TI SURAT NI APOSTOL PABLO CADAGITI TAGA ROMA CAPITULO 1 1 Pablo, maysa nga adipen ni Jesus Cristo, naayaban nga apostol, nailasin nga agpaay iti evangelio ti Dios, 2 (Nga incarina idi babaen cadagiti mammadtona cadagiti nasantoan a sursurat,) 3 Maipapan iti Anacna a ni Jesus Cristo nga Apotayo, a nayanac iti capoonan ni David a mayannurot iti lasag; 4 Isu naiparangarang nga Anac ti Dios gapu iti pannacabalin, nga mayannurot iti espiritu ti kinasanto, gapu iti panagungar cadagiti natay: 5 Gapu kencuana inawatmi ti parabur ken ti kina-apostol, a maipaay ti pannacapatulnog iti pammati cadagiti amin nga nasnacion, a maipaay iti naganna: 6 Cas nairamancayo met a naayaban ken Jesus Cristo: 7 Cadacayo amin nga adda dita Roma, ay-ayaten ti Dios, ken naayaban nga sasanto: Parabur ken talna cadacayo nga aggapu iti Dios nga Amatayo, ken ni Apo Jesus Cristo. 8 Umuna, agyamanac iti Diosco gapu ken Jesus Cristo maipuon cadacayo amin, agsipud ta ti pammatiyo ket naipaduyacyaken iti amin a lubong. 9 Ta ti Dios isu ti sacsic, a pagserserviac babaen iti espirituc ti evangelio iti Anacna, no casano ti di-agressat a pannacalaglagipco cadacayo nga cancanayon cadagiti carcararagco; 10 Nga agdawdawatac, a no mabalin coma babaen ti panangananamong ti Dios ket addanton gundawayco nga umay cadacayo. 11 Ta tarigagayancayo a makita, tapno ipaayancayo ti sagut a naespirituan, camaudiananna mapapigsacayo; 12 Cayatna a saoen, nga aglilinniwanliwatayo iti pammati ti tunggal maysa dacayo ken siac. 13 Ket diac cayat a diyo maammoan, cacabsat, a namin-adu a pinanggepco ti umay cadacayo, (ket agpapan ita nalappedannac,) tapno macagun-odac met coma ti dadduma a bunga cadacayo, a cas met cadagiti dadduma a Gentiles. 14 Siac nacautangac nga agpadpada cadagiti Griegos, ken cadagiti Barbarians; cadagiti mamasirib, ken cadagiti nanengneng. 15 Gapuna, no maipapan caniac, sisasaganaac a mangicasaba ti evangelio cadacayo met dita Roma. 16 Ta diac ibain ti evangelio ni Cristo: ta isu ti pannacabalin ti Dios a maipaay iti pannacaisalacan ti tunggal maysa a mamati; umuna iti Judio, ken casta met iti Griego. 17 Ta iti daytoy maipacaammo iti kinalinteg ti Dios manipud iti pammati agingga iti pammati: cas iti adda a naisurat, Ti nalinteg agbiagto gapu iti pammati. 18 Ta ti pungtot ti Dios maiparangarang manipud langit a maibusor iti amin a kinadangcuc ken kinakillo dagiti tattao, a lappedanda ti kinapudno gapu iti kinadakes; 19 Ta ti panangammo iti Dios nalawag cadacuada met; ta ti Dios imparangarangna cadacuada. 20 Ta dagiti banbanag a di makita nanipud idi pannacaparsua ti lubong naipacaammo a nalawag, ta naipakitada gapu cadagiti inaramidna, isuda ti agnanayon a pannacabalin ken iti Kinadiosna; tapno awan ti pagpambarda: 21 Ta idinto, a naammoanda ti Dios, saanda nga inpadayag a cas Dios, ken dida met nagyaman; no di ket nagbalin nga ubbaw dagiti panpanunotda, ket dagiti nanengneng a pusoda ket nagsipnget. 22 A cunkunada a mamasiribda, nagbalinda a nanengneng, 23 Ket sinucatanda iti dayag ti Dios a di agrupsa iti caasping ti ladawan ti tao nga agrupsa, ken dagiti tumatayab, ken dagiti an-animal nga uppat ti sacada, ken dagiti agcarcarayam a banbanag. 24 Gapuna ti Dios binaybay-anna met ida nga agturong iti kinarugit cadagiti derderrep dagiti puspusoda, tapno maibabain coma dagiti bagbagida cadacuada met laeng: 25 Ta sinucatanda iti kinapudno ti Dios iti ulbod, ket dinaydayawda ken nagserservida iti parsua a nangnangrona ngem iti Namarsua, isu a bendito nga agnanayon awan patinggana. Amen. 26 Gapu iti daytoy ti Dios binaybay-anna ida cadagiti derderrep nga nacababain: ta uray dagiti babbai nga adda cadacuada ket sinucatanda iti nacaparsuaan nga pannacaaramatda iti maisalungasing iti nacaparsuaan: 27 Ket casta met dagiti lallaki, binaybay-anda ti nacaparsuaan dagiti babbai, ket simgedda iti derrep iti maysa ken maysa cadacuada; a lallaki ken lallaki inaramidda ti nacarugrugit a pamay-an, ket inawatda cadagiti bagbagida met laeng ti maicari a gunggona iti pannacaallilawda. 28 Ket agsipud ta dida kinayat nga inammo iti Dios, ti Dios binaybay-anna ida iti maysa a nakem a dakes, tapno aramidenda dagiti banbanag nga di maipaay; 29 A napnoda iti amin a kinakillo, pannakicamalala, kinadakes, agum, dakes a nakem; napno iti apal, panagpatay, ringgor, ulbod, kinadangcuc; managuy-uyaw, 30 Managdadaelda, managgurada iti Dios, nacuspag, napalangguad, napasindayag, managparnuay cadagiti dakes a banbanag, nasukir cadagiti dadackelda, 31 Awanan pannacaawat, saanda a matalec cadagiti tultulag, awan ti ayatda a nacaparsuaan, salawasawda, awan asida: 32 Nga idinto nga ammoda dagiti pagallagadan ti Dios, a dagiti agaramid cadagiti cacasta nga banbanag ket maicarida ken patay, saan laeng nga aramidenda ida, no di ket pacaragsacanda pay cadagiti agaramid cadacuada CAPITULO 2 1 Gapuna awan pambarmo sica, O tao, uray siasinoca a mangocom: ta iti panangocommo iti sabali; ocomem met la ta bagim; agsipud ta sica a mangocom ket agaramidca met cadagiti cacasta a banbanag. 2 Ket ammotayo a ti panangocom ti Dios isu ti mayannurot iti kinapudno a maibusor cadagiti agaramid cadagiti cacasta a banbanag 3 Ket pagarupem aya sica, O tao, a mangocom cadagiti agar-aramid cadagiti cacasta a banbanag, ket aramidem met ida, a malisiamto ti panangocom ti Dios? 4 Wenno laisem aya ti kinabacnang ti imbagna ken ti anusna ken ti nabayag a panagituredna; a dica ammo aya a ti kinaimbag ti Dios iturongnaca iti panagbabawi? 4 Wenno laisem aya ti kinabacnang ti imbagna ken ti anusna ken ti nabayag a panagituredna; a dica ammo aya a ti kinaimbag ti Dios iturongnaca iti panagbabawi? 6 Isu a manggunggonanto iti tunggal maysa a cas maitutop cadagiti ar-aramidna: 7 Cadagiti aganus nga agtalinaed iti panagaramid ti naimbag ket sapsapulenda ti gloria ken ti dayaw ken ti saan nga ipapatay, ti biag nga agnanayon: 8 Ngem cadagiti mannakisuppiat, a dida nga agtulnog iti kinapudno, no di ket agtulnogda iti kinakillo, gura ken pungtot, 9 Rigat ken ladingit, dagiti lac-amento iti amin nga cararrua ti tao nga agaramid ti dakes, umuna ti Judio, ken casta met iti Gentil; 10 Ngem gloria, dayaw, ken talna, iti magunggona ti isuamin nga agaramid ti naimbag, umuna ti Judio, ken casta met iti Gentil: 11 Ta awan ti pagdudumaan dagiti tattao iti Dios. 12 Ta dagup dagiti nagbasol nga awan ti linteg ket mapucawdanto met nga awan ti linteg: ket dagup dagiti nagbasol iti babaen ti linteg ket maocomdanto met gapu iti linteg; 13 (Ket saan a dagiti agdengngeg iti linteg dagiti nalinteg iti sangoanan ti Dios, no di ket dagiti mangtungpal iti linteg isudanto dagiti mapalinteg. 14 Ta no dagiti Gentiles, nga awan lintegda, gapu iti nacaparsuaan a ricna ket aramidenda dagiti banbanag ti linteg, dagitoy, uray awan ti lintegda, isuda ti linteg cadacuada met laeng: 15 Nga ipakitada ti aramid ti linteg a naisurat cadagiti puspusoda, ti concienciada met laeng mangpanecnec cadacuada, ken dagiti panpanunotda agpipinnabasolda ken agpipinnambarda;) 16 Intono aldaw a ti Dios ocomenanto dagiti palpalimed dagiti tattao gapu ken Jesus Cristo a cas mayannurot iti evangelioc. 17 Adtoy, no managanca a Judio, ken agtalecca iti linteg, ket agpasindayawca iti Dios, 18 Ket ammom ti pagayatanna, ken mailasinmo dagiti banbanag a nasaysayaat, a nasursuroanca iti linteg; 19 Ket agcammatalecca a sica ti mangidaldalan cadagiti bulbulsec, silawca cadagiti adda iti sipnget, 20 Mangisursuroca cadagiti awan ammona, mangad-adalca cadagiti ub-ubbing, nga addaanca ti pagallagadan ti pannacaammo ken ti pudno iti linteg. 