TI SURAT NI APOSTOL PABLO CADAGITI TAGA COLOSAS CAPITULO 1 1 Ni Pablo, apostol ni Jesus Cristo gapu ti pagayatan ti Dios, ken ni Timoteo a cabsattayo, 2 Isuratda cadagiti sasanto ken matalec a cacabsat ken Cristo idiay Colosas: Parabur maadda coma cadacayo, ken talna, nga aggapu iti Dios nga Amatayo ken ni Apo Jesus Cristo. 3 Agyamancami iti Dios ken Ama ni Apotayo a Jesus Cristo, a cancanayon nga icarcararagandacayo. 4 Manipud idi pannacadamagmi iti pammatiyo ken Cristo Jesus, ken ti ayatyo cadagiti isuamin a sasanto, 5 Gapu iti inanama a naidulin cadagiti langlangit a maipaay cadacayo, isu a nangegyon gapu iti sao ti kinapudno ti evangelio; 6 A dimteng cadacayo, a cas met iti isuamin a lubong; ket adda nga agbungbunga, a cas met cadacayo, nanipud iti aldaw a pannacangegyo, ken pannaca-ammoyo iti parabur ti Dios iti kinapudno: 7 Cas nasursuroyo ken Epafras nga ay-ayatenmi a caddua iti panagservi, isu cadacayo ti maysa a matalec nga ministro ni Cristo; 8 Isu ti nangibaga cadacami iti ayatyo ti Espiritu. 9 Gapu itoy dacami met, nanipud idi aldaw a pannacangegmi, saancami nga umingga a mangicarcararag cadacayo, ken tinarigagayanmi nga mapnocayo coma iti pannaca-ammo iti pagayatanna iti amin a kinasirib ken naespirituan nga pannacaawat; 10 A magnacayo coma a maicari iti Apo a maipaay iti amin a pacaay-aywan, nga agbungacayo iti isuamin nga aramid a naimbag, ket rumang-aycayo iti pannacaammo iti Dios; 11 A mapapigsa iti amin a pannacabalin, cas mayannugot iti pannacabalin ti dayagna, iti amin a kinaanus ken nabayag a panagitured a siraragsac; 12 A pagyamanan iti Ama, a nangaramid cadatayo a maicari a mairaman nga makipagtawid cadagiti sasanto iti lawag: 13 Isu a nangluc-at cadatayo iti pannacabalin ti sipnget, ket inyallatiwnatayo iti pagarian ti dungdungoenna nga Anac: 14 A kencuana maaddaantayo ti pannacasubbot gapu iti darana, ti pannacapacawan dagiti basbasoltayo: 15 Isu a ladawan ti di makita a Dios, ti anac nga inauna cadagiti amin a naparsua: 16 Ta kencuana naparsua dagiti amin, nga adda cadagiti langlangit, ken daga, makita ken saan a makita, uray dagiti trono, wenno kinaturay, wenno pagturayan, wenno dagiti pannacabalin: dagiti isuamin naparsuada gapu kencuana, ken maipaayda kencuana: 17 Ket isu ti umuna cadagiti isuamin nga adda, ken isuamin a banbanag addada kencuana. 18 Ket isu ti ulo ti bagi, ti iglesia: isu ti puon, ti inauna nga anac cadagiti natay; tapno cadagiti isuamin ket isu iti catan-ocan. 19 Ta macaay-ayo iti Ama a ti amin nga pannacapunno ket agtaeng kencuana; 20 Ket, idinto nga inaramidna ti cappia a gapu ti dara iti cruzna, gapu kencuana maicappia dagiti isuamin a banbanag babaen kencuana; gapu kencuana, kunak, uray dagiti adda iti rabaw ti daga, uray dagiti adda sadi langit. 21 Ket dacayo, idinto a gangannaetcayo idi ken ti nakemyo naibusor gapu cadagiti dakes nga aramidyo, nupay casta ita pinakicappianacayo 22 Gapu iti natao-an a bagina babaen ti patay, tapno agparangcayo a sasanto ken awan tulawyo ken awan ti pacapilawanyo iti sangoananna: 23 No pudno nga agtalinaedcayo iti pammati a naipasdec ken natibker, ken saanyo nga panawan iti pananginanama iti evangelio, isu nga nangegyo, ken naicascasaba iti amin a parsua iti baba ti langit; a gapu kencuana siac ni Pablo nagbalinac a ministro; 24 Ita agragragsacac cadagiti sagabaec gapu cadacayo, ket