GENESIS

TI UMUNA A LIBRO NI MOSES, NAAWAGAN

GENESIS

CAPITULO 1

1 Idi pangruggianan dagiti isuamin iti Dios ket pinarsuana dagiti langlangit ken ti daga.

2 Ket ti daga awan idi iti kalangalangana, ken awan nagyan; ket iti sipnget adda idi iti rabaw ti yuyeng. Ket ti Espiritu ti Dios nagtignay ti rabaw dagiti dandanum.

3 Ket ti Dios kinunana, Adda coma lawag: ket nagadda iti lawag.

4 Ket iti Dios nakitana ti lawag, nga naimbag: ket ti Dios pinagsinana ti lawag cadagiti sipnget.

5 Ket iti Dios ninagananna ti lawag Aldaw, ket ti sipnget ninagananna Rabii. Ket ti malem ken ti bigat isuda iti umuna nga aldaw.

6 śKet ti Dios kinunana, Adda coma maysa a tangatang iti tengnga dagiti dandanum, ket pagsisinaenna coma dagiti dandanum cadagiti dandanum.

7 Ket ti Dios inaramidna ti tangatang, ket insinana dagiti dandanum nga adda iti baba ti tangatang cadagiti dandanum nga adda iti rabaw ti tangatang: ket naaramid nga casta.

8 Ket ti Dios ninagananna ti tangatang Langit. Ket ti malem ken ti bigat isuda iti maicaddua nga aldaw.

9 śKet ti Dios kinunana, Mapagtitipon coma dagiti dandanum nga adda iti baba dagiti langit iti maysa a disso, ket ti namaga nga daga agparang coma: ket naaramid nga casta.

10 Ket iti Dios ninagananna ti namaga nga daga Daga; ken ti nacatiponan dagiti dandanum ninagananna Tataaw: ket iti Dios nakitana nga nasayaatda.

11 Ket iti Dios kinunana, Ti daga patubboenna coma ti root, mulmula nga adda bukelda, ken caycayo nga agbunga iti bungbunga cas iti casisigudda, ti bukelda adda cadacuada, iti rabaw ti daga: ket naaramid a casta.

12 Ket ti daga pinataudna iti root, ken mulmula nga addaan bukel nga mayannatup iti casisigudda, ken caycayo nga agbunga, a ti bukel adda cadacuada, a cas iti casisigudda: ket iti Dios nakitana nga nasayaatda.

13 Ket ti malem ken ti bigat isuda iti maicatlo nga aldaw.

14 ś Ket iti Dios kinunana, Adda coma silsilaw ti tangatang dagiti langlangit tapno agsina iti aldaw ken iti rabii; ket maipaayda coma nga pagilaslasinan, ken panpanawen, ken al-aldaw, ken tawtawen:

15 Ket maipaayda coma a silsilaw iti tangatang dagiti langit a manglawag iti daga: ket naaramid nga casta.

16 Ket iti Dios inaramidna dagiti dua a dadackel nga silsilaw; iti dacdackel nga silaw ket iturayanna ti aldaw, ket iti basbassit nga silaw ket iturayanna iti rabii: inaramidna pay amin met dagiti bitbituen.

17 Ket ti Dios insaadna ida iti tangatang dagiti langit tapno itedda ti lawag iti rabaw ti daga,

18 Ken tapno agturay iti aldaw ken agturay iti rabii, ken tapno mapagsina iti lawag cadagiti sipnget: ket iti Dios nakitana nga nasayaatda.

19 Ket ti malem ken ti bigat isuda iti maicapat nga aldaw.

20 Ket ti Dios kinunana, Patauden coma dagiti dandanum ti adu nga aggargaraw a parsua nga addaan biag, ken tumatayab tapno agtayabda iti ngato ti daga iti nacalucat nga tangatang iti langit.

21 Ket ti Dios pinarsuana dagiti dadackel nga ballena iti taaw, ken isuamin nga sibibiag a parsua nga aggargaraw, a gapu cadagiti dandanum napataudda nga adu, cas iti casisigudda, ken amin a tumatayab nga nagpayac cas iti casisigudda: ket iti Dios nakitana nga nasayaatda.

22 Ket iti Dios binendicionanna ida, a kunana, Agbungacayo, ken agaducayo, ken punnoenyo dagiti dandanum dagiti tataaw, ken dagiti tumatayab agaduda coma iti daga.

23 Ket ti malem ken ti bigat isuda iti maicalima nga aldaw.

24 ś Ket ti Dios kinunana, Patauden coma ti daga dagiti sibibiag nga parsua cas iti casisigudda, baca, ken agcacarayam nga banag, ken an-animal ti daga cas iti casisigudda: ket naaramid nga casta.

25 Ket ti Dios inaramidna dagiti nabileg nga an-animal iti daga cas ti casisigudda, ken naamo nga animal cas iti casisigudda, ken amin nga agcarcarayam iti daga cas iti casisigudda: ket ti Dios nakitana nga nasayaatda.

26 ś Ket ti Dios kinunana, Aramidentayo iti tao nga caladawantayo, a cas caaspingtayo: ket tapno iturayanda dagiti ic-ican iti taaw, ken dagiti tumatayab cadagiti langlangit, ken dagiti an-animal, ken iti amin a daga, ken dagiti amin nga cumacarayam nga agcarayam iti rabaw iti daga.

27 Ket ti Dios pinarsuana ti tao nga caladawanna met laeng, iti ladawan ti Dios pinarsuana ti tao; lalaki ken babai pinarsuana ida.

28 Ket ti Dios binendicionanna ida, ket ti Dios kinunana cadacuada, Agbungacayo, ken umaducayo, ken punnoenyo ti daga, ken parmekenyo: ken iturayanyo dagiti ican iti taaw, ken dagiti tumatayab cadagiti langit, ken amin nga sibibiag a parsua nga aggargaraw iti rabaw ti daga.

29 ś Ket ti Dios kunana, Adtoy, iniccancayo ti isuamin a mulmula nga addaan bukel, nga adda iti rabaw ti amin a daga, ken isuamin nga cayo, nga addaan bunga nga agpataud iti bin-i; maipaaydanto nga canenyo.

30 Ken dagiti isuamin nga an-animal iti daga, ken isuamin nga tumatayab iti langit, ken isuamin nga agcarayam iti daga, nga addaan biag, itedco isuamin a nalasbang a mulmula a canenda: ket naaramid a casta.

31 Ket ti Dios nakitana amin nga inaramidna, ket, adtoy, nasayaatda unay. Ket ti malem ken ti bigat isuda ti maicanem nga aldaw.

CAPITULO 2

1 Ket iti casta dagiti langlangit ken iti daga nalpasda, ken isuamin nga or-ornosda.

2 Ket ti maicapito nga aldaw ti Dios lineppasna iti gapuanan nga inaramidna; ket naginana iti maicapito nga aldaw cadagiti isuamin a gapuanan nga inaramidna.

3 Ket ti Dios binendicionanna iti maicapito nga aldaw, ken sinantificarna: agsipud ta ti daytoy nga aldaw ti Dios naginana cadagiti amin a ginapuananna nga pinarsuana ken inaramidna.

4 ś Dagitoy isuda ti caruruggianan dagiti langlangit ken ti daga idi a naparsuada, iti aldaw a ni APO Dios inaramidna ti daga ken dagiti langlangit,

5 Ket idi awan pay la iti mula ti langalang iti daga, ken awan pay iti roroot ti daga a timmubo: ta ni APO Dios dina pay pinagtudo iti rabaw ti daga, ken awan pay la idi ti tao a mangtalon iti daga.

6 Ngem nagpangato ti maysa nga angep nga naggapu iti daga, ket binisibisinna iti amin nga rabaw ti daga.

7 Ket ni APO Dios binukelna ti tao iti tapuc ti daga, ket impuyotna iti agongna ti anges iti biag; ket ti tao nagbalin a sibibiag nga cararrua.

8 ś Ket ni APO Dios incabilna iti maysa a minuyongan iti daya idiay Eden; ket idiay insaadna ti tao nga binukelna.

9 Ket manipud iti daga ni APO Dios pinatubona iti amin nga cayo a nacaay-ayo nga makita, ken naimbag a canen; ti cayo ti biag met iti tengnga ti minuyongan, ken ti cayo ti pannacaammo iti imbag ken dakes.

10 Ket maysa a carayan nagayus idiay Eden a mangsibug iti minuyongan; ket manipud idiay nabingay, ket nagbalin nga uppat iti pagayusanna.

11 Ti nagan ti umuna ket Pishon: daytoy isu ti manglawlaw iti amin a daga iti Havila, isu nga ayan ti balitoc;

12 Ket ti balitoc iti daydiay a daga nasayaat: adda idiay dagiti batbato a bedelio ken onix.

13 Ti nagan ti maicaddua a carayan ket Gijon: isu daytoy ti manglawlaw iti amin nga daga ti Etiopia.

14 Ket ti nagan ti maicatlo a carayan ket Hiddekel: daytoy ti agturong iti sangoanan ti daya nga Assiria. Ket ti maicapat nga carayan isu ti Eufrates.

15 Ket ni APO Dios innalana ti tao, ket insaadna isuna iti minuyongan idiay Eden tapno talonenna ken aywananna.

16 Ket ni APO Dios binilinna di tao, a kinunana, Cadagiti amin nga cayo iti minuyongan mangancanto a siwayawaya:

17 Ngem ti aggapu iti cayo ti pannacaammo iti imbag ken ti dakes, saanmonto nga canen: ta iti aldaw a pannanganmo iti dayta mataycanto nga awan duduana.

18 ś Ket ni APO Dios kinunana, Saan a nasayaat nga agmaymaysa ti tao; iyaramidacto iti catulonganna nga maitutop kencuana.

19 Manipud iti daga ti APO Dios binukelna amin nga an-animal iti daga, ken amin nga tumatayab cadagiti tangatang; ket inyegna ida ken Adan tapno makitana no casino ti panangpanaganna cadacuada: ket cas iti pinangnagan ni Adan iti amin a sibibiag nga parsua, dayta isu ti naganna.

20 Ket ni Adan ninagananna amin a naamo nga animal, ken tumatayab iti langlangit, ken amin a nabileg nga an-animal ti daga; ngem ni Adan saan a nacasarac ti catulongan nga maitutop kencuana.

21 Ket ni APO Dios impaayna ti nargaan a turog ken Adan, ket isu nacaturog: ket innalana ti maysa cadagiti paragpagna, ket rinipcanna iti lasag a nangalaanna;

22 Ket ti paragpag, nga innala ni APO Dios iti tao, inaramidna a babai, ket inyegna iti tao.

23 Ket ni Adan kinunana, Daytoy ita isu ti tulang dagiti tultulangco, ken lasag iti lasagco: isu mapanagananto Babai, agsipud ta iti nacaalaanna ket Lalaki.

24 Gapuna ti lalaki panawannanto ti amana ken ti inana, ket tumiponto iti asawana: ket agbalindanto nga maymaysa a lasag.

25 Ket isuda a dua silalamoda idi, ti lalaki ken ti asawana, ket dida nagbain.

CAPITULO 3

1 Itan ti uleg isu idi ti casisicapan cadagiti amin nga animal iti daga nga inaramid ni APO Dios. Ket isu kinunana iti babai, Wen, ti Dios kinuna aya, Saancayo a mangan iti amin nga cayo iti minuyongan?

2 Ket ti babai kinunana iti uleg, Maipalubos a mangancami cadagiti bunga dagiti cayo ti minuyongan:

3 Ngem ti bunga iti cayo nga adda iti tengnga ti minuyongan, ti Dios kinunana, Dicayto canen, ken uray sagiden, di la ket ta mataycayo.

4 Ket ti uleg kinunana iti babai, Saan nga pudno a mataycayonto:

5 Ta ti Dios ammona nga ti aldaw nga pannanganyo iti dayta, dagiti matayo maluctandanto, ket caslacayton cadagiti didios, a macaammo ti naimbag ken ti dakes.

6 Ket idi ti babai nakitana nga ti cayo nasayaat nga canen, ken macaay-ayo a buyaen, ken cayo a macagargari a mamagsirib, pimmuros ti bungana, ket nangan, casta met iniccanna ni asawana, ket isu nakipagkaan met.

7 Ket dagiti matmatada nga dua naluctanda, ket naammoanda nga silalamoda; idin nagdaitda cadagiti bulong iti higos, ket inaramidda a bidangda.

8 Ket nangegda ti timec ni APO Dios a magmagna iti minuyongan iti lamiis ti aldaw: ket ni Adan ken ti asawana naglemmengda iti imatang ni APO Dios cadagiti cacaycayoan iti minuyongan.

9 Ket ni APO Dios inawaganna ni Adan, ket kinunana kencuana, Sadimo ti ayanmo?

10 Ket isu kinunana, Nangegco ti timecmo ditoy uneg iti minuyongan, ket nagbutengac, gapu ta silalamoac; isu nga naglemmengac.

11 Ket kinunana kencuana, Siasino aya ti nangibaga kenca a silalamoca? Nanganca cadi iti cayo, nga imbilinco kenca a dica canen?

12 Ket ti lalaki kinunana, Ti babai nga intedmo a cadduac, iniccannac ti bungana, ket kinnanco.

13 Ket ni APO Dios kinunana iti babai, Ania daytoy nga inaramidmo? Ket ti babai kinunana, Ti uleg sinicapannac, ket nangannac.

14 Ket ni APO Dios kinunana idi uleg, Gapu ta inaramidmo daytoy, nailunodca a nangnangrona ngem cadagiti isuamin a naamo nga animal, ken amin a nabileg nga animal iti daga; ta barucongmo ti ipagnamto, ket tapuc ti canemto iti isuamin nga aldaw iti panagbiagmo:

15 Ket Siac pagginnuraencayto iti babai, ken ti caputotam ken ti caputotanna; daytoy sugatennanto ta ulom, ket sica sugatemto iti mucodna.

16 Ket iti babai kinunana, Paadduecto unay dagiti ut-utmo ken ti panagsicogmo; ti adu nga rigat

ipasngaymonto dagiti annacmo; ket ti asawam isunto ti calicagumam, ket isu iturayannacanto.

17 Ket ken Adan kinunana, Gapu ta inanamungam iti sao ni asawam, ket nanganca iti cayo, nga inbilinco kenca, a kinunac, Dica manganto iti daydiay: nailunod ti daga gapu kenca; babaen ti rigat mangancanto kencuana iti isuamin nga aldaw ti panagbiagmo;

18 Sisiit met ken calcalunay pataudennanto kenca; ket mangancanto iti mulmula iti daga;

19 Babaen ti ling-et ta rupam mangancanto ti taraon, agingga agsublica iti daga; isu ti nacabuclam: ta tapucca, ket ti tapuc agsublicanto.

20 Ket pinanaganan ni Adan iti asawana Eva; gapu ta isu iti ina dagiti isuamin nga sibibiag.

21 Ket inyaramidan ni APO Dios da Adan ken iti asawana cadagiti pagan-anay nga lallalat, ket kinawesanna ida.

22 ś Ket ni APO Dios kinunana, Adtoy, ti lalaki nagbalin a cas maysa cadatayo, nga ammona iti naimbag ken ti dakes: ket ita, di la ket ta igaw-atna ti imana, ken mangala met iti cayo ti biag, ken mangan, ken agbiag nga agnanayon:

23 Iti casta ni APO Dios pinarruarna isuna manipud iti minuyongan iti Eden, tapno talonenna ti daga nga nacaalaana.

24 Ket pinagtalawna ti tao; ket insaadna iti daya ti minuyongan ti Eden dagiti Kerubims, ken ti maysa a sumilsilap a campilan a simmango iti amin nga dalan, tapno bantayanna ti dalan nga agturong iti cayo ti biag.

CAPITULO 4

1 Ket ni Adan dinennaanna ni Eva nga asawana; ket nagsicog, ket inyanacna ni Cain, ken kinunana, Nagun-odco ti maysa a lalaki nga naggapu ken ti APO.

2 Ket inyanacna manen ni cabsatna nga Abel. Ket ni Abel nagaywan cadagiti carcarnero, ngem ni Cain nagtaltalon.

3 Ket naaramid iti panaglasat dagiti pannawen, a ni Cain nangala iti bunga ti daga nga indatonna ken ni APO.

4 Ket ni Abel, nangala met cadagiti inauna nga anac cadagiti pangenna ken dagiti nalucmeg. Ket ti APO pinatpategna ni Abel ken iti datonna:

5 Ngem ni Cain ken ti datonna dina incancano. Ket ni Cain nagpungtot la unay, ken nagliday iti rupana.

6 Ket iti APO kinunana ken Cain, Apayapay nga agpungpungtotca? ken apayapay narupanget ta rupam?

7 No naimbag iti aramidem, apay a saanto nga macaparagsac? ket no dica agaramid ti naimbag, ti basol cumleb iti ruangan. Ket sicanto ti calicagumanna, ken sica iturayamto isuna.

8 Ket kinasao ni Cain ni cabsatna nga Abel: ket naaramid, nga idi addada iti away, ni Cain dinuclosna ni Abel a cabsatna, ket pinatayna.

9 ś Ket ti APO kinunana ken Cain, Sadino ti ayan ni Abel nga cabsatmo? Ket kinunana, Diac ammo: Siac aya iti agaywan ken cabsatco?

10 Ket kinunana, Ania ti inaramidmo? ti timec ti dara ni cabsatmo awagannac manipud iti daga.

11 Ita ngarud nailunodca iti daga, isu nga nanglucat iti ngiwatna tapno awatenna ti dara ni cabsatmo manipud cadagita imam;

12 Intono talonem ti daga, dinanto sublien nga itden kenca iti bilegna; walang-walangcanto ken agpagnapagnacanto iti daga.

13 Ket kinuna ni Cain ken ti APO, Ti dusac ket dacdackel ngem ti mabalinco nga awiten.

14 Adtoy, pinagtalawnac ita nga aldaw iti rabaw ti daga; ket ti sangoanam aglemmengacto; agwalang-walangacto ken agpagnapagnaacto iti daga; ket maaramidto nga, uray siasino ti macasarac caniac papatayennacto.

15 Ket kinuna ti APO kencuana, Gapuna no siasinoman a mamapatay ken Cain, maibalesto kencuana ti maminpito. Ket ti APO incabilna iti maysa nga pagilasinan ken Cain, di la ket ta patayen ti uray siasino nga macasarac kencuana.

16 Ket pimmanaw ni Cain iti sangoanan ti APO, ket isuna nagnaed iti daga nga Nod, idiay daya iti Eden.

17 Ket ni Cain dinennaanna ni asawana, ket nagsicog, ket inyanacna ni Henoc: ket namangon iti maysa nga ili, ket ninanagananna ti ili, ti nagan iti anacna, Henoc.

18 Ket naputot ken Henoc ni Irad: ket ni Irad pinutotna ni Maviael: ket ni Maviael pinutotna ni Matusael: ket ni Matusael pinutotna ni Lamec.

19 ś Ket ni Lamec nangala ti dua nga asawana: ti nagan ti maysa Ada, ket ti nagan ti sabali Sella.

20 Ket ni Ada inyanacna ni Jabel: isu nga ama dagiti agtaeng iti sapsapaw, ken dagiti adda an-animalda.

21 Ket ti nagan daydi cabsatna a lalaki ket Jubal: isu nga ama dagiti agtoctocar iti harpa ken flauta.

22 Ket ni Sella, inyanacna met ni Tubal-cain, nga agpanpanday iti amin a natadem a suer ken landoc: ket ti babai nga cabsat ni Tubal-cain isu ni Naama.

23 Ket kinuna ni Lamec cadagiti assawana, Ada ken Sella, Denggenyo ti timecco; dacayo nga assawa ni Lamec, timudenyo ti saoc: ta pinatayco ti maysa a tao gapu ta sinugatnac, ken ti maysa a baro gapu ta rinanggasannac.

24 No ni Cain maminpitonto nga mabales, pudno a ni Lamec maminpitopulo a pito.

25 ś Ket dinennaan manen ni Adan iti asawana; ket isu inyanacna ti maysa a lalaki, ket pinanagananna iti Set: Ta kinunana, ti Dios, iniccannac iti sabali nga putot a sucat ni Abel, isu nga pinatay ni Cain.

26 Ket ni Set, naputot met kencuana ti maysa a lalaki; ket pinanagananna ti Enos: daytoyen ti nangruggian dagiti tattao iti panangawagda ti nagan ti APO.

CAPITULO 5

1 Daytoy ti pacabasaan cadagiti caputotan ni Adan. Idi aldaw a pinarsua ti Dios ti tao, a caasping iti Dios ti panangaramidna iti tao;

2 Lalaki ken babai pinarsuana ida; ket binendicionanna ida, ket pinanagananna ida iti Adan, idi aldaw a pannacaparsuada.

3 Ket ni Adan nagbiag iti sangagasut ken tallopulo a tawen, ket pinutotna ti maysa a lalaki a caaspingna, cas iti ladawanna; ket pinanagananna iti Set:

4 Ket dagiti aldaw ni Adan calpasanna ti panangputotna ken Set ket walogasut a tawen: ket pinutotna dagiti annac a lallaki ken babbai:

5 Ket dagup dagiti aldaw a panagbiag ni Adan siam a gasut ken tallopulo a tawen: ket calpasanna natay.

6 Ni Set nagbiag iti sangagasut ken lima a tawen, ket pinutotna ni Enos:

7 Ket ni Set nagbiag calpasan ti panangputotna ken Enos walogasut ken pito a tawen, ket pinutotna dagiti annac a lallaki ken babbai:

8 Ket ti dagup dagiti aldaw ni Set siam a gasut ken sangapulo ket dua a tawen: ket calpasanna natay.

9 ś Ni Enos nagbiag iti siam a pulo a tawen, ket pinutotna ni Cainan:

10 Ket ni Enos nagbiag calpasanna ti panangputotna ken Cainan walogasut ken sangapulo ket lima a tawen, ket pinutotna dagiti annac a lallaki ken babbai:

11 Ket dagup dagiti aldaw ni Enos siam a gasut ken lima a tawen: ket calpasanna natay.

12 ś Ni Cainan nagbiag iti pitopulo a tawen, ket pinutotna ni Mahalael:

13 Ket ni Cainan nagbiag calpasanna ti panangputotna ken Mahalael walogasut ken uppat a pulo a tawen, ket pinutotna dagiti annac a lallaki ken babbai:

14 Ket dagup dagiti aldaw ni Cainan siam a gasut ken sangapulo a tawen: ket calpasanna natay.

15 ś Ni Mahalael nagbiag iti innem a pulo ket lima a tawen, ket pinutotna ni Jared:

16 Ket ni Mahalael nagbiag calpasanna ti panangputotna ken Jared walogasut ken tallopulo a tawen, ket pinutotna dagiti annac a lallaki ken babbai:

17 Ket dagup dagiti aldaw ni Mahalael walogasut ken siam a pulo ken lima a tawen: ket calpasanna natay.

18 ś Ni Jared nagbiag iti sangagasut innem a pulo ket dua a tawen, ket pinutotna ni Enoc:

19 Ket ni Jared nagbiag calpasanna ti panangputotna ken Enoc walogasut a tawen, ket pinutotna dagiti annac a lallaki ken babbai:

20 Ket dagup dagiti aldaw ni Jared siam a gasut ken innem a pulo ket dua a tawen: ket calpasanna natay.

21 ś Ni Enoc nagbiag iti innem a pulo ket lima a tawen, ket pinutotna ni Matusalem:

22 Ket ni Enoc nakipagna iti Dios calpasanna ti panangputotna ken Matusalem ti tallogasut a tawen, ket pinutotna dagiti annac a lallaki ken babbai:

23 Ket dagup dagiti aldaw ni Enoc tallogasut ken innem a pulo ket lima a tawen:

24 Ket ni Enoc nakipagna iti Dios: ket nagawan; ta innala ti Dios.

25 Ni Matusalem nagbiag iti sangagasut walopulo ket pito a tawen, ket pinutotna ni Lamec:

26 Ket ni Matusalem nagbiag calpasanna ti panangputotna ken Lamec ti pitogasut ken walopulo ket dua a tawen, ket pinutotna dagiti annac a lallaki ken babbai:

27 Ket dagup dagiti aldaw ni Matusalem siam a gasut ken innem a pulo ket siam a tawen: ket calpasanna natay.

28 ś Ni Lamec nagbiag iti sangagasut walopulo ket dua a tawen, ket pinutotna ti maysa nga anac a lalaki:

29 Ket pinanagananna iti Noe, a kunana, Daytoy liwliwaennatayto cadagiti aramidtayo ken cadagiti banbannog dagiti im-imatayo, maipuon iti daga nga inlunod ti APO.

30 Ket ni Lamec nagbiag calpasanna ti panangputotna ken Noe ti limagasut ken siam a pulo ket lima a tawen, ket pinutotna dagiti annac a lallaki ken babbai:

31 Ket dagup dagiti aldaw ni Lamec pitogasut ken pitopulo ket pito a tawen: ket calpasanna natay.

32 Ket ni Noe nagtawen iti limagasut a tawen: ket ni Noe pinutotna ni Sem, Cam, ken ni Jafet.

CAPITULO 6

1 Ket napasamac, nga idi dagiti tao nangrugida nga nagadu iti rabaw ti daga, ket nayanac cadacuada dagiti babbai,

2 Nga idi dagiti lallaki nga annac ti Dios nakitada ti kinapintas dagiti babbai nga annac dagiti tattao; pimmilida cadacuada dagiti kinayatda nga asawaenda.

3 Ket ti APO kinunana, Ti Espirituc saanto a cancanayon a mangbabalaw iti tao, ta isu ngarud linalasag: nupay casta dagitinto aldawna ket sangagasut ket duapulo pay nga tawen.

4 Adda cadagidi nga aldaw dagiti higante iti daga; ket casta met iti calpasanna, ta idi simrec dagiti lallaki nga annac ti Dios cadagiti babbai nga annac dagiti tattao, ket nagputotda cadagiti annac, dagitoy isuda idi dagiti mamaingel nga tattao nga adda idi ugma, dagiti lallaki nga nagdindinamag.

5 ś Ket ti DIOS nakitana nga ti kinadakes ti tao ket dackel iti daga, ken amin nga arapaap dagiti panunot ti pusona dakesda la a cancanayon.

6 Ket napaladingit ti APO iti panangaramidna iti tao iti daga, ket napasennaay iti pusona.

7 Ket ti APO kinunana, Pucawecto ti tao nga pinarsuac ti rabaw iti daga; tao, ken animal, ken dagiti agcarcarayam, ken dagiti tumatayab cadagiti langit; ta naladingitac a nangaramid cadacuada.

8 Ngem ni Noe nasaracanna iti parabur cadagiti mata iti APO.

9 ś Dagitoy dagiti caputotan ni Noe: Ni Noe isu ti nalinteg a tao ken naan-anay cadagiti caputotanna, ket ni Noe nakipagna iti Dios.

10 Ket ni Noe pinutotna iti tallo nga lallaki, ni Sem, ni Cam, ken ni Jafet.

11 Ket ti daga nagdakes iti sangoanan ti Dios, ket ti daga napno iti ranggas.

12 Ket ti Dios kinitana ti daga, ket, adtoy, nacadacdakesda; ta amin nga lasag pinadakesda ti dalanda iti rabaw ti daga.

13 Ket ti Dios kinunana ken Noe, Ti panungpalan iti amin nga lasag dimtengen iti imatangco; ta ti daga napno ti ranggas gapu cadacuada; ket, adtoy, dadaelecto ida a maicanunong iti daga.

14 ś Agaramidca iti maysa a daong nga cayo iti cedro; agaramidcanto dagiti silsilid iti daong, ket betunamto ti uneg ken ti ruar iti galagala.

15 Ket castoy ti panangaramidmonto: Ti caatiddug ti daong ket tallogasutto nga sico, ti caacabana ket limapulonto nga sico, ken ti cangatona ket tallopulonto nga sico.

16 Mangaramidcanto iti maysa a tawa ti daong, ket mangitiddacanto iti maysa a sico iti ngato; ket iti ruangan ti daong icabilmonto iti bacrangna; iti baba, iti maicaddua, ken ti maicatlo a cadsaaran aramidemto.

17 Ket, adtoy, Siac, uray Siac, paglayusec ti danum iti rabaw ti daga, tapno mangpucaw iti amin a lasag, nga addaan anges ti biag, iti baba ti langit; ken amin nga adda iti daga matayto.

18 Ngem sica bangonecto ti tulagco; ket sumreccanto iti daong, sica, ken dagiti annacmo a lallaki, ken ti asawam, ken dagiti assawa dagiti annacmo a lallaki.

19 Ket iti isuamin nga lasag nga addaan biag, dua ti tumunggal maysa a kita ket ipastrecmonto iti daong, tapno biagem ida agraman kenca; isudanto ket lallakida ken babbaida.

20 Cadagiti tumatayab a mayalubog iti cakitada, ken dagiti an-animal a mayalubog iti cakitada, ken cadagiti amin nga agcarcarayam iti daga a mayalubog iti cakitada, dua iti tumunggal maysa a kita ipastrecmonto a cumuyog kenca, tapno aluadam nga agbiagda.

21 Ket sica mangalaca ti amin nga taraon a macan, ket urnongem nga agpaay kenca; ket agpaayto a taraonmo, ken maipaay cadacuada.

22 Casta iti inaramid ni Noe; cas mayannatup iti amin nga imbilin ti Dios kencuana, casta ti inaramidna.

CAPITULO 7

1 Ket ti APO kinunana ken Noe, sumrecca ken amin a cabbalaymo iti daong; ta nakitaca nga nalinteg iti sangoanac itoy a caputotan.

2 Iti amin nga animal a nadalus mangalacanto iti sinagpipito, ti kalaki-an ken ti kabai-anna: ket cadagiti animal a saan nga nadalus sinagdudua, iti kalaki-an ken iti kabai-anna.

3 Casta met cadagiti tumatayab cadagiti tangatang sinagpipito, ti kalaki-an ken ti kabai-anna; tapno mabatida a nabiag nga agputot iti rabaw ti amin a daga.

4 Ta apaman a mapalabes ti pito nga aldaw, siac pagtudoecto iti rabaw ti daga cadagiti uppat a pulo nga aldaw ken uppat a pulo nga rabii; ket ti amin a nabiag nga inaramidco pucawecto iti rabaw ti daga.

5 Ket ni Noe inaramidna amin nga cas mayannatup iti imbilin ti APO kencuana.

6 Ket ni Noe nagtawen iti innem a gasut idi adda ti layus dagiti danum iti rabaw ti daga.

7 ś Ket simrec ni Noe, ken dagiti annacna a lallaki, ken ti asawana, ken dagiti assawa dagiti annacna a naicuyog kencuana, iti uneg ti daong, a maipoon cadagiti dandanum iti layus.

8 Cadagiti an-animal a nadalus, ken cadagiti saan a nadalus nga animal, ken cadagiti tumatayab, ken amin nga agcarcarayam iti rabaw ti daga,

9 Simrecda a sinagdudua ken Noe iti daong, ti lalaki ken ti babai, nga cas imbilin ti Dios ken Noe.

10 Ket naaramid nga idi nalpas ti pito nga aldaw, dagiti dandanum iti layus addada idi iti rabaw ti daga.

11 ś Iti maicanem a gasut a tawen iti panagbiag ni Noe, iti maicadua a bulan, iti maicasangapulo ket pito nga aldaw ti bulan, idi met laeng nga aldaw dagiti amin nga ubbog iti dackel nga yuyeng naglucatda, ket dagiti tawtawa iti langit nalucatanda.

12 Ket nagtudo iti rabaw ti daga iti uppat a pulo nga aldaw ken uppat a pulo nga rabii.

13 Iti daydi met laeng nga aldaw simrec ni Noe, ken Sem, ken Cam, ken Jafet, nga annac a lallaki ni Noe, ken ti asawa ni Noe, ken dagiti tallo nga assawa dagiti annacna nga naicuyog cadacuada, iti uneg ti daong;

14 Isuda, ken amin nga narungsot nga an-animal a mayalubog iti cakitada, ken amin nga naamo nga animal a mayalubog iti cakitada, ken amin nga aguy-uyas iti rabaw ti daga a mayalubog iti cakitada, ken amin nga tumatayab a mayalubog iti cakitada, ken amin nga bilbillit iti amin a cakita.

15 Ket simrecda ken Noe iti daong, a sinagdudua ti amin a lasag, nga addaan anges ti biag.

16 Ket dagiti simrec, simrecda nga lalaki ken babai iti amin a lasag, cas imbilin ti Dios kencuana: ket isu inrikepan ti APO.

17 Ket naaramid ti layus iti uppat a pulo nga aldaw iti rabaw ti daga; ket dagiti dandanum immadalem, ket inngatoda di daong, ket naipangato iti rabaw ti daga.

18 Ket naggundaway dagiti danum, ket dimmackelda la unay iti rabaw ti daga; ket nagna di daong iti rabaw dagiti dandanum.

19 Ket dagiti danum nagtalinaedda iti adu la unay iti rabaw ti daga; ket amin dagiti nangato a turturod, nga adda idi iti baba ti langit, nalapunosda.

20 Sangapulo ket lima a sico iti rabaw ti nangarpawan dagiti dandanum; ket dagiti banbantay nalapunosda.

21 Ket natay amin nga lasag a naggunay iti rabaw ti daga, uray tumatayab, ken an-animal a naamo, ken an-animal a narungsot, ken amin nga agcarcarayam nga agcarayam iti daga, ken amin a tao:

22 Amin dagiti addaan anges iti biag cadagiti agongda, iti amin nga adda idi iti daga a namaga, natayda.

23 Ket napucaw ti amin a sibibiag nga adda idi iti rabaw ti daga, tao man, ken animal, ken dagiti agcarcarayam, ken dagiti tumatayab iti tangatang; ket napucawda amin iti daga: ket ni Noe laeng ti nabati a sibibiag, ken dagiti adda a naicuyog kencuana ti daong.

24 Ket dagiti dandanum nagtalinaedda iti daga iti sangagasut ken limapulo nga aldaw.

CAPITULO 8

1 Ket ti Dios inimatanganna ni Noe, ken amin nga sibibiag, ken amin nga animal nga naamo nga adda kencuana idi daong: ket pinalabas ti Dios ti maysa nga angin iti rabaw ti daga, ket nagsardeng dagiti dandanum;

2 Dagiti met ub-ubbog iti yuyeng ken dagiti tawtawa iti langit ket naripcanda, ket ti tudo nga naggapu iti langit ket nagsardeng;

3 Ket nagtultuloy dagiti dandanum nga nagsubli manipud iti rabaw ti daga: ket calpasan ti sangagasut ken limapulo nga aldaw dagiti dandanum nages-es.

4 Ket di daong naisadsad idi maicapito a bulan, idi maicasangapulo ket pito nga aldaw ti bulan, iti rabaw dagiti bantay ti Ararat.

5 Ket dagiti danum bimmassit la a bimmassit agingga iti maicasangapulo nga bulan: idi maicasangapulo a bulan, iti umuna nga aldaw ti bulan, nagpakita dagiti pantoc dagiti banbantay.

6 ś Ket naaramid iti calpasanna ti uppat a pulo nga al-aldaw, ni Noe linuctanna ti tawa di daong nga inaramidna idi:

7 Ket imbaonna ti maysa a wac, ket napan nagsubli subli, agingga nga dagiti dandanum nagmaga iti daga.

8 Ket imbaonna ti maysa a calapati, tapno mapanna kitaen no dagiti danum naabbatandan iti rabaw ti daga;

9 Ngem ti calapati saan a nacasarac ti pangibatayanna ti sacana, ket nagsubli kencuana iti daong, gapu ta dagiti danum adda pay laeng idi ti rabaw iti isuamin nga daga: ket inunnat ni Noe ti imana, ket innalana di calapati, ket impastrecna iti uneg ti daong.

10 Ket naguray pay laeng iti sabali a pito nga aldaw; ket imbaonna manen di calapati iti ruar di daong;

11 Ket di calapati nagsubli kencuana iti sumipnget; ket, adtoy, iti ngiwatna ti maysa a bulong ti olivas a sinippitna: iti casta ni Noe naawatanna nga naabbatanen dagiti dandanum iti rabaw ti daga.

12 Ket naguray pay laeng iti sabali a pito nga aldaw; calpasanna imbaonna di calapati; ket isu saanen a nagsubli kencuana.

13 ś Ket naaramid calpasan iti innem a gasut ken maysa a tawen, iti umuna a bulan, ti umuna nga aldaw ti bulan, dagiti dandanum namagaanda iti daga: ket iniccat ni Noe ti calub ti daong, ken minatmatanna, ket, adtoy, ti rabaw iti daga ket simamagan.

14 Ket idi maicaddua a bulan, idi maicaduapulo ket pito nga aldaw ti bulan, namagan ti daga.

15 ś Ket ti Dios nagsao ken Noe, a kinunana,

16 Rummuarca ti daong, sica, ken ti asawam, ken dagiti annacmo a lallaki, ken dagiti assawada agraman kenca.

17 Ipanmo iti ruar a maicuyog kenca dagiti isuamin a sibibiag, amin a lasag, uray tumatayab, ken an-animal nga naamo, ken amin nga agcarcarayam nga agcarayam iti daga; tapno agputotda cadagiti adu iti daga, ken agbungada, ken agaduda iti rabaw ti daga.

18 Ket ni Noe rimmuar, ken dagiti annacna a lallaki, ken ti asawana, ken dagiti assawa dagiti annacna a kimmuyog kencuana:

19 Amin nga animal, amin nga agcarcarayam, ken amin a tumatayab, ken uray ania nga agcarayam ti rabaw ti daga, cas mayannatup ti cakitada, rimmuarda idi daong.

