TI APOCALIPSIS NI SN. JUAN TI NADIOSAN CAPITULO 1 1 Ti Paltiing ni Jesus Cristo, nga inted ti Dios kencuana, tapno ipacaammona cadagiti ad-adipenna dagiti banbanag a maaramidto iti mabiit; ket intedna ken pinaibagana iti angelna ken ni adipenna nga Juan: 2 Isu a namanecnec iti sao ti Dios, ken iti pammanecnec ni Jesus Cristo, cas cadagiti isuamin a nakitana. 3 Bendito ti bumasa, ken dagiti agdengngeg cadagiti sasao daytoy a padto, ket salimetmetanda dagiti banbanag a naisurat kencuana: ta iti panawen adtoyen. 4 Ni Juan isuratna cadagiti pito nga iglesia nga adda iti Asia: Parabur cadacayo, ken talna, nga aggapu iti daydiay nga adda ita, ket adda idi, ken umayto; ken aggapu cadagiti pito nga Espiritu nga adda iti sangoanan iti tronona; 5 Ken aggapu ken Jesus Cristo, ti matalec a mamanecnec, ken ti inauna nga anac cadagiti natay, ken ti principe cadagiti ar-ari ditoy daga. Iti daydiay nangayat cadatayo, ken nangugas cadatayo cadagiti basbasoltayo babaen iti darana met laeng, 6 Ket pinagbalinnatayo nga ar-ari ken papadi a maipaay iti Dios ken Amana; adda coma kencuana ti dayag ken ti panagturay iti agnanayon nga awan inggana. Amen. 7 Adtoy, isu umay a buyogen dagiti ul-ulep; ket isuamin a matmata makitadanto, ken casta met dagidi nangduyoc kencuana: ket dagiti isuamin a capcaputotan ditoy daga ket agdung-awdanto gapu kencuana. Casta coma, Amen. 8 Siac ti Alfa ken ti Omega, ti pangruggianan ken ti panungpalan, cuna iti Apo, ti adda ita, ken ti adda idi, ken ti umayto, ti Mannacabalin-amin. 9 Siac ni Juan, a maysa met a cabsatyo, ken makipaglac-am cadacayo iti rigat, ken iti pagarian ken iti kinaanus ni Jesus Cristo, addaac idi idiay puro a managan Patmos, maipuon iti sao ti Dios, ken iti pammanecnec ken Jesus Cristo. 10 Siac addaac idi iti Espiritu iti aldaw ti Apo, ket nangngegco iti licudac ti maysa nga dackel a timec, a casla iti uni ti tangguyob, 11 A kunkunana, Siac ti Alfa ken ti Omega, ti umuna ken ti camaudianan: ken, Ti makitam, isuratmo iti maysa a pagbasaan, ket ipatulodmo cadagiti pito nga iglesia nga adda iti Asia; idiay Efeso, ken idiay Smirna, ken idiay Pergamo, ken idiay Tiatira, ken idiay Sardis, ken idiay Filadelfia, ken idiay Laodicea. 12 Ket timmaliawac tapno kitaec daydi timec a makisasao caniac. Ket idinto a nagpusipusac, nakitac dagiti pito a nabalitocan a pagsilawan; 13 Ket iti tengnga dagiti pito a pagsilawan nakitac ti maysa nga umasping iti maysa nga Anac ti tao, a nagcawes iti pagan-anay a macagteng agingga iti saca, ket nalicmut iti barucong ti maysa a barikes nga nabalitocan. 14 Ket ti ulona ken boboocna napudawda a casla iti dutdot ti carnero a puraw, napudaw a casla nieve; ket dagiti matana casda la darang iti apuy; 15 Ket dagiti sacsacana umaspingda iti napasileng a bronce, a casla nagugoran iti apuy ti pagpandayan; ket ti timecna casla daranudor dagiti adu a dandanum. 16 Ket iti macanawan nga imana nagiggem cadagiti pito nga bituen: ket iti ngiwatna rimmuar ti maysa a campilan a dua iti tademna: ket daydi rupana casla panaglawag ti init no caraniagna. 17 Ket idi nakitac isuna, napasagac cadagiti sacsacana a casla natay. Ket impatayna daydi macanawan nga imana caniac, a kinunana, Dica agbuteng; siac ti umuna ken ti camaudianan: 18 Siac daydi sibibiag, ket natayac idi; ket, adtoy, sibibiagac iti agnanayon nga awan inggana, Amen; ket adda caniac dagiti tultulbec ti impierno ken ti patay. 19 Isuratmo ngarud dagiti banbanag a nakitam, ken dagiti banbanag nga adda ita, ken dagiti banbanag a mapasamacto calpasan dagitoy; 20 Ti palimed dagiti pito nga bituen a nakitam iti macanawanco, ken dagiti pito nga nabalitocan a pagsilawan. Dagiti pito nga bituen isuda dagiti angel cadagiti pito nga iglesia: ket dagiti pito nga pagsilawan nga nakitam isuda dagiti pito nga iglesia. CAPITULO 2 1 Iti angel ti iglesia sadi Efeso isuratmo; Dagitoy a banbanag cuna ti agig-iggem cadagiti pito nga bituen iti macanawanna, ken magmagna iti tengnga dagiti pito nga nabalitocan a pagsilawan; 2 Siac ammoc dagiti aramidmo, ken ti panagbannogmo, ken ti anusmo, ken ti dica pannacaibtur cadagiti dakes a tattao: ket sinuutmo dagiti mangnagnagan cadagiti bagbagida nga apostol, ket saanda met, ket nasaracam ida a naulbod: 3 Ket naganusca, ken nagituredca, gapu iti naganco nagtrabahoca, ket saanca a nagcapsut. 4 Ngem adda bassit a busorec kenca, ta pinanawam daydi immuna nga ayatmo. 5 Lagipem ngarud no sadino ti nacatnagam, ket agbabawica, ket aramidem dagidi immuna nga aramidmo; ta no saan ket umayacto kenca iti madaras, ket iccatecto ti pagsilawam iti ayanna, malacsid no agbabawica. 6 Ngem adda kenca daytoy, a guraem dagiti ar-aramid dagiti Nicolaitas, isuda a cagurac met. 7 Ti adda pagdengngegna, denggenna coma ti cuna ti Espiritu cadagiti iglesias; Daydiay agballigi isu ti itdecto a mangan iti cayo ti biag, nga adda iti tengnga ti paraiso ti Dios. 8 Ket iti angel ti iglesia ti Smirna isuratmo; Dagitoy a banbanag cuna ti umuna ken ti camaudianan, daydi natay, ket nagbiag manen; 9 Siac ammoc dagiti ar-aramidmo, ken ti rigatmo, ken ti kinapanglawmo, (ngem nabacnangca) ket ammoc ti kinatabbaaw dagiti agcuna a Judioda, ngem saan met, no di ket isuda dagiti sinagoga ni Satanas. 10 Dica cabuteng dagiti banbanag nga inca sagabaen: adtoy, ti diablo ket ipisocnanto iti pagbaludan dagiti dadduma cadacayo, tapno masuutcayo; ket addanto rigatyo bayat ti sangapulo nga aldaw: agtalgedca agingga ken patay, ket itdecto kenca ti balangat ti biag. 11 Ti adda pagdengngegna, denggenna coma ti cuna ti Espiritu cadagiti iglesias; Ti agballiginto ket saanto a maranggasan iti maicaddua nga ipapatay. 12 Ket iti angel ti iglesia sadi Pergamo isuratmo; Dagitoy a banbanag cuna ti agig-iggem iti natadem a campilan nga dua ti tademna; 13 Siac ammoc dagiti aramidmo, no sadino ti pagnaedam, uray pay iti ayan ti trono ni Satanas: ket taginayonem ti naganco, ket saanmo a naglicudan ti pammatic, uray cadagidi aldaw ni Antipas daydi matalec a sacsic, isu a napapatay iti tengngayo, a pagnanaedan ni Satanas. 14 Ngem adda sumagmamano nga banag a busorec kenca, agsipud ta pagnaedem dita dagiti mangsalimetmet iti sursuro ni Balaam, isu a nangisuro ken Balac a mangicabil iti pacaitibcolan iti sangoanan dagiti annac ti Israel, a manganda iti maidaton cadagiti didiosen, ken makicamalalada. 15 Cas ti caadda met kenca dagiti dadduma a mangsalimetmet iti sursuro dagiti Nicolaitas, nga banag a cagurac. 16 Agbabawica; ta no saan umayacto kenca iti madaras, ket gubatecto ida iti campilan iti ngiwatco. 17 Ti adda pagdengngegna, denggenna coma ti cuna ti Espiritu cadagiti iglesias; Daydiay agballigi isu ti pangtedacto a mangan iti nailemmeng a mana, ket itdecto kencuana ti maysa a puraw nga bato, ket naisurat iti bato ti maysa a nagan a baro, nga awan ti macaammo uray siasino no di laeng daydiay umawat kencuana. 18 Ket iti angel ti iglesia sadi Tiatira isuratmo; Dagitoy a banbanag cuna ti Anac ti Dios, isu nga adda dagiti matana a casla darang ti apuy, ket dagiti sacsacana casla napasileng a bronce; 19 Siac ammoc dagiti ar-aramidmo, ken ti ayatmo, ken ti panagservim, ken ti pammatim, ken ti kinaanusmo, ken dagiti ar-aramidmo; ket ti naud-udi ad-aduda ngem dagiti immun-una. 20 Ngem adda bassit nga banbanag a pilawec kenca, ta ipalubosmo ita babai a Jezebel, a nagnaganenna ti bagina a mammadto, ket mangisuro ken manggargari cadagiti adipenco a makicamalala, ken manganda iti maidaton cadagiti didiosen. 21 Ket impaayco kencuana ti tiempo tapno agbabawi coma ti pannakicamalalana; ngem saan a nagbabawi. 22 Adtoy, isu ipisocconto iti maysa a pagiddaan, ken dagiti makicamalala kencuana a maipaay iti dackel a rigat, malacsid no agbabawida cadagiti ar-aramidda. 23 Ket patayecto dagiti annacna iti ipapatay; ket amin nga iglesias maammoandanto a siac ti mangsukimat cadagiti nalimed a panggep ken cadagiti puspuso: ket itedconto iti tunggal maysa cadacayo cas mayannatup cadagiti ar-aramidyo. 24 Ngem kunak cadacayo, ken cadagiti sabsabali idiay Tiatira, dagup dagidiay awanan itoy a sursuro, a dida naammoan dagiti nauneg a banbanag ni Satanas, cas saoenda; Diac ipabaclay cadacayo ti sabali nga awit. 25 No di laeng ti adda cadacayon salimetmetanyo a naimbag agingga iti umayac. 26 Ket ti agballigi, ken mangsalimetmet cadagiti aramidco agingga iti panungpalan, itdecto kencuana iti panagturay cadagiti nasnacion: 27 Ket iturayannanto ida iti maysa a sarucod nga landoc; ket marumrumecdanto a casla caramba ti agdamdamili: a cas caniac inawatco met ken Amac. 28 Ket itdecto kencuana iti baggac ti agsapa. 29 Ti adda pagdengngegna, denggenna coma ti cuna ti Espiritu cadagiti iglesias. CAPITULO 3 1 Ket iti angel ti iglesia sadi Sardis isuratmo; Dagitoy a banbanag cuna ti addaan cadagiti pito nga Espiritu ti Dios, ken dagiti pito nga bituen; Siac ammoc dagiti ar-aramidmo, a managananca sibibiag, ngem natayca. 2 Agsalucagca, ket pasingkedam dagiti banag a natda pay, isuda a nganngani matay: ta saanco a nasaracan dagiti ar-aramidmo a naan-anay iti sangoanan ti Dios. 3 Lagipem ngarud no casano ti panangawatmo ken panagdengngegmo, ket aywanam, ken agbabawica. No saancanto ngarud nga agsalucag, umayacto kenca a casla mannanacaw, ket dicanto ammo no ania nga horas ti iyaayco kenca. 4 Ngem adda kenca sumagmamano a nagnagan dita Sardis a dida rinugitan dagiti pagan-anayda; ket dagitoy makicuyogdanto caniac nga agcawesda iti puraw: ta isuda dagiti maicari. 