TI SAPASAP NGA SURAT NI SANTIAGO CAPITULO 1 1 Ni Santiago, nga adipen ti Dios ken ni Apo Jesus Cristo, cadagiti sangapulo ket dua a tribu a naiwarawara, cabblaawandacayo. 2 Cacabsatco, ibilangyo a rag-o amin no aglac-amcayo cadagiti nadumaduma a pacasuutan; 3 Idinto nga ammoyo, a ti pannacasuut ti pammatiyo ket pataudenna ti anus. 4 Ket patauden coma ti kinaanus ti aramid a naan-anay, tapno maan-anaycayo iti isuamin, nga awan ket ti aniaman a pagcuranganyo. 5 Ngem no siasinoman cadacayo ket agcurang iti kinasirib, agdawat coma iti Dios, isu a mangted a sicacaasi cadagiti isuamin, ket saan a mangpabain; ket maitedto kencuana. 6 Ngem agdawat coma a babaen iti pammati, nga awan ket ti panagduadua. Ta ti managduadua ket umasping iti maysa a dalluyon ti baybay nga iduron ti angin ket agpallayog. 7 Saan coma ngarud a panunoten daydiay a tao nga addanto aniaman nga awatenna iti Apo. 8 Ti nagcaddua ti nakemna a tao ket saan nga agtalinaed cadagiti amin a daldalanna. 9 Ngem ti cabsat a nababa ti casasaadna agrag-o coma iti pannacaitan-ocna: 10 Ngem ti nabacnang, iti pannacaipababana: agsipud ta isu a cas iti sabong ti root ket lumabasto. 11 Ta ti init ket napardas iti iruruarna a mapacuyogan iti nabara a darang, ket ti root magango, ken ti sabong agtinnag, ket ti napintas a buyana agpucaw: casta met ti nabacnang a tao makeltayto cadagiti isuamin a daldalanna. 12 Bendito ti tao a macaibtur iti pannacasulisog: ta inton masuuten, awatennanto ti balangat ti biag, nga incari ti Apo cadagiti agayat kencuana. 13 Saan coma a saoen ti siasinoman a tao no masulisog, nasulisogac iti biang ti Dios: ta ti Dios saan a mabalin a sulisogen cadagiti banbanag a dakes, ket isu awan met ti sulisogenna a tao: 14 No di ket tunggal maysa a masulisog, no gargarien ti derrepna met laeng, ken masiloan. 15 Iti casta ti derrep idinto a nagsicog, iyanacna ti basol: ket ti basol, inton macagteng iti pannacapunnona, iyanacna ti ipapatay. 16 Saancayo a paallilaw, ay-ayatec unay a cacabsatco. 17 Amin a nasayaat nga sagut ken amin a naan-anay nga sagut ket aggapu iti ngato, a bumaba nga aggapu iti Ama dagiti lawag, a kencuana awan ti aniaman a panagbalbaliw, wenno anniniwan ti panagbaliw iti turongen. 18 Iti met laeng pagayatanna ket inyanacnatayo gapu iti sao ti kinapudno, tapno datayo coma ti maysa a kita dagiti umuna a bungbunga cadagiti parsuana. 19 Gapuna, ay-ayatec a cacabsatco, tunggal maysa ket nasiglat coma a dumngeg, nabannayat iti panagsaona, nabannayat iti pungtot: 20 Ta ti pungtot ti tao saanna a tungpalen ti kinalinteg ti Dios. 21 Gapuna pagpanawanyo ti amin a kinarugit ken aglablabes a kinadakes, ket awatenyo a si-eemma ti sao a naimula, isu a mannacabalin a mangisalacan cadagiti carcararruayo. 22 Ngem managtungpalcayo coma iti sao, ket saan a managdengngeg laeng, nga allilawenyo met laeng dagiti bagbagiyo. 23 Ta no adda managdengngeg iti sao, ket dina aramiden, umaspingto iti maysa nga tao a kitkitaenna ti sigud a nacayanacanna a rupa iti maysa a sarming: 24 Ta kitaenna ti rupana, ket pumanaw, ket malipatanna daras no ania ti kitana a tao idi. 25 Ngem ti mangsukimat iti linteg a naan-anay nga isu ti linteg ti wayawaya, ket pagtalinaedanna, ket saan a managdengngeg a macalipat, no di ket managaramid iti aramid, daytoy a tao nabenditonto cadagiti aramidna. 