21 Sica ngarud a mangisuro iti sabali, saanmo aya nga isuro ti bagim met laeng? sica nga icascasabam a ti tao dina rebbeng ti agtacaw, agtacawca met aya? 22 Sica a cuncunam a di rebbeng ti makicamalala, makikamalalaca aya? sica a caguram dagiti saan a pudno a dios, tacawam aya dagiti temtemplo? 23 Sica nga agpasindayag iti linteg, ibabainmo aya ti Dios gapu iti panangsalungasingmo iti linteg? 24 Ta ti nagan ti Dios matabbaawan iti tengnga dagiti Gentiles gapu cadacayo, cas adda a naisurat. 25 Ta pudno a ti pannacacugit agbanag a manggunggona, no tungpalem ti linteg: ngem no agsukirca iti linteg, ti pannacacugitmo ket agbalin nga saan a pannacacugit. 26 Ngarud no ti saan a pannacacugit tungpalennanto dagiti bilbilin ti linteg, saan aya a maibilangto ti saanna a pannacacugit iti pannacacugit? 27 Ket ti nacaparsuaan a di-pannacacugit, intono tungpalenna ti linteg, dinacanto babalawen aya, idinto nga adda kenca ti surat ken ti pannacacugit ket sumalungasingca iti linteg? 28 Ta saan a Judio, ti akinruar laeng a kinajudio; ket di met pannacacugit, ti akinruar laeng a pannacacugit iti lasag: 29 Ngem ti pudno a Judio, isu ti kinajudio iti uneg; ket ti pannacacugit agtaud iti puso, iti naespirituan, ket saan nga iti letra; nga ti pannacaidayawna ket saan nga adda iti biang dagiti tattao, no di ket iti Dios. CAPITULO 3 1 Ania ngarud ti pacaigundawayan dagiti Judio? wenno ania ti magunggona iti pannacacugit? 2 Adu dagiti pacaipa-ayanna: cangronaanna, gapu ta naitalec cadacuada dagiti sasao ti Dios 3 Ta ania ngarud no dadduma cadacuada ket saanda a namati? ti saanda a panamati ket pagbalinenna ngata ti kinamatalec ti Dios nga awan ti capaypay-anna? 4 Ti Dios dina ipalubos: wen, ti Dios sipupudno, ngem tunggal maysa ket ulbod; cas adda a naisurat, Tapno mapalintegca cadagiti sasaom, ket agballigica intono umayca iti pangocoman. 5 Ngem no ti kinakillotayo ket ilatacna iti kinalinteg ti Dios, ania ti saoentayonto? Nakillo aya ti Dios a mangipatay iti dusa? (Agsaoac a cas iti cadawyan dagiti tattao) 6 Ti Dios dina ipalubos: ta casanonto ngarud ti panangocom ti Dios iti lubong? 7 Ngem no ti kinapudno ti Dios immadu unay gapu iti ulbodco a nagbalin a pacaidayawanna; apayapay a mapabasolac pay laeng a cas managbasol? 8 Ken saan ketdi, (cas iti pannacapabasoltayo, ken cas panecnecan dagiti dadduma a cuncunatayo,) Aramidentayo ti dakes, tapno ti naimbag coma ket umay? ti pannacadusa dagitoy ket maiparbeng. 9 Ania ngarud? naim-imbagtayo aya ngem isuda? Saan, ni caanoman: ta inanamunganmi nga agpadpada dagiti Judios ken dagiti Gentiles, nga addada amin iti babaen ti basol; 10 Cas adda a naisurat, Awan iti nalinteg, awan, uray maysa: 11 Awan ti siasinoman a macaawat, awan ti siasinoman nga agsapul iti Dios. 12 Simminada amin, nagmaymaysada a nagbalin nga awan capapayanda; awan ti agaramid ti naimbag, awan, uray la coma maymaysa. 13 Ti carabucobda ket tanem a silulucat; dagiti dildilada nagaramidda ti allilaw; gita dagiti ul-uleg ti adda iti baba dagiti bibbibigda: 14 Ti ngiwatda ket adda a napno iti lunod ken kinapait: 15 Dagiti sacsacada naparagsitda a mangibuyat ti dara: 16 Pannacadadael ken kinadacsanggasat ti adda cadagiti daldalanda: 17 Ket ti dalan ti talna saanda nga naammoan: 18 Awan ti buteng iti Dios cadagiti matmatada. 19 Ita ammotayon a dagup ti saoen ti linteg kunana, naisao cadacuada cadagiti adda iti babaen ti linteg: tapno amin a ngiwat agumel coma, ket amin a lubong addada a naocom babaen iti pangngeddeng ti Dios. 20 Agsipud ta gapu cadagiti ar-aramid ti linteg awanto ti lasag a maibilang a nalinteg iti sangoananna: ta gapu iti linteg ket maipacaammo ti basol. 21 Ngem ita iti kinalinteg ti Dios iti ruar ti linteg maiparangarang, a mapanecnecan ti linteg ken dagiti mammadto; 22 Uray iti kinalinteg ti Dios gapu iti pammati ken Jesus Cristo a maipaay amin ken cadagiti isuamin a mamati: ta awan ti pagdudumaan: 23 Ta isuamin nagbasol, ken agcurang iti dayag ti Dios; 24 Idinto a maibilangda a nalinteg gapu iti paraburna a maaramat ti pannacasubbot nga adda ken Cristo Jesus: 25 Isu nga impaay ti Dios a daton ti pannakicappia gapu iti pammati iti darana, tapno maiparangarang ti kinalintegna a maipaay ti pannacapacawam dagiti napalabas a basbasol, gapu iti kinaanus ti Dios; 26 Tapno maiparangarang, cunaec, ti agdama a tiempo iti kinalintegna: tapno isu ket nalinteg, ken mangpalinteg iti adda pammatina ken Jesus. 27 Sadino ngarud iti ayan ti panagpasindayaw? Naiccaten. Gapu ti ania a linteg? ti linteg dagiti aramid? Saan: no di ket gapu iti linteg ti pammati. 28 Panungpalenmi ngarud a ti tao maibilang a nalinteg gapu iti pammati uray awan dagiti ar-aramid ti linteg. 29 Isu Dios laeng aya dagiti Judio? saan aya a Dios met dagiti Gentiles? Wen, Dios met dagiti Gentiles: 30 Ta makita nga maymaysa laeng a Dios, iti mangpalintegto iti pannacacugit gapu iti pammati, ken iti saan a pannacacugit gapu iti pammati. 31 Pucawentayo ngarud aya ti linteg gapu iti pammati? Ti Dios dina ipalubos: wen, pagtaginayonentayo iti linteg. CAPITULO 4 1 Ania ngarud ti saoentayo maipapan ken Abraham nga amatayo, cas mayannurot iti lasag, ti nasaracanna? 2 Ta no ni Abraham napalinteg cadagiti ar-aramid, adda panagpasindayagna; ngem saan no maipapan iti sangoanan iti Dios. 3 Ta ania ngarud ti saoen ti surat? Ni Abraham pinatina ti Dios, ket naibilang kencuana a kinalinteg. 4 Ita iti mangmangged ket saan a maibilang kencuana a parabur ti tangdanna, no di ket maiparbeng a bayad. 5 Ngem iti saan nga agaramid, ket patienna daydiay mangpalinteg iti managdacdakes, ti pammatina ket maibilang kencuana a kinalinteg. 6 Casta met uray ni David met laeng ipalawagna ti kinabendito ti tao, a pangibilangan ti Dios iti kinalinteg uray awan dagiti ar-aramidna, 7 A kunana, Bendito dagidiay mapacawan dagiti kinadakesda, ken dagiti basbasolda maabbonganda. 8 Bendito ti tao nga ti Apo ket saanna nga ipatay kencuana ti basol. 9 Daytoy ngarud a kinabendito maipaay laeng aya iti nacugit, wenno iti met saan a nacugit? ta cunatayo a ti pammati ni Abraham naibilang kencuana a kinalinteg. 10 Casano ngarud ti pannacaibilangna kencuana? idi a nacugiten, wenno idi saanpay a nacugit? Saan nga idi nacugiten, no di ket idi saan pay a nacugit. 11 Ket inawatna ti pagilasinan ti pannacacugit, a cas tanda iti kinalinteg ti pammati a cupcupicupanna idi di pay nacugit: tapno isu coma idi ti ama dagiti isuamin a mamati, uray pay saanda a nacugit; tapno maibilang cadacuada a kinalinteg: 12 Ken ama ti pannacacugit a saan laeng a cadagiti nacugit, no di ket cadagiti met sumursurot cadagiti tugtugot ti pammati ni amatayo nga Abraham, nga adda kencuana idi saan pay a nacugit. 13 Ta ti cari, nga isunto ti agtawid iti lubong, ket saan nga maipaay ken Abraham, wenno iti caputotanna, a gapu iti linteg, no di ket maigapu iti kinalinteg ti pammati. 14 Ta no dagiti sumurot iti linteg ket isuda ti agtawid, ti pammati rumsua nga awan ti banbanagna, ket ti cari awan ti capapay-anna: 15 Gapu ta ti linteg ket pataudenna ti pungtot: ket no awan ti linteg, awan met ti pannacasalungasing. 16 Gapuna maigapu iti pammati, tapno mayannurot iti parabur; ken tapno mapatalgedan ti cari cadagiti isuamin a caputotan; saan laeng a cadagiti sumursurot iti linteg, no di pay ket cadagiti sumursurot met iti pammati ni Abraham; isu nga amatayo amin, 17 (Cas adda a naisurat, Insaadca nga ama dagiti adu a nasnacion,) iti imatang ti pinatina, uray pay ti Dios, a mangpabiag cadagiti natay ket ibilangna dagiti banbanag nga awan pay a casla addadan. 