|
HEBREO 1 Ti Dios, iti nadumaduma a pannaca-ipaayna ken iti nadumaduma a pamay-an cadagidi napalabas nga panpannawen nagsao cadagiti amma babaen cadagiti mammadto, 2 Ket cadagitoyen maud-udi nga al-aldaw kinasaonatayo babaen iti Anacna, isu a tinudinganna nga agtawid cadagiti isuamin nga adda, a gapu met kencuana inaramidna ti amin a lubong; 3 Idinto nga isu ti raniag ti dayagna, ken iti napaypayso a ladawan ti kinadiosna, ket idinto a salimetmetanna dagiti isuamin a banbanag iti sao ti pannacabalinna, idi naaramidnan ti pannacagugor dagiti basbasoltayo, nagtugaw iti macanawan ti Ari sadi ngato; 4 Idinto a naaramid a natantan-oc ngem cadagiti angel, cas iti panagtawidna iti nasudsudi unay a nagan ngem isuda. 5 Ta siasino cadagiti angel ti nagcunaanna uray caano, Sica ti Anacco, itoy nga aldaw binukelca? Ket iti sabali pay, Siacto ti Amana, ket isunto ti Anacco? 6 Ket iti sabali manen, idi inyegna ti inauna nga bugbugtong nga anac ditoy lubong, kunana, Amin coma dagiti angeles ti Dios ket agrucbabda kencuana. 7 Ket maipapan cadagiti angel kunana, Ti mangaramid cadagiti angelna nga espiritu, ket dagiti ministrona a darang ti apuy. 8 Ngem maipapan iti Anac kunana, Ti tronom, O Dios, mataginayon awan patinggana: ket ti cetro ti kinalinteg isu ti cetro ti pagariam. 9 Inayatmo ti kinalinteg, ket ginuram ti kinadakes; gapuna Dios, ti Diosmo, pinulotannaca iti lana ti kinaragsac a nangnangrona ngem cadagiti cacadduam. 10 Ken, Sica, Apo, idi punganay binangonmo ti pamunganayan ti daga; ket dagiti langlangit aramid ida dagiti im-imam. 11 Mapucawdanto; ngem sica mataginayoncanto; ket isuda amin marunotdanto cas maysa a pagan-anay; 12 Ket cas maysa a cagay lucotemto ida, ken masuctandanto: ngem sica cascasdi laeng, ket dagiti tawenmo saandanto nga aggibus. 13 Ngem siasino cadagiti angel ti nangisaoanna uray caano, Agtugawca iti macanawanco, agingga iti panangaramidco cadagiti cabusormo a pagbatayan dagiti sacsacam? 14 Saanda aya amin nga agserservi nga espiritu, a maibabaon tapno agserservi a maipaay iti paglaingan dagiti agtawidto iti pannacaisalacan? CAPITULO 2 1 Gapuna rebbengtayo a regtaan nga saluadan dagiti banbanag a nangegantayo, di la ket ta mayayustayo a mayadayu cadacuada. 2 Ta no ti sao a naisao dagidi angel ket natibkerda, ken amin a basol ken kinasukir inawatda ti maitutop a supapac ti gunggona; 3 Casanonto iti intayo panaglisi, no ditayo icancano iti casta la unay a nagdackel a pacaisalacanan; isu nga idinto nga impacaammo idi damo ti Apo, ken pinanecnecan cadatayo dagiti nacangngeg kencuana; 4 Ti Dios bimmuyog met cadacuada a sacsi, cadagiti pagilasinan ken nacacasdaaw, ken nadumaduma a kita dagiti kinadatdatlag, ken sagsagut ti Espiritu Santo, cas iti pagayatanna? 5 Ta dagiti angel ket saanna nga impalubos nga iturayanda ti lubong nga umayto, isu a saoenmi. 6 Ngem iti maysa nga paset ket sinacsianna, a kinunana, Ania ti tao, tapno panpanunotem isuna? wenno iti anac ti tao, no apay nga sumarungcarca kencuana? 7 Isu inaramidmo a nanumnumo bassit ngem dagiti angel; isu binalangatam iti dayag ken dayaw, ket isu insaadmo a mangaywan cadagiti ar-aramid dagiti im-imam: 8 Incabilmo dagiti amin a banbanag iti babaen dagiti sacsacana. Gapu ta idi a pinaiturayanna kencuana dagiti isuamin a banbanag, awan ti binaybay-anna a di paiturayan kencuana. Ngem ita saantayo pay a makita dagiti isuamin a banbanag a paiturayan kencuana. 9 Ngem makitatayo ni Jesus, daydi naaramid a nanumnumo bassit ngem cadagiti angeles a naipaay iti panagsagaba iti ipapatay, nabalangatan ti dayag ken dayaw; tapno gapu iti parabur ti Dios rinamananna ni patay a maipaay cadagiti isuamin a tattao. 10 Ta isu iti maiparbeng, a pacaipaayan dagiti isuamin a banbanag, ken pacaigappuan dagiti isuamin a banbanag, agsipud ta mangipanto cadagiti adu nga annac idiay gloria, tapno maaramid a pangulo ti pannacaisalacanda nga awan pagcurcuranganna gapu cadagiti panagsagaba. 11 Ta iti mamagsanto ken dagiti mapagsanto ket agtaudda amin iti maymaysa: gapuna iti daytoy saan nga agbain a mangnagan cadacuada iti cacabsat, 12 A kunana, Siac ipacaammocto ti naganmo cadagiti cacabsatco, ket iti tengnga ti iglesia icancantacto iti dayawmo. 13 Ket kunana manen, Siac agtalecacto kencuana. Ket kunana manen, Adtoy siac ken dagiti annac nga inted ti Dios caniac. 14 Iti casta agsipud ta dagiti annac ket makiramanda iti lasag ken dara, casta met kencuana nakiraman cadacuada; tapno gapu iti patay pucawenna daydiay addaan pannacabalin ni patay, cayatco a saoen, iti diablo; 15 Ken tapno maluc-atanna dagidiay a gapu iti buteng iti ipapatay iti bayat ti amin a panagbiagda ket addada a paad-adipen. 16 Ta pudno saanna nga inawat iti galad dagiti angeles; no di ket inawatna iti caputotan ni Abraham. 17 Gapuna maipaay idi nga iti isuamin casapulan nga isuna ket mayasping nga cas cadagiti cacabsatna, tapno isu macapagbalin nga maysa a manangngaasi ken matalec a cangatoan nga padi no maipapan iti Dios, tapno agidaton iti subbot dagiti basbasol dagiti tattao. 18 Ta gapu iti panagsagabana met laeng iti pannacasulisog, mabalinna nga badangan dagiti CAPITULO 3 1 Gapuna, nasantoan a cacabsat, a nairaman iti nailangitan a pannacaawis, panunotenyo ti Apostol ken Cangatoan a Padi ti pammatitayo, ni Cristo Jesus; 2 Isu a napagtalcan iti daydi nangtuding kencuana, a cas met ken Moises a napagtalcan iti isuamin a balayna. 3 Ta daytoy a tao ket naibilang a maicari iti dacdackel a dayaw ngem ni Moises, a cas ti nangbangon iti balay dacdackel ti dayawna ngem iti balay. 4 Ta amin a balay adda nangbangon a tao; ngem ti nangbangon cadagiti isuamin a banbanag isu ti Dios. 5 Ket ni Moises kinapudnoanna a napagtalcan idi iti isuamin a balayna, cas maysa nga adipen, a maipaay a pammanecnec cadagidiay banag a maipacaammonto idi; 6 Ngem ni Cristo cas maysa nga anac nga agaywan iti balayna; ket datayo ti balayna, no taginayonentayo ti panagtalectayo ken iti ragsac ti pananginanamatayo a sibibileg agingga iti panungpalan. 