SN. JUAN

TI EVANGELIO CAS INSURAT NI

SN. JUAN

CAPITULO 1

1 Idi pangruggianan iti isuamin adda iti Sao, ket ti Sao adda iti Dios, ket ti Sao isu Dios.

2 Isu met laeng adda idi pangruggianan iti isuamin nga caddua iti Dios.

3 Dagiti isuamin napa-addada gapu kencuana; ket no isu awan awan ti napa-adda cadagiti adda.

4 Adda idi kencuana ti biag; ket ti biag isu idi ti silaw dagiti tattao.

5 Ket ti silaw aglawag iti sipnget; ket ti sipnget isu dina nailasin.

6 ś Adda idi ti maysa a tao nga imbaon ti Dios, a managan Juan.

7 Daytoy immay maipuon iti pangpanecnec, tapno panecnecanna ti maipapan iti Silaw, tapno amin nga tattao ket mamatida gapu kencuana.

8 Saan nga isu idi ti Silaw, ngem isu naibaon tapno panecnecanna ti maipapan iti dayta nga Silaw.

9 Dayta idi iti pudno a Silaw, a manglawag iti isuamin nga tao nga umay ditoy lubong.

10 Isu adda idi iti lubong, ket ti lubong napa-adda gapu kencuana, ket ti lubong dina naammoan.

11 Isu immay cadagiti cucuana, ket dagiti cucuana isu saanda nga inawat.

12 Ngem cadagiti amin nga immawat kencuana, ket iniccanna ida ti pannacabalin nga agbalin nga annac ti Dios, uray cadagidiay a mamati iti naganna:

13 Nga nayanacda, saan nga agtaud iti dara, wenno iti pagayatan ti lasag, wenno iti pagayatan ti tao, no di ket nayanacda iti pagayatan iti Dios.

14 Ket daydi a Sao nagbalin a lasag, ket nakipaggian cadatayo, (ket nakitami ti dayagna, ti dayag a cas iti cacaisuna a bugbugtong nga anac ti Ama,) napno ti parabur ken pudno.

15 ś Ni Juan panecnecanna ti maipapan kencuana, ket nagpuccaw, a kunkunana, Daytoy isu daydi kinunac, Dayta umay sumaruno caniac ket nangnangrona ngem siac: ta immun-una idi ngem siac.

16 Ta iti pannacapunnona immawattay amin, ket parabur iti parabur.

17 Ta ti linteg ket inted ni Moises, ngem ti parabur ken ti kinapudno immayda gapu ken Jesus Cristo.

18 Awan ti tao a nakakita iti Dios uray caano; ti laeng cacaisuna a bugbugtong nga Anac, nga adda iti saclot ti Ama, isu ti nangipacaammo kencuana.

19 ś Ket daytoy ti pangpanecnec ni Juan, idi nangibaon dagiti Judio cadagiti papadi ken Levitas manipud Jerusalem a mangintuud kencuana, Siasinoca?

20 Ket nagpudno, ken saan a naglibac; ket impudnona, Saan a siac ti Cristo.

21 Ket inintuudda kencuana, Ania ngarud? Sica ni Elias? Ket kinunana, Saan a siac. Sica daydi mammadto? Ket simmungbat, Saan.

22 Kinunada ngarud kencuana, Asinoca? tapno maitedmi ti sungbat cadagiti nangibaon cadacami. Ania ti maconam iti maipapan kenca met laeng?

23 Kinunana, Siac ti timec ti maysa nga agaw-awag idiay let-ang, Palintegenyo iti dalan ti Apo, a cas kinuna ni mammadto nga Isaias.

24 Ket dagiti naibaon ket naggapuda cadagiti Fariseo.

25 Ket inintuudda, ket kinunada kencuana, Apayapay ngarud a mamautizarca, no saan a sica ti Cristo, wenno ni Elias, wenno daydi mammadto?

26 Ni Juan simmungbat cadacuada, a kunana, Siac mamautizarac iti danum: ngem agtactacder ti maysa iti nagtengngaanyo, a saanyo nga am-ammo;

27 Isu daytoy, nga umay sumaruno caniac ngem nangnangrona ken siac, a iti galut ti sapatosna ket saannac a maicari a mangwarwar.

28 Dagitoy a banbanag na-aramidda idiay Betabara iti labes ti Jordan, isu a pangbabautizaran idi ni Juan.

29 ś Iti sumuno nga aldaw nakita ni Juan ni Jesus nga um-umay kencuana, ket kinunana, Adtoy ti Cordero ti Dios, a mangiccat iti basol ti sangalubongan.

30 Daytoy isu daydi kinunac, Sumaruno caniac nga umay ti maysa a lalaki isu a nangnangrona ngem siac: ta immun-una ngem siac.

31 Ket isu diac ammo idi: ngem tapno isu ket maiparangarang iti Israel, gapuna immayac nga mangbabautizar iti danum.

32 Ket ni Juan pinanecnecanna, a kunana, Naimatangac ti Espiritu a bumabbaba manipud langit a casla calapati, ket nagtaeng kencuana.

33 Ket isu diac am-ammo: ngem daydi nangibaon caniac a mamautizar iti danum, kinunana caniac, Ti makitamto a babaan ti Espiritu, ket agtaeng kencuana, daytoy met laeng ti mamautizar iti Espiritu Santo.

34 Ket siac nakitac, ket pinanecnecac a daytoy ti Anac ti Dios.

35 ś Iti sumuno nga aldaw agtactacder manen ni Juan, ken dua cadagiti adalanna;

36 Ket kinitana ni Jesus a magmagna, ket kunana, Adtoy ti Cordero ti Dios!

37 Ket dagidi dua nga adalan a nacangngeg ti panagsaona, simmurotda ken Jesus.

38 Idin ket timmaliaw ni Jesus, ket nakitana ida a sumursurot, ket kunana cadacuada, Ania ti sapsapulenyo? Ket kinunada kencuana, Rabbi, (a no maipatarus, cayatna a saoen, Mannursuro,) adino ti pagtaengam?

39 Isu kunana cadacuada, Umaycayo ket kitaenyo. Napanda ngarud ket nakitada ti pagtaenganna, ket nakipagtaengda kencuana ti daydi nga aldaw: ta nganngani horas a maicasangapulo.

40 Maysa cadagiti dua a nacangeg iti panagsao ni Juan, ken simmurot kencuana, isu ni Andres, cabsat ni Simon Pedro.

41 Ket binirocna nga umuna ni cabsatna a Simon, ket kunana kencuana, Nasaracanmin ti Mesias, nga, no maipatarus, ti Cristo.

42 Ket isu inyegna ken Jesus. Ket ni Jesus minatmatanna isuna, ket kinunana, Sica ni Simon anac ni Jonas: sica managanancanto iti Cefas, a cayatna a saoen, Maysa a bato.

43 ś Iti sumuno nga aldaw kinayat ni Jesus ti mapan idiay Galilea, ket nasaracanna ni Felipe, ket kunana kencuana, Surutennac.

44 Ita ni Felipe ket taga Betsaida, ili daytoy ni Andres ken ni Pedro.

45 Ni Felipe nasapulanna ni Natanael, ket kunana kencuana, Nasaracanmi isuna, daydi insurat ni Moises iti linteg, ken dagiti mammadto, ni Jesus a taga Nazaret, nga anac ni Jose.

46 Ket kinuna ni Natanael kencuana, Mabalin aya ti aniaman a naimbag nga banag nga agtaud idiay Nazaret? Cuna kencuana ni Felipe, Umayca ket kitaem.

47 Ni Jesus nakitana nga agturong kencuana ni Natanael, ket kunana iti maipapan kencuana, Adtoy ti maysa nga Israelita a pudno, a kencuana awan ti ulbod!

48 Cuna kencuana ni Nataniel, Casano ti pannaca-ammom caniac? Simmungbat ni Jesus ket kinunana kencuana, Sacbay ti panangayab ni Felipe kenca, idi addaca iti siroc ti cayo nga higos, nakitaca.

49 Ni Natanael simmungbat kencuana, Rabbi, sica ti Anac ti Dios; sica ti Ari ti Israel.

50 Ni Jesus simmungbat ket kinunana kencuana, Gapu ta kinunac kenca, Nakitaca iti siroc ti cayo nga higos, mamatica? makitamto ti dacdackel a banbanag nga nangnangrona ngem cadagitoy.

51 Ket kunana kencuana, Pudno, pudno, kunak cadacayo, Calpasanna ket makitayonto ti langit a silulucat, ken dagiti angeles ti Dios nga umuli ken bumaba itoy Anac ti tao.

CAPITULO 2

1 Ket ti maicatlo nga aldaw adda idi maysa a boda idiay Cana ti Galilea; ket ti ina ni Jesus adda sadiay:

2 Ket naawis met ni Jesus, ken dagiti adalanna, idiay pagbodaan.

3 Ket idi cayatda iti arac, ti ina ni Jesus kinunana kencuana, Awan ti aracda.

4 Ket cuna ni Jesus kencuana, Babai, ania ti pacaibiangac kenca? ti horasco dipay dimteng.

5 Ni inana kunana cadagiti tumultulong, Aniaman nga ibagana cadacayo, isu ti aramidenyo.

6 Ket naicabil idiay idi ti innem a burnay, nga cas iti ugali a panaggugor dagiti Judio, aglaon ti dua wenno tallo a caramba ti tunggal maysa.

7 Cuna cadacuada ni Jesus, Punnoenyo dagiti burnay iti danum. Ket pinunnoda ida agingga iti ngarabda.

8 Ket kunana cadacuada, Tacoenyon, ket ipanyo iti panguloen ti rambac. Ket impanda.

9 Ket idi rinamanan ti panguloen ti rambac daydi danum a nagbalinen nga arac, dina ammo no adino ti naggapuanna: (ngem ammo dagiti tumultulong a nangala idi danum;) ti pangulo ti rambac inayabanna ti novio,

10 Ket kunana kencuana, Tunggal tao unaenna ti nasayaat nga arac; ket inton macainumda ti adun, calpasanna isangona ti dacdakes: ngem sica indulinmo ti nasayaat nga arac agingga ita.

11 Daytoy iti pangruggian dagiti datdatlag nga inaramid ni Jesus idiay Cana ti Galilea, ket impakitana ti dayagna; ket dagiti adalanna namatida kencuana.

12 ś Calpasanna daytoy simmalog idiay Capernaum, isu, ken ni inana, ken dagiti cacabsatna, ken dagiti adalanna: ket naggianda idiay iti saan nga adu nga aldaw.

13 ś Ket asidegen idi ti ilalabas dagiti Judio, ket ni Jesus simmang-at idiay Jerusalem,

14 Ket nasaracanna idiay templo dagiti aglaclaco ti bacbaca ken carcarnero ken calcalapati, ken dagiti agsucsucat ti pirac nga agtutugaw:

15 Ket nangaramid ti pagbaot a taltali a babassit, ket pinarruarna ida amin iti templo, ken dagiti carcarnero, ken bacbaca; ket impurruacna dagiti pirac dagiti agsucsucat ti pirac, ket tinuangna dagiti lamlamisaanda;

16 Ket kinunana cadagiti agtagtagilaco ti calcalapati, Iccatenyo dagitoy manipud itan; dicayo aramiden ti balay ni Amac a balay a pagtagtagilacoan.

17 Idin nalagip dagiti adalanna nga adda a naisurat, Ti ganetnet ti balaymo alun-onennacto.

18 ś Dagiti Judio ngarud simmungbatda ket kinunada kencuana, Ania ti pagilasinan nga ipakitam cadacami, idinto nga aramidem dagitoy a banbanag?

19 Simmungbat ni Jesus ket kinunana cadacuada, Rebbaenyo daytoy a templo, ket iti uneg ti tallo nga aldaw bangonecto.

20 Kinuna ngarud dagiti Judio, Uppat a pulo ket innem a tawen ti pannacabangon daytoy a templo, ket sica bangonemto iti tallo nga aldaw?

21 Ngem sinaona idi iti maipapan ti templo ti bagina.

22 Idi ngarud nagungaren cadagiti natay, dagiti adalanna ket nalagipda a sinaona daytoy cadacuada; ket namatida cadagiti sursurat, ken ti sao nga insao ni Jesus.

23 ś Ita ket bayat ti caaddana idiay Jerusalem iti ilalabas, idi aldaw ti rambac, adu dagiti namati iti naganna, idi nakitada dagiti datdatlag nga inaramidna.

24 Ngem ni Jesus dina intalec isuna cadacuada, agsipud ta am-ammona amin a tattao,

25 Ken gapu ta awan ti pacasapulanna nga adda mangpanecnec kencuana iti maipapan iti tao: ta isu met laeng ket ammona ti adda idi iti tao.

CAPITULO 3

1 Ket adda idi maysa a tao cadagiti Fariseo, a managan Nicodemo, panguloen dagiti Judio:

2 Daytoy immay ken Jesus iti rabii, ket kinunana kencuana, Mannursuro, ammomi a maysaca a mannursuro a naggapu iti Dios: ta awan ti tao a macabalin a mangaramid cadagitoy a pagilasinan nga ar-aramiden, no awan iti Dios kencuana.

3 Simmungbat ni Jesus ket kinunana kencuana, Pudno, pudno, kunak kenca, No ti maysa a tao saan a mayanac a mabalbaliwan, saanna a mabalin a kitaen ti pagarian ti Dios.

4 Cuna kencuana ni Nicodemo, Casano ti pannacabalin ti tao nga mayanac idinto a lacayen? mabalinna aya ti sumrec manen iti aanacan ni inana, ken mayanac?

5 Simmungbat ni Jesus, Pudno, pudno, kunak kenca, No ti maysa a tao saan a mayanac iti danum ken iti Espiritu, saanna a mabalin ti sumrec ti pagarian ti Dios.

6 Ti mayanac iti lasag isu lasag; ket ti mayanac iti Espiritu isu espiritu.

7 Dica pagsiddaawan a kinunac kenca, Masapulmo ti mayanac a mabalbaliwan.

8 Ti angin agpuyupoy iti pagayatanna, ket mangngegmo ti awengna, ngem dica ammo no adino ti paggapuanna, ken adino ti papananna: casta ti amin a mayanac iti Espiritu.

9 Simmungbat ni Nicodemo ket kinunana kencuana, Casano ti pannacabalinna nga maaramid dagitoy?

10 Simmungbat ni Jesus ket kinunana kencuana, Sica a mannursuro ti Israel, ket dica ammo dagitoy?

11 Pudno, pudno, kunak kenca, Saoenmi ti ammomi, ket sacsianmi ti nakitami; ket dicayo awaten ti pangpanecnecmi.

12 No imbagac cadacayo dagiti banag a naindagaan, ket diyo patien, casanonto a mamaticayo, no ibagac cadacayo dagiti nailangitan?

13 Ket awan ti tao nga immuli sadi langit, no di ti bimmaba nanipud langit, ti Anac ti tao nga naggapu idiay langit.

14 ś Ket no casano iti panangibayog ni Moises iti uleg idiay let-ang, casta met a masapul a ti Anac ti tao ket maibayog:

15 Tapno siasinoman a mamati kencuana saan a mapucaw, no di ket maaddaan ti biag nga agnanayon.

16 ś Ta casta la unay ti panagayat ti Dios iti lubong, nga intedna ti bugbugtong nga Anacna, tapno amin a mamati kencuana saan a mapucaw, no di ket adda biagna nga agnanayon.

17 Ta saan nga imbaon ti Dios ti Anacna iti lubong a mangocom iti lubong; no di ket tapno ti lubong maisalacan gapu kencuana.

18 ś Ti mamati kencuana ket saan a maocom: ngem ti di mamati kencuana ket naocomen, agsipud ta saan nga namati iti nagan ti cacaisuna a bugbugtong nga Anac ti Dios.

19 Ket daytoy ti pacaocoman, ta ti silaw immay ditoy lubong, ket dagiti tao inayatda ti sipnget a nangnangrona ngem iti lawag, agsipud ta dakes idi dagiti aramidda.

20 Ta amin nga agaramid ti dakes guraenna ti lawag, ket saan nga umay iti lawag, di la ket ta dagiti aramidna mababalaw.

21 Ngem ti agaramid iti pudno ket umay iti lawag, tapno dagiti aramidna maiparangarang, a naaramidda a mayannurot iti Dios.

22 ś Idi nalpas dagitoy immay ni Jesus ken dagiti adalanna iti daga ti Judea; ket idiay nakipaggian cadacuada, ket nangbautizar.

23 ś Ket nangbautizar met ni Juan idiay Enon iti denna ti Salim, ta adda idiay idi ti adu a danum: ket immayda, ket nabautizaranda.

24 Ta ni Juan saan pay idi a naipupoc iti pagbaludan.

25 ś Nabangon ngarud ti maysa a suppiat idi cadagiti adalan ni Juan ken dagiti Judio no maipapan iti panaggugor.

26 Ket immayda ken Juan, ket kinunada kencuana, Mannursuro, daydi adda idi a naicuyog kenca idiay labes ti Jordan, isu a pinanecnecam, adtoy, nga isu mamautizar, ket amin a tattao umayda kencuana.

27 Simmungbat ni Juan ket kinunana, Ti maysa a tao saanna a mabalin ti umawat ti uray ania, no saan a naited kencuana nanipud langit.

28 Dacayo met laeng masacsiandac, a kinunac, Saan a siac ti Cristo, no di ket naibaonac iti casangoananna.

29 Ti makincucua iti novia isu ti novio: ngem ti gayyem ti novio, nga umim-imatang ket mangngegna isuna, agragrag-o unay gapu ti timec ti novio: ngarud daytoy iti rag-oc a nagdanunan.

30 Isu masapul a dumackel, ngem siac masapul a bumassitac.

31 Ti umay manipud ngato nangatngato ngem cadagiti isuamin: ti taga daga isu naindagaan, ket banbanag a naindagaan dagiti saoenna: ti immay manipud langit nangatngato ngem cadagiti isuamin.

32 Ket ti nakitana ken nangngegna, isu ti sacsianna; ket awan ti tao nga umawat ti pangpanecnecna.

33 Ti umawat ti pangpanecnecna pinanecnecanna a ti Dios pudno.

34 Ta ti imbaon ti Dios saoenna dagiti sao ti Dios: ta ti Dios saanna a rucrucoden ti Espiritu nga naited kencuana.

35 Ti Ama ayatenna ti Anac, ket intedna aminen nga banbanag cadagiti im-imana.

36 Ti mamati iti Anac adda biagna nga agnanayon: ngem ti saan nga mamati iti Anac saannanto a makita ti biag; no di ket ti pungtot ti Dios agtaeng kencuana.

