2 Corinthians

2 Korinhtu

1

1 Karai Kasang myit ra ai hte maren, Hkristu Yesu a kasa, ngai Pawlu hte, hpunau Timohti gaw, Korinhtu mare na Karai Kasang a Hpung hte Ahkaia mung ting na chyoi pra ai ni nlang hte hpe, ga shana dat ga ai. 2 Anhte a Wa Karai Kasang hte Madu Yesu Hkristu kaw na, chyeju hte ngwi pyaw ai gaw, nanhte hta e anga nga malit ga law. 3 Matsan dum chye ai Kawa hte, shangwi shapyaw na lam amyu myu a Karai Kasang, anhte a Madu Yesu Hkristu a Karai Kasang hte Kawa gaw, a nga u ga law. 4 Karai Kasang kaw na anhte hkum nan lu la sagaw ai shangwi shapyaw ai lam tau yu yang, dai shangwi shapyaw ai a marang e, tsin-yam tsindam amyu myu hkrum ai ni hpe shangwi shapyaw lu hkra, anhte a tsin-yam tsindam amyu myu hta shi anhte hpe shangwi shapyaw mi ai. 5 Shingrai, Hkristu a nni nkri anhte hta e law htam wa ai hte maren, Hkristu a jaw e mung, anhte a shangwi shapyaw na lam, law htam wa nga ai. 6 Dai rai nna, anhte tsin-yam tsindam hkrum yang, nanhte a shangwi shapyaw na lam hte hkyehkrang la na lam a majaw, hkrum ga ai: shangwi shapyaw ai hkrum yang, anhte nan hkam ai nni nkri amyu hta, shakut sharang ai shachyen chye ai nanhte a shangwi shapyaw na lam a majaw sha hkrum ga ai rai nna, nanhte a matu mara anhte a myit mada ai lam ngang ngang grin grin rai nga ai: 7 dai nni nkri hta nanhte lawm nga myit dai hte maren, dai shangwi shapyaw na lam hta mung lawm nang myit dai, anhte chye nga ga ai. 8 Kaning rai nme law, hpunau ni e, Asi mung e anhte hkrum sagaw ai tsin-yam tsindam a lam, nanhte n chye ai nga na, an n ra ga ai; anhte a asak lawt na n nawn lu hkra, anhte n dang lu ai nhtum nni li ai lit e anhte hpe dip kamyet ma ni ai: 9 dai hta n-ga, anhte gaw tinang dai n shamyet ai sha, si mat ai ni hpe hkrung sharawt ya ai Karai Kasang hpe sha shamyet shanat nga u ga, anhte nan tinang hkum hta si na dawdan gun saga ai. 10 Shi gaw ning san ai si lam hta na anhte hpe mawai la ma ni ai rai nna, naw mawai la na mi ai; shi anhte hpe naw mawai la na, anhte shi hpe myit mada nga ga ai rai nna, law law ni a myiman a marang e anhte lu la ai chyeju a majaw, 11 law law wa anhte a lam shakawn kungdawn lu mu ga, nanhte mung shingdep shingtau let anhte a matu mara akyu hpyi ya mi. 12 Kaning rai nme law, Karai Kasang a chyoi pra nna sanseng ai myit hte, dinghta hpaji n lawm ai sha, Karai Kasang a chyeju hte, mungkan ga e anhte htinglet nga nna, nanhte hte rau grau nna dai zawn rai nga ga ai hpe, anhte a myit masin a sakse hkam ai lam ngu ai gaw, anhte a gumrawng shara rai nga ai. 13 Nanhte hti yu nna chye lu manit dai lam hta kaga, anhte nanhte kaw ka dat ga ai n re ai sha, anhte a Madu Yesu Hkristu a nhtoi e nanhte gaw, 14 anhte a gumrawng shara tai wa ai hte maren, anhte mung nanhte a gumrawng shara tai wa na rai nna, anhte a lam nanhte kau chyen mi chye na nga ai zawn, hpang chyahtum du hkra chye nga na myit dai, ngu nna ngai myit mada nga nngai. 15 Ya, ning rai myit mu nga yang, nanhte gaw lahkawng lang na chyeju lu la myit ga she, nanhte hpang de shawng sa du nna, 16 nanhte a makau hku hprang let Makedoni mung de sa nhtawm, Makedoni kaw na nanhte hpang de bai wa nna, nanhte ngai hpe Yuda mung de hkan sa dat mi ga, ngai myit da nga nngai. 17 Ya, shingrai ngai myit da nga yang, ngai gaja wa nhting nhtang re ai myit madun nngai kun? Bai, nye a ga gaw, Rai sa, rai sa, nga ai gaw, N rai, n rai, tai wa u ga, ngu nna ngai myit da ai gaw, dinghta myit hku hkan nna myit da nngai kun? 18 Gaja wa, Karai Kasang teng nga ai hte maren, anhte a ga gaw nanhte kaw, Rai sa, n rai sa, ngu ai n rai. 19 Kaning rai nme law, ngai hte Silwanu yan Timohti gaw, nanhte hpe hkaw dan yu sai Karai Kasang a Kasha Hkristu Yesu gaw, Rai sa, n rai sa, ngu ai mi n nga ai sha, shi hta e, Rai sa, ngu ai sha tai wa ai. 20 Karai Kasang a ndat ga gade law nga raitimung, shi hta e, Rai sa, hkrai rai nga ai; dai rai nna, anhte a lata e Karai Kasang a hpung shingkang pru u ga, shi a jaw e, Amen, ngu ai mung rai nga ai. 21 Nanhte hte rau anhte hpe Hkristu hta e shagrin da nna, anhte hpe namman chya ya ai wa gaw, Karai Kasang hkrai rai nga ai: 22 shi gaw anhte hpe dazik shakap da nna, anhte a kraw lawang e Wenyi ngu ai masat dingsat jaw da ma ni ai. 23 Nanhte hpe matsam dum na majaw sha, ngai Korinhtu mare de rai n sa du ai gaw, nye a myit masin hta sakse tai na, Karai Kasang hpe ngai shaga nngai. 24 Ning nga tsun ai gaw, nanhte a kamsham ai hpe anhte madu nga ai n re ai sha, nanhte a kabu gara ai hta shingdep shingtau ai ni anhte rai nga ga ai; kaning rai nme law, kamsham ai hta nanhte grin grin tsap nga myit dai.