5 Ti agballiginto, castoyto a macawesan cadagiti pagan-anay a puraw; ket uray caano diacto punasen ti naganna iti pagbasaan ti biag, no di ket ipaduyacyacconto ti naganna iti sangoanan ni Amac, ken cadagiti angelna. 6 Ti adda pagdengngegna, denggenna coma ti cuna ti Espiritu cadagiti iglesias. 7 Ket iti angel ti iglesia sadi Filadelfia isuratmo; Dagitoy a banbanag cuna ti santo, ti napudno, ti addaan ti tulbec ni David, ti manglucat, ket awan ti macapunit; ken ti mangpunit, ket awan ti macalucat; 8 Siac ammoc dagiti ar-aramidmo: adtoy, incabilco iti sangoanam ti maysa a ruangan a silulucat, isu nga awan ti macairikep: ta adda pay bassit a pigsam, ket sinalimetmetam ti saoc, ket dica naglibacan ti naganco. 9 Adtoy, siac aramidecto manipud iti sinagoga ni Satanas, dagidiay mangnagan iti bagida Judio, ket saan met, no di ket agulbodda; adtoy, aramidecto nga umayda ken agrucbabda cadagiti sacsacam, ket maammoanda nga inay-ayatca. 10 Gapu ta sinalimetmetam ti sao iti kinaanusco, siac igagacanto met iti horas ti pannacasuut, isu nga umayto iti isuamin a lubong, tapno masuut dagiti agnaed iti rabaw ti daga. 11 Adtoy, siac umayac iti madaras: salimetmetam a sititibker ti adda kenca, tapno awan ti mangala iti balangatmo. 12 Daydiay agballigi aramidecto nga isu ti maysa nga adigi iti templo ti Diosco, ket saanto a rummuaren sadiay: ket isuratconto kencuana ti nagan ti Diosco, ken ti nagan ti ili ti Diosco, isu ti baro a Jerusalem, isu a bumaba manipud langit nga aggapu iti Diosco: ket isuratconto met kencuana ti baro a naganco. 13 Ti adda pagdengngegna, denggenna coma ti cuna ti Espiritu cadagiti iglesias. 14 Ket iti angel ti iglesia sadi Laodicea isuratmo; Dagitoy a banbanag cuna ti Amen, ti matalec ken napudno nga mamanecnec, ti puon ti pinarsua ti Dios; 15 Siac ammoc dagiti ar-aramidmo, a saanca a nalamiis ket saanca met a napudot: Cayatco coma a nalamiisca wenno napudotca. 16 Iti casta gapu ta napatay ti lamiismo, ket saanca a napudot ket saanca met a nalamiis, itupracanto iti ngiwatco. 17 Agsipud ta cunam, Siac nabacnangac, ket nagun-odacon ti kinabacnang, ket awan ti pacasapulac ti aniaman; ket dica ammo a sica ti dacsanggasat, ken marigrigat, ken napanglaw, ken bulsec, ken lamolamo: 18 Ibalacadco kenca a gumatangca caniac iti balitoc a napasudi iti apuy, tapno bumacnangca coma; ken dagiti pagan-anay a puraw, tapno agcawesca, ket saan a maiparang ti nacababain a kinalamolamom; ken sapsapoam dagita matmatam ti lana nga agas ti mata, tapno macakitaca. 19 Cadagiti isuamin nga ay-ayatec, babalawec ken gugorac ida: aggagetca ngarud, ken agbabawica. 20 Adtoy, addaac nga agtactacder iti ruangan, ket agtugtugtugac: no adda dumngegto iti timecco, ket luctannanto ti ruangan, sumrecacto kencuana, ket makipanganacto kencuana, ket isu caniac. 21 Daydiay agballigi ket ipaayconto kencuana a makicatugaw caniac iti tronoc, a cas met caniac a nagballigiac, ket nakicatugawac ken Amac idiay tronona. 22 Ti adda pagdengngegna, denggenna coma iti cuna ti Espiritu cadagiti iglesias. CAPITULO 4 1 Calpasan dagitoy kimmitaac, ket, adtoy, maysa a ruangan a naluctan idiay langit: ket ti umuna a timec a nangngegco ket casla uni ti tangguyob a nakisasao caniac; a kunkunana, Umulica ditoy, ket iparangconto kenca dagiti banbanag a mapasamacto iti masacbayan. 2 Naigiddato nga naaddaac iti espiritu: ket, adtoy, ti maysa a trono a naisaad sadi langit, ket adda maysa a situtugaw di trono. 3 Ket daydi agtugtugaw casla umasping iti maysa a jaspe ken maysa a bato a sardio; ket adda idi ti maysa a bullalayaw a nanglawlaw iti trono, nga umasping iti maysa nga esmeralda. 4 Ket iti aglicmut di trono adda duapulo ket uppat a tugtugaw: ket dagiti pagtutugawan nakitac ti duapulo ket uppat nga lallacay a situtugaw, a nagcawes cadagiti pagan-anay a puraw; ket dagiti ul-uloda adda balbalangat a balitoc. 5 Ket iti trono rumrummuar idi dagiti kimkimat ken gurgurruod ken timtimec: ket adda idi pito a pagsilawan nga apuy a sumsumged iti sangoanan ti trono, nga isuda dagiti pito nga Espiritu ti Dios. 6 Ket iti sangoanan di trono adda idi maysa a baybay nga sarming nga umasping iti cristal: ket di tengnga ti trono, ken iti aglicmut daydi trono, adda idi uppat nga animal a napno cadagiti matmata iti sango ken iti licud. 7 Ket daydi umuna nga animal umas-asping idi iti maysa a leon, ket daydi maicaddua nga animal umas- asping iti maysa nga urbon ti baca, ket daydi maicatlo nga animal adda rupana a casla rupa ti maysa a tao, ket daydi maicapat nga animal umas-asping iti maysa nga aguila a tumaytayab. 8 Ket dagiti uppat nga animal iti tunggal maysa cadacuada ket adda innem a payacna; ket napnoda cadagiti matmata iti aglawlaw ken iti uneg: ket dida umingga iti aldaw ken rabii, a cunkunada, Santo, santo, santo, Apo Dios ti Mannacabalin-amin, isu nga adda idi, ken adda ita, ken umayto. 9 Ket intono dagitoy nga animal mangtedda iti dayag ken dayaw ken panagyaman iti daydi adda a situtugaw iti trono, isu nga agbiag iti awan inggana, 10 Dagidi duapulo ket uppat a lallacay agparintumengda iti sangoanan daydi adda nga agtugtugaw iti trono, ket agrucbabda iti daydiay agbiag iti agnanayon, ket idatagda dagiti balbalangatda iti sangoanan di trono, a cunkunada, 11 Sica ti maiparbeng, O Apo, nga umawat iti dayag ken dayaw ken iti pannacabalin: ta sica pinarsuam dagiti isuamin nga banbanag, ket gapu iti pagayatam naaddada ken naparsuada. CAPITULO 5 1 Ket nakitac iti macanawan daydi agtugtugaw iti trono ti maysa a pagbasaan a nasuratan iti uneg ken iti ruar, ket namarcaan cadagiti pito a sello. 2 Ket nakitac iti maysa a nabileg nga angel nga iyaw-awagna iti dackel a timec, Siasino ti maicari a mangbistrad iti pagbasaan, ken mangwarwar cadagiti sellona? 3 Ket awan ti tao idiay langit, ket uray iti rabaw ti daga, uray iti uneg ti daga, ti nacabalin a mangbistrad idi a pagbasaan, uray no cumita laeng kencuana. 4 Ket siac nagsangsangitac unay, ta awan ti tao a nasaracan a maicari a nangbistrad ken mangbasa idi a pagbasaan, wenno cumita kencuana. 5 Ket maysa cadagiti lallacay kinunana caniac, Saanca nga agsangit: adtoy, ti Leon iti tribu ni Juda, iti Ramut ni David, nagballigi tapno bistradenna ti pagbasaan, ken tapno warwarenna dagiti pito a sellona. 6 Ket nakitac, nga, adtoy, iti nagtengngaan ti trono ken dagiti uppat nga animal, ken iti nagtetengngaan dagidi lallacay, nagtacder ti maysa a Cordero a casla napapatay idi, nga adda pito a sarana ken pito a matana, nga isuda dagiti pito nga Espiritu ti Dios a naibaon iti isuamin a daga. 7 Isu nga immasideg ket innalana daydi pagbasaan iti ima a macanawan daydi nagtugaw idi trono. 8 Ket idi a naalana daydi pagbasaan, dagiti uppat nga animal ken dagidi duapulo ket uppat a lallacay nagrucnoyda iti sangoanan daydi Cordero, a ti tunggal maysa adda arpana, ken malmalucong a balitoc a napno iti sayamusom ti incienso, nga isuda dagiti carcararag dagiti sasanto. 9 Ket icancantada ti maysa a canta a baro, a cunkunada, Maicarica a mangala iti pagbasaan, ken manglucat cadagiti sellona: ta napapatayca idi, ket sinubbotnacami a maipaay iti Dios babaen ti daram met laeng dagiti tattao ti amin a caputotan, ken pagsasao, ken ili, ken pagarian; 10 Ket pinagbalinnacami a maipaay iti Diostayo nga ar-ari ken papadi: ket agaricaminto iti rabaw ti daga. 11 Ket adtoy kimmitaac, ket nangngegco ti timec dagiti adu nga angel ti aglicmut daydi trono ken dagidi animal ken dagidi lallacay: ket ti bilangda idi ket linacsa a lacsa, ken rinibu a ribo; 12 A cunkunada iti dackel a timec, Maiparbeng ti Cordero a napapatay idi nga umawat iti pannacabalin, ti kinabacnang, ken ti kinasirib, ken ti kinapigsa, ken ti dayaw, ken ti dayag, ken ti bendicion. 13 Ket isuamin a naparsua idiay langit, ken iti rabaw ti daga, ken iti uneg ti daga, ken iti baybay, ken dagiti isuamin nga adda cadacuada, nangngegco ida nga cunkunada, Bendicion, ken dayaw, ken dayag, ken pannacabalin, ti adda coma iti daydiay agtugtugaw iti trono, ken iti Cordero iti awan inggana. 14 Ket dagidi uppat nga animal kunada idi, Amen. Ken dagidi uppat ken duapulo nga lallacay nagrucbabda ket nagdaydayawda iti daydiay sibibiag nga agnanayon iti awan patinggana. CAPITULO 6 1 Ket nakitac idi linuctan daydi Cordero daydi maysa cadagidi pito a sello, ket nangngegco, iti casla timec ti gurruod, daydi maysa cadagidi uppat nga animal a kunana, Umayca ken kitaem. 2 Ket nakitac, ket adtoy ti maysa a cabalyo a puraw: ket daydi adda a sisasacay kencuana adda idi maysa a bai ti panana; ket naited kencuana ti maysa a balangat: ket rimmuar a sibaballigi, ken tapno agballigi. 3 Ket idi a linucatanna daydi maicaddua a sello, nangngegco daydi maicaddua nga animal a nagcuna, Umayca ken kitaem. 4 Ket rimmuar ti sabali a cabalyo a nalabaga: ket ti pannacabalin naited iti daydi nagsacay itoy ti panangiccat ditoy daga ti talna, ken tapno agpipinnatayda: ket naited kencuana ti maysa a dackel a campilan. 5 Ket idi linucatanna daydi maicatlo a sello, nangngegco daydi maicatlo nga animal a nagcuna, Umayca ken kitaem. Ket kimmitaac, ket adtoy ti maysa a cabalyo a nangisit; ket daydi adda a nagsacay kencuana adda maysa a pagtimbangan iti imana. 6 Ket nangngegco ti maysa a timec iti tengnga dagidi uppat nga animal a nagcuna, Maysa a casucat ti trigo mapatgan iti maysa a denario4, ket tallo a casucat ti cebada mapatgan iti maysa a denario4, ken kitaem ta saanmo a dadaelen ti lana ken ti arac. 7 Ket idi linucatanna daydi maicapat a sello, nangngegco ti timec daydi maicapat nga animal a nagcuna, Umayca ken kitaem. 