26 No ti asinoman a tao panunotenna nga isu managdaydayaw, ngem dina ngedngedan ti dilana, no di ket allilawenna ti pusona met laeng, ti panagdaydayaw daytoy a tao isu ti barengbareng. 27 Ti nadalus a panagdaydayaw ken awan tulawna iti imatang ti Dios ken Ama isu daytoy, Sarungcaranna dagiti awan ammada ken dagiti balo a babbai iti ladingitda, ken agannad nga awan tulawna ti lubong. CAPITULO 2 1 Cacabsatco, saanyo nga salimetmetan coma ti pammati ken Apotayo a Jesus Cristo, ti Apo iti gloria, nga adda panangidumdumayo cadagiti tattao. 2 Ta no sumrecto ti gimongyo ti maysa a tao a nagsingsing iti balitoc, ket nagpagan-anay iti napateg, ket sumrec met ti maysa a napanglaw a tao nga nagpagan-anay ti nanumo; 3 Ket idumdumayo ti nagpagan-anay ti napateg, ket cunaenyo kencuana, Agtugawca ditoy maysa a disso a nasayaat; ket iti napanglaw cunayo, Aggianca idiay nga agtacder, wenno agtugawca iti babaen ti nagbatayan dagiti sacsacac: 4 Saancayo a mangidumduma cadacayo met laeng, ket nagbalincayo a mangocom babaen cadagiti panpanunot a dakes? 5 Dumgngegcayo, ay-ayatec a cacabsatco, Saan aya a pinili ti Dios dagiti napanglaw no maipapan itoy a lubong a maipaay iti kinabacnang iti pammati, ken agtawid iti pagarian nga incarina cadagiti agayat kencuana? 6 Ngem dacayo iniccatyo ti dayaw ti napanglaw. Saan aya a dagiti nabacnang ti mangparigat cadacayo, ket isuda met laeng ul-uludendacayo nga isaclang cadagiti pangocoman? 7 Dida aya tabbaawan daydiay nadayaw nga nagan a nangayab cadacayo? 8 Ngem no tungpalenyo ti naarian a linteg a cas mayannugot ti surat, Ayatem ti caarrobam a cas met ti bagim, naimbag ti aramidyo: 9 Ngem no pagdudumaenyo dagiti tattao, macabasolcayo, ket pabasolennacayo ti linteg a cas nacasalungasing. 10 Ta ti siasinoman a mangtungpalto iti amin a linteg, ket macasalungasingto iti uray maymaysa, agbanagto a pacabasolanna amin. 11 Ta ti nagsao, Dica makicamalala, kinunana met, Dica mamapatay. Ita ngarud no dica makicamalala, ngem mamapatayca, rumsuaca a nangsalungasing iti linteg. 12 Iti casta agsaocayo, ket agaramidcayo, a casla maocomcayonto gapu iti linteg ti wayawaya. 13 Ta mangocomto nga awan asina, a maipaay iti daydiay saan a nangaramat ti asi; ket ti asi agrag-o a maisupiat iti panangocom. 14 Ania ti magunggona, cacabsatco, no ti maysa a tao kunana nga adda pammatina, ngem awan iti ar-aramidna? mabalin aya dayta a pammati ti mangisalacan kencuana? 15 No ti maysa a cabsat a lalaki wenno babai adda a lamolamo, wenno awan taraonna nga inaldaw, 16 Ket ti maysa cadacayo cunaennanto, Incayo a sitatalna, aginudo ken agbussogcayo; ngem dicayto ited cadacuada dagiti masapul a maipaay iti bagi; ania ti magunggonam? 17 Casta met ti pammati, no awan dagiti ar-aramidna, isu natay, no agmaymaysa. 