7 Gapuna (castoy ti cuna ti Espiritu Santo, Ita nga aldaw no mangegyo ti timecna, 8 Saanyo a patangkenen dagiti puspusoyo, a cas idi pannacagargari, cas idi aldaw ti pannacasulisog idiay let-ang: 9 Idiay a dagidi ammayo sinulisogdac, sinuutdac, ken nakitada dagiti ar-aramidco iti uppat a pulo a tawen. 10 Gapuna napaleddaangac iti daydi a caputotan, ket kinunac, Agnanayon a maisiasi ti pusoda; ket dida naammoan dagiti daldalanco. 11 Iti casta insapatac iti pungtotco, Saandanto a sumrec iti inanac.) 12 Kitaenyo ngarud, cacabsat, di la ket ta addanto iti siasinoman cadacayo ti maysa a puso a dakes a saan a mamati, nga umadayu iti sibibiag a Dios. 13 No di ket agbibinnalacadcayo iti inaldaw, ita ta nasasao Ita nga aldaw; tapno saan a tumangken ti uray siasino cadacayo gapu iti panangallilaw ti basol. 14 Ta naaramidtayo a mairaman ken Cristo, no taginayonentayo ti pamunganayan a panagtalectayo nga sititibker agingga iti panungpalan; 15 Ita ta masasao, Ita nga aldaw no mangegyo ti timecna, saanyo a patangkenen dagiti puspusoyo, a cas idi pannacagargari. 16 Ta dadduma dagidi, nga idinto ta nangngegda, ginargarida: numan pay casta saan nga isuamin dagidi rimmuar idiay Egipto a nakicuyog ken Moises. 17 Ket siasino dagiti nacaleddaanganna iti uppat a pulo a tawen? saan aya a dagidi nagbasol, a dagiti bangbangcayda napasagda idiay let-ang? 18 Ket siasino dagidi nangisapataanna a didanto sumrec iti inanana, no saan a dagiti di namati? 19 Ket makitatayo nga saanda a nabalinan ti simrec gapu iti dida panamati. CAPITULO 4 1 Agbutengtayo ngarud, di la ket ta, iti cari a nabati cadatayo nga iseserrec iti inanana, adda maysa cadacayo nga agbanag a saan a macadanon. 2 Ta pudno a naicascasaba met cadatayo ti naimbag a damag, a cas met cadacuada: ngem ti sao nga naicascasaba cadacuada nagbanag nga awan nagungonada, agsipud ta saanda nga namati dagiti nacangeg kencuana. 3 Ta datayo nga namati sumrectayo iti dayta nga inana, cas iti sinaona, Cas iti panangisapatac idi pannacapungtotco, saandanto a sumrec iti inanac: uray dagiti ar-aramid naturposda nanipud idi pannacabangon ti lubong. 4 Ta iti maysa a paset castoy ti masasao a maipapan iti maicapito nga aldaw, Ket ti Dios naginana iti maicapito nga aldaw cadagiti isuamin nga ar-aramidna. 5 Ket ditoy a paset masasao manen, No sumrecdanto iti inanac. 6 Iti casta agsipud ta rumsua a dagiti dadduma sumrecdanto kencuana, ket dagidi naicascasabaan dagiti naimbag a damag idi damo saanda a simrec gapu iti saanda a panamati: 7 Ibagana manen, ti maysa nga aldaw, a kinuna babaen ni David, Ita nga aldaw, iti calpasan ti adu a tiempo; cas adda a naisaon, Ita nga aldaw no mangngegyo ti timecna, dicayto patangkenen dagiti puspusoyo. 8 Ta no ni Jesus intedna cadacuada ti inana, saanna coma a sasaoen iti calpasan daytoy ti sabali nga aldaw. 9 Adda pay ngarud maysa nga inana a maipaay iti ili ti Dios. 10 Ta ti simrec iti inanana, isu met laeng ti simmardeng cadagiti ar-aramidna, a cas met ti Dios simmardeng cadagiti ar-aramidna. 11 Umagawatayo ngarud tapno sumrectayo iti dayta nga inana, di la ket ta adda mapasag a maitulad iti daydiay met la a kita iti saan a panamati. 12 Ta ti sao iti Dios nabiag, ken napigsa, ket natadtadem ngem uray ania a dua ti tademna a campilan, ket dumanon nga agingga iti paglalasinan ti cararrua ken ti espiritu, ken cadagiti nagsusuupan ken pata, ket nasiglat nga agilasin cadagiti panunot ken panagem ti puso. 13 Ket awan ti aniaman a parsua a saan a sipapanayag iti imatangna: no di ket dagiti isuamin a banag addada a lamolamo ken silulucat cadagiti mata daydiay a pagidatagantayo. 14 Idinto ngarud ta addaantayo ti maysa a dackel a cangatoan a padi, a limmabas cadagiti langlangit, ni Jesus nga Anac ti Dios, salimetmetantayo ngarud a sititibker ti pammatitayo. 15 Ta awan cadatayo ti maysa a cangatoan a padi a di macabalin a mangricna cadagiti kinalap-ittayo; no di iti isuamin nasulisog a cas cadatayo, ngem saan a nagbasol. 16 Umadanitayo ngarud a sitatalged iti trono ti parabur, tapno awatentayo ti asi, ken macasaractayo ti parabur a tumulong cadatayo iti aldaw ti pannacasapul. CAPITULO 5 1 Ta isuamin a cangatoan a padi a mapili cadagiti tattao matudingan a maipaay cadagiti tattao cadagiti banbanag a maipanggep iti Dios, tapno mangidiaya cadagiti sagsagut ken castamet cadagiti datdaton gapu cadagiti basbasol: 2 Maysa a macabalin a mangngaasi cadagiti nanengneng, ken dagiti maallilaw; ta isu nalawlaw met iti kinalap-it. 3 Ket gapu itoy ket rebbengna, a maipuon iti ili, ken casta met maipuon iti bagina met laeng, ti mangidaton gapu cadagiti basbasol. 4 Ket awan coma ti mangakem itoy a dayaw, no di ti inayaban ti Dios, a cas ti pannacaayab ni Aaron. 5 Iti casta uray ni Cristo saanna nga indayaw ti bagina a nagakem a cangatoan a padi; no di ket daydiay nagsao kencuana, Sica ti Anacco, itoy nga aldaw binukelca. 6 Cas met iti kunana iti sabali a paset, Sica ti padi nga agnanayon a cas iti kinapadi ni Melquisedec. 7 Isu a cadagidi aldaw ti panaglasagna, idinto a nangidaton cadagiti carcararag ken dawdawat a nabuyogan iti nasged nga araraw ken lulua iti daydiay macabalin idi a mangispal kencuana iti ipapatay, ket idinto a naipangag gapu iti nadiosan nga butengna; 8 Uray pay no isu ti Anac idi, naadalna ti panagtulnog gapu cadagiti banbanag a linac-amna; 9 Ket idinto a naaramid nga awan pagcuranganna, nagbalin nga isu ti nakin-aramid ti agnanayon a pannacaisalacan cadagiti isuamin nga agtulnog kencuana; 10 Ket ti Dios tinudinganna nga cangatoan a padi cas iti kinapadi ni Melquisedec. 