TI MAICADDUA A SURAT NI APOSTOL PABLO CADAGITI TAGA TESALONICA CAPITULO 1 1 Ni Pablo, ken ni Silvano, ken ni Timoteo, isuratda iti iglesia dagiti taga Tesalonica nga adda iti Dios nga Amatayo ken ni Apo Jesus Cristo: 2 Parabur adda coma cadacayo, ken talna, nga aggapu ti Dios Ama ken ni Apo Jesus Cristo. 3 Rebbengmi ti agyaman a cancanayon ti Dios gapu cadacayo, cacabsat, cas maicari, agsipud ta ti pammatiyo rumang-ay unay, ket amin iti panagayatyo ti maysa ken maysa dumacdackel; 4 Nga iti casta dacami pagpasindayawdacayo cadagiti iglesia ti Dios a maipuon iti anusyo ken pammatiyo iti tengnga dagiti isuamin a pannacaidadanes ken rigat a sagsagabaenyo: 5 Isuda a nalawag a pacailasinan iti nalinteg a panangipato ti Dios, a maipaay iti pannacaibilangyo a maicari iti pagarian ti Dios, isu met a pacaigappuan ti panagsagabayo: 6 Makitatayo a nalinteg iti biang ti Dios a mangisupapac ti rigat cadagiti mamarigat cadacayo; 7 Ket dacayo a maparparigat aginanacayo a mairaman cadacami, intono maiparangarang ni Apo Jesus nga aggapu sadi langit agraman cadagiti nabileg nga angelesna, 8 Babaen cadagiti darang ti apuy balsenna dagiti saan a mangammo ti Dios, ken ti di agtulnog iti evangelio ni Apotayo a Jesus Cristo: 9 Isuda madusadanto iti agnanayon a pannacapucaw a maisinada iti sangoanan ti Apo, ken iti dayag ti pannacabalinna; 10 Inton umay tapno maidaydayaw cadagiti sasantona, ken maaramid a macaay-ayo cadagiti amin a mamati (ta ti pangpanecnecmi cadacayo napapati) iti dayta nga aldaw. 11 Gapu itoy a panggep cancanayon nga idawdawatandacayo, tapno ti Diostayo ket ibilangnacayo a maicari iti nacaawisanyo, ket pagbanagenna iti isuamin a tarigagay ti kinaimbag, ken aramid ti pammati a buyogen ti pannacabalin: 12 Tapno ti nagan ni Apotayo a Jesus Cristo ket maitantan-oc cadacayo, ket dacayo kencuana, a mayalubog iti parabur ti Diostayo ken ni Apo Jesus Cristo. CAPITULO 2 1 Ita dawatenmi cadacayo, cacabsat, no maipapan iti iyaay ni Apotayo a Jesus Cristo, ken iti pannakigimongtayo kencuana, 2 A dicayo coma mapaalis a sipapardas iti panunotyo, ket dicayo pariribuc, uray gapu iti espiritu, uray gapu iti sao, uray gapu iti surat a cas naggapu cadacami, a casla nga asidegen iti aldaw ni Cristo. 3 Dicayo paallilaw iti uray siasino iti uray aniaman: ta dayta nga aldaw dinto umay, no dipay umuna ti panaglicud, ken dayta tao ti basol ket maiparangarang, ti anac ti pannacapucaw; 4 Isu a sumalungasing ken agpalangguad a bumusor iti isuamin a maawagan Dios, wenno ti madaydayaw; ket iti casta isu cas Dios agtugaw iti templo ti Dios, nga agparang a casla isu ti Dios. 5 Dicayo cadi malagip, nga, idi addaac pay laeng cadacayo, imbagbagac cadacayo dagitoy a banbanag? 6 Ket ita ammoyo ti mangigawid kencuana tapno maiparangarang iti tiempona. 7 Ta ti palimed ti kinadakes ket agar-aramiden: isuna laeng nga adda ita mangigawgawid, aginggana isu ket maiccat iti nagtetengngaan. 8 Iti casta dayta a Nadangkes ket maiparangarangton, isu a papatayento ti Apo babaen ti espiritu ti ngiwatna, ket pucawennanto babaen ti ranniag iti iyaayna: 9 Uray daydiay, nga ti iyaayna ket cas ti panangaramid ni Satanas a mapacuyogan iti amin a pannacabalin ken dagiti pagilasinan ken dagiti ulbod a datdatlag, 10 Ken ti amin nga allilaw ti kinadakes a maipaay cadagiti mapucaw; agsipud ta dida inawat ti ayat ti kinapudno, a maipaay coma a paca-isalacananda. 