18 Wen, nalabit cunaento ti maysa a tao, Sica adda pammatim, ket siac adda ar-aramidco: ipakitam caniac ti pammatim nga awan ar-aramidmo, ket siac ipakitacto kenca ti pammatic babaen cadagiti ar-aramidco. 19 Sica patiem nga adda maymaysa a Dios; naimbag ti aramidem: dagiti sairo patienda met, ket agpigergerda. 20 Ngem cayatmo nga ammoen, O tao a maag, a ti pammati a di mapacuyogan cadagiti ar-aramid isu natay? 21 Saan aya a ni Abraham nga amatayo napalinteg gapu cadagiti ar-aramid, idi indatonna ni Isaac nga anacna iti rabaw ti altar? 22 Makitamon a ti pammati napacuyogan cadagiti ar-aramidna, ket gapu cadagiti ar-aramid ti pammati maaramid a naan-anay? 23 Ket natungpal ti surat a kunana, Ni Abraham pinatina ti Dios, ket naibilang kencuana nga kinalinteg: ket napanaganan iti Gayyem ti Dios. 24 Makitayo ngarud a gapu cadagiti ar-aramid ti tao mapalinteg, ket saan a gapu iti pammati laeng. 25 Ket casta met ni Rahab a balangcantis saan aya a napalinteg gapu cadagiti ar-aramid, idi inawatna dagidi naibaon, ket inturongna ida iti sabali a dalan? 26 Ta cas iti bagi a no awanan iti espiritu ket natay, casta met ti pammati nga awanan ar-aramid ket natay. CAPITULO 3 1 Cacabsatco, saan nga aducayo coma a mannursuro, idinto nga ammotayo nga awatentayto ti naing-inget a pannacaocom. 2 Ta maitibcoltayo amin cadagiti adu a banbanag. No adda saan a macabasol iti sao, dayta ket naan-anay a tao, ken macabalin a mangngednged iti isuamin a bagi. 3 Kitaentayo, ta no icabiltayo dagiti bosal dagiti cabalyo cadagiti ngiwatda, tapno agtulocda cadatayo; ket iti casta mapagtuloctayo met amin a bagida. 4 Kitaenyo met dagiti vir-viray, uray nagdadackelda, ken iduron ida dagiti angin a napigsa, ngem mapusiposda pay gapu iti maysa a bassit unay a timon, iti uray sadino a cayatto ti mangidalan a pangiturongan. 5 Casta met ti dila maysa a camcameng a bassit, ket pagpasindayagna dagiti dadackel a banbanag. Kitaenyo, ti nagdackelen a banag a silmutan ti bassit nga apuy! 6 Ket ti dila isu ti maysa nga apuy, ti maysa a lubong ti kinadakes: casta met ti dila a naicabil iti nagtengaan dagiti camcamengtayo, isu a mangtulaw iti isuamin a bagi, ket pasgedanna ti dalanen ti sangngaparsuaan; ket pasgedanna iti apuy ti impierno. 7 Ta isuamin a kita dagiti animal, ken tumatayab, ken dagiti aguy-uyas, ken dagiti adda iti baybay, ket mapaamoda, ken pina-amo ida iti tao: 8 Ngem ti dila saan a mabalin a paammoen ti uray siasino a tao; maysa a dakes nga di aginana, napno iti gamut a macapatay. 9 Isu ti pangbendiciontayo iti Dios, uray ken Ama; ket isu met ti pangilunodtayo cadagiti tattao, isuda a na-aramid a caasping ti Dios. 10 Iti maymaysa a ngiwat rummuar ti panangbendicion ken panangilunod. Cacabsatco, dagitoy a banbanag saanda coma a casta. 11 Ipussoac aya ti maysa nga ubbog nga adda iti maymaysa nga disso ti danum a nasam-it ken napait? 12 Mabalin aya ti higos, cacabsatco, a pataudenna ti olivas? wenno ti uvas, higos? casta met awan iti ubbog a pataudenna ti apgad a danum ken nasam-it a danum. 13 Siasino ti masirib a tao ken mannacaammo cadacayo? ipakitana coma gapu iti naimbag a panagbiagna dagiti aramidna iti kinaemma ti sirib. 