20 ś Ket nangbangon ni Noe ti maysa nga altar iti APO; ket nangala ti tunggal nadalus nga animal, ken tunggal nadalus nga tumatayab, ket impaayna dagiti datdaton nga mapuoran iti rabaw ti altar.

21 Ket ti APO nasay-upna ti nabanglo nga sayamusom; ket ti APO kinunana iti pusona, Diacto sublianen nga ilunod ti daga a maipuon iti tao; ta ti darepdep ti puso ti tao dakes manipud iti kinaubingna; diacto met sublianen a cabilen iti amin a nabiag, a cas inaramidco.

22 Bayat ti caadda ti daga, panagmula ken panagapit, ken lam-ec ken ti pudot, ken ti calgaw ken ti sibabasa, ken ti aldaw ken ti rabii saandanto nga agsardeng.

CAPITULO 9

1 Ket ti Dios binendicionanna ni Noe ken dagiti annacna nga lallaki, ket kinunana cadacuada, Agbungacayo, ken agaducayo, ken punnoenyo ti daga.

2 Ket ti panagbuteng cadacayo ken ti panaglagaw cadacayo addanto cadagiti amin nga animal iti daga, ken cadagiti amin a tumatayab iti tangatang, agraman amin nga aggaraw iti daga, ken amin nga ic-ican ti taaw; cadagiti imayo maiyawatda.

3 Amin nga aggaraw a sibibiag agpaaydanto a taraonyo; cas iti nalasbang nga nateng intedcon iti isuamin cadacayo.

4 Ngem ti lasag agraman ti biagna, nga isu ti darana, saanyonto a canen.

5 Ket awan iti duduana nga ti dara dagiti bibiagyo sapulecto; iti ima ti amin nga animal sapulecto, ken iti ima ti tao; uray iti ima ti cabsat iti tunggal tao sapulecto ti biag iti tao.

6 Ti mangibucboc iti dara ti tao, ti darana ibuyatto ti tao: ta ti ladawan iti Dios inaramidna ti tao.

7 Ket dacayo, agbungacayo, ken agaducayo; agputot cayo iti nawadwad iti daga, ket agaducayo iti rabawna.

8 ś Ket ti Dios kinasaona ni Noe, ken dagiti annacna a lallaki a cadduana, ket kinunana,

9 Ket siac, adtoy, buangayec cadacayo iti tulagco, ken cadagiti caputotanyo nga sumaruno cadacayo;

10 Ken iti amin a parsua nga sibibiag nga adda cadacayo, cadagiti tumatayab, cadagiti animal nga naamo, ken iti amin nga animal a narungsot ti daga agraman cadacayo; cadagiti amin a rummuar iti daong, uray isuamin nga animal ti daga.

11 Ket siac bangonecto ti tulagco cadacayo; saanto met pulos nga mapucawen ti amin nga lasag cadagiti dandanum ti layus; ket awanto metten a pulos iti layus nga mangdadael iti daga.

12 Ket ti Dios kinunana, Daytoy isu ti pagilasinan ti tulag nga aramidec iti nagbaetan iti siac ken dacayo ken amin a nabiag a parsua nga adda cadacayo, tapno maipaay cadagiti capcaputotan nga agnanayon:

13 Ti bullalayawco icabilconto iti ulep, ket isunto ti pagilasinan ti maysa a tulag caniac ken iti daga.

14 Ket mapasamacto, nga no pagulepec iti tangatang, ti bullalayaw makitanto cadagiti ulep:

15 Ket lagipecto ti tulagco, nga adda caniac ken cadacayo ken iti tunggal parsua a sibibiag nga addaan lasag; ket dagiti dandanum didanto pulos nga agbalinen a layus tapno mangpucaw iti amin a lasag.

16 Ket ti bullalayaw addanto iti ulep; ket kitaecto, tapno pacalaglagipac ti agnanayon a tulag iti Dios ken iti isuamin nga sibibiag a parsua nga addaan lasag iti rabaw iti daga.

17 Ket ti Dios kinunana ken Noe, Daytoy ti pagilasinan ti tulag nga imbangonco caniac ken iti amin a lasag nga adda iti rabaw ti daga.

18 ś Ket dagiti annac nga lallaki ni Noe, a rimmuar iti daong, da Sem, ken Cam, ken Jafet: ket ni Cam isu ti ama ni Canaan.

19 Dagitoy tallo isuda dagiti lallaki nga annac ni Noe: ket cadagitoy nasacnapan iti amin a daga.

20 Ket ni Noe rinuggianna ti nagtalon, ket nagmula iti maysa a cauvasan:

21 Ket imminum idi iti arac, ket nabartec; ket naglamolamo idi iti uneg ti sapawna.

22 Ket ni Cam, nga ama ni Canaan, nakitana ti kinalamolamo ni amana, ket sinaritana cadagiti dua a cacabsatna idiay ruar.

23 Ket da Sem ken Jafet nangalada iti maysa a pagan-anay, ket incabilda a dua cadagiti abagada, ket nagnada a sitatallicud, ket inarpawanda ti kinalamolamo ni amada; ket sitatallicud idi dagiti rupada, ket saanda a nakita ti kinalamolamo ni amada.

24 Ket ni Noe nagriing a namunawan iti aracna, ket naammoanna iti inaramid kencuana ti anacna nga inaudi.

25 Ket kinunana, Mailunod coma ni Canaan; isuna ket adipento dagiti ad-adipen cadagiti cacabsatna.

26 Ket kinunana, Bendito coma iti APO Dios ni Sem; ket ni Canaan adipennanto.

27 Ti Dios palawaennanto ni Jafet, ket isu agnaedto cadagiti sapaw ni Sem; ket ni Canaan adipennanto.

28 ś Ket ni Noe nagbiag calpasan iti layus iti tallogasut ken limapulo a tawen.

29 Ket ti dagup dagiti aldaw ni Noe ket siam nga gasut ken limapulo a tawen: ket calpasanna isu natay.

CAPITULO 10

1 Dagitoy ngarud dagiti caputotan dagiti lallaki nga annac ni Noe, Sem, Cam, ken ni Jafet: ket cadacuada nagtaud dagiti lallaki nga annac ti calpasan iti layus.

2 Dagiti lallaki nga annac ni Jafet; Gomer, ni Magog, ni Madai, ni Javan, ni Tubal, ni Mesec, ken ni Tiras.

3 Dagiti lallaki nga annac ni Gomer; Ascenez, ni Rifat, ken ni Togorma.

4 Ket dagiti lallaki nga annac ni Javan; Elisa, ni Tarsis, Cetim, ken ni Dodanim.

5 Dagitoy ti nacabingbingayan dagiti purpuro dagiti Gentiles cadagiti dagdagada; tunggal maysa cas iti pagsasaona, cas mayannurot cadagiti famfamiliada, cadagiti uneg iti pagpagilianda.

6 ś Ket dagiti lallaki nga annac ni Cam; Cus, ni Mizraim, ni Fut, ken ni Canaan.

7 Ket dagiti lallaki nga annac ni Cus; Seba, ni Hevila, ni Sabta, ni Raama, ni Sabteca: ket dagiti lallaki nga annac ni Raama; Saba, ken ni Dedan.

8 Ket ni Cus pinutotna ni Nimrod: ket isu nangrugi a maysa nga mamaingel iti daga.

9 Isu maysa a maingel nga mangnganup idi iti imatang ti APO: gapuna a masasao, Cas ken ni Nimrod ti maingel a mangnganup iti imatang ti APO.

10 Ket ti nangruggian ti pagarianna idi ket Babel, ken Erac, ken Acad, ken Calne, idiay daga a Sinnaar.

11 Nanipud iti dayta a daga napan ni Assur, ket binangonna ti Nineve, ken ti ili nga Rehobot, ken Cale,

12 Ken ti Resen a nagbaetan ti Nineve ken Cale: ket isu daytoy met laeng iti dackel a ili.

13 Ket ni Mizraim pinutotna ni Ludim, ni Anamin, ni Lahabim, ken ni Naftuhim,

14 Ni Patrusim, ni Casluhim, (isu a nagtaudan dagiti Filisteos,) ken ni Caftorim.

15 ś Ket ni Canaan pinutotna ni Sidon nga inauna nga anacna, ken ni Jet,

16 Ken ti Jebuseo, ken ti Amorreo, ken ti Gergaseo,

17 Ken ti Heveo, ken ti Arceo, ken ti Cineo,

18 Ken ti Arvadeo, ken ti Semareo, ken ti Hamoteo: ket iti calpasanna nagwaras dagiti famfamilia dagiti Cananeo.

19 Ket ti beddeng ti Cananeo naglayon nanipud iti Sidon, no cas agturongca iti Gerar, agingga iti Gaza; no cas agturongca, iti Sodoma, ken Gomorra, ken Adma, ken Seboim, agpapan pay iti Lasa.

20 Dagitoy dagiti annac nga lallaki ni Cam, cas cadagiti famfamiliada, a cas mayannurot cadagiti pagsasaoda, cadagiti dagdagada, ken cadagiti pagpagilianda.

21 ś Ket ken ni Sem met, nga ama dagiti amin nga annac ni Jeber, nga cabsat ni Jafet nga inauna, kencuana met nagtaud dagiti annac nga naputot.

22 Dagiti lallaki nga annac ni Sem; Elam, ni Assur, ni Arfajad, ni Lud, ken ni Aram.

23 Ket dagiti lallaki nga anac ni Aram; Uz, ni Hul, ni Geter, ken ni Mas.

24 Ket ni Arfajad pinutotna ni Selah; ket ni Selah pinutotna ni Jeber.

25 Ket ken Jeber naiputot iti dua nga annac: ti nagan ti maysa Peleg; ta cadagiti aldawna nabingay ti daga; ket ti nagan ti lalaki a cabsatna ket Joctan.

26 Ket ni Joctan pinutotna ni Almodad, ni Selef, ni Hazarmavet, ken ni Jera,

27 Ni Hadoram, ni Uzal, ni Dicla,

28 Ni Obal, ni Abimael, ni Saba,

29 Ni Ofir, ni Havila, ni Jobab: amin dagitoy isuda idi dagiti annac a lallaki ni Joktan.

30 Ket ti nagnaedanda idi ket idiay Mesa, no cas agturongca idiay Sefar a maysa nga bantay ti daya.

31 Dagitoy dagiti annac a lallaki ni Sem, cas mayannurot cadagiti familiada, cadagiti pagsasaoda, idiay dagdagada, a cas cadagiti pagpagilianda.

32 Dagitoy dagiti familia dagiti annac a lallaki ni Noe, cas mayannurot cadagiti caputotanda, cadagiti pagpagilianda: ket cadagitoy nabingaybingay dagiti pagpagilian iti daga idi calpasan ti layus.

CAPITULO 11

1 Ket iti isuamin a daga maymaysa idi iti pagsasaona, ken maymaysa idi iti pannacabalicasna.

2 Ket naaramid nga, idi nagpagpagnada iti daya, nasaracanda iti maysa a tanap iti daga ti Senar; ket nagtaengda sadiay.

3 Ket kinuna iti maysa ken maysa, Intayon, agaramidtayo coma cadagiti ladrillo, ket papudotentayo ida a nasayaat. Ket adda idi cadacuada dagiti ladrillo a pannacabatoda, ken ti galagala a pannacamasada.

4 Ket kinunada, Intayon, mangbangontayo coma iti maysa nga ili ken maysa nga torre, a ti tuctocna dumanon coma sadi langit; ket aramidentayo ti pacaidayawantayo, di la ket ta maiwaraswarastayo iti rabaw iti isuamin nga daga.

5 Ket ti APO bimmaba tapno kitaenna ti ili ken ti torre, a bangbangonen idi dagiti annac ti tao.

6 Ket ti APO kinunana, Adtoy, dagiti tattao nagsangcamaysada, ket maymaysa ti pagsasaoda; ket daytoy rinuggianda nga aramiden: ket ita awanton ti manglapped cadacuada, iti panangaramidda cadagiti amin a panggepda nga aramiden.

7 Intayon, bumabatayo, ket sadiay riribukentayo ti pagsasaoda, tapno tunggal maysa dida agkikinnaawatan iti pagsasaoda.

8 Iti casta ti APO inwarasna ida iti rabaw iti isuamin nga daga: ket nanipud sadiay binaybay-anda ti panangbangonda iti ili.

9 Gapuna itoy ti ili naawagan iti Babel; gapu sadiay ti APO riniribucna ti pagsasao ti amin a daga: ken nanipud sadiay iti APO inwarasna ida iti rabaw ti isuamin a daga.

10 ś Dagitoy isuda ti caputotan ni Sem: Ni Sem agtawen iti sangagasut, ket pinutotna ni Arfajad idi dua a tawen calpasan iti layus:

11 Ket ni Sem nagbiag calpasan iti panangputotna ken Arfajad iti limagasut a tawen, ket pinutotna dagiti annac a lallaki ken babbai.

12 Ket ni Arfajad nagbiag ti tallopulo ket lima a tawen, ket pinutotna ni Sela:

13 Ket ni Arfajad nagbiag calpasan iti panangputotna ken Sela iti uppat a gasut ken tallo a tawen, ket pinutotna dagiti annac a lallaki ken babbai.

14 Ket ni Sela nagbiag ti tallopulo a tawen, ket pinutotna ni Eber:

15 Ket ni Sela nagbiag calpasan iti panangputotna ken Eber iti uppat a gasut ken tallo a tawen, ket pinutotna dagiti annac a lallaki ken babbai.

16 Ket ni Eber nagbiag ti tallopulo ket uppat a tawen, ket pinutotna ni Peleg:

17 Ket ni Eber nagbiag calpasan iti panangputotna ken Peleg iti uppat a gasut ken tallopulo a tawen, ket pinutotna dagiti annac a lallaki ken babbai.

18 Ket ni Peleg nagbiag ti tallopulo a tawen, ket pinutotna ni Reu:

19 Ket ni Peleg nagbiag calpasan iti panangputotna ken Reu iti duagasut ken siam a tawen, ket pinutotna dagiti annac a lallaki ken babbai.

20 Ket ni Reu nagbiag ti tallopulo ket dua a tawen, ket pinutotna ni Serug:

21 Ket ni Reu nagbiag calpasan iti panangputotna ken Serug iti duagasut ken pito a tawen, ket pinutotna dagiti annac a lallaki ken babbai.

22 Ket ni Serug nagbiag ti tallopulo a tawen, ket pinutotna ni Nacor:

23 Ket ni Serug nagbiag calpasan iti panangputotna ken Nacor iti duagasut a tawen, ket pinutotna dagiti annac a lallaki ken babbai.

24 Ket ni Nacor nagbiag ti duapulo ket siam a tawen, ket pinutotna ni Tare:

v 25 Ket ni Nacor nagbiag calpasan iti panangputotna ken Tare iti maysa a gasut ken sangapulo ket siam a tawen, ket pinutotna dagiti annac a lallaki ken babbai.

26 Ket ni Tare nagbiag ti pitopulo a tawen, ket pinutotna ni Abram, Nacor, ken ni Haran.

27 ś Ngarud dagitoy dagiti caputotan ni Tare: Ni Tare pinutotna ni Abram, Nacor, ken ni Haran; ket ni Haran pinutotna ni Lot.

28 Ket ni Haran immun-una a natay ngem ni amana a Tare iti daga a nacayanacanna, idiay Ur dagiti Caldeos.

29 Ket da Abram ken Nacor nangalada cadagiti assawada: ti nagan ti asawa ni Abram ket Sarai; ket ti nagan ti asawa ni Nacor, ket Milca, babai nga anac ni Haran, ama ni Milca, ken ama ni Isca.

30 Ket ni Sarai lupes idi; awan iti anacna.

31 Ket ni Tare innalana ni Abram nga anacna, ken ni Lot nga anac ni Haran anac a lalaki ti anacna a lalaki, ken ni Sarai a manugangna, nga asawa ni Abram nga anacna; ket pimmanaw a naicuyog cadacuada idiay Ur dagiti Caldeos, tapno mapanda iti daga a Canaan; ket nacadanonda sadiay Haran, ket nagnaedda sadiay.

32 Ket dagiti aldaw ni Tare duagasut ken lima a tawen: ket ni Tare natay idiay Haran.

CAPITULO 12

1 Itan ti APO kinunana ken Abram, Pumanawca iti dagam, ken cadagiti cacabaggiam, ken iti balay ni amam, ket mapanca iti daga nga ipakitacto kenca:

2 Ket aramidencanto a dackel a pagarian, ket bendicionancanto, ket padackelecto ti naganmo; ket sicanto ti maysa a bendicion:

3 Ket bendicionacto dagiti mamendicion kenca, ken ilunodconto ti mangilunod kenca: ket kenca isuamin dagiti capcaputotan iti daga mabendicionandanto.

4 Iti casta ni Abram pimmanaw, a cas kinuna ti APO kencuana; ket ni Lot nakicuyog kencuana: ket ni Abram nagtawen iti pitopulo ket lima idi pimmanaw idiay Haran.

5 Ket ni Abram innalana ni Sarai nga asawana, ken ni Lot nga anac ni cabsatna, ken amin a sanicua a nasapsapulanda idi, ken dagiti tattao a nagun-odanda idiay Haran; ket pimmanawda a mapan iti daga a Canaan; ket dimtengda sadiay Canaan.

6 ś Ket ni Abram nagdalliasat iti daga inggana iti disso a Siquem, agpapan iti tanap ti More. Ket dagiti Cananeo addada idin nga agnanaed idiay a daga.

7 Ket ti APO nagparang ken Abram, ket kinunana, Iti putotmo itedconto daytoy a daga: ket nangbangon idiay iti maysa nga altar ti APO, a nagparang kencuana idi.

8 Ket immalis idiay a napan iti bantay a dayaen ti Betel, ket inucradna sadiay ti sapawna, Betel ti laudenna, ken Ai iti dayaenna: ket idiay nangbangon iti maysa nga altar iti APO, ket inawaganna iti nagan iti APO.

9 Ket ni Abram nagrubbuat, ket nagnagna a nagtultuloy nga agpaabagatan.

10 ś Ket naadda idi ti maysa a bisin iti daga: ket ni Abram simmalog idiay Egipto tapno agdagus idiay; ta ti bisin ket nagpalalo iti daga.

11 Ket calpasanna napasamac, idi ngannganidan a sumrec idiay Egipto, kinunana ken Sarai nga asawana, Adtoy ita, Siac ammoc nga maysaca a babai a napintas a mabuya:

12 Ket maaramidto calpasanna, a no makitadaca dagiti Egipcios, ket cunaendanto, Daytoy iti asawana: ket patayendacto, ngem sica biagendacanto.

13 Cunaem, dawatec kenca, a sica ti babai a cabsatco: tapno saanac nga maanano gapu kenca; ken tapno ti cararruac agbiag a maipuon kenca.

14 ś Ket naaramid calpasanna, nga, idi simrec ni Abram idiay Egipto, dagiti Egipcios nakitada ti babai a naiduma iti sayaatna.

15 Ket dagiti principe ni Faraon nakitada, ket impadayawda isuna ken Faraon: ket naipan ti babai iti balay ni Faraon.

16 Ket inaramidna ken Abram ti naimbag maipuon iti babai: ket adda carnerona idi, ken baca, ken asno a kalaki-an, ken ad-adipen a lallaki, ken ad-adipen a babbai, ken asno a kabai-an, ken camello.

17 Ket ti APO pinaricnaanna ni Faraon ken ti balayna cadagiti dadackel a didigra maipuon ken Sarai nga asawa ni Abram.

18 Ket ni Faraon inayabanna ni Abram, ket kinunana, Ania daytoy nga inaramidmo caniac? ania ti gapuna a dica inbaga caniac nga isu ti asawam?

19 Apayapay kinunam, Isu cabsatco a babai? iti casta isu ti gapuna nga innalac nga asawaen coma isuna: ita ngarud adtoy ti asawam, alaem isuna, ket incan.

20 Ket ni Faraon nagbilin cadagiti tattao iti pannacaalluadna: ket isu intulodda iti dalan, ken ti asawana, ken amin nga adda kencuana.

CAPITULO 13

1 Ket ni Abram rimmuar nanipud iti Egipto, isu, ken ni asawana, agraman amin nga adda kencuana, ken ni Lot a kinacuyogda, a nagpaabagatan.

2 Ket ni Abram nabacnang unay idi cadagiti an-animal, ken pirac, ken balitoc.

3 Ket nagsubli nanipud iti abagatan agpapan iti Betel, iti disso a nagsapawanna idi damo, a nagbaetan ti Betel ken Ai;

4 Aginggana iti lugar ti altar, isu nga inaramidna sadiay idi damo: ket idiay ni Abram inawaganna ti nagan ti APO.

5 ś Ket casta met ni Lot, a kimmuyog ken Abram, adda carcarnerona, ken bacbacana, ken sapsapawna.

6 Ket iti daga saanna ida nga nalaon, tapno agnaedda nga agtitipon: ta ti sanicuada adu idi, isu a dida nabalinan nga agnaed a nagtitipon.

7 Ket adda susic idi cadagiti pastor ti an-animal ni Abram ken cadagiti pastor ti an-animal ni Lot: ket dagiti Cananeo ken Ferezeo nagnaedda met idi iti daga.

8 Ket ni Abram kinunana ken Lot, Awan coma iti susic, dawatec kenca, cadata nga dua, ken cadagiti pastorco ken cadagiti pastormo; ta agcabsatta.

9 Saan cadi nga iti amin a daga adda ti sangoanam? suminaca cadi, dawatec kenca, manipud caniac: no mapancanto iti akincatigid, mapanacto ngarud iti akincannawan; wenno piliemto ti akincannawan, mapanacto ngarud iti makincatigid.

10 Ket intannawag ni Lot dagiti matana, ket nakitana amin ti tanap ti Jordan, a nasayaat ti pannacadanumda iti isuamin a disso, idi saan pay a dinadael ti APO ti Sodoma ken Gomorra, cas ti minuyongan ti APO, cas ti daga nga Egipto, no cas sumrecca idiay Zoar.

11 Iti casta ni Lot pinilina a cucuana amin ti tanap ti Jordan; ket nagna ni Lot a nagpadaya: ket nagsinada ti maysa ken maysa.

12 Ni Abram nagnaed iti daga a Canaan, ket ni Lot nagnaed cadagiti il-ili ti tanap, ket inbangonna ti sapawna nga agturong iti Sodoma.

13 Ngem dagiti tattao a taga Sodoma nagdakesda ken managbasolda la unay a nacaro nga maibusor iti APO.

14 ś Ket ti APO kinunana ken Abram, calpasan ti pannacaisina ni Lot kencuana, Itannawagmo ita dagiti matmatam, ket kitaem manipud iti disso nga ayanmo nga agpa-amianan, ken agpabagatan, ken agpadaya, ken agpalaud:

15 Ta amin nga daga a makitam, itedconto kenca, ken iti putotmo iti agnanayon.

16 Ket pagbalinecto ti putotmo cas iti tapuc ti daga: a no adda macabilang iti tapuc ti daga, casta met ti putotmo mabilangto.

17 Tumacderca, pagnaem ti daga iti pagatidduganna ken iti pagacabaanna; ta itedconto kenca.

18 Ket ni Abram inyalisna ti sapawna, ket napan ken nagnaed iti tanap ti Mamre, nga adda sadiay Hebron, ket namangon sadiay ti altar nga agpaay iti APO.

CAPITULO 14

1 Ket naaramid a cadagiti al-aldaw ni Amrafel nga ari ti Sinar, ni Arioc nga ari ti Elasar, Codorlaomer nga ari ti Elam, ken ni Tadal nga ari dagiti pagpagilian;

2 Dagitoy namuangayda iti gubat a maibusor ken Bera nga ari ti Sodoma, ken Birsa nga ari ti Gomorra, Sinab nga ari ti Adma, ken Semeber nga ari ti Seboim, ken ti ari ti Bela, nga isu Zoar.

3 Amin dagitoy nagtitiponda iti lobong ti Siddim, nga isu ti taaw ti asin.

4 Sangapulo ket dua a tawen nagservida ken Codorlaomer, ket iti maicasangapulo ket tallo nga tawen immalsada.

5 Ket iti maicasangapulo ket uppat nga tawen immay ni Codorlaomer, ken dagiti ar-ari nga cadduana, ket rinautda dagiti Rafaim idiay Astarot Carnaim, ken dagiti Zuzim idiay Ham, ken dagiti Emin idiay Save Cariataim,

6 Ken dagiti Horeos idiay bantayda a Seir, agingga idiay Faran, nga adda iti abay ti let-ang.

7 Ket nagsublida, ket dimmanonda idiay Em-mispat, nga isu ti Cades, ket dinadaelda amin ti daga dagiti Amalecitas, casta met dagiti Amorreo, nga agnaed idi idiay Hasason-tamar.

8 Ket rimmuar ti ari ti Sodoma, ken ti ari ti Gomorra, ken ti ari ti Adma, ken ti ari ti Seboim, ken ti ari ti Bela (nga isu ti Zoar;) ket nagtitiponda a makigubat a bumusor cadacuada idiay tanap iti Siddim;

9 Maibusorda cada Codorlaomer nga ari ti Elam, ken Tidal nga ari dagiti nation, ken Amrafel nga ari ti Sinar, ken Arioc nga ari ti Elasar; uppat nga ar-ari a maibusor cadagiti lima.

10 Ket ti lobong ti Siddim napno cadagiti palpalab-ug a nagalagalaan; ket ti ari ti Sodoma ken ti ari ti Gomorra timmarayda, ket natnagda idiay; ket dagiti natda nagcamangda iti bantay.

11 Ket innalada amin iti cucua ti Sodoma ken Gomorra, ken amin a taraonda, sada pimmanaw.

12 Ket innalada met ni Lot, anac a lalaki ti cabsat ni Abram, nga isu nga nagnaed idiay Sodoma, ken dagiti cucuana, ket pimmanawdan.

13 Ket immay ti maysa a nacatalaw, ket imbagana ken Abram nga Hebreo; daytoy nagnaed iti tanap ti Mamre nga Amorreo, cabsat a lalaki ni Escol, ken cabsat a lalaki ni Aner: ket dagitoy nakicapponda ken Abram.

14 Ket idi nga nangeg ni Abram a ti cabsatna a lalaki innalada a balud, inigamanna dagiti nasursuroan nga ad-adipenna, naiyanacda iti balayna, tallogasut ken sangapulo ket walo, ket kinamatda ida agingga iti Dan.

15 Ket biningaybingayna ti buyotna, isu ken dagiti ad-adipenna, iti rabii, ket kinabilna ida, ken kinamatna ida agingga iti Hobah, nga adda iti macatigid ti Damasco.

16 Ket insublina amin dagiti cucua, ket casta met nga insublina ni cabsatna a Lot, ken ti cucuana, ken casta met dagiti babbai, ken dagiti umili.

17 ś Ket ti ari ti Sodoma napan simmabet kencuana idi nagsubli iti panangdadaelna ken Codorlaomer, ken cadagiti ar-ari a kinadduana, iti lobong ti Save, nga isu a lobong ti ari.

18 Ket ni Melquisedec nga ari ti Salem nangiruar ti tinapay ken arac: ket isu ti padi ti cangatoan unay a Dios.

19 Ket binendicionanna, ket kinunana, Bendito coma ni Abram iti biang iti cangatoan unay a Dios, isu nga makincucua iti langit ken iti daga:

20 Ken bendito coma iti cangatoan unay nga Dios, a nangyawat cadagiti cabusormo ita imam. Ket intedna kencuana ti apagcapullo iti isuamin.

21 Ket ti ari ti Sodoma kinunana ken Abram, Iyawatmo caniac dagiti tattao, ket alaem dagiti cucua a maipaay kenca.

22 Ket ni Abram kinunana ti ari ti Sodoma, Ingngatoc ti imac iti APO, iti cangatoan unay nga Dios, ti makincucua iti langit ken iti daga,

23 Nga awanto ti alaec a maysa a lubid wenno maysa a cordon ti sapatos, wenno uray ania a cucuam, di la ket ta cunaem, siac pinabacnangco ni Abram:

24 Malacsid laeng ti kinnan dagiti bumabbaro, ken ti bingay dagit lallaki a nakicuyog caniac, nga da Aner, Escol, ken Mamre; bay-am nga alaenda ti bingayda.

CAPITULO 15

1 Calpasan dagitoy a banbanag ti sao ti APO immay ken Abram iti maysa a parparmata, a kinunana, Dica agbuteng, Abram: Siac ti calasagmo, ken ti nawadwad unay a gungonam.

2 Ket ni Abram kinunana, Apo DIOS, ania ti itdemto caniac, idinto a siac aglabasac nga awan anacco, ket ti agtagicuanto iti balayco isu ni Eliezer a taga Damasco?

3 Ket ni Abram kinunana, Adtoy, saannac nga iniccan iti putot: ket, adtoy, a ti maysa a nayanac iti balayco isu ti agtawid caniac.

4 Ket, adtoy, ti sao ti APO immay kencuana, a kunana, Daytoy a lalaki saanto nga agtawid kenca; no di ket ti agtaudto iti unegmo isu ti agtawidto kenca.

5 Ket impanna iti ruar, ket kinunana, Kitaem ita ti langit, ken ibagam dagiti bitbituen, no mabalinmo ida a bilangen: ket kinunana kencuana, Castanto dagiti putotmo.

6 Ket pinatina ti APO; ket daytoy imbilangna kencuana a kinalinteg.

7 Ket kinunana kencuana, Siac ti APO nga nangiruar kenca idiay Ur dagiti Caldeos, tapno itedco kenca daytoy daga a tawidem.

8 Ket isu kinunana, Apo DIOS, ania ti pacaammoacto nga agtawidacto iti dayta?

9 Ket kinunana kencuana, Iyalaannac ti bumalasang a baca nga agtawen iti tallo, ken maysa a babai a calding nga agtawen iti tallo, ken maysa a lalaki a carnero nga agtawen iti tallo, maysa met a pagaw, ken maysa nga urbon a calapati.

10 Ket isu innalana amin dagitoy, ket pinisina ida iti tengnga, ket incabilna ti tunggal guddua iti sango ti cagudduana: ngem dagiti tumatayab saanna ida a pinisi.

11 Ket idi nga dagiti tumatayab bimmabada iti rabaw dagiti bangcay, ni Abram binugawna ida.

12 Ket idi a lumlumnec iti init, maysa a nauneg nga turog immapay ken Abram; ket, adtoy, maysa nga nacaal-alingget a dackel a sipnget immapay kencuana.

13 Ket kinunana ken Abram, Ammoem a pudno a dagiti putotmo aggangannaetdanto iti daga a dida cucua, ket agservidanto cadacuada; ket parigatendanto ida cadagit uppat a gasut a tawtawen;

14 Ket dayta met la a nacion, a pagserviandanto, siac ocomecto: ket calpasanna pumanawdanto agraman cadagiti adu unay nga sanicua.

15 Ngem sica mapancanto cadagiti ammam a sitatalna; maitaboncanto iti naimbag nga kinalakay.

16 Ngem iti maicapat a caputotan agsublidanto manen ditoy: gapu ta ti kinadakes ti Amorreo saanpay a napno.

17 Ket naaramid, nga, idi nacalneken iti init, ket nasipngeten, adtoy ti maysa nga umas-asuc nga horno, ken maysa a sidadarang nga aluten a naglasat iti baet dagidiay a napisipisi.

18 Iti dayta met laeng nga aldaw ti APO inaramidna ti maysa a tulag ken Abram, a kinunana, Iti putotmo intedcon daytoy a daga, manipud iti carayan ti Egipto aginggana iti dackel a carayan, ti carayan Eufrates:

19 Dagiti Cineo, ken dagiti Cenezco, ken dagiti Cadmoneo,

20 Ken dagiti Jeteo, ken dagiti Ferezeo, ken dagiti Rafeo,

21 Ken dagiti Amorreo, ken dagiti Cananeo, ken dagiti Gergeseo, ken dagiti Jebuseo.

CAPITULO 16

1 Ita ni Sarai nga asawa ni Abram saan nga nangyanac kencuana cadagiti annac: ket isu adda idi maysa nga adipenna, a taga Egipto, nga agnagan ti Agar.

2 Ket ni Sarai kinunana ken Abram, Adtoy ita, ti APO pinaritannac nga aganac: Dawatec kenca, a sumrecca coma iti adipenco; nalabit addanto annacco kencuana. Ket ni Abram immannugot iti sao ni Sarai.

3 Ket ni Sarai nga asawa ni Abram innalana ni Agar nga adipenna a taga Egipto, calpasan nga ni Abram nagnaed dagiti sangapulo a tawen iti daga ti Canaan, ket intedna ken asawana nga Abram tapno asawaenna.

4 ś Ket isu simrec ken Agar, ket nagsicog: ket idi nakitana nga masicogen, ni apona a babai ket nalais cadagiti matana.

5 Ket ni Sarai kinunana ken Abram, Ti pannacalaisco maipabaclay coma kenca: Insaadco ti adipenco iti barucongmo, ket idi nakitana a masicog, siac nauyawac cadagiti matana: ti APO ocomennata coma.

6 Ngem ni Abram kinunana ken Sarai, Adtoy, ti adipenmo adda iti imam; aramidem kencuana dayta pagayatam. Ket idi nga ni Sarai pinarigatna, isu nagtalaw iti sangoananna.

7 ś Ket ti angel ti APO nasaracanna iti sibay ti maysa nga ubbog ti danum iti let-ang, iti sibay ti ubbog nga adda iti dalan nga agturong idiay Sur.

8 Ket kinunana kencuana, Agar, adipen ni Sarai, sadino ti naggapuam? ken sadino ti papanam? Ket isu kinunana, Agtalawac iti imatang ni Sarai nga apoc.

9 Ket ti angel ti APO kinunana kencuana, Agsublica ken apom, ket agpacumbabaca cadagiti imana.

10 Ket ti angel ti APO kinunana kencuana, Paadduecto unay iti putotmo, tapno dinto mabilang maipuon iti kinaaduda.

11 Ket ti angel ti APO kinunana kencuana, Adtoy, sica addaanca iti sicog, ket aganaccanto iti maysa a lalaki, ket panaganamto iti Ismael, ta ti APO nangegna iti pannacaparigatmo.

12 Ket isu maysanto nga naatap a tao; ti imana maicaniwasto iti tumunggal tao, ket ti ima ti tumunggal tao maicaniwasto kencuana; ket agnaedto iti sangoanan dagiti isuamin a cacabsatna.

13 Ket inawaganna ti nagan ti APO a nakisao kencuana, Sica Dios a macakita caniac: ta kinunana, Siac diac nakita aya ditoy ti nacakita caniac?

14 Gapuna a nanaganan ti bubon Beer-lahai-roi; adtoy, adda iti nagbaetan ti Cades ken Bered.

15 ś Ket ni Agar nangyanac ken Abram iti maysa a lalaki: ket ni Abram ninagananna iti anacna, nga inyanac ni Agar, Ismael.

16 Ket ni Abram agtawen iti walopulo ken innem, idi ni Agar inyanacna ken Abram ni Ismael.

CAPITULO 17

1 Ket idi nga ni Abram siam nga pulo ket siam ti tawenna, ti APO nagparang ken Abram, ket kinunana kencuana, Siac ti Mannacabalin-amin nga Dios; magnaca iti sangoc, ket awan coma ti pagcurcurangam.

2 Ket aramidecto ti pagtulaganta, ket pagaduencanto iti nawadwad unay.

3 Ket ni Abram nagpacleb cadagiti rupana: ket ti Dios nagsao kencuana, a kunana,

4 No maipapan caniac, adtoy, ti tulagco adda kenca, ket sicanto ti ama dagiti adu nga pagpagarian.

5 Ket dinto maawaganen ti naganmo Abram, ngem ti naganmo isunto Abraham; ta incabilcan nga ama dagiti adu nga pagpagarian.

6 Ket pagbungaencanto iti nawadwad unay, ken aramidencanto a pagpagarian, ket ar-ari agtauddanto kenca.

7 Ket buangayecto ti catulaganta ken cadagiti putotmo ken amin a caputotanda calpasam iti agnanayon a catulagan, tapno siac ti Diosmo, ken cadagiti putotmo nga sumaruno kenca.

8 Ket siac itedconto kenca, ken dagiti putotmo calpasam, ti daga nga naggangannaetam, amin ti daga a Canaan, iti agnanayon a panagtagicua; ket siacto ti Diosda.

9 ś Ket ti Dios kinunana ken Abraham, Sica salimetmetamto ngarud ti tulagco, sica, ken dagiti putotmo iti calpasam bayat dagiti amin a caputotanda.

10 Daytoy ti tulagco, nga salimetmetanyo, siac ken sica ken dagiti putotmo iti calpasam; Tumunggal annac a lalaki cadacayo ket macugitto.

11 Ket cugitenyonto ti lasag dagiti akinsango a cudilyo; ket daytoyto ti pagilasinan ti tulag ti nagbaetan iti siac ken sica.

12 Ket iti adda walo nga aldawna cadacayo macugitto, amin nga annac a lallaki cadagiti caputotanyo, ti mayanac iti balay, wenno ti magatang iti pirac iti uray siasino a gangannaet, nga saan a caputotam.

13 Ti lalaki a mayanac iti balaymo, ken ti lalaki a magatang iti piracmo, masapul a macugitda: ket ti tulagco addanto iti lasagyo a maipaay iti awan patinggana a catulagan.

