TI LIBRO DAGITI SALMOS Salmo 86 ~ Salmo 150 SALMO 86 Maysa a Cararag ni David. 1 Itimudmo cadi ta lapayagmo, O APO, ket denggennac: ta napanglawac ken agcasapulannac. 2 Salacnibam toy cararruac; ta nasantoanac: O sica a Diosco, isalacanmo ti adipenmo nga nagtalec kenca. 3 Mangngaasica caniac, O Apo: ta um-umkisac kenca iti inaldaw aldaw. 4 Paragsakem ti cararrua ti adipenmo: ta kenca, O Apo, itag-ayco toy cararruac. 5 Ta sica, Apo, naimbagca, ken sisasaganaca a mamacawan; ken napnoanca iti asi cadagiti amin nga umawag kenca. 6 Imdengam, O APO, ti cararagco; ket timudem ti timec dagiti ar-ararawco. 7 Iti aldaw a panagducotco umawagacto kenca: ta sica sungbatannacto. 8 Cadagiti didiosen awan ti cas kenca, O Apo; awan dagiti ar-aramid a cas cadagiti ar-aramidmo. 9 Amin dagiti nasnacion nga inaramidmo umaydanto nga agrucbab iti saclangmo, O Apo; ket itan-ocdanto ti naganmo. 10 Ta sica naindaclanca, ket agaramidca cadagiti nacascasdaaw a banbanag: sicsica laeng ti Dios. 11 Isurom caniac ti dalanmo, O APO; cayatco ti magna iti kinapudnom: pagcaycaysaem toy pusoc tapno agbuteng ita naganmo. 12 Idaydayawcanto, O Apo a Diosco, iti amin a pusoc: ken itantan-occonto ti naganmo iti agnanayon. 13 Ta dackel ti asim caniac: ken inaonmo toy cararruac manipud iti caungan nga impierno. 14 O Dios, dagiti natangsit bimmangonda a bumusor caniac, ket ti bunggoy dagiti tattao a naranggas binirocda toy cararruac; ket saandaca nga insaad iti saclangda. 15 Ngem sica, O Apo, sica iti Dios nga napnoan dungngo, ken managparabur, nabayag iti panagibturmo, ken aglaplapusananca iti kinamanangnga-asi ken kinapudno. 16 O tumaliawca caniac, ket caasiannac; itdem ta bilegmo itoy adipenmo, ket isalacanmo toy anac ti adipenmo a babai. 17 Iparangannac iti tanda a pagimbagan; tapno dagiti gumurgura caniac makitada coma, ket mabainanda: ta sica, APO, binadangannac, ken liniwliwanac. SALMO 87 Maysa a Salmo wenno Canta a maipaay cadagiti annac nga lallaki ni Korah. 1 Ti pamunganayanna adda cadagiti nasantoan nga banbantay. 2 Ni APO ay-ayatenna dagiti ruruangan ti Sion nga nangnangrona ngem iti isuamin cadagiti pagtaengan ni Jacob. 3 Nadayag a banbanag dagiti panangsarsaritada kenca, O ili ti Dios. Selah. 4 Inaganacto ni Rahab ken Babilonia cadagiti macaam-ammo caniac: adtoy da Filistia, ken Tiro, agraman Etiopia; daytoy a lalaki nayanac sadiay. 5 Ket masasaonto maipanggep ti Sion, Daytoy ken daydiay a lalaki naipasngay kencuana: ket ti met laeng cangatoan ti mangpasingkedto kencuana. 6 Iti APO agbilangto, intono ilanadna dagiti tattao, a daytoy a lalaki naipasngay sadiay. Selah. 7 Dagiti agcancanta a cas met cadagiti agtokar ti instrumento addadanto sadiay: amin dagiti ub-ubbogco addada kenca. SALMO 88 Maysa a Canta wenno Salmo a maipaay cadagiti annac nga lallaki ni Korah, iti cangronaan a Tomotokar ti Mahalath Leannoth, Maschil ni Heman nga Ezrahite. 1 O APO Dios ti pannacaisalacanco, nagsangitac iti aldaw ken rabii iti saclangmo: 2 Toy cararagco macastrec cadi dita sangoanam: iyallingagmo cadi ta lapayagmo itoy unnoyco; 3 Ta ti cararruac sipuponno cadagiti ducducot: ket ti biagco umadani ken tanem. 