14 Ngem no adda cadagiti puspusoyo dagiti napait nga agum ken ti ringringgor, dicayo agpasindayag, ken dicayo agulbod a maisalungasing iti pudno. 15 Saan nga isu daytoy ti sirib nga aggapu sadi ngato, no di ket ti sirib a nailubongan, dinederrep, sinasairo. 16 Ta no sadino ti ayan dagiti agum ken panagriringgor, adda idiay ti riribuc ken amin nga aramid a kinadangcuc. 17 Ngem ti sirib nga aggapu sadi ngato ket umuna nadalus, sumaganad natalna, nalaing, nalaca a pagdawatan, napno iti asi ken cadagiti nasayaat a bungbunga, awan ti idumdumana, awan ti panaginsisingpetna. 18 Ket ti bunga ti kinalinteg maimula iti talna a maipaay cadagiti agar-aramid ti talna. CAPITULO 4 1 Sadino ti paggapuan dagiti gubgubat ken dagiti ringringgor cadacayo? saanda aya nga aggapu, cadagiti aglablabes a tarigagayyo isuda a makibacal cadagiti camcamengyo? 2 Agagumcayo, ket awan ti cupicupanyo: mamapataycayo, ken tarigagayanyo ti maaddaan, ket dicayo mabalin ti gumun-od: makicabilcayo ken makigubatcayo, ngem awanancayo, gapu ta dicayo agdawat. 3 Agdawatcayo, ket dicayo umawat, ta saan a nasayaat ti panggepyo nga agdawat, gapu ngamin ta usarenyo cadagiti ragragsacyo. 4 Makicamcamalala ken makicamcamalala a babbai, dicayo ammo aya a ti pannakipagayam iti lubong isu ti pannakicabusor iti Dios? daydiay ngarud agtarigagayto a gayyem ti lubong ket isu ti cabusor iti Dios. 5 Pagarupenyo aya nga awan capapay-an ti panagcuna ti surat, Ti espiritu nga agtaeng cadatayo agagum a si-aapal? 6 Ngem isu mangted iti dacdackel a parabur. Gapuna kinunana, Ti Dios bumusor cadagiti natangsit, ngem mangted ti parabur cadagiti napacumbaba. 7 Paiturayancayo ngarud iti Dios. Ngem busorenyo iti diablo, ket isu agtalawto cadacayo. 8 Umadanicayo iti Dios, ket isu umasidegto cadacayo. Dalusanyo dagiti im-imayo, dacayo a managbasol; ket guguranyo dagiti puspusoyo, dacayo a nagcaddua ti nakemyo. 9 Agladingitcayo, ken agsaibbeccayo, ken agsangitcayo: ti catawayo agbalin coma a saibbec, ket ti ragsacyo agbalin coma a liday. 10 Agpacumbabacayo iti imatang ti Apo, ket isu itan-ocnacayto. 11 Dicayo agsao iti dakes a maibusor iti maysa ken maysa, cacabsat. Ti agsao iti dakes a maibusor iti maysa a cabsat, ken ocomenna ni cabsatna, agsao iti maisalungasing iti linteg, ket ipatona ti linteg: ngem no ipatom ti linteg, saan nga sica ti managtungpal iti linteg, no di ocom. 12 Maymaysa laeng ti manangited ti linteg, nga isu daydiay macabalin a mangisalacan ken mangpucaw: ngem asinoca nga ocomem ti padam a tao? 13 Incayo ita, dacayo nga agsasao, Ita nga aldaw wenno inton bigat incamto iti maysa a ili, ket agnaedcamto idiay iti macatawen, ket aggatang ken agtagilacocamto, ket macagunggonacamto: 14 Idinto a dicayo ammo ti maaramid no bigat. Ta ania ti biagyo? Pudno a casla maysa nga alibongabong, nga iti apagbiit agparang, ket agpucaw. 15 Rebbengyo coma a sao-en, No pagayatan ti Apo, agbiagcaminto, ket aramidenminto daytoy, wenno daydiay. 16 Ngem ita agragsaccayo babaen ti kinapasindayagyo: isuamin a castoy a panagragsac ket isu ti dakes. 