2

1 Raitimung, ngai gaw myit yawn ai hte nanhte hpang de bai n sa na, ngu nna ngai nan myit da se ai. 2 Kaning rai nme law, ngai nanhte hpe shayawn made yang gaw, shingrai ngai shayawn ai wa hta kaga, ngai hpe kadai kabu shangun lu na kun? 3 Dai hta kaga, nye a kabu gara ai lam gaw, nanhte nlang hte a kabu gara ai lam rai nga ai, ngu nna nanhte nlang hte hpe ngai myit kam nngai majaw, ngai sa du ai shaloi e ngai hpe kabu gara mai shangun ai ni gaw myit yawn shara n shabyin u ga she, shawng na laika nan ngai ka dat made ai. 4 Kaning rai nme law, tsin-yam tsindam, myit ru myit yak law law hte, myi prwi law law pru let ngai nanhte hpe ka dat made ai; nanhte hpe myit yawn shangun na n re ai sha, ngai nanhte hpe nachying naw tsawra nga ai hpe nanhte chye lu myit ga, ngai ka dat made ai. 5 Bai, marai langai ngai yawn shangun ai teng a yang gaw, ( nau wa n daru mayu nngai ) ngai hpe n re ai sha, nanhte nlang hpe zawn shayawn nga ai. 6 Nanhte hta na malaw maga dai wa hpe shingrai daru sharin ai gaw, shi a matu ram nga ai rai nna, 7 nachying sung ai yawnhkyen ai hta n lup mat u ga, shi hpe mara dat nna bai shangwi shapyaw nga mu. 8 Dai rai nna tsawra ai gaw shi a matu bai shagrin u ga, ngai nanhte hpe shadum made ai. 9 Dai re ai majaw mung nanhte lam shagu hta madat mara nga ai kun chye lu n ga, ka dat ai laika hte ngai nanhte hpe chyam yu made ai. 10 Kadai wa a mara nanhte raw dat myit yang gaw, ngai mung raw dat nngai: kaning rai nme law, ngai lama ma raw dat ni yang gaw, Satan gaw anhte hpe n dang kau u ga, nanhte a majaw, Hkristu a man e, ngai raw dat nngai; 11 Satan a myit mang ai hku chyawm gaw anhte n chye ya gaw ai n rai. 12 Dai hta kaga, Hkristu a kabu gara shiga a lam, Troa mare de ngai sa du yang, dai Madu a marang e nye a matu chyinghka hpaw malang nga timung, 13 ngai nau Titu hte n hkrum lu ai majaw, nye a Wenyi hta ngai n ngwi n pyaw rai nga nngai rai nna, shanhte hpe shakram ngut jang, Makedoni mung de sa wa nngai. 14 Raitimung, anhte hpe Hkristu hta tutnawng e padang manau hta nlaw shangun nna, shi a chye chyang ai manam pyaw bat anhte a lata hte shara shagu hkan e shapraw shadan ai Karai Kasang gaw, a nga u ga law. 15 Kaning rai nme law, anhte gaw hkyehkrang la hkrum ai ni hta mung, sum mat hkrum ai ni hta mung, Karai Kasang a man e Hkristu hta ngwi pyaw bat rai nga ga ai: 16 sum mat hkrum ai ni hta si na matu si hkrung si htan bat, gale hta asak lu na matu asak kaw na bat, anhte rai nga ga ai. 17 Ndai bungli shachyen na kadai wa ging ram nga a ta? Kaning rai nme law, Karai Kasang a mungga hpe pau chye ai masha law law ni zawn anhte n rai nga ai sha, sanseng ai myit hte mung, Karai Kasang kaw nna mung, Karai Kasang a man e anhte Hkristu hta tsun nga ga ai.

3

1 Anhte gaw tinang a hkum marai hpe bai dan hpang ga ai kun? dai hta n-ga, masha nkau mi zawn nanhte hpang de, shing n rai nanhte kaw na tinang marai dan ai laika anhte ra ga ai kun? 2 Anhte a kraw lawang e ka da nna, masha yawng mayawng chye chyang lu ai hte hti yu lu ai anhte a laika nan, nanhte rai nga myit dai: 3 tsi hte n re ai sha, hkrung nga ai Karai Kasang a Wenyi hte, bai, lung pa hta mung n re ai sha, hkumshan a kraw lawang e ka da nga ai, anhte a lata hte lajang da ai Hkristu a laika nan nanhte rai nga myit dai gaw, dan dan leng leng rai nga ai. 4 Ning rai myit kam ai gaw, anhte Hkristu a marang e Karai Kasang a man e lu ga ai. 5 Raitimung, anhte gaw tinang atsam machyu nna me, anhte nan hpa hpaji daw lu ga ai n rai; anhte a ging ram ai tsam gaw Karai Kasang kaw nna rai nga ai; 6 ningnan ga shaka sara tai na shi anhte hpe shaging sharam ma ni ai; dai ga shaka gaw, laika hkum hta na n re ai sha, Wenyi hta na rai nga ai: kaning rai nme law, laika hkum gaw sat kau chye ai, Wenyi chyawm gaw jahkrung ya lu ai. 7 Dai rai nna, hkoi mat chye ai Mawshe a myiman a hpung shingkang majaw, Israela masha ni shi a myiman hpe n azi yu lu hkra, laika hkum hte lung pa hta tawk ka da ai, si hkrung si htan daw ai aya gaw, hpung shingkang hte danpru nga ai rai yang gaw, 8 Wenyi hta na daw ai aya gaw, hpung shingkang hta grau nna tai na, n rai ni? 9 Kaning rai nme law, dawdan chye ai daw ai aya gaw hpung shingkang rawng ai rai yang gaw, dinghpring shangun ai daw ai aya gaw hpung shingkang hta grau nna law htam wa na ra ai. 10 Dai rai nna, chyahtum chyalai re ai hpung shingkang rawng ai aya a majaw, shawng na hpung shingkang rawng ai lam gaw, ning re ai hpung shingkang shapraw dan lu ai n rai. 11 Kaning rai nme law, hkoi mat chye ai aya gaw hpung shingkang rawng a yang gaw, agrin nga ai aya gaw grau nna hpung shingkang rawng na ra ai. 12 Ning re ai myit mada ai lam lu ga ai majaw, anhte grai wa nden ja ai myit madun ga ai rai nna. 13 hkoi mat chye ai aya jahtum hpe Israela masha ni n azi yu lu u ga, Mawshe gaw shi a myiman hpe man magap htinggrum ai zawn, anhte n galaw ga ai. 14 Shanhte a myit mang ai hku chyawm gaw shaja kau ai hkrum ma ai; kaning rai nme law, dai ni nan du hkra, dai ga shaka dingsa hti yang, myi na man magap gaw a htinggrum nga ai rai nna, dai gaw Hkristu e kun di kau nu ai hpe, shanhte kaw shapraw shadan manu ai n rai: 15 dai ni du hkra, galoi mung Mawshe a ga hti yang, man magap gaw shanhte a kraw lawang e a htinggrum nga malu ai. 16 Raitimung, dai Madu hpang de galoi kayin a yang gaw, dai man magap shaloi jang kun di kau ya na ru ai. 17 Dai Madu chyawm gaw dai Wenyi rai nga ai rai nna, dai Madu a Wenyi nga ai shara hkan e shanglawt mung rai nga ai. 18 Anhte nlang hte chyawm gaw myiman a man magap kun di kau nna, dai Madu a hpung shingkang hpe jamna hta mada yu let, dai Madu ngu ai Wenyi a marang e, hpung shingkang htap mi hte htap mi lu la ai hte, shing re ai hkrang bung sumla hte nan galai mat mat rai nga ga ai.