11 Ket adda adu pay a saoenmi a maipapan kencuana, ngem narigat nga ipalawag, agsipud ta nagbalincayo a ngelngel a dumngeg. 12 Ta idinto a tiempona coman a dacayo ti manursuron, masapulyo ketdi manen ti mangisuro cadacayo no ania dagiti pamunganayan a sursuroen cadagiti sasao ti Dios; ket nagbalincayo a casla cadagiti macasapul ti gatas, a saan a ti taraon a nakired. 13 Ta tunggal maysa a mangaramat iti gatas awan padpadasna iti sao ti kinalinteg: ta isu maysa nga ubing. 14 Ngem ti taraon a nakired maipaay cadagiti tattao a nataenganen, dagidiay a gapu iti pannacaas-asada dagiti ricnada nairuamdan a mangilasin ti naimbag ken dakes. CAPITULO 6 1 Gapuna bay-antayon dagiti nagdamdamoan a sursuro ni Cristo, ket agtuloytayo iti kinaan-anay; a ditayo mangicabil manen dagiti pamunganayan ti panagbabawi cadagiti natay nga ar-aramid, ken ti pammati iti Dios, 2 Ti maipapan iti panangisuro cadagiti pammautizar, ti panangipatay cadagiti im-ima, ken ti panagungar dagiti natay, ken ti pannacaocom nga agnanayon. 3 Ket dagitoy aramidentayo, no ipalubos ti Dios. 4 Ta saan a mabalin a dagiti nalawagan iti naminsan, ken naramananda ti sagut a nailangitan, ket na-aramidda a mairaman iti Espiritu Santo, 5 Ket naramananda ti naimbag a sao ti Dios, ken dagiti pannacabalin ti lubong a mapasungad, 6 Ken calpasanna simminada, saan a mabalinen a pabaroen ida iti panagbabawi; idinto nga inlansada manen a maipaay cadacuada ti Anac ti Dios, ket isu imbabainda iti sangoanan dagiti amin a tattao. 7 Ta ti daga a nangsagepsep iti tudo a naminadu nga umay kencuana, ket pataudenna dagiti roroot a macaited iti gunggona cadagidiay pacaigappuan ti pannacamulana, awatenna ti bendicion ti Dios: 8 Ngem ti mangpataud cadagiti roroot a nasiit ken calcalunay maumsi, ket adda nga asideg iti pannacailunod; ket ti tungpalna isu ti pannacaipuor. 9 Ngem, ay-ayatec unay, namnamaenmi a sitatalged dagiti banbanag a nasaysayaat iti biangyo, ken dagiti banbanag a bumuyog iti pannacaisalacan, castoy isu ti saoenmi. 10 Ta ti Dios saan a nakillo tapno lipatenna ti aramidyo ken ti bannog ti ayatyo, nga impakitayo iti naganna, gapu iti tulongyo dagiti pacasapsapulan dagiti sasanto, ken iti panangtultulongyo pay ita cadacuada. 11 Ket tarigagayanmi a tunggal maysa cadacayo ket ipakitana coma ti casdi a regta a maipaay iti naan-anay nga inanama aginggana iti panungpalan: 12 A saancayo a nasadut, no di ket tumutulad cadagidiay a gapu iti pammati ken ti kinaanus tawidenda dagiti carcari. 13 Ta ti Dios idi nagcari ken Abraham, gapu ta dina mabalin ti agsapata iti sabali a dacdackel, nagsapata babaen ti kinaisuna met laeng, 14 A kinunana, Pudno a bendicionancanto a bendicionan, ket paadduencanto a paadduen. 15 Ket iti casta, calpasan ti nabayag a panagan-anusna, nagun-odanna ti cari. 16 Ta dagiti tattao ket agsapatada babaen ti dacdackel: ket ti sapata isu ti pammanecnec cadacuada a mangibanag iti amin nga panagsusuppiat. 17 Gapuna ti Dios, idinto a cayatna nga ipakita a nalawlawag pay cadagiti agtawid iti cari ti saan nga agbalbaliw a panggepna, impanecnecna babaen iti maysa a sapata: 18 Tapno gapu cadagiti dua a banag a di agbalbaliw, isu a saan a mabalin a ti Dios agulbod, adda maysa a napigsa a liwliwatayo, datayo a napan nagcamang babaen ti panginanamaan a naicabil iti sangoanantayo: 19 Inanama nga icutantayo a cas maysa nga ankla ti cararrua, napaypayso ken natibker, ket sumrec nga agingga iti uneg ti abbong; 20 Isu nga ti immun-una cadatayo ken gapu cadatayo a simrec, ni Jesus, naaramid a cangatoan a padi iti agnanayon cas iti kinapadi ni Melquisedec. CAPITULO 7 1 Ta daytoy Melquisedec, ari ti Salem, padi ti cangatoan unay a Dios, isu a nangsabet ken Abraham idi nagawid iti panangparmecna cadagidi ar-ari, ket binendicionanna; 2 Ket ni Abraham nangted met kencuana ti apagcapullo dagiti isuamin; ta umuna ti caipapananna ket isu ti Ari ti kinalinteg, sumaganad Ari ti Salem, nga isu ti, Ari ti talna; 3 Awan amana, awan inana, awan capuonan, ket awan ti pangruggian dagiti aldawna, wenno tungpal ti biagna; ngem naaramid nga umasping iti Anac ti Dios; agtaeng a padi iti agnanayon. 4 Ngem panunotenyo no casano a nagdackel daytoy a tao idi, isu a nangtedan ni patriarca Abraham iti apagcapullo dagiti casayaatan nga inabacna. 5 Ket pudno a dagiti annac ni Levi, nga immawat iti saad ti kinapadi, adda lintegda nga umawat cadagiti apagcapullo cadagiti umili cas cunaen ti linteg, nalawlawag a pannao, umawatda cadagiti cacabsatda, uray pay no dagitoy nagtaudda met ken Abraham: 6 Ngem daydiay a ti capuonanna ket saan a maibilang cadacuada inawatna dagiti apagcapullo ken Abraham, ket binendicionanna daydiay agicut cadagiti carcari. 7 Ngem awan ti aniaman a suppiat ti basbassit mabendicionan gapu iti dacdackel. 8 Ket ditoy dagiti tattao a matay umawatda cadagiti apagcapullo; ngem idiay awatenna, a sacsianda nga sibibiag. 9 Ket cas cayatco pay a saoen, ni Levi met, nga umawat cadagiti apagcapullo, nagbayad ti apagcapullo ken Abraham. 10 Ta ni Levi adda pay laeng iti lomo ni amana, idi nasaracan ni Melquisedec. 11 No ngarud ti kinaan-anay adda iti kinapadi dagiti Levitas, (ta gapu cadacuada dagiti umili inawatda ti linteg,) ania pay ti pacasapulan ti pannaca-adda ti sabali a kinapadi a cas iti kinapadi ni Melquisedec, ket saan a naibilang cas iti kinapadi ni Aaron? 12 Ta no ti kinapadi agbalbaliw, masapul met ngarud nga agbaliw iti linteg. 13 Ta daydiay pacaigappuan a masarsarita iti dagitoy a banbanag ket nagtaud iti sabali a tribu, a saan a naggappuan ti uray siasino nga agserservi iti altar. 14 Ta nalawag a ni Apotayo ket nagtaud iti Juda; isu a tribu nga awan ti sinao ni Moises no maipapan cadagiti kinapadi. 