18 Isu namati nga si-inanama iti saan a mainanamaan, tapno agbalin coma nga ama dagiti adu a nasnacion, cas iti naisao kencuana, Castanto ti caputotam. 19 Ket saan met nga nagcapuy iti pammati, ket dina met imbilang ti bagina a natayen, idinto nga agsangagasut idin ti tawenna, wenno uray pay iti natayen nga aanacan ni Sara: 20 No di ket namati nga awan duaduana iti cari ti Dios; ket timmibker iti pammati, nga pinadayawanna ti Dios; 21 Ket napnec unay, a ti incarina, mabalinna met a tungpalen kencuana. 22 Gapuna naibilang ngarud kenkuana a kinalinteg. 23 Itan saan a naisurat a maipaay kencuana laeng, ti kinalinteg a naibilang kencuana; 24 No di ket maipaay met cadatayo, a pacaibilangannanto, no mamatitayo iti namagungar ken Jesus nga Apotayo cadagiti natay; 25 Isu a nayawat gapu cadagiti babactayo, ken napagungar tapno pacaibilangantayo a nalinteg. CAPITULO 5 1 Idinto ngarud a napalintegtayo gapu iti pammati, addaantayo ti pannakicappia iti Dios gapu ken Apotayo a Jesus Cristo: 2 Gapu kencuana met addaantayo ti pagsercan gapu iti pammati itoy a parabur isu a pagtalinaedantayo a sititibker, ket agrag-otayo ti namnama iti dayag ti Dios. 3 Ket saan laeng a daytoy, no di ket agrag-otayo met cadagiti rigrigattayo: nga ammotayo a ti rigat ket pataudenna ti anus; 4 Ket ti anus, pacasuutan; ket ti pannacasuut, inanama: 5 Ket ti inanama saan a pacaibabainan; gapu ta ti ayat ti Dios naiparucpoc cadagiti puspusotayo gapu iti Espiritu Santo a naited cadatayo. 6 Ta idi awan pay laeng iti pigsatayo, idi tiempo a pannacaipaayna ni Cristo ket natay gapu cadagiti managdacdakes. 7 Ta narasay ti mayat a matay a maipuon iti maysa a tao a nalinteg: nupay adda ngata macaitured a matay gapu iti maysa a tao a naimbag. 8 Ngem ti Dios ipatalgedna ti ayatna cadatayo, agsipud ta, idinto a managbasoltayo pay laeng, ni Cristo natay gapu cadatayo. 9 Nangnangrona pay ngarud, idinto a napalintegtayon iti darana, maisalacantayo iti pungtot gapu kencuana. 10 Ta no, idinto a agcabusortayo, naicappiatayo iti Dios gapu iti ipapatay ti Anacna, nangnangrona pay ita, ta naicappiatayon, maisalacantayo maipuon iti biagna. 11 Ket saan laeng a casta, no di ket agrag-otayo iti Dios gapu ken Apotayo a Jesus Cristo, a gapu kencuana inawattayon ita ti pannacaicappia. 12 Gapuna, no casano ti iseserrec ti basol ditoy lubong gapu iti maymaysa a tao, ken ti ipapatay gapu iti basol; ket iti casta ti ipapatay immay cadagiti isuamin a tattao, agsipud ta isuamin a tattao nagbasol: 13 (Ta idi awan pay ti linteg ti basol addan ditoy lubong: ngem ti basol saan a maibilang a salungasing no awan pay ti linteg. 14 Nupay casta nagari ti ipapatay nanipud ken Adan agingga ken Moses, uray pay cadagiti saan a nagbasol cas iti caasping ti isasalungasing ni Adan, isu a cayarigan ti umayto. 15 Ngem saan a cas iti salungasing, casta met ti naparabur a sagut. Ta no gapu iti babac daydi maysa adu dagiti natay, ad-adda pay a ti parabur ti Dios, ken ti sagut gapu iti parabur, gapu daydi maysa a tao, ni Jesus Cristo, naiparabur cadagiti adu. 16 Ket saan a cas iti salungasing ti maysa, casta met ti sagut: ta ti pannacaocom nagpaay a pacadusaan ti maysa, ngem ti parabur a sagut naigapu cadagiti adu a panagsalsalungasing a maipaay iti pannacapalinteg. 17 Ta no ti ipapatay nagari gapu iti basol daydi maysa; nangnangrona pay a dagiti immawat iti kinawadwad ti parabur ken ti sagut ti kinalinteg agaridanto iti biag gapu iti maysa, nga isu ni Jesus Cristo.) 18 Iti casta ngarud gapu iti salungasing ti maysa ti pannacaocom immay cadagiti isuamin a tattao ti pannacadusa; casta met gapu iti kinalinteg ti maysa ti parabur a sagut immay cadagiti isuamin nga tattao a pacapalintegan ti biag 19 Ta cas gapu iti isusukir ti maysa a tao dagiti adu ket naibilangda a managbasol, casta met gapu iti panagtulnog ti maysa dagiti adu maibilangda a nalinteg. 20 Ket ti linteg simrec pay, tapno paadduenna coma ti basol. Ngem no sadinoman nga ti basol immadu, ti parabur immad-adu pay iti casta unay: 21 Tapno cas ti panagari ti basol ken patay, casta met coma nga agari ti parabur gapu iti kinalinteg a maipaay iti biag nga agnanayon gapu ken Jesus Cristo nga Apotayo. CAPITULO 6 1 Ania ngarud ti cunaentayo? Agtalinaedtayo iti basol, tapno ti parabur ket umadu? 2 Ti Dios dina ipalubos. Casanotayo, a natayen iti basol, nga agbiagtayo pay laeng kencuana? 3 Dicayo ammo aya, a datayo amin a nabautizaran ken Jesus Cristo nabautizarantayo iti ipapatayna? 4 Naitanemtayo ngarud a naicanunong kencuana gapu iti pannacabautizar iti patay: tapno cas iti panagungar ni Cristo cadagiti natay gapu iti dayag ti Ama, casta met a magnatayo coma iti baro a panagbiag. 5 Ta no naicanunongtayo kencuana iti caasping ti ipapatayna, mairanudtayto met kencuana iti caasping ti panagungarna: 6 Nga ammotayo, a ti daan a kinataotayo ket nailansa iti cruz a naicanunong kencuana, tapno mapucaw iti bagi ti basol, tapno ditayo coman a patagabun iti basol. 7 Ta ti natayen ket naluc-atanen iti basol. 8 Ngem no nataytayo a naicanunong ken Cristo, patientayo nga agbiagtayto met a mairanud kencuana: 9 Nga ammotayo a ni Cristo idinto a nagungar cadagiti natay saan a matayen; ti ipapatay saanen nga agturay kencuana. 10 Ta no maipapan iti ipapatay, natay iti naminpinsan maipuon iti basol: ngem no maipapan iti panagbiag, agbiag a maipaay iti Dios. 11 Casta met nga ibilangyo ti bagiyo a natayen no maipapan iti basol, ngem sibibiag a maipaay iti Dios ken Jesus Cristo nga Apotayo. 12 Saan coma ngarud nga agari ti basol iti bagitayo a matay, tapno tungpalenyo dagiti derrepna. 13 Ket diyo met idaton dagiti bagbagiyo nga aramaten ti kinakillo a maipaay ti basol: no di ket idatonyo dagiti bagbagiyo met laeng iti Dios, a cascayla napagungar cadagiti natay, ken dagiti camcamengyo nga aramaten ti kinalinteg a maipaay iti Dios. 14 Ta ti basol dinto agari cadacayo: ta awancayo iti babaen ti linteg, no di iti babaen ti parabur. 15 Ania ngarud? agbasoltayo, gapu ta awantayo iti babaen ti linteg, no di iti babaen ti parabur? Ti Dios dina ipalubos. 16 Diyo ammo aya, nga iti pangidatonanyo a siannugot a pagservianyo met laeng, isu dayta ti mangadipen cadacayo; uray iti basol a maipaay iti ipapatay, wenno uray iti panagtulnog a maipaay iti kinalinteg? 17 Ngem yaman pay iti Dios, ta nupay pinaad-adipencayo idi iti basol, nagbalincayo a natulnog iti pusoyo iti daydiay kita ti sursuro a nacasursuroanyo. 18 Ket idinto a nawayawayaancayon iti basol, nagbalincayo nga ad-adipen ti kinalinteg. 19 Agsaoac cas ugali dagiti tattao maipuon iti kinacapuy ti lasagyo: ta cas iti panangidatonyo cadagiti camcamengyo a pa-adipen iti kinarugit ken kinadakes a maipaay iti kinadakes; casta met ita idatonyo dagiti camcamengyo a pa-adipen iti kinalinteg a maipaay iti kinasanto. 20 Ta idi dacayo dagiti ad-adipen ti basol, nailapsutcayo iti kinalinteg. 21 Ania ngarud ti bungana cadacayo idi dagiti banbanag nga ibainyo ita? ti panungpalan dagidiay a banbanag ket isu ni patay. 22 Ngem ita ta nawayawayaancayon iti basol, ket nagbalincayon nga adipen ti Dios, adda bungayo a maipaay iti kinasanto, ket ti panungpalanna biag nga agnanayon. 23 Ta dagiti supapac ti basol isu ni patay; ngem ti naparabur a sagut ti Dios isu ti biag nga agnanayon ken Jesus Cristo nga Apotayo. CAPITULO 7 1 Dicayo ammo aya, cacabsat, (casaoc dagiti maca-ammo iti linteg,) a ti linteg iturayanna laeng ti tao bayat ti caaddana a sibibiag? 