|
TAGA EFESO 1 Ni Pablo, apostol ni Jesus Cristo gapu iti pagayatan ti Dios, isuratna cadagiti sasanto nga adda idiay Efeso, ken cadagiti matalec ken Cristo Jesus: 2 Parabur cadacayo, ken talna, nga aggapu ti Dios nga Amatayo, ken ni Apo Jesus Cristo. 3 Bendito coma ti Dios ken Ama ni Apotayo a Jesus Cristo, isu a nangbendicion cadatayo cadagiti amin a kita ti naespirituan a bendicion a nailangitan ken Cristo: 4 Cas iti panangpilina cadatayo kencuana idi saan pay a nabangon ti lubong, tapno agsantotayo ken awan ti pacapilawantayo iti sangoanna babaen ti ayat: 5 Idinto a tinudingannatayo idi damo a maibilang nga annacna gapu ken Jesus Cristo a maipaay kencuana, cas ti naimbag a pacaragsacan iti pagayatanna, 6 Tapno pacaidayawan iti dayag ti paraburna, idi inawatnatayo kencuana nga ay-ayatenna nga annac. 7 Ket kencuana maaddaantayo ti pannacasubbot gapu iti darana, ti pannacapacawan dagiti basbasol, a cas mayannurot iti kinabacnang ti paraburna; 8 A pinaaduna a maipaay cadatayo iti amin a kinasirib ken kinamanakem; 9 Nga impacaammona cadatayo ti palimed ti pagayatanna, cas iti naimbag a pacaragsacanna a pinanggepna kencuana: 10 Tapno iti pannacaisagana ti pannacatungpal dagiti panawen mapagcaycaysana dagiti amin a banbanag ken Cristo, dagiti adda sadi langit, ken dagiti met adda iti rabaw ti daga; uray kencuana: 11 Isu met nga inawattayo a tawid, idinto a natudingantayo idi cas ti panggep daydiay agar-aramid cadagiti isuamin a banag a mayalubog iti pammagbaga iti bucodna a pagayatan: 12 Tapno maipaaytayo coma a pacaidayawan ti dayagna, datayo nga immuna a nangnamnama ken Cristo. 13 Isu a dacayo met idi tinalecyo, calpasan ti pannacangegyo ti sao ti pudno, ti evangelio ti pannacaisalacanyo: isu met idinto a namaticayo, namarcaancayo iti Espiritu Santo ti cari, 14 Isu ti tanda ti tawidtayo a maipaay ti pannacasubbot ti nagatang a sanicuana, a maipaay iti dayaw ti dayagna. 15 Gapu itoy met, idinto a nangegco ti pammatiyo ken Apo Jesus, ken ti ayatyo cadagiti isuamin a sasanto, 16 Diac umingga nga agyaman gapu cadacayo, nga idawdawatancayo cadagiti ar-ararawco; 17 Tapno ti Dios ni Apotayo a Jesus Cristo, ti Ama ti kinadayag, ipa-ayannacayo coma ti maysa nga espiritu ti kinasirib ken paltiing iti pannaca-ammo kencuana: 18 A malawagan coma dagiti matmata ti pannacaawatyo; tapno ma-ammoanyo coma no ania ti inanama ti panangawisna, ken no ania dagiti kinabacnang iti dayag ti ipatawidna cadagiti sasanto, 19 Ken ania ti naindaclan unay ti pannacabalinna cadatayo a mamati, cas iti panagar-aramid ti pigsa ti pannacabalinna, 20 Nga inaramatna ken Cristo, idi pinagungarna cadagiti natay, ket impatugawna iti macanawanna cadagiti ayan a nailangitan, 21 A nangatngato unay ngem ti amin a gobierno, ken agturay, ken pannacabalin, ken kinaapo, ken iti isuamin a nagan a managanan, saan la nga daytoy a lubong, no di ket iti mapasungad pay: 22 