14 Ket ti di nacugit a lalaki a ti lasag ti akinsango a cudilna ket saan a nacugit, dayta nga lalaki maipusayto cadagiti cailianna; isu rinacracna iti tulagco.

15 ś Ket ti Dios kinunana ken Abraham, No maipapan ken ni Sarai nga asawam, saanmonto a nagananen Sarai, ngem Sara ti nagannanto.

16 Ket bendicionacto, ken iccancanto iti iyanacna a lalaki: wen, bendicionacto, ket isunto ti ina dagiti pagpagarian; ar-ari dagiti tattao agtauddanto kencuana.

17 Idin ni Abraham nagpacleb cadagiti rupana, ket nagcatawa, ket kinunana iti pusona, Macayanacto ngata iti maysa nga anac a lalaki nga sangagasut iti tawenna? ken ni Sara, nga siam a pulo ti tawenna, aganacto?

18 Ket ni Abraham kinunana iti Dios, O sapay ta ni Ismael agbiag coma ti sangoanam!

19 Ket ti Dios kinunana, Ni Sara nga asawam pudno unay a mangyanacto kenca iti maysa a lalaki; ket panaganamto iti Isaac: ket patalgedacto iti tulagco kencuana iti awan patinggana a tulag, ken cadagiti caputotanna calpasanna.

20 Ket maipanggep ken Ismael, dinengngegca: Adtoy, binendicionacon, ken aramidecto nga nabunga, ken pagaduecto iti nawadwad unay; sangapulo ket dua nga pangpangulo putotennanto, ken aramidecto isuna nga dackel a nation.

21 Ngem ti tulagco buangayecto ken Isaac, isu nga ni Sara iyanacnanto kenca iti daytoy a tiempo a nakedngan ti sumaruno a tawen.

22 Ket lineppasna ti nakisao kencuana, ket ti Dios immuli a pinanawanna ni Abraham.

23ś Ket ni Abraham innalana ni Ismael nga anacna, ken isuamin a nayanac iti balayna, isuamin nga nagatang iti piracna, amin nga annac a lalaki dagiti lallaki iti balay ni Abraham; ket kinugitna ti lasag ti akinsango a cudilda iti daydiay met laeng nga aldaw, cas ti panangibaga iti Dios idi kencuana.

24 Ket ni Abraham nagtawen iti siam nga pulo ket siam, idi nacugit iti lasag ti akinsango a cudilna.

25 Ket ni Ismael nga anacna nagtawen iti sangapulo ket tallo, idi nacugit iti lasag ti akinsango a cudilna.

26 Iti daydi met laeng nga aldaw ni Abraham nacugit, ken ni Ismael nga anacna.

27 Ken isuamin nga lallaki iti balayna, dagiti nayanac iti balay, ken dagiti nagatang iti pirac nga gangannaet, nakipagcugitda kencuana.

CAPITULO 18

1 Ket ti APO nagparang kencuana cadagiti tantanap iti Mamre: ket adda idi nga situtugaw iti ruangan ti sapaw idi a capudot iti aldaw;

2 Ket intangadna dagiti matana ket kimmita, ket, adtoy, tallo a lallaki sitatacderda iti sangona: ket idi nakitana ida, timmaray nga simmabet cadacuada manipud ti ruangan ti sapaw, ket nagrucnoy agingga iti daga,

3 Kinunana, Apoc, no ita nasaracac ti parabur cadagiti imatangmo, dica labsan, dawatec kenca, ti adipenmo:

4 Ti bassit a danum, dawatec kenca, masacdu coma, ket buggoanyo dagiti sacsacayo, ken aginanacayo dita siroc iti cayo:

5 Ket mangyegacto iti maysa a sangcasacmol a tinapay, ket pakiredenyo dagiti puspusoyo; ket calpasanna lumabascayto: iyantangay nacadanoncayo iti adipenyo. Ket kinunada, Aramidem ngarud, cas sinaom.

6 Ket ni Abraham nagdardaras nga napan iti sapaw ni Sara, ket kinunana, Agdarasca nga mangisagana iti tallo a casucat ti nasayaat nga bellaay, gamayem, ket agaramidca iti tinapay.

7 Ket ni Abraham nagtaray iti ayan dagiti baca, ket nangala iti maysa nga urbon a naganus ken nasayaat, ket intedna iti adipen; ket dinardarasna nga insagana.

8 Ket nangala iti mantequilla, ken gatas, ken ti urbon a sinaganana, ket incabilna iti sangoananda; ket isu nagtacder iti sibayda iti siroc ti cayo, ket nanganda.

9ś Ket kinunada kencuana, Sadino ti ayan ni Sara nga asawam? Ket kinunana, Adtoy, idiay uneg iti sapaw.

10 Ket kinunana, Awan duduana nga agsubliacto kenca a cas mayalubog iti tiempo ti biag; ket, adtoy, ni Sara nga asawam aganacto iti lalaki. Ket ni Sara nangegna daytoy idiay ruangan ti sapaw, nga adda iti licudanna.

11 Ita ni Abraham ken Sara lakay ken baketdan ket adu ti napalabasdan a tawtawen; ket iti casta simmardengen ken Sara iti cas cadaywan cadagiti babbai.

12 Gapuna ni Sara nagcatawa nga is-isu, a kunana, Calpasan nga bimmaketacon agragsacacto, idinto nga ni apoc ket lacay metten?

13 Ket ti APO kinunana ken Abraham, Apayapay nga

ni Sara nagcatawa, a kunana, Pudno aya nga aganacacto ti ubing, ket siac baketacon?

14 Adda aya banag a naricut unay ken ti APO? Iti tiempo a nakedngan agsubliacto kenca, cas mayalubog iti tiempo ti biag, ket ni Sara addanto anacna a lalaki.

15 Idin ni Sara naglibac, a kinunana, Saannac nga nagcatawa; ta isuna nagbuteng. Ket isu kinunana, Saan; no di ket nagcatawaca.

16 ś Ket dagiti lallaki timmacderda idiay, ket kinitada ti turong iti Sodoma: ket ni Abraham kimmuyog cadacuada a nangitulod cadacuada iti dalan.

17 Ket ti APO kinunana, Ilimedconto aya ken Abraham daytoy banag nga aramidec;

18 Idinto nga ni Abraham pudno nga agbalinto a dackel ken nabileg a nacion, ket dagitinto amin a nasnacion ti daga mabendicionandanto gapu kencuana?

19 Ta siac ammoc isuna, nga ibilinnanto dagiti annacna ken iti balayna iti calpasanna, ket salimetmetanda ti dalan ti APO, nga aramidenda ti kinalinteg ken pangngocom; tapno ti APO tungpalenna ken Abraham dagiti naisaona kencuana.

20 Ket ti APO kinunana, Agsipud ta ti ariwawa ti Sodoma ken Gomorra ket dackel, ken gapu ta ti basolda ket nacacarcaro unayen;

21 Umulogacto ita, ket kitaecto no inaramidda amin a cas mayalubog iti ariwawada, nga dimmanon caniac; ket no saan, maammoacto,

22 Ket dagiti lallaki simminada idiay, ket tinurongda ti Sodoma: ngem ni Abraham nagtactacder pay laeng iti sangoanan ti APO.

23 ś Ket ni Abraham immasideg, a kinunana, Pucawem met aya ti nalinteg a maicanunong cadagiti nadangkes?

24 Nalabit no adda limapulo a nalinteg iti uneg ti ili: dadaelem ket dicanto ispalen ti disso maipuon cadagiti limapulo a nalinteg nga addada iti unegna?

25 Adayu coma kenca ti panagaramid ti casta, a patayem ti nalinteg a maicanunong ti nadangkes: nga iti casta ti nalinteg maipada a cas ti nadangkes, adayu coma dayta kenca: Saan aya nga ti Ocom iti isuamin a daga agaramid ti nalinteg?

26 Ket ti APO kinunana, No masaracacto idiay Sodoma ti limapulo a nalinteg idiay uneg ti ili, ispalecto amin nga disso a maipuon cadacuada.

27 Ket ni Abraham simmungbat a kinunana, Adtoy ita, rinuggiac ti nakisaon iti Apo, uray tapucac ken dapoac laeng:

28 Nalabit no agcurangto ti lima dagiti limapulo a nalinteg: dadaelemto cadi ti amin nga ili maipuon cadagiti lima a curang? Ket kinunana, No masaracacto idiay ti uppat a pulo ken lima, saanconto a dadaelen.

29 Ket nakisao manen kencuana, a kinuna, Nalabit no addanto uppat a pulo a masaracan idiay. Ket kunana, diacto aramiden maipuon cadagiti uppat a pulo.

30 Ket kinunana kencuana, O saan coma nga agunget ti Apo, ket agsaoacto: Nalabit no adda tallopulo a masaracan idiay. Ket kinunana, Diacto aramiden, no masaracacto ti tallopulo idiay.

31 Ket kunana, Adtoy ita, naiganuatcon ti nakisao iti Apo: Nalabit no adda duapulo a masaracan idiay. Ket kunana, Saanco nga dadaelen maipagapu cadagiti duapulo.

32 Ket kinunana. O saan coma nga agunget ti Apo, ket agsaoacto iti maminsan pay: Nalabit sangapulo ti masaracan idiay. Ket kinunana, Saanco a dadaelen maipagapu cadagiti sangapulo.

33 Ket ti APO napanen iti dalanna, apaman a nalpas iti pannakisaona ken Abraham: ket ni Abraham nagsubli met iti dissona.

CAPITULO 19

1 Ket dagiti dua nga angel dimtengda idiay Sodoma iti malem; ket ni Lot nagtugtugaw iti ruangan ti Sodoma: ket ni Lot idi nakitana ida timmacder tapno sabtenna ida; ket indumogna ti rupana iti daga;

2 Ket kinunana, Adtoy ita, appoc, umaycayo, dawatec cadacayo, iti balay ti adipenyo, ket umyancayo, ket buggoanyo dagiti sacsacayo, ket bumangoncayto a masapa, sacayto mapan iti dalanyo. Ket kinunada, Saan; ngem agyancaminto nga agpatnag iti calzada.

3 Ngem inuyutanna ida ti napalalo; ket napanda kencuana, ket simrecda iti balayna; ket inyaramidanna ida iti maysa a daya, ket nagluto iti tinapay a dinalevaduraan, ket nanganda.

4 śNgem idi dida pay nagidda, dagiti lallaki ti ili, dagiti lallaki a taga Sodoma, linacubda iti balay, bumaro ken lumakay, ken amin a tattao cadagiti amin nga sulsuli:

5 Ket inayabanda ni Lot, ket kinunada kencuana, Adino ti ayan dagiti lallaki nga immay kenca ita a rabii? irruarmo ida cadacami, tapno maam-ammomi ida.

6 Ket rimmuar ni Lot iti ruangan nga mapan cadacuada, ket rinepcanna ti ruangan ti licudanna.

7 Ket kinunana, Dawatec cadacayo, cacabsatco, dicayo coma agaramid iti casta a kinadakes.

8 Adtoy ita, adda dua nga annacco a babbai a dida pay naam-ammo ti lalaki; palubosandac, dawatec cadacayo, nga iyegco ida cadacayo, ket aramidenyo cadacuada ti naimbag cadagiti matmatayo: isuna laeng cadagitoy nga lallaki dicayo aramiden iti uray no ania; gapu ta immayda iti salinong ti atepco.

9 Ket kinunada, Aglisica. Ket kinunada manen, Daytoy maysa a tao immay nga agnaed, ket agbalinto nga ocom: ita aramidenminto kenca iti dacdakes, ngem cadacuada. Ket dinarupda ti lalaki, ni Lot, ket immasidegda tapno racrakenda ti ruangan.

10 Ngem dagiti lallaki inunnatda ti imada, ket ginuyodda cadacuada ni Lot iti uneg ti balay, ket rinipkanda ti ruangan.

11 Ket kinabilda dagiti lallaki nga adda iti ruangan ti balay babaen ti kinabulsec, ubing man ken lacay: iti casta naparigatanda nga nangsapsapul iti ruangan.

12 ś Ket dagiti lallaki kinunada ken Lot, Adda pay sabali kenca ditoy? manugang nga lalaki, ken annacmo nga lallaki, ken annacmo nga babbai, ken uray siasino nga adda kenca iti ili, ipanawmo ida iti daytoy a disso:

13 Ta dadaelenminto daytoy nga disso, gapu ta ti ariwawada pimmigsa unay iti sango ti APO; ket ti APO imbaonnacami tapno dadaelenmi.

14 Ket ni Lot pimmanaw, ket kinasaona dagiti manugangna, nga nangasawa cadagiti annacna a babbai, ket kinunana, Bumangoncayo, agtalawcayo itoy a disso; ta ti APO dadaelenna ti ili. Ngem isu inawatda a casla mangrabrabac dagiti lallaki nga manugangna.

15 ś Ket idi nagbannawagen, dagiti angel pinagdarasda ni Lot, a kunada, Tumacderca, alaem ta asawam, ken dagiti dua nga annacmo a babbai, nga adda ditoy; di la ket ta mapucawcayo iti kinadakes ti ili.

16 Ngem idin ta magmayeng pay laeng, dagiti lallaki iniggamanda ti imana, ken ti ima ti asawana, ken dagiti im-ima dagiti dua nga annacna a babbai; ti APO ket naasian la unay kencuana: ket inruarda isuna, ket incabilda iti ruar ti ili.

17 ś Ket naaramid, nga idi nairuarda idan, kinunana, Agtalawca gapu iti biagmo; dica taliawen ti licudam, ken dica agsardeng iti uray ania a tanap; agcamangca iti bantay, di la ket ta mapucawca.

18 Ket ni Lot kinunana cadacuada, O, saan coma a casta, sica nga Apoc:

19 Adtoy ita, toy adipenmo nacasarac iti parabur ti imatangmo, ket pinadackelmo ta caasim, nga impakitam caniac iti panangispalmo iti biagco; ket diac macacamang a mapan idiay bantay, di la ket ta macamacamnac ti dakes, ket matayac:

20 Adtoy ita, daytoy nga ili asideg nga pagcamangac, ket bassit: O, palubosannac nga agcamang sadiay, (saan aya a maysa a bassit nga ili?) ket ti cararruac agbiagto.

21 Ket isu kinunana kencuana, Makitam, inanamunganca uray pay daytoy a banag, nga diac to pucawen ti ili, nga cas nasaom.

22 Agdarasca, agcamangca idiay; ta awanto ti mabalinco nga aramiden aginggana iti macadanonca sadiay. Gapu iti daytoy nanaganan ti ili iti Zoar.

23 ś Ti init naglawagen iti rabaw ti daga idi ni Lot nacadanon idiay Zoar.

24 Idin ti APO pinagtudona idiay Sodoma ken Gomorra ti azufre ken apuy nga naggapu ken ti APO manipud sadi langit;

25 Ket dinadaelna dagidiay nga il-ili, ken amin ti tanap, ken amin dagiti agnaed cadagiti il-ili, ken dagiti nagtubo iti daga.

26 ś Ngem ti asawana timmaliaw iti nalicudanna, ket nagbalin a teddec nga asin.

27 Ket ni Abraham bimmangon a nasapa iti bigat iti disso a nagtacderanna iti sangoanan ti APO:

28 Ket kimmita iti agpa Sodoma ken Gomorra, ken ti amin a daga iti tanap, ket naimatanganna, ken, adtoy, ti asuc ti daga nagpangato a casla asuc ti maysa nga horno.

29 ś Ket naaramid nga, idi dinadael ti Dios dagiti il-ili iti tanap, ti Dios nalagipna ni Abraham, ket pinapanawna ni Lot iti tengnga ti pannacapucaw, idi rinebbana dagiti il-ili a nagnaedan ni Lot.

30 ś Ket ni Lot nagtalaw idiay Zoar, ket nagtalinaed idiay bantay, agraman dagiti dua nga annacna a babbai; ta nagbuteng nga nagnaed idiay Zoar: ket nagtaeng iti maysa a rukib, isu ken dagiti dua nga annacna a babbai.

31 Ket ti inauna kinunana iti inaudi, Ni amata lacayen, ket awanen ti lalaki iti daga a sumrec cadata a cas cadawyan ti amin a daga:

32 Umayca, painumenta ni amata iti arac, ket makicaiddatanto kencuana, tapno mataginayonta ti caputotan gapu ken amata.

33 Ket pinainumda ni amada iti arac iti daydi nga rabii: ket ti inauna simrec, ket nakicaidda ken amana; ket isu dina naammoan idi nga ti anacna immay nakicaidda, wenno idi nga ti anacna bimmangon.

34 Ket naaramid nga iti sumuno nga aldaw, ti inauna kinunana iti inaudi, Adtoy, nakicaiddaac idi rabii ken ni amac: painumenta manen ala ti arac ita a rabii; ket sumrecca, ken makicaiddaca kencuana, tapno maitaginayonta ti caputotan ni amata.

35 Ket pinainumda manen iti arac ni amada idi a rabii: ket ti inaudi timmacder, ket nakicaidda kencuana; ket isu dina naammoan idi nga ti anacna immay nakicaidda, wenno idi nga ti anacna bimmangon.

36 Iti casta dagiti dua nga annac nga babbai ni Lot nagsicogda gapu ken amada.

37 Ket ti inauna nangyanac iti lalaki, ket pinanagananna iti Moab: daytoy isu ti ama dagiti Moabitas agpapan pay ita.

38 Ket ti inaudi, nangyanac met iti lalaki, ket pinanagananna iti Benami: daytoy isu ti ama dagiti annac ni Ammon agpapan pay ita.

CAPITULO 20

1 Nanipud idiay nagluas ni Abraham a nagturong iti daga ti abagatan, ket nagnaed iti nagbaetan iti Cades ken Shur, ket nagtaeng idiay Gerar.

2 Ket ni Abraham insaona ti maipapan ken Sara nga asawana, Isu cabsatco a babai: ket ni Abimelech nga ari ti Gerar nagbaon, ket pinaalana ni Sara.

3 Ngem ti Dios immay ken Abimelech iti maysa a tagtagainep ti rabii, ket kinunana kencuana, Adtoy, nataycan a lalaki, maipuon ti babai nga innalam; ta isu asawa ti maysa a lalaki.

4 Ngem ni Abimelech saan pay a dimminna kencuana: ket kinunana, Apo, patayemto uray ti nalinteg a nacion?

5 Dina aya kinuna caniac, Isu cabsatco? ket ti babai, isu met laeng kinunana, Isu cabsatco nga lalaki: iti kinapudno ti pusoc ken kinadalus dagiti im-imac inaramidco daytoy.

6 Ket ti Dios kinunana kencuana iti tagtagainep, Wen, ammoc nga inaramidmo daytoy gapu ti kinapudno ti pusom; ta ingawidca met nga agbasol iti maicaniwas caniac: gapuna a diac impalubos kenca a sagidem

7 Ita ngarud isublim ti babai ken asawana; ta isu ket mammadto, ket icararagannacanto, ket agbiagcanto: ket no dicanto isubli ti babai, ammoem a mataycanto nga awan iti duduana, sica, ken amin a cucuam.

8 Ngarud ni Abimelech bimmangon a nasapa iti bigat, ket inayabanna amin nga adipenna, ket imbagana amin dagitoy a banbanag cadagiti lapayagda: ket dagiti tattao nagbutengda unay.

9 Idin ni Abimelech inayabanna ni Abraham, ket kinunana kencuana, Ania ti inaramidmo cadacami? ken ania ti nacabasolac kenca, ta inyegmo caniac ken ti pagariac ti dackel a basol? inaramidmo caniac dagiti ar-aramid a dida rebbeng coma nga maaramid.

10 Ket ni Abimelech kinunana ken Abraham, Ania ti nakitam, tapno inaramidmo daytoy a banag?

11 Ket ni Abraham kinunana, Gapu ta impagarupco, Kinapudnona nga awan ti panagbuteng iti Dios ditoy a disso; ket patayendacto maipuon ken asawac.

12 Ken maysa pay isu ket pudno a cabsatco nga babai; babai nga anac ni amac, ngem saan nga anac a babai ni inac; ket isu nagbalin nga asawac.

13 Ket naaramid nga, idi ti Dios nanipud inyalisnac iti balay ni amac, nga kinunac kencuana, Daytoy isu ti kinaimbag nga ipaaymonto caniac; iti isuamin a disso a papanantanto, saoemto no maipapan caniac, Isu ket cabsatco a lalaki.

14 Ket ni Abimelech nangala cadagiti carcarnero, ken bacbaca, ken ad-adipen a lallaki, ken ad-adipen a babbai, ket intedna ida ken Abraham, ket insublina kencuana ni Sara nga asawana.

15 Ket ni Abimelech kinunana, Adtoy, ti dagac iti sangoanam: agtaengca iti aniaman a disso a pagayatam.

16 Ken ni Sara kinunana, Adtoy, iniccac ni cabsatmo iti sangaribo a bagi ti pirac: adtoy, isu kenca ti maipaay a pannacaabbong cadagiti matmata, dagiti isuamin a makipagyan kenca, ken amin pay dagiti dadduma: iti casta isu nababalaw.

17 ś Ket ni Abraham nagcararag iti Dios: ket ti Dios pinaimbagna ni Abimelech, ken ti asawana, ken dagiti ad-adipenna a babbai; ket naganacda.

18 Ta ti APO rinikepanna ti isuamin nga aanacan iti balay ni Abimelech, maipuon ken Sara nga asawa ni Abraham.

CAPITULO 21

1 Ket ti APO sinarungcaranna ni Sara cas nasaona idi, ket ti APO inaramidna ken Sara cas ti incarina.

2 Ket ni Sara nagsicog, ket nangyanac ken Abraham iti anac a lalaki iti kinalacayna, idi tiempo a naituding ti Dios a cas kinunana kencuana.

3 Ket ni Abraham impanaganna iti anacna a nayanac kencuana, nga impasngay kencuana ni Sara, Isaac.

4 Ket ni Abraham kinugitna ni anacna nga Isaac idi adda walo nga aldawna, cas imbilin ti Dios kencuana.

5 Ket ni Abraham nagtawen iti sangagasut a tawen, idi nayanac ni anacna nga Isaac.

6 ś Ket ni Sara kinunana, Ti Dios pinagcatawanac, ket amin a macangeg makipagcatawadanto caniac.

7 Ket kinunana, Siasino coma iti nagsao ken Abraham, a ni Sara mamasuso cadagiti annac? ta nangyanacac kencuana ti maysa a lalaki iti kinalacayna.

8 Ket ti ubing dimmackel, ket napusot: ket ni Abraham nagaramid ti dackel a daya idi aldaw a ni Isaac napusot.

9 ś Ket ni Sara nakitana ti anac ni Agar a taga Egipto, nga inyanacna ken Abraham, nga mangrabrabac.

10 Gapuna a kinunana ken Abraham, Pagtalawem daytoy nga adipen a babai ken ti anacna: ta ti anac daytoy nga adipen a babai saan a makipagtawidto ti anacco, a ni Isaac.

11 Ket daytoy nasaem la unay iti imatang ni Abraham maipuon iti anacna.

12 ś Ket ti Dios kinunana ken Abraham, Saan coma kenca nga nasaem iti imatangmo maipuon it ubing, ken gapu iti adipenmo a babai; iti amin nga imbaga ni Sara kenca, ipangagmo ti timecna; ta ken Isaac ti caputotam maawaganto.

13 Ket casta met ti anac ti adipen a babai pagbalinecto a nacion, agsipud ta isu ket putotmo.

14 Ket ni Abraham bimmangon a nasapa ti bigat, ket nangala ti tinapay, ken maysa a lalat a pagyanan ti danum, ket intedna ida ken Agar, nga impacaratayna iti abagana, ken ti ubing, ket pinapanawna: ket pimmanaw, ket namagpagna iti let-ang ti Beer-seba.

15 Ket ti danum iti lalat naibus, ket incabilna ti ubing iti linong ti maysa a cayo a bassit.

16 Ket napan, ket nagtugaw iti masangoanan iti adayu, iti casla madanon ti ibiat ti pana: ta kinunana, Diac coma makita ti ipapatay ti ubing. Ket nagtugaw iti masangoanan, ket inyickisna ti timecna, ket nagsangit.

17 Ket ti Dios nangegna ti timec ti ubing; ket ti angel ti Dios inawaganna ni Agar nanipud sadi langit, ket kinunana kencuana, Ania ti pagdanagam, Agar? dica agbuteng; ti Dios nangegna ti timec ti ubing iti ayanna.

18 Tumacderca, bagcatem ti ubing, ken isu iggamam cadagiti imam; ta isu aramidecto a dackel a nacion.

19 Ket ti Dios linuctanna dagiti matmatana, ket nakitana ti maysa a bubon ti danum; ket napan, ket pinunnona ti lalat iti danum, ket pinainumna ti ubing.

20 Ket ti Dios kinadduana iti ubing; ket dimmackel, ken nagtaeng ti let-ang, ket nagbalin a pumapana.

21 Ket nagnaed iti let-ang ti Paran: ket ni inana inyalaanna iti asawana a taga iti daga ti Egipto.

22 ś Ket naaramid nga idi met la nga tiempo, ni Abimelech ken ni Phicol a capitan dagiti buyotna nagsaoda ken Abraham, a kinunada, Ti Dios adda kenca iti isuamin nga aramidmo:

23 Ita ngarud sapataam caniac iti sangoanan iti Dios a dinacto guliban, ken iti anacco, wenno cadagiti annac dagiti annacco: ngem cas iti mayannatup iti caasi nga inaramidco kenca, aramidemto met caniac, ken iti daga a nagtaengam.

24 Ket ni Abraham kinunana, Agsapataacto.

25 Ket ni Abraham binabalawna ni Abimelech maipuon iti maysa a bubon ti danum, a dagiti adipen ni Abimelech inagawda a siraranggas.

26 Ket ni Abimelech kinunana, Diac ammo no siasino ti nangaramid iti daytoy: ket uray sica dica imbaga caniac, ken diac pay nangeg, no di laeng ita nga aldaw.

27 Ket ni Abraham nangala cadagiti carcarnero ken bacbaca, ket intedna ida ken Abimelech; ket isuda nga dua inaramidda ti maysa a tulag.

28 Ket ni Abraham nangilasin ti pito nga cordero nga babbai iti pangen ket naisinada.

29 Ket ni Abimelech kinunana ken Abraham, Ania ti caipapanan dagitoy pito a cordero a babbai nga inlasinmo?

30 Ket kinunana, Dagitoy pito a cordero a babbai alaemto iti biangco, tapno mangpanecnec coma caniac, nga siac ti nangcali iti daytoy a bubon.

31 Gapuna nga pinanagananna daydiay a disso iti Beer-seba; gapu ta idiay ti nagsapataanda a dua.

32 Iti casta nangaramidda ti tulagda idiay Beer-seba: ket timmacder ni Abimelech, ken Phicol capitan dagiti buybuyotna, ket nagsublida iti daga dagiti Filisteos.

33 ś Ket ni Abraham nagmula ti maysa a salamagi idiay Beer-seba, ket inawaganna idiay iti nagan ti APO, ti agnanayon a Dios.

34 Ket ni Abraham nagnaed idiay daga dagiti Filisteos cadagiti adu nga al-aldaw.

CAPITULO 22

1 Ket naaramid calpasan dagitoy a banbanag, a ti Dios sinuutna ni Abraham, ket kinunana kencuana, Abraham: ket isu simmungbat, Adtoy, addaac ditoy.

2 Ket kinunana, Alaem ita ti anacmo, ti bugbugtong nga anacmo Isaac, nga dongdongoem, ket inca iti daga nga Moria; ket isu idatagmo idiay nga maysa a daton a mapuoran iti rabaw ti maysa cadagiti banbantay nga ibagacto kenca.

3 Ket ni Abraham bimmangon a nasapa iti bigat, ket sinilyaanna ti asnona, ket nangicuyog ti dua nga babbaro, ken ni Isaac nga anacna, ket nangputed iti cayo nga agpaay iti daton a mapuoran, ket timmacder, ket napan iti disso a ti Dios imbagana kencuana.

4 Iti maicatlo nga aldaw ni Abraham intangadna dagiti matana, ket nakitana ti disso iti adayo.

5 Ket ni Abraham kinunana cadagiti babbarona, Agyancayo ditoy agraman ti asno; ket siac ken ti ubing mapancamto idiay nga agdaydayaw, ket agsublicamto cadacayo,

6 Ket ni Abraham innalana ti cayo iti daton a mapuoran, ket impa-awitna ken Isaac nga anacna; ket iniggamanna ti apuy, ken ti buneng; ket napanda a dua nga nagcuyog.

7 Ket ni Isaac kinasaona ni Abraham nga amana, ket kinunana, Amac: ket kinunana, Adtoyac, anacco. Ket isu kinunana, Adtoy ti apuy ken ti cayo: ngem sadino ti ayan ti cordero a maidaton a mapuoran?

8 Ket ni Abraham kinunana, Anacco, ti Dios mangisagananto kencuana iti cordero a maipaay a daton a mapuoran: iti casta napanda a dua a nagcuyog.

9 Ket nacadanonda iti disso nga imbaga ti Dios kencuana; ket ni Abraham binangonna idiay ti maysa nga altar, ket inurnosna ti cayo, ket rineppetna ni Isaac nga anacna, ket imparabawna iti altar ti rabaw ti cayo.

10 Ket ni Abraham inyunnatna ti imana, ket innalana ti buneng a pangpatayna iti anacna.

11 Ket ti angel ti APO pinuccawanna nanipud langit, ket kinunana, Abraham, Abraham: ket isu simmungbat, Addaac ditoy.

12 Ket isu kinunana, Saanmo nga idisso ta imam iti ubing, ket uray ania dica aramiden kencuana: ta ita mabigbigco a mabutengca iti Dios, iyantangay dica impaidam ti anacmo, ti bugbugtong nga anacmo caniac.

13 Ket ni Abraham intannawagna dagiti matana, ket kimmita, ket adtoy ti licudanna maysa a carnero a lalaki naisalat iti casamecan dagiti sarana: ket ni Abraham napan ken innalana ti carnero, ket impaayna a daton a mapuoran a suno ti anacna.

14 Ket ni Abraham pinanagananna daydiay a disso iti Jehovah-jireh: a cas masansan a masasao agpapan ita, Iti bantay ti APO makitanto.

15 ś Ket ti angel ti APO inawaganna ni Abraham manipud langit ti capaminduana.

16 Ket kinunana, Gapu caniac met laeng sinapataac, kinuna ti APO, a gapu ta inaramidmo daytoy, ket dica impaidam ti anacmo, ti bugbugtong nga anacmo:

17 Iti panangbendicion bendicionancanto, ket iti pammaadu paadduecto ti putotmo cas cadagiti bitbituen ti langit, ken cas iti darat nga adda iti igid ti baybay; ket ti putotmo cucuananto dagiti ruangan dagiti cabusorna;

18 Ket iti putotmo dagiti isuamin a nasnacion ti daga mabendicionanto; agsipud ta nagtulnogca cadagiti saoc.

19 Ngarud ni Abraham nagsubli cadagiti babbarona, ket timmacderda ket nagcucuyogda a napan idiay Beer-seba; ket ni Abraham nagnaed idiay Beer-seba.

20 ś Ket naaramid a calpasan dagitoy a banbanag, nga naipadamag ken Abraham, a kunada, Adtoy, ni Milca, nagpasngay cadagiti annac ken ni cabsatmo a Nacor;

21 Ni Huz inauna nga anacna a lalaki, ken ni Buz a cabsatna, ken ni Kemuel nga ama ni Aram,

22 Ken Chesed, ken Hazo, ken Pildas, ken Jidlaf, ken ni Betuel.

23 Ket ni Betuel pinutotna ni Rebecca: dagitoy walo inyanac ni Milca ken Nacor, a cabsat ni Abraham.

24 Ket ti camalalana, nga agnagan iti Reuma, inyanacna met ni Taba, ken ni Gaham, ken ni Taas, ken ni Maaca.

CAPITULO 23

1 Ket ni Sara nagtawen ti sangagasut duapulo ken pito a tawen: dagitoy dagiti tawtawen ti biag ni Sara idi.

2 Ket ni Sara natay idiay Kiriath-arbe; isu met laeng ti Hebron idiay daga a Canaan: ket ni Abraham immay nga nagladingit ken Sara, ken tapno sangitanna:

3 ś Ket ni Abraham timmacder a naggapu iti sango ti minatayna, ket nagsao cadagiti annac ni Heth, kunana,

4 Gangannaetac ken sangsangailiac cadacayo: iccandac cadi ti tagicuaec a maysa a disso cadacayo, tapno maitabonco ti minatayco a maipanaw iti imatangco.

5 Ket dagiti annac ni Heth simmungbatda ken Abraham, a kinunada kencuana,

6 Denggennacami, apoc: sica ti maingel a principe cadacami: iti casayaatan cadagiti tanemmi itabonmo ti minataymo; awan cadacami ti mangiparitto iti tanemna, tapno itabonmo ti minataymo.

7 Ket ni Abraham timmacder, ket isu nagdumog cadagiti umili ti daydi a lugar, cadagiti annac ni Heth.

8 Ket nakisarita cadacuada, a kinunana, No dayta ti pagayatanyo a siac itabonco ti minatayco a maipanaw ti imatangco; denggendac, ket idawdawatdac ken Ephron nga anac a lalaki ni Seor,

9 Tapno itedna coma caniac ti rukib ti Macpela, a cucuana, nga adda iti pungto ti talonna; babaen ti tumutop nga ibayadco itedna coma caniac a tagicuaen a disso nga pagitaneman iti nagtetengngaanyo.

10 Daytoy Ephron nagnaed idi ti tengnga dagiti annac ni Heth: ket ni Ephron a Hetheo simmungbat ken Abraham iti tallaong dagiti annac ni Heth, ken isuamin dagiti simrec iti ruangan ti ilina, a kinunana,

11 Saan, apoc, denggennac: ti talon itedco kenca, ken ti rukib nga adda iti dayta, kenca itedco; iti sango dagiti annac ti ilic itedco kenca: itabonmo ti minataymo.

12 Ket ni Abraham nagdumog iti sango dagiti umili iti daydi a daga.

13 Ket nakisao ken Ephron iti tallaong dagiti umili iti daydi a daga, a kinunana, Ngem no itedmo, dawatec kenca, denggennac: Itedconto kenca ti pateg ti talon; alaem caniac, ket itabonconto ti minatayco idiay.

14 Ket ni Ephron simmungbat ken Abraham, ket kinunana kencuana,

15 Apoc, denggennac: ti daga ket agpateg iti uppat a gasut a siclo ti pirac; ania daytoy iti nagbaetanta? Iti casta ngarud itabonmo ti minataymo.

16 Ket ni Abraham impangagna ni Ephron; ket tinimbang ni Abraham ken Ephron ti pirac, nga imbagana iti tallaong dagiti annac ni Heth, uppat a gasut a siclo ti pirac, cas iti agdama a pateg cadagiti agtagtagilaco.

17 ś Iti casta ti talon ni Ephron, nga adda idiay Macpela, a sango ti Mamre, ti talon, ken ti rukib nga adda idiay, ken isuamin a caycayo nga adda iti sacupna, amin nga aglawlaw, ket napatalgedanda

18 Ken Abraham tapno tagicuaenna iti sango dagiti annac ni Heth, iti imatang dagiti amin a simrec iti ruangan ti ilina.

19 Ket iti calpasan daytoy, ni Abraham intabonna ni Sara nga asawana iti rukib ti talon ni Macpela iti sango ti Mamre: nga isu ti Hebron idiay daga a Canaan.

20 Ket ti talon, ken ti rukib nga adda idiay, napatalgedanda ken Abraham tapno tagicuaena a disso a pagitaneman gapu cadagiti annac ni Heth.

CAPITULO 24

1 Ket ni Abraham lacayen, ket aduanen ti tawen: ket ti APO binendicionanna ni Abraham iti amin a banbanag.

2 Ket ni Abraham kinunana iti panglacayen nga adipen ti balayna, nga agaywan iti isuamin nga adda kencuana, Isaadmo, dawatec kenca, ta imam iti babaen ti luppoc:

3 Ket pagsapataencanto iti imatang ti APO, ti Dios ti langit, ken ti Dios ti daga, a dicanto pangasawaen iti anacco cadagiti annac a babbai dagiti Cananitas, isuda a pakipagtaengac:

4 Ngem mapancanto iti dagac, ken cadagiti cacabagiac, ket mangalaca ti asawa nga agpaay iti anacco nga Isaac.

5 Ket ti adipen kunana kencuana, Nalabit no ti balasang dinanto cayat ti sumurot caniac a dumanon itoy a daga: casapulan cadi nga ipan manen ti anacmo iti daga nga naggapuam?

6 Ket ni Abraham kinunana kencuana, Agannadca ta dica ipan manen ti anacco idiay.

7 ś Ti APO Dios dagiti langlangit, a nangala caniac iti balay ni amac, ken ti daga dagiti cacabagiac, ken nagsao caniac, ken nagsapata caniac, a kunana, Iti putotmo itedconto daytoy a daga; isu ibaonnanto ti angelna iti masangoanam, ket mangalacanto ti asawa ti anacco idiay.

8 Ket no ti babai dinanto cayat ti sumurot kenca, mawayawayaancanton itoy sapatac: isuna laeng a dicanto ipan manen ti anacco idiay.

9 Ket ti adipen insaadna ti imana iti baba ti luppo ni Abraham nga apona, ket nagsapata kencuana maipapan itoy a panggep.