2 Ta ti babai nga adda asawana adda a naisinggalut gapu iti linteg ken asawana iti bayat ti panagbiagna; ngem no matay ti asawa a lalaki, ti babai nawayaanen iti linteg iti asawana. 3 Ngarud, no sibibiag pay ti asawa a lalaki, ket ti babai makitipon iti sabali a lalaki, managananto iti makicamcamalala a babai: ngem no ti asawana matay, nawayaanen iti linteg, saan a makicamcamalala, uray pay makiasawa iti sabali a lalaki. 4 Gapuna, cacabsatco, dacayo nataycayon iti maipapan iti linteg gapu iti bagi ni Cristo; tapno maicallaysacayo iti sabali, nga isu daydi napagungar cadagiti natay, tapno mangpataudtayo iti bunga a maipaay iti Dios. 5 Ta idi nagbibiagtayo a linalasag, dagiti calcalicagum a pacabasolan, a pinarnuay ti linteg, ginargarida dagiti camcamengtayo tapno agpataudda iti bunga a maipaay ken patay. 6 Ngem ita nawayawayaantayon iti linteg, idinto a nataytayon iti daydi nacatenglantayo; iti casta agservitayo coma iti kinabaro ti espiritu, ket saan a babaen iti kinadaan ti letra. 7 Ania ngarud ti cunatayo? Basol aya ti linteg? Ti Dios dina ipalubos. Saan, ta diac coma nabigbig ti basol, no saan a gapu ti linteg: ket diac met coma nabigbig ti panagagum, no saan a kinuna ti linteg, Dica agagum. 8 Ngem ti basol, idi nga adda gundawayna gapu ti bilin, ginargarinac cadagiti amin a kita ti kinadakes. Ta no awan linteg ti basol natay. 9 Ket siac nagbibiagac idi nga awan linteg: ngem idi immay ti bilin, ti basol nagungar, ket natayac. 10 Ket ti bilin, a natudingan nga maipaay iti biag, nasaracco a maipaay iti patay. 11 Ta ti basol, idi nga adda gundawayna gapu iti bilin, sinulisognac, ket gapu kencuana pinataynac. 12 Iti casta ngarud ti linteg nasantoan, ket ti bilin nasantaon, ken nalinteg, ken naimbag. 13 Ti naimbag ngarud nagbalin aya caniac nga ipapatay? Ti Dios dina ipalubos. No di ket ti basol, tapno agparang a basol, nangpataud caniac ti ipapatay gapu iti naimbag; tapno ti basol gapu iti bilin mabigbig a dakes unay. 14 Ta ammotayo a ti linteg isu naespirituan: ngem siac linalasagac, a nalaco iti biang ti basol. 15 Ta ti aramidec diac ipalubos: ket ti ipalubosco, diac met aramiden; ket ti cagurac, aramidec pay. 16 Ngem no aramidec ti saanco a pagayatan, ananamungac a ti linteg ket naimbag. 17 Ita ngarud saanen a siac ti agaramid iti dayta, no di ket ti basol nga agnaed caniac. 18 Ta ammoc nga caniac (cayatco a saoen, iti lasagco,) awan iti agnaed a naimbag nga banag: ta ti panagpanggep nalaca caniac; ngem ti panagtungpal iti naimbag awan a masaracac. 19 Ta ti naimbag a panggepec diac aramiden: ngem ti dakes a diac panggepen, isu ket di ti aramidec. 20 Ita no aramidec ti diac pinanggep, saanen a siac ti agar-aramid kencuana, no di ket ti basol nga agnaed caniac. 21 Masaracac ngarud daytoy a linteg, nga, idinto a tarigagayac nga aramiden ti naimbag, ti dakes adda caniac. 22 Ta maay-ayoac iti linteg ti Dios iti makin-uneg a kinatao: 23 Ngem makitac ti sabali a linteg cadagiti camcamengco, a makigubgubat a maibusor iti linteg ti nakemco, ket ipannac a baluden iti linteg ti basol nga adda cadagiti camcamengco. 24 O nacaay-ay-ayac a tao! saisino ti mangluc-atto caniac itoy bagi ni patay? 25 Agyamanac iti Dios gapu ken Jesus Cristo nga Apotayo. Iti casta ngarud siac met laeng agserviac a mayannurot iti nakemco iti linteg ti Dios; ngem mayannurot iti lasagco iti linteg ti basol. CAPITULO 8 1 Awan ngarud ita ti aniaman a pannacadusa a maipaay cadagiti adda ken Cristo Jesus, nga magmagna a saan a mayannurot iti lasag, no di ket magmagna nga mayannurot babaen ti Espiritu. 2 Ta ti linteg ti Espiritu ti biag ken Cristo Jesus linuc-atannac iti linteg ti basol ken ti patay. 3 Ta ti saan a mabalinan ti linteg, idinto a napacapuy gapu iti lasag, inaramid ti Dios nga imbaonna ti Anacna a caasping ti lasag a managbasol, ket gapu iti basol, impatayna ti dusa ti basol iti lasag: 4 Tapno ti kinalinteg ti linteg matungpal coma cadatayo, a saan nga agbiag a mayannurot ti lasag, no di ket mayannurot ti Espiritu. 5 Ta dagiti umannurot iti lasag panunotenda dagiti banbanag iti linalasag; ngem dagiti umannurot iti Espiritu panunotenda dagiti banbanag iti Espiritu. 6 Ta ti linalasag a nakem isu ti patay; ngem ti naespirituan a nakem isu ti biag ken talna. 7 Agsipud ta ti linalasag a nakem ket maibusor iti Dios: ta saan a paiturayan iti linteg ti Dios, ket dina met cabaelan a pulos. 8 Ngarud dagiti agbiag a linalasag ket saanda a mabalin nga ay-aywen ti Dios. 9 Ngem saancayo a linalasag, no di ket addacayo ti Espiritu, no bilang ta ti Espiritu ti Dios agnaed cadacayo. Ita no siasinoman iti saan a mangupicup iti Espiritu ni Cristo, saanna a cucua. 10 Ket no ni Cristo adda cadacayo, ti bagi pudno a natay gapu iti basol; ngem ti Espiritu ket biag gapu iti kinalinteg. 11 Ngem no ti Espiritu daydi namagungar ken Jesus cadagiti natay agnaed cadacayo, daydi namagungar ken Cristo cadagiti natay biagennanto met dagiti agrupsa a bagbagiyo babaen ti Espirituna nga agnanaed cadacayo. 12 Iti casta ngarud, cacabsat, datayo ti makautang, saan nga iti lasag, tapno agbiagtayo a mayannugot iti lasag. 13 Ta no agbiagcayo a mayannugot iti lasag, mataycayto: ngem no gapu iti Espiritu patayenyo dagiti ar-aramid ti lasag, agbiagcayto. 14 Ta dagup amin nga idalan ti Espiritu ti Dios, isuda dagiti annac ti Dios. 15 Ta saanyo nga inawat ti espiritu ti pannaca-adipen manen tapno agbutengcayo; ngem inawatyo ti Espiritu ti pannacaibilang nga annac, gapuna umawagtayo, Abba, Ama. 16 Ti Espiritu met laeng panecnecanna cadagiti espiritutayo, a datayo annacnatayo iti Dios: 17 Ket no annac, agtawid met; agtawid iti Dios, ken makipagtawid ken Cristo; no casta makipagsagabatayo kencuana, tapno makipaggloriatayo met kencuana. 18 Ta pagarupec a dagiti sagsagabaen itoy agdama nga aldaw ket saanda a maicari nga ipadis iti dayag a maiparangarangto cadatayo. 19 Ta ti nasged a tarigagay ti sangaparsuaan ket ur-urayenna ti pannacaiparangarang dagiti annac ti Dios. 20 Ta ti sangaparsuaan ket naaramid a pinaiturayan iti kinapasindayag, saan a ti nakemna, no di gapu iti daydi nangituray kencuana a si-inanama, 21 Gapu ti sangaparsuaan met laeng ket maluc-atanto iti pannaca-adipen ti panagrupsa a maipaay iti nadayag a wayawaya dagiti annac ti Dios. 22 Ta ammotayo a ti isuamin a sangcaparsuaan agsasaibbecda ken agrigrigatda iti panagpasngay a sangsangcamaysa agingga ita. 23 Ket saan laeng nga isuda, no di ket datayo met, nga addaan cadagiti umuna a bungbunga ti Espiritu, wen datayo met laeng agsasaibbec ti unegtayo, nga agur-uray iti pannacaibilang nga annac, nga ammotayo, ti pannacasubbot dagiti bagbagitayo. 24 Ta naisalacantayo gapu ti namnama: ngem ti inanama a makita isu ti saan nga inanama: ta no ti tao ket makitanan, apay pay laeng nga mangnamnama? 25 Ngem no namnamaentayo iti ditay pay makita, ngarud ur-urayentayo a si-aanus. 26 Casta met a ti Espiritu tulongannatayo iti kinacapuytayo: ta ditayo ammo no casano ti panagcararagtayo a cas maiparbeng: ngem ti Espiritu met laeng ibabaetnatayo a buyogen dagiti un-unnoy a di mayebcas. 27 Ngem ti mangsukimat cadagiti puspuso ket ammona no ania ti tarigagay ti Espiritu, gapu ta isu ibabaetna dagiti sasanto cas iti pagayatan ti Dios. 28 Ket ammotayo a dagiti amin a banbanag agtitimpuyogda nga agaramid a maipaay iti pagimbagan dagiti agayat iti Dios, dagiti naayaban a cas mayannurot iti panggepna. 29 Ta dagiti sigud a naammoanna, dinutocanna met ida idi tapno mayaspingda iti ladawan ni Anacna, tapno isu agbalin nga inauna cadagiti adu a cacabsat. 