Ket incabilna dagiti amin a banbanag iti babaen dagiti sacsacana, ket isu insaadna nga ulo cadagiti isuamin a banbanag iti iglesia, 23 Isu a bagina, ti pannacaan-anay daydiay mangpunno amin cadagiti isuamin. CAPITULO 2 1 Ket pinagbiagnacayo, idinto a nataycayon gapu cadagiti panagsalungasing ken basbasol; 2 A nagnaanyo idi naminsan cas iti ugali daytoy lubong, cas mayannurot iti panguloen ti pannacabalin ti angin, ti espiritu nga ita ket agar-aramid cadagiti annac iti kinasukir: 3 Nga iti tengnga dagitoy ket datayo met amin idi naminsan nagbiagtayo cadagiti derderrep ti lasagtayo, a tinungpaltayo dagiti tarigagay ti lasag ken dagiti panpanunot; ket iti sigud a nacayanacan annacnatayo idi ti pungtot, a cas cadagiti dadduma. 4 Ngem ti Dios, idinto a nabacnang iti caasi, gapu iti dackel nga ayatna a pinangayatna cadatayo, 5 Uray pay nataytayon idi gapu cadagiti basbasoltayo, pinagbiagnatayo a nairanud ken Cristo, (gapu iti parabur naisalacancayo;) 6 Ket pinagungarnatayo a nairaman kencuana, ket pinagtugawnatayo a naicuyog kencuana cadagiti ayan a nailangitan ken Cristo Jesus: 7 Tapno cadagiti pannawen a mapasungad ket iparangarangna iti naindaclan nga kinabacnang ti paraburna ti kinaimbag cadatayo ken Cristo Jesus. 8 Ta gapu iti parabur naisalacancayo gapu iti pammati; ket daytoy saan a nagtaud cadatayo: ta sagut ti Dios: 9 Saan nga aggapu cadagiti ar-aramid, tapno awan iti siasinoman nga agpasindayaw. 10 Ta datayo ket aramidnatayo, a naparsua ken Cristo Jesus a maipaay cadagiti naimbag nga ar-aramid, isuda nga intuding ti Dios idi tapno magmagnatayo coma cadacuada. 11 Gapuna laglagipenyo, nga iti naminsan dacayo a Gentil iti lasag, managanancayo idi ti Dipannacacugit gapu iti daydiay managan Pannacacugit iti lasag nga aramid ti ima; 12 Idi a tiempo nga awancayo pay ken Cristo, a saancayo nga nairaman iti pannakipagili iti Israel, ket gangannaetcayo ti maipapan cadagiti tulag ti cari, nga awan ti inanamayo, ket addacayo ditoy lubong nga awanan Dios: 13 Ngem ita ken Cristo Jesus dacayo nga idi ket adayucayo iti Dios naiyasidegcayon kencuana gapu iti dara ni Cristo. 14 Ta isu ti cappiatayo, isu a namagcaycaysa cadagiti dua, ket dinupracna ti nagtengnga a pader nga mamaglasin idi cadatayo; 15 Ket pinucawna babaen iti lasagna ti gurangura, uray pay ti linteg dagiti bilbilin cadagiti al-allagaden; tapno mamarsua kencuana met laeng ti maysa nga baro a tao, ket nagaramid ti cappia; 16 Ken maicappiana ida nga agpadpada iti Dios iti maymaysa a bagi gapu iti cruz, idinto a pinapatayna ti gurangura kencuana: 16 Ken maicappiana ida nga agpadpada iti Dios iti maymaysa a bagi gapu iti cruz, idinto a pinapatayna ti gurangura kencuana: 17 Ket immay ket incascasabana ti cappia cadacayo nga adda idi iti adayu, ken cadagiti adda iti asideg. 