|
KEN TIMOTEO 1 Ni Pablo, apostol ni Jesus Cristo gapu iti pagayatan ti Dios, cas mayannurot iti cari ti biag nga adda ken Cristo Jesus, 2 Isuratco ken Timoteo, a patpatgec ken ay-ayatec unay nga anac: Parabur, caasi, ken talna, nga aggapu iti Dios Ama ken ni Cristo Jesus nga Apotayo. 3 Agyamanac iti Dios, isu a pagserviac nanipud cadagiti appoc a lallacay a buyugen ti nadalus a conciensa, tapno saan nga agressat iti pananglaglagipco kenca babaen cadagiti ar-ararawco iti rabii ken aldaw; 4 Tartarigagayac unay a makitaca, idinto a laglagipec dagiti luluam, tapno mapnoac iti rag-o; 5 No maipalagip caniac ti pammati a pudno nga adda kenca, isu a naadda nga immuna ken apom a baket a Loida, ken ni inam a Eunice; ket mapnecac nga adda met kenca. 6 Gapuna ipalagipco kenca a parangrangem ti sagut ti Dios, nga adda kenca gapu iti pannacaipatay dagitoy im-imac. 7 Ta ti Dios saannatayo nga iniccan ti espiritu ti kinatacrut; no di ket ti pannacabalin, ken ti ayat, ken ti naimbag a nakem. 8 Dica ngarud ibain ti pangpanecnec ti Apotayo, ken casta met caniac a baludna: no di ket makipagsagabaca cadagiti rigrigat gapu iti evangelio cas mayannurot iti pannacabalin ti Dios; 9 Isu a nangisalacan cadatayo, ken nangawis iti maysa a panangawis a nasantoan, saan a mayalubog cadagiti ar-aramidtayo, no di ket mayannurot iti panagemna met laeng ken ti parabur, a naited cadatayo ken Cristo Jesus idi sacbay iti pannacabangon itoy lubong, 10 Ngem naiparangarang ita a gapu iti panagparang ti Manangisalacantayo a Jesus Cristo, isu a nangpucaw ken patay, ket imparangarangna ti biag ken ti saan nga ipapatay gapu iti evangelio: 11 Isu a nacatudingac a mangasaba, ken apostol, ken mannursuro cadagiti Gentiles. 12 Gapu met itoy sagabaec dagitoy a banbanag: nupay casta saannac a mabain: ta ammoc daydiay pinatic, ket mapnecac unay nga isu ket mannacabalin a mangaywan iti intalecco kencuana a maipaay iti daydiay nga aldaw. 13 Salimetmetam a pagwadan dagiti naurnos a sasao, a nangegmo caniac, iti pammati ken ayat nga adda ken Cristo Jesus. 14 Daydi nasayaat a banag a naicumit kenca aywanam gapu iti Espiritu Santo nga agtaeng cadatayo. 15 Ammomon daytoy, nga amin dagiti taga Asia ket simminada caniac; ket cadacuada nairaman da Figello ken Hermogenes. 16 Ti Apo ipaayna coma ti asi iti balay ni Onesiforo; ta namin-adu nga isu liniwliwanac, ket dina imbain ti cawarco: 17 No di ket, idi adda idiay Roma, sinapulnac a sireregta, ket nasaracannac. 18 Ti Apo ipaayna coma kencuana a masaracanna ti caasi ti Apo iti daydiay nga aldaw: ket ti caadu ti panagservina caniac idiay Efeso, ammom la unay. CAPITULO 2 1 Sica ngarud, anacco, bumilegca iti parabur nga adda ken Cristo Jesus. 2 Ket dagiti banbanag a nangegmo caniac a sinacsian dagiti adu, dagitoy icumitmo cadagiti matalec a tattao, isuda a macabalinto a mangisuro met cadagiti sabsabali. 3 Agibturca ngarud iti nabayag, a cas naimbag a buyot ni Jesus Cristo. 4 Awan ti tao nga makigubat ket maringgoran cadagiti pagsapulan daytoy a biag; tapno mabalinna nga ay-aywen daydiay nangpili kencuana a soldado. 5 Ket no met ti tao makidangadang cadagiti pagay-ayaman, saan a mabalangatan, no saan a makidangadang a naincalintegan. 6 Ti agtaltalon nga agbannog rebbengna nga isu ti umuna a mairaman cadagiti bungbunga. 7 Imutectecam ti saoec; ta ti Apo iccannacanto ti pannacaawat cadagiti isuamin a banbanag. 8 Laglagipem ni Jesus Cristo a capuonan ni David a nagungar cadagiti natay cas mayannurot iti evangelioc: 9 Isu a pagsagabaac cadagiti rigrigat, a cas cadagiti agaramid ti dakes, agingga cadagiti pannacarepreppet; ngem ti sao ti Dios ket saan a nareppet. 10 Gapuna siac sagabaec amin gapu cadagiti napili, tapno magun-odanda met ti pannacaisalacan nga adda ken Cristo Jesus agraman iti agnanayon nga gloria. 