CAPITULO 4

1 Idi ngarud a ti Apo na-ammoanna no casano nga nangngegan dagiti Fariseo a ni Jesus nagaramid ken nangbautizar ti ad-adu nga adalan ngem ni Juan,

2 (Uray ni Jesus saan a nangbautizar, no di ket dagiti adalanna,)

3 Pinanawanna ti Judea, ket napan manen idiay Galilea.

4 Ket masapul idi a mapan idiay Samaria.

5 Iti casta napan iti maysa nga ili ti Samaria, a managan Sicar, iti asideg ti daga nga inted ni Jacob ken anacna a Jose.

6 Ket adda idiay idi ti bubon ni Jacob. Ni Jesus ngarud, a nabannogan iti dalan, iti casta nagtugaw iti ngarab iti bubon: ket horas idi a maicanem.

7 Umay idi ti maysa a babai a taga Samaria a sumacdo: ni Jesus kunana kencuana, Iccannac ti inumen.

8 (Ta dagiti adalanna napanda iti ili a gumatang ti pagtaraon.)

9 Ket daydi babai a taga Samaria kunana ngarud kencuana, Casano a sica idinto a Judioca, dumawatca caniac ti inumen, idinto a babai-ac a taga Samaria? ta awan ti panangicancano dagiti Judio cadagiti taga Samaria.

10 Simmungbat ni Jesus ket kinunana kencuana, No mailasinmo coma ti sagut ti Dios, ken no siasino ti agcuna kenca, Iccannac ti inumen; dimmawatca coma kencuana, ket iniccannaca coma iti nabiag a danum.

11 Ti babai kunana kencuana, Apo, awan ti pagsacdom, ket ti bubon nauneg: sadino ngarud ti pangalaam iti nabiag nga danum?

12 Dacdackelca aya ngem ni amami a Jacob, a nangted cadacami ti bubon, isu nga ini-numanna, ken dagiti annacna, ken dagiti animalna?

13 Simmungbat ni Jesus ket kinunana kencuana, Isuamin nga uminum itoy a danum mawawto manen:

14 Ngem siasinoman nga uminum iti danum nga itdecto kencuana uray caano saanto a mawawen; no di ket ti danum nga itdecto kencuana agbalinto kencuana nga ubbog ti danum nga agburburayoc a maipaay iti biag nga agnanayon.

15 Ti babai kunana kencuana, Sir, itedmo caniac daytoy a danum, tapno saanac a mawaw, ken tapno diac umayen ditoy a sumacdo.

16 Ni Jesus kunana kencuana, Inca, ayabam ni asawam, ket umayca ditoy.

17 Simmungbat ti babai ket kinunana, Awan asawac. Ni Jesus kunana kencuana, Naimbag ti panagcunam, Awan asawac;

18 Ta naaddaanca ti lima nga asawa; ket ti adda ita kenca saanmo nga asawa: daytoy sinaom a sipupudno.

19 Ti babai kunana kencuana, Sir, makitac a sica mammadtoca.

20 Dagiti ammami nagrucbabda ditoy a bantay; ket dacayo cunayo, nga idiay Jerusalem isu ti disso a masapul a pagrucbaban dagiti tao.

21 Cuna kencuana ni Jesus, Babai, patiennac, nga umay ti horas, nga uray ditoy a bantay, ken uray idiay Jerusalem, dicayto pagrucbaban iti Ama.

22 Agrucbabcayo iti dicayo ammo: agrucbabcami iti ammomi: ta ti pannacaisalacan aggapu cadagiti Judio.

23 Ngem ti horas umay, ket adda itan, a dagiti pudno nga agrucbab agrucbabdanto iti Ama iti espiritu ken iti kinapudno: ta ni Ama sapulenna dagiti cacasta nga agrucbab kencuana.

24 Ti Dios maysa nga Espiritu: ket dagiti agrucbab kencuana masapul nga agrucbabda iti espiritu ken kinapudno.

25 Ti babai kinunana kencuana, Ammoc a ti Mesias umay, isu a managan ti Cristo: inton isu umay, ibagananto cadacami dagiti amin a banbanag.

26 Cuna kencuana ni Jesus, Siac nga makisasao kenca siac dayta.

27 ś Ket iti daydi dimteng dagiti adalanna, ket nagsiddaawda ta makisasao iti babai: ngem awan ti tao a nagcuna, Ania ti sapulem? wenno, Apay makisasaoca kencuana?

28 Iti casta daydi babai pinanawanna ti carambana, ket napan iti ili, ket kunana cadagiti tattao,

29 Umaycayo, kitaenyo ti maysa a tao, nga imbagana caniac dagiti amin nga inaramidco: saan cadi nga isu daytoy ti Cristo?

30 Rimmuarda iti ili, ket napanda kencuana.

31 ś Idi dagiti adalanna kiniddawda, a cunkunada, Mannursuro, manganca.

32 Ngem kinunana cadacuada, Adda taraonco nga macan nga dicayo ammo.

33 Dagiti adalan ngarud ket kinunada iti maysa ken maysa, Adda ngata tao a nangyeg kencuana ti macan?

34 Ni Jesus kunana cadacuada, Ti taraonco isu ti panangaramidco iti pagayatan ti nangibaon caniac, ken ti panangturposco ti aramidna.

35 Dicayo cuna aya, Adda pay uppat a bulan, ket santo dumteng ti panagani? adtoy, kunak cadacayo, Itannawagyo dagiti matayo, ket matmatanyo dagiti taltalon; ta natangkenandan a maani.

36 Ti agani umawat ti tangdan, ket agurnong ti bunga a maipaay iti biag nga agnanayon: tapno ti agmula ken ti agani aggiddanda nga agrag-o.

37 Ta iti daytoy a pagsasao ket pudno, Maysa ti agmula, ket sabali ti agani.

38 Siac imbaoncayo nga agani iti dicayo tinalon: sabali dagiti nagtalon, ket dacayo simreccayo cadagiti tinalonda.

39 ś Ket adu cadagiti taga Samaria iti daydi nga ili a namati kencuana agsipud iti sao ti babai, a nangpanecnec a kunana, Imbagana caniac dagiti amin nga inaramidco.

40 Gapuna nga idi immay dagiti taga Samaria kencuana, inuyutanda nga agbati cadacuada: ket nagbati sadiay iti dua nga aldaw.

41 Ket namati dagiti ad-adu pay agsipud iti saona;

42 Ket kinunada iti babai, Ita mamaticami, saan a gapu iti saom: ta dacami met laeng nangngegmi, ket ammomi a pudno a daytoy ti Cristo, ti Manangisalacan iti lubong.

43 ś Ket idi napalabas ti dua nga aldaw, pimmanaw idiay a napan sadi Galilea.

44 Ta ni Jesus met laeng pinanecnecanna, a ti maysa a mammadto ket saan a mapadayawan ti bucodna a daga.

45 Gapuna nga idi dimteng idiay Galilea, dagiti taga Galilea inawatda, agsipud ta nakitada dagiti amin a banag nga inaramidna idiay Jerusalem idi fiesta: ta napanda met iti fiesta.

46 Immay ngarud manen ni Jesus idiay Cana ti Galilea, isu a namagbalinanna ti danum nga arac. Ket adda idiay iti maysa a tao ti ari, a ti anacna ket adda idi a masakit idiay Capernaum.

47 Daytoy idi nangngegna a ni Jesus immay idiay Galilea nanipud Judea, napan kencuana, ket dinawatna a sumalog coma, ket agasanna ti anacna: ta ngannganin matay.

48 Kinuna ngarud ni Jesus kencuana, No dicayo coma macakita cadagiti pagilasinan ken datdatlag, dicayto mamati.

49 Ti tao ti ari kinunana kencuana, Sir, sumalogca cadi ita ta di pay matay ti anacco.

50 Ni Jesus kunana kencuana, Agawidcan; ti anacmo sibibiag. Ti tao pinatina ti sao nga imbaga kencuana ni Jesus, ket nagawid.

51 Ket idi madama a sumalog, dagiti adipenna simmabetda, a nangipadamag kencuana, Ti anacmo a lalaki sibibiag.

52 Inintuudna ngarud cadacuada no ania nga horas idi nangrugi a immimbag. Ket kinunada kencuana, Idi calman iti maicapito nga horas pinanawan ti gorigorna.

53 Ti ama naawatanna nga daydi nga horas ket naggiddan, ti pinagcuna ni Jesus kencuana, Ti anacmo sibibiag: ket namati isuna, ken amin a cabbalayna.

54 Daytoy manen ti maicaddua a datdatlag nga inaramid ni Jesus, idi rimmuar idiay Judea a napan idiay Galilea.

CAPITULO 5

1 Idi nalpas dagitoy ket adda maysa a fiesta dagiti Judio; ket ni Jesus simmang-at idiay Jerusalem.

2 Ket adda idiay Jerusalem iti abay ti pagtagilacuan dagiti carnero ti maysa a pagdigosan, a managan Betesda iti sao ti Hebreo, isu nga adda lima nga arcona a sercan.

3 Cadagitoy adda a nagidda dagiti adu a masacsakit, dagiti bulbulsec, pilpilay, saan a macagunay, nga agur-uray iti ti panaggaraw ti danum.

4 Ta maysa nga angel bumaba idi iti maysa a tiempo idi pagdigosan, ket kiburenna ti danum: ti umuna ngarud a sumrec idi pagdigosan iti calpasan ti pannacakibur ti danum ket maagasan iti uray ania a sakit nga adda kencuana.

5 Ket adda idiay idi ti maysa a tao, nga adda tallo pulo ket walo a tawenen a masakit.

6 Idi makita ni Jesus daytoy a naidalit, ken naammoanna nga adda a nabayagen iti dayta a casasaad, kinunana kencuana, Cayatmo ti mapaimbag?

7 Simmungbat kencuana di masakit a tao, Sir, awan ti tao, no makibur ti danum, a mangipisoc caniac idiay danum: ta no mapmapanac pay laeng, nacababan ti sabali nga umun-una ngem siac.

8 Cuna ni Jesus kencuana, Tumacderca, bagcatem ta iddam, ket magnaca.

9 Ket naigiddato a daydi tao napaimbag, ket binagcatna di iddana, ken nagna: ngem aldaw a panaginana idi.

10 ś Kinuna ngarud dagiti Judio iti daydi napaimbag, Aldaw a panaginana ita: ket di maipalubos kenca a bagcatem ti iddam.

11 Ngem isu simmungbat cadacuada, Ti nangpaimbag caniac, kinunana caniac, Bagcatem ti iddam, ket magnaca.

12 Inintuudda kencuana, Asino a tao ti nagcuna kenca, Bagcatem ti iddam, ket magnaca?

13 Ngem daydi napaimbag dina ammo no asino: ta ni Jesus immadayo, ta adda adu unay a tattao iti daydi a disso.

14 Idin masaracan ni Jesus idiay templo, ket kinunana kencuana, Adtoy, a napaimbagcan a naan-anay: dica agbasolen, di la ket ta dacdackes ti mapasamac kenca.

15 Ti tao pimmanaw, ket impacaammona cadagidi Judio a ni Jesus, ti nangpaimbag kencuana.

16 Ket gapu itoy dagidi Judio kinagurada ni Jesus, ken panggependa a papatayen, agsipud ta aramidenna dagitoy a banag iti aldaw a panaginana.

17 ś Ngem ni Jesus simmungbat cadacuada, Ni Amac agingga ita agar-aramid, ket agar-aramidac met.

18 Gapuna dagidi Judio ket nag-agawada la unay a mangpatay kencuana, ta saan laeng a dina ngilinen ti aldaw a panaginana, no di ket kunana pay a ti Dios isu iti Amana, nga impadana ti kinaisuna iti Dios.

19 Simmungbat ngarud ni Jesus ket kinunana cadacuada, Pudno, pudno kunak cadacayo, Ti Anac saanna a mabalinan ti agbucbucod nga agaramid iti uray ania, no di ket ti makitana nga aramiden ti Ama: ta amin nga aramidenna, dagitoy met ti aramiden a casta ti Anac.

20 Ta ti Ama ayatenna ti Anac, ket ipakitana kencuana dagiti amin nga aramidenna: ket ipakitananto pay kencuana dagiti daddadackel nga ar-aramid ngem dagitoy, tapno agsiddaawcayo.

21 Ta cas ti Ama pagungarenna dagiti natay ket iccanna ida ti biag, casta met ti Anac iccanna ti biag dagiti cayatna.

22 Ta ti Ama awan ti ocomenna a tao, no di ket isuamin a panangocom intedna iti Anac:

23 Tapno dagiti isuamin padayawanda ti Anac, a cas met iti panangpadayawda iti Ama. Ti saan a mangpadayaw iti Anac saanna a padayawan ti Ama a nangibaon kencuana.

24 Pudno, pudno, kunak cadacayo, Ti dumngeg iti saoc, ket patienna ti nangibaon caniac, adda biagna nga agnanayon, ket saanto nga umay iti pannacaocom; no di ket nanipud ken patay immalis iti biag.

25 Pudno, pudno, kunak cadacayo, Umay ti horas, ket adda itan, a dagiti natay mangngegdanto ti timec ti Anac ti Dios: ket dagiti agdengngeg agbiagdanto.

26 Ta cas ti Ama adda kencuana met laeng ti biag; casta met impaayna nga ti Anac adda biag kencuana met laeng;

27 Ket intedna met kencuana ti kinaturay a mangocom, agsipud ta isu iti Anac ti tao.

28 Dicayo pagsiddaawan daytoy: ta umay ti horas, a dagiti amin nga adda cadagiti tanem mangngegdanto ti timecna,

29 Ket rummuardanto; dagiti nagaramid ti naimbag, iti panagungar ti biag; ken dagiti nagaramid ti dakes, iti panagungar ti pannacapucaw.

30 Awan ti pannacabalinco nga agaramid a sisiac iti uray ania: cas iti mangngegco, mangocomac: ket ti panangocomco nalinteg; ta diac sapulen ti pagayatac, no di ket ti pagayatan ti Ama a nangibaon caniac.

31 No panecnecac ti maipapan caniac met laeng; ti pangpanecnecco saan a pudno.

32 ś Adda sabali a mangpanecnec iti maipapan caniac; ket ammoc a ti panecnec a pangpanecnecna iti maipapan caniac pudno.

33 Nangibaoncayo ken Juan, ket pinanecnecanna ti pudno.

34 Ngem siac diac awaten ti pangpanecnec a nataoan: ngem kunak dagitoy, tapno maisalacancayo.

35 Isu idi ti silaw a sumsumged ken manglawag: ket kinayatyo iti nagrag-o ti apagbiit babaen iti lawagna.

36 ś Ngem adda dacdackel a pangpanecnecco ngem iti pangpanecnec ni Juan: ta dagiti aramid nga inted ni Ama caniac a leppasec, dagita met laeng nga ar-aramid ti aramidec, ket panecnecanda ti maipapan caniac, a ti Ama imbaonnac.

37 Ket ni Ama, a nangibaon caniac, panecnecanna ti maipapan caniac. Dacayo uray caano dicayo nangngeg ti timecna, ket dicayo met nakita ti langana.

38 Ket ti saona saan nga agtaeng cadacayo: ta ti imbaonna, dicayo patien.

39ś Sukimatenyo dagiti sursurat; agsipud ta pagarupenyo nga adda cadacuada ti biag nga agnanayon: ket dagitoy isuda ti mangpanecnec ti maipapan caniac.

40 Ket nupay casta madicayo nga umay caniac, tapno maaddaancayo coma ti biag.

41 Diac awaten ti dayaw a nataoan.

42 Ngem siac am-ammocayo, nga awan cadacayo ti panagayat iti Dios.

43 Immayac iti nagan ni Amac, ket saandac nga awaten: no sabali ti umay coma iti naganna met laeng, isu awatenyo.

44 Casano ti pannacabalinna a mamaticayo, nga awatenyo ti dayaw iti maysa ken maysa, ket dicayo biroken ti dayaw nga aggapu laeng iti Dios?

45 Dicayo pagarupen nga siac ipulongcayto iti sangoanan ni Ama: adda maysa a mangipulong cadacayo, ni Moises, a panginanamaanyo.

46 Ta no pinatiyo coma ni Moises, pinatidac coma: ta isu nagsurat iti maipapan caniac.

47 Ngem no dicayo patien dagiti sursuratna, casanonto ti panamatiyo cadagiti sasaoc?

CAPITULO 6

1 Idi nalpas dagitoy napan ni Jesus idiay ballasiw ti baybay ti Galilea, nga isu ti baybay ti Tiberias.

2 Ket simmurot kencuana dagiti adu a tattao, ta nakitada dagiti datdatlag nga inaramidna cadagiti masacsakit.

3 Ket simmang-at ni Jesus iti maysa a bantay, ket nagtugaw sadiay agraman dagidi adalanna.

4 Ket ti ilalabas, a fiesta dagiti Judio, asidegen.

5 ś Ni Jesus ngarud idi intannawagna dagiti matana, ket makitana nga umay kencuana ti adu a tattao, kunana ken Felipe, Adino ti panggatangantayo ti tinapay, tapno macapangan dagitoy?

6 Ngem kinunana daytoy tapno suutenna isuna: ta isu met laeng ket ammona ti aramidennanto.

7 Simmungbat kencuana ni Felipe, Dua gasut a denario4 ti tinapay saan nga umanay cadacuada, tapno tunggal maysa cadacuada macapangan bassit.

8 Maysa cadagidi adalanna, ni Andres, a cabsat ni Simon Pedro, kunana kencuana,

9 Adda ditoy ti maysa nga agtutubo a lalaki, nga adda lima a tinapayna a cebada, ken dua nga ican: ngem aniada dagitoy iti castoy nga caadu ti tattao?

10 Kinuna ni Jesus, Pagtugawenyo dagiti tao. Ket adda idi ti adu a root iti daydi a disso. Nagtugaw ngarud dagidi lallaki, a cas iti bilangda ket lima ribo.

11 Ni Jesus ngarud innalana dagiti tinapay; ket idi nalpas a nacapagyaman, binunonganna dagiti adalanna, ket dagidi adalanna binunonganda met dagiti situtugaw; ket casta met cadagidi ic-ican binunonganda iti cas caadu ti kinayatda.

12 Ket idi napnecdan, kinunana cadagiti adalanna, Urnongenyo dagiti napisipisi nga natda, tapno awan ti madadael.

13 Inurnongda ngarud, ket pinunnoda ti sangapulo ket dua nga alat cadagiti napisipisi dagiti lima nga tinapay a cebada, a natidda calpasan iti pannanganda.