18 Ta gapu kencuana dacami ken dacayo addaantayo ti gundaway babaen ti maymaysa nga Espiritu nga umasideg iti Ama. 19 Iti casta ngarud saancayon a gangannaet ken dumagdagus, no di ket cailiandacayon dagiti sasanto, ken cabbalay ti Dios; 20 A nabangon iti rabaw ti pamunganayan dagiti apostol ken dagiti mammadto, ket ni Jesus Cristo met laeng ti cangronaan nga pasuli a bato; 21 Kencuana isuamin a balbalay nga agga-allot ti pannacasangsangalna rumang-ay a maipaay a maysa nga nasantoan nga templo iti Apo: 22 Isu a pacaicuyoganyo met a mabangbangon tapno pagbalbalayan ti Dios babaen ti Espiritu. CAPITULO 3 1 Gapu itoy siac ni Pablo, a balud ni Jesus Cristo gapu cadacayo nga Gentiles, 2 No casta a nadamagyo ti pannaca-aywan ti parabur ti Dios a naited caniac a maipaay cadacayo: 3 Ta gapu iti paltiing naipacaamo caniac ti palimed; (cas insuratco idi iti ababa a sao, 4 Ngarud, no basaenyo, ma-awatanyo coma ti pannaca-ammoc iti palimed ni Cristo) 5 Isu a cadagidi sabsabali a caputotan saan a naipacaammo cadagiti annac dagiti tattao, cas iti pannacaipaltiingna ita cadagiti sasanto nga apostol ken mammadto babaen ti Espiritu; 6 A dagiti Gentil makipagtawidda coma, ken makipagcamcamengda iti bagi, ket makiranudda iti naicari ken Cristo gapu iti evangelio: 7 Gapu itoy naaramidac a ministro, cas iti sagut daydi parabur ti Dios a naited caniac gapu iti maitutop a panagaramid ti pannacabalinna. 8 No caniac, a canunumoan cadagiti isuamin a sasanto, naited daytoy a parabur, ti panangicascasabac cadagiti Gentil dagiti di matucod a kinabacnang ni Cristo; 9 Ken ti panangilawlawag cadagiti amin a tattao no ania ti urnos ti palimed, a nanipud idi pangruggian ti lubong ket nailemmeng iti Dios, a namarsua cadagiti amin a banbanag gapu ken Jesus Cristo: 10 Tapno ita cadagiti panguloen ken agtuturay cadagiti ayan a nailangitan gapu iti iglesia ket maipacaammo coma dagiti nadumaduma a kinasirib ti Dios, 11 A cas mayannurot iti agnanayon nga gandat a tinungpalna ken Cristo Jesus nga Apotayo: 12 Isu a pacagun-odantayo ti tured ken iseserrec a sitatalged gapu iti pammatitayo kencuana. 13 Gapuna dawatec a dicayo maupay gapu cadagiti rigrigat a sagabaec gapu cadacayo, ta isuda ti pacaidayawanyo. 14 Gapu itoy irucnoyco dagiti tumengco iti sangoanan ti Ama ni Apo Jesus Cristo, 15 Isu a pangalaan ti nagan ti isuamin a sangacabbalayan idiay langit ken ditoy daga, 16 Tapno ipaayna coma cadacayo, cas iti kinabacnang ti dayagna, a mapapigsacayo iti pannacabalin gapu iti Espirituna iti makin-uneg a tao; 17 Tapno ni Cristo agnaed coma cadagiti puspusoyo gapu iti pammati; tapno dacayo, agramutcayo ket mapadackelcayo ken ayat, 18 Ken mabaelanyo coma a maawatan agraman dagiti amin a sasanto no ania iti caacaba, ken caatiddug, ken ti cangato, ken cauneg; 19 Ken maammoan iti ayat ni Cristo, nga daeganna ti amin a pannacaammo, tapno mapnocayo iti isuamin a pannacapunno ti Dios. 20 Ket ita iti daydiay macabalin nga agaramid iti di matucod nga ad-adu ngem iti dagup ti