8 Ket kimmitaac, ket adtoy ti maysa a cabalyo a nabessag: ket daydi adda a nagsacay kencuana managan idi ti Patay, ket ti Impierno sumursurot kencuana. Ket naited cadagitoy ti panagturay iti apagcapat ti daga, tapno agpapatayda babaen ti campilan, ken ti bisin, ken ti patay, ken cadagiti narungsot nga animal ditoy daga. 9 Ket idi linuctanna ti maicalima a sello, nakitac iti siroc ti altar dagiti carcararrua dagiti napapatay idi gapu iti sao ti Dios, ken gapu iti pammanecnec a sinalimetmetanda: 10 Ket agas-asugda iti dackel a timec, a kunada, Casano ti cabayagna pay, O Apo, santo ken napudno, a dica ocomen ken ibales ti darami cadagiti agnaed iti rabaw ti daga? 11 Ket pagan-anay a puraw ti naited iti tunggal maysa cadacuada; ket naibaga cadacuada, nga aginanada pay iti bassit a panawen, agingga dagiti cadduada met nga adipen ken dagiti cacabsatda, ket mapapatayda a cas met cadacuada idi, matungpalto. 12 Ket nakitac idi linuctanna daydi maicanem a sello, ket, adtoy, immay ti maysa a dackel a gingined; ket daydi init ngimmisit a casla maysa a panes a booc, ket daydi bulan nagbalin amin a casla dara; 13 Ket dagiti bitbituen ti langit nagtinnagda iti daga, a cas iti maysa nga higos nga iregregna dagiti bungbungana a saanda pay a naluom, no gunggonen ti maysa a napigsa nga angin. 14 Ket ti langit naipanaw a casla maysa a pagbasaan no malucot; ket isuamin a bantay ken puro naiyalisda cadagiti dissoda. 15 Ket dagiti ar-ari ti daga, ken dagiti mamaingel, ken dagiti babacnang, ken dagiti capcapitan, ken dagiti nabibileg, ken isuamin nga adipen, ken agwayawaya, naglemmengda cadagiti rucrukib ken dagiti batbato cadagiti banbantay; 16 Ket kinunada cadagiti banbantay ken dagiti batbato, Agtinnagcayo cadacami, ket ilemmengdacami iti imatang daydi agtugtugaw iti trono, ken iti pungtot ti Cordero: 17 Ta dimtengen ti dackel nga aldaw ti pungtotna; ket siasinonto ti macabalin nga agtacder? CAPITULO 7 1 Ket calpasan daytoy nacakitaac cadagiti uppat nga angel nga agtactacder cadagiti uppat a suli ti daga, a laplappedanda dagiti uppat nga angin ditoy daga, tapno awan ti angin nga agpuyupoy iti rabaw ti daga, wenno iti rabaw ti baybay, wenno iti aniaman a cayo. 2 Ket nakitac ti sabali nga angel nga umuli manipud iti leleggacan ti init, nga adda kencuana ti marca ti Dios a sibibiag: ket pinuccawanna iti dackel a timec dagiti uppat nga angel, a naiccan ti pannacabalin a mangranggas iti daga ken iti baybay, 3 A kunana, Dicayo ranggasan ti daga, ken castamet ti baybay, wenno dagiti caycayo, agingga iti ditayo mamarcaan dagiti adipen ti Diostayo cadagiti mugmugingda. 4 Ket nangngegco ti bilang dagidi namarcaan: sangagasut uppat a pulo ket uppat a ribo dagiti namarcaan cadagiti isuamin a caputotan dagiti annac ti Israel. 5 Iti caputotan ni Juda namarcaan dagiti sangapulo ket dua a ribo. Iti caputotan ni Ruben namarcaan dagiti sangapulo ket dua a ribo. Iti caputotan ni Gad namarcaan dagiti sangapulo ket dua a ribo. 6 Iti caputotan ni Aser namarcaan dagiti sangapulo ket dua a ribo. Iti caputotan ni Nephtali namarcaan dagiti sangapulo ket dua a ribo. Iti caputotan ni Manases namarcaan dagiti sangapulo ket dua a ribo. 7 Iti caputotan ni Simeon namarcaan dagiti sangapulo ket dua a ribo. Iti caputotan ni Levi namarcaan dagiti sangapulo ket dua a ribo. Iti caputotan ni Isacar namarcaan dagiti sangapulo ket dua a ribo. 8 Iti caputotan ni Zabulon namarcaan dagiti sangapulo ket dua a ribo. Iti caputotan ni Jose namarcaan dagiti sangapulo ket dua a ribo. Iti caputotan ni Benjamin namarcaan dagiti sangapulo ket dua a ribo. 9 Calpasan dagitoy kimmitaac, ket, adtoy, ti umariwecwec, nga awan ti nacabalin a bumilang, a naggapuda dagiti isuamin a pagarian, ken tribu, ken il-ili, ken pagsasao, nga agtatacderda iti sangoanan di trono, ken iti sangoanan daydi Cordero, a nagcawesda cadagiti pagan-anay a puraw, ket adda bulong ti palmas cadagiti im-imada; 10 Ket agpucpuccawda iti dackel a timec, a cunkunada, Ti pannacaisalacan nagtaud iti Diostayo nga agtugtugaw iti trono, ken iti Cordero. 11 Ket isuamin dagidi angel addada a sitatacder iti aglicmut daydi trono, ken dagidi lallacay ken dagidi uppat nga animal, ket inrucnoyda dagiti rupada agingga iti baba iti sangoanan daydi trono, ket nagrucbabda iti Dios, 12 A cunkunada, Amen: Bendicion, ken dayag, ken sirib, ken panagyaman, ken dayaw, ken bileg, ken pannacabalin, ti adda coma iti Diostayo iti agnanayon awan patinggana. Amen. 13 Ket simmungbat daydi maysa cadagiti lallacay, a kunkunana caniac, Siasinoda dagitoy a nagcawes cadagiti pagan-anay a puraw? ken sadino ti naggappuanda? 14 Ket kinunac kencuana, apo, sica ammom. Ket isu kinunana caniac, Dagitoy isuda dagiti naggapu iti dackel a rigat, ket binuggoanda dagiti pagan-anayda, ket pinapudawda ida iti dara ti Cordero. 15 Gapu itoy addada iti sangoanan ti trono ti Dios, ket agserservida kencuana iti aldaw ken rabii iti templona: ket daydiay nagtugaw iti trono makipagnaedto cadacuada. 16 Didanto agbisinen, wenno mawawen; ket didanto met mainitanen, wenno aniaman a pudot. 17 Ta ti Cordero nga adda iti tengnga ti trono ket ipastorannanto ida, ket iturongnanto ida cadagiti sibibiag nga ubbog dagiti dandanum: ket ti Dios punasennanto ti amin a lulua cadagiti matada. CAPITULO 8 1 Ket idi linucatanna daydi maicapito a sello, ketnapasamac iti panagulimec sadi langit iti bayat ti guddua ti horas. 2 Ket nakitac dagiti pito nga angel nga agtactacder iti sangoanan ti Dios; ket naited cadacuada dagiti pito a tangguyob. 3 Ket sabali nga angel ti immay ket nagtacder iti sangoanan ti altar, a nagiggem iti maysa a paginciensoan a balitoc; ket naited kencuana ti adu nga incienso, tapno inayonna cadagiti carcararag dagiti isuamin a sasanto iti rabaw di altar a balitoc nga adda idi iti sangoanan di trono. 4 Ket ti asuc daydi incienso, a naicuyog cadagidi cararag dagiti sasanto, nagpangato agingga iti sangoanan iti Dios manipud iti ima daydi angel. 5 Ket daydi angel innalana daydi paginciensoan, ket pinunnona ti apuy di altar, ket inpurruacna iti daga: ket simmaruno dagiti ririaw, ken gurgurrood, ken kimkimat, ken maysa a gingined. 6 Ket dagidi pito nga angel a nagiggem cadagidi pito a tangguyob nagsaganada nga agtangguyob. 7 Ket daydi immuna nga angel nagtangguyob, ket timmaud ti uraro ken apuy a nalaocan iti dara, ket naipurruacda iti daga: ket daydi apagcatlo dagidi caycayo napuoran, ket amin dagiti nalangto a root ket napuoranda. 8 Ket daydi maicaddua nga angel nagtangguyob, ket maysa a casla dackel a bantay a sumsumged iti apuy naitappuac iti baybay: ket ti apagcatlo ti baybay nagbalin a dara; 9 Ket ti apagcatlo dagiti parsua nga adda idi iti baybay, dagiti addaan biag, natayda; ket ti apagcatlo ti sasacayan iti baybay nadadaelda. 10 Ket daydi maicatlo nga angel nagtangguyob, ket natnag nanipud sadi langit ti maysa a dackel a bituen, a sumsumged a casla maysa nga aluten, ket nagdisso iti apagcatlo dagiti carcarayan, ken dagiti ub-ubbog dagiti dandanum; 11 Ket daydi a bituen nagnaganenda iti Igges Ti Cayo: ket ti apagcatlo dagiti dandanum nagbalinda nga igges ti cayo; ket adu cadagiti tattao natayda gapu cadagidi dandanum, ta nagbalinda a napait. 12 Ket daydi maicapat nga angel nagtangguyob, ket nadadael ti apagcatlo ti init, ken ti apagcatlo ti bulan, ken ti apagcatlo dagiti bitbituen; tapno ti apagcatloda napasipnget, ket ti aldaw saan nga naglawag ti apagcatlona, ken casta met ti rabii. 13 Ket nakitac, ken nangngegco ti maysa nga angel nga agtaytayab iti tangatang, a kunkunana iti dackel a timec, Nacacascas-ang, nacacascas-ang, nacacascas-ang, cadagiti agnaed iti rabaw ti daga maipuon cadagiti sabali nga uni ti tangguyob dagiti tallo nga angel, nga agtangguyobto pay! CAPITULO 9 1 Ket daydi maicalima nga angel nagtangguyob, ket nakitac ti maysa a bituen a natnag ditoy daga nanipud sadi langit: ket kencuana naited ti tulbec ti abut a mangliwengliweng. 2 Ket linuctanna daydi abut a mangliwengliweng; ket rimmuar ti asuc idi abut, a casla iti asuc ti maysa a dackel nga horno; ket nagsipnget ti init ken ti angin iti daga maipuon iti asuc daydi abut. 3 Ket rimmuar iti asuc dagiti dudon iti rabaw ti daga: ket naiccanda ti pannacabalin, a cas ti pannacabalin dagiti manggagama ti daga. 4 Ket naibaga cadacuada a dida coma ranggasan ti root ti daga, wenno aniaman a nalangto, ken uray ania a cayo; no di laeng dagidiay tattao nga awanan ti marca ti Dios cadagiti mugmugingda. 5 Ket naibaga cadacuada a saanda a papatayen ida, no di ket tutuokenda ida bayat ti lima a bulan: ket ti pannacatutuocda casla iti tuoc a patauden idi ti manggagama, no siludenna ti tao. 6 Ket cadagidiay nga al-aldaw dagiti tattao birukendanto ni patay, ket didanto masaracan; ket tarigagayandanto ti matay, ket ni patay itarayannanto ida. 7 Ket ti langa dagiti dudon umas-aspingda cadagiti cabalyo a maisagana iti gubat; ket iti rabaw dagidi ul-uloda adda sinanbalangat a casla balitoc, ket dagiti ruprupada casla ruprupa dagiti tattao. 8 Ket adda boocda a casla booc dagiti babbai, ket dagiti ngipngipenda casla ngipngipen dagiti leon. 9 Ket adda cabalda, a casla cabal a landoc; ket ti daranudor dagiti paypayacda casla iti daranudor dagiti luglugan ken dagiti adu a cabcabalyo a sisisiglat a simbrec iti gubat. 