|
FILEMON 1 Ni Pablo, balud ni Jesus Cristo, ken ni Timoteo a cabsattayo, isuratmi ken Filemon a napateg unay nga ay-ayatentayo, ken catulongantayo, 2 Ken ni ay-ayatentayo unay nga Apia, ken ni Arquipo a cabuyotantayo, ken iti iglesia iti balaymo: 3 Parabur maadda coma kenca , ken talna, nga aggapu ti Dios nga Amatayo ken ni Apo Jesus Cristo. 4 Agyamanac iti Diosco, nga ibabaetca a cancanayon cadagiti carcararagco, 5 Idinto a naammoac ti ayatmo ken ti pammatim, nga adda kenca ken Apo Jesus, ken cadagiti isuamin a sasanto; 6 Tapno ti pannacaicadcaddua ti pammatim agbalin coma a napigsa babaen ti pannacaammo iti isuamin nga imbag nga adda cadacayo a maipaay ken Cristo Jesus. 7 Ta adda dackel a rag-omi ken liwliwami gapu iti ayatmo, agsipud ta dagiti puspuso dagiti sasanto ket naliwliwada gapu kenca, cabsat. 8 Gapuna, uray adda adu a turedco gapu ken Cristo a mangibilin kenca iti maipaay, 9 Nupay casta gapu iti ayat caycayatco iti dumawat kenca, idinto a castoyac siac ni Pablo a lumacayen, ken ita balud pay gapu ken Jesus Cristo. 10 Dawatec kenca gapu ken anacco nga Onesimo, nga inyanacco cadagiti cawcawarco: 11 Isu nga idi naminsan ket awan iti gunggonana kenca, ngem ita ket macagunggonan kenca ken caniac: 12 Isu a pinagsublic manen: ngarud awatem coma isuna, cayatco nga saoen, a cas iti pusoc met laeng: 13 Tinarigagayac nga isu ket ibatic coma iti dennac, tapno cas iti casucatmo ket tulongannac coma cadagiti pannacacawcawarco gapu iti evangelio: 14 Ngem diac cayat nga aramiden no awan ti pananganamungmo; tapno ti kinaimbagmo saan coma a cas nagtaud a casapulan, no di ket iti pagayatam. 15 Ta nalabit gapu itoy met laeng isu nayadayu kenca iti bassit a tiempo, tapno awatem isuna iti agnanayon; 16 Saanen a casla adipen, no di ket napatpateg ngem adipen, cabsat nga ay-ayaten unay, nangrona caniac, ngem nangnangrona pay kenca, nga agpadpada iti lasag, ken iti biang ti Apo? 17 No ngarud ibilangnac nga caddua, awatem isuna a cas siac met laeng. 18 No adda nacabiddutanna kenca, wenno adda nacautanganna kenca, ibilangmo iti cuentac; 19 Siac ni Pablo ti nagsurat babaen iti imac met laeng, bayadacto: numan pay diac saoen kenca nga uray pay ti kinataom ket nautangmo caniac. 20 Wen, cabsat, adda coma rag-oc kenca iti Apo: pabang-arem iti pusoc gapu ken Cristo. 21 Ta adda panagtalecco iti iya-annugotmo isu nga nagsuratac kenca, ket ammoc nga sica ket aramidemto pay ti ad-adda ngem iti ibagac. 22 Ket casta met nga isaganaannac ti pagdagusac: ta inanamaec nga gapu cadagiti carcararagyo ket maipaayacto cadacayo. 23 Cablaawannacayo ni Epafras, nga cadduac iti pagbaludan gapu ken Cristo Jesus; 24 Ni Marcos, ni Aristarco, ni Demas, ni Lucas, dagitoy dagiti catulongac. 25 Ti parabur ni Apotayo a Jesus Cristo adda coma iti espirituyo. Amen. ¶ Naisurat idiay Roma a maipaay ken Filemon, babaen ken Onesimo, maysa nga adipen. |