isuamin a mabalintayo a dawaten wenno panunoten, cas iti pannacabalin nga agar-aramid cadatayo, 21 Maipaay coma kencuana ti dayag iti iglesia ken ni Cristo Jesus cadagiti isuamin a caputotan, iti lubong nga agnanayon awan patinggana. Amen. CAPITULO 4 1 Siac ngarud, a balud iti Apo, dawatec cadacayo a magnacayo coma a maicari iti pannacaayab a nacaawisanyo, 2 A buyogen iti amin a kinaemma ken kinapacumbaba, agraman ti nabayag a panagitured, nga aggi-innanuscayo babaen iti ayat; 3 Nga agawaanyo a salimetmetan ti panagmaymaysa ti Espiritu iti singgalut ti talna. 4 Adda maysa a bagi, ken maysa nga Espiritu, a cas met iti pannacaawisyo iti maysa nga inanama ti pannaca-ayabyo; 5 Maysa nga Apo, maysa nga pammati, maysa nga pammautizar, 6 Maysa nga Dios ken Ama dagiti isuamin, isu a cangatoan amin, ken adda iti nagtengaan dagiti isuamin, ken adda cadacayo amin. 7 Ngem iti tunggal maysa cadatayo naiccan ti parabur cas iti rucod ti sagut ni Cristo. 8 Gapuna a kunana, Idi nga immuli iti ngato, impanna a kinayawan ti pannacacayaw, ket iniccanna ti sagsagut dagiti tattao. 9 (Ket daytoy nga iyu-uli, ania ti cayatna a saoen no di ket immulog met cadagiti disso a nababbaba iti daga? 10 Daydi immulog isu met laeng daydi immuli iti nangatngato pay ngem cadagiti isuamin a langlangit, tapno punoenna dagiti amin a banbanag.) 11 Ket dagiti dadduma incabilna nga, apostol; ket dagiti dadduma, mammadto; ket dagiti dadduma, evangelistas; ket dagiti sabsabali, papastor ken mannursuro; 12 A maipaay iti pannacapaan-anay dagiti sasanto, a maipaay iti aramid ti panagservi, a maipaay iti pannacapatibker iti bagi ni Cristo: 13 Agingga iti macagtengtayo amin iti panagmaymaysa ti pammati, ken ti pannaca-ammo iti Anac ti Dios, iti casasaad ti tao a nataengan, a maipaay iti rucod ti kinatayag ti pannacapunno ni Cristo: 14 Tapno ditayo agub-ubinganen, nga agalla-allatayo ditoy ken didiay, a pailawlaw iti amin nga angin ti sursuro, gapu cadagiti salsalamangca dagiti tattao, iti kinasicapda a di madmadlaw, nga agur-urayda babaen ti kinaulbod ken allilaw; 15 No di ket saoentayo ti pudno a buyogen ni ayat, ket rumang-aytayo coma cadagiti isuamin, ken Cristo, isu nga ulo: 16 A kencuana amin a bagi nga agga-allot ti pannacasangalna ken natonos gapu iti itutulong ti tunggal nagsusuupan, cas iti panagaramid a maitutop iti tunggal camcameng, padackelenna ti bagi tapno pacapatibkeranna met laeng ken ayat. 16 A kencuana amin a bagi nga agga-allot ti pannacasangalna ken natonos gapu iti itutulong ti tunggal nagsusuupan, cas iti panagaramid a maitutop iti tunggal camcameng, padackelenna ti bagi tapno pacapatibkeranna met laeng ken ayat. 17 Daytoy ngarud ti ibagac, ken sacsiac iti Apo, a dicayo coma magmagnan a cas iti pannagna dagiti Gentil, iti kinapalangguad dagiti isipda, 18 Idinto a nacudrepan ti pannacaawatda, a nayadayuda iti biag ti Dios gapu iti kinacuneng nga adda cadacuada, a maipuon iti nabulsekan a puspusoda: 19 Nga idinto a napucaw ti amin a ricnadan inyawatda ti bagida iti kinaderrep, tapno aramidenda a si-aagum ti amin a kinarugit. 