4

1 Dai rai nna, chyeju lu la sagaw ai hte maren, ndai ahkang aya gunhpai lu ga ai majaw, anhte n hki n sang ga ai: 2 makoi magap re ai kaya kahpa hpe anhte rap di kau sagaw ai hte, hkalem hkalau ai mung n hkan nna, Karai Kasang a mungga hpe gale galau n di ai sha, dai tengman ai lam shapraw shadan let, Karai Kasang a man e, masha yawng mayawng a myit masin kaw, anhte hkum a tsam marai anhte dan nga ga ai. 3 Anhte a kabu gara shiga ndawng n dan nga a yang gaw, sum mat hkrum ai ni hta she ndawng n dan nga malu ai; 4 Karai Kasang a hkrang bung sumla ngu ai, Hkristu a hpung shingkang rawng ai kabu gara shiga a nhtoi gaw, n kam n sham ai ni hta n htoi tu u ga she, ndai mungkan ga na Hpara gaw, shanhte a myit mang ai hku shakyaw shamak kau ya manu ai. 5 Kaning rai nme law, anhte gaw tinang a lam hkaw dan ga ai n re ai sha, Madu Hkristu Yesu a lam hpe mung, anhte nan Yesu a jaw e nanhte a mayam ni rai nga ga ai lam hpe mung, hkaw dan nga ga ai. 6 Nsin hta na nhtoi htoi na ra ai, nga nna tsun ai Karai Kasang gaw, Hkristu a myiman kaw na Karai kasang a hpung shingkang a chye chyang ai nhtoi hpe shapraw ya lu u ga she, anhte a kraw lawang e jahtoi ya ma ni ai. 7 Raitimung, dai chyahtum chyalai re ai n-gun atsam gaw anhte kaw na n re ai sha, Karai Kasang kaw na pru nga u ga she, ndai sutgan gaw, ga di bu hta sha anhte rawng da gaw ai. 8 Anhte lam shagu hta tsin-yam tsindam hkrum ga ai raitimung, ginwan n lu ga ai n rai; myit ru myit tsang hkrum ga ai raitimung, myit htum ga ai n rai; 9 zungri zingrat hkrum ga ai raitimung, dam jahka kau ai hkrum ga ai n rai; ari gumpye kau ai hkrum ga ai raitimung, daw hten ai hkrum ga ai n rai. 10 Yesu a hkrung ai asak gaw anhte a hkum hkrang hta danpru lu u ga, Yesu a si wa ai lam hpe anhte hkum hkrang hta tutnawng e dagraw hkawm nga ga ai. 11 Kaning rai nme law, Yesu a asak hkrung ai gaw anhte a si chye ai hkumshan hta danpru lu n ga, anhte naw hkrung nga ai ni gaw, Yesu a jaw e tut tut si ai de ap kau ai hkrum nga ga ai. 12 Dai rai nna, anhte hta e si hkrung si htan, nanhte hta e chyawm gaw asak hkrung ai gaw, a shachyen nga ai. 13 Kamsham nngai majaw ngai tsun nga nngai, nga nna ka da nga ai hte maren, dai kamsham ai Wenyi nan anhte rawng nga ga ai majaw, anhte mung kamsham nga ga ai rai nna a tsun nga ga ai; 14 dai Madu Yesu hpe sharawt ya ai wa gaw, Yesu hte rau anhte hpe mung sharawt ya na rai nna, nanhte hte rau dingrawng shangun na mi ai hpe, anhte chye nga ga ai. 15 Kaning rai nme law, masha law law ni a gawp e chyeju gaw jat wa ai majaw, shakawn kungdawn ai ga gaw Karai Kasang a hpung shingkang matu mara law htam wa u ga, yawng mayawng gaw nanhte a matu mara rai nga ai. 16 Dai rai nna anhte n hki n sang ga ai sha, anhte a shinggan na wa hten bya hkrum raitimung, anhte a kata de na wa gaw, lani hte lani prat bai pra wa nga ai. 17 Kaning rai nme law, dandawng nga ai arai ni gaw ndai aprat na sha, n dan ndawng nga ai arai ni gaw htani htana na arai rai nga ai majaw, dandawng nga ai arai ni hpe anhte n tau yu ai sha, n dan ndawng ai arai ni hpe tau yu let, 18 ya e sha hkrum ai atsang sha rai nga ai tsin-yam tsindam gaw, nachying kaba li la ai htani htana hpung shingkang hpe anhte a matu mara a shachyen nga ai.

5

1 Dinghta ga na nta ngu ai anhte a sum gaw run mat wa raitimung, lata hte n galaw ai nta, sumsing lamu e htani htana re ai Karai Kasang kaw na wahpang anhte lu nga ga ai gaw, anhte chye nga ga ai. 2 Kaning rai nme law, ndai sum hta anhte madai nga ga ai rai nna, sumsing lamu na anhte a hkum hkrang nta hpe, dagraw lu na ndawt nga ga ai; 3 gaja wa shingrai dagraw ngut jang, anhte hpe singgu krin mu hkrup na mi ai n rai. 4 Ndai sum hta e naw nga nga ai ni anhte gaw, lit hpe gunhpai let a madai nga ga ai rai nna, ndai sum hpe anhte kun di kau mayu ga ai n re ai sha, si mat chye ai gaw asak hkrung ai hta lup mayu kau ai hkrum u ga, hkum hkrang nta hpe dagraw na mahtang ra nga ga ai. 5 Dai chyeju nan lu la na anhte hpe shachyen ai wa gaw, Karai Kasang rai nga ai; shi gaw dai Wenyi a masat ding sat mung, anhte hpe jaw da ma ni ai. 6 Dai re ai majaw anhte galoi mung myit kaba nga ai hte ndai hkum hkrang hta naw shanu nga yang, dai Madu hte anhte tsan gang nga ga ai hpe, chye nga ga ai; 7 myi hte mu lu ai n re ai sha, makam masham a marang e anhte hkawm nga ga ai; 8 gaja wa anhte myit kaba nga ga ai rai nna, dai hkum hkrang hta n shanu ai sha, dai Madu kaw shanu lu u ga anhte grau nna ra nga ga ai. 9 Dai rai nna, shanu nga yang raitimung, garai n shanu nga yang raitimung, shi a man e sharawng awng ai ni tai u ga, anhte myit makun nga ga ai. 10 Kaning rai nme law, dai hkum hkrang hte kaja ai raitimung, n kaja ai raitimung, galaw saga ai hte maren, langai hte langai hkam la shajang mu ga, anhte nga manga Hkristu a tingnyang man e dawng pru na ra ga ai. 11 Dai rai nna, dai Madu a hkrit kang hpa hpe chye ga ai majaw, anhte masha ni hpe madun shadik nga ga ai; Karai Kasang a man e chyawm gaw, anhte dan dan leng leng rai nga ga ai; nanhte a myit masin a man e mung, anhte dan leng nga ga ai, ngai nawn nga nngai. 12 Anhte gaw nanhte a man e anhte hkum marai bai dan ga ai n re ai sha, myit masin hta n rai, myiman hta sha gumrawng ai ni hpe htan lu myit ga she, anhte a lam gumrawng na shara, nanhte hpe jaw nga ga ai. 13 Kaning rai nme law, anhte myit n gring nga ga ai rai yang gaw, Karai Kasang a matu mara n gring nga ga ai; gring nga ga ai rai yang gaw, nanhte a matu mara gring nga ga ai. 14 Dai hta n-ga, marai langai wa yawng mayawng a matu mara si hkam yang, yawng mayawng si hkam sai, nga nna myit da nga ga ai majaw, Hkristu a tsawra ai lam gaw anhte hpe woi awn nga mi ai: 15 asak hkrung ai ni mung, tinang myit hte n re ai sha, shanhte a matu mara si hkam nna, bai rawt wa ai wa a jaw e hkrung nga mu ga, yawng mayawng a matu mara shi si hkam sai. 16 Dai re ai majaw, ya kaw nna anhte kadai hpe mung hkumshan ahpraw hpe tau yu yang, n chye nga ga ai; Hkristu a hkumshan ahpraw hpe pyi anhte chye lu saga ai raitimung, ya kaw nna dai zawn hpa n chye ga ai. 17 Hkristu hta e marai langai ngai rai nga ai teng yang gaw, shi gaw ningnan hpan da ai wa rai nga ai; dingsa hte gaw lai mat wa sai, yu mu, dai hte gaw ningnan tai wa sai. 18 Dai lam yawng mayawng chyawm gaw Karai Kasang kaw nna rai nga ai; shi gaw anhte hpe Hkristu hta e shi hkum lala hte htinglu htinglai ya mi ai rai nna, dai htinglu htinglai ya ai ahkang aya gaw anhte hpe jaw da ma ni ai; 19 Karai Kasang gaw Hkristu hta nga let, mungkan ga hpe shi hkum lala hte htinglu htinglai ya nga ai; shanhte a mara gaw shi shanhte hpe n shagun ya mu ai rai nna, dai htinglu htinglai ya ai mungga gaw anhte hta e tawn da ya ma ni ai. 20 Dai re ai majaw Karai Kasang gaw anhte a lata e shadum shahprang nga ai zawn, Hkristu a lam htinglet ya ai kasa ni anhte rai nga ga ai; Karai Kasang hte htinglu htinglai mu, ngu nna Hkristu a jaw e anhte hpyi nem ga ai. 21 Shi hta e Karai Kasang a dinghpring ai ni anhte tai wa u ga, shi yubak n chye ai wa hpe, anhte a matu mara yubak shatai wu ai.