10 Ket adda ipusda nga umas-asping cadagiti manggagama, ken pangsilsilud cadagiti ipusda: ket ti pannacabalinda ket isu ti mangranggas cadagiti tattao iti bayat dagiti lima a bulan. 11 Ket adda a pannacaarida, daydi angel ti mangliwengliweng nga abut, ti naganna iti pagsasao nga Hebreo ket Abaddon, ngem iti Griego nga pagsasao ket managanan iti Apolyon. 12 Daydi umuna nga nacacascas-ang napalabas; ket, adtoy, sumarunoda dagiti dua pay nga nacacascas-ang. 13 Ket daydi maicanem nga angel nagtangguyob, ket nangngegco ti maysa a timec a naggapu cadagidi uppat nga sarsara ti altar a balitoc nga adda iti sangoanan ti Dios, 14 A kunkunana idi maicanem nga angel a nagiggem iti tangguyob, Luc-atam dagiti uppat nga angel a sibabalud idiay dackel nga carayan a Eufrates. 15 Ket naluc-atan dagiti uppat nga angel, isuda a naisagana iti maysa nga horas, ken maysa nga aldaw, ken maysa a bulan, ken maysa nga tawen, tapno papatayenda ti apagcatlo dagiti tattao. 16 Ket ti bilang dagiti buybuyot dagidi nagcabalyo ket mamindua a sangngalacsa a lacsa: ket nangngegco ti bilangda. 17 Ket iti casta nakitac dagidi cabcabalyo iti parparmatac, ken dagidi nagsacay cadacuada, nga adda cabalda a cas iti apuy, ket color ti jacinto, ken azufre: ket dagidi ul-ulo dagidi cabalyo casla cadagiti ulo dagiti leon; ket cadagiti ngiwatda rumrummuar ti apuy ken azuc ken azufre. 18 Gapu cadagitoy tallo a pannaplit napapatay ti apagcatlo dagidi tattao, babaen ti apuy, ken asuc, ken azufre, a rimmuar cadagidi ngiwatda. 19 Ta ti pannacabalinda adda idi cadagiti ngiwatda, ken cadagiti ipusda: ta dagiti ipusda umas-asping cadagiti ul-uleg, ket adda ul-uloda, ket dagitoy ti pagranggasda. 20 Ket dagiti natda a tattao a saan a napapatay cadagitoy a pannaplit ket saanda a nagbabawi dagiti ar-aramid dagiti im-imada, tapno dida coma pagrucbaban dagiti demonio, ken dagiti didiosen a balitoc, ken pirac, ken bronce, ken bato, ken cayo: isuda a dida mabalin ti cumita, wenno dumngeg, uray magna: 21 Ket saanda a nagbabawi cadagiti panagpapatayda ti tao, wenno dagiti panagan-anitoda, wenno dagiti pannakicamalalada, wenno dagiti panagtactacawda. CAPITULO 10 1 Ket nacakitaac iti sabali nga angel a napigsa a bimmaba manipud langit, a nabaddoan ti maysa nga ulep: ket adda ti bullalayaw iti rabaw ti ulona, ket daydi rupana casla iti init, ket dagiti sacsacana cacasda la adigi nga apuy: 2 Ket adda iti imana ti maysa a pagbasaan a bassit a sibibistrad: ket impatayna ti sacana a macanawan iti rabaw ti baybay, ket ti sacana a macatigid iti rabaw ti daga, 3 Ket nagpuccaw iti dackel a timec, a cas ti panagungor ti maysa a leon: ket idi a nagpuccaw, dagiti pito nga gurruod nagunida. 4 Ket idi a dagidi pito nga gurruod nagunidan, innac coma agsuraten: ket nangngegco ti maysa a timec a naggapu sadi langit a nagcuna, Selloam dagiti banag a binalicas dagiti pito a gurruod, ket dica isurat ida. 5 Ket daydi angel a nakitac a nagbatay iti baybay ken iti daga intayagna ti imana sadi langit, 6 Ket nagsapata gapu iti daydiay agbiag nga awan inggana, isu a namarsua iti langit, ken dagup ti adda kencuana, ken ti daga, ken dagup ti adda kenkuana, ken iti baybay, ken dagup ti adda kencuana, tapno awanton a pulos iti tiempo a pacatactacan: 7 Ngem cadagiti al-aldaw ti timec ti maicapito nga angel, inton pagunienna ti tangguyobna, isu metten ti pannacatungpalto ti palimed ti Dios, cas impacaammona cadagiti ad-adipenna a mammadto. 8 Ket daydi timec a nangegco a naggapu sadi langit kinasaonac manen, a kinunana, Magnaca ken alaem daydiay bassit a pagbasaan nga adda a sibibistrad iti ima ti angel a nagbatay ti baybay ken iti daga. 9 Ket immasidegac idi angel, a kinunac kencuana, Itedmo caniac dayta bassit a pagbasaan. Ket kinunana caniac, Alaem, ket canem; ket pumaitto ti tianmo, ngem dita ngiwatmo ket nasam-itto a cas diro. 10 Ket innalac daydi pagbasaan a bassit iti ima daydi angel, ket kinnanco; ket nasam-it ti ngiwatco a casla diro: ngem idi nacancon, ti tianco nagpait. 11 Ket kunana caniac, Masapul nga agipadtoca manen cadagiti adu nga il-ili, ken pagpagarian, ken pagsasao, ken ar-ari. CAPITULO 11 1 Ket naited caniac ti maysa a runo nga umasping iti maysa a sarucod: ket ti angel timmacder, kunana, Tumacderca, ket rucodem ti templo ti Dios, ken ti altar, ken dagiti agrucrucbab sadiay. 2 Ngem ti paraangan iti ruar ti templo lacsidem, ket dica rucoden; ta naiteden cadagiti Gentiles: ket payatpayatandanto ti nasantoan nga ili cadagiti sacsacada bayat iti uppat a pulo ket dua a bulan. 3 Ket itdecto ti pannacabalin cadagiti dua a sacsic, ket agipadtodanto cadagiti sangaribo dua gasut ket innem a pulo nga aldaw, a sicacawesda cadagiti lupot a nakersang. 4 Dagitoy isuda dagiti dua a cayo ti olivo, ken dagidi dua a pagsilawan nga agtactacder iti sangoanan ti Apo ti isuamin a daga. 5 Ket no adda aniaman a tao a mangranggas cadacuada, rummuar ti apuy cadagiti ngiwatda, ket alun-onenna dagiti cabusorda: ket no adda manggayagay a mangranggas cadacuada, masapul met a mapapatayda iti castoy. 6 Dagitoy adda pannacabalinda a mangrikep iti langit, tapno saan a tumudo iti bayat dagiti aldaw ti panagpadtoda: ket adda pannacabalinda cadagiti dandanum tapno pagbalinenda ida a dara, ken tapno saplitenda toy daga iti isuamin nga kita iti rigat, uray mamin-ano nga daras ti cayatda. 7 Ket no intono malpasda iti panagpanecnecdan, ti animal nga immuli nga naggapu iti mangliwengliweng nga abut gubatennanto ida, ket abakennanto ida, ket papatayenna ida. 8 Ket dagiti bangcayda maiwalangdanto iti dalan ti dackel a ili, nga iti naespirituan a caipapananna ket managanan ti Sodoma ken Egipto, isu met a nacailansaan ti Apotayo. 9 Ket dagiti naggapu cadagiti il-ili ken caputotan ken pagsasao ken pagpagarian buybuyaendanto ti bangcayda ti bayat ti tallo nga aldaw ket guddua, ket didanto ipalubos dagiti bangcayda a maitanemda. 10 Ket dagiti agnaed ditoy daga ket agragrag-odanto maipuon cadacuada, ket agramrambacda, ket agsisinnagutdanto; ta dagitoy dua a mammadto ket pinarigatda dagiti agnaed ditoy daga. 11 Ket idi calpasan dagidi tallo nga aldaw ket guddua ti Espiritu ti biag a naggapu iti Dios simrec cadacuada, ket timmacderda babaen cadagiti sacsacada; ket nagbutengda iti napalalo dagiti nacakita itoy. 12 Ket nangngegda ti maysa nga dackel a timec a naggapu sadi langit a nagcuna cadacuada, Umulicayo ditoy. Ket nagpangatoda sadi langit babaen ti ulep; a kitkitaen ida dagidi cabusorda. 13 Ket idi met la nga horas immay ti maysa a dackel a gingined, ket natuang ti apagcapullo ti ili, ket natayda iti gingined dagiti pito ribo a tattao: ket dagidi natidda nagbutengda, ket impaayda ti dayag iti Dios ti langit. 14 Daydi maicaddua nga nacacascas-ang napalabas; ket, adtoy, ti maicatlo nga nacacascas-ang umay daras. 15 Ket daydi maicapito nga angel nagtangguyob; ket simmaruno dagiti dadackel a timec idiay langit, ket kinunada, Dagiti pagpagarian ti lubong ket nagbalinen a pagpagarian ni Apotayo, ken ti Cristona; ket agarinto nga awan patinggana. 16 Ket dagiti duapulo ket uppat a lallacay, nga situtugaw cadagiti tugawda iti sangoanan ti Dios inrucnoyda dagiti rupada iti baba, ket nagrucbabda iti Dios, 17 A cunkunada, Agyamancami kenca, O Apo Dios a Mannacabalin-amin, ta addaca ita, ket addaca idi, ken sica umaycanto, agsipud ta innalam ti dackel a pannacabalinmo, ket nagarica. 18 Ket nacapungtot dagiti pagpagarian, ket dimtengen ti pungtotmo, ken ti aldaw dagiti natay, a maipaay iti pannacaocomda, ken ti pannacaited ti gunggona cadagiti adipenmo a mammadto, ken cadagiti sasanto, ken cadagiti agbuteng iti naganmo, babassit ken dadackel; ken panangdadaelmo cadagiti mangdadael iti daga. 19 Ket naluctan daydi templo ti Dios idiay langit, ket nakita idiay templona daydi lacasa ti tulagna: ket naadda dagiti kimkimat, ken ririaw, ken gurgurruod, ken maysa a gingined, ken dackel a tudo ti uraro. CAPITULO 12 1 Ket maysa a dackel nga pagilasinan nakita idiay langit; maysa a babai nga sicacawes iti init, ket iti bulan iti baba dagiti sacsacana, ket ti ulona maysa a balangat nga adda sangapulo ket dua a bituenna: 2 Ket isu masicog idi ket agickis, iti panagpasicalna, ken agrigrigat nga agpasngay. 3 Ket adda nagparang a sabali a nacascasdaaw sadi langit; ket adtoy ti maysa a dackel a dragon a nalabaga, nga adda pito nga ulona ken sangapulo a sarana, ket iti rabaw dagiti ul-ulona ket pito a corona. 4 Ket ti ipusna guyodenna ti apagcatlo dagiti bitbituen sadi langit, ket inpurruacna ida iti daga: ket daydi dragon adda iti sangoanan daydi babai a nganngani aganac, tapno alun-onenna daydi anacna inton maipasngay. 5 Ket inyanacna ti maysa nga anac a lalaki, a mangiturayto cadagiti isuamin a pagpagarian babaen iti maysa a sarucod a landoc: ket daydi anacna naipangato agingga iti Dios, ken idiay tronona. 6 Ket daydi babai timmaray a nagcamang idiay let-ang, nga ayan ti disso nga insagana kencuana ti Dios, tapno taraonanda idiay cadagiti sangaribo dua gasut ket innem a pulo nga aldaw. 7 Ket adda gubat idi sadi langit: Ni Miguel ken dagiti angelna nakigubatda a maibusor idi dragon; ket daydi dragon ken dagiti angelna nakicabilda, 8 Ngem dida nangabac; ket saanen a nasaracan iti dissoda sadi langit iti uray caanoman. 9 Ket naigarangogong daydi dackel a dragon, daydi uleg a cadaanan, nga isu ti managan ti Diablo, ken Satanas, isu a nangallilaw iti isuamin a lubong: naitappuac itoy daga, ket dagidi angelna naitappuacda a naicanunong kencuana. 