|
TAGA GALATIA 1 Ni Pablo, maysa nga apostol, (saan nga iti biang dagiti tattao, ket saan met a gapu iti tao, no di ket gapu ken Jesus Cristo, ken ti Dios Ama, a namagungar kencuana cadagiti natay;) 2 Ken dagiti isuamin a cacabsat nga cacuyogac, ken cadagiti iglesia ti Galacia: 3 Parabur ma-adda coma cadacayo ken talna ti Dios Ama, ken ni Apotayo a Jesus Cristo, 4 Isu a nangited iti bagina gapu cadagiti basbasoltayo, tapno isalacannatayo itoy agdama nga lubong a dakes, a cas mayannurot iti pagayatan ti Dios ken Amatayo: 6 Siac masmasdaawac iti lacayo nga pumanaw iti daydiay a nangawis cadacayo ti parabur ni Cristo tapno sumurotcayo iti sabali nga evangelio: 7 Saan a sabali; no di laeng adda dadduma a mangriribuc cadacayo, ket cayatda coma a ballicogen ti evangelio ni Cristo. 8 Ngem uray dacami, wenno maysa nga angel a naggapu idiay langit, ket icascasabana cadacayo iti sabali nga evangelio a naiduma iti daydiay incascasabami cadacayo, mailunod coma. 9 Cas iti insaomin, casta ti isaoc manen, No adda mangascasaba cadacayo iti sabali nga evangelio a maisupadi iti inawatyo, mailunod coma. 10 Ta gungun-odec aya ti parabur dagiti tattao, wenno ti Dios? wenno ag-agawaac aya nga ay-ayoen dagiti tao? no coma no agawaac pay nga ay-ayoen dagiti tao, saannac coma nga adipen ni Cristo. 11 Ta ipacaammoc, cacabsat, nga ti evangelio nga incascasabac cadacayo ket saan nga mayannurot iti tao. 12 Ta saanco nga inawat iti tao, ket di met naisuro caniac, no di ket gapu iti paltiing ni Jesus Cristo. 13 Ta nadamagyo no casano ti panagbibiagco idi iti pammati dagiti Judio, no casano ti nalabes unay a panangidadanesco idi iti iglesia ti Dios, ken ti panangdadaelco kencuana: 14 Ket nangnangronaac idi iti pammati dagiti Judio ngem cadagiti adu a casadarco idiay ilic, ket naregtaac pay unay cadagiti ug-ugali ti pammati dagidi ammac. 15 Ngem idi kinayat ti Dios, isu a nangilasin caniac nanipud iti tian ni inac, ket inayabannac gapu iti paraburna, 16 Tapno ipaltiingna ti Anacna caniac, tapno isu icascasabac cadagiti Gentil; dagus a diac nagyuman babaen iti lasag ken dara: 17 Ket diac met napan kinita idiay Jerusalem dagiti immun-una nga apostol ngem siac; no di ket napanac idiay Arabia, sa manen nagsubliac idiay Damasco. 18 Ket calpasan ti tallo a tawen simmang-atac idiay Jerusalem a mapan kitaen ni Pedro, ket nakipagnaedac kencuana iti sangapulo ket lima nga aldaw. 19 Ngem cadagiti sabali nga apostol awan ti nakitac cadacuada, no di laeng ni Santiago daydi cabsat ti Apo. 20 Ita no maipapan dagiti isuratco cadacayo, adtoy, iti imatang ti Dios, diac agulbod. 21 Calpasanna napanac cadagiti dagdaga ti Siria ken Cilicia; 22 Ket dida pay ammo iti langac dagiti iglesia ti Judea nga adda ken ni Cristo: 23 Isu nga nadamdamagda laeng, Daydi nangidadanes cadatayo cadagiti naglablabas nga tiempo ket itan icascasabana ti pammati a dinaddadaelna idi. 24 Ket intantan-ocda iti Dios gapu caniac. CAPITULO 2 1 Ket idi calpasan ti sangapulo ket uppat a tawen simmang-atac manen idiay Jerusalem agraman ken Bernabe, ket incuyogco met ni Tito. 2 Ket simmang-atac gapu iti paltiing, ket impalawagco iti sangoananda ti evangelio nga icascasabac cadagiti Gentil, ngem nalimed cadagiti maibilang a panguloen, di la ket ta agtartarayac coma, wenno nagtartarayac, nga awan banbanagna. 