6

1 Karai Kasang a chyeju hpe n gawn n sawn nanhte n hkam la myit ga, shingdep shingtau ai ni anhte mung, shadum shahprang dat ga ai. 2 Kaning rai nme law, Ang wa ai aten e ngai na a ga madat ya de ai, Hkyehkrang la ai nhtoi e ngai nang hpe karum de ai, nga nna shi tsun nga ai; yu mu, ya e pyi mai ang ai aten rai nga ai; yu mu, ya e pyi hkyehkrang la ai nhtoi rai nga ai. 3 Ndai daw ai aya gaw shatan nhkan n hkrum u ga, hpa lam hta mung ahtu kataw shara loi mi muk anhte n shatai ai sha, 4 shakut sharang ai law law hta, tsin-yam tsindam hta, kyindut ai hta, shagyeng ai hta, 5 anu kayat hkrum ai hta, htawng bang ai hta, kabrawng kabrang hkrum ai hta, bungli gunhpai ai hta, a maja nga ai hta, kawsi hpang gara ai hta, 6 san pra ai hta, chye chyang ai hta, myit galu kaba ai hta, mai kaja ai hta, Chyoi pra ai Wenyi hta, n sawt ai tsawra ai myit hta, 7 tengman ai mungga hta, Karai Kasang a n-gun atsam hta mung; dinghpring ngu ai hpyen hking gaw hkra maga pai maga e sumraw ai hte, 8 hpung shingkang hkrum ai raitimung, n kaw n law hkrum ai raitimung, shatan nhkan hkrum ai raitimung, shagrau ai hkrum ai raitimung: 9 hkalem sha ai ni zawn raitimung, tengman nga ga ai ni; gade ai n dum n chye ai ni zawn raitimung, kajai gumhkawng hkrum ai ni; si hkrung si htan hkrum ai ni raitimung, yu mu, anhte ahkrung nga ga ai; 10 adup achyin hkrum ai ni zawn raitimung, n si n mat ai ni; yawnhkyen hkrum ai ni zawn raitimung, tutnawng e a kabu nga ai ni; matsan mayan re ai ni zawn raitimung, masha law law hpe shalu jasu chye ai ni; hpa n lu ai ni zawn raitimung, yawng mayawng hpe madu nga ai ni rai nga ga ai rai nna, Karai Kasang a bungli daw ai sara ni rai nga ga ai gaw, lam shagu hta anhte hkum marai dan nga ga ai. 11 Korinhtu ni e, anhte a n-gup gaw nanhte a jaw e hpaw nga mali ai, anhte a myit gaw dam lada maden wa sai. 12 Anhte hta e nanhte chyat nga myit dai n rai; nanhte a kraw lawang gyip nga malit dai. 13 Dai zawn chyeju htang lu myit ga, nanhte a kraw lawang mung maden dat mu: tinang kasha ni hpe zawn ngai ning nga tsun nngai. 14 N kam n sham ai ni hte rau nhtan shai ai kandang hpe hkum jawm hpai mu: kaning rai nme law, dingman ai lam gaw, tara n hkungga ai lam hte hpa seng a ta? Nhtoi gaw nsin hte kaning rai kanawn lu a ta? 15 Hkristu gaw Beliala hte kaning rai hkau chyap lu ma ta? Kamsham ai wa gaw, n kam n sham ai wa hte hpa gumhtaw mi lu la na a ta? 16 Karai Kasang a nawku ai htingnu gaw, gawngngu sumla ni hte rau kaning rai kahtep lu na a ta? Kaning rai nme law, Ngai shanhte a kata de shanu nga nna ginrun nga na hte, Shanhte a Karai Kasang ngai tai na nngai rai nna, Shanhte gaw nye a amyu tai na mara ai, nga nna Karai Kasang tsun dan nga ai hte maren, ahkrung nga ai Karai Kasang a nawku ai htingnu gaw, anhte rai nga ga ai. 17 Dai rai nna, Shanhte a ka-ang na pru nhtawm, Kaga lak lak rai wa mu, nga nna dai Madu tsun nga ai. Awu asin re ai hpe hkum hkra mu, Shaloi ngai nanhte hpe hkap la na made ai. 18 Nanhte a Kawa ngai tai na nngai rai nna, Nanhte gaw nye a shadang sha ni hte shayi sha ni tai na marin dai, nga nna chyahtum chyalai n-gun rawng ai Madu gaw a tsun nga ai.

7

1 Tsawra ai ni e, ndai ga sadi yawng hte gaw lu la gaw ai majaw, hkum hkrang hte wenyi hpe awu asin di kau ai matsat shabat hta na tinang hkum hpe jasan jaseng kau nhtawm, Karai Kasang hpe hkrit hkungga let shachyoi shapra ai lam shatup nga ga. 2 Anhte hpe hkap hkalum la mi: anhte kadai hpe mung n shut n hpyit yu ga ai; kadai hpe mung n shabyak ga ai; kadai hpe mung hkalem hkalau sha ga ai n rai. 3 Nanhte hpe jeyang na ngai ning nga tsun nngai n rai; kaning rai nme law, rau si rau prawn lu hkra, nanhte nan anhte a kraw lawang e anga nga myit dai gaw, ngai shawng e tsun yu ni ai. 4 Nanhte a man e nachying nden ja ai myit ngai rawng nga nngai; nanhte a matu mara ngai grai gumrawng nga nngai; ngwi pyaw ai hte ngai hpring chyat nga nngai; anhte a tsin-yam tsindam shagu hta ladu lai hkra kabu gara nga nga nngai. 5 Kaning rai nme law, Makedoni mung de du yang pyi anhte a hkumshan hta n ngwi n pyaw rai nga ai hte, lam shagu hta tsin-yam tsindam hkrum nga ga ai; shinggan maga de gasat gala, kata maga de hkrit kang ai pra nga ga ai. 6 Raitimung, myit gyip ai ni hpe shangwi shapyaw ai Karai Kasang gaw, Titu du sa ai hte e anhte hpe shangwi shapyaw mi ai. 7 Shi a du sa ai hte sha n rai, nanhte a marit ai myit, nanhte a madai sharung ai hte, nye a matu nanhte nja nhpra rai nga ai gaw, anhte hpe shana ya mi yang, nanhte kaw na shi lu la ai ngwi pyaw ai hte mung, anhte ngwi pyaw nga ga ai; shingrai ngai grau nna kabu nga nngai. 8 Dai rai nna, nye a shagun dat ai laika hte nanhte hpe myit shayawn yang, myit tsang shara n nga nngai: raitimung, dai laika gaw tawng marang mi nanhte hpe shayawn nga ai, ngai dum nna myit tsang nngai; 9 ya chyawm gaw ngai kabu nga nngai. Nanhte hpe myit shayawn ai majaw n rai, myit malai hkra shayawn made ai majaw, ngai kabu nga nngai; anhte a lata hte nanhte hpa sum mat ai mung n hkrum myit ga, Karai Kasang ra ai hte maren shayawn ai hkrum myit dai. 10 Kaning rai nme law, Karai Kasang ra ai yawnhkyen ai gaw, hkyehkrang la ai hkrum hkra, n tsang ra ai myit malai ai hpe shachyen nga ai; mungkan ga a yawnhkyen ai chyawm gaw, si mat ai hpe shachyen nga ai. 11 Bai, Karai Kasang ra ai hte shayawn hkrum ai lam hta nan, da hpran shakang na lam mung, mara nem na lam mung, masin rawt na lam mung, hkrit kang na lam mung, myit marit ai lam mung, nja nhpra ai lam hte mara htang na lam, gade wa shachyen jat wa ai gaw, yu yu mu: nanhte ndai amu hta mara n rawng nga myit dai gaw, lam shagu hta dan nga myit dai. 12 Dai rai nna, nanhte hpe ka dat made ai gaw, shut hpyit ai wa a nhkan e n rai, shut hpyit hkam ai wa a nhkan e mung n re ai sha, anhte a matu mara nanhte a da hpran ai myit Karai Kasang a man e nanhte hpe shadan dan myit ga, ngai ka dat nngai. 13 Dai lam hta e anhte shangwi shapyaw ai hkam ga ai. Anhte a shangwi shapyaw ai hkam lu ga ai hta n-ga, Titu a kabu gara ai lam majaw grau nna kabu gara nga ga ai; kaning rai nme law, nanhte nlang a majaw shi a wenyi kabu awng nga ai. 14 Nanhte a lam lama ma hta ngai shi hpe gumrawng nga nngai rai yang gaw, kaya kahpa ngai n hkrum nga nngai: anhte gaw lam shagu hta nanhte kaw tengman ai ga tsun saga ai hte maren, Titu a man e anhte a gumrawng ai mung tengman wa sai. 15 Nanhte nlang a madat mara ai myit hte, hkrit nna gari let shi hpe hkap hkalum la myit dai hpe adum nga ai majaw, shi nanhte hpe tsawra ai shawang amyit gaw, nachying galu kaba nga lu ai. 16 Nanhte hta ngai lam shagu hta myit kaba nga nngai majaw, kabu gara nga nngai law.