10 Ket nangngegco ti maysa a dackel a timec sadi langit nga kunkunana, Ita immayen ti pannacaisalacan, ken bileg, ken ti pagarian ti Diostayo, ken pannacabalin ti Cristona: ta ti mangidardarum cadagiti cacabsattayo ket naitappuaken, daydiay mangidardarum cadacuada iti sangoanan ti Diostayo bayat ti aldaw ken rabii. 11 Ket inabacda isuna gapu iti dara ti Cordero, ken gapu iti sao ti pammanecnecda; ket dida kina-ilalaan dagiti biagda agingga ken patay. 12 Gapuna agragrag-ocayo, o langlangit, ken dacayo nga agnaed cadacuada. Asicayo pay nga agnanaed iti daga ken iti baybay! ta ti diablo ket immulog cadacayo, nga addaan iti dackel a pungtot, gapu ta ammona a bassiten ti tiempona. 13 Ket idi nakita daydi dragon a naitappuaken itoy daga, kinamatcamatna daydi babai a nangipasngay iti anac a lalaki. 14 Ket naited idi babai ti dua a payac ti dackel nga aguila, tapno tumayab coma nga agpalet-ang, idiay dissona, isu a pacataraonanna bayat ti maysa a pannawen, ken panpanawen, ken guddua ti maysa a panawen, manipud iti sangoanan ti uleg. 15 Ket daydi uleg impugsona iti ngiwatna nga impasaruno idi babai ti danum a casla maysa a layus, tapno maiyanud coma iti daytoy a layus. 16 Ket ti daga tinulonganna daydi babai, ta ti daga naglucat ti ngiwatna, ket sinagepsepna daydi layus nga impugso ti ngiwat daydi dragon. 17 Ket nacapungtot daydi dragon idi babai, ket napanna ginubat iti natda ti capuonanna, a mangsalsalimetmet cadagiti bilbilin ti Dios, ken addaanda ti pammanecnec ni Jesus Cristo. CAPITULO 13 1 Ket siac nagtactacderac iti cadaratan iti igid ti baybay, ket nacakitaac ti maysa nga animal a sumang-at manipud idi baybay, isu nga adda pito nga ulona ken sangapulo a sarana, ket iti rabaw dagidi sarsarana sangapulo a balangat, ket iti rabaw dagidi ul-ulona dagiti nagnagan ti tabbaaw. 2 Ket daydi animal a nakitac umas-asping ti maysa a leopardo, ket dagiti sacsacana casla sacsaca ti oso, ket ti ngiwatna casla ngiwat ti leon: ket inted daydi dragon kencuana ti pannacabalinna, ken ti tronona, ken dackel a kinaturay. 3 Ket nakitac ti maysa cadagiti ul-ulona a casla nasugatan ti ipapatay; ket daydi sugatna nga ipapatay naagasan: ket isuamin a daga nagsidsiddaawda ti daydi nga animal. 4 Ket dinaydayawda ti dragon gapu ta intedna ti turayna idi animal: ket nagdaydayawda idi animal, a cunkunada, Siasino ti pumadpad itoy nga animal? ket siasino ti macabalin a manggubat kencuana? 5 Ket naited kencuana ti maysa a ngiwat nga agsasao cadagiti banbanag a dadackel ken tabtabbaaw; ket naited kencuana ti kinaturayna nga agaramid iti bayat ti uppat a pulo ket dua a bulan. 6 Ket naglucat daydi ngiwatna tapno tabbaawanna ti Dios, tapno tabbaawanna ti naganna, ken ti tabernaculona, ken cadagiti agnaed sadi langit. 7 Ket naipalubos kencuana ti pananggubatna cadagiti sasanto, ken mangabac cadacuada: ket naited kencuana ti panagturay iti isuamin a caputotan, ken pagsasao, ken pagpagarian. 8 Ket isuamin dagiti agnaed iti rabaw ti daga agdaydayawdanto kencuana, dagidiay saan a naisurat dagiti nagnaganda iti pagbasaan ti biag ti Cordero a napapatay manipud idi pannacabangon itoy lubong. 9 No ti siasinoman a tao adda pagdengngegna, dumngeg coma. 10 No ti siasinoman a tao mangipaay ti pannacacayaw mapan iti pannacacayaw: no ti siasinoman a tao macapapatayto iti campilan masapul nga isu mapapatayto met iti campilan. Adtoy ti kinaanus ken ti pammati dagiti sasanto. 11 Ket nacakitaac ti sabali nga animal nga rimmuar manipud iti daga; ket adda dua a sarana a casla maysa a cordero, ket agsasao idi a cas maysa a dragon. 12 Ket aramatenna ti amin a kinaturay daydi immuna nga animal iti sangoananna, ket pagbalinenna ti daga ken dagiti isuamin nga agnaed kencuana a daydayawenda idi immuna nga animal, a ti sugatna nga ipapatay ket naagasan. 13 Ket agaramid cadagiti dadackel a datdatlag, nga uray pay pababaenna sadi langit ti apuy nga umay ditoy daga iti imatang dagiti tattao, 14 Ket allilawenna dagiti agnaed iti rabaw ti daga gapu cadagiti datdatlag a naited kencuana nga aramiden ti imatang daydi animal; a kunkunana cadagiti agnaed iti rabaw ti daga, a mangaramidda coma iti maysa a ladawan di animal, a nasugatan iti campilan, ket nagbiag. 15 Ket adda pannacabalinna a mangted iti anges iti ladawan daydi animal, tapno daydi ladawan daydi animal saan laeng nga agsao coma, no di ket papapatayna dagup dagiti saan nga agdaydayaw idi ladawan daydi animal. 16 Ket pamarcaanna dagiti isuamin, babassit ken dadackel, babacnang ken napanglaw, dagiti siwawaya ken dagiti paad-adipen, tapno maaddaanda iti marca iti imada a macanawan, wenno iti mugingda: 17 Ket tapno awan coma ti tao a macabalin a gumatang wenno aglaco, no di laeng dagidiay addaan iti marca, wenno daydi nagan ti animal, wenno daydi bilang ti naganna. 18 Adtoy ti kinasirib. Ti addaan pannacaawat imutectecanna coma ti bilang daydi animal: ta isu ti bilang ti maysa a tao; ket ti bilangna Innem a gasut innem a pulo ket innem. CAPITULO 14 1 Ket kimmitaac, ket, adtoy, ti Cordero agtactacder iti rabaw ti bantay Sion, ket naicuyogda kencuana dagiti sangagasut uppat a pulo ken uppat a ribo, nga addaan ti nagan ni Amana a naisurat cadagiti mugmugingda. 2 Ket nangngegco ti maysa a timec nga naggapu iti langit, a casla iti daranudor dagiti adu a dandanum, ken cas iti uni ti maysa a dackel a gurruod: ket nangngegco ti timec dagiti tomotocar nga agtoctocar dagiti arpada: 3 Ket agcancantada ti casla maysa a canta a baro iti sangoanan ti trono, ken iti sangoanan dagiti uppat nga animal, ken dagiti lallacay: ket awan idi ti macabalin a mangadal idi a canta no di laeng dagidi sangagasut uppat a pulo ket uppat a ribo, isuda a nasubbot itoy daga. 4 Dagitoy dagiti saan a natulawan cadagiti babbai; ta birhenda. Dagitoy dagiti sumursurot iti Cordero uray adino a papananna. Dagitoy nasubbotda cadagiti tattao, a cas umunada a bungbunga a maipaay iti Dios ken iti Cordero. 5 Ket iti ngiwatda saan a nasaracan ti ulbod: ta awan iti tulawda iti sangoanan ti trono ti Dios. 6 Ket nacakitaac ti sabali nga angel a tumaytayab iti tangatang, nga adda kencuana ti agnanayon a naimbag a damag tapno ipacaammona cadagiti agnaed iti rabaw ti daga, ken cadagiti amin a pagpagarian, ken caputotan, ken pagsasao, ken il-ili, 7 Ket kunana iti dackel a timec, Agbutengcayo iti Dios, ket itedyo kencuana ti dayag; ta dimteng ti horas ti panangocomna: ket agrucbabcayo iti nangaramid iti langit, ken iti daga, ken iti baybay, ken cadagiti ubbog dagiti dandanum. 8 Ket sabali manen nga angel ti simmaruno a kinuna, Ti Babilonia narban, narban, ti dackel nga ili, isu a nangpainum cadagiti isuamin a pagpagarian iti arac ti pungtot gapu iti pannakicamalalana. 9 Ket daydi maicatlo nga angel sinurotna ida, a kunkunana iti dackel a timec, No ti asinoman a tao agrucbab iti animal ken iti ladawanna, ket pamarcaan iti mugingna, wenno iti imana, 10 Isu met laeng uminumto iti arac ti pungtot ti Dios, nga adda a naisagana nga awan aniaman a lalaocna iti copa ti pungtotna; ken matuocto iti apuy ken azufre ti imatang dagiti santo nga angelna, ken iti imatang ti Cordero: 11 Ket ti asuc ti tutuocda agpangpangato iti agnanayon: ket awan ti panaginanada iti aldaw ken rabii, dagidi agrucbab iti animal ken iti ladawanna, ken uray siasino nga immawat iti marca ti naganna. 12 Daytoy ti kinaanus dagiti sasanto: nga isuda salimetmetanda dagiti bilbilin ti Dios, ken ti pammati ken Jesus. 13 Ket nangngegco ti maysa a timec a naggapu iti langit ng agcuncuna caniac, Isuratmo, Bendito dagiti matay a matayda gapu iti Apo manipud itan: Wen, cuna ti Espiritu, tapno aginanada cadagiti banbannogda; ta dagiti aramidda sumursurotda cadacuada. 14 Ket kimmitaac, ket adtoy ti maysa nga ulep a napudaw, ket iti ulep adda a nagtugaw ti maysa nga umas-asping iti Anac ti tao, nga adda iti ulona ti maysa a balangat a balitoc, ket iti imana maysa a cumpay a natadem. 15 Ket sabali nga angel rimmuar iti templo, a pucpuccawanna iti dackel a timec daydi nagtugaw iti ulep, Aramatem ta cumpaymo, ket agparaspasca: ta dimteng ti horas a panagani; ta ti anien ti daga natangkenanen. 16 Ket daydi adda a nagtugaw iti ulep inaramatna daydi cumpayna iti daga; ket ti daga naparaspasan. 17 Ket sabali nga angel rimmuar iti templo nga adda sadi langit, nga addaan met ti maysa a cumpay a natadem. 18 Ket sabali nga angel rimmuar iti altar, isu nga adda pannacabalinna iti apuy; ket pinuccawanna iti dackel a timec daydi addaan ti cumpay a natadem, a kinunana, Aramatem dayta cumpaymo a natadem, ket urnongem dagiti bungbunga ti uvas ti daga; ta dagiti uvasna naluomdan. 19 Ket daydi angel inaramatna daydi cumpayna itoy daga, ket inurnongna ti apiten nga uvas ti daga, ket impisocna iti pagpespesan daydi dackel a pagdapilan ti pungtot ti Dios. 20 Ket daydi pagpespesan nabaddebaddec iti ruar ti ili, ket timbog ti dara aginggana iti ruar ti pagpespesan, uray pay dimmanon ti pacabosalan dagiti cabalyo, iti caatiddug ti sangaribo ket innem a gasut nga estadio8. CAPITULO 15 1 Ket nakitac ti sabali a pagilasinan sadi langit, dackel ken nacascasdaaw, dagiti pito nga angel nga addaan cadagiti pito a camaudianan a pannaplit; ta cadacuada matungpal ti pungtot ti Dios. 2 Ket nacakitaac ti maysa a casla baybay a sarming a nalaocan ti apuy: ken dagidiay nagballigi iti daydi animal, ken ti ladawanna, ken ti pamarcana, ken ti bilang ti naganna, nga agtatacderda ti igid daydi baybay a sarming, nga addaanda cadagiti arpa iti Dios. 3 Ket cancantaenda daydi canta ni Moises nga adipen ti Dios, ken ti canta ti Cordero, a cunkunada, Dackel ken nacascasdaaw dagiti ar-aramidmo, Apo Dios a Mannacabalin-amin; nalinteg ken napudno dagiti daldalanmo, sica Ari dagiti sasanto. 