3 Ngem uray ni Tito, a naicuyog idi caniac, idinto a taga Grecia, saan a napilit a nacugit: 4 Ket gapu cadagiti sinan-cacabsat a naiserrec a di nadnadlaw, isuda a simrec iti nalimed tapno si-imenda ti wayawaya a cupcupicupanmi ken Cristo Jesus, tapno ipandacami iti pannaca-adipen: 5 Cadacuada dicami immannugot iti panagtuloc, saan, uray no maymaysa nga oras; tapno ti kinapudno ti evangelio agtultuloy coma cadacayo. 6 Ngem iti biang dagidiay a casla maibilangda a panguloen, (uray no ania iti sasaadda idi, awan ti nacaidumaanna caniac: ti Dios saanna a bigbigen ti kinasiasino ti uray ania nga tao:) ta dagidi casla maibilang a panguloen awan ti naitedda caniac: 7 No di ket, idi nakitada a ti evangelio ti saan a pannacacugit ket naitalec caniac, a cas iti evangelio ti pannacacugit naitalec ken Pedro; 8 (Ta ti nagtrabaho ken Pedro iti kinaapostol ti pannacacugit, isu met ti napigsa a nagtrabaho caniac nga maipaay cadagiti Gentil:) 9 Ket idi da Santiago, Cefas, ken Juan, isuda a maibilang nga adigi, nakitada ti parabur a naited caniac, intedda caniac ken ni Bernabe ti ima a macanawan a cas tanda ti pannakicadcaddua; tapno mapancami cadagiti Gentil, ket mapanda iti pannacacugit. 10 Isuna laeng a tartarigagayanda idi a lagipenmi coma dagiti napanglaw; daydi met la nga banag a rinegtaac nga inaramid. 11 Ngem idi immay ni Pedro idiay Antioquia, sinuppiatco a rupanrupa, ta rimsua a nacabiddut. 12 Ta idi saan pay nga immay dagiti naggapu iti biang ni Santiago, nakipangpangan cadagiti Gentil: ngem idi immaydan, nagpalicud ket simmina cadacuada, gapu ta kinabutengna dagiti nacugit. 13 Ket dagidi dadduma cadagidi Judio simminada a cas met kencuana; iti casta uray ni Bernabe nayaw-awan a cas cadagidi dadduma gapu iti panangilimedda. 14 Ngem idi nakitac a dida nagna a sililinteg cas iti kinapudno ti evangelio, kinunac ken Pedro iti sangoananda amin, No sica, idinto a Judioca, agbiagca a casla cadagiti Gentil, ket saan a cas cadagiti Judio, apayapay ngarud a pilitem dagiti Gentil nga agbiag a cas cadagiti Judio? 15 Datayo idinto a Judiotayo gapu iti pannacayanac, ket saan a managbasol nga Gentil, 16 Agsipud ta ammon a ti tao saan a mapalinteg gapu cadagiti ar-aramid ti linteg, no di ket gapu iti pammati ken Jesus Cristo, uray dacami met namaticami ken Jesus Cristo, tapno mapalintegcami gapu iti pammati ken Cristo, ket saan a gapu cadagiti aramid ti linteg: ta dagiti aramid ti linteg ket awanto ti aniaman nga lasag a mapalinteg. 17 Ngem no, agawaanmi ti mapalinteg ken Cristo, rumsuacami met a managbasol, ni Cristo ngarud aya ti ministro ti basol? Ti Dios di na ipalubos. 18 Ta no bangonecto manen dagiti banbanag a rinebbacon, rumsuaacto a managsalungasing. 19 Ta gapu iti linteg natayac a maipaay iti linteg, tapno agbiagac a maipaay iti Dios. 20 Nailansaac a naicuyog ken Cristo: numan pay casta agbiagac; ket saan a siac, no di ket ni Cristo ti agbiag caniac: ket ti biag a pagbiagco ita iti lasag pagbiagco gapu iti pammati iti Anac ti Dios, isu a nagayat caniac, ket inyawatna ti bagina gapu caniac. 21 Diac ibilang nga awan capapay-anna iti parabur ti Dios: ta no ti pannacapalinteg magun-odan gapu iti linteg, ni Cristo natay ngarud nga awan ti banbanagna. CAPITULO 3 1 O awanan pannacaawat nga taga Galacia, asino ti nangallilaw cadacayo, tapno saanyo a pagtulnogan iti kinapudno, idinto a naipakita iti nalawagen cadacayo ni Jesus Cristo, nga nailansa iti cruz ? 