15 Ket nalawlawag pay unay: no cas iti kinapadi ni Melquisedec adda timmaud nga sabali a padi, 16 Nga naaramid, saan a cas iti linteg ti nainlasagan a bilin, no di ket cas iti pannacabalin ti awan panungpalanna a biag. 17 Ta maipapan kencuana panecnecanna, Sica ti padi nga agnanayon cas iti kinapadi ni Melquisedec. 18 Ta adda kinapudnoanna a pannacaucas ti bilin nga immun-una gapu iti kinacapuy ken kinaawan capapay-anna. 19 Ta ti linteg awan ti inaramidna a naan-anay, no di ket naipastrec ti maysa nga inanama a nasaysayaat; a gapu kencuana umadanitayo iti Dios. 20 Ken nangnangrona pay uray saan nga awan iti sapata naaramid a padi: 21 (Ta dagidi a papadi na-aramidda nga awan sapata; ngem daytoy babaen ti sapata gapu iti daydi nagcuna ti maipapan kencuana, Ti Apo nagsapata ket saanto nga agbabawi, Sica ti padi nga agnanayon cas iti kinapadi ni Melchizedec:) 22 Iti casta ngarud nagbalin met ni Jesus a mangpatalged iti maysa a tulag a nasaysayaat. 23 Ket pudno a dagidiay na-aramid nga adu a papadi, gapu ta nalappedanda nga agtuloy gapu iti ipapatayda: 24 Ngem daytoy a tao, agsipud ta agtalinaed nga agnanayon, addaan saan nga agbalbaliw a kinapadina. 25 Gapuna mabalinna met nga isalacan agingga iti awan pagcuranganna dagiti umasideg iti Dios gapu kencuana, ta makita nga isu ket sibibiag nga agnanayon tapno ibabaetna ida. 26 Ta castoy ti cangatoan a padi a naipaay cadatayo, isu ket nasantoan, awan basolna, di natulawan, naisina cadagiti managbasol, ket naaramid a nangatngato ngem cadagiti langlangit; 27 Isu a saanna a masapul iti inaldaw, a cas inaramid dagiti cangatoan a padi, nga agidaton, umuna gapu cadagiti basbasolna, ket calpasanna gapu cadagiti basbasol ti umili: ta daytoy inaramidna iti naminpinsan, idi indatonna ti bagina. 28 Ta ti linteg tudinganna a cangatoan a padi dagiti tattao nga addaan kinacapuy; ngem ti sao ti panagsapata, idi sacbay ti linteg, tinudinganna ti Anac, isu a naaramid nga awan pagcuranganna iti agnanayon. CAPITULO 8 1 Ita cadagiti banbanag nga sinaomi daytoy ti tungpalna: Adda maipaay cadatayo a cangatoan nga padi, a nagtugaw iti macanawan ti trono ti Ari cadagiti langlangit; 2 Maysa a ministro ti sanctuario, ken iti napudno a tabernaculo, nga binangon ti Apo, ket saan a ti tao. 3 Ta tunggal cangatoan a padi natudingan tapno idatonna dagiti sagsagut ken datdaton: gapuna masapul nga daytoy a tao adda met idatonna. 4 Ngem no adda coma iti rabaw ti daga, saan coma a padi, ta makita nga adda dagiti papadi nga agidaton dagiti sagsagut cas mayannurot iti linteg: 5 Isuda nga agservi a casla pacakitaan ken anniniwan dagiti banbanag a nailangitan, a cas met ni Moises binalacadan ti Dios idi irugina a bangonen ti tabernaculo: ta, Kitaem, kinunana, ta aramidem dagiti isuamin a banbanag cas iti pagwadan a naipakita kenca idiay bantay. 6 Ngem ita isu nagun-odanna ti maysa a panagaywan a nasaysayaat, a cas met ti panangibabaetna iti maysa a tulag a nasaysayaat, a nabangon cadagiti nasaysayaat a carcari. 7 Ta no daydi immun-una a tulag awan coma idi ti pagcurcuranganna, saan coma ngarud a masapulen ti pagsaadan ti maicaddua. 8 Ta idinto a binabalawna isuda, kinunana, Adtoy, dagiti al-aldaw ket umayda, cuna iti Apo, intono agaramidac iti baro nga tulag iti balay ni Israel ken iti balay ni Juda: 9 Saan a cas iti tulag nga inaramidco cadagidi ammada iti aldaw a panangibinco cadacuada idi inruarco ida idiay daga ti Egipto; gapu ta saanda a nagtalinaed iti tulagco, ket binaybay-ac ida, cuna ti Apo. 10 Ta daytoy ti tulag nga aramidecto iti balay ni Israel inton malpas dagidiay nga aldaw, cuna ti Apo; Icabilconto dagiti linlintegco iti isipda, ket isuratconto met ida cadagiti puspusoda: ket siacto ti Diosda, ket isudanto dagiti tattaoc: 11 Ket didanto mangisuron tunggal maysa iti caarrubana, ken tunggal maysa iti cabsatna, a kunana, Ammoem ti Apo: ta isuda amin maammoandacto, manipud iti cabassitan agingga iti cadackelan. 12 Ta siac mangngaasiacto cadagiti kinakilloda, ken dagiti basbasolda ken kinadakesda diacto lagipenen. 13 Idi kunana, Maysa nga tulag a baro, daydi immun-una ket pinadaannan. Ita ti dumadaan ken bobo-otonen ket nacasaganan iti panaggibusna. CAPITULO 9 1 Ket pudno a daydi immuna a tulag adda met dagiti pagalagadanna iti nasantoan a panagservi, ken iti naindagaan a sanctuario. 2 Ta maysa a tabernaculo iti naisagana; daydi immuna, a naggianan ti candelero, ken ti lamisaan, ken ti tinapay a sidadaya; isu a managanan ti sanctuario. 3 Ket iti labes ti maicaddua nga abbong, adda daydi tabernaculo a managanan ti Casasantoan amin; 4 A naggianan daydi incensario a balitoc, ken ti lacasa ti tulag a napacalupcupan amin nga aglicmut iti balitoc, a naggianan daydi banga a balitoc a nacaickan daydi mana, ken daydi nagsabong a sarucod ni Aaron, ken dagidi taptapi ti tulag; 5 Ken iti rabawna dagiti querubin a nadayag a manglinlinong iti tugaw ti asi; ket cadagitoy a banbanag saanmi a mabalin ita a saritaen a saggaysa. 6 Ket idi dagitoy a banbanag naisaganada a castoy, dagiti papadi ket canayon nga umuna a sumrecda idi immuna a tabernaculo, ket tungpalenda ti panagservi iti Dios. 7 Ngem iti maicaddua simrec ti cangatoan a padi a maymaysana iti maminsan ti macatawen, saan nga awan ti icuyogna a dara, isu nga idatonna gapu kencuana met laeng, ken gapu cadagiti basbasol ti ili: 8 Nga impaawat daytoy ti Espiritu Santo, a ti pagsercan iti nasantoan a disso ket saan pay idi a naiparang, bayat ti caadda a sitatacder ti umuna a tabernaculo; 9 Nga isu ti maysa a pangngarig iti aldaw nga agdama, ket cas mayannurot itoy maidatonda dagiti sagsagut ken datdaton, a dida mabalin a palaingen nga awan pagcuranganna dagidi mangidaton iti panagservi, no maipapan iti consciensa; 10 Idinto a pagalagadanda laeng babaen dagiti taraon ken in-inumen, ken nadumaduma a kita ti panagbuggo, ken dagiti allagaden iti bagi, a naituyangda agingga iti aldaw ti pannacabalbaliw. 