4 Siasino ti di agbutengto kenca, O Apo, ken saan a mangitantan-octo iti naganmo? ta sicsica laeng ti santo: ta isuamin nga pagpagilian umayto agrucbab kenca; ta dagiti panangocommo naiparangarangda. 5 Ket idi nalpas dagitoy nakitac, ken, adtoy, ti templo iti tabernaculo ti pammanecnec sadi langit naluctan: 6 Ket pito nga angel ti rimmuar idi templo, nga addaan cadagiti pito a pannaplit, a nagcawesda cadagiti natarnaw ken nalapat a lupot a puraw, ket nabaricsan dagiti barucongda cadagiti barikes a balitoc. 7 Ket maysa cadagidi uppat nga animal intedna cadagidi pito nga angel dagiti pito a malucong a balitoc a napno iti pungtot ti Dios, isu nga agbiag iti agnanayon. 8 Ket napno daydi templo iti asuc a nagtaud iti dayag ti Dios, ken naggapu iti pannacabalinna; ket awan ti nacabalin a simrec iti templo, agingga iti pannacatungpal dagiti pito nga pannaplit dagiti pito nga angel. CAPITULO 16 1 Ket nangngegco ti maysa a dackel a timec a naggapu iti templo a kunkunana cadagidi pito nga angel, Incayo, ket ibuyatyo dagiti pito a malucong ti pungtot ti Dios iti rabaw ti daga. 2 Ket rimmuar daydi immuna, ken imbuyatna daydi malucongna iti daga; ket nagbalin a derder a nacaar-ariec ken nasaem cadagidi tattao nga addaan iti marca daydi animal, ken nagrucbab idi ladawannna. 3 Ket daydi maicaddua nga angel imbuyatna daydi malucongna iti baybay; isu a nagbalin a dara a casla dara ti maysa a natay a tao: ket isuamin a cararrua a sibibiag dagiti adda iti baybay natay. 4 Ket daydi maicatlo nga angel imbuyatna daydi malucongna cadagiti caracarayan ken ub-ubbog ti danum; ket nagbalinda a dara. 5 Ket nangngegco daydi angel dagiti danum a kunkunana, Sica nalintegca, O Apo, nga addaca ita, ket addaca idi, ken umayto, agsipud ta nangocomca a castoy. 6 Gapu ta imbuyatda ti dara dagiti sasanto ken dagiti mammadto, ket sica impainummo met cadacuada ti dara; ta isu iti caicarianda. 7 Ket nangngegco ti sabali a timec a naggapu idi altar a kunkunana, Wen, O Apo Dios a Mannacabalin-amin, napudno ken nalinteg dagiti panangocommo. 8 Ket ti maicapat nga angel imbuyatna daydi malucongna idi init; ket naipalubos kencuana ti panangpuor cadagiti tattao iti apuy. 9 Ket dagidi tattao napuoranda iti napalalo a pudot, ket tinabbaawanda ti nagan ti Dios, isu nga adda pannacabalinna cadagitoy a pannaplit: ket saanda nga nagbabawi tapno agdayawda coma kencuana. 10 Ket daydi maicalima nga angel imbuyatna daydi malucongna idi trono daydi animal; ket daydi pagarianna napno ti sipnget; ket nagngaretngetanda dagiti dildilada gapu iti rigatda, 11 Ket tinabbaawanda ti Dios ti langit gapu cadagiti rigrigat ken dagiti derderda, ket saanda nga nagbabawi cadagiti ar-aramidda. 12 Ket daydi maicanem nga angel imbuyatna daydi malucongna idi dackel a carayan nga Eufrates; ket nagmaga daydi dandanumna, tapno maisagana coma ti dalan dagiti ar-ari nga aggapu iti leleggacan ti init. 13 Ket nakitac dagiti tallo nga espiritu a narugit a casda la tucac a rumrummuar idi ngiwat daydi dragon, ken idi ngiwat daydi animal, ken idi ngiwat daydi saan a pudno a mammadto. 14 Ta isuda dagiti espiritu dagiti demonio, nga agar-aramid cadagiti datdatlag, isuda a mapan cadagiti ar-ari ti daga ken ti amin a lubong, tapno urnongenna ida a maisagana ti gubat ti dackel nga aldaw ti Dios a Mannacabalin-amin. 15 Adtoy, siac umayac a casla mannanacaw. Bendito daydiay agsalucag, ket aywananna dagiti pagan-anayna, di la ket ta magna a silalamolamo, ket makitada ti ibainna. 16 Ket inurnongna ida amin idiay disso nga iti Hebreo a pagsasao ket managanan iti Armagedon. 17 Ket daydi maicapito nga angel imbuyatna daydi malucongna iti angin; ket rimmuar ti maysa a dackel a timec idi templo idiay langit, ken manipud idi trono, a kunkunana, Nalpasen. 18 Ket adda ririaw, ken gurguruod, ken kimkimat; ket immay ti maysa a dackel a gingined, nga awan capadana nanipud idi adda tattao ti rabaw ti daga, maysa a gingined a nagdackel, casta unay nga nagbileg. 19 Ket ti dackel a ili nabingaybingay iti tallo a paset, ket dagiti ili dagiti pagpagarian narbada: ket ti dackel a Babilonia naipalagip iti sangoanan ti Dios, tapno maited kencuana iti copa ti arac ti kinarungsot iti pungtotna. 20 Ket napucaw ti amin a puro, ket dagiti banbantay saanda a nasaracan. 21 Ket nagtinnag cadagiti tattao manipud langit dagiti dadackel nga uraro, a cas ti cadagsen ti maysa a talento: ket dagiti tattao tinabbaawanda ti Dios gapu iti pannaplit nga uraro; ta daydi a pannaplitna ket napalaus la unay a nagdackel. CAPITULO 17 1 Ket immay ti maysa cadagidi pito nga angel nga addaan cadagidi pito a malucong, ket nakisao caniac, a kunana caniac, Umayca ditoy; ipakitacto kenca ti pannacaocom ti dackel a balangcantis nga adda a nagtugaw iti rabaw dagiti adu a dandanum: 2 Isu a nakicamalalaan dagiti ar-ari ti daga, ket dagiti agnaed iti daga nabartecda maigapu iti arac ti pannakicamalalana. 3 Ket impannac babaen iti espiritu iti maysa a let-ang: ket nakitac idiay ti maysa a babai a nagsacay iti maysa nga animal nga nalabaga, a napno cadagiti nagnagan a tabbaaw, nga addaan pito nga ulo ken sangapulo nga sara. 4 Ket daydi babai nagcawes iti purpura ken escarlata, ket naarcosan cadagiti balitoc ken batbato a napateg ken perperlas, nga adda idi imana ti maysa a copa a balitoc a napno cadagiti macarimon ken dagiti kinarugit ti pannakicamalalana: 5 Ket idi mugingna maysa a nagan ti naisurat, PALIMED, TI BABILONIA A DACKEL, INA DAGITI BALANGCANTIS KEN DAGITI NACARIMRIMON DITOY DAGA. 6 Ket nakitac daydi babai a nabartec iti dara dagiti sasanto, ken iti dara dagiti sacsi ni Jesus: ket idi a nakitac, nagsiddaawac iti dackel a pannacascasdaaw. 7 Ket kinuna caniac di angel, Apayapay agsiddaawca? Siac ibagacto kenca ti palimed a maipapan idiay babai, ken daydiay animal a mangawit kencuana, nga addaan pito nga ulo ken sangapulo a sara. 8 Daydiay animal a nakitam isu ti adda idi, ket awan ita; ket rummuarto iti mangliwengliweng nga abut, ken mapan iti pacapucawan: ket dagiti agnaed iti rabaw ti daga agsiddaawdanto, dagiti nagnaganda saanda a naisurat iti pagbasaan ti biag nanipud idi pannacabangon toy lubong, inton makitada ti animal nga adda idi, ket awan ita, ken addanto. 9 Adtoy ti panunot nga adda siribna. Dagiti pito nga ulo isuda dagiti pito a banbantay, isuda a nagtugawan daydiay babai. 10 Ket isuda dagiti pito nga ar-ari: dagiti lima cadacuada natnagdan, maysa addan, ket diay maysa ket saan pay nga immay; ket inton umay, masapul nga agtuloy iti apagbassit a canito. 11 Ket daydi animal nga adda idi, ket awan ita, isu met laeng ti maicawalo, ket isu ti maysa cadagiti pito, ket mapan iti pacapucawan. 12 Ket dagiti sangapulo a sara a nakitam isuda dagiti sangapulo nga ar-ari, a dida pay immawat iti pagarian; ngem umawatda iti panagturay a casla ar-ari a mairanud idiay animal iti maysa nga horas. 13 Dagitoy sangsangcanakemda, ket itedda ti pannacabalinda ken ti turayda idiay animal. 14 Dagitoy gubatendanto ti Cordero, ket ti Cordero abakennanto ida: ta isu ti Apo dagiti ap-apo, ken Ari dagiti ar-ari: ket dagiti maicuyog kencuana isuda dagiti naayaban, ken napili, ken mapagtalcan. 15 Ket kinunana caniac, Dagiti danum a nakitam, idiay a nagtugawan ti balangcantis, isuda dagiti tattao, ken umariwecwec a tattao, ken pagpagarian, ken pagsasao. 16 Ket dagiti sangapulo a sara a nakitam ken ti animal, dagitoy guraendanto iti balangcantis, ket isuna ket pagwalangwalangendanto a lamolamo, ket sidaendanto ti lasagna, ket puorandanto iti apuy. 17 Ta ti Dios incabilna cadagiti puspusoda ti panangtungpalda ti pagayatanna, ken iti panagsangsangcanakemda, ken ti panangtedda iti pagarianda idiay animal, agingga nga dagiti sao ti Dios matungpalda. 18 Ket ti babai a nakitam isu daydiay dackel a ili, nga isu a mangituray cadagiti ar-ari ti daga. CAPITULO 18 1 Calpasan dagitoy a banag nakitac ti sabali nga angel a bimmaba nanipud langit, nga addaan dackel a turay; ket ti daga nasilnagan daydi dayagna. 2 Ket pimmuccaw iti napigsa a timec, a kunkunana, ti Babilonia nga dackel narban, narban, ket nagbalinen a pagnaedan dagiti demonio, ken pagapunan ti amin a kita ti espiritu a nacarimrimon, ken tangcal ti amin a narugit ken macapagura a tumatayab. 3 Dagiti isuamin a pagpagarian imminumda ti arac ti pungtot ti pannakicamalalana, ken dagiti ar-ari ti daga nakicamalalada kencuana, ket dagiti agtagtagilaco ditoy daga bimmacnangda gapu iti kinabuslon dagiti ragragsacna. 4 Ket nangngegco ti sabali a timec a naggapu sadi langit, a kunkunana, Rummuarcayo kencuana, dacayo nga tattaoc, tapno dicayo mairaman cadagiti basbasolna, ken tapno saanyo nga awaten dagiti saplitna. 5 Ta dagiti basbasolna nacagtengda sadi langit, ket ti Dios linagipna dagiti kinadangkesna. 6 Supapacanyo a cas ti pananggunggonana cadacayo, ket paminduaenyo ti mamindua kencuana cas mainugot cadagiti ar-aramidna: iti copa a nangilaocanna ilaocanyo iti mamindua a maipaay kencuana. 7 No casano ti panagpasindayagna, ken panagbuslonna cadagiti ragragsac, casta ti itedyo a tuoc ken sangsangit kencuana: ta kunana iti pusona, naisaadac a reina, ken saanac a balo, ket uray caano diacto aglac-am iti ladingit. 