|
JUAN 1 Ti panglacayen isuratna ken ay-ayaten unay a Gayo, isu nga ay-ayatec a pudno. 2 Ay-ayatec unay, siac dawatec cadagiti isuamin a banbanag nga adda coma rang-ay ti salun-atmo, a cas met iti irarang-ay ti cararruam. 3 Ta nagrag-oac iti nalaus, idi immay dagiti cacabsat ket pinanecnecanda ti kinapudno nga adda kenca, cas met iti pannagnam iti kinapudno. 4 Awan ti dackel a pagragrag-oac no di iti pannacangegco nga dagiti annacco ket magmagnada iti kinapudno. 5 Ay-ayatec unay, sica aramidem a matalec ti amin nga aramidem cadagiti cacabsat, ken uray pay cadagiti gangannaet; 6 Dagidiay a mamanecnec iti ayatmo iti sangoanan ti iglesia: no tulongamto ida iti dalanda a maicari iti nadiosan a banag, ket nasayaatto ti aramidem: 7 Ta gapu iti pateg ti naganna pimmanawda, nga awan ti innalada cadagiti Gentil. 8 Rebbengtayo ngarud a pasangbayen dagiti cacasta, tapno datayo coma ti catulongan ti kinapudno. 9 Nagsuratac iti iglesia: ngem ni Diotrefes, nga agumanna ti nagungundaway ngem cadagiti dadduma, saannacami nga awaten. 10 Gapuna, no umayac, malagipconto dagiti banbanag nga ar-aramidenna, nga agsalsalawasaw iti maibusor cadacami cadagiti sasao a dakes: ket saan pay la a mapnec itoy, ta saanna pay nga awaten dagiti cacabsat, ket dina met palubosan dagiti mayat, ket pagtalawenna ida iti iglesia. 11 Ay-ayatec unay, saanmo nga suroten ti dakes, no di ket ti naimbag. Ti agaramid iti nasayaat adda iti Dios: ngem ti agaramid iti dakes saanna a nakita ti Dios. 12 Ni Demetrio naimbag ti pammanecnecna dagiti isuamin a tattao, ken ti pay pudno: wen, dacami met panecnecanmi; ket ammom a ti pammanecnecmi ket pudno. 13 Adu dagiti banbanag nga isuratco coma, ngem diac cayat nga isurat kenca iti tinta ken pluma: 14 Ta namnamaec a kitaenca iti mabiit, ket agsaotanto iti rupanrupa. Ti talna agtaeng coma kenca. Dagiti gagayyem cablaawandaca. Cablaaawan met dagiti gagayyem babaen cadagiti nagnaganda. |