11 Ngem idi nga immay ni Cristo nga cangatoan a padi dagiti naimbag a banbanag nga umayto, gapu iti dacdackel ken nasaysayaat a tabernaculo, a saan a na-aramid babaen ti ima, cayatna a sao-en, saan nga daytoy a patacder; 12 Ket saan met a gapu iti dara dagiti toro a calding ken dagiti toro a baca, no di ket gapu iti darana met laeng simrec iti naminpinsan a maipaay iti agnanayonen idiay santo a disso, a nagun-odanna ti agnanayon a pannacasubbot a maipaay cadatayo. 13 Ta no ti dara dagiti toro a baca ken dagiti toro a calding, ken ti dapo ti bumalasang a baca a naiwarsi cadagiti narugit, mamagsantoda a maipaay iti pannacagugor ti lasag: 14 Dinto nangnangrona pay ti dara ni Cristo, isu a gapu iti agnanayon nga Espiritu indatonna ti bagina nga awan tulawna iti Dios, dalusanna ti consciensayo cadagiti ar-aramid a natay tapno agservicayo iti sibibiag a Dios? 15 Ket gapu itoy isu ti mangibabaet iti maysa a baro a tulag, gapu iti ipapatayna, a maipuon iti pannacasubbot dagiti salsalungasing babaen daydi immuna a tulag, tapno dagiti naayaban awatenda coma ti naicari nga agnanayon a tawid. 16 Ta no adda testamento, masapul ti pacakitaan ti ipapatay ti nagatestar. 17 Ta ti testamento ket adda bilegna iti calpasan nga ti tao matay: ta ngamin awan ti aniaman a pategna no ti nagatestar ket sibibiag pay. 18 Gapuna uray daydi immuna a tulag saan a naconsagrar nga awan dara. 19 Ta idinto a naiwaragawag ni Moises dagiti amin a bilbilin a mayannurot iti linteg cadagiti amin nga umili, innalana ti dara dagiti urbon a baca a lalaki ken calcalding, a napacuyogan ti danum, ken dutdot a nalabaga ti carnero, ken ti hisopo, ket winarsianna daydi pagbasaan met laeng, ken dagidi isuamin nga umili, 20 A kinunana, Daytoy isu iti dara ti tulag nga imbilin ti Dios a maipapan cadacayo. 21 Casta met winarsianna iti dara daydi tabernaculo, ken dagidi isuamin nga arruaten ti panagservi. 22 Ket cas mayalubog iti linteg nganngani isuamin a banag maguguronda iti dara; ket no awan ti maiparucpoc a dara awan ti pannacasubbot. 23 Masapul ngarud idi a dagiti catulad dagiti banbanag a nailangitan magugoranda cadagitoy a banbanag; ngem dagiti banbanag a nailangitan magugoranda cadagiti daton a nasaysayaat ngem dagitoy. 24 Ta ni Cristo saan a simrec cadagiti santo a disdisso nga inaramid ti ima, nga isu ti catulad ti napudno; no di ket idiay langit met laeng, tapno agparang ita iti sangoanan ti Dios gapu cadatayo: 25 Ket saan met a masapul nga idatonna ti bagina iti mamin-adu, a cas iti cangatoan a padi sumrec nasantoan a disso iti tinawen a mangipan iti dara ti sabali; 26 Ta no saan coma a casta nasapulna coma ti nagsagaba iti namin-adu nanipud idi pannacabangon toy lubong: ngem ita naminpinsan laeng idi panungpalan iti adu a pannawen isu naiparangarang a nangpucaw ti basol gapu iti pannacaidaton ti bagina met laeng. 27 Ket gapu ta naituding cadagiti tattao a matayda amamimpinsan, ngem calpasanna daytoy isu iti pannacaocom: 28 Casta met ni Cristo naidaton a naminpinsan tapno awitenna iti basbasol dagiti adu; ken dagiti agur-uray kencuana ket agparangto cadacuada ti maicaddua nga awanan basol a maipaay iti pannacaisalacan. CAPITULO 10 1 Ta ti linteg idinto nga addaan laeng iti anniniwan dagiti naimbag a banag a mapasungad, ket saan a ti napaypayso a catulad dagiti banbanag, uray caano saanna a mabalin a palaingen dagiti umay agidaton cadagiti datdaton nga cancanayon iti tinawentawen. 2 Iti casta ket saanda coma nga nagsardengen iti panagidaton? gapu ta dagiti mangaramid itoy a panagdayaw idinto a nagugoranda iti naminsan ket awan coman ti consciensada cadagiti basol. 3 Ngem dagidiay a datdaton adda nga pacalaglagipan dagiti basbasol iti tunggal tawen. 4 Ta saan a mabalin a ti dara dagiti toro a baca ken calding a lallaki iccatenna dagiti basbasol. 5 Gapuna iti iseserrecna iti lubong, kunana, Daton ken sagut saanmo ida a kinayat, ngem maysa a bagi ti insaganam caniac: 6 Saanmo a nacaay-aywan dagiti datdaton a mapuoran ken dagiti datdaton gapu iti basol. 7 Kinunac ngarud, Adtoy, umayac (iti lucot ti pagbasaan naisurat ti maipapan caniac,) tapno aramidec ti pagayatam, O Dios. 8 Idiay ngato cunaenna, Daton ken sagsagut ken sagsagut a mapuoran ken datdaton a maipaay iti basol dica kinayat, ket dica met nacaay-aywan ida; banbanag a maidaton cas cunaen ti linteg; 9 Calpasanna kunana, Adtoy, umayac tapno aramidec ti pagayatam, O Dios. Iccatenna ti umuna, tapno ipasdecna ti maicaddua. 10 Ket itoy a pagayatan napagsantotayo gapu iti pannacaidaton ti bagi ni Jesus Cristo iti naminpinsan a maipaay iti amin. 11 Ket isuamin a papadi nga agserservi iti inaldaw ken agidatonda iti mamin-adu cadagiti datdaton nga agpapada met laeng nga uray caano, dida mabalin nga iccaten dagiti basbasol: 12 Ngem daytoy a tao, idi indatonna ti maymaysa a daton gapu cadagiti basbasol a maipaay iti agnanayonen, nagtugaw iti macanawan ti Dios; 13 Ket manipud ita agingga iti masangoanan ket agur-uray agingga a dagiti cabusorna ket maaramidda a pagbatayan dagiti sacsacana. 14 Ta gapu iti maymaysa laeng a daton inaramidna nga awan pagcurcurangan a maipaay iti agnanayon dagiti napagsanto. 15 Gapuna ti Espiritu Santo panecnecannatayo met; ta idi kinunana, 16 Daytoy ti tulag nga aramidecto cadacuada inton malabes dagidiay nga aldaw, cuna ti Apo, Icabilconto dagiti linlintegco cadagiti puspusoda, ken cadagiti is-isipda isuratconto ida; 17 Ket dagiti basbasolda ken dagiti kinadakesda diacto lagipenen ida. 18 Ket no adda pannacapacawan dagitoy, awanen ti daton gapu iti basol. 