TI LIBRO NI MAMMADTO

ISAIAS


CAPITULO 1

1 Ti sirmata ni Isaias nga anac ni Amos, isu a nakitana a maipapan iti Juda ken Jerusalem cadagiti al-aldaw da Uzias, Jotam, Acaz, ken Ezekias, nga ar-ari ti Juda.

2 Denggenyo, O langlangit, ket timudem, O daga: ta iti APO nagsaon, Nangtarakennac ken nangpadackelac cadagiti annac, ket simmukirda nga maicaniwas caniac.

3 Ti baca ammona ti makincucua kencuana, ket ti asno ammona ti pagpacanan ni apona: ngem ti Israel saanna nga ammo, ti ilic saanna nga utoben.

4 Ah managbasol a nacion, umili nga nagbaclay iti kinadakes, maysa a caputotan dagiti managdacdackes, annac nga nacabalballicug: naglicudandan iti APO, ginargarida ti Santo Ti Israel nga agpungtot, pimmanawdan nga timmalicud.

5 ¶ Apay a masaplitcayonto manen? ket ad-adda pay ti iyaalsayo: ti isuamin nga ulo masakit, ken ti isuamin nga puso mapacsuyan.

6 Manipud iti dapan ti saca agingga iti ulo awan ti kinasalun-at kencuana; no di ket sugsugat, ket litlitem, ken manggugor a sapsaplit: saanda a nacaem, saanda met a napatapatan, ken dida met nasapsapoan iti lana.

7 Ti dagayo aglangalang, dagiti il-iliyo naur-uramda iti apuy: ti dagayo, isu ti alun-onen dagiti gangannaet iti saclangyo, ket aglangalang, cas narbec iti sangsangaili.

8 Ket ti anac a babai ti Sion mabaybay-an a cas sapaw iti cauvasan, cas maysa a calapaw iti minuyongan dagiti pepino, cas maysa nga ili a nalacub.

9 No coma iti APO dagiti buybuyot saan a nangitidda cadatayo iti maysa a bassit unay a tidda, naipadatayo coman a cas iti Sodoma, ken datayo caslatayo coman iti Gomorra.

10 ¶ Denggenyo ti sao iti APO, dacayo nga agturturay iti Sodoma; timudenyo ti linteg ti Diostayo, dacayo a tattao ti Gomorra.

11 Ania ti capapaayanna caniac ti kinaadu dagiti datdatonyo? cuna iti APO: addan caniac ti kinawadwad dagiti datdaton a mapuoran a lallaki a carnero, ken iti taba dagiti napalucmeg nga an-animal; ket diac nga agrag-o iti dara dagiti bacbaca, wenno dagiti cordero, wenno dagiti lallaki a calding.

12 Intono umaycayo agparang iti saclangco, asino ti nagkiddaw daytoy cadagiti imayo, a baddekenyo dagiti parparaanganco?

13 Dicayo mangyegen cadagiti ubbaw nga datdaton; ti incienso ket macarimon caniac; ti luttuad ken aldaw a panaginana, ti panaggu-urnong dagiti gimgimong, diac maanusan; isu ti kinadangkes, uray ti nadaeg a gimong.

14 Dagiti luttuadyo ken dagiti naikeddeng a fiestayo toy cararruac guraenna: macariribucda caniac; mautoyanac nga agaw-awiten cadacuada.

15 Ket intono itag-ayyo dagiti im-imayo, ilingedconto dagiti matac cadacayo: wen, intono agaramidcayo cadagiti adu a cararag, diacto ipangag: dagiti im-imayo napnoda iti dara.

16 Agbuggocayo, agdaluscayo; iyadayuyo ti dakes cadagiti ar-aramidyo manipud iti sangoanan dagiti matac; agsardengcayo nga agaramid iti dakes;

17 Sursuroenyo ti agaramid iti naimbag; sapulenyo ti kinajusticia, saranayenyo dagiti nailupit, icalinteganyo dagiti ul-ulila, salacnibanyo ti balo a babai.

18 Umaycayo ita, ket agsusurottayo coma, cuna iti APO: uray no dagiti basbasolyo casda la iti escarlata, mapapudawdanto a casla nieve; nupay no nalabbasitda a casda la carnesi, agbalindanto a casla napudaw a de lana.

19 No agmayatcayo ken agtulnogcayo, canenyonto ti caimbagan iti daga:

20 Ngem no paayenyo ken sumukircayo, maalun-oncayto iti campilan: ta ti ngiwat iti APO insaonan.

21 ¶ Casano aya a ti matalec nga ili nagbalin nga balangcantis! isu a napno idi iti kinajusticia; ti kinalinteg nagtaeng idi kencuana; ngem ita managpapatay.

22 Ti piracmo nagbalin a rugit, ti aracmo nalaocan iti danum:

23 Dagiti pangpanguloem nasukirda, ken cadcaddua ida dagiti mannanacaw: tunggal maysa ayatenna ti pannucsoc, ken surotsurotenna ti gunggona: dida icalintegan ti ul-ulila, ket di met dumanon cadacuada ti darum ti balo a babai.

24 Gapuna a cuna ti Apo, iti APO dagiti buybuyot, ti Mannacabalin ti Israel, Ah, bang-aracto ti bagic cadagiti cabusorco, ken balsecto dagiti cabcabusorco:

25 ¶ Ket iparabawconto manen ti imac kenca, ket gugoracto a talipupusen ti rugitmo, ken ibellengco amin a gampormo:

26 Ket bangonecto manen dagiti ocomyo a cas idi unana, ken dagiti consejorosmo a cas idi punganay: iti calpasanna maawagancanto, Iti ili ti kinalinteg, ti matalec nga ili.

27 Ti Sion masubbotto iti kinajusticia, ket dagiti napasurotna iti kinalinteg.

28 ¶ Ngem ti pannacadadael dagiti managlabsing ken managbasol agcucuyogdanto, ken dagiti tumallicud iti APO ket maibusdanto.

29 Ta isuda mabaindanto cadagiti luglugo a kinalicagumanyo, ken mariribuccayto gapu cadagiti minuyongan a piniliyo.

30 Ta cascayto la lugo nga agusaw ti bulongna, ken cas minuyongan nga awan danumna.

31 Ket ti napigsa caslanto iti lapnit, ket ti nangaramid kencuana caslanto iti dalipato, ket agpadpadadanto a mapuoran, ken awanto ti mangiddep cadacuada.


CAPITULO 2




1 Ti sao nga ni Isaias nga anac ni Amos nakitana a maipapan iti Juda ken Jerusalem.

2 Ket maaramidto cadagiti maud-udi nga al-aldaw, a ti bantay ti balay iti APO mabangonto iti rabaw dagiti banbantay, ket maibayogto a nangnangrona ngem cadagiti turturod; ket isuamin a nasnacion agayusdanto agingga kencuana.

3 Ket adu dagiti inilin-ili a mapanto ken agcuna, Umaycayo, ket sumang-attayo iti bantay iti APO, iti balay ti Dios ni Jacob; ket isuronatayonto cadagiti dalanna, ket magnatayonto cadagiti dan-ana: ta iti Sion rummuarto ti linteg, ket ti sao iti APO idiay Jerusalem.

4 Ket ocomennanto dagiti nacion, ket tubngarennanto dagiti adu nga inilin-ili: ket pandayendanto dagiti camcampilanda a pagbalinen a dingding ti arado, ken dagiti picpicada a comcompay: ti nacion saannanto nga itag-ay ti campilan a maibusor iti sabali a nacionen, ket didanto met adalenen iti pannakigubat uray caano.

5 O balay ni Jacob, umaycayo, ket magnatayo iti lawag iti APO.

6 ¶ Gapuna ta sica tinallicudam ti ilim a balay ni Jacob, ta napnoda iti cadawyan iti daya, ken managbuyonda a cas cadagiti Filisteos, ket maay-ayoda cadagiti annac dagiti gangannaet.

7 Ket ti dagada pay ket napno iti pirac ken balitoc, ket awan met ti inggana dagiti gamgamengda; ti dagada met napno pay cadagiti cabcabalyo, awan met ti paggibusan dagiti lugluganda:

8 Ti dagada met ket napno pay cadagiti didiosen; daydayawenda dagiti aramid dagiti im-imada met laeng, nga inaramid dagiti ramramayda met laeng:

9 Ket ti nababa a tao maparucnoy, ket ti nangato a tao agpacumbaba: gapuna a dica ida pacawanen.

10 ¶ Sumrecca iti bato, ken aglemmengca ti tapoc, gapu iti panagbuteng iti APO, ken iti dayag ti kinatan-ocna.

11 Ti napalangguad a panagkitkita ti tao maipababanto, ken ti kinatangsit dagiti tattao maparucobto, ket iti APO laeng ti maitantan-octo iti dayta nga aldaw.

12 Ta ti aldaw iti APO dagiti buybuyot addanto a maipatay cadagiti isuamin a natangsit ken napalangguad, ken cadagiti amin a naipangato; ket isu mapaibabanto:

13 Ken iti isuamin a cedcedro ti Libano, a natayag ken nacangatngato, ken cadagiti amin a luglugo ti Basan,

14 Ken cadagiti isuamin a banbantay a natayag, ken iti isuamin a turturod a nangangato,

15 Ken cadagiti tunggal torre a nangato, ken iti tunggal maysa cadagiti nasarikedkedan a bacud,

16 Ken cadagiti amin a sasacayan iti taaw a taga Tarsis, ken iti amin a nacaay-ayo nga ladladawan.

17 Ket ti kinapalangguad ti tao maparucnoyto, ket ti kinatangsit dagiti tattao maipababanto: ket iti APO laeng ti maitantan-octo iti dayta nga aldaw.

18 Ket dagiti didiosen ikisapnanto nga pucawen.

19 Ket sumrecdanto cadagiti rukib dagiti batbato, ken iti uneg dagiti abut ti daga, gapu ti panagbuteng iti APO, ken gapu iti dayag ti kinatan-ocna, intono tumacder a manggunggon a nacaal-allinget iti daga.

20 Iti dayta nga aldaw ti maysa a tao ipalladawnanto ti didiosenna a pirac, ken ti didiosenna a balitoc, nga inaramidda a maipaay cadacuada a pagdaydayawan, dagiti marabutit ken curaratnip;

21 A sumrecda cadagiti rukib dagiti batbato, ken iti tapaw ti rengngat dagiti nakersang a batbato, gapu ti panagbuteng iti APO, ken iti dayag ti kinatan-ocna, inton tumacder a manggunggon a nacaal-alinget ti daga.

22 Bay-anyo ti tao, a ti angesna adda cadagiti abut iti agongna: ta ania ti pacaibilangannanto?


CAPITULO 3




1 Ta, adtoy, ti Apo, iti APO dagiti buybuyot, iccatenna iti Jerusalem ken iti Juda ti mangpakired ken ti sarikedked, ti isuamin a mangpakired a tinapay, ken ti isuamin a mangpakired a danum,

2 Ti maingel a tao, ken ti tao ti gubat, ti ocom, ken ti mammadto, ken ti manakem, ken ti panglacayen,

3 Ti capitan ti limapulo, ken ti natacneng a tao, ken ti consejero, ken ti nalaing nga agaramid, ken ti nalaing nga agbitla.

4 Ket mangtedacto cadagiti annac tapno isuda dagiti panguloenda, ken dagiti maladaga agturaydanto cadacuada.

5 Ket dagiti umili maparigatdanto, tunggal maysa a gapu iti sabali, ken tunggal maysa a gapu iti carrubana: ti ubing tumacderto a sitatangsit unay a bumusor iti lacay, ken ti nanumo a bumusor iti natacneng.

6 Intono ti maysa a tao tengngelennanto ti cabsatna iti balay ni amana, a cunaenna, Sica adda pagan-anaymo, sica coma ti agturay cadacami, ket daytoy a pannacarba agsaad coma iti babaen ti imam:

7 Iti dayta nga aldaw agsapatanto, a cunaenna, Saanacto a mangagas; ta iti balayco awan ti tinapay ken uray pagan-anay: didacto isaad nga agturay cadagiti umili.

8 Ta ti Jerusalem narban, ket ti Juda narugpon: agsipud ta ti dilada ken dagiti ar-aramidda bumusorda iti APO, a panggargarida cadagiti mata ti dayagna.

9 ¶ Ti panagparang dagiti rupada panecnecanna ti maibusor cadacuada; ket ipalawagda ti basolda a cas iti Sodoma, dida ilimed. Asipay ti cararruada! ta ginungonaanda ti dakes cadacuada met laeng.

10 Cunayo maipapan iti nalinteg, a naimbagto kencuana: ta canendanto ti bunga dagiti ar-aramidda.

11 Asi pay ti managdacdakes! nasanaangto kencuana: ta ti gunggona dagiti im-imana maitedto kencuana.

12 ¶ No maipapan iti ilic, ub-ubbing ti mamarigat cadacuada, ken dagiti babbai ti mangituray cadacuada. O ilic, dagidi mangiturturong kenca pagbiddutendaca, ken dadaelenda ti turongen dagiti dandan-am.

13 Iti APO sitatacder a sumupring, ken sitatacder a mangocom cadagiti inilin-ili.

14 Iti APO sumrecto iti panangocom cadagiti lallacay dagiti tattaona, ken cadagiti panguloenda: ta dacayo dagiti nangalun-on iti cauvasan; ti nasamsam cadagiti napanglaw adda cadagiti balbalayyo.

15 Ania ti panggepyo dacayo ta ladditenyo ti ilic, ken lebbekenyo ti rupa dagiti napanglaw? cuna ti Apo DIOS dagiti buybuyot.

16 ¶ Casta met a iti APO kunana pay, Agsipud ta dagiti annac a babbai ti Sion napalangguadda, ken magnada a sitatangar dagiti tengngedda ken mata a nagaramugam, ken magnada ken agkinnikinnida no mapanda, ken agaramidda iti killingkilling cadagiti sacsacada:

17 Gapuna a ti Apo paggaddilennanto ti toctoc ti ulo dagiti annac a babai ti Sion, ket iti APO iparangnanto dagiti nalimed a camcamengda.

18 Iti dayta nga aldaw ti Apo iccatennanto ti kinaimnas dagiti ar-arcos dagiti sacsacada, ken dagiti iniket nga abbongda, ken dagiti nagtatambukel a sinan-bulbulanda,

19 Dagiti pendientes, ken dagiti pulceras, ken dagiti ab-abungot ti rupa,

20 Dagiti dalungdong, ken dagiti arcos cadagiti sacsaca, ken dagiti barikes ti ulo, ken dagiti cajita ti bangbanglo, ken dagiti ar-aritos,

21 Dagiti singsing, ken dagiti aritos ti agong,

22 Dagiti pagan-anay a pakirambac, ken dagiti pañolon, ken dagiti cagcagay, ken dagiti supsupot,

23 Dagiti espejo, ken dagiti nalapat a lienzo, ken dagiti turbante, ken dagiti dalungdong.

24 Ket maaramidto, a dagiti nasam-it a nabanglo agbalinto a kinabuyoc; ket iti saad ti barikes maisucatto ti tali; ket iti saad ti naornos a buoc panagcalvonto; ket iti saad ti lambon pagbarikes a lupot a nakersang; ken iti saad ti napuoran kinaimnas.

25 Dagiti lallakim mapasagdanto iti campilan, ket ti maingelmo iti paggugubatan.

26 Ket ti ruruanganna agladingitto ken agpanes; ket isu nga langalang ket agtugawto iti daga.


CAPITULO 4




1 Iti dayta nga aldaw pito a babbai tenglendanto ti maysa a lalaki, a cunaenda, Canenminto ti tinapaymi met laeng, ken agcawescamto ti pagan-anaymi met laeng: isuna laeng nga maawagancami coma ita naganmo, tapno maiccat ti pannacaibabainmi.

2 Iti dayta nga aldaw ti saringit iti APO napintasto ken nadayag, ket ti bunga ti daga natarnawto ken nataerto nga agpaay cadacuada nga naitalaw iti Israel.

3 Ket maaramidto, a ti mabati idiay Sion, ken ti matda idiay Jerusalem, managananto a nasantoan, uray pay iti tumunggal maysa a naisurat cadagiti sibibiag idiay Jerusalem:

4 Intono ugasan ti Apo ti rugit dagiti annac a babbai ti Sion, ket intono gugurannan ti dara ti Jerusalem iti tengngana babaen ti espiritu ti kinajusticia, ken babaen ti espiritu a sumsumged.

5 Ket iti APO parsuaennanto iti amin a pagtaengan iti bantay Sion, ken cadagiti gimgimongna, ti ulep ken asuc iti aldaw, ken ti raniag ti apuy iti rabii: ta iti amin a dayag addanto sarikedked.

6 Ket addanto tabernaculo a paglinongan iti aldaw a mangilisi iti pudot, ken pagsalindegan, ken paglinongan iti baggio ken tudo.


CAPITULO 5




1 Itan agcantaac coma a maipaay ken ay-ayatec unay iti maysa a canta ti ay-ayatec a maipapan iti cauvasanna. Ti ay-ayatec unay adda idi maysa a cauvasanna iti maysa a nabunga unay a turod:

2 Ket inaladanna, ken iniccatna dagiti batbatona, ket minulaanna iti napili nga uvas, ken namatacder iti maysa a torre iti nagtengngaanna, ken nangtaga met iti pagpespesan iti arac idiay: ket inurayna nga agpataud coma cadagiti uvas, ngem nagpataud ketdi cadagiti uvas nga atap.

3 Ket ita, O dacayo nga agnaed iti Jerusalem, ken tattao ni Juda, ipatoyo, dawatec cadacayo, ti maipapan caniac ken ti cauvasac.

4 Ania pay coma aya ti nabalin a nayon a naaramid iti cauvasac, a diac inaramid kencuana? ania ti gapuna, nga idi nga ur-urayec a mangpataud coma cadagiti uvas, isu namataud cadagiti uvas nga atap?

5 Ket ita mapanca; ibagac cadacayo ti aramidecto iti cauvasac: iccatecto ti aladna, ket maibusto; ken rebbaecto ti bacudna, ket isu mapayatpayatto:

6 Ket baybay-acto a madadael: saanto a maparaspasan, wenno macali; no di ket pagtuboanto dagiti cascasumba ken calcalunay: ket ibilinconto met cadagiti ul-ulep tapno dida tinnagan iti tudo iti rabawna.

7 Ta ti cauvasan iti APO dagiti buybuyot isu ti balay ti Israel, ket dagiti tattao ti Juda isuda dagiti nacaay-ayo a mulana: ket nagsapul ti kinajusticia, ngem adtoy ti pammarigat; ti kinalinteg, ngem adtoy ti maysa a riaw.

8 ¶ Asi pay dagiti mamagtitipon iti balay ken balay, ken mamagtitipon ti talon ken talon, agingga iti awan pagdissoan, ket maaramidda nga agtaeng a is-isuda iti tengnga ti daga!

9 Iti lapayagco cuna iti APO dagiti buybuyot, Iti kinapudnona adu a balbalay ti aglangalangto, uray no dackel ken nasayaat, awanto ti agnaed kencuana.

10 Wen, ti uppat nga ecria ti cauvasan mangtedto iti lima a litro, ket ti tallo cavan a bin-i mangpataudto laeng iti sangapulo salup.

11 ¶ Asi pay dagiti bumangon a masapa iti bigat, tapno sumurotda iti naingel nga inumen; nga idiayda a marabiian unay, agingga iti paggil-ayaben ida ti arac!

12 Ket adda arpa, gitarra a bassit, pandereta, ken pito, ken arac, cadagiti rambacda: ngem dida met utoben ti aramid ti APO, wenno icancano dagiti panagaramid dagiti im-imana.

13 ¶ Gapuna a ti ilic napan iti pannacacayaw, agsipud ta awan pannacaammoda: ket dagiti natan-ocda a tattao nabisinanda, ket dagiti caadduanda namagaanda iti pannacawaw.

14 Gapuna a ni impierno pinalawana isuna, ken linuctanna ti ngiwatna a di marucod: ket ti dayagda, ken ti caadduanda, ken ti rambacda, ken ti sinoman nga agragragsac, bumabadanto idiay.

15 Ket ti nauyong nga tao maparucnoyto, ket ti natan-oc a tao mapababanto, ket dagiti mata ti nangato mapababanto:

16 Ngem iti APO dagiti buybuyot maitan-octo iti kinajusticia, ket ti Dios a santo masantificarto iti kinalinteg.

17 Iti casta agarabton dagiti cordero a cas addada iti pacapastoranda, ket dagiti disso a langalang dagiti nalucmeg canento ti gangannaet.

18 Asi pay dagiti agguyod ti kinadakes iti taltali ti kinaubbaw, ken basol a casla iti pannacaaramat ti maysa a guyodan ti pasagad:

19 A cunaenna, Agpartac coma, dardarasenna coma ti aramidna, tapno makitatayo: ket ti patigmaan ti Santo ti Israel umasideg coma ken dumteng, tapno isu maammoantayo!

20 ¶ Asi pay dagiti mangnagan dakes iti naimbag, ken naimbag iti dakes; nga icabilda a sipnget ti lawag, ket lawag ti sipnget; nga icabilda a napait ti nasam-it, ket nasam-it iti napait!

21 Asi pay dagiti mamasirib cadagiti matada met laeng, ken manakem iti imatangda met laeng!

22 Asi pay dagiti mamaingel nga aginum iti arac, ken tattao a napigsa a mamaglalaoc iti naingel nga inumen:

23 A mangjustificar iti managdacdakes a gapu iti maysa a pannucsoc, ket pucawenda ti kinalinteg iti nalinteg!

24 Gapuna a cas iti gil-ayab ti apuy ibusenna ti punget ti garami, ken cas iti nagango a root a marunaw iti gil-ayab, castanto ti ramutda a cas iti pannacalungsot, ket ti sabongda tumayabto a cas iti tapoc: agsipud ta inwacsida ti linteg iti APO dagiti buybuyot, ken inuyawda ti sao ti Santo ti Israel.

25 Gapuna a ti pungtot iti APO simged a maibusor iti ilina, ken inunnatna ti imana a maibusor cadacuada, ken kinabilna ida: ket dagiti turturod nagkintayegda, dagiti bangbangcay addada a cas rugit iti tengnga dagiti calcalsada. Iti amin daytoy di pay maipanaw ti pungtotna, no di ket ti imana adda pay laeng a silalayat.

26 ¶ Ket isu mangitayagto iti maysa a wagayway cadagiti nasnacion iti adayu, ket sultipannanto ida manipud iti pungto ti daga: ket, adtoy, umaydanto a nadaras ken napardas:

27 Awanto ti mabannog wenno maitibcol cadacuada; awanto cadacuada ti agdungsa ket awan met ti maturog; ket di met maiccat ti barikes iti lomoda, ket di met mapugsat ti cordon dagiti sapatosda:

28 A dagiti panada natatadem, ken sibibiat amin dagiti ba-ida, ket dagiti cuco dagiti cabalyoda maibilangdanto a casla pamulinawen, ken dagiti pilid dagiti lugluganda cacasda la maysa nga alawig:

29 Ti ungorda casla iti leon, agungordanto a cas cadagiti ur-urbon ti leon: wen, agungordanto, ken tucmaandanto ti samsam, ket ipanawda a dida maan-ano, ket awanto a pulos ti mangisalacan.

30 Iti dayta nga aldaw agungordanto a bumusor cadacuada a cas iti ungor ti baybay: ket no ti maysa cumita iti daga, adtoy ti sipnget ken ladingit, ken ti lawag napasipnget cadagiti langlangitna.


CAPITULO 6




1 Idi tawen nga ipapatay ni ari Uzias nakitac ti Apo a situtugaw iti maysa a trono, nangato ken natan-oc, ket ti gayadan ti cawesna pinunnona ti templo.

2 Iti ngatoenna nagtacder dagiti serafin: a ti tunggal maysa adda innem nga payacna; dagiti dua pangabbongna iti rupana, ket dagiti dua pangabbongna cadagiti sacana, ket dagiti dua pagtayabna.

3 Ket nagiinnickisda ti maysa ken maysa, a kinunada, Santo, santo, santo, iti APO dagiti buybuyot: ti isuamin a daga napno iti dayagna.

4 Ket dagiti pamuon iti ruangan nagpigergerda iti timec daydi nagickis, ket ti balay napno iti asuc.

5 ¶ Idin kinunac, Asiac pay! ta madadaelac; agsipud ta taoac a narugit dagiti bibigna, ket makipagtaengac cadagiti tattao a narugit dagiti bibigda: ta dagiti matac nakitada ti Ari, ti APO dagiti buybuyot.

6 Idin timmayab nga immay caniac di maysa cadagiti serafim, nga adda maysa a beggang iti imana, nga innalana a sinipit idi idiay altar:

7 Ket isu ti indeppelna iti ngiwatco, ket kinunana, Adtoy, daytoy dimmeppel cadagiti bibigmo; ket ti kinadakesmo naiccat, ken ti basolmo napacawan.

8 Ket nangngegco pay ti timec ti Apo, a kinunana, Asino ti ibaonconto, ken asino ti mapan a gapu cadatayo? Idin kinunac, Adtoyac; ibaonnac.

9 ¶ Ket isu kinunana, Inca, ket ibagam cadagitoy a tattao, Pudno a mangngegyo, ngem dicayo maawatan; ken pudno a makitayo, ngem dicayo mailasin.

10 Palucmegenyo dagiti puspuso daytoy nga umili, ken pagdagsenenyo dagiti lapayagda, ken pagkidemenyo dagiti matada; di la ket ta macakitada cadagiti matada, ken macangngegda cadagiti lapayagda, ken macaawatda cadagiti pusoda, ken agbabawida, ket mapasalun-atda.

11 Idin kinunac, Apo, casano aya ti cabayagna? Ket isu simmungbat, Agingga iti maracrac dagiti il-ili nga awan matagtagitaona, ken dagiti balbalay nga awan tattaoda, ken ti daga aglangalang a maikisap,

12 Ket iti APO inpanna dagiti tattao iti adayo unay, ken addanto dackel a panangbaybay-a iti nagtetengngaan iti daga.

13 ¶ Ngem numan pay casta adda apagcapullo kencuana, ken agsublinto, ken macanto: cas cayo a terebinto, ken cas maysa a lugo, a ti puonda mabati, no itinnagda dagiti bulongda: casta met ti nasantoan nga bin-i ket isu ti puonna.


CAPITULO 7




1 Ket naaramid cadagidi aldaw ni Acaz nga anac ni Jotham, nga anac ni Uzias, nga ari ti Juda, a ni Rezin nga ari ti Siria, ken ni Peca nga anac ni Remalias, nga ari ti Israel, simmang-atda idiay Jerusalem a manggubat kencuana, ngem dida nabalinan a nagballigian.

2 Ket naipacaammo iti balay ni David, a nacuna, Ti Siria nakisingalut iti Efraim. Ket ti pusona nagkintayeg, ken ti puso dagiti tattaona, a cas cadagiti caycayo iti bakir magongonda a gapu iti angin.

3 Idin kinuna iti APO ken Isaias, Inca ita a sumabet ken Acaz, sica, ken ni Searjasub nga anacmo, idiay pungto ti calasugan ti nangatngato a tangke iti dalan iti tay-ac ti agdaldalus iti lupot;

4 Ket cunaem kencuana, Agalluadca, ken agtalnaca; dica agbuteng, ket dica met ipalubos a maupay ta pusom a gapu cadagitoy dua nga ipus ti aluten nga umas-asuc, a gapu iti narungsot a pungtot ni Rezin ken ti Siria, ken ti anac ni Remalias.

5 Agsipud ta ti Siria, ti Efraim, ken ti anac ni Remalias, nagpanggepda iti dakes a maibusor kenca, a cunaenda,

6 Sumang-attayo a maibusor iti Juda, ket isu ti riribukentayo, ket gubbawantayo sadiay a maipaay cadatayo, ken mangisaadtayo iti ari iti nagtengngaanna, uray pay iti anac ni Tabeel:

7 Castoy ti cuna ni Apo DIOS, Isu saanto nga agtacder, ket dinto met maaramid.

8 Ta ti ulo ti Siria isu ti Damasco, ket ti ulo ti Damasco isu ni Rezin; ket iti bayat dagitoy innem a pulo ket lima a tawen ti Efraim maburacto, tapno isu saanton nga ili.

9 Ket ti ulo ti Efraim isu ti Samaria, ket ti ulo ti Samaria isu ti anac ni Remalias. No saancayo a mamati, pudno a dicayto maipasdec.

10 ¶ Ket iti APO nakisao manen ken ni Acaz, a kinunana,

11 Agkiddawca iti maysa a pagilasinan iti APO a Diosmo; uray ti kiddawem iti caadalman, wenno iti cangatoan sadi ngato.

12 Ngem ni Acaz kinunana, Diacto agkiddaw, ket diacto met suuten iti APO.

13 Ket kinunana, Denggenyo ita, O balay ni David; Bassit laeng aya a banag cadacayo ti panangrengrengyo cadagiti tattao, a rengrengngenyonto pay met ti Diosco?

14 Gapuna a ti Apo met laeng iccannacayto iti maysa a pagilasinan; Adtoy, maysa a birhen agsicogto, ken mangipasngayto iti maysa nga anac a lalaki, ket maigaladto iti naganna nga Emmanuel.

15 Mantequilla ken diro ti canennanto, tapno maammoanna a paiden ti dakes, ken pilien ti naimbag.

16 Ta intono di pay ammo ti ubing a paiden ti dakes, ken pilien ti naimbag, ti daga a caguram mabaybay-anton cadagiti dua nga arina.

17 ¶ Iti APO iyegnanto kenca, ken iti ilim, ken iti balay ni amam, dagiti al-aldaw a dida pay immay, nanipud idi aldaw nga ipapanaw ti Efraim iti Juda; uray pay ti ari ti Asiria.

18 Ket maaramidto iti dayta nga aldaw, a iti APO sultipannanto ti ngilaw nga adda iti caadayuan a paset dagiti carayan ti Egipto, ken ti uyocan nga adda iti daga ti Asiria.

19 Ket umaydanto, ket agtaengdanto amin cadagiti nalangalang a tantanap, ken cadagiti rengrengngat dagiti batbato, ken iti amin a casisiitan, ken amin a babassit a cayo.

20 Iti dayta nga aldaw ti Apo kiskisannanto nga aramatenna ti pangiskis nga inupaan, isuda dagitoy, dagiti labes ti carayan, ti ari ti Asiria, ti ulo, ken muldot dagiti sacsaca: ket ikisapnanto met ti iming.

21 Ket maaramidto iti dayta nga aldaw, a ti maysa a tao mangtarakento iti maysa nga ubing a baca, ken dua a carnero;

22 Ket maaramidto, a gapu iti kinawadwad ti gatas a pataudendanto manganto iti mantequilla: ta mantequilla ken diro ti canento ti tunggal maysa a nabati iti tengnga ti daga.

23 Ket maaramidto iti dayta nga aldaw, a iti tunggal disso, nga ayan idi ti sangaribu nga uvas nga agpateg iti sangaribu nga capisi a pirac, maipaayto cadagiti cascasumba ken calcalunay.

24 Cadagiti pana ken ba-i umayto dagiti tattao ditoy; agsipud ta isuamin a daga agbalinto nga cascasumba ken calcalunay.

25 Ket isuamin a turturod a nacali iti gabion, saanto nga umay dita a disso iti buteng cadagiti cascasumba ken calcalunay: ngem daydiay maipaayto a pagpawaywayan cadagiti bacbaca, ken cadagiti pagpayatpayatan dagiti carcarnero.


CAPITULO 8




1 Ket kinuna iti APO pay caniac, Mangalaca iti dackel a tapi, ket suratam iti rabawna iti pluma ti tao maipapan ken Maher-salal-hash-baz.

2 Ket nangicuyogac cadagiti matalec nga sacsi a mangipanecnec, isuda Urias a padi, ken Zacarias nga anac a lalaki ni Jeberekias.

3 Ket napanac ken mammadto a babai; ket isu nagsicog, ken nangipasngay iti maysa a lalaki. Idin kinuna iti APO caniac, Awagam iti naganna nga Maher-salal-hash-baz.

4 Ta intono di pay ammo ti ubing ti agbalicas ti, Amac, ken inac, ti kinabacnang ti Damasco ken ti nasamsam iti Samaria maipandanto iti sangoanan ti ari ti Asiria.

5 ¶ Ket iti APO nagsao pay caniac manen, a kinunana,

6 Agsipud ta inwacsi daytoy nga umili dagiti dandanum ti Siloe nga agayus a sitatalna, ket agragsac cada Rezin ken iti anac a lalaki ni Remalias;

7 Ita ngarud, adtoy, ti Apo pasalpaenna cadacuada dagiti dandanum ti carayan, napigsa ken adu, a ti met laeng ari ti Asiria, ken amin nga dayagna: ket isu sumalpanto cadagiti isuamin a pagayusanna, ken agayus cadagiti isuamin nga ig-igidna:

8 Ket agayusto agingga iti Juda; manglayusto ken aglasatto, isu dumanonto agingga iti tengnged met laeng; ket ti panangyucradna cadagiti paypayacna sacnapannanto ti caacaba ti dagam, O Emmanuel.

9 ¶ Agcacadduacayo, O dacayo nga inilin-ili, ket maburburaccayo; ket timudenyo, dacayo amin nga taga adayu a dagdaga: agbarikescayo, ket maburburaccayo; agbarikescayo, ket maburburaccayonto.

10 Agpipinnatigmaancayo, ket awanto ti capapaayanna; balicsenyo ti sao, ket dinto macatacder: ta ti Dios adda cadacami.

11 ¶ Ta iti APO casta ti insaona caniac a binuyogan ti napigsa nga ima, ken binilinnac a diac magmagna iti dalan daytoy nga umili, a kinunana,

12 Dicayo saoen, Maysa a iyaalsa, a maipapan iti amin a saoento daytoy nga umili, Maysa a iyaalsa; dicayo met umamac iti panagamacda, dicayo met agbuteng.

13 Santificarenyo ti APO dagiti buybuyot; isu coma ti caamacyo, ken isu coma ti cabutengyo.

14 Ket isunto ti maipaay a santuario; ngem maipaay a maysa a bato a pacaitibcolan ken maysa a bato a pacarurodan cadagiti dua a balbalay ti Israel, a maipaay a saltoc ken silo cadagiti agtaeng sadi Jerusalem.

15 Ket adunto cadacuada iti maitibcol, ket maiticleb, ken mablodanto, ken masiloandanto, ket matiliwdanto.

16 Reppetem ti pammanecnec, selloam ti linteg cadagiti adalac.

17 Ket urayecto iti APO, nga nangilinged ti rupana iti balay ni Jacob, ket sapulecto isuna.

18 Adtoy, siac ken dagiti ubbing nga inted caniac iti APO maipaayda nga pagilasinan ken datdatlag idiay Israel a naggapu iti APO dagiti buybuyot, isu nga agtataeng idiay bantay Sion.

19 ¶ Ket intono saoenda cadacayo, Umumancayo cadagiti baglan, ken cadagiti mammuyon, nga agarasaas ken agtanabutob: saan aya a rebbeng coma dagiti umili nga umumanda iti Diosda? gapu cadagiti sibibiag cadagiti natay?

20 Iti linteg ken iti pammanecnec: no dida agsao a cas mayannurot itoy a sao, maigapu ta awan iti silaw cadacuada.

21 Ket aglasatdanto, iti nacaro a sennaay ken panagbisin: ket maaramidto nga, intono mabisindan, agalimutengdanto, ken ilunoddanto ti arida ken iti Diosda, ken tumangadda.