14 Dagiti tao, idi makitada ngarud daydi pagilasinan nga inaramid ni Jesus, kinunada, Kinapudnona a daytoy ti mammadto nga umayto ditoy lubong.

15 ś Ni Jesus ngarud idi a naawatanna a nganngannida umay ket alaenda a piliten, tapno aramidenda nga ari, pimmanaw a napan manen nga is-isu idiay bantay.

16 Ket idi rumabiin, dagiti adalanna simmalogda iti baybay,

17 Ket limmuganda iti maysa a viray, ken bimmallasiwda iti baybay nga agturong idiay Capernaum. Ket nasipnget idin, ket ni Jesus saan pay nga immay cadacuada.

18 Ket ti baybay nagdawel agsipud ta nagangin iti napigsa.

19 Idi nacapagga-odda ngarud ti casla lima wenno innem a kilometro, makitada ni Jesus a magmagna iti rabaw ti baybay, nga umas-asideg iti viray: ket nagbutengda.

20 Ngem kunana cadacuada, Siac; dicayo agbuteng.

21 Nagayatanda ngarud nga inawat iti viray: ket iti apagbiit ti viray dimteng iti daga a papananda.

22 ś Ti sumuno nga aldaw, dagidi tattao nga agtatacder idiay ballasiw iti baybay nakitada nga awan ti sabali a viray idiay, no di la diay viray a limmuganan dagiti adalanna, ket ni Jesus saan a nakicuyog cadagiti adalanna, no di ket dagidi adalanna napanda nga is-isuda;

23 (Nupay casta adda virviray a naggapu idiay Tiberias a dimteng iti asideg ti disso a nangananda ti tinapay, idi calpasan ti panagyaman ti Apo:)

24 Idi ngarud nakita dagiti tattao a ni Jesus awan sadiay, ken uray dagiti adalanna, simrecda cadagiti viray, ket napanda idiay Capernaum, a nangsapsapul ken Jesus.

25 Ket idi nasaracanda idiay ballasiw ti baybay, kinunada kencuana, Mannursuro, caano ti idadatengmo ditoy?

26 Ni Jesus simmungbat cadacuada ket kinunana, Pudno, pudno, kunak cadacayo, Sapulendac, saan a gapu ta nacakitacayo cadagiti datdatlag, no di ket gapu ta nangancayo cadagiti tinapay, ket nabsogcayo.

27 Agtrabahocayo saan a gapu ti taraon a mapucaw, no di ket gapu iti taraon a mataginayon a maipaay iti biag nga agnanayon, nga itedto cadacayo ti Anac ti tao: ta isu minarcaan ti Dios Ama.

28 Kinunada ngarud kencuana, Ania ti aramidenmi, tapno ma-aramidmi dagiti ar-aramid ti Dios?

29 Simmungbat ni Jesus ket kinunana cadacuada, Daytoy ti aramid iti Dios, a mamaticayo iti daydiay nga imbaonna.

30 Kinunada ngarud kencuana, Ania ngarud ti pagilasinan nga aramidem, tapno makitami, ket patiendaca? ania ti aramidem?

31 Dagiti ammami kinnanda ti mana idiay let-ang; cas adda a naisurat, Intedna cadacuada ti tinapay a nailangitan a canen.

32 Ni Jesus ngarud kinunana cadacuada, Pudno, pudno, kunak cadacayo, saan a ni Moises ti nangted cadacayo ti tinapay a nailangitan; no di ket ni Amac itedna cadacayo ti pudno a tinapay nga aggapu sadi langit.

33 Ta ti tinapay ti Dios isu dayta bumaba manipud langit, ket mangted ti biag iti lubong.

34 Kinunada ngarud kencuana, Apo, itedmo cadacami a patinayon daytoy a tinapay.

35 Ni Jesus kinunana cadacuada, Siac ti tinapay ti biag: ti umay caniac saanto nga agbisin; ket ti mamati caniac uray caano saanto a mawaw.

36 Ngem kinunac cadacayo, A nakitadac, ket nupay casta dicayo mamati.

37 Isuamin nga ited caniac ni Ama umayto caniac; ket ti umay caniac diacto pagtalawen.

38 Ta bimmabaac nanipud langit, saan a tapno aramidec ti pagayatac, no di ti pagayatan ti nangibaon caniac.

39 Ket daytoy ti pagayatan ti Ama a nangibaon caniac, nga amin nga intedna caniac awan coma ti mapucaw, no di ket pagungarec iti camaudianan nga aldaw.

40 Ta daytoy ti pagayatan ti nangibaon caniac, nga tunggal maysa a macakita iti Anac, ket mamati kencuana, adda biagna nga agnanayon: ket isu pagungarecto iti camaudianan nga aldaw.

41 Agtantanabutob ngarud dagiti Judio iti maipapan kencuana, agsipud ta kinunana, Siac ti tinapay a bimmaba nanipud langit.

42 Ket kinunada, Saan aya a daytoy ni Jesus, ti anac ni Jose, ket ti amana ken inana am-ammotayo? casano ita ti panagkunana, Nanipud langit immulogac?

43 Ni Jesus simmungbat ket kinunana cadacuada, Dicayo agtantanabutob.

44 Awan ti tao a macabalin nga umay caniac, no saan a guyugoyen ni Ama a nangibaon caniac: ket isu pagungarecto iti camaudianan nga aldaw.

45 Adda nga insurat dagiti mammadto, Ket maisurodanto amin iti Dios. Tunggal maysa nga tao a dimngeg, ket nacasursuro iti Ama, umay caniac.

46 Awan ti tao a nakakita ken Ama, no di ket ti naggapu iti Dios, isu ti nakakita ken Ama.

47 Pudno, pudno, kunak cadacayo, Ti mamati caniac addaan biag nga agnanayon.

48 Siac ti tinapay ti biag.

49 Dagidi ammayo kinnanda ti mana idiay let-ang, ket natayda.

50 Daytoy ti tinapay a bimmaba manipud langit, tapno ti siasinoman a macapangan kencuana, saan a matay.

51 Siac ti tinapay a sibibiag a bimmaba nanipud langit: no adda tao a mangan itoy a tinapay, agbiagto nga agnanayon: ket ti tinapay nga itdecto isu ti lasagco, isu nga itdecto a pacabiagan ti lubong.

52 Dagiti Judio ngarud nagsusuppiatda, a cunkunada, Casano ti pannacabalin daytoy a tao a mangted cadatayo ti lasagna a canen?

53 Ni Jesus ngarud kinunana cadacuada, Pudno, pudno, kunak cadacayo, No saancayo a mangan iti lasag ti Anac ti tao, ken uminum iti darana, awanancayo iti biag.

54 Ti mangan iti lasagco, ken uminum iti darac, adda biagna nga agnanayon; ket isu pagungarecto iti camaudianan nga aldaw.

55 Ta ti lasagco pudno a pagtaraon, ket ti darac pudno nga inumen.

56 Ti mangan iti lasagco, ken uminum iti darac, agtalinaed caniac, ket siac kencuana.

57 Cas ti Ama a sibibiag imbaonnac, ket agbiagac gapu iti Ama: casta met a ti mangan caniac, agbiagto gapu caniac.

58 Daytoy ti tinapay a bimmaba nanipud langit: saan a cas cadagidi ammayo a nanganda iti mana, ket natayda: ti mangan itoy a tinapay agbiagto nga agnanayon.

59 Dagitoy sinaona idiay sinagoga, idi nangisursuro idiay Capernaum.

60 Adu ngarud cadagidi adalanna, idi mangngegda, kinunada, Naricut daytoy a sao; asino ti macabalin a dumngeg kencuana?

61 Ngem ni Jesus agsipud ta na-ammoanna met laeng a dagiti adalanna agtantanabutobda gapu iti daytoy, kinunana cadacuada, Pacaitibcolanyo aya daytoy?

62 Anianto la ketdin no makitayonto ti Anac ti tao nga agpangato idiay ayanna nga immuna?

63 Ti espiritu ti mangted iti biag; ti lasag awan ti maitedna: dagiti sasao nga insaoc cadacayo, espirituda, ken biagda.

64 Ngem adda dadduma cadacayo a saan a mamati. Ta ni Jesus nanipud idi damo ammona no siasino dagiti saan a mamati, ken no siasino ti mangliputto kencuana.

65 Ket kinunana, Gapuna kinunac cadacayo, nga awan ti tao mga macabalin nga umay caniac, no saan nga impaay kencuana ni Amac.

66 ś Nanipud idin adu cadagiti adalanna nagsanudda, ket saanda a nakicuyogen kencuana.

67 Kinuna ngarud ni Jesus cadagiti sangapulo ket dua, Dacayo pumanawcayo met aya?

68 Ket simmungbat kencuana ni Simon Pedro, Apo, asinonto ti papananmi? sica addaanca cadagiti sasao ti biag nga agnanayon.

69 Ket dacami namaticami ken awan duduami a sica ti Cristo, ti Anac ti sibibiag a Dios.

70 Ni Jesus simmungbat kencuana, Dicayo aya pinili a sangapulo ket dua, ket maysa cadacayo isu ti diablo?

71 Ket sinaona daytoy maipapan ken ni Judas Iscariote nga anac ni Simon: isu ti mangliputto kencuana, ta isu maysa met cadagiti sangapulo ket dua.

CAPITULO 7

1 Ket idi nalpas dagitoy nagna ni Jesus idiay Galilea: ta dina kinayat ti magna idiay Judea, ta dagiti Judio ket sinapsapulda a papatayen.

2 Itan ti fiesta iti ab-abong dagiti Judio ket asideg idi.

3 Dagiti cacabsatna kinunada ngarud kencuana, Pumanawca ditoy, ket inca idiay Judea, tapno dagiti adalam makitada met dagiti aramidmo nga aramidem.

4 Ta awan ti tao nga agaramid ti uray ania a nalimed, idinto a tarigagayanna a mailatac. No aramidem dagitoy, agparangca iti lubong.

5 Ta uray dagiti cacabsatna saanda a mamati idi kencuana.

6 Cuna idin ni Jesus cadacuada, Ti orasco saan pay a dimteng: ngem ti aldawyo cancanayon a sisasagana.

7 Ti lubong saannacayo a mabalin a guraen; ngem siac guraennac, gapu ta sacsiac ti maipapan kencuana, a dakes dagiti aramidna.

8 Sumang-atcayo iti fiesta: siac diac pay sumang-at itoy a fiesta; ta ti aldawco saan pay a dimteng.

9 Ket idi naisaona dagitoy cadacuada, nagbati idiay Galilea.

10 Ngem idi nacasang-aten dagiti cacabsatna, simmang-at met a napan iti fiesta, saan a nalatac, no di ket casla nalimed.

11 Dagiti Judio ngarud sinapsapulda iti pagfiestaan, ket cunkunada, Adino ti yanna?

12 Ket adda idi dackel a tanabutob cadagiti adu a tao iti maipapan kencuana: ta kinuna dagiti dadduma, Isu naimbag a tao: ket dagiti sabsabali kunada, Saan; no di ket iyaw-awanna dagiti adu a tao.

13 Ngem awan ti tao nga nagsao a nalatac iti maipapan kencuana gapu ti butengda cadagiti Judio.

14 ś Itan idi adda iti nagtengaan ti fiesta ni Jesus ket napan idiay templo, ket nangisuro.

15 Nasnasdaaw ngarud dagiti Judio, a cunkunada, Casano ti pannacaammo daytoy a tao cadagiti pagbasaan, idinto nga saan a pulos a nagadal?

16 Simmungbat ngarud cadacuada ni Jesus, ket kinunana, Ti isursuroc saanco a cucua, no di cucua ti nangibaon caniac.

17 No adda tao nga agpanggep nga agaramid ti pagayatanna, maammoannanto ti maipapan iti isursuroc, no aggapu iti Dios, wenno no agsaoac a sisiac.

18 Ti mangibunannag iti saona met laeng sapulenna ti pacaidayawanna: ngem ti agsapul ti pacaidayawan ti nangibaon kencuana, isu met laeng ti napudno, ket awan kencuana ti kinakillo.

19 Dinacayo aya iniccan ni Moises ti linteg, ket awan pay cadacayo ti macatungpal iti linteg? Apayapay agawaandac a papatayen?

20 Simmungbat dagiti tattao a kunada, Adda sairom: asino ti manggayagay a mamapatay kenca?

21 Ni Jesus simmungbat ket kinunana cadacuada, Nagaramidac ti maysa nga aramid, ket dacayo amin agsidsiddaawcayo.

22 Ni Moises intedna cadacayo ti pannacacugit; (saan a gapu nga nagtaud ken Moises, no di ket cadagiti amma;) ket ti aldaw ti panaginana cugitenyo ti tao.

23 No ti tao awatenna ti pannacacugit iti aldaw ti panaginana, tapno ti linteg ni Moises saan a masalungasing; agpungtotcayo aya caniac, agsipud ta pinaimbagco nga awan pagcuranganna ti maysa a tao iti aldaw ti panaginana?

24 Saancayo nga mangocom a cas ti makita, no di ket mangocomcayo ti maysa a nalinteg a panangocom.

25 Kinuna ngarud dagiti dadduma a taga Jerusalem, Saan aya nga isu daytoy, ti sapsapulenda a papatayen?

26 Ket, adtoy, agsasao iti nalatac, ket awan ti cunaenda kencuana. Saan cadi a dagiti agtuturay ammoda a pudno a daytoy iti Cristo?

27 Ngem daytoy a tao ammomi no adino ti naggapuanna: ngem ni Cristo inton umay, awanto ti tao a macaammo no adino ti paggapuanna.

28 Idin impuccaw ni Jesus idiay templo idi a mangisursuro, a kinunana, Am-ammodac, ket ammoyo met ti naggapuac: ket saannac a naggapu caniac, ngem ti nangibaon caniac napudno, isu a dicayo am-ammo.

29 Siac ammoc isuna: ta naggapuac kencuana, ket isu iti nangibaon caniac.

30 Idin ket inagawaanda ngarud a tiliwen: ngem awan ti nangipatay ti imana kencuana, ta saan pay a dimteng ti horasna.

31 Ket adu cadagidi nga tattao iti namati kencuana, ket kinunada, Ni Cristo intono umay, agaramidto ngata ti ad-adu a datdatlag ngem cadagiti inaramid daytoy a tao?

32 ś Dagiti Fariseo nangngegda dagiti adu a tattao a tantanabutobenda dagitoy a maipapan kencuana; ket dagiti Fariseo ken cangatoan a papadi nangibaonda cadagiti policia a mangtiliw kencuana.

33 Ni Jesus kinunana ngarud, Adda pay bassit a panawen nga makipaggianac cadacayo, calpasanna mapanacton iti nangibaon caniac.

34 Sapulendacto, ket didacto masaracan: ket no adino ti ayanco, dicayo mabalin ti umay.

35 Dagiti Judio ngarud ket kinunkunada, Adinonto ti papanan daytoy, a ditayto masaracan? mapanto ngata cadagiti naiwara cadagiti Gentiles, ken mangisuro cadagiti Gentiles?

36 Ania nga kita a sao daytoy a kinunana, Sapulendacto, ket didacto masaracan: ket no adino ti ayanco, dicayo mabalin ti umay?

37 Idi camaudianan, iti dackel nga aldaw ti fiesta, ni Jesus nagtacder ket nagpuccaw, a kinunana, No adda tao a mawaw, umay caniac, ket uminum.

38 Ti mamati caniac, a cas cunaen ti surat, carcarayan iti nabiag a danum ti agayusto manipud iti unegna.

39 (Ngem sinaona daytoy a maipapan iti Espiritu, nga awatento dagiti mamati kencuana: ta saan pay idi a naited ti Espiritu Santo; ta ni Jesus saan pay idi a naipanayag.)

40 ś Dadduma ngarud cadagidi adu a tattao, idi mangngegda dagitoy a sao, kinunada, Pudno a daytoy ti Mammadto.

41 Dagiti sabsabali kinunada, Daytoy ti Cristo. Ngem kinuna dagiti dadduma, Ni Cristo aggapu ngata idiay Galilea?

42 Saan a kinuna aya ti surat, nga ti paggapuan ti Cristo isu iti caputotan ni David, ken idiay Bethlehem, idiay puroc a tinaudan ni David?

43 Iti casta napataud ti panagsusupadi dagiti adu a tao a gapu kencuana.

44 Ket dadduma cadacuada cayatda coman a tiliwen; ngem awan ti tao a nangipatay dagiti imada kencuana.

45 ś Dagiti ngarud policia nagsublida cadagiti cangatoan a papadi ken Fariseo; ket dagitoy kinunada cadacuada, Apayapay dicayo inyeg isuna?

46 Dagiti policia simmungbatda, Awan iti uray siasino a tao a nagsaon a cas iti daytoy nga tao.

47 Dagiti Fariseo ngarud simmungbatda cadacuada, Na-allilawcayo met aya?

48 Adda aya cadagiti agtuturay wenno cadagiti Fariseo ti namati kencuana?

49 Ngem dagitoy nga tattao a dida ammo ti linteg ket nailunodda.

50 Cuna cadacuada ni Nicodemo, (daydi immay ken Jesus iti rabii, ta maysa met cadacuada,)

51 Ocomen aya ti lintegtayo ti tao, no di umuna a denggen, ken ammoen ti aramidenna?

52 Simmungbatda ket kinunada kencuana, Sica taga Galileaca met aya? Sukimatem, ken kitaem: a manipud idiay Galilea awan ti tumaud a mammadto.

53 Ket tunggal maysa a tao nagawid iti balayna.

CAPITULO 8

1 Ket ni Jesus napan idiay bantay dagiti Olivo.

2 Ket iti cabigatanna a nasapa unay napan manen iti templo, ket amin dagiti tattao immayda kencuana; ket nagtugaw, ket insursurona ida.

3 Ket dagiti escriba ken Fariseo inyegda ti maysa a babai a nasaracanda iti pannakiabig iti dina asawa; ket idi incabilda isuna iti nagtetengngaanda,

4 Kunada kencuana, Mannursuro, daytoy a babai ket nakiabig, ken natiliw itay madama iti aramidda.

5 Ket iti linteg ni Moises imbilinna cadacami, nga uburenmi dagiti cacasta: ania ngarud iti macunam?

6 Ngem daytoy kinunada, a pangsuut kencuana, tapno adda pacabalinanda a mangidarum kencuana. Ngem ni Jesus nagrucob, ket pinagsuratna ti ramayna iti daga, a casla saanna a nangeg ida.