19 Gapuna ngarud, cacabsat, idinto nga adda talgedtayo a sumrec iti disso a nasantoan unay gapu iti dara ni Jesus, 20 Iti maysa a baro ken sibibiag a dalan, nga isu linuctanna a maipaay cadatayo, babaen ti abbong, cayatco a saoen, ti lasagna; 21 Ket addaantayon iti cangatoan a padi nga agaywan iti balay ti Dios; 22 Umadanitayo coma a buyugen ti puso a napudno iti naan-anay a kinatalged ti pammati, nga adda a dagiti puspusotayo ket nawarisanda nanipud iti dakes a consciensa, ken dagiti bagbagitayo ket nabuggoanda iti nadalus a danum. 23 Salimetmetantayo coma a sititibker ti panangipaduyacyac ti pammatitayo nga awan panagduadua; (ta mapagtalcan daydiay nagcari;) 24 Ket agpipinnanunottayo a maipaay iti pannacaparegtatayo iti ayat ken cadagiti naimbag nga ar-aramid: 25 A ditayo baybay-an dagiti panaggigimongtayo, cas iti cadawyan dagiti dadduma; no di ket agbibinnalacadtayo: ket nangnangrona pay, gapu ta makitayo nga ti aldaw ket umas-asidegen. 26 Ta no agbasoltayo a sipapakinakem iti calpasan ti panangawattayo ti pannacaammo iti pudno, awanen ti mabalintayo nga idaton gapu cadagiti basbasol, 27 No di ket ti maysa a nacabutbuteng a panagur-uray iti pannacaocom ken maysa a kinarungsot ti apuy, a mangalun-onto cadagiti cabcabusor. 28 Ti maysa a tao a nangumsi iti linteg ni Moises ket natay nga awan ti asi gapu iti dua wenno tallo a sacsi: 29 Anianto a naing-inget pay iti dusa, ti pagarupenyo, nga agpanunot a maicari, iti daydiay nangipayatpayat babaen cadagiti sacsacana iti Anac ti Dios, ket impatona ti dara ti tulag, a nacasantificaranna, a saan nga nasantoan, ket inumsina ti Espiritu ti parabur? 30 Ta ammotayo daydiay nagsao, Ti ibabales maipabagi caniac, itdecto ti gunggona, cuna iti Apo. Cunana manen, Ti Apo ocomennanto dagiti tattaona. 31 Nacabutbuteng a banag iti matnag cadagiti im-ima ti sibibiag a Dios. 32 Ngem lagipenyo dagiti aldaw nga immun-una, nga idi, nalpascayo a nasilawan, inanusanyo ti dackel a culcul dagiti rigrigat; 33 A no maminsan, na-aramidcayo idi a buybuyaen gapu cadagiti pannacauy-uyaw ken dagiti ladladingit; ket no dadduma, naicanunongcayo cadagidiay napagsagaba cadagiti cacastoy. 34 Ta saan laeng a kinaasiandac cadagiti pannacabalbaludco, no di ket inanusanyo a si-aayat ti panangrabsutda cadagiti cucuayo, nga ammoyo nga adda cadacayo met laeng ti maysa a sanicua idiay langit a nasaysayaat ken agnanayon a banag. 35 Dicayo ngarud pucawen ti pananginanamayo, nga addaan dackel a supapac iti gunggona. 36 Ta masapulyo ti anus, tapno, iti calpasan ti panangaramidyo iti pagayatan ti Dios, awatenyo ti naicari. 37 Ta iti mabiit unay nga aldaw, dayta umay umayto, ket dinto agtactac. 38 Ita ti nalinteg ket agbiagto gapu iti pammati: ngem no adda siasinoman nga agsanud, toy cararruac ket saanto a maay-ayo kencuana. 39 Ngem awancami cadagidiay agsanud nga agturong iti pannacapucaw; no di ket addacami cadagidiay mamati nga agpaay iti pannacaisalacan ti cararrua. CAPITULO 11 1 Ita ti pammati ket isu ti punganay ti panangnamnama cadagiti banbanag nga ur-urayen, maysa a panagtalged cadagiti banbanag a di pay makita. 2 Ta gapu kencuana dagiti lallacay nagun-odanda ti nasayaat a pammanecnec. 3 Gapu iti pammati maawatantayo a dagiti lublubong nabukelda gapu iti sao ti Dios, gapuna a ti makita ket saan a naaramid cadagiti banbanag nga agparang. 4 Gapu iti pammati ni Abel indatonna iti Dios ti maysa a daton a nasaysayaat ngem ni Cain, ket gapu iti daytoy naited kencuana ti pannacapanecnec nga isu nalinteg, idi a sinacsian ti Dios ti maipapan cadagiti datdatonna: ket gapu itoy nupay natayen agsasao pay laeng. 5 Gapu iti pammati ni Enoc ket nayalis tapno dina coma makita ni patay; ket isu saan a nasaracan, ta inyalis ti Dios: ta idi saan pay a nayalis ket naited kencuana ti pammanecnec, a naay-ayona ti Dios. 6 Ngem no awan iti pammati saan a mabalin nga ay-aywen: ta masapul a ti umadani iti Dios patienna coma nga adda, ket gungonaanna dagiti mangsapul kencuana. 7 Gapu iti pammati ni Noe, idi a binalacadan ti Dios iti maipapan cadagiti banbanag a di pay makita idi, natignay iti siraraem a panagbuteng, nangisagana ti maysa a daong a pacaisalacanan ti balayna; ket gapu iti daytoy binabalawna ti lubong, ket isu naaramid a nagtawid iti kinalinteg a mayannurot iti pammati. 8 Gapu iti pammati ni Abraham, idi a naayaban tapno mapan iti maysa a disso nga awatennanto a cas tawid, nagtulnog; ket napan, a dina ammo no sadino idi ti pagturonganna. 9 Gapu iti pammati naggian idiay daga a naicari, a cas gangannaet, a nagnaed cadagiti abong-abong agraman cada Isaac ken Jacob, a makipagtawid iti daydi met la nga cari: 10 Ta inur-urayna ti ili nga adda pamunganayanna, a ti mangbalabala ken mangipatacker kencuana isu ti Dios. 11 Gapu iti pammati ni Sara met laeng inawatna ti pannacabalin a mangisicog iti maysa nga anac, nupay nalabesen ti tawenna, gapu ta isu imbilangna a matalec daydi nangicari. 12 Gapuna daytoy adda nagtaud a maysa, ken casla natayen gapu iti kinalacayna, dagiti casla bitbituen ti langit ti caaduda, ken casla cadagiti darat nga adda iti igid ti baybay a di mabilang. 13 Dagitoy natayda amin babaen iti pammati, a dida pay inawat dagiti carcari, ngem nakitada ida manipud iti adayu, ket napnecda, ken inaracupda, ken impudnoda nga isuda gangannaetda ken agpagpagnada iti rabaw ti daga. 14 Ta dagiti agcuna cadagiti cacastoy a banbanag ket iparangda a sapsapulenda ti daga a pagilianda. 15 Ket pudno, a no malagipda coma daydi pagilian nga naggapuanda, naaddaanda coma ti gundaway nga agsubli. 16 Ngem ita tarigagayanda ti nasaysayaat a pagilian, cayatna a sao-en, ti nailangitan; gapuna ti Dios saanna ida nga ibain nga isu awaganda a Diosda: ta insaganana cadacuada iti maysa nga ili. 17 Gapu iti pammati ni Abraham, idi nasuut, indatonna ni Isaac; daydi immawat a si-aayat cadagiti carcari indatonna idi ti bugbugtong nga anacna. 