22 Ket cumitadanto iti daga; ket makitadanto iti rigat ken sipnget, kinacudrep ti pannacacumicum; ket mayabogdanto iti kinasipnget.


CAPITULO 9




1 Numan pay casta ti kinacudrep saanto a casdiay idi isu adda iti pannacacumicomna, idi un-unana inyegna ti nalag-an a panagladingit iti daga ni Zabulon ken ti daga ni Neftali, ngem idi naud-udi a tiempo inaramidna ti nacarcaro a panagladingitna babaen iti dalan ti baybay, iti labes ti Jordan, idiay Galilea dagiti nasnacion.

2 Ti umili a nagnagna iti casipngetan nacakita iti maysa a dackel a lawag: dagiti nagtaeng iti daga ti anniniwan ni patay, cadacuada naglawag ti silaw.

3 Sica pinaadum ti nacion, ken dica pinadackel ti ragsac: agragsacda iti sangoanam a cas iti ragsac ti panagapit, a cas iti ragsac dagiti tattao no bingayenda ti sinamsam.

4 Ta binungtolmo ti sangol ti awitna, ken ti sarucod ti abagana, ti pang-or ti mamarigat kencuana, a cas idi aldaw ni Madian.

5 Ta isuamin a bacal ti tao a naigaman ket caraman iti nariribuc nga uni, ken cawcawes a nabungon iti dara; ngem daytoy maipaayto iti pannacapuor ken sungrod ti apuy.

6 Ta nayanac ti maysa nga ubing cadatayo, maysa nga anac a lalaki ti naited cadatayo: ket ti panangituray maiparabawto iti abagana: ket ti naganna magaladanto iti Nacascasdaaw, Mamagbaga, Ti Mannacabalin a Dios, Ti Agnanayon nga Ama, Ti Principe iti Cappia.

7 Ti idadackel ti panangiturayna ken ti cappia awanto ti inggana, iti trono ni David, ken iti pagarianna, tapno bangonenna, ken pasingkedanna babaen iti kinajusticia ken kinalinteg manipud ita ken iti agnanayon. Ti regta iti APO dagiti buybuyot ti mangaramidto iti daytoy.

8 ¶ Ti Apo nangibaon ti sao ken Jacob, ket nagdisso iti Israel.

9 Ket isuamin nga umili maammoannanto, uray pay ti Efraim ken ti agnaed ti Samaria, nga agcuna a sitatangsit ken sisusukir ti pusoda,

10 Dagiti ladrillo narbada, ngem mangpatacdercaminto nga aramatenmi ti tinicapan a batbato: dagiti sicomoro napucanda, ngem sucatanminto ida iti cedcedro.

11 Gapuna a iti APO ipasdecnanto dagiti cabusor ni Rezin a maibusor kencuana, ket pagtitiponennanto dagiti cabusorna a sangsangcamaysa;

12 Dagiti Sirio iti sangoanan, ken dagiti Filisteos iti licudan; ket alun-onendanto ti Israel iti nacanganga a ngiwat. Ta gapu amin daytoy ti pungtotna di pay pimmanaw, no di ket ti imana silalayat pay laeng.

13 ¶ Ta dagiti tattao dida simmango iti daydiay kimmabil cadacuada, ket dida met sinapul iti APO dagiti buybuyot.

14 Gapuna a iti APO putdennanto iti Israel manipud ti ulo ken ti ipus, ti sanga ken puon, iti maysa nga aldaw.

15 Ti panglacayen ken ti natacneng, isu ti ulo; ket ti mammadto a mangisuro cadagiti ul-ulbod, isu ti ipus.

16 Ta isuda a mangidalan iti daytoy nga umili pagbiddutenda ida; ket dagidiay a maidalan cadacuada madadaelda.

17 Gapuna a ti Apo saannanto a pagragsacan dagiti agtutuboda a lallaki, ket dinto sumnec ti asina cadagiti ul-ulilada ken babbaloda a babbai: ta tunggal maysa managinsisingpet ken managdacdakes, ken tunggal ngiwat agsao iti kinamaag. Ta gapu amin daytoy ti pungtotna saan a pimmanaw, no di ket ti imana adda a silalayat pay laeng.

18 ¶ Ta ti kinadakes manguram a casla apuy: alun-unenna dagiti cascasumba ken calcalunay, ken pasgedanna ti casamecan ti bakir, ket agpangatoda a cas pannacaipangato iti asuc.

19 Gapu iti pungtot iti APO dagiti buybuyot ti daga ngimmisit, ket dagiti tattao isuda ti casla pagsungrod iti apuy: awan ti tao a mangigaga iti cabsatna.

20 Ket agrabsutto iti imana a macanawan, ket mabisinanto; ket manganto iti imana a macatigid, ket didanto mabsog: tunggal maysa a tao canennanto ti lasag ti tackiagna met laeng.

21 Ni Manases, Efraim; ken ni Efraim, Manases: ket isuda agtipondanto a bumusor iti Juda. Ta gapu amin daytoy ti pungtotna saan a pimmanaw, no di ket ti imana adda a silalayat pay laeng.


CAPITULO 10




1 Asi pay dagiti mangipacdaar dagiti nakillo nga pacdaar, nga nagisurat dagiti kinaulpit nga panggepda;

2 Tapno mailisi dagiti addaan pannacasapul iti kinajusticia, ken tapno iccatenda ti calintegan dagiti napanglaw iti ilic, tapno dagiti babbalo a babbai isuda ti samsamda, ken tapno tacawanda dagiti ul-ulila!

3 Ket ania ti aramidenyonto iti aldaw ti isasarungcar, ken ti pannacarba nga umayto nga aggapu iti adayu? asino ti pagcamanganyo a tumulongto cadacayo? ket sadino ti pangibatianyonto ti dayagyo?

4 No awanac agrucnoydanto laeng cadagiti balud, ken mapasagdanto iti babaen dagiti natay. Ta gapu amin daytoy ti pungtotna saan a pimmanaw, no di ket ti imana adda a silalayat pay laeng.

5 ¶ O Asirio, pang-or ti pungtotco, ti sarucod nga adda iti imana ket isu iti rungsotco.

6 Ibaonconto kencuana a bumusor iti maysa a nacion a managincucuna, ken isu bilinecto a bumusor iti umili a cagurac, tapno alaenna ti samsam, ken alaenna ti tinucmaan, ken payatpayatenna ida a casla iti pitac dagiti calcalsada.

7 Nupay casta dina panggepen a casta, ket di met panunoten ti pusona a casta; ngem adda iti pusona ti panangdadael ken mangtalipupus cadagiti nasnacion nga adu.

8 Ta kunana, Saan aya nga dagiti principec ket ar-arida amin?

9 Ti Calno saan aya a cas iti Carkemis? ti Hamath saan aya a cas iti Arpad? ken ti Samaria saan aya a cas iti Damasco?

10 Iyantangay ti imac nasaracanna dagiti pagpagarian dagiti didiosen, nga dagiti kinitikitan a ladladawanda inartapanda dagidiay adda idiay Jerusalem ken ti Samaria;

11 Diacto aya, ti cas inaramidco iti Samaria ken cadagiti didiosenna, aramiden iti Jerusalem ken cadagiti didiosenna?

12 Gapuna a maaramidto, nga intono matungpal ti Apo ti amin nga aramidna idiay bantay Sion ken iti Jerusalem, dusaecto ti bunga ti nasukir a puso ti ari ti Asiria, ken ti dayag ti natangsit a panagkitkitana.

13 Agsipud ta kinunana, Babaen iti pigsa ti imac isu ti inaramidco, ken babaen iti kinasiribco; ta adda pannacaawatco: ket iniccatco dagiti beddeng dagiti inilin-ili, ken rinabsutco dagiti gamgamengda, ken pinarmecco dagiti nagnaed cadacuada a cas iti maysa a maingel a tao:

14 Ket ti imac nasapulanna a casla umoc dagiti kinabacnang dagiti il-ili: ken cas iti panagurnong cadagiti itlog a nabaybay-an, casta ti panangurnongco iti amin a daga; ket awan a pulos ti nanggunay iti payacna, wenno nagnganga, wenno nagkiac.

15 Agpasindayawto aya ti wasay a bumusor iti daydiay mangiwasay kencuana? wenno agtangsitto aya ti ragadi a maibusor iti daydiay mangyudaod kencuana? casla ti maysa a pang-or bumusor coma cadagidiay mangilayat kencuana, wenno casla ti maysa a surucod nga ingatona isuna met laeng, a casla no awan iti cayo.

16 Gapuna a ti Apo, ti APO dagiti buybuyot, ibaonnanto cadagiti nalucmegna iti kinacuttong; ken iti baba ti dayagna pasgedannanto ti maysa a darang a cas iti darang ti apuy.

17 Ket ti silaw ti Israel maipaayto a cas maysa nga apuy, ket Ti Santona maipaay a maysa a darang: ket uramennanto ken runutennanto dagiti calcalunayna ken cascasumbana iti maysa nga aldaw;

18 Ket ibusennanto ti dayag ti bakirna, ken ti nabunga nga talonna, cararrua ken bagi nga agpadpada: ket casladanto iti maysa a mangiggem iti wagayway no matalimudaw.

19 Ket ti matda cadagiti caycayo ti bakirna bassitto, iti casta a ti maysa nga ubing maisuratna ida.

20 ¶ Ket maaramidto iti dayta nga aldaw, a ti matda iti Israel, ken dagiti macalisi iti balay ni Jacob, saandanto nga agsadagen iti daydiay nangcabil cadacuada, no di ket agsadagdanto ken iti APO, ti Santo Ti Israel, ti kinapudno.

21 Ti tidda agsublinto, ti tidda met laeng ken Jacob, iti saclang ti mannacabalin a Dios.

22 Ta uray no ti ilim nga Israel casda la cadagiti darat ti baybay, numan pay casta ti laeng tidda dacuada iti agsublinto: ket ti pannacadadael nga naikeddeng agliplippiasto iti kinalinteg.

23 Ta ti Apo DIOS dagiti buybuyot aramidennanto ti pannacadadael, uray ket naikeddengen, iti tengnga ti isuamin nga daga.

24 ¶ Gapuna a casta ti cuna ti Apo DIOS dagiti buybuyot, O ilic nga agnaed iti Sion, dica agbuteng iti Asirio: cabilennaca iti pang-or, ken ilayatna a maibusor kenca ti sarucodna, a cas iti cababalin ti Egipto.

25 Ta iti maysa nga apagbiit a canito, ket ti gura manungpalto, ket ti pungtotco iti pannacadadaelda.

26 Ket iti APO dagiti buybuyot tignayennanto ti maysa a saplit kencuana a mayannurot iti pannacapapatay ti Madian idiay bato ti Oreb: ket cas ti sarucodna iti rabaw iti baybay, castanto nga itag-aynanto a cas casasaad idi idiay Egipto.

27 Ket maaramidto iti dayta nga aldaw, a ti awitna pumanawto iti abagam, ken ti sangolna maiccatto iti tengngedmo, ket ti sangol matuccolto a gapu iti pannacalana na.

28 Isu immay iti Ajad, linasatna ti Migron; idiay Micmas ti pangurnonganna cadagiti gargaretna:

29 Naglabasda iti pagballasiwan: nagaramidda iti pagdagusanda idiay Geba; ti Rama nagpigerger; ti Gabaa ni Saul timmaray.

30 Ipuccawmo ta timecmo, O anac a babai ti Galim: ipangegmo agingga idiay Lasa, O napanglaw nga Anathoth.

31 Ti Madmena nagtalaw; dagiti umili sadi Gebim nagtitiponda tapno tumarayda.

32 Cas met laeng nga agsardengto idiay Nob iti daydiay nga aldaw: ilayatnanto ti imana iti bantay ti anac a babai ti Sion, ti turod ti Jerusalem.

33 Adtoy, ti Apo, ti APO dagiti buybuyot, pucanennanto dagiti sangsanga babaen iti nacaal-alinget: ken dagiti natayag ti langada maputeddanto, ket dagiti nangato maipababadanto.

34 Ket isu pucanennanto dagiti casamecan ti bakir nga aramatenna ti landoc, ket ti Libano marsuodto a gapu iti maysa a mannacabalin.


CAPITULO 11




1 Ket addanto tumaud a maysa a saringit iti puon ni Jesse, ken maysa a Sanga agtaudto cadagiti ramutna:

2 Ket ti espiritu iti APO agtaengto kencuana, ti espiritu ti kinasirib ken pannacaawat, ti espiritu ti pammatigmaan ken pannacabalin, ti espiritu ti pannacaammo ken ti panagbuteng iti APO;

3 Ket pagbalinennanto a napardas ti pannacaammona iti panagbuteng ken iti APO: ket saanto a mangocom a cas iti makita dagiti matana, wenno mangtubngar a cas iti mangngeg dagiti lapayagna:

4 Ngem babaen ti kinalinteg ocomennanto dagiti napanglaw, ken mangtubngar a sililinteg a maipaay cadagiti napacumbaba ditoy daga: ket cabilennanto ti daga iti baras ti ngiwatna, ken gapu iti puyot dagiti bibigna patayennanto ti managdacdakes.

5 Ket ti kinalinteg isunto ti barikes iti siketna, ket ti kinamatalec isunto ti barikes iti lomona.

6 Ket ti pay lobo makipagnaedto iti cordero, ket ti leopardo makicaiddanto iti urbon a calding; ket ti urbon ti baca ken ti urbon ti leon ken ti napalucmeg agcacaiddadanto; ket ti maysa nga ubing a bassit idalannanto ida.

7 Ti baca ken ti oso agarabdanto; dagiti urbonda agcacaiddadanto: ket ti leon manganto iti garami a cas iti baca a lalaki.

8 Ket ti ubing nga agsuso agay-ayamto iti abut ti uleg, ket ti capuspusot nga ubing icautnanto ti imana iti rukib ti carasaen.

9 Didanto mangranggas wenno mangdadael iti amin a nasantoan a bantayco: ta ti daga mapnonto iti pannacaammo ken iti APO, a casla dagiti dandanum sacnapanda ti baybay.

10 ¶ Ket iti dayta nga aldaw addanto ti ramut ni Jesse, ket tumacderto nga wagayway cadagiti tattao; isu ti sapulento dagiti Gentiles: ket ti inana na nadayagto.

11 Ket maaramidto iti dayta nga aldaw, a ti Apo isaadnanto manen ti imana iti maicaddua nga daras a mangsubbot iti tidda iti ilina, dagiti maitiddanto, nga aggapu iti Asiria, ken aggapu iti Egipto, ken aggapu iti Patros, ken aggapu iti Cus, ken aggapu iti Elam, ken aggapu iti Sinar, ken aggapu iti Amat, ken cadagiti purpuro iti baybay.

12 Ket mangitag-ayto ti maysa a wagayway cadagiti nasnacion, ken urnongennanto dagiti naipurruac iti Israel, ken tiponenna nga agcaycaysa dagiti naiwarwara ti Juda manipud cadagiti uppat a suli ti daga.

13 Ti apal met ti Efraim pumanawto, ket dagiti mangriribuc iti Juda madadaeldanto: ti Efraim dinanto apalan ti Juda, ket ti Juda dinanto riribuken ti Efraim.

14 Ket tumayabdanto iti rabaw ti abaga dagiti Filisteos iti agpalaud; samsamendanto dagiti taga daya a sangsangcamaysa: iyunnatdanto dagiti im-imada iti Edom ken Moab; ket dagiti annac ni Ammon agtulnogdanto cadacuada.

15 Ket iti APO dadaelannanto a talipupusen ti dila ti baybay ti Egipto; ket babaen iti nabileg nga anginna gungonennanto ti imana iti rabaw ti carayan, ket cabilenna iti nagcapito nga ayusna, ket aramidenna a dagiti tattao macaballasiwda a simamaga ti sacada.

16 Ket addanto dalan a napatac a maipaay cadagiti tidda iti ilina, dagiti mabatinto, nga aggapu iti Asiria; a casla iti Israel idi aldaw nga isasang-atna nga rimmuar iti daga ti Egipto.


CAPITULO 12




1 Ket iti dayta nga aldaw cunaemto, O APO, idaydayawcanto: ta nupay no nagungetca caniac idi, ti ungetmo naiccat, ket liwliwaennac.

2 Adtoy, ti Dios isu iti salacanco; agtalecacto, ket saannacto nga agbuteng: ta ni APO JEHOVA isu ti pigsac ken cantac; ken isu nagbalin pay a salacanco.

3 Gapuna nga sirarag-o a sumacducayo iti danum cadagiti bubon ti pacaisalacanan.

4 Iti dayta nga aldaw cunaenyonto, Idaydayaw ti APO, awaganyo ti naganna, ipalawagyo dagiti ar-aramidna cadagiti tattao, isaritayo a ti naganna maitan-oc.

5 Cantaanyo iti APO; ta inaramidna dagiti natan-oc a banbanag: daytoy naammoanen iti isuamin a daga.

6 Agdir-ica ken agriawca, sica nga agtaeng iti Sion: ta dackel ti Santo Ti Israel iti nagtetengngaam.


CAPITULO 13




1 Ti dadagsen ti Babilonia, a nakita ni Isaias nga anac ni Amoz.

2 Ipatacderyo ti wagayway iti rabaw ti nangato a bantay, ipigsayo ti agtimec cadacuada, ipayapayyo ti imayo, tapno sumrecda cadagiti ruruangan dagiti natacneng.

3 Binilinco dagiti pinagsantoc, inayabac pay dagiti mamaingel a tattaoc a gapu iti pungtotco, uray dagiti met laeng agragragsac iti kinangatoc.

4 Ti daranudor ti umariwecwec cadagiti banbantay, a cas ti adu a tattao; ti daranudor ti maysa nga ariwawa dagiti pagpagarian dagiti nacion naggu-urnongda: ti APO dagiti buybuyot urnongenna dagiti buybuyot a maipaay iti gubat.

5 Umayda manipud iti adayu a daga, manipud iti disso a caadayuan ti langit, ni met laeng APO, ken dagiti ig-igam ti lucsawna, a mangdadael iti isuamin a daga.

6 ¶ Agdung-awcayo; ta ti aldaw iti APO adtoyen; umayto cas pannacadadael nga aggapu iti Mannacabalin-amin.

7 Gapuna isuamin nga im-ima cumapuydanto, ken tunggal puso ti tao marunawto:

8 Ket agcullayawdanto: dagiti tuoc ken ledleddaang tenglendanto ida; addadanto iti tuoc a cas iti maysa a babai nga agpaspasical: agkikinnitadanto nga agmalmalanga ti maysa ken maysa; dagiti ruprupada casladanto dumardarang.

9 Adtoy, ti aldaw iti APO umay, naranggas a buyogan ti pungtot ken narungsot nga unget, tapno paglangalangenna ti daga: ket dadaelennanto dagiti managbasol iti nagtengngaanna.

10 Ta dagiti bitbituen sadi langit ken dagiti purpuroc dagiti bitbituenna didanto ipaay ti silawda: ti init agsipngetto iti iruruarna, ket ti bulan dinanto pagsilnagen ti lawagna.

11 Ket dusaecto ti lubong a gapu iti kinadakesda, ken dagiti managdacdakes a gapu iti kinadangkesda; ket pasardengecto ti kinatangar ti natangsit, ket ipababacto ti kinapalangguad ti nacabutbuteng.

12 Aramidecto a ti maysa a lalaki napatpateg ngem iti nasudi a balitoc; uray ti maysa a lalaki ngem iti balitoc a napasudi ti Ofir.

13 Gapuna a pagkintayegecto dagiti langlangit, ket ti daga mayalisto iti dissona, gapu ti pungtot iti APO dagiti buybuyot, ken ti aldaw ti narungsot nga ungetna.

14 Ket maaramidto a cas iti ugsa a maanupan, ken cas cadagiti carcarnero nga awan ti tao a mangaywan cadacuada: sumang-atdanto tunggal maysa a mapan ken cailianna, ken agtarayto ti tunggal maysa a mapan iti dagana met laeng.

15 Ket tunggal maysa a masaracan masalputto; ket tunggal maysa a naicuyog cadacuada mapasagto babaen iti campilan.

16 Dagiti maladagada mapirsapirsaydanto pay iti sangoanan dagiti matada; masamsamto dagiti balbalayda, ken dagiti assawada a babbai mapilitdanto.

17 Adtoy, tignayecto dagiti Medos a bumusor cadacuada, isuda a di mangipateg iti pirac; ket no maipapan iti balitoc, saandanto nga agrag-o kencuana.

18 Dagiti ba-ida lasanglasangendanto dagiti agtutuboda a lallaki; ken awanto ti asida iti bunga ti aanacan; dagiti matada didanto mangigaga cadagiti ubbing.

19 ¶ Ket ti Babilonia, a dayaw dagiti pagpagarian, nga imnas ti kinatangsit dagiti Caldeos, isunto ti casla idi panangrebba ti Dios iti Sodoma ken Gomorra.

20 Isu dinto matagitaoanen uray caano, ket dinto met mataenganen manipud iti caputotan agingga iti caputotan: ket ti Arabe dinto met mangipatacder idiayen iti toldana; dagiti agpaspastor didanto met pagiddaen idiayen dagiti pangenda.

21 No di ket dagiti narungsot nga an-animal ti let-ang ti agidda idiay; ket dagiti balbalayda mapnonto cadagiti agunno-unnoy a parsua; ket dagiti avestruz agnaedto idiay, ken dagiti calding nga atap agsaladanto idiay.

22 Ken dagiti atap nga an-animal iti daga agickisdanto cadagiti langalang a balbalayda, ken dagiti dragons cadagiti nacaay-ayo nga palpalacioda: ket ti tiempona umadani a dumteng, ket dagiti al-aldawna saandanto a mapaatiddug.


CAPITULO 14




1 Ta iti APO addanto caasina ken Jacob, ken piliennanto pay laeng ti Israel, ken pagtaengennanto ida iti dagada met laeng: ket ti gangannaet tumiponto cadacuada, ket makicadduadanto iti balay ni Jacob.

2 Ket dagiti tattao alaendanto ida, ken ipanda ida iti lugarda: ket ti balay ti Israel icutannanto ida idiay daga iti APO nga cas ad-adipen a lallaki ken babbai: ket cayawandanto ida, dagiti nangcayaw cadacuada; ket iturayandanto dagiti namarparigat cadacuada.

3 Ket maaramidto iti aldaw a pannangted iti APO kenca iti panaginanam iti ladingitmo, ken iti riribucmo, ken iti narigat a pannacabaludmo nga nacaipapilitam a nagservi,

4 ¶ Nga alaemto daytoy a proverbio a maibusor iti ari ti Babilonia, ket cunaemto, Casano ti mangilupitlupit aggibus! ti ili nga balitoc aggibus!

5 Iti APO binungtolna ti sarucod ti managdacdakes, ken ti cetro dagiti agturturay.

6 Ti nangcabil ti umili iti pungtot babaen iti cancanayon a pang-or, ti nagturay dagiti nasnacion iti unget, isu ket naidadanes, ket awan ti nanglapped.

7 Ti isuamin nga daga agin-inana, ken natalna: tumpuarda nga agcancanta.

8 Wen, dagiti caycayo a parwa agragsacda kenca, ken dagiti cedcedro ti Libano, a cunaenda, Nanipud iti pannacaibabam, awan ti mannaga a sumang-at a bumusor cadacami.

9 Ti impierno iti baba natignay a maipaay kenca a sumabet iti iyaaymo: inriingannaca cadagiti natay, uray pay dagiti amin a pangpangulo ti daga; pinatacderna cadagiti tronoda amin dagiti ar-ari dagiti nasnacion.

10 Isuda amin sumungbatdanto ken kunadanto kenca, Kimmapuyca met aya a cas cadacami? nagbalinca aya a capadpadami?

11 Ti pasindayagmo nayulog idiay tanem, ken ti aweng dagiti violinmo: ti igges maiwaras iti sirocmo, ken dagiti ig-igges abungotandaca.

12 Casano ti pannacatnagmo nanipud langit, O Lucifer, anac ti bigat! casano ti pannacakeltaymo a naipadaga, sica a nangpacapuy dagiti nasnacion!

13 Ta kinunam ita pusom, Agpangatoacto sadi langit, ibayogconto ti tronoc iti ngato dagiti bitbituen ti Dios: ken agtugawacto pay iti bantay ti gimong, cadagiti sulsuli a paspaset iti amianan:

14 Agpangatoacto iti ngato ti cangatoan dagiti ul-ulep; ipadpadconto ti bagic ken iti Cangatoan unay.

15 Nupay casta sica maibabacanto didiay impierno, idiay sulsuli nga paspaset ti dariwangwang.

16 Dagiti macakita kenca ket tan-awandacanto, ken ut-utobendacanto, a cunaenda, Isu cadi daytoy ti tao a pinagpigpigergerna ti daga, a nanggungon cadagiti pagpagarian;

17 Nga inaramidna ti lubong a cas maysa a let-ang, ken rinebbana dagiti il-ilina; a dina lucatan ti pagbaludan nga balay dagiti balbaludna?

18 Amin dagiti ar-ari dagiti nasnacion, uray pay isuda amin, agiddada iti kinadayag, tunggal maysa iti bucodna a balay.

19 Ngem sica maipalapalca manipud iti tanemmo a cas maysa a nacarimrimon a sanga, a cas cawes dagiti napapatay, a sinalput ti campilan, a bumaba cadagiti batbato ti dariwangwang; a cas iti maysa a bangcay a nabaddebaddecan.

20 Dicanto maitipon cadacuada iti pannacaitabon, agsipud ta dinadaelmo ti dagam, ken pinapataymo dagiti cailiam: ti bin-i dagiti managaramid ti dakes saanto nga mabigbig iti agnanayon.

21 Agsaganacayo iti pagpapatayan a maipaay cadagiti annacna a gapu iti kinadakes dagiti ammada; tapno dida tumacder, ken agtagicua iti daga, ken mangpunno iti rabaw ti lubong cadagiti il-ili.

22 Ket tumacderacto a bumusor cadacuada, cuna iti APO dagiti buybuyot, ket pucawecto manipud Babilonia ti nagan, ken ti tidda, ken anac a lalaki, ken caanacan, cuna iti APO.

23 Isu aramidecto met a tagicuaen dagiti babassit nga animal, ken al-alog dagiti dandanum: ken sagadecto iti sagad ti panangrebba, cuna iti APO dagiti buybuyot.

24 ¶ Iti APO dagiti buybuyot insapatana, a kunana, Pudno unay a cas iti panangpanunotco, castanto ti maaramid; ken cas pinanggepco, casta nga isu mataginayonto:

25 A burakecto ti Asirio idiay dagac, ken iti rabaw dagiti banbantayco isu payatpayatec: iti casta ti sangolna agiccatto cadacuada, ket ti awitna agiccatto cadagiti abagada.

26 Isu daytoy ti panagem a naisagana a maipaay iti amin a daga: ken daytoy ti ima a nailayat iti rabaw ti amin a nasnacion.

27 Ta iti APO dagiti buybuyot pinanggepna, ket asino ti mangaw-awanto? ket ti imana nailayat, ket asino ti mangcucotto?

28 Idi tawen nga ipapatay ni ari Acaz adda idi daytoy nga dadagsen.

29 ¶ Dica agragsac, amin nga Filistia, agsipud ta ti pang-or a nangabil kenca nabungtol: ta iti ramut ti uleg agtaudto ti maysa a carasaen, ket ti bungana isunto ti maysa a narungsot nga agtaytayab nga uleg.

30 Ti inauna nga anac ti napanglaw agtaraonto, ket ti macurcurangan agiddanto a sitatalged: ket patayecto ti ramutmo iti bisin, ken papatayennanto ti mabati kenca.

31 Agtagguobca, O ruangan; agickisca, O ili, sica, amin nga Filistia, narunawcan: ta umay ti maysa nga asuc nga aggapu iti amianan, ket awanto ti agmaymaysa cadagiti nadutocan a tiempona.

32 Ania ngarud ti isungbatto ti maysa cadagiti binaon ti nacion? A iti APO binangonna ti Sion, ket dagiti napanglaw iti ilina agcamangto kencuana.


CAPITULO 15




1 Ti dadagsen ti Moab. Gapu ta iti maysa nga rabii ti Ar iti Moab ket nadadael, ken naipan iti kinaulimec; gapu ta iti maysa nga rabii ti Kir iti Moab ket nadadael, ken naipan iti kinaulimec;

2 Simmang-at agingga iti Bayith, ken Dibon, cadagiti disso nga nangato, tapno agsangit: ti Moab dung-awannanto ti Nebo, ken ti Medeba: iti amin nga ul-uloda nagcalvo, ken tunggal iming nakiskisan.

3 Cadagiti daldalanda baricsandanto dagiti bagbagida iti lupot a nakersang: cadagiti tuctoc ti balayda, ken cadagiti daldalanda, agdung-awto iti tunggal maysa, nga agsangsangit iti napalalo.

4 Ket ti Hesbon agickisto, ken ti Eleale: ti timecda mangngegto agingga iti Jahas met laeng: gapuna a dagiti nagigam nga tattao ti Moab agriawdanto; ti biagna nasaemto iti unegna.

5 Ti pusoc agickis a gapu iti Moab; dagiti nacatalawna tumaraydanto agingga ti Zoar, cabai-an nga baca a tallo ti tawenna: ta iti sasang-atan ti Luhith sumang-atda a sisasangit; ta iti dalan ti Horonaim iriawdanto iti maysa nga ickis iti pannacarba.

6 Ta dagiti dandanum ti Nimrim maabbatandanto: ta ti garami magangonto, ti root malaylayto, awanto ti nalangto nga banag.

7 Gapuna a ti nagun-odanda nga kinawadwad, ken dagiti inurnongda, ipandato iti ballasiw ti waig dagiti caycayo nga runruno.

8 Ta ti ariwawa naglicmut cadagiti beddeng ti Moab; ti dung-awna dimmanon iti Eglaim, ken ti dung-aw dimmanon iti Beer-elim.

9 Ta dagiti dandanum ti Dimon mapnodanto iti dara: ta mangyegacto pay ti nayonna idiay Dimon, dagiti leon cadagiti nacatalaw ti Moab, ken cadagiti tidda iti daga.


CAPITULO 16




1 Paipanyo ti cordero a maipaay iti agturay iti daga manipud Sela aginggana iti let-ang, agingga iti bantay ti anac a babai ti Sion. Ta isunto, nga, cas cadagiti aglicawlicaw a tumatayab a naipalladaw manipud ti umoc, castadanto dagiti annac a babbai ti Moab cadagiti ballasiwan ti Arnon.

3 Mangbalacadca, tungpalem ti kinajusticia; pagbalinem ti anniniwanmo a cas rabii ti nagtengngaan ti tenga ti aldaw; ilingedmo dagiti naibelleng; dica liputan ti aglicawlicaw.

4 Dagiti imbellengco makipagyanda coma kenca, Moab; sica coma ti abbong cadacuada manipud iti rupa ti manangranggas: ta ti nasicap nga managpatubo ket addan ti canibusananna, ti manangranggas sumardeng, dagiti mamarparigat maibusda iti daga.

5 Ket iti kinamanangngaasi maysa a trono ti mabangonto: ket agtugawto kencuana iti kinapudno iti tabernaculo ni David, a mangocom, ken mangbiroc iti kinajusticia, ken napardas a mangaramid iti kinalinteg.

6 ¶ Nangeganmi iti kinatangsit ti Moab; isu natangsit unay: iti met laeng palangguadna, ken ti tangsitna, ken ti pungtotna: ngem dagiti ulbodna saandanto a casta.

7 Gapuna a ti Moab agdung-awto a maipuon iti Moab, tunggal maysa agdung-awto: ta dagiti pamuon ti Kir-hareseth dung-awanyonto; pudno a nadadaeldan.

8 Ta dagiti taltalon ti Hesbon cumapuyda, ken ti uvas ti Sibma: dagiti appo dagiti nacion sinep-acda dagiti napili a mulmulana, a gimmaw-atda pay agingga iti Jazer met laeng, a naglicawlicawda iti let-ang: dagiti sangsangana nabinnatda, bimmallasiwda iti baybay.

9 ¶ Gapuna a makipagsangitacto iti panagsangit ti Jazer ti uvas ti Sibma: sibugancanto cadagiti luluac, O Hesbon, ken Eleale: ta ti ariwawa cadagiti bungbungam iti calgaw ken iti apitem ket nadadaelen.

10 Ket ti rag-o naipanawda, ken ti ragsac iti nabunga nga talon; ken iti cauvasan awanto ti panagcancanta, awan met ti nacaragragsac a timec: awan ti agpaypayat a mangpayatto iti arac cadagiti pagpespesan ti uvas; pinasardengco ti riaw ti panagburas.

11 Gapuna ti pusoc aguni a cas arpa a maipuon iti Moab, ken dagiti lalaemco a maipuon iti Kir-hareseth.

12 ¶ Ket maaramidto, intono agparang ti Moab a nabannog iti nangato a disso, ken umayto iti santuariona nga agcararag; ngem saanto a mangabac.

13 Daytoy ti sao nga imbalicas iti APO maipapan iti Moab nanipud idi napalabas a pannawen.

14 Ngem ita iti APO sinaona, a kinunana, Iti bayat ti tallo a tawen, a cas cadagiti tawen ti maysa a mangmangged, ti dayag ti Moab maumsinto, agraman amin iti dayta a dackel nga kinaadu; ket ti tidda bassitto unay ken nacapuy.


CAPITULO 17




1 Ti dadagsen ti Damasco. Adtoy, ti Damasco naiccat ti kinailina, ket isunto ti maysa a narba nga gabsuon.

2 Dagiti il-ili ti Aroer nabaybay-anda: maipaaydanto cadagiti ar-arban, nga agiddadanto, ket awanto ti mangpabuteng cadacuada.

3 Ket mapucawto ti sarikedked ti Efraim, ken iti pagarian manipud ti Damasco, ken ti matda iti Siria: isudanto ti cas iti dayag dagiti annac ti Israel, cuna iti APO dagiti buybuyot.

4 Ket maaramidto iti dayta nga aldaw, a ti dayag ni Jacob mapacuttongto, ken ti kinalucmeg ti lasagna agbalinto a nacuttong.

5 Ket isunto ti casla iti agan-ani no urnongenna ti sitatacder a trigo, ken rurosenna dagiti dawa iti tackiagna; ket isu caslanto iti maysa no agad-adas iti dawa iti tanap ti Refaim.

6 ¶ Nupay casta addanto pay la matda nga adasen nga uvas, a cas ti pananggungon ti cayo a olivo, dua wenno tallo a bunga iti catayagan a murdong ti sanga, uppat wenno lima iti caalimpatocan a cabungaan nga sanga, cuna iti APO Dios ti Israel.

7 Iti dayta nga aldaw ti tao kumitanto ti Namarsuana, ket dagiti matada agraemdanto iti Santo Ti Israel.

8 Ket dinto cumita cadagiti al-altar, aramid dagiti im-imana, ket didanto met pagdayawan dagiti inaramid dagiti ramramayna, uray pay dagiti tedteddec, wenno cadagiti ladladawan.

9 ¶ Iti dayta nga aldaw dagiti nalagda nga il-ilida casladanto cadagiti disso a nabaybay-an nga cabakiran, ken iti cangatoan a sangana, a nabaybay-anda idi iti sangoanan dagiti annac ti Israel: ket addanto idiay ti maysa a langalang.

10 Ta sica linipatam ti Dios a salacanmo, ken dica linaglagip ti bato ti pigsam, gapuna a nangimulaca cadagiti nacaay-ayo a mulmula, ket isu ti immulam cadagiti gangannaet a sarsaringit:

11 Iti aldaw ti inca panangpatubo ti mulam, ken iti agsapa pagsabongem ti bukelmo: ngem ti apit maysanto a gabsuon iti aldaw ti rigat ken leddaang nga awanan ti inanama.

