TI SURAT NI APOSTOL PABLO CADAGITI TAGA FILIPOS CAPITULO 1 1 Ni Pablo ken ni Timoteo, nga ad-adipen ni Jesus Cristo, isuratda cadagiti isuamin a sasanto ken Cristo Jesus idiay Filipos, agraman cadagiti ob-obispo ken dagiti diacono: 2 Parabur maadda coma cadacayo, ken talna, nga aggapu ti Dios nga Amatayo, ken ni Apo Jesus Cristo. 3 Agyamanac iti Diosco ti tunggal pannacalaglagipco cadacayo, 4 Cancanayon cadagiti panagcararagco gapu cadacayo amin ket agdawdawatac nga siraragsac, 5 Gapu iti pannakicadcadduayo iti evangelio nanipud idi immuna nga aldaw aginggana ita; 6 Ket sitatalgedac itoy met laeng a banag, a daydiay nangirugi cadacayo ti nasayaat nga aramid ket an-anayennanto agingga iti aldaw ni Jesus Cristo: 7 Iti casta nalinteg caniac a panpanunotencayo amin, gapu ta addacayo itoy pusoc; ken cadagiti pannacabalbaludco, a cas met iti panangisakit ken pammanecnecco iti evangelio, dacayo amin mairamancayo caniac itoy a parabur. 8 Ta ti Dios iti sacsic, no casano ti iliwco cadacayo amin iti nasnec a dungngo ni Jesus Cristo. 9 Ket daytoy ti cararagco, a ti ayatyo umadu coma la nga umadu iti kinasirib ken iti amin a pannacaawat; 10 Tapno mabigbigyo coma dagiti banag a nasayaat; tapno napudnocayo ken awan iti pacapilawanyo agingga iti aldaw ni Cristo; 11 A mapnocayo cadagiti bungbunga iti kinalinteg, gapu ken Jesus Cristo, a maipaay iti dayag ken pacaidayawan ti Dios. 12 Ngem cayatco a maawatanyo, cacabsat, a dagiti banbanag a napasamac caniac ket nagbanagda ketdi a nangparang-ay ti evangelio; 13 Iti casta dagiti pannacarepreppetco gapu ken Cristo naiparangarangda cadagiti isuamin idiay uneg ti palacio, ken cadagiti sabsabali pay a disdisso; 14 Ket adu cadagiti cacabsat iti Apo, idi a napakiredda gapu cadagiti pannacarepreppetco, ad-adda pay iti turedda nga agsao iti sao nga awan butbutengda. 15 Dagiti dadduma pudno nga icascasabada ni Cristo gapu iti apal ken pannakisusic laeng; ngem dagiti sabali iti met naimbag a nakem: 16 Ti maysa icascasabana ni Cristo gapu iti suppiat, ket saan a napudno, ket panpanunotenda a nayonan ti rigatco cadagiti pannacarepreppetco: 17 Ngem daydiay maysa gapu iti ayat, idinto nga ammoda a naisaadac a mangicanawa iti evangelio. 18 Ania ngarud? nupay casta, uray casano, uray pagpambar, uray napudno, ni Cristo maicascasaba; ket iti daytoy agragragsacac, wen, ket agragsacacto. 19 Ta ammoc a daytoy rumsuanto a pacaisalacanac gapu cadagiti panangidawdawatyo, ken ti pannacaipaay ti Espiritu ni Jesus Cristo, 20 Cas iti nasnec a panagpadpadaanco ken pananginanamac, a diacto maibabain iti uray ania, no di ket idinto a situturedac, a cas masansan, casta met ita ni Cristo mapatan-oc itoy bagic, uray gapu iti biag, wenno uray gapu iti patay. 21 Ta no caniac ti panagbiag isu ni Cristo, ket ti ipapatay isu ti gunggona. 22 Ngem no ti panagbiag iti lasag, daytoy pagbungaenna ti aramidco: iti casta diac ammo ti piliecto. 23 Ta addaac a naglabbetan dagiti dua a banag, a tarigagayac ti pumanaw, ken agnaed ken Cristo; isu a nasaysayaat unay: 24 Numan pay casta ti panagtaeng iti lasag ket nangnangrona a masapul maipuon cadacayo. 25 Idinto ngarud a capnecac daytoy, ammoc a matdaacto ket makipaggianacto cadacayo amin a maipaay iti irarang-ayyo ken ragsacyo iti pammati; 26 Tapno umadu ti rag-oyo ken Jesus Cristo gapu caniac a maipuon iti caaddacto manen cadacayo. 