30 Ket dagiti dinutucanna idi, inayabanna met ida: ket dagiti inayabanna, pinalintegna met ida: ket dagiti pinalintegna, inpadayagna met ida. 31 Ania ngarud ti saoentayonto pay cadagitoy a banbanag? No ti Dios adda a bumuyog cadatayo, siasino ti bumusorto cadatayo? 32 Daydi saan a nangipaidam iti Anacna met laeng, no di ket inyawatna a naipaay cadatayo amin, casano nga dinanto aya a gapu kencuana ket siwayawaya a mangited cadatayo dagiti amin a banbanag? 33 Siasino ti mangidarumto cadagiti pinili ti Dios? Ti Dios ti mangpalinteg. 34 Siasino ti mangipatay iti dusa? Ni Cristo a natay, wen nangnangrona, ta isu napagungar cadagiti natay, isu nga adda iti macanawan ti Dios, a mangibabaet met cadatayo. 35 Siasino ti mangisinanto cadatayo iti ayat ni Cristo? tinto ladingit, wenno rigat, weno pannacaidadanes, wenno bisin, wenno kinalamolamo, wenno peggad, wenno campilan? 36 Cas adda a naisurat, Gapu kenca mapapataycami iti agmalmalem; maibilangcami a cas cadagiti carcarnero a maipaay iti paguragaan. 37 Saan, no di ket cadagitoy amin a banbanag agballigitayo pay a naan-anay gapu iti daydiay nagayat cadatayo. 38 Ta diac duaduaen, nga uray ni patay, uray ti biag, uray dagiti angel, uray dagiti pagturayan, uray dagiti pannacabalin, uray dagiti banbanag nga agdama, uray dagiti banbanag nga umayto, 39 Uray ti nangato, uray ti nababa, uray aniaman a sabsabali a parsua, didatayto mabalin nga isina iti ayat ti Dios, nga adda ken Cristo Jesus nga Apotayo. CAPITULO 9 1 Saoec ti pudno gapu ken Cristo, diac agulbod, ti concienciac makipagpanecnec caniac babaen ti Espiritu Santo, 2 Nga adda dackel a dadagsen ken ladingit a di agressat itoy pusoc. 3 Ta no mabalin tarigagayac a siac met laeng mailunodac coma a maisina ken Cristo gapu cadagiti cacabsatco, dagiti cacabaggiac no maipapan iti lasag: 4 Isuda dagiti Israelitas; nga agtagicua iti pannacaibilang nga annac, ken ti gloria, ken dagiti tultulag, ken ti pannacaited ti linteg, ken ti panagservi iti Dios, ken dagiti carcari; 5 Isuda a makin-ama cadagiti amma, ket isuda ti nagtaudan ni Cristo no maipapan iti lasag, isu iti amin nga kinaan-anay, Dios bendito nga agnanayon. Amen. 6 Ngem saan a casla awan banagna ti sao ti Dios. Ta saan nga amin a nagtaud iti Israel, ket Israelitasda: 7 Ket saan met, a gapu ta caputotan ida ni Abraham, ket annacna ida amin: ngem, ken Isaac managananto ti caputotam. 8 Cayatna a saoen, Isuda nga annac ti lasag, dagitoy ket saanda nga annac ti Dios: no di ket dagiti annac ti cari isuda dagiti maibilang a caputotan. 9 Ta daytoy ti sao ti cari, Itoy a panawen umayacto, ket ma-addaanto ni Sara ti maysa nga anacna a lalaki. 10 Ket saan laeng a casta; no di ket ni Rebeca nagsicog met, gapu ken ni amatayo nga Isaac; 11 (Ket idi dagiti singin saanda pay a nayanac, ket awan pay ti inaramidda a naimbag wenno dakes, tapno ti panggep ti Dios nga mayannurot iti pannacapili mataginayon coma, saan a gapu cadagiti ar-aramid, no di ket gapu iti nagayab;) 12 Naibaga kencuana, Ti inauna agservinto a maipaay iti inaudi. 13 Cas iti adda a naisurat, ni Jacob inayatco, ngem ni Esau ginurac. 14 Ania ngarud ti saoentayo? Adda aya kinakillo iti biang ti Dios? Ti Dios dina ipalubos. 15 Ta kunana ken Moises, Addanto asic ti siasinoman a cayatco nga caasian, ket caasiacto a si-aayat ti siasinoman a cayatco nga caasian a si-aayat. 16 Iti casta ngarud saan nga aggapu iti mayat, ket saan met nga iti agtaray, no di ket aggapu iti Dios nga adda asina. 17 Ta cuna ti surat a maipapan ken Faraon, Gapu met laeng itoy intan-occa, tapno ipakitac kenca ti pannacabalinco, ken tapno maiwarragawag ti naganco iti amin a daga. 18 Iti casta ngarud manga-asi iti cayatna a caasian, ken iti siasinoman a cayatna patangkenenna. 19 Cunaemto ngarud caniac, Apayapay mangpabasol pay laeng? Ta siasino ti macasupring iti pagayatanna? 20 Ngem saan, O tao, siasinoca a sumungbat ti maibusor iti Dios? Ti naaramid cunaennanto aya iti nangaramid kencuana, Apayapay inaramidnac a castoy? 21 Ti agdamdamili awan aya ti pannacabalinna ti pitac, a mangaramid iti dayta nga pitac ti maysa a damili tapno pacaidayawan, ken ti sabali tapno pacaibainan? 22 Ania ngata no ti Dios, cayatna nga ipakita ti pungtotna, ken ipaca-ammo ti pannacabalinna, ituredna iti adu ken atiddug nga anus dagiti vasijas ti pungtot a maipaay a pacapucawan: 23 Tapno ipaca-ammona met dagiti kinabacnamg ti gloriana cadagiti vasijas ti asi, nga insaganana idi a maipaay iti gloria, 24 Cadatayo, nga inayabanna met, saan laeng a cadagiti Judios, no di ket cadagiti pay Gentiles? 25 Cas kunana pay ni Oseas, Naganecto ida nga ilic, dagiti saanco nga ili idi; ken ay-ayaten, dagiti saan a naay-ayat idi. 26 Ket mapasamacto, nga iti disso a nacaisaoan daytoy, Saan a dacayo ti ilic; idiay met laeng managanandanto annac ti Dios a sibibiag. 27 Ket ni Isaias umawag met a maipapan ken Israel, No ti bilang dagiti annac ti Israel casla coma cadagiti darat ti baybay, adda latta tidda nga maisalacan: 28 Ta tungpalennanto a siinget ti aramidna, ken leppasennanto iti kinalinteg ti apagbiit: gapu ta agaramidto ti apagbiit ti Apo ditoy daga. 29 Cas kinuna ni Isaias idi, No ti Apo dagiti buybuyot dinatayo coma intiddaan ti putot, nagbalintayo coman a cas iti Sodoma, ket pimmadistayo coman iti Gomorra. 30 Ania ngarud ti saoentayo? A dagiti Gentiles, a saan a simmurot iti kinalinteg, nacagun-odda ti kinalinteg, nga isu ti kinalinteg a gapu iti pammati. 31 Ngem ni Israel, a sumursurot gapu iti linteg ti kinalinteg, saanda a nacagteng iti dayta a linteg ti kinalinteg. 32 Ania ti gapuna? Agsipud ta ginun-odda saan a gapu iti pammati, no di ket cas gapu cadagiti ar-aramid ti linteg. Gapuna naitibcolda iti bato a pacaitibcolan; 33 Cas adda a naisurat, Adtoy, isaadco idiay Sion ti maysa a bato a pacaitibcolan ken bato a pacarurodan: ket siasinoman a mamati kencuana saanto a maibabain. CAPITULO 10 1 Cacabsat, ti tarigagay ti pusoc ken ti dawatco iti Dios a maipaay iti Israel, ket tapno maisalacanda coma. 2 Ta panecnecac ida nga adda regtada a maipapan iti Dios, ngem saan a cas mayannurot iti sirib. 3 Ta idinto a dida ammo ti kinalinteg ti Dios, ket idinto nga agawaanda nga isaad ti bucodda a kinalinteg, saanda a nagtulnog iti kinalinteg ti Dios. 4 Ta ni Cristo isu iti panungpalan ti linteg ti kinalinteg ti tunggal maysa a mamati. 5 Ta ni Moises insuratna ti kinalinteg a mayannurot iti linteg, Nga ti tao nga agaramid cadagitoy ket agbiagto gapu kencuana. 6 Ngem ti kinalinteg a mayannurot iti pammati castoy ti kunana, Saanmo a cunaen ita pusom, Siasino ti umulinto sadi langit? (cayatna a saoen, tapno iyulogna ni Cristo sadi langit:) 7 Wenno, Siasino ti umulogto iti yuyeng? (cayatna a saoen, tapno iyulina ni Cristo cadagiti natay.) 8 Ngem ania ti kunana? Ti sao adda iti asideg kenca, iti ngiwatmo, ken iti pusom: cayatna a saoen, ti sao ti pammati, nga icascasabatayo; 9 Agsipud ta no ipudnom babaen ti panagsao a ni Jesus isu ti Apo, ket patiem iti pusom a ti Dios pinagungarna cadagiti natay, maisalacanca. 10 Ta buyugen iti puso no mamati ti tao tapno maipaayan iti kinalinteg; ket iti ngiwat ti pangaramid ti panangipaduyacyac a maipaay iti pannacaisalacan. 11 Ta cuna ti Surat, Isuamin a mamatinto kencuana ket saanto a mabain. 12 Ta awan ti pagdumaan ti Judio ken Griego: ta maymaysa met laeng ti Apo dagiti isuamin ket naparabur cadagiti isuamin nga umawag kencuana. 13 Ta siasinoman nga umawag iti nagan ti Apo ket maisalacanto. 14 Casanonto ngarud ti panangawagda iti daydiay dida pinati? ket casano ti panamatidanto iti daydiay dida nangnangngeg? ket casanonto ti pannacangngegda no awan ti mangascasaba? 