|
TITO 1 Siac ni Pablo, nga adipen ti Dios, ken apostol ni Jesus Cristo, cas mayannurot iti pammati dagiti pinili ti Dios, ken ti pannacaammo iti pudno a maiyannugot iti kinasanto; 2 Babaen ti pananginanama iti biag nga agnanayon, nga ti Dios, a dina mabalin ti agulbod, incarina idi sacbay a nabangon ti lubong; 3 Ngem cadagiti pannawenna impaca-ammona ti saona babaen ti panangascasaba, a naitalec caniac cas iti bilin ti Dios a Manangisalacantayo; 4 Isuratco ken Tito, pudno nga anacco cas iti sapasap a pammati: Parabur, ken asi, ken talna, nga aggapu ti Dios Ama ken ni Apo Jesus Cristo a Manangisalacantayo. 5 Gapu itoy imbatica idiay Creta, tapno ituloymo nga urnosen dagiti banbanag a dipay nalpas idi, ken tapno mangisaadca cadagiti panglacayen iti tunggal ili, cas imbilinco kenca: 6 No adda awan pacababalawanna, asawa ti maymaysa a babai, addaan matalec nga annac a saanda a naidarum gapu iti kinariribuc wenno kinasukir. 7 Ta ti obispo masapul nga awan pacababalawanna, a cas isu iti pagaywanen ti Dios; saan a napalangguad, saan a managpungtot, saan a managinum ti arac, saan a mannakicabil, saan a naagum iti narugit a kinabacnang; 8 No di ket naayat nga managpadagus, naayat cadagiti naimbag a tattao, natacneng, nalinteg, nasantoan, managparbeng; 9 A salimetmetanna a sititibker iti sao a napudno nga isu a nacasursurroanna, tapno iti casta mabalinna ti mamalbalacad babaen ti naurnos a sursuro ken tapno mabagbagaanna ken maallukoyna dagiti tattao nga sumuppiat. 10 Ta adda adu a manangriribuc ken managsao ti awan capapay-anna ken manangallilaw, nangnangrona cadagiti adda iti pannacacugit: 11 A dagiti ngiwngiwatda masapul nga apputen, a rukirocda iti amin a sangacabbalayan, nga isursuroda ti saan nga rumbeng, maigapu iti narugit a panagbacnang. 12 Maysa cadacuada, a maysa nga mammadtoda met laeng, kinunana, Dagiti taga Creta ket cancanayon nga naulbodda, dakes nga an-animalda, nasadutda ken nabuclisda. 13 Daytoy a pammanecnec ket pudno. Gapuna babalawem ida iti nainget, tapno nasalun-atda iti pammati; 14 A dida ipangag dagiti parparbo a sarita dagiti Judio, ken dagiti bilbilin dagiti tattao, a sumiasi iti pudno. 15 Cadagiti nadalus ket isuamin nadalusda: ngem cadagiti narugit ken dagiti di mamati ket awan iti nadalus; no di ket ti isipda met laeng ken ti concienciada narugitan. 16 Ipaduyacyacda nga ammoda ti Dios; ngem gapu cadagiti ar-aramidda tallicudanda isuna, idinto a macarimonda, ken nasukirda, ken cadagiti amin a naimbag nga ar-aramid ket nagdakesda. CAPITULO 2 1 Ngem sica saoem dagiti banbanag a maipaay nga agbalin a naurnos nga sursuro: 2 A dagiti lallacay managparbengda coma, natacneng, nanakem, nasalun-at iti pammati, iti ayat, iti kinaanus. 3 Dagiti babbaket castada met coma, iti panagbiagda ket agturong coma iti kinasanto, saanda a mamadpadakes, saanda a patagabu iti adu nga arac, mangisursuroda cadagiti nasayaat a banbanag; 4 Tapno isuroda dagiti agtutubo a babbai nga managparbengda, ket ayatenda dagiti assawada, ken ayatenda dagiti annacda, 5 Natacnengda, nadalusda, nga aywananda ti balay, naimbagda, natulnogda cadagiti assawada met laeng, tapno iti sao ti Dios saan nga matabbaawan. 6 Dagiti agtutubo a lallaki balacadam met tapno managparbeng dagiti nakemda. 7 Cadagiti isuamin a banag agparangca coma nga ulidan babaen cadagiti naimbag nga aramid: nga iti panangisursurom ket ipakitam ti kinatacneng, kinapudno, ken kinadalus. 8 Naurnos nga panangipalawag, a saan a mabalin nga mababalaw; tapno daydiay cumappon iti bangir a bumusor ket agbain coma, agsipud ta awan ti aniaman nga dakes a mabalinna a saoen iti maipapan kenca. 