2 Daytoy laeng ti cayatco coma a damagen cadacayo, Inawatyo ti Espiritu gapu cadagiti ar-aramid ti linteg, wenno gapu iti panangdengngeg iti pammati? 3 Nanengnengcayo unay aya? idinto a nangrugicayo iti Espiritu, ita maan-anaycayo iti lasag? 4 Nagsagabacayo aya cadagiti adu unay a banbanag nga awan capapay-anna? no pudno nga awan capapay-anna. 5 Ti mangmangted ngarud cadacayo iti Espiritu, ken agar-aramid cadagiti datdatlag cadacayo, agtaud aya cadagiti ar-aramid ti linteg, wenno agtaud iti panagdengngeg iti pammati? 6 Cas ken Abraham a namati iti Dios, ket daytoy a pammati naibilang kencuana a kinalinteg. 7 Ammoenyo ngarud a dagiti mamati, agpada met laeng nga isuda dagiti annac ni Abraham. 8 Ket ti surat, sigud nga ipacpakitana a ti Dios palintegennanto dagiti Gentil gapu iti pammati, impacpacaunana ti evangelio ken Abraham, a kunana, Kenca dagiti amin a nacion ket mabendicionanto. 9 Gapuna dagiti mammati mabendicionanda a mairaman ken ni mamati nga Abraham. 10 Ta dagup dagiti isuamin a sumurot cadagiti ar-aramid ti linteg ket addada babaen ti pannacailunod: ta adda a naisurat, Mailunod ti isuamin a di agtalinaed iti amin nga adda a naisurat iti libro ti linteg tapno aramidenna. 11 Ngem nalawag nga awan ti tao a mapalinteg gapu ti linteg iti imatang ti Dios, ta nalatac ngamin: nga, Ti nalinteg agbiagto gapu iti pammati. 12 Ket ti linteg saan nga agtaud iti pammati: ngem, Ti agaramidto cadagiti cacasta a banbanag ket agbiagto cadacuada. 13 Ngem ni Cristo sinubbotnatayo iti pannacailunod ti linteg, idi naaramid a lunod gapu cadatayo: ta adda a naisurat, Mailunod ti isuamin a maibitin iti cayo: 14 Tapno ti bendicion ni Abraham umay cadagiti Gentil gapu ken Jesus Cristo; tapno awatentayo ti cari ti Espiritu gapu iti pammati. 15 Cacabsat, Agsaoac a cas iti ugali dagiti tattao; Uray no tulag laeng ti tao, no mapatalgedanen, uray siasino saanna a mabalin a dadaelen, wenno nayonan. 16 Naited ngarud dagiti carcari ken Abraham ken iti caputotanna. Saanna a kinuna, Cadagiti caputotam, a casla agsao cadagiti adu; no di maymaysa, Iti putotmo, nga isu ni Cristo. 17 Daytoy ngarud iti kunak, a ti tulag, a pinatalgedan nga immun-una ti Dios ken Cristo, ti linteg, a naited calpasan iti uppat a gasut ken tallo pulo a tawen, saanna a mabalin dadaelen, tapno ti cari ket maucas coma. 18 Ta no ti tawid maigapu iti linteg, saanen a maigapu iti cari: ngem ti Dios intedna ken Abraham babaen iti cari. 19 Ania ngarud iti nacausaran ti linteg? Isu nainayon gapu cadagiti panagsalungasing, agingga iti iyaay ti caputotan isu a nacaipaayan ti cari; ket napatalgedan gapu cadagiti angel iti ima ti maysa a mangibabaet. 20 Ket ti mangibabaet saan a gapu iti maymaysa, ngem ti Dios maymaysa. 21 Ti linteg ngarud adda a maisalungasing cadagiti cari ti Dios? Ti Dios dina ipalubos: ta no naited coma ti maysa a linteg a macabalin a mangted ti biag, pudno a ti pannacapalinteg magun-odan coma gapu iti linteg. 22 Ngem ti surat impupocna nga ti amin ket adda iti babaen ti basol, tapno ti cari a maigapu iti pammati ken Jesus Cristo maited coma cadagiti mamati. 