7 Ngem agsipud ta ulit-ulitenda a pagsaludsodan, nagtacder, ket kinunana cadacuada, Ti awan basolna cadacayo, umuna coma a mangibacal ti bato kencuana.

8 Ket nagrucob manen, ket pinagsuratna ti ramayna iti daga.

9 Ket idi mangngegda daytoy, nababalaw iti amin a conciensada, rimmuarda a saggaysa, nangrugi iti calacayan, agingga cadagiti caubingan: ket ni Jesus laeng ti nabati, ken daydi babai nga adda iti tengnga.

10 Idin timmacder ni Jesus, ket awan nakitana no di laeng ti babai, ket kinunana kencuana, Babai, adino ti ayanda dagiti nangiyuman kenca? awanen ti tao a mangocom kenca?

11 Ket isu kinunana, Awanen ti tao, Apo. Ket ni Jesus kinunana kencuana, Uray siac met saanca nga ocomen: incan, ket manipud ita dica agbasolen.

12 ś Ni Jesus kinasaona manen ngarud idan, a kunkunana, Siac ti silaw ti lubong: ti sumurot caniac saanto a magna iti sipnget, no di ket addanto kencuana ti silaw ti biag.

13 Dagiti Fariseo ngarud ket kinunada kencuana, Sica sacsiam ti bagim; ti pangpanecnecmo ket saan a pudno.

14 Ni Jesus simmungbat ket kinunana cadacuada, Uray sacsiac ti maipapan caniac, ngen ti pangpanecnecco pudno: ta ammoc no adino ti naggapuac, ken no adino ti papanac; ngem dicayo ammo no adino ti naggapuac, ken no adino ti papanac.

15 Dacayo mangocomcayo a mayannurot iti lasag; ngem siac awan ti tao nga ocomec.

16 Ket uray no mangocomac, ti panangocomco pudno: ta saanac a maymaysa, no di ket siac ken ti Ama a nangibaon caniac.

17 Ket naisurat pay iti lintegyo, a ti pangpanecnec ti dua a tao ket isu ti pudno.

18 Siac ti mangpanecnec iti bagic, ken panecnecannac ti Ama a nangibaon caniac.

19 Kinunada ngarud kencuana, Adino ti ayan ti Amam? Simmungbat ni Jesus, Saandac nga am-ammo, uray pay ni Amac: no am-ammodac coma, na-ammoanyo met coma ni Amac.

20 Dagitoy a sasao kinuna ni Jesus idiay tesoreria, idi nangisursuro idiay templo: ket awan ti tao a nangtiliw kencuana; ta dipay dimteng ti horasna.

21 Kinuna ngarud manen ni Jesus cadacuada, Innacon, ket sapulendacto, ket mataycayto cadagiti basbasolyo: no adino ti papanac, dicayo mabalin ti umay.

22 Kinuna ngarud dagiti Judio, Papatayennanto ngata ti bagina? ta kunana, No adino ti papanac, dicayo mabalin ti umay.

23 Ket kinunana cadacuada, Dacayo taga babacayo; siac taga ngatoac: dacayo taga ditoy a lubongcayo; siac saannac a taga ditoy nga lubong.

24 Kinunac ngarud cadacayo, a mataycayto cadagiti basbasolyo: ta no dicayo patien a siac daydi, mataycayto cadagiti basbasolyo.

25 Kinunada ngarud kencuana, Siasinoca? Ni Jesus kinunana cadacuada, Daydi met laeng imbagac cadacayo idi damo.

26 Adu dagiti masapul nga ibagac ken ipatoc iti maipapan cadacayo: ngem ti nangibaon caniac napudno; ket dagiti nangngegco kencuana dagitoy ti saoec iti lubong.

27 Saanda a naawatan nga isu insarsaritana cadacuada iti maipapan iti Ama.

28 Kinuna ngarud ni Jesus cadacuada, Inton maibayogyon ti Anac ti tao, isunto ti pannacaammoyo a siac daydi, ken awan ti aramidec a sisiac; no di ket cas iti insuro caniac ni Ama, dagitoy ti saoec.

29 Ket ti nangibaon caniac adda caniac: ti Ama saannac a binaybay-an a maymaysa; ta siac agnanayon nga aramidec dagiti macaay-ayo kencuana.

30 Idi sasaoenna dagitoy, adu dagiti namati kencuana.

31 Kinuna ngarud ni Jesus cadagiti Judio a namati kencuana, No agtalinaedcayo cadagiti saoc, pudno a dacayto dagiti adalac;

32 Ket maammoanyonto ti pudno, ket ti kinapudno wayawayaannacayto.

33 ś Simmungbatda kencuana, Caputotannacami ni Abraham, ket uray caano awan ti nacatagabuanmi a tao: casano ti panagcunam, Mawayawayaancayto?

34 Ni Jesus simmungbat cadacuada, Pudno, pudno, kunak cadacayo, Siasinoman nga agaramid iti basol ket tagabu ti basol.

35 Ket ti tagabu saan nga agtaeng iti balay nga agnanayon: ngem ti Anac agtaeng nga agnanayon.

36 No ngarud ti Anac wayawayaannacayo, pudno nga siwayawayacayto.

37 Ammoc a caputotannacayo ni Abraham; ngem agawaandac a papatayen, gapu ta ti saoc awan ti pagyananna cadacayo.

38 Siac saoec dagiti nakitac ken Amac: ket dacayo met aramidenyo dagiti nakitayo ken amayo.

39 Simmungbatda ket kinunada kencuana, Ti amami isu ni Abraham. Cuna cadacuada ni Jesus, No annacnacayo coma ni Abraham, aramidenyo coma met dagiti ar-aramid ni Abraham.

40 Ngem ita agawaandac a papatayen, siac a tao ti nagsao cadacayo iti pudno, a nangegco iti Dios: daytoy saan nga inaramid ni Abraham.

41 Dacayo aramidenyo dagiti ar-aramid ni amayo. Idin kinunada kencuana, Dacami saancami a nayanac iti pannakicamalala; adda maymaysa nga Amami, nga isu ti Dios.

42 Ni Jesus kinunana cadacuada, No ti Dios coma ti Amayo, ayatendac coma: ta naggapuac ken immayac iti Dios; ta saannac nga immay a nacnakemco laeng, ngem isu imbaonnac.

43 Ania ti gapu a dicayo maawatan ti panagsaoc? gapu ta saanyo a mangeg ti saoc.

44 Cucuanacayo ti amayo nga diablo, ket cayatyo nga aramiden dagiti dakes a calicagum ni amayo. Isu mammapatay nanipud idi damo, ket saan a nagtalinaed iti pudno, gapu ta awan ti pudno kencuana. No agsao ti ulbod, saoenna ti cababalinna met laeng: ta isu manangulbod, ken ama ti kinaulbod.

45 Ngem siac agsipud ta saoec ti pudno, didac patien.

46 Asino cadacayo ti mangbabalaw caniac iti basol? No saoec ti pudno, ania ti gapuna a didac patien?

47 Ti agtaud iti Dios denggenna dagiti sao ti Dios: gapu iti daytoy dicayo agdengngeg, ta saancayo a nagtaud iti Dios.

48 Simmungbat dagiti Judio, ket kinunada kencuana, Saan aya a naimbag ti panagcunami a taga Samariaca, ket adda sairom?

49 Simmungbat ni Jesus, Siac awan ti sairoc; no di ket padayawac ni Amac, ket dacayo didac padayawan.

50 Ngem siac diac sapulen ti pacaidayawac: adda maysa a mangsapul ken mangocom.

51 Pudno, pudno, kunak cadacayo, No adda tao a mangsalimetmet iti saoc, saannanto a makita ni patay uray caano.

52 Dagiti Judio kinunada kencuana, Ita ammomi nga adda sairom. Ni Abraham natayen, casta met dagidi mammadto; ket cunam, No adda tao a mangsalimetmet iti saoc, dinanto maramanan ni patay uray caano.

53 Dacdackelca aya ngem ni amami nga Abraham, isu a natayen? ken casta met dagiti mammadto a nataydan: asino ti panangipapanmo iti bagim?

54 Simmungbat ni Jesus, No dayawec ti bagic met laeng, ti dayawco awan capapaayanna: ni Amac ti mangidayaw caniac; nga isu ti cunayo, a Diosyo:

55 Ket isu dicayo naammoan; ngem siac ammoc: ket no kunak coma, nga diac ammo, caslanacto coma cadacayo a naulbod: ngem isu ammoc, ket salimetmetac ti saona.

56 Ni amayo nga Abraham nagragsac iti pannacakitana iti aldawco: ket nakitana, ket nagrag-o.

57 Kinuna ngarud kencuana dagiti Judio, Awan pay lima pulo a tawenmo, ket nakitamon aya ni Abraham?

58 Kinuna cadacuada ni Jesus, Pudno, pudno, kunak cadacayo, Idi casacbayan ni Abraham, addaacon.

59 Pimmidutda ngarud dagiti batbato tapno uburenda: ngem ni Jesus naglemmeng, ken rimmuar iti templo, ken nagna iti nagtetengaanda, nga linabsanna ida.

CAPITULO 9

1 Ket idi a limmabas ni Jesus, nakitana ti maysa a tao a bulsec nanipud idi pannacayanacna.

2 Ket dagiti adalanna inintuudda kencuana, a kunada, Mannursuro, asino ti nacabasol, daytoy a tao, wenno dagiti dadackelna, iti casta nayanac a bulsec?

3 Simmungbat ni Jesus, Saan a nagbasol uray daytoy a tao, uray dagiti dadackelna: ngem tapno dagiti aramid ti Dios maiparangarang kencuana.

4 Rebbengco nga aramiden dagiti aramid ti nangibaon caniac, bayat ti aldaw: ti rabii umay, inton awan ti tao nga mabalin nga agaramid.

5 Bayat iti caaddac ditoy nga lubong, siac iti silaw ti lubong.

6 Idi naisaona dagitoy, timmupra iti daga, ket nangaramid ti pitac iti natupraan, ket sinapsapoanna dagiti mata ti tao a bulsec iti pitac,

7 Ket kinunana kencuana, Inca, agbuggoca idiay danum ti Siloe, (a cayatna a saoen, Naibaon.) Napan ngarud, ket nagbuggo, ket nagawid a makakitan.

8 ś Dagiti cacarruba ngarud, ken dagiti nacakita idi damo kencuana a bulsec, kinunada, Saan a daytoy aya daydi agtugtugaw ken makilimlimos?

9 Dagiti dadduma kinunada, Isu daytoy: dagiti sabsabali kinunada, Saan no di ket umasping kencuana: ngem isu kinunana, Siac daydiay.

10 Kinunada ngarud kencuana, Casano ngarud ti pannacalucat dagiti matam?

11 Isu simmungbat, Ti tao a managan Jesus nangaramid ti pitac, ket sinapsapoanna dagiti matac, ket kinunana caniac, Inca idiay danum ti Siloe, ket agbuggoca: Napanac ngarud nagbuggo, ket nakakitaac.

12 Ket kinunada kencuana, Adino ti ayanna? Isu kunana, diac ammo.

13 ś Impanda ngarud daydi bulsec idi damo cadagiti Fariseo.

14 Ket aldaw ti panaginana idi inaramid ni Jesus ti pitac, ken linuctanna dagiti matana.

15 Inintuudda manen ngarud kencuana dagiti Fariseo no casano ti pannacakitana. Ket kinunana cadacuada, Nangicabil ti pitac cadagiti matac, ken nagbuggoac, ket nacakitaac.

16 Dadduma cadagiti Fariseo kunada, Daytoy a tao saan a naggapu iti Dios, ta saanna a ngilinen ti aldaw a panaginana. Dagiti sabsabali kunada, Casano ti maysa a tao a managbasol nga agaramid dagiti cacasta a datdatlag? Ket adda panagsusupadi cadacuada.

17 Kinunada ngarud manen idi bulsec a tao, Sica ania ti cunaem kencuana, idinto a linucatanna dagiti matam? Ket kinunana, Isu ti maysa a mammadto.

18 Dagidi Judio ngarud saanda a namati iti maipapan kencuana, a bulsec idi damo, ket nakakita, agingga idi naayabanda dagiti dadackel daydi naiccan ti pannacakita,

19 Ket inintuudda cadacuada, a cunkunada, Isu daytoy ti anacyo, daydi cunayo a nayanac a bulsec? casano ngarud a makakita ita?

20 Simmungbat dagiti dadackelna ket kinunada, Ammomi a daytoy ti anacmi, ken nayanac a bulsec:

21 Ngem no casano iti pannacakitana ita, saanmi nga ammo; ken no asino ti nanglucat cadagiti matana, saanmi nga ammo: nataenganen, isu ti pagintuudanyo: isu agsaonto iti maipapan kencuana.

22 Dagitoy kinuna dagiti dadackelna, ta cabutengda idi dagiti Judio: ta dagiti Judio nagnunumoanda a no adda tao nga mangipudno nga isu ti Cristo, maparruar iti sinagoga.

23 Gapuna kinuna dagiti dadackelna, Nataenganen; isu ti pagintuudanyo.

24 Inayabanda manen ngarud ti tao a bulsec idi, ket kinunada kencuana, Iccam ti pammadayaw iti Dios: ammomi a daytoy a tao ket managbasol.

25 Isu simmungbat ket kinunana, No managbasol wenno saan, diac ammo: maysa a banag iti ammoc, nga, idinto a bulsecac idi, itan ket macakitaac.

26 Kinunada ngarud kencuana, Ania ti inaramidna aya kenca? casano ti pananglucatna dagiti matam?

27 Sinungbatanna ida, Imbagac la ngaruden cadacayo, ket dicayo met impangag: apayapay cayatyo manen a denggen? cayatyo met aya ti agbalin nga adalanna?

28 Ket isu nagsasaoanda, ket kinunada, Sica ti adalanna; ngem dacami adalannacami ni Moises.

29 Ammomi a ti Dios nakisao ken Moises: ngem daytoy a tao, dicam ammo no adino ti naggapuanna.

30 Simmungbat daydi tao ket kinunana cadacuada, Adtoy ti nacascasdaaw a banag, a dicayo ammo no adino ti naggapuanna, ket idinto a linuctanna pay dagiti matac.

31 Ammotayo a ti Dios dina ipangag dagiti managbasol: ngem no adda tao a managrucbab iti Dios, ket aramidenna ti pagayatanna, isu ti denggenna.

32 Nanipud idi panangrugi ti lubong awan pay nangngegan a nanglucat cadagiti mata ti maysa a tao a nayanac a bulsec.

33 No daytoy a tao saan coma a naggapu iti Dios, awan coma ti mabalinna nga aramiden.

34 Simmungbatda ket kinunada kencuana, Naigamerca cadagiti basbasol ti pannacayanacmo, ket isuronacami? Ket pinaruarda isuna.

35 Nangngeg ni Jesus nga pinarruarda; ket idi nasaracanna, kinunana kencuana, Mamatica iti Anac ti Dios?

36 Isu simmungbat ket kinunana, Siasino, Apo, tapno mamatiac kencuana?

37 Ket kinuna ni Jesus kencuana, Nakitamon, ket isu met laeng ti makisasao kenca.

38 Ket kinunana, Apo, Mamatiac. Ket nagrucbab kencuana.

39 śKet kinuna ni Jesus, Gapu ti panangocom immayac iti daytoy nga lubong, tapno dagiti saan a macakita makakitada; ken dagiti macakita agbalinda a bulsec.

40 Dagiti Fariseo a naitallaong kencuana nangngegda dagitoy a sasao, ket kinunada kencuana, Bulseccami met aya?

41 Kinuna ni Jesus cadacuada, No bulseccayo coma, awan coma ti basolyo: ngem ita cunayo, Macakitacami; iti casta ngarud dagiti basolyo ket agtalinaed cadacayo.

CAPITULO 10

1 Pudno, pudno, kunak cadacayo, Ti saan a sumrec iti ruangan ti pacayaponan dagiti carnero, ngem ketdi cumalay-at iti sabali a pagdalanan, isu met la daytoy iti mannanacaw ken tulisan.

2 Ngem ti sumrec iti ruangan ket isu ti pastor dagiti carnero.

3 Isu ket ilucatan ti agay-aywan iti ruangan; ket dagiti carnero denggenda ti timecna: ket ayabanna dagiti carnerona cadagiti nagnaganda, ken iruarna ida.

4 Ket inton nairuarnan amin dagiti carnerona, magna iti sangoananda, ket dagiti carnero sumurotda kencuana: gapu ta mailasinda iti timecna.

5 Ngem ti dida am-ammo ket saandanto nga suroten, no di ket itarayandanto: ta dida am-ammo ti timecna.

6 Daytoy a pangngarig ket insao ni Jesus cadacuada: ngem saanda nga naawatan no ania dagidi a sinasaona cadacuada.

7 Kinuna manen ngarud ni Jesus cadacuada, Pudno, pudno, kunak cadacayo, siac ti ruangan dagiti carnero.

8 Isuamin dagidi immay nga immun-una ngem siac ket mannanacawda ken tulisanda: ngem saan nga dinengngeg ida dagiti carnero.

9 Siac ti ruangan: ti siasinoman a tao nga sumrec a magna caniac, maisalacanto, ket sumrecto ken rummuarto, ket macasaracto iti pagaraban.

10 Ti mannanacaw saan nga umay, no di tapno agtacaw, ken agpatay, ken agdadael: Siac immayac tapno maaddaanda ti biag, ken tapno maaddaanda pay ti nawadwad unay.

11 Siac ti naimbag a pastor: ti naimbag a pastor itedna ti biagna gapu cadagiti carnerona.

12 Ti matangtangdanan, ket saan nga pastor, ken dina cucua dagiti carnero, no makitana ti lobo nga umay, itarayanna dagiti carnero, ken baybay-anna ida: ket ti lobo rabsutenna, ken warawaraenna dagiti carnero.

13 Ti matangtangdanan tumaray, agsipud ta isu patangtangdanan, ket saanna a ipatpateg dagiti carnero.

14 Siac ti naimbag a pastor, ket ammoc dagiti carneroc, ket ammodac dagiti cucuac,

15 A cas ti Ama am-ammonac, casta met siac am-ammoc ti Ama: ket itedco ti biagco maipuon cadagiti carnero.

16 Adda met sabsabali a carneroc, a saanda a naitipon itoy a pagtaracnan: dagidiay masapul nga iyegco, ket denggendanto ti timecco; ket addanto maymaysa nga arban, ken maymaysa a pastor.