15 Ket casano ti panangascasabadanto, no saanda a naibaon? cas adda a naisurat, Nagimnas ketdin dagiti sacsaca dagiti mangascasaba ti evangelio iti talna, ken mangyeg cadagiti naragsac a damdamag dagiti naimbag a banbanag! 16 Ngem saanda amin nga impangag ti evangelio. Ta cuna ni Isaias, Apo, siasino ti namati iti impadamagmi? 17 Iti casta ti pammati ket agtaud iti panagdengngeg, ken panagdengngeg babaen iti sao ti Dios. 18 Ngem kunak, Dida aya nagdengngeg? Wen kinapudnoanna, ta ti awengda nagsacnap iti amin a daga, ken dagiti sasaoda ket aginggana cadagiti pungpungto ti lubong. 19 Ngem kunak, Saan aya a naawatan ti Israel idi? Umuna cuna ni Moises, Siac pagimunencayto gapu iti saanco nga ili, gapu iti maysa a nacion a nanengneng pagpungtotencayto. 20 Ket ni Isaias sibibileg unay, ket kunana, Nasaracandac dagiti saan a nagsapul caniac; Naiparangarangnac cadagiti saan a nagsaludsod caniac. 21 Ngem no maipapan iti Israel kunana, Nagmalmalemac a nangigaygay-at cadagiti im-imac iti maysa a nasukir ken nasubeng nga tattao. CAPITULO 11 1 Kunak ngarud, Imbelleng aya ti Dios dagiti tattaona? Ti Dios dina ipalubos. Ta siac ket Israelitaac met, a capuonan ni Abraham, iti tribu ni Benjamin. 2 Saan nga inbelleng ti Dios dagiti tattaona a sigud a naammoanna idi. Saanmo nga ammo aya ti cuna ti surat a maipapan ken Elias? no casano ti panagasugna iti Dios a maicaniwas iti Israel, a kunana, 3 Apo, pinataydan dagiti mammadtom, ket dinupracdan dagiti al-altarmo; ket sisiac laengen iti nabati, ken sapsapulenda toy biagco. 4 Ngem ania iti cuna ti Dios a sungbat kencuana? Intiddac a maipaay caniac dagiti pito ribo a lallaki, nga saanda a nagparintumeng iti sangoanan ti ladawan ni Baal. 5 Casta met ngarud ita a pannawen ket adda natidda a cas iti pannacapili gapu iti parabur. 6 Ket no gapu iti parabur, saanen a gapu cadagiti ar-aramid: ta no saan ti parabur ket saanen nga parabur. Ngem no gapu cadagiti ar-aramid, saanen a gapu iti parabur: ta no saan ti aramid ket saanen nga aramid. 7 Ania ngarud? Ni Israel saanna a nagun-odan ti sapsapulenna; ngem dagiti napili nagun-odda, ket dagiti nabati nabulsecanda 8 (Cas iti naisurat, Iniccan ida ti Dios ti espiritu ti talimpungaw, matmata tapno dida macakita, ken laplapayag a dida macangngeg;) agingga ita nga aldaw. 9 Ket cuna ni David, Ti lamisaanda agbalin coma cadacuada nga maysa a silo, ken maysa a palab-og, ken maysa a pacaitibcolan, ken maysa a supapac cadacuada: 10 Agcudrep coma dagiti matmatada, tapno dida macakita, ken agnanayon coma a pagrucobem dagiti bucotda. 11 Kunak ngarud, Naitibcolda aya tapno madadaelda? Ti Dios dina ipalubos: no saan ket a gapu iti pannacaitibcolda immay ti pannacaisalacan cadagiti Gentiles, tapno umay coma ti panagimunda. 12 Ket no ti pannacatnagda isu ti pannacapabacnang ti lubong, ken no ti pannacapabassitda isu ti pannacapabacnang dagiti Gentiles; dinto nangnangrona pay iti pannacapunnoda? 13 Ngem casaocayo a Gentiles, gapu ta siac apostolac cadagiti Gentiles, idayawco ti kinaministroc: 14 Bareng no mabalinco a gargarien iti panagimun dagiti cacabaggiac, ken isalacan dagiti dadduma cadacuada. 15 Ta no iti pannacapagtalawda isu ti pannakicappia ti lubong, anianto la ketdin iti pannacaawatda, no di biag cadagiti natay? 16 Ket no ti umuna a bunga ket nasantoan, casta met nasantoan ti nacaalaanna: ket no nasantoan ti ramut, casta met dagiti sangsanga. 17 Ngem no dagiti dadduma a sangsanga nasip-acda, ket sica, idinto a maysaca nga olivo nga atap, a naisulbongca iti puonda, ket makipagtaraonca cadacuada iti ramut ken kinalucmeg ti puon ti olivo; 18 Dica tumangsit a maibusor cadagiti sangsanga. Ngem no tumangsitca, saan a sica ti mangtaraon iti ramut, no di ket ti ramut ti mangtaraon kenca. 19 Cunaemto ngarud, Dagiti sangsanga ket nasip-acda, tapno maisulbongac. 20 Nasayaat; gapu iti awan pammati nasip-acda, ket gapu iti pammatim agtaengca. Dica agtangsit, no di ket agbutengca: 21 Ta no ti Dios saanna a pinacawan dagiti naparsua a sangsanga, agalluadca saannacanto met a pacawanen. 22 Kitaem ngarud ti kinaimbag ken kinainget ti Dios: cadagiti naiculbo, kinainget; ngem kenca, kinaimbag, no agtalinaedca iti kinaimbagna: ket no saan maputedcanto met. 23 Ket isuda met, no saanda nga agtalinaed iti kinaawan pammati, maisulbongdanto: ta ti Dios adda pannacabalinna a mangisulbong manen cadacuada. 23 Ket isuda met, no saanda nga agtalinaed iti kinaawan pammati, maisulbongdanto: ta ti Dios adda pannacabalinna a mangisulbong manen cadacuada. 25 Ta diac cayat, cacabsat, a dicayo ma-ammoan daytoy a palimed, tapno dicayo aginsisirib iti kinatangsit; a ti pannacabulsec ti maysa a paset na-aramid ken Israel, agingga iti macastrec a naan-anay dagiti Gentiles. 26 Ket iti casta isuamin nga Israel maisalacanto: a cas iti naisurat, Aggapunto idiay Sion ti Mangwayawaya, ket iyadayonanto ken Jacob dagiti kinadakes: 27 Ket daytoy ti tulagco cadacuada, inton iccatec dagiti basbasolda. 28 No maipapan iti evangelio, cabusorda gapu cadacayo: ngem no maipapan iti pannacapili, maay-ayatda unay maigapu cadagiti am-amma. 29 Ta dagiti sagsagut ken panagawis ti Dios ket awan ti babawina. 30 Ta cas cadacayo idi napalabas nga aldaw dicayo namati idi iti Dios, ngem ita nacagun-odcayo iti asi gapu iti dida panamati: 31 Casta met dagitoy ita ket dida namati, tapno gapu iti caasi a naited cadacayo macagun-odda met coma iti caasi. 32 Ta ti Dios imbilangna amin ida nga awan panamatida, tapno mangnga-asi coma cadagiti isuamin. 33 O nagunegen dagiti kinabacnang ti sirib ken ti pannaca-ammo ti Dios! ania ketdin ti saan a pannacatucod cadagiti pakinakemna, ken ti saan a pannacasukimat cadagiti cadawyanna! 34 Ta siasino ti nacaammo iti panunot ti Apo? wenno siasino ti nangbalbalacad kencuana? 35 Wenno siasino ti immun-una a nangted kencuana, tapno masupapacan coma manen isuna? 36 Ta kencuana, ken gapu kencuana, ken agpaay kencuana, dagiti isuamin nga banbanag: isu maitantan-oc coma iti agnanayon nga awan patinggana. Amen. CAPITULO 12 1 Dawatec ngarud cadacayo, cacabsat, gapu cadagiti caasi ti Dios, nga ipaayyo dagiti bagbagiyo nga daton a sibibiag, nasantoan, ananamungan iti Dios, isu nga maiparbeng nga incayo panagserservi. 2 Ket dicayo umabuloy itoy a lubong: no di ket agbalbaliwcayo gapu iti pannacapabpabaro iti isipyo, tapno mapanecnecanyo no ania iti nasayaat, ken ananamungan, ken naan-anay, nga pagayatan iti Dios. 3 Ta kunak, gapu iti parabur a naited caniac, iti tunggal maysa cadacayo, a dina coma ipappapan ti bagina a nangatngato unay ngem iti rebbengna a panangipapan; no di ket agpanunot a sipaparbeng, cas iti rucod ti pammati nga ited ti Dios iti tunggal maysa. 4 Ta adu iti camcamengtayo a maymaysa a bagi, ket ti amin a cameng saan nga agpapada ti pacaaramatanda: 5 Iti casta datayo, idinto nga adutayo, maymaysatayo a bagi ken Cristo, ket makipagcamcameng iti maysa ken maysa cadatayo. 6 Ket idinto nga addaantayo cadagiti sagsagut nga agduduma nga cas iti parabur a naited cadatayo, no pammadto, agipadtotayo coma cas iti rucod ti pammatitayo: 7 No kinaministro, ipaaytayo dagiti bagbagitayo nga agministro: no manangisuro, iti panangisuro coma; 8 No manamagbaga, mamagbaga coma: ti mangted, aramidenna coma iti naparabur a nakem; ti agturay, mangituray coma a sireregta; ti mangnga-asi, aramidenna coma a sirarag-o. 9 Ti ayat awan coma iti ulbodna. Guraenyo iti dakes; salimetmetanyo ti naimbag. 