23 Ngem idi saan pay nga immay ti pammati, addatayo idi a naaywanan iti babaen ti linteg, a naipupoc a maipaay iti pammati a maipaltiingto idi. 24 Idi casta ti linteg nagbalin a mangaywan cadatayo tapno iturongnatayo ken Cristo, tapno mapalintegtayo a maipuon iti pammati. 25 Ngem ita ta immayen ti pammati, awantayon iti babaen ti mangaywan. 26 Ta annacnatayo amin ti Dios gapu iti pammati ken Cristo Jesus. 27 Ta dagupyo amin a nabautizaran ken Cristo ket incawesyon ni Cristo. 28 Kencuana awan ti Judio ken Griego, awan ti adipen wenno agwayawaya, awan iti lalaki wenno babai: ta dacayo amin ket maymaysacayo ken Cristo Jesus. 29 Ket no cucuanacayo ni Cristo, dacayo ngarud ti caputotan ni Abraham, ken agtawid cas iti cari. CAPITULO 4 1 Ngem ita kunak, Ti agtawid, bayat ti kinaubingna, awan ti pacaidumaanna iti maysa nga adipen, uray pay isu ti apo ti isuamin; 2 No di ket adda iti babaen dagiti agaywan ken dagiti agtaraken agingga iti aldaw a tinudingan ni amana. 3 Casta met cadatayo, idi ub-ubbingtayo, addatayo iti pannaca-adipen dagiti pagsursuroan a nailubongan: 4 Ngem idi nadanunan ti natudingan nga aldaw, ti Dios imbaonna ti Anacna, a nayanac iti babai, nayanac iti babaen ti linteg, 5 Tapno subbotenna dagiti adda iti babaen ti linteg, tapno awatentayo coma ti pannacaibilang nga annac. 6 Ket agsipud ta dacayo dagiti annac, imbaon ti Dios ti Espiritu ni Anacna cadagiti puspusoyo, nga agpucpuccaw, Abba, Ama. 7 Iti casta saanca nga adipenen, no di ket anac; ket no anac, agtawid ngarud iti Dios gapu ken Cristo. 8 Ngem, idi saanyo pay nga ammo ti Dios, addacayo iti pannacaadipen cadagiti nacaisigudan a galad nga saan a dios. 9 Ngem ita, calpasan a naammoanyo ti Dios, wenno dacayo iti am-ammon ti Dios, apayapay nga agsublicayo cadagidiay nacapuy ken nanumo a pagsursuroan, a tarigagayanyo manen a paca-adipenan? 10 Ngilinenyo dagiti al-aldaw, ken bulbulan, ken dagiti tiempo, ken tawtawen. 11 Ma-amacac ti maipapan cadacayo, di la ket ta nagbannogac gapu cadacayo nga awan pagmama-ayanna. 12 Cacabsat, dawatec cadacayo, nga agbalincayo coma a cas caniac; ta siac ti cas cadacayo: awan ti ranggas nga inaramidyo caniac 13 No di ket ammoyo a gapu iti kinacapuy ti bagi incascasabac cadacayo iti evangelio idi damo. 14 Ket daydi pacasuutac idi iti lasagco ket diyo inum-umsi, wenno dicayo naglicudan; no di ket inawatdac a cas maysa nga angel ti Dios, a cas ken Cristo Jesus. 15 Sadino ngarud ita iti ayan daydi pammadayawyo nga sinarsaritayo idi? ta iccancayo ti pangpanecnec, nga, no mabalin coma, sinuatyo coma dagiti matmatayo, ken intedyo ida caniac. 16 Nagbalinac aya a cabusoryo, gapu iti panangibagac cadacayo ti pudno? 17 Isuda essemandacayo, ngem saan a nasayaat; wen, cayatdacayo coma nga isina, tapno essemanyo ida. 18 Ngem nasayaat ti maesseman nga canayon no mayalubog iti naimbag a banag, ken saan laeng a no addaac a sisasango cadacayo. 19 Dungdungoec a maladagac, pasicalencayo manen aya agingga iti mabukel ni Cristo cadacayo, 20 Cayatco coma ti adda a sisasango cadacayo itan, ken baliwan ti timecco; ta agduduaac iti maipapan cadacayo. 21 Ibagayo caniac, dacayo nga agtarigagay nga agbiag iti babaen ti linteg, saanyo cadi nga mangeg ti linteg? 22 Ta adda a naisurat, nga ni Abraham adda idi dua nga annacna a lallaki, ti maysa babaen iti tagabu a babai, ken ti sabali babaen iti babai a siwawaya. 