8 Gapuna iti maymaysa nga aldaw umayto dagiti saplitna, ti ipapatay, ken ti ladingit, ken ti bisin; ken aglablabesto a mapuoran iti apuy: ta napigsa ni Apo Dios a mangocom kencuana. 9 Ket dagiti ar-ari ti daga, a nakicamalala ken nakipagbiag iti kinabuslon dagiti ragragsac kencuana, agsangsangitda, ken dungdung-awandanto, intono makitada ti asuc ti pannacapuorna. 10 Nga agtatacderda iti adayu gapu ti butengda iti tuocna, a cunkunada, Asipay, asipay, daydi dackel nga ili ti Babilonia, daydi ili a mannacabalin! ta iti maymaysa nga horas ket immay ti pannacaocommo. 11 Ket dagiti agtagtagilaco ditoy daga sangsangitanda ken dungdung-awandanto; ta awanen a pulos ti gumatangen iti tagtagilacoda: 12 Tagtagilaco a balitoc, ken pirac, ken dagiti batbato a napateg, ken dagiti perlas, ken ti lupot a nalapat a puraw, ken purpura, ken seda, ken escarlata, ken isuamin a kita ti cayo a nabanglo, ken amin a kita ti al-alicamen a marfil, ken amin a kita dagiti al-alicamen a cayo a napateg unay, ken bronce, ken landoc, ken marmol, 13 Ken canela, ken incienso, ken unguento, ken bangbanglo, ken arac, ken lana, ken nasayaat nga harina, ken trigo, ken an-animal, ken carcarnero, ken cabcabalyo, ken luglugan, ken dagiti ad-adipen, ken dagiti carcararrua dagiti tattao. 14 Ket dagiti bungbunga nga ag-aguman idi ti cararruam immadayuda kenca, ket isuamin dagiti banbanag a naganas ken nabacnang napucawda kenca, ket saanmonto a masaracanen ida. 15 Dagiti agtagtagilaco cadagitoy a banbanag, a bimmacnangda gapu kencuana, agtatacderdanto idiay adayu gapu iti butengda iti tuocna, nga agsangsangit ken agdungdung-awda, 16 A cunkunada, Asipay, asipay, daydiay dackel nga ili, a nagcawes iti lupot a nalapat a puraw, ken iti purpura, ken iti escarlata, ken naarcosan iti balitoc, ken iti bato a napateg, ken perlas! 17 Ta iti maymaysa nga horas ti nagdackel a kinabacnang ket nagbalin a dapo. Ket amin a piloto, ken amin dagiti aglaylayag nga agturong iti uray ania a disso, ken dagiti marinero, ken amin dagiti agsapsapul iti pagbiagda iti baybay, nagtactacderda iti adayu, 18 Ket agic-ickisda idi makitada ti asuc daydi pannacapuorna, a cunkunada, Ania nga ili ti umas-asping iti daytoy dackel nga ili! 19 Ket pinurwacanda ti tapoc dagiti ul-uloda, ket agic-ickisda, nga agsangsangit ken agananug-ugda a cunkunada, Asipay, asipay, daydi dackel a ili, isu a bimmacnangan dagiti isuamin nga adda sasacayanda idi iti baybay gapu cadagiti agcacapateg a gamengna! ta iti maymaysa nga horas isu ket nagbalin nga langalang. 20 Agragrag-oca maipanggep kencuana, sica langit, ken dacayo a nasantoan nga apostol ken mammadto; ta ti Dios imbalesannacayo kencuana. 21 Ket maysa nga angel a napigsa binagcatna ti maysa a bato a casla maysa a dackel a bato nga gilingan, ket inpurruacna idiay baybay, a kunkunana, Castoy a babaen ti nacaal-alingget a pannacatnag marbecto ti Babilonia daydi dackel a ili, ket saanto pulos a masaracanen. 22 Ket ti timec dagiti umaarpa, ken dagiti agcancanta, ken dagiti pumaflauta, ken dagiti tumatangguyob, saanto a mangngeganen kenca; ket awanton ti manursuro, ti aniaman nga partuat, a masaracan kenca; ket ti uni ti gilingan saanto a mangegen kenca; 23 Ket ti lawag ti maysa a pagsilawan saanto nga aglawagen kenca; ket ti timec ti novio ken ti novia saanto a mangeganen kenca: ta dagiti agtagtagilaco kenca isuda idi dagiti natan-oc nga tattao iti daga; ta gapu cadagiti panagsalsalamangcam dagiti isuamin a nasnacion naallilawmo. 24 Ket nasaracan kencuana ti naiparucpoc a dara dagiti mammadto, ken dagiti sasanto, ken dagiti isuamin a napapatay ditoy daga. CAPITULO 19 1 Calpasanna dagitoy ket nangngegco ti maysa a dackel a timec a casla ariwawa ti umariwecwec nga tattao sadi langit, a cunkunada, Aleluya; Ti pannacaisalacan, ken ti dayag, ken ti dayaw, ken ti pannacabalin, cucua ti Apo a Diostayo: 2 Ta napudno ken nalinteg dagiti panangocomna: ta isu inocomna daydi dackel a balangcantis, isu a nangparugit iti daga babaen ti pannakicamcamalalana, ket naibales ti dara dagiti adipenna cadagiti im-ima di babai. 3 Ket kinunada manen, Aleluya. Ket daydi asucna nagpangato iti agnanayon awan patinggana. 4 Ket dagiti duapulo ket uppat a lallacay ken dagiti uppat nga animal nagrucnoyda ken nagrucbabda iti Dios nga adda a nagtugaw iti trono, a cunkunada, Amen; Aleluya. 5 Ket manipud iti trono rimmuar ti maysa a timec, a kunkunana, Itan-octayo ti Diostayo, dacayo amin nga ad-adipenna, dacayo nga agbuteng kencuana, babassit ken dadackel. 6 Ket nangngegco ti casla ariwawa ti umariwecwec, ken casla ungor dagiti adu a dandanum, ken ti casla uni ti napigsa a gurgurruod, a cunkunada, Aleluya: ta ti Apo Dios a Mannacabalin-amin agari. 7 Agragsactayo ken agragrag-otayo, ket agdaydayawtayo kencuana, ta dimteng ti panagboda ti Cordero, ket ti asawaenna nacasaganan. 8 Ket maipaay kencuana ti panagcawesna iti lupot a nalapat ken puraw, nasileng ken natarnaw: ta ti lupot a nalapat a puraw isu ti kinalinteg dagiti sasanto. 9 Ket isu kinunana caniac, Agsuratca, Bendito dagidiay naawis iti pagbodaan a pangrabii ti Cordero. Ket kinunana caniac, Dagitoy napudnoda a sao ti Dios. 10 Ket nagrucnoyac cadagiti sacsacana tapno agrucbabac kencuana. Ket kinunana caniac, Kitaem ta dica aramiden dayta: Siac ti adipen a cadduam, ken caddua dagiti cacabsatmo a mangsalimetmet iti pammanecnec ken Jesus: agrucbabca iti Dios: ta ti pammanecnec ken Jesus ket isu ti espiritu ti pammadto. 11 Ket nakitac ti langit a silulucat, ket adtoy ti maysa a cabalyo a puraw; ket daydi nagsacay kencuana managan idi ti Matalec ken Napudno, ket maipuon iti kinalinteg mangocom ken agaramid iti gubat. 12 Ket dagiti matana casla darang ti apuy, ket iti ulona adda adu a balbalangat; ket adda maysa a naganna a naisurat, nga awan ti nacaammo, no di isu laeng. 13 Ket nagcawes iti maysa a pagan-anay a nabbasa iti dara: ket ti naganna isu Ti Sao ti Dios. 14 Ket dagiti buybuyot sadi langit sumursurotda kencuana a nagsacay cadagiti cabcabalyo a puraw, nagcawesda ti lupot a nalapat, puraw ken natarnaw. 15 Ket iti ngiwatna rummuar ti maysa a campilan a natadem, tapno pangdunorna cadagiti pagpagarian: ket iturayanna ida babaen ti maysa a sarucod a landoc: ket isu payatenna ti pagpespesan ti uvas iti kinainget ti pungtot ti Dios a Mannacabalin-amin. 16 Ket iti cawesna ken idi rabaw di luppona adda a naisurat daytoy a nagan, ARI DAGITI AR-ARI, KEN APO DAGITI AP-APPO. 17 Ket nakitac ti maysa nga angel nga agtatacder iti init; isu a pimmuccaw babaen ti dackel a timec, a kunkunana cadagiti isuamin a tumatayab nga agtaytayab iti tangatang, Umaycayo ken aggu-urnongcayo iti pangrabii ti dackel a Dios; 18 Tapno canenyo ti lasag dagiti ar-ari, ken ti lasag dagiti capcapitan, ken ti lasag dagiti mamaingel a lallaki, ken ti lasag dagiti cabcabalyo, ken dagiti nagsacay cadacuada, ken ti lasag dagiti isuamin a tattao, agwayawayada man wenno paad-adipen, babassit ken dadackel. 19 Ket nakitac daydi animal, ken dagiti ar-ari ti daga, ken dagiti buybuyotda, a naurnongda tapno gubatenda daydiay nagsacay idi cabalyo, ken daydi buybuyotna. 20 Ket natiliw daydi animal, ket nairaman kencuana daydi saan a pudno a mammadto a nagar-aramid cadagiti dadatlag iti sangoananna, isuda a pinangal-allilawna cadagiti immawat iti marca daydi animal, ken dagidi nagrucrucbab iti ladawanna. Dagitoy dua naitappuacda a sibibiag idiay danaw ti apuy a dumardarang nga addaan azufrena. 21 Ket dagidi dadduma napapatayda babaen ti campilan daydi nagsacay idi cabalyo, daydi campilan a rummuar idi ngiwatna: ket isuamin dagiti tumatayab nagbussogda cadagiti laslasagda. CAPITULO 20 1 Ket nakitac ti maysa nga angel a bimmaba nanipud langit, ket ti tulbec ti mangliwengliweng nga abut adda kencuana ken ti maysa a dackel a cawar iti imana. 2 Ket tiniliwna daydi dragon, daydi uleg a cadaanan, nga isu ti Diablo, ken Satanas, ket pinarautanna iti bayat ti sangaribo a tawen, 3 Ket isu ingarangogongna iti abut a mangliwengliweng, ket inrikepanna, ken sinelloanna ti rabawna, tapno dina allilawenen dagiti nasnacion, agingga iti maturpos dagiti sangaribo a tawen: ket inton maturpos daytoy masapul a maluc-atan iti bassit a canito. 4 Ket nakitac dagiti trono, ken dagiti nagtugaw cadacuada, ket naitalec cadacuada ti panangocom: ket nakitac dagiti carcararrua dagiti naputolan gapu iti pammanecnec ken Jesus, ken gapu iti sao ti Dios, ken dagup dagiti saan a nagrucbab idi animal, ken iti ladawanna, ken saan a namarcaan cadagiti mugmugingda, wenno dagiti imada; ket dagitoy nagbiagda ket nakipagarida ken Cristo iti sangaribo a tawen. 5 Dagiti sabsabali cadagiti natay saanda a napagbiag agingga iti di maturpos dagiti sangaribo a tawen. Daytoy isu ti umuna a panagungar. 6 Bendito ken santo ti mairaman iti panagungar nga umuna: cadacuada awan pannacabalin ti maicaddua nga ipapatay, no di ket isudanto dagiti papadi ti Dios ken ni Cristo, ket makipagaridanto kencuana bayat ti sangaribo a tawen. 7 Ket no maturpos dagiti sangaribo a tawen, ni Satanas maluc-atanto iti nacabaludanna, 8 Ket rummuarto tapno allilawenna dagiti pagpagarian nga adda cadagiti uppat a suli ti daga, da Gog ken Magog, tapno urnongenna ida a maipaay iti gubat: ti bilangda ket cas cadagiti darat ti baybay. 