17 Gapu iti daytoy ayatennac ni Amac, gapu ta itedco ti biagco, tapno awatecto manen.

18 Awan ti tao a mangiccat caniac, no di ket iyawatco a sisiac. Adda pannacabalinco a mangyawat ti biagco, ken adda pannacabalinco met a mangawat manen. Daytoy a bilin ket inawatco ken Amac.

19 ś Naaramid manen ngarud ti panagsusupadi cadagiti Judio gapu cadagitoy a sasao.

20 Ket adu cadacuada iti nagcuna, Adda sairona, ket mauyong isuna; apayapay denggenyo?

21 Kinuna dagiti sabsabali, Dagitoy saanda a sao ti adda sairona. Cabaelan aya ti sairo a luctan dagiti mata dagiti bulsec?

22 ś Ket idiay Jerusalem fiesta idi ti panangidaton, ken tiempo ti lam-ec idi.

23 Ket ni Jesus magmagna idiay templo iti ruangan ni Salomon.

24 Idin immay dagiti Judio a linawlawda, ket kinunada kencuana, Agingga ti caano a pagduaduaennacami ? No sica ti Cristo, ibagam cadacami a silalawag.

25 Simmungbat cadacuada ni Jesus, Imbagac cadacayo, ket dicayo mamati: dagiti aramid nga ar-aramidec iti nagan ni Amac, dagita ti mangpanecnec iti maipapan caniac.

26 Ngem dicayo mamati, ta saancayo a caddua dagiti carneroc, a cas kunak cadacayo.

27 Dagiti carneroc denggenda ti timecco, ket ammoc ida, ken surotendac:

28 Ket iccac ida ti biag nga agnanayon; ket didanto mapucaw uray caano, ket awanto iti uray siasinoman nga mangrabsut cadacuada itoy imac.

29 Ni Amac, a nangted caniac cadacuada, dacdackel ngem cadagiti isuamin; ket awan ti siasinoman nga macabalin a mangrabsut cadacuada iti ima ni Amac.

30 Siac ken ti Ama maymaysacami.

31 Dagiti Judio pimmidutda manen ti batbato tapno uburenda isuna.

32 Simmungbat cadacuada ni Jesus, Adu dagiti naimbag nga aramid nga impakitac cadacayo a naggapu ken Amac: ania cadagita nga aramid ti panguboranyo caniac?

33 Simmungbat kencuana dagiti Judio, a kinunada, Saandaca nga uboren gapu iti naimbag nga aramidmo; no di ket gapu iti tabbaawmo; gapu ta sica, idinto a taoca, ket pagbalinem nga sica ket Dios.

34 Ni Jesus simmungbat cadacuada, Saan aya nga adda a naisurat iti lintegyo, Siac kinunac, Dacayo didioscayo?

35 No ninaganna ida ti didios, dagiti nacaisaoan ti sao ti Dios, ket ti surat saan a mabalin a paglibacan;

36 Cunaenyo ngarud, iti pinagsanto ti Ama, ken imbaonna ditoy lubong; Agtabbaawca; agsipud ta kinunac, Siac ti Anac ti Dios?

37 No diac agaramid cadagiti aramid ni Amac, didac patien.

38 Ngem no aramidec ida, uray no didac patien, patienyo dagiti aramid: tapno maammoanyo, ken mamaticayo, a ti Ama adda caniac, ket siac addaac kencuana.

39 Inagawaanda ngarud idi manen nga tiliwen: ngem isu ket nacalapsut cadagiti im-imada,

40 Ket napan manen idiay labes ti Jordan iti disso nga immuna nga namamautizaran ni Juan; ket naggian sadiay.

41 Ket adu dagiti immay kencuana, a kunada, Ni Juan awan ti datdatlag nga inaramidna: ngem isuamin nga insao ni Juan a maipapan itoy a tao ket napudnoda.

42 Ket adu dagiti namati kencuana idiay.

CAPITULO 11

1 Ket masakit idi ti maysa a tao, a managan Lazaro,

taga Betania, a puroc da Maria ken ni cabsatna a Marta.

2 (Isu daytoy ni Maria nga nangsapsapo iti Apo iti bangbanglo, ken nangpunas dagiti sacana cadagiti boocna, cabsat ni Lazaro a masakit.)

3 Dagiti ngarud cacabsatna a babbai nagbaonda kencuana, a kunada, Apo, adtoy ti ay-ayatem masakit.

4 Ngem idi nangngeg ni Jesus daytoy, kinunana, Daytoy a sakit ket saan nga ipatay, ngem pacaidayagan ti Dios, tapno ti Anac ti Dios maipadayag iti dayta.

5 Ket ni Jesus ay-ayatenna idi da Marta, ken ni cabsatna a babai, ken ni Lazaro.

6 Idi mangngegna ngarud nga isu masakit, nagbati pay laeng idiay ayanna iti dua nga aldaw.

7 Calpasanna kinunana cadagiti adalanna, Intayo manen idiay Judea.

8 Cuna kencuana dagiti adalan, Mannursuro, dagiti Judio ket sapsapulendaca nga uboren; ket inca manen idiay?

9 Simmungbat ni Jesus, Awan aya ti sangapulo ket dua nga horas iti aldaw? No ti maysa a tao magna iti aldaw, saan a maitibcol, agsipud ta makitana ti lawag daytoy a lubong.

10 Ngem no ti maysa a tao magna iti rabii, isu ket maitibcol, gapu ta awan iti silaw kencuana.

11 Sinaona dagitoy: ket calpasanna kinunana cadacuada, Ni Lazaro a gayyentayo ket matmaturog; ngem innac, tapno ri-ingec iti turogna.

12 Kinuna ngarud dagiti adalan kencuana, Apo, no matmaturog, umimbagto.

13 Ngem ni Jesus nagsao a maipapan iti ipapatayna: ngem impapanda a nagsao iti panaginana iti turog.

14 Idin kinuna ngarud ni Jesus a silalawag cadacuada, Ni Lazaro ket natayen.

15 Ket agragragsacac gapu cadacayo ta siac awanac idi idiay, ta ti panggep ket tapno mamaticayo; nupay casta intayon kencuana.

16 Kinuna ngarud ni Tomas, a managan ti Didimo, cadagiti caadalanna, Intayo met, tapno mataytayo a maicanunong kencuana.

17 Ket idi immay ni Jesus, nasaracanna nga isu ket naicabilen idiay tanem iti uppat nga aldawen.

18 Itan ti Betania ket asideg iti Jerusalem, a cas sangapulo ket lima nga estadio8 ti caadayona:

19 Ket adu cadagiti Judio ti immay cada Maria ken ni Marta, tapno liwliwaenda ida maipuon ken ni cabsatda.

20 Ni Marta ngarud, apaman a nangngegna nga sumungad ni Jesus, napan simmabet kencuana: ngem ni Maria nagbati pay laeng nga situtugaw idiay balay.

21 Ni Marta kinunana ngarud ken Jesus, Apo, no addaca coma ditoy idi, ni cabsatco saan coma a natay.

22 Ngem ammoc, uray itan, a ti aniaman a dawatem iti Dios, ti Dios itednanto kenca.

23 Cuna kencuana ni Jesus, Ni cabsatmo agungarto.

24 Ni Marta kunana kencuana, Ammoc nga agungarto inton panagungar iti camaudianan nga aldaw,

25 Cuna kencuana ni Jesus, Siac ti panagungar, ken ti biag: ti siasinoman a mamati caniac, uray no matay, ket agbiagto pay:

26 Ket ti siasinoman nga agbiag ken mamati caniac saanto nga matay a pulos. Patiem daytoy?

27 Ket kinunana kencuana, Wen, Apo: mamatiac a sica ti Cristo, ti Anac iti Dios, nga umayto ditoy lubong.

28 Ket idi nasaonan daytoy, napan, ket inayabanna iti nalimed ni Maria a cabsatna, a kunkunana, Ti Mannursuro adda ditoy, ket ayabannaca.

29 Ket idi nangngegna daytoy, timmacder a dagus, ket napan kencuana.

30 Ngem itan ni Jesus saan pay a dimteng iti puroc, no di ket adda pay laeng iti nangsabatan ni Marta kencuana.

31 Dagiti Judio ngarud a cadduana iti balay, ken mangliwliwa kencuana, idi nakitada ni Maria, a timmacder iti napardas ken rimmuar, sinurotda, nga cunkunada; Mapan idiay tanem tapno agsangit sadiay.

32 Ni Maria ngarud idi dimteng idi ayan ni Jesus, ken nakitana, nagrucnoy cadagiti sacsacana, a kunkunana kencuana, Apo, no addaca coma ditoy idi, saan coma a natay ni cabsatco.

33 Idi nakita ngarud ni Jesus nga isu agsangsangit, ken agsangsangit met dagiti Judio nga nangcuyog kencuana, nagladingit iti espirituna, ket nagsennaay,

34 Ket kinunana, Adino ti nangicabilanyo kencuana? Kunada kencuana, Apo, umayca ket kitaem.

35 Ni Jesus nagsangit.

36 Kinuna ngarud dagiti Judio, Kitaenyo no casano ti panangay-ayatna kencuana!

37 Ngem dadduma cadacuada kinunada, Saan aya a nabalinan daytoy a tao, a nanglucat cadagiti mata ti bulsec, nga aramiden met nga daytoy a tao saan coma a natay?

38 Ni Jesus ngarud nagsennaay manen iti pusona ket dimteng iti tanem. Isu idi ti maysa a rukib, ket naserraan iti maysa a bato.

39 Cuna ni Jesus, Iccatenyo ti bato. Ni Marta, a cabsat ti natay, kunana kencuana, Apo, nabuyoken itan: ta maicapat nga aldaw a natayen.

40 Ni Jesus kunana kencuana, Diac aya kinuna kenca, nga, no mamatica, makitam ti dayag ti Dios?

41 Iniccatda ngarud ti bato iti daydiay disso nga nacaicabilan ti natay. Ket ni Jesus intangadna dagiti matana, ket kinunana, Ama, agyamanac kenca ta impangagnac.

42 Ket ammoc nga ipangagnac nga cancanayon: ngem gapu cadagitoy adu a tao nga agtactacder iti aglawlaw nagsaoac, tapno patienda a sica imbaonnac.

43 Ket idi nasaona dagitoy, pimmuccaw iti napigsa a timec, Lazaro, rummuarca.

44 Daydi natay rimmuar, a dagiti im-ima ket sacsacana sipapatapat cadagiti lupot ti natay: ket ti rupana adda a nabungon iti maysa nga panyo. Cuna ni Jesus cadacuada, Warwaranyo, ket baybay-anyo a magna.

45 Adu ngarud cadagiti Judio nga immay ken Maria, ken nacakita iti inaramid ni Jesus, namatida kencuana.

46 Ngem dadduma cadacuada napanda cadagiti Fariseo, ket imbagada dagiti inaramid ni Jesus.

47 ś Dagiti cangatoan a papadi ken dagiti Fariseo nangurnongda ti maysa a pagu-umanan, ket kinunada, Ania ti aramidentayo? ta daytoy a tao agaramid cadagiti adu nga datdatlag.

48 No baybay-antayo laeng, mamatinto amin dagiti tao kencuana: ket umayto dagiti taga Roma ket iccatendanto dagiti saadtayo ken ti naciontayo.

49 Ngem ti maysa cadacuada, ni Caifas, cangatoan a padi iti daydi a tawen, kinunana cadacuada, Awan ti ammoyo a pulos,

50 Ket dicayo panpanunoten a casapulantayo, a matay ti maysa a tao gapu cadagiti umili, tapno ti sangcanaciontayo ket saan a mapucaw.

51 Daytoy saanna a sinao gapu kencuana laeng: no di ket idinto nga isu ti cangatoan a padi iti daydi a tawen, impadtona a ni Jesus matayto gapu iti dayta a nacion;

52 Ket saan laeng a maipuon iti dayta a nacion, no di ket tapno isu maurnongna met nga agmaymaysa dagiti annac ti Dios a naiwarawara idi.

53 Nanipud ngarud idi nga aldaw nagnunummoanda nga papatayenda.

54 Ni Jesus ngarud ket saanen nga nagna a nalatac iti ayan dagiti Judio; no di ket nanipud idiay napan iti away nga asideg iti let-ang, iti maysa nga ili a managan Efraim, ket naggian idiay agraman dagiti adalanna.

55 ś Ket ti ilalabas dagiti Judio asidegen idi: ket adu ti naggapu cadagiti aw-away a napan idiay Jerusalem casacbayan ti ilalabas, tapno aggugorda.

56 Sinapulda ngarud ni Jesus, ket cuncuna ti maysa ken maysa, idi agtatacderda idiay templo, Ania ti pagarupenyo, umayto ngata isuna iti fiesta?

57 Ket dagiti cangatoan a papadi ken dagiti Fariseo nagbilinda, nga, no adda tao nga macaammo ti ayanna, ibagana coma, tapno tiliwenda.

CAPITULO 12

1 Ni Jesus idi innem nga aldaw iti casangoanan ti ilalabas ket napan idiay Betania, isu a nacatayan idi ni Lazaro, a pinagungarna cadagiti natay.

2 Iti casta inyaramidanda idiay ti maysa a panangrabii; ket ni Marta nagservi: ngem ni Lazaro maysa cadagidi nakisango kencuana iti panganan.

3 Ni Maria ngarud ket nangala ti maysa a libra ti bangbanglo a pulpulos a nardo, a napateg unay, ket sinapsapoanna dagiti sacsaca ni Jesus, ken pinunasanna ida cadagidi boocna: ket ti balay napno ti ayamuom daydi bangbanglo.

4 Ngem cuna ti maysa cadagiti adalanna, ni Judas Iscariote, anac ni Simon, isu a mangliputto kencuana,

5 Apayapay nga saan a nalaco daytoy a bangbanglo iti tallo gasut nga denario4, ken naited coma cadagiti napanglaw?

6 Ngem kinunana daytoy, saan a gapu ta isakitna dagiti napanglaw; no di ket gapu ta mannanacaw, ken agsipud ta isu ti agiggem iti supot, ket innalana dagiti naipisoc.

7 Ni Jesus ngarud kinunana, Baybay-am: daytoy indulinna tapno maipaay iti aldaw ti pannacaitabonco.

8 Ta dagiti napanglaw ket cancanayon nga addada cadacayo; ngem no siac ket saannac a cancanayon nga adda cadacayo.

9 Adu unay a tattao cadagiti Judio ket naammoanda nga isu ket adda idiay: ket immayda saan laeng a gapu ken Jesus, no di ket tapno kitaenda ni Lazaro, isu a pinagungarna cadagiti natay.

10 ś Ngem dagiti cangatoan a papadi nagnunumoanda a papatayenda met ni Lazaro;

11 Ta gapu kencuana adu ti simmina cadagiti Judio, ken namati ken Jesus.

12 ś Iti sumuno nga aldaw adu unay a tattao ti immay iti fiesta, idi nangngegda a ni Jesus um-umay idiay Jerusalem,

13 Nangalada cadagiti sangsanga dagiti cayo a palma, ket napanda simmabet, ket inpucpucawda, Hosanna: Bendito ti Ari ti Israel nga umay iti nagan ti Apo.

14 Ket ni Jesus, idi nacasarac ti maysa nga urbon nga asno, nagsacay kencuana, cas adda a naisurat,

15 Dica agbuteng, babai nga anac ti Sion: adtoy, ti Arim umay, a sisasacay iti maysa nga urbon ti asno.

16 Dagitoy saan a maawatan dagiti adalanna idi damo: ngem idi ni Jesus ket naipaglorian, idin nalagipda a dagitoy ket naisuratda nga maipapan kencuana, ken inaramidda dagitoy a banbanag kencuana.

17 Dagidi ngarud adu a tattao nga naicuyog kencuana idi panangawagna ken Lazaro a rummuar ti tanem, ken pinagungarna cadagiti natay, ket pinanecnecanda.

18 Gapu itoy dagiti tattao ket napanda met simmabet kencuana, ta nangngegda nga isu ket inaramidna daytoy nga datdatlag.

19 Dagiti Fariseo ngarud kinunada iti maysa ken maysa, Makitayo nga awan ti pangabacanyo? adtoy, ti sangalubongan napanen simmurot kencuana.

20 ś Ket adda idi dadduma nga taga Grecia cadagiti simmang-at a mapan agdaydayaw iti fiesta:

21 Dagitoy ngarud ket immayda ken Felipe, a taga Betsaida ti Galilea, ken nagdawatda, a cunkunada kencuana, Sir, cayatmi coma a kitaen ni Jesus.

22 Napan ni Felipe ket inbagana ken Andres: ken napan da Andres ken ni Felipe ket imbagada ken Jesus.

23 ś Ket ni Jesus sumungbat cadacuada, a kinuna, Ti horas dimtengen, a ti Anac ti tao ket maipadayag coma.

24 Pudno, pudno, kunak cadacayo, No ti bukel ti trigo saan nga agtinnag iti daga ket matay, isu agtaeng a maymaysa: ngem no matay, adu nga bunga ti itedna.

25 Ti mangipangpangrona iti biagna isu ti mapucawna: ket ti gumura iti biagna iti daytoy a lubong isu ti idulinnanto a maipaay iti biag nga agnanayon.

26 No adda tao nga agservi caniac, surotennac coma; ket no adino ti ayanco, addanto met idiay ti adipenco: no adda tao a agservi caniac, ni Amac padayawannanto.

27 Ita ket adda nga mariribuc iti cararruac; ket ania ti saoecto? Ama, isalacannac itoy nga horas: ngem maipanggep itoy immayac iti daytoy nga horas.

28 Ama, itan-ocmo ti naganmo. Immay ngarud ti timec a nanipud langit, a nagcuna, Intan-occon, ket itan-occonto manen.

29 Dagiti adu a tao ngarud, nga adda idiay, ken nacangeg, kinunada a naggurruod: dagiti sabsabali kinunada, Maysa nga angel nakisao kencuana.

30 Simmungbat ni Jesus ket kinunana, Daytoy a timec saan nga immay gapu caniac, no di ket gapu cadacayo.

31 Ita iti pannacaocom daytoy a lubong: ita iti principe daytoy a lubong ket maibellengto iti ruar.

32 Ket siac, no maipangatoac manipud iti daga, guyugoyecto ti amin a tao caniac.

33 Ngem daytoy kinunana, tapno ipaawatna no ania a kita nga patay ti ipapataynanto.

34 Simmungbat ngarud kencuana dagidi tao, Nangngegmi iti linteg a ti Cristo mataginayonto: ket casano ti panagcunam, Ti Anac ti tao masapul a maipangato? siasino daytoy nga Anac ti tao?