4 Maibilangac cadagiti bumaba iti abut: arigac la tao nga awan pigsana: 5 Siwayawaya cadagiti natay, cas iti napapatay a naidalit iti tanem, a dica pulos lagipenen: ket nagudasdan dita imam. 6 Sica insaadnac iti caunegan nga abut, iti nasipnget, cadagiti yuyeng. 7 Ta pungtotmo agdisso a sibabantot caniac, ken pinarigatnac cadagiti amin a daldalluyonmo. Selah. 8 Inyadayom caniac dagiti caammo-ammoc; pinagbalinnac a carimonda: sipupupocac, ket diac macaaliwacsay. 9 Ti matac marunaw a gapu iti ladingit: APO, inawaganca nga inaldaw, intag-ayco dagitoy im-imac kenca. 10 Iparangmonto aya dagiti datdatlag cadagiti natay? dagiti natay bumangondanto ken idaydayawdacanto aya? Selah. 11 Ti kinamanagayatmo maipalgacto aya idiay tanem? wenno ti kinamatalecmo idiay pacadadaelan? 12 Dagiti datdatlagmo maammoanto aya iti casipngetan? ken ti kinalintegmo idiay daga ni lipat? 13 Ngem kenca imkisac, O APO; ket iti bigat umayto ti cararagco ita saclangmo. 14 APO, apay nga iwagsacmo toy cararruac? apay nga ilingedmo ta rupam caniac? 15 Napaladingitac ket sisasaganaac a matay nanipud kinaubingco: idinto nga agsagabaac cadagiti pangigtotmo maculcolanac. 16 Ti rungsot ti pungtotmo naglasat caniac; dagiti pangigtotmo ginessatdac. 17 Immaydac linawlaw a cas danum iti agmalmalem; linacubdac a sangsangcamaysan. 18 Mangay-ayat ken pagayam inyadayom unay caniac, ken ti caammo-ammoc idiay casipngetan. SALMO 89 Maschil ni Heman nga Ezrahite. 1 Icantacto ti kinamanangaasi iti APO iti agnanayon: ti ngiwatco ipacaammocto ti kinamatalecmo cadagiti amin a capcaputotan. 2 Ta kinunac, Ti caasi mabangonto iti agnanayon: ti kinamatalecmo ipasdecmonto cadagiti langlangit. 3 Nangaramidac iti tulag cadagiti pinilic, insapatac ken David nga adipenco, 4 Ti caputotam ipasdecconto nga agnanayon, ken bangonecto ti tronom iti amin a capcaputotan. Selah. 5 Ket dagiti langlangit idaydayawdanto dagiti datdatlagmo, O APO: ti kinamatalecmo pay iti gimong dagiti sasanto. 6 Ta siasino dita langit ti maipada iti APO? siasino cadagiti annac ti maingel ti mabalin nga pumada iti APO? 7 Ti Dios ket dackel coma a pagbutngan iti gimong dagiti sasanto, ken raemen dagiti amin nga nanglawlaw kencuana. 8 O APO Dios dagiti buybuyot, siasino ti nabileg nga APO a cas kenca? wenno ta kinamatalecmo nga aglicmut kenca? 9 Sica iturayam ti panagdawel ti baybay: no dagiti dalluyonna bumangonda, sica pagtalnaem ida. 10 Rinebbam a sagbabassit ni Rahab, a cas maysa a napapatay; winarawaram dagiti cabcabusormo babaen iti pigsa ta imam. 11 Dagiti langlangit cucuam, ti daga cucuam met: ket no ti lubong ken dagup ti adda kencuana, pinataudmo pay ida. 12 Ti amianan ken abagatan pinarsuam ida: da Tabor ken Hermon agragsacdanto ta naganmo. 13 Adda nabileg nga tackiagmo: napigsa ta imam, ket nangato ta macanawan nga imam. 14 Ti kinalinteg ken kinajusticia isuda ti pagnaedan ta tronom: ti asi ken pudno addada iti sangoanam. 