9 Ket nagwarasda iti naglawaan ti daga, ket linawlawda daydi campamento dagiti sasanto iti aglicmut, ken ti ili nga ay-ayaten unay: ket bimmaba ti apuy a naggapu ti Dios sadi langit, ket inalun-onna ida. 10 Ket daydi diablo a nangallilaw cadacuada naibelleng idiay dan-aw nga apuy ken azufre, isu met a ayan di animal ken daydi saan nga pudno a mammadto, ket matutuocdanto iti aldaw ken rabii iti awan inggana. 11 Ket nakitac ti maysa a dackel nga trono a puraw, ken daydi nagtugaw kencuana, nga iti sangoananna ket nagtalaw ti daga ken langit; ket saan a nasaracan ti dissoda. 12 Ket nakitac dagiti natay, babassit ken dadackel, a nagtatacder iti sangoanan ti Dios; ket nabistrad dagiti pagbasaan; nabistrad met iti sabali nga pagbasaan, nga isu ti pagbasaan ti biag: ket dagiti natay naocomda cadagiti banbanag a naisurat cadagiti pagbasaan, cas mayannurot cadagiti aramidda. 13 Ket ti baybay inyawatna dagiti natay nga addada kencuana; ket ni patay ken ni impierno inyawatda dagiti natay nga adda idi cadacuada: ket naocomda tunggal maysa a cas mayannurot cadagiti ar-aramidda. 14 Ket ni patay ken ni impierno naitappuacda iti dan-aw nga apuy. Daytoy ti maicaddua nga ipapatay. 15 Ket no ti siasinoman saan nga nasaracan a naisurat iti pagbasaan ti biag naitappuac idiay dan-aw nga apuy. CAPITULO 21 1 Ket nakitac ti maysa a langit a baro ken maysa a daga a baro: ta daydi immuna a langit ken daydi immuna a daga napalabasdan; ket ti baybay awanen. 2 Ket siac ni Juan nakitac ti santo nga ili, ti baro a Jerusalem, a bimmaba manipud langit nga aggapu iti Dios, naisagana a casla maysa a novia a naarcosan a maipaay iti noviona. 3 Ket nangngegco ti maysa a dackel a timec a naggapu iti langit nga agcuncuna, Adtoy, iti tabernaculo ti Dios adda cadagiti tattao, ket isu makipagnaedto cadacuada, ket isudanto dagiti tattaona, ket ti Dios met laeng addanto cadacuada, a Dios da. 4 Ket ti Dios punasennanto ti amin a lulua cadagiti matada; ket awanton ni patay, ket awanto metten ti sasaibbec, wenno sangsangit, wenno rigrigat: ta dagiti immuna a banbanag ket napalabasdan. 5 Ket daydi situtugaw idi trono kinunana, Adtoy, pagbalinec a babbaro dagiti isuamin a banbanag, ket kinunana caniac, Isuratmo: Ta dagitoy nga sasao ket napudnoda ken mapagtalcanda. 6 Ket kinunana caniac, Nalpasen. Siac ti Alfa ken Omega, ti pangruggian ken panungpalan. Siac itdecto daydiay mawaw iti ubbog ti danum ti biag nga awan baybayadna. 7 Ti agballiginto tawidennanto dagitoy a banbanag; ket siacto ti Diosna, ket isunto ti anacco. 8 Ngem no maipapan cadagiti natacrut, ken cadagiti di mamati, ken dagiti nasabrac, ken dagiti nacapapatay, ken dagiti mannakicamalala, ken dagiti managanito, ken dagiti agrucbab cadagiti didiosen, ken dagiti isuamin nga agul-ulbod, ti bingayda addanto idiay dan-aw a sumsumged ti apuy ken azufre: daytoy ti maicaddua nga ipapatay. 9 Ket maysa cadagiti pito nga angel nga addaan cadagiti pito nga malucong a napnoda cadagiti pito a camaudianan a pannaplit, immay ket nakisao caniac, a kunkunana, Umayca ditoy, ipakitacto kenca ti novia, ti asawa ti Cordero. 10 Ket impannac babaen ti espiritu iti maysa a bantay a dackel ken natayag, ket impakitana caniac ti dackel a ili, ti nasantoan a Jerusalem, nga agpabpababa nanipud langit a naggapu iti Dios, 11 Isu nga addaan ti dayag ti Dios: ti raniagna umas-asping iti maysa a bato a napateg unay, cas bato a jaspe, aganinaw a casla cristal; 12 Adda maysa a bacudna a dackel ken natayag, adda sangapulo ket dua a ruanganna, ket cadagiti ruangan adda sangapulo ket dua nga angel, ket adda nagnagan a naisurat cadacuada, nga isuda dagiti nagnagan dagiti sangapulo ket dua a tribu ti Israel: 13 Iti daya adda idi dagiti tallo a ruangan; iti amianan tallo a ruangan; iti abagatan tallo a ruangan; ket iti laud tallo a ruangan. 14 Ket daydi bacud ti ili adda sangapulo ket dua a pamunganayanna, ket cadacuada adda dagiti nagnagan dagiti sangapulo ket dua nga apostol ti Cordero. 15 Ket daydi makisasao caniac adda maysa a pagrucodna a balitoc tapno rucodenna ti ili, ken dagiti ruanganna, ken dagiti bacudna. 16 Ket daydi ili nagcuadrado, ket ti rucod ti caatiddugna casta met ti caacabana: ket rinucodna idi pagrucodna daydi ili, sangapulo ket dua ribo nga estadio8. Ti caatiddug ken caacaba ken ti cangato agpapadada. 17 Ket rinucodna daydi bacudna, ket sangagasut uppat a pulo ket uppat a casico, cas panagrucod ti maysa a tao, isu ti panagrucod, daydi angel. 18 Ket daydi a naaramat iti bacudna ket jaspe: ket daydi ili balitoc a pulpulos, a cas iti pulpulos a sarming. 19 Dagidi pamunganayan daydi bacud ti ili naarcosanda iti amin a kita dagiti batbato a napateg. Ti umuna a pamunganayan jaspe; ti maicaddua, zafiro; ti maicatlo, calcedona; ti maicapat, esmeralda; 20 Ti maicalima, sardonica; ti maicanem, sardio; ti maicapito, crisolito; ti maicawalo, berilo; ti maicasiam, topacio; ti macaisangapulo, crisoprasio; ti macaisangapulo ket maysa, jacinto; ti macaisangapulo ket dua, amatista. 21 Ket dagiti sangapulo ket dua a ruangan ket adda sangapulo ket dua a perlasda; tunggal maysa cadagiti ruangan maymaysa a perlas: ket ti calsada daydi ili ket balitoc a pulpulos, nga aganinaw a casla cristal. 22 Ket awan ti nakitac a templo kencuana: ta ni Apo Dios a Mannacabalin-amin ken daydi Cordero ket isuda iti templona. 23 Ket ti ili awan ti pacasapulanna ti init, wenno iti bulan, tapno silnaganda: ta ti dayag ti Dios isu ti nanglawag kencuana, ket ti pagsilawanna isu ti Cordero. 24 Ket dagiti nasnacion nga naisalacan magmagnadanto iti lawagna: ket dagiti ar-ari ti daga iyegda kencuana ti dayag ken dayawda. 25 Ket dagiti ruanganna saandanto a maripcan uray caano iti aldaw: ta awanto iti rabii sadiay. 26 Ket iyegdanto kencuana ti dayag ken ti dayaw dagiti nasnacion. 27 Ket saanto a sumrec kencuana uray caano ti aniaman a narugit, wenno uray siasino nga agaramid ti macarimon, wenno ulbod: no di laeng dagidiay adda a naisurat iti pagbasaan ti biag a cucua ti Cordero. CAPITULO 22 1 Ket impakitana caniac ti maysa a natarnaw a carayan ti danum ti biag, a sumilsilap a cas iti sarming a crystal, agayus a rummuar ti trono ti Dios ken iti Cordero. 2 Iti tengnga ti calsada sadiay, ket iti agsumbangir nga igid daydi carayan, adda daydi cayo ti biag, nga adda sangapulo ket dua a kita ti bungana, nga agbunga iti binulan: ket dagiti bulbulong daydi cayo maipaayda ti pannacaagas dagiti nasnacion. 3 Ket awanton ti lunod: ket ti trono ti Dios ken ti Cordero addanto kencuana; ket dagiti adipenna agservidanto kencuana: 4 Ket makitadanto ti rupana; ket ti naganna addanto cadagiti mugmugingda. 5 Ket awanton ti rabii sadiay; ket dida masapul ti lawag ti pagsilawan, wenno ti lawag ti init; ta ni Apo Dios lawaganna ida: ket agarinto iti awan patinggana. 6 Ket kinunana caniac, Dagitoy a sasao mapagtalcanda ken napudnoda: ket ti Apo Dios dagiti nasantoan a mammadto imbaonna daydi angelna tapno ipakitana cadagiti ad-adipenna dagiti banbanag a masapul a mapasamac iti mabiit. 7 Adtoy, siac umayac iti madaras: bendito daydiay mangsalimetmet cadagiti sasao ti padto daytoy nga pagbasaan. 8 Ket siac ni Juan nakitac dagitoy a banbanag, ken nangngegco. Ket idi nangngegco ken nakitac, nagrucnoyac tapno agrucbabac iti sangoanan dagiti sacsaca daydi angel a nangipakita caniac cadagitoy a banbanag. 9 Ket isu kinunana caniac, Kitaem ta dica aramiden dayta: ta siac adipenac a cadduam, ken caddua dagiti cacabsatmo a mammadto, ken dagiti mangsalimetmet cadagiti sasao daytoy a pagbasaan: agrucbabca iti Dios. 10 Ket kinunana caniac, Saanmo a selloan dagiti sasao ti padto daytoy a pagbasaan: ta ti aldaw adtoyen. 11 Sinoman a nakillo, agaramid coma latta iti kinakillo: ket ti sinoman a narugit, agaramid coma latta ti narugit: ket ti sinoman a nalinteg, agaramid latta ti nalinteg: ket ti sinoman a santo, agaramid coma latta ti nasantoan. 12 Ket, adtoy, siac umayac a dagus; ket ti panggunggona adda caniac, tapno gunggonaac ti tunggal maysa nga cas mayannatup iti aramidna. 13 Siac ti Alpha ken ti Omega, iti pangruggian ken ti panungpalan, iti umuna ken ti camaudianan. 14 Bendito dagidiay a natulnog nga agaramid dagiti bilbilinna, tapno adda calinteganda nga aglac-am iti cayo ti biag, ken tapno mabalinda ti sumrec cadagiti ruruangan ti ili. 15 Idiay ruar addada dagiti as-aso, ken dagiti managanito, ken dagiti mannakicamalala, ken dagiti nacapapatay, ken dagiti agrucbab cadagiti didiosen, ken tunggal maysa nga agayat ken agaramid ti ulbod. 16 Siac ni Jesus imbaonco ti angelco tapno sacsianna cadacayo dagitoy a banbanag cadagiti iglesia. Siac ti capuonan ken ti caputotan ni David, ken ti naraniag ken baggac ti agsapa. 17 Ket daydi Espiritu ken daydi novia kunada, Umayca. Ket ti dumngeg cunaenna, Umayca. Ket ti sinoman a mawaw umay. Ket siasinoman a mayat, awatenna ti danum ti biag nga awan baybayadna. 18 Siac sacsiac ti tunggal maysa a dumngeg cadagiti sasao ti padto daytoy a pagbasaan, No addanto mangnayon cadagitoy a banbanag, ti Dios inayonnanto kencuana dagiti pannaplit a naisurat itoy a pagbasaan: 19 Ket no addanto mangkissay cadagiti sasao ti pagbasaan daytoy a padto, ti Dios iccatennanto ti pannacabagina iti cayo ti biag, ken idiay nasantoan a ili, ken cadagiti banbanag a naisurat itoy a pagbasaan. 20 Isu a mangsacsi cadagitoy a banbanag kunana, Kinapudnoanna siac umayac a dagus. Amen. Agpayso unay, umayca, Apo Jesus. 21 Ti parabur ni Apo Jesus Cristo agtaeng coma cadacayo amin. Amen.