35 Kinuna ngarud ni Jesus cadacuada, Iti bassit pay nga aldaw ti silaw adda cadacayo. Magnacayo ita ta adda pay laeng ti silaw cadacayo, tapno dinacayo macamacam ti sipnget: ket ti magna iti sipnget saanna nga ammo no adino ti papananna.

36 Ita ta adda pay laeng ti silaw cadacayo, mamaticayo iti silaw, tapno agbalincayo nga annac ti lawag. Dagitoy sinao ni Jesus, ket pimmanaw, ket inlemmenganna ida.

37 ś Ngem uray inaramidna iti sangoananda dagiti nagadu a datdatlag, saanda pay la nga namati kencuana:

38 Tapno matungpal idi ti sao nga insao ni mammadto nga Isaias, a kinunana, Apo, asino ti namati iti impadamagmi? ket siasino ti nacaipakitaan ti tackiag ti Apo?

39 Gapu itoy saanda a nabalinan iti mamati, ta kinuna manen ni Isaias,

40 Binulsecna dagiti matada, ket pinatangkenna dagiti pusoda; di la ket ta macakitada cadagiti matada, ken macaawatda cadagiti pusoda, ket agbalbaliwda, ket siac agasac coma ida.

41 Dagitoy sinao ni Isaias, idi nakitana ti dayagna, ket nagsao ti maipapan kencuana.

42 ś Nupay casta dadduma cadagidi panguloen nga agturay ket adu ti namati kencuana; ngem gapu cadagidi Fariseo saanda nga imparangarang, amangan no maparruarda iti sinagoga:

43 Ta ad-adda nga inayatda ti dayaw a nataoan ngem iti dayaw ti Dios.

44 ś Ket ni Jesus nagpuccaw ket kinunana, Ti mamati caniac, saannac a patien, no di ti nangibaon caniac.

45 Ti macakita caniac makitana ti nangibaon caniac.

46 Immayac a silaw ditoy lubong, tapno siasinoman a mamati caniac saanda nga agtaeng iti sipnget.

47 Ket no ti siasinoman a tao dumngeg cadagiti saoc, ket dina patien ida, saanco nga ocomen: ta saanac nga immay mangocom iti lubong, no di ket mangisalacan iti lubong.

48 Ti tumallicod caniac, ket dina awaten dagiti sasaoc, adda mangocom kencuana: ti sao nga insaoc, isu ti mangocomto kencuana iti camaudianan nga aldaw.

49 Ta saanac a nagsao a sisiac; no di ni Ama a nangibaon caniac, isu imbilinna caniac, no ania ti ibagac, ken no ania ti saoec.

50 Ket ammoc a ti bilinna isu ti biag nga agnanayon: dagiti aniaman ngarud a saoec, cas iti panangibaga caniac ni Ama, casta ti panagsaoc.

CAPITULO 13

1 Ita ket casangoanan ti rambac ti ilalabas, idi ammo ni Jesus a ti horasna dimtengen tapno umalis ditoy lubong ket mapan iti Ama, idinto nga inayatna dagiti cucuana nga adda ditoy lubong, inayatna ida agingga iti panungpalan.

2 Ket idi malpasen iti panangrabii, ti diablo ket naipastreken iti puso ni Judas Iscariote, anac ni Simon, tapno isu liputanna;

3 Idinto nga ammo ni Jesus a ti Ama intedna kencuana dagiti amin a banbanag cadagiti im-imana, ken isu ket naggapu iti Dios, ket mapan iti Dios;

4 Timmacder idi pangrabiian, ket iniccatna dagiti pagan-anayna; ket nangala ti maysa a tualya, ket imbarikesna.

5 Calpasanna nangibuyat idi ti danum iti maysa a palanggana, ket rinuggianna a binuggoan dagiti sacsaca dagidi adalanna, ken pinunasanna ida iti tualya nga imbarikesna.

6 Immay ngarud ken Simon Pedro: ni Pedro kunana kencuana, Apo, buggoam cadi dagitoy sacsacac?

7 Ni Jesus simmungbat, ket kinunana kencuana, Ti aramidec dica maawatan ita; ngem maawatamto no calpasanna.

8 Cuna kencuana ni Pedro, Uray caano dicanto buggoan dagitoy sacsacac. Ni Jesus simmungbat kencuana, No saanca nga buggoan, awanto ti pannacabagim caniac.

9 Cuna kencuana ni Simon Pedro, Apo, saan laeng a dagitoy sacsacac, ngem dagiti pay im-imac ken ti uloc.

10 Cuna kencuana ni Jesus, Ti nabuggoanen ket saan a masapul a buggoanen no di laeng dagiti sacsacana, ngem adda amin a sidadalus: ket dacayo nadaluscayo, ngem saan a dacayo amin.

11 Ta ammona idi no siasino ti mangliputto kencuana; gapuna kinunana, Saancayo amin a nadalus.

12 Idi ngarud nalpasna a binuggoan dagiti sacsacada, ken naalanan dagidi pagan-anayna, ken simmango manen, kinunana cadacuada, Ammoyo ti inaramidco cadacayo?

13 Dacayo awagandac ti Mannursuro ken Apo: ket naimbag ti panagcunayo; ta pudno a siac.

14 No ngarud siac, nga Apoyo ken Mannursuroyo, binuggoac dagiti sacsacayo; rebbengyo ngarud met ti agbibinnuggo cadagiti sacsaca ti maysa ken maysa.

15 Ta iniccancayo ti pagtuladan, tapno aramidenyo met coma a cas iti inaramidco cadacayo.

16 Pudno, pudno kunak cadacayo, Ti adipen ket saan a dacdackel ngem iti apona; ket saan met a dacdackel ti maysa a naibaon ngem iti nangibaon kencuana.

17 No ammoyo dagitoy a banbanag, nagasatcayo no aramidenyo ida.

18 ś Saanac nga agsao ti maipapan cadacayo amin: ammoc dagiti pinilic: ngem tapno matungpal ti surat, Ti makipangan caniac iti tinapay kinusayannac ti mucodna nga maibusor caniac.

19 Manipud ita ibagac cadacayo casangoanan ti pannacaaramidna, tapno, inton malpas, patienyo a siac daydiay.

20 Pudno, pudno, kunak cadacayo, Ti umawat iti ibaonconto ket siac ti awatenna; ket iti umawat caniac awatenna met iti nangibaon caniac.

21 Idi nasao daytoy ni Jesus, nariribuc ti espirituna, ket pinanecnecanna, a kinunana, Pudno, pudno, kunak cadacayo, a maysa cadacayo liputannacto.

22 Dagiti adalan nagkikinnitada iti maysa ken maysa, a pagduaduaanda no siasino ti nagcunaanna.

23 Itan adda nagsadag iti barucong ni Jesus nga maysa nga adalanna, daydi dinungdungngo ni Jesus.

24 Ni Simon Pedro sininiasanna daytoy, tapno damagenna no siasino daydiay nagcunaanna.

25 Daydi sisasadag iti barucong ni Jesus kunana kencuana, Apo, siasino?

26 Ni Jesus sumungbat kencuana, Isuna dayta, a pangtedacto iti tinapay, intono maisimotco. Idi ngarud nga naisimotnan ti tinapay, intedna ken Judas Iscariote, nga anac ni Simon.

27 Ket iti calpasan ti panangisacmolna simrec kencuana ni Satanas. Ni Jesus ngarud kunana kencuana, Ti aramidem, aramidem iti madaras.

28 Ngem awan ti tao cadagiti adda idi panganan ti nacaawat no ania ti gapu a kinunana kencuana daytoy.

29 Ta dagiti dadduma ipappapanda, gapu ta ni Judas ti agiggem idi ti supot ti cuarta, kinuna ni Jesus kencuana, Gatangem ti masapultayo a maipaay iti fiesta; wenno, iccanna coma idi ti bassit dagiti napanglaw.

30 Ket idi nacannan ti tinapay dagus a rimmuar: ket rabii idi.

31 ś Idi ngarud, rimmuaren, cuna ni Jesus, Ita ti Anac ti tao maipadayag, ket ti Dios maipadayag kencuana.

32 No ti Dios maipadayag kencuana, casta met ipadayagto ti Dios kencuana met laeng, ket dagus nga ipadayagnanto isuna.

33 Ub-ubbing, bassit pay a tiempo ti caaddac cadacayo. Sapulendacto: ket cas kinunac cadagiti Judio, No adino ti papanac, dicayo mabalin ti umay; kunak met cadacayo ita.

34 Maysa a bilin a baro ti itdec cadacayo, Tapno agayan-ayatcayo iti maysa ken maysa; cas iti panagayatco cadacayo, casta met nga agayan-ayatcayo coma iti maysa ken maysa.

35 Gapu itoy mailasindanto a dacayo dagiti adalac, no adda ayatyo iti maysa ken maysa.

36 ś Cuna kencuana ni Simon Pedro, Apo, adino ti papanam? Simmungbat ni Jesus, No adino ti papanac, saannac nga mabalin a suroten ita; ngem surotennacto no calpasanna.

37 Cuna kencuana ni Pedro, Apo, apayapay saanca nga mabalin a suroten ita? Ti biagco itedconto gapu kenca.

38 Simmungbat ni Jesus, Itedmonto ti biagmo gapu caniac? Pudno, pudno, kunak kenca, Saanto pay nga nacapagtaraoc ti cawitan, namitlonton nga nailibacnac.

CAPITULO 14

1 Saanyo nga ituloc iti pusoyo nga agpulcoc: mamaticayo iti Dios, mamaticayo met caniac.

2 Idiay balay ni Amac adda adu a paggianan: no coma no saan a casta, kinunac coma cadacayo. Ta innac isaganaancayo ti paggianan.

3 Ket no innac coma ket isaganaancayo ti paggianan, umayacto manen, ket icuyogcayto caniac met laeng; tapno no adino ti ayanco, addacayo met coma.

4 No sadino ti papanac ammoyo, ket ti dalan ammoyo.

5 Cuna kencuana ni Tomas, Apo, saanmi nga ammo no adino ti papanam; casano ti pannacaammomi ti dalan?

6 Ni Jesus kunana kencuana, Siac ti dalan, ken ti pudno, ken ti biag: awan ti tao nga umay ken Ama, no di magna caniac.

7 No nailasindac coma, nailasinyo met coma ni Amac: manipud ita ket isu am-ammoyo, ket nakitayon isuna.

8 Cuna kencuana ni Felipe, Apo, ipakitam cadacami ti Ama, ket umanayen cadacami.

9 Ni Jesus kunana kencuana, Nabayagen nga aldaw nga addaac cadacayo, ket dinac pay la mailasin, Felipe? ti nacakita caniac ket nakitanan ni Ama; apay-apay a cunaem pay laeng, Ipakitam cadacami ti Ama?

10 Dica patien aya nga addaac ken Ama, ket ni Ama adda caniac? dagiti sasao a saoec cadacayo saanco a saoen a sisiac: ngem ni Ama nga adda caniac, aramidenna dagiti ar-aramidna.

11 Patiendac nga addaac ken Ama, ket ni Ama adda caniac: wenno no saan patiendac a maigapu cadagiti ar-aramid met laeng.

12 Pudno, pudno, kunak cadacayo, Ti mamati caniac, dagiti ar-aramid nga aramidec aramidennanto met; ket dacdackelto pay ngem dagitoy ti aramidenna; gapu ta mapanac ken Ama.

13 Ket ti aniaman a dawatenyonto iti naganco, dayta ti aramidecto, tapno ni Ama maipadayag iti Anac.

14 No adda aniaman a dawatenyonto iti naganco, dayta ti aramidecto.

15 ś No ayatendac, tungpalenyo dagiti bilbilinco.

16 Ket agdawdawatacto ken Ama, ket iccannacayto ti sabali a Manangliwliwa, tapno agtaeng cadacayo nga agnanayon;

17 Nga isu ti Espiritu ti pudno; isu a ti lubong saanna a mabalin nga awaten, ta dina makita, ket dina mailasin: ngem dacayo ammoyo; ta makipagtaeng cadacayo, ken addanto iti unegyo.

18 Dicayto baybay-an nga awan iti liwliwayo: umayacto cadacayo.

19 Adda pay apagbassit, ket ti lubong dinacto makitan; ngem dacayo makitadacto: gapu ta agbiagac, agbiagcayto met.

20 Iti dayta nga aldaw mailasinyonto nga addaac ken Amac, ket dacayo addacayo caniac, ket siac addaac cadacayo.

21 Ti addaan cadagiti bilbilinco, ket tungpalenna ida, isu dayta ti agayat caniac; ket ti agayat caniac ayatento met ni Amac, ken isu ayatecto met, ket agparangacto kencuana.

22 Cuna kencuana ni Judas, saan a daydi Iscariote, Apo, ania ti mapasamac nga agparangcanto cadacami, ngem saan nga iti sangalubongan?

23 Simmungbat ni Jesus ket kinunana kencuana, No adda tao nga agayat caniac, salimetmetannanto dagiti sasaoc: ket ni Amac ayatennanto, ket umaycamto kencuana, ket agnaedcamto kencuana.

24 Ti di agayat caniac saanna a tungpalen dagiti sasaoc: ket ti sao a nangngegyo saanco a cucua, no di cucua ni Ama a nangibaon caniac.

25 Dagitoy a banbanag insaoc cadacayo, ita ta addaac pay cadacayo.

26 Ngem ti Manangliwliwa, nga isu ti Espiritu Santo, nga ibaonto ni Ama iti naganco, isu isuronanto cadacayo dagiti amin a banbanag, ken ipalagipnanto cadacayo, dagiti isuamin nga imbagac cadacayo.

27 Ti talna ibatic cadacayo, ti talnac itdec cadacayo: saan a cas iti panangited ti lubong, ti panangitedco cadacayo. Saan coma nga agpulcoc ti pusoyo, ken di coma agbuteng.

28 Nangegyon no casano ti panagkunak cadacayo, Pumanawac, ket agsubliacto manen cadacayo. No inay-ayatdac coma, agrag-ocay coma met, gapu ta kunak, Ta mapanac ken Ama: ta ni Ama dacdackel ngem siac.

29 Ket ita kinunac cadacayo ta dipay maaramid, tapno, inton maaramid, mamaticayo coma.

30 Calpasanna itan ket saanacon a makisao ti adu cadacayo: gapu ta ti principe ti daytoy nga lubong umay, ket awan ti cucuana caniac.

31 Ngem tapno mailasin ti lubong nga ayatec ti Ama; ken no casano ti panangited ti Ama iti bilin caniac, casta ti aramidec. Tumacdercayo, pumanawtayon ditoy.

CAPITULO 15

1 Siac ti pudno a puon ti uvas, ket ni Amac ti agtaltalon.

2 Isuamin a sangac a di agbunga iccatennanto: ket amin dagiti sanga nga agbunga, isu ti dalusanna, tapno mangited coma ti ad-adu a bunga.

3 Dacayo nadaluscayon gapu iti sao nga insaoc cadacayo.

4 Agnaedcayo caniac, ket siac cadacayo. Cas ti sanga saanna nga mabalinan ti agbunga nga is-isu, malacsid no agnaed iti uvas; casta met nga dicayo mabalinan, malacsid no agnaedcayo caniac.

5 Siac ti uvas, dacayo dagiti sangsanga: Ti agnaed caniac, ket siac kencuana, daytoy ti agbunga ti adu: ta no awanac ket awan ti mabalinyo nga aramiden.

6 No adda tao a saan nga agnaed caniac, maibellengto iti ruar a cas iti sanga, ket magangonto; ket urnongendanto, ken ibelleng iti apuy, ket mapuoranto.

7 No agnaedcayo caniac, ket dagiti sasaoc agnaedda cadacayo, dawatenyo ti aniaman a cayatyo, ket maaramidto cadacayo.

8 Daytoy ti pacaidayawan ni Amac, nga agbungacayo ti adu; ket agbalincayo coma nga adalac.

9 Cas iti panagayat ni Ama caniac, casta met ti panagayatco cadacayo: agtalinaedcayo iti ayatco.

10 No tungpalenyo dagiti bilbilinco, agtalinaedcayto iti ayatco; cas iti panagtungpalco cadagiti bilbilin ni Amac, ket agtalinaedac iti ayatna.

11 Dagitoy sinaoc cadacayo, tapno ti rag-oc agtaeng coma cadacayo, ket ti rag-oyo agdanunan coma.

12 Daytoy ti bilinco, Nga agayan-ayatcayo iti maysa ken maysa, a cas ti panagayatco cadacayo.

13 Awan ti tao nga addaan dacdackel nga ayat ngem daytoy, ti mangted ti biagna gapu cadagiti gagayyemna.

14 Dacayo ti gagayyemco, no aramidenyo dagiti ibilinco cadacayo.

15 Dicayo awaganen ti ad-adipen; ta ti adipen dina ammo ti aramiden ni apona: ngem inawagancayo ti gagayyem; ta isuamin dagiti nangngegco ken Amac impacaammoc cadacayo.

16 Dacayo didac pinili, ngem siac pinilicayo, ken tinudingancayo, tapno incayo ket agbungacayo coma, ket ti bungayo manayon coma: tapno ti amin a dawatenyonto ken Ama iti naganco, itdenna coma cadacayo.

17 Dagitoy ket ibilinco cadacayo, tapno agayan-ayatcayo coma iti maysa ken maysa.

18 No ti lubong guraennacayo, ammoyo a ginuranac nga immun-una ngem dacayo.

19 No taga lubongcayo coma, ti lubong ayatenna coma ti cucuana: ngem gapu ta saancayo a taga lubong, no di ket pinilicayo iti lubong, gapuna guraennacayo ti lubong.

20 Laglagipenyo ti sao nga imbagac cadacayo, Ti adipen saan a dacdackel ngem ti apona. No inrurumendac, irurumendacayto met; no sinalimetmetanda ti saoc, salimetmetandanto met dagiti saoyo.

21 Ngem amin dagitoy aramidendanto cadacayo gapu iti naganco, ta dida ammo ti nangibaon caniac.

22 No saannac coma nga immay ken diac coma kinasao ida, awan coma ti basolda: ngem ita awan ti pagpambarda iti basolda.

23 Ti gumura caniac guraenna met ni Amac.

24 No diac coma nagaramid cadacuada cadagiti ar-aramid nga awan sabali a tao nga nacaaramid, awan coma ti basolda: ngem ita nakitadac ken ginuradac agraman pay ni Amac.