12 ¶ Asipay ti adu cadagiti umili, nga agungor a cas iti panagungor dagiti baybay; ken ti panagdarison dagiti nasnacion, nga agdarisonda a cas iti panagdarison dagiti napegges nga dandanum!

13 Dagiti nasnacion agdarisonda a cas iti panagdarison dagiti adu nga dandanum: ngem ti Dios tubngarennanto ida, ket agtalawdanto nga umadayu, ken macamatdanto a cas iti taep dagiti banbantay iti sangoanan ti angin, ken cas iti agtaytayyec a banag iti sangoanan ti baggio.

14 Ket adtoy iti rumabii riribuc; ket no di pay bumigat isu awanen. Daytoy isu ti apag dagiti mangsamsam cadacami, ken ti paset dagiti mangtacaw cadacami.


CAPITULO 18




1 Asipay ti daga a linlinongan dagiti paypayac, nga adda iti labes dagiti carcarayan sadi Etiopia:

2 A agibaon cadagiti embajadores iti baybay, iti sasacayan nga alupasi cadagiti dandanum, a cunaenna, Incayo, dacayo a nasiglat a mabaon, iti maysa a nacion a naiwara ken nauckisan, iti maysa a pagilian a nacaam-amac nanipud idi damoda agpapan ita; maysa a nacion a nadasigdasig ken napayatpayatan, a ti dagada dagiti carcarayan sinamsamda!

3 Dacayo amin nga agtaeng iti lubong, ken dacayo nga agnaed iti daga, kitaenyo, intono maitay-agna ti maysa a wagayway iti rabaw dagiti banbantay; ken intono agpaguni ti tangguyob, denggenyo.

4 Ta castoy ti imbaga iti APO caniac, Agtalnaacto, ken utobecto manipud iti pagnaedac cas nalawag a pudot cadagiti natnateng, cas maysa nga ulep ti linaaw iti pudot ti panagapit.

5 Ta iti sacbay ti panagapit, intono malabesen ti panagsabong, ket ti naalsem nga uvas agluom iti sabong, putdennanto dagiti narangpaya a sangsanga babaen iti cumpay a pagputed, ket iccatennanto ken pucanennanto dagiti sangsanga.

6 Mabaybay-andanto a naurnong a maipaay cadagiti tumatayab cadagiti banbantay, ken cadagiti an-animal iti daga: ket dagiti tumatayab agyandanto cadacuada iti pannawen ti pudot, ket isuamin dagiti an-animal ti daga agyandanto cadacuada iti pannawen ti lam-ec.

7 ¶ Iti dayta a tiempo maysa a daton ti maidatagto iti APO dagiti buybuyot nga aggapu iti maysa a pagilian a naiwara ken nauckisan, ken iti umili a nacaal-alingget nanipud idi damoda agpapan ita; maysa a nacion a nadasigdasig ken napayatpayatan, a ti dagada sinamsam dagiti carcarayan, aginggana iti disso ti nagan iti APO dagiti buybuyot, ti bantay Sion.


CAPITULO 19




1 Ti dadagsen ti Egipto. Adtoy, iti APO aglugan iti nasiglat nga ulep, ken umayto idiay Egipto: ket dagiti didiosen ti Egipto agpigergerdanto iti sangoananna, ken ti puso ti Egipto marunawto iti tengngana.

2 Ket tignayecto dagiti Egipcios a bumusor cadagiti Egipcios: ket agcacabildanto tunggal maysa a maicaniwas ken cabsatna, ken tunggal maysa a maicaniwas ken caarrubana; ili a maicaniwas iti ili, ken pagarian a maicaniwas iti pagarian.

3 Ket ti espiritu ti Egipto maawanto iti tengngana; ken dadaelecto ti pinanggepda: ket umumandanto cadagiti didiosen, ken cadagiti bagbaglan, ken cadagiti managan-anito, ken cadagiti mammuyon.

4 Ket iyawatconto dagiti Egipcios iti ima ti maysa nga apo a nadawel; ket maysa a narungsot nga ari ti mangiturayto cadacuada, cuna ti Apo, iti APO dagiti buybuyot.

5 Ket macuranganto dagiti dandanum iti baybay, ket ti carayan umes-esto ken mamagaan.

6 Ket dagiti carcarayan ipaturongdanto iti adayo; ket dagiti cancanal a sarikedked umes-esto ket mamagaan: dagiti badobadoc ken dagiti tartarabang magangodanto.

7 Dagiti tantanap a carootan iti denna dagiti canal, iti ngiwat dagiti cancanal, ken amin a namulaan a taltalon iti denna dagiti cancanal, agbalindanto a namaga, maipayugpugdanto, ket awandanton.

8 Ket dagiti mangngalap agladingitdanto, ken amin dagiti agbanniit iti cancanal agdung-awdanto, ket dagiti mangiwayat iti iket cadagiti dandanum agcapuydanto.

9 Castamet dagiti agtrabaho iti sinagaysay a lino, ken dagiti agabel iti puraw a lupot, marirudanto.

10 Ket mabungbungtolto dagiti panggepda, amin dagiti agar-aramid iti pagdanuman ken pagpupocan iti ican.

11 ¶ Pudno a dagiti panguloen ti Zoan namaagda, ti patigmaan dagiti nasirib a consejero ni Faraon nagbalinda a nacuneng: casano ti panagcunayo ken Faraon, Siac ti anac ti masirib, anac dagidi cadaanan nga ar-ari?

12 Sadino ti ayanda? sadino ti ayan dagiti tattaom a mamasirib? ket ibagada coma kenca ita, ken ipacaammom coma dagiti gandat iti APO dagiti buybuyot a maipanggep iti Egipto.

13 Dagiti panguloen ti Zoan nagbalinda a maag, dagiti panguloen ti Noph naallilawda; sinulisogda pay ti Egipto, uray pay dagiti nabati cadagiti capcaputotanna.

14 Iti APO inlaocna ti maysa a nakillo nga espiritu ti tengngana: ket inyaw-awanda ti Egipto iti tunggal aramidna, a cas maysa a nabartec a tao nga agibar-ibar iti panagbaccuarna.

15 Awanto met ti aniaman nga aramid a maipaay iti Egipto, a ti ulo wenno ti ipus, ti sanga wenno ti badobadoc, a mabalinda nga aramiden.

16 Iti dayta nga aldaw ti Egipto casladanto la babbai: ket agpigergerdanto ken agbutengdanto maigapu iti panaggungon ti ima iti APO dagiti buybuyot, isu a panggunggona cadacuada.

17 Ket ti daga ti Juda agbalinto a pagbutbutngan ti Egipto, ta tunggal maysa nga agsarita ti pacaisaritaanna isu agbutengto, a gapu iti panggep iti APO dagiti buybuyot, a panggepenna a maibusor kencuana.

18 ¶ Iti dayta nga aldaw addanto lima nga il-ili iti daga ti Egipto nga agsao iti pagsasao ti Canaan, ket agsapatada ken iti APO dagiti buybuyot; ti maysa cadacuada managananto, Ti ili iti dadael.

19 Iti dayta nga aldaw addanto maysa nga altar iti APO iti tengnga ti daga ti Egipto, ken maysa nga adigi ken iti APO iti beddengna.

20 Ket maipaayto a pagilasinan ken pangsacsi ken iti APO dagiti buybuyot iti daga ti Egipto: ta umawagdanto ken iti APO a gapu cadagiti namarigat, ken isu mangibaonto ti mangisalacan cadacuada, ken maysa a cadackelan, ket isalacannanto ida.

21 Ket iti APO maipacaammonto iti Egipto, ket dagiti Egipcios maammoandanto iti APO iti dayta nga aldaw, ket agsacrificiodanto ken agidatondanto; wen, ket agcaridanto ti cari iti APO, ket tungpalendanto.

22 Ket iti APO cabilennanto ti Egipto: cabilennanto ken paimbagennanto: ket sumublidanto ken iti APO, ket isu ti pagdawatandanto, ket pasalun-atennanto ida.

23 ¶ Iti dayta nga aldaw addanto maysa a napatac a dalan nga aggapu iti Egipto nga agturong sadi Asiria, ket dagiti Asirios sumrecdanto iti Egipto, ket dagiti Egipcios iti Asiria, ket dagiti Egipcios agservidanto agraman cadagiti Asirios.

24 Iti dayta nga aldaw ti Israel isunto ti maicatlo iti Egipto ken Asiria, uray pay maysa a bendicion iti tengnga ti daga:

25 Agsipud ta iti APO dagiti buybuyot binendicionanna ida, a kinuna, Bendito coma ti ilic nga Egipto, ken Asiria nga aramid dagiti im-imac, ken Israel a tawidco.


CAPITULO 20




1 Iti tawen nga iyaay ni Tartan sadi Asdod, (idi imbaon ni Sargon nga ari ti Asiria,) ken ginubatna ti Asdod, ket innalana;

2 Iti dayta met la a tiempo iti APO nagsao iti pannacaaramat ni Isaias nga anac ni Amoz, a kinunana, Inca ket iccatem ti lupot a nakersang cadagita lomom, ket iccatem dagiti sapatos iti sacam. Ket casta ti inaramidna, a nagnagna a silalamolamo ken sacasaca.

3 Ket iti APO kinunana, Cas iti pannagna ni adipenco nga Isaias a silalamolamo ken sacasaca bayat iti tallo a tawen a maipaay a pagilasinan ken pacasdaawan a maipanggep iti Egipto ken iti Etiopia;

4 Castanto ti ari ti Asiria ipanawna dagiti Egipcios nga balud, ken dagiti nacawayan ti Etiopia, agtutubo ken lallacay, silalamolamo ken sacasaca, uray pay awan ti abbong ti patongda, a pacaibabainan ti Egipto.

5 Ket agbutengdanto ken mabaindanto iti Etiopia nga inanamada, ken iti Egipto a dayagda.

6 Ket dagiti agnaed iti daytoy a daga cunaendanto iti dayta nga aldaw, Adtoy, castoy ti nanginanamaantayo, a nagcamangan tapno maispaltayo iti ari ti Asiria: ket casano ti panagtalawtayo?


CAPITULO 21




1 Ti dadagsen a maipaay iti let-ang ti baybay. Cas ti dagiti alipugpug iti abagatan lumabasda; casta daydiay aggapu iti let-ang, aggapu iti nacaam-amac a daga.

2 Maysa a nacalcaldaang a sirmata ti naipalawag caniac; ti manangliliput a tao agaramid a sililiput, ket ti managdadael agdadael. Sumang-atca, O Elam: lumacubca, O Media; amin a sainnecmo pinasardengco.

3 Gapuna a napno dagiti lomoc iti tuoc: dagiti ut-ut ginemgemandac, a cas ut-ut ti maysa a babai iti panagpasical: naparucobac ti pannacangegco; addaac a sicucullayaw idi casta a makitac.

4 Ti pusoc agkibbayo, ti buteng kinigtotnac: ti rabii a ragsacco pinagbalinna a buteng caniac.

5 Isagana ti lamisaan, isaadda ti agwanawan, mangan, uminum: tumacder, dacayo a pangpanguloen, ken sapsappoanyo ti calasag.

6 Castoy ti kinuna ti Apo caniac, Inca, mangisaadca iti maysa nga agwanawan, ibagana coma ti makitana,

7 Ket nakitana ti maysa a lugan agraman sicacabalyo a tattao a sagdudua caabay, maysa a lugan dagiti asno, maysa a lugan dagiti camello; ket timudenna a sia-agawa unay ken sia-annad:

8 Ket isu nagpuccaw, Maysa a leon: Apoc, agtacderac nga cancanayon iti rabaw ti pagwanawanan iti aldaw, ket maisaadac nga agbantay nga agpatpatnag iti rabii:

9 Ket, adtoy, sumungad ti maysa a buyot dagiti tattao, sicacabalyo a tattao a sagdudua caabay. Ket isu simmungbat ket kinunana, ti Babilonia narban, narban; ket amin dagiti kinitikitan a ladladawan dagiti didiosna binurburacna a naipadaga.

10 O sica pagtaltagac, ken ti bukel iti cadsaarac: daydiay a nangngegco iti APO dagiti buybuyot, ti Dios ti Israel, impaduyacyacco kenca.

11 ¶ Ti dadagsen a maipaay iti Duma. Umaw-awag caniac manipud Seir, Agwanawan, adda aniaman iti rabii? Agwanawan, adda aniaman iti rabii?

12 Ti agwanawan simmungbat, Ti bigat sumungad, ket casta met ti rabii: no cayatyonto ti dumamag, dumamagca: agsublica, ket umayca.

13 ¶ Ti dadagsen a maipaay iti Arabia. Iti cabakiran ti Arabia ti pagdagusanyonto, O dacayo nga agdaldaliasat nga bunggoy a taga Dedanim.

14 Dagiti agtataeng iti daga ti Tema inyeganda ti danum ti sinoman a mawaw, agraman tinapayda cadagiti nagtalaw.

15 Ta intalawanda dagiti campilan, dagiti naasut a campilan, ken ti sibibiat a ba-i, ken iti kinaranggas ti gubat.

16 Ta castoy ti kinuna iti APO caniac. Iti bayat ti macatawen, cas mayannurot cadagiti tawen ti maysa a mangmangged, amin a dayag ti Cedar maawanto:

17 Ket ti matidda iti bilang dagiti pumapana, dagiti maingel a tattao cadagiti annac ti Cedar, maibusdanto: ta ti APO Dios ti Israel insaonan.


CAPITULO 22




1 Ti dadagsen ti tanap ti sirmata. Ania aya ti napasamac kenca ita, ta nacaulican a naananay cadagiti toctoc ti balay?

2 A napnocan iti ariwawa, maysa a naariwawa nga ili, maysa a narag-o a ili: dagiti napapatay kenca saanda a napapatay iti campilan, wenno natayda iti gubat.

3 Amin dagiti agtuturaymo ket nagtalawda a nagcucuyog, rineppet ida dagiti pumapana: amin a nasaracan kenca nareppetda a nagtitipon, dagidiay nagtalaw iti adayu.

4 Gapuna a kinunac, Ibaw-ingyo ti ikikitayo caniac; agsangitacto iti napait unay, dicayo agbannog a mangliwliwa caniac, a gapu iti pannacarbec iti anac a babbai ti ilic.

5 Ta isu ti maysa nga aldaw ti pannacariribuc, ken ti pannacaibaddebaddec, ken ti pannacacumicum nga aggapu iti Apo DIOS dagiti buybuyot iti tanap ti sirmata, pannacarba dagiti bacud, ken panagsangit cadagiti banbantay.

6 Ket ti Elam innalana ti taguban agraman luglugan dagiti tattao ken tattao a sicacabalyo, ket ti Kir iniccatna ti abbong ti calasag.

7 Ket maaramidto, a dagiti tanapmo a casayaatan mapnodanto cadagiti luglugan, ket dagiti tattao a sicacabalyo naggu-urnosdanto iti ruangan.

8 ¶ Ket iniccatna ti abbong ti Juda, ket sica sinukimatmo iti dayta nga aldaw iti pagidulinan cadagiti ig-igam idiay balay ti cabakiran.

9 Ket nakitayo dagiti gutbaw ti ili ni David, nga aduda: ken inurnongyo dagiti dandanum ti nababbaba a tangke.

10 Ket binilangyo dagiti balbalay ti Jerusalem, ket rinacracyo dagiti balbalay a pangpalagda iti bacud.

11 Nagaramidcayo met ti maysa a canal iti baet dagiti dua a bacud a maipaay nga danum ti daan a tangke: ngem dicayo kimmita iti daydiay a namarsua itoy, ket dicayo met pinadayawan daydiay a nangaramid itoy idi nabayagen a tiempo.

12 Ket iti daydiay nga aldaw ti Apo DIOS dagiti buybuyot nangayab iti panagsangit, ken iti panagdung-aw, ken ti panagcalvo, ken ti panagbarikes iti lupot a nakersang:

13 Ket adtoy ti rag-o ken ragsac, ti panangparti ti baca, ken panangpapatay dagiti carcarnero, pannangan iti lasag, ken panaginum iti arac: mangantayo ken uminumtayo; ta intono bigat mataytayto.

14 Ket naipaltiing cadagiti lapayagco iti APO dagiti buybuyot, Pudno a daytoy a kinadangkes saan a mapacawan cadacayo agingga iti mataycayo, cuna ti Apo DIOS dagiti buybuyot.

15 ¶ Castoy ti cuna ti Apo DIOS dagiti buybuyot, Inca, dumanonca itoy a tesorero, nga isu met laeng idiay Sebna, a pangulo ti balay, ket cunaem,

16 Ania ti aramidem ditoy? ken asino ti cadduam ditoy, a nangabutca ditoy iti maysa a tanem a maipaay kenca, a cas iti maysa a nangabut ti tanem a nangato, ken nangcungcong iti maysa a pagtaengan a maipaay kencuana iti uneg ti bato?

17 Adtoy, iti APO ipanawnacanto babaen ti nabileg a pannacacayaw, ket pudno a calubannacanto.

18 Patayyekennacanto a pudno unay ken ipallangatocnaca a cas maysa a bola iti maysa a nalawa a daga: idiayto ti pacatayam, ken idiay dagiti luglugan ti dayagmo isudanto ti pacaibabainan ti balay ni apom.

19 Ket iccatencanto manipud iti saadmo, ken manipud iti pagtaengam guyodennacanto.

20 ¶ Ket maaramidto iti dayta nga aldaw, nga ayabacto ni adipenco nga Eliakim nga anac a lalaki ni Hilcias:

21 Ket isu cawesacto iti pagan-anaymo, ken papigsaecto babaen iti barikesmo, ken iyawatconto ti turaymo cadagiti imana: ket agbalinto nga ama cadagiti agnaed sadi Jerusalem, ken iti balay ni Juda.

22 Ket ti tulbec iti balay ni David iparabawconto iti abagana; ket isu luctannanto, ket awanto ti mangirikep; ket ripcannanto, ken awanto ti mangilucat.

23 Ket isu ipasocconto a cas maysa a lansa iti natalged a disso; ket isunto ti nadayag a trono ti balay ni amana.

24 Ket ibitindanto kencuana ti amin a dayag ti balay ni amana, putotna ken ti caputotanna, isuamin nga alicamen a babassit, manipud cadagiti alicamen a copa, uray pay agingga cadagiti amin a alicamen a frascona.

25 Iti dayta nga aldaw, cuna iti APO dagiti buybuyot, ti lansa a naipasoc iti natalged a disso agsaltonto, ket maputedto, ket matnagto; ket ti awit nga adda iti rabawna maiccatto: ta ti APO ket sinaonan.


CAPITULO 23




1 Ti dadagsen ti Tiro. Aganug-ogcayo, dacayo nga sasacayan ti taaw iti Tarsis; ta isu narban, iti casta nga awananen iti balay, awanen iti sercan: manipud iti daga ti Kittim isu ti maipacdaar cadacuada.

2 Agulimeccayo, dacayo nga aggigian iti igid ti taaw; sica a dagiti agtagtagilaco ti Sidon, a bumallasiw iti taaw, pinadackeldaca.

3 Ken cadagiti dadackel a dandanum ti bin-i ti Shihor, ti apit ti carayan, isu idi ti gunggonana; ken isu idi ti paglaclacoan dagiti nasnacion.

4 Mabainanca, O Sidon: ta ti taaw insaonan, uray pay ti sarikedked ti taaw, kinunana, Saannac a nagpasical, wenno naganacac, wenno nagtarakenac cadagiti agtutubo a lallaki, wenno nagtagibinac cadagiti birhen.

5 Cas intono dumteng ti damag sadi Egipto, iti casta lumdaangdanto nga nacaro a gapu iti damag ti Tiro.

6 Lumabascayo sadi Tarsis; agdung-awcayo, dacayo nga agtaeng iti igid ti taaw.

7 Isu daytoy aya ti naragsac nga iliyo, a ti kinalacayna aggapu cadagiti al-aldaw idi ugma? a dagiti sacsacana met laeng isu ipanda nga aggangannaet iti adayu.

8 Asino ti nangbalacad itoy a maibusor iti Tiro, ti agbalbalangat nga ili, a dagiti agtagtagilaco kencuana piprincipeda, a dagiti pagbaniagaenna isuda dagiti natatacneng a tattao iti daga?

9 Iti APO dagiti buybuyot pinanggepna, a mulitanna iti kinatangsit ti amin a dayag, ken mangyeg iti pannacaumsi cadagiti isuamin a natacneng ditoy daga.

10 Lumabasca a lasatem ti dagam a cas iti carayan, O anac a babai ti Tarsis: ta awanen a pulos ti pigsa.

11 Isu inyunnatna ti imana iti rabaw ti taaw, ginunggonna dagiti pagpagarian: iti APO nangited ti bilin a maipanggep iti agtagtagilaco nga ili, a mangdadael cadagiti sarikedkedna.

12 Ket kunana, Dicanto agrag-on, O naparigat a birhen, anac a babai ti Sidon: tumacderca, bumallasiwca sadi Kittim; uray pay idiay awanto ti inanam.

13 Adtoy ti daga dagiti Caldeo; daytoy nga ili napucaw, agingga ti binangon ti Asirio a maipaay cadagiti agnaed iti let-ang: pinatacderda dagiti torreda, binangonda dagiti palaciona; ket isu rinebbana.

14 Aganug-ogcayo, dacayo a sasacayan ti Tarsis: ta naduprac ti sarikedkedyo.

15 Ken maaramidto iti dayta nga aldaw, a ti Tiro malipatanto bayat iti pitopulo a tawen, cas mayannurot cadagiti al-aldaw ti maysa nga ari: iti calpasan dagiti pitopulo a tawen iti Tiro agcantanto cas ti balangcantis.

16 Mangalaca iti maysa nga arpa, inca licmuten ti ili, sica balangcantis a nalipatan; agtocarca iti nasam-it, agcantaca cadagiti adu a cancanta, tapno malagipdaca.

17 ¶ Ket maaramidto calpasan dagiti pitopulo a tawen, a iti APO sarungcarannanto ti Tiro, ket isu agsublinto iti pakitangdananna, ken makicamalalanto cadagiti isuamin a pagpagarian ti lubong iti rabaw ti daga.

18 Ket ti tagilacona ken tangdanna isudanto ti kinasanto ken iti APO: isu dinto maidulin ken maurnong; ta ti tagilacona maipaayto cadagiti agtaeng iti sangoanan iti APO, a canenda nga nawadwad, ken maipaay iti napaot a pagan-anay.


CAPITULO 24




1 Adtoy, iti APO aramidenna ti daga nga awan nagyanna, ken aramidenna a langalang, ken balictadenna, ken iwarawarana dagiti agnaed kencuana.

2 Ket castanto, a no casano iti umili, casta met iti padi; no casano iti adipen, casta met iti apona; no casano iti tagabu a babai, casta met iti apona a babai; no casano iti aggatang, casta met iti aglaco; no casano iti mamautang, casta met iti umutang; no casano iti manggun-od iti anac ti piracna, casta met iti mangted iti anac ti pirac kencuana.

3 Ti daga matalipupusto nga awan ti nagyanna, ken matalipupus nga aglangalang: ta ti APO insaona daytoy a sao.

4 Ti lubong agdung-aw ken aglabas, ti lubong malpes ken aglabas, dagiti nangato a tattao ti daga malpesdanto.

5 Ti lubong met narugitan babaen cadagiti agtaeng kencuana; agsipud ta naglabsingda cadagiti linteg, binaliwanda dagiti bilbilin, rinacracda ti agnanayon a tulag.

6 Gapuna a ti panangilunod inalun-onna ti daga, ken dagiti agtaeng kencuana nasaracan ida a langalang: gapuna a dagiti agnaed iti daga mapuoranda, ket bassit a tattao ti natda.

7 Ti baro nga arac agdung-aw, ti cayo ti uvas malpes, amin dagiti naragsac a puso agsainnecda.

8 Ti ragsac ti pandereta agsardeng, ti daranudor dagiti agragrag-o aggibus, ti ragsac ti arpa agsardeng.

9 Didanto uminum iti arac a buyogan ti maysa a canta; ti naingel nga inumen napaitto cadagiti manginum kencuana.

10 Ti ili nga nariru narsuoden: tunggal balay naripcan, tapno awan ti tao a macastrec.

11 Adda maysa a panagickis a gapu iti arac cadagiti lanlansangan; amin a rag-o agcudrep, ti ragsac ti daga pimmanawen.

12 Idiay ili nabatin iti panaglangalang, ket ti ruangan naracraken iti pannacadadael.

13 ¶ Ta castoyto iti tengnga ti daga cadagiti umili, addanto ti cas pannacagungon ti maysa a cayo nga olivo, ken cas iti panagad-adas cadagiti bungbunga ti uvas no ti panagburas nalpasen.

14 Dagitoy idackeldanto ti timecda, agcantadanto a maipaay iti kinadayag iti APO, agickisdanto iti natbag manipud iti baybay.

15 Gapuna nga idaydayawyo iti APO cadagiti apuy, uray iti nagan met laeng iti APO Dios ti Israel cadagiti purpuro ti taaw.

16 ¶ Manipud caadayuan a paset ti daga nacangngegcami cadagiti cancanta, uray dayaw iti nalinteg. Ngem kinunac, Ti kinacuttongco, ti kinacuttongco, asiac pay! ti manangliliput agaramid a sililiput unay; wen, ti manangliliput agaramid a sililiput unay.

17 Ti buteng, ken ti dariwangwang, ken ti silo, naiparabawda kenca, O agnaed iti daga.

18 Ket maaramidto, a ti agtalaw nga gapu iti daranudor ti buteng matnagto iti dariwangwang; ket ti rummuar iti tengnga ti dariwangwang masilloanto: ta dagiti tawa sadi ngato nalucatanda, ken dagiti pamuon ti daga agkintayegda.

19 Ti daga maburac a matalipupus, ti daga narunaw nga naan-anay, ti daga nagunggon iti napigsa unay.

20 Ti daga agbarbariringto a cas maysa a tao a nabartec, ken maiyalisto a cas maysa nga pagbalayan; ket dagiti labsingna nadagsento kencuana; ket mapasagto, ket saanto a bumangonen.

21 Ket maaramidto iti dayta nga aldaw, a iti APO dusaennanto ti buyot dagiti nangangato nga adda iti ngato, ken dagiti ar-ari ti daga iti rabaw ti daga.

22 Ket maurnongdanto a natipontipon, a cas cadagiti balbalud a maurnong iti dariwangwang, ken mapupocdanto iti pagbaludan, ket iti calpasan dagiti adu nga al-aldaw masarungcarandanto.

23 Idin ti bulan mariribucto, ken ti init mabainto, intono ti APO dagiti buybuyot agarinto idiay bantay Sion, ken sadi Jerusalem, ken iti sangoanan dagiti panglacayenna a sidadayag.


CAPITULO 25




1 O APO, sica ti Diosco; sica ti itan-occo, dayawecto ti naganmo; ta nagaramidca cadagiti nacascasdaaw nga banbanag; dagiti pammatigmaanmo idi ugma isuda iti kinamatalec ken kinapudno.

2 Ta inaramidmo ti ili a maysa a gabsuon; ti maysa a nasarikedkedan nga ili iti pannacarba: ti maysa a palacio dagiti gangannaet a saanen nga ili; isu saanto a mabangonen uray caano.

3 Gapuna a ti ili a napigsa idaydayawnaca, ti ili dagiti nacaal-allingget a nasnacion agbutengto kenca.

4 Ta sica ti sarikedked ti napanglaw, maysa a sarikedked ti addaan pannacasapul iti pacarigatanna, maysa a pagcamangan iti baggio, maysa a paglinongan iti pudot, intono ti pagbanagan dagiti nacaal-allingget a tattao isu ti cas maysa a baggio a bumusor iti bacud.

5 Pagtalnaemto ti daranudor dagiti gangannaet, cas iti pudot iti maysa a disso a namaga; uray iti pudot ti anniniwan ti ulep: ti sanga dagiti nacaal-allingget a tattao maipababanto.

6 ¶ Ket iti daytoy a bantay iti APO dagiti buybuyot agaramidto cadagiti amin nga inilin-ili iti maysa a rambac dagiti nalucmeg a banbanag, maysa a rambac dagiti ar-arac cadagiti burnay, dagiti nalucmeg nga banag a napno iti pata, dagiti arac cadagiti burnay a nadalusan a naimbag.

7 Ken racrakennanto iti daytoy a bantay ti rupa ti abbong a nangabbong cadagiti isuamin nga tattao, ken ti cumot a nayaplag iti rabaw dagiti isuamin a nasnacion.

8 Isu inalimonna ni patay babaen iti balligi; ket iti Apo DIOS punasennanto dagiti lulua cadagiti isuamin a ruprupa; ket ti pacaumsian ti ilina iwacsinanto manipud iti amin a daga: ta ti APO sinaonan.

9 ¶ Ket maisaonto iti dayta nga aldaw, Adtoy, daytoy ti Diostayo; isu ti inur-uraytayo, ken isalacannatayto: isu daytoy iti APO; isu ti inur-uraytayo, agragsactayto ken agrag-otayto iti panangisalacanna.

10 Ta iti daytoy a bantay ti ima iti APO aginananto, ket ti Moab mabaddebaddecto isuna, uray cas iti garami a mabaddebaddecan nga agpaay ti turod a pagrugitan.

11 Ket isu iyunnatnanto dagiti im-imana iti nagtetengaanda, a cas ti aglanglangoy unnatenna dagiti im-imana nga aglangoy: ket ipababananto ti tangsitda a maitipon cadagiti sinamsam dagiti im-imada.

12 Ket ti sarikedked ti natayag a sarikedked dagiti bacbacudmo rebbaennanto, ipababa, ken iyegnanto aginggana iti daga, uray pay iti tapoc met laeng.


CAPITULO 26




1 Iti dayta nga aldaw macantanto daytoy a canta iti daga ti Juda; Adda cadacami ti maysa nga ili a nalagda; pacaisalacanan isaadnanto a cas bacud ken sarikedked.

2 Luctanyo dagiti ruruangan, tapno ti nalinteg a nacion a mangsalimetmet ti kinapudno macastrec.

3 Aywanamto iti naan-anay nga talna, daydiay a ti panunotna agtalinaed kenca: agsipud ta agtalec kenca.

4 Agtaleccayo ken ti APO iti agnanayon: ta ni APO JEHOVA isu ti agnanayon nga pigsa:

5 ¶ Ta imbabana dagiti agtaeng iti nangato; ti natangar nga ili, isu ti ipababana; isu ti ipababana, agingga iti daga met laeng; ket idanonna uray ti tapoc met laeng.

6 Ti saca payatpayatennanto, uray pay ti saca ti napanglaw, ken dagiti ad-addang dagiti addaan iti pannacasapul.

7 Ti dalan ti nalinteg isu ti kinalinteg: sica, a nalinteg unay, usigenna ti dalan ti nalinteg.

8 Wen, iti dalan dagiti panangocommo, O APO, nagur-uraycami kenca; ti tarigagay dagiti cararruami ket ti naganmo, ken iti pannacalaglagip kenca.

9 Itoy cararruac tinartarigagayanca iti rabii; wen, agraman iti espirituc iti unegco sapulencanto iti nasapa unay: ta intono dagiti panangocommo addada iti daga, dagiti agtaeng iti lubong masursurodanto iti kinalinteg.

10 Ti parabur maiparang coma iti nadangkes, nupay casta saan a macasursuro iti kinalinteg: iti daga ti kinalinteg agaramidto iti kinakillo, ket isu dinanto mabuya ti kinadayag iti APO.

11 APO, no ti imam maitayag, dida makita: ngem makitadanto, ket mabainandanto gapu ti imunda cadagiti tattao; wen, ti apuy dagiti cabusormo alun-onennanto ida.

12 ¶ APO, ikeddengmonto ti talna a maipaay cadacami: ta inaramidmo dagiti amin nga ar-aramid cadacami.

13 O APO a Diosmi, dagiti dadduma nga appo a saan a sica inturayandacami idi: ngem gapu kenca laeng saritaenminto ti naganmo.

14 Natnataydan, didanto agbiagen; nataydan, didanto bumangonen: gapuna a sinarungcaram ken dinadaelmo ida, ken pinucawmo amin a panglaglagipanen cadacuada.

15 Sica pinadackelmo ti nacion, O APO, sica pinadackelmo ti nacion: sica maitantan-occa: sica iniccatmo ida ti adayo agingga ti pungpungto iti daga.

16 APO, iti pannacariribuc sinucnalandaca, nagibucbocda iti cararag idi adda cadacuada ti panangdusam.

17 Cas iti maysa a babai a masicog, nga umadani ti oras ti panagpasngayna, nga addaan iti panagut-ut, ken agickis iti panagpasicalna; casta ti panagtalinaedmi idi iti sangoanam, O APO.

18 Nagsicogcami, nagut-utcami, dacami cascami la nangipasngay iti angin; dicami nangaramid iti aniaman a pannacaispal iti daga; ket dagiti agnaed iti lubong dida met napasag.

19 Dagiti minataymo agbiagdanto, a caraman ti bangcayco bumangondanto. Agriingcayo ken agcantacayo, dacayo nga agnanaed iti tapoc: ta ti linnaawmo casla iti linnaaw dagiti natnateng, ket ti daga iruarnanto dagiti natnatay.

20 ¶ Umayca, ilic, sumrecca cadagiti siledmo, ket ripcam dagiti ruangan a maipaay kenca: aglemmengca iti bassit a cas apagcanito, agingga ti pungtot masibet.

21 Ta, adtoy, iti APO rummuarto iti lugarna tapno mangdusa cadagiti agnaed iti daga a gapu iti kinadangkesda: ti daga lucasannanto met ti darana, ket uray caano dinanto abbonganen dagiti napapatay a cucuana.


CAPITULO 27




1 Iti dayta nga aldaw iti APO babaen ti nasakit ken dackel ken napigsa a campilanna dusaennanto ti leviatan ti mangsalput nga uleg, uray iti leviatan ti killokillo nga uleg; ken papatayennanto ti dragon nga adda iti baybay.

2 Iti dayta nga aldaw icantaanyo isuna, Maysa a cauvasan ti nalabbaga nga arac.

3 Siac iti APO nga agaywan kencuana; sibugacto iti tunggal canito: di la ket ta adda mangranggas kencuana, isu aywanacto iti rabii ken aldaw.

4 Ti pungtot awan caniac: asino ti mangicabil dagiti casumba ken calunay tapno bumusorda caniac iti gubat! Pagnaac iti tengada, puorac ida nga agtitipon.

5 Wenno isu cumpet coma iti pigsac, tapno makicappia coma caniac; ket isu makicappia caniac.

6 Pagbalinennanto a dagiti aggapu ken ni Jacob agramutto: ti Israel agsabongto ken agbuselto, ken punnoendanto ti rabaw ti amin a lubong cadagiti bunga.

7 Kinabilna ida aya, iti cas panangcabilna cadagidi nangcabil cadacuada? wenno napapatayda aya a cas iti pannacapapatay dagiti pinapatayda?

8 Iti maitutop, intono tumubo, makisusicca cadacuada: isu italinaedna ti napigsa a daranudorna iti aldaw ti angin ti daya.

9 Ngarud gapu itoy ti kinadangkes ni Jacob maguguranto; ken daytoy amin ti bunga ti panangiccat iti basolna; intono aramidenna amin dagiti batbato ti altar a cas tisa a narumrumec, dagiti tedteddec ken dagiti ladladawan didanto tumacderen.

