wu ai wa hpe, Dawi mung sha-a nga nna tsun ai gaw: 7 Tara shut hpyit ai hta na raw dat ai hte, Yubak hpe makoi kau ya ai hkrum ai ni gaw, a nga ma ai; 8 Madu e yubak n shagun ai wa gaw a nga ai, nga ai. 9 Shing nga sha-a ai gaw, matu gadoi hkam ai ni hpe sha, shing n rai, matu gadoi n hkam ai ni hpe mung, sha-a nga mu ni? Kaning rai nme law, kamsham ai gaw Abraham hta dinghpring ai ngu ya wu ai, nga nna anhte tsun ga ai. 10 Dai rai yang gaw, kaning rai ngu ya wu ta? Matu gadoi hkam ngut sayang, shing n rai, garai n hkam yang re ai, ngu ya nga wu ni? Matu gadoi hkamla ai hpang e n rai, garai n hkam yang she, rai nga sai. 11 Dai hta kaga, matu gadoi n hkamla ai sha, kamsham ai a majaw dinghpring ngu ya hkrum ai nlang hte a kawa mung; 12 matu gadoi hkam ai ni hta lawm ma ai rai nna, matu gadoi hkam ai hta n-ga, anhte a wa Abraham gaw matu gadoi garai n hkam kaw nna rawng nga sai makam masham a hkang hta e a hkannang nga ai ni a kawa mung shi tai nga u ga, matu gadoi garai n hkam kaw nna, dinghpring nga ai makam masham a dazik ngu ai, matu gadoi ai kumla gaw, shi hkamla nu ai. 13 Dai hta n-ga, mungkan ga a sali wunli tai na, nga nna Abraham hte shi a aru arat kaw pru ai ga ndat gaw, dai jep ai tara kaw na pru ai n rai, makam masham a dinghpring ai hte sha lu la lu ai. 14 Kaning rai nme law, jep ai tara hta lawm ai ni, sali wunli hkamla ai ni rai nga ma yang gaw, makam masham gaw kaman lila rai mat wa ai hte, ga ndat mung hpoi mat sai. 15 Jep ai tara gaw pawt sindawng ai shapraw wu ai; jep ai tara n nga yang gaw, yubak mara mung n nga na re ai. 16 Dai re ai majaw, sali wunli hpe chyeju hku hte sha lu la lu hkra, dai ga ndat gaw jep ai tara hta lawm ai ni hta sha n rai, yawng mayawng a kawa Abraham a kamsham ai hta lawm ai amyu mahkra hta e grin dik wa u ga she, kamsham ai hte sha rai wa ai: 17 Abraham hpe gaw, Amyu law law a kawa ngai nang hpe shatai sade ai, nga nna ka da nga ai hte maren si mat ai ni hpe jahkrung ya ai hte, garai n tai ai ni hpe ya e rai nga ai zawn ngu da ai rai nna, shi kamsham nga ai Karai Kasang a man e, anhte mahkra a kawa rai nga ai. 18 Na a nshu nsha ni dai hte maren tai na mara ai, nga nna tsun dan wu ai hte maren, myit mada shara n nga raitimung, amyu baw law law a kawa tai u ga, kamsham let, myit a mada nga ai. 19 Latsa ning du magang wa ai majaw, tinang hkum nan chyasi rai sai hte, Sara a pu jat mung chyasi zawn nawn wu ai raitimung, kamsham ai myit n yawm lu ai: 20 rai sa, Karai kasang a ga ndat hpe dum yang, shi kam shut ai hte ndi nda n re ai sha, kamsham ai hte dakan dakring rai wa let, 21 Karai Kasang hpe shakawn kungdawn nna, ga ndat da ai hte maren shi shabyin na ra ai hpe, myit a jung nga ai. 22 Dai re ai majaw, dai gaw shi a matu dinghpring ai, ngu ya wu ai. 23 Shi hpe shing ngu ya wa ai gaw, shi a matu sha ka da nga ai n rai: 24 anhte a Madu Yesu hpe si mat ai ni kaw na hkrung sharawt la ai wa hpe kamsham nna, ngu ya hkrum na ra ga ai, anhte a matu mung ka da nga ai: 25 dai Madu Yesu gaw, anhte a shut hpyit ai a matu ap kau ai hkrum nna, anhte dinghpring wa lu na matu, hkrung sharawt la ai hkrum nu ai.

5

1 Shingrai, kamsham ai hte dinghpring wa lu ga ai majaw, anhte a Madu Yesu Hkristu a marang e, anhte Karai Kasang hte mahku mara rai ga ai: 2 Yesu a gawp e mung, ya lu la sagaw ai chyeju hta e, anhte kamsham ai hte shang lu saga ai rai nna, Karai Kasang a hpung shingkang hpe myit mada nga let, kabu gumrawng nga ga ai. 3 Dai hta n-ga, tsin-yam tsindam hta e mung anhte kabu gumrawng ga ai; tsin-yam tsindam mahtang gaw shakut sharang ai, 4 shakut sharang ai gaw myit marai ai, myit marai ai gaw myit mada ai shabyin nga ai hpe, anhte chye ga ai: 5 dai myit mada ai chyawm gaw, kaya kahpa jahkrum mi ai n rai: kaning rai nme law anhte hpe jaw da sai Chyoi pra ai Wenyi e Karai Kasang a tsawra ai myit, anhte a kraw lawang hta e ru bang ya ma ni ai. 6 Anhte naw, gawngkya nga ga yang, ladaw da ai ahkying hta e, Hkristu gaw tara n hkungga ai ni a matu mara si hkam sai. 7 Gaja wa, dinghpring ai masha a matu mara si hkam na kadai n nga nhten; mai kaja ai masha matu mara chyawm gaw, si hkam gwi na pyi, langai ngai nga nhten. 8 Raitimung, anhte yubak kap ai ni naw rai nga ga yang, Hkristu gaw anhte a matu mara si hkam ai hta, Karai Kasang nan shi a tsawra ai hpe, anhte kaw e shadan dat ma ni ai. 9 Dai rai nna, shi a asai hta ya dinghpring lu saga ai majaw, anhte shi a gawp e Karai Kasang a pawt sindawng ai kaw na, hkyehkrang la ai grau nna hkrum na ga ai. 10 Kaning rai nme law, anhte hpyen ni naw rai nga ga yang, shi a Kasha a si hkam ai a majaw, anhte Karai Kasang hte htinglu htinglai ai hkrum lu saga ai rai yang gaw, htinglu htinglai hkamla ngut jang, shi a asak sumdam hta e, anhte hkyehkrang la ai grau nna hkrum na ga ai. 11 Bai, dai hta n-ga, anhte a Madu Yesu Hkristu a marang e, Karai Kasang hta mung anhte kabu gumrawng nga ga ai: shi a majaw dai htinglu htinglai ai chyeju gaw anhte ya hkamla lu sagaw ai. 12 Dai rai nna, masha langai mi a jaw e yubak gaw mungkan ga e shang wa nna, yubak a majaw sihkrung sihtan shang nang wa ai hte maren, yawng mayawng yubak kap nga ma ai, majaw, masha nlang kaw e sihkrung sihtan du bang wa sai. 13 Kaning rai nme law, dai jep ai tara da ai du hkra yubak gaw mungkan ga e nga nga sa timung, jep ai tara n nga ai laman e, yubak shagun ai, ngu ai, n nga ai. 14 Shing nga raitimung, Adam a tawt lai ai lam hte maren yubak n galaw ai ni a ntsa e pyi, Adam kaw nna Mawshe a aprat du hkra sihkrung sihtan uphkang nga sai: Adam chyawm gaw, du na ra ai wa a kumla rai nga ai. 15 Raitimung, tawt lai ai lam zawn, chyeju kumhpa lam rai nga ai n rai; kaning rai nme law, marai langai mi a shut hpyit ai jaw e ga daga si mat ma sayang gaw, Karai Kasang a chyeju hte, Yesu Hkristu ngu ai masha langai mi a chyeju hte jaw ai kumhpaw kumhpa gaw, lanlak a matu grau nna law htam wa na rai nga sai. 16 Bai, marai langai mi a yubak galaw ai lam zawn, dai kumhpaw kumhpa lam rai nga ai n rai; kaning rai nme law, dawdan shangun hkra, yubak langai mi a majaw tara dara na lam pru wa timung, dinghpring lu la hkra, tawt lai shajang ai law law a jaw e, dai chyeju kumhpa pru wa sai. 17 Dai hta kaga, marai langai mi tawt lai nna, dai langai mi a majaw sihkrung sihtan uphkang nga sayang gaw, n taw n tsang ai chyeju hte dinghpring ngu ai kumhpa hpe hkamla ai ni gaw, Yesu Hkristu ngu ai wa langai mi a majaw, asak hkrung ai hte grau nna uphkang nga na masai. 18 Dai rai nna, tawt lai ai langai mi a majaw, masha nlang hte gaw dawdan ai hkrum ma ai hte maren, dinghpring ai amu langai mi a majaw, masha nlang hte gaw dinghpring lu na asak sumdam lu la manu ai. 19 Kaning rai nme law, masha langai mi a n madat mara ai a majaw, ga daga hpe yubak kap ai ni ngu shatai mu ai hte maren, marai langai mi a madat mara ai lam majaw, lanlak hpe dinghpring ai ni ngu shatai na maru ai. 20 Shut hpyit ai amu law jat wa mu ga, jep ai tara gaw shang lawm wa sai: 21 raitimung, yubak gaw sihkrung sihtan hte uphkang nga ai hte maren, anhte a Madu Yesu Hkristu a marang e, htani htana asak lu la hkra, chyeju gaw dinghpring ai hte uphkang nga lu u ga, yubak law htam wa ai hte yang e, chyeju gaw grau nna law htam wa sai.

6

1 Dai rai yang gaw anhte kaning ngu tsun na ma? Chyeju law htam wa u ga, yubak hta e naw a hkan nga na kun? 2 Shing n rai u ga. Yubak kaw na si hka nga ai ni anhte gaw, dai hta e kaning rai naw pra nga lu na ga ta? 3 Dai hta kaga, Hkristu Yesu hta e baptisma hkam ai ni anhte nlang hte gaw, shi a si hkam ai hta baptisma hkam nga ga ai hpe, nanhte n chye nga myit ni? 4 Dai re ai majaw, Hkristu gaw Kawa a hpung shingkang hte si mat ai ni kaw na hkrung sharawt la ai hkrum wu ai hte maren, anhte mung asak sumdam ningnan hta e rawt hkawm wa lu hkra, dai baptisma hkam ai hta e, anhte si hkam nna shi hte rau lup makoi ai hkrum saga ai. 5 Kaning rai nme law, anhte a si hkam ai gaw shi a si hkam ai hte baw sha rai nga ai majaw, anhte nhpang sha tai nga ga yang gaw, bai hkrung rawt ai hta e mung, anhte shi hte nhpang rum na ga ai. 6 Si mat ai wa gaw yubak hta na lawt pru nga ai majaw, 7 yubak a mayam anhte naw n tai nga sa na, ngu nna yubak hkum gaw shaza kau ai hkrum u ga she, anhte a gawng shing-yan dingsa gaw shi hte rau wudang hta jen da hkam ai hpe, anhte chye nga ga ai. 8 Si mat ai ni kaw na hkrung sharawt la hkrum ai Hkristu gaw, galoi mung bai n si lu na hte, sihkrung sihtan gaw galoi mung shi hpe n madu lu na nu ai, anhte chye ga ai majaw, 9 Hkristu hte rau si hkam ga yang gaw, anhte shi hte rau mung hkrung nga lu na ga ai, ngu nna anhte kamsham nga ga ai. 10 Kaning rai nme law, shi a si hkam ai gaw, yubak a majaw kalang sha mi si hkam ai, rai nga ai; bai rawt hkrung ai chyawm gaw, Karai Kasang a man e ahkrung nga ai lam rai nga ai. 11 Dai hte maren nanhte mung, yubak hte si hka mat ai ni rai nga manit dai rai nna, Hkristu Yesu hta e Karai Kasang a man e ahkrung nga ai ni rai nga ga ai, ngu nna myit la mu. 12 Dai re ai majaw, yubak a kayut ai lam madat mara ai du hkra, nanhte a si chye ai hkum hkrang hta e yubak hpe hkum up shangun myit; 13 nanhte a daw shan ni hpe mung, n ding n hpring ai hpyen hking hpe zawn, yubak hpe hkum ap ya myit; si mat ai ni kaw na hkrung rawt lu ai ni zawn, Karai Kasang kaw tinang dai sak ya mu; nanhte a daw shan ni hpe mung, dinghpring ai hpyen hking shatai nna, Karai Kasang hpe sak ya mu. 14 Kaning rai nme law, nanhte gaw jep ai tara npu e n rai, chyeju npu e rai nga myit dai majaw, yubak gaw nanhte a ntsa e madu lu na n rai. 15 Dai rai yang gaw, kaning law? jep ai tara npu e n rai, chyeju npu e anhte rai nga ga ai majaw, yubak galaw na ga ni? Shing n rai u ga. 16 Langai ngai kaw madat mara na nga, tinang dai shang nna mayam tai wa myit yang gaw, sihkrung sihtan hkrum hkra yubak a ga raitimung, dinghpring ai lu la hkra madat mara ai lam raitimung, nanhte hkan madat nga myit yang gaw, de a mayam ni nanhte rai nga myit dai, n chye nga myit ni? 17 Nanhte chyawm gaw yubak a mayam ni tai yu manit dai raitimung, nanhte hkamla hkrum ai sharin shaga ai lam hpe, sharawng ai myit hte madat mara manit dai majaw, Karai Kasang kaw a nga u ga: 18 yubak kaw na shalawt dat ai hkrum nhtawm, dinghpring ai a mayam ni nanhte tai wa manit dai. 19 Nanhte gawng shingma kya nga myit dai majaw, masha a hku hkan nna sha ngai tsun nngai: kaning rai nme law, n tara ai bungli galaw u ga, nanhte a daw shan ni hpe awu asin re ai hte n tara ai a mayam ni tai na, nanhte ap kau manit dai hte maren, chyoi pra ai lu la hkra, dinghpring ai a mayam ni tai na, nanhte a daw shan ni hpe ya e ap ya mu. 20 Yubak a mayam ni nanhte rai nga manit dai shaloi e, dinghpring ai hta na nanhte daw hka nga myit dai. 21 Dai rai nna, dai aten e nanhte hpa akyu lu la nga myit ta? ya e nan kaya kahpa ai baw lu la nga myit dai: dai ni a chyahtum gaw si mat ai hkrai rai nga ai. 22 Ya chyawm gaw yubak kaw na shalawt dat ai hkrum nna, Karai Kasang a ali ama ni tai nga myit dai majaw, chyoi pra hkam na ngu ai akyu gaw, nanhte lu la myit dai: de a chyahtum madaw gaw htani htana asak rai nga ai. 23 Kaning rai nme law, yubak a shabrai gaw si mat ai rai nga ai; Karai Kasang a chyeju kumhpa chyawm gaw, anhte a Madu Hkristu Yesu hta e, htani htana asak rai nga ai.

7

1 Bai, hpunau ni e, masha naw hkrung nga ai aten e, jep ai tara gaw shi hpe madu nga ai, nanhte n chye nga myit ni? ( ning nga ai gaw, tara lam chye ai ni hpe ngai tsun nngai). 2 Kaning rai nme law, madu wa lu ai numsha gaw, madu wa naw hkrung nga ai hte yang, tara a majaw shi hte a lashum manoi nga ai: raitimung, madu wa si mat a yang gaw, madu wa a tara na lawt lu nga ai. 3 Dai re ai majaw, madu wa garai n si yang, la kaga kaw wa a yang gaw, la shaw ai num shi hpe ngu na rai nga ai; madu wa si mat sayang chyawm gaw, tara hta na shi lawt lu sai rai nna, la kaga kaw wa timung, la shaw ai num tai na n rai. 4 Dai hte maren, hpunau ni e, si mat ai ni kaw na hkrung sharawt la hkrum ai la kaga ngu ai wa kaw, nanhte wa lu nna, anhte Karai Kasang a matu asi si lu u ga, nanhte mung Hkristu a hkum hkrang hta e si mat ai hkrum nna, jep ai tara hte daw hka wa manit dai. 5 Kaning rai nme law, hkumshan a myit hta anhte naw rawng nga ga yang gaw, sihkrung sihtan a matu asi si u ga, jep ai tara a jaw e yubak a marin marit ai baw, anhte a daw shan ni hta e katu nga mali ai. 6 Ya chyawm gaw, si mat hkrum ai hte anhte hpe sharen da ai baw hta na daw hka wa yang, jep ai tara kaw na shalawt dat ai anhte hkrum saga ai: dai rai nna, ga matsun dingsa hku n hkan ai sha, Wenyi a myit ningnan hte anhte dawjau nga ga ai. 7 Dai rai yang gaw, anhte kaning ngu tsun na ma? Dai jep ai tara gaw yubak rai nga n ni? Shing n rai u ga. Raitimung, jep ai tara hte sha n rai yang gaw, yubak hpe ngai n chye nngai: kaning rai nme law, Myit hkum marin, nga nna jep ai tara n tsun taw gaw, gaja wa, myit marin ai hpe ngai n chye nngai. 8 Yubak chyawm gaw ginshan yaw nna, dai ga matsun hte myit marin ai baw sumhpa ngai hta e shapraw dat wu ai; kaning rai nme law, jep ai tara n nga yang gaw, yubak gaw chyasi rai nga ai. 9 Ngai chyawm gaw tara hta n nga ai wa, lang mi e pra nga nngai: raitimung dai ga matsun pru wa yang, yubak prawn wa ai, ngai mahtang si wa nngai; 10 dai rai nna, asak hte seng ai ga matsun gaw, si ai lam tai wa sai, ngai dum nngai: 11 kaning rai nme law, yubak gaw ginshan yaw nna, dai ga matsun hte ngai hpe hkalem kau nhtawm, dai hte ngai hpe sat kau ni ai. 12 Dai rai nna, jep ai tara gaw chyoi pra nga ai; dai ga matsun mung, chyoi pra, dinghpring ai hte mai kaja nga ai. 13 Dai rai yang gaw, mai kaja ai baw nye a matu si lam tai wa sani? Shing n rai u ga. Dai mai kaja ai baw ngai hta si mat ai shabyin let, yubak majing shadan dan nna, dai ga matsun hte yubak gaw nachying n hkru ai yubak tai u ga she, yubak mahtang nye a si lam tai wa sai. 14 Dai hta kaga, jep ai tara gaw wenyi tara rai nga ai anhte chye ga ai; ngai mahtang hkumshan myit sha rawng nna, yubak e mari ai mayam rai nga nngai. 15 Ngai shachyen ai bungli hpe ngai n chye nngai; ngai n galaw mayu ai lam galaw nga nngai; ngai ndawng n yawt ai bungli sha a galaw nga nngai. 16 Raitimung, n galaw mayu ai hpe ngai galaw yang gaw, jep ai tara gaw kaja nga ai, ngai dai hte myit hkrum nngai. 17 Dai rai nna, ya ngai nan dai hpe n galaw nngai, ngai hta rawng ai yubak she dai hpe galaw nga ai. 18 Kaning rai nme law, nye a kraw e, rai sa, nye a shinggyim hkumshan myit hta, kaja ai baw n rawng li ai, ngai chye nga nngai: galaw mayu ai myit ngai hta a rawng nga timung, mai kaja ai hku galaw na ngai n mu lu we ai. 19 Galaw mayu ai mai kaja ai hpe ngai n galaw ai wa, n galaw mayu ai n hkru n hkra dai hpe ngai galaw nga nngai. 20 Shingrai ngai n galaw mayu ai hpe ngai a galaw nga ai gaw, ngai nan dai hpe n galaw nngai, ngai hta rawng ai yubak she dai hpe galaw nga ai. 21 Dai re ai majaw, mai kaja galaw mayu ai ngai hkum lala, n hkru n hkra hte ginrun nga ai, ngu ai tara hpe ngai mu hkrup nngai. 22 Kaning rai nme law, nye kraw lawang myit hte Karai Kasang a tara hta e ngai kabu gara nga nngai; 23 raitimung, nye a daw shan ni hta e tara kaga gaw, nye myit mang hta rawng ai tara hte gasat hkat nga ai rai nna, nye daw shan ni hta e rawng ai yubak a tara hta e ngai hpe bawngdung shangun nngai, ngai mu ni ai. 24 Chyum sha hkrum ai ngai wa e, ndai si shangun ai hkum hkrang hta na, ngai hpe kadai wa mawai la na law e? 25 Anhte a Madu Yesu Hkristu a marang e, Karai Kasang hpe ngai sha-a nga nngai. Dai rai nna nye a myit mang hte ngai hkum nan Karai Kasang a tara hpe a daw nga nngai; hkumshan hte mahtang gaw yubak a tara hpe ngai a daw nga nngai.

8

8:1 Dai re ai majaw ya gaw, Hkristu Yesu hta e nga ai ni a matu mara, dawdan shara n nga ai. 2 Kaning rai nme law, Hkristu Yesu hta e jahkrung ya ai Wenyi a tara gaw, yubak a tara hta na raitimung, si mat ai tara hta na raitimung, ngai hpe shalawt dat ni ai. 3 Jep ai tara nan shinggyim hkumshan majaw n-gun kya nna n shabyin lu ai gaw, hkumshan kaw hkannang ai ni hta e n re ai sha, anhte Wenyi kaw hkannang ai ni mahtang hta e, dai jep ai tara a ga matsun dik wa lu hkra, 4 Karai Kasang gaw yubak a matu mara, yubak a hkum hkrang hte bung ai gawng shing-yan hte, shi hkum nan a Kasha hpe shangun dat ru ai rai nna, shinggyim hkumshan hta e yubak hpe dawdan wu ai. 5 Kaning rai nme law, shinggyim hkumshan myit hkan ai ni gaw, hkumshan hte seng ai arai ni hpe myit nga ma ai; Wenyi hkan ai ni mahtang gaw, Wenyi a lam myit nga ma ai. 6 Hkumshan myit gaw si mat ai lam rai nga ai; Wenyi a myit chyawm gaw, hkrung ai lam hte ngwi pyaw ai lam rai nga ai. 7 Dai hta kaga hkumshan myit gaw Karai Kasang a tara npu e n taw lu ai hte, dai hpe n madat lu ai majaw, Karai Kasang hpe ndawng n yawt ai myit sha rai nga ai; 8 hkumshan myit hkannang ai ni mung, Karai Kasang a myit awng shara n tai lu ma ai. 9 Nanhte hta e chyawm gaw Karai Kasang a Wenyi rawng nga myit yang gaw, nanhte hkumshan myit hta e n rai, Wenyi hta e nan rawng nga myit dai. Langai ngai gaw Hkristu a Wenyi n rawng yang dai wa shi hte n seng nga ai. 10 Hkristu gaw nanhte hta e nga nga a yang gaw, hkum hkrang gaw yubak a majaw si nga raitimung, wenyi mahtang dinghpring ai a majaw ahkrung nga ai. 11 Dai hta kaga, si mat ai ni kaw na Yesu hpe hkrung sharawt la ai wa a Wenyi gaw, nanhte hta e rawng nga a yang gaw, si mat ai ni kaw na Hkristu Yesu hpe hkrung sharawt la ai wa gaw, nanhte hta e rawng nga ai shi a Wenyi a lata hte nanhte a si chye ai hkum hkrang ni hpe mung, jahkrung ya na marin dai. 12 Dai re ai majaw, hpunau ni e, hkumshan a myit hkannang na matu, hkumshan a hka kap ai ni anhte rai nga ga ai n rai; 13 kaning rai nme law, hkumshan hte seng ai asak sha hkrung nga myit yang gaw, nanhte si na rai nga myit dai; raitimung, Wenyi hte hkum hkrang a arawn alai ni hpe nanhte sat kau myit yang gaw, nanhte hkrung nga na marin dai. 14 Karai Kasang a Wenyi e woi lakawn la ai hkrum mahkrum ni gaw, Karai Kasang a kashu kasha ni rai nga ma ai. 15 Kaning rai nme law, bai hkrit kang na matu, mayam a wenyi hpe nanhte hkamla manit dai n rai; Aba, Wa e, nga nna jahtau chye ai, yin la ai kasha a wenyi hpe she, nanhte hkamla manit dai. 16 Dai Wenyi nan anhte a wenyi hte hkrum nna, anhte Karai Kasang a kashu kasha ni rai nga ga ai hpe, sakse hkam ya ma ai. 17 Kashu kasha rai nga ga yang gaw, sali wunli hkamla ai ni mung anhte rai nga ga ai; Hkristu hte rau hpung shingkang hkamla lu hkra, shi hte rau nni nkri hkrum nga ga yang gaw, Karai Kasang a sali wunli hkamla ai ni hte, Hkristu hte rum ai sali wunli hkamla ai ni, anhte rai nga ga ai. 18 Kaning rai nme law, ndai aprat na tsin-yam tsindam gaw, anhte kaw e shadan shapraw na ra ai hpung shingkang hte shadawn n ging nga ai, ngai myit nga nngai. 19 Nga yawng nga pra mung myit ndawt ai hte, Karai Kasnag a kashu kasha ni a paw pru na ra ai hpe ala nga ma ai. 20 Dai nga yawng nga pra chyawm gaw, hten run lam npu e shagrit kau ai hkrum raitimung, tinang ra ai hku n re ai sha, nga yawng nga pra nan lala sharen da ngu ai hten mat ai kaw na shalawt dat ai hkrum nna, 21 Karai Kasang a kashu kasha ni a pru lawt wa ngu ai hpung shingkang hta shang lu na, myit mada nga nna, dai hpe shagrit kau ai wa a majaw, shagrit kau ai hkam nga ai. 22 Dai hta kaga, nga yawng nga pra ting gaw ya du hkra rau madai nga nna, gadau gadap rai nga ma ai hpe, anhte chye ga ai. 23 Dai hta n-ga, Wenyi a chyeju nloi hpe hkamla sai ni anhte mung, anhte a kraw lawang hta e, anhte nan madai nga nna, anhte a hkum hkrang a htingrai htingrat ai lam ngu ai, kasha yin la na chyeju hpe, a la nga ga ai. 24 Kaning rai nme law, myit mada ai hte anhte hkyehkrang la ai hkamla saga ai; raitimung, mu lu ai arai hpe myit mada ai, ngu ai n rai nga ai; mu lu ai mahtang hpe kadai myit mada nga a ta? 25 N mu lu ai mahtang hpe myit a mada nga ga yang gaw, anhte dai hpe shakut sharang ai hte a la nga ga ai. 26 Dai hte maren, dai Wenyi mung anhte a gawng run gawng tsang ai hpe lanu lahku ya nga ai: kaning rai nme law, akyu hpyi mai ai hte maren anhte n chye hpyi nga ga timung, dai Wenyi nan n-gup n hkawn lu ai kraw madai ai hte, anhte a matu hpyi htinglu ya mi ai; 27 kraw lawang e sawk yu ai wa chyawm gaw, Wenyi a myit hpa rai nga ai gaw chye ya nga ai: kaning rai nme law, Karai Kasang ra ai hte maren, chyoi pra ai ni a matu mara shi hpyi htinglu ya nga ai. 28 Dai rai nna, shakyet tawn da ai hte maren, shaga la ai hkrum ai ni ngu ai, Karai Kasang hpe tsawra ai ni a matu mara, yawng mayawng mai kaja hkra jawm byin wa sai, anhte chye ga ai. 29 Kaning rai nme law, shi a Kasha gaw kahpu kanau lanlak hta e alat ningshawng tai u ga, shawng nna chye tawn da ai ni hpe, shi a Kasha a gawng shing-yan hte bung na matu, shi shanhte hpe shawng nna san tawn da mu ai: 30 shawng nna san tawn da sai ni hpe mung shi shaga la mu ai; shaga la manu ai ni hpe mung, shi dinghpring shangun mu ai; dinghpring shangun manu ai ni hpe mung, hpung shingkang lu shangun mu ai. 31 Dai rai yang gaw, ndai hte hta anhte hpa tsun na ga ta? Karai Kasang gaw anhte a maga e nga nga a yang gaw, anhte hpe hpyen ai maga de kadai wa mi nga lu na a ta? 32 Shi kasha lala hpe lahpawt lama n di ai sha, anhte mahkra a matu mara shi hpe ap ya ai wa gaw, shi hte nawng yawng mayawng anhte hpe jaw na, n rai ni? 33 Karai Kasang a lata la ai ni hpe kadai wa mi mara shagun lu na a ta? Karai Kasang gaw dinghpring shangun ai wa rai nga ai. 34 Dawdan lu ai wa gaw, kadai wa mi rai nga a ta? Si hkam nna, rai sa, si hkam ai hta n-ga, si mat ai ni kaw na hkrung sharawt la ai hkrum nhtawm, Karai Kasang a hkra lata e rai nga let, anhte a matu mara hpyi htinglu ya ai wa, Hkristu Yesu nan rai nga ai. 35 Hkristu a tsawra ai hta na anhte hpe kadai wa mi jahka kau lu na a ta? 36 Na a jaw e anhte shani shagu sat kau ai hkrum ga ai, Sat na san da ai sagu hpe zawn, anhte hpe nawn da mi ai, nga nna ka da nga ai hte maren, tsin-yam tsindam atsu atsam, zingri zingrat ai, hku hku hpang gara ai, singgu krin ai, shoihpa hkrithpa hte ri nhtu hkrum yang she, jahka kau lu na mi ni? 37 N rai law, anhte hpe tsawra nga ai wa a majaw, ndai yawng hte hpe anhte grau nna hkap dang kau lu ai ni rai ga ai. 38 Kaning rai nme law, si timung prawn timung, lamu kasa raitimung, tawa magam raitimung; ya e nga ai arai htawmhpang e du na arai hte, hpung atsam raitimung; 39 lahta tang na arai lawu tsang na arai hte, hpan da mada kaga hpa raitimung, anhte a Madu Hkristu Yesu hta e Karai Kasang a tsawra ai hta na, anhte hpe n jahka kau lu na mi ai, ngu nna ngai myit hkut nga nngai law.

9

1 Hkristu hta e tengman ai ga ngai tsun nngai, ngai n masu nngai; 2 nye kraw lawang e yawnhkyen kaba hte tutnawng na atsu atsam ngai hkam nga nngai gaw, Chyoi pra ai Wenyi hta e nye a myit nsam gaw, ngai hte sakse hkam ya ai. 3 Kaning rai nme law, nye a amyu baw re ai, nye a hpunau ni a matu mara, ngai hkum dai Hkristu hte hka nna dagam dala hkrum na hpe, hkam mayu hkra rai nga nngai: 4 shanhte gaw Israela masha rai nga ma ai; kasha yin la ai akyu mung, dai hpung shingkang mung, ga shaka ni mung, tara jaw ai shingran mung, dawjau ai lam mung, ga ndat ni hpe mung, shanhte lu ma ai: 5 ji wa ni gaw shanhte a ji wa ni rai nga ma ai rai nna, masha labau hku gawn yang, Hkristu gaw shanhte kaw na rai nga ai; shi gaw yawng mayawng a ntsa e htani htana e a nga ai Karai Kasang rai nga ai. Amen. 6 Raitimung, Karai Kasang a mungga gaw kaman be be zawn tai wa sai n rai. Kaning rai nme law, Israela amyu yawng hte wa, Israela masha majing n rai ma ai: 7 Abraham a aru arat re ai ni mung, yawng hte wa kashu kasha mai ngu na n rai. Isak hta mahtang, na a matu mara tai na ra ai, nga ai. 8 Da ndai gaw ning rai nga ai: shinggyim hkumshan e shangai ai kashu kasha ni gaw, Karai Kasang a kashu kasha ni majing n rai ma ai; ga ndat hte seng ai kashu kasha ni chyu sha, matu mara majing re ai nawn da mu ai. 9 Kaning rai nme law, Ladu hkrum jang ngai sa du nna Sara gaw shadang sha ba na ra ai, nga ai ga gaw, ga ndat rai nga ai. 10 Dai hta n-ga, Rebeka mung anhte a wa Isak hte na-um nasin rai wa sayang, 11 Karai Kasang shakyet da nhtawm, lata la ai lam gaw, magam bungli hte n re ai sha, shaga la ai wa a majaw she grin wa u ga, kasha yan garai n shangai ai rai nna, kaja ai hte n kaja ai hpa garai n galaw ti pyi, 12 Kaba ai wa matang kaji ai wa kaw mayam tai na ra ai, nga nna kanu hpe tsun dan wu ai. 13 Dai hte maren, Yaku hpe ngai tsawra nna, Esaw hpe ngai ndawng n yawt nngai, nga nna ka da nga ai. 14 Dai re ai majaw anhte kaning ngu tsun na ma? Karai Kasang kaw n ding n hpring nga ai rai ni? Shing n rai law. 15 Kaning rai nme law, Ngai chyeju galaw mayu ai wa hpe chyeju galaw na we ai; ngai matsan dum mayu ai wa hpe matsan dum na we ai, nga nna Mawshe hpe tsun dan nu ai. 16 Dai rai nna, lu la mayu ai wa a myit e rai lu ai n rai, gat shakut ai majaw mung rai lu ai n rai, dai gaw chyeju rawng ai Karai Kasang a myit majaw sha rai nga ai. 17 Kaning rai nme law, Chyum laika gaw, Nang hta nye a atsam madun dan lu nna, ga ntsa ting e nye a amying gumhkawng wa u ga she, ngai nang hpe sharawt dat de ai, nga nna Hpara-u hpe tsun nga ai. 18 Dai rai nna, kadai hpe mung, chyeju galaw mayu yang galaw nga ai, kadai hpe mung myit shaja mayu yang, shaja ya nga ai. 19 Dai re ai majaw, Shi hpa rai ra baw naw shagun nga ai kun? shi a shawang myit hpe kadai wa ban hkum lu a ta? nga nna ngai hpe htan mayu nhten. 20 Ataw, Karai Kasang hpe nhkap ai wa e, nang gaw kadai wa mi rai nga n ta? Galaw da sai arai gaw, Hpa majaw nang ngai hpe ning di galaw n ta? nga nna shachyaw da ai wa hpe tsun na a ni? 21 Di bu sama gaw kagam ga hpe madu lu nna, ga gumdin langai sha hta na, chyen mi hte reng ai di langai mi, bai chyen mi hte n reng ai di langai mi, galaw lu ai n rai ni? 22 Dai zawn Karai Kasang gaw, shi a pawt sindawng madun nna, shi a atsam hpe chye wa shangun mayu let, hten mat na matu hkyen da ai pawt ging ai di ni hpe galu kaba sumnung ai myit madun nna shakut sharang nga nga ai hte; 23 hpung shingkang a matu shawng e lajang da ai chyeju di ngu ai, Yuda ni hta sha n rai, maigan amyu ni hta na mung, 24 shaga la ai anhte hta e, shi a grau ai hpung shingkang hpe chye shangun mayu ai rai nga a yang gaw, hpa tsun shara nga a ta? 25 Dai hte maren Hosea laika hta mung shi ning nga tsun ai, Nye a amyu n re ai hpe, nye a amyu ngai ngu nna, N tsaw n ra ai shayi sha hpe, tsawra ai ngu na we ai; 26 Shingrai, Nanhte nye a amyu n rai nga myit dai, nga nna shanhte hpe tsun dan ai shara, dai yang e pyi, Hkrung nga ai Karai Kasang a kasha ni ngu na marin dai, nga ai. 27 Esaia mung Israela amyu a lam jahtau nna, Israela kashu kasha ni gaw nammukdara a zaibru zawn law ma timung, ngam nga ai kau chyen chyu sha hkyehkrang la ai hkrum na mara ai. 28 Kaning rai nme law, dai Madu gaw mungkan ting a ntsa e, shi a ga shadik na hte dai hpe shatup nna jahtum na ra ai, nga ai. 29 Dai hte maren, shawng e Esaia tsun da ai gaw, Dai Madu Zeba-ut anhte hpe matu mara n shangam taw gaw, Sodom zawn anhte tai nna, Gomora hte bung na ga ai, nga ai. 30 Dai re ai majaw anhte kaning ngu tsun na ma? Dinghpring ai lam n shachyut ai maigan amyu ni gaw, dinghpring ai hpe lep la ma ai; rai sa, kamsham ai hte lu la ai dinghpring ai hpe lep la ma ai: 31 tara hte seng ai dinghpring ai lam hpe shachyut ma ai Israela amyu mahtang gaw, dai tara hpe n dep lu ma ai. 32 Hpa majaw law nga yang, kamsham ai hte n re ai sha, magam bungli hte sha hkan shachyut ma ai majaw n dep lu ma ai. 33 Shingrai, Ahtu kataw na nlung hte, myit kataw shangun na lunghkrung hpe, Ziun hta e ngai tawn da se ai rai nna, Shi hpe kamsham ai wa gaw, kaya kahpa n hkrum na ra ai, nga nna ka da nga ai hte maren, dai ahtu kataw na nlung hta e shanhte ahtu kataw nga ma ai.

10

10:1 Hpunau ni e, shanhte gaw hkyehkrang la ai kaw du lu mu ga, shanhte a matu mara nye kraw lawang hta myit ndawt la nna, Karai Kasang hpe ngai akyu hpyi nga nngai. 2 Kaning rai nme law, Karai Kasang a lam shanhte grai myit maju jung nga ma ai hpe, ngai shanhte a lam sakse hkam ya nngai: raitimung, chye chyang ai nyan hte n re ai sha, 3 Karai Kasang a dinghpring ai lam hpe n chye n chyang ma ai rai nna, tinang a dinghpring ai lam hpe shagrin da na chyam yu ma ai majaw, shanhte Karai Kasang a dinghpring ai lam a npu e n taw ma ai. 4 Kaning rai nme law, dinghpring ai kaw du lu mu ga, Hkristu gaw kamsham ai ni mahkra a matu mara, jep ai tara a chyahtum rai nga ai. 5 Mawshe chyawm gaw, Tara hku hkan galaw ai wa gaw de a majaw asak hkrung nga lu na ra ai, nga nna jep ai tara hte seng ai dinghpring ai lam ka da nu ai. 6 Kamsham ai hte seng ai dinghpring ai lam mahtang gaw, Lamu de kadai lung wa lu na kun? Sunghtum ai shara de kadai yu wa lu na kun? nga nna na a kraw lawang e nang tsun lu na n rai, nga ai: 7 Shing nga ai gaw, Hkristu hpe yu wa shangun na, lamu de kadai lung wa lu na kun? bai, Hkristu hpe si mat ai ni kaw na sharawt la na, sunghtum ai shara de kadai yu wa lu na kun? nga ai rai nga ai. 8 Shaloi kaning rai tsun na law? Dai mungga gaw nang hte htep rai nga ai; dai gaw na a n-gup hte na a kraw lawang hta e rai nga ai:dai gaw, anhte hkaw tsun dan ai kamsham ai hte seng ai mungga rai nga ai: 9 shingrai, Yesu gaw Madu rai nga ai, nga nna na a n-gup ga hte tsun gara nna, Karai Kasang gaw si mat ai ni kaw na shi hpe hkrung sharawt la ai hpe, na a myit masin hta kamsham n yang gaw, nang hkyehkrang la ai hkrum na rin dai. 10 Kaning rai nme law, masha gaw dinghpring ai lu la hkra, myit masin hte kamsham nna, hkyehkrang la ai lu la hkra, n-gup hte tsun gara nga ai. 11 Dai Chyum Laika mung, Shi hpe kamsham ai ni yawng mayawng hte gaw kaya kahpa n hkrum na ra ai, nga ai. 12 Kaning rai nme law, Yuda ni hte Heleni masha ni hpe lachyen lahka n nga ai sha, dai Madu gaw yawng mayawng a ntsa na Madu langai sha rai nga ai rai nna, shi hpe shaga ai ni yawng mayawng hte hta chyeju hpring nga ai. 13 Shingrai dai Madu a amying nsang hpe shaga ai masha kadai mung, hkyehkrang la ai kaw du lu na ra ai. 14 Dai rai nna, garai n chye kam ai Madu hpe, kaning rai shaga lu na ma ta? garai n na yu ai wa hpe, kaning rai kamsham lu na ma ta? hkaw tsun dan ai wa n nga yang gaw, kaning rai na la lu na ma ta? 15 n shangun dat yang gaw, shanhte kaning rai hkaw tsun dan lu na ma ta? Dai hte maren, Mai kaja ai lam kabu gara shiga hkaw tsun dan ai ni a sat lagaw ni gaw, gade wa tsawm nga malu hka! nga nna ka da nga ai. 16 Raitimung, nlang hte wa dai kabu gara shiga hpe madat mara nga ma ai n rai. Kaning rai nme law, Esaia gaw, Madu e, anhte a shiga hpe kadai wa kamsham nga a ta? nga nna tsun ai. 17 Dai rai nna, kamsham ai gaw na la lu ai kaw nna, na la lu ai mahtang gaw Hkristu a mungga a majaw pru wa ai. 18 Raitimung, ngai tsun nngai gaw, Shanhte n na yu ma hka kun? Gaja wa teng teng, Mung shagu hkan e shanhte a nsen gaw, Mungkan ting hta shanhte a mungga pri rai wa sai, nga ai. 19 Bai, ngai tsun nngai gaw, Israela masha ni n chye ma hka kun? Mawshe gaw, Hpa n re ai amyu hte ngai nanhte hpe manawn shangun nna, N gring ai amyu e nanhte hpe pawt bu shangun na made ai, nga nna shawng nnan e tsun nga ai. 20 Dai hta kaga Esaia gaw, grai nden ja ai myit hte, Ngai hpe n tam ai ni gaw, ngai hpe mu ma ni ai, Nye a lam n san yu ai ni kaw, ngai danpru nngai, nga ai, nga nna tsun ai. 21 Israela masha ni a lam hpe mahtang shi bai tsun ai gaw, N madat n mara nna ndang kalang re ai amyu hpe, nye a lata shani tup ngai ladawn wak nga nngai, nga ai.

11

11:1 Dai rai nna, ngai tsun nngai gaw, Karai Kasang shi a amyu hpe kau da nu hka? Shing n rai law. Ngai mung Israela masha rai nga nna, Abraham a aru arat hte Benyamin a baw sang rai nga nngai. 2 Karai Kasang gaw shawng nna chye tawn da sai, shi a amyu hpe kau da nu ai n rai. Dai hta kaga, Elia gaw Karai Kasang a man e Israela masha ni hpe mara madi nna, 3 Madu e, na a myihtoi ni hpe shanhte sat kau manu ai; na a tawn hkungri ni hpe shanhte htu kadawng kau manu ai; ngai chyu sha ngam nga nna, shanhte nye a asak hpe mung tam ma ai, nga nna, shi a lam Chyum laika hta rawng nga ai ga hpe nanhte n chye nga myit ni? 4 Dai shingran ga chyawm gaw shi hpe kaning nga htan a ta? Bala a man e lahput garai n hput di ai lasha hkying sanit hte gaw, nye a matu ngai shangam da se ai, nga ai. 5 Dai hte maren, ndai aprat e mung, chyeju hte seng ai lata la ai lam a majaw, kau chyen mi naw ngam nga ai. 6 Dai gaw chyeju hte rai nga a yang gaw, magam bungli majaw n rai; bungli hte rai yang gaw, chyeju lam chyeju n rai nga ai. 7 Dai rai yang gaw, kaning law? Israela masha ni gaw, tinang tam ai lam hpe n dep ma ai; lata la hkrum ai ni mahtang gaw dep ma ai: 8 gale chyawm gaw, Ya du hkra pyi, hpam nga ai wenyi mung, n mu lu na myi hte n na lu na ana mung, Karai Kasang shanhte hpe jaw da manu ai, nga nna ka da nga ai hte maren, myit shanuk ya ai hkrum nu ai. 9 Dawi mung, Shanhte a sha ku tinang a matu dawnggawng hte mahkam, Myit kataw shara hte madawng hkrum na lam tai u ga; 10 Myi n mu lu hkra shanhte a myi sin mak malu ga, Shanhte a marung hpe tutnawng htingkung nga shangun nga u, nga ai. 11 Dai rai nna ngai tsun nngai gaw, Israela masha ni kazut taw nan hkra ahtu kataw hkrup ma sani? Shing n rai law, Shanhte hpe manawn shangun mu ga she, shanhte a ahtu kataw ai lam a jaw e, hkyehkrang la ai gaw maigan amyu ni kaw du wa sai. 12 Dai hta kaga shanhte a ahtu kataw ai gaw mungkan ga a sutgan, shanhe a sum mat ai gaw maigan amyu ni a sutgan tai wa a yang gaw, shanhte a hkum sumhpa gaw grau nna, akyu shabyin na n rai ni? 13 Dai rai nna nanhte maigan masha ni hpe ngai tsun made ai gaw: maigan amyu ni a kasa ngai rai nga nngai raitimung, nye a baw sang nkau mi hpe hkyehkrang la lu hkra, 14 shanhte hpe manawn shangun lu mawe yang gaw, nye a kasa aya hpe ngai shagrau sha-a nga nngai. 15 Kaning rai nme law, shanhte hpe kau da ai lam, mungdan ga a htinglu htinglai ya ai lam tai wa a yang gaw, shanhte hpe bai hkapla ai lam gaw, si mat ai kaw na hkrung wa ai hte bung nga na n rai ni? 16 Dai hta kaga, shawng nawng ai muk shadung gaw chyoi pra nga a yang gaw, de a muk tawng ting chyoi pra nga ai; ru pawt chyoi pra nga a yang gaw, lakung lakying ni mung chyoi pra nga na ma ai. 17 Raitimung, lakung lakying nkau mi gyi kau ai hkrum nna, tsanlun chyalam ngu ai nang mahtang gaw, dai ni hta shachyaw ai hkrum ndai hte, tsanlun ru a asau hta bawk jaw lawm ai wa tai n yang gaw, lakung lakying ni a ntsa e gumrawng gumtawng hkum rai et. 18 Gumrawng gumtawng nga n yang gaw, nang dai ru hpe gun ndai n rai, dai ru mahtang gaw nang hpe gun da ndai. 19 Raitimung, Ngai hpe shachyaw na, lakung lakying ni gyi kau ai hkrum ma ai, nga nna nang tsun mayu nhten. 20 Rai taw, rai u ga; shanhte gaw n kam n sham ai majaw gyi kau ai hkrum ma ai, nang mahtang gaw makam masham hte ngang hkang nga ndai. Myit hkum kaba et, hkrit kang nga u: 21 kaning rai nme law, Karai Kasang gaw lakung lakying majing hte hpe n lahpawt yang gaw, nang hpe mung lahpawt lama di na ndai n rai. 22 Dai re ai majaw, Karai Kasang a chyeju hte masin ja ai hpe myit yu mu. Kataw nga ai ni a ntsa e masin ja nga ai rai nna, Karai Kasang a chyeju hta e nang naw nga nga n yang gaw, shi a chyeju na ntsa e rai nga ai, dai n rai taw gaw, nang mung krum kau ai hkrum na rin dai. 23 Shanhte mahtang, tinang a n kam n sham ai hta n nawng mat malu yang gaw, bai shachyaw ai hkrum lu na mara ai: Karai Kasang gaw, shanhte hpe bai shachyaw na di lu nga ai. 24 Kaning rai nme law, tsanlun chyalam majing hta na nang hpe dan la nna, htung n nga timung, tsanlun kaja hta shachyaw n yang gaw, lakung lakying majing rai nga ai shanhte gaw, tinang a tsanlun hpun madung hta grau nna shachyaw ai hkrum na mara ai, n rai ni? 25 Dai rai nna, hpunau ni e, nanhte tinang a hpaji n machyu myit ga, ndai sunghtum ai lam hpe nanhte n chye nga na, ngai n ra nngai; dai gaw, maigan amyu ni garai n shang hkum ai du hkra, Israela masha nkau mi myit shanuk kau ai hkrum ma ai, nga ai: 26 shingrai Israela masha ni nlang hte gaw hkyehkrang la ai hkrum na ma ai: dai hte maren, Ziun kaw na Mawai la ai wa paw pru nhtawm, Tara n hkungga ai hpe Yaku hta na lat kau na ru ai; 27 Shanhte a yubak yeng seng kau ai shani e, Dai gaw shanhte hte nye a ga shaka rai nga ai, nga nna ka da nga ai. 28 Shaloi, dai kabu gara shiga a lam yu yang, nanhte a matu mara, shanhte hpyen ni tai wa masai; raitimung, lata la ai lam hpe yu yang, ji wa ni a gawp e, shanhte tsawra hkrum ai ni rai nga ma ai. 29 Karai Kasang a chyeju kumhpa ni hte shaga la ai lam chyawm gaw, myit dawm la shara n nga lu ai. 30 Kaning rai nme law, nanhte gaw shawng e Karai Kasang hpe n madat n mara myit timung, shanhte a n madat mara ai a majaw, ya e chyeju hkamla lu myit dai hte maren; 31 nanhte hkamla ai chyeju hte shanhte mung ya e chyeju hkamla lu mu ga, shanhte gaw ya e n madat n mara nga ma ai. 32 Karai Kasang chyawm gaw, nlang hte hpe chyeju madun dan lu hkra, nlang hte hpe n madat n mara ai hta ban hkum da mu ai. 33 Karai Kasang a n taw n tsang ai hpaji byeng-ya hte chye chyang ai myit gaw, gade wa sung nga a hka! kadai n sawk ya lu ai shi a jeyang ai hku, kadai n gawn ya lu ai shi a ningsang magam lam ni gaw, mau n ma rai nga ai. 34 Kaning rai nme law, dai Madu Du a myit hpe kadai dang chye a ta? shi hte bawng ai bawmung kadai wa rai nga a ta? 35 Chyeju htang ai hkrum lu hkra, kadai wa shi hpe shawng e sak ya sata? 36 Arai yawng mayawng hte gaw, shi kaw nna, shi a majaw, shi a matu mara pra nga ai. Shi kaw e htani htana hpung shingkang anga nga u ga law. Amen.

12

1 Dai re ai majaw, hpunau ni e, nanhte a hkum hkrang hpe, hkrung nga ai, chyoi pra ai hte, Karai Kasang kaw sharawng awng ai hkungga matu nawng ya na, Karai Kasang a chyeju hte ngai nanhte hpe shadut shahkat dat made ai: dai gaw nanhte a myit masin a dawjau ai lam rai nga ai. 2 Dai hta kaga, ndai dinghta ga a myit n hkan dagraw ai sha, Karai Kasang a mai kaja ai, sharawng awng ai hte hkum tsup re ai myit mang lam hpe nanhte chye ginhka lu myit ga, myit nnan lu la na hku arawn asam galai nga mu. 3 Dai rai nna, kadai mung tinang hkum hpe shadawn sharam ai hta nau wa n rai dum ai sha, Karai Kasang gaw langai hte langai hpe makam masham ren di nna karan jaw ai hte maren, mai myit ai lam chyu sha myit nga n ga, ngu nna ngai hpe jaw ai chyeju hte, nanhte kaw na langai hte langai hte hpe, ngai tsun dat nngai. 4 Kaning rai nme law, hkum hkrang langai sha hta nna, daw shan law law rai nga ai rai nna, daw shan ni yawng gaw asung langai sha hta n shang lu ai hte maren, 5 law law rai nga ga ai anhte mung, Hkristu hta hkum hkrang langai sha tai nna, langai hte langai shada da a daw shan ni rum nga ga ai. 6 Shingrai anhte hpe karan jaw ai chyeju majaw, langai hte langai gaw chyeju kumhpa kaga ga lu la ga ai hte maren, myihtoi htoi ga yang gaw, anhte a makam masham ang ai hte maren htoi ga; 7 hpungtau rai yang gaw, hpungtau bungli hpe gunhpai ga; sharin achyin re ai wa gaw, sharin achyin ai amu hpe, 8 shadum shahprang chye ai wa gaw, shadum shahprang ai amu hpe, shachyen u ga; alu jaw ai wa gaw n daw n hta jaw u ga; uphkang ai wa gaw, kasang kalang hte up nga u ga; matsan dum chye ai wa gaw, kabu gara ai myit hte galaw u ga. 9 Tsawra ai myit hta sawt ai n lawm u ga; n hkru n hkra ai hpe matsat nga mu, mai kaja ai hta manoi nga mu. 10 Hpunau hpe tsawra ai hta, shinggyim nau na myit shada da rawng nga mu; hkungga lara ai hta shada da shagrau hkat mu; 11 shakut sharang ai hta kadawn kanawn hkum rai myit; wenyi hta alet nga mu; dai Madu a bungli hpe a galaw nga mu; 12 myit mada let kabu gara nga mu; nni nkri hkrum yang, myit hkum kaji nga mu; akyu hpyi ai hta htep lahti tut rai nga mu; 13 chyoi pra ai ni a ra ai lam a matu mara gam jaw nga mu; manam daw ai lam hta sharau nga mu. 14 Nanhte e zingri zingrat ai ni hpe shaman ya mu; shaman ya mu, dagam dala hkum rai myit. 15 Kabu gara re ai ni hte rau kabu gara nga mu; hkrapngu hkrapngoi re ai ni hte rau hkrapngu hkrapngoi nga mu. 16 Langai hte langai shada da myit shara mu; arawng lam n tam ai sha, arawng n lu ai ni hte mazum hkau nga mu. Tinang hkum hpe hpaji rawng ai zawn, hkum nawn nga myit. 17 N kaja ai a majaw, n kaja ai hku kadai hpe mung hkum tai mu, Masha yawng mayawng a man e htaphtuk ai ningli madun na, myit yu nga mu. 18 Nanhte rai lu myit dai daram, masha nlang hte hte myit hkrum nna hkau chyap nga mu. 19 Tsawra ai ni e, tinang nan matai hkum htang mu; Karai Kasang a pawt sindawng na hpe ala nga mu: kaning rai nme law, dai Madu tsun ai gaw, Matai htang na ahkang ngai chyu lu nngai, ngai tai na we ai, nga nna ka da nga ai. 20 Dai hta n-ga, nang hpe hpyen ai wa kawsi nga a yang, shi hpe shat jaw u; hpang gara nga a yang, lu na jaw u: dai lam galaw n yang gaw, shi a baw ntsa e grung nga ai wan n-ga nang sumpum da na wu ai. 21 N hkru n hkra ai gaw nang hpe n dang kau u ga; mai kaja ai hte n hkru n hkra ai hpe dang kau u.

13

13:1 Shinggyim masha nlang hte gaw, daru magam ahkang aya lu ai ni a npu e ataw nga mu ga: kaning rai nme law, Karai Kasang kaw nna sha n rai yang gaw, ahkang aya n nga nga ai: nga nga ai ahkang aya hte mung, Karai Kasang e san da manu ai. 2 Dai re ai majaw, ahkang aya hpe lale ai wa gaw, Karai Kasang a tawn da ai aya hpe nhkap shadang nga ai; nhkap shadang nga ai ni chyawm gaw, tinang nan tara dara ai hkrum na mara ai. 3 Kaning rai nme law, du ni gaw kaja ai bungli a matu mara hkrithpa tai ma ai n rai; n kaja ai a matu mara hkrithpa rai ma ai. Ahkang aya lu ai wa hpe n hkrit mayu ai nga na myit ni? Mai kaja ai bungli galaw u, shingrai jang shi nang hpe shakawn kungdawn na rin dai: 4 kaning rai nme law, shi gaw na a akyu ara a matu mara, Karai Kasang a hkringmang rai nga ai. N hkru n hkra ai bungli nang galaw n yang gaw, hkrit kang nga u; kaning rai nme law, shi gaw dai nhtu hpe be lagya hpye wu ai n rai; n hkru n hkra ai bungli galaw ai wa hpe pawt sindawng hkra matai tai ai wa ngu ai, Karai Kasang hkringmang shi rai nga ai. 5 Dai rai nna, pawt sindawng na hpe tsang ai majaw sha n rai, tinang a myit masin e hkang ai majaw mung, ahkang aya npu e nanhte taw lu na marin dai. 6 Dai majaw mung, nanhte hkansi bang nga myit dai; kaning rai nme law, Karai Kasang a agyi salang ni shanhte rai nga ma ai rai nna, ndai amu hpe tutnawng e a gunhpai nga ma ai. 7 langai hte langai hte hpe mai ang ai hte maren jaw ya mu. hkansi mai hta ai wa hpe hkansi, kang mai hta ai wa hpe kang, bang mu; hkrit kamyin mai ai wa hpe hkrit kamyin nga mu, hkungga lara ram ai wa hpe, hkungga lara di mu. 8 Shada da tsawra ai hta kaga, kadai hte mung hpa hka hkum kap mu: masha kaga hpe tsawra ai wa gaw jep ai tara hpe shatup ngut nu ai. 9 Kaning rai nme law, Masha num hkum shaw, masha hpe hkum sat, hkum lagu, myit hkum marin, nga ai hte htet da ai ga kaga naw nga a yang gaw, dai hte gaw, Na a htingbu wa hpe na a hkum hte maren nang tsawra lu na ndai, nga ai ga langai sha hta gumhpawn lawm nga ai. 10 Tsawra ai gaw htingbu wa hpe n hkru n hkra galaw yu ai n rai: dai rai nna tsawra ai gaw, jep ai tara a shatup shadik ai lam rai nga ai. 11 Dai hta kaga, ndai aten hpe nanhte chye nga myit dai majaw, nanhte a yup hprang wa na ahkying, ya e pyi rai ra ai; kaning rai nme law, shawng nnan kamsham saga ai hta, dai hkyehkrang la ai gaw ya e nan anhte hte grau nna ni wa sai. 12 Shana ahkying lai magang wa nna, shani nhtoi du magang wa ra ai. Dai re ai majaw, nsin hte seng ai bungli hpe anhte raw sharun kau nna, nhtoi a hpyen hking hpe dagraw nga ga. 13 Tangpyaw shalai ai hte chyaru nang ai, shawa num gasawi ai hte ngang kayut ai, ga law ga la ai hte manawn masham ai hpe n hkan tam ai sha, shani chyingtung na shingdi ai zawn anhte a hkawm nga ga. 14 Dai hta n-ga, Madu Yesu Hkristu hpe buhpun dagraw nga mu: hkumshan a myit marin ai hku shadik na matu, hkum maw hkum hkyen nga myit.

14

14:1 Kamsham ai hta n-gun n ja ai wa hpe hkap hkalum la mu: raitimung, myit mang hparan ai lam hpe dinglik yu na matu, hkum rai myit. 2 Langai ngai gaw lusha amyu myu mai sha na kam nga ai, n-gun n ja ai wa mahtang gaw nam law nam lap sha nga ai. 3 Amyu myu sha ai wa gaw, n sha ai wa hpe hkum hkya u ga; n sha ai wa mung, sha ai wa hpe hkum jeyang u ga; kaning rai nme law, Karai Kasang gaw shi hpe hkap hkalum la sai. 4 Masha wa a shangun ma hpe jeyang ai wa e, nang gaw kaning san ai wa rai nga n ta? Tinang a madu a man e shi myiman pa na re ai, shing n rai, n pa na re ai; gaja wa shi pa na re ai; dai Madu gaw shi hpe shapa ya lu nga ai. 5 Marai langai ngai gaw nhtoi gale hta lani ni hpe shagrau wu ai; bai, langai ngai gaw, nhtoi shagu maren rai nga ai, myit da wu ai: langai hte langai gaw tinang myit shatawng shadik nga u ga. 6 Nhtoi hpe ginhka yu ai wa gaw, dai Madu a lam majaw ginhka yu nga ai: sha ai wa gaw, Karai Kasang hpe shakawn kungdawn nga ai majaw, dai Madu hpe dum let sha nga ai; n sha ai wa mung, dai Madu hpe dum let n sha nga ai rai nna, Karai Kasang hpe shakawn kungdawn nga ai. 7 Kaning rai nme law, anhte hta kadai raitimung, tinang hkum a matu mara sha hkrung nga ai n rai; kadai raitimung, tinang hkum a matu mara sha si wa ai n rai; 8 Hkrung nga yang gaw, dai Madu a lam anhte hkrung nga ga ai; si wa yang mung, dai madu a lam anhte si wa ga ai. Dai re ai majaw, hkrung timung si timung, dai Madu hte anhte seng nga ga ai. 9 Kaning rai nme law, si mat ai ni hte hkrung nga ai ni hpe madu nga lu hkra, Hkristu gaw si hkam nna bai hkrung rawt wa sai. 10 Nang chyawm gaw, hpa majaw na nhpu nnau wa hpe jeyang nga n ta? bai, na nhpu nnau wa hpe hpa majaw n gawn n sawn rai nga n ta? Anhte yawng mayawng hte gaw, Karai Kasang a tara tingyang a man e du tsap na ra ga ai. 11 Kaning rai nme law, Dai Madu gaw, Ngai ahkrung nga ai hte maren, nye a man e lahput shagu hput di nna, Shinglet shagu Karai Kasang kaw tawngban lu na re ai, nga ai, nga nna ka da nga ai. 12 Dai rai nna, anhte langai hte langai, tinang dai tinang lam a jahpan, Karai Kasang kaw dan na ra ga ai. 13 Dai re ai majaw, anhte shada da hpa n jeyang saga; kadai raitimung, tinang hpunau a matu ahtu kadawng shara hte myit kataw shara n tawn da na lam she, jeyang nga mu. 14 Hpa raitimung, tinang a npawt nhpang sa gawn yu yang, awu asin re ai mi n nga ai gaw, Madu Yesu hta e ngai chye nga nna myit dik nga nngai: raitimung, langai ngai gaw lama ma hpe awu asin re ai, nga nna myit nga a yang gaw, dai arai gaw shi a matu awu asin rai nga lu ai. 15 Kaning rai nme law, lusha shahpa majaw na a nhpu nnau a myit n pyaw nga a yang gaw, nang tsawra ai lam hta naw hkawm nga ndai n rai. Hkristu gaw shi a matu mara si hkam ya nu ai majaw, na a lusha shahpa e shi hpe hkum jahten et. 16 Shingrai nanhte a mai kaja ai bungli gaw, shatan nhkan hkum hkrum shangun u ga. 17 Kaning rai nme law, Karai Kasang a mungdan gaw, sha sha, lu lu rai na hku n re ai sha, Chyoi pra ai Wenyi e, dinghpring ai, ngwi pyaw ai hte kabu gara ai, rai nga ai. 18 Dai hku hkan nna Hkristu a bungli gunhpai ai wa gaw, Karai kasang a man e sharawng awng ai hkrum nna, masha a man e mung awlaw ai hkrum nga ai. 19 Dai re ai majaw, ngwi pyaw ai lam hte, shada da sharin hkang na lam hpe, anhte hkan shachyut nga ga. 20 Lusha shahpa nhkan e Karai Kasang a bungli hpe hkum sharun shabya kau et. Yawng mayawng hte gaw sanseng ai hkrai rai nga ai; raitimung kataw ai myit hte sha ai wa a matu, mara rai nga ai. 21 Shan sha na hte tsabyi lu na raitimung, na nhpu nnau hpe myit kataw shangun na lam hpa raitimung koi gam kau na gaw, mai kaja nga ai. 22 Nang hta rawng ai makam masham gaw, nang nan Karai Kasang a man e rawng nga n ga: ginhka lata ai lam hta tinang hkum dai jeyang shara n nga ai wa gaw, a nga ai. 23 Mahkoi myit rawng ai wa madaw sha a yang gaw, dawdan ai hkrum nga ai; kaning rai nme law, makam masham hte shi sha nga ai n rai: makam masham hte n seng ai hpa raitimung, yubak sha rai nga ai.

15

1 Dai rai nna anhte n-gun ja ai ni gaw, tinang pyaw ai lam n hkan ai sha, n-gun kya ai ni a magrau n grang ai hpe hkam sharang na, sut nga ai. 2 Anhte langai hte langai tinang a manang wa a ngamu ngamai na lam tau yu nna, shadaw shangang rai hkra shi hpe shapyaw nga ga. 3 Shingrai Hkristu mung shi hkum dai n shapyaw la ai sha, Nang hpe shatan ai ni a shatan nhkan ga, nye a ntsa e du ra ai, nga nna ka da nga ai hte maren, rai nga sai. 4 Kaning rai nme law, anhte shakut sharang nga lu nna, Chyum laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai. 5 Ya, anhte a Madu Yesu Hkristu a Kawa rai nga ai, Karai Kasang hpe, myit mang langai sha hte n-gup ga langai sha e shakawn kungdawn nga lu myit ga, 6 Hkristu Yesu a jaw e nanhte shada da myit mang ara sha rai nga lu u ga, shakut sharang ya ai hte shangwi shapyaw ya ai a Karai Kasang gaw, nanhte hpe awn nga u ga law. 7 Dai rai nna Karai Kasang a hpung shingkang a matu mara, Hkristu gaw anhte hpe hkap hkalum la mani ai hte maren, nanhte shada da hkap hkalum la mu. 8 Kaning rai nme law, ngai tsun nngai gaw, ji wa ni kaw jaw da ai ga ndat hpe shagrin lu na hte, maigan amyu ni mung chyeju majaw Karai Kasang hpe shakawn kungdawn lu mu ga, 9 Karai Kasang a tengman ai lam a matu mara, Hkristu gaw matu gadoi hkam ai ni a ali ama tai wa sai. Shingrai, Dai re ai majaw maigan amyu ni hta ngai nang hpe shakawn na nngai, Na amying nsang hpe mahkawn mangoi na nngai, nga nna ka da ai hte maren rai nga ai. 10 Bai shi gaw, Maigan amyu ni e, shi a amyu hte rau kabu gara nga mu, nga nna tsun ai. 11 Bai, Maigan amyu nlang hte e, dai Madu hpe shakawn mu; Amyu baw nlang hte gaw shi hpe kungdawn u ga, nga ai. 12 Bai Esaia gaw, Yese kaw nna kying ai ru npawt hte, Maigan amyu ni hpe up na paw pru ai wa rai na ra ai: Dai wa hpe maigan amyu ni myit mada na mara ai, nga ai. 13 Ya, Chyoi pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kamsham ai lam hta e, chyeju hte ngwi pyaw ai amyu myu nanhte hpe jahpring shatsup ya myit ga law. 14 Nye a hpunau ni e, nanhte nan lala kaja htum ai hte hpring tsup nga nna, chye chyang ai amyu myu htak rai nga ai hte, nanhte shada da sharin jep lu myit dai hpe, nanhte a lam ngai hkum nan kam da made ai. 15 Raitimung, Chyoi pra ai Wenyi e shachyoi shapra ai a majaw, maigan amyu ni gaw sharawng awng ai hkungga tai lu mu ga, Karai Kasang a kabu gara shiga hta hkungga jaw let, maigan amyu ni a matu Hkristu Yesu a shangun ma ngai tai wa n ga; 16 Karai Kasang e ngai hpe jaw da ai chyeju majaw, nanhte hpe bai shadum jahprang na zawn, ngai nanhte hpe nden ja ai myit hte kau chyen ka dat made ai. 17 Dai re ai majaw, Karai Kasang hte seng ai lam hte hta, Hkristu Yesu hta e nye a gumrawng shara rai nga li ai. 18 Kaning rai nme law, maigan amyu ni madat mara lu hkra, Hkristu gaw ngai hta shabyin ai sumtu ga hte amu bungli mung, Chyoi pra ai Wenyi a atsam hte n-gun lagaw re ai lamik kumla hte mauhpa amu hta kaga, ngai hpa n tsun wam nngai. 19 Shingrai, dai ni hpe tau yu nna, Yerusalem kaw na Iluri mung ginwang grup hkra, Hkristu a kabu gara shiga ngai hkaw jahproi dan ni ai. 20 Raitimung, masha wa e gaw da ai npawt ntsa e n kahtap u ga, Hkristu a amying n na yu ai shara hkan e dai kabu gara shiga hkaw dan na, ngai nan myit makun nga nngai. 21 Dai hte maren, Shi a lam kajai gara ai garai n dep ai ni mu lu nna, Garai n na yu ai ni, chye na lu na mara ai, nga nna ka da nga ai. 22 Dai rai nna nanhte kaw du na lam hkum shadang kau ai, ngai law law lang hkrum nngai. 23 Ya chyawm gaw ndai shara hkan e ngai nga na lam n nga sai rai nna, Spani mung de ngai sa wa ai shaloi, nanhte kaw shang na, law law ning wa myit a katu nga nngai. 24 Kaning rai nme law, lai sa wa yang, nanhte hte hkrum mu nna, nanhte hte tawng marang mi kanawn mazum ngut jang she, dai mung de nanhte ngai hpe hkan shakram sa dat mi ga, ngai myit mada nga nngai. 25 Ya chyawm gaw, chyoi pra ai ni hpe galaw daw let, ngai Yerusalem de sa wa nga nngai. 26 Kaning rai nme law, Makedoni hte Ahkaia mung masha ni gaw, Yerusalem na chyoi pra ai ni hta na matsan mayan ai ni a matu, shawang kumhpa langai mi lahkawn na, myit madu nga masai. 27 Shanhte myit madu ma timung, dai gaw chyeju htang ai sha naw rai nga ai: kaning rai nme law, shanhte a wenyi wunli wun-gau hta maigan amyu ni jawm hpawm ma yang gaw, mungkan arai hte shanhte hpe galaw daw na, sut nga ai. 28 Dai re ai majaw, ndai amu hpe galaw ngut nna, ndai shawang si hpe shanhte a man e dazik dawk da ngut jang, nanhte hpang hku hprang rai, Spani mung de ngai lai sa wa na nngai. 29 Nanhte kaw du yang, Hkristu a gumring gumrat ai hte hpring chyat rai nna du na ring ngai, ngai chye nga nngai. 30 Ya, hpunau ni e, Yuda mung na nhtan shai ai ni kaw na ngai lawt lu nna, Yerusalem na ni a matu nye a shawang kumhpa hpajang na lam, chyoi pra ai ni a man e, sharawng awng ai hkrum lu na hte; 31 Karai Kasang a myit e, kabu gara ai hte nanhte kaw du lu nna, nanhte hte rau ban sa ai hkamla lu n ga, 32 Karai Kasang kaw nye a matu mara akyu hpyi let, nanhte gaw ngai hte rau shingjawng nga na, anhte a Madu Yesu Hkristu a marang e mung, Wenyi a tsawra ai a marang e mung ngai nanhte hpe shadut shahkat dat made ai. 33 Ya, ngwi pyaw ai a npawt Karai Kasang gaw, nanhte yawng mayawng hte rau anga nga u ga law. Amen

16

1 Kenhkrea hpung na hpungtau rai nga ai anhte a kajan Hpobe hpe ngai nanhte hpang de shashawn dat ya nngai: 2 chyoi pra ai ni a ging dan ai hku hkan nna, dai Madu hta e shi hpe hkap hkalum la nhtawm, hpa lam raitimung shi ra ai hte maren, shi hpe tawn nga mu; kaning rai nme law, shi hkum nan masha law law wa hpe mung, ngai hpe mung, tau ga sai. 3 Ngai hte rau Yesu Hkristu a amu shingtau ai Priska yan Akula hpe shakram ya mi; 4 shan gaw nye a asak a matu tinang du baw shatawng kau manu ai rai nna, ngai hkrai sha n rai, maigan na Hpung ni yawng hte mung, shan hpe shakawn ga ai: shan a nta e shanu ai Hpung hpe mung shakram ya mi. 5 Asi mung e Hkristu a matu shawng si ai asi rai nga ai, ngai tsawra ai Eponetu hpe shakram ya mi. 6 Nanhte a matu mara grai wa shakut sharang yu sai Mari hpe shakram ya mi. 7 Nye a baw sang re ai, ngai hte rau htawng rawng yu ai Androniku yan Yuni hpe shakram ya mi: dai yan gaw kasa ni hta e arawng lu ma ai rai nna, nye a shawng e Hkristu hta e de lu ma ai. 8 Dai Madu hta e ngai tsawra ai Ampliatu hpe shakram ya mi. 9 Anhte hte rau Hkristu a amu shingtau ai Orban hte, ngai tsawra ai Staku hpe shakram ya mi. 10 Hkristu hta e jet rai nga ai Apele hpe shakram ya mi. Aristobulu a nta na ni hpe shakram ya mi. 11 Nye a baw sang wa Herodion hpe shakram ya mi. Narkiso a nta na dai Madu hta de ai ni hpe shakram ya mi. 12 Dai Madu a bungli gunhpai ai Truhpena hte Truhpawsa hpe shakram ya mi. Dai Madu hta e grai wa shakut sharang ai, tsawra ai Persi hpe shakram ya mi. 13 Dai Madu hta e lata la ai Ruhpu hte, shi hte an a kanu hpe mung shakram ya mi. 14 Asunkritu, Hpelegu, Herme, Patroba, Herma hte, shanhte hte rau nga ai hpunau ni hpe shakram ya mi. 15 Hpilogu hte Yulia, Nerea hte shi a kajan hpe mung, Olumpa hte shanhte hte rau nga ai chyoi pra ai ni yawng hte hpe shakram ya mi. 16 Nanhte shada da chyoi pra ai pup hte shakram ya mi. Hkristu hta de ai Hpung ni yawng hte gaw, nanhte hpe shakram dat ma ai. 17 Bai, hpunau ni e, nanhte hkamla ai sharin shaga ai lam hpe nhtan shai let, shabra sharun ai hte myit kataw shara shabyin ai ni hpe joi yu nna, shanhte hpe koi gam nga myit ga, ngai nanhte hpe shadum dat made ai. 18 Kaning rai nme law, shingre ai ni gaw, anhte a Madu Hkristu hpe n dawjau ai wa, tinang kan a matu sha tsang ma ai rai nna, naw kaja nga ai ni a myit hpe ga sau ga pyaw hte hkalem kau ma ai. 19 Nanhte a madat mara ai myit chyawm gaw masha nlang kaw chyam wa sai: dai re ai majaw nanhte a matu ngai kabu gara nga nngai; raitimung, nanhte gaw mai kaja lam hta hpaji byeng-ya, n kaja lam hta sanseng ai myit rawng nga myit ga, ngai naw ra nga nngai. 20 Ngwi pyaw ai a npawt Karai Kasang gaw, gade n na yang, nanhte a lagaw npu e Satan hpe kabye arin na ra ai. Anhte a Madu Yesu a chyeju gaw nanhte hte rau anga nga u ga law, 21 Nye a shingdep shingtau wa Timohti hte, nye a baw sang rai nga ai Luki, Yasun hte Sosipata hte gaw nanhte hpe shakram dat ma ai. 22 Ndai laika ka ai wa, ngai Tertiu mung, dai Madu hta e nanhte hpe shakram dat nngai. 23 Ngai hpe mung, Hpung ting hpe mung, manam daw ai madu Geu gaw nanhte hpe shakram dat ai. Dai mare na gumhpraw dek up ai wa Erastu hte, hpunau Kuartu yan gaw nanhte hpe shakram ma ai. 25 Amyu baw shagu makam masham a madat mara ai lu la hkra, htani htana Karai Kasang a matsun maroi ga majaw, myihtoi laika ni a jaw e kajai gara pri rai nga ai, chyi nma hpri nhpra e kyem da nhtawm, 26 ya e shadan dat ai sung ai shingran ga hku hkan let, nye a kabu gara shiga hte, Yesu Hkristu a lam hkaw dan ai ga hte maren, nanhte hpe shadaw shangang ya lu ai, 27 langai sha ngu ai, hpaji rawng htum ai Karai Kasang kaw, Yesu Hkristu a marang e, htani htana e hpung shingkang anga nga u ga law. Amen.

AMAZING GRACE BIBLE INSTITUTE