25 Ngem maaramid daytoy, tapno matungpal ti sao nga adda a naisurat iti lintegda, Ginuradac nga awan ti gapgapuna.

26 Ngem inton ti Manangliwliwa umay, nga ibaonconto cadacayo manipud ken Ama, uray pay ti Espiritu ti kinapudno, nga aggapu ken Ama, isu panecnecannanto ti maipapan caniac:

27 Ket mangpanecneccayto met, gapu ta addacayo a naicuyog caniac nanipud idi damo.

CAPITULO 16

1 Dagitoy a banbanag sinaoc cadacayo, tapno dicayo coma maitibcol.

2 Parruarendacayto cadagiti sinagoga: wen, ti horas umay, nga siasinoman a mangpapatayto cadacayo ket panunotennanto nga ti inaramidna ket ti Dios iti nagservianna.

3 Ket dagitoy aramidendanto cadacayo, ta dida am-ammo ni Ama, ken uray pay siac.

4 Ngem sinaoc cadacayo dagitoy, tapno inton umay ti tiempoda, malagipyo ida nga insaoc cadacayo. Ngem dagitoy saanco nga insao cadacayo idi damo, gapu ta addaac pay laeng idi cadacayo.

5 Ngem ita innacon iti nangibaon caniac; ket awan cadacayo ti mangintuud caniac, Adino ti papanam?

6 Ngem agsipud ta sinaoc dagitoy a banbanag cadacayo, ti ladingit pinunnona ti pusoyo.

7 Nupay casta ibagac cadacayo ti pudno; Casapulan cadacayo a mapanac: ta no diac mapan, ti Manangliwliwa dinto umay cadacayo; ngem no mapanac, ibaonconto cadacayo.

8 Ket isu inton umay, babalawennanto ti lubong ti maipapan iti basol, ken ti kinalinteg, ken ti panangocom:

9 Ti maipapan iti basol, gapu ta dida namati caniac;

10 Ti maipapan iti kinalinteg, gapu ta innac ken Ama, ket dacayo didacto makitan;

11 Ti maipapan iti panangocom, gapu ta ti principe daytoy a lubong naocomen.

12 Adda pay adu nga ibagac cadacayo, ngem dicayo mabalin nga awiten ita.

13 Ngem inton daydiay, ti Espiritu ti kinapudno, umay, idalannacayto iti amin a kinapudno: ta saanto nga agsao nga is-isu; no di ket aniaman a mangngegnanto, isunto ti saoenna: ket ipaca-ammonanto cadacayo dagiti banbanag a mapasamacto.

14 Isu itantan-ocnacto: ta mangalanto iti cucuac, ket ipacaammonanto cadacayo.

15 Isuamin dagiti adda ken Ama cucuac ida: gapuna kinunac, a mangalanto iti cucuac, ket ipaca-ammonanto cadacayo.

16 Iti apagbiit pay, ket didacto makitan: ken manen, iti apagbiit pay, ket makitadacto, gapu ta mapanac ken Ama.

17 Ngarud dadduma cadagiti adalanna nagsasaoda iti maysa ken maysa, Ania daytoy a kunana cadatayo, Iti apagbiit pay, ket didac makitan: ken manen, iti apagbiit pay, ket makitadacto; ken daytoy, Gapu ta mapanac ken Ama?

18 Kinunada ngarud, Ania daytoy a kunana, Iti apagbiit pay? saanmi a maawatan ti saoenna.

19 Ket ni Jesus naawatanna nga cayatda idi a damagen, ket kinunana cadacuada, Agi-innintuudcayo iti maipapan itoy sinaoc, Iti apagbiit pay, ket didac makitan: ken manen, iti apagbiit pay, ket makitadacto?

20 Pudno, pudno, kunak cadacayo, Nga agsangitcayto ket agsainneccayto, ngem ti lubong agragsacto: Naladingitcayto, ngem ti ladingityo agbalinto a rag-o.

21 Ti babai no agpasical adda ladingitna, ta dimteng ti horasna: ngem inton naipasngayna ti ubing, saanna a malagipen ti rigat, gapu iti rag-o ta nayanac ti maysa a tao itoy lubong.

22 Ket dacayo ngarud ita adda ladingityo: ngem makitacayto manen, ket agragsacto ti pusoyo, ket ti awanto ti tao a macaiccat iti ragsac cadacayo.

23 Ket iti dayta nga aldaw awanto ti intu-udenyo caniac. Pudno, pudno, kunak cadacayo, Aniaman a dawatenyo ken Ama iti naganco, itdennanto cadacayo.

24 Agingga ita awan pay ti dinawatyo iti naganco: dumawatcayo, ket umawatcayo, tapno dagiti ragsacyo naan-anay.

25 Dagitoy insaoc idi cadacayo cadagiti pangngarig: ngem umay ti horas, a diacto agsaon cadacayo cadagiti pangngarig, no di ket ipaca-ammocto a silalawag cadacayo ti Ama.

26 Iti dayta nga aldaw dumawatcayto iti naganco: ket diac cunaen cadacayo, nga icararagancayto ken Ama:

27 Ta ni met laeng Ama ayatennacayo, gapu ta dacayo inayatdac, ket pinatiyo a naggapuac iti Dios.

28 Naggapuac ken Ama, ket immayac ditoy lubong: ita manen, panawac ti lubong, ket mapanac ken Ama.

29 Dagiti adalanna kunada kencuana, Adtoy, itan agsasaoca a silalawag, ket awan ti pangngarig a saoem.

30 Ita maawatanmi nga ammom dagiti isuamin a banbanag, ket di masapul ti siasinoman ti agintuud kenca: daytoy ti pamatianmi a naggapuca iti Dios.

31 Ni Jesus simmungbat cadacuada, Ita mamaticayon?

32 Adtoy, umay ti horas, wen, dimtengen, a mawarawaracayto, ket tunggal maysa mapanto iti dissona, ket baybay-andacto a maymaysa: ngem saanac nga agmaymaysa, gapu ta ni Ama adda caniac.

33 Dagitoy insaoc idi cadacayo, tapno gapu caniac adda coma talnayo. Ditoy lubong addanto rigatyo: ngem manginanamacayo; siac pinarmecco ti lubong.

CAPITULO 17

1 Ni Jesus sinaona dagitoy, ket idi intangadna dagiti matana sadi langit, kinunana, Ama, ti horas dimtengen; itan-ocmo ti Anacmo, tapno ti Anacmo itantan-ocnaca coma:

2 Cas iti pannangtedmo kencuana ti pannacabalin iti amin a lasag, tapno iccanna ida ti biag nga agnanayon dagiti amin nga intedmo kencuana.

3 Ket daytoy ti biag nga agnanayon, a maammoandaca coma a maymaysa a pudno a Dios, ken ni Jesus Cristo, nga imbaonmo.

4 Siac intantan-occa ditoy daga: naturposco ti aramid nga intedmo nga aramidec.

5 Ket ita, O Ama, itan-ocnac kenca met laeng iti tan-oc nga adda caniac idi dita dennam idi awan pay ti lubong.

6 Impalawagco ti naganmo cadagiti tao nga intedmo caniac itoy lubong: cucuam ida idi, ket intedmo ida caniac; ket sinalimetmetanda ti saom.

7 Ita ammodan nga amin dagiti intedmo caniac naggapuda kenca.

8 Ta dagiti sao nga intedmo caniac intedco cadacuada; ket inawatda, ket naammoanda a pudno a naggapuac kenca, ket pinatida a sica imbaonnac.

9 Idawatac ida: diac idawatan ti lubong, no di ket dagiti intedmo caniac; ta cucuam ida.

10 Ket isuamin dagiti cucuac cucuam ida, ket dagiti cucuam cucuac; ket maitantan-ocac cadacuada.

11 Ket itan awanacon iti lubong, ket dagitoy addada iti lubong, ket umayac kenca. Nasantoan nga Ama, aywanam iti naganmo dagiti intedmo caniac, tapno agmaymaysada, a cas cadata.

12 Bayat ti caaddac idi cadacuada ditoy lubong, inaywanac ida iti naganmo: dagiti intedmo caniac ingagac ida, ket awan cadacuada ti napucaw, no di ket daydi anac ti pacadadaelan; tapno ti surat matungpal.

13 Ngem ita umayac kenca; ket saoec dagitoy ditoy lubong, tapno adda cadacuada met laeng ti rag-oc a naan-anay.

14 Intedco cadacuada ti saom; ket ti lubong ginurana ida, ta saanda a taga lubong, a cas caniac a saanac a taga lubong.

15 Diac dawaten nga iccatem ida ditoy lubong, no di ket igagam coma ida iti dakes.

16 Saanda a taga lubong, a cas caniac a saanac a taga lubong.

17 Pagsantoem ida iti kinapudno: ti saom isu iti pudno.

18 Cas imbaonnac ditoy lubong, casta met imbaonco ida itoy lubong.

19 Ket gapu cadacuada pagsantoec ti bagic, tapno mapagsantoda coma met iti kinapudno.

20 Ket saan laeng a dagitoy ti idawdawatac, no di ket dagiti pay mamati caniac gapu iti saoda;

21 Tapno isuda amin agmaymaysada coma; a cas met sica, Ama, caniac, ket siac kenca, tapno addada met coma cadata: tapno ti lubong patienna coma a sica imbaonnac.

22 Ket ti dayag nga intedmo caniac intedco cadacuada; tapno agmaymaysada coma, a cas cadata nga agmaymaysa:

23 Siac cadacuada, ket sica caniac, tapno agmaymaysada nga awan pagcuranganna coma; ket ti lubong maammoanna coma a sica imbaonnac, ket inayatmo ida, a cas met iti panagayatmo caniac.

24 Ama, cayatco a no adino ti ayanco, dagiti intedmo caniac, addada met coma a maicuyog caniac; tapno makitada ti dayagco, nga intedmo caniac: ta inayatnacon idi saan pay a nabangon ti lubong.

25 O nalinteg a Ama, ti lubong saannaca a naammoan: ngem siac naammoanca, ket dagitoy naammoanda a sica imbaonnac.

26 Ket impacaammoc cadacuada ti naganmo, ket ipacaammocto: tapno ti ayat a panagayatmo caniac adda coma cadacuada, ken siac cadacuada.

CAPITULO 18

1 Idi naisao ni Jesus dagitoy a sasao, napan agraman dagiti adalanna iti labes ti waig a Cedron, nga ayan ti maysa a minuyungan, a sinercanna, isu ken dagiti adalanna.

2 Ket ni Judas, a nangliput kencuana, ammona met daydi a disso: ta namin-adu a ni Jesus nakium-ummong idiay idi cadagiti adalanna.

3 Ni Judas ngarud, idi a naawatna ti companya ti solsoldado ken dagiti official a naggapu cadagiti panguloen a papadi ken dagiti Fariseo, napan idiay a nangicuyog ti lampara ken silsilaw ken ig-igam.

4 Ni Jesus, idinto nga ammona amin dagiti mapasamacto kencuana, rimmuar, ket kunana cadacuada, Asino ti sapulenyo?

5 Simmungbatda kencuana, ni Jesus a taga Nazaret. Cuna cadacuada ni Jesus, Siac daydiay. Ket ni Judas, a nangliput kencuana, sitatacder met a naicuyog cadacuada.

6 Apaman ngarud idi nasaona cadacuada, Siac daydiay, napasanudda, ket napasagda iti daga.

7 Inintuudna manen ngarud cadacuada, Siasino ti birukenyo? Ket kinunada, Ni Jesus a taga Nazaret.

8 Simmungbat ni Jesus, Kinunac cadacayo a siac daydiay: no siac ngarud ti sapulenyo, baybay-anyo a pumanaw dagitoy:

9 Tapno ti sao matungpal, nga naisaona, Cadagiti intedmo caniac awan cadacuada ti napucawco.

10 Ni Simon Pedro ngarud ta adda campilanna inasutna, ket sinugatna daydi adipen ti cangatoan a padi, ket piningasanna ti macanawan a lapayagna. Ket ti nagan daydi adipen ket Malco.

11 Ni Jesus kinunana ngarud ken Pedro, Isublim ta campilanmo iti bainana: ti copa nga inted ni Ama caniac, diac aya rebbeng nga inumen?

12 Iti casta ti companya ken ti coronel ken dagiti policia dagiti Judio tiniliwda ni Jesus, ken ginalutanda.

13 Ket impanda ken Anas nga immuna; ta catugangan a lalaki ni Caifas, ken isu iti agakem ti cangatoan a padi idi a taoen.

14 Ket ni Caifas isu idi, ti nangbalacad cadagiti Judio, a masapul idi a matay ti maysa a tao gapu cadagiti umili.

15 ś Ket ni Simon Pedro sinurotna ni Jesus, agraman pay iti sabali nga adalan: ket daydi nga adalan am-ammo ti cangatoan a padi, ket simrec a kimmuyog ken Jesus iti paraangan ti cangatoan a padi.

16 Ngem ni Pedro sitatacder idi iti ruar ti ruangan. Rimmuar ngarud daydi sabali nga adalan, nga am-ammo ti cangatoan a padi, ket kinasaona daydi babai a nagaywan ti ruangan, ket inserrecna ni Pedro,

17 Daydi adipen a babai ngarud a nagaywan ti ruangan kunana ken Pedro, Saan a sica met ti maysa cadagiti adalan daytoy a tao? Cunana, Saan a siac.

18 Ket agtatacder idi dagiti adipen ken policia, a nangaramid ti paginudoan a beggang; ta nalam-ec idi: ket agin-inudoda: ket ni met Pedro adda cadacuada nga agtactacder, ken maki-ininudo.

19 ś Ti cangatoan a padi ngarud inintuudna ken Jesus ti maipapan cadagiti adalanna, ken ti maipapan iti isursurona.

20 Ni Jesus simmungbat kencuana, Siac nagsaoac iti napanayag iti lubong; ken cancanayon a nangisursuroac idiay sinagoga, ken idiay templo, isu a paggu-urnongan amin dagiti Judio; ket awan ti sinaoc a nalemmeng.

21 Apayapay siac ti pagintuudam? Intuudem cadagiti nagdengngeg caniac, no ania ti insaoc cadacuada: adtoy, dagitoy ammoda dagiti sinaoc.

22 Ket idi naisaona dagitoy, maysa cadagiti official nga agtactacder iti asideg tinungpana ni Jesus cadagiti daculapna, a kinunana, Sungbatam cadi iti cangatoan a padi a casta?

23 Ni Jesus simmungbat kencuana, No dakes ti pinagsaoc, panecnecam ti kinadakesna: ngem no naimbag, apayapay tungpaennac?

24 Ni Anas ngarud imbaonna a sigagalut ken Caifas a cangatoan a padi.

25 Ket adda idi ni Simon Pedro a sitatacder ken agin-inudo. Kinunada ngarud kencuana, Sica met saanca aya a maysa cadagiti adalanna? Inlibacna, ket kinunana, Saan a siac.

26 Maysa cadagiti adipen ti cangatoan a padi, cabaggian daydi piningasan ni Pedro ti lapayagna, kinunana, Saanca aya a nakita idiay minuyungan a nakicuyog kencuana?

27 Ni Pedro ngarud naglibac manen: ket naigiddato a nagtaraoc ti cawitan.

28 ś Impanda ngarud ni Jesus nanipud ken Caifas idiay palacio ti pacaocoman: ket agsapa idi; ket saanda a simrec idiay palacio ti pacaocoman, tapno dida matulawan; ken mabalinanda ti mangan iti ilalabas.

29 Rimmuar ngarud ni Pilato cadacuada, ket kinunana, Ania ti pangipulongan nga iyegyo a maibusor itoy tao?

30 Simmungbatda ket kinunada kencuana, No daytoy a tao saan coma a managdacdakes, saanmi coma nga inyawat kenca.

31 Kinuna ngarud cadacuada ni Pilato, Isu alaenyo, ket ocomenyo cas iti lintegyo. Kinuna kencuana dagiti Judio, Saan a maipalubos cadacami ti mamapatay iti uray siasino a tao:

32 Tapno matungpal coma ti sao ni Jesus, nga insaona, idi impacdaarna no ania nga ipapatay ti ipapataynanto.

33 Ni Pilato ngarud simrec manen idi palacio ti pacaocoman, ket inayabanna ni Jesus, ket kinunana kencuana, Sica ti Ari dagiti Judio?

34 Ni Jesus simmungbat, Cunam a sicsica dayta, wenno dagiti sabsabali imbagada kenca a maipapan caniac?

35 Ni Pilato simmungbat, Maysaac aya a Judio? Ti nacionmo met laeng ken dagiti cangatoan a padi inyawatdaca caniac: ania aya ti inaramidmo?

36 Simmungbat ni Jesus, Ti pagariac saan a ditoy a lubong: ta no ditoy a lubong coma ti pagariac, dagiti adipenco makibacalda coma, tapno saannac a maiyawat coma cadagiti Judio: ngem ita ti pagariac saan a ditoy.

37 Kinuna ngarud ni Pilato kencuana, No casta ngarud arica? Simmungbat ni Jesus, Cunam nga ariac. Nayanacac gapu itoy, ken gapu itoy immayac ditoy lubong, tapno panecnecac ti pudno. Isuamin nga aggapu iti pudno denggenna ti timecco.

38 Cuna kencuana ni Pilato, Ania ti pudno? Ket idi naisaona daytoy, rimmuar manen cadagiti Judio, ket kunana cadacuada, Awan ti babac a masaracac kencuana.

39 Ngem adda cadawyanyo, a maysa ti palubosac cadacayo iti ilalabas: cayatyo ngarud nga palubosac cadacayo ti Ari dagiti Judio?

40 Nagariwawada ngarud manen, a kinunada, Saan a daytoy a tao, no di ni Barabas. Ket ni Barabas maysa idi a tulisan.

CAPITULO 19

1 Iti casta ni Pilato innalana ni Jesus, ket sinaplitna.

2 Ket dagiti soldado nanglagada ti corona a sisiit, ket imbalangatda iti ulona, ken kinagayanda ti maysa a cagay a purpura,

3 Ket kinunada, Cablaaw, Ari dagiti Judio! ket tinungtungpada cadagiti im-imada.

4 Ket ni Pilato rimmuar manen, ket kunana cadacuada, Adtoy, iruarco cadacayo, tapno maammoanyo nga awan ti babac a masaracac kencuana.