10 ś Ket ti adipen nangala iti sangapulo a camello cadagiti camello ni apona, ket nagluas; ta amin a napateg a cucua ni apona adda iti imana: ket isu timmacder, ket napan idiay Mesopotamia, ili ni Nacor.

11 Ket pinagparintumengna dagiti camello iti ruar ti ili iti abay ti bubon ti danum iti horas nga mumalem, horas nga ipapan dagiti babbai nga agsacdu ti danum.

12 Ket kinunana, O APO Dios ni apoc nga Abraham, Dawatec kenca, ibaonmo cadi caniac ti naimbag a paset ita nga aldaw, ket itdem ti caasi ken apoc nga Abraham.

13 Adtoy, sitatacderac iti abay ti bubon ti danum; ket dagiti babbai nga annac dagiti tattao ti ili um-umayda sumacdu:

14 Ket maaramid coma, nga ti balasang a pagcunaac, Ibabam cadi ta carambam, dawatec kenca, tapno uminumac; ket kunananto, Uminumca, ken casta met painumecto dagita camellom: ipaaymo cadi nga daytoy ti insaganam iti adipenmo nga Isaac; ket iti castoy maammoacto nga inaramidmo ti kinaimbag ken apoc.

15śKet naaramid nga, idi dina pay natuloy ti agsao, ket, adtoy, ni Rebeca rimmuar, isu a nayanac ken Bethuel, lalaki nga anac ni Milca, asawa ni Nacor, a cabsat ni Abraham, nga ti carambana ket binaclay ti abagana.

16 Ket ti balasang napintas unay a mabuya, birhen, a dipay naam-ammo ti uray ania nga lalaki: ket simmalog iti bubon, ket pinunnona ti carambana, ket simmang-at.

17 Ket ti adipen nagtaray a simmabet kencuana, ket kinunana, Ala cadi, dawatec kenca, painumennac ti bassit a danum manipud iti dayta carambam.

18 Ket kinunana, Uminumca, apoc: ket nagdaras isuna, ket imbabana ti carambana cadagiti imana, ket pinainumna.

19 Idi nalpasnan a pinainum, kinunana, Casta met sumacduacto pay iti danum a maipaay cadagiti camellom, inggana iti dida malpas nga uminum.

20 Ket nagdaras, ket imbuyatna ti danum ti carambana iti pagpainuman, ket nagtaray manen nga napan ti bubon nga sumacdu, ket simmacdu ti agpaay cadagiti amin a camellona.

21 Ket ti lalaki minatmatanna a siuulimec, tapno maammoanna no ti APO ket binendicionanna iti dalanna wenno saan.

22 Ket naaramid nga, idi dagiti camello nalpasdan nga imminum, ti lalaki nangala iti maysa a balitoc nga aritos a guddua ti siclo ti timbengna, ken dua a pulceras nga agservi cadagiti im-imana a sangapulo a siclo ti balitoc ti timbengda;

23 Ket kinunana, Siasino ti akin-anac kenca? ibagam caniac, dawatec kenca: adda cadi lugar idiay balay ni amam tapno pagdagusanmi?

24 Ket kinunana kencuana, Siac ti balasang ni Betuel anac a lalaki ni Milca, isu nga inyanacna ken Nacor.

25 Ket kinunana pay kencuana, Casta met nga adda cadacami ti garami ken adu a macan dagiti an-animal, ken ti lugar nga pagdagusan.

26 Ket ti lalaki indumogna ti ulona, ket indaydayawna ti APO.

27 Ket kinunana, Bendito coma ti APO Dios ni apoc nga Abraham, isu nga di nangbaybay-a iti apoc cadagiti caasina ken kinapudnona: casta met caniac, ti APO inturongnac iti dalan agingga iti balay dagiti cacabsat ti apoc.

28 Ket ti balasang nagtaray, ket imbagana idiay balay ni inana dagitoy a banbanag.

29 ś Ket ni Rebeca adda cabsatna a lalaki, ket ti naganna Laban: ket ni Laban nagtaray a napan iti lalaki, idiay ubbog.

30 Ket naaramid nga, idi nakitana dagiti aritos ken pulceras cadagiti im-ima ni cabsatna, ken idi nangegna dagiti balicas ni Rebeca a cabsatna, a kinunana, Casta ti kinuna ti lalaki caniac; immasideg iti lalaki; ket, adtoy, isu adda idi iti sibay dagiti camello idiay bubon.

31 Ket kinunana, Sumrecca, sica bendito ti APO; apayapay sitatacderca iti ruar? ta insaganacon ti balay, ken ti disso a pagyanan dagiti camello.

32 ś Ket ti lalaki simrec iti balay, ket inalsaanna dagiti camellona, ket nangted ti garami ken canen a maipaay cadagiti camello, ken danum a pangbuggo cadagiti sacsacana, ken sacsaca dagiti lallaki a kinacuyogna.

33 Ket insangoananda ti canenna: ngem kinunana, Diacto mangan, agingga iti diac maibaga iti nacaibaonac. Ket kinunana, Agsaoca ngarud.

34 Ket kinunana, Siac adipennac ni Abraham.

35 Ket ti APO binendicionanna ni apoc iti adu; ket nagbalinen a dackel: ket iniccanna dagiti carcarnero, ken bacbaca, ken pirac, ken balitoc, ken ad-adipen nga lallaki ken babbai, ken camcamello, ken as-asno.

36 Ket ni Sara nga asawa ni apoc inyanacna ti maysa a lalaki ken apoc idi baketen: isu a nangtedanna ti amin nga adda kencuana.

37 Ket ni apoc pinagsapatanac, a kinunana, Dicanto mangala iti babai nga asawaen ti anacco cadagiti annac a babbai dagiti Cananitas, nga ti dagada pagnaedac:

38 Ngem incanto iti balay ni amac, ken cadagiti cacabagiac, ket mangalacanto idiay ti asawa nga agpaay ti anacco.

39 Ket kinunac ken apoc, No nalabit a ti babai dinto sumurot caniac.

40 Ket kinunana caniac, Ti APO, nga ti sangona magmagnaac, ibaonnanto ti angelna a maicuyog kenca, ket bendicionannanto ti dalanmo; ket mangalacanto ti asawa a maipaay ti anacco cadagiti cacabagiac, ken iti balay ni amac:

41 No casta mawayawayaancanton iti sapatac, intono macasangpetca cadagiti cacabagiac; ket no didanto ited kenca iti maysa, mawayawayaancanton iti sapatac.

42 Ket dimtengac ita nga aldaw ditoy nga bubon, ket kinunac, O APO Dios ni apoc nga Abraham, no sica bendicionan coma ita ti dalanco nga turongec:

43 Adtoy, sitatacderac iti abay ti ubbog ti danum; ket intono calpasanna, nga ti birhen a rummuar a sumacdu, ket isu pagcunaacto, Iccannac, dawatec kenca, iti bassit a danum ita carambam nga inumec;

44 Ket kunananto caniac, Uminumcayo, ken casta met sacduac pay nga agpaay cadagiti camellom: isu cadi daytoy ti babai nga ti APO insaganana iti anac ti apoc.

45 Ket idi di pay nalpas ti sasaoen ti pusoc, adtoy, ni Rebeca rimmuar a sibabaclay ti carambana; ket simmalog nga napan iti bubon, ket nagsacdu: ket kinunac kencuana, Painumennac cadi, dawatec kenca.

46 Ket isu nagdaras, ket imbabana ti carambana iti abagana, ket kinunana, Uminumca, ken casta met painumecto met dagiti camcamellom: ket imminumac, ken iniccanna met dagiti camcamello ti inumen.

47 Ket sinaludsudco kencuana, a kinunac, Asino ti makin-anac kenca? Ket kinunana, Balasangnac ni Betuel, anac ni Nacor, isu nga impasngay ni Milca kencuana: ket incabilco ti aritos iti rupana, ken pulceras cadagiti im-imana.

48 Ket intamedco ti uloc, ken indaydayawco ti APO, ken beninditoc ti APO Dios ni apoc nga Abraham, a nangiturong caniac iti napudno a dalan tapno mangalaac iti babai nga anac ti cabsat a lalaki ni apoc nga agpaay iti anacna.

49 Ita ngarud no ipaayyonto ti kinaasi ken kinapudno ken apoc, ibagayo caniac: ket no saan; ibagayo caniac; tapno agturongac iti macanawan, wenno iti macatigid.

50 Idin ni Laban ken Betuel simmungbatda ket kinunada, Daytoy a banag naggapu ti APO: saanmi a mabalin ti agsao kenca iti dakes wenno naimbag.

51 Adtoy, ni Rebeca adda iti sangoanam, alaem, ket mapanca, ket pagbalinem nga asawa ti anac ni apom, cas ti APO sinaona.

52 Ket naaramid, nga, idi ti adipen ni Abraham nangegna dagiti balbalicasda, indaydayawna ti APO, nga impaclebna ti bagina iti daga.

53 Ket ti adipen nangiruar cadagiti alajas a pirac, ken alajas nga balitoc, ken pagan-anay, ket intedna ida ken Rebeca: casta met iniccanna da cabsatna ken ni inana dagiti napapateg nga banbanag.

54 Ket nanganda ken imminumda, isu ken dagiti lallaki a naicuyog kencuana, ket imyanda iti agpatnag; ket bimmangonda iti bigat, ket kinunana, Ibaondac nga mapan ken apoc.

55 Ket ti cabsatna ken ti inana kinunada, Bay-am pay la ti balasang nga agnaed cadacami iti sumagmamano nga aldaw, uray la no sangapulo; iti calpasanna mapanto.

56 Ket kinunana cadacuada, Didac tactaken, ta ti APO linuclucatanna dagiti daldalanco; ibaondac ngarud tapno mapanacon ken apoc.

57 Ket simmungbatda, Ayabanmi ti balasang, ket agintuudcami kencuana.

58 Ket inayabanda ni Rebeca, ket kinunada kencuana, Mapancanto makicuyog itoy a lalaki? Ket kinunana, Mapanacto.

59 Ket inbaonda ni Rebeca a cabsatda a babai, ken ti tarakenna, ken ti adipen ni Abraham, ken dagiti taona.

60 Ket binendicionanda ni Rebeca, ket kinunada kencuana, Sica cabsatmi a babai, sica coma ti ina ti rinibribu a linacsalacsa, ket dagiti putotmo tagicuaenda coma ti ruangan dagiti gumura cadacuada.

61 ś Ket timmacder ni Rebeca, ken dagiti babbalasangna, a simmacayda dagiti camcamello, ket sinurotda ti lalaki: ket ti adipen innalana ni Rebeca, ket napan ti dalanna.

62 Ket ni Isaac naggapu iti dalan ti bubon a Lahai-roi; ta nagnaed ti abagatan a daga.

63 Ket ni Isaac napan iti away nagpanpanunot idi tagtagilinneken ti init: ket intangadna dagiti matana, ket nakitana, adtoy, dagiti camcamello sumungadda idi.

64 Ket ni Rebeca intannawagna dagiti matana, ket idi nakitana ni Isaac, isu dimsaag iti camello.

65 Ket kinunana iti adipen, Asino daytoy a lalaki a magmagna iti away tapno sumabet cadatayo? Ket ti adipen kinunana, Isu ti apoc: gapuna innalana ti dalongdongna, ket inarpawanna ti bagina.

66 Ket ti adipen sinaritana ken Isaac dagiti amin nga inaramidna.

67 Ket ni Isaac impastrecna ti sapaw ni Sara nga inana, ket innalana ni Rebeca, ket nagbalin nga asawana; ket inay-ayatna isuna : ket ni Isaac naliwliwa calpasan ti ipapatay ni inana.

CAPITULO 25

1 Ket ni Abraham nangasawa manen iti sabali, ket ti naganna Cetura.

2 Ket inyanacna kencuana da Zimrac, ken Joksan, ken Midian, ken Isbak, ken Sua.

3 Ket ni Joksan pinutotna da Seba, ken Dedan. Ket dagiti annac a lallaki ni Dedan isuda Assurim, ken Letusim, ken Leummim.

4 Ket dagiti annac a lallaki ni Midiam; da Efa, ken Efer, ken Enoc, ken Abida, ken Eldaa. Amin dagitoy annac ida ni Cetura.

5 ś Ket ni Abraham intedna amin a cucuana ken Isaac.

6 Ngem dagiti annac a lallaki dagiti camalala, nga putot ni Abraham, idi ni Abraham iniccanna ida cadagiti sagsagut, ket imbaonna ida ti adayu ken Isaac nga anacna, idi sibibiag pay, iti agpadaya, iti akindaya nga daga.

7 Ket dagitoy dagiti al-aldaw dagiti tawtawen ti biag a panagbiag ni Abraham, sangagasut ken pitopulo ket lima a tawen.

8 Ket ni Abraham inyawatna ti cararruana, ket natay iti naimbag a kinalakay, maysa nga lacay, ken napnoan cadagiti tawtawen; ket naitipon cadagiti cacabaggianna.

9 Ket dagiti annacna ni Isaac ken Ismael imponponda idiay rukib ti Macpela, iti talon ni Efron nga anac ni Zoar a Heteo, nga adda iti sango ti Mamre;

10 Ti daga nga ginatang ni Abraham cadagiti annac ni Het: idiay ni Abraham naitanem, ken ni Sara nga asawana.

11 ś Ket naaramid nga idi calpasan ti ipapatay ni Abraham, ti Dios binendicionanna ni Isaac; ket ni Isaac nagtaeng iti asideg iti bubon nga Lahai-roi.

12 ś Ket dagitoy dagiti caputotan ni Ismael, anac ni Abraham, nga inyanac ni Agar a taga Egipto, adipen ni Sara, impasngayna ken Abraham:

13 Ket dagitoy dagiti nagnagan dagiti annac a lallaki ni Ismael, dagiti nagnaganda, cas mayannurot cadagiti caputotanda: ti inauna a lalaki nga anac ni Ismael, Nabayot; ken ni Cedar, ken ni Adbeel, ken ni Mibsan,

14 Ken Misma, ken Duma, ken Massa,

15 Hadad, ken Tema, Jetur, Nafis, ken ni Cedema:

16 Ket dagitoy dagiti annac a lallaki ni Ismael, ket dagitoy dagiti nagnaganda, cas mayannurot cadagiti purpurocda, ken pagsapsapawanda; sangapulo ket dua a pangpangulo a cas maitutop cadagiti nasnacionda.

17 Ket dagitoy dagiti tawtawen ti panagbiag ni Ismael, sangagasut ket tallopulo ket pito a tawen: ket inyawatna ti cararruana ket natay; ket naitipon cadagiti cacabaggianna.

18 Ket nagnaedda nanipud Havila agingga iti Shur, nga adda iti sango ti Egipto, no cas agturongca iti Asiria: ket isu natay iti sangoanan dagiti amin a cacabsatna.

19 ś Ket dagitoy dagiti capcaputotan ni Isaac, anac ni Abraham: ni Abraham pinutotna ni Isaac:

20 Ket ni Isaac nagtawen iti uppat a pulo idi inasawana ni Rebeca, nga anac a babai ni Betuel nga Sirio idiay Padan-aram, ken cabsat ni Laban nga Sirio.

21 Ket ni Isaac nagdawat ti APO maipuon iti asawana, gapu ta lupes idi: ket ti APO immannugot ti dawatna, ket ni Rebeca nga asawana nagsicog.

22 Ket dagiti annac naggubalda iti unegna; ket kinunana, No casta ti maaramid, casino ti panagbiagco? Ket napan a nakiuman ken ti APO.

23 Ket ti APO kinunana kencuana, Dua a nacion iti adda ti tianmo, ken dua nga ili maisinadanto ita unegmo; ket ti maysa nga ili napigpigsanto ngem iti dayta sabali nga ili; ket ti inauna pagserviannanto iti inaudi.

24 ś Ket idi nagtenganen dagiti aldaw a panaganacna, adtoy, adda dagiti singin iti tianna.

25 Ket ti immuna a rimmuar nalabaga, ket nabungon ti cudilna iti muldot a cas maysa a pagan-anay; ket pinanagananda iti Esau.

26 Ket calpasanna rimmuar ti cabsatna, ket ti imana adda nga sicacapet iti mucod ni Esau; ket napanaganan iti Jacob: ket ni Isaac nagtawen iti innem a pulo idi naiyanacda.

27 Ket dagiti ubbing dimmackelda: ket ni Esau nagbalin a nalaing nga mangnganup, tao ti away; ket ni Jacob tao a natalna, nga nagtataeng cadagiti sapsapaw.

28 Ket ni Isaac inay-ayatna ni Esau, gapu ta nagsidsida cadagiti maananupanna: ngem ni Rebeca inay-ayatna ni Jacob.

29 Ket ni Jacob nagluto iti maysa a lauya: ket ni Esau naggapu iti away, ket napacapsuyan:

30 Ni Esau kinunana ken Jacob, Iccannac ti canec, dawatec kenca, ita nalabaga nga linauyam; ta napacapsuyannac: gapuna a napanaganan iti Edom.

31 Ket ni Jacob simmungbat, Ilacom caniac ita nga aldaw ti kinainaunam.

32 Ket ni Esau kinunana, Adtoy, addaac nga ngannganin matay: ket ania pay ti magunggonac nga aramiden daytoy kinainauna caniac?

33 Ket ni Jacob kinunana, Isapataam caniac ita nga aldaw; ket sinapataanna kencuana: ket inlacona ti kinainaunana ken Jacob.

34 Ket ni Jacob intedna ken Esau ti tinapay ken ti nalauya nga lentejas; ken nangan ken imminum, ket timmacder, ken napan iti dalanna: iti casta ni Esau linaisna ti saguday ti kinainaunana.

CAPITULO 26

1 Ket adda idi bisin iti daga, a sabsabali iti daydi immuna a bisin nga naadda cadagiti aldaw ni Abraham. Ket ni Isaac napan ken Abimelech nga ari dagiti Filesteos idiay Gerar.

2 Ket ti APO nagparang kencuana, ket kinunana, Dica sumalog idiay Egipto; agtaengca iti daga nga ibagacto kenca:

3 Agnaedca iti daytoy a daga, ket siac addaacto kenca, ket bendicionancanto; ta kenca, ken iti putotmo, itedconto amin dagitoy a dagdaga, ket patalgedacto ti sapata nga insapatac ken Abraham nga amam;

4 Ket aramidecto ti putotmo nga umadu a cas cadagiti bitbituen ti langit, ket itedconto iti putotmo amin dagitoy a dagdaga; ket gapu iti putotmo isuamin a nasnacion iti daga mabendicionanto;

5 Gapu ta ni Abraham impangagna ti timecco, ket tinungpalna ti patigmaanco, dagiti bilbilinco, dagiti pagalagadac, ken dagiti linlintegco.

6 ś Ket ni Isaac nagnaed idiay Gerar:

7 Ket dagiti lallaki idiay a disso inintuudda kencuana ti maipapan iti asawana; ket kinunana, Isu cabsatco a babai: ta nagbuteng a nagcuna, Isu ti asawac; di la ketdi, kinunana, dagiti lallaki itoy a disso patayendacto a maipuon ken Rebeca; gapu ta napintas ti buyana idi.

8 Ket naaramid nga, idi nagnaed idiay iti nabayag, ni Abimelech nga ari dagiti Filisteos simmirpat iti maysa a tawa, ket nakitana, ket, adtoy, ni Isaac nga madama nga makiay-ayam ken Rebeca nga asawana.

9 Ket ni Abimelech inayabanna ni Isaac, ket kinunana, Adtoy, pudno unay isu ti asawam: ket apayapay kinunam, Isu ti cabsatco a babai? Ket ni Isaac kinunana kencuana, Gapu ta kinunac, Di la ket ta matayac maipuon kencuana.

10 Ket ni Abimelech kinunana, Ania daytoy nga inaramidmo cadacami? maysa cadagiti lallaki linacada coma iti nakicaidda iti asawam, ket gapu iti dayta inyegmo coma ti babac cadacamin.

11 Ket ni Abimelech inbilinna iti amin a umili, a kunana, Ti sumagid itoy a lalaki wenno iti asawana ket awanto ti duduana nga mapapatayto.

12 Idin ni Isaac nagtalon idiay a daga, ket nacagunggona iti daydi a tawen ti naminsangagasut: ket binendicionan isuna iti APO.

13 Ket isuna dimmackel a dimmackel, ken nagtultuloy, ket rimmangay aginggana nagbalin la unay a dackel:

14 Ta adda cucuana a pangpangen, cucuana nga ar-arban, ken adu nga ad-adipen: ket dagiti Filisteos inagumanda isuna.

15 Ta isuamin a bobbubon nga kinali dagiti ad-adipen ni amana cadagiti al-aldaw ni Abraham nga amana, dagiti Filisteos pinagsardengda ida, ket ginaburanda iti daga.

16 Ket ni Abimelech kinunana ken Isaac, Pumanawca cadacami; gapu ta napigpigsaca ngem dacami.

17 ś Ket ni Isaac pimmanaw idiay, ket insaadna dagiti sapsapawna iti lobong ti Gerar, ket nagnaed idiay.

18 Ket ni Isaac kinalina manen dagiti bobbubon dagiti danum, a binobonda idi cadagiti aldaw ni Abraham nga amana; ta dagiti Filisteos ginaburanda ida idi natayen ni Abraham: ket impanaganna cadacuada dagiti nagnagan a ni amana impanaganna idi cadacuada.

19 Ket dagiti ad-adipen ni Isaac nagcalida idiay tanap, ket nasaracanda idiay ti maysa a bubon nga agburburayoc ti danumna.

20 Ket dagiti agpaspastor a taga Gerar nakisusicda cadagiti papastor ni Isaac, a kunada, Ti danum cucuami: ket ninagananna ti bubon Esek; agsipud ta nakisusicda idi kencuana.

21 Ket nagcalida manen ti sabali a bubon, ket casta met a nakisusicda latta: ket pinanagananna iti Sitna.

22 Ket pimmanaw idiay, ket nagcali manen ti sabali a bubon; ket daytoy saanda a nakisusic: ket pinanagananna iti Rehobot; ket kinunana, Itan ti APO iniccannatayo ti disso a nawaya, ket agbalintayto a nabunga iti daga.

23 Ket simmang-at idiay nga napan sadi Beer-seba.

24 Ket ti APO nagparang kencuana iti daydi met la a rabii, ket kinunana, Siac ti Dios ni Abraham nga amam: dica agbuteng, ta siac addaac kenca, ket bendicionancanto, ken paadduecto ti putotmo maipuon ken adipenco nga Abraham.

25 Ket isu nangbangon ti altar idiay, ket inawaganna ti nagan ti APO ken pinatacderna ti sapawna idiay: ket sadiay nagcali dagiti ad-adipen ni Isaac ti maysa a bubon.

26 ś Idin ni Abimelech napan kencuana nanipud Gerar, ken Ahuzat a maysa cadagiti gagayyemna, ken ni Picol a pangulo nga capitan dagiti buybuyotna.

27 Ket ni Isaac kinunana cadacuada, Apayapay immaycayo caniac, idinto a cagurguradac, ken pinapanawdac cadacayo?

28 Ket kinunada, Nakitami a nalawag nga ti APO adda kenca: ket kinunami, Adda coma ita ti maysa a sapata cadatayo, dacami ken sica, ket aramidentayo coma ti maysa a tulag;

29 A dicanto aramiden cadacami ti ranggas, a cas cadacami didaca sinagsagid, a cas inaramidmi kenca a no di naimbag laeng, ken imbaondaca a sitatalna: ket sica itan ti bendito ti APO.

30 Ket inyaramidanna ida iti maysa a daya, ket nanganda ken imminumda.

31 Ket bimmangonda a nasapa iti bigat, ket nagsinnapatada ti maysa ken maysa: ket ni Isaac pinagawidna ida, ket pimmanawda a sicacappia.

32 Ket naaramid calpasan iti daydi met la nga aldaw, immay dagiti ad-adipen ni Isaac, ket imbagada ti maipanggep ti bubon nga kinalianda, ket kinunada kencuana, Nasaracanmi ti danum.

33 Ket ninagananna iti Seba: gapuna ti nagan ti ili ket Beer-seba aginggana iti daytoy nga aldaw.

34 ś Ket ni Esau nagtawen iti uppat a pulo idi innalana nga asawana ni Judit nga anac a babai ni Beeri a Heteo, ken ni Basemat nga anac a babai ni Elon a Heteo:

35 Ket dagitoy isuda dagiti nangited iti pagledleddaangan dagiti panunot da Isaac ken Rebeca.

CAPITULO 27

1 Ket naaramid nga, idi lacayen ni Isaac, ket dagiti matana nagcudrepda, iti casta dida macakita, inayabanna ni Esau nga anacna nga inauna, ket kinunana kencuana, Anacco: ket simmungbat kencuana, Adtoy, addaac ditoy.

2 Ket kinunana, Adtoy ita, lacayacon, diac ammo ti aldaw nga ipapatayco:

3 Ita ngarud alaem, dawatec kenca, dagiti igammo, ti baina ken panam, ket inca iti away, ket iyalaannac iti ugsa;

4 Ket iyaramidannac ti luto a naimas, cas pagayayatac, ket iyegmo caniac, ta canecto; tapno toy cararruac bendicionannacanto sacbay ti ipapatayco.

5 Ket ni Rebeca nangegna ni Isaac idi casasaona ni Esau nga anacna. Ket ni Esau napan iti away nga aganup iti ugsa, tapno iyegnanto.

6 ś Ket ni Rebeca kinasaona ni Jacob nga anacna, a kunana, Adtoy, nangegco ni amam a nagsao ken Esau a cabsatmo, a kunkunana,

7 Iyegannac iti ugsa, ket iyaramidannac iti luto a naimas, tapno manganac, ken bendicionanca iti sango ti APO casacbayan iti ipapatayco.

8 Ita ngarud, anacco, tungpalem ti saoc a cas iti ibilinco kenca.

9 Inca ita iti ayan dagiti arban, ket iyala-annac sadiay cadagiti dua a nasayaat nga urbon dagiti calcalding; ket aramidecto ida a luto a naimas nga sidaen ni amam, cas pagayayatanna:

10 Ket sica ipanmonto ken amam, tapno mangan, ta iti casta bendicionannaca sacbay iti ipapatayna.

11 Ket ni Jacob kinunana ken Rebeca nga inana, Adtoy, ni Esau a cabsatco ket moldotan a tao, ket siac awan moldotco nga tao:

12 No nalabit nga ni amac aricapennacto, ket ibilangnacto a cas manangal-allilaw; ket maalacto ti pannacailunodco, ket saan a pannacabendicion.

13 Ket ni inana kinunana kencuana, Siacto ti pacaipatayan ti pannacailunodmo, anacco: tungpalem laeng ti timecco, ket inca alaen caniac ida.

14 Ket napan, ket nangala, ket inyegna ida ken inana: ket ni inana nagaramid ti luto a naimas, a cas iti pagayayatan ni amana.

15 Ket ni Rebeca innalana dagiti casayaatan a pagananay ti inauna nga anacna a ni Esau, nga addada kencuana iti balay, ket inbadona ida ken Jacob nga inaudi nga anacna:

16 Ket kinawesanna iti lalat dagiti urbon dagiti calcalding ti rabaw dagiti im-imana, ken ti awan moldotna a tengngedna:

17 Ket intedna ti linutona a naimas ken ti tinapay, nga insaganana, iti ima ni Jacob nga anacna.

18 ś Ket isu napan ken amana, ket kinunana, Amac: ket simmungbat, Adtoyac; asinoca, anacco?

19 Ni Jacob kinunana ken amana, Siac ni Esau nga inauna nga anacmo; inaramidco cas iti sinaom caniac: bumangonca, dawatec kenca, agtugawca ken agsidaca iti ugsac, tapno ta cararruam bendicionannac coma.

20 Ket ni Isaac kinunana ken anacna, Casano ti pannacasaracmo a nadaras unay, anacco? Ket kinunana, Gagu ta ti APO a Diosmo inyegna caniac.

21 Ket ni Isaac kinunana ken Jacob, Umasidegca, dawatec kenca, tapno aricapenca, anacco, no sica met laeng ti anacco nga Esau wenno saan.

22 Ket ni Jacob immasideg ken amana nga Isaac; ket isu inaricapna, ket kinunana, Ti timec isu ti timec ni Jacob, ngem dagiti im-ima isuda dagiti im-ima ni Esau.

23 Ket dina nailasin, gapu ta dagiti im-imana namoldotda, a cas dagiti im-ima ni Esau: iti casta binendicionanna.

24 Ket kinunana, Sica met laeng ti anacco nga Esau? Ket insungbatna, Siac.

25 Ket kinunana, Iyasidegmo caniac, ta agsidaac iti ugsa ti anacco, tapno ti cararruac bendicionannaca. Ket inyasidegna kencuana, ket isu nangan: ken nangyeg iti arac, ket isu imminum.

26 Ket ni amana nga Isaac kinunana kencuana, Umasidegca ita, ken ongngoennac, anacco.

27 Ket immasideg, ket inongngona: ket nasay-upna ti angot ti cawesna, ket binendicionanna, ket kinunana, Kitaem, ti angot ti anacco cas ti angot ti talon a ti APO binendicionannan:

28 Gapuna ti Dios itedna kenca ti linnaaw ti langit, ken ti dam-eg ti daga, ken kinawadwad ti trigo ken arac:

29 Dagiti tattao agservida coma kenca, ken nasnacion agtamedda coma kenca: agbalinca coma nga apo dagiti cacabsatmo, ket agtamed coma kenca dagiti annac ni inam: mailunod coma ti tunggal maysa a mangilunod kenca, ken bendito coma ti tunggal maysa a mangbendicion kenca.

30 ś Ket naaramid nga, idi nga ni Isaac calcalpasna ti panangbendicionna ken Jacob, ket ni Jacob pumanpanaw pay laeng iti sango ni Isaac nga amana, ni Esau nga cabsatna simmangpet iti panaganupna.

31 Ket nagaramid met ti luto a naimas, inyegna ken amana, ket kinunana ken amana, Bumangon coma ni amac, ket agsida iti ugsa ti anacna, tapno ta cararruam bendicionannac coma.

32 Ket ni Isaac nga amana kinunana kencuana, Asinoca? Ket simmungbat, Siac ti anacmo, ti inauna nga anacmo Esau.

33 Ket ni Isaac namigerger iti casta unay, ket kinunana, Asino? Sadino ti ayanna ti nangala ti ugsa, ket inyegna caniac, ket kinnanco amin itay dica pay simmangpet, ket binendicionac? wen, ket isu pudno a benditonto.

34 Idi ni Esau nangegna dagiti sasao ni amana, nagickis iti natbag ken nalaus nga napait a puccaw, ket kinunana ken amana, Bendicionannac, uray siac met, O amac.

35 Ket kinunana, Ni cabsatmo immay a sisisicap, ket innalana kenca ti pannacabendicionmo.

36 Ket kinunana, Saan cadi nga apag-isu ti naganna a Jacob? ta ginundawayannac cadagitoy namindua a daras: innalana ti kinainaunac; ken, adtoy, ita innalana ti pannacabendicionco. Ket kinunana, Awan cadin ti inteddam a bendicion nga agpaay caniac?

37 Ni Isaac simmungbat ket kinunana ken Esau, Adtoy, inaramidcon nga apom, ken amin dagiti cacabsatna intedco kencuana nga ad-adipen; ken dagiti trigo ken arac insaganac kencuana: ket ania ngarud ita ti aramidecto kenca, anacco?

38 Ket ni Esau kinunana ken amana, Maymaysa la cadi ti pamendicionmo, amac? bendicionannac, uray siac met cadi, O amac. Ket ni Esau impigsana ti timecna, ket nagsangit.

39 Idin ni Isaac nga amana simmungbat ket kinunana kencuana, Adtoy, ti pagnaedam ket itinto nadam-eg a daga, ken iti linnaaw ti langit idiay ngato;

40 Ket gapu ti campilanmo agbiagcanto, ket agservicanto ken cabsatmo; ket maaramidto intono sica ti agpannuray, ket sica dadaelemto iti sangolna ita tengngedmo.

41 ś Ket ni Esau ginurana ni Jacob maipanggep ti bendicion nga pamendicion ni amana kencuana: ket ni Esau kinunana ti pusona, Dagiti al-aldaw ti ladingit a maipaay ken amac umasidegdan; iti casta calpasanna ket papatayecto ni cabsatco a Jacob.

42 Ket dagitoy a sasao ni Esau nga inauna nga anacna naipadamag ken Rebeca: ket isu pinaayabanna ni Jacob nga inaudi nga anacna, ket kinunana kencuana, Adtoy, ni cabsatmo nga Esau, no maipapan kenca, liwliwaenna ti bagina, ket panggepennaca a papatayen.

43 Ita ngarud, anacco, tungpalem ti saoc; ket tumacderca, agtalawca a mapan ken Laban a cabsatco idiay Haran;

44 Ket makipagyanca kencuana iti bassit nga aldaw, agingga iti gura ni cabsatmo kenca ket pumanaw;

45 Agingga iti gura ni cabsatmo kenca mapucaw, ken malipatanna ti inaramidmo kencuana: calpasanna agbaonacto, ket paalacanto sadiay: apayapay nga maulilaacto cadacayo a dua iti maysa nga aldaw?

46 Ket ni Rebeca kinunana ken Isaac, Maumaac iti biagco maipuon cadagiti annac a babbai ni Heth: no ni Jacob mangasawa cadagiti annac a babbai ni Heth, cas cadagitoy annac a babbai a taga ditoy a daga, ania pay laeng ti nasayaat nga aramiden toy biagco?

CAPITULO 28

1 Ket ni Isaac inayabanna ni Jacob, ket binendicionanna, ken binilinna, ken kinunana kencuana, Dicanto makiasawa cadagiti annac a babbai ti Canaan.

2 Tumacderca, ket inca idiay Padan-aram, iti balay ni Bethuel nga ama ni inam; ket mangasawaca sadiay cadagiti annac a babbai ni Laban a cabsat a lalaki ni inam.

3 Ket ti Dios a Mannacabalin-amin bendicionannaca, ket pagbungaennaca, ket pagaduennaca, tapno sica agbalinca a bunggoy dagiti inilin-ili;

4 Ket itdenna kenca ti bendicion ni Abraham, sica, ken cadagiti putotmo a mairanud kenca; tapno tawidem ti daga a naggangannaetam, a ti Dios intedna ken Abraham.

5 Ket ni Isaac pinalubosanna ni Jacob: ket napan idiay Padan-aram ken Laban, anac ni Bethuel nga Sirio, a cabsat a lalaki ni Rebeca, nga ina ni Jacob ken ni Esau.

6 ś Idi ngarud nakita ni Esau nga ni Isaac binendicionanna ni Jacob, ken imbaonna sadiay Padan-aram, tapno mangasawa idiay; ken idi nga binendicionanna ket binilinna, a kinuna, Dicanto makiasawa cadagiti annac a babbai ti Canaan;

7 Ket iti casta ni Jacob nagtulnog cada amana ken inana, ken napan sadiay Padan-aram;

8 Ket idi nga ni Esau nakitana a dagiti annac a babbai ti Canaan saanda a nacaayayo ken Isaac nga amana;

9 Iti casta ni Esau napan ken Ismael, ket nangala ti nayon cadagiti assawana ni Mahaleth anac a babai ni Ismael nga anac ni Abraham, cabsat a babai ni Nabaioth, tapno agbalin nga asawana.

10 ś Ket ni Jacob pimmanaw sadi Beer-seba, ket napan nga agturong idiay Haran.

11 Ket nacatumpong iti maysa a disso, ket imyan sadiay, ta limneken ti init; ket nangala cadagiti batbato sadiay a disso, ket incabilna nga pungpunganna, ket nagidda sadiay tapno maturog.

12 Ket nagtagainep, ket adtoy ti maysa nga agdan naipatacder iti daga, ket ti murdongna tumocno sadi langit: ket adtoy dagiti an-angel ti Dios umul-ulida ken bumabbabada iti daydi agdan.

13 Ket, adtoy, ti APO nagtacder iti rabawna, ket kinunana, Siac ti APO Dios ni Abraham nga amam, ken ti Dios ni Isaac: ti daga nga nagiddaam, itdecto kenca, ken cadagiti caputotam;

14 Ket dagiti putotmo casdanto cadagiti taptapuc ti daga, ket agwarascanto iti laud, ken iti daya, ken iti amianan, ken iti abagatan: ket kenca ken ti putotmo aminto a famfamilia ditoy daga mabendicionanto.

15 Ket, adtoy, addaac kenca, ket aywanancanto iti uray sadino a papanam, ket isublicanto manen ditoy a daga; ta dicanto baybayan, agingga iti diac matungpal ti sinaoc kenca.

16 ś Ket ni Jacob nacariing iti turogna, ket kinunana, Pudno unay ti APO adda ditoy a disso; ket siac saanco nga ammo.

17 Ket nagbuteng, ket kinunana, Ania ketdin a nacaam-amac daytoy a disso! Daytoy ket awan sabali no di ti balay ti Dios, ket daytoy ti ruangan ti langit.

18 Ket ni Jacob bimmangon nga nasapa, ket innalana iti bato nga nagpungananna, ket pinatacderna a teddec, ket binuyatanna ti lana iti rabawna.