10 Nupay casta ti ili nga nasarikedked agwaywayasto, ken dagiti pagnaedan nabaybay-an, ken nabati a cas ti let-ang: idiay agarabto ti urbon ti baca, ken agiddanto idiay, ken arabenna dagiti sangana.

11 Intono dagiti sangana magangoda, masep-acdanto: dagiti babbai umaydanto, ket puoranda ida: ta isu ti umili nga awan ti pannacaawatna: gapuna a ti nangaramid cadacuada awanto ti caasina cadacuada, ken ti nangbukel cadacuada dinanto ipakitaan ida iti parabur.

12 ¶ Ket maaramidto iti dayta nga aldaw, a iti APO ablatannanto manipud iti ayus ti carayan agingga iti waig ti Egipto, ket dacayo maurnongcayto a saggaysa, O dacayo nga annac ti Israel.

13 Ket maaramidto iti dayta nga aldaw, a ti maysa a tangguyob a dackel mapuyotto, ket umaydanto dagiti nganngani napucaw idiay daga ti Asiria, ken dagiti naibelleng idiay daga ti Egipto, ken agdayawdanto ken iti APO idiay nasantoan a bantay sadi Jerusalem.


CAPITULO 28




1 Asi pay ti balangat ti kinatangsit, cadagiti managbarbartec ti Efraim, a ti dayag iti pintasda ket cas ti malaylaylay a sabong, nga adda iti uloanan ti nataba a tanap dagiti adda a maitublac iti arac!

2 Adtoy, ti Apo addaan maysa a mannacabalin ken napigsa, cas maysa a baggio ti uraro ken maysa a baggio a mangracrac, cas iti layus dagiti dandanum a napegges nga aglippias, casta ti panangigarangugongna iti daga babaen iti imana.

3 Ti balangat ti kinatangsit, cadagiti managbarbartec ti Efraim, mapayatpayatdanto iti baba ti saca:

4 Ken ti nadayag a pintas, nga adda iti uloanan ti nataba a tanap, malaylayto a sabong, isunto ti casla iti nasapa a bunga sacbay iti calgaw; isu nga intono ti macakita kencuana mingminganna, iti bayat ti panangig-iggemna pay laeng isu canenna.

5 ¶ Iti dayta nga aldaw iti APO dagiti buybuyot agbalinto a balangat ti dayag, ken diadema ti kinaimnas, nga agpaay ti tidda iti ilina,

6 Ken maysa nga espiritu ti kinajusticia iti daydiay agtugaw iti panangocom, ken pigsa cadagiti mamagtuckiad iti gubat iti ruangan.

7 ¶ Ngem uray pay dagitoy a nagbiddut gapu iti arac, ken agibar-ibarda gapu iti naingel nga inumen; ti padi ken ti mammadto nagbiddutda gapu iti naingel nga inumen, addada nga inalun-on ti arac, agibar-ibarda gapu iti naingel nga inumen; bumiddutda iti panagkita, agtibcolda iti panangocom.

8 Ta amin dagiti lamisaan napnoda iti sarrua ken kinarugit, iti casta awan ti disso a nadalus.

9 ¶ Asino ti sursuroannanto iti pannacaammo? ken asino ti pangipaawatannanto iti sursuro? dagiti aya napusot iti gatas, ken naisina cadagiti suso?

10 Ta ti allagaden a mainayon iti allagaden, allagaden a mainayon iti allagaden; uged iti rabaw ti uged, uged iti rabaw ti uged; sangcabassit ditoy, sangcabassit idiay:

11 Ta babaen iti agtattatel nga bibbibig ken sabali a pagsasao ti pakisaonanto iti daytoy nga umili.

12 Isu a nagcunaanna, Daytoy ti inana nga itedyonto iti daydiay nabannog tapno aginana; ken isu daytoy ti pacabang-aran: nupay casta dida kinayat a dinengngeg.

13 Gapuna a ti sao iti APO isunto ti allagaden a mainayon iti allagaden, allagaden a mainayon iti allagaden; uged iti rabaw ti uged, uged iti rabaw ti uged; sangcabassit ditoy, sangcabassit idiay; tapno mapanda, ken maliadda a mapasag, ket mabettacda, ken masiloanda, ket matiliwda.

14 ¶ Gapuna a denggenyo ti sao iti APO, dacayo a managuyaw, a mangituray itoy nga umili nga adda iti Jerusalem.

15 Agsipud ta kinunayo, Dacami nakitulagcami ken patay, ken nakinumocami ken ni impierno; intono lumasat ti aglayus a saplit, dinto dumteng cadacami: ta inaramidmi dagiti kinaulbod a pagcamanganmi, ken iti siroc ti kinatiri naglemmengcami:

16 ¶ Gapuna a castoy ti cuna ni Apo DIOS, Adtoy, isaadco idiay Sion ti maysa a bato a maipaay a pamuon, maysa a napadas a bato, maysa a napateg a bato a pasuli, natibker a pamuon: ti mamati saanto nga agganat.

17 Ken aramidecto ti kinajusticia iti uged, ken ti kinalinteg iti tinnag: ket ti uraro itayabnanto ti pagcamangan dagiti kinaulbod, ket dagiti dandanum layusendanto ti paglemmengan.

18 ¶ Ket ti pannakitulagyo ken patay maawanto, ken ti pannakinumoyo ken ni impierno dinto agtalinaed; intono lumasat ti aglayus a saplit, dacayo mapayatpayatcayonto gapu kencuana.

19 Manipud iti tiempo nga ilalasatna alaennacayto: ta biniganbigat a lumasatto, iti aldaw ken iti rabii: ket pacacumicumanto laeng iti daydiay a macaawat iti maibaga.

20 Ta ti pagiddaan ab-ababa ngem iti daydiay tao nga agunnat kencuana: ket ti pagcumot ac-akikid ngem iti daydiay rucod iti maiyules kencuana.

21 Ta iti APO tumacderto a cas idiay bantay Perasim, macapungtotto cas idiay tanap sadi Gabaon, tapno maaramidna ti aramidna, ti aramidna a datdatlag; ken palabasenna ti aramidna, ti aramidna a datdatlag.

22 Ita ngarud dicayo aguy-uyaw, di la ket ta mapairut dagiti galutyo: ta nangngegco manipud iti Apo DIOS dagiti buybuyot iti pannacaalun-on, a naituding uray pay iti amin nga daga.

23 ¶ Timudenyo dagiti lapayagyo, ken denggenyo ti timecco; dumngegcayo, ket denggenyo ti saoc.

24 Ti mangarado agarado iti sangka-aldaw tapno agmula? dina cadi luctan ken pac-olan ti dagana?

25 Intono mapalanasna ti rabawna, dinanto aya iwaris dagiti neguillas, ken ipurruac ti bukel ti comino, ken ilumlom ti trigo a binatbatog ken nadutocan a cebada ken espelta cadagiti dissoda?

26 Ta ti Diosna ket isurona kencuana ti maiparbeng, ken idalanna isuna.

27 Ta dagiti neguillas saan ida nga iriken iti paglebbec nga al-o, ket saanto met a maitulid iti rabaw ti comino ti pilid ti carison; no di ket dagiti neguillas mabatbatda iti maysa a bislac, ket ti comino iti maysa a pang-or.

28 Ti bukel nga aramiden a tinapay isu ti gilingen; ta isu ti saan a lebbeken a cancanayon, wenno buraken ti pilid ti carisonna, wenno dunoren dagiti tattaona a nagcabalyo.

29 Daytoy agtaud met laeng ken ti APO dagiti buybuyot, isu a nacacasdaaw a mamalacad, ken natarnaw iti panagar-aramidna.


CAPITULO 29




1 Asipay ni Ariel, ni Ariel, ili a nagnaedan idi ni David! pagnanayonenyo ti tawen ken tawen; bay-am a patayenda dagiti datdaton.

2 Nupay casta parigatecto ti Ariel, ket addanto panagdung-aw ken panagasug: ket casdiaynacto a cas ken ni Ariel.

3 Ken agpacarsoacto iti aglicmut a bumusor kenca, ken lacubencanto cadagiti naisaad a buybuyot, ken mangipatacderacto iti pagsalindegan a maibusor kenca.

4 Ket sica maipababacanto, ken agsaocanto manipud iti daga, ket ti saom tumpuarto iti tapoc, ket ti timecmo caslanto, casla timec ti maysa nga baglan, timpuar nanipud iti daga, ket ti saom agarasaasto a sumngaw iti tapoc.

5 Nayonna ket dagiti kinaadu a gangannaetmo agbalindanto a casla namayecmec a tapoc, ken ti kinaadu dagiti nacaam-amac casda la taep a pumanaw: wen, isu ti mapasamacto a kellaat iti apagdaricmat.

6 Sarungcarannacanto iti APO dagiti buybuyot a buyogan dagiti gurruod, ken gingined, ken dackel a daranudor, cadagiti alawig ken baggio, ken ti darang ti mangrunaw nga apuy.

7 ¶Ken ti kinaadu dagiti amin a nasnacion a manggubat iti Ariel, isuamin a manggubat kencuana ken iti sarikedkedna, ken dayta mamarigat kencuana, isudanto ti cas maysa a tagtagainep ti parparmata iti rabii.

8 Ket caslanto la iti panagtagtagainep ti tao a mabisin, ket, adtoy, isu mangan; ngem mariing, ket ti cararruana ongaong: wenno casla iti panagtagtaginep ti mawaw a tao, ket, adtoy, isu uminum, ngem agriing, ket, adtoy, isu mapacsuyan, ket ti cararruana mabisin: castadanto amin dagiti umariwecwec a nasnacion, a manggubat a maibusor iti bantay Sion.

9 ¶ Agtactaccayo, ken agsiddaawcayo; agickiscayo, ken agickis: nabartecda, ngem saan nga iti arac; agibar-ibarda, ngem saan nga iti naingel nga inumen.

10 Ta iti APO imbucbocna cadacayo ti espiritu ti nargaan a turog, ken pinagkidemna dagiti matmatayo: dagiti mammadto ken dagiti panguloenyo, dagiti macakita iti masacbayan inabbonganna.

11 Ken amin a sirmata nagbalin cadacayo a cas cadagiti sasao ti maysa a libro a naselloan, nga inyawat dagiti tattao iti maysa a nasursuroan, a kunada, Basaem daytoy, dawatec kenca: ket isu kunana, Diac mabalin; ta naselloan:

12 Ket ti libro nayawat iti daydiay saan a nasursuroan, a kunada, Basaem daytoy, dawatec kenca: ket isu kunana, Saanac a nasursuroan.

13 ¶ Gapuna ti Apo kinunana, Agsipud ta daytoy nga umili umasidegda caniac cadagiti ngiwatda, ken cadagiti bibigda dayawendac, ngem iniccatda dagiti pusoda iti adayu caniac, ken ti panagbutengda caniac naisuro babaen ti allagaden dagiti tattao:

14 Gapuna, adtoy, irugic nga aramiden ti maysa a nacascasdaaw nga aramid iti tengnga daytoy nga ili, maysa met laeng a nacascasdaaw nga aramid ken datdatlag: ta ti kinasirib dagiti tattaoda a mamasirib mapucawto, ken ti pannacaawat dagiti tattaoda a manakem mailemmengto.

15 Asi pay dagiti nauneg ti panagbirocda tapno ilemmengda dagiti patigmaanda iti imatang iti APO, ket dagiti ar-aramidda addada iti sipnget, ken kunada, Asino ti macakita cadacami? ken asino ti macaammo cadacami?

16 Kinapudnoanna iti panangbalinsuekyo dagiti ban-banag mapatganto a cas ti pila ti agdamdamili: ta ti naaramid cunaenna ngata iti daydiay nangaramid kencuana, Isu saannac nga inaramid? wenno ti banag a nabukel cunaenna ngata iti nangbukel kencuana, Isu awan ti pannacaawatna?

17 Saan aya a bassit pay la a canito, ket ti Libano agbalinto a maysa a nabunga a talon, ken ti nabunga a talon mapatganto a cas bakir?

18 ¶ Ket iti dayta nga aldaw ti tuleng mangngegnanto dagiti sasao ti libro, ken dagiti mata ti bulsec macakitadanto manipud iti kinalidem, ken kinasipnget.

19 Dagiti met naemma dumackelto ti rag-oda ken iti APO, ket dagiti napanglaw iti tengnga dagiti tattao agragsacdanto iti Santo Ti Israel.

20 Ta ti nacaam-amac a tao mapucaw, ken ti managuyaw maibus, ken amin dagiti nasalucag a maipaay iti kinadangkes makeltaydan:

21 Dagiti mangpabasol iti maysa a tao iti maysa laeng a sao, ken mangipacat iti silo daydiay a mangtubngar idiay ruangan, ken killoenna ti nalinteg iti maysa a banag nga ubbaw.

22 Gapuna a castoy ti cuna iti APO, a nanubbot ken Abraham, a maipapan iti balay ni Jacob, ni Jacob saanto itan a maibabain, ket ti rupana ita saanto metten a bumsag.

23 Ngem intono makitana dagiti annacna, nga aramid dagiti im-imac, iti tengngana, santificarendanto ti naganco, ken santificarendanto ti Santo Ni Jacob, ken agbutengdanto iti Dios ti Israel.

24 Dagidiay a naallilaw iti espiritu umaydanto iti pannacaawat, ken dagidiay nagtanabutob awatendanto ti sursuro.


CAPITULO 30




1 Asida pay dagiti annac a nasukir, cuna iti APO, nga umawat iti patigmaan, ngem saan nga aggapu caniac; ken abbonganda ti maysa nga abbong, ngem saan nga iti espirituc, tapno pagnanayonenda ti basol ken basol:

2 Nga agrubbuatda a sumalog idiay Egipto, ket dida nagsaludsod iti ngiwatco; tapno bumilegda iti bileg ni Faraon, ken agcamangda iti salinong ti Egipto!

3 Gapuna a ti bileg ni Faraon isunto ti pacaibainanyo, ken ti panagcamang iti salinong ti Egipto isunto ti riribucyo.

4 Ta dagiti panguloenda addada sadi Zoan, ken dagiti embajadorda dimmanonda sadi Hanes.

5 Mababaindanto amin gapu iti ili a saan nga macagunggona cadacuada, wenno macatulong wenno macagunggona, no di ket pacabainan, ken pacaumsian pay.

6 Ti dadagsen dagiti an-animal ti abagatan: iti daga ti riribuc ken cumicum, a pagtaudan ti ubing a leon ken lumacayen a leon, ti carasaen ken ti narungsot nga uleg nga agtayab, ipaawitda dagiti kinabacnangda iti abaga dagiti urbon nga asno, ken dagiti gamengda iti bucot dagiti camello, nga agpaay iti maysa nga ili a saanto nga macagunggona cadacuada.

7 Ta ti Egipto tumulongto nga ubbaw, ken awan capapaayanna: gapuna nga nagickisac gapu itoy, Ti pigsada isu ti agtugaw nga sitatalna.

8 ¶ Inca ngarud ita, isuratmo iti sangoananda iti maysa a tapi, ket ilanadmo iti maysa a libro, tapno isu ti maipaay coma iti tiempo a sumungad iti agnanayon nga awan patinggana:

9 Ta nasukir daytoy nga umili, annac a managulbod, annac a dida cayat a denggen ti linteg iti APO:

10 Nga agcuna cadagiti macakita iti masacbayan, Dicayo cumita; ken cadagiti mammadto, Dicayo mangipadto cadacami cadagiti nalinteg a banbanag, saoenyo cadacami dagiti naalumamay nga banbanag, mangipadtocayo cadagiti al-allilaw:

11 Baybay-anyo ti dalan, sinaanyo ti dan-a, pasardengenyo ti caadda ti Santo Ti Israel iti sangoananmi.

12 Gapuna a castoy ti cuna ti Santo Ti Israel, Agsipud ta uyawenyo daytoy a sao, ken agtaleccayo iti panangparigat ken kinaulpit, ken agtalinaedcayo cadagitoy:

13 Gapuna a daytoy a kinadangkes isunto cadacayo a cas maysa a gutbaw a sidadaan a margaay, lumlumteg iti nangato a bacud, a ti pannacarbana umay a kellaat iti apagdaricmat.

14 Ket burakennanto a cas pannacaburac ti maysa a caramba ti agdamdamili a narumecrumec; awanto ti iliclicna: iti casta nga awan ti masaracanto cadagiti narumec iti maysa a tipping nga pangala iti apuy iti dalican, wenno pangtaco iti danum manipud iti abut.

15 Ta castoy ti cuna ni Apo DIOS, ti Santo Ti Israel; Iti panagsubli ken panaginana maisalacancayto; iti kinatalna ken iti panagtalec isunto ti pigsayo: ngem dicayo kinayat.

16 Ngem kinunayo, Saan; ta agtalawcaminto a sicacabalyo; ngarud agtalawcayonto: ken, Agsacaycamto iti nasiglat; gapuna a dagiti mangcamat cadacayo nasiglatdanto.

17 Maysa a ribu ti agtalawto iti pananglayat ti maysa; iti pananglayat ti lima agtalawcayonto: agingga iti mabaticayo a cas maysa a farola iti tuctoc ti bantay, ken cas maysa a wagayway iti rabaw ti turod.

18 ¶ Gapuna nga agurayto iti APO, tapno paraburannacayo, ket iti casta maitan-octo, tapno isu maaddaan iti panangngaasi cadacayo: ta iti APO isu ti Dios ti kinajusticia: bendito dagiti isuamin nga agpannuray kencuana.

19 Ta dagiti umili agtaengdanto idiay Sion sadi Jerusalem: dicanto agsangiten: isu ket naparaburto unay kenca gapu iti timec ti panagsangitmo; intono mangngegna, sungbatannacanto.

20 Ket uray no inted ti Apo cadacayo ti tinapay ti pammarigat, ken ti danum ti pammaldaang, nupay casta dagiti manursurom saandanto pulos a mailemmengen kenca, no di ket dagiti matam makitadanto dagiti mannursuro kenca:

21 Ket dagiti lapayagmo macangngegdanto iti maysa a sao iti licudam, a kunana, Daytoy isu ti dalan, magnacayo kencuana, intono agturongcayo iti macanawan, ken intono agturongcayo iti macatigid.

22 Ket rugitanyonto ti calupcup a pirac dagiti kinitikitan a ladladawan, ken ti naidigus a balitoc cadagiti sinocog a ladladawan: ibellengmonto ida a cas lupot ti babai nga agcadaywan; cunaemto cadacuada, Agtalawcayo ditoy.

23 Ket isu itednanto ti tudo a maipaay iti bin-im, nga imulamto iti daga; ket ti tinapay nga agtaud iti bunga ti daga, ket isunto ti nalucmeg ken nawadwad: iti dayta nga aldaw dagiti animalmo mangandanto cadagiti nalawa a pagaraban.

24 Casta met dagiti bacbaca a lallaki ken dagiti urbon nga as-asno nga agarado iti daga mangandanto iti nananam a taraon, a nadalusan babaen ti soplad ken ti caraid.

25 Ket addanto iti rabaw ti amin a bantay a natayag, ken iti rabaw ti amin a turod a nangato, dagiti carayan ken wawaig ti dandanum iti aldaw ti dackel a panagpapatay, intono dagiti tortorre marsuodda.

26 Maysa pay ti lawag ti bulan caslanto la lawag ti init, ket ti lawag ti init maminpitonto, a cas iti lawag dagiti pito nga aldaw, iti aldaw a panangpatapat iti APO iti dunor ti ilina, ken ti panangpaimbagna cadagiti birri ti sugatda.

27 ¶ Adtoy, ti nagan iti APO sumungad nga aggapu iti adayu, nga agdardarang iti pungtotna, ken ti dadagsenna ket nabantot: dagiti bibigna napnoda iti unget, ken ti dilana isu ti cas mangrunaw nga apuy:

28 Ken ti angesna, isu ti cas maysa a layus, a danonenna ti tengnged, a manggasagas cadagiti nasnacion iti gasagasan ti kinaubbaw: ket addanto maysa a bosal cadagiti sangi dagiti tattao, a mangpaallilaw cadacuada.

29 Maaddaancayto iti maysa a canta, a cas iti rabii no ngilinen ti maysa a nasantoan a rambac; ken ragsac ti puso, cas no ti maysa mapan agraman flauta idiay bantay iti APO, iti Mannacabalin ti Israel.

30 Ket iti APO ipangngegnanto ti nagloriaan a timecna, ket ipakitananto ti kimat iti baba ti tackiagna, iti kinarungsot ti pungtotna, ken ti darang ti maysa a mangrunaw nga apuy, iti maysa a daranudor, ken baggio, ken ur-uraro.

31 Ta ti panagtimec iti APO dagiti Asirio maabacdanto, a nangcabil babaen iti pang-orna.

32 Ket ti tunggal disso a labasan nga cabilen ti sarucod, a iti APO iyablatnanto kencuana, mapacuyoganto iti aweng dagiti pandereta ken ar-arpa: ken cadagiti panagpigerger ti gubgubat makidangadangto.

33 Ta ti Tophet nadutocan pay laeng idi; wen, ta naisagana ti ari; inaramidna a nauneg ken dackel: ti gabsuonna isu ti apuy ken adu a cayo; ti sang-aw iti APO, cas ayus ti azufre, isu ti pangpasgedna.


CAPITULO 31




1 Asi pay dagiti sumalog sadi Egipto nga agpatulong; ken mangnamnama cadagiti cabcabalyo, ken agcammatalec cadagiti luglugan, agsipud ta aduda; ken cadagiti tattao a sicacabalyo, agsipud ta napigsada unay; ngem dida cumita iti Santo ti Israel, ket dida met sapulen iti APO!

2 Nupay casta isu masirib met, ket iyegnanto ti dakes, ket dinanto babawien dagiti saona: no di ket tumacder a bumusor iti balay dagiti managdacdakes, ken bumusor cadagiti tumultulong cadagiti agaramid ti kinadakes.

3 Ita dagiti Egipcios tattaoda, ket saanda a Dios; ket dagiti cabalyoda lasagda, ket saanda nga espiritu. Intono unnaten iti APO ti imana, daydiay mangtulong matnagto, ket ti matulongan mapasagto, ket isuda amin maibusdanto nga agcucuyog.

4 Ta casta ti cuna iti APO caniac, Cas ti leon ken ti urbon ti leon agngerngerda ti matiliwda, no adu dagiti agpapaarab nga naayaban a maibusor kencuana, saanto nga agcullayaw iti timecda, wenno agcul-ob cadagiti dalagudogda: castanto ti iyuulog iti APO dagiti buybuyot a manggubat iti bantay Sion, ken iti turodna.

5 Cas cadagiti bilbillit tumayabda, castanto ti panangigaga iti APO dagiti buybuyot iti Jerusalem; igagananto ken isalacanna ida; lumabasto ken salacnibannanto ida.

6 ¶ Tumalliawcayo kencuana a dagiti annac ti Israel ket nagsukiranda iti napalalo unay.

7 Ta iti dayta nga aldaw tunggal maysa ipalladawnanto dagiti didiosenna a pirac, ken dagiti didiosenna a balitoc, a dagiti im-imayo inaramidda nga nagpaay cadacayo a basol.

8 ¶ Ket ti Asirio mapasagto gapu iti campilan, saan a ti maingel a lalaki; ken ti campilan, saan a naranggas a tao, ti mangibusto kencuana: ngem italawannanto ti campilan, ket dagiti agtutubo a lallakina maricutandanto.

9 Ket lamabasto a mapan iti nabileg a sarikedkedna gapu iti buteng, ket dagiti principena agcullayawdanto gapu iti wagayway, cuna iti APO, a ti apuyna adda iti Sion, ken ti hornona idiay Jerusalem.


CAPITULO 32




1 Adtoy, maysa nga ari agarinto iti kinalinteg, ken dagiti panguloen agturaydanto iti kinajusticia.

2 Ket ti maysa a tao caslanto maysa a paglemmengan no agangin, ken maysa a paglinongan no agbaggio; cas ay-ayus dagiti danum iti disso a namaga, casla linong ti maysa dackel a bato iti napacsuyan a daga.

3 Ket dagiti mata dagiti macakita saandanto nga agcudrep, ken dagiti lapayag dagiti macangngeg dumngegdanto.

4 Ken ti puso ti nadursoc maawatannanto ti pannacaammo, ket ti dila dagiti agtattatel nasiglatto nga agbalicas a nalawag.

5 Ti nadangkes a tao uray caano dinto managananen iti managiwaras, uray ti tao a nagaramugam saanton a macuna a managparabur.

6 Ta ti nadangkes a tao agsao a simamaag, ket ti pusona agaramidto iti kinadangkes, tapno paadduenna ti tabbaaw, ken mangibalicas iti allilaw a maibusor iti APO, tapno aramidenna nga awan ti agyan iti cararrua ti mabisin, ken pagawanenna ti inumen ti mawaw.

7 Ket dagiti alicamen ti nagaramugam dakesda: isu agpakinakem cadagiti dakes a gandat a mangdadael iti napanglaw babaen cadagiti naulbod a sasao, uray no ti addaan pannacasapul agsao ti nalinteg.

8 Ngem ti managiwaras agpakinakem cadagiti managiwaras nga banbanag; ket babaen cadagiti managiwaras nga banbanag isu agtalinaedto.

9 ¶ Tumacdercayo, dacayo a babbai nga addaan nam-ay; ket denggenyo ti timecco, dacayo a naliway nga annac a babbai; timudenyo toy bitlac.

10 Ta adu nga al-aldaw ken tawtawen maringgorancayto, dacayo babbai a naliway: ta ti panagburas maawanto, ti panagapit saanto nga umay.

11 Agpigergercayo, babbai nga addaan nam-ay; maringgorancayo, dacayo a naliway: agucsobcayo, ken aglamolamocayo, ket barikesanyo iti lupot a nakersang dagiti lomoyo.

12 Isuda dandanugendanto dagiti barbarucong, a maigapu cadagiti macaay-ayo a taltalon, gapu iti nabunga nga uvas.

13 Iti rabaw ti daga ti ilic tumpuarto dagiti calcalunay ken cascasumba; wen, cadagiti amin a balbalay ti rag-o iti ili a narag-o.

14 Ta dagiti palacio mabaybay-anto; ti ili nga adu ti taona mapanawanto; ti sarikedked ken pagwanawanan agbalindanto a rukrukib nga agnanayon, maysa a rag-o dagiti asno nga atap, maysa a pagaraban dagiti arban;

15 Agingga iti maibucboc cadatayo ti espiritu nga aggapo iti ngato, ket ti let-ang agbalin a maysa a nabunga a talon, ket ti nabunga a talon maibilang a cas maysa a bakir.

16 Iti casta ti kinajusticia agtaengto iti let-ang, ken ti kinalinteg agtaengto iti nabunga a talon.

17 Ket ti aramid ti kinalinteg isunto ti talna; ket ti patauden ti kinalinteg isuda kinaulimec ken kinatalged iti agnanayon.

18 Ket ti ilic agnaedto iti natalna a pagyanan, ken iti namayengmeng a pagnaedan, ken cadagiti naulimec nga paginanaan a luglugar;

19 Ngem no aguraronto, nga umay agtinnag iti bakir; ket ti ili addanto ti baba idiay nababa a disso.

20 Benditocayo dacayo nga agmula iti sibay dagiti amin a dandanum, nga mangibaon ditoy dagiti sacsaca ti baca ken ti asno.


CAPITULO 33




1 Asica pay sica nga mangdadael, ket sica saanca a nadadael; ken agaramidca a sililiput, ket saandaca a nagaramidan a sililiput! intono maminggaca a mangdadael, madadaelcanto; ket intono agpatinggaca nga agaramid a sililiput, agaramiddanto met kenca nga sililiput.

2 O APO, paraburannacam cadi; naguraycami kenca: sica coma ti pannacatackiagda iti biniganbigat, ti pannacaisalacanmi met iti tiempo ti pacarigatan.

3 Iti daranudor ti arimbangaw dagiti umili nagtalawda; iti itatacdermo met laeng nawarawara dagiti nasnacion.

4 Ket dagiti samsamyo maurnongdanto a cas ti panaggu-urnong ti arabas: cas ti panaglagtolagto dagiti duddudon iti pananglagtolagtonanto cadacuada.

5 Iti APO maitan-oc; ta agnaed sadi ngato: isu pinunnona ti Sion iti kinajusticia ken kinalinteg.

6 Ket ti sirib ken pannacaammo isudanto ti talged dagiti tiempom, ken kinapigsa ti pannacaisalacan: ti panagbuteng iti APO isu ti gamengmo.

7 Adtoy, dagiti maingelda agickisda iti ruar: dagiti embajador ti cappia agsangitda a sipapait.

8 Dagiti calcalsada madadaelda, ti agbariw-as a tao agsardeng: rinacracna ti tulag, inuyawna dagiti il-ili, saanna nga patpatgen ti tao.

9 Ti daga agpanes ken aglupoy: ti Libano mabain ken napucan: ti Saron casla maysa a let-ang; ket ti Basan ken Carmelo regregenda dagiti bungbungada.

10 Ita tumacderacto, cuna iti APO; ita maitantan-ocacto; ita ibayogco iti bagic.

11 Aginawcayo iti taep, iyanacyonto ti punget ti garami: ti angesyo, cas apuy, mangalun-onto cadacayo.

12 Ket dagiti inilin-ili casdanto la cadagiti pagpuoran ti apug: cas sisiit a pinucan ket maipuordanto iti apuy.

13 ¶ Denggenyo, dacayo nga adda iti adayu, ania ti inaramidco; ken, dacayo nga adda iti asideg, bigbigenyo ti pigsac.

14 Dagiti managbasol sadi Sion mabutengda; pigerger ti nangkellaat dagiti managinsisingpet: Asino cadatayo ti macabalin a makipagtaeng iti mangalun-on nga apuy? asino cadatayo ti macabalin a makipagtaeng iti awan inggana a pannacapupuor?

15 Daydiay magna a sililinteg, ken ti agsao a sipupudno; ti mangumsi iti sapul iti pannacailupit, ti mangiwagteng cadagiti im-imana ta dina cayat nga awaten ti pannucsoc, ti mangapput cadagiti lapayagna tapno di macangeg iti dara, ken mangikidem cadagiti matana tapno saan a macakita iti dakes;

16 Isu agtaengto sadi ngato: ti lugar a camangna isunto dagiti bacud a binato: ti tinapay maitedto kencuana; dagiti danumna manamnama.

17 Dagiti matam makitadanto ti ari iti kinaimnasna: mabuyadanto ti daga nga nacaad-adayu.

18 Ti pusom agpanunotto iti nacaam-amac. Sadino ti ayan ti escriba? sadino ti ayan daydiay nangtimbeng iti buis? sadino ti ayan daydiay nagbilang dagiti tortorre?

19 Dicanto makita ti narungsot a tattao, tattao a nauneg ti pagsasaona a dica maawatan; addaanda iti agtattatel nga dila, nga saanmo a maawatan.

20 Kitaem ti Sion, ti ili ti kinadaegtayo: dagiti matam makitadanto ti Jerusalem a maysa a natalingenngen a pagyanan, maysa a tabernaculo a saanto a mayalis; awanto ti uray maysa cadagiti pasocna ti maparuten, ket awanto met ti uray maysa cadagiti lubidna iti mapugsoten.

21 No di ket idiay ti nadayag nga APO isunto cadatayo ti maysa a disso dagiti nalawa a carcarayan ken ay-ayus; nga awanto idiay ti dumanon a bilog nga agusar dagiti gagaud, ket awanto met ti nalibnos a sasacayan iti taaw a lumabas sadiay.

22 Ta ti APO isu ti ocomtayo, ti APO isu ti mangmangted iti linteg cadatayo, ti APO isu ti aritayo; isalacannatayo.

23 Dagiti taltalim nalucayda; saanda a napalagda iti puon dagiti paloda, dida nayucrad ti layag: iti casta ti tinucmaan a dackel a samsam nabingbingay; ti pilay ti nangala iti sinamsam.

24 Ket ti agtaeng dinanto cunaen, Masakitac: dagiti umili nga agtaeng sadiay mapacawanto dagiti kinadangkesda.


CAPITULO 34




1 Umasidegcayo, dacayo a nasnacion, a dumngeg; ken timudenyo, dacayo nga il-ili: dumngeg coma ti daga, Ken amin nga adda kencuana; ti lubong, ken amin nga banbanag a tumaud kencuana.

2 Ta ti pungtot iti APO adda cadagiti amin a nasnacion, ken ti rungsotna iti isuamin nga buybuyotna: isu dinadaelna ida a tinalipupus, ket inyawatna ida iti pagpapatayan.

3 Dagiti minatayda maibellengdanto met, ket ti buyocda rummuarto cadagiti bangcayda, ken dagiti banbantay marunawdanto iti darada.

4 Ket amin a buyot ti langit marunawdanto, ken dagiti langlangit malucotlucotdanto a cas maysa a libro a linucot: ket amin a buyotda matinnagdanto, a cas iti bulong a matinnag iti uvas, ken cas maysa a higos nga agtintinnag iti cayo ti higos.

5 Ta ti campilanco madigosto sadi langit: adtoy, umulogto idiay Edom, ken idiay ili ti inlunodco, tapno maocom.

6 Ti campilan iti APO napno iti dara, isu napalucmeg iti taba, iti dara dagiti cordero ken calding, iti taba dagiti beckel dagiti carnero a lallaki: ta iti APO adda maysa nga idatonna idiay Bosra, ken maysa a dackel a panagpapatay iti daga ti Edom.

7 Ket makipagsalogdanto dagiti cabalyo nga addaan sarsara cadacuada, ken dagiti urbon a kalaki-an agraman cadagiti toro; ket ti dagada mabbasanto iti dara, ken ti tapocda mapalucmegto iti taba.

8 Ta isu daytoy ti aldaw a panangbales iti APO, ken ti tawen a panangunggona a maipaay iti panggep ti Sion.

9 Ket dagiti carcarayanna agbalindanto nga aspalto, ken ti tapocna azufre, ket ti dagana agbalinto nga agdardarang nga aspalto.

10 Isu dinto maiddep iti rabii wenno aldaw; ti asucna agpangatonto nga agnanayon: manipud iti caputotan agingga iti caputotan aglangalangto; awanto ti lumasat kencuana iti agnanayonen.

11 ¶ Ngem ti pelicano ken ti animal a bassit a natirad di dutdutna isu tagicuaendanto; ket ti puec ken ti wac agtaengdanto idiay: ket iyunnatnanto iti paltic ti pannacariribuc, ken dagiti batbato ti kinaawan.

12 Ayabandanto dagiti natacnengna iti pagarian, ngem awanto ti agyan idiay, ket amin a panguloenna awanandanto.

13 Ket dagiti calunay tumubodanto cadagiti palaciona, camcamiring ken cascasumba cadagiti sarikedkedna: ket isunto ti maysa a pagyanan dagiti dragons, maysa a paraangan a maipaay cadagiti avestruz.

14 Ket dagiti atap nga an-animal iti let-ang agsasaracdanto cadagiti atap nga an-animal ti puro, ken ti atap a calding awagannanto ti cadduana; ti pagkigtotan a cullaaw agsaadto sadiay, ket masaracannanto ti maysa a disso a paginanaanna.

15 Idiay ti pagaramidanto ti dackel a puec iti umocna, ken agitlog, ken agucop, ken agurnong iti siroc ti linongna: idiayto pay dagiti sawi maurnongdanto, tunggal maysa agraman cadduana.

16 ¶ Sapulenyo nga aggapu iti libro iti APO, ket basaenyo: cadagitoy awanto ti agcurang, awanto ti mangsapul iti cadduana: ta isu ti imbilin ti ngiwatco, ken ti espirituna inurnongna ida.