18 Uray pay isu ti nacaisaoan daytoy, Ken ni Isaac ti caputotam maawaganto: 19 Nga imbilangna a ti Dios mabalinna a pagungaren, uray pay cadagiti natay; ket nanipud idiay inawatna manen isuna a casla pagpangngarigan. 20 Gapu iti pammati ni Isaac binendicionanna ni Jacob ken ni Esau uray pay maipapan cadagiti banbanag a mapasungad. 21 Gapu iti pammati ni Jacob, idi a nganngani matay, binendicionanna ti tunggal maysa cadagiti annac ni Jose; ket nagrucbab, a sisasadag iti murdong ti sarucodna. 22 Gapu iti pammati ni Jose, iti ipapatayna, imbagana daydi ipapanaw dagiti annac ni Israel; ket nagbilin iti maipapan cadagiti tultulangna. 23 Gapu iti pammati ni Moises, idi nayanac, isu inlemmeng dagiti dadackelna bayat ti tallo a bulan, ta nakitada a nalibnos daydi ubing; ket dida kinabuteng daydi bilin ti ari. 24 Gapu iti pammati ni Moises, idi nataenganen, nagmadi a napanaganan ti anac daydi anac a babai ni Faraon; 25 A pinilina nga impangpangrona ti makipagsagaba iti rigat cadagidi tattao ti Dios, ngem iti makiranud cadagiti aglabas nga ragragsac iti basol; 26 A pinagarupna a ti pannacaumsi ken Cristo ket dacdackel a kinabacnang ngem cadagiti kinabacnang ti Egipto: ta nabigbigna idi ti gunggona. 27 Gapu iti pammati pinanawanna ti Egipto, a dina kinabuteng ti pungtot ti ari: ta nagtalinaed, a casla kitkitaenna ti saan a makita. 28 Gapu iti pammati rinambacanna ti ilalabas, ken ti pannacaiwarsi ti dara, tapno daydiay mangdadael cadagiti inauna nga annac saanna coma ida a sagiden. 29 Gapu iti pammati limmasatda iti Nalabaga a baybay a cas iti daga a namaga: ket idi nga pinadas nga inaramid dagidi taga Egipto natinepda. 30 Gapu iti pammati dagiti bacbacud ti Jerico natuang, idi nalpasda a linawlaw cadagiti pito nga aldaw. 31 Gapu iti pammati ni balangcantis a Rahab saan a nairaman a napucaw cadagidi dida kinayat ti namati, idi nga inawatna a sicacappia dagidi immay nagsiim. 32 Ket ania pay ti saoecto? ta agcurangacto iti tiempo no saoec ti maipapan cada Gedeon, ken ni Barac, ken ni Samson, ken ni Jefte; ken ni pay David, ken ni Samuel, ken dagiti mammadto: 33 Isuda a gapu iti pammati inab-abacda dagiti pagpagarian, nagaramidda iti kinalinteg, nacagun-odda cadagiti carcari, inappotda dagiti ngiwat dagiti leon, 34 Dinepdepda ti pigsa ti apuy, nacalisida iti tadem ti campilan, nanipud iti kinacapuyda nagbalinda a nabileg, nagbalinda a mannacabalin iti gubat, pinagtarayda dagiti buybuyot dagiti tattao a gangannaet. 35 Dagiti babbai inawatda dagiti minatayda babaen ti panagungar: ket dagiti sabsabali napapatayda iti panangparigat, a dida kinayat ti maluc-atan; tapno magun-odanda ti nasaysayaat a panagungar: 36 Ket dagiti sabsabali nagsagabada cadagiti pannacarabrabngis ken babaot, wen, uray pay cadagiti pannacarepreppet ken pannacaibalbalud: 37 Nauborda, naragadida, nasuutda, napapatayda iti campilan: nagalla-allada ditoy ken idiay a nagcawesda iti sidudutdot a lalat dagiti carnero ken calcalding; napapanglawda, naparigatda, nacabcabilda; 38 (Ket cadacuada ti lubong saan idi a maicari:) magmagnada a naiyaw-awan cadagiti letlet-ang, cadagiti banbantay, ken cadagiti rucrukib ken ab-abut ti daga. 39 Ket isuamin dagitoy, idi nalpasda nga inawat ti naimbag nga pammanecnec gapu iti pammatida, saanda pay nga inawat ti naicari: 40 Idinto a ti Dios insaganana ti nasaysayaat a banag a maipaay cadatayo, tapno saanda coma a mapalaing a naan-anay nga awantayo. CAPITULO 12 1 Gapuna makitatayo nga adda iti aglawlaw cadatayo ti casta unay nga nagdackel a caadu dagiti sacsi, iwagsactayo ti amin a pacadagsenan, ken ti basol nga manglawlaw a silalaca cadatayo, ket tarayentayo a si-aanus ti tarayen a naicabil iti sangoanantayo, 2 A kitkitaentayo ni Jesus a pangulo ken mangtungpal ti pammatitayo; isu a gapu ti rag-o nga naicabil iti sangoananna inibturanna ti cruz, nga inwacsina iti bain, ket nagtugaw iti macanawan ti trono iti Dios. 3 Panunotenyo ngarud daydiay nagsagaba iti casta a panangsupring dagiti managbasol nga bimmusor kencuana, tapno dicayo coma mabannog ken agcapuy cadagiti panpanunotyo. 4 Dicayo pay la nga nagsagaba agingga iti dara, a simmaranget a maibusor iti basol. 5 Ket nalipatanyon iti balacad nga agsasao cadacayo nga casla annac, Anacco, saanmo nga umsien iti panagdusa ti Apo, ket dica met agcapuy no sica ket babalawennaca: 6 Ta ti ay-ayaten iti Apo ket dusaenna, ken saplitenna ti tunggal maysa nga anac nga awatenna. 7 Ta no ibturanyo iti pannacadusa, ti Dios ibilangnacayo nga cas annac; ta asino iti anac nga saan a dusaen ni amana? 8 Ngem no nailacsidcayo iti pannacadusa, a lac-amen dagiti isuamin nga annacna, iti casta ket bastardocayo ngarud, ket saancayo nga annac. 9 Ket maysa pay adda amma ti lasagtayo ket isuda ti nangdusa cadatayo, ket nagraemtayo cadacuada: dinto nangnangrona a paiturayantayo iti Ama dagiti espiritu, ket agbiagtayo? 10 Ta dagiti ammatayo pudno a dinusadatayo iti bassit nga aldaw cas iti pagarupenda a naimbag: ngem daytoy dusaennatayo a maipaay iti paglaingantayo, tapno mairamantayo iti kinasantona. 11 Ita ket awan iti madama nga dusa a maipagarup nga pagragsacan, no di ket pagladingitan: ngem calpasanna pataudenna ti natalna a bunga ti kinalinteg a maipaay cadagiti nairuam iti daytoy. 12 Gapuna itay-agyo dagiti im-ima a nalpay, ken dagiti tumtumeng nga aglucay; 13 Ket palintegenyo dagiti dandan-a a maipaay cadagiti sacsacayo, di la ket ta iti pilay ket maisiasi; ngem ketdi umimbag coma. 14 Surotenyo ti talna cadagiti isuamin a tattao, ken ti kinasanto, a no awan awanto ti tao a macakita iti Apo: 15 A kitaenyo nga sireregta di la ket ta adda siasinoman a tao a mayadayu iti parabur ti Dios; di la ket ta ti aniaman nga ramut ti kinapait tumubtubo ket pagsicorennacayo, ken gapu kencuana adu ti matulawan; 16 Di la ket ta adda asinoman a mannakicamalala, wenno saan nga agraem cadagiti banbanag a nasantoan, cas ken Esau, isu a gapu laeng iti naminsan a pannangan inlacona ti calinteganna nga inauna nga anac. 17 Ta ammoyo nga idi calpasannan, uray cayatna coma a tawiden ti pannacabendicion, isu napaay: ta saanna a natumpongan iti gundaway ti panagbabawi, uray pay no sinapsapulna a sireregta a binuyog dagiti lulua. 