tultuloyec ti biangco babaen ti lasagco ti agcurang pay cadagiti sinagaba ni Cristo gapu ti bagina, nga isu ti iglesia: 25 A gapu kencuana nagbalinac a ministro, cas mayannugot iti pannaca-aywan nga intalec ti Dios caniac a maipapan cadacayo, tapno icascasabac a naan-anay ti sao ti Dios; 26 Cayatco a saoen ti palimed a nailemmeng bayat ti ginasgasut a tawen ken cadagiti caputotan, ngem ita naiparangarang cadagiti sasantona: 27 Isuda a kinayat ti Dios a nangipacaammoan no ania ti kinabacnang ti dayag daytoy a palimed iti tengnga dagiti Gentil; isu ti caadda ni Cristo cadacayo, iti inanama ti gloria: 28 Isu nga icascasabami, a bagbagaan ti amin a tao, ken sursuroan ti amin a tao babaen iti amin a kinasirib; tapno idatagmi ti isuamin a tao a nataengandan ken Cristo Jesus: 29 Ket maipanggep itoy agaramidac met, a sipipinget cas mayannurot iti bilegna, isu nga agaramid caniac a buyugen ti pannacabalin. CAPITULO 2 1 Ta cayatco a maamoanyo ti dackel unay a pannakidangadangco gapu cadacayo, ken cadagiti taga Laodicea, ken cadagiti isuamin a dipay nacakita ti rupac; 2 Tapno maliwliwa coma dagiti puspusoda, nga agsisinggalutda coma ken ayat, ken maipaay iti amin a kinabacnang ti naan-anay a pannacaawat, a maipaay iti panangammo iti palimed ti Dios, ken ti Ama, ken ni Cristo; 3 Isu a nacailemmengan dagiti isuamin a gameng ti sirib ken pannaca-ammo. 4 Kunak daytoy, tapno awan coma ti tao nga mangallilaw cadacayo cadagiti sao nga macauy-uyot. 5 Ta uray no awanac a sibabagi cadacayo, ngem adda ti espirituc cadacayo, a siraragsac ken sikikita iti urnosyo, ken ti kinatibker ti pammatiyo ken Cristo. 6 Idinto ngarud nga inawatyo ni Cristo Jesus nga Apo, magnacayo kencuana: 7 A maparamutcayo ken mapadackelcayo kencuana, ken mapalagdacayo iti pammati, a cas met iti pannacaisuroyo, ken mapnocayo cadagiti panagyaman. 8 Agannadcayo di la ket ta adda mangcayaw cadacayo gapu iti filosofiana ken macaallilaw a sursuro, cas mayalubog cadagiti sarsarita a natao-an, ken mayalubog cadagiti nailubongan a pamunganayan, ket saan a mayannurot ken Cristo. 9 Ta kencuana agtaeng ti naan-anay a Kinadios a sibubukel. 10 Ket na-aramidcayo a naan-anay kencuana, ket isu ti ulo ti amin a kinaturay ken pannacabalin: 11 Isu met a nacacugitanyo iti maysa a pannacacugit a saan nga inaramid iti ima, babaen iti pannacaiwacsi ti bagi dagiti basbasol ti lasag gapu iti panangcugit ni Cristo: 12 A naitabuncayo a naicuyog kencuana iti pannacabautizar, isu met a nacapagungaranyo a naicuyog kencuana gapu iti pammati iti panagaramid ti Dios, a namagungar kencuana cadagiti natay. 13 Ket dacayo, idinto a nataycayon gapu cadagiti basbasolyo ken ti di pannacacugit dagiti lasagyo, pinagbiagnacayo a naicuyog kencuana, ken pinacawannacayo cadagiti isuamin a basbasoltayo; 14 A pinunasna ti surat a nacailanadan dagiti bilbilin nga naibusor cadatayo, ken nangparigat cadatayo, ket pinucawna, idi inlansana iti cruzna; 15 Ket inabacna dagiti kinaturay ken dagiti pannacabalin, imparangna iti nalatac, ti panagballigina cadacuada iti cruzna. 16 Dicayo coma ngarud paocom iti siasinoman no maipapan iti pannangan, wenno iyiinum, wenno maipapan iti aldaw ti fiesta, wenno luttuad, wenno aldaw a panaginana: 17 Dagitoy a banbanag isuda idi ti anniniwan dagiti banbanag nga umay; ngem ti bagi cucua ni Cristo. 