19 Ket pinanagananna iti nagan daydi a disso iti Bethel: ngem ti nagan dayta nga ili ket Luza idi unana.

20 Ket ni Jacob nagcari iti maysa a cari, ket kinunana, No ti Dios addanto coma caniac, ket saluadannacto iti daytoy dalan a papanac, ket iccannacto ti tinapay a taraonco, ken pagan-anay nga pagcawesco,

21 Tapno agsubliacto manen iti balay ni amac a sicacappia; iti casta ngarud ti APO isunto iti Diosco:

22 Daytoy ngarud a bato, a pinatacderco a teddec, isunto ti balay ti Dios: ken cadagiti amin nga itedmonto caniac itdecto nga awan duduana iti apagcapullo kenca.

CAPITULO 29

1 Idin ni Jacob nagtuloy iti dalanna, ket nacadanon iti daga dagiti tattao a taga daya.

2 Ket kimmita, ket adtoy maysa a bubon iti cataltalonan, ken, adtoy, tallo a pangen dagiti carcarnero agid-iddada iti sibayna; ta iti daydi a bubon iti nagpapainumanda cadagiti pangenda: ket adda idi maysa a dackel a bato iti ngarab ti bubon.

3 Ket ditoy dagiti panpangen naurnongda: ket ligsayenda idi ti bato nga adda iti ngarab ti bubon, ket painumenda dagiti carcarnero, sada isubli manen ti bato iti ngarab ti bubon iti sigud a lugarna.

4 Ket ni Jacob kinunana cadacuada, Cacabsatco, Tagaanocayo? Ket simmungbatda, Taga Haran cami.

5 Ket kinunana cadacuada, Am-ammoyo ni Laban nga anac ni Nacor? Ket kinunada, Am-ammomi.

6 Ket kinunana cadacuada, Naimbag iti casasaadna? Ket kinunada, Naimbag ti casasaadna: ket, adtoy, ni Raquel nga anacna a babai umay a cacuyogna dagiti carcarnero.

7 Ket kinunana, Adtoy, aldaw pay laeng, ket dipay met panagapon dagiti an-animal: painumenyo dagiti carcarnero, ket incayo ken ipaarab ida.

8 Ket kinunada, Dimi mabalin, aginggana nga isuamin dagiti pangpangen mapagtitiponda, ken agingga iti dida ligsayen ti bato iti ngarab ti bubon; calpasanna saminto painumen dagiti carcarnero.

9 ś Idinto a makisasao pay laeng cadacuada, ni Raquel immay agraman dagiti carcarnero ni amana: ta isu idi ti mangtaraken cadacuada.

10 Ket naaramid nga, idi nakita ni Jacob ni Raquel nga anac a babai ni Laban a cabsat ni inana, ken dagiti carcarnero ni Laban a cabsat a lalaki ni inana, ni Jacob immasideg, ket linigsayna ti bato iti ngarab ti bubon, ket pinainumna ti arban ni Laban a cabsat ni inana.

11 Ket ni Jacob inagcanna ni Raquel, ket impigsana ti timecna, ken nagsangit.

12 Ket ni Jacob imbagana ken Raquel nga isu ti cabsat ni amana, ken isu ti anac ni Rebeca: ket isu nagtaray a napan nagipadamag ken amana.

13 Ket naaramid nga, idi ni Laban nangegna dagiti damdamag maipapan ken Jacob nga anac ti cabsatna a babai, nagtaray a simmabat kencuana, ket inaracupna, ken inagcanna, ket insangpetna iti balayna. Ket sinaritana ken Laban isuamin dagitoy a banbanag.

14 Ket ni Laban kinunana kencuana, Agpayso unay a sica ti tulangco ken lasagco. Ket nakipagyan kencuana iti nacabulan.

15 ś Ket ni Laban kinunana ken Jacob, Gapu ta sica ti cabsatco, pagserviannac cadi nga awan tangdanmo? ibagam caniac, anianto ti cayatmo a tangdan?

16 Ket ni Laban adda idi dua nga annacna a babbai: ti nagan ti inauna Lea, ket ti nagan ti inaudi Raquel.

17 Ni Leah ket napungay dagiti matmatana; ngem ni Raquel naimnas ken nasayaat ti langana.

18 Ket ni Jacob inayatna ni Raquel; ket kinunana, Agserviacto kenca iti pito a tawen gapu ken Raquel nga anacmo a babai nga inaudi.

19 Ket ni Laban kinunana, Nasaysayaat nga isu itdec kenca, ngem iti itedco iti sabali a lalaki: makipagtaengca caniac.

20 Ket ni Jacob nagservi iti pito a tawen gapu ken Raquel; ket impapanna daytoy a bassit la nga aldaw, gapu ta isu ti ayan iti ayatna.

21 ś Ket ni Jacob kinunana ken Laban, Itedmo caniac ti asawac, ta dagiti al-aldawco nalpasen, tapno sumrecac kencuana.

22 Ket ni Laban inummongna amin nga lallaki idiay a disso, ket nagaramid iti padaya.

23 Ket calpasanna iti daydi a rabii, innalana ni Lea nga anacna a babai, ket inyegna kencuana; ket isu simrec kencuana.

24 Ket ni Laban intedna a tagabu ni Lea nga anacna ni Zilpa nga agpaay nga adipenna.

25 Ket naaramid, nga iti bigat, adtoy, ni met Lea: ket kinunana ken Laban, Ania daytoy nga inaramidmo caniac? saan aya a nagserviac kenca maigapu ken Raquel? ania ngarud ti gapuna nga sinicapannac?

26 Ni Laban simmungbat, Saan a maaramid iti casta ditoy lugarmi, nga ited nga umun-una ti inaudi ngem ti inauna.

27 Panungpalem pay ti lawasna, ket calpasanna itedminto kenca iti panagservim nga iservim caniac manen iti sabali a pito nga tawtawen.

28 Ket ni Jacob inaramidna a casta, ket tinungpalna ti lawasna: ket intedna kencuana ni Raquel nga anacna a babai nga asawaenna.

29 Ket ni Laban intedna ken Raquel nga anacna ni Bilha nga adipenna tapno agbalin nga tagabuna.

30 Ket simrec met ken ni Raquel, ket inayatna ni Raquel a nangnangrona ngem ni Lea, ket nagservi manen kencuana iti sabali a pito a tawtawen.

31 ś Ket idi ti APO nakitana nga ni Lea ket magurgura, linucatanna ti aanacanna: ngem ni Raquel ket lupes.

32 Ket ni Lea nagsicog, ken naganac iti maysa a lalaki, ket pinanagananna iti Ruben: ta kinunana, Kinaagpaysona ti APO nakitana ti lidayco; itatta ngarud ni asawac ayatennacto.

33 Ket nagsicog manen, ket naganac iti maysa a lalaki; ket kinunana, Gapu ta ti APO nangegna nga magurguraac, intedna pay manen caniac daytoy nga anac: ket inawaganna ti nagan a Simeon.

34 Ket nagsicog manen, ket naganac iti maysa a lalaki; ket kinunana, Ita itoy a daras ti asawac makitiponto caniac, ta inpasngayac ti tallo nga annac a lallaki: gapuna nga ti naganna naawagan ti Levi.

35 Ket nagsicog manen, ket naganac iti maysa a lalaki: ket kinunana, Itan a daras daydayawecto ti APO: gapuna inawaganna ti naganna a Juda; ket simmardengen a naganac.

CAPITULO 30

1 Ket idi ni Raquel nakitana nga di macaiyanac ken Jacob, ni Raquel inapalanna ni cabsatna a babai; ket kunana ken Jacob, Iccannac ti anac, ta no saan matayac.

2 Ket ni Jacob nacapungtot ken Raquel: ket kinunana, Siac aya ti sumucat iti Dios, nga isu ti nanglapped kenca iti bunga ti tianmo?

3 Ket kinunana, Adtoy ni adipenco nga Bilha, sumrecca kencuana; tapno aganacto iti baet dagiti tumtumengco tapno magun-odco met dagiti annac gapu kencuana.

4 Ket intedna kencuana ni Bilha nga adipenna tapno asawaenna: ket ni Jacob simrec kencuana.

5 Ket ni Bilha nagsicog, ket nangyanac ken Jacob iti maysa nga anac a lalaki.

6 Ket ni Raquel kinunana, ti Dios inocomnac, ken dinengngegna pay ti timecco, ket iniccannac iti maysa nga anac: gapuna pinanagananna iti Dan.

7 Ket ni Bilha nga adipen ni Raquel nagsicog manen, ket nangyanac ken Jacob ti maicadua nga anac a lalaki.

8 Ket ni Raquel kinunana, Cadagiti dackel a salisal nakisalisalac ken cabsatco a babai, ket inabacco: ket pinanagananna ti Nephtali.

9 Idi nadlaw ni Lea a simmardengen nga aganac, innalana ni Zilpa nga adipenna, ket intedna ken Jacob tapno asawaenna.

10 Ket ni Zilpa nga adipen ni Lea nangyanac ken Jacob iti maysa a lalaki.

11 Ket ni Lea kinunana, Maysa a bonggoy umay: ket pinanagananna iti Gad.

12 Ket ni Zilpa nga adipen ni Lea nangyanac ken Jacob iti maicaddua nga lalaki.

13 Ket ni Lea kinunana, Maragsacanac, ta dagiti annac nga babbai awagandacto ti nabendicionan: ket inawaganna ti naganna nga Aser.

14 ś Ket ni Ruben napan idi tiempo a panagani iti trigo, ket nasaracanna dagiti mandragoras cadagiti taltalon, ket insangpetna ida ken ni inana nga Lea. Idin ni Raquel kinunana ken Lea, Iccannac, dawatec kenca, dagiti mandragoras ni anacmo.

15 Ket isu simmungbat kencuana, Bassit pay laeng a banag ti panangalam idi ken asawac? ket alaem manen dagiti mandragoras ti anacco? Ket ni Raquel kinunana, Iti casta makicaiddanto kenca no rabii a gapu dagiti mandragoras ni anacmo.

16 Ket ni Jacob naggapu iti talon iti mumalem, ket ni Lea rimmuar nga simmabet kencuana, ket kinunana, Sumreccanto caniac; ta agpayso nga inabanganca cadagiti mandragoras ni anacco. Ket nakicaidda kencuana idi a rabii.

17 Ket ti Dios dinengngegna ni Lea, ket nagsicog, ket inyanacna ken Jacob iti maicalima nga anac a lalaki.

18 Ket ni Lea kinunana, Ti Dios intedna ti gunggonac, gapu ta intedco ti adipenco ken asawac: ket pinanagananna iti Isacar.

19 Ket ni Lea nagsicog manen, ket inyanacna ken Jacob iti maicanem nga anac a lalaki.

20 Ket ni Lea kinunana, Ti Dios iniccannac ti nasayaat a sab-ong; itan ni asawac makipagnaedto caniac, gapu ta inyanacac cadagiti innem nga annac a lallaki: ket pinanagananna iti Zabulon.

21 Ket iti calpasanna naganac ti maysa a babai, ket ninagananna iti Dina.

22 ś Ket ti Dios linagipna ni Raquel, ket ti Dios impangagna, ket linuctanna ti aanacanna.

23 Ket nagsicog, ket naganac iti lalaki; ket kinunana, ti Dios iniccatna ti pacaibabainac:

24 Ket pinanagananna iti Jose; a kinunana, Ti APO nayonannacto ti sabali nga anac a lalaki.

25 ś Ket naaramid nga, idi ni Raquel inyanacna ni Jose, ni Jacob kinunana ken Laban, Palubosannac, tapno mapanacon idiay lugarco, ken sadiay dagac.

26 Itedmo caniac dagiti assawac ken dagiti annacco, isuda nga nagserviac kenca, ket palubosannac: ta ammom ti panagservic nga inaramidco kenca.

27 Ket ni Laban simmungbat kencuana, Dawatec kenca, no ngarud nacasaracac iti parabur cadagiti matam, agurayca: ta naadalcon cadagiti napalabas a tiempo nga ti APO binendicionannac gapu kenca.

28 Ket kinunana, Ikeddengmo caniac ti gunggonam, ket siac itedconto.

29 Ket kinunana kencuana, Sica ammom no casano ti panagservic kenca, ket no casano dagiti an-animalmo nga adda caniac.

30 Ta bassit ti adda a cucuam sacbay nga immayac, ket itan immadu iti nawadwad; ket ti APO binendicionannaca manipud idi immayac: ket caanonto ngarud iti panagbannogco a maipaay met iti balayco?

31 Ket isu kinunana, Ania ti itedconto kenca? Ket ni Jacob kinunana, Awanto ti itedmo caniac: no aramidem daytoy a banag caniac, ipaarabconto ken bantayacto manen ti pangenmo:

32 Siac innacto cadagiti amin a pangpangenmo ita nga aldaw, tapno iccatecto sadiay amin nga labang ken turicturican nga an-animal, ken amin a kayumanggi cadagiti carcarnerom, ken dagiti labang ken turicturican cadagiti calcalding: ket dagitoy ti gunggonacto.

33 Ket ti calintegac agsungbatto caniac intono umay ti tiempo, nga ti aldaw umay maipapan ti gunggonac iti sangoanam: isuamin a saan a labang ken turicturican cadagiti calcalding, ken kayumanggi cadagiti carcarnero, no matumpongan caniac maibilangto a tinacawco.

34 Ket ni Laban kinunana, Adtoy, sapay coma ta casta cas iti panagsaom.

35 Ket inlasinna idi nga aldaw dagiti calcalding a lallaki a garitgaritan ken turicturican, ken amin a babbai a calcalding nga labang ken turicturican, ken amin nga adda purawpurawda, ken amin a kayumanggi cadagiti carcarnero, ket inyawatna ida dagiti ima dagiti annacna a lallaki.

36 Ket incabilna ti tallo nga aldaw a pagnaen iti nagbaetanda isu ken ni Jacob: ket ni Jacob pinaarabna dagiti natda nga pangpangen ni Laban.

37 ś Ket ni Jacob nangala cadagiti rawrawis ti alamo a naata, ken almendra ken castano; ket sinalapsapanna ida cadagiti puraw a garitgarit, inaramidna agingga ti puraw rimmuar cadagiti rawrawis.

38 Ket incabilna dagiti rawrawis nga sinalapsapanna ti sangoanan cadagiti liblibsong iti ayan a paginuman no umay dagiti pangpangen uminum, tapno agsicogda coma no umayda uminum.

39 Ket dagiti pangpangen nagsicogda iti sangoanan dagiti rawrawis, ket nangyanacda dagiti ar-arban nga garitgaritan, labang, ken turicturican.

40 Ket ni Jacob insinana dagiti ur-urbon a carnero, ket incabilna ti rupa dagiti pangpangen a maiturong ti garitgaritan, ken amin a kayumanggi iti pangen ni Laban; ket inlasinna dagiti pangpangenna met laeng, ket dina intipon iti pangen ni Laban.

41 Ket naaramid nga, idi dagiti napigpigsa iti pangen nagsicogda, ni Jacob incabilna dagiti rawrawis iti sango dagiti mata dagiti pangpangen iti ayan dagiti liblibsong, tapno agsicogda iti baet dagiti rawrawis.

42 Ngem no ti animal nacapuy, saanna nga incabil: iti casta dagiti nacapcapuy isuda idi ti cucua ni Laban, ket dagiti napigpigsa cucua idi ni Jacob.

43 Ket ti lalaki dimmackel iti casta unay, ket aduda idi dagiti an-animalna, ken ad-adipen nga babbai, ken ad-adipen nga lallaki, ken camcamello, ken as-asno.

CAPITULO 31

1 Ket nangegna dagiti sasao dagiti annac a lallaki ni Laban, a kunkunada, ni Jacob innalana amin a cucua ni amatayo; ket dagiti cucua idi ni amatayo isuda dagiti nacaigapuan daytoy a dayaw kencuana.

2 Ket ni Jacob nakitana ti rupa ni Laban, ket, adtoy, saanen a cas agparang kencuana a cas idi.

3 Ket ti APO kinunana ken Jacob, Agsublica iti daga dagiti dadackelmo, ken cadagiti cacabaggiam; ket siac addaacto kenca.

4 Ket ni Jacob nangbaon ken pinaayabanna da Raquel ken Lea idiay talon nga ayan dagiti pangpangenna,

5 Ket kinunana cadacuada, Siac makitac ti rupa ni amayo, nga saanen nga agparang caniac a cas idi damo; ngem ti Dios ni amac nakipagyan caniac.

6 Ket dacayo ammoyo nga iti amin a pigsac nagserviac ken amayo.

7 Ket ni amayo inallilawnac, ket sinuctanna ti tangdanco iti naminpulo a daras; ngem ti Dios dina impalubos kencuana nga agaramid ti dakes caniac.

8 No isu kinunana a castoy, Dagiti labang isudanto ti gungonam; iti casta dagiti pangpangen aganacda amin ti labang: ket no kinunana a castoy, Dagiti garitgaritan isudanto ti gunggonam; iti casta aganac amin idi dagiti pangpangen ti garitgaritan.

9 Iti castoy ti Dios iniccatna dagiti an-animal ni amayo, ket intedna caniac.

10 Ket naaramid nga iti tiempo ti panagsicog dagiti an-animal, intangadco dagiti matac, ket nakitac iti parmata, ket, adtoy, dagiti lallaki nga kimmalay-at dagiti babbai ket garitgaritan, labang, ken turicturican.

11 Ket ti angel ti Dios kinunana caniac iti tagtagainep, a kinunana, Jacob: Ket kinunac, Adtoyac.

12 Ket kinunana, Itangadmo ita dagiti matam, ket kitaem, amin a dagiti lallaki nga kumalay-at cadagiti babbai isuda garitgaritan, labang, ken turicturican: ta siac nakitac amin nga inar-aramid ni Laban kenca.

13 Siac iti Dios ti Bethel, isu a nanglanaam iti bato, ken nagcariam iti cari caniac: ita tumacderca, ket pumanawca ditoy a daga, ken agsublica iti daga dagiti cacabaggiam.

14 Ket ni Raquel ken ni Lea simmungbatda ket kinunada kencuana, Adda pay la ngata bingaymi wenno tawidmi idiay balay ni amami?

15 Saancami cadi a maibilang kencuana a gangannaet? ta inlaconacami, ket naminpinsan a pinucawna pay amin a piracmi.

16 Ta amin dagiti kinabacnang nga iniccat ti Dios ken amami, isuda dagiti cucuami, ken cucua dagiti annacmi: ita ngarud, aniaman nga sinao ti Dios kenca, aramidem.

17 ś Idin ni Jacob timmacder, ket insacayna dagiti annacna ken dagiti assawana cadagiti camcamello;

18 Ket intalawna amin dagiti an-animalna, ken amin a cucuana nga naurnongna, dagiti an-animal a nagun-odna, nga naummongna idiay Padan-aram, tapno mapan ken Isaac nga amana idiay daga a Canaan.

19 Ket ni Laban napan idi nagpukis dagiti carnerona: ket ni Raquel tinacawna dagiti ladladawan a cucua ni amana.

20 Ket ni Jacob naglibas ken Laban a Sirio, a gapu iti dina panangipacaammo kencuana iti ipapanawna.

21 Iti casta nagtalaw idi agraman amin nga adda kencuana; ket timmacder, ket bimmallasiw iti carayan, ket inturongna ti rupana idiay bantay Galaad.

22 Ket naipadamag ken Laban iti maicatlo nga aldaw nga ni Jacob ket timmalaw.

23 Ket innalana dagiti cacabsatna a cadduana, ket kinamatda isuna ti pito nga aldaw nga pannagna; ket nacamacamda isuna idiay bantay ti Galaad.

24 Ket ti Dios immay ken Laban a taga Siria iti maysa a tagainep ti rabii, ket kinunana kencuana, Agaluadca ta dica agsao ken Jacob iti naimbag wenno dakes.

25śKet ni Laban nacamacamna ni Jacob. Itan ni Jacob imbangonna ti sapawna sadiay bantay: ket ni Laban ken dagiti cacabsatna nagsardengda idiay bantay ti Galaad.

26 Ket ni Laban kinunana ken Jacob, Ania ti inaramidmo, ta linibasannac, ket intalawmo dagiti annacco a babbai, a casda natiliw a balud ti campilan?

27 Apayapay a pimmanawca a nalimed, ket linibasannac; ket dica inbagbaga caniac, ta pinalubosanca coma a siraragsac, ken nacancantaan, ken natamtamboran, ken naharharpaan?

28 Ket dica impalubos nga impaagep caniac dagiti annacco a lallaki ken babbai? ita nagaramidcan ti kinanengneng gapu itoy nga inaramidmo.

29 Adda ti pannacabalin iti imac nga mangranggas kenca: ngem ti Dios ni amam sinaona caniac idi rabii, a kinunana, Agaluadca ta dica agsao ken Jacob iti naimbag wenno dakes.

30 Ket ita, nupay no cayatmo ti mapanen, gapu ta mailiwca unay iti balay ni amam, apayapay ngarud a tinacawmo dagiti didiosco?

31 Ket ni Jacob simmungbat ken Laban ket kinunana, Gapu ta agbutengac idi: ta kinunac, Amangan la ket no alaem nga piliten dagiti annacmo nga babbai caniac.

32 Iti siasinoman a pacasaracan cadagita didiosmo, saanto nga agbiag: iti sango dagiti cacabsatta lasinem ti cucuam nga adda caniac, ket alaem. Ta ni Jacob saanna nga ammo a ni Raquel tinacawna ida.

33 Ket ni Laban simrec iti sapaw ni Jacob, ken iti sapaw ni Lea, ken iti sapaw dagiti dua nga ad-adipen; ngem awanda a nasaracanna. Ket rimmuar iti sapaw ni Lea, ket simrec iti sapaw ni Raquel.

34 Itan ni Raquel innalana idi dagiti didios, ket incabilna ida iti pasanga ti camello, ket nagtugawanna ida. Ket ni Laban sinukimatna amin ti uneg ti sapaw, ngem dina ida nasaracan.

35 Ket kinunana ken amana, Saan coma nga agunget ni apoc ta indiac macatacder iti sangoanam; ta ti caugalian dagiti babbai ket madama caniac. Ket nagsukimat, ngem dina nasaracan dagiti didiosen.

36śKet ni Jacob nagpungtot, ket binabalawna ni Laban: ket ni Jacob simmungbat ket kinunana ken Laban, Ania ti salungasingco? ania ti basolco, nga sipupudotca nga nangcamcamat caniac?

37 Iyantangay sinukimatmo dagiti amin a cucuac, ania ti nasaracam nga cucua ti balaymo? icabilmo iti sango dagiti cacabsatco ken cacabsatmo, tapno ocomendata nga agpadpada.

38 Cadagitoy duapulo a tawen nga nakipagyanac kenca; dagiti carcarnero ken calcaldingmo a babbai saanda a naalisan, ket dagiti lallaki dagiti pangpangenmo diac nagsidsida.

39 Ti pinatay dagiti narungsot nga animal diac indatag kenca, siac ti naglac-am ti pucaw; cadagiti imac sinapulmo ida, natacawda man ti aldaw, wenno natacawda iti rabii.

40 Castaac idi; iti aldaw magagaraac iti pannacawaw, ken ti lamiis ti linnaaw iti rabii; ket ti turogco pimmanawda cadagiti matmatac.

41 Castaac cadagiti duapulo a tawen iti caaddac ti balaymo; nagserviac kenca ti sangapulo ket uppat a tawen gapu cadagiti dua nga annacmo a babbai, ken innem a tawen gapu cadagiti an-animalmo: ket binaliwam ti tangdanco iti naminpulo.

42 No ti Dios ni amac, ti Dios ni Abraham, ken ti buteng ni Isaac, awan coma nga nangcaddua caniac, kinaagpaysona pinapanawnac coman nga ima-ima. Ti Dios nakitana ti rigatco ken ti bannog dagiti im-imac, ket tinubngarnaca idi rabii.

43 ś Ket ni Laban simmungbat ket kinunana ken Jacob, Dagitoy nga annac a babbai annacco ida, ken dagitoy nga ub-ubbing ub-ubbingco ida, ken dagitoy ar-arban ar-arbanco ida, ken amin nga makitam cucuac: ket ania ti mabalinco nga aramiden ita nga aldaw cadagitoy nga annacco nga babbai, wenno cadagiti ub-ubbing nga impasngayda?

44 Ita umayca ngarud, mangaramidta ti tulag, siac ken sica; ket daytoy agservi coma a pammanecnec cadata a dua.

45 Ket ni Jacob nangala ti maysa a bato, ket binangonna a teddec.

46 Ket ni Jacob kinunana cadagiti cacabsatna, Mangurnongcayo cadagiti batbato; ket nangalada cadagiti batbato, ket inaramidda a bunton: ket nanganda sadiay iti abay ti bunton.

47 Ket ni Laban pinanagananna iti Jegar-sahadutha: ngem ni Jacob ninagananna iti Galaad.

48 Ket ni Laban kinunana, Daytoy a bunton isu ita ti pammanecnec cadata nga dua iti daytoy a aldaw. Gapuna a napanaganan iti Galaad;

49 Ken Mizpa; ta kinunana, Ti APO sisisiput iti nagbaetanta, no masina ti maysa ken maysa cadata.

50 No paldaangem dagiti annacco a babbai, wenno no mangalaca pay iti sabali nga assawa malacsid cadagiti annacco a babbai, awan tao nga adda cadata; kitaem, ti Dios ti mammanecnec ti nagbaetanta nga dua.

5 Ket ni Laban kinunana ken Jacob, Adtoy ti bunton, ken adtoy ti teddec, a binangonco iti nagbaetan caniac ken iti sica;

52 Daytoy a bunton pagpanecnec coma, ken daytoy teddec pagpanecnec coma, a diacto labsan itoy a bunton, ken dicanto met labsan daytoy a bunton ken teddec, nga umay mangranggas iti maysa ken maysa.

53 Ti Dios ni Abraham, ken ti Dios ni Nacor, ti Dios dagiti ammada, ocomennata coma. Ket ni Jacob nagsapata gapu iti buteng ni Isaac nga amana.

54 Idin ni Jacob nangidaton ti daton idiay bantay, ket inayabanna dagiti cacabsatna tapno manganda iti tinapay: ket nanganda, ken imyanda idiay bantay.

55 Ket iti nasapa a bigat ni Laban bimmangon, ket inagcanna dagiti annacna a lallaki ken babbai, ken binendicionanna ida: ket ni Laban nagluas, ket nagsubli iti taengna.

CAPITULO 32

1 Ket ni Jacob nagtuloy iti dalanna, ket dagiti an-angel ti Dios simmabetda kencuana.

2 Ket idi nakita ni Jacob ida, kinunana, Dagitoy isuda dagiti buybuyot iti Dios: ket pinanagananna iti disso ti Mahanaim.

3 Ket ni Jacob nangibaon dagiti immun-una nga napan ken Esau a cabsatna diay sacup ti Seir, ti daga ni Edom.

4 Ket binilinna ida, a kinunana, Castoy iti saoenyonto ken apoc nga Esau; Toy adipenmo ni Jacob kunana kenca, Nakicabbalayac ken Laban, ken nakipagtaengac kencuana agpapan ita:

5 Ket adda bacbacac, ken as-asno, pangpangen, ken ad-adipen nga lallaki, ken ad-adipen nga babbai: ket nagbaonac tapno paibagac ken apoc, tapno masaracac ti parabur iti imatangmo.

6 Ket dagiti naibaon nagsublida ken Jacob, a kinunanada, Nacagtengcami ken cabsatmo nga Esau, ket um-umay payen a sumabet kencan, ken dagiti uppat nga gasut a lallaki a cacucogna.

7 Iti casta ni Jacob immapay iti nagdackel nga buteng ken danagna: ket biningayna dagiti tattao nga cadduana, ken dagiti carcarnero, ken pangpangen, ken dagiti camcamello, iti dua a bonggoy;

8 Ket kinunana, No ni Esau umay iti umuna a bonggoy, ket cabilenna, daydiayto ngarud sabali a bonggoy nga matda macatalawto.

9 ś Ket ni Jacob kinunana, O Dios ni amac nga Abraham, ken Dios ni amac nga Isaac, ti APO a nagcuna caniac, Agsublica idiay dagam, ken cadagiti cacabaggiam, ket aramidecto ti naimbag kenca:

10 Diac maicari iti cabassitan cadagiti amin a kinamanangaasi, ken iti amin a kinapudno, nga inaramidmo nga impaay itoy adipenmo; ta iti la sarucodco ti kinadduac idi naglasatac ditoy Jordan; ket ita nagbalinacon nga dua a bonggoy.

11 Isalacannac, dawatec kenca, manipud iti ima ni cabsatco, manipud iti ima ni Esau: ta cabutengco isuna, di la ket ta umay ket sugatennac, ken ti ina ken agraman dagiti annac.

12 Ket sica sinaom, Siac ti awan duduana nga mangpaimbag kenca, ken aramidecto a ti putotmo casla darat ti baybay, a di mabilang gapu iti caaduda.

13 ś Ket imyan sadiay iti daydi a rabii; ket nangala cadagiti cucuana ti sagut nga ipaayna ken Esau nga cabsatna;

14 Duagasut a calcalding a babbai, ken duapulo a calcalding a lallaki, duagasut a carcarnero a babbai, ken duapulo a carcarnero a lallaki.

15 Tallopulo nga agpasuso a camcamello agraman ur-urbonda, uppat a pulo a bacbaca a babbai, ken sangapulo a bacbaca a lallaki, duapulo nga as-asno a babbai, ken sangapulo nga ur-urbonda.

16 Ket inyawatna ida cadagiti im-ima dagiti ad-adipenna, tunggal pangen a nailasin; ket kinunana cadagiti ad-adipenna, Labsan ken una-andac, ket iccanyo ti pagbabaetan ti tumunggal pangen.

17 Ket binilinna iti umuna, a kinunana, Intono ni Esau nga cabsatco masabatnaca, ket saludsudenna kenca, a kunana, Siasino ti akincucua kenca? ket adino ti papanam? ken siasino ti akincucua cadagitoy nga adda iti malicudam?

18 Iti casta cunaemto, Cucua ni adipenmo a Jacob; isu ti maysa a sagut nga impaoitna para ken apoc nga Esau: ken, adtoy, isu sumarsaruno met cadacami.

19 Ket binilinna met ti maicaddua, casta met ti maicatlo, ken amin nga sumarsaruno a pangpangen, a kinunana, Castanto ti saoenyo ken ni Esau, no masaracanyo.

20 Ket cunayonto pay, Adtoy, ni adipenmo nga Jacob adda a sumarsaruno cadacami. Ta kinunana, Makipagcappiaacto cadagiti sagut nga mapan nga umun-una ngem siac, ket calpasanna makitacto ti rupana; nalabit isu awatennacto.

21 Ket immun-una dagiti sagut ngem isu: ket isu met laeng imyan iti daydi a rabii cadagiti pacarso.

22 Ket bimmangon iti daydi a rabii, ket innalana dagiti dua nga assawana, ken dagiti dua nga ad-adipenna a babbai, ken dagiti sangapulo ket maysa nga annacna, ket naglasat ken bimmallasiw ti waig Jaboc.

23 Ket innalana ida, ken impalasatna ida iti waig, ken impalasatna dagiti adda a cucuana.

24 ś Ket ni Jacob nabati a maymaysa; ket didiay nakigabbo ti maysa a lalaki kencuana aginggana nagbannawag ti aldaw.

25 Ket idi makitana a dina magawayan, sinagidna ti padingpadingna; ket ti padingpading ni Jacob nasulnot, idi nga makigubgubal kencuana.

26 Ket kinunana, Palubosannacon, ta aglawagen. Ket kinunana, Saancanto a palubosan, malacsid no bendicionannac.

27 Ket isu kinunana kencuana, Ania ti naganmo? Ket kinunana, Jacob.

28 Ket isu kinunana, Ti naganmo saanto a maawaganen ti Jacob, no di ket Israel: ta cas maysa a principe nga adda pannacabalinmo iti Dios ken cadagiti tattao, ket nangabacca.

29 Idin ni Jacob sinaludsodna kencuana, ket kinunana, Ibagam caniac, dawatec kenca, ti naganmo. Ket isu kinunana, Apay a saludsodem ti naganco? Ket binendicionanna isuna sadiay.

30 Ket ni Jacob pinanagananna daydi a disso iti Fanuel: ta nakitac ti Dios iti rupanrupa, ket ti biagco naisalacan.

31 Ket idi lablabsanna ti Peniel ti init rimmuar agpapan kencuana, ket impilpilayna ti padingpadingna.

32 Gapu itoy dagiti annac ti Israel saanda a mangan iti piskel a bimmassit, ti nagsimpaan ti padingpading, agpapan iti daytoy nga aldaw: gapu ta sinagidna ti nagsimpaan ti padingpading ni Jacob iti piskel a bimmassit.

CAPITULO 33

1 Ket ni Jacob intangadna dagiti matana, ken kimmita, ket, adtoy, sumungad ni Esau, a cadduana dagiti uppat a gasut nga lallaki. Ket biningaybingayna dagiti ubbing cada Lea, ken ni Raquel, ken cadagiti dua nga ad-adipen nga babbai.

2 Ket incabilna dagiti ad-adipen a babbai ken dagiti annacda nga inyun-una, sa simmaruno ni Lea ken dagiti annacna, ket da Raquel ken Jose dagiti naud-udi.

3 Ket isu met laeng linabasanna ida, ket nagrucnoy iti daga iti naminpito a daras, agingga ti nacaadani iti ayan ni cabsatna.

4 Ket ni Esau nagtaray a simmabat kencuana, ket inaracupna, ken inapungolna ti tengngedna, ket inagcanna: ket nagsangitda.

5 Ket intangadna dagiti matana, ket nakitana dagiti babbai ken dagiti ubbing; ket kinunana, Asinoda dagitoy nga adda kenca? Ket kinunana, Isuda dagiti annac nga inted ti Dios nga sipaparabur toy adipenmo.

6 Idin dagiti ad-adipen nga babbai immasidegda, isuda ken dagiti annacda, ket nagtamedda.

7 Ket ni Lea ken dagiti annacna immasidegda met, ken nagtamedda: iti calpasanna immasideg ni Jose ken ni Raquel, ket nagtamedda.

8 Ket kinunana, Ania ti cayatna a saoen dagitoy amin nga bonggoy a nasabetco? Ket kinunana, Dagitoy tapno masaracac ti parabur cadagiti mata ni apoc.

9 Ket ni Esau kinunana, Adda umanay caniacon, cabsatco; salimetmetam la kenca dagiti cucuam.

10 Ket ni Jacob kinunana, Saan, dawatec kenca, no ita nasaracac ti parabur iti matam, awatem ngarud ti sagutco iti imac: iyantangay nakitac ti rupam, a cas iti macakita iti rupa ti Dios, ket naay-ayoca caniac.

11 Awatem, dawatec kenca, ti pamendicionco a maiyeg kenca; gapu ta ti Dios pinaraburannac, ken gapu ta umanay ti adda caniac. Ket inrupirna kencuana, ket isu inawatna.

12 Ket kinunana, Magnatan iti dalantan, ken intan, ket agyanacto iti masangoanam.

13 Ket kinunana kencuana, Ni apoc ammona a dagiti ubbing naganusda, ken dagiti pangpangen ken ar-arban nga adda babassit a tagibianda adda caniac: ket dagiti lallaki no ipagnada ida iti nalabes iti maysa nga aldaw, amin nga pangpangen matayda.

14 Ituloc coma ni apoc, idawatco, ta aglasat coma nga umun-una ngem ti adipenna: ket siac agturongacto iti nainayad, a cas cadagiti an-animal nga makipagna caniac ken dagiti ubbing iti cabaelanda, aginggana iti macadanonac ken apoc idiay Seir.

15 Ket ni Esau kinunana, Itulocmo ngarud ita nga ibatic kenca dagiti dadduma cadagiti tattao nga adda caniac. Ket kinunana, Ania ti pacasapulanna? macasaracac coma iti parabur cadagiti mata ni apoc.

16 ś Iti casta ni Esau nagsubli iti daydi nga aldaw iti dalanna a mapan idiay Seir.

17 Ket ni Jacob napan idiay Succoth, ket namangon idiay a maipaay kencuana iti maysa a balay, ken nagaramid cadagiti sapsapaw a maipaay cadagiti an-animalna: gapuna ti nagan daydi a disso ket Succoth.

18 ś Ket ni Jacob dimmanon didiay Salem, nga ili ti Siquem, nga adda iti daga a Canaan, idi naggapu iti Padan-aram; ket nagsapaw iti sango ti ili.

19 Ket ginatangna ti sanganayon a daga, a namangonanna iti sapawna, iti ima dagiti annac ni Jamor, nga ama ni Siquem, ti sangagasut a bagi ti pirac.

20 Ket namangon sadiay iti maysa nga altar, ket pinanagananna iti El-elohe-Israel.

CAPITULO 34

1 Ket ni Dina nga anac a babai ni Lea, nga impasngayna ken Jacob, rimmuar a cumita cadagiti annac nga babbai ti daga.

2 Ket idi ni Siquem nga anac a lalaki ni Hamor a Heveo, pangulo ti daga, nakitana ti babai, ket innalana, ken kinaiddana, ket tinulawanna isuna.

3 Ket ti cararruana dimmecket ken Dina nga anac a babai ni Jacob, ket inayatna ti balasang, ket nakisao a siaayat iti balasang.

4 Ket ni Siquem kinasaona ni amana nga Hamor, a kinunana, Alaem daytoy a balasang tapno asawaec.

5 Ket ni Jacob nangegna nga tinulawanna ni Dina nga balasangna: ita dagiti annacna a lallaki addada cadagiti an-animalna idiay away: ket ni Jacob nagulimec inggana iti isasangpetda.