27 Isuna laeng a ti panagbibiagyo ket maicari coma iti evangelio ni Cristo: tapno uray umayac ket makitacayo, wenno no awanac, madamagco coma ti casasaadyo, a sititibkercayo iti sangsangcamaysa nga espiritu, agraman sangsangcamaysa a nakem nga umag-agawa a maipaay iti pammati iti evangelio; 28 Nga awan ket ti cabutengyo gapu cadagiti cabusoryo: ket daytoy isu cadacuada ti pagilasinan ti pannacapucaw, ngem cadacayo ti pannacaisalacan, ket daytoy iti biang ti Dios. 29 Ta maipuon ken Cristo maited cadacayo, saan laeng a ti panamati kencuana, no di ket ti panagsagaba met gapu kencuana; 30 Ket adda cadacayo daydi met la pannakidangadang a nakitayo caniac, ket madamagyo ita nga adda caniac. CAPITULO 2 1 No adda ngarud aniaman a pammagbaga a maipuon ken Cristo, no adda aniaman a pangliwliwa ti ayat, no adda aniaman a pannacaicadcaddua iti Espiritu, no adda aniaman nga ayat ti puso ken panangnga-asi, 2 Anayenyo iti rag-oc, nga agmaymaysa coma ti panggepyo, adda agmaymaysa nga ayatyo, maymaysa a panagtitimpuyog, ken maymaysa a nakem. 3 Awan coma ti maaramid gapu iti suppiat wenno iti kinatangsit; no di ket mabuyogan coma iti kinapacumbaba a ti tunggal maysa padayawanna ti sabali a cas natantan-oc ngem isu met laeng. 4 A saan a kitaen ti tunggal maysa cadacayo ti paglainganna laeng, no di ket tunggal maysa kitaenna met coma ti paglaingan dagiti sabsabali. 5 Adda coma cadacayo daytoy a nakem, nga adda met ken Cristo Jesus: 6 Isu, nga idinto nga addaan galad a Dios, saanna nga incancano ti pannakipada iti Dios: 7 No di ket binaybay-anna, ket innalana ti galad nga adipen, ket naaramid a capadpada dagiti tao: 8 Ket idinto a nagparang iti casasaad ti tao, nagpacumbaba a nacnakemna, a nagtulnog agingga ken patay, uray pay ti patay iti cruz. 9 Gapuna met a ti Dios intan-ocna iti cangatoan unay, ket iniccanna ti nagan a natantan-oc ngem iti isuamin a nagan: 10 Tapno iti nagan ni Jesus isuamin a tumeng agparintumengto, dagiti adda sadi langit, dagiti adda iti daga, ken dagiti adda iti uneg ti daga; 11 Ken amin a dila ipudnodanto a ni Jesus Cristo isu ti Apo, tapno pacaidayagan ti Dios Ama. 12 Iti casta, ay-ayatec, cas ti iya-annugotyo a cancanayon, saan laeng nga iti sangoc, no di ket nangnangrona pay ita nga awanac, iparangarangyo iti bucodyo a pannacaisalacan met laeng a buyugen ti buteng ken pigerger. 13 Ta ti Dios ti mangaramid cadacayo iti panagayat ken iti panagaramid ti naimbag nga pagayatanna. 14 Aramidenyo dagiti isuamin a banbanag nga awan tantanabutob ken supsupiat: 15 Tapno awan coma ti pacababalawanyo ken natarnawcayo, annacnacayo ti Dios, nga awan pacapilawanyo, iti nagtengngaan ti maysa a nakillo ken managdacdakes nga nacion, ket iti nagtetengaanda aglawagcayo a casla silsilaw iti lubong; 16 Nga iracuracyo iti sao ti biag; tapno addanto pagragsacac iti aldaw ni Cristo, gapu ta diac nagtartaray nga awan nagmamaayanna, ken diac met nagbannog nga awan capapaayanna. 17 Wen, ket uray no maidatonacto iti rabaw iti daton ken panagservi ti pammatiyo, agrag-oac, ken makipagrag-oac cadacayo amin. 18 Ket casta met agrag-ocayo, ken makipagrag-ocayo caniac. 19 Ngem inanamaec ken Apo Jesus nga ibaonco ni Timoteo cadacayo iti mabiit, tapno mabang-aran met ti nakemco, intono maammoac ti casasaadyo. 20 Ta awanen iti sabali a tao nga agcacapanunotan, a mangisakit a sia-anep iti casasaadyo. 21 Ta amin sapsapulenda ti paglainganda, saan a dagiti banbanag a maipapan ken ni Jesus Cristo. 22 Ngem ammoyo ti pannacapadasna, isuna nga, cas iti anac ken amana, nagservi a cadduac iti evangelio. 23 Gapuna isu ti namnamaec nga ibaon cadagitoy a tiempo, apaman a maammoac no ania ti casasaadco. 24 Ngem manginanamaac iti Apo nga umayacto met iti mabiit. 