18 Ta saancayo nga immasideg iti bantay a mabalin a sagiden, ken sumsumged iti apuy, wenno iti kinangisit, ken ti kinasipnget, ken ti nadawel nga angin, 19 Ken ti uni ti tangguyob, ken ti timec a nangngeg; ket dagiti nacangngeg iti daytoy a timec dinawatda a ti timec ket saanna coma ida casaon: 20 (Ta dida maibturan dayta nga naibilin idi cadacuada, Ken uray no iti maysa la nga animal ket sagidenna ti bantay, isu ket mauborto, wenno masalputto iti gayang: 21 Ket nacaal-alinget idi daydi a buyaen, iti casta ni Moises kinunana, Mabutengac unay ken agtaytayegtegac:) 22 Ngem immasidegcayo iti bantay Sion, ken iti ili ti sibibiag a Dios, ti Jerusalem a nailangitan, ken cadagiti di mabilang a buybuyot dagiti angeles, 23 Iti sapasap a gimong ken iglesia iti inauna nga anac, a nailanad ti naganda idiay langit, ken iti Dios nga Ocom dagiti isuamin, ken cadagiti espiritu dagiti nalinteg a naaramidda nga awan pagcurangandan, 24 Ken ni Jesus a mangibabaet iti baro a tulag, ken iti dara nga iwarwarsi, nga agsasao cadagiti nasaysayaat a banbanag ngem daydi ken Abel. 25 Kitaenyo ta dicayo pa-ayen ti agsasao. Ta no dida nacatalaw dagidi saan nga inmannugot daydi nagsao ditoy rabaw ti daga, nangnangrona a ditayto macatalaw, no ditayo ipangag daydiay agsasao manipud sadi langit: 26 Idi ti timecna pinagkintayegna ti daga: ngem ita incarina, a kunana, Pagkintayegec pay maminsan saan laeng a ti daga, no di ket ti langit pay. 27 Ket daytoy a sao, A maminsan pay, ibagana ti anbanag a timmaud laeng, tapno dagiti saan a magaraw mataginayon coma. 28 Gapuna idinto nga awatentayo ti maysa a pagarian a saan a mabalin nga garawen, maaddaantayo coma ti parabur, ket gapu itoy agservitayo iti Dios a macaay-ayo kencuana nga buyogen iti panagraem ken buteng: 29 Ta ti Diostayo isu ti maysa nga apuy a mangrunaw. CAPITULO 13 1 Mataginayon coma ti ayat nga naincacabsatan. 2 Dicayo lipatan ti panangiparangyo iti ayat cadagiti gangannaet: ta gapu itoy dagiti dadduma pinadagusda dagiti angeles nga dida nadlawan. 3 Lagipenyo dagiti sibabalud, a casla nairamancayo iti pannacabaludda; dagiti maparigatan, a casla addacayo met a naibagi cadacuada. 4 Ti panagasawa ket nadayaw cadagiti isuamin, ken ti pagiddaan awan ti tulawna: ngem dagiti mannakiabig ken dagiti mannakicamalala ket ocomento ti Dios. 5 Ti panagbiagyo ket awan coma iti kinaagum; ket mapneccayo coma iti adda cadacayo: ta isu met laeng kinunana, Saancanto a panawan, ket dicanto baybay-an. 6 Iti casta mabalintayo a saoen a sitatalged, Ti Apo ti tumulong caniac, diacto agbuteng iti uray ania nga aramiden ti tao caniac. 7 Lagipenyo dagiti mangipangulo cadacayo, isuda a nangipacaammo cadacayo ti sao ti Dios: ket ti pammatida tuladenyo, a panpanunotenyo no ania ti nagtungpalan ti panagbiagda. 8 Ni Jesus Cristo isu met laeng idi calman, ken ita nga aldaw, ken iti agnanayon awan patinggana. 9 Saancayo ngarud a paiyalla-alla cadagiti nadumaduma ken gangannaet a sursuro. Ta nasayaat a banag a ti puso ket mapapigsa babaen ti parabur; saan a cadagiti tartaraon, nga uray caano saan a naglaingan dagidi nangsango cadacuada. 10 Adda maysa nga altartayo, nga awan ti calinteganda nga mangan dagiti agserservi iti tabernaculo. 11 Ta dagiti bagbagi dagidiay an-animal, a ti darada idaton ti cangatoan a padi idiay nasantoan a disso gapu iti basol, ket mapuoranda iti ruar ti pacarso. 12 Gapuna ni Jesus met, tapno pagsantoenna ti ili gapu iti darana met laeng, nagsagaba iti ruar ti ruangan. 13 Mapantayo ngarud kencuana iti ruar ti pacarso, a sagabaentayo ti pannacauy-uyawna. 14 Ta awan ti pagiliantayo ditoy a mataginayon, ngem tarigagayantayo ti mapasungad. 15 Iti casta gapu kencuana idatontayo a cancanayon iti Dios ti daton ti panagdaydayaw, cayatna a saoen, ti bunga dagiti bibbibigtayo nga mangipaduyacyac cadagiti panagyaman a maipaay iti naganna. 16 Ngem dicayo liplipatan ti panagaramid iti naimbag ken iti panagcacaddua: ta dagiti cacastoy a datdaton ket pagay-ayatan unay ti Dios. 17 Agtulnogcayo cadagiti mangidaulo cadacayo, ket paiturayancayo: ta igagada dagiti cararruayo, a casla isuda ti mangidatagto, tapno aramidenda daytoy a sirarag-o, ket a saan a sililiday: ta daytoy ket awan ti magunggonayo. 18 Icarcararagandacami: ta mapneccami unay nga adda nasayaat a concienciami, a tarigagayanmi ti agbiag a sitatacneng cadagiti isuamin a banbanag. 19 Ngem agdawatac a nangnangrona nga aramidenyo daytoy, tapno maisubliac cadacayo iti mabibiit. 20 Ket ita ti Dios ti talna, isu a nangisubli manipud cadagiti natay ni Apotayo a Jesus, dayta dackel a pastor dagiti carnero, gapu iti dara ti agnanayon a tulag, 21 Aramidennacayo coma a naan-anay cadagiti isuamin a naimbag nga ar-aramid tapno aramidenyo ti pagayatanna, isu nga agar-aramid cadatayo ti macaay-ayo unay iti imatangna, gapu ken Jesus Cristo; isu a maitantan-oc coma iti agnanayon nga awan patinggana. Amen. 22 Ngem dawatec cadacayo, cacabsat, nga anusanyo coma ti sao a pammagbaga: ta nagsuratac cadacayo iti bassit a sasao. 23 Ammoenyo a ni cabsattayo a Timoteo ket nawayawayaanen; ket gapuna daytoy, no umay iti mabiit, umaycayto kitaen. 24 Cablaawanyo dagiti isuamin a mangipangulo cadacayo, ken dagiti isuamin a sasanto. Dagiti taga Italia cablaawandacayo. 25 Ti parabur adda coma cadacayo amin. Amen. Naisurat idiay Italia nga agpaay cadagiti Hebreo babaen ken Timoteo. |