8

1 Dai hta kaga, hpunau ni e, Makedoni mung na hpung ni hpe Karai Kasang jaw dat ai chyeju a lam, anhte nanhte hpe shana dat ga ai: 2 tsin-yam tsindam law law hta dinglik hkrum raitimung, shanhte a ladu lai ai kabu gara ai myit hte, shanhte a sung la ai matsan mayan ai hta, sutgan n daw n hta shapraw hkra law htam wa ma sa lu ai. 3 Kaning rai nme law, rai lu ai hte maren, rai sa, rai lu malu hta n-ga, shanhte hkrat nga ma ai hpe, ngai sakse hkam nngai; 4 chyoi pra ai ni hpe galaw daw na ngu ai chyeju hte lawm lu na ahkang shanhte gaw tinang myit lu ai hte anhte hpe akroi anoi hpyi nem mi ai: 5 anhte myit nawn ai hku n re ai sha, Karai Kasang a myit hkan yang, tinang hkum nan dai Madu hpe shawng jaw kau nna, anhte hpe mung jaw kau mi ai. 6 Dai rai nna, Titu gaw shawng galaw hpang ai hte maren, dai chyeju mung nanhte hta shatup u ga, anhte shi hpe shadut jahkat gaw ai. 7 Nanhte gaw kamsham ai hta, ga jahta ai hta, chye chyang ai hta, shakut sharang ai amyu myu hte, anhte a matu tsawra ai myit lam shagu hta law htam wa ai hte maren, ndai chyeju hta mung nanhte law htam wa myit ga, adum nga mu. 8 Ning nga tsun ai gaw htet da ai ga tsun nngai n re ai sha, kaga ni a shakut sharang ai hpe tau yu nna nanhte a tsawra ai myit majing hpe chyam yu na she, tsun nga nngai. 9 kaning rai nme law, anhte a Madu Yesu Hkristu gaw sut su nga ai raitimung, nanhte a matu mara matsan mayan hkrum nna, shi a matsan mayan ai hta nanhte sut su lu na rai nga ai chyeju hpe, nanhte chye nga myit dai. 10 Ndai lam hta nye a mung sumtu ngai madun nga nngai: kaning rai nme law, maning nna pyi galaw hpang ai hta n-ga, galaw mayu ai myit shawng madun ai ni, nanhte rai nga myit dai majaw, dai gaw nanhte a matu sut nga malit dai. 11 Dai rai nna dai bungli hpe ya shatup nga mu: galaw mayu ai myit rawng nga sai hte maren, nanhte rai lu ai daram, shangut na lam mung, dai zawn rai nga u ga. 12 Kaning rai nme law, galaw mayu ai myit rawng nga a yang gaw, n sharai lu ai hte n re ai sha, sharai lu ai hku sha sharawng awng nga ai. 13 Ndai amu hta e kaga ni hpe ngamu ngamai shangun nna, nanhte hpe sharu shayak na maw nga nngai n re ai sha, amu shabung shapre na she myit nga nngai: 14 nanhte a paw ai gaw shanhte a taw ai hta ya e shang lu nna, shanhte a paw ai gaw nanhte a taw ai hta bai shang lu na rai nna, shabung shapre ai hku rai wa u ga, ngai myit nga nngai. 15 Shingrai, Law wa hta la ai wa jan ai n rai, loi mi hta la ai wa mung naw ra nga ai n rai, nga nna ka da nga ai hte maren dik wa na ra ai. 16 Dai hta kaga, Titu a kraw lawang e, nanhte a matu mara dai zawn tsang ai myit nan jaw da ai Karai Kasang gaw, a nga u ga. 17 Ngai shadut jahkat ai ga shi hkam la ai hta n-ga, shi hkum nachying katu nga let, tinang myit tsu rai nna nanhte hpang de pru sa wa ai. 18 Dai kabu gara shiga nhkan e Hpung ni yawng hta shakawn hkrum ai hpunau wa hpe mung, anhte shi hte rau shangun dat ga ai; 19 dai hta n-ga, dai Madu a arawng sadang hte anhte a galaw mayu ai myit madun na matu, anhte a lata hte galaw daw ai, ndai chyeju hta anhte a kanawn manang tai wa u ga she, Hpung ni a lata la ai wa mung, shi rai nga ai: 20 anhte a lata hte galaw daw ai, ndai alu kaba lahkawn ai hta, kadai mung anhte hpe mara shagun shara n nga u ga, sadi nga ga ai; 21 kaning rai nme law, dai Madu a man e sha n rai, masha a man e mung htaphtuk ai ningli madun na, anhte myit yu nga ga ai. 22 Dai hta kaga, lam shagu hta law law lang chyam yu yang, shakut sharang chye nna nanhte hpe grai wa kamsham nga ai majaw, ya e grau nna shakut sharang nga ai hpunau wa hpe mung, dai yan hte rau anhte naw shangun dat ga ai. 23 Titu a lam chye mayu yang, shi gaw, nye a kanawn manang hte nanhte a matu shingdep shingtau ai wa rai nga ai; anhte a hpunau yan a lam chye mayu yang, shan gaw, Hpung ni a kasa yan hte Hkristu a arawng sadang mung rai nga ma ai. 24 Dai re ai majaw, nanhte a tsawra ai myit hte, nanhte a jaw e anhte a gumrawng nga ai sakse, Hpung ni a man e shanhte hpe shadan dan nga mu.