6 ś Ket ni Hamor ti ama ni Siquem napan ken Jacob tapno makisarita kencuana.

7 Ket dagiti annac a lallaki ni Jacob rimmuarda iti away idi nangegda: ket dagiti lallaki napasaemda, ket nacapungtotda unay, gapu ta nagaramid ti linalaad ti Israel iti panangkaiddana iti balasang ni Jacob; isu a banag nga dina rebbeng coma nga maaramid.

8 Ket ni Hamor nakisao cadacuada, ket kinunana, Ti cararrua ti anacco a Siquem agrayrayo a maipaay ti anacyo a babai: dawatec cadacayo nga itedyo kencuana tapno asawaenna.

9 Ket makiabalayancayo cadacami, itedyo dagiti annacyo a babbai cadacami, ket alaenyo met dagiti annacmi a babbai a maipaay cadacayo.

10 Ket makipagnaedcayto cadacami: ket ti daga addanto ti sangoyo; iti daytoy agyancayo ken agsapulcayo, ket pangalaanyonto dagiti tagicuaenyo.

11 Ket ni Siquem kinunana iti ama ti balasang ken cadagiti cacabsatna, Macasaracac coma ti parabur cadagiti matmatayo, ket no ania ti ibagayo caniac itedconto.

12 Dawatenyo uray ania nga caadu iti sab-ong ken sagut, ket itdecto ti ibagayo caniac: ngem ketdi itedyo ti balasang tapno asawaec.

13 Ket dagiti annac a lallaki ni Jacob simmungbatda ken Siquem ken ni Hamor nga amana babaen ti panangallilaw, ket sinaoda, gapu ta tinulawanna ni Dina a cabsatda a babai:

14 Ket kinunada cadacuada, Dicami mabalin nga aramiden daytoy, nga itedmi ti cabsatmi iti lalaki a di nacugit; ta dayta ket maysa a lais cadacami:

15 Ngem iti daytoy nga pagayatan umannugot caminto cadacayo: No dacayo cascayonto cadacami, nga amin a lallakiyo macugitto;

16 Isunton ti panangitedmi dagiti annacmi a babbai cadacayo, ket alaenminto met cadagiti annacyo a babbai cadacami, ket makipagnaedcamto cadacayo, ken agmaymaysatayto nga ili.

17 Ngem no didacam ipangag, a macugitcayto; alaenminto ngarud ti anacmi a babai, ket calpasanna pumanawcaminto.

18 Ket dagiti sasaoda nacaay-ayoda cada Hamor, ken ni Siquem nga anac ni Hamor.

19 Ket saan nga inbaybayag ti baro ti nagaramid iti daydi, ta nagay-ayatanna ti anac a babai ni Jacob: ket isu idi ti cadayawan unay iti balay ni amana.

20 ś Ket ni Hamor ken Siquem nga anacna immayda iti ruangan ti ilida, ket nakisaoda cadagiti lallaki ti ilida, a kinunada,

21 Dagitoy a lallaki natacnengda cadatayo; iti casta palubosanyo ida nga agnaed iti daga, ken agsapul ditoy; ta toy daga, adtoy, nalawa a maipaay cadacuada; alaentayo coma dagiti annacda a babbai nga asawaentayo, castamet itedtayo cadacuada dagiti annactayo a babbai.

22 Gapu laeng itoy dagiti lallaki umannugotdanto nga makipagnaed cadatayo, nga agbalin a maymaysa nga ili, no amin la ket a lallakitayo ket macugitto, cas iti pannacacugitda.

23 Saan cadi aya a dagiti bacbacada ken cucuada ken an-animalda cucuatayto ida? umannugottayo laeng cadacuada, ket makipagyandanto cadatayo.

24 Ket ni Hamor ken ni Siquem nga anacna impangagda isuda amin nga rimmuar iti ruangan iti ilina; ket isuamin nga lallaki nacugitda, amin cadagiti rimmuar iti ruangan ti ilina.

25 ś Ket calpasanna iti maicatlo nga aldaw, idi sisasakitda, dua cadagiti annac ni Jacob, da Simeon ken ni Levi, cacabsat ni Dina, innala ti tunggal maysa cadacuada ti campilanna, ket napanda rinaut ti ili nga situtured, ket pinatayda amin dagiti lallaki.

26 Ket pinatayda ni Hamor ken ni Siquem nga anacna iti tadem ti campilan, ket innalada ni Dina iti balay ni Siquem, ket sada rimmuar.

27 Dagiti annac ni Jacob napanda cadagiti pinapatayda, ket sinamsamda ti ili, gapu ta tinulawanda idi ti cabsatda a babai.

28 Innalada dagiti carcarneroda, ken dagiti bacbacada, ken dagiti as-asnoda, ken dagiti adda iti ili, ken dagiti adda idi iti talon,

29 Ken amin a sanicuada, ken amin dagiti babassit nga annacda, ken dagiti assawada innalada ida a tiniliw, ket sinamsamda amin nga adda idi iti balay.

30 Ket ni Jacob kinunana ken Simeon ken ni Levi, Dacayo riniribucdac ta pinagbalindac a macarurod cadagiti agnaed ditoy a daga, cadagiti Cananeo ken Ferezeo: ket siac idinto a bassit ti tattaoc, agtitipondanto a bumusor caniac, ken patayendac; ket siac mapucawacto, siac ken ti balayco.

31 Ket isuda kinunada, Pagbalinennanto aya ni cabsatmi a babai a cas maysa a balangcantis?

CAPITULO 35

1 Ket ti Dios kinunana ken Jacob, Tumacderca, inca idiay Bethel, ket agnaedca sadiay: ket mangaramidca sadiay iti maysa nga altar a maipaay iti Dios, a nagparang kenca idi nagtalawca iti sangoanan ni Esau a cabsatmo.

2 Idin ni Jacob kinunana cadagiti cabbalayna, ken cadagiti amin a nakipaggian kencuana, Iwagsacyo dagiti sabsabali a didiosen nga adda cadacayo, ket agdaluscayo, ken sucatanyo dagiti pagan-anayyo:

3 Ket tumacdertayo, ket sumang-attayo idiay Bethel; ket mangaramidacto sadiay iti altar a maipaay iti Dios, a nangsungbat caniac iti aldaw ti panaglagawco, ket kinadcadduanac iti dalan a nagnagnaac.

4 Ket intedda ken ni Jacob amin dagiti sabsabali a didiosen nga adda idi cadagiti biangda, ken amin nga ar-aritos nga adda cadagiti laplapayagda; ket ni Jacob inlemmengna ida iti siroc ti cayo a lugo nga adda iti asideg ti Siquem.

5 Ket nagnagnada: ket ti panagamac iti Dios adda idi cadagiti il-ili iti lawlawda, ket dagitoy saanda a sinurot a kinamat dagiti annac a lallaki ni Jacob.

6 ś Ket ni Jacob dimteng idiay Luza, nga adda iti daga a Canaan, nga daytoy, isu ti Bethel, isu ken amin a tattao nga adda idi a kinacuyogna.

7 Ket namangon sadiay iti maysa nga altar, ket ninagananna daydi a disso ti El-beth-el: gapu ta idiay ti Dios nagparang kencuana, idi a tinalawanna ti sangoanan ni cabsatna.

8 Ket ni Debora nga agaywan ken ni Rebecca natay, ket naitabon iti ruar ti Bethel iti siroc ti maysa a lugo: ket ti naganna ket inawaganda iti Allon-bacuth.

9 ś Ket ti Dios nagparang ken Jacob manen, idi naggapu idiay Padan-aram, ket binendicionanna.

10 Ket ti Dios kinunana kencuana, Ti naganmo Jacob: ta naganmo saanen nga maawagan nga Jacob, ngem ita Israel ti naganmon: ket inawaganna ti naganna Israel.

11 Ket ti Dios kinunana kencuana, Siac ti Dios a Mannacabalin-amin: agbungaca ken umaduca; maysa a nacion ken maysa a bonggoy dagiti nasnacion agtauddanto kenca, ken ar-ari agtauddanto cadagiti pus-ongmo;

12 Ket ti daga nga intedco ken Abraham ken Isaac, itdecto kenca, ken cadagiti putotmo iti calpasam itdecto iti daga.

13 Ket ti Dios immuli nanipud iti disso a nakisasaoanna kencuana.

14 Ket ni Jacob namatacder iti maysa a teddec iti disso a nakisaoanna kencuana, maysa a teddec a bato: ket binuyatanna ti daton nga inumen ti rabawna, ken binuyatanna ti lana ti rabawna.

15 Ket ni Jacob pinanagananna daydi a disso nga nakisaoan iti Dios kencuana, iti Bethel.

16 ś Ket pimmanawda sadi Bethel; idi adda pay laeng bassit a dalan sacbay nga dumanonda iti Efrata: ni Raquel nagpasical, ket nagparigat iti panagpasngayna.

17 Ket iti calpasan, idi nagparigat iti panagpasngayna, a ti mangngilot kinunana kencuana, Dica agbuteng; ta addanto kenca iti maysa pay nga anac a lalaki.

18 Ket iti calpasanna, nga idi ti cararruana agwaywayawayen, (ta isu natay) inawaganna ti naganna Ben-oni: ngem ni amana ninagananna iti Benjamin.

19 Ket ni Raquel natay, ket naitabon iti dalan sadiay Efrata, nga isu daytoy ti Bethlehem.

20 Ket ni Jacob namatacder iti maysa a teddec iti rabaw ti tanemna: daytoy ti teddec ti tanem ni Raquel agpapan ita.

21 ś Ket ni Israel pimmanaw, ket inucradna ti sapawna iti labes ti torre ni Edar.

22 Ket naaramid a, idi ni Israel nagnaed sadiay a daga, ni Ruben napan ket kinaiddana ni Bilha a cabbalay ni amana: ket ni Israel naammoanna. Ita dagiti annac a lallaki ni Jacob ket sangapulo ket dua:

23 Dagiti annac a lallaki ni Lea; Ruben, inauna nga anac ni Jacob, ken Simeon, ken Levi, ken Juda, ken Issachar, ken ni Zabulon:

24 Dagiti annac a lallaki ni Raquel; Jose, ken Benjamin:

25 Ken dagiti annac a lallaki ni Bilha, adipen ni Raquel; Dan, ken Nephtali:

26 Ken dagiti annac a lallaki ni Zelfa, nga adipen ni Lea; Gad, ken Aser: dagitoy dagiti annac a lallaki ni Jacob, a nayanacda kencuana idiay Padan-aram.

27 ś Ket ni Jacob immay ken Isaac nga amana idiay Mamre, idiay ili nga Arbee, isu ti Hebron, nga da Abraham ken Isaac nagnaedanda.

28 Ket dagiti al-aldaw ni Isaac ket sangagasut ken walopulo a tawtawen.

29 Ket ni Isaac inyawatna ti cararruana, ket natay, ket naitipon iti ayan dagiti capuonanna, nga lacayen ken napnapnec iti al-aldaw: ket dagiti annacna nga lallaki a da Esau ken Jacob intabonda isuna.

CAPITULO 36

1 Dagitoy dagiti capcaputotan ni Esau, nga isu ti Edom.

2 Ni Esau innalana dagiti assawana cadagiti annac a babbai ti Canaan; ni Ada anac a babai ni Elon a Hetheo, ken ni Aholibama anac a babai ni Ana nga anac a babai ni Zibeon a Heveo;

3 Ken ni Bashemath, anac a babai ni Ismael, cabsat ni Navaioth.

4 Ket ni Ada inyanacna ken Esau ni Eliphaz; ket ni Bashemath inyanacna ni Reuel;

5 Ket ni Aholibama inyanacna ni Jeus, ken ni Jaalam, ken ni Cora: dagitoy dagiti annac a lallaki ni Esau, a nayanac kencuana sadiay daga a Canaan.

6 Ket ni Esau innalana dagiti assawana, ken dagiti annacna a lallaki, ken annacna a babbai, ken amin a tattao ti balayna, ken dagiti bacbacana, ken amin a an-animalna, ken amin a cucuana, a nasapsapulanna idiay daga a Canaan; ket napan iti maysa a daga nga adayu ken Jacob a cabsatna.

7 Ta dagiti cucuada ket nagadu a dida mabalin nga agtipon ti paggianan; ket ti daga a naggangannaetanda saan a macaanay a gapu cadagiti bacbacada.

8 Iti casta ni Esau nagnaed idiay bantay Seir: ni Esau isu ti Edom.

9 ś Ket dagitoy dagiti capcaputotan ni Esau nga ama dagiti Edomitas idiay bantay a Seir:

10 Dagitoy dagiti nagnagan dagiti annac a lallaki ni Esau; Eliphaz anac ni Ada nga asawa ni Esau, ni Reuel anac ni Basemath nga asawa ni Esau.

11 Ket dagiti annac a lallaki ni Eliphaz isuda idi da Teman, Omar, Zepho, ni Gatam, ken ni Cenaz.

12 Ket ni Timna cabbalay idi ni Eliphaz nga anac a lalaki ni Esau; ket inyanacna ken Eliphaz ni Amalek: dagitoy dagiti annac a lallaki ni Ada nga asawa ni Esau.

13 Ket dagitoy dagiti annac a lallaki ni Reuel; Nahath, ni Zera, Samma, ken ni Mizza: dagitoy isuda dagiti annac a lallaki ni Basemath nga asawa ni Esau.

14 ś Ket dagitoy dagiti annac a lallaki ni Aholibama, nga anac a babai ni Ana nga anac a babai ni Zibeon, nga asawa ni Esau; ket isu nangyanac ken Esau da Jeus, ken Jaalam, ken ni Cora.

15 ś Dagitoy dagiti pangpangulo cadagiti annac a lallaki ni Esau; dagiti annac a lallaki ni Eliphaz nga inauna nga anac ni Esau; ni pangulo Teman, pangulo Omar, pangulo Zepho, pangulo Cenaz,

16 Pangulo Cora, pangulo Gatam, ni pangulo Amalek: dagitoy dagiti pangpangulo a pinutot ni Eliphaz idiay daga ti Edom; dagitoy dagiti annac a lallaki ni Ada.

17 ś Ket dagitoy dagiti annac a lallaki ni Reuel anac a lalaki ni Esau; pangulo Nahath, pangulo Zera, pangulo Samma, pangulo Mizza: dagitoy dagiti pangpangulo a nagtaud ken Reuel idiay daga ti Edom; dagitoy dagiti annac a lallaki ni Basemath nga asawa ni Esau.

18śKet dagitoy dagiti annac a lallaki ni Aholibama nga asawa ni Esau; pangulo Jeus, pangulo Jaalam, pangulo Cora: dagitoy dagiti pangpangulo a nagtaud ken Aholibama nga anac a babai ni Ana, nga asawa ni Esau.

19 Dagitoy dagiti annac a lallaki ni Esau, nga isu ti Edom, ket dagitoy dagiti pangpanguloda.

20 ś Dagitoy dagiti annac a lallaki ni Seir nga Horeo, nga nagnaed iti daga; Lotan, ni Sobal, ni Zibeon, ni Ana.

21 Ni Dison, ni Ezer, ni Disan: dagitoy dagiti pangpangulo a nagtaud cadagiti Horeo, nga annac ni Seir idiay daga ti Edom.

22 Ket dagiti annac ni Lotan isuda idi da Hori ken Hemam; ket ti cabsat a babai ni Lotan isu ni Timna.

23 Ket dagiti annac ni Sobal isuda idi dagitoy; Alvan, ni Manahath, ni Ebal, Sepho, ken ni Onam.

24 Ket dagitoy dagiti annac ni Zibeon; da Aja, ken ni Ana: daytoy daydi Ana nga nacasarac cadagiti as-asno idiay let-ang, idi ipapaarabna dagiti as-asno ni Zibeon nga amana.

25 Ket dagiti annac ni Ana isuda dagitoy; ni Dison, ken ni Aholibama nga anac a babai ni Ana.

26 Ket dagitoy dagiti annac ni Dison; Hemdan, ni Eshban, ni Ithran, ken ni Cheran.

27 Dagiti annac ni Ezer isuda dagitoy; Bilhan, ni Zaavan, ken ni Acan.

28 Dagiti annac ni Disan isuda dagitoy; Huz, ken Aran.

29 Dagitoy dagiti pangpangulo nga nagtaud cadagiti Horeo; pangulo Lotan, pangulo Sobal, pangulo Zibeon, pangulo Ana,

30 Pangulo Dison, pangulo Ezer, pangulo Disan: dagitoy dagiti pangpangulo nga nagtaud cadagiti Horeo, a maitutop iti pangpanguloda iti daga ti Seir.

31 ś Ket dagitoy dagiti ar-ari a nagturay iti daga ti Edom, idi awan pay mangituray nga ari cadagiti annac ni Israel.

32 Ket ni Bela nga anac a lalaki ni Beor nagari sadiay Edom: ket ti nagan ti ilina idi ket Dinaba.

33 Ket ni Bela natay, ni Jobab anac a lalaki ni Zera a taga Bosra nagturay a sono na.

34 Ket ni Jobab natay, ni Husam a taga iti daga ti Temanitas nagturay a sono na.

35 Ket ni Husam natay, ket ni Adad anac a lalaki ni Badad, nga nangdadael ken Midian iti away ti Moab, nagturay a sono na: ket ti nagan ti ilina idi ket Avith.

36 Ket ni Adad natay, ni Samla a taga Masreca nagturay a sono na.

37 Ket ni Samla natay, ni Saul a taga Rehoboth iti ayan ti carayan nagturay a sono na.

38 Ket ni Saul natay, ni Baalanan anac a lalaki ni Achbor nagturay a sono na.

39 Ket ni Baalanan anac a lalaki ni Achbor natay, ket ni Adar nagturay a sono na: ket ti nagan ti ilina idi Pau; ket ti nagan idi ti asawana ket Meetabel, nga anac a babai ni Matred, anac nga babai ni Mezaab.

40 Ket dagitoy dagiti nagnagan dagiti pangpangulo a nagtaud ken Esau, a cas maiyannurot iti capuonanda, ken cadagiti pagnaedanda, ken dagiti nagnaganda; pangulo Timna, pangulo Alva, pangulo Jetheth,

41 Pangulo Aholibama, pangulo Ela, pangulo Pinon,

42 Pangulo Cenaz, pangulo Teman, pangulo Mibzar,

43 Pangulo Magdiel, pangulo Hiram: dagitoy dagiti pangpangulo sadi Edom, cas mayannurot cadagiti pagnanaedanda iti daga a pagtagicuaanda: daytoy isu ni Esau ti ama dagiti Idumeo.

CAPITULO 37

1 Ket ni Jacob nagnaed idiay daga nga ni amana ket gangannaet, idiay daga ti Canaan.

2 Dagitoy dagiti capcaputotan ni Jacob. Ni Jose, idi nagtawen iti sangapulo ket pito, agipapaarab cadagiti an-animal agraman cadagiti cacabsatna; ket isu caddua idi dagiti annac a lallaki ni Bilha, ken dagiti annac a lallaki ni Zelfa, nga assawa ni amana: ket ni Jose indanonna ken amana dagiti dakes nga aramidda.

3 Ita ni Israel ay-ayatenna ni Jose nga inpangpangrona ngem cadagiti isuamin nga annacna, gapu ta nayanac iti kinalacayna: ket inyaramidanna iti maysa a bado a naggarit iti nadumaduma a kita.

4 Ket idi nakita dagiti cacabsatna nga ni amada ket inay-ayatna nga inpangpangrona ngem cadagiti isuamin a cacabsatna, kinagurada isuna, ken dida nabalinan ti nakisao iti natalna kencuana.

5 ś Ket ni Jose nagtagtagipnep iti maysa a tagainep, ket inbagana cadagiti cacabsatna: ket kinagurada isuna iti ad-adda.

6 Ket kinunana cadacuada, Denggenyo, dawatec cadacayo, daytoy tagainep nga tinagtagainepco:

7 Ta, adtoy, agbetbettectayo idi ti pagtalonan, ket, adtoy, ti binettecco bimmangon, ket nagtindec; ken, adtoy, dagiti met binettecyo nagtindecda iti aglawlaw, ket nagtamedda iti binettecco.

8 Ket dagiti cacabsatna kinunada kencuana, Pudno aya nga agaricanto cadacami? wenno pudno nga agturaycanto cadacami? Ket immad-adda manen ti gurada kencuana gapu cadagiti tagtagainepna, ken cadagiti sasaona.

9 ś Ket nakatagtagainep man ti sabalin a tagainep, ket imbagana cadagiti cacabsatna, ket kinunana, Adtoy, nakatagtagainepnac man iti nayon tay tagainepco; ket, adtoy, ti init ken ti bulan ken dagiti sangapulo ket maysa a bitbituen nagtamedda caniac.

10 Ket sinaritana ken amana, ken cadagiti cacabsatna: ket ni amana tinubngarna, a kinunana kencuana, Ania daytoy a tagainep nga natagtagainepmo? Pudno aya nga siac ken inam ken dagiti cacabsatmo umaycamto agtamed kenca iti daga?

11 Ket dagiti cacabsatna inapalanda isuna; ngem ni amana sinalimetmetanna iti nakemna daytoy a nasao.

12 ś Ket dagiti cacabsatna napanda nagpaarab dagiti an-animal ni amada sadiay Siquem.

13 Ket ni Israel kinunana ken Jose, Saan aya a dagiti cacabsatmo addada nga agpapaarab iti pangen idiay Siquem? umayca, ket ibaonca cadacuada. Ket isu simmungbat kencuana, Adtoyac.

14 Ket kinunana kencuana, Inca, dawatec kenca, kitaem no naimbag ti casasaad dagiti cacabsatmo, ken no naimbag met dagiti pangen; ket iyegmo manen caniac ti damag. Ket pinalubosanna a rimmuar idiay lugar ti Hebron, ket dimmanon sadiay Siquem.

15 ś Ket maysa a tao ti nasaracanna, ket, adtoy, magmagna a nayaw-awan iti away: ket ti lalaki inintuudna, a kinunana, Ania ti sapsapulem?

16 Ket kinunana, Sapsapulec dagiti cacabsatco nga lallaki: ibagam caniac, dawatec kenca, no sadino ti ayan ti pagpapaarabanda cadagiti pangpangenda.

17 Ket ti lalaki kinunana, Pimmanawdan ditoy; ta nangegco a sinaoda, Intayo sadiay Dothan. Idin ni Jose napanna sinurot dagiti cacabsatna, ket nabirocanna ida idiay Dothan.

18 Ket idi nakitada iti adayu pay, idi sacbay nga immasideg cadacuada, nagnunumoanda iti maibusor kencuana tapno patayenda.

19 Ket kinunada iti maysa ken maysa, Adtoy, daytoy a managtagtaginepnep ket sumungad.

20 Umaycayo ita ngarud, ket papatayentayo, ket itappuactayo iti maysa nga abut, ket cunatayto, Maysa a dakes nga animal inalun-unna isuna: ket kitaentayto no ania ti maaramidanto dagiti tagtagainepna.

21 Ket ni Ruben nangegna dayoty, ket inispalna isuna cadagiti im-imada; a kinunana, Ditayo cadi papatayen.

22 Ket ni Ruben kinunana cadacuada, Dicayo mangibucbuc ti dara, ngem itappuacyo ketdi iti daytoy nga abut nga adda ti let-ang, ngem dicayo sagiden cadagiti im-imayo; tapno mailisina cadagiti im-imada, tapno maisublina manen ken amana.

23 ś Ket naaramid nga, idi ni Jose nacagteng cadagiti cacabsatna, ket linabusanda ni Jose iti badona, ti badona nga adu ti gargaritna a sicacapet idi kencuana;

24 Ket innalada, ket intappuacda iti abut: ket ti abut natianan, awan ti danum iti unegna.

25 Ket nagtugawda a nangan ti tinapay: ket intangadda dagiti matmatada ket kimmitada, ket, adtoy, maysa a bonggoy dagiti Ismaelitas nga aggapu idiay Galaad ken dagiti camcamelloda inawitda dagiti recrecado ken balsamo ken mirra, ket ipanda idi sadi Egipto.

26 Ket ni Juda kinunana cadagiti cacabsatna, Ania ti magungonatayo no papatayentayo ni cabsattayo, ken ilemmengtayo ti darana?

27 Umaycayo, ket ilacotayo cadagiti Ismaelitas, ket ditayo coma ipatay dagiti im-imatayo kencuana; ta isu cabsattayo a lalaki ken lasagtayo. Ket dagiti cacabsatna inanamunganda.

28 Idin adda lumablabas dagiti taga Midian nga agtagtagilaco; ket inaonda ken inpangatoda ni Jose iti abut, ket inlacoda ni Jose cadagiti Ismaelitas iti duapulo a bagi ti pirac: ket insangpetda ni Jose sadi Egipto.

29 ś Ket ni Ruben nagsubli iti abut; ket, adtoy, ni Jose awan iti uneg ti abut; ket pinigisna dagiti pagananayna.

30 Ket nagsubli cadagiti cacabsatna, ket kinunana, Ti ubing awanen; ket siac, sadinonto ita ti papanac?

31 Ket innalada ti bado ni Jose, ket nangpapatayda ti maysa a calding a lalaki, ket intanebda diay badona ti dara;

32 Ket intulodda diay bado nga adu ti gargaritna, ket inpanda ken amada, ket kinunada, Daytoy nasaracanmi: lasinem ita no isu ti bado ni anacmo wenno saan.

33 Ket isu nalasinna, ket kinunana, Isu ti bado ni anacco; maysa a dakes nga animal inalun-unna isunan; ni Jose ket awan dudua nga napisangpisangen.

34 Ket ni Jacob pinisangna dagiti pagananayna, ket incabilna ti nakersang a lupot cadagiti luppona, ket nagladingit a maipaay iti anacna ti adu nga al-aldaw.

35 Ket dagiti amin nga annacna nga lallaki ken babbai timmacderda tapno liwliwaenda; ngem isu dina kinayat ti maliwliwa; ket kinunana, Ta bumabaacto iti tanem nga mapan ken anacco a silaladingit. Ket iti casta ni amana sinangitanna isuna.

36 Ket dagiti taga Midian inlacoda isuna idiay Egipto ken ni Potifar, maysa nga official ni Faraon, ken capitan dagiti agbanbantay.

CAPITULO 38

1 Ket naaramid iti daydi a tiempo, a ni Juda simmalog a naggapu cadagiti cacabsatna, ket napan iti maysa a lalaki nga Adullamita, nga agnagan idi ti Hira.

2 Ket ni Juda nacakita sadiay iti maysa nga anac a babai ti maysa a taga Canaan, nga agnagan idi ti Sua; ket innalana, ket simrec kencuana.

3 Ket isu nagsicog, ket naganac iti maysa a lalaki; ket ni amana ninagananna iti Er.

4 Ket nagsicog manen, ket naganac iti maysa a lalaki; ket ni inana ninaganana iti Onan.

5 Ket sa nagsicog manen, ket naganac iti maysa a lalaki; ket ninagananna iti Sela: ket adda idi idiay Chezib, idi inyanacna.

6 Ket ni Juda nangala iti babai nga inyasawana ken ni Er nga anacna a lalaki nga inauna, ket ti naganna idi ket Thamar.

7 Ket ni Er, inauna nga anac a lalaki ni Juda, nagdakes isuna cadagiti imatang ti APO; ket isu pinatay ti APO.

8 Ket ni Juda kinunana ken Onan, Sumrecca iti asawa ni cabsatmo, ken asawaem, ket parnuayem ti putot ken cabsatmo a lalaki.

9 Ket ni Onan inammona nga ti putot saan coma a maipaay kencuana; ket naaramid, nga idi simrec ken ni asawa ni cabsatna a lalaki, isu imbocbocna iti daga, di la ket ta macaited iti putot a maipaay iti cabsatna.

10 Ket ti banag nga inaramidna ket saan a nacaay-ayo iti APO: gapuna pinatayna met isuna.

11 Idin kinuna ni Juda ken Thamar a manugangna, Agtalinaedca a balo idiay balay ni amam, agingga nga ni Sela nga anacco a lalaki macadackel: ta kinunana, di la ketdi isu matay met, a cas cadagiti cacabsatna a lallaki. Ket ni Thamar napan ken nagtaeng iti balay ni amana.

12 ś Ket iti panaglabas dagiti panawen ti anac a babai ni Sua nga asawa ni Juda natay; ket ni Juda naliwliwan, ket napan cadagiti mangpucpukis cadagiti carcarnerona idiay Timnath, isu ken ni gayyemna nga Hira nga Adullamita.

13 Ket naibaga ken Thamar, a kunada, Adtoy ni catugangam a lalaki sumang-at idiay Timnath nga mamukis dagiti carnerona.

14 Ket inucsobna ti cawesna a balo, sa nagdalongdong, ken inabbonganna ti bagina, ket nagtugaw iti nawaya a disso, ti sibay ti dalan nga agturong idiay Timnath; ta nakitana idi a ni Sela dimmackelen, ket di met naited kencuana nga asawana.

15 Idi ni Juda nakitana, impagarupna a babai idi nga balangcantis; gapu ta inabbonganna ti rupana.

16 Ket nagturong a napan kencuana iti sibay ti dalan, ket kinunana, Ala, dawatec kenca, ipalubosmo a sumrecac kenca; (ta dina ammo nga isu idi ti manugangna a babai.) Ket kinunana, Ania ti itdemto caniac, tapno sumrecca caniac?

17 Ket kinunana, Siac paitulodancanto ti maysa nga urbon a calding cadagiti pangenco. Ket kinunana, Mangtedca ngarud caniac iti tanda, agingga paiyegmo?

18 Ket kinunana, Ania ngarud ti tanda nga itedco kenca? Ket insungbatna, Dayta barikesmo, ken dayta singsingmo, ken dayta sarucodmo nga adda iti imam. Ket intedna ida kencuana, ket simrec kencuana, ket nagsicog gapu kencuana.

19 Ket ti babai timmacder, ken pimmanaw, ken iniccatna ti dalongdongna, sa inbadona dagiti cawcawes iti kinabalona.

20 Ket ni Juda inpaiyegna ti urbon a calding iti ima ti gayyemna nga Adullamita, tapno maalana dagidi tanda na iti ima daydi babai: ngem dina nasaracan ti babai.

21 Idin nagintuud cadagiti lallaki idiay disso, a kunana, Sadino ti ayan di balangcantis, nga adda iti nawaya a sibay ti dalan? Ket kinunada, Awan ti balangcantis ditoy a disso.

22 Ket nagsubli ken ni Juda, a kinunana, Indiac nasaracan; ken casta met dagiti lallaki sadiay a disso kinunada, nga awan ti balangcantis ditoy a disso.

23 Ket ni Juda kinunana, Alaenna coma a maipaay kencuana, di la ket ta maibabaincami: adtoy, inpayegco daytoy urbon a calding, ngem dica nasaracan isuna.

24 ś Ket naaramid idi calpasan iti tallo a bulan, nga naibaga ken Juda, a kinunada, Ni Thamar nga manugangmo a babai nagbalangcantis; ken maysa pay, adtoy, masicog iti panagbalangcantis. Ket ni Juda kinunana, Iyegyo isuna, ket mapuoran coma.

25 Ket idi naisaclang, pinaibagana ken catuganganna a lalaki, a kinunana, Gapu iti lalaki, a makincucua dagitoy, isu ti nagsicogac: ket kinunana, Bigbigem, dawatec kenca, siasino ti akincucua dagitoy, ti barikes, ti singsing, ken ti sarucod?

26 Ket ni Juda binigbigna a cucuana ida, ket kinunana, Isu nalinlinteg ngem siac; gapu ta diac inted kencuana ni Sela nga anacco a lalaki. Ket dina pulos a dinennaanen ti babai.

27 ś Ket naaramid nga idi immay ti panagpasicalna, ket, adtoy, singin ti adda idi iti tianna.

28 Ket naaramid nga, idi agpasngay, nga ti maysa inruarna ti imana: ket ti mangngilot inawatna ken binedbedanna ti imana iti lubid nga nalabaga, a kinunana, Daytoy ti immuna nga rimmuar.

29 Ket naaramid nga idi, inyunegna ti imana, ket, adtoy, ti cabsatna rimmuar: ket kinuna di mangngilot, Casano ti panangdupracmo? daytoy a pannacaburac inaramidmo kenca met laeng: gapuna ti naganna ket naawagan iti Phares.

30 Ket calpasanna rimmuar ti cabsatna, nga adda sagot a nalabaga iti imana: ket ti naganna ket naawagan iti Zara.

CAPITULO 39

1 Idin ni Jose naisalog idiay Egipto; ket ni Potifar, maysa nga oficial ni Faraon, panguloen dagiti agbanbantay, lalaki nga Egipciano, isu ginatangna iti ima dagiti Ismaelitas, a nangipan kencuana sadiay.

2 Ket ti APO sia-adda idi ken Jose, ket isu lalaki a narang-ay; ket adda idi iti balay ni apona nga maysa a Egipciano.

3 Ket ni apona nakitana nga ti APO adda idi kencuana, ken maysa pay ti APO pinarang-ayna amin nga aramiden ti imana.

4 Ket ni Jose nacasarac ti parabur iti imatangna, ket nagservi kencuana: ken pinagbalinna a mangaywan amin iti balayna, ken amin nga inyawatna iti imana.

5 Ket naaramid a nanipud idi pinangpaaywanna kencuana iti balayna, ken dagiti amin a cucuana, nga ti APO binendicionanna ti balay ti Egipciano a maipuon ken Jose; ket ti bendicion ti APO naisacnap cadagiti amin nga adda kencuana ti balay, ken iti pay away.

6 Ket intalecna amin nga adda kencuana iti ima ni Jose; ket awan ti binibianganna nga adda kencuana, no di la ti taraon nga kinnanna. Ket ni Jose idi nabaked a lalaki, ken nacaay-ayo a makita.

7 ś Ket naaramid iti calpasan dagitoy nga banbanag, a ti asawa ni apona nagargari dagiti matmatana ken Jose; ket kinunana kencuana, Caiddaennac.

8 Ngem isu nagmadi, ket kinunana iti asawa ni apona, Adtoy, ni apoc saanna nga ammo ti adda caniac iti balay, ket intalecna dagiti amin a cuccucuana cadagiti im-imac;

9 Ket awan iti dacdackel itoy a balay ngem siac; ket awan sabali a dina intalec caniac no di la sica, a gapu ta sica ti asawana: casano ngarud nga aramidec itoy naindaclan a kinadakes, ken macabasolac iti Dios?

10 Ket naaramid nga, iti pannakisasaona ken Jose iti inaldaw-aldaw, isu ket saanna nga impangag, iti pannakicaiddana kencuana, wenno duminna kencuana.

11 Ket naaramid cadagidiay nga aldaw, nga ni Jose simrec ti balay tapno aramidenna dagiti annongenna; ket awan dagiti lallaki ti balay idi nga adda iti uneg.

12 Ket ti babai ginammatanna dagiti pagan-anayna, a kinunana, Caiddaennac cadi: ket nabatina ti pagan-anayna iti imana, ket nagtaray, ken rimmuar.

13 Ket calpasanna, idi nakitana nga nabati ti pagan-anayna iti imana, ken nagtaray a rimmuar,

14 Inawaganna dagiti lallaki ti balayna, a kinasaona ida, a kunana, Kitaenyo, inyegna cadatayo ti maysa a Hebreo tapno rabrabakennatayo; immay caniac tapno caiddaennac, ket nagickisac iti napigsa a timec:

15 Ket calpasanna, idi nangegna nga impigsac ti timecco ken nagickisac, nabatina ti pagan-anayna iti ayanco, ket nagtaray, ken rimmuar.

16 Ket indulinna ti pagan-anayna iti ayanna, agingga iti di simmangpet ti apona iti balayna.

17 Ket sinaritana kencuana dagitoy cacastoy a sasao, a kinunana, Toy adipen nga Hebreo, nga insangpetmo cadata, immay caniac tapno mangrabrabac caniac:

18 Ket naaramid nga, idi impigsac ti timecco ken nagickisac, nabatina ti pagan-anayna iti ayanco, ket nagtaray a rimmuar.

19 Ket naaramid nga, idi ti apona nangegna dagiti sinarita ti asawana, nga imbagana kencuana, a kinunana, Castoy nga wagas ti inaramid ti adipen caniac; ket iti casta ti pungtotna bimmara.

20 Ket ni Jose innala ti apona, ket incabilna iti pagbaludan, maysa a disso a pacaibaludan dagiti balbalud ti ari: ket nagyan idiay pagbaludan.

21 ś Ngem ti APO sia-adda idi ken Jose, ket kina-asianna, ken inaramidna a nacaay-ayo cadagiti mata ti agaywan ti pagbaludan.

22 Ket ti agaywan ti pagbaludan intalecna iti ima ni Jose amin dagiti balbalud nga adda ti pagbaludan; ket no aniaman nga aramidenda sadiay, isu ti agaramid idi.

23 Ti agaywan ti pagbaludan ket awan ti banag nga tamingenna nga adda cadagiti im-imana; gapu ta ti APO adda idi kencuana, ket iti aniaman nga inaramidna, ti APO pinarang-ayna.

CAPITULO 40

1 Ket naaramid nga calpasan dagitoy, dagiti mamacpacan ti ari ti Egipto ken ti pagtintinapayenna nacabasolda ken apoda nga ari ti Egipto.

2 Ket ni Faraon nacapungtot cadagiti dua nga oficialna, nga isuda ti panguloen cadagiti mamacpacan, ken ti panguloen dagiti agtintinapay.