23 Ngem daydi anac ti tagabu a babai ket nayanac cas iti lasag; ngem daydi anac ti babai a siwawaya ket nayanac gapu iti cari. 24 Dagitoy a banbanag pangngarigda: ta dagitoy dagiti dua a tulag; ti maysa naggapu idiay bantay Sinai, a mangipasngay cadagiti annac a maipaay iti pannacatagabu, ket isu ni Agar. 25 Ket daytoy Agar isu ti bantay Sinai idiay Arabia, ket cayarigan ti Jerusalem ita, ta adda iti pannacatagabu agraman dagiti isuamin nga annacna. 26 Ngem ti Jerusalem sadi ngato ket agwayawaya, isu nga inatayo amin. 27 Ta adda a naisurat, Agragsacca, sica lupes a di naganac; agdir-ica ket agpuccawca, sica a di nagpasical: ta ad-adu dagiti annac ti babai a nabaybay-an ngem iti addaan asawa. 28 Ita datayo, cacabsat, cas ken Isaac idi, datayo ti annac iti cari. 29 Ngem cas idi nga ti nayanac iti lasag ket indadanesna daydi nayanac iti Espiritu, casta met uray pay ita. 30 Ngem ania ti cuna ti surat? Pagtalawem ti tagabu a babai ken ti anacna: ta dinto agtawid ti anac ti tagabu a babai a mairaman iti anac ti babai a siwawaya. 31 Gapuna, cacabsat, saantayo nga annac ti tagabu a babai, no di ket ti babai a siwawaya. CAPITULO 5 1 Agtalinaedcayo ngarud a maipaay iti panangwayawaya ken panangluc-at ni Cristo cadatayo, ket dicayo paisangol manen iti babaen ti sangol ti pannaca-adipen. 2 Adtoy, siac ni Pablo kunak cadacayo, a no awatenyo ti pannacacugit, awan ti magungunayonto ken Cristo. 3 Ket sacsiac manen iti amin a tao nga umawat iti pannacacugit, nga annongda a tungpalen ti amin a linteg. 4 Naisinacayon ken Cristo, dacayo nga agtarigagay a mapalinteg gapu iti linteg; ket natnagcayon iti parabur. 5 Ta gapu iti Espiritu ur-urayentayo ti inanama ti kinalinteg babaen iti pammati. 6 Ta ken Cristo Jesus uray ti pannacacugit awan ti pannacabalinda, uray pay met ti saan a pannacacugit; no di ket iti pammati nga agaramid gapu iti ayat. 7 Nagtartaraycayo a naimbag; siasino ti nanglapped cadacayo tapno dicayo agtulnog iti pudno? 8 Daytoy nga panangawis ket saan nga aggapu iti daydiay mangayab cadacayo. 9 Ti bassit a levadura ket levaduraanna ti amin a masa. 10 Siac adda pananginanamac iti Apo a maipaay cadacayo, a dicayto panunoten ti sabali a banag: ngem ti mangriribuc cadacayo awatennanto ti dusana, uray no siasino. 11 Ngem siac, cacabsat, no icascasabac pay laeng ti pannacacugit, apayapay maidadanesnac ngarud? no casta napucawen ti pacaitibcolan iti cruz. 12 Sapay coma ta maputedan dagiti mangriribuc cadacayo. 13 Ngamin, cacabsat, naayabancayo iti panagwayawaya; isuna laeng a ti wayawaya saan coma a gundawayan ti lasag, ngem babaen ti ayat ket agtitinnulongcayo iti maysa ken maysa. 14 Ta ti amin a linteg natungpal itoy maymaysa a sao, uray pay itoy; Ayatem ti caarrobam a cas iti bagim. 15 Ngem no agkikinnagat ken aginnalun-oncayo, alluadanyo ta dicayo coma aggi-innibus. 16 Kunak ngarud, Magnacayo iti Espiritu, ket dicayto tungpalen dagiti tarigagay ti lasag. 17 Ta ti lasag agumanna ti maibusor iti Espiritu, ket ti Espiritu maibusor iti lasag: ta dagitoy agkinnabusor iti maysa ken maysa: iti casta dicayo mabalin nga aramiden dagiti banbanag a cayatyo coma. 18 Ngem no idalannacayo ti Espiritu, awancayo iti babaen ti linteg. 