9

1 Ya, chyoi pra ai ni a matu mara galaw daw ai amu a lam, ngai nanhte hpang de ka dat shara n nga nngai. 2 Kaning rai nme law nanhte a galaw mayu ai myit ngai chye nna, de a lam nanhte a jaw e gumrawng let, Ahkaia mung na ni maning kaw nna lajang jin nga masai, ngu nna Makedoni masha ni hpe tsun nngai: nanhte a sharawng ai myit mung, dai malaw maga hpe shadum sha-awn nga ai. 3 Raitimung, ndai lam hta nanhte a jaw e anhte gumrawng ai ga gaw kaman lila n tai u ga hte, ngai tsun nga sai hte maren nanhte a jin nga myit ga she, hpunau ni hpe ngai shangun dat nngai: 4 shing n rai, Makedoni masha nkau mi ngai hte rau sa nna nanhte n jin nga ma la ai hpe mu hkrup yang, nanhte kaya kahpa hkrum na ngai n tsun ai sha, anhte mung dai kamsham shara hta kaya kahpa hkrum na ra ga ai. 5 Dai re ai majaw, dai alu gaw kashun kashe la ai zawn n re ai sha, chyeju alu zawn jin magang nga u ga she, hpunau ni gaw nanhte hpang de sa magang nna, shawng na ndat da ai, nanhte a chyeju alu hpe shagum tawn myit ga, ngu nna shanhte hpe shadut jahkat na lam ngai dum nngai. 6 Raitimung, ngai tsun nngai gaw, loi sha mi gat ai wa gaw loi sha mi dan la na ra ai; myit sharawng awng let gat ai wa gaw, myit sharawng awng let dan la na ra ai. 7 Langai hte langai tinang a kraw lawang e myit da ai hte maren jaw u ga: lahpawt ai myit hte n rai, jaw shangun ai majaw sha mung n re ai sha, Karai Kasang gaw kabu gara ai myit hte jaw ya ai wa hpe tsawra nga ai. 8 Dai hta kaga, Shi gat nu ai, matsan mayan ni hpe gam jaw nu ai: Shi a dinghpring ai gaw htani htana anga nga ai, nga nna ka da nga ai hte maren, 9 lam shagu hta e nanhte tut tut marai hkum sumhpa rawng let, mai kaja ai magam bungli amyu myu hta law htam wa myit ga, Karai Kasang gaw nanhte hta e chyeju hkum sumhpa law htam shangun lu ai. 10 Nli gat ai wa hpe nli mung, sha na matu shahpa mung shapraw ya ai wa gaw, nanhte a gat na nli hpe shapraw nna shalaw jahtam na hte, nanhte a dinghpring ai a asi hpe law wa shangun na ru ai. 11 N daw n hta jaw lu hkra, lam shagu hta e nanhte sut su ai hkrum manit dai rai nna, dai gaw anhte a lata e, Karai Kasang hpe shakawn kungdawn na lam tai wa na ra ai. 12 Kaning rai nme law, ndai galaw daw ai bungli gaw, chyoi pra ai ni a ra nga ai hpe shatup nga ai hta n-ga, Karai Kasang a chyeju hpe mahkawn mangoi na lam mung law htam wa nga ai: 13 ndai galaw daw ai lam hte nanhte hpe chyam yu ngut jang, Hkristu a kabu gara shiga a lam hkan nang nna madat mara nga myit dai hte, n daw n hta re ai alu kumhpa, shanhte hpe mung, mahkra hpe mung, a jaw nga ai majaw, shanhte gaw Karai Kasang hpe shagrau sha-a nga ma ai: 14 shanhte mung nanhte hta nachying grau ai Karai Kasang a chyeju hpe tau yu ai majaw, nanhte a matu mara akyu hpyi nga yang, nanhte hte hkrum na hpe grai marit nga ma ai. 15 Tsun n dang lu ai Karai Kasang a kumhpaw kumhpa majaw, shi hta a nga u ga law.

10

1 Nanhte a man e myit grit ai hte, tsan gang nga yang nanhte a lam nden ja ai myit madun ai, ngai Pawlu nan, Hkristu a sumnung ai hte myit gyip ai hpe tau yu nna, nanhte hpe shadut jahkat dat made ai: 2 anhte gaw hkumshan hking hte hkawm nga ga ai myit nna, anhte a lam nawn ya ai ni nkau mi hpe nachying nden ja ai myit madun na ngai maw nga nngai hte maren, nanhte hte rau nga yang, dai hte wa nden ja ai myit madun shara n nga u ga, ngai hpyi nem nngai. 3 Kaning rai nme law, hkumshan hta anhte hkawm nga ga ai raitimung, hkumshan hking hku hkan nna majan gasat nga ga ai n rai; 4 anhte a majan gasat na ri nhtu ni gaw hkumshan hte n seng ai sha, hpyendap ni hpe sharun shabya na matu, Karai Kasang a man e atsam n-gun rawng nga ai; 5 masha a myit mang ai hku hte, Karai Kasang a chye chyang ai lam hpe hkum da mayu ai tsaw matsaw hte hpe, anhte sharun shabya lu ai hte, Hkristu a ga madat mara na lam a npu e myit mang shagu hpe sharen da mu ai; 6 nanhte a madat mara ai lam gaw hkum tsup ngut jang, n madat n mara ai yawng hte hpe ari jaw na, anhte jin jin rai nga saga ai. 7 Nanhte gaw myiman sha yu matsing myit dai. Ngai gaw Hkristu hta e rai nga nngai, nga nna langai ngai myit da a yang gaw, shi nan Hkristu hta e rai nga ai hte maren, anhte mung rai nga ga ai, tinang hkum dai myit dum nga u ga. 8 Nanhte hpe sharun shabya na majaw n rai, nanhte hpe shadaw shalan na matu, dai Madu anhte hpe jaw da sai ahkang aya a lam ngai grai wa naw gumrawng nga timung, ngai hkrit kaya hkrum na nngai n rai; 9 dai hta kaga, nye a shagun dat ai laika ni hte nanhte hpe jahkrit na zawn, nawn shara n tai u ga. 10 Kaning rai nme law, shi a laika ni gaw li la ai hte atsam rawng ai laika rai lu ai raitimung, shi hkum nan rau nga nga yang, shi a hkum hpung n rawng nna, shi a tsun ai ga akyu n rawng lu ai, nga nna tsun ai ni nga ma ai. 11 Shing nga ai wa chyawm gaw, anhte tsan gang nga ga yang, laika ni hta rawng ai ga rai nga ai hte maren, rau nga yang mung anhte dai zawn bungli hta e rai na ga ai, adum nga u ga. 12 Kaning rai nme law, tinang a hkum hpe shagrau ai ni nkau mi hte hti lawm nna, anhte a hkum hpe shanhte hte shadawn yu na, anhte n gwi ga ai: shanhte gaw tinang a hkum hpe tinang dai shadawn nna, tinang a hkum hte tinang dai shabung nga ma ai majaw, myit n rawng nga ma ai. 13 Anhte chyawm gaw shalai nna gumrawng ga ai n re ai sha, nanhte kaw pyi du dep lu hkra rai u ga she, Karai Kasang gaw anhte hpe shadawn sharam da ai jarit hpe tau yu nna sha, gumrawng lu ga ai. 14 Nanhte kaw du dep na matu ntsa hku chyan ga ai n re ai sha, anhte Hkristu a kabu gara ai shiga hte nanhte kaw mung du dep saga ai. 15 Bai anhte gaw masha kaga wa a bungli hta shang nna, shalai gumrawng ga ai n re ai sha, nanhte a kamsham ai myit kaba wa yang she, anhte a shadawn sharam da ai jarit tau yu let, nanhte a jaw e anhte grau nna kaba wa na ga ai rai nna, 16 nanhte a ginwang shinggan e dai kabu gara ai shiga sa hkaw tsun lu nna, masha kaga wa shajin da ai yi ngam hta shang gumrawng ai hku n re ai sha, anhte myit mada nga ga ai. 17 Dai gumrawng ai wa chyawm gaw dai Madu hta gumrawng nga u ga. 18 Kaning rai nme law, tinang hkum hpe shagrau ai wa n rai, dai Madu shagrau ai wa chyu sha, ging dan ngu ai hkam la nga ai.