3 Ket impupocna ida ti balay ti capitan dagiti agbanbantay, iti uneg ti pagbaludan, isu nga ayan ni Jose a nacabaludan.

4 Ket ti capitan dagiti agbanbantay intalecna ida ken Jose, ket nagservi cadacuada: ket nagyanda iti sumagmamano nga aldaw iti pagbaludan.

5 ś Ket nagtagtagainepda a dua, ti tumunggal maysa adda idi ti tagtagainepna iti maymaysa a rabii, ti tumunggal maysa cas mayannurot iti cayulogan ti tagainepna, ti mamacpacan ken ti agtintinapay ti ari sadi Egipto, nga addada nga naipupoc iti pagbaludan.

6 Ket ni Jose immay cadacuada iti bigat, ket kinitana ida, ket, adtoy, nalidayda idi.

7 Ket inintuudna dagiti ad-adipen ni Faraon a cadduana iti pagbaludan iti balay ni apona, a kinunana, Apayapay dagiti langlangayo naliday ita nga aldaw?

8 Ket kinunada kencuana, Nacatagtagainep cami ti tagainep, ket awan ti macaipatarus. Ket ni Jose kinunana cadacuada, Saan aya nga dagiti panangipatarus addada iti biang ti Dios? ibagayo caniac, dawatec cadacayo.

9 Ket ti panguloen dagiti mamacpacan sinaritana ti tagtagainepna ken Jose, ket kinunana kencuana, Iti tagtagainepco, adtoy, maysa a puon ti uvas adda idi iti sangoc;

10 Ket iti dayta nga uvas adda idi tallo a sangana: ken casla nagsaringit idi, ket dagiti sabsabongna rimmuar; ket dagiti raraayna nagbungada dagiti naluom nga uvas:

11 Ket ti copa ni Faraon adda iti imac: ket innalac dagiti uvas, ket pinespesco ida iti copa ni Faraon, ket intedco ti copa iti ima ni Faraon.

12 Ket ni Jose kinunana kencuana, Daytoy ti cayuloganna: Dagiti tallo a sanga ket tallo nga aldaw:

13 Iti uneg ti tallo nga aldaw ni Faraon itan-ocnanto ta ulom, ket isublinacanto ta saadmo: ken iyawatmonto ti copa ni Faraon iti imana, cas inar-aramidmo idi mamacpacanca kencuana.

14 Ngem laglagipennacto intono nasayaaten ti casasaadmo, ket ipakitam ti caasim, dawatec kenca, a maipaay caniac, ken ipadpadamagnac ken Faraon, tapno iruarnac iti daytoy a balay:

15 Ta ti kinapudnona tinacawdac sadiay daga dagiti Hebreo: ket ditoy awan met ti inaramidco nga macaigapu no apay nga impupocdac iti pagbaludan.

16 Idi ti pangulo dagiti agtintinapay nakitana nga ti pannacaipatarusna ket nasayaat, kinunana ken Jose, Siac addaac met idi ti tagtagainepco, ket, adtoy, adda tallo a puraw nga lablabba naiparabawda iti uloc:

17 Ket ti akinngato nga labba adda idi amin a cancanen a naluto a maipaay ken Faraon; ket dagiti tumatayab kinnanda ida iti labba nga adda idi iti uloc.

18 Ket ni Jose simmungbat ket kinunana, Daytoy ti cayuloganna: Dagiti tallo a labba ket tallo nga aldaw:

19 Iti uneg ti tallo nga aldaw ni Faraon paputolannanto ta ulom, ken paibitinnacanto iti maysa a cayo; ket dagiti tumatayab canendanto nga ibusen dagiti lasagmo.

20 ś Ket naaramid calpasan ti tallo nga aldaw, nga isu ti panagcasangay ni Faraon, nagpadaya cadagiti isuamin nga ad-adipenna: ket pinaalana ti panguloen dagiti mamacpacan ken ti panguloen dagiti agtintinapay cadagiti ad-adipenna.

21 Ket insublina ti panguloen dagiti mamacpacan iti sigud nga panamacpacanna manen; ket inyawatna ti copa iti ima ni Faraon:

22 Ngem pinabitayna ti pangulo dagiti agtintinapay: cas impatarus idi ni Jose cadacuada.

23 Nupay casta ti pangulo dagiti mamacpacan saanna a nalagipen ni Jose, no di ket nalipatanna isuna.

CAPITULO 41

1 Ket calpasan nga napalabas ti apag-isu nga dua a tawen, ni Faraon nagtagtagainep: ket, adtoy, sitatacder idi iti asideg ti carayan.

2 Ket, adtoy, simmang-at iti carayan dagiti pito a bacbaca nga nacaay-ayo iti mata ken nalucmeg iti panaglaslasagda; ket nagar-arabda iti carootan.

3 Ket, adtoy, pito nga sabali a bacbaca simmarunoda cadacuada a naggapuda iti carayan, nalaadda a kitkitaen ken nacuttong iti panaglaslasagda; ket nagtacderda iti sibay dagiti immun-una a bacbaca iti igid ti carayan.

4 Ket dagiti bacbaca a nalaad ken nacuttong inalun-onda dagiti pito a bacbaca a nasayaat ken nalucmeg. Ket ni Faraon nacariing.

5 Ket nacaturog ken nagtagtagainep manen: ket, adtoy, pito a dawdawa rimmuarda iti maymaysa a puon, nabagasda ken nasayaatda.

6 Ket, adtoy, pito a dawdawa a naeppes ken nagango gapu iti angin nga aggapu iti daya rimmuarda a simmaruno ngem cadagidiay.

7 Ket dagiti pito a dawdawa a naeppes inalun-onda dagiti pito a dawdawa a nabagas ken nasayaat. Ket ni Faraon nacariing, ket, adtoy, maysa la a tagtagainep.

8 Ket naaramid iti cabigatanna a ti spirituna ket nariribuc; ket nagbaon ken pinaayabanna amin dagiti managsalamangca sadi Egipto, ken amin dagiti mamasiribna nga lallaki: ket ni Faraon sinaritana cadacuada ti tagtagainepna; ngem awan cadacuada iti nacabalin nga mangipatarus ken Faraon.

9 śIdin nagsao ti panguloen ti mamacpacan ken Faraon, a kinunana, Malagipco dagiti babacco ita nga aldaw:

10 Idi ni Faraon nacapungtot cadagiti ad-adipenna, ket incabilnac a naipupoc iti balay ti panguloen dagiti agbanbantay, siac ken ti panguloen dagiti agtintinapay:

11 Ket duacami a nagtagtagainep iti maymaysa a rabii, siac ken isu; nagtagtagainepcami sagtunggal maysa cas ti cayulogan ti tagtagainepna.

12 Ket sadiay adda kinadduami a maysa a baro, maysa nga Hebreo, adipen ti panguloen dagiti agbanbantay; ket sinaritami kencuana, ket isu inpatarusna cadacami dagiti tagtagainepmi; iti tunggal lalaki a cas ti tagtagainepna inpatarusna.

13 Ket naaramid nga, cas iti panangipatarusna cadacami, casta iti nagbanaganna; siac insublinac ti saadco, ket isu pinaibitayna.

14 ś Idin ni Faraon nagbaon ken pinaayabanna ni Jose, ket inruarda a nadaras iti pagbaludan: ket nagkiskis isuna, ken sinuctanna dagiti pagan-anayna, ket napan ken Faraon.

15 Ket ni Faraon kinunana ken Jose, Nagtagtagainepac ti maysa a tagainep, ket awan maysa nga macaipatarus: ket nangegco ti sasaoenda maipapan kenca, nga maawatam ti tagtagainep ket mabalinmo nga ipatarus.

16 Ket ni Jose simmungbat ken Faraon, a kinunana, Awan caniac: Ti Dios itednanto ken Faraon ti sungbat a natalna.

17 Ket ni Faraon sinaritana ken Jose, Iti tagtagainepco, adtoy, nagtacderac iti igid ti carayan:

18 Ket, adtoy, adda simmang-at a naggapu iti carayan dagiti pito a bacbaca, nalucmeg ken nasayaat ti langlangada; ket nagar-arabda cadagiti carorootan:

19 Ket, adtoy, pito nga sabsabali nga bacbaca simmang-atda met a naud-udi ngem dagita, narapis ken nalaad ti langada ken nacuttong, nga awan pay nakitac iti amin a daga ti Egipto nga umasping iti kinalaadda:

20 Ket dagiti nacuttong ken nalaad ti langada a bacbaca kinnanda dagiti immuna a pito a bacbaca a nalucmeg:

21 Ket idi nalpas nga inalun-onda idan, saan met a nadlawan nga inalun-onda ida; no di ket nagtalinaedda pay laeng a nalaad ti langada, a cas idi damona. Idin nacariingac.

22 Ket nakitac iti tagtagainepco, ket, adtoy, pito a dawdawa rimmuarda iti maymaysa a puon, nabagas ken nasayaat:

23 Ket, adtoy, pito a dawdawa, nalaylay, naeppes, ken pinagango ti angin a naggapu ti daya, rimmuarda a naud-udi ngem dagidiay:

24 Ket dagiti naeppes a dawdawa inalun-onda dagiti pito a nasayaat a dawdawa: ket imbagac cadagiti mamagsalamanca; ngem awan ti macaipalawag caniac.

25 Ket ni Jose kinunana ken Faraon, Ti tagtagainep ni Faraon ket maymaysa ti caipapananna: ti Dios impakitana ken Faraon iti aramidenna iti mabiiten.

26 Dagiti pito a bacbaca a nasayaat ket pitoda a tawtawen; ken dagiti pito a dawdawa a nasayaat ket pitoda a tawtawen: ti tagtagainep ket maymaysa.

27 Ket dagiti pito a nacuttong ken dakes ti langada a bacbaca a simmang-at a naud-udi ngem dagita ket pitoda a tawtawen; ket dagiti pito nga eppes nga dawdawa ken pinagango ti angin nga aggapu ti daya ket isudanto dagiti pito a tawtawen ti bisin.

28 Dayta ti banag nga ibagac ken Faraon: Ti aramiden ti Dios iti mabiiten inpakitana ken Faraon.

29 Adtoy, umay dagiti pito a tawtawen iti naindaclan a kinaadu ti apit iti amin a daga ti Egipto:

30 Ket calpasanna daytoy umayto ti pito a tawtawen ti bisin; ket amin ti nawadwad nga apit malipatanton ti daga ti Egipto; ket ti bisin ibusennanto ti daga;

31 Ket ti tiempo dagiti kinawadwad saanto nga maammoanen iti daga gapu ti bisin a sumaruno; ta ti dayta a tiempo isunto ti nacarigrigat unay.

32 Ket dayta a tagtagainep ket naulit ken Faraon iti namindua; gapu ta dayta a banag ket inkeddengen ti Dios, ket ti Dios tungpalennanto iti mabiit.

33 Iti casta ngarud ni Faraon mangkita coma iti maysa a lalaki nga macailasin ken masirib, ket isaadna coma nga agturay iti daga nga Egipto.

34 Aramiden coma ni Faraon daytoy, ket tudinganna coma dagiti pangpanguloen iti daga, ket urnongenda coma iti apagcalima ti daga ti Egipto bayat dagiti pito a tawtawen ti kinawadwad.

35 Ket ummongenda coma amin a taraon cadagitoy umay a tawtawen ti kinawadwad, ket idulinda coma dagiti bucbukel iti biang dagiti ima ni Faraon, ket aywananda coma dagiti taraon cadagiti il-ili.

36 Ket dagiti taraon maipenpenda coma a maisagana iti daga cadagiti pito a tawtawen ti bisin, nga addanto iti daga ti Egipto; tapno ti daga saanto a mapucaw gapu ti bisin.

37 śKet ti panggep nacaay-ayo cadagiti mata ni Faraon, ken cadagiti matmata dagiti amin nga ad-adipenna.

38 Ket ni Faraon kinunana cadagiti ad-adipenna, Macasaractayo aya ti maysa a lalaki a cas itoy, lalaki nga adda kencuana ti Espiritu ti Dios?

39 Ket ni Faraon kinunana ken Jose, Gapu ta ti Dios impacaammona amin daytoy kenca, awanen ti mamaglasin ken masirib a cas kenca:

40 Sicanto ti agturay iti balayco, ket cas mayannurot cadagiti saom dagiti amin a tattaoc maiturayamto: iti la tronoc ti pagngatngatoacto ngem sica.

41 Ket ni Faraon kinunana ken Jose, Makitam, insaadcan nga agturay iti amin a daga ti Egipto.

42 Ket ni Faraon iniccatna ti singsingna iti imana, ket incabilna iti ima ni Jose, ket kinawesanna dagiti bado a nalapat a lienzo, ken iniccanna ti balitoc a cuentas nga naiyuccor ti tengngedna;

43 Ket pinaluganna isuna iti maicaddua a luganna; ket impuccawda iti sangoananna, Agparintumengcayo: ket pinagturayna isuna iti amin a daga ti Egipto.

44 Ket ni Faraon kinunana ken Jose, Siac ni Faraon, ket awanto ti tao nga mangitag-ay ti imana wenno sacana a maibusor kenca iti amin a daga ti Egipto.

45 Ket ni Faraon inawaganna ni Jose ti nagan a Zaphnath-paaneath; ket intedna kencuana nga asawana ni Asenath nga anac a babai ni Potiphera a padi sadi On. Ket ni Jose sinursurna iti isuamin a daga ti Egipto.

46 ś Ket ni Jose nagtawen ti tallopulo idi naidatag ken Faraon nga ari ti Egipto. Ket ni Jose rimmuar iti saclang ni Faraon, ket napan nagsursur iti amin a daga ti Egipto.

47 Ket cadagiti pito a tawtawen a kinawadwad ti apit ti daga nagbunga cadagiti rinacrakem.

48 Ket inurnongna amin a taraon cadagiti pito a tawtawen, nga adda idi ti daga ti Egipto, ket indulinna dagiti pagtaraon cadagiti il-ili: ti pagtaraon ti aw-away, nga adda idi ti arubayan ti tunggal ili, indulinna sadiay.

49 Ket ni Jose inurnongna dagiti bucbukel a casla darat ti baybay, nagadu la unay, inggana insardengna ti panangbilangna, ta di mabalinen a mabilang.

50 Ket naiyanacda ken Jose dagiti dua a lallaki nga annac idi di pay dimteng dagiti tawtawen a panagbisin, nga inyanac kencuana ni Asenath nga anac a babai ni Potiphera a padi sadi On.

51 Ket ni Jose inawaganna ti nagan ti inauna nga anacna ti Manases: Ta ti Dios, kinunana, pinalipatna amin a rigrigatco, ken amin ti balay ni amac.

52 Ket ti nagan ti maicaddua naawagan Ephraim: Ta ti Dios inaramidna nga nabungaac iti uneg ti daga nga ayan ti nagtuocac.

53 Ket dagiti pito a tawtawen ti kinawadwad ti apit, nga adda idi iti daga ti Egipto, naggibusda.

54 Ket dagiti pito a tawtawen a panagbisin nangrugi a dumteng, a cas kinuna ni Jose: ket ti bisin adda idi iti amin a dagdaga; ngem iti amin a daga ti Egipto adda idi ti pagtaraon.

55 Ket idi ti amin a daga ti Egipto nagbisin, dagiti tattao immasugda ken Faraon ti pagtaraon: ket ni Faraon kinunana amin cadagiti taga Egipto, Incayo ken Jose, ti aniaman nga ibagana cadacayo, aramidenyo.

56 Ket ti bisin nagsacnap iti amin a rupa ti lubong: ket ni Jose linuctanna amin dagiti pagidulinan, ket naglaco cadagiti taga Egipto; ket ti bisin nagpalalo unay idi ti daga nga Egipto.

57 Ket amin a pagpagilian immayda iti Egipto ken Jose tapno gumatang ti pagtaraon; gapu ta ti bisin nacacarcaro idi iti amin a lubong.

CAPITULO 42

1 Idi ni Jacob naammoanna nga adda pagtaraon sadiay Egipto, ni Jacob kinunana cadagiti annacna a lallaki, Ania ti gapuna nga agkikinnitacayo?

2 Ket kinunana, Adtoy, nadamagco nga adda pagtaraon sadiay Egipto: sumalogcayo sadiay, ken gumatang ti mausartayo; tapno agbiagtayo, ken saantayo a matay.

3 ś Ket dagiti sangapulo nga cacabsat ni Jose simmalogda a gumatang ti pagtaraon sadiay Egipto.

4 Ngem ni Benjamin, a cabsat ni Jose, saan nga impacuyog ni Jacob cadagiti cacabsatna, ta kinunana, Di la ket no adda peggad a mapagteng kencuana.

5 Ket dagiti annac ni Israel dimtengda nga aggatang ti taraon agraman cadagiti immay: ta ti bisin adda idi nga sapasap iti daga ti Canaan.

6 Ket ni Jose isu idi ti agturay iti daga, ket isu idi ti aglaco cadagiti tattao ti daga: ket dagiti cacabsat ni Jose dimtengda, ket nagtamedda kencuana dagiti ruprupada iti daga.

7 Ket ni Jose nakitana dagiti cacabsatna, ket nalasinna ida, ngem saan nga nagpadlaw cadacuada, ken kinasaona ida ti nagubsang; ket kinunana cadacuada, Sadino ti naggapuanyo? Ket kinunada, Idiay daga ti Canaan tapno gumatangcami iti taraon.

8 Ket ni Jose nalasinna dagiti cacabsatna, ngem isu saanda a nabigbig.

9 Ket ni Jose nalagipna dagiti tagtagainepna nga natagtagainepna cadacuada, ket kinunana cadacuada, Dacayo agsisiimcayo; immaycayo tapno masiimyo iti kinaawan sarikedked ti daga.

10 Ket kinunada kencuana, Saan, apomi, ngem umay gumatang ti taraon dagitoy ad-adipenmo immayda.

11 Dacami amin annacnacami ti maymaysa a lalaki; napudnocami a lallaki, dacami nga ad-adipenmo saancami nga immay agsisiim.

12 Ket kinunana cadacuada, Saan, ngem immaycayo tapno makitayo nga awan sarikedked ti daga.

13 Ket kinunada, Dacami nga ad-adipenmo sangapulo ket dua nga agcacabsat, annac ti maymaysa a lalaki idiay daga ti Canaan; ket, adtoy, ti inaudianmi ket adda iti ayan ni amami ita, ket ti maysa awanen.

14 Ket ni Jose kinunana cadacuada, Daytoy ti naisaoc cadacayon, a kinunac, Agsisiimcayo:

15 Gapu itoy masuutcayo: Babaen ti biag ni Faraon dicayonto pumanaw ditoy, malacsid no ti inaudianyo a cabsat umay ditoy.

16 Mangibaoncayo ti maysa cadacayo, ket apanna alaen ti cabsatyo, ket mabaticayo a maipisoc ti pagbaludan, tapno dagiti sinaoyo mapanecnecanda, no adda met la pudno cadacayo: wenno saan gapu ti biag ni Faraon awan duduana nga agsisiimcayo.

17 Ket impanna ida ti pagpupucan iti tallo nga aldaw.

18 Ket ni Jose kunana cadacuada ti maicatlo nga aldaw, Daytoy aramidenyo, ket agbiagcayo; ta agbutengac iti Dios:

19 No napudnocayo a lallaki, maysa coma cadagiti cacabsatyo mapupuc iti balay a nacabaludanyo: ken incayo, bumunagcayo ti pagtaraon a maipaay iti bisin nga adda cadagiti balbalayyo:

20 Ngem iyegyo ti inaudi a cabsatyo caniac; iti casta dagiti sasaoyo mapanecnecanda, tapno dicayonto mapapatay. Ket inaramidda a casta.

21 ś Ket kinunada iti maysan maysa, Kinaagpaysona nga nacabasoltayo iti maicaniwas ken cabsattayo, ta nakitatayo iti danag ti cararruana, idi agdawdawat cadatayo, ket ditayo la dinengngeg; isu ti gapuna lac-amentayo met daytoy a pannacariribuctayo.

22 Ket ni Ruben simmungbat cadacuada, a kinunana, Diac cadi sinao cadacayo, a kinunac, Dicayo agbasol a maicaniwas iti ubing; ket saancayo a nangipangag? gapuna, adtoy, ti pay met darana ket agsapul.

23 Ket dida ammo idi a ni Jose naawatanna ti sinaoda; ta nakisasao caniada babaen iti maysa a mangipatarus.

24 Ket tinallicudanna ida, ken nagsangit; ket nagsubli manen cadacuada, a nakitabono cadacuada, ken innalana cadacuada ni Simeon, ket binaludna iti imatangda.

25 ś Idin ni Jose imbilinna nga punnoenda dagiti supotda iti pagtaraon, ken pinaisublina ti pirac ti tunggal maysa iti supotna, ken iniccanna ida iti balonda nga magna iti dalan: ket casta iti inaramidna cadacuada.

26 Ket impasacayda cadagiti as-asnoda dagiti taraon, ket pimmanawda sadiay.

27 Ket idi nga ti maysa linuctanna ti supotna tapno iccanna ti taraon ti asnona iti disso a nagsangbayanda, nakitana ti piracna; ta, adtoy, adda idi ti ngarab ti supot.

28 Ket kinunana cadagiti cacabsatna, Ti piracco naisubli; ken, adtoy, adda pay ditoy uneg ti supotco: ket dagiti puspusoda nagkibbayoda, ken napabutengda, a kinunada iti maysan maysa, Ania daytoy nga inaramid ti Dios cadatayo?

29 ś Ket simmangpetda ken Jacob nga amada sadiay daga ti Canaan, ket imbagada kencuana amin a napasamac cadacuada; a kinunada,

30 Ti lalaki, nga agturay iti daydiay a daga, nagubsang ti pannakisaona cadacami, ket impagarupna nga immaycami agsisiim iti daga.

31 Ket kinunami kencuana, Napudnocami a lallaki; saancami nga agsisiim:

32 Sangapulo ket duacami nga agcacabsat, annac a lallaki ni amami; ti maysa awanen, ket ti inaudi adda ita ken amami idiay daga iti Canaan.

33 Ket ti lalaki, nga apo sadiay a daga, kinunana cadacami, Daytoy ti pacaammoac no napudnocayo a lallaki; ibatiyo caniac ti maysa cadagiti cacabsatyo, ket mangalacayo ti taraon nga agservi ti panagbisin cadagiti balbalayyo, ket agluascayon:

34 Ket iyegyo ti inaudi a cabsatyo caniac: isu ti pacaammoacto nga saancayo nga agsisiim, no di ket napudno a lallaki: ket iti casta iyawatconto cadacayo ti cabsatyo, ken agsapulcayto ti panagbiagyo ditoy daga.

35 ś Ket naaramid nga idi imbucbucda dagiti supsupotda, nga, adtoy, adda iti supot ti tunggal maysa ti nabungon a piracna: ket idi isuda ken ni amada nakitada dagiti nabungon a pirac, nagbutengda.

36 Ket ni Jacob nga amada kinunana cadacuada, Inuliladac cadagiti annacco: ni Jose awan, ken ni Simeon awan, ket alaenyonto nga ipanaw ni Benjamin: amin dagitoy a banbanag maibusorda caniac.

37 Ket ni Ruben nagsao ken ni amana, a kinunana, Papatayem dagiti dua nga annacco a lallaki, no diacto isubli isuna kenca: iyawatmo isuna cadagiti imac, ket isublicto isuna met laeng manen kenca.

38 Ket isu kinunana, Ti anaccco saanto a makipagsalog cadacayo; ta ti cabsatna a lalaki natayen, ket is-isunan a nabati: no adda dakes a mapasamacna iti dalan a papananyo, pagbabaenyo ngarud dagiti ub-ubanco iti leddaang agpapan ken tanem.
CAPITULO 43

1 Ket ti bisin nagpalalo unay iti daga.

2 Ket naaramid, idi a nacandan amin ti pagtaraon nga ingapuda sadi Egipto, ti amada kinunana cadacuada, Incayo manen, gumatangcayo ti bassit a taraontayo.

3 Ket ni Juda nagsao kencuana, a kinunana, Ti lalaki incarina iti nainget cadacami, a kinunana, Dicayonto makita ti rupac, malacsid ti lalaki a cabsatyo maicuyogto cadacayo.

4 No ipacuyogmo ni cabsatmi a lalaki cadacami, sumalogcaminto ken igatangandacanto iti taraon:

5 Ngem no dica ibaon, saancamto a sumalog: ta daydi lalaki kinunana cadacami, Dicayonto makita ti rupac, malacsid ti lalaki a cabsatyo maicuyogto cadacayo.

6 Ket ni Israel kinunana, Apay ngamin nga nagdakes iti inaramidyon caniac, ti panangibagayo ti daydiay a lalaki nga adda pay laeng cabsatyo?

7 Ket kinunada, Ti lalaki sinaludsodna ti nainget maipapan cadacami, ken dagiti cacabaggianmi, a kinunana, Ni amayo sibibiag pay laeng? adda pay maysa a cabsatyo a lalaki? ket inpalawagmi kencuana a cas mayannatup cadagitoy a sasao: ammomi cadi aya a saoenna ngarud daytoy, Iyegyo ti cabsatyo a lalaki?

8 Ket ni Juda kinunana ken Israel nga amana, Ipacuyogmo ti ubing caniac, ket tumacdercamto a mapan; tapno agbiagtayo, ket ditay matay, dacami, ken sica, ken dagiti pay annacmi a babassit.

9 Siacto ti agsungbat a maipaay kencuana; iti imac ti pagtontonamto: no siac diacto isubli kenca, ken iyegco iti sangom, uray siac ti agawiten ti basol iti agnanayon:

10 Ta no saantayo coma a nagtactac, kinaagpaysona nga uray ita nagsublicami coma iti pacapaminduan.

11 Ket ni amada nga Israel kinunana cadacuada, No isu ngarud iti masapul ita, aramidenyo daytoy; alaenyo dagiti nasayaat a bungbunga ti daga cadagiti curcuributyo, ket bunagenyo nga isagut iti daydiay a lalaki, ti bassit a resina, ken bassit a diro, recrecado, ken mirra, pinones, ken almendras:

12 Ket mangitugotcayo ti mamindua a pirac iti imayo; ken ti pirac nga naisubli ti wangawangan dagiti supsupotyo, itugotyo manen ida babaen cadagiti im-imayo; nalabit adda idi nacabiddut iti panagkita:

13 Alaenyo met ti cabsatyo a lalaki, ket tumacdercayo, incayo manen iti daydiay a lalaki:

14 Ket ti Dios a Mannacabalin-amin itedna coma cadacayo ti caasi iti sango ti lalaki, tapno iyawatna cadacayo tay maysa a cabsatyo a lalaki, ken ni Benjamin. Ket no maulilaac cadagiti annacco, maulilaac.

15 Ket dagiti lallaki innalada ti sagut, ket nangalada ti pinaminduada a pirac iti imada, ken ni Benjamin; ket timmacderda, ket napanda simmalog sadi Egipto, ket nagtacderda iti saclang ni Jose.

16 Ket idi ni Jose nakitana ni Benjamin a cadduada, kinunana iti panguloen ti balayna, Ipanmo dagitoy a lallaki idiay balay, ken pumartica, ken agsaganaca; ta dagitoy a lallaki makipangaldawda caniac.

17 Ket ti lalaki inaramidna ti imbilin ni Jose; ket ti lalaki inserrecna dagiti lallaki iti balay ni Jose.

18 Ket dagiti lallaki nagbutengda, gapu ta naipanda idiay balay ni Jose; ket kinunada, Maipuon iti daydi pirac a naisubli cadagiti supsupottayo idi damo nga iseserrectayo; tapno agsapul iti pangidarumanna cadatayo, ken tiliwennatayo, ken alaennatayo a tagabuen, ken dagiti as-asnotayo.

19 Ket isuda immasidegda iti panguloen ti balay ni Jose, ket nakisaritada kencuana idiay ruangan ti balay,

20 Ket kinunada, O apo, kinapudnoanna immaycami simmalog idi damona nga gumatang ti taraon:

21 Ket naaramid nga, idi dimtengcami iti nagsangbayanmi, linuctanmi dagiti supsupotmi, ket, adtoy, ti pirac iti tunggal maysa adda idi ti wangawangan ti supotna, ti piracmi iti met la gatadna: ket incuyogmi manen cadagiti im-imami.

22 Ken sabali met a pirac ti incuyogmi cadagiti im-imami nga paggatang ti taraon: dimi nga ammo no asino ti nagicabil daydi piracmi cadagiti supsupotmi.

23 Ket kinunana, Talna coma cadacayo, dicayo agbuteng: ti Diosyo, ken ti Dios ni amayo, intedna cadacayo ti gameng cadagiti supsupotyo: adda idi caniac ti piracyo. Ket inruarna ni Simeon cadacuada.

24 Ket ti lalaki impanna dagiti lallaki iti balay ni Jose, ket iniccanna ida ti danum, ket binuggoanda dagiti sacsacada; ket iniccanna dagiti as-asnoda ti kinnanda.

25 Ket insaganada ti sagut a maipaay iti iyaay ni Jose iti tengnga ti aldaw: ta nangegda idi nga makipanganda sadiay.

26 ś Ket idi ni Jose simmangpet iti balayna, impanda kencuana ti sagut nga adda cadagiti im-imada iti uneg ti balay, ket nagtamedda kencuana agingga iti daga.

27 Ket sinaludsodna cadacuada no casano ti salun-atda, ket kinunana, Ni amayo nasalun-at pay, daydi lakay nga sinaritayo? Sibibiag pay isuna?

28 Ket simmungbatda, Ti adipenmo nga amami ket naimbag ti salun-atna, sibibiag pay isuna. Ket indumogda dagiti ul-uloda, ket nagtamedda.

29 Ket isu intangadna dagiti matmatana, ket nakitana ni cabsatna a Benjamin, anac a lalaki ni inana, ket kinunana, Daytoy cadi ti inaudi a cabsatyo a lalaki, nga imbagayo caniac? Ken kinunana, ti Dios paraburannaca coma, anacco.

30 Ket ni Jose nagdardaras; ta ti pusona natignay gapu ti cabsatna: ket binirocna no sadino ti pagsangitanna; ket simrec iti siledna, ket nagsangit sadiay.

31 Ket binuggoanna ti rupana, ken rimmuar, ket tinengngelna isuna, a kunana, Mangicabilcayo ti canen.

32 Ket incabilda ti canenna a maipaay kencuana, ken ti canenda nga is-isuda, ken ti canen dagiti Egipcios, a nakipangan kencuana, nga nailasinda met: gapu ta dagiti Egipcios dida mabalin ti makipangan cadagiti Hebreos; ta daytoy ket macarimon cadagiti Egipcios.

33 Ket nagtugawda ti sangoananna, ti inauna cas iti calintegan ti pannacayanacna, ken ti inaudi a cas iti kinaubingna: ket dagiti lallaki nagsidsiddaawda iti maysa ken maysa cadacuada.

34 Ket isu nangala ken nangibaon iti canenda nga aggapu iti saclangna: ngem ti biang ni Benjamin ket maminlima ti caaduna ngem ti biang ti uray siasino cadacuada. Ket imminumda, ken nakipagragsacda kencuana.

CAPITULO 44

1 Ket binilinna ti panguloen ti balayna, a kinunana, Punnoem ti supsupot dagiti lallaki iti taraon, iti agingga ti maawitda, ken icabilmo ti pirac ti tunggal maysa dagitoy a lallaki iti wangawangan ti supotna.

2 Ket icabilmo ti copac, ti copa a pirac, ti wangawangan ti supot ti inaudi, agraman ti pirac nga igatangna ti taraon. Ket inaramidna a cas ti sao ni Jose nga insaona.

3 Idin a ti bigat limmawagen, dagiti lallaki napalubosanda, isuda ken dagiti as-asnoda.

4 Ket idi nacaruardan iti ili, ngem dida pay la nacaadayu, ni Jose kinunana iti pangulo ti balayna, Tumacderca, surotem dagidiay a lallaki; ket intono macamacammo idan, cunam cadacuada, Ania ti gapuna nga sinubadanyo iti dakes ti naimbag?

5 Saan aya a daytoy iti pagin-inuman ti apoc, ken isu a pagoc-ocomanna? inaramidyo ti dakes daytoy a gapuananyo.

6 ś Ket nacamacamna ida, ket sinaona cadacuada dagitoy nga agcacapadis nga balicas.

7 Ket kinunada kencuana, Apay met nga ti apoc ket casta dagiti sasaoenna? Ti Dios dina ipalubos a dagitoy nga ad-adipenmo ket aramidenda ti casta a banag:

8 Adtoy, ti pirac, a nasaracanmi ti wangawangan dagiti supsupotmi, incuyogmi manen kenca nanipud iti daga ti Canaan: casano ngarud ti panagtacawmi iti balay ni apom iti pirac wenno balitoc?

9 No siasinonto cadagiti ad-adipenmo ti pacasaracam, matay coma, ket agbalincamto pay a tagabu ni apomi.

10 Ket kinunana, Ita ngarud maaramid a cas sinaoyo; iti daydiay pacasaracacto isu ti adipenecto; ket dacayo awanto ti pacabasolanyo.

11 Idi ngarud nagdardarasda nga indissaag ti tunggal supotna iti daga, ket naluctan ti supot ti tunggal maysa.

12 Ket sinukimatna, nga inrugina iti inauna, ket lineppasna iti inaudi: ket ti copa nasaracan iti supot ni Benjamin.

13 Idin rinay-abda dagiti cawcawesda, ket kinargaan ti tunggal maysa ti asnona, ket nagsublida iti ili.

14 ś Ket ni Juda ken dagiti cacabsatna napanda iti balay ni Jose; ta isu adda pay la idi sadiay: ket nagpaclebda iti sangoananna agingga iti daga.

15 Ket ni Jose kinunana cadacuada, Ania nga aramid daytoy nga nagapuananyo? dicayo cadi ammo a maysa a tao a cas caniac ket mabalinco unay ti mangocom?

16 Ket ni Juda kinunana, Ania ngarud ti saoenminto ken apoc? ania ngata ti maibagami? wenno ania ngata ti pangpanecnecminto? Ti Dios inpalgacna ti kinadakes dagiti ad-adipenmo: adtoy, dacami dagiti ad-adipen ni apoc, dacami amin, ken daydiay nga iti copa nasaracan.

17 Ket kinunana, ti Dios dina ipalubos nga aramidec iti casta: ngem ti tao nga cadagiti imana ti copa nasaracan, isunto ti agbalin nga adipenco; ngem no maipapan dacayo, incayon a sitatalna ken ni amayo.

18 ś Idin ni Juda immasideg kencuana, ket kinunana, O, apoc, palubosam toy adipenmo, dawatec kenca, nga agsao iti maysa a balicas cadagiti laplapayag ni apoc, ket saan coma a ti pungtotmo gumil-ayab itoy adipenmo: ta sica casca ken Faraon met laeng.

19 Ni apoc inintuudna cadagiti ad-adipenna, a kinunana, Adda amayo, wenno cabsatyo a lalaki?

20 Ket kinunami ken apoc, Adda amami, lumacayen, ken maysa nga anac a lalaki ti kinalacayna, ubing a bassit; ket ti cabsatna a lalaki natayen, ket isu la ti natda iti inana, ket ni amana ay-ayatenna isuna.

21 Ket sica kinunam cadagiti ad-adipenmo, Iyegyo isuna caniac, tapno mingmingac isuna cadagiti matac.

22 Ket kinunami ken apoc, Ti ubing dina mapanawan ni amana: ta no panawanna ni amana, ni amana ket matay.

23 Ket sica kinunam cadagiti ad-adipenmo, Malacsid nga ti inaudi a cabsatyo a lalaki makicuyog cadacayo, dicayonto makitan ti rupac ni caanoman.

24 Ket naaramid nga idi dimtengcami ken ni amami nga adipenmo, sinaritami kencuana dagiti sinao ti apoc.

25 Ket ni amami kinunana, Incayo manen, ken gumatangcayo iti bassit a taraontayo.

26 Ket kinunami, Dicami mapan: no ti cabsatmi nga inaudi a lalaki maicuyogmi, incamto sumalog ngarud: ta saanmi a mabalin a kitaen ti rupa ti lalaki, malacsid no ti inaudi a cabsatmi a lalaki cumuyog cadacami.

27 Ket ti adipenmo nga amac kinunana cadacami, Ammoyo nga ti asawac inpasngayannac ti dua nga annac a lallaki:

28 Ket ti maysa pinanawannac, ket kinunac, Pudno a napirsapirsayen; ket diac nakita isuna nanipud idin:

29 Ket no alaenyo daytoy met caniac, ket dakes ti mapasamac kencuana, dacayo pagbabaenyonto dagiti ub-ubanco a silaladingit agpapan ken tanem.

30 Ita ngarud no dumanonacto ken adipenmo nga amac, ket ti ubing awanto a cacuyogmi; makitkita nga ti biagna ket naisinggalut iti biag ti ubing;

31 Maaramidto a no, makitana a ti ubing ket saanmi a cacuyog, nga ipataynanto: ket dacami nga ad-adipenmo ibabadanto dagiti ub-uban ti adipenmo nga amami a silaladingit agpapan ken tanem.

32 Ta toy adipenmo nagbalin nga agsungbat ita ubing ken ni amac, a kinunac, No diacto isubli isuna kenca, siacto ngarud ti akinbasol ken amac iti agnanayon.

33 Iti casta ngarud, dawatec kenca, ipalubosmo coma toy adipenmo nga agbati a sucat ti ubing a tagabuen ti apoc; ket palubosam ti ubing a maicuyog cadagiti cacabsatna a lallaki.