15 Bendito ti umili nga macaammo iti naragsac nga timec: magnadanto, O APO, babaen iti silnag ta langam. 16 Ita naganmo agragsacda nga agmalmalem: ket iti kinalintegmo maitan-ocdanto. 17 Ta sica ti dayag ti bilegda: ket iti pammaraburmo ti sarami ket maitan-octo. 18 Ta ti APO isu ti calasagmi; ken ti Ti Santo ti Israel isu ti arimi. 19 Idin nagsaoca iti parparmata cadagiti sasantom, ket kinunam, Siac incumitco ti tulong iti maysa a nabileg; intan-occo ti maysa a napili cadagiti umili. 20 Nasaracac ni David nga adipenco; ti nasantoan a lanac ti pinangpulotco kencuana: 21 Kencuana mataginayonto ti imac: ti tackiagco isunto met iti mangpapigsanto kencuana. 22 Ti cabusor dinto macadaeg kencuana; wenno ti anac ti kinadangkes parigatennanto isuna. 23 Ket itublacconto dagiti cabusorna iti sangoananna, ken didigraecto dagiti gumura kencuana. 24 Ngem ti kinamatalecco ken asic maicappondanto kencuana: ket gapu iti naganco maitan-octo ti sarana. 25 Icabilconto met ti imana iti baybay, ken ti macanawan nga imana cadagiti carcarayan. 26 Isu umkisto caniac, Sica ti amac, Diosco, ken bato ti pannacaisalacanco. 27 Isu pagbalinecto met nga inauna nga anacco, cangangatoan cadagiti ar-ari ditoy daga. 28 Ti asic taginayonecto kencuana ti agnanayon, ket ti tulagco sitatalinaedto kencuana. 29 Ti putotna pagpautecto met nga agnanayon, ket ti tronona cas cadagiti al-aldaw ti langit. 30 No dagiti annacna bay-anda ti lintegco, ket dida magna cadagiti pagbilinac; 31 No barengbarengenda dagiti linlintegco, ket dida salimetmetan dagiti bilbilinco; 32 Iti casta sarungcaracto ti salungasingda iti pang-or, ken ti kinadakesda iti babaot. 33 Numan pay casta ti kinamanagayatco diacto talipupusen nga iccaten kencuana, wenno bay-ac iti kinamatalecco nga agsarday. 34 Ti tulagco diacto barengbarengen, wenno baliwan ti banag a nagwayaway cadagiti bibigco. 35 Maminpinsan nga insapatac babaen ti kinasantoc nga saanacto nga agulbod ken David. 36 Ti putotna agtalinaedto nga agnanayon, ken ti tronona cas ti init iti sangoanac. 37 Sipapasdecto nga agnanayon a cas iti bulan, ken cas iti matalec a sacsi idiay langit. Selah. 38 Ngem sica inwagsacmo ken kina-ariecmo, kinapungtotmo ti pinulotam. 39 Winaswasmo ti tulag ti adipenmo: minulitam iti coronana gapu iti panangipalladawmo iti daga. 40 Rinacracmo amin dagiti al-aladna; impanmo iti pannacareggaay dagiti nabileg nga pagsalindeganna. 41 Amin nga aglasat iti dalan tumacawda kencuana: nagbalin nga bain isuna cadagiti caarrubana. 42 Intag-aymo ti macanawan nga ima dagiti cabusorna; pinagragsacmo amin dagiti cabcabusorna. 43 Kinulpim pay ti tadem ti campilanna, ket saanmo a pinagtacder iti gubat. 44 Pinagsardengmo ti kinaraniagna, ket impalladawmo ti tronona iti daga. 45 Dagiti al-aldaw ti kinaagtutubona pinaababam: isu kinumotam iti bain. Selah. 46 Casano ti cabayagna, APO? aglingedcanto aya nga agnanayon? sumgedto aya ta pungtotmo a cas apuy? 47 Lagipem ti caababa ti tiempoc: isu ti gapuna ngata nga inaramidmo amin a tattao iti kinaubbaw? 48 Ania a tao ti agbiagto, ket saannanto a makita ni patay? maispalnanto ngata ti cararruana iti pannacabalin ni tanem? Selah. 