11 Napudno daytoy a pagsasao: Ta no nataytayo a naicanunong kencuana, agbiagtayo met a naicanunong kencuana: 12 No agsagabatayo, agaritayto met a mairanud kencuana: no isu paglicudantayo, paglicudannatayto met: 13 No saantayo a mamati, numan pay casta agtalinaedto nga matalec: ta dina mabalin nga ilibac ti bagina. 14 Ipalagipmo dagitoy a banbanag, nga ipaganetgetmo cadacuada iti sangoanan ti Apo a dida agsusuppiat maipuon cadagiti sasao nga awan ti pagimbagan, no di ket pacariribucan dagiti agdengngeg. 15 Agadalca a sireregta nga agparang a ma-anamungan iti sangoanan ti Dios, mangmangged a saan a masapul nga mabain, ken bingaybingayem nga apag-isu dagiti sao ti kinapudno. 16 Ngem adaywam dagiti ubbaw ken awan capapay-anda a palpalawag: ta cumarcarodanto a cumarcaro iti kinadakes. 17 Ket ti saoda agdadaelto a casla iti gangrena: ket cadacuada adda da Himeneo ken Fileto; 18 A naisiasidan iti kinapudno, a cunkunada a ti panagungar ket napalabasen; ket riribukenda ti pammati dagiti dadduma. 19 Nupay casta ti pamunganayan ti Apo ket mataginayon a sititibker, nga adda daytoy a pagilasinan, Ti Apo mailasinna dagiti tattao a cucuana. Ken, Amin coma dagiti umawag iti nagan ti Apo ket pagpanawanda iti kinadakes 20 Ngem iti maysa nga balay a dackel ket saan laeng nga addaan cadagiti basbaso a balitoc ken pirac, no di pay adda dagiti cayo ken dinamili; ket dagiti dadduma maipaayda iti nadayaw, ket dagiti dadduma maipaayda iti nanumo. 21 No ngarud adda aggugorto cadagidiay a banag, isunto ti maysa a baso a maipaay iti dayaw, napagsanto, maiparbeng nga usaren iti apona, ken naisagana iti isuamin a naimbag nga aramid. 22 Ngem adaywam dagiti derrep a tarigagay nga inu-ubingan: ket sumurotca iti kinalinteg, iti pammati, iti ayat, iti talna, a makicadcadduaca cadagiti umawag iti Apo a sidadalus iti pusoda. 23 Ngem dagiti minamaag ken agtaud iti kinanengneng a supsuppiat liclicam, ta ammom a dagita ket pataudenna dagiti panagriringgor. 24 Ket ti adipen ti Apo saanna a rebbeng ti makiringgor; no di ket naamo cadagiti isuamin a tattao, nalaing a mangisuro, naanus, 25 A siemma nga mamatigmaan cadagiti sumalungasing; bareng no ti Dios ipa-ayanna ida ti panagbabawi a maipaay iti pannaca-ammoda iti pudno; 26 Ken tapno macalapsutda iti silo ti diablo, isu a nangsilo cadacuada a maipaay iti pagayatanna. CAPITULO 3 1 Ngem ammoem pay daytoy, a cadagiti maud-udi nga al-aldaw dagiti napeggad a tiempo ket umaydanto. 2 Ta dagiti tattao ket ayatendanto dagiti bagbagida, naagumda, managpasindayaw, napalangguad, managtabbaaw, nasukir cadagiti dadackelda, awan panagyamanda, saanda a nadiosan, 3 Awananda iti ayat iti sigud a nacayanacan, saanda a mapagtalcan, managpadpadakesda, saanda a managparbeng, nauyongda, gumurgurada cadagiti banbanag nga naimbag, 4 Mangliliput, nasubeg, natangsit, managayat cadagiti ragragsac a nangnangrona ngem iti panagayatda iti Dios; 5 Nga adda langada a kinasanto, ngem libakenda ti pannacabalin daytoy a kinasanto: umadayuca met cadagiti cacasta. 6 Ta adda cadagitoy dagiti sumrec cadagiti balbalay, ket siloanda dagiti babbai a maag a napno cadagiti basbasol, a maiculbo cadagiti nadumaduma a kinagaramugam, 7 Dagita cancanayon nga agad-adalda, ket ni caanoman dida macagteng iti pannacaammo iti pudno. 8 Ket cas cada Janes ken Jambres ti panangsukirda ken Moises, casta met dagitoy ket sukirenda iti kinapudno: tattao a dimmakes ti panunotda, ket nagdakesda no maipapan iti pammati. 9 Ngem didanto rumang-ayen iti masangoanan: ta maiparangarangto cadagiti isuamin iti caawan ti nakemda, a cas met pannacaiparang iti kinaawan a nakem dagidi. 10 Ngem sica na-ammoam a naimbag ti sursuroc, no casano iti panagbiagco, ti turongen ti biagco, ti pammatic, ti nabayag a panagituredco, ti ayatco, ti anusco, 11 Dagiti pannacaidadanesco, dagiti sinagabac, dagiti banbanag a napasamac caniac idiay Antioquia, idiay Iconio, idiay Listra; no aniada dagiti pannacaidadanes a linac-amco: ket cadacuada amin iti Apo inispalnac. 