18 Dicayo coma paallilaw ti gungonayo babaen ti siasinoman nga aginpapacumbaba ken gapu iti panagrucbab cadagiti angeles, ket agtalged cadagiti banbanag nga saanna a nakita, ken sipapalangguad gapu iti panunotna a linalasag, 19 Ket saan nga agtalinaed iti Ulo, a gapu kencuana amin a bagi babaen cadagiti ur-urat ken nagsusuupan idinto a mataraonan, ken masangalsangal, rumang-ay iti irarang-ay nga aggapu iti Dios. 20 No nataycayon a naicanunong ken Cristo no maipapan cadagiti nailubongan a sursuro, apayapay, a casla agbibiagcayo babaen ti lubong, nga agtulnogcayo cadagiti al-allagaden, 21 (Dicayo igganan; dicayo ramanan; dicayo sagiden; 22 Ta amin dagitoy ket mapucawdanto ti pannacaaramatda;) a cas mayannurot cadagiti bilbilin ken sursuro dagiti tattao? 23 Dagitoy a banbanag agpayso nga agparangda a nainsiriban babaen ti cananakem a panagdayaw, ken kinapacumbaba, ken panangbaybay-a iti bagi; awan ti aniaman a pategda a manglapped iti tarigagay ti lasag. CAPITULO 3 1 Ngarud no napagungarcayo a naicuyog ken Cristo, sapulenyo dagiti banbanag sadi ngato, isu nga ayan ni Cristo nga agtugtugaw iti macanawan ti Dios. 2 Panunotenyo dagiti banbanag sadi ngato, saan a dagiti banbanag ditoy daga. 3 Ta nataycayon, ket ti biagyo naidulin a nairaman ken Cristo ken iti Dios. 4 Inton ni Cristo, isu a biagtayo, maiparangarangto, maiparangarangcayonto metten a mairaman kencuana iti gloria. 5 Papatayenyo ngarud dagiti camcamengyo nga addada iti rabaw iti daga; nga isuda ti pannakicamalala, ti kinarugit, dagiti derrep, dagiti dakes a tarigagay, ken ti agum, isu a panagrucbab cadagiti didiosen: 6 Gapu cadagitoy nga banag ket umay iti pungtot ti Dios cadagiti annac ti kinasukir: 7 Cadacuada nagnagnacayo met idi naminsan, idi nagbibiagcayo cadagitoy a banbanag. 8 Ngem ita idianyo coma metten amin dagitoy a banbanag; pungtot, gura, kinadakes ti nakem, kinasalawasaw, naalas a sasao a rummuar iti ngiwatyo. 9 Saancayo nga agiinnulbod, iyantangay inucsubyo daydi tao a daan agraman dagiti ar-aramidna; 10 Ket incawesyo ti tao a baro, isu a mapabpabaro iti pannacaammo nga umasping iti daydiay namarsua kencuana: 11 A kencuana awan ti Griego ken Judio, pannacacugit ken di pannacacugit, uray Barbarian, uray Escita, uray adipen ken agwayawaya; no di ket ni Cristo ti isuamin, ket adda cadagiti isuamin. 12 Agcawescayo ngarud, cas dagiti pinili ti Dios, sasanto ken ay-ayaten, puspuso a naasi, iti kinaimbag ti nakem, iti kinapacumbaba, iti kinaemma, ken iti nabayag a panagiturtured; 13 Nga agiinnanuscayo, ket agpipinnacawancayo, no ti asinoman adda pangidarumanna iti sabali: cas iti pammacawan ni Cristo cadacayo, castacayo met. 14 Ket iti cangronaan cadagitoy a banbanag agcawescayo ti ayat, isu ti singgalut ti pannacaan-anay. 15 Ket agari coma ti talna ti Dios cadagiti puspusoyo, isu met a nacaawisanyo iti maymaysa a bagi; ket managyamancayo coma. 16 Ti sao ni Cristo agtaeng coma cadacayo a sibabacnang iti amin a kinasirib; nga agsisinnurocayo ken agbibinnalacadcayo babaen cadagiti salmos ken himhimno ken naespirituan a cancanta, a cancantaenyo ti parabur cadagiti puspusoyo iti Dios. 17 Ket dagup ti amin nga aramidenyo iti sao wenno iti aramid, aramidenyo amin babaen iti nagan ni Apo Jesus, nga agyamancayo iti Dios ken Ama gapu kencuana. 18 Assawa nga babbai, agtulnogcayo cadagiti assawayo, cas mayannugot iti Apo. 19 Assawa nga lallaki, ayatenyo dagiti assawayo, saancayo coma nga marurod a maibusor cadacuada. 