17 Ket intedna cadacuada dagiti paspasetda, ken iti imana isu ti pinangbingayna cadacuada a bininnatog: isu ti tagicuaendanto nga agnanayon, manipud caputotan agingga iti caputotan agtaengdanto kencuana.


CAPITULO 35




1 Ti let-ang ken ti namaga a daga naragsacdanto; ken ti tay-ac a langalang agragrag-onto, ken agsabongto a cas iti rosa.

2 Isu agsabongto iti nawadwad, ken agrag-onto a buyogan pay ti ragsac ken cancanta: ti dayag ti Libano maitedto kencuana, ti kinadaeg ti Carmelo ken Saron, makitadanto ti dayag iti APO, ken ti kinadaeg ti Diostayo.

3 ¶ Patibkerenyo dagiti napacsuyan nga im-ima, ken pakiredenyo dagiti nacapuy a tumtumeng.

4 Cunaenyo cadagiti managbutbuteng a puso, Bumilegcayo, dicayo agbuteng: adtoy, ti Diosyo umayto iti panangibales, uray iti panangsupapac ti Dios; isu umayto ken isalacannacayo.

5 Iti casta maluctanton dagiti mata ti bulsec, ken dagiti lapayag ti tuleng maluctandanto.

6 Iti casta aglagtonto ti pilay a cas maysa nga ugsa, ken ti dila ti umel agcantanto: ta iti let-ang pumsuacto dagiti dandanum, ken barbaresbes iti tay-ac a langalang.

7 Ket ti namagaan nga daga agbalinto a libtong, ken ti mawaw a daga agbalinto nga ub-ubbog ti danum: iti pagyanan dagiti dragon, isu a pagiddaanda, ket root to agraman runruno ken badobadoc.

8 Ket addanto idiay ti maysa a calsada, ken maysa a dalan, ken managananto Iti dalan ti kinasanto; ti saan a nadalus saanto a magna kencuana; no di ket maipaayto: dagiti agbariwas a tattao, uray no maagda, didanto mayaw-awan idiay.

9 Awan ti leon nga agyanto idiay, awan met ti narungsot nga animal a sumang-at idiay, saandanto a masaracan idiay; no di ket ti nasubbot magnanto idiay:

10 Ket dagiti sinubbot iti APO agsublidanto, ken umayda idiay Sion a mabuyogan iti cancanta ken agnanayon a rag-o ti rabaw dagiti ul-uloda: magun-odanto ti ragsac ken rag-o, ket ti ladingit ken sasainnec agtalawdanto.


CAPITULO 36




1 Ita ket naaramid idi maicasangapulo ket uppat a tawen ni ari Ezekias, a ni Sennakerib nga ari ti Asiria immay a maibusor cadagiti amin a nasarikedkedan nga il-ili ti Juda, ket innalana ida.

2 Ket ti ari ti Asiria imbaonna ni Rabsaces nanipud Lakis agingga iti Jerusalem ken ni ari Ezekias a cadduana ti maysa a dackel a buyot. Ket isu nagtacder iti denna ti calasugan ti nangatngato a tangke iti calsada ti talon ti agpappapuscol iti lupot.

3 Idin immay kencuana ni Eliakim, nga anac ni Helcias, isu a mayordomo idi, ken ni Sebna nga escriba, ken ni Joah, nga anac ni Asaf, a registrador.

4 ¶ Ket ni Rabsaces kinunana cadacuada, Cunaenyo ita ken ni Ezekias, Castoy ti cuna ti dackel nga ari, ti ari ti Asiria, Ania a pagtalcan dayta a kencuana agtaleccayo?

5 Kunak, ket kunam, (ngem bin-igda amin nga ubbaw a sasao) Adda patigmaanco ken pigsac a maipaay iti gubat: ita siasino aya ti pagtalcam, nga umalsaca a maibusor caniac?

6 Adtoy, agtalecca iti cayo dayta naparpar a runo, a ti met laeng Egipto; isu a no ti maysa a tao agsanggir, salputenna dagiti imana: casta ni Faraon nga ari ti Egipto cadagiti isuamin nga agtalec kencuana.

7 Ngem no cunaem caniac, Agtaleccami ken iti APO a Diosmi: saan aya nga isu daydi, a dagiti dissona a nangato ken dagiti altarna iniccat ni Ezekias, ket kinunana iti Juda ken iti Jerusalem, Agrucbabcayto iti sangoanan daytoy nga altar?

8 Ita ngarud mangitedca dagiti pammatalged, dawatec kenca, ken ni apoc nga ari ti Asiria, ket iccancanto iti dua ribu a cabcabalyo, no mabalinmo ti mangisaad cadagiti agsacay cadacuada.

9 Casano ngarud ti pannacabalinmo a mamagtuckiad iti rupa ti maysa a capitan dagiti cababassitan cadagiti ad-adipen ni apoc, ket isaadmo ti panagtalecmo iti Egipto a gapu cadagiti luglugan ken tattao nga agcabcabalyo?

10 Ket ita immayac a diac kinaddua iti APO a bumusor itoy a daga tapno dadaelec? iti APO kinunana caniac, Sumang-atca a maibusor itoy a daga, ket dadaelem.

11 ¶ Idin cuna da Eliakim ken Sebna ken Joab ken ni Rabsaces, Agsaoca, dawatec kenca, cadagiti ad-adipenmo iti pagsasao ti Siria; ta maawatanmi: ket dica makisao cadacami iti pagsasao dagiti Judio, cadagiti lapayag dagiti tattao nga adda iti rabaw ti bacud.

12 ¶ Ngem ni Rabsaces kinunana, Imbaonnac ni apoc aya ken ni apom ken iti sica a mangisao cadagitoy a sasao? saannac nga imbaon aya cadagiti tattao nga agtugaw iti rabaw ti bacud, tapno canenda ti iblengda, ken inumenda iti isbo da nga caramancayo?

13 Idin ni Rabsaces timmacder, ket imkis iti natbag a timec iti pagsasao dagiti Judio, ket kinunana, Denggenyo dagiti sasao ti dackel nga ari, ti ari ti Asiria.

14 Castoy ti cuna ti ari, Dinacayo coma allilawen ni Ezekias: ta dinacayto mabalin nga isalacan.

15 Saanyo coma nga ipalubos ni Ezekias a pagcammatalekennacayo iti APO, a cunaenna, Iti APO ispalennatayto nga awan duduana: daytoy nga ili saanto a maited iti ima ti ari ti Asiria.

16 Dicayo ipangag ni Ezekias: ta castoy ti cuna ti ari ti Asiria, Makicappiacayo caniac babaen iti sagut, ket rummuarcayo agingga caniac: ket mangancayo tunggal maysa iti uvasna, ken tunggal maysa iti higosna, ken uminumcayo tunggal maysa cadagiti danum ti tangkena met laeng;

17 Agingga iti umayac ket ipancayo iti maysa a daga a cas iti dagayo, maysa a daga ti trigo ken arac, maysa a daga ti tinapay ken cauvasan.

18 Agannadcayo di la ket ta ni Ezekias mauyutannacayo, a kunana, Iti APO ispalennatayto. Adda aya asinoman cadagiti didios dagiti nasnacion a nangisalacan iti dagana iti ima ti ari ti Asiria?

19 Sadino aya ti ayan dagiti didios ti Hamath ken ti Arfad? sadino aya ti ayan dagiti didios ti Sefarvaim? ket inispalda aya ti Samaria iti imac?

20 Siasinoda aya cadagiti amin a didios itoy a dagdaga, a nangispal idi iti dagada iti imac, tapno iti APO ispalenna coma ti Jerusalem iti imac?

21 Ngem nagulimecda, ken dida sinungbatan iti maysa a balicas: ta ti imbilin idi ti ari ket, kinunana, Dicayo sumungbat kencuana.

22 ¶ Idin immay ni Eliakim, nga anac ni Helcias, a mayordomo, ken Sebna nga escriba, ken Joah, nga anac ni Asaf, a registrador, aginggana ken ni Ezekias a napigis dagiti cawcawesda, ket imbagada kencuana dagiti sasao ni Rabsaces.


CAPITULO 37




1 Ket naaramid, idi nangngeg ni ari Ezekias, pinigisna dagiti pagan-anayna, ken nagabungot iti lupot a nakersang, ket simrec iti balay iti APO.

2 Ket imbaonna da Eliakim, a mayordomo, ken ni Sebna nga escriba, ken dagiti panglacayen dagiti papadi a nacaabungotda iti lupot a nakersang, ken ni Isaias a mammadto nga anac ni Amoz.

3 Ket kinunada kencuana, Castoy ti cuna ni Ezekias, Daytoy nga aldaw isu ti aldaw ti riribuc, ken ti babalaw, ken ti tabbaaw: ta dagiti annac dumtengdan iti pannacayanac, ket awan ti pigsa nga agipasngay.

4 Nalabit a iti APO a Diosmo denggennanto dagiti sasao ni Rabsaces, nga imbaon ti ari ti Asiria nga apona a nangumsi iti Dios a sibibiag, ket tubngarennanto dagiti sasao a nangngeg iti APO a Diosmo: gapuna nga ipangatom ti cararagmo a maipaay iti tidda a nabati.

5 Iti casta immay dagiti ad-adipen ni ari Ezekias ken ni Isaias.

6 ¶ Ket ni Isaias kinunana cadacuada, Castoyto ti cunaenyo ken apoyo, Castoy ti cuna iti APO, Dica agbuteng cadagiti sasao a nangngegmo, isuda a dagiti ad-adipen ti ari ti Asiria pinangtabbaawda caniac.

7 Adtoy, ibaonconto kencuana ti napigsa nga angin, ket macangngegto ti damag, ket agsublinto iti dagana met laeng; ket pagpasagecto isuna iti campilan idiay dagana met laeng.

8 ¶ Iti casta ni Rabsaces nagsubli, ken nasaracanna ti ari ti Asiria a manggubgubat iti Libna: ta nangngegna idin nga isu pimmanaw idiay Lakis.

9 Ken nangngegna a masasao iti maipapan ken ni Tirhakah nga ari ti Etiopia, Isu umay a makibacal kenca. Ket idi nga nangngegna, nangibaon cadagiti babaonen ken ni Ezekias, a kinunana,

10 Castoyto ti saoenyo ken ni Ezekias nga ari ti Juda, a cunaenyo, Dimo coma ipalubos ti Diosmo, nga isu a nagtalcam, allilawennaca, nga agcuna, Ti Jerusalem dinto maited iti ima ti ari ti Asiria.

11 Adtoy, nangngegmo no ania ti inaramid dagiti ar-ari ti Asiria cadagiti isuamin a dagdaga iti panangdadaelda cadacuada a tinalipupus; ket sica maispalcanto aya?

12 Dagiti didios dagiti nasnacion inispalda aya ida dagidiay a dinadael idi dagiti ammac, cas iti Gozan, ken ti Haram, ken ti Resef, ken dagiti annac ti Eden nga agyan idi idiay Thelazar?

13 Sadino ti ayan ti ari ti Amath, ken ti ari Arpad, ken ti ari ti ili ti Sepharvaim, Hena, ken Ivah?

14 ¶ Ket ni Ezekias inawatna di surat iti ima dagiti nabaon, ket binasana: ket ni Ezekias napan idi balay iti APO, ket isu ti inyucradna iti sango iti APO.

15 Ket ni Ezekias nagcararag ken iti APO, a kinunana,

16 O APO dagiti buybuyot, Dios ti Israel, nga agnanaed iti nagbaetan dagiti kerubin, sica ti Dios, sicsica laeng ti maymaysa, cadagiti isuamin a pagarian iti lubong: sica inaramidmo ti langit ken daga.

17 Iyallingagmo ta lapayagmo, O APO, ket denggem; luctam dagiti matam, O APO, ket kitaem: ken denggem amin dagiti sasao ni Sennakerib, isu a nagbaon a mangumsi iti Dios a sibibiag.

18 Kinapudnona, APO, a dagiti ar-ari ti Asiria pinaglangalangda dagiti amin a nasnacion, ken dagiti dagdagada,

19 Ken impurruacda dagiti didiosda iti apuy: ta isuda saanda a dios, no di ket aramid dagiti im-ima dagiti tattao, cayo ken bato: gapuna a dinadaelda ida.

20 Ita ngarud, O APO a Diosmi, ispalennacami iti imana, tapno isuamin dagiti pagpagarian iti lubong ammoenda coma a sica iti APO, ken sicsica laeng.

21 ¶ Idin ni Isaias nga anac ni Amoz nangibaon ken ni Ezekias, a kinunana, Castoy ti cuna iti APO Dios ti Israel, Idinto a nagcararagca caniac a maibusor ken ni Sennakerib nga ari ti Asiria:

22 Daytoy ti sao ti APO nga insaona a maipapan kencuana; Ti birhen, nga anac a babai ti Sion, linaisnaca, ken kinatawaannaca a rinabngis; ti anac a babai ti Jerusalem inngilangilna ti ulona kenca.

23 Siasino ti inumsim ken tinabbaawam? ket asino ti pacaibusoran ti nangato a riawmo, ken tinangadan dagita matam iti nangato? uray maibusor met laeng iti Santo Ti Israel.

24 Iti pannacaaramat dagiti ad-adipenmo inumsim ti Apo, ket kinunam, Iti kinaadu dagiti lugluganco simmang-atac iti tapaw dagiti banbantay, cadagiti sulsuli ti Libano; ket pucanecto dagiti natayag a cedcedrona, ken dagiti casayaatan a parwana: ket sumrecacto iti cangatoan a beddengna, ken ti bakir ti Carmelna.

25 Nagcaliac, ken imminumac iti danum; ket babaen iti dapan dagiti sacsacac pagmagaecto dagiti isuamin a carcarayan dagiti nalacub a disdisso.

26 Dica nangngeg aya idi nabayagen a tiempo, no casano ti inaramidco; idi ugma, a binalabalac ida? ita isu ti tinungpalco, tapno cucuam coma a pangrebba dagiti nasarikedkedan nga il-ili iti ginabgabsuon a narnarba.

27 Iti casta dagiti nagnaed cadacuada bassit ti pannacabalinda, nagcullayawda ken nariribucda: cacasda la idi iti root idiay away, ken cacasda la iti nalangto a nateng, cas iti root cadagiti toctoc ti balay, ken cas maysa a bangcag a namulaan nga aglaylay casacbayan ti panagbungana.

28 Ngem ammoc ti panaglugarmo, ken ti panagruarmo, ken ti panagserrecmo, ken ti panagpungtotmo a maibusor caniac.

29 Gapu iti panagpungtotmo a maibusor caniac, ken agsipud ta ti kinacuspagmo, immuli cadagiti lapayagco, gapuna nga icabilconto ti callawitco ita agongmo, ken ti bosalco cadagiti bibigmo, ket pagsubliencanto iti dalan nga immayam.

30 Ket daytoyto ti pagilasinan kenca, Mangancayto itoy a tawen iti daydiay a tumubo latta; ket iti maicaddua a tawen iti daydiay timmubo met laeng: ket iti maicatlo a tawen agmulacayo, ket aganicayo, ket agmulacayo cadagiti cauvasan, ket mangancayo iti bungana.

31 Ket ti tidda a nailiclic iti balay ni Juda ket agramutto manen iti agpauneg, ket agbunganto iti agpangato:

32 Ta rummuarto idiay Jerusalem ti maysa a tidda, ken dagidi nacatalaw ti bantay Sion: ti regta iti APO dagiti buybuyot aramidennanto daytoy.

33 Gapuna castoy ti cuna iti APO no maipapan iti ari ti Asiria, Isu dinto umay itoy nga ili, wenno mangibiat iti maysa a pana sadiay, wenno umay iti sangona a sicacalasag, wenno mangaramid iti pagsalingda a maibusor kencuana.

34 Iti dalan nga immayanna, isu ti pagsubliannanto met laeng, ket dinto dumteng iti daytoy nga ili, cuna iti APO.

35 Ta siac salacnibacto daytoy nga ili tapno isu isalacanco a gapu caniac met laeng, ken gapu ken ni David nga adipenco.

36 Ket ti angel iti APO rimmuar, ket kinabilna iti pacarso dagiti Asirios ti sangagasut walopulo ket lima a ribu: ket idi bimmangonda iti agsapa, adtoy, dagitoy ket bangcayda aminen.

37 ¶ Iti casta ni Sennakerib nga ari ti Asiria pimmanaw, ket napan ken nagsubli, ket nagtaeng idiay Ninive.

38 Ket naaramid, idi nga isu agdaydayaw iti balay ni Nisroc a diosna, da Adremelec ken Sarezer nga annacna a lallaki kinabilda isuna iti campilan; ket nagtalawda agingga iti daga ti Armenia: ket ni Esarhadon nga anacna nagari a simmucat kencuana.


CAPITULO 38




1 Cadagidi nga aldaw ni Ezekias nagsakit iti macapapatay. Ket ni Isaias a mammadto nga anac ni Amoz immay kencuana, ket kinunana kencuana, Castoy ti cuna iti APO, Urnosem ti balaymo: ta mataycanto, ket dicanto agbiag.

2 Idin ni Ezekias intaliawna ti rupana iti bacud, ket nagcararag iti APO,

3 Ket kinunana, Lagipem ita, O APO, gumawawaac kenca, no casano ti pannagnac idi ita saclangmo iti kinapudno ken iti maysa nga naan-anay a puso, ket inaramidco daydiay a naimbag ita imatangmo. Ket ni Ezekias nagsangit iti napalalo.

4 ¶ Idin immay ti sao iti APO ken ni Isaias, a kinunana,

5 Inca, ket cunaem ken ni Ezekias, Castoy ti cuna iti APO, ti Dios ni David nga amam, Nangngegco ti cararagmo, nakitacon dagiti luluam: adtoy, nayonac dagiti al-aldawmo iti sangapulo ket lima a tawen.

6 Ket ispalencanto ken daytoy nga ili iti ima ti ari ti Asiria: ken salacnibacto daytoy nga ili.

7 Ket daytoyto ti pagilasinan kenca nga aggapu ken iti APO, a iti APO aramidennanto daytoy a banag nga insaona;

8 Adtoy, aramidecto ti anniniwan cadagiti gerger, a bimmaba iti cuadrante iti init ni Acaz, nga agsanud iti sangapulo a gerger. Iti casta ti init nagsanud iti sangapulo a gerger, iti cuadrante a bimmabaanna.

9 ¶ Ti surat ni Ezekias nga ari ti Juda, idi nagsakit, ken naimbagan iti sakitna:

10 Kinunac iti pannacaputed dagiti al-aldawco, innacto cadagiti ruangan ni tanem: Naiccat caniac dagiti tidda dagiti tawenco.

11 Kinunac, Diacto makita iti APO, iti APO met laeng, idiay daga dagiti nabiag: diacto macakitan iti tao agraman cadagiti agnaed ditoy a lubong.

12 Ti al-aldawco pimmanawen, ket naiccat caniac a cas maysa a tolda ti agpaspastor: linucotco a casla maysa nga agabel ti biagco: pulsotennacto iti nacaro a panagsakit: manipud iti aldaw agingga iti rabii paggibusennac.

13 Nagtalnaac agingga iti bigat, nga, cas maysa a leon, casta ti panangbungtolna cadagiti amin a tultulangco: manipud iti aldaw agingga iti rabii paggibusennac.

14 Casla maysa a sallapingaw wenno tipor, casta ti panagit-itco: nagun-unnoyac a casla calapati: dagiti matac cumapuyda a gapu iti panangitangad: O APO, maparigatac; badangannac.

15 Ania ti saoecto? isu nagsaon caniac, ken inaramidna met laeng: magnaacto a sii-inayad iti amin dagiti tawenco agraman iti kinapait toy cararruac.

16 O Apo, gapu cadagitoy a banbanag dagiti tattao agbiagda, ket amin dagitoy iti ayan ti biag ti espirituc: gapuna a paimbagennac, ken pagbiagennac.

17 Adtoy, maipaay iti talnac naaddaanac iti dackel a kinapait: ngem sica inayatmo toy cararruac ta insalacanmo manipud iti dariwangwang ti panagrupsa: ta sica impurruacmo amin a basbasolco iti licudam.

18 Ta ni tanem dinaca mabalin a dayawen, ni patay dinaca rambacan: dagiti umulog iti dariwangwang dida mabalin nga inanamaen ti kinapudnom.

19 Ti sibibiag, ti sibibiag, dayawennacanto, cas aramidec ita nga aldaw: ti ama ipacaammonanto ti kinapudno cadagiti annac.

20 Iti APO madadaan a mangisalacan caniac: gapuna a cantaentayto dagiti cancantac agraman instrumento a kinuerdasan iti amin nga al-aldaw dagiti biagtayo iti balay iti APO.

21 Ta ni Isaias kinunana idi, Mangalada coma ti sangcatukel nga higos, ket itapalda iti bosalina, ket umimbagto.

22 Ni Ezekias kinunana met idi, Ania ti pagilasinan nga siac umuliacto iti balay iti APO?


CAPITULO 39




1 Iti daydi a pannawen ni Merodac-baladan, nga anac ni Baladan, ari ti Babilonia, nangibaon cadagiti sursurat ken maysa a sagut ken ni Ezekias: ta nangngegna nga isu nagsakit, ket naimbagan.

2 Ket ni Ezekias nagragsac cadacuada, ket impakitana cadacuada ti balay dagiti cucuana a napateg, ti pirac, ken balitoc, dagiti recrecado, ken ti napateg a lana, ken ti amin a balay ti ig-igamna, ken dagiti amin a masaracan cadagiti gamgamengna: awan idi idiay balayna, wenno iti amin a pagturayanna, ti saan nga impakita ni Ezekias cadacuada.

3 ¶ Idin immay ni Isaias a mammadto ken ari Ezekias, ket kinunana kencuana, Ania ti kinuna dagitoy a lallaki? ken sadino ti naggapuanda nga immay kenca? Ket ni Ezekias kinunana, Immayda caniac nanipud iti adayu a daga, uray diay met laeng Babilonia.

4 Idin kinunana, Ania ti nakitada dita uneg ti balaymo? Ket ni Ezekias simmungbat, Amin nga adda iti uneg ti balayco nakitada: awan ti aniaman cadagiti gamgamengco ti diac impakita cadacuada.

5 Idin ni Isaias kinunana ken Ezekias, Denggem ti sao iti APO dagiti buybuyot:

6 Adtoy, dumteng dagiti al-aldaw, intono amin nga adda iti balaymo, ken dayta nga inurnong dagiti ammam iti pagidulinan agingga ita nga aldaw, maipandanto idiay Babilonia: awanto ti mabati, cuna iti APO.

7 Ken dagiti annacmo a lallaki nga agtaudto kenca, isuda a putotemto, ipanawdanto; ket isudanto dagiti eunucos iti palacio ti ari ti Babilonia.

8 Idin ni Ezekias kinunana ken ni Isaias, Naimbag ti sao iti APO nga insaom. Ket kinunana pay, Ta addanto talna ken kinapudno cadagiti al-aldawco.


CAPITULO 40




1 Liwliwaenyo, liwliwaenyo ti ilic, cuna ti Diosyo.

2 Agsaocayo a sililiwliwa iti Jerusalem, ket ipuccawyo kencuana, a ti pannakidangadangna nanungpalen, ta ti kinadangkesna napacawanen: nga isu inawatna iti ima iti APO iti mamindua a maipaay iti amin a basbasolna.

3 ¶ Ti timec ti maysa nga agpucpuccaw iti let-ang, Isaganayo ti dalan iti APO, palanasenyo iti tay-ac ti maysa a dalan a maipaay iti Diostayo.

4 Tunggal tanap maitan-octo, ken amin a bantay ken turod maipababadanto: ken ti nakillo mapalintegto, ken ti nabungtuolan nga disdisso mapalanasto:

5 Ken ti dayag iti APO maiparangarangto, ken amin a lasag makitadanto a sangsangcamaysa: ta ti ngiwat iti APO insaona.

6 Ti timec kunana, Ipuccawmo. Ket kinunana, Ania ti ipuccawco? Amin a lasag ket root, ken amin a kinasayaatna isu ti casla sabong iti tay-ac:

7 Ti root magango, ti sabong malaylay: agsipud ta ti espiritu iti APO agpuyopoy kencuana: pudno a dagiti tattao isuda dagiti root.

8 Ti root magango, ti sabong malaylay: ngem ti sao ti Diostayo agtalinaed iti agnanayon.

9 ¶ O Sion, a mangiyeg cadagiti naimbag a damdamag, sumang-atca iti nangato a bantay; O Jerusalem, a mangiyeg cadagiti naimbag a damdamag, ipuccawmo ta timecmo a buyogen ti pigsa; ipuccawmo, dica agbuteng; ibagam cadagiti il-ili ti Juda, Adtoy ti Diosyo!

10 Adtoy, ni Apo DIOS umayto iti nabileg nga imana, ken ti tackiagna agturayto a maipaay kencuana: adtoy, ti panggunggonana maicuyog kencuana, ken ti panupapacna adda iti sangona.

11 Pagarabennanto ti arbanna a cas iti maysa nga pastor: urnongennanto dagiti cordero iti tackiagna, ken awitenna ida babaen iti barucongna, ket idalannanto a nainayad dagiti adda urbonda.

12 ¶ Asino ti nangsucat iti danum iti lucong ti imana, ken nangrucod iti langit iti danganna, ken ti nangipalaon ti tapoc ti daga iti maysa nga pagsucatan, ken nangtimbang cadagiti banbantay cadagiti pagcatian, ket dagiti turturod iti maysa a pagtimbengan?

13 Asino ti nangiturong iti Espiritu iti APO, wenno mamalacad kencuana ket isu insurona?

14 Asino ti nangbalacad, ken asino ti nangisuro kencuana, ken ti nangipalawag kencuana iti dalan ti kinajusticia, ken ti nangisuro kencuana iti pannacaammo, ken ti nangiparang kencuana iti dalan ti pannacaawat?

15 Adtoy, dagiti nasnacion casda la sangcatedted ti maysa a timba, ken naibilangda a cas bassit a tapoc ti timbengan: adtoy, isu iccatenna dagiti purpuro a cas maysa a bassit a banag.

16 Ket ti Libano di-umanay a puoran, ket di met umanay dagiti animalna a mapuoran a daton.

17 Amin dagiti nasnacion casda la awan capapayanda iti sangoananna; ibilangna ida a basbassit ngem iti awan, ken kinaubbaw.

18 ¶ Asino ngarud iti pangipadisanyo iti Dios? wenno ania a caasping ti pangiyariganyo kencuana?

19 Ti agtartarabaho sucogenna ti ladawan a kinitikitan, ket ti mammanday iti balitoc calupcupanna iti balitoc, ket sana iyaramidan cadagiti cawar a pirac.

20 Ti capanglawan unay nga awan pagdatonna pilienna ti cayo a saan a bacabaken; sumapul iti maysa a nalaing nga agtrabaho a mangbangon iti maysa ladawan a kinitikitan, a saanto a mayalis.

21 Dicayo naammoan aya? dicayo nangngeg aya? saan a naibaga aya cadacayo nanipud idi damo? dicayo aya naawatan nanipud idi pannacaibangon ti daga?

22 Isuna daydiay nga agtugtugaw iti ngatoen ti nagtimbukel a daga, ket dagiti agtaeng kencuana casda la dudon; a mangibistrad cadagiti langlangit a cas maysa a bengbeng, ken mangyaplag cadacuada a cas maysa a tolda a pagnaedan:

23 A mangpucaw cadagiti pangpanguloen; isu a mangaramid cadagiti oc-ocom ti daga a cas kinaubbaw.

24 Wen, saandanto a maimula; wen, saandanto a maibunobon; wen, ti puonda saandanto nga agramut iti daga: ken puyotannanto pay la ida, ket magangodanto, ket ti alipugpug iyadayunanto ida a casla root nga nagango.

25 Siasino ngarud iti pangipadisanyo caniac, wenno pacaipadaac? cuna Ti Santo.

26 Itangadyo dagiti matayo idiay ngato, ket kitaenyo no asino ti namarsua cadagitoy nga banbanag, nga irruarna dagiti buybuyotda babaen iti bilangda: awaganna ida amin babaen cadagiti nagnagananda gapu iti kinadackel unay ti kinamaingelna, ta isu napigsa iti pannacabalin; awan ti agcurang uray no maysa.

27 Apay a cunaem, O Jacob, ken saoem, O Israel, Ti dalanco nailinged ken iti APO, ken ti kinajusticia a maiparebbeng caniac limmabas nanipud iti Diosco?

28 ¶ Dica aya naammoan? dica aya nangngeg nga ti agnanayon a Dios, iti APO, ti Namarsua cadagiti pungto ti daga, saan a cumapuy, ket di met mabannog? awan ti macasukimat iti pannacaawatna.

29 Isu ti mangpapigsa iti nacapuy; ken iti daydiay awan ti cabaelanna isu pawadwadenna iti pigsa.

30 Uray pay dagiti ubbing cumapuydanto ken mabannogdanto, ken dagiti agtutubo matuangdanto a matalipupus:

31 Ngem dagiti agpannuray ken iti APO pabaroendanto dagiti pigsada; agpangatodanto a sipapayac a casla aguila; agtaraydanto, ket dida mabannog; magnadanto, ket dida agcapuy.


CAPITULO 41




1 Agulimeccayo iti sangoanac, O purpuro; ket dagiti tattao pabaroenda coma ti pigsada: umadanida coma; sada coma agsao: dumtengtayo coma nga agcucuyog iti pangocoman.

2 Asino ti namangon iti nalinteg a tao nanipud iti daya, nga inayabanna iti sacaananna, ket inyawatna dagiti nasnacion iti sangoananna, ken inaramidna nga agturay cadagiti ar-ari? itedna ida a casla tapoc iti campilanna, ken cas naitayab a nagango a ruting iti bai-na.

3 Isu camatenna ida, ken lumabas a di naan-ano; uray pay iti maysa a dalan a di pay pinagna dagiti sacsacana.

4 Asino ti nangaramid ken nangtungpal itoy, nga ayabanna dagiti caputotan nanipud idi damo? Siac nga APO, ti umuna ken ti maudi; siac daydiay.

5 Dagiti purpuro nakitada, ket nagbutengda; dagiti pungto ti daga nagbutengda, immasidegda, ken immayda.

6 Isuda nagtitinnulongda tunggal maysa iti caarrubana; ket ti tunggal maysa kunana ken cabsatna, Bumilegca.

7 Iti casta ti allawagi pinaregtana ti mammanday iti balitoc, ken ti agpalanas babaen iti martillo pinaregtana daydiay agtaltal iti pasnaan, a kunana, Nacasaganan iti aglanlanang: ket inlansana, tapno isu di macuti.

8 Ngem sica, Israel, nga adipenco, ni Jacob a pinilic, ti bin-i ni Abraham a gayyemco.

9 Sica a kinibinco nanipud cadagiti pungto ti daga, ken inayabanca nanipud cadagiti nangrona nga pangpanguloenna, ken kinunac kenca, Sica ti adipenco; pinilica, ket dica imbelleng.

10 ¶ Dica agbuteng; ta addaac kenca: dica agcullayaw; ta siac ti Diosmo: papigsaencanto; wen, tulongancanto; wen, tapayaencanto iti makincanawan nga ima ti kinalintegco.

11 Adtoy, amin dagiti gimmura kenca maibabaindanto ken mariruda: casladanto awan; ket dagiti makisuppiat kenca mapucawdanto.

12 Sica sapulemto ida, ket dica ida masaracan, uray pay dagiti makisuppiat kenca: dagiti manggubat kenca agbalindanto a casla awan, ken cas maysa a banag nga awan ti capapaayanna.

13 Ta siac nga APO a Diosmo tenglecto iti makincanawan nga imam, a kunak kenca, Dica agbuteng; badangancanto.

14 Dica agbuteng, sica igges a Jacob, ken dacayo tattao ti Israel; badangancanto, cuna iti APO, ken ti mannubbotmo, isu ti Santo Ti Israel.

15 Adtoy, inaramidca a maysa a baro ken natadem a pagtaltag nga addaan ngipen: sica taltagemto dagiti banbantay, ken rumekento ida, ken aramidemto dagiti turturod a casla taep.

16 Itaepmonto ida, ket ti angin itayabnanto ida, ken ti alipugpog warawaraennanto ida: ket sica agragsaccanto ken iti APO, ken ipadayagmonto iti Santo Ti Israel.

17 No ti napanglaw ken iti addaan pannacasapul sapulenda ti danum, ket awan a pulos, ket dagiti dilada agcapuy a gapu iti waw, siac iti APO denggecto ida, siac a Dios ti Israel diacto ida baybay-an.

18 Lucatacto dagiti carcarayan cadagiti nangato a disdisso, ken ub-ubbog iti tengnga dagiti tantanap: aramidecto ti let-ang a maysa a libtong ti danum, ken ti namaga a daga nga ub-ubbog ti danum.

19 Imulacto iti let-ang ti cedro, ti acacia, ken ti mirto, ken ti cayo a mangted ti lana; isaadconto iti tay-ac ti cayo ti parwa, ken ti saleng, ken ti cayo ti alamo nga aglulubbonda:

20 Tapno makitada, ken maammoanda, ken mautobda, ken maawatanda amin, a ti ima iti APO inaramidna daytoy, ket ti Santo Ti Israel pinarsuana ida.

21 Ipalawagyo ti calinteganyo, cuna iti APO; iparangarangyo dagiti napigsa nga rasrasonyo, cuna ti Ari ni Jacob.

22 Iyegda coma ida, ken ipablaacda cadacami no ania ti mapasamacto: ipablaacyo coma dagiti immun-una a banag, no aniada, tapno utobenmi ida, tapno maammoanmi ti camaudianan a tungpalda; wenno ipakitayo cadacami dagiti banbanag a sumungad.

23 Ipablaacyo dagiti banbanag nga umay iti masacbayan, tapno maammoanmi a dioscayo: wen, agaramidcayo iti naimbag, wenno agaramidcayo iti dakes, tapno agcullayawcami, ken mabuyami amin.

24 Adtoy, awan capapaayanyo, ken ti aramidyo awan: maysa a kinarimon ti mangpili cadacayo.

25 Namangonac ti maysa nanipud iti amianan, ket umayto: manipud irurusingan ti init awagannanto iti naganco: ket isu umayto cadagiti agtuturay a cas magna iti masa, ken cas ti agdamdamili a payatenna ti pila.

26 Asino ti nangipablaac kencuana nanipud idi punganay, tapno maammoanmi coma? ken idi un-unana, tapno maisaomi, Isu nalinteg? wen, awan ti mangipablaac, wen, awan ti mangiparang, wen, awan ti dumngeg cadagiti sasaoyo.

27 Ti umuna agsaonto iti Sion, Adtoy, buyaenyo ida: ket itedconto iti Jerusalem ti maysa a mangyeg cadagiti naimbag a damdamag.

28 Ket kimmitaac, ket awan ti tao; uray cadacuada, awan ti mamatigmaan, nga, no agsaludsudac cadacuada, a macasungbat coma iti maysa a sao.

29 Adtoy, isuda amin ubbaw; dagiti ar-aramidda awan capapaayanda: dagiti sinucog a ladladawanda isuda dagiti angin ken pannacariru.


CAPITULO 42




1 Adtoy ti adipenco, isu a salacnibac; ti pinilic, a pagay-ayatan toy cararruac; incabilco ti espirituc kencuana: isu iyegnanto ti kinalinteg cadagiti Gentiles.