11

1 Ngai angawk ai mara loi mi nanhte naw sharang ya mi ga, ngai ra nga nngai: gaja wa nanhte nye a lam sharang ya nga myit dai. 2 Kaning rai nme law, Karai Kasang a nja nhpra ai hte maren, ngai nanhte a lam nja nhpra rai nga nngai; nanhte hpe hkawnsek hpe zawn Hkristu kaw jaw ya nna, madu langai sha hte ngai nanhte hpe hkungran ya made ai. 3 Raitimung, lapu gaw shi a hkalem ai hte Ewa hpe lau kau wu ai zawn, Hkristu a sanseng ai hte chyoi pra ai lam hpe kau da hkra, nanhte a myit mang hten na hpe, ngai tsang nga nngai. 4 Kaning rai nme law, nanhte kaw sa du ai wa gaw, anhte n hkaw dan ai Yesu kaga a lam shi hkaw dan nna, nanhte n hkam la ai Wenyi kaga hpe nanhte hkam la myit dai hte, nanhte n hta la ai kabu gara shiga kaga hpe hta la myit yang gaw, shi a lam nanhte gaja wa sharang nga myit dai. 5 Ngai chyawm gaw kaba htum ai kasa ni a lawu e loi mi sha pyi n grit nga nngai, ngai nawn nga nngai. 6 Tsun ai ga hta zai ai zawn raitimung, chye chyang ai lam hta gaw dai zawn n re ai sha, nanhte a man e lam shagu hta, dai gaw yawng mayawng hta, dan dan leng leng pru wa sai. 7 Nanhte grau wa myit ga, ngai hkum hpe ngai shagrit nna, jahpu n hpyi ai sha Karai Kasang a kabu gara shiga nanhte hpe hkaw dan ai gaw, ngai hta mara kap nga ai kun? 8 Nanhte hpe galaw daw na, Hpung kaga ni kaw na ngai jarit hkam la ai gaw, shanhte hpe dip kashun sha nngai; nanhte hte rau nga nna lama ma ra ai shaloi, ngai kadai hpe mung n shatsang nngai: 9 Makedoni mung na du sa ai hpunau ni chyawm gaw ngai ra mara shapraw jaw ma ai rai nna, nanhte hpe hpa mung n shatsang ai sha ngai sadi nga ai hte naw a sadi nga na nngai. 10 Hkristu a tengman ai ga ngai hta rawng nga ai hte maren, ngai ning rai gumrawng shara nga ai hpe Ahkaia mung ginwang hkan e kadai mung hkum da lu na n rai. 11 Dai gaw hpa majaw rai kun? Nanhte hpe n tsaw n ra ai majaw rai kun? Karai Kasang gaw chye nga ai. 12 Mara tam mayu ai ni mara n mu u ga hte, shanhte a gumrawng ai hta anhte hte maren sha shanhte tai u ga she, ngai galaw yu ai lam hpe naw a galaw nga na nngai. 13 Kaning rai nme law, ning re ai ni gaw masu ai kasa ni hte, Hkristu a kasa ni a hpyi hpun nna hkalem ai bungli galaw ai ni rai nga ma ai. 14 Dai gaw mau na shara n nga ai; kaning rai nme law, Satan pyi nhtoi hta na lamu kasa a hpyi hpun chye nga ai; 15 dai rai nna shi a salung sala ni mung, dinghpring ai a ali ama ni a hpyi hpun nga ma ai hpe, amu kaba shadu na n rai: shanhte a jahtum na gaw, shanhte a bungli hte maren rai na ra ai. 16 Bai ngai tsun nngai gaw, kadai mung ngai hpe angawk angak hkum aleng nga u ga: aleng nga myit yang gaw, ngai loi mi naw gumrawng nga lu n ga, angawk angak re ai wa hpe zawn ngai hpe naw hkap hkalum la mi. 17 Ning nga nna gumrawng ai lam hta ngai sharawng nngai gaw, dai Madu ra ai hte maren ngai tsun nngai n re ai sha, angawk angak re ai ga zawn tsun nga nngai. 18 Masha law law wa hkumshan lam hta gumrawng nga ma ai majaw, ngai mung gumrawng na nngai. 19 Nanhte myitsu nga myit dai rai nna, angawk angak re ai ni hpe kabu gara ai hte sharang nga myit dai. 20 Kaning rai nme law, marai langai ngai nanhte hpe rim yam ai, kashun sha ai, rim la ai, tinang a hkum hpe shagrau ai hte nanhte hpe shabyi kahpret ya myit yang gaw, dai wa hpe nanhte sharang ya nga myit dai. 21 Anhte gaw n-gun kya ai ni zawn rai nga ga ai, ngu nna anhte a lam shatan let ngai tsun nngai; raitimung lam gale hta masha wa manoi nna nden ja nga a yang gaw, ngai mung dai lam hta nden ja lu nngai, ngu nna angawk angak re ai ga ngai tsun nngai. 22 Shanhte Hebre masha rai ma yang gaw, ngai mung rai nga nngai; shanhte Israela amyu rai ma yang gaw, ngai mung rai nga nngai; shanhte Abraham a aru arat rai ma yang gaw, ngai mung rai nga nngai. 23 Shanhte Hkristu a bungli gunhpai ai ni rai ma yang gaw, ngai mahtang grau nna rai nga nngai, ngu nna mana bu ai wa zawn ngai tsun nngai. Amu bungli grau nna ngai galaw nngai; htawng hkrat ai grau nna ngai hkrum nngai; ladu lai ai shingna ngai hkam ni ai; si hkrung si htan law law lang ngai hkrum nngai. 24 Yuda ni ngai hpe mali shi du na langai yawm yawm di nna, manga lang ndaw kayat ai shingna hkrum ni ai. 25 Masum lang hkawn hte adup ai mung ngai hkrum nngai; lang mi nlung hte kabai ai mung ngai hkrum nngai: masum lang li hten ai hta ngai lawm ni ai; lana mi hte lani mi tup nammukdara hta rawng nga nngai. 26 Law law lang ningwan hkawm nga nngai; hka e rap ai tsin-yam, damya hkrum ai tsin-yam, nye a amyu masha ni e di ai tsin-yam, maigan amyu ni e di ai tsin-yam, kahtawng mare hkan e hkrum ai tsin-yam, nam mali hkan e hkrum ai tsin-yam, nammukdara e hkrum ai tsin-yam, masu ai hpunau ni e di ai tsin-yam ngai a hkrum nga nngai; 27 amu bungli hte kyindut ai hta, law law lang yup n lusha ai hta, kawsi ai hte hpang gara ai hta, law law lang lusha gam ai hta, kashung ai hte shinggu krin re ai. tsin-yam, a hkrum nga nngai. 28 Dai shinggan de na kyindut ai hta kaga, Hpung ni yawng hte a lam myit ru myit tsang ai gaw, shani shagu ngai hpe a shadut shatsang nga ni ai. 29 Ngai gawng n kya yang, kadai gawngkya nga a ta? kadai kataw ai hkrum yang gaw, ngai myit n kahtet ai nga na kun? 30 Ngai gumrawng nga n yang gaw, nye a gawngkya ai lam ngai gumrawng nga nngai. 31 Ngai masu magaw ga n tsun nngai gaw, htani htana e a nga ai Madu Yesu a Kawa Karai Kasang gaw chye nga ai. 32 Damasku hta e ngai hpe rim la na hkawhkam Areta a munggyi gaw Damasku masha ni a mare hpe a sin da nga wu ai. 33 ngai chyawm gaw, mare bunghku na hkuwawt hku e, ka hta shayawn jahkrat dat mi ai rai nna, shi a lata na lawt lu nngai.

