|
JUDAS 1 Ni Judas, adipen ni Jesus Cristo, ken cabsat ni Santiago, cadagiti sinantificar iti Dios Ama, ket naaywanan a maipaay ken Jesus Cristo: ken naayaban: 2 Caasi maadda coma cadacayo, ken talna, ken ayat, umaduda coma nga umadu. 3 Ay-ayatec, idinto nga icabilco ti amin a kinaregtac nga agsurat cadacayo iti maipapan iti sapasap a pannacaisalacantayo, napilitac nga agsurat cadacayo, a balacadancayo tapno makidangadangcayo a sibibileg gapu iti pammati a naminpinsan a naited cadagiti sasanto. 4 Ta adda dadduma a tattao a simrecda a di nadnadlaw, dagidiay sigud a nadutocan ti maipaay itoy a pannacadusa, nadangkes a tattao, ket pagbalinenda ti parabur ti Diostayo a derrep, ken paglicudanda ti cacaisuna nga Apo Dios, ken ni Apotayo a Jesus Cristo. 5 Tarigagayac ngarud nga ipalagip cadacayo, idinto nga ammoyon daytoy, no casano a ti Apo, inaonna ti ili manipud idiay daga nga Egipto, calpasanna pinucawna dagiti saan a namati. 6 Ken dagiti angel a saanda a tinaginayon daydi nacaisigudanda a casasaad, no di ket pinanawanda daydi umisu a pagyananda, incabilna ida cadagiti agnanayon a pannacacawar iti ayan ti sipnget agingga iti panangocom ti naindaclan nga aldaw. 7 Cas met iti Sodoma ken Gomorra, ken dagiti ili iti cabangibangda idinto a cas cadagitoy, nga inyawatda ti bagida iti pannakiabig, ken idinto a simmurotda iti naisingayan a lasag, a maicabilda a cas pagwadan, nga aglaclac-am iti dusa ti apuy nga agnanayon. 8 Casta met dagitoy narugit nga dumardarepdep nga rugitanda ti lasag, ket umsienda ti agturay, ken agbassawangda cadagiti natan-oc. 9 Ngem ni Miguel nga arcangel, idi a nakibacal iti diablo ket nakisusic iti maipapan iti bagi ni Moises, saanna a naitured a nagipato a sitatabbaaw, no di ket kinunana, Ti Apo tubngarennaca coma. 10 Ngem dagitoy agsaoda ti dakes iti uray aniaman a dida maawatan: ngem dagiti ammoda a nacaisigudanda, a cas cadagiti narungsot nga an-animal nga awan nakemda, cadagitoy agrupsada. 11 Asida pay! ta nagnada iti dalan ni Cain, ket nagdarasudosda iti nacaallilawan ni Balaam gapu iti gunggona, ket nadadaelda iti panagsupring ni Core. 12 Dagitoy isuda dagiti batbato a nailemmeng cadagiti pagdadaya-anyo iti ayat, a no makidayada cadacayo, makipanganda nga awanan bain: ul-ulep nga awan danumda, nga itayab dagiti angin; caycayo nga ti bungbungada malaylay, awan ti bungada, a naminduada a natay, ken naparut iti amin a ramutda; 13 Daldalluyon a nadawel ti baybay, nga ilabutabda dagiti pacaibabainanda met laeng; bitbituen nga agalla-alla, isuda a nacaisaganaan ti ngisit iti kinasipnget nga agnanayon. 14 Ket ni met Enoc, daydi maicapito nanipud ken Adam, impadtona dagitoy, a kinunana, Adtoy, ti Apo umay nga cuyogen dagiti linaclacsa a sasantona, 15 Tapno aramidenna ti panangocom cadagiti isuamin, ken mangipanecnec cadagiti amin a managdacdakes iti amin a managdacdakes nga aramid ken managdacdakes nga inaramidda, ken iti amin a kinamanagtabbaaw a sinao dagiti managdacdakes nga managbasol a bassawang nga maibusor kencuana. 16 Dagitoy isuda dagiti managtanabutob, naagal, a sursurotenda dagiti dakes a tarigagayda; ket ti ngiwatda saoenna dagiti sao a naparammag, nga iparparangda ti pammasablogda cadagiti tattao gapu iti magunggonada. 17 Ngem, ay-ayatec, lagipenyo dagidi sasao nga insaoda idi damo dagiti apostoles ni Apotayo a Jesus Cristo; 18 Nga kinunada cadacayo nga addanto mangrabrabngis iti camaudianan nga tiempo, dagitoy ket sumursurotdanto cadagiti nadangkes a tarigagayda. 19 Dagitoy isuda dagiti agaramid iti panagsisina, naderrepda, ket awananda ti Espiritu. 20 Ngem dacayo, cacabsat, rumang-aycayo unay iti nasantoan a pammatiyo, nga agcarcararagcayo babaen iti Espiritu Santo, 21 Agtaengcayo iti panagayat iti Dios, a namnamaenyo ti asi ni Apotayo a Jesus Cristo a maipaay iti biag nga agnanayon. 22 Caasianyo dagiti dadduma, nga mangaramid iti pannacapunno cadagiti panagdudua: 23 Ket isalacanyo dagiti dadduma nga sibubuteng, nga guyodenyo ida iti apuy; a cagurayo uray la ti pagan-anay a marugitan iti lasag. 24 Ket ita iti daydiay mannacabalin a mangigaga cadacayo iti pannacaitibcolyo, ken mangidatag cadacayo nga awan ti pacapilawanyo iti sangoanan ti dayagna a buyogen ti napalaus a rag-o, 25 Iti maymaysa a masirib nga Dios a Manangisalacantayo, adda coma ti kinadayaw ken ti kinadayag, kinaturay ken ti pannacabalin, ita ken iti agnanayon nga awan patinggana. Amen. |