2 Isu saanto nga agickis, ket dina met ipigsa,wenno ipangeg ti timecna iti calsada.

3 Ti maysa a runo a naparpar dinanto bungtolen, ket ti maysa a micha a sumsumged dinanto iddepen: isu pataudennanto ti kinajusticia iti kinapudno.

4 Isu saanto a cumapuy ket di met maupay, agingga iti maisaadna ti kinajusticia iti daga: ken dagiti purpuro urayendanto ti lintegna.

5 ¶ Castoy ti cuna ti Dios nga APO, isu a namarsua cadagiti langlangit, ken nangisacnap cadacuada; isu a nangpalawa iti daga, ken ti agtaud kencuana; isu a mangited ti anges cadagiti tattao iti rabawna, ken ti espiritu cadagiti magna kencuana:

6 Siac ti APO inayabanca iti kinalinteg, ken petpetacto ta imam, ken aywanancanto, ken itedcanto a maipaay a maysa a tulag cadagiti tattao, a silaw dagiti Gentil;

7 Tapno luctam dagiti bulsec a mata, tapno irruarmo dagiti nabalud iti pagbaludan, ken dagiti agtugtugaw iti nasipnget irruarmo ida iti pagbaludan a balay.

8 Siac iti APO: dayta ti naganco: ket ti dayagco diacto ited iti sabali, uray ti dayawco cadagiti kinitikitan a ladladawan.

9 Adtoy, dagiti umuna a banbanag napasamacdan, ket babbaro a banbanag ti ipablaacco: iti sacbay ti itutumpuarda ibagac cadacayo ti maipapan cadacuada.

10 Icantayo iti APO iti maysa a baro a canta, ken ti dayawna manipud iti pungto ti daga, dacayo a mapan iti baybay, ken amin dagiti adda kencuana; dagiti purpuro, ken dagiti agnaed kencuana.

11 Ti let-ang ken dagiti il-ilina ipigsada coma ti timecda, dagiti pur-puroc a pagnaedan ti Cedar: dagiti agnaed iti bato agcanta coma, agriawda coma manipud iti tapaw dagiti banbantay.

12 Mangtedda coma ti dayaw iti APO, ken ipablaacda ti dayawna cadagiti purpuro.

13 Iti APO rummuarto a cas maingel a tao, kiwarennanto ti panagimun a cas maysa a tao ti gubat: isu agickisto, wen, agriaw; abakennanto ti cabusorna.

14 Nabayagen a nagtalnaac; nagulimecac, ken ginawidac ti bagic: ita agickisacto a cas maysa a babai nga agpasical; agdadaelacto ken agibus a maminpinsan.

15 Rebbaecto dagiti banbantay ken turturod, ken pagangoecto amin a rorootda; ken dagiti carcarayan pagbalinecto ida a purpuro, ken paabbatecto dagiti liblibtong.

16 Ken iyegconto ti bulsec iti maysa a dalan a dida ammo; idalanconto ida cadagiti dandan-a a dida ammo: aramidecto ti sipnget a lawag iti sangoananda, ken ti nakillo nga banbanag palintegec. Dagitoy a banbanag aramidecto cadacuada, ken diacto ida baybay-an.

17 ¶ Mapasublidanto, maibabaindanto unay, dagiti agtalec cadagiti kinitikitan a ladladawan, nga agcuna cadagiti sinucog a ladladawan, Dacayo dagiti diosmi.

18 Denggenyo, dacayo a tuleng; ken matmatanyo, dacayo a bulsec, tapno makitayo.

19 Siasino ti bulsec, no di ti adipenco? wenno ti tuleng, cas iti babaonec nga imbaonco? asino ti bulsec a cas daydiay isu nga naan-anay, ken bulsec a cas iti adipen iti APO?

20 Sica makitam dagiti adu a banbanag, ngem sica dica paliiwen; dagiti lapayag nalucatanda, ngem saan a macangngeg.

21 Ti APO maay-ayo unay gapu iti kinalintegna; itan-ocnanto iti linteg, ken ipadayawna.

22 Ngem daytoy isu ti maysa nga ili a natacawan ken nasamsaman; isuda amin naipalab-ogda cadagiti ab-abut, ket addada a nailemmeng iti balay a pagbaludan: maipaayda a cayaw, ket awan ti mangisalacan; maipayda a maysa a samsam, ket awan ti agcuna, Isubliyo.

23 Siasino cadacayo ti dumngegto iti daytoy? asino ti mangtimud ken dumngegto a maipaay iti panawen a mapasungad?

24 Asino ti nangyawat ken ni Jacob a maysa a samsam, ken ti Israel cadagiti tulisan? saan aya a iti APO, isu a nagbasolantayo? ta dida kinayat a nagnaan dagiti dalanna, ken dida met nagtulnog iti lintegna.

25 Gapuna nga inbucbocna kencuana ti kinarungsot ti ungetna, ken ti pigsa ti gubat: ket pinasgedanna iti aglicmutna, nupay casta dina pay ammo; ken napuoran isuna, nupay casta isu dina pay impapuso.


CAPITULO 43




1 Ngem ita castoy ti cuna iti APO a namarsua kenca, O Jacob, ken isu a nagbukel kenca, O Israel, Dica agbuteng: ta siac sinubbotca, siac inayabanca iti naganmo; sica ti cucuac.

2 Intono ballasiwem dagiti dandanum, addaacto kenca; ket iti pannacaballasiw dagiti carcarayan, didacanto layusen: intono magnaca a lumasat iti apuy, saancanto a mapuoran; ket dinaca met silmutan ti darang.

3 Ta siac iti APO a Diosmo, ti Santo Ti Israel, a Mangisalacan kenca: intedco ti Egipto a cas subbotmo, ti Etiopia ken Seba nga agpaay kenca.

4 Agsipud ta napategca idi iti imatangco, ken madaydayaw, ken dinungdungoca: gapuna nga itedconto dagiti tattao kenca, ken dagiti il-ili a sumandi iti biagmo.

5 Dica agbuteng: ta addaac kenca: iyegconto ti bin-im nga igapu iti daya, ken urnongencanto nga igapu iti laud;

6 Cunaecto iti amianan, Ibbatam; ken iti abagatan, Dica igawid: iyegmo dagiti annacco a lallaki manipud iti adayu, ken dagiti annacco a babbai manipud iti pungto ti daga;

7 Tunggal maysa a magaladan iti naganco: ta pinarsuac isuna a maipaay iti dayagco, isu a binukelco; wen, inaramidco isuna.

8 ¶ Iparangmo dagiti bulsec a tattao nga adda matada, ken dagiti tuleng nga adda lapayagda.

9 Maurnong coma dagiti amin a nasnacion, ken dagiti inilin-ili matipontiponda coma: asino cadacuada ti macabalin a mangipalgac itoy, ken mangiparang cadagiti immun-una a banbanag cadatayo? iyegda coma dagiti sacsida, tapno majustificarda: wenno denggenda coma, ken cunaenda, Isu ti pudno.

10 Dacayo dagiti sacsic, cuna iti APO, ken ti adipenco a pinilic: tapno maammoanyo ken patiendac, ken maawatanyo a siac daydiay: iti casacbayac awan iti Dios a nabukel, ken awanto met iti sumaruno caniac.

11 Siac, siac met laeng, iti APO; ket malacsid caniac awan ti mangisalacan.

12 Impablaacco, ken insalacanco, ken impakitac, idi awan ti sabali a gangannaet a dios cadacayo: gapuna a dacayo dagiti sacsic, cuna iti APO, a siac iti Dios.

13 Wen, nanipud pannacaadda ti aldaw siac daydiay; ket awan a pulos ti macalapsut iti imac: agaramidac, ket asino ti macatiped?

14 ¶ Casta ti cuna iti APO, ti mannubbotyo, ti Santo Ti Israel; Gapu cadacayo nagbaonac iday Babilonia, ket inyulogco amin dagiti natan-ocda, ken dagiti Caldeos, a nagun-unnoyda idiay luglugan iti taaw.

15 Siac iti APO, ti Nasantoanyo, ti namarsua iti Israel, ti Ariyo.

16 Casta ti cuna iti APO, a mangaramid ti dalan iti taaw, ken maysa a dan-a cadagiti mannacabalin a dandanum;

17 Isu a mangiruar iti lugan ken cabalyo, ti buyot ken ti pigsa; agpasagdanto amin, saandanto a bumangon: napucawdan, naiddepda a cas iti micha.

18 ¶ Dicayo laglagipen dagiti immun-una a banbanag, ket dicayo met panunoten dagiti daan a banbanag.

19 Adtoy, agaramidacto iti baro a banag; tumpuarto itan; dicayto aya maammoan? Mangicabilacto pay iti maysa a dalan iti let-ang, ken carcarayan iti langalang.

20 Dagiti animal iti away dayawendacto, dagiti dragons ken dagiti avestruz: gapu ta itdec dagiti danum iti let-ang, ken carcarayan iti langalang, tapno uminum ti ilic, a pinilic.

21 Daytoy nga umili binukelco a maipaay caniac; iparangarangdanto ti pannacaidayawco.

22 ¶ Nupay casta sica dinac inawagan, O Jacob; ngem sica napacsuyanca caniac, O Israel.

23 Dica nangyeg caniac dagiti babassit nga animalmo a maipaay a daton nga mapuoran; dinac met dinayaw cadagiti sacrificiom. Saanca pinaawitan nga agservi ti maidaton, wenno binannogca iti incienso.

24 Sica dinac ingatangan ti nasam-it nga unas iti pirac, ket dinac met pinennec iti taba dagiti datonmo: no di ket sica pinadagsenannac cadagiti basbasolmo, sica binannognac cadagiti kinadangkesmo.

25 Siac, siac met laeng, daydiay nangpunas cadagiti labsingmo gapu caniac met laeng, ket diacto lagipenen dagiti basbasolmo.

26 Ipalagipmo caniac: agsinnurotanta: iparangmo ti panggepmo, tapno mapalintegca.

27 Ti immuna nga ammam nagbasolda, ken dagiti mangisursuro kenca simmalungasingda caniac.

28 Gapuna nga tinulawac dagiti pangpanguloen ti santuario, ket inyawatco ni Jacob iti pannacailunod, ken ti Israel iti pacaibabainan.


CAPITULO 44




1 Ita ngarud denggem, O Jacob nga adipenco; ken Israel, a pinilic:

2 Castoy ti kinuna iti APO a nangaramid kenca, ken nangbukel kenca nanipud iti tian, isu a mangtulongto kenca; Dica agbuteng, O Jacob, nga adipenco; ken sica, Jeshurun, a pinilic.

3 Ta ibucbocacto ti danum iti mawaw, ken ay-ayus ti danum iti rabaw ti namaga a daga: Iparucpocconto ti espirituc iti putotmo, ken ti bendicionco iti caputotam:

4 Ket tumpuardanto a cas iti tengnga ti carootan, a casla cayo a narucbos iti denna dagiti dandanum.

5 Ti maysa cunaennato, Cucuanac iti APO; ket ti sabali panagananto ti bagina iti nagan ni Jacob; ket ti sabali isuratnanto iti imana ti maipaay ken iti APO, ken galadannanto ti bagina iti nagan nga Israel.

6 Castoy ti cuna iti APO nga Ari ti Israel, ken ti mannubbot kencuana ti APO dagiti buybuyot; Siac ti immuna, ken siac ti camaudianan; ket awan ti Dios no di la sisiac.

7 Ket siasino, ti cas caniac, a mangayabto, ken mangipablaacto, ken mangurnosto a maipaay caniac, nanipud panangisaadco cadagiti immun-una a tattao? ken dagiti banbanag nga um-umay, ken dagiti mapasamacto, ipablaacda coma cadacuada.

8 Dicayo agbuteng, ket dicayo met umamac: diac aya impablaac kenca idi unana, ken impakita? ket dacayo dagiti sacsic. Adda aya sabali a Dios no saan laeng a siac? wen, awan ti Dios; awan nga pulos iti ammoc.

9 ¶ Dagiti mangbukel iti kinitikitan a ladawan isuda amin ubbawda; ket dagitoy a banbanag a pagay-ayatanda saanto a manggungona; ken isuda dagiti sacsida met laeng; saanda a macakita, wenno ammo; tapno dagidiay maibabaindanto.

10 Asino ti nangbukel iti maysa a dios, wenno nangsucog iti maysa a nakitikitan a ladawan nga awan a pulos ti pagpapaayanna?

11 Adtoy, amin a cadduana maibabaindanto: ken dagiti agar-aramid, tattaoda: maurnongda coma amin nga nagtitipon, tumacderda coma; nupay casta umamacdanto, ken maibabaindanto a padapada.

12 Ti mammanday agraman sipitna ket agpanday cadagiti beggang, ket ti martillo ti pangbukelna, ken aramidenna babaen iti napigsa nga imana: wen, isu agbisin, ken ti pigsana cumapuy: saan nga uminum ti danum, ket mapacsuyan.

13 Ti allawagi mangyunnat iti maysa a paltic; markaanna iti maysa nga uged; iti catam ti pangtabasna, ket bukelenna iti compas, ket aramidenna a cas iti ladawan ti tao, cas mayannurot iti pintas ti maysa a tao; tapno agtaeng iti balay.

14 Isu pucanenna dagiti cedro, ken alaenna ti encina ken lugo, a mangpatibker kencuana cadagiti caycayo iti cabakiran: mangimula isuna iti parwa, ket taraonan ti tudo.

15 Ket iti casta aramatento ti maysa a tao a pangpuor: ket mangalanto, ken aginudo; wen, pasgedanna, ken agluto iti tinapay; wen, mangaramid iti maysa a dios, ket pagdayawanna; isu ti aramidenna a maysa a kinitikitan a ladawan, ket pagparintumenganna.

16 Puoranna ti sangcapaset ti cayo iti apuy; iti pannacaaramat ti sangcapaset mangan iti lasag; mangitono iti tinono a sidaen, ket mabussog: wen, aginudo, ken kunana, Ah, bimmaraac, nakitac ti apuy:

17 Ket ti matda aramidenna a maysa a dios, nga isu ti kinitikitan a ladawanna: isu agrucbab itoy a ladawan, ken agdayaw, ken agcararag kencuana, ket kunana, Isalacannac; ta sica ti diosco.

18 Isuda saanda nga naammoan wenno naawatan: ta inabbonganna dagiti matada, tapno dida macakita; ken dagiti pusoda, tapno dida macaawat.

19 Ken awan ti mangutob iti pusona, ket awan met ti pannacaammo wenno pannacaawat nga agcuna, Pinuorac ti sangcapasetna daytoy iti apuy; wen, naglutoac iti tinapay iti rabaw dagiti beggangna; nangitonoac iti lasag, ket sindac: ket aramidecto aya ti matda kencuana a maysa a kinarimon? agrucbabacto pay aya iti puted ti maysa a cayo?

20 Isu agtaraon iti dapu: ti naallilaw a puso ti nangpabaw-ing kencuana, ket dina maisalacan ti cararruana, ken dina met cunaen, Awan aya ti ulbod iti makincanawan nga imac?

21 ¶ Laglagipem dagitoy, O Jacob ken Israel; ta sica ti adipenco: siac inaramidca; sica ti adipenco: O Israel, saancanto a malipatan.

22 Siac pinucawco, a casla ulep a napuscol, dagiti salungasingmo, ken, cas maysa nga ulep, dagiti basbasolmo: agsublica caniac; ta siac sinubbotca.

23 Agcantacayo, O langlangit, ta iti APO inaramidna daytoy: agriawcayo, nababbaba a disdisso ti daga: pumgaaccayo nga agcanta, dacayo a banbantay, O bakir, ken tunggal cayo kencuana: ta iti APO sinubbotna ni Jacob, ken impadayagna isuna iti Israel.

24 Castoy ti cuna iti APO, ti mannubbotmo, ken nangbukel kenca nanipud iti aanacan, Siac iti APO a mangaramid cadagiti amin a banbanag; a nangisacnap dagiti langlangit a sisiac; ken nangiyaplag iti daga a sisiac;

25 A mangdadael cadagiti pagilasinan dagiti managulbod, ken mamagpungtot cadagiti mammadles; ken mangbalictad cadagiti mamasirib a tattao, ken mangaramid iti pannaca-ammoda a kinamaag;

26 A mamanecnec iti sao iti adipenna, ken manungpal iti balacad dagiti babaonenna; nga agcuna iti Jerusalem, Sica matagitaoanto; ken cadagiti il-ili ti Juda, Dacayo mapatacdercayonto, ken bangonecto dagiti narnarba a disdissona:

27 Nga agcuna iti yuyeng, Agmagaca, ken pagmagaecto dagiti carcarayanmo:

28 Nga agcuna maipapan ken Ciro, Isu ti pastorco, ken aramidennanto amin a pagayatac: kunana met pay iti Jerusalem, Sica mabangonto; ken iti templo, Ti pamuonmo maisaadto.


CAPITULO 45




1 Castoy ti cuna iti APO iti pinulotanna, ken Ciro, a ti imana a macanawan pinetpetac, a mangparucma cadagiti nasnacion iti sangoananna; ket bucraacto dagiti

lomlomo dagiti ar-ari, tapno manglucat cadagiti ruruangan iti sangoananna; ket dagiti ruruangan saandanto a maripcan;

2 Mapanacto iti sangoanam, ket palanasecto dagiti nakillo a disdisso: burburakecto dagiti gambang a ruruangan, ket putdecto dagiti balbalunet a landoc:

3 Ket itedconto kenca dagiti gupgupit ti kinasipnget, ken gameng a nailemmeng cadagiti nalimed a disdisso, tapno sica maammoam a siac, iti APO, a mangayab kenca iti naganmo, siac met laeng iti Dios ti Israel.

4 Gapu ken ni Jacob nga adipenco, ken Israel a pinilic, Siac inayabanca babaen iti naganmo: siac ginaladanca, nupay no dinac am-ammo.

5 ¶ Siac iti APO, ket awanen ti sabali pay, awan ti Dios no di la sisiac: siac binaricsanca, nupay no saannac nga am-ammo:

6 Tapno isuda maammoanda manipud iti irurusingan ti init, ken manipud iti laud, nga awan ti sabali no di la sisiac. Siac iti APO, ket awanen ti sabali.

7 Siac parnuayec ti lawag, ken parsuaec ti sipnget: aramidec ti talna, ket parsuaec ti pagdacsan: siac iti APO a mangaramid amin cadagitoy.

8 Ibucbucyo, dacayo langlangit, manipud ngato, ket dagiti tangatang agibucbocda coma ti kinalinteg: aglucat coma ti daga, tapno lumtuad coma iti pannacaisalacan, ken makigiddan coma a tumpuar ti kinalinteg; siac iti APO a namarsua kencuana.

9 Asi pay daydiay makiringgor iti Nangaramid kencuana! Dagiti nakersang a pagdamilian makiringgor coma cadagiti nakersang a damili iti daga. Ti pila cunaenna ngata iti mangdamili kencuana, Ania ti aramidem? wenno ti inaramidmo, Awan ti im-imana?

10 Asi pay daydiay agcuna iti amana, Ania ti pinutotmo? wenno iti babai, Ania iti impasngaymo?

11 Castoy ti cuna iti APO, ti Santo Ti Israel, ken ti Nangaramid kencuana, Intuodem caniac dagiti banbanag nga umayto a maipanggep cadagiti annacco, ken maipanggep iti aramid dagiti im-imac bilinennac.

12 Inaramidco ti daga, ken pinarsuac ti tao iti rabawna: Siac, dagiti im-imac met laeng, binistradco dagiti langlangit, ket binilinco amin dagiti buybuyotda.

13 Isu binangonco iti kinalinteg, ket isurocto amin dagiti daldalanna: bangonennanto ti ilic, ket palubosannanto nga agawid dagiti kinayawac, saan a gapu iti gatad wenno gunggona, cuna iti APO dagiti buybuyot.

14 Castoy ti cuna iti APO, Ti aramid ti Egipto, ken ti tagilaco ti Etiopia ken Sabeos, tattao a natayag, umaydanto kenca, ket cucuamto ida: sumurotdanto kenca; umaydanto a sicacawar, ket agrucbabdanto kenca, agcararagdanto kenca, a kunada, Agpayso nga adda kenca ti Dios; ket awanen ti sabali, awan ti sabali a Dios.

15 Pudno a sica ti Dios nga mangilimed ti bagim, O Dios ti Israel, ti Mangisalacan.

16 Isuda maibabaindanto, ken marirudanto pay, isuda amin: mapandanto iti pannacariru nga agcucuyog dagiti agar-aramid cadagiti didiosen.

17 Ngem ti Israel isalacanto iti APO iti agnanayon a pannacaisalacan: saancayto a maibabain wenno mariru iti lubong nga awan iti patinggana.

18 Ta castoy ti cuna iti APO a namarsua cadagiti langlangit; ti Dios a nangbukel ti daga ken nangaramid kencuana; isu a nangpasingked kencuana, ken pinarsuana nga saan nga ubbaw, binukelna tapno isu ket pagnaedan: Siac iti APO; ket awanen iti sabali.

19 Saannac a nagsao iti nalimed, iti maysa a disso iti daga ti kinasipnget: saanco a kinunana iti bin-i ni Jacob, Sapulendac nga awan ti pagmaayanna: Siac iti APO agsaoac iti kinalinteg, ipablaacco dagiti banbanag nga nalinteg.

20 ¶ Aggu-urnongcayo ken umaycayo; umasidegcayo nga agcucuyog, dacayo a nacatalaw cadagiti nasnacion: awanan pannacaammo dagidiay nga agawit ti cayo ti kinitikitan a ladawanda, ken agcararagda iti maysa a dios a dina mabalin ti mangisalacan.

21 Ipablaacyo, ken iyasidegyo ida; wen, agpipinnatigmaanda coma: asino ti nangipakita iti daytoy nanipud idi ugma? asino ti nangipablac itoy idi a pannawen? saan a siac aya iti APO? ket awan ti sabali a Dios no di la sisiac; maysa a nalinteg a Dios ken maysa a Mangisalacan; awanen ti sabali no di la sisiac.

22 Kitaendac, ket maisalacancayo, amin a pungto ti daga: ta siac ti Dios, ket awanen ti sabali.

23 Nagsapataac caniac met laeng, ti sao rimmuar iti ngiwatco iti kinalinteg, ket saanto nga maisubli, A tunggal tumeng agparintumengto caniac, ken tunggal dila agsapatanto.

24 Kinapudnona, maysanto ti agsao, ken iti APO ti puon ti kinalintegco ken kinapigsac: kencuana met laeng dagiti tattao umaydanto; ken amin dagiti gumura kencuana maibabaindanto.

25 Ken iti APO ti amin a bin-i ti Israel mapalintegto, ken maiglorianto.


CAPITULO 46




1 Ni Bel agrucob, ni Nebo agdumog, dagiti ladladawan a diosda adda iti rabaw dagiti an-animal, ken iti rabaw dagiti bacbaca: dagiti lugluganyo nadagsen unay ti cargada; dadagsen ida iti nabannog nga animal.

2 Agdumogda, agrucobda nga agcaycaysa; dida nabalin ti aglisi iti dadagsen, no di ket isuda met laeng napanda iti pannacacayaw.

3 ¶ Dumngegcayo caniac, O balay ni Jacob, ken amin a tidda iti balay ti Israel, nga inawitco nanipud iti pannacayanacda, a naaw-awit nanipud iti aanacan:

4 Ken agpapan pay iti kinalacayyo siac daydiay; ken agpapan pay iti panaguban awitencayto: inaramidco, ket awitecto; wen awitecto pay, ken isalacancanto.

5 ¶ Asino ti pangipadisanyonto caniac, ken pangipadpadanyo caniac, ken pangyariganyo caniac, tapno mabalinmi coma ti agpada?

6 Agirruarda a sibubuslon ti balitoc iti supot, ken timbangenda ti pirac iti cacatian, ken manangdanda iti maysa a mammanday iti balitoc; ket aramidenna daydiay iti maysa a dios: agpaclebda, wen, agdaydayawda.

7 Isu ti baclayenda iti abaga, ket awitenda, ken isaadda iti dissona, ket isu agtacder; saanto nga umalis iti lugarna: wen, maysa a tao ti umawag kencuana, nupay casta saan a macasungbat, ken dina met maisalacan iti pacarigatanna.

8 Laglagipenyo daytoy, ket iparangarangyo a dacayo ket lallakicayo: sublianyo manen a panunoten, O dacayo a managsalungasing.

9 Laglagipenyo dagiti immuna a banbanag idi ugma: ta siac ti Dios, ket awanen ti sabali; siac ti Dios, ket awanen iti pumada caniac,

10 Nga ipalawagco ti panungpalan manipud iti pangruggian, ken manipud idi unana a pannawen dagiti banbanag a saan pay idi a naaramid, a cunaec, Ti patigmaanco mataginayonto, ken aramidecto amin a pagayatac:

11 Nga ayabac ti maysa a narawet a tumatayab nga aggapu iti daya, ti tao a mangaramid iti patigmaanco manipud adayu a daga: wen, insaocon, aramidecto met ti pannacatungpalna; pinanggepco, ket aramidecto met.

12 ¶ Ipangagdac, dacayo nga nalucmeg ti puspusona, nga adayu iti kinalinteg:

13 Iyasidegco ti kinalintegco; saanto unay nga adayu, ken ti panangisalacanco saanto nga agtactac: ket isaadconto ti panangisalacan idiay Sion a maipaay iti Israel a dayagco.


CAPITULO 47




1 Umulogca, ken agtugawca iti tapoc, O birhen nga anac ti Babilonia, agtugawca iti daga: nga awan trono, O anac a babai dagiti Caldeos: ta sica saancanton a managanan nalucneng ken naganus.

2 Alaem dagiti bato a paggilingan, ket aggilingca iti bellaay: iccatem ta dalungdungmo, ucsobem ti pasinggayadmo, lislisam ta gurongmo, ballasiwem dagiti carcarayan.

3 Ti kinalamolamom malucasanto, wen, ket ti ibainmo makitanto: bumalesacto, ket saancanto a casango a cas tao.

4 No maipapan ti mannubbottayo, ti APO dagiti buybuyot ti naganna, ti Santo Ti Israel.

5 Agtugawca a siuulimec, ken sumrecca iti kinasipnget, O anac a babbai dagiti Caldeos: ta saancanto a managananen, Ti apo a babai dagiti pagpagarian.

6 ¶ Nagungetac iti ilic, minulitac ti tawidco, ken intedco ida ita imam: dica ida pinakitaan iti panangngaasi; dagiti lallacay impataymo cadacuada iti nadagsen unay nga sangolmo.

7 ¶ Ket kinunam, Siacto ti apo a babai nga agnanayon: iti casta a dica impapuso dagitoy a banbanag, ket dica met linagip ti maud-udi a pagtungpalanna.

8 Ita ngarud denggem daytoy, sica a nayawat cadagiti ragragsac, nga agnanaed a sitatalged, a cunam ita pusom, Siac, ket awanen ti sabali no di la sisiac; saanacto nga agtugaw a cas maysa a balo a babai, ket diacto met maammoan ti pannacapucaw dagiti annac:

9 Ngem dagitoy dua a banag dumtengdanto kenca a kellaat iti maysa nga aldaw, ti pannacapucaw dagiti annac, ken ti pannacabalo: dumtengdanto kenca iti kinaan-anay iti kinaadu ti panagan-anitom, ken iti kinawadwad unay a kinabaglanmo.

10 ¶ Ta sica nagtalcam ti kinadangkesmo: sica kinunam, Awan ti macakita caniac. Ti kinasiribmo ken ti pannacaammom, inallilawdaca; ket sica kinunam ita pusom, Siac, ket awanen ti sabali no di la sisiac.

11 ¶ Gapuna a ti dakes umayto kenca; dicanto maammoan ti pagleggacanna: ket ti ranggas agtinnagto kenca; dicanto mabaelan nga iccaten: ken ti pannacalangalang dumtengto kenca a kellaat, a dica maammoan.

12 Tumacderca ita agraman cadagiti kinabaglanmo, ken iti kinaadu dagiti panagan-anitom, nga isuda dagiti nagbanbannogam nanipud idi kinaubingmo; no bareng macagun-odca iti gunggona, no iti casta bareng mangabacca.

13 Nabannogca iti kinaadu ti pammatigmaanmo. Ita dagiti astrologos, dagiti agpaliiw cadagiti bitbituen, dagiti agpangta iti binulanbulan tumacderda coma, ket isalacandaca cadagiti banbanag a dumtengto kenca

14 Adtoy, casdanto la punget ti cayo; ti apuy uramennanto ida; didanto mailisi isuda iti pigsa ti darang: awanto ti matda a beggang a paginudoan, wenno apuy nga iti sangona ket pagtugawan.

15 Castoyto ti pagmaayanda kenca dagiti banbanag a nagbanbannogam, uray dagiti nagtagtagilaco kenca, nanipud idi kinaubingmo: agtawtawatawdanto tunggal maysa iti pagnaedanna; awanto ti mangisalacan kenca.


CAPITULO 48




1 Denggenyo daytoy, O balay ni Jacob, a mapanaganan iti nagan ti Israel, ken nagtaud cadagiti dandanum ti Juda, dacayo nga agsapata iti nagan iti APO, ken mangipalagip iti Dios ti Israel, ngem saan nga iti kinapudno, ken saan met nga iti kinalinteg.

2 Ta naganenda ti bagida a tattaoda iti santo nga ili, ken agsadagda iti Dios ti Israel; Ti APO dagiti buybuyot ti naganna.

3 Impablaacco dagiti immuna a banbanag nanipud idi damo; ket rimmuarda iti ngiwatco, ken imparangco ida; inaramidco nga kellaat, ket natungpalda.

4 Agsipud ta ammoc idi a natangkenca, ket ti tengngedmo isu ti piskel a landoc, ken ti mugingmo gambang;

5 Uray pay idi unana impablaacco kencan; idi saan pay a naaramid impakitacon kenca: di la ket ta cunaem, Ti didiosec inaramidna ida, ken ti kinitikitan a ladawanco, ken ti sinucog a ladawanco, binilinda ida.

6 Sica nangngegmon, mamatmatanyo amin daytoy; ket dicayo aya ipablaac? Impakitac kenca dagiti babbaro a banbanag manipud itoy a pannawen, uray pay dagiti nailemmeng a banbanag, ngem dica ida naammoan.

7 Naparsuada itan, ket saan a nanipud idi damo; uray pay idi sacbay daytoy nga aldaw idi dica pay nangngegan; di la ket ta cunaem, Adtoy, ammoc idan.

8 Wen, dica nangngegan; wen, dica naammoan; wen, nanipud idi unana a ti lapayagmo saanpay a naluctan: ta ammoc idi nga agaramidca a sililiput unay, ket nanagananca ti managsalungasing nanipud iti aanacan.

9 ¶ Gapu iti naganco pagtantanec ti ungetco, ken gapu iti dayawco igawidco maigapu kenca, tapno saanca pay a keltayen.

10 Adtoy, siac ginugoranca, ngem saan a ti pirac; pinilica iti horno ti pacarigatan.

11 Gapu caniac, uray pay gapu caniac, aramidecto: ta casano coma ti pannacatulaw ti naganco? ken diacto ited ti dayagco iti sabali.

12 ¶ Dumngegcayo caniac, O Jacob ken Israel, nga inayabac; Siac daydiay; Siac ti umuna, Siac met ti camaudianan.

13 Ti imac insaadna ti pamuon ti daga, ken ti imac a macanawan insacnapna dagiti langlangit: no ayabac ida, sangsangcagiddanda a tumacder.

14 Dacayo amin, agtatallaongcayo, ket denggenyo; asino cadacuada ti mangipablaacto cadagitoy a banbanag? Ti APO inayatna isuna: aramidennanto ti pagayatanna iti Babilonia, ken ti tackiagna maipatayto cadagiti Caldeos.

15 Siac, siac met laeng, sinaocon; wen, isu ti inayabac: isu ti inyegco, ket isu aramidennanto a narang-ay ti dalanna.

16 ¶ Umasidegcayo caniac, denggenyo daytoy; nanipud idi pungaynay saanac a nagsao iti nalimed; nanipud idi pannawen a kinaaddana, addaac idiay: ket ita ni Apo DIOS, ken ti Espirituna, imbaonnac.

17 Castoy ti cuna iti APO, ti Mannubbotmo, ti Santo Ti Israel; Siac iti APO a Diosmo a mangisuro kenca a maipaay iti gunggonam, a mangiturong kenca iti dalan a papanam coma.

18 O no dinengngegmo coma dagiti bilbilinco! iti casta ti talnam cas coma iti maysa a carayan, ken ti kinalintegmo casla coma ti daldalluyon ti baybay:

19 Ti bin-im ket casla met coma iti darat, ken ti putot ti tianmo casda la coma iti caadu ti darat; ti naganna saan coma a nakeltay wenno nadadael iti sangoanac.

20 ¶ Magnacayo manipud Babilonia, italawanyo dagiti Caldeos, ipablaacyo babaen ti timec ti panagcanta, ibagayo daytoy, ipuccawyo agingga iti pungto ti daga; cunaenyo, Ti APO sinubbotna ni adipenna a Jacob.

21 Ket dida nawaw idi inturongna ida nga inlasat cadagiti langlangalang: pinaayusna dagiti dandanum a naggapu iti bato a maipaay cadacuada; pinisina met ti bato, ket dagiti dandanum pimsuacda.

22 Awan iti talna, cuna iti APO, cadagiti nadangkes.


CAPITULO 49




1 Denggem, O purpuro, denggendac; ken dumngegcayo, dacayo nga tattao, manipud adayu; Ti APO inayabannac nanipud iti aanacan; nanipud iti tian ni inac nasasaonan iti naganco.

2 Ket inaramidna ti ngiwatco a cas maysa a campilan a natadem; iti anniniwan ti imana inlemmengnac, ken inaramidnac a maysa a napasileng nga putan; iti tagubanna indulinnac;

3 Ket kinunana caniac, Sica ti adipenco, O Israel, a kencuana pacaitantan-ocacto.

4 Idin kinunac, nagbannogac nga awan ti papaayna, inibusco ti pigsac a maipaay iti awan, ken iti kinaubbaw: nupay casta kinapudnoanna ti kinajusticia a rumbeng caniac adda ken iti APO, ken ti aramidco adda ken iti Diosco.

5 ¶ Ket ita, cuna iti APO a nangaramid caniac nga adipenna nanipud iti aanacan, tapno pagsubliec kencuana ni Jacob, Uray pay no ti Israel saan nga maurnong, nupay casta mapadayagacto cadagiti mata iti APO, ket ti Diosco isunto iti pigsac.

6 Ket kinunana, Bassit unay a banag ti panagbalinmo nga adipenco a mamangon cadagiti caputotan ni Jacob, ken mangisubli dagiti naaywanan iti Israel: Itedcanto met a silaw cadagiti Gentil, tapno macapagbalinca a pangisalacanco agingga iti ungto ti daga.

7 Castoy ti cuna iti APO, ti Mannubbot ti Israel, ken Ti Santona, isu nga um-umsien ti tao, isu a guraen ti nacion, iti maysa nga adipen dagiti agtuturay, Dagiti ar-ari makitadanto ken tumacderdanto, dagiti panguloen ket agdayawdanto met, gapu ken iti APO a matalec, ket ti Santo Ti Israel, ket piliennacanto.

8 Castoy ti cuna iti APO, Iti pannawen a maitutop dinengngegca, ken iti aldaw ti pannacaisalacan binadanganca: ket idulincanto, ken itedcanto a maipaay a tulag cadagiti tattao, a mamasingked iti daga, ken mamagtawid cadagiti nalangalang a tawtawid;

9 Tapno inca cunaem cadagiti nabalud, Rummuarcayo; dagiti adda iti kinasipnget, Agparangcayo. Agarabdanto cadagiti daldalan, ket dagiti pagpaarabanda ket idiayto ayan ti amin a nangangato nga disdisso.