10 Agdidinnungocayo coma iti tunggal maysa iti ayat nga naincacabsatan; no iti panagpipinnadayaw ket ipangpangronayo ti sabali; 11 Saan coma a mapucaw iti regtayo; nasgedcayo iti espiritu, nga agserservi iti Apo; 12 Naragsac iti pananginanama; managitured iti rigat; managtalinaed iti panagcararag; 13 Makitulong cadagiti pacasapsapulan dagiti sasanto; naayat iti panagpadagus. 14 Bendisyonanyo dagiti manangidadanes cadacayo: bendisyonanyo, ket dicayo agilunod. 15 Makipagrag-ocayo cadagiti agrag-o, ken makipagsangitcayo cadagiti agsangit. 16 Agmaymaysa coma dagiti nakemyo. Dicayo agpanunot cadagiti napasindayag a banbanag, no di ket umabuloycayo cadagiti banbanag a napacumbaba. Saancayo coma a mamasirib iti imatangyo met laeng. 17 Saanyo nga ibales iti uray siasino ti dakes iti dakes. Aramidenyo dagiti banbanag nga nadayaw iti imatang dagiti amin a tattao. 18 No mabalin coma, a cas iti cabaelanyo, agbiagcayo a makicappia cadagiti isuamin a tattao. 19 Napateg nga ay-ayatec, saancayo a bumalbales, no di ket bay-anyo laeng iti pungtot: ta adda a naisurat, Cuac ti pammales; siac supapacacto, cuna ti Apo. 20 Ngem no ti cabusormo ket mabisin, taraonam; no mawaw, painumen: ta itinto panangaramidmo iti casta ket agurnongcanto cadagiti begbeggang ti apuy iti rabaw ti ulona. 21 Saanca coma nga paabac iti dakes, no di ket abakem ti dakes gapu iti naimbag, CAPITULO 13 1 Paiturayan coma ti amin a tao cadagiti turturay a nangangato. Ta awan iti turay nga saan nga agtaud iti Dios: no di ket dagiti pagturayan binangon ida ti Dios. 2 Ti sumukir ngarud iti turay, sumukir iti linteg ti Dios: ket dagiti sumukir awatendanto iti bucodda nga pannacadusa. 3 Ta dagiti agturay ket saan a pagbutngan ti aramid a naimbag, no saan ket a ti dakes. Saanca coma ngarud nga agbuteng iti turay? aramidem ti naimbag, ket addanto pacaidayawam kencuana: 4 Ta isu ti ministro ti Dios a maipaay iti pagimbagam. Ngem no aramidem ti dakes, agbutengca; ta saan a barengbareng ti panagtagicampilanna: ta isu ti ministro ti Dios, a mangibales ti pungtot a maipaay iti agaramid iti dakes. 5 Gapuna masapul a paiturayancayo, saan laeng a gapu ti pungtot, no di ket gapu pay iti naimbag a nakem. 6 Ta gapu itoy bayadanyo met dagiti buis: ta isuda dagiti ministro nga agservi iti Dios, a cancanayon a sangoenda daytoy met laeng a banag. 7 Agbayadcayo ngarud cadagiti isuamin a rebbengyo: buis iti pacautangan ti buis; impuesto iti impuesto; buteng iti buteng; dayaw iti dayaw. 8 Awan coma ti utangyo iti uray siasino, no di laeng ti panagayan-ayatyo ti maysa ken maysa: ta ti agayat iti padana a tao ket natungpalnan ti linteg. 9 Ta daytoy, Dica makicamalala, Dica mamapatay, Dica agtacaw, Dica agulbod a pammanecnec, Dica agagum; ken uray no adda pay sabali a bilin, maipucpoc itoy a sao, nga isu daytoy, Ayatem ti caarrobam a cas ti bagim met laeng. 10 Ti ayat saan nga agaramid ti dakes iti caarrobana: gapuna ti ayat ket isu ti pacatungpalan ti linteg. 11 Ket daytoy, idinto nga ammotayo ti pannawen, nga itan ti umnas nga horas a panagriingtayon iti turog: ta ita ti pannacaisalacantayo ket as-asidegen ngem idi damo a namatitayo. 11 Ket daytoy, idinto nga ammotayo ti pannawen, nga itan ti umnas nga horas a panagriingtayon iti turog: ta ita ti pannacaisalacantayo ket as-asidegen ngem idi damo a namatitayo. 13 Magnatayo a sipupudno, a cas iti aldaw; saan a cadagiti ragragsac a nalabes ken barbartec, saan nga iti kinaderrep ken cadagiti kinadakes, saan a cadagiti ringringgor ken ap-apal. 14 No di ket icawesyo ni Apo Jesus Cristo, ket dicayo agsagana a maipaay iti linalasag. tapno matungpal ti derrepna. CAPITULO 14 1 Awatenyo ti nacapuy iti pammati, ngem saan a casuppiat cadagiti panpanunot a pagduaduaan. 2 Ta adda mamati a mabalinna a canen ti isuamin; ti sabali, nga isu ti nacapuy, mangan laeng ti natnateng. 3 Ti mangan saanna coma nga umsien ti saan a mangan; ket ti saan a mangan dina met coma babalawen ti mangan: ta isu inawat ti Dios. 4 Siasinoca a mangbabalaw iti adipen ti sabali? iti imatang ni apona adda a sitatacder wenno maitublac. Wen, matengngelto a sititibker: ta ti Apo mabalinanna ti mangtengngel kencuana a sititibker. 5 Maysa a tao patgenna ti maysa nga aldaw a nangnangrona ngem iti sabali: ti sabali ipategna a padapada dagiti isuamin nga aldaw. Tunggal maysa sipepennec coma iti panunotna met laeng. 6 Ti mangipateg iti aldaw, ipategna a maipaay iti Apo; ket ti saan a mangipateg iti aldaw, saanna nga ipateg a maipaay iti Apo. Ti mangan, mangan a maipaay iti Apo, ta agyaman iti Dios; ket ti saan a mangan, saan a mangan a maipaay iti Apo, ken agyaman iti Dios. 7 Ta awan cadatayo ti agbiag a maipaay kencuana laeng, ken awan met ti matay a maipaay kencuana laeng. 8 Ta uray agbiagtayo, agbiagtayo a maipaay iti Apo; ket uray mataytayo, mataytayo a maipaay iti Apo: uray ngarud no agbiagtayo, uray mataytayo, cucuanatayo ti Apo. 9 Ta gapu itoy nga panggep ni Cristo natay, ken nagungar, ket nagbiag manen, tapno isu coma ti Apo dagiti natay ken dagiti nabiag. 10 Ngem sica apayapay babalawem ni cabsatmo? ket sica apayapay umsiem ni cabsatmo? ta agparangtayto amin iti saclang ti tugaw iti pangocoman ni Cristo. 11 Ta adda a naisurat, Agsipud ta siac agbiagac, cuna ti Apo, agparintumengto ti amin a tumeng caniac, ket amin a dila agipudnonto iti Dios. 12 Iti casta tunggal maysa cadatayo idatagnanto iti Dios ti kinaisuna met laeng. 13 Ditayo ngarud agi-innocomen iti maysa ken maysa: no di ket ikeddengyo coma a nangnangrona daytoy, nga awan coma ti tao a mangicabil iti pacaitibcolan wenno pasamac a pacaiculboan iti dalan ti maysa a cabsat. 14 Ammoc, ket capcapnecac ken Apo Jesus, nga awan ti adda a casisigudna a narugit: ngem ti mangipapan nga adda aniaman a narugit, kencuana narugit. 15 Ta no ni cabsatmo ket agliday gapu iti taraonmo, itan saancan a magmagnan iti panagayat. Saanmo a dadaelen ni cabsatmo gapu iti taraonmo, nga isu ti nacaigappuan ni Cristo a natay. 16 Saanyo nga ipalubos dagiti kinaimbagyo nga pagsaoanda ti dakes: 17 Ta ti pagarian ti Dios ket saan nga isu ti pannangan ken panaginum; no di ket kinalinteg, ken talna, ken rag-o iti Espiritu Santo. 18 Ta ti agservi a cas itoy ken Cristo ket macaay-ayo iti Dios, ken anamungan dagiti tattao. 19 Iti casta ngarud surutentayo dagiti banbanag nga agpataud ti talna, ken dagiti banbanag a macapatibker iti maysa ken maysa. 20 Ta saan a gapu ti taraon maracrac ti aramid ti Dios. Dagiti isuamin a banbanag nadalusda a pudno; nupay casta dakes iti tao a mangan a mangted ti pacaitibcolan. 21 Nasayaat ti saan a mangan ti lasag, ken saan nga uminum ti arac, wenno agaramid iti aniaman a pacaitibcolan ti cabsatmo, wenno iti pannacaupayna, wenno iti pacapacapsutanna. 22 Adda pammati kenca? salimetmetam a maipaay iti imatang ti Dios. Bendito daydiay saan a mangpabasol ti bagina met laeng gapu iti ananamunganna. 23 Ngem ti adda duaduana no mangan macabasol, ta salungasingenna ti pammatina: ta isuamin a saan a mayannurot iti pammati isu ti basol. CAPITULO 15 1 Datayo ngarud a nabileg rebbengtayo nga awiten dagiti kinacapuy dagiti nacapuy, ken ditayo ay-aywen ti bagitayo met laeng. 2 Tunggal maysa cadatayo ay-aywenna coma ti padana a tao a maipaay iti pannacapatibkerna. 3 Ta uray ni Cristo saanna nga inay-ayo ti bagina; no di ket, cas iti naisurat, Dagiti panangum-umsi dagiti nangum-umsi kenca nagtinnagda caniac. 4 Ta dagup dagiti immun-una a naisuraten naisuratdan tapno pacasursuroantayo, tapno gapu iti anus ken iti liwliwa dagiti sursurat maaddaantayo coma ti inanama. 