25 Nupay casta pinagarupco a masapul nga ibaonco cadacayo ni Epafrodito, a cabsatco, ken cadduac iti trabaho, ken cabuyotac, ngem babaonenyo, isu a kimmitkita cadagiti nasapsapulco. 26 Ta mailiw unay cadacayo amin, ken napnoan iti dadagsen, agsipud ta nadamagyo nga isuna ket nagsakit. 27 Kinapudnona a nagsakit ket nganngani natay: ngem kinaasian ti Dios; ket saan la nga isu, no di siac pay, tapno awan ladingitco nga agsusucot. 28 Iti casta ngarud inbaonco iti adu nga kina-annad, tapno, inton isu makitayo manen, agragsaccayo, ket mapabassit met coma ti lidayco. 29 Gapuna awatenyo iti biang ti Apo a mapacuyogan ti amin a ragsac; ket dagiti cacastoy patgenyo: 30 Ta gapu iti panagservina ken Cristo ket nganngani natay, nga impeggadna ti biagna, tapno an-anayenna ti pagcuranganyo iti panagservi caniac. CAPITULO 3 1 Camaudiananna, cacabsatco, agrag-ocayo iti Apo. Ti panangisurat cadagitoy met la nga banag cadacayo, saan a maca-alimuteng caniac, ngem cadacayo pacapatibkeran. 2 Annadanyo dagiti as-aso, annadanyo dagiti dakes nga agar-aramid, annadanyo ti managcugit. 3 Ta datayo ti pannacacugit, nga agrucbab ti Dios babaen ti espiritu, ken agrag-o ken Cristo Jesus, ket awan ti panagtalectayo iti lasag. 4 Uray siac met mabalinco coma ti agtalec iti lasag. No adda siasinoman nga agpanunot nga agtalec iti lasag, nangnangronaac pay: 5 Nacugitac iti maicawalo nga aldaw, iti capuonan ti Israel, iti caputotan ni Benjamin, Hebreo dagiti Hebreo; no maipapan iti linteg, maysanac a Fariseo; 6 Ket no maipapan iti regta, nangidadanes iti iglesia; ket no maipapan iti kinalinteg nga adda iti linteg, awan pacapilawac. 7 Ngem dagidiay nga banbanag a gunggona caniac idi, imbilangco ida a pucaw gapu ken Cristo. 8 Wen awan duduana, ibilangco amin dagiti banbanag a pucaw gapu iti napateg unay a pannacaammo ken Cristo Jesus nga Apoc: a gapu kencuana pinucawco amin a banbanag, ket ibilangco ida a rugit, tapno magun-odac ni Cristo, 9 Ket tapno maaddaac kencuana, a diac cupicupan ti kinalintegco met laeng, nga maigapu iti linteg, no di ket gapu iti pammati ni Cristo, ti kinalinteg nga aggapu iti Dios gapu iti pammati: 10 Tapno maammoac ni Cristo, ken ti pannacabalin ti panagungarna, ken ti pannakicadcaddua cadagiti sinagabana, tapno agbalinac a mayasping ti ipapatayna; 11 Bareng ti aniaman coma a pamay-an ket magun-odac ti panagungar cadagiti natay. 12 Saan a casla nacagun-odacon, wenno ket di naan-anayacon: no di ket agtuloyac latta, bareng coma no maalac daydiay gapu a nangala-an met ni Cristo Jesus caniac. 13 Cacabsat, diac ibilang ti bagic a nagun-odacon: ngem daytoy maysa iti aramidec, idinto a lipatac dagiti malicudan, camacamec dagiti banbanag a masangoanan, 14 Agtarayac a sipipinget nga agturong iti pagpatinggaan maipuon iti gunggona ti natan-oc a panangawis ti Dios gapu ken Cristo Jesus. 15 Datayo ngarud amin, a nataenganen, addaantayo coma ti castoy a panunot: ket no mapanunotyo ti maisupadi daytoy, ti Dios lawagannanto cadacayo. 16 Isuna laeng, nga iti nacagtengantayon, ituloytayo coma ti pannagna ti pannagsusurot, ituloytayo coma ti sangsangcamaysa a panunot. 17 Cacabsat, tumuladcayo a sititimpuyog caniac, ket siputanyo dagidiay casta ti pannagnada ken cas iti pagulidananmi nga adda cadacayo. 18 (Ta adu dagiti magna, isuda nga imbagac a namin-adu cadacayo, ket ita ibagac manen a sisasangit cadacayo, nga cabusor ida ti cruz ni Cristo: 19 A ti panungpalanda isu ti pannacadadael, a ti Diosda isu ti tianda, ket ti dayagda adda iti bainda, isuda panunotenda laeng ti naindagaan nga banbanag.) 