10 Saandanto a mabisinan wenno mawaw; saanto met a cabilen idan ti pudot ken init: ta daydiay adda caasina cadacuada iturongnanto ida, uray pay ti denna ti ubbog ti danum ti pangidalanannanto cadacuada.

11 Ket aramidecto amin a banbantayco a dalan, ken dagiti napatac a daldalanco maitan-ocdanto.

12 Adtoy, dagitoy dumtengdanto nga aggapu iti adayu: ket, adtoy, dagitoy manipud iti amianan ken manipud iti laud; ken dagitoy manipud iti daga ti Sinim.

13 ¶ Agcantacayo, O langlangit; ken agragsacca, O daga; ken pumgaaccayo iti panagcanta, O banbantay: ta iti APO liniwliwana ti ilina, ken caasiannanto dagiti naparigatan a tattaona.

14 Ngem ti Sion kinunana. Iti APO binaybay-annac, ket ti Apo nalipatannac.

15 Mabalinan aya ti maysa a babbai a lipatan ti maladagana nga agsussuso, a dina ket coma caasian ti anac ti aanacanna? wen, dagitoy mabalin a macalipatda, ngem saanac a macalipat kenca.

16 Adtoy, inkitikitca iti daculap dagiti im-imac; dagiti bacudmo addada nga agnanayon iti sangoanac.

17 Dagiti annacmo agpardasda; dagiti nangracrac kenca ken dagiti nangdadael kenca adayuandacanto.

18 ¶ Itangadmo dagiti matam iti aglicmut, ken matmatam: amin dagitoy aggu-urnongda, ket umayda kenca. Cas sibibiagac, cuna iti APO, awan duduana nga agcawescanto cadacuada amin, a cas maysa nga arcos, ken ibarikesmo ida, a cas aramiden ti maysa a novia.

19 Ta no maipapan iti naglangalang ken ti narba a dissom, ken ti daga a nacadadaelam, awan duadua nga ita mailetancanto unay gapu cadagiti agnaed kencuana, ken dagiti nangalun-on kenca ayadayudanto.

20 Dagiti annac a maadda kenca, calpasan iti pannacapucawmo ti maysa, cunaendanto pay manen cadagiti lapayagmo, Ti disso nailet unay caniac: iccannac ti pagyanan tapno macapagtaengac.

21 Iti casta cunaenton iti pusom, Asino ti nangipasngay dagitoy caniac, idinto a naulilaac cadagiti annacco, ken agwaywayasac, maysaac a nacayawan, ken agalis-alis didiay ken ditoy? ket asino ti nangtagibi cadagitoy? Adtoy, nabaybay-anac a maymaysa; dagitoy, sadino ti naggapuanda?

22 Castoy ti cuna ni Apo DIOS, Adtoy, itayagconto ti imac cadagiti Gentil, ken ibayogconto ti wagaywayco cadagiti tattao: ket iyegdanto dagiti annacmo a lallaki cadagiti tackiagda, ken dagiti annacmo a babbai cadagiti ab-abagada.

23 Ket dagiti ar-ari isudanto dagiti mangtagibi nga ammam, ket dagiti reinada ti mangtagibi nga innam: ket irucobdanto dagiti ruprupada kenca iti daga, ken dilpatandanto ti tapoc dagita sacsacam; ket maammoamto a siac iti APO: ket saandanto a mabainan dagiti agpannuray caniac.

24 ¶ Maiccatto aya ti samsam cadagiti napigsa, wenno ti nalinteg ti pannacacayawna maluc-atan?

25 Ngem castoy ti cuna iti APO, Uray dagiti nacayawan ti napigsa maipanawto, ken ti sinamsam ti nacakigkigtot maisalacanto: ta makisuppiatacto iti dayta makisuppiat kenca, ken isalacanconto dagiti annacmo.

26 Ken pacanecto dagiti mamarigat kenca iti lasagda met laeng; ken mabartecdanto iti darada met laeng, a cas nasam-it nga arac: ket isuamin a lasag maammoamnanto a siac iti APO ti Mangisalacanmo ken Mannubbotmo, ti Mannacabalin ni Jacob.


CAPITULO 50




1 Castoy ti cuna iti APO, Sadino ti ayan ti surat ti pannakisina ni inam, nga isu ti namagtalawac kencuana? wenno asino cadagiti nacautangac ti nangilacoac cadacayo? Adtoy, nailacocayo gapu cadagiti kinadangkesyo, ken gapu cadagiti panaglabsingyo napagtalaw ni inayo.

2 Apay ngarud, nga idi immayac, nga awan ti tao? idi immayabac, awan ti simmungbat? Napaababa aya ti imac, tapno saanna a mabalin ti mannubbot? wenno awan aya ti pannacabalinco a mangisalacan? adtoy, iti panangtubngarco paatianac ti baybay, aramidec dagiti carcarayan a let-ang: dagiti icanda agbuyocda, ta awan ti danum, ket matayda iti waw.

3 Cawesac dagiti langlangit iti kinasipnget, ken aramidec ti lupot a nakersang nga abbongda.

4 Ni Apo DIOS intedna caniac ti dila dagiti nasursuroan, tapno maammoac coma ti rumbeng a tiempona no casano ti agsao iti sao iti daydiay nabannogan: isu agriing a biniganbigat, isu riingenna ti lapayagco a pagdengngeg a cas cadagiti nasursuroan.

5 ¶ Ni Apo DIOS linuctanna ti lapayagco, ket saannac a nagsukir, ken diac met timmallicud.

6 Intayac ti bucotco cadagiti mangcabil, ket dagiti pingpingco insangoc cadagiti agparparut iti booc: diac inlinged ti rupac iti pannacaibabain ken pannacatupra.

7 ¶ Ta ni Apo DIOS badangannacto; gapuna a diac nariribuc: iti casta insaadco ti rupac a cas pamulinawen, ket ammoc a saannacto a maibabain.

8 Adda nga asideg ti mangpalinteg caniac; asino ti makisusic caniac? agtacdertayo coma nga agcaycaysa: asino ti cabusorco? umasideg coma caniac.

9 Adtoy, ni Apo DIOS tulongannacto; asino aya dayta a mangocom caniac? adtoy, isuda amin casda la pagan-anay a dumaandanto; ti sanga ibusennanto ida.

10 ¶ Asino ti adda cadacayo nga agbuteng iti APO, nga agtulnog iti timec ti adipenna, a magmagna iti kinasipnget, ken awan ti silawna? agtalec coma iti nagan iti APO, ken agtalinaed iti Diosna.

11 Adtoy, dacayo amin a mangpasged iti apuy, a lawlawenyo dagiti bagiyo cadagiti aluten: magnacayo iti silaw ti apuyyo, ken dagiti aluten a pinasgedanyo. Daytoy awatenyonto iti imac; agiddacayto iti ladingit.


CAPITULO 51




1 Denggendac, dacayo a sumursurot iti kinalinteg, dacayo nga agsapsapul ken iti APO: cumitacayo iti bato a nacatippinganyo, ken iti disso ti abut a nacacalianyo.

2 Cumitacayo ken ni Abraham nga amayo, ken casta met ken ni Sara a nangipasngay cadacayo: ta inayabac isuna a maymaysa, ket binendicionac, ken isu pinaaduc.

3 Ta iti APO liwliwaennanto ti Sion: liwliwaenna dagiti amin a dissona a nalangalang; ket aramidennanto dagiti let-angna a casla Eden, ken ti cadaratan a tay-acna a cas minuyongan ti APO; rag-o ken ragsac masaracanto idiay, panagyaman, ken ti timec ti naespirituan a canta.

4 ¶ Ipangagdac, dacayo nga ilic; ken timudendac, O nacionco: ta maysa a bilin ti agtaudto caniac, ket isaadconto ti kinalintegco a maipaay a silaw iti ili.

5 Ti kinalintegco asideg; ti panangisalacanco rimmuaren, ken dagiti tackiagco ocomendanto dagiti inilin-ili; dagiti purpuro urayendacto, ken agtalecdanto cadagiti tackiagco.

6 Itangadyo dagiti matayo cadagiti langlangit, ken cumitacayo iti baba ditoy daga: ta dagiti langlangit mapucawdanto a cas asuc, ken ti daga dumaanto a cas iti pagan-anay, ket dagiti agtaeng kencuana mataydanto met a casta: ngem ti panangisalacanco agnanayonto, ket ti kinalintegco saanto a mapucaw.

7 ¶ Dumngegcayo caniac, dacayo a macaammo ti kinalinteg, dagiti tattao a ti pusoda adda ti lintegco; dicayo agbuteng iti panangumsi dagiti tattao, ket dicayo met agcullayaw cadagiti panaguy-uyawda.

8 Ti sanga ibusennanto ida a cas pagan-anay, ken ti igges lamutenna ida a cas lupot a de lana: ngem ti kinalintegco agnanayonto, ken ti panangisalacanco agpaay iti caputotan aginggana iti amin a caputotan.

9 ¶ Agriingca, agriingca, iyusongmo ti kinabileg, O tackiag iti APO; agriingca, a cas cadagidi al-aldaw idi unana, dagidi caputotan idi ugma. Saan a sica aya ti nangrangcay ken ni Rahab, ken nangdunor idi dragon?

10 Saan a sica aya ti nangpamaga iti baybay, dagiti dandanum iti yuyeng; nga aramidem ti kinaadalem ti baybay a maysa a dalan a ballasiwan dagiti nasubbot?

11 Gapuna dagiti sinubbot iti APO agsublidanto, ken umayda nga agcancanta agingga iti Sion; ket ti agnanayon a rag-o agtaengto iti rabaw dagiti uloda: magun-odandanto ti ragsac ken rag-o; ket ti ladingit ken sainnec agtalawdanto.

12 Siac, siac met aleng, daydiay mangliwliwa cadacayo: siasinoca, a mabutengca coma iti tao a matayto, ken iti anac ti tao a maaramidto a casla root;

13 Ket lipatem iti APO a nangaramid kenca, isu a nangisacnap cadagiti langlangit, ken nangisaad iti pamuon ti daga; ket umamacca a cancanayon a gapu iti rungsot ti mamarigat, a cas nacasagana a mangdadael? ket sadino ti ayanna ti rungsot ti mamarigat?

14 Ti nacayawan a nayadayu iti ilina agdardaras tapno maibulos coma, ken tapno saan a matay a bumaba iti dariwangwang, wenno ti taraonna ket macurangan.

15 Ngem siac iti APO a Diosmo, a nangbisngay iti baybay, a dagiti dalluyonna nagungorda: Ti APO dagiti buybuyot ti naganna.

16 Ket incabilco dagiti sasaoc iti ngiwatmo, ken lininonganca iti anniniwan iti imac, tapno maipasdecco dagiti langlangit, ken maisaadco dagiti pamuon ti daga, ken cunaec iti Sion, Sica ti ilic.

17 ¶ Agriingca, agriingca, bumangonca, O Jerusalem, sica nga imminum iti copa ti pungtot iti APO nga adda iti imana; sica imminumca iti malucong ti copa ti panagpigerger, ket isu ti pinespesmo.

18 Awan uray maysa a mangiturong kencuana cadagiti amin nga annac nga impasngayna; ken awan met ti mangibin kencuana cadagiti amin nga annacna a tinagibina.

19 Dagitoy dua a banbanag napasamacda kenca; asino ti nagladingit kenca? panaglangalang, ken pannacadadael, ken bisin, ken campilan: siasino cadagitoy ti pangliwliwacto kenca?

20 Dagiti annacmo natalimudawda, naidalitda iti uloanan dagiti amin a calcalsada, a casda la atap nga baca iti uneg ti bateng: napnoda iti pungtot iti APO, ti panangtubngar ti Diosmo.

21 ¶ Gapuna a denggem ita daytoy, sica a naparigatan, ken nabartec, ngem saan nga iti arac:

22 Castoy ti cuna ti Apom a ti APO, ken Diosmo a mangsalacnib iti biang ti ilina, Adtoy, iniccatco ita imam ti copa ti panagpigerger, uray pay ti malucong ti copa ti pungtotco; dicanto inumenen manen:

23 Ket icabilconto iti ima dagiti namarigat kenca; a nagcuna iti cararruam, Agcul-obca, tapno lumabascami: ket sica insaadmo ta bagim a casla iti daga, ken casla iti calsada, cadacuada nga limmabas kenca.


CAPITULO 52




1 Agriingca, agriingca; iyusongmo ti pigsam, O Sion; iyusongmo ti nasayaat a pagan-anaymo, O Jerusalem, ti nasantoan nga ili: ta manipud ita saanto a sumreken kenca ti saan nga nacugit ken ti saan nga nadalus.

2 Pampagem ta bagim iti tapoc; tumacderca, ken agtugawca, O Jerusalem: warwarem dagiti galgalut ti tengngedmo, O nacayawan a babai nga anac ti Sion.

3 Ta castoy ti cuna iti APO, Inlacoyo dagiti bagbagiyo nga awan ti bayadna; ket masubbotcayonto nga awan ti pirac.

4 Ta castoy ti cuna ni Apo DIOS, Ti ilic simmalog sadi Egipto idi unana tapno agtaeng sadiay; ket ti Asirio pinarigatna ida nga awan ti gapgapuna.

5 Ita ngarud, ania ti adda ditoy, cuna iti APO, a ti ilic naala nga awan ti bayadna? dagiti agturay cadacuada pagtaggu-obenda ida, cuna iti APO; ken ti naganco patinayon a matabbaawan iti tunggal aldaw.

6 Gapuna a ti umili maammoannanto ti naganco: iti casta maammoandanto iti dayta nga aldaw a siac daydiay nga agsasao: adtoy, siac daytoy.

7 ¶ Anian nga naglibnos idiay banbantay dagiti sacsaca ti mangyeg cadagiti naimbag a damdamag, a mangiwarnac iti talna; a mangyeg cadagiti naimbag a damdamag ti kinaimbag, a mangiwarragawag iti pannacaisalacan; a kunana iti Sion, Ti Diosmo agari!

8 Dagiti agbanbantay kenca ipigsadanto ti dir-i; babaen ti dir-i agcantada a sangsangcagiddan: agkikitadanto iti matanmata, intono iti APO isublina manen ti Sion.

9 ¶ Idir-iyo iti rag-o, agcantacayo a sangsangcagiddan, dacayo a nalangalang a disso ti Jerusalem: ta iti APO liniwliwana ti ilina, sinubbotna ti Jerusalem.

10 Iti APO linislisanna ti tackiagna a nasantoan cadagiti matmata dagiti amin a nasnacion; ken amin nga pungto ti daga makitadanto ti panangisalacan ti Diostayo.

11 ¶ Pumanawcayo, pumanawcayo, rummuarcayo sadiay, dicayo mangsagid iti aniaman a banag a di nadalus; rummuarcayo iti tengngana; agdaluscayo, dacayo nga agawit cadagiti al-alicamen iti APO.

12 Ta saancayto a pumanaw nga agganganat, wenno mapan nga agtartaray: ta iti APO mapanto iti sangoananyo; ken ti Dios ti Israel isunto ti agbantay iti licudyo.

13 ¶ Adtoy, ti adipenco agaramidto a sisisirib, maitan-octo ken maibayog, ken isu natan-octo unay.

14 Cas iti kinaadu ti nagmalmalanga kenca; ti langana napalaad unay nga ad-adda ngem iti asinoman a tao, ken ti tabasna ad-adda pay ngem cadagiti annac a lallaki dagiti tattao:

15 Iti casta a warisannanto dagiti adu a nasnacion; dagiti ar-ari apputendanto dagiti ngiwatda kencuana: ta dayta saan a naibaga cadacuada makitadanto; ken ti dayta saanda a nangngeg ket utobendanto.


CAPITULO 53




1 Siasino ti namati iti impadamagmi? ken iti siasino ti nacaiparangarangan ti tackiag iti APO?

2 Ta dumackelto iti sangoananna a cas maysa a naganus a mula, ken cas maysa a ramut nga agtaud iti namaga a daga: isu awan ti buyana wenno sayaatna; ket intono isu makitatayo, awan ti kinaimnasna tapno tarigagayantayo coma.

3 Isu nauy-uyaw ken binaybay-an dagiti tattao; maysa a tao ti ladladingit, ken nacaam-ammo iti liday: ket inlingedtayo dagiti ruprupatayo kencuana; isu ket naum-umsi, ken saantayo nga impatpateg.

4 ¶ Pudno nga isu binaclayna dagiti lidaytayo, ken inawitna dagiti ladingittayo: nupay casta isu impatotayo a nasaplit, nacabil iti Dios, ken napagsagaba.

5 Ngem isu nasugsugat a gapu cadagiti labsingtayo, isu napalitem a gapu cadagiti kinadangkestayo: ti dusa ti pacaicappiaantayo naipatay kencuana; ket gapu cadagiti saplitna maagasantayo.

6 Datayo amin castayla carcarnero a nayaw-awan; nagturong ti tunggal maysa cadatayo iti dalanna met laeng; ket iti APO impatayna kencuana ti kinadakestayo amin.

7 Isu naparigat, ken nagsagaba, ngem saanna nga linuctan ti ngiwatna: naiyeg cas maysa a cordero iti pagpartian, ken cas maysa a carnero a nagumel iti sangoanan dagiti mangpukis kencuana, iti casta saanna nga linuctan ti ngiwatna.

8 Isu naiyalis manipud pagbaludan ken pannacaocom: ket asino ti mangipalgac ti caputotanna? ta isu nakeltay iti daga dagiti sibibiag: gapu iti panaglabsing ti ilic isu ket nasaplit?

9 Ket inaramidna ti tanemna iti denna dagiti managdacdakes, ken iti nabacnang iti ipapatayna; gapu ta saan a nagaramid iti ranggas, wenno aniaman nga panangallilaw iti ngiwatna.

10 ¶ Nupay casta naay-ayo iti APO iti pinangpalitemna kencuana; isu pinalidayna: intono aramidem ti cararruana a maysa a daton iti basol, makitananto ti caputotanna, paatiddugennanto dagiti al-aldawna, ket ti pagayatan iti APO rumang-ayto iti imana.

11 Makitananto ti panagrigat ti cararruana, ket mapnecto: gapu iti pannacaammo kencuana ti nalinteg nga adipenco palintegenanto dagiti adu; ta awitennanto dagiti kinadangkesda.

12 Gapuna nga isu ibingayacto iti sangcaapag cadagiti natan-oc, ket isu bingayennanto ti samsam cadagiti napigsa; gapu ta imbucbocna ti cararruana ken patay: ket naibilang cadagiti managlabsing; ken inawitna ti basol dagiti adu, ken nagaramid iti panangibabaet cadagiti managlabsing.


CAPITULO 54




1 Agcantaca, O lupes, sica a di naganac; pumgaacca iti panagcanta, ken iyickismo, sica a di nagpaspasical: ta ad-adu dagiti annac ti nabaybay-an ngem dagiti annac ti naasawaan a babai, cuna iti APO.

2 Padackelem ti disso ti toldam, ken pabistradmo cadacuada dagiti bengbeng dagiti pagyanam: dica medmedan, paatiddugem dagiti lublubidmo, ken patibkerem dagiti paspasocmo;

3 Ta agsacnapcanto iti macanawan ken macatigid; ket ti putotmo tawidennanto dagiti Gentil, ket aramidenna a dagiti il-ili a nalangalang matagitaoandanto.

4 Dica agbuteng; ta saancanto a mabainan: ket saanca met a mariru; ta saancanto a maibabain: ta sica malipatamto ti bain ti kinaagtutubom, ken dicanto malagipen a pulos ti pannacaumsi ti kinabalon.

5 Ta ti Nangaramid kenca ket isu ti asawam a lalaki; ti APO dagiti buybuyot ti naganna; ket ti Mannubbotmo ti Santo Ti Israel; Ti Dios ti sangalubongan ti pangnagandanto kencuana.

6 Ta iti APO inayabannaca a cas maysa nga asawa a babai a nabaybay-an ken napaldaangan iti espiritu, ken asawa a babai ti kinaagtutubo, idi saanca nga naicancano, cuna ti Diosmo.

7 Iti bassit a canito binaybay-anca; ngem iti dackel a caasi urnongencanto.

8 Iti bassit a pungtot inlingedco ti rupac kenca iti maysa a canito; ngem iti agnanayon a kinamanagayat caasiancanto, cuna iti APO a Mannubbotmo.

9 Ta daytoy isu ti cas cadagiti dandanum ni Noe caniac: ta cas insapatac a dagiti dandanum ni Noe saandanto a layusenen ti daga; casta met nga insapatac a saanacto nga agpungtoten kenca, wenno tubngarenca.

10 Ta dagiti banbantay macapanawda, ken dagiti turturod mayalisda; ngem ti kinamanagayatco saanto a pumanaw kenca, ket ti tulagco ti pannakicappia saanto met nga mayalis, cuna iti APO nga addaan asi kenca.

11 ¶ O sica a napagsagaba, nga impalpallais ti baggio, ket saan a naliwliwa, adtoy, isaadconto dagiti batbatom iti nasayaat a colcolor, ken icabilconto ti pamuonmo cadagiti zafiros.

12 Ken aramidecto dagiti tawam cadagiti rubrubi, ken dagiti ruanganmo cadagiti carbunculos, ken amin dagiti beddengmo dagiti batbato a napateg.

13 Ken amin dagiti annacmo maisurodanto iti APO; ket dackelto ti talna dagiti annacmo.

14 Iti kinalinteg ti pacapasingkedamto: adayucanto iti pannacaparigat; ta saancanto nga agbutengen: ken ti nacaal-alinget; ta dinto umasidegen kenca.

15 Adtoy, awan dudua nga agurnongdanto nga agcaycaysa, ngem saan a gapu caniac: siasinoman nga agurnong a bumusor kenca mapasagto a gapu kenca.

16 Adtoy, pinarsuac ti mammanday nga agpuyot cadagiti apuy dagiti begbeggang, ken pataudenna ti maysa nga arruaten a pagtrabahona; ken pinarsuac ti manangrebbec a mangdadael.

17 ¶ Awan ti igam a naaramid a maibusor kenca a rumang-ayto; ken tunggal dila a bumusorto kenca iti panangocom condemaremto. Isu daytoy ti tawid dagiti ad-adipen iti APO, ken ti kinalintegda aggapu caniac, cuna iti APO.


CAPITULO 55




1 Ho, tunggal mawaw, umaycayo cadagiti dandanum, ken siasinoman nga awanan ti pirac; umaycayo, gumatangcayo, ken mangancayo; wen, umaycayo, ken gumatangcayo iti arac ken gatas nga awan ti pirac ken awan ti baybayad.

2 Apay ngarud a gastoenyo ti pirac iti saan a taraon? ken ti bannogyo iti saan a macapnec? umimdengcayo a sireregta caniac, ken canenyo daydiay nga naimbag, ken pagrag-oenyo coma ti cararruayo met laeng iti kinalucmeg.

3 Iyallingagyo ti lapayagyo, ken umaycayo caniac: dumngegcayo, ket ti cararruayo agbiagto; ket agaramidacto iti agnanayon a tulag cadacayo, uray dagiti awan duduana a panangngaasi ken David.

4 Adtoy, isu ti intedco a maipaay a sacsi cadagiti il-ili, a mangipangulo ken agturay cadagiti il-ili.

5 Adtoy, ayabamto ti maysa a nacion a dica am-ammo, ken nasnacion a didaca pay am-ammo tumaraydanto nga umay kenca gapu ken iti APO a Diosmo, ken gapu iti Santo Ti Israel; ta isu intan-ocnaca.

6 ¶ Sapulenyo iti APO ita ta masaracan pay, umawagcayo kencuana ita ta asideg pay:

7 Ti managdacdakes baybay-anna coma ti dalanna, ken ti tao a saan a nalinteg dagiti pampanunotna: ket agsubli coma ken iti APO, ket isu caasiannanto; ken iti Diostayo, ta isu mamacawan iti nawadwad.

8 ¶ Ta dagiti pampanunotco saanyo a pampanunot, ket dagiti daldalanyo saanda met a daldalanco, cuna iti APO.

9 Ta cas dagiti langlangit nangatngatoda ngem iti daga, casta dagiti daldalanco nangatngatoda ngem cadagiti daldalanyo, ken dagiti pampanunotco ngem cadagiti pampanunotyo.

10 Ta cas ti tudo bumaba, ken ti nieve aggapu iti langit, ket saanda nga agsubli idiayen, no di ket siboganda ti daga, ken pagtuboenna ken pagbuselenna, tapno itdenna iti bukel cadagiti agmulmula, ken tinapay iti mangan:

11 Castanto met ti saoc a rummuar iti ngiwatco: saanto nga agsubli caniac nga awan ti pagmamaayanna, no di ket tungpalennanto ti pagayatac, ken rumang-ayto iti banag a pangipanac kencuana.

12 Ta rummuarcayto nga addaan iti rag-o, ken maiturong a sitatalna: dagiti banbantay ken turturod pumgaacdanto iti sangoananyo nga agcancantada, ken amin a caycayo iti talon agsipatto dagiti im-imada.

13 Iti saad ti calunay tumubonto ti parwa, ken iti saad ti casumba tumubonto ti cayo a mirto: ket isunto ti maysa a nagan a maipaay iti APO, maysa a pagilasinan iti agnanayon a saanto a makeltay.


CAPITULO 56




1 Castoy ti cuna iti APO, Salimetmetanyo ti kinajusticia, ken agaramidcayo iti kinalinteg: ta ti panangisalacanco umasideg, ken ti kinalintegco a maiparangarangto.

2 Bendito ti tao a mangaramid itoy, ken ti anac ti tao a mangsalimetmet a sibibileg kencuana; a salimetmetanna ti aldaw a panaginana tapno saan a matulawan, ken igawidna ti imana iti panangaramidna iti aniaman a kinadakes.

3 ¶ Castamet ti gangannaet, a nakitipon ken iti APO, di coma agsao, a cunaenna, Ti APO tinalipuposnac nga insina iti ilina: ket saan coma met a saoen ti eunuco, Adtoy, maysaac a cayo a nagango.

4 Ta castoy ti cuna iti APO cadagiti eunucos nga mangsalimetmet cadagiti aldawco a panaginana, ken pilienda dagiti banbanag a macaay-ayo caniac, ken salimetmetanda ti tulagco;

5 Uray cadacuada mangtedacto iti uneg ti balayco ken iti uneg dagiti bacudco ti lugar ken nagan a naim-imbag ngem cadagiti annac a lallaki ken annac a babbai: iccacto ida iti maysa a nagan a mataginayon, a saanto a makeltay.

6 Casta met dagiti annac ti gangannaet, a nakitipon ken iti APO, tapno agservi kencuana, ken ayatenda iti nagan iti APO, tapno agbalinda nga ad-adipenna, tunggal maysa nga mangsalimetmet iti aldaw a panaginana iti pannacamulitna, ken sinalimetmetanna ti tulagco;

7 Uray isuda iyegconto ida iti nasantoan a bantayco, ken paragsakecto ida iti balayco a pagcararagan: dagiti mapuoran a datonda ken dagiti sacrificioda maawatdanto iti rabaw ti altarco; ta ti balayco managananto ti balay ti cararag a maipaay cadagiti amin nga il-ili.

8 Ni Apo DIOS a mangummong cadagiti naipanaw ti Israel, kunana, Urnongecto pay dagiti sabsabali nga agpaay kencuana, malacsid pay cadagidiay nga naurnongen a cucuana.

9 ¶ Dacayo amin nga an-animal iti away, umaycayo a mangalun-on, wen, dacayo amin nga an-animal ti bakir.

10 Dagiti pagwanawanenna bulsecda: isuda amin awananda iti pannacaammo, isuda amin as-asoda nga umel, dida mabalin ti agtaol; matmaturog, agid-iddada, ayatenda ti agdungsa.

11 Wen, as-asoda a nabuclis ket uray caano dida map- mapnec, ket isuda dagiti paspastor a dida macaawat: isuda amin ket agturong iti dalanda met laeng, tunggal maysa ti paglainganna, manipud amin nga ayanda.

12 Umaycayo, kunada, mangalaacto iti arac, ket agpennectayo iti naingel nga inumen; ket intono bigat caslanto met laeng iti daytoy nga aldaw, ken nacarcaronto pay a nawadwadwad.


CAPITULO 57




1 Ti nalinteg mapucaw, ket awan ti tao a mangicascaso: ket dagiti manangaasi a lallaki maiccatda, awan ti mangutob a ti nalinteg maiccat iti sangoanan ti dakes nga umay.

2 Isu sumrec iti talna: isuda aginanada cadagiti iddada, tunggal maysa magmagna iti kinalintegna.

3 ¶ Ngem umasidegcayo ditoy, dacayo annac a lallaki dagiti managanito, putot ti mannakicamalala ken ti balangcantis.

4 Asino ti rinabrabacyo? siasino ti pangingangaanyo ita ngiwatyo, ken pangidilantayo ita dila? saan aya a dacayo dagiti annac ti panaglabsing, maysa a putot ti kinaulbod,

5 Dacayo a mangpasged cadagiti bagbagiyo ti tengnga dagiti didiosen iti siroc ti tunggal narucbos a cayo, a mamapatay cadagiti annac cadagiti tantanap iti siroc dagiti rengrengngat dagiti batbato?

6 Iti baet dagiti nalinis a batbato ti waig isu ti biangmo: isuda, isuda ti pasetmo: cadacuada met laeng ti nangibucbocam iti daton a mainum, nangidatonca iti daton a macan. Awatecto ngata iti liwliwa cadagitoy?

7 Iti rabaw ti nangato ken natayag a bantay insaadmo ti iddam: uray idiay simmang-atca a nangidatag ti daton.

8 Ket iti licudan dagiti ruruangan ken dagiti ad-adigi insaadmo ti pacalaglagipam: ta sica imparangmo ti bagim iti sabali a saan a siac, ket simmang-atca; pinadackelmo ti iddam, ket nakitulagca cadacuada; sica inayatmo dagiti iddada iti sadinoman a nacakitaam.

9 Sica napanca iti ari nga incuyogmo ti lana, ket pinawadwadmo dagiti bangbanglom, ken imbaonmo dagiti babaonem iti adayu, ket minulitam ta bagim agingga met laeng ken impierno.

10 Sica nabannoganca iti kinaatiddug ti dalanmo; nupay casta dica kinuna, Awanen ti namnama: sica nasaracam ti biag cadagiti imam; gapuna a dica napacsuyan.

11 Ket iti siasino ti nacapabutngam wenno kinabutengmo, ta sica nagulbodca, ket dinac linagip, wenno impapuso? diac aya nagtalna uray idi nabayagen a pannawen, ket sica dica nagbuteng caniac?

12 Ipalawagconto ti kinalintegmo, ken dagiti ar-aramidmo; ta isuda saandacanto a magunggonaan.

13 ¶ Intono umasugca, dagiti cacadduam icanawadaca coma; ngem ti angin itayabnanto ida amin; kinaubbaw ipanawnanto ida: ngem ti agcamang caniac tagicuaennanto ti daga, ken tawidennanto ti nasantoan a bantayco;

14 Ket isu cunaennanto, Ibellengyo, ibellengyo, isaganayo ti dalan, iccatenyo ti pacaitibcolan iti dalan ti ilic.

15 Ta castoy ti cuna ti Nangato ken Natan-oc nga agnaed iti agnanayon, a ti naganna Santo; Agnaedac iti nangato ken nasantoan a disso, agraman iti daydiay addaan iti maysa nga espiritu a napagbabawi ken napacumbaba, tapno biagec manen ti espiritu ti napacumbaba, ken tapno biagec manen ti puso dagiti napagbabawi.

16 Ta diacto makisusic iti agnanayon, diacto met cancanayon nga agpungtot: ta ti espiritu mapacsuyan coma iti sangoanac, ken dagiti carcararrua nga inaramidco.

17 Maipuon iti kinadangkes ti agumna nagpungtotac, ket isu kinabilco: naglingedac, ket nagpungtotac, ket isu nagtuloy a nagtallicud iti dalan ti pusona.

18 Nakitac dagiti daldalanna, ken isu agasacto: isu idalanconto met, ken isublicto dagiti liwliwa kencuana ken dagiti agdung-aw kencuana.

19 Agparsuaac iti bunga dagiti bibig; Talna, talna iti daydiay nga adda iti adayu, ken iti daydiay nga adda iti asideg, cuna iti APO; ket isu agasacto.

20 Ngem dagiti nadangkes casdala iti mariribuc a taaw, ta dina mabalin ti aglinac, a dagiti dandanumna ket agipurruacda iti lugnac ken pitac.

21 Awan ti talna, cuna ti Diosco, cadagiti nadangkes.


CAPITULO 58




1 Umkisca iti natbag, dica medmedan, agtimecca iti natbag a cas maysa a tangguyob, ket ipalawagmo iti ilic ti ilalabsingna, ken iti balay ni Jacob dagiti basbasolna.

2 Nupay casta isuda birukendac iti inaldaw, ken agrag-oda nga umammo cadagiti dalanco, cas maysa a nacion a nagaramid iti kinalinteg, ket saanda a binaybay-an ti impaannurot ti Diosda: agdawatda caniac iti annuroten a panangocom; agrag-oda nga umadani iti Dios.

3 ¶ Apay aya a nagayunarcami, kunada, ket dica nakita? apay aya a pinaladingitmi ta cararruami, ket dica incascaso? Adtoy, iti aldaw ti panagayunaryo sarakenyo ti ragsacyo, ken kiddawenyo amin a panagbannog.

4 Adtoy, dacayo agayunarcayo a maipaay iti panagsususic ken panagsusubang, ken tapno cumabil iti gemgem ti kinadakes: saancayo nga agayunar a cas aramidenyo itoy nga aldaw, tapno maipangag ti timecyo idiay ngato.

5 Casta aya ti panagayunar a pinilic? ti aldaw a maipaay iti tao a pangpaladingitna iti cararruana? iti ngata irurucnoyna ti ulona a cas maysa a lidda, ken iyuyucradna ti lupot a nakersang ken dapdapu iti baba na? naganemto aya daytoy a panagayunar, ken maysa nga aldaw a maawat iti APO?

6 Saan a daytoy aya ti panagayunar a pinilic? ti panangwayway cadagiti galut ti kinadangkes, ti panangwarwar cadagiti nadagsen nga aw-awit, ken ti mailuplupit mawayawayaan, ken tapno bungtolenyo ti tunggal sangol?

7 Saan aya a tapno iwarasmo ti tinapaymo iti mabisin, ken ti panangalam iti napanglaw a napagtalaw iti balaymo? no makitam ti lamolamo, tapno isu cawesam; ket dica coma lemmengan ti lasagmo met laeng?

8 ¶ Iti casta agbannawagto ti lawagmo a cas iti agsapa, ket ta salun-atmo sumantacto a sisisiglat unay: ket ta kinalintegmo mapanto iti sangoanam; ti dayag iti APO isunto ti agaywan iti malicudam.

9 Iti casta umawagcanto, ket iti APO sumungbatto; umkiscanto, ket isu cunaennanto, Addaac ditoy. No sica iccatem iti tengngam ti sangol, ti panangitudo iti ramay, ken panagsao a kinaubbaw;

10 Ket no ta cararruam mangngaasi iti mabisin, ket bussogem ti naladingit a cararrua; iti casta tumangcayagto ta lawagmo iti casipngetan, ket ta kinacudrepmo caslanto iti tenga ti aldaw:

11 Ket iti APO idalannacanto a cancanayon, ken pennekennanto ta cararruam ti kinaticag, ken palucmegennanto dagiti tultulangmo: ket mayarigcanto iti nadanuman a minuyongan, ken cas iti ubbog ti danum, a dagiti dandanumna saanda nga maatianan.