5 Ita ti Dios iti anus ken saranay ipaayna coma cadacayo nga agmaymaysacayo coma iti nakem a mayannurot ken Cristo Jesus: 6 Tapno iti maymaysa a timpuyog ken maymaysa a timec ipadayagyo ti Dios, uray pay ti Ama ni Apotayo a Jesus Cristo. 7 Gapuna aggi-innawatcayo iti maysa ken maysa, a cas met ni Cristo inawatnacayo tapno pacaidayagan ti Dios. 8 Ita kunak a ni Jesus Cristo naaramid a ministro iti pannacacugit a maipaay iti kinapudno ti Dios, tapno panecnecanna dagiti carcari a naited cadagiti amma: 9 Ken tapno dagiti Gentiles ket itan-ocda coma ti Dios gapu iti asina; cas iti naisurat, Gapuna ipanecneccanto cadagiti Gentiles, ket icancantaacto ti maipaay iti naganmo. 10 Ken saoenna manen, Agragsaccayo, dacayo Gentiles, ken iti ilina. 11 Ket manen, Dayawenyo ti Apo, dacayo amin a Gentiles; ket isu ti itantan-ocyo, dacayo amin nga il-ili. 12 Ket manen, cuna ni Isaias, Addanto ti ramut ni Jesse, ken daydiay bumangonto a mangituray cadagiti Gentiles; kencuana dagiti Gentiles mangnamnamanto. 13 Ita ti Dios ti inanama punnoennacayo iti amin a ragsac ken cappia iti panamati, tapno umadu ti inanamayo, gapu iti pannacabalin ti Espiritu Santo. 14 Ket siac met laeng capnecac ti maipapan cadacayo, cacabsatco, nga addacayo met a sipupunno iti imbag, a napno iti amin a pannacaammo, a mabalinyo met ti agbibinnalacad iti maysa ken maysa. 15 Numan pay casta, cacabsat, nagsuratac cadacayo iti ad-adda a kinatured, a cas mangipalagip cadacayo, gapu iti parabur a naited caniac iti biang ti Dios, 16 Tapno agbalinac coma a ministro ni Jesus Cristo cadagiti Gentiles, nga iracurac ti evangelio iti Dios, tapno ti daton dagiti Gentiles agbalin coma a macaay-ayo, idinto a mapasanto gapu iti Espiritu Santo. 17 Siac ngarud ket adda pannacaidayawco ken Jesus 18 Ta diac maitured ti agsao iti aniaman no di maipapan cadagiti inaramid ni Cristo caniac, a maipaay iti panagtulnog dagiti Gentiles, babaen ti sao ken aramid. 19 Iti pannacabalin dagiti pagilasinan ken datdatlag, ken gapu iti pannacabalin ti Espiritu ti Dios; nga iti casta nanipud Jerusalem, ken isuamin nga cabangibang agingga iti Ilirico, incasabac a naan-anay ti evangelio ni Cristo. 20 Wen, inagawa-ac nga incascasaba ti evangelio, cadagiti disdisso a saanda pay a naammoan ti nagan ni Cristo, tapno diac mangbangon iti rabaw ti pamunganayan ti sabali a tao: 21 Ngem cas iti naisurat, Dagidiay saan a nacadamag kencuana, makitadanto: ket dagiti saan a nacangeg maawatandanto. 22 Gapuna itoy nalappedanac unay nga umay cadacayo. 23 Ngem ita ta awanen ti lugarco cadagitoy a disdisso, ket agsipud ta nabayag a tawtawenen nga adda nasged a tarigagayco nga umay cumita cadacayo; 24 Ket inton mapanac idiay España, umayacto cadacayo: namnamaec nga makitacayto iti ilalabasco, ken cuyugendacto iti dalanco manipud dita, intono calpasan ti pannacapnecco a makicadcaddua cadacayo. 25 Ngem ita agluasac a mapan idiay Jerusalem tapno mapanac agservi a maipaay cadagiti sasanto. 26 Ta nacaay-ayo cadagiti taga Macedonia ken Acaya iti panagurnongda iti pirac a pagtutulongan a maipaay cadagiti napanglaw a sasanto nga adda idiay Jerusalem. 27 Naay-ayoda unay iti daytoy; ket isuda macautangda cadacuada. Ta no dagiti Gentiles nairamanda cadagiti banbanagda a naespirituan, utangda met a pagservian ida cadagiti banbanag a maipapan iti bagi. 28 Ngarud intono matungpalco daytoy, ket mayawatcon cadacuada daytoy a bunga, dumagasacto cadacayo a mapan sadi Espana. 29 Ket ammoc nga, inton macaumayac cadacayo, umayacto babaen ti pannacapunno iti bendicion ti evangelio ni Cristo. 30 Ita dawatec cadacayo, cacabsat, maigapu ken Apotayo a Jesus Cristo, ken iti ayat ti Espiritu, nga bumuyogcayo caniac cadagiti nasged a panagcararag iti Dios a maipaay caniac: 31 Tapno maisalacanac cadagiti saan nga mamati nga adda idiay Judea; ken tapno ti panagservic a maipaay idiay Jerusalem ket patgen coma dagiti sasanto; 32 Tapno umayac coma a siraragsac cadacayo gapu iti pagayatan ti Dios, ket masaracac ti kinabang-ar iti dennayo. 33 Ket ita ti Dios ti cappia adda coma cadacayo amin. Amen. CAPITULO 16 1 Italecco cadacayo ni Febe cabsattayo a babai, isu nga adipen iti iglesia idiay Cencreas: 2 Tapno isu awatenyo iti Apo, cas maicari cadacayo a sasanto, ket isu tulonganyo iti uray ania a banag a pacasapulanna cadacayo: ta isu timmultulong met cadagiti adu, ken casta met caniac. 3 Cablaawanyo ni Priscila ken ni Aquila dagiti catulongac ken Cristo Jesus: 4 Isuda a nangipeggad cadagiti tengngedda gapu itoy biagco: ket saan laeng a siac ti agyaman cadacuada, no di ket isuamin pay dagiti iglesias cadagiti Gentil. 5 Ken cablaawanyo pay ti iglesia nga adda iti balayda. Cablaawanyo ni Epeneto a dungdungoec, nga isu ti umuna a bunga ti Acaya a maipaay ken Cristo. 6 Cablaawanyo ni Maria, isu nga nagbannog iti adu a naipaay cadacami. 7 Cablaawanyo ni Andronico ken ni Junia, dagiti cacabaggiac, ken cadcadduac a balud, nga isuda ti naidamdamag cadagiti apostol, ket immun-unada nga adda ken Cristo ngem siac. 8 Cablaawanyo ni Amplias a dungdungoec iti Apo. 9 Cablaawanyo ni Urbano, a catulongtayo ken Cristo, ken ni Stachis nga ay-ayatec unay. 10 Salute Apelles approved in Christ. Salute them which are of Aristobulus' household. 12 Cablaawanyo da Trifena ken Trifosa, isuda nga agbanbannog gapu iti Apo. Cablaawanyo ni Persida nga ay-ayaten unay, nga nagbannog ti adu iti Apo. 13 Cablaawanyo ni Rufo a napili iti Apo, ken ni inana ken siac. 14 Cablaawanyo ni Asincrito, ken ni Flegonte, ken Hermas, ken ni Patrobas, ken ni Hernes, ken dagiti cacabsat nga addada a naicuyog cadacuada. 15 Cablaawanyo ni Filologo, ken ni Julia, Nereo, ken ni cabsatna a babai, ken ni Olimpas, ken dagiti isuamin a sasanto nga addada a naicuyog cadacuada. 16 Agkikinnablaawcayo iti maysa ken maysa iti nasantoan nga agep. Dagiti iglesias ni Cristo cablaawandacayo. 17 Ita dawatec cadacayo, cacabsat, a kitaenyo dagiti adda a mangpataud cadagiti panagsisina ken pacaitibcolan a maisalungasingda iti sursuro nga inadalyo; ket umadayucayo cadacuada. 18 Ta dagita ket saanda nga agserservi ken Apotayo a Jesus Cristo, no di ket cadagiti titianda laeng; ket gapu cadagiti nasayaat ken nalamuyot a panagipalpalawag allilawenda dagiti puspuso dagiti nanengneng. 19 Ta ti kinatulnogyo ket nadamagen dagiti isuamin. Agay-ayatac ngarud gapu cadacayo: ngem tarigagayac a mamasiribcayo coma no maipapan iti naimbag, ket nanengneng no maipapan iti dakes. 20 Ket ti Dios iti cappia dunorennanto iti mabiit ni Satanas iti babaen dagiti sacsacayo. Ti parabur ni Apotayo a Jesus Cristo adda coma cadacayo. Amen. 21 Ni Timoteo a catulongac, ken ni Lucio, ni Jason, ken ni Sosipater, a cacabaggiac, cablaawandacayo. 22 Siac ni Tercio, nga nagsurat itoy a surat, cablaawancayo iti Apo. 23 Ni Gayo a nagdagusac, ken ti amin nga iglesia, cablaawandacayo. Ni Erasto a tesorero ti ili cablaawannacayo, ken ni Quartus a cabsat. 24 Ti parabur ni Apotayo a Jesus Cristo adda coma cadacayo amin. Amen. 25 Ita iti dayta macabalin a mangaramid cadacayo a mamagtalinaed cas iti evangelioc, ken ti pannacaicascasaba ni Jesus Cristo, cas mayannurot iti pannacayammo ti palimed, a nailemmeng manipud pay idi nangrugi ti lubong, 26 Ngem ita maiparangarang, ken gapu cadagiti sursurat dagiti mammadto, cas iti panagbilin ti agnanayon a Dios, impacaammona cadagiti isuamin a nasnacion a maipaay ti pannacapatulnog iti pammati: 27 Iti maymaysa nga masirib a Dios, maited coma ti gloria gapu ken Jesus Cristo iti agnanayon nga awan patinggana. Amen. ¶Naisurat idiay Corinthus nga agpaay cadagiti taga Roma, ken impaitulod ni Phebe adipen ti iglesia idiay Cenchrea.