20 Ngem saanyo nga inadal a casta ni Cristo; 21 No casta ngarud a nagdengngegcayo kencuana, ken nasursuroancayo kencuana, cas iti kinapudno ken Jesus: 22 Iccatenyo coma ti maipapan iti napalabes a panagbibiagyo di tao a daan, isu nga agruprupsa a maitonos cadagiti mangallilaw a derrep; 23 Ket mapabarocay coma iti espiritu dagiti isipyo; 24 Ket macawesancayo coma iti tao a baro, nga naparsua a maitonos iti Dios iti kinalinteg ken pudno a kinasanto. 25 Gapuna baybay-anyo ti kinaulbod, ket saoenyo ti pudno tunggal maysa iti padana a tao: ta datayo agkikinnamengtayo ti maysa ken maysa. 26 Agpungtotcayo, ngem dicay agbasol: saan coma a lumnec ti init a sipupungtotcayo pay laeng: 27 Ket dicayo met iccan iti lugar ti sairo. 28 Daydi nagtactacaw saan coma nga agtacawen: no di ket agtrabaho, nga aramidenna ti naimbag babaen ti imana, tapno adda pagitedna iti adda pacasapulanna. 29 Awan coma ti sao a naalas a rummuar iti ngiwatyo, no di ket ti naimbag a maipaay a pacapatibkeran, tapno agtrabaho ti paraburna cadagiti agdengngeg. 30 Ket dicayo pagleddaangen ti Espiritu Santo ti Dios, isu a nacamarcaanyo a naisagana iti aldaw ti pannacasubbot. 31 Isuamin a pait, ken gura, ken unget, ken ariwawa, ken dakes a panagsao, maiccat coma cadacayo, agraman ti amin a dakes a panggep: 32 Ket managayan-ayatcayo, addaan iti nalucneng a puso, ken agpipinnacawancayo, a cas met ti Dios ket pinacawannacayo gapu ken Cristo. CAPITULO 5 1 Tuladenyo ngarud iti Dios, a cas annac nga madungdungngo; 2 Ket magnacayo babaen iti ayat, a cas met ni Cristo inayatnatayo, ket intedna ti bagina gapu cadatayo a cas sagut ken daton iti Dios a nasayamusom ti banglona. 3 Ngem ti pannakicamalala, ken ti amin a kita ti kinarugit, wenno ti agum, saan man la coma a madukit cadacayo, cas mayannugot cadagiti sasanto; 4 Ket uray kinarugit, wenno dagiti naalas a panagsasao nga awan capapay-anna, wenno dagiti panangsursuron, banbanag a di maipaay: no di ket dagiti coma panagyaman. 5 Ta paga-ammoyo unay, nga amin a mannakicamalala, wenno tao a narugit, wenno tao a naagum, isu a panagrucbab cadagiti didiosen, ket awan ti aniaman a tawidda iti pagarian ni Cristo ken ti Dios. 6 Dicayo coma paallilaw cadagiti sasao nga awan capapay-anna: ta gapu cadagitoy a banbanag ket umay ti pungtot ti Dios cadagiti annac ti kinasukir. 7 Saancayo ngarud a makiraman cadacuada. 8 Ta idi naminsan dacayo ti sipnget, ngem ita dacayo ti silaw iti Apo: magnacayo a cas annac ti lawag: 9 (Ta iti bunga ti Espiritu ket pulos nga imbag ken kinalinteg ken pudno;) 10 A padpadasenyo no ania iti pagayatan ti Apo. 11 Saancayo a makicadcaddua cadagiti di agbunga nga aramid ti sipnget, no di ket babalawenyo ida. 12 Ta nacababain uray saritaen laeng ida dagiti banbanag nga aramidenda iti nalemmeng. 