12 Ket dagidiay nga adda kenca bangonendanto dagiti cadaanan a disdisso a narba: patacderemto dagiti pamuon dagiti adu a caputotan; ket managanancanto Ti Managtarimaan iti gutbaw, Ti Mangpabaro cadagiti daldalan tapno pagnaedan.

13 ¶ No ibaw-ingmo ta sacam iti aldaw a panaginana, iti panagaramid iti ragsacmo iti aldawco a nasantoan; ket naganem ti aldaw a panaginana a maysa a rag-o, ti nasantoan iti APO, a nadayaw; ket isunto ti dayawem, ket dica aramiden dagiti daldalanmo met laeng, wenno sapulen ti ragsacmo met laeng, wenno saoen dagiti saom met laeng:

14 Iti casta agrag-ocanto ken iti APO; ket pasacayencanto nga ipan cadagiti nangato a disdisso ti daga, ken taraonancanto iti tawid ni Jacob nga amam: gapu ta ti ngiwat iti APO insaonan.


CAPITULO 59




1 Adtoy, ti ima iti APO saan a napaababa, tapno dina mabalin ti mangisalacan; wenno ti lapayagna ket nadagsen, tapno dina mabalin ti dumngeg:

2 Ngem dagiti kinadangkesyo namagsinada cadacayo ken iti Diosyo, ket dagiti basbasolyo inlemmengda ti rupana cadacayo, iti casta dinto mangipangag.

3 Ta dagiti imayo narugitanda iti dara, ken dagiti ramayyo iti kinadangkes; dagiti bibigyo nagsaoda cadagiti ulbod, ti dilayo nagdayamudom iti dakes.

4 Awan ti umawag ti justicia, wenno mangsalacnib iti kinapudno: agtalecda iti kinaubbaw, ken agsaoda cadagiti ulbod; sicogenda ti dakes, ket agipasngayda iti kinadangkes.

5 Isuda agucopda cadagiti itlog ti uleg, ken agabelda iti catay ti lawalawa: ti mangan cadagiti itlogda matay, ket ti mabuong agpessa ket rummuar ti maysa a carasaen.

6 Dagiti abelda didanto agbalin a pagan-anay, didanto maabbongan dagiti bagida met laeng cadagiti aramidda: dagiti aramidda isuda dagiti aramid ti kinadangkes, ket ti aramid ti narungsot adda cadagiti im-imada.

7 Dagiti sacada agtarayda iti dakes, ket agpardasda a mangibucboc iti dara nga awan ti basolna: dagiti panunotda isuda dagiti panunot ti kinadangkes; pannacarba ken pannacadadael dagiti adda cadagiti daldalanda.

8 Ti dalan ti talna dida ammo; ket awan ti kinajusticia cadagiti pagnaanda: inaramidda ida a nakillo a daldalan: uray asino a mapan idiay dina ammo ti talna.

9 ¶ Gapuna a ti kinajusticia adayu cadacami, ti kinalinteg dinacami met macamacam: urayenmi ti lawag, ngem ti makitami kinasipnget; ken iti kinaraniag, ngem magnacami iti kinasipnget.

10 Dacami agar-aricapcami iti diding a cas iti bulsec, ken agar-aricapcami a cas awan matami: maitibcolcami iti tengnga ti aldaw a cas iti sumipnget; addacami cadagiti langalang a disdisso a cas natay a tattao.

11 Agungorcami amin a cas cadagiti oso, ken agunnoycami iti nasaem a cas cadagiti calapati: sapulemnmi ti kinajusticia, ngem awan; ken ti pannacaisalacan, ngem isu adayu cadacami.

12 Ta dagiti salungasingmi umaduda iti sangoanam, ket dagiti basolmi manacsida iti maibusor cadacami: ta dagiti labsingmi addada cadacami; ket no maipapan cadagiti kinadangkesmi, ammomi ida;

13 Iti ilalabsing ken panangulbod ken iti APO, ken iti isisiasi iti Diosmi, panagsao iti pammarigat ken iyaalsa, panagpakinakem ken panagdayamudom iti puso cadagiti sasao ti kinaulbod.

14 Ket ti kinajusticia mapasanod, ket ti kinalinteg agtacder iti adayu: ta ti kinapudno matinnag iti dalan, ket ti kinalinteg dina mabalin ti sumrec.

15 Wen, ti kinapudno maawan; ket daydiay nga italawanna ti kinadangkes maaramid met laeng a kinayawan: ket iti APO nakitana, ket saan a nacaay-ayo kencuana ta awan idi ti kinajusticia.

16 ¶ Ket nakitana nga awan idi ti tao, ket nasdaaw nga awan idi ti mangibabaet: gapuna a ti met laeng tackiagna ti mangyeg ti pannacaisalacan kencuana; ket ti kinalintegna, ti nangtengngel kencuana.

17 Ta incawesna ti kinalinteg a cas maysa a cabal, ken maysa a cabal ti pannacaisalacan iti ulona; ket nagcawes iti ibabales a pagan-anayna, ket naabbongan iti regta a cas maysa a cagay.

18 Cas mayannatup cadagiti aramidda, iti mayannatup isunto ti pangsubadna, ti pungtot cadagiti cabusorna, supapac cadagiti cabusorna; cadagiti purpuro itdennanto ti supapacda.

19 Iti casta agbutengdanto iti nagan iti APO manipud iti laud, ken ti dayagna manipud iti irurusingan ti init. No ti cabusor umayto a cas maysa a layus ti danum, ti Espiritu ti APO mamangonto ti wagayway a maibusor kencuana.

20 ¶ Ket ti Mannubbot umayto iti Sion, ken cadagidiay aglicud iti panaglabsing nga putot ni Jacob, cuna iti APO.

21 Ket ti maipapan caniac, daytoy isu ti tulagco cadacuada, cuna ti APO; ti Espirituc nga adda kenca, ken dagiti sasaoc nga incabilco ita ngiwatmo, didanto pumanaw ita ngiwatmo, uray iti ngiwat ti putotmo, uray iti ngiwat ti putot ti putotmo, cuna iti APO, manipud ita ken iti agnanayon.


CAPITULO 60




1 Tumacderca, agraniagca; ta ti lawagmo immayen, ket ti dayag iti APO rimmusingen kenca.

2 Ta, adtoy, ti kinasipnget abungotanna ti daga, ket ti napuscol a kinasipnget cadagiti il-ili: ngem iti APO lumtuadto kenca, ket ti dayagna makitanto kenca.

3 Ket dagiti Gentil umaydanto ita lawagmo, ken dagiti ar-ari iti raniag ta irurusingmo.

4 Itangadmo dagita matam iti aglicmut, ket kumitaca: isuda amin aggu-urnongda, umayda kenca: dagiti annacmo a lallaki umaydanto nga aggapu iti adayu, ket dagiti annacmo a babbai matagibidanto cadagiti sibaymo.

5 Iti casta makitamto, ket agcucuyogcayto, ket ta pusom agkintayegto, ken mapadackelto; agsipud ta ti kinawadwad ti taaw agturongdanto kenca, ti cuccucua dagiti Gentil umayto kenca.

6 Ti kinaadu dagiti camcamello abbongandacanto, dagiti dromedarios ti Madian ken Efa; amin manipud Seba umaydanto: mangyegdanto ti balitoc ken incienso; ket ipakitadanto dagiti pannacaidaydayaw iti APO.

7 Isuamin a pangen ti Cedar maurnongdanto kenca, dagiti carcarnero a lallaki ti Nebayoth agservidanto kenca: umaydanto a maawat iti altarco, ket ipadayagconto ti balay iti dayagco.

8 Asinoda dagitoy nga tumayab a casla ulep, ken cacasla calcalapati cadagiti tawada?

9 Pudno a dagiti purpuro agpannuraydanto caniac, ket dagiti sasacayan ti Tarsis nga umuna, a mangyeg cadagiti annacmo a lallaki nga aggapu ti adayu, ti piracda ken balitocda cacuyogda, a maipaay iti nagan iti APO a Diosmo, ken iti Santo Ti Israel, agsipud ta isu ti nangpadayag kenca.

10 Ket dagiti annac ti gangannaet bangonendanto dagiti bacudmo, ket dagiti arida agservidanto kenca: ta iti pungtotco sinaplitca, ngem iti paraburco kinaasianca.

11 Gapuna dagiti ruanganmo cancanayondanto a silulucat; didanto maripcan iti aldaw uray iti rabii; tapno dagiti lallaki mabalinda nga iyeg kenca dagiti cuccucua dagiti Gentil, ken dagiti arida maidatagda.

12 Ta dayta a nacion ken pagarian a dinto agservi kenca ket mapucawto; wen, dagidiay a nasnacion matalipuposdanto a mapaglangalang.

13 Ti dayag ti Libano umayto kenca, ti parwa, ti saleng, ken ti alamo nga agtitimpuyog, tapno papintasenda ti lugar ti santuarioc; ket aramidecto ti disso dagiti sacsacac a nagloriaan.

14 Ket dagiti annac a lallaki dagidiay a namaladingit kenca umaydanto a sirurucob kenca; ket amin dagiti nanguy-uyaw kenca agrucnoydanto cadagiti dapanmo; ket naganendacanto, Ti ili iti APO, Ti Sion iti Santo Ti Israel.

15 Idinto a sica nabaybay-anca ken naguraca idi, iti casta nga awan ti tao a limmasat kenca, aramidencanto a maysa a kinadaeg iti agnanayon, maysa a rag-o dagiti adu a capcaputotan.

16 Sica met susopemto ti gatas dagiti Gentil, ket susopemto dagiti barucong dagiti ar-ari: ket sica maammoamto a siac iti APO ti Mangisalacanmo ken Mannubbotmo, ti Mannacabalin ni Jacob.

17 Iti lugar ti suer mangyegacto ti balitoc, ket iti landoc mangyegacto ti pirac, ket iti cayo ti suer, ken iti batbato ti landoc: Ket aramidecto met dagiti pagturayem a talna, ken dagiti agsingsingir iti kinalinteg.

18 Ti kinaranggas dinto mangegen iti dagam, ti pannacalangalang ken pannacadadael cadagiti beddengmo; ngem sica naganemto dagiti bacudmo iti Pannacaisalacan, ken dagiti ruanganmo iti Dayaw.

19 Ti init saanto nga isu ti lawagmo iti aldaw; uray ti raniag ti bulan dinanto itden ti lawagna kenca: no di ket iti APO isunto ti agnanayon a silawmo, ket ti Diosmo ti dayagmo.

20 Ti initmo dinto lumneken; uray ti bulanmo dinto pumanawen; ta iti APO isunto ti agnanayon a lawagmo, ket dagiti aldaw ti panagpanesmo manungpaldanto.

21 Ti umilim met nalintegdanto amin: isuda tawidendanto ti daga iti agnanayon, ti sanga ti panagmulmulac, ti aramid dagiti im-imac, tapno maipadayagac.

22 Ti maysa a bassit agbalinto a sangaribu, ket ti cabassitan maysa a napigsa a nacion: Siac ti APO aramidecto a nadaras iti pannawenna.


CAPITULO 61




1 Ti Espiritu iti Apo DIOS adda caniac; gapu ta iti APO pinulotannac a mangicasaba cadagiti naimbag a damdamag cadagiti naemma; imbaonnac a mamatapat iti puso a nadunor, a mangiwaragawag iti wayawaya cadagiti nacayawan, ken ti pannacalucat iti pagbaludan dagiti nacabalud;

2 A mangiwaragawag iti tawen ti parabur iti APO, ken iti aldaw ti ibabales ti Diostayo; a mangliwliwa iti amin nga agdung-aw;

3 A mangipaay cadagidiay nga agdung-aw idiay Sion, a mangted cadacuada iti balangat iti lugar ti dapu, ti lana ti rag-o iti lugar ti dung-aw, ti pagan-anay ti dayaw iti lugar ti espiritu ti ladingit; tapno managananda coma caycayo ti kinalinteg, ti mulmula iti APO, tapno isu madaydayaw coma.

4 ¶ Ket isuda bangonendanto dagiti cadaanan a langalang, patacderendanto dagiti immum-una a narba, ken tarima-anendanto dagiti naracrac nga il-ili, dagiti pannacarba dagiti adu a capcaputotan.

5 Ket dagiti gangannaet agtacderdanto ken pacanendanto dagiti pangenyo, ken dagiti annac ti sangsangaili agbalindanto nga para aradoyo ken agaywan iti inuvasanyo.

6 Ngem dacayo managanancayto Papadi iti APO: dagiti tattao naganendacayto dagiti Ministros ti Diostayo: canenyonto dagiti kinabacnang dagiti Gentil, ken iti dayagda maitan-occayto.

7 ¶ Iti lugar ti pacaibainanyo maminduacayto; ket iti pacarabngisan agragsacdanto iti biangda: gapuna nga iti dagada cupicupandanto ti mamindua: agnanayon nga rag-o ti addanto cadacuada.

8 Ta siac iti APO ayatec ti kinajusticia, guraec ti panagtacaw a maipaay ti daton a mapuoran; iturongconto dagiti aramidda a sipupudno, ket agaramidacto ti agnanayon a tulag cadacuada.

9 Ket ti capuonanda maammoanto iti tengnga dagiti Gentil, ken ti caputotanda iti tengnga dagiti il-ili: isuamin a macakita cadacuada mabigbigdanto ida, nga isuda ti putot a binendicionan iti APO.

10 Siac agragsacacto unay ken iti APO, ti cararruac agrag-onto iti Diosco; ta kinawesannac cadagiti pagan-anay ti pannacaisalacan, inabbongannac iti lambon ti kinalinteg, a cas novio nga nangcawes kencuana cadagiti ar-arcos, ken cas maysa a novia nga nangarcos kencuana cadagiti alajasna.

11 Ta cas ti daga irruarna ti buselna, ken cas ti minuyongan patuboenna dagiti banbanag a maimula kencuana; casta ti panangpatubo ni Apo DIOS iti kinalinteg ken panagdayaw iti saclang dagiti amin a nasnacion.


CAPITULO 62




1 Gapu iti Sion diacto agtalna, ken gapu iti Jerusalem diacto aginana, agingga iti iruruar ti kinalinteg nga cas kinaraniag, ken ti pannacaisalacanna a cas maysa a silaw a dumardarang.

2 Ket dagiti Gentil makitadanto ta kinalintegmo, ken amin nga ar-ari dayta dayagmo: ket sica managanancanto iti baro a nagan, nga inagananto ti ngiwat iti APO.

3 Sicanto met ket agbalin a corona ti dayag ti ima iti APO, ken naarian a diadema iti ima ti Diosmo.

4 Saancanton a managanan iti Nabaybay-an; ket dinto met managananen ta dagam iti Langalang: no di ket sica managanancanto iti Hebsiba, ken iti dagam iti Beulah: ta ti APO agrag-o kenca, ken ti dagam maasawanto.

5 ¶ Ta cas ti agtutubo a lalaki mangasawa iti maysa a birhen, castanto ti panangasawa kenca dagiti annacmo a lallaki: ket cas ti novio agragrag-o iti noviana, castanto ti panagrag-o ti Dios kenca.

6 Siac nangisaadac cadagiti agwanawan iti rabaw dagiti bacbacudmo, O Jerusalem, isuda didanto agtalna uray caano iti aldaw uray iti rabii: dacayo a mangipalpalagip ken iti APO, dicayo agulimec,

7 Ken dicayo paginanaen isuna, agingga iti isu mangpasingked, ken agingga iti maaramidna ti Jerusalem a maysa a dayaw ti daga.

8 Iti APO insapatana babaen iti imana a macanawan, ken gapu iti tackiag ti pigsana, Pudno a diacto itdenen ti trigom a canen dagiti cabcabusormo; ket dagiti annac ti gangannaet saandanto nga uminumen iti aracmo, a sica nagbannogam:

9 No di ket dagiti nangurnong kencuana isuda met laeng ti manganto, ket dayawendanto iti APO; ket dagiti nagmaymaysa a nagburas ti uminumto kencuana cadagiti paraangan ti santuarioc.

10 Sumreccayo, sumreccayo cadagiti ruruangan; isaganayo ti dalan dagiti tattao; palanasenyo, palanasenyo ti dalan; iccatenyo dagiti batbato; mangibayogcayo iti wagayway a maipaay cadagiti tattao.

11 Adtoy, iti APO inwaragawagna agingga iti pungto ti daga, Saoenyo iti anac a babai ti Sion, Adtoy, ti pannacaisalacanmo umay; adtoy, ti panggunggonana adda kencuana, ken ti aramidna iti sangoananna.

12 Ket naganendanto ida, Ti nasantoan nga ili, Ti sinubbot iti APO: ket sica managanancanto, Ti Nabirocan, Maysa nga ili nga saan a nabaybay-an.


CAPITULO 63




1 Siasino daytoy a sumungad nga aggapu sadi Edom, a tinina ti pagan-anayna a naggapu iti Bosra? daytoy a nadayag ti cawesna, a magmagna iti kinadackel ti pigsana? Siac nga agsao iti kinalinteg, mannacabalin a mangisalacan.

2 Apay a sica nalabaga iti cawesmo, ken ti pagan-anaymo umasping iti daydiay a nagpayat iti pagpespesan iti uvas?

3 Maymaysaac a nagpayat iti pagpespesan iti uvas; ket cadagiti il-ili awan idi ti tao a nakicaddua caniac: ta payatecto ida iti rungsotco, ken ibaddebaddecconto ida iti pungtotco; ket ti darada maiparsiacto cadagiti pagan-anayco, ket mansaacto ti amin a cawesco.

4 Ta ti aldaw ti panangibales adda iti pusoc, ket ti tawen dagiti sinubbotco dimtengen.

5 Ket kimmitaac, ket awan idi ti timmulong; ket nasdaawac nga awan idi ti mangsaranay: gapuna a ti met laeng tackiagco ti nangyeg ti pacaisalacanan caniac; ket ti pungtotco, isu ti nangpasingked caniac.

6 Ket impayatco dagiti il-ili iti pungtotco, ket binartecco ida iti rungsotco, ket ipababacto ti pigsada iti daga.

7 ¶ Siac saritaecto dagiti kinamanagayat iti APO, ken dagiti kinadayaw iti APO, a mainugot amin a iti APO impaayna cadatayo, ken ti dackel a kinaimbag a maipaay iti balay ti Israel, nga impaayna cadacuada a mayalubog cadagiti caasina, ken cas mayalubog iti kinawadwad dagiti kinamanangngaasina.

8 Ta kinunana, Pudno isuda ti ilic, annac a saan nga agulbod: iti casta isu ti Mangisalacan cadacuada.

9 Iti amin a ladingitda isu napaladingit, ket ti angel ti saclangna insalacanna ida: iti ayatna ken iti asina sinubbotna ida; ket inawitna ida, ken binagcatna ida cadagiti amin nga al-aldaw di ugma.

10 ¶ Ngem isuda simmukirda, ket pinaladingitda ti nasantoan nga Espirituna: gapuna nga isu nagbalin a cabusorda, ket nakibacal a maibusor cadacuada.

11 Idin nalagipna dagiti al-aldaw idi ugma, ni Moises, ken ti ilina, a kunana, Sadino ti ayan daydi a nangisang-at cadacuada nanipud iti baybay agraman ti pastor ti arbanna? sadino ti ayanna daydi a nangicabil iti nasantoan nga Espirituna kencuana?

12 Daydi a nangidalan babaen ti macanawan nga ima ni Moises ti nadayag a tackiagna, a nangbisngay cadagiti dandanum iti sangoananda, tapno aramidenna a maipaay kencuana a nagan iti agnanayon?

13 Daydiay a nangidalan cadacuada iti caadalman, a cas iti maysa a cabalyo iti let-ang, tapno saanda nga maitibcol?

14 Cas cadagiti bacbaca a sumalog iti tanap, ti Espiritu iti APO pinaginanana ida: iti casta indalanmo ti ilim, tapno aramidem kenca ti maysa a nadayag a nagan.

15 ¶ Tumannawagca manipud langit, ket cumitaca manipud iti pagtaengan ta kinasantom ken gloriam: sadino ti ayan ti kinaregtam ken pigsam, ti panaguni ta pusom ken asim caniac? nalappedanda cadin?.

16 Ta awan dudua sica ti amami, nupay ni Abraham saannacami nga ammo, ken ni Israel dinacami bigbigen: sica, O APO, sica ti amami, ti mannubbotmi; ti naganmo ket manipud iti kina-agnanayon.

17 ¶ O APO, apay nga insiasinacami cadagiti daldalanmo, ken pinatangkenmo ti pusomi iti di panagbuteng kenca? Agsublica gapu cadagiti ad-adipenmo, dagiti putputot ti tawidmo.

18 Ti ilim gapu ti kinasantom isu tinagicuana iti bassit a pannawen: dagiti cabusormi pinayatpayatda ti santuariom.

19 Cucuanami: saanca nga pulos a nagturay cadacuada; saanda a nainaganan iti naganmo.


CAPITULO 64




1 O ta pigisem coma dagiti langlangit, ket umulogca coma, tapno dagiti banbantay marunawda iti saclangmo,

2 A casla ti manglunag nga apuy uramenna, ti apuy paburkenna dagiti danum, tapno ipacaammom ta naganmo cadagiti cabusormo, tapno dagiti nacion agpigergerda ita saclangmo!

3 Idi nga inaramidmo dagiti nacakigkigtot a banbanag a saanmi a ninamnama, sica immulogca, dagiti banbantay nagkintayegda iti saclangmo.

4 Ta nanipud iti pangruggianan ti lubong dagiti tattao saanda a nangngeg, saanda met a natimud iti lapayag, uray ti mata saanna a nakita, O Dios, malacsid kenca, iti insaganana iti daydiay nga agpannuray kencuana.

5 Sica sabtem daydiay nga agrag-o ken agaramid iti kinalinteg, dagidiay a manglagip kenca cadagiti daldalanmo: adtoy, sica nagungetca; ta nagbasolcami: nagtalinaedcami cadacuada, ket maisalacancamto.

6 Ta dacami amin nagbalincami a cas maysa a narugit, ket amin a kinalintegmi isuda dagiti cas narugitan nga pagan-anay; ket dacami amin malaylaycami a casla bulong; ket dagiti kinadangkesmi, cas iti angin, impalaisdacami.

7 Ket awan ti umawag iti naganmo, nga agregget tapno cumpet kenca: ta sica inlemmengmo ta rupam cadacami, ken rinunawnacami, maigapu cadagiti kinadangkesmi.

8 Ngem ita, O APO, sica ti amami; dacami pilacami, ket sica ti agdamdamilimi; ket dacami amin gapuanannacami ta imam.

9 ¶ Dica agunget unay, O APO, dica lagipen nga agnanayon ti kinadangkes: adtoy, kitaem, agpacaasicami kenca, nga dacami amin ilinacami.

10 Dagiti nasantoan nga il-ilim nagbalinda a letlet-ang, ti Sion nagbalin a let-ang, ti Jerusalem maysa a langalang.

11 Ti nasantoan ken naimnas a balaymi, isu nga dagidi ammami nangdaydayawanda kenca, napuoran iti apuy: ket amin a nacaay-ayo a dissomi narnarbada.

12 Macaibturca aya gapu cadagitoy a banbanag, O APO? tenglemto cadi aya ta kinatalnam, ken parigatennacamto aya la unay?


CAPITULO 65




1 Nasapulandac cadagiti saan a nagsaludsod caniac; nasaracandac cadagidiay a saan a nagsapul caniac: kinunac, Adtoyac, adtoyac, iti maysa a nacion a saan a nanaganan iti naganco.

2 Inyunnatco dagiti im-imac iti nagmalmalem iti nasukir nga ili, a magna iti dalan a saan a naimbag, a mayannurot cadagiti pampanunotda met laeng;

3 Maysa nga ili a manggargari caniac a cancanayon iti rupac; nga agidaton iti uneg dagiti minuyongan, ken agpuor ti incienso iti rabaw dagiti ladrillo;

4 Nga agbati iti tengnga dagiti tantanem, ken agdagusda cadagiti nalimed a disdisso, a cancanenda ti lasag ti babuy, ken ti digo dagiti nacarimrimon a banbanag adda cadagiti bangbangada;

5 A kunada, Agtacderca dita ayanmo, saanca nga duminna caniac; ta siac nasansantoac ngem sica. Dagitoy isuda ti maysa nga asuc iti agongco, maysa nga apuy a sumsumged iti agmalmalem.

6 Adtoy, naisurat iti sangoanac: diacto agulimec, no di ket mangsupapac, uray pay mangsupapac cadagiti saclotda,

7 Dagiti kinadangkesyo, mairaman dagiti kinadangkes dagiti ammayo, cuna iti APO, nga nagpuor iti incienso iti rabaw dagiti banbantay, ken tinabbaawandac iti tapaw dagiti turturod: gapuna rucodecto dagiti napalabas nga aramidda iti saclotda.

8 ¶ Castoy ti cuna iti APO, Cas iti baro nga arac masaracan iti raay ti uvas, ket ti maysa kunana, Saanyo a dadaelen; ta maysa a bendicion ti adda kencuana: casta ti aramidecto cadagiti ad-adipenco, tapno diac coma dadaelen amin ida.

9 Ket parruarecto ti maysa a putot nga aggapu ken ni Jacob, ken rummuar ken ni Juda ti maysa nga agtawid cadagiti banbantayco: ket ti pinilic tawidennanto, ket dagiti ad-adipenco agtaengdanto idiay.

10 Ket ti Saron isunto ti maysa a pagaponan dagiti carcarnero, ket ti tanap ti Acor maysa a disso a maipaay a pagiddaan dagiti pangen, a maipaay iti ilic a nangsapul caniac.

11 Ngem dacayo a nangbaybay-a iti APO, a nanglipat iti nasantoan a bantayco, a nangisagana iti maysa a lamisaan a maipaay ken dayta a bunggoy, ken mangpunno iti inumen a daton ken dayta a bilang.

12 Gapuna ibilangcayto iti campilan, ket agrucnoycayto iti pannacapapatay: agsipud ta idi immayabac, dicayo simmungbat; idi nagsaoac, dicayo impangag; no di ket inaramidyo daydiay dakes cadagiti matac, ket piniliyo daydiay diac pagragsacan.

13 Gapuna a castoy ti cuna ni Apo DIOS, Adtoy, dagiti adipenco mangandanto, ngem dacayo mabisincayto: adtoy, dagiti adipenco uminumdanto, ngem dacayo mawawcayto: adtoy, dagiti adipenco agrag-odanto, ngem dacayo mabainancayto:

14 Adtoy, dagiti adipenco agcantadanto a gapu iti rag-o ti puso, ngem dacayo agsangitcayto a gapu iti ladingit ti puso, ken agdung-awcayto a gapu iti tuoc ti espiritu.

15 Ket ibatiyonto ti naganyo a maysa a lunod iti pinilic: ta ti Apo DIOS ket patayennacayto, ken naganennanto dagiti ad-adipenna iti sabali a nagan:

16 Iti casta daydiay mangbendicion kencuana iti daytoy a daga bendicionannanto ti bagina met laeng iti Dios ti pudno; ket daydiay agsapata iti daga agsapatanto iti Dios ti pudno; agsipud ta dagiti immun-una a riribuc nalipatandan, ken agsipud ta isuda nailemmengdan cadagiti matac.

17 ¶ Ta, adtoy, mamarsuaac cadagiti baro nga langlangit ken maysa a baro a daga: ket ti immun-una saanto nga malagipen, ken saanto nga mapanunoten.

18 Ngem agragsaccayo ken agrag-ocayo iti agnanayon iti daydiay a parsuaec: ta, adtoy, parsuaec ti Jerusalem a maysa a pagrag-oan, ken ti umilina a maysa a rag-o.

19 Ket agrag-oacto iti Jerusalem, ken agragsacacto iti ilic: ket ti timec ti sangit saanto nga mangngegen kencuana, wenno iti timec ti aganug-og.

20 Awanton manipud iti daydiay a pannawen ti maysa nga ubing nga ababa ti biagna, uray lacay a tao a di napnoan cadagiti al-aldawna: ta ti ubing matayto inton agsangagasut ti tawenna; ngem ti managbasol inton agsangagasut ti tawenna mailunodto.

21 Ket isuda bangonendanto dagiti balbalay, ken agtaengdanto cadacuada; ket agmuladanto cadagiti cauvasan, ket canendanto ti bungada.

22 Isuda didanto mangbangon, ket sabali ti agnaed; didanto agmula, ket sabali ti mangan: ta cas cadagiti al-aldaw ti maysa a cayo castanto dagiti al-aldaw iti ilic, ket ti pinilic agragsacdanto iti mabayag iti aramid dagiti im-imada.

23 Isuda didanto agtrabaho iti ubbaw, wenno agpasngay a maipaay iti riribuc: ta isuda ti capuonan ti binendicionan ti APO, agraman dagiti putotda.

24 Ket maaramidto nga, iti sacbay ti iyaawagda, sumungbatacto; ken iti bayat ti panagsasaoda, denggecto.

25 Ti lobo ken ti cordero agtipondanto nga mangan, ket ti leon manganto iti garami a cas iti baca: ket ti tapoc isunto ti canen ti uleg. Didanto mangranggas wenno mangdadael iti amin a nasantoan a bantayco, cuna iti APO.


CAPITULO 66




1 Castoy ti cuna iti APO, Ti langit isu ti tronoc, ket ti daga isu ti pagbatayan dagiti sacsacac: ayanna ti balay a binangonyo a maipaay caniac? ken ayanna ti disso a paginanaac?

2 Ta amin dagitoy a banbanag inaramid ti imac, ket dagitoy a banbanag addada idin, cuna iti APO: ngem iti daytoy a tao ti imatangacto, iti daydiay met laeng nga napanglaw ken napagbabawi nga espiritu, ken daydiay nga agkintayeg iti saoc.

3 Daydiay a mangpatay ti baca isu ti casla mangpatay ti tao; daydiay a mangidaton ti cordero, casla iti mangputol ti tengnged ti aso; daydiay agidaton iti daton, casla agidaton ti dara ti babuy; daydiay agpuor ti incienso, casla iti mangbendicion ti didiosen. Wen, pinilida dagiti bucodda a daldalan, ket dagiti cararruada agragsac cadagiti kinarimonda.

4 Siac piliecto pay ti pacaallilawanda, ken iyegconto dagiti pagbutnganda; agsipud ta idi immayabac, awan ti simmungbat; idi nagsaoac, dida impangag: no di ket inaramidda daydiay a dakes cadagiti matac, ken pinilida ti saan a macaparagsac caniac.

5 ¶ Denggenyo ti sao iti APO, dacayo nga agkintayeg iti saona; Dagiti cacabsatyo a gumura cadacayo, dagidiay nangipurruac cadacayo gapu iti naganco, kinunada, Madaydayaw coma iti APO: ngem agparangto isuna nga rag-oyo, ket isuda mabainandanto.

6 Adda timec ti ririaw nga aggapu iti ili, timec nga aggapu iti templo, timec iti APO a mangted ti supapac cadagiti cabusorna.

7 Iti sacbay ti panagpasicalna, nagpasngay; iti sacbay ti iyaay ti tuocna, nangipasngay iti anac a lalaki.

8 Asino ti nacangeg iti casta a banag? asino ti nacakita iti cacasta a banbanag? Maipasngayto aya ti daga iti maymaysa nga aldaw? maipasngayto aya ti maysa a nacion iti apagdaricmat? ta apaman a ti Sion nagpasical, isu impasngayna dagiti annacna?

9 Idatengconto aya iti panagpasngay, ket diacto pagpasngayen? cuna iti APO: siac a mangpapasngay, punitacto aya ti aanacan? cuna ti Diosmo.

10 Makipagrag-ocayo iti Jerusalem, ket agragsaccayo kencuana, isuamincayo nga agayat kencuana: makipagrag-ocayo kencuana a gapu iti ragsac, dacayo amin nga agdung-aw iti maipapan kencuana:

11 Tapno susoenyo, ken mapneccayo cadagiti barucong ti panangliwliwana; tapno magatasyo coma, ken agrag-ocayo iti kinawadwad ti dayagna.

12 Ta castoy ti cuna iti APO, Adtoy, isacnapconto ti talna kencuana a cas iti carayan, ken ti dayag dagiti Gentil a cas iti agay-ayus a waig: ket sumusopcayto, maubbacayto ti bacrangna, ken maay-ayamcayto iti rabaw dagiti tumengna.

13 Cas maysa a liwliwaen ni inana, castanto ti panangliwliwac cadacayo; ket maliwliwacayto idiay Jerusalem.

14 Ket no makitayonto, ta pusoyo agragsacto, ken dagita tultulangyo rumang-ayto a cas iti root: ket ti ima iti APO maammoanto a maipaay cadagiti adipenna, ken ti pungtotna a maibusor cadagiti cabusorna.

15 Ta, adtoy, ti APO umayto agraman iti apuy, ket dagiti luganna casdanto la alawig, tapno ipaayna ti pungtotna a sirurungsot, ken ti panangtubngarna a cacuyog dagiti darang ti apuy.

16 Ta babaen ti apuy ken babaen ti campilanna ti APO ocomennanto ti isuamin nga lasag; ket iti mapapatay ti APO adudanto.

17 Dagiti agsantificar, ken aggugor iti minminuyongan iti licudan ti maysa a cayo iti tengnga, a mangan iti lasag ti babuy, ken ti kinarimon, ken ti marabutit, isuda mapucawdanto a sangsangcamaysa, cuna iti APO.

18 Ta ammoc dagiti ar-aramidda ken dagiti pampanunotda: umayen ti panawen, a panangurnongco iti amin a nacion ken pagsasao; ket umaydanto, ken makitadanto ti dayagco.

19 Ket mangisaadacto iti pagilasinan iti tengngada, ket ibaonconto dagidiay a macatalaw cadacuada cadagiti nasnacion, idiay Tarsis, Pul, ken Lud, a agibiat iti ba-i, idiay Tubal, ken Javan, idiay adayu a purpuro, a di pay nacangngeg iti damagco, dida pay met nakita ti dayagco; ket ipacdaardanto ti dayagco cadagiti Gentil.

20 Iyegdanto amin dagiti cacabsatyo a daton iti APO nga igapu cadagiti amin a nasnacion nga nacasacayda cadagiti cabcabalyo, ken dagiti luglugan, ken dagiti duyduyan, ken dagiti mulo, ken dromedarios, agingga iti bantayco a nasantoan a Jerusalem, cuna iti APO, a cas iti panangyeg dagiti annac ti Israel iti datonda iti nadalus nga alicamen iti uneg ti balay iti APO.

21 Ket cadagidiay met mangalaacto ti agpaay a padi ken ti agpaay a Levitas, cuna iti APO.

22 Ta cas cadagiti babbaro a langlangit ken ti baro a daga, nga aramidecto, agtalinaeddanto iti saclangco, cuna iti APO, castanto ti panagtalinaed dagiti putotyo ken naganyo.

23 Ket maaramidto, a manipud iti maysa a luttuad agingga iti sabali, ken manipud iti maysa nga aldaw a panaginana agingga iti sabali, isuamin a lasag umayto agrucbab iti sangoanac, cuna iti APO.

24 Ket isuda rummuardanto, ket kitaendanto dagiti bangcay dagiti tattao a naglabsing a maicaniwas caniac: ta dagiti iggesda saandanto a matay, uray ti apuyda saandanto a maiddep; ket isudanto dagiti nacaar-ariec cadagiti amin a lasag.