49 Apo, sadino ti ayandan dagiti casisigud a kinamanagayatmo, nga insapatam ken David babaen ti kinapudnom? 50 Lagipem, Apo, ti pannacaibabain dagiti ad-adipenmo; no casano nga inawitco ditoy barucongco iti pammabain dagiti amin nga nabileg a tattao; 51 Isu nga pananguy-uyaw dagiti cabcabusormo, O APO; isu a pananguy-uyawda dagiti tugtugot ti pinulotam. 52 Bendito coma iti APO nga agnanayon. Amen, ken Amen. SALMO 90 Maysa a Cararag ni Moses nga lalaki iti Dios. 1 APO, sica ti nagtataenganmi cadagiti amin nga capcaputotan. 2 Idi sacbay nga timmaud dagiti banbantay, wenno idi pinaltuadmo ti daga ken ti lubong, ken manipud pay idi kinaagnanayon iti kinaagnanayon, sica ti Dios. 3 Sica pagbaw-ingem ti tao iti pannacadadael; ket cunam, Sumublicayo, dacayo nga annac dagiti tattao. 4 Ta dagiti sangaribu a tawen iti sangoanam ket cas laeng maysa a calman no nacalabasen, ken cas maysa a panagpuyat iti rabii. 5 Sica iyanudmo ida a cas mailayusda; isuda arigda la daytay maysa nga ridep: iti agsapa arigda la root nga tumubo. 6 Iti bigat agbaludbud, ken dumackel; iti rumabii mapucan, ken malaylay. 7 Ta marunawcami ita ungetmo, ket ita pungtotmo mariribucancami. 8 Incabilmo dagiti kinadangkesmi dita sangoanam, ti nalilimed nga basbasolmi ket masilnagan ta rupam. 9 Ta amin dagiti al-aldawmi naglabasda iti pungtotmo: usarenmi dagiti tawtawenmi a cas maysa nga pacasaritaan nga maibaga. 10 Dagiti al-aldaw dagiti tawenmi pitopuloda a tawen; wenno agpapan pay gapu iti kinabileg walopulo a tawen, nupay casta ti laeng pigsada bannog ken ladingit; ta lumabas nga apagbiit, ket tumayabcamin. 11 Siasino ti macaammo iti bileg ti ungetmo? uray pay mayannurot ta butengmo, casta met ti pungtotmo. 12 Iti casta isuronacami a mangbilang cadagiti al-aldawmi, tapno agaramid dagiti puspusomi iti kinasirib. 13 Agsublica, O APO, caanonto? ket pagbabawiam cadi ti maipaay cadagiti ad-adipenmo. 14 O pennekennacami a masapa ita asim; tapno agrag-o ken agragsaccami cadagiti amin nga al-aldawmi. 15 Paragsakennacami cadi cas mayannurot cadagiti al-aldaw a panamagladingitmo cadacami, ken cadagiti tawtawen a pannacaimatangmin iti dakes. 16 Agparang cadi ti aramidmo cadagiti ad-adipenmo, ken ta dayagmo cadagiti annacda. 17 Ket ti imnas ti Apo a Diostayo adda coma cadatayo: ket patalgedam cadi ti aramid dagiti imami cadacami; wen, ti aramid dagiti im-imami patalgedam coma. SALMO 91 1 Ti agtaeng iti nalemmeng nga ayan ti Cangatoan unay ket agtalinaedto iti salinong ti Mannacabalin-amin. 2 Kunkunakto maipanggep iti APO, Isu ti camangco ken salindegco: Diosco; isu ti pagcamatalcac. 3 Pudno nga ispalennacanto iti silo ti mannilo, ken iti macapatay nga angol. 4 Salucobannacanto cadagiti dutdotna, ket iti salinong dagiti payacna agcamangcanto: ti kinapudnona isunto ti calasagmo ken sanggam. 5 Sica saancanto nga agbuteng iti pangigtot iti rabii; wenno iti pana a sumiag iti aldaw; 6 Wenno iti angol a magna iti casipngetan; wenno iti pannacadadael a mangrupsa iti tengnga ti aldaw. 