20 Annac, agtulnogcayo cadagiti naganac cadacayo iti amin a banbanag: ta daytoy macaay-ayo unay ti Apo. 21 Amma, saanyo a suronen dagiti annacyo iti panagpungtot, di la ket ta maupayda. 22 Paad-adipen, agtulnogcayo iti isuamin cadagiti appoyo a tattao; saan la nga ti imatangda, a cas cadagiti agayat a mangay-ayo cadagiti tattao; no di ket buyogen ti kinadalus ti puso, a cabutengyo ti Apo: 23 Dagup ti aramidenyo, aramidenyo a napusoan, a cas maipaay iti Apo, ket saan a maipaay cadagiti tattao; 24 A paga-ammoyo nga iti biang ti Apo awatenyonto ti gunggona iti tawid: gapu ta agserservicayo ken ti Apo Cristo. 25 Ta ti agaramid ti dakes awatennanto ti supapac ti dakes nga inaramidna: ket awan ti pagdudumaan dagiti tattao. CAPITULO 4 1 Appo, aramidenyo cadagiti adipenyo ti nalinteg ken ti maiparbeng; nga paga-ammoyo nga adda met maysa nga Apoyo sadi langit. 2 Agtalinaedcayo iti cararag, nga agsalucagcayo kencuana a mapacuyogan cadagiti panagyaman; 3 Nga idawdawatandacami met, tapno ti Dios ilucatannacami iti maysa a ruangan nga maipaay iti sao, tapno ipalawagmi ti palimed ni Cristo, a gapu kencuana nacawaranac: 4 Ken tapno isu mailawlawagco, cas rebbengco a panangipalawag. 5 Magnacayo a nainsiriban iti imatang dagiti adda iti ruar, ket ilalaenyo ti tiempo. 6 Ti saoyo ket cancanayon coma nga macaay-ayo, a natempla iti asin, tapno ammoyo no casano ti maiparbeng nga isusungbatyo iti tunggal tao. 7 Amin dagiti maipapan caniac ket ibaganto cadacayo ni Tiquico, napateg nga ay-ayaten a cabsat, ken matalec a ministro ken cadduatayo iti panagservi iti Apo: 8 Isu nga imbaonco cadacayo a maipuon itoy nga banag, tapno maammoanna ti casasaadyo, ken tapno liwliwaenna dagiti puspusoyo; 9 A naicuyog ken Onesimo, matalec ken patpatgen nga ay-ayaten a cabsat, a maysa cadacayo. Ipadamagdanto cadacayo amin a banbanag nga naaramid ditoy. 10 Ni Aristarco a cadduac iti pagbaludan cablaawannacayo, ken ni Marcos, anac iti cabsat a babai ni Bernabe, (ket ti maipapan kencuana inawatyon dagiti bilbilin: ket no umayto cadacayo, isu awatenyo;) 11 Ken ni Jesus, a managan Justus, isuda a naicadcaddua iti pannacacugit. Dagitoy laeng dagiti catulongac iti maipapan iti pagarian ti Dios, isuda a nacaliwliwa caniac. 12 Ni Epafras, a maysa cadacayo, ken adipen ni Cristo, cablaawannacayo, ket cancanayon a sia-agawa cadagiti panangicarcararagna cadacayo, tapno mataginayoncayo a sititibker a naan-anay ken sitatalged unay iti amin a pagayatan ti Dios. 13 Ta panecnecac, nga dackel unay iti regtana no maipapan cadacayo, ken gapu cadagiti taga Laodicea, ken gapu cadagiti taga Hierapolis. 14 Ni Lucas, ti ay-ayaten a mangngagas, ken ni Demas, cablaawandacayo. 15 Cablaawanyo dagiti cacabsat sadi Laodicea, ken ni Nimfas, ken iti iglesia nga adda iti balayna. 16 Ket intono daytoy a surat naibasan cadacayo, ipabasayo met idiay iglesia dagiti taga Laodicea; castanto met a basaenyo ti surat nga aggapu idiay Laodicea. 17 Ket ibagayo ken Arquipo, Alluadam a kitaem ti kinaministro nga inawatmo iti Apo, tapno tungpalem. 18 Ti cablaaw sinuratan babaen ti imac siac ni Pablo. Laglagipenyo dagiti pannacabalbaludco. Ti parabur agtaeng coma cadacayo. Amen. ¶ Naisurat idiay Roma nga maipaay cadagiti taga Colosas babaen da Tyquico ken ni Onesimo.