13 Ngem amin dagitoy a banbanag intono mababalawda maiparangarangda gapu iti silaw: ta ti mangiparangarang ti aniaman ket isu ti silaw. 14 Gapuna masasao, Agri-ingca sica a matmaturog, ken bumangonca iti nagtetengngaan dagiti natay, ket lawagannacanto ni Cristo. 15 Kitaenyo ngarud a si-aannad no casano ti pannagnayo, saan a casla nacuneng, no di ket casla masirib, 16 Nga cailalaanyo ti gundaway, ta dagiti al-aldaw ket dakesda. 17 Gapuna dicayo agnengnengneng, no di ket ammoenyo no ania iti pagayatan ti Apo. 18 Ket dicayo agbartec ti arac, isu a nabuslon; no di ket mapnocayo coma iti Espiritu; 19 Nga agsasaocayo coma ti mapacuyogan cadagiti salmos ken himhimno ken naespirituan a cancanta, nga icancantayo ken itoctocaryo dagiti puspusoyo iti Apo; 20 Nga agyamancayo nga agnanayon cadagiti isuamin a banbanag babaen iti Dios ken iti Ama gapu ti nagan ni Apotayo a Jesus Cristo; 21 Nga agtulnog ti maysa ken maysa cadacayo babaen iti panagbuteng iti Dios. 22 Dacayo assawa nga babbai, agtulnogcayo cadagiti assawayo nga lallaki, a cas iti Apo. 23 Ta ti asawa a lalaki ket isu ti ulo ti asawa a babai, a cas met ni Cristo isu ti ulo ti iglesia: ket isu met laeng ti manangisalacan iti bagi. 24 Ngem cas ti iglesia agtulnog ken Cristo, casta met a dagiti babbai agtulnogda coma cadagiti assawada iti isuamin. 25 Lallaki, ayatenyo dagiti assawayo, a cas met iti panagayat ni Cristo iti iglesia, ket intedna iti bagina gapu kencuana; 26 Tapno pagsantoenna ken ugasanna iti panangbuggo ti danum gapu iti sao, 27 Tapno pagparangenna kencuana met laeng ti iglesia a nadayag, nga awan ti rugitna, wenno caretket, wenno sabali a pacapilawan nga umas-asping; no di ket coma nasantoan ken awan tulawna. 28 Casta met ti rebbeng dagiti lallaki a panagayat cadagiti assawada a cas cadagiti bagida. Ti agayat iti asawana ayatenna ti bagina. 29 Ta uray caanoman ket awan pay ti gimmura iti bagina met laeng; no di ket taraonanna ken igagana, a cas met iti Apo igagana ti iglesia: 30 Ta datayo dagiti camcameng ti bagina, dagiti lasagna, ken tultulangna. 31 Gapu itoy ti lalaki panawannanto ni amana ken ni inana, ket makitiponto ken asawana, ket isuda a dua maymaysadanto a lasag. 32 Daytoy ket dackel a palimed: ngem agsaoac a maipapan ken Cristo ken iti iglesia. 33 Nupay casta tunggal maysa cadacayo ayatenna coma ti asawana a babai cas iti bagina; ket ti babai padayawanna coma ti asawana a lalaki. CAPITULO 6 1 Annac, agtulnogcayo cadagiti dadackelyo gapu iti Apo: ta daytoy isu ti nalinteg. 