20 Ta ti pannakipagilitayo ket adda sadi langit; ket manipud idiay urayentayo met ti Manangisalacan, ni Apo Jesus Cristo: 21 Isu pabaroennanto daytoy nanumo a bagitayo, tapno mayasping iti nadayag a bagina, cas mayalubog iti pannacabalinna met a mangpatulnog cadagiti isuamin a banbanag a maipaay met laeng kencuana. CAPITULO 4 1 Gapuna, cacabsatco napateg nga ay-ayatec ken il-iliwec, ragsacco ken balangatco, agtalinaedcayo ngarud iti Apo, dacayo a napateg unay nga ay-ayatec. 2 Bagbagaac ni Evodias, ket bagbagaac ni Sintique, nga agmaymaysada coma ti nakemda iti Apo. 3 Ket dawatec kenca met, matalec a catulongan, a tulongam coma dagitoy nga babbai a nakipagbannog caniac iti evangelio, agraman met ken Clemente, ken cadagiti dadduma pay a catulongac, a dagiti nagnaganda ket addada iti libro ti biag. 4 Agrag-ocayo iti Apo iti cancanayon: ken ibagac manen, Agrag-ocayo. 5 Maammoan coma dagiti isuamin a tattao ti kinamanagparbengyo. Ti Apo adtoyen. 6 Dicayo madanagan iti uray ania; no di ket dagiti isuamin babaen iti cararag ken ar-araraw agraman panagyaman maipacaammo coma dagiti dawdawatyo iti Dios. 7 Ket ti talna ti Dios, a labsanna ti amin a pannacaawat, aywanannanto dagiti puspusoyo ken dagiti panunotyo ken Cristo Jesus. 8 Camaudiananna, cacabsat, aniaman a banbanag a napudno, aniaman a banbanag a nadayaw, aniaman a banbanag a nalinteg, aniaman a banbanag a nadalus, aniaman a banbanag a macaay-ayo, aniaman a banbanag a naimbag ti damagda; no adda aniaman a kinasingpet, ken no adda aniaman a kinadayaw, panunotenyo dagitoy a banbanag. 9 Dagiti banbanag, nga inadalyo, ken inawatyo, ken nangngegyo, ken nakitayo caniac, aramidenyo ida: ket ti Dios ti talna addanto cadacayo. 10 Ket nagragrag-oac unay iti Apo, ta iti camaudiananna ti panunotyo maipapan caniac ket rimmayray manen; iti kinapudnona napnoancayo, ngem na-awanancayo iti gundaway. 11 Saanco a saoen no maipapan iti pannacasapul: ta naadalcon, no aniaman iti casasaadco, didiayacto a mapnec. 12 Ammoc ti panagsagaba iti kinanumo, ket ammoc ti panaglac-am iti nam-ay: iti tunggal disso ken iti isuamin a casasaad naadalco iti palimed ti pannacapnec ken ti panagsagaba iti bisin, casta met ti panaglaplapusanan ken ti kinakirang. 13 Mabalinac dagiti amin a banbanag gapu ken Cristo a mamapigsa caniac. 14 Nupay casta naimbag ti inaramidyo, iti pannakiramanyo caniac iti sagabaec. 15 Ket dacayo a taga Filipos ammoyo met, nga idi pannacairugi ti evangelio, idi pimmanawac idiay Macedonia, awan ti iglesia a nakicadcaddua caniac iti banag a panagited ken panagawat, no di dacdacayo laeng. 16 Ta uray idiay Tesalonica nangipaoitcayo iti naminsan ken nangipaoitcayo manen ti maipaay iti pacasapulac. 16 Ta uray idiay Tesalonica nangipaoitcayo iti naminsan ken nangipaoitcayo manen ti maipaay iti pacasapulac. 18 Ngem adda amin caniac, ken aduanac: Mapnecac, iti calpasan ti pangawatco ken Epafrodito dagiti impaoityo, nabanglo a nasam-it nga sayamusom, daton nga apag-isu, a pagay-ayatan unay ti Dios. 19 Ket ti Diosco punnoannanto ti amin a pacasapsapulanyo cas mainugot iti kinabacnangna iti dayag gapu ken Cristo Jesus. 20 Ket ita iti Dios ken Amatayo maitantan-oc coma iti agnanayon awan patinggana. Amen. 21 Cablaawanyo ti tunggal santo ken Cristo Jesus. Dagiti cacabsat nga adda a cadduac cablaawandacayo. 22 Isuamin dagiti sasanto cablaawandacayo, nangnangrona dagiti cabbalay ni Cesar. 23 Ti parabur ni Apo Jesus Cristo agtaeng coma cadacayo amin. Amen. ¶ Naisurat idiay Roma nga maipaay cadagiti taga Filipos babaen ken Epafrodito.