5 Rimmuar ngarud ni Jesus, a nacabalangat ti sisiit, ken cagay a purpura. Ket cuna cadacuada ni Pilato, Adtoy ti tao!

6 Idi ngarud nakita dagiti panguloen dagiti papadi ken dagiti official, nagariwawada, a kinunada, Ilansam iti cruz, ilansam iti cruz. Cuna cadacuada ni Pilato, Isu alaenyo, ket ilansayo iti cruz: ta awan ti babac a masaracac kencuana.

7 Simmungbat kencuana dagiti Judio, Adda maysa a lintegmi, ket gapu iti dayta a linteg rebbengna ti matay, gapu ta inaramidna nga isuna ket Anac ti Dios.

8 ś Idi ngarud nangngeg ni Pilato daytoy a sao, ad-adda manen ti butengna;

9 Ket simrec manen iti palacio ti pacaocoman, ket kunana ken Jesus, Taga anoca aya? Ngem ni Jesus saan nga simmungbat kencuana.

10 Cuna kencuana ni Pilato, Dinac a sungbatan? dica ammo nga adda pannacabalinco a mangilansa kenca iti cruz, ken adda pannacabalinco a mangpalubos kenca?

11 Simmungbat ni Jesus, Awan ti aniaman a pannacabalinmo ti maibusor caniac, no di naited kenca nanipud ngato: gapuna ti nangyawat caniac kenca addaan a dacdackel iti basolna.

12 Maipuon itoy ni Pilato impamuspusanna ti panangpalubosna: ngem dagiti Judio agariwawada, a cunkunada, No ibbatam daytoy a tao, saannaca a gayyem ni Cesar: ta ti siasinoman a mangaramid kencuana nga ari sumalungasing a maibusor ken Cesar.

13 ś Ni Pilato ngarud idi nangngegna dagitoy a sao, impanna iti ruar ni Jesus, ket nagtugaw idiay pangocoman iti disso a naawagan ti Nabaldosaan ti marmol, ngem iti Hebreo, Gabbatha.

14 Ket pannacaisagana idi ti ilalabas, casla horas a maicanem: ket kunana cadagiti Judio, Adtoy ti Ariyo!

15 Isuda ngarud nagariwawada, Adaywanyo, adaywanyo, ilansam iti cruz. Cuna ni Pilato cadacuada, Ilansacto aya iti cruz ti Ariyo? Simmungbat dagiti cangatoan a papadi, Awan ti sabali nga arimi no saan a ni Cesar.

16 Ngarud idin inyawatna cadacuada tapno mailansa iti cruz. Ket innalada ni Jesus, ket inruarda.

17 Ket rimmuar a sibabaclay ti cruzna agingga iti disso a managan ti disso ti bangabanga, nga naawagan iti Hebreo Golgotha:

18 Ket idiay ti nangilansaanda iti cruz, ken dua a tao ti naigiddan, maysa iti tunggal sikigan, ket ni Jesus iti nagtengnga.

19 ś Ket ni Pilato insuratna ti maysa a titulo, ket incabilna iti uloan ti cruz. Ket ti naisurat castoy, JESUS A TAGA NAZARET ARI DAGITI JUDIO.

20 Daytoy ngarud a titulo nabasa dagiti adu nga Judio: ta daydi disso a nacailansaan ni Jesus iti cruz adda idi iti asideg ti ili: ket adda a naisurat iti Hebreo, iti Griego, ken iti Latin.

21 Ket dagiti cangatoan a papadi dagiti Judio kinunada ngarud ken Pilato, Dica isurat, Ti Ari dagiti Judio; no di ket isu kinunana, Ariac dagiti Judio.

22 Simmungbat ni Pilato, Ti insuratco insuratcon.

23 ś Dagiti soldado ngarud, idi nailansada ni Jesus iti cruz, innalada dagiti pagan-anayna, ket pinagcapatda, iti tunggal soldado maysa a bingay; ket daydi pay tunicana: itan daydi tunica awan ti nagdaitanna, naabel amin nanipud iti ngato.

24 Kinunada ngarud iti maysa ken maysa, Saantayo a pigisen, no di ket paggiginnasatantayo, no asinonto ti akincua: tapno matungpal idi ti surat, a kunana, Biningayda dagiti pagan-anayco, ket naggiginnasatanda ti cawesco. Dagitoy ngarud inaramid dagiti soldado.

25 ś Ket adda nga agtactacder idi iti denna ti cruz ni Jesus da inana, ken ti cabsat a babai ni inana, ni Maria nga asawa ni Cleofas, ken ni Maria Magdalena.

26 Ni Jesus ngarud idi nakitana ni inana, ken ti adalan nga adda iti dennana, nga inay-ayatna, kunana ken inana, Babai, Kitaem ti anacmo!

27 Sana kinuna idi adalan, Kitaem ti inam! Ket nanipud idi nga horas daydi nga adalan innalana iti balayna.

28 ś Idi nalpas daytoy, agsipud ta ammo ni Jesus a malpasen dagiti amin a banbanag, ken tapno matungpal idi ti surat, kunana, Mawawac.

29 Adda idiay idi ti maysa a burnay a napno ti suca: ket impasagepsepda ti maysa nga esponja ti suca, ket incabilda iti murdong ti maysa nga sucdal, ket ingaw-atda iti ngiwatna.

30 Idi ngarud nainumen ni Jesus di suca, kinunana, Natungpalen: ket indumogna ti ulona, ken inyawatna ti cararruana.

31 Dagiti Judio ngarud, agsipud ta isu ti panagsagana, tapno dagiti bagi saanda a mabati iti cruz ti aldaw a panaginana, (ta daydi nga aldaw a panaginana dackel nga aldaw,) dinawatda ken Pilato a matuccol coma dagiti sacsacada, sada coma iccaten ida.

32 Immay ngarud dagiti soldado, ket tinuccolda dagiti sacsaca ti immuna, ken ti sabali a naigiddan kencuana a nailansa iti cruz.

33 Ngem idi dimtengda ken Jesus, agsipud ta nakitada a natayen, saanda a tinuccol dagiti sacsacana:

34 Nupay casta maysa cadagiti soldado babaen iti maysa a pica dinuyocna ti bacrangna, ket dagus a rimmuar ti dara ken danum.

35 Ket ti nacakita pinanecnecanna, ket ti pangpanecnecna napudno: ket isu ammona a saoenna ti pudno, tapno patienyo met coma.

36 Ta dagitoy naaramidda, tapno matungpal idi ti surat, Uray maysa a tulangna saanto a matuccol.

37 Ket sabali pay a surat kunana, Kitaendanto ti dinuyucda.

38 ś Idi nalpas dagitoy ni Jose a taga Arimatea, adalan ni Jesus, ngem nalimed gapu iti butengna cadagiti Judio, dinawatna ken Pilato nga iccatenna coma ti bagi ni Jesus: ket impalubos ni Pilato. Napan ngarud, ket Iniccatna ti bagi ni Jesus.

39 Ket ni Nicodemo, daydi napan idi damo ken Jesus iti rabii, immay met a nangicuyog ti maysa a napaglaoc ti mirra ken aloes, nga agsangagasut a libra ti cabantotna.

40 Innalada ngarud ti bagi ni Jesus, ket binungonda cadagiti luplupot ken binangbangloanda, a cas ugali a panangitabon dagiti Judio.

41 Ket idiay disso a nacailansaanna iti cruz adda maysa a minuyungan; ket idiay minuyungan adda maysa a tanem a baro, nga awan pay tao a naitanem.

42 Idiay incabilda ni Jesus ngarud gapu ta aldaw a panagsagana dagiti Judio; ket ti tanem adda iti asideg.

CAPITULO 20

1 Ket iti umuna nga aldaw ti lawas ni Maria Magdalena nasapa, idi nasipnget pay laeng, simrec iti tanem, ket nakitana ti bato a naligsayen idi tanem.

2 Ngarud timmaray, a napan ken Simon Pedro, ken ti sabali nga adalan, nga inay-ayat ni Jesus, ket kinunana cadacuada, Iniccatda ti Apo idiay tanem, ket dicami ammo no adino ti nangicabilanda kencuana.

3 Rimmuar ngarud ni Pedro, ken ti sabali nga adalan, ket napanda idi tanem.

4 Ket timmarayda nga dua: ngem ti sabali nga adalan inuna-anna ni Pedro, ket dimteng nga immuna ti tanem.

5 Ket idi a nagrucob, minatmatanna, ket nakitana dagidi lupot a naiwayat; ngem saan a simrec iti uneg.

6 Dimteng met ngarud ni Simon Pedro a simmaruno kencuana, ket simrec idi tanem, ket matmatmatanna dagiti lupot a naiwayat,

7 Ket daydi panyo, a naiparabaw idi rupana, saan a naitipon cadagiti sabali a lupot, no di ket nalucot a nailasin iti maysa a disso.

8 Idin simrec met ti sabali nga adalan, daydi simmangpet nga immun-una idi tanem, ket nakitana, ket namati.

9 Agsipud ta dida pay naawatan idi ti surat, a masapul nga isu agungarto cadagiti natay.

10 Gapuna a dagiti adalan nagsublida manen cadagiti balbalayda.

11 ś Ngem ni Maria agtactacder nga agsangsangit idi iti ruar iti asideg ti tanem: ket idi adda nga agsangsangit, nagrucob, a kimmita iti tanem,

12 Ket nakitana ti dua nga angel a nagtagipuraw nga agtugtugaw, ti maysa iti uloan, ket ti sabali iti sacaanan, iti nacaicabilan idi ti bagi ni Jesus.

13 Ket kunada kencuana, Babai, apayapay agsangsangitca? Cunana cadacuada, Agsipud ta iniccatda ditoy ti Apoc, ket diac ammo no adino ti nangicabilanda kencuana.

14 Idi naisaona dagitoy, timmaliaw iti licudan, ket nakitana ni Jesus nga agtactacder, ngem dina impagarup nga isu ni Jesus.

15 Cuna kencuana ni Jesus, Babai, apayapay agsangitca? asino ti sapulem? Isu, idi ipappapanna nga isu ti managaywan iti minuyungan, kunana kencuana, Sir, no sica ti nangiccat ditoy, ibagam caniac no adino ti nangicabilam kencuana, ket ipanawconto ditoy.

16 Cuna kencuana ni Jesus, Maria. Di babai simmango, ket kunana kencuana, Rabboni; a cayatna a saoen, Mannursuro.

17 Cuna kencuana ni Jesus, Dinac sagiden; ta saanac pay nga immuli ken Amac: ngem inca cadagiti cacabsatco, ket cunam cadacuada, umuliac ken Amac, ken Amayo, ken iti Diosco, ken Diosyo.

18 Napan ni Maria Magdalena ket impacaammona cadagiti adalan nga nakitana ti Apo, ket dagitoy ti imbagana caniana.

19 ś Ket idi malemen iti daydi nga aldaw, ti umuna nga aldaw ti lawas, ken adda idi a sipupunit dagiti ruangan a nacatiptipunan dagiti adalan gapu iti butengda cadagiti Judio, immay ni Jesus ket nagtacder iti tengnga, ket kunana cadacuada, Talna coma cadacayo.

20 Ket idi nasaona daytoy, impakitana cadacuada dagiti im-imana ken ti bacrangna. Ket dagiti adalan nagrag-oda, idi makitada ti Apo.

21 Ni Jesus ngarud kinunana manen cadacuada, Talna coma cadacayo: cas iti pinangibaon caniac ni Ama, casta met ti panangibaonco cadacayo.

22 Ket idi nasaona daytoy, sinang-awanna ida ket kunana cadacuada, Awatenyo ti Espiritu Santo:

23 Cadagiti pamacawananyo cadagiti basbasol, mapacawan cadacuada; cadagiti pangigawidanyo cadagiti basbasol, cadacuada maigawidda.

24 ś Ngem ni Tomas, maysa dagiti sangapulo ket dua, managan Didimo, awan cadacuada idi immay ni Jesus.

25 Dagiti dadduma nga adalan kinunada kencuana, Nakitami ti Apo. Ngem isu kinunana cadacuada, No diac makita cadagiti im-imana ti gapuanan dagiti lansa, ken iserrecco toy ramayco iti naggapuan dagiti lansa, ken iserrecconto ti imac iti bacrangna, diacto mamati.

26 ś Ket idi nalabes ti walo nga aldaw addada manen dagiti adalanna iti uneg, ket adda met cadacuada ni Tomas: immay ni Jesus, idi a sipupunit dagiti ruangan, ket nagtacder iti tengnga, ket kinunana, Talna coma cadacayo.

27 Idin kunana ken Tomas, Igaw-atmo ta ramaymo ditoy, ket kitaem dagiti im-imac; ket iyegmo ditoy ta imam, ket iserrecmo iti bacrangco: ket saanca a di mammati, no di ket mammatica.

28 Simmungbat ni Tomas ket kinunana kencuana, Apoc ken Diosco.

29 Cuna kencuana ni Jesus, Tomas, gapu ta nakitanac, namatica: Bendito dagiti saan a nacakita, ket namatida.

30 ś Ket adu dagiti sabsabali a pagilasinan nga inaramid ni Jesus iti sangoanan dagiti adalan, a saan a naisurat itoy a libro:

31 Ngem dagitoy addada a naisurat, tapno patienyo a ni Jesus isu ti Cristo, ti Anac ti Dios; ken tapno gapu iti pammatiyo maaddaancayo ti biag gapu iti naganna.

CAPITULO 21

1 Idi nalabes dagitoy nagparang manen ni Jesus cadagiti adalanna iti igid ti baybay ti Tiberias; ket castoy ti panagparangna.

2 Addada idi a nagtitipon da Simon Pedro, ken ni Tomas a managan ti Didimo, ken ni Natanael a taga Cana ti Galilea, ken dagiti annac ni Zebedeo, ken dua pay cadagiti adalanna.

3 Cuna ni Simon Pedro cadacuada, Innac agcalap. Kunada kencuana, Umaycami met sumurot kenca. Napanda, ket limmuganda daras iti viray; ket daydi a rabii awan ti naalada.

4 Ngem idi bumigaten, ni Jesus nagtacder iti igid ti baybay: ngem dagiti adalan saanda a nailasin nga isu ni Jesus.

5 Ni Jesus ngarud kunana cadacuada, Annacco, adda cadacayo ti aniaman a macan? Simmungbatda kencuana, Awan.

6 Ket kunana cadacuada, Iwayatyo ti iket iti bacrang a macanawan ti viray, ket macaalacayto. Inwayatda ngarud, ket saanda a mabalinen idi nga guyuden a maipuon iti caadu dagiti ican.

7 Daydi adalan ngarud a inay-ayat ni Jesus kunana ken Pedro, Isu ti Apo. Ni Simon Pedro idi mangngegna nga isu ti Apo, imbarikesna ti pagan-anayna, (ta adda idi a lamolamo,) ket timmapuac iti baybay.

8 Ngem dagiti dadduma nga adalan immayda iti bilog; (ta saan nga adayu iti daga, no di agdua gasut a casico,) a guyguyudenda ti iket a napno iti ic-ican.

9 Idi simmang-atda ngarud iti daga, makitada a naisagana dagiti dumardarang a beggang, ken ican a naiparabaw, ken tinapay.

10 Cuna ni Jesus cadacuada, Mangyegcayo cadagiti ican a nacalapanyo ita.

11 Dimsaag ngarud ni Simon Pedro, ket ginuyodna nga impaigid ti iket a napno cadagiti dadackel nga ic-ican, sangagasut lima pulo ket tallo: ket uray nagaduda, di iket saan a nabsang.

12 Cuna cadacuada ni Jesus, Umaycayo ken mangantayo. Ket awan cadagiti adalan idi nga macaitured a mangintuud kencuana, Siasinoca? idinto nga ammoda nga isu ti Apo.

13 Ni Jesus immay, ket innalana ti tinapay, ken iniccanna ida, ket casta met idi ican.

14 Daytoyen ti maicatlo a panagparang ni Jesus cadagiti adalanna, calpasan a nagungar cadagiti natay.

15 ś Idi ngarud nacapangandan, ni Jesus kunana ken Simon Pedro, Simon, anac ni Juan, ad-adda ti panagayatmo caniac ngem dagitoy? Cunana kencuana, Wen, Apo; sica ammom nga ayatenca. Cunana kencuana, Pacanem dagiti corderoc.

16 Cunana kencuana iti maicaddua, Simon, nga anac ni Juan, ay-ayatennac? Simmungbat kencuana, Wen, Apo, sica ammom nga ay-ayatenca. Cunana kencuana, Pacanem dagiti carneroc.

17 Cunana kencuana iti maicatlo, Simon, anac ni Juan, ay-ayatennac? Nagladingit ni Pedro gapu ta kinunana kencuana a namitlo, Ay-ayatennac? Ket kinunana kencuana, Apo, sica ammom dagiti isuamin: sica ammom nga ay-ayatenca. Cuna kencuana ni Jesus, Pacanem dagiti carneroc.

18 Pudno, pudno, kunak kenca, Idi ubingca, agbarikesca, ket magnaca idi iti cayatmo: ngem inton lumacaycan, unnatemto iti im-imam, ket baricsannaca iti sabali, ket ipannacanto ti disso a dica cayat.

19 Ket kinunana daytoy, nga impaawatna no anianto nga ipapatay ti pangidaydayawnanto iti Dios. Ket idi naisaona daytoy, kunana kencuana, Surotennac.

20 Ket ni Pedro, timmaliaw ti licudan, makitana a sumursurot daydi adalan nga inay-ayat ni Jesus; daydi nagsadag pay iti barucongna idi pinangrabii, ken nagcuna, Apo, asino ti mangliputto kenca?

21 Idi a makita ngarud ni Pedro daytoy kunana ken Jesus, Apo, ania met ti aramidento daytoy a tao?

22 Cuna kencuana ni Jesus, No cayatco nga agbati nga agingga iti umayac, ania dayta kenca? surotennac.

23 Nagwaras ngarud ti sasao cadagiti cacabsat, nga dayta nga adalan saanto a matay: ngem ni Jesus dina sinao kencuana, Saanto a matay; no di ket, No cayatco nga agbati agingga iti umayac, ania dayta kenca?

24 Daytoy isu daydi adalan a mangpanecnec cadagitoy a banbanag, ket insuratna dagitoy a banbanag: ket ammomi a ti pangpanecnecna pudno.

25 Ket adda pay adu a sabsabali nga inaramid ni Jesus, a no, maisuratda coma a masaggaysa, pagarupec nga uray pay daytoy nga lubong ket saanna a malaon dagiti libro nga pacaisuratanda coma. Amen.