2 Dayawem ni amam ken ni inam; (nga isu ti umuna a bilin nga adda carina;) 3 Tapno naimbag ti banagmo, ken ti biagmo atiddagto iti rabaw ti daga. 4 Ket, dacayo nga amma, dicayo ruroden dagiti annacyo iti pungtot: no di ket idalanyo ida iti allagaden ken pammagbaga ti Apo. 5 Dacayo a paad-adipen, agtulnogcayo cadagiti appoyo a tattao, a mabuyogan ti buteng ken pigerger, iti panagmaymaysa ti pusoyo, a cas ken Cristo; 6 A dicayo agservi babaen iti mata, a cas na-agawa a mangay-ayo cadagiti tattao; no di ket cas ad-adipen ni Cristo, nga agaramid iti pagayatan ti Dios a naimpapusoan; 7 Nga agservicayo a si-aayat, a cas maipaay iti Apo, ket saan ketdi a cadagiti tattao: 8 Ammoenyo ngarud nga iti aniaman nga banag a naimbag nga aramidento ti siasinoman, awatennanto met laeng ti supapacna ti biang ti Apo, adipen man wenno siwayawaya. 9 Ket, dacayo nga appo, casta met ti aramidenyo cadacuada, ket baybay-anyo dagiti panagam-ames: a si-ammocayo a ti Apoyo adda sadi langit; ket awan ti pagdudumaan dagiti tattao kencuana. 10 Panungpalanna, cacabsat, agsarikedkedcayo iti Apo, ken ti pigsa ti pannacabalinna. 11 Icawesyo ti amin a cabal ti Dios, tapno mabalinyo ti agtalinaed a bumusor cadagiti pangallilaw ti sairo. 12 Ta ti pannakidangadangtayo ket saan a maibusor iti lasag ken dara, no di ket maibusorda cadagiti ar-ari, cadagiti mannacabalin, cadagiti agtuturay iti sipnget daytoy a lubong, cadagiti espiritu ti kinadakes idiay nangangato a luglugar. 13 Gapuna alaenyo ti amin a cabal ti Dios, tapno mabalinyo ti sumarikedked iti dakes nga aldaw, ket inton naisaganayon amin, addacayo a sititibker. 14 Bumilegcayo ngarud, a sibabarikescayo iti kinapudno, ken sicacawescayo iti cabal ti kinalinteg; 15 Ket sisasapatoscayo iti pannacaisagana iti evangelio ti cappia; 16 Cangronaanna unay, alaenyo a calasag ti pammati, isu a mabalinyonto a pangsarapa cadagiti isuamin a dumardarang a gayang ti dakes. 17 Alaenyo met a pannacacabal ti ulo ti pannacaisalacan, ken ti campilan ti Espiritu, nga isu ti sao ti Dios: 18 Nga agdawdawatcayo a cancanayon cadagiti dawdawat ken carcararag babaen iti Espiritu, ket agsalucagcayo a mabuyogan ti amin a panagtalinaed ken panangidawdawat cadagiti isuamin a sasanto; 19 Ken gapu caniac, tapno maited caniac ti sao, agraman ti panagsao a situtured, tapno ipacaammoc ti palimed ti evangelio, 20 Gapu iti daytoy siac ti maysa nga babaonen a nacawaran; tapno kencuana macapagsaoac coma a situtured, a cas rebbengco a panagsao. 21 Ngem tapno ammoyo met dagiti banbanag a maipapan caniac, ken ti casasaadco, ni Tyquico, patpatgen nga ay-ayaten a cabsat ken mapagtalcan a ministro iti Apo, ipacaammonanto amin cadacayo: 22 Isu nga imbaonco cadacayo gapu itoy met laeng, tapno maammoanyo ti maipapapn cadacami, ken tapno liwliwaenna dagiti puspusoyo. 23 Talna coma cadagiti cacabsat, ken ayat a buyogen ti pammati, aggapu iti biang ti Dios Ama ken ni Apo Jesus Cristo. 23 Talna coma cadagiti cacabsat, ken ayat a buyogen ti pammati, aggapu iti biang ti Dios Ama ken ni Apo Jesus Cristo. 24 Ti parabur adda coma cadagiti isuamin nga agayat ken Apotayo a Jesus Cristo iti kinapudno. Amen. ¶ Naisurat idiay Roma a maipaay cadagiti taga Efeso babaen ken Tyquico. |