17 Ti macaammo ngarud nga agaramid iti nasayaat, ket dina aramiden, daytoy ket basol kencuana. CAPITULO 5 1 Incayo ala ita, dacayo a babacnang, agsangitcayo ket aganug-ogcayo gapu cadagiti rigrigat nga umayto cadacayo. 2 Dagiti kinabacnangyo addada a nadadael, ken dagiti pagan-anayyo addada a bobooten. 3 Ti balitocyo ken ti piracyo addada a naglati; ket dagiti latida isudanto ti macasacsi a maibusor cadacayo, ket runutendanto dagiti lasagyo a cas apuy. Nagurnongcayo iti gamengyo cadagiti camaudianan nga al-aldaw. 4 Adtoy, ti tangdan dagiti mangmangged a nagan-ani cadagiti taltalonyo, isu nga ingawidyo a babaen ti allilaw, ket agas-asug: ket dagiti as-asug dagiti nagan-ani simrecda cadagiti pagdengngeg ti Apo ti panaginana. 5 Nagbiagcayo a sinanam-ay ditoy rabaw ti daga, ket naalayon ti ragsacyo; pinalucmegyo dagiti puspusoyo, a cas ti maysa nga aldaw ti panagparti. 6 Pinabasolyo ken pinapatayyo ti nalinteg; ket isu saan a simmukir cadacayo. 7 Aganuscayo coma ngarud, cacabsat, nga agingga iti iyaay ti Apo. Adtoy, ti agtaltalon urayenna ti napateg a bunga ti daga, idinto nga ur-urayenna a si-aanus, agingga iti panangawatna iti nasapa ken ti naladaw a tudo. 8 Aganuscayo met coma; patibkerenyo dagiti puspusoyo: ta ti iyaay ti Apo asidegen. 9 Saancayo nga agtantanabutob a maibusor ti maysa ken maysa, cacabsat, di la ket ta mapabasolcayo: adtoy, ti ocom agtactacder iti sangoanan ti ruangan. 10 Alaenyo, cacabsat, dagiti mammadto, a nagsaoda babaen iti nagan ti Apo, a pagulidanan ti panagsagaba iti kinarigat, ken iti kinaanus. 11 Adtoy, naganentayo a nagasat dagiti nagitured. Nangegyo ti kina-anus ni Job, ket nakitayo ti panungpalan nga impaay ti Apo; ta ti Apo napno iti ayat, ken manangnga-asi. 12 Ken nangnangrona ngem iti isuamin, cacabsatco, saancayo nga agsapata, uray gapu iti langit, uray gapu iti daga, wenno aniaman a sabali a sapata: no di ket ti panagwenyo isu coma ti wen; ket ti panagsaanyo isu coma ti saan; tapno dicayo matnag iti pannacaocom. 13 Adda agsagsagaba cadacayo? isu ti agcararag coma. Adda agragragsac? agcanta coma cadagiti salmos. 14 Adda masakit cadacayo? Paayabanna coma dagiti panglacayen ti iglesia; ket icararaganda coma isuna, a sapsapoanda ti lana babaen iti nagan ti Apo: 15 Ket ti cararag ti pammati isalacannanto ti masakit, ket ti Apo paimbagennanto; ket no nacaaramid cadagiti basbasol, mapacawanto kencuana. 16 Ipudnoyo ngarud dagiti bidbiddutyo iti maysa ken maysa, ket agkikinnararagcayo ti maysa ken maysa, tapno mapasalun-atcayo. Ti nasged a cararag ti nalinteg a tao ket adu iti mabalinanna. 17 Ni Elias maysa a tao idi a ti kinataona ket cas cadatayo, ket nagcararag iti nasged unay a di coma tumudo: ket saan a nagtudo iti rabaw ti daga iti bayat dagiti tallo a tawen ken innem a bulan. 18 Ket nagcararag manen, ket ti langit nangted iti tudo, ket ti daga pinataudna ti bungana. 19 Cacabsat, no adda cadacayo maisiasinto iti kinapudno, ket isu pagbabawiento ti maysa; 20 Ammoenna coma, a ti mamagbabawi iti maysa a managbasol iti pannacaallilaw ti dalanna ket isalacannanto iti ipapatay ti maysa a cararrua, ket abbongannanto dagiti adu unay a basbasol.