19 Ita ket addada a sipapatac dagiti aramid ti lasag, nga isuda dagitoy; Pannakicamalala, pannaki-abig, kinarugit, derrep, 20 Panagrucbab cadagiti didiosen, panaganito, gurangura, ringringgor, im-imun, panagpungpungtot, panagsususic, panagsisina, panangilkillo ti pammati, 21 Ap-apal, mammapatay, panagbarbartec, panagragragsac nga aglablabes, nga umasping cadagitoy: ipacpacaunac, cas iti imbagacon cadacayo idi napalabas, nga dagiti agaramid cadagitoy a banbanag ket saandanto nga tawiden ti pagarian ti Dios. 22 Ngem ti bunga iti Espiritu ket isu ti ayat, rag-o, talna, mabayag a panagitured, kinaanus, kinalaing, kinamanagtalec, 23 Kinaemma, panagteppel: awan linteg a maibusor cadagitoy a banag. 24 Ket dagiti adda ken Cristo inlansada iti cruz ti lasag agraman dagiti naalas a ricnada ken dagiti dakes a tarigagayda. 25 No agbiagtayo a gapu iti Espiritu, magnatayo met coma gapu iti Espiritu. 26 Ditayo coma aguman ti dayaw nga barengbareng, ditayo agpipinnasakit ti maysa ken maysa, ditay aggi-innapal ti maysa ken maysa. CAPITULO 6 1 Cacabsat, no ti maysa a tao ket masucalan iti uray ania a panangsalungasing, dacayo nga naespirituan, bagbagaanyo dayta babaen ti espiritu ti kinaemma; a kitaem ti bagim, di la ket ta masulisogca met. 2 Agtitinnulongcayo iti pacadagsenan ti maysa ken maysa, ket iti casta tungpalenyo ti linteg ni Cristo. 3 Ta no ti maysa a tao panunotenna nga isu ket adda pategna a bassit, idinto nga awan, allilawenna ti bagina. 4 Ngem suuten ti tunggal maysa ti aramidna met laeng, ket ti casta addanto ragsacna iti maipuon met la kencuana, ket saan a maipuon iti sabali. 5 Ta tunggal maysa awitennanto ti awitna met laeng. 6 Ti maisuro iti sao ti Dios ket makipinnaraman coma kencuana nga mangisuro cadagiti amin nga naimbag a banbanag. 7 Dicayo coma maallilaw; ti Dios saan a marabrabac: ta ti aniaman nga imulanto ti maysa a tao, apitennanto met laeng. 8 Ta ti agmula a maipaay iti lasagna iti lasag apitennanto ti panagrupsa; ngem dayta agmula a maipaay iti Espiritu iti Espiritu apitennanto ti biag nga agnanayon. 9 Ditayo ngarud mabannog iti panagaramid iti naimbag: ta inton tiempona ket agapittayto, no saantayo nga maupay. 10 Iti casta ngarud no maaddaantayo iti gundaway, aramidentayo ti naimbag cadagiti amin a tattao, nangnangrona cadagiti cabbalay iti pammati. 11 Kitaenyo no casano a nagdadackel a letletra ti panagsuratco cadacayo iti pannaca-aramat ti imac met laeng. 12 Isuamin dagiti agcalicagum a mangiparangarang iti nasayaat a langa iti lasag, pilitendacayo a macugit; tapno dida maidadanes gapu iti cruz ni Cristo. 13 Ta uray dagiti met laeng addaan iti pannacacugit ket saanda nga tungpalen ti linteg; ngem cayatdacayo a pacugit, tapno agpasindayagda iti lasagyo. 14 Ngem ti Dios dina ipalubos nga agpasindayawac, no saan laeng nga iti cruz ni Apotayo a Jesus Cristo, a gapu kencuana ti lubong nailansa iti cruz no maipapan caniac, ket siac iti lubong. 15 Ta ti adda ken Cristo Jesus ti pannacacugit awan capapay-anna, ken uray met ti saan a pannacacugit, no di ket ti baro a parsua. 16 Ket cadagiti isuamin nga agbiagto cas itoy a pagalagadan, talna coma cadacuada, ken caasi, ken casta met iti Israel ti Dios. 17 Manipud ita ken iti masangoanan awan coma ti mangriribuc caniac: ta addada iti bagic dagiti marca ni Apo Jesus. 18 Cacabsat, ti parabur ni Apotayo a Jesus Cristo maadda coma iti espirituyo. Amen. ¶ Naisurat idiay Roma a maipaay cadagiti taga Galatia. |