7 Sangaribu ti matuangto ita sikigam, ket sangapulo ribo dita macanawanmo; ngem saanto nga umasideg kenca. 8 Cadagita laeng matam makitamto ket maimatangamto iti gunggona dagiti nadangkes. 9 Gapu ta sica pinagbalinmo ti APO, nga camangco, uray pay ti Cangatoan unay, a pagnaedam; 10 Awanto ti aniaman a dakes a dumteng kenca, wenno aniaman a didigra a macaasidegto dita balaymo. 11 Ta itdennanto dagiti angelesna nga agaywan kenca, tapno aluadandaca cadagiti amin a daldalanmo. 12 Tapayaendacanto cadagiti im-imada, di la ket ta maitibcol ta sacam iti bato. 13 Ibaddecmonto ti leon ken carasaen: ti urbon a leon ken ti uleg ipayatpayatmonto ida ita dapanmo. 14 Gapu ta insaadna ti ayatna caniac, ngarud isu ispalecto: icabilconto iti nangato, gapu ta inammona ti naganco. 15 Isu awagannacto, ket siac sungbatacto: addaacto kencuana iti pagducotan; isu ispalecto, ken idaydayawconto. 16 Isu pennekecto iti napaut a panagbiag, ken iparangarangco kencuana iti panangisalacanco. SALMO 92 Maysa a Salmo wenno Canta iti aldaw ti panaginana. 1 Nasayaat ti panangited ti panagyaman iti APO, ken ti panagcanta cadagiti panangidaydayaw iti naganmo, O Cangatoan unay: 2 Tapno maiparangarang iti kinamanagayatmo iti bigat, ket ti kinamanagtalecmo iti tunggal rabii, 3 A danggayan ti pagtocaran a sangapulo ti cuerdasna, ken ti salterio; agraman nadaeg nga aweng ti arpa. 4 Ta sica, APO, pinaragsacnac gapu cadagiti ar-aramidmo: agballigiacto iti aramid dagiti im-imam. 5 O APO, anian a nagdackel dagiti ar-aramidmo! ket dagiti panpanunotmo naunegda unay. 6 Ti nadueg a tao dina ammo; uray pay met ti maag dina maawatan daytoy. 7 Inton dagiti nadangkes rumusingda cas iti root, ken no dagiti amin nga agar-aramid iti kinadakes rumang-ayda; gapuna ngamin ta madadaeldanto nga agnanayon: 8 Ngem sica, APO, natan-occa iti agnanayon. 9 Ta, adtoy, dagiti cabcabusormo, O APO, ta, adtoy, dagiti cabcabusormo mapucawdanto; amin dagiti agar-aramid iti kinadangkes mawarawaradanto. 10 Ngem ti sarac intan-ocmo a cas ti sara ti cabalyo nga adda sarana: mapulotanacto iti lana a baro. 11 Ti matac makitananto ti calicagumco a maipaay cadagiti cabcabusorco, ken dagiti laplapayagco mangngegdanto ti calicagumco a maipaay cadagiti managdacdakes a bumangon nga mangbusor caniac. 12 Ti nalinteg agrangpayanto a cas iti cayo a palma: bumaludbodto a cas iti cedro ti Libano. 13 Dagiti naimula idiay balay iti APO agrangpayadanto cadagiti paraangan ti Diostayo. 14 Agbungadanto pay laeng iti kinalacayda; silulucmegdanto ken silalangtodanto; 15 Tapno iparangarangda a ti APO nalinteg: isu ti batoc, ket awan iti kinakillo kencuana. SALMO 93 1 Iti APO agari, nacawesan iti kinadayag; ti APO nacawesan iti kinapigsa, isu ti imbarikesna: ti lubong naisimpa met, ket tapno saan a magaraw. 2 Ti tronom naisimpa nanipud idi ugma: sica addaca nanipud kinaagnanayon. 3 Dagiti layus nagpangatoda, O APO, dagiti layus nagpangato ti timecda; dagiti layus nagpangato ti daldalluyonda. 4 Iti APO sadi ngato ket napigpigsa ngem dagiti timtimec dagiti adu a