34 Ta casanonto iti isasaclangco ken amac, nga ti ubing ket awan a kimmuyog caniac? ket apaman nalabit makitacto ti dakes nga umayto ken ni amac.

CAPITULO 45

1 Idin ni Jose saanen a macaibtur cadagiti amin nga agtactacder ti sibayna; ket nagpuccaw, Pagtalawenyo ti amin a tao ti saclangco. Ket awan natda nga tao idi kencuana, ket ni Jose impabigbigna isuna cadagiti cacabsatna.

2 Ket nagsangit iti napigsa: ket dagiti Egipcios ken dagiti nagtaeng iti balay ni Faraon nangegda.

3 Ket ni Jose kinunana cadagiti cacabsatna, Siac ni Jose; sibibiag pay la ni amac? Ket dagiti cacabsatna dida nacasungbat kencuana; gapu ta nariribucda iti sangoananna.

4 Ket ni Jose kinunana cadagiti cacabsatna, Umasidegcayo caniac, dawatec cadacayo. Ket immasidegda. Ket kinunana, Siac ni Jose a cabsatyo, nga inlacoyo a naipan sadi Egipto.

5 Ita ngarud dicayo agladingit, wenno agpungtot cadagiti bagbagiyo, gapu ta inlacodac ditoy: ti Dios ket imbaonnac nga inyuna cadacayo tapno mamagbiagac.

6 Ta cadagitoy a dua a tawen nagsacnap ti bisin iti daga: ket adda pay lima a tawen a natda, isu nga awanto ti matalon wenno maapit.

7 Ket ti Dios imbaonnac nga inyuna cadacayo tapno mamagtuloy ti cabibiagyo ditoy daga, ken mangispal dagiti bibiagyo babaen iti dackel a pannacaisalacan.

8 Iti casta saan a dacayo ti nangibaon caniac ditoy, no di ket ti Dios: ket inaramidnac a pannacaama ni Faraon, ken apo ti isuamin iti balayna, ken agturay iti amin a daga ti Egipto.

9 Agdarascayo, ket sumang-atcayo ken amac, ket cunayo kencuana, Castoy ti cuna ni anacmo a Jose, ti Dios inaramidnac nga apo iti amin nga Egipto: sumalogca nga umay caniac, dica agtactac:

10 Ket agnaedcanto iti daga nga Gosen, ken addacanto iti asideg caniac, sica, ken dagiti annacmo, ken dagiti annac dagiti annacmo, ken dagiti an-animalmo a babassit, ken dagiti an-animalmo a dadackel, ken amin nga adda kenca:

11 Ket sadiay siac taraonancanto; ta adda pay laeng natda a lima a tawen ti bisin; amangan sica, ken ti sangngacabbalayam, ken amin nga adda kenca, umay ti ipapanglaw.

12 Ken, adtoy, dagiti matayo makitada, ken dagiti matmata ni Benjamin a cabsatco, a ti ngiwatco isu ti makisasao cadacayo.

13 Ket ipacaammoyonto ken ni amac iti amin a dayawco ditoy Egipto, ken amin dagiti nakitayo; ket agdarascayo ken iyegyo nga isalog ni amac ditoy.

14 Ket inapungolna ti tengnged ni cabsatna a Benjamin, ket nagsangit; ket ni Benjamin nagsangit met a siaapungol iti tengnged ni cabsatna.

15 Mainayon pay ket inagcanna amin dagiti cacabsatna a lallaki, ket nagsangit cadacuada: ket iti calpasanna daytoy dagiti cacabsatna nakisaoda kencuana.

16 ś Ket nagdinamag daytoy a nangegan iti balay ni Faraon, a kunkunada, dagiti cacabsat ni Jose ket immayda: ket nacaay-ayo unay ken Faraon, ken cadagiti ad-adipenna.

17 Ket ni Faraon kunana ken Jose, Ibagam cadagiti cacabsatmo, Aramidenyo daytoy; cargaanyo dagiti an-animalyo, ket incayo, mapancayo sadiay daga a Canaan;

18 Ket alaenyo ni amayo ken dagiti sangcabbalayanyo, ket umaycayo caniac: ket itdecto cadacayo ti nasayaat ti daga nga Egipto, ket mangancayto iti taba iti daga.

19 Ita ta nabilincayon, aramidenyo daytoy; mangalacayo dagiti pagluganan ditoy daga nga Egipto a maipaay cadagiti ubbingyo, ken dagiti assawayo, ket alaenyo ni amayo, ket umaycayo.

20 Maysa pay dicayo icascaso dagiti alicamenyo; ta ti nasayaat iti amin a daga ti Egipto isu ti cucuayo.

21 Ket dagiti annac ti Israel inaramidda a casta: ket ni Jose iniccanna ida dagiti pagluganan, cas imbilin ni Faraon, ket iniccanna ida ti balonenda iti dalanda.

22 Cadacuada amin iniccanna iti tunggal maysa iti pagsucatan a pagan-anay; ngem ni Benjamin iniccanna iti tallogasut a bagi ti pirac, ken lima a pagsucatan a pagan-anay.

23 Ket ken amana impaoitna iti castoy; sangapulo nga as-asno a nagawit cadagiti casayaatan a banbanag ti Egipto, ken sangapulo a babbai nga as-asno a nagawit iti bagas ken tinapay ken sida a balon ni amana ti dalan.

24 Iti casta imbaonna dagiti cacabsatna a lallaki, ket nagluasda: ket kinunana cadacuada, Kitaenyo ta dicayo summiasi iti dalan.

25 ś Ket nagluasda a rimmuar sadi Egipto, ket dimtengda idiay daga ti Canaan ken Jacob nga amada.

26 Ket imbagada kencuana, a kinunada, ni Jose ket sibibiag pay laeng, ket isu ti agturay iti amin a daga ti Egipto. Ket ti puso ni Jacob naglusdoy, ta dina pinati ida.

27 Ket imbagada kencuana amin dagiti sinasao ni Jose, nga imbalicasna idi cadacuada: ket idi nakitana dagiti luglugan nga impatulod ni Jose nga pangala kencuna, ti espiritu ni Jacob nga amada napabiag:

28 Ket ni Israel kinunana, Isunan; ni Jose nga anacco a lalaki ket sibibiag pay met laeng: mapanac ken kitaec isuna sacbay iti ipapatayco.

CAPITULO 46

1 Ket ni Israel nagluas agraman amin a cucuana, ket dimmanon sadi Beer-seba, ket nangipaay cadagiti datdaton iti Dios ni amana nga Isaac.

2 Ket ti Dios nakisao ken Israel cadagiti sirsirmata ti rabii, ket kinunana, Jacob, Jacob, Ket isu kinunana, Siac adtoyac.

3 Ket kinunana, Siac ti Dios, ti Dios ni amam: dica agbuteng a sumalog sadi Egipto; ta sadiay aramidencanto a dackel a nacion:

4 Cuyogencanto a sumalog sadi Egipto; ket awan iti duduana nga isublicanto manen: ket ni Jose isaadnanto ti imana cadagiti matmatam.

5 Ket ni Jacob nagrubbuat sadi Beer-seba: ket dagiti annac a lallaki ni Israel innalada ni Jacob nga amada, ken dagiti ubbingda, ken dagiti assawada, cadagiti luglugan nga inbaon ni Faraon a paglugananda.

6 Ket innalada dagiti an-animalda, ken dagiti cucuada, a nasapsapulanda idiay daga a Canaan, ket dimmanonda sadi Egipto, ni Jacob, ken amin nga putotna a naicuyog kencuana:

7 Dagiti annacna a lallaki, ken dagiti annac a lallaki dagiti annacna a lallaki a naicuyog kencuana, dagiti annacna a babbai, ken dagiti annac a babbai dagiti annacna a lallaki, ken amin a putotna incuyogna ida sadi Egipto.

8 ś Ket dagitoy dagiti nagnagan dagiti annac ni Israel, nga simrec sadi Egipto, ni Jacob ken dagiti annacna a lallaki: ni Ruben, anac nga inauna ni Jacob

9 Ket dagiti annac a lallaki ni Ruben; ni Hanoch, ken Phallu, ken Hezron, ken Carmi.

10 ś Ket dagiti annac a lallaki ni Simeon; ni Jamuel, ken Jamin, ken Ohad, ken Jachin, ken Zohar, ken Saul nga anac a lalaki ti babai a taga Canaan.

11 ś Ket dagiti annac a lallaki ni Levi; ni Gerson, Coath, ken Merari.

12 ś Ket dagiti annac a lallaki ni Juda; ni Er, ken Onan, ken Sela, ken Phares, ken Zara: ngem da Er ken Onan natayda idiay daga a Canaan. Ket dagiti annac a lallaki ni Phares isuda idi da Hezron ken Hamul.

13 ś Ket dagiti annac a lallaki ni Issacar; ni Thola, ken Phua, ken Job, ken Simron.

14 ś Ket dagiti annac a lallaki ni Zabulon; ni Sered, ken Elon, ken Jahiell.

15 Dagitoy dagiti annac a lallaki ni Lea, nga inyanacna ken Jacob idiay Padan-aram, ken ni Dina nga anacna a babai: dagup dagiti cararrua dagiti annacna a lallaki ken annacna a babbai ket tallopulo ket tallo.

16 ś Ket dagiti annac a lallaki ni Gad; ni Ziphion, ken Aggi, Suni, ken Ezbon, Heri, ken Arodi, ken Areli.

17 ś Ket dagiti annac a lallaki ni Aser; ni Jimna, ken Ishua, ken Isui, ken Beria, ken ni Sara a cabsatda a babai: ken dagiti annac a lallaki ni Beria; ni Heber, ken Malchiel.

18 Dagitoy dagiti annac a lallaki ni Zilpa, isu nga inted ni Laban ken Lea nga anacna a babai, ket inyanacna ken Jacob, iti sangapuloda ket innem a carcararrua.

19 Ket dagiti annac a lallaki ni Raquel nga asawa ni Jacob; ni Jose, ken Benjamin.

20 ś Ket ken Jose iti daga nga Egipto nayanac da Manases ken Ephraim, isuda nga ni Aseneth nga anac a babai ni Potiphera a padi sadi On inyanacna kencuana.

21 ś Ket dagiti annac a lallaki ni Benjamin isuda idi da Bela, ken Becher, ken Asbel, Gera, ken Naaman, Ehi, ken Ros, Moppim, ken Oppim, ken Ard.

22 Dagitoy dagiti annac a lallaki ni Raquel, a nayanac ken Jacob: amin a cararrua idi ket sangapulo ket uppat.

23 ś Ket dagiti annac a lallaki ni Dan; ni Husim.

24 ś Ket dagiti annac a lallaki ni Nephtali; ni Jahzeel, ken Guni, ken Jeser, ken Shillem.

25 Dagitoy dagiti annac a lallaki ni Bilha, isu nga inted ni Laban ken Raquel nga anacna a babai, ket dagitoy inyanacna ken Jacob: amin dagiti cararrua ket pitoda.

26 Amin nga cararrua nga naicuyog ken Jacob a napan Egipto, nga nagtaud iti pus-ongna, malacsid dagiti assawa dagiti annac a lallaki ni Jacob, dagupda amin a cararrua ket innem a pulo ket innem;

27 Ket dagiti annac a lallaki ni Jose, a nayanac kencuana sadi Egipto, duada idi a cararrua: dagup amin nga cararrua iti balay ni Jacob, a simrec sadi Egipto, pitopuloda idi.

28 ś Ket imbaonna ni Juda nga immuna ngem isu a napan ken Jose, tapno ipakitana ti dalan kencuana nga agturong sadi Gosen; ket dimtengda sadiay daga a Gosen.

29 Ket ni Jose insaganana ti luganna, ket simmang-at a sumabet ken Israel nga amana, idiay Gosen, ket nagparang kencuana; ket inapungolna ti tengngedna, ket nagsangit cadagiti tengngedna iti nabayag.

30 Ket ni Israel kinunana ken Jose, Itan mabalinco ti matay, ta nakitacon ta rupam, gapu ta sibibiagca pay laeng.

31 Ket ni Jose kinunana cadagiti cacabsatna a lallaki, ken dagiti cabbalay ni amana, Sumang-atacto, ken iyammocto ken Faraon, ket kunakto kencuana, Dagiti cacabsatco a lallaki, ken dagiti cabbalay ni amac, nga adda idi ti daga a Canaan, immaydan caniac;

32 Ket dagiti lallali ket papastorda, ta dagiti pagsapulanda ket agpacan ti animal; ket intugotda dagiti an-animalda, dagiti pangpangenda, ken amin nga adda cadacuada.

33 Ket maaramidto, nga ni Faraon ayabannacayto, ket saludsudennanto, Ania iti pagsapulanyo?

34 Nga isungbatyonto, Dagiti pagsapulan toy ad-adipenmo ket maipapan cadagiti animal manipud kinaubingmi agpapan ita, dacami amin, ken dagiti pay met ammami: tapno agnaedcayo coma iti daga a Gosen; ta isuamin a papastor ket macarimon cadagiti Egipcios.

CAPITULO 47

1 Idin ni Jose napan ket imbagana ken Faraon, ket kinunana, Ni amac ken dagiti cacabsatco, ken dagiti an-animalda, ken dagiti pangpangenda, ken amin nga adda cadacuada, ket naggapuda iti daga a Canaan; ket, adtoy, addadan iti daga a Gosen.

2 Ket nangala cadagiti cacabsatna, lima a lallaki, ket indatagna ida ken Faraon.

3 Ket ni Faraon kinunana cadagiti cacabsatna, Ania ti pagsapulanyo? Ket kinunada ken Faraon, Dagiti ad-adipenmo ket papastor dagiti an-animal, dacami, ken dagiti pay met ammami.

4 Ket innayonda pay nga kinuna ken Faraon, Ta iti panagnaedmi iti daga isu nga immaycami; ken dagiti ad-adipenmo awanen ti pagpacananda cadagiti an-animalda; ta ti bisin nagpalalo idiay daga ti Canaan: ita ngarud, dawatenmi kenca, ipalubosmo cadi nga dagiti ad-adipenmo agnaedda coma iti daga a Gosen.

5 Ket ni Faraon kinasaona ken Jose, a kinunana, Ni amam ken dagiti cacabsatmo immayda kenca:

6 Ti daga nga Egipto adda iti saclangmo; dagiti casasayaatan iti daga ni amam ken dagiti cacabsatmo pagnaedem; iti daga nga Gosen agnaedda coma: ket no adda ammom a nagaget cadacuada, icabilmo ngarud ida nga agturay cadagiti an-animalco.

7 Ket ni Jose inserrecna ni Jacob nga amana, ket indatagna iti saclang ni Faraon: ket ni Jacob binendicionanna ni Faraon.

8 Ket ni Faraon sinaludsudna ken Jacob, Manoda cadi dagiti tawenmo?

9 Ket ni Jacob kinunana ken Faraon, Dagiti al-aldaw dagiti tawtawen a panagpagpagnac sangagasut ket tallopuloda a tawen: bassit ken dakes dagiti al-aldaw dagiti tawtawen ti panagbiagco, ket saanda a nacadanon cadagiti al-aldaw dagiti tawtawen ti panagbiag dagiti ammac cadagiti al-aldaw nga inda met panagpagpagna.

10 Ket ni Jacob binendicionanna ni Faraon, ket rimmuar iti saclang ni Faraon.

11 ś Ket ni Jose pinagyanna ni amana ken dagiti cacabsatna, ket pinagtagicuana ida iti daga nga Egipto, iti casasayaatan nga daga, iti daga ti Rameses, a cas ni Faraon inbilinna.

12 Ket ni Jose tinaraonanna ni amana, ken dagiti cacabsatna, ken amin dagiti sangacabbalay ni amana, iti canen, a cas mayannatup ti tunggal sangacabbalayan.

13 śKet awan idi ti taraon iti amin a daga; ta ti bisin ket napalalo unay, iti casta ti daga nga Egipto ken ti amin a daga ti Canaan napacapsuyanda maipuon iti bisin.

14 Ket ni Jose inucconna amin a pirac a nasaracan iti daga nga Egipto, ken iti daga a Canaan, ta gapu ti taraon nga ginatangda: ket ni Jose impanna ti pirac iti balay ni Faraon.

15 Ket idi nga ti pirac naibusen iti daga nga Egipto, ken iti daga a Canaan, amin dagiti Egipcios napanda ken Jose, ket kinunada, Iccannacami ti canen: ta apayapay a mataycami coma ti sangoanam? ta ti pirac ket naibus.

16 Ket ni Jose kinunana, Itdenyo dagiti an-animalyo; ket iccancayto gapu cadagiti an-animalyo, no naibus ti pirac.

17 Ket impanda dagiti an-animalda ken Jose: ket ni Jose iniccanna ida iti taraon a sucat dagiti cabcabalyo, ken dagiti an-animal a babassit, ken dagiti bacbaca, ken dagiti as-asno: ket pinacanna ida ti taraon a sucat dagiti an-animalda iti daydi a tawen.

18 Ket idi nalpas daydi a tawen, immayda kencuana idi tawen a maicaddua, ket kinunada kencuana, Dicamto ilibac ken apoc, nga dagiti piracmi ket nagastosen; ket ket adda pay a cucuan ti apoc dagiti arban dagiti an-animal; awanen ti nabati a makitan ti apoc, no di laeng dagiti bagbagimi, ken dagiti dagdagami:

19 Apayapay mataycami coma iti imatang dagita matam, dacami ken dagiti dagdagami? gatangen nacami agraman dagiti dagdagami a sucat iti taraon, ket dacami ken dagiti dagdagami ad-adipennacamto ni Faraon: ket iccannacami iti imula, tapno agbiagcami, ket saan a matay, tapno ti daga di agbalin a langalang.

20 Ket ni Jose ginatangna amin a daga ti Egipto nga agservi ken Faraon; ta dagiti Egipcios inlacoda ti tunggal maysa ti pagtalonanna, maipuon iti panagpalalo ti bisin cadacuada: ket ti daga tinagicua ni Faraon.

21 Ket no maipapan cadagiti umili, pinaalisna ida cadagiti il-ili nanipud ti maysa a pungto ti beddeng ti Egipto aginggana ti tungpal iti sabali a pungtona.

22 Dagiti la dagdaga dagiti papadi ti dina ginatang; gapu ta dagiti papadi adda idi bingayda nga aggapu ken Faraon, ket nanganda cadagiti bingayda nga inted ni Faraon caniada: iti casta dida inlaco dagiti dagdagada.

23 Idin ni Jose kinunana cadagiti umili, Adtoy, siac ginatangcayon ita nga aldaw ken dagiti dagdagayo a maipaay ken Faraon: adtoy, ti bukel nga imulayo, ket mulaanyonto ti daga.

24 Ket maaramidto intono panagaduna, nga itedyonto ti apagcalima ken Faraon, ket ti apagcapat cucuayonto, nga imulayo ti pagtalonan, ken taraonyo, ken agraman dagiti cabbalayyo, ken taraon dagiti ubbingyo a babassit.

25 Ket kinunada, Inispalmon dagiti bibiagmi: macasaraccami coma iti parabur ti imatang ni apoc, ket ad-adipennacaminto ni Faraon.

26 Ket ni Jose inaramidna nga allagaden iti amin a daga ti Egipto agpapan pay ita nga aldaw, nga ni Faraon ket cucuana iti apagcalima; malacsid dagiti daga dagiti papadi, nga saan a tinagicua ni Faraon.

27 ś Ket ni Israel nagnaed iti daga nga Egipto, iti daga a Gosen; ket nacagun-odda cadagiti sansanicua sadiay, ket rimmang-ayda, ken immaduda ti napalalo.

28 Ket ni Jacob nagyan iti daga nga Egipto iti sangapulo ket pito a tawen: iti casta dagiti amin nga aldaw ti panagbiag ni Jacob ket sangagasut uppat a pulo ken pito a tawen.

29 Ket iti oras umadani nga ni Israel ket masapul a matay: ket inayabanna ni anacna a Jose, ket kinunana kencuana, No ita nacasaracac ti parabur cadagita imatangmo, icabilmo, dawatec kenca, ta imam iti babaen toy luppoc, ket ipaayannac iti kinaasi ken kinapudno; saannac coma nga itabon, dawatec kenca, ditoy Egipto:

30 Ngem matayacto a maitipon cadagiti ammac, ket ipanawnacto nga iruar ditoy Egipto, ket itabonnacto iti nacaitabonanda a disso. Ket isu kinunana, Aramidecto a cas iti sinaom.

31 Ket kinunana, Agsapataca caniac. Ket isu nagsapata kencuana. Ket ni Israel nagtamed isuna ti olloanan iti iddana.

CAPITULO 48

1 Ket naaramid calpasan dagitoy a banbanag, nga adda maysa a nangibaga ken Jose, Adtoy, ni amam ket masakit: ket innalana a cadduana dagiti dua nga annacna a lallaki, da Maneses ken Ephraim.

2 Ket maysa ti nangibaga ken Jacob, a kinunana, Adtoy, ni Jose nga anacmo um-umay kenca: ket ni Israel pinatibkerna isuna, ket nagtugaw iti pagiddaan.

3 Ket ni Jacob kinunana ken Jose, ti Dios a Mannacabalin-amin nagparang caniac idiay Luza sadiay daga ti Canaan, ket binendicionnannac.

4 Ket kinunana caniac, Adtoy, pagbungaencanto, ken paadduencanto, ken aramidencanto a maysa a bunggoy dagiti inilin-ili; ket itdecto daytoy daga cadagiti putputotmo iti calpasam a tagicuaen nga agnanayon.

5 ś Ket ita dagiti dua nga annacmo a lallaki, da Ephraim ken Manases, a nayanac kenca iti daga nga Egipto idi diac pay immay kenca ditoy Egipto, cucuac ida; a cas da Ruben ken Simeon, cucuacto ida.

6 Ket dagiti annacmo, nga putotem calpasan cadagitoy, cucuamto ida, agnagandanto a mayannurot iti nagan dagiti cacabsatda iti panagtawidda.

7 Ket no maipapan caniac, idi naggapuac idiay Padan, ni Raquel natay iti arpadco iti dalan idiay daga a Canaan, idi adayu pay laeng bassit ti Ephrata: ket intabonco isuna iti dalan a mapan sadi Ephrata; daytoy ket isu met laeng ti Belen.

8 Ket ni Israel kinitana dagiti annac ni Jose, ket kinunana, Siasinoda dagitoy?

9 Ket ni Jose kinunana ken amana, Isuda dagiti annacco a lallaki, nga inted ti Dios caniac iti daytoy a disso. Ket kinunana, Iyegmo ida, dawatec kenca, caniac, ket bendicionnacto ida.

10 Itan dagiti matmata ni Israel ket kimmudrepdan gapu ti panaglacayna, iti casta saanen a macakita. Ket inyasidegna isuda kencuana; ket inagcanna ida, ken inaracupna ida.

11 Ket ni Israel kinunana ken Jose, Siac indiac impagarup nga makitac ta rupam: ket, adtoy, ti Dios impalubosna a makitac pay dagiti putotmo.

12 Ket ni Jose inruarna ida nanipud iti nagbaetan dagiti tumengna, ket intamedna ti rupana iti daga.

13 Ket ni Jose innalana ida a dua, ni Ephraim iti macanawanna nga agturong iti ima a macatigid ni Israel, ket ni Manases iti macatigidna nga agturong iti ima a macanawan ni Israel, ket inyasidegna ida kencuana.

14 Ket ni Israel inyunnatna ti imana a macanawan, ket impatayna ti ulo ni Ephraim, isu nga inaudi, ken ti imana a macatigid iti ulo ni Maneses, inturongna dagiti im-imana a sia-ammo; ta ni Maneses isu idi ti inauna.

15 ś Ket binendicionanna ni Jose, ket kinunana, ti Dios, nga dagiti ammac ni Abraham ken Isaac nakipagnada, ti Dios nga nangtaraon caniac iti amin a panagbiagco agingga ita nga aldaw,

16 Ti Angel nga nangispal caniac iti amin a dakes, bendicionanna coma dagiti ubbing; ket ti naganco mainagan coma cadacuada, ken ti nagan dagiti ammac ni Abraham ken Isaac; ket umaduda coma iti nawadwad iti tengnga ti daga.

17 Ket idi ni Jose nakitana nga ni amana impatayna ti macanawan nga imana iti ulo ni Ephraim, saan a nacaay-ayo kencuana: ket ingngatona ti ima ni amana, tapno maiccat iti ulo ni Ephraim ket mayallatiw iti ulo ni Manases.

18 Ket ni Jose kinunana ken amana, Saan a casta, amac: ta daytoy isu ti inauna; ipataymo ta imam a macanawan iti ulona.

19 Ket ni amana nagmadi, ket kinunana, Ammoc, anacco, ammoc: isu met agbalinto a maysa a ili, ket isu dackelto met: ngem kinapudnoanna ti inaudi a cabsatna dacdackelto ngem isu, ket ti putotna agbalinto nga adu a nasnacion.

20 Ket binendicionanna ida idi nga aldaw, nga kinuna, Kenca ti Israel mamendicionto, a kunkunana, ti Dios aramidennaca a cas ken Ephraim ken cas ken Manases: ket inyun-unana ni Ephraim ngem ni Manases.

21 Ket ni Israel kinunana ken Jose, Adtoy, matayac: ngem ti Dios addanto cadacayo, ken isublinacayto manen iti daga dagiti ammayo.

22 Maysa pay intedco kenca iti maysa a bingay a nacaipangpangronaam ngem cadagiti cacabsatmo, isu nga innalac cadagiti ima ti Amorreo babaen iti campilanco ken iti panac.

CAPITULO 49

1 Ket ni Jacob inayabanna dagiti anacna a lallaki, ket kinunana, Agtitiponcayo, tapno saritaec cadacayo ti mapasamac cadacayo cadagiti maud-udi nga al-aldaw.

2 Agtitiponcayo, ket denggenyo, dacayo nga annac a lallaki ni Jacob; ket imdenganyo ni Israel nga amayo.

3 Ruben, sica ti inauna nga anacco, ti pannacabalinco, ken ti pangruggian ti pigsac, cangronaan ti caicarian, ken cangronaan ti pannacabalin:

4 Agalla-alla a cas danum, saanca nga maipangpangrona; gapu ta inulim ti pagiddaan ni amam; ken idin tinulawam: isu inulina ti pagiddaac.

5 ś Da Simeon ken Levi agcabsatda; ig-igam ti kinaranggas iti adda cadagiti tataengda.

6 O cararruac, dica sumrec cadagiti palimedda; iti gimongda, ti dayawco, dica makitimpuyog: ta ti pungtotda pinatayda iti maysa a lalaki, ken iti kinasungitda kinalida ti maysa a bacud.

7 Mailunod coma ti gurada, ta nacacarcaro; ken ti pungtotda, ta nacarangranggas: Siac sinasinaecto ida ken Jacob, ken iwarasconto ida iti Israel.

8 ś Juda, sica dagiti cacabsatmo daydayawendacanto: ti imam addanto cadagiti lengnges dagiti cabusormo; dagiti annac ni amam agrucbabdanto kenca.

9 Ni Juda isu ti urbon ti maysa a leon: cadagiti sinamsam, anacco, immulica: nagrucob, nagidda a cas maysa a leon, ken cas maysa a lacay a leon; siasino ti mangriingto kencuana?

10 Ti cetro dinto pumanaw ken Juda, wenno ti sarucod ti agturay cadagiti nagbabaetan dagiti sacsacana, agingga ti Mamagcappia umay; ket isu ti pacaummonganto dagiti tattao.

11 Igalgalutanna ti urbonna iti puon ti uvas, ken ti urbon ti asnona iti napili a puon ti uvas; linabaanna dagiti cawcawesna iti arac, ken ti pagan-anayna iti dara dagiti uvas: 12 Dagiti matana nalabbagadanto cadagiti arac, ken dagiti ngipenna purawdanto cadagiti gatas.

13 ś Ni Zabulon agnaedto cadagiti pagsangladan cadagiti baybay; ket isu ti pagsangbayanto dagiti sasacayan; ket ti beddengna agpatingganto idiay Sidon.

14 ś Ni Isaacar isu ti napigsa nga asno nga agid-idda cadagiti nagbaetan iti dua nga dadagsen:

15 Ket nakitana nga ti inana ket naimbag, ket ti daga ket nacaay-ayo idi; ket imtamedna ti abagana tapno awitenna, ket nagbalin nga adipen iti panagbannog.

16 ś Ni Dan ocomennanto dagiti tattaona, a cas maysa cadagiti tribu ti Israel.

17 Ni Dan maysanto nga uleg iti dalan, maysanto nga carasaen iti dan-a, a cumagat dagiti mucmucod dagiti cabcabalyo, iti casta ti nagsacay matnagto iti licudanna.

18 Inur-urayco ti panangisalacanmo, O APO.

19 ś Ni Gad, parmekento ti maysa nga sangcabuyot: ngem parmekennanto ida iti camaudianan.

20śManipud ken Aser dagiti tinapayna aglaplapusanan, ket isu itednanto dagiti naarian a nanam.

21 ś Ni Nephtali ugsa a babai nga nabaybay-an: mangted cadagiti nasayaat nga balbalicas.

22 ś Ni Jose maysa a nabunga a sanga, uray nabunga a sanga iti sibay ti bubon; nga dagiti sarsaringitna cumalatcatda iti ngato ti bacud:

23 Dagiti pumapana pinarparigatda isuna, ket pinampanada isuna, ken ginurada isuna:

24 Ngem ti ba-ina nagtalinaed iti pigsana, ket dagiti ig-igam dagiti im-imana napapigsada babaen cadagiti im-ima ti mannacabalin a Dios ni Jacob; (isu a naggapuan ti pastor, ti bato ni Israel:)

25 Aggapu pay iti Dios ni amam, ti tumulongto kenca; ken aggapu iti Mannacabalin-amin, ti mamendicionto kenca cadagiti benbendicion ti langit sadi ngato, benbendicion ti yuyeng nga agyan iti baba, benbendicion dagiti sussuso, ken dagiti aanacan:

26 Dagiti benbendicion ni amam dacdackelda idi ngem dagiti benbendicion dagiti capuonac inggana caadaywan dagiti pungto dagiti agnanayon a turturod: dagitoy addadanto iti ulo ni Jose, ken iti corona ti ulona nga naisina idi cadagiti cacabsatna.

27 ś Ni Benjamin isu ti agag-agawto nga cas iti lobo: iti bigat sidaennanto ti sinamsam, ket iti rabii bingayennanto ti inagawan.

28 ś Amin dagitoy isuda dagiti sangapulo ket dua a tribu ti Israel: ket daytoy ti sinao ni amada cadacuada, ket binendicionanna ida; tunggal maysa a cas mayannatup iti pamendicionna binendicionanna ida.

29 Ket imbilinna cadacuada, ket kinunana cadacuada, siac maitiponacto cadagiti cacabaggiac: itabondacto cadagiti ammac idiay rukib nga adda iti talon ni Ephron a Hetheo,

30 Idiay rukib nga adda iti talon idiay Macpela, iti sango ti Mamre, sadiay daga a Canaan, isu a ginatang ni Abraham agraman ti talon ken Ephron a Hetheo tapno tagicuaenna a pagitabonan.

31 Sadiay ti nangitabonanda da Abraham ken Sara nga asawana; sadiay ti nangitabonanda da Isaac ken Rebecca nga asawana; ket idiay intabonco ni Lea.

32 Iti nacagatangan ti talon ken iti rukib nga adda sadiay ket naggapu cadagiti annac ni Heth.

33 Ket idi ni Jacob nalpasnan dagiti panangbilbilinna dagiti annacna, inurnosna dagiti sacsacana iti iddana, ket inyawatna ti cararruana, ket naitipon cadagiti cacabaggianna.

CAPITULO 50

1 Ket ni Jose inapungolna ti rupa ni amana, ket sinangitanna, ken inagcanna.

2 Ket ni Jose binilinna dagiti ad-adipenna a mangngagas tapno embalsamarenda ni amana: ket dagiti mangngagas binalsamarda ni Israel.

3 Ket uppat a pulo nga aldaw ti tinungpalda kencuana; ta casta iti panagtungpal iti al-aldaw cadagiti nabalsamar: ket dagiti Egipcios nakipagleddaangda a maipaay kencuana iti pitopulo nga al-aldaw.

4 Ket calpasan dagiti al-aldaw iti panagleddaang, ni Jose sinaona cadagiti adda ti balay ni Faraon, a kinunana, No ita nacasaracac iti parabur cadagiti matayo, agsaocayo, dawatec cadacayo, cadagiti lapayag ni Faraon, a cunayo,

5 Ni amac inpasapatana caniac, a kinunana, Adtoy, matayac: iti tanemco a kinalic nga agpaay caniac idiay daga a Canaan, idiayto ti pangitabonam caniac. Ita ngarud sumang-atac coma, dawatec kenca, ken itabonco ni amac, ket saacto agsubli manen.

6 Ket ni Faraon kinunana, Sumang-atca, ket itabonmo ni amam, a cas inpasapatana kenca.

7 ś Ket ni Jose simmang-at tapno itabonna ni amana: ket kimmuyog kencuana amin dagiti ad-adipen ni Faraon, dagiti panglacayen iti balayna, ken dagiti amin a panglacayen iti daga nga Egipto,

8 Ken amin dagiti sangngacabbalay ni Jose, ken dagiti lallaki nga cacabsatna, ken dagiti sangacabbalay ni amana: isuna laeng dagidi annacda a babassit, ken dagiti an-animalda a babassit, ken dagiti an-animalda a dadackel, imbatida sadiay daga a Gosen.

9 Ket simmang-at a kimmuyog kencuana dagiti luglugan ken tattao nga nacacabalyo: ket adda idi ti napalalo nga nagdackel a bonggoy.

10 Ket nacagtengda idi iti pagtaltagan idiay Atad, nga adda iti labes ti Jordan, ket sadiay nagleddaangda iti dackel ken napalalo unay nga panagdung-aw: ket inaramidna ti panagleddaang ken amana iti pito nga aldaw.

11 Ket idi dagiti agnaed sadiay a daga, dagiti Cananeo, nakitada iti panagleddaang sadiay pagtaltagan idiay Atad, kinunada, Daytoy ket nacaro a panagleddaang iti biang dagiti Egipcios: isu ti gapuna a napanaganan iti Abel-mizraim, nga adda iti labes ti Jordan.

12 Ket dagiti annacna inaramidda kencuana cas imbilinna cadacuada:

13 Ta dagiti annacna impanda idiay daga a Canaan, ken intabonda idiay rukib ti talon a Macpela, isu a ginatang ni Abraham a nairaman ti talon ni Ephron a Hetheo a tagicuaenna a pagitabonan, sacbay ti Mamre.

14 ś Ket ni Jose nagsubli idiay Egipto, isu, ken dagiti cacabsatna a lallaki, ken amin a kimmuyog kencuana a nangitabon ken amana, calpasan ti panangitabonna ken amana.

15 ś Ket idi a dagiti cacabsat a lallaki ni Jose nakitada nga ni amada natayen, kinunada, nalabit ni Jose guraennatayto, ken di bumurong nga supapacannatayto cadagiti amin a dakes nga inaramidtayo kencuana.

16 Ket nangibaonda ti mangibaga ken Jose, a kinunada, Ni amam imbilinna idi dipay natay, a kinunana,

17 Saoenyonto iti castoy ken Jose, Pacawanem, dawatec kenca itan, ti salungasing dagiti lallaki a cacabsatmo, ken ti basolda; ta dakes ti inaramidda kenca: ket ita, dawatenmi kenca, pacawanem ti salungasing dagiti ad-adipen ti Dios ni amam. Ket ni Jose nagsangit idi nakisaoda kencuana.

18 Ket dagiti cacabsatna napanda met ket nagpaclebda iti sangoanan ti rupana; ket kinunada, Adtoy, dacami dagiti ad-adipenmo.

19 Ket ni Jose kinunana cadacuada, Dicayo agbuteng: ta siac addaac aya iti akem ti Dios?

20 Ngem no maipapan cadacayo, pinanunotyo ti dakes a maicaniwas caniac; ngem ti Dios pinanagemna a naimbag, tapno tungpalenna, cas ita nga aldaw, tapno isalacanna dagiti adu nga tattao nga agbiag.

21 Ita ngarud dicayo agbuteng: siac taraonancayto, ken dagiti annacyo a babassit. Ket liniwliwana ida, ken nagsao nga naimbag cadacuada.

22 ś Ket ni Jose nagnaed sadi Egipto, isu, ken dagiti sangngacabbalay ni amana: ket ni Jose nagbiag iti sangagasut ket sangapulo a tawen.

23 Ket ni Jose nakitana dagiti annac ni Ephraim agingga iti maicatlo a caputotan: dagiti met annac ni Maquir nga anac ni Manases dimmackelda cadagiti tumtumeng ni Jose.

24 Ket ni Jose kinunana cadagiti cacabsatna a lallaki, Matayac: ket ti Dios sarungcarannacayto nga awan iti duduana, ket iruarnacayto ditoy a daga a mapan ti daga nga insapatana ken Abraham, Isaac, ken ni Jacob.

25 Ket ni Jose sinapataanna cadagiti annac ti Israel, a kunkunana, ti Dios awanto iti duduana nga sarungcarannacayto, ket dacayo bunagenyonto dagiti tultulangco manipud ditoy.

26 Ket ni Jose natay, idi nagtawen iti sangagasut ken sangapulo: ket binalsamarda, ket naicabil iti maysa a lungon sadiay Egipto.