9 Bagbagaam met dagiti paad-adipen tapno agtulnogda cadagiti appoda met laeng, nga ay-aywenda ida a naimbag iti isuamin; saanda a managsungbat; 10 A dida agtacaw, no di ket ipakitada ti isuamin a pannacatalec; tapno arcosanda ti sursuro ti Dios a Manangisalacantayo cadagiti isuamin. 11 Ta ti parabur ti Dios a mangyeg ti pannacaisalacan ket nagparangen cadagiti isuamin a tattao. 12 Nga isursuronatayo, a pagtalawantayo ti kinadakes ken dagiti nailubongan a tartarigagay, agbiagtayo coma a sipaparbeng, ken sililinteg, ken nadiosan, itoy agdama nga lubong; 13 Nga ur-urayen daydiay bendito nga inanama, ken ti nadayag nga panagparang ti dackel a Dios ken Manangisalacantayo a ni Jesus Cristo; 14 Isu nga nangited iti bagina gapu cadatayo, tapno subbotennatayo iti amin a kinadakes, ken manggugor a maipaay kencuana met laeng ti maysa nga naisupsupadi nga ili, a naregta cadagiti naimbag nga ar-aramid. 15 Dagitoy a banbanag saoem, ken ibalacadmo, ket mangtubngarca a buyogen ti amin a kinaturay. Awan coma ti tao a pacaumsiam. CAPITULO 3 1 Ipalagipmo a paiturayanda coma cadagiti agtuturay ken dagiti pannacabalin, ta agtulnogda cadagiti pagalagadan, ken sisasaganada iti isuamin nga naimbag nga aramid, 2 A dida agsao iti dakes iti uray siasino a tao, saanda a mannakiringgor, no di ket na-amoda, nga ipakitada ti amin a kinaemma cadagiti isuamin a tattao. 3 Ta idi naminsan ket nacunengtayo met, nasukir, naallilaw, a nagtulnogtayo cadagiti nadumaduma a kinagaramugam ken ragragsac, a nagbibiagtayo iti kinadakes ken apal, mannakigura, ken nagiginnuratayo. 4 Ngem calpasanna ti kinamananga-asi ken ayat ti Dios a Manangisalacan cadagiti tattao ket nagparang, 5 Saan a gapu cadagiti ar-aramid ti kinalinteg nga inaramidtayo, no di ket cas mayannugot iti asina insalacannatayo, gapu iti panaggugor ti baro a pannacaparsua, ken ti panangpabaro ti Espiritu Santo; 6 Nga imbuyatna cadatayo a sibabacnang gapu ken Jesus Cristo a Mangisalacantayo; 7 Tapno idinto a mapalintegtayo gapu iti paraburna, maaramidtayo met nga agtawid a mayalubog iti pananginanama ti biag nga agnanayon. 8 Daytoy ket mapagtalcan a pagsasao, ket no maipapan cadagitoy nga banbanag ket tarigagayac nga ipapatim a sitatalged, a dagiti namati iti Dios ket rumegtada coma a mangaramid cadagiti naimbag nga ar-aramid. Dagitoy a banbanag ket nasayaatda ken macaited ti gunggona cadagiti tattao. 9 Ngem adaywam dagiti minamaag a supsuppiat, ken dagiti capcapuonan, ken dagiti panagsusungbat, ken panagsususic a maipapan iti linteg; ta awan ti maitedda a pagimbagan ken barengbarengda. 10 Ti tao a simmiasi ti sursuro inton malpas ti umuna ken ti maicaddua a panamagbaga papanawem; 11 Idinto a mailasinmo a daytoy dimmakesen, ken agbasbasol, ket ocomenna ti bagina met laeng. 12 Intono ibaonco kenca ni Artemas, wenno ni Tiquico, umagawaca nga umay caniac idiay Nicopolis: ta panggepco ti agnaed sadiay iti calam-ecna. 13 Agawaam a palubosan iti panagrubbuat da Zenas a masirib iti linteg ken ni Apolos, tapno awan coma ti pagcuranganda iti panagdaliasatda. 14 Ket dagiti cadduatayo adalenda met coma ti agtalinaed cadagiti nasayaat nga ar-aramid a maipaay cadagiti masapul a paca-aramatan, tapno saanda a di agbunga. 15 Dagiti isuamin nga adda a naicuyog caniac cablaawandaca. Cablaawam dagiti agayat cadacami iti pammati. Parabur coma cadacayo amin. Amen. ¶ Naisurat nga agpaay ken Tito, nadutocan nga umuna a obispo ti iglesia dagiti taga Creta, taga Nicopolis Macedonia. |