12 Wen, ket isuamin dagiti mayat nga agbiag a nasantoan ken Cristo Jesus aglac-amdanto iti pannacaidadanes. 13 Ngem dagiti tattao a dakes ken dagiti manggargari ket dumakesdanto la a dumakes, a mangallilawda, ket isu maallilawda met laeng. 14 Ngem sica agtalinaedca cadagiti banbanag a sinursurom ken nacapatalgedam, nga ammom no siasino ti nangadalam cadacuada; 15 Ket nanipud idi kinaubingmo naammoam dagiti nasantoan a sursurat, a macabalin a mamagsirib kenca a maipaay iti pannacaisalacan gapu iti pammati ken Cristo Jesus. 16 Isuamin nga surat ket impaltiing ti Dios, isu met ti naimbag nga pacasursuroan, ken pacatingaran, ken pacababalawan, ken paca-adalan iti kinalinteg: 17 Tapno iti tao ti Dios ket naan-anay coma, a masursuroan nga naimbag iti isuamin a nasayaat nga ar-aramid. CAPITULO 4 1 Tarigagayac unay nga bilinenca iti imatang ti Dios, ken ni Apo Jesus Cristo, isu a mangocomto cadagiti nabiag ken natay intono iti panagparangna ken ti pagarianna; 2 Nga icascasabam ti sao; umagawaca no iti tiempona man, wenno no saanna a tiempo; tumubngarca, mangbabalawca, mamagbagaca a buyugen iti amin a panaganus ken ti panangisursuro. 3 Ta umayto ti aldaw a didanto maanusan ti naurnos a sursuro; no di ket cas mainugot iti kinagaramugamda met laeng mangurnongdanto cadagiti mannursuroda, ta ngamin adda gagatel cadagiti laplapayagda; 4 Ket iyadayudanto dagiti pagdengngegda iti pudno, ket sumiasida a mapan cadagiti parparbo a sarita. 5 Ngem sica agtacnengca cadagiti isuamin a banbanag, aganusca cadagiti rigrigat, aramidem ti aramid ti evangelista, tungpalem nga naan-anay ti nacaibaonam. 6 Ta addaacon nga nacasagana a maidaton, ket ti aldaw ti ipapanawco dimtengen. 7 Nakirupacac iti nasayaat a pannakidangadang, naturposco ti tarayec, inaywanac ti pammati: 8 Manipud ita naisagana a maipaay caniac iti balangat ti kinalinteg, nga ti Apo, ti nalinteg nga ocom, itednanto caniac iti daydiay nga aldaw: ket saan laeng a siac, no di pay cadagiti isuamin nga agayat iti panagparangna. 9 Aramidem ti cabaelam tapno umayca caniac daras: 10 Ta ni Demas ket pinanawannac, nga inay-ayatnan daytoy agdama a lubong, ket napan idiay Tesalonica: ni Crescente napan idiay Galacia, ni Tito idiay Dalmacia. 11 Ni laeng Lucas ti adda caniac. Alaem ni Marcos, ket icuyogmo: ta matulongannac iti panagaywan. 12 Ngem ni Tiquico imbaonco idiay Efeso. 13 Daydi cagay a nabatic idiay Troas ken Carpo, inton umayca, icuyogmonto, ken dagiti pagbasaan, nangrona unay dagiti pergamino. 14 Ni Alejandro a mammanday iti cobre ket adu ti dakes nga inaramidna caniac: ti Apo supapacannanto cas mayalubog cadagiti ar-aramidna: 15 Sica agaluadca met kencuana; ta sinuppiatna unay dagiti sasaomi. 16 Idi immuna a pannakicalintegac ket awan iti tao a kimmanunong caniac, no di ket isuda amin pinanawandac: icararagco iti Apo ta dinto coma maipabasol cadacuada daytoy. 17 Ngem ti Apo kinadduanac, ket pinapigsanac; tapno gapu caniac ti panangascasaba maan-anay coma ti pannacaipadamagna, ken tapno denggen dagiti isuamin a Gentiles: ket siac naispalnac iti ngiwat ti leon. 18 Casta met ti Apo ilisinacto iti isuamin a dakes nga aramid, ket sallucobannacto a maipaay iti nailangitan a pagarianna: maited coma kencuana ti gloria iti agnanayon nga awan patinggana. Amen. 19 Cablaawam ni Prisca ken ni Aquila, ken dagiti sangacabbalayan ni Onesiforo. 20 Ni Erasto nagbati idiay Corinto: ngem ni Trofimo pinanawac idiay Mileto a masakit. 21 Aramidem ti cabaelam tapno macaumayca sacbay ti calam-ecna. Ni Eubulo cablaawannaca, ken ni Pudente, ken Lino, ken ni Claudia, ken dagiti isuamin a cacabsat. 22 Ni Apo Jesus Cristo ti cumuyog coma iti espiritum. Parabur coma ti adda kenca. Amen. ¶ Ti maicadua a libro ni Timoteo, nadutocan nga umuna a obispo ti iglesia dagiti taga Efeso, ket naisurat idiay Roma, idi naidatag ni Pablo iti saclang ni Nero iti maicaddua a daras. |