11 Gapu itoy ti Dios ibaonnanto cadacuada ti nabileg nga pannacaallilaw, tapno patienda ti kinaulbod: 12 Tapno mapucaw coma amin dagiti di namati iti pudno, no di ket nagray-oanda ti kinakillo. 13 Ngem rebbengmi ti agyaman a cancanayon iti Dios gapu cadacayo, cacabsat nga dungdungoen ti Apo, agsipud ta nanipud idi punganay pinilinacayo ti Dios a maipaay iti pannacaisalacan babaen iti pannacasantificar ti Espiritu ken ti pammati iti pudno: 14 Isu a nangayabanna cadacayo a gapu iti evangeliomi, tapno magun-odan ti gloria ni Apotayo a Jesus Cristo. 15 Iti casta ngarud, cacabsat, bumilegcayo, ket taginayonenyo dagiti nacaisigudan a naisuro cadacayo, iti sao man, wenno iti suratmi. 16 Ita ni Apotayo a Jesus Cristo met laeng, ken ti Dios, nga Amatayo, isu a nangayat cadatayo, ket iniccannatayo iti agnanayon a liwliwa ken nasayaat nga inanama gapu iti parabur, 17 Liwliwaenna dagiti puspusoyo, ken patibkerennacayo iti isuamin nga naimbag a sao ken aramid. CAPITULO 3 1 Camaudiananna, cacabsat, icarcararagandacami, tapno ti sao ti Apo ket maiwarnac nga siwayawaya, ken madaydayaw, a cas met maar-aramid cadacayo: 2 Ken tapno maispalcami cadagiti macarengreng ken dakes a tattao: ta saan nga amin a tattao ket mamatida. 3 Ngem ti Apo matalec, isu a mamagtalinaedto cadacayo, ken alluadannacayto iti dakes. 4 Ket adda panagtalecmi iti Apo no maipapan cadacayo, nga aramidenyo ken aramidenyonto dagiti banbanag nga ibilinmi cadacayo. 5 Ket ti Apo idalanna dagiti puspusoyo iti ayat ti Dios, ken iti naanus a panagur-uray ken ni Cristo. 6 Ibilinmi ngarud ita cadacayo, cacabsat, babaen ti nagan ni Apotayo a Jesus Cristo, a panawanyo ti siasinoman a cabsat a magna iti saan nga naurnos, ket saan a cas iti sursuro nga inawatyo cadacami. 7 Ta dacayo met laeng ammoyo no casano ti rebbengyo a panangtulad cadacami: ta dicami nagna nga saan a naurnos iti tengngayo; 8 Ket dicami met kinnan ti tinapay iti siasinoman a tao nga awan baybayadna; no di ket nagtrabahocami a nagbannog ken binuyogan ti narigat a panagtrabaho iti rabii ken aldaw, tapno dicami agbalin a dadagsen ti siasinoman cadacayo: 9 Saan a gapu ta awan ti calinteganmi, no di ket tapno agbalincami nga ulidan cadacayo tapno tumuladcayo cadacami. 10 Ta uray pay idi addacami cadacayo, imbilbilinmi cadacayo daytoy, a no adda madi nga agtrabaho, saan met coma nga mangan. 11 Ta madamdamagmi nga adda dadduma cadacayo a magmagnada iti saan a naurnos, a dida sangoen ti uray ania nga aramid, no di ket manangsalsalida. 12 Cadagita a tao ngarud ibilinmi ken bagbagaanmi gapu ken Apotayo a Jesus Cristo, nga agtrabahoda coma nga naulimec, ken manganda ti bucodda a tinapay. 13 Ngem dacayo, cacabsat, saancayo coma a maupay nga agaramid ti naimbag. 14 Ket no addanto saan nga agtulnog iti saomi gapu itoy a surat, usigenyo dayta a tao, ket dicayo makicuyog kencuana, tapno mabainan. 15 Ngem saanyo nga ibilang isuna a cabusor, no di ket bagbagaanyo a cas cabsat. 16 Ket ti met laeng Apo ti talna iccannacayo ti talna a cancanayon cadagiti isuamin a casasaad. Ti Apo adda coma cadacayo amin. 17 Ti cablaaw ni Pablo a sinuratan toy imac met laeng, nga isu ti pagilasinan iti tunggal casuratan: castoy ti panagsuratco. 18 Ti parabur ni Apotayo a Jesus Cristo agtaeng coma cadacayo amin. Amen. Ti maicaddua a libro nga maipaay cadagiti taga Tesalonica ket naisurat idiay Atenas.