12

1 N gumrawng nga ai gaw n nga lu nngai; raitimung dai gaw htaphtuk nga ai n rai: ya chyawm gaw, dai Madu kaw na myi le le ai hte shingran mu ai lam, ngai gaw tsun hpang na nngai. 2 Ya shi mali ning na wa sai, Hkristu hte seng ai wa langai mi hpe ngai chye nngai; dai wa gaw masum na sumsing lamu du hkra woi lung wa ai hkrum wu ai: shi gaw hkum hkrang lawm ai kun, ngai n chye nngai, n lawm ai kun, ngai n chye nngai, Karai Kasang sha chye nga ai. 3 Shing re ai wa hpe ngai chye nngai; shi gaw Paradisu de woi lung wa ai hkrum nna masha kadai mung tsun n ging ai kaba htum ai ga na wu ai: 4 shi gaw hkum hkrang lawm ai kun, n lawm ai kun, ngai n chye nngai, Karai Kasang sha chye nga ai. 5 Dai wa a lam ngai gumrawng na nngai: nye a gawngkya ai lam n rai yang gaw, nye hkum a lam ngai gumrawng na nngai n rai. 6 Ngai gumrawng mayu timung, angawk angak ngai tai na nngai n rai; kaning rai nme law, tengman ai ga ngai tsun na nngai: raitimung, ngai hkum hpe mu ai hte nye a n-gup ga na lu ai hta n-ga, nye a lam kadai mung hpa n nawn mu ga, gumrawng na lam da kau na nngai. 7 Ya dai chyahtum chyalai re ai shingran a majaw, ngai myit nau wa n kaba u ga, ngai hpe abyen na Satan a salung sala ngu ai, nye hkumshan hta ju ai aju ngai hkrum nga nngai; shingrai ngai nau wa myit n kaba nngai. 8 Ngai gaw dai hta na lawt lu u ga, dai Madu hpe masum lang akyu hpyi nga nngai. 9 Dai rai nna shi gaw, Nye a chyeju gaw na a matu ram nga ai; masha a gawngkya ai hta nye a n-gun atsam hkum tsup nga ai, nga nna ngai hpe tsun ni ai. Dai re ai majaw, Hkristu a n-gun atsam gaw nye a ntsa e a up nga u ga, nye a gawngkya ai hta grau nna ngai gumrawng na ra nga nngai. 10 Dai rai nna Hkristu a jaw e hkam ai gawngkya ai, hkala nba ai, kyindut ai, zingri zingrat ai hte nni nkri re ai hta ngai kabu nga nngai: kaning rai nme law, ngai gawngkya nga yang, n-gun atsam rawng nga nngai. 11 Ngai gaw angawk angak tai wa nngai; nanhte mahtang ngai hpe tai shangun ma ni ai: kaning rai nme nga yang, nanhte a shakawn kungdawn na hpe ngai hkam ang nga nngai. Ngai gaw hpa n re ai wa rai nga nngai raitimung, kaba htum ai kasa ni lawu e loi mi sha pyi n grit nga nngai. 12 Gaja wa, shakut sharang ai amyu myu hte, lamik kumla mauhpa amu hte hpung dagu ngu ai kasa kumla hte gaw, nanhte a ka-ang e dan wa sai. 13 Kaning rai nme law, ngai nanhte hpe n sharu shatsang ai lam n lawm yang me, nanhte Hpung kaga ni hte kaning rai lawu grit nga myit ta? shingrai ngai shut ai mara hpe dat kau ya mi. 14 Yu mu, ya masum lang ngu na hta nanhte kaw du na ngai jin jin rai ni ai rai nna, ngai nanhte hpe n sharu shatsang na nngai. Kaning rai nme law, nanhte a arung arai hpe ngai tam nngai n rai, nanhte hpe sha ngai tam nga nngai: kashu kasha ni gaw kanu kawa ni a matu sutgan mahkawng da na n ang ai sha, kanu kawa ni mahtang kashu kasha ni a matu mahkawng da na ang nga ai. 15 Ngai chyawm gaw nanhte a myit masin a matu sutgan jahkrat mayu ai hta n-ga, nye a hkum hpe pyi jahkrat na grau nna ra nga nngai. Nanhte hpe ning rai ladu lai hkra tsawra nga nngai majaw, ngai hpe ndawng n yawt na mai nga a ni? 16 Nanhte hpe ngai n sharu shatsang nga ai teng u ga; raitimung, ngai zai rawng nna hkalem ai hte nanhte hpe rim la nga ai, tsun nga myit yang gaw, 17 nanhte hpang de shangun ai masha langai ngai hte ngai nanhte a arung arai hpe sen di sha nga nngai kun? 18 Titu hpe ngai shadut jahkat nna, dai hpunau wa hpe shi hte rau shangun dat nngai. Titu gaw nanhte hpe sen di sha nga ai kun? Anhte gaw Wenyi langai sha hta hkawm nga ga ai, n rai kun? Lagaw hkang langai sha hta anhte hkawm nga ga ai, n rai ni? 19 Bai, anhte gaw nanhte a man e mara raw ai ga tsun nga ga ai, nanhte a nawn nga myit ni? Hkristu hta Karai Kasang a man e nan, anhte tsun nga ga ai. Raitimung, tsawra ai ni e, nanhte hpe shadaw shalan na matu, lam yawng mayawng hte gaw rai nga ai. 20 Kaning rai nme law, nanhte hpang de ngai du yang, ngai ra ai hte maren nanhte n rai nga nna, nanhte ra ai hte maren ngai mung n rai nga na nhten, ngu nna ngai tsang nga nngai: gasat gala, manawn masham, ndawng n yawt ai, bra wa na lam, bawlaw ai ga, kadum kahte ai ga, grang ai ga hte kabrawng kabrang rai nga na hpe mung, ngai tsang nga nngai: 21 nanhte hpang de ngai bai du ai shaloi, nye a Karai Kasang gaw nanhte a man e ngai hpe shagrit nhtawm, shawng e yubak galaw nna, tinang galaw ai n se ai lam hte, shut hpyit nna ngang ai amu a lam hta, myit n malai ai law law hte a majaw ngai myit yawn ai hkrum na nngai hpe mung, myit tsang nga nngai.

13

1 Ya nanhte hpang de sa du ai gaw, masum lang na bat rai nga ai. Ga nga manga hte hpe, sakse lahkawng masum a n-gup ga hte shagrin nga na ra ai. 2 Ngai bai du yang gaw matsan n dum na nngai, ngu nna shawng e tsun ni ai hte maren, ya nanhte hte rau garai n nga raitimung, lahkawng lang na bat e rau nga ai hte maren, ya du hkra shut hpyit ai ni hte kaga yawng mayawng hte hpe, ngai tsun magang made ai; 3 ngai hta e ga tsun nga ai Hkristu a lam nanhte sakse tam myit dai majaw, ngai matsan n dum na made ai. Shi gaw nanhte hta e n-gun n kya ai sha, nanhte a kata e n-gun atsam dan nga ai: 4 kaning rai nme law, n-gun kya ai majaw wudang e jen da hkrum raitimung, Karai Kasang a n-gun atsam a gawp e shi ahkrung nga ai. Anhte mung Hkristu hte maren gawngkya nga ga timung, nanhte hta rawng ai Karai Kasang a n-gun atsam majaw, anhte shi hte rau ahkrung nga na ga ai. 5 Nanhte gaw dai makam masham hta de nga myit dai kun, tinang dai chyam yu mu; nanhte tinang hkum hpe dinglik yu mu: dinglik yu ai n hkam lu ai ni, nanhte n rai nga myit yang me, Yesu Hkristu nan nanhte a hkum hta e rawng nga ai hpe, nanhte n chye nga myit ni? 6 Anhte mahtang dinglik n hkam lu ai ni n rai nga ga ai hpe, nanhte chye lu myit ga, ngai myit mada nga nngai. 7 Dai hta kaga, anhte dinglik hkam lu ai lam dan wa u ga n re ai sha, anhte dinglik n hkam lu ai ni zawn rai na ga ai raitimung, nanhte gaw kaja ai lailen galaw lu myit ga hte, n kaja ai lai len n galaw myit ga, ngu nna Karai Kasang hpe anhte a hpyi nga ga ai. 8 Kaning rai nme law, tengman ai ga hte nhtan shai let anhte hpa mung n galaw lu ai sha, tengman ai ga a maga e nga yang she, galaw lu ga ai. 9 Dai rai nna, anhte gawngkya nga nna nanhte n-gun ja nga yang, anhte kabu gara nga ga ai: shingrai nanhte hkum tsup lu myit ga, dai lam mung anhte a hpyi nga ga ai. 10 Dai re ai majaw, nanhte hte rau nga ai shaloi sharun shabya na matu n rai, shadaw shalan na matu sha dai Madu ngai hpe jaw da ai ahkang aya hte maren, aja awa n di u ga she, ya e naw tsan gang nga yang, ning rai ngai ka dat nngai. 11 Dai hta kaga gaw, hpunau ni e, kabu gara nga mu; hkum hkum tsup tsup rai nga mu; shangwi shapyaw ai hkam la mu; myit mang langai sha rai nga mu; ngwi pyaw ai lam hkan nna, tsawra myit rawng ai hte ngwi pyaw shangun ai Karai Kasang gaw nanhte hte rau anga nga na ra ai. 12 Nanhte shada chyoi pra ai pup hte shakram ya mi. Chyoi pra ai ni yawng mayawng nanhte hpe shakram dat manit dai. 13 Madu Yesu Hkristu a akyu ara, Karai Kasang a tsawra n-gaw nwai ai hte, Chyoi pra ai Wenyi a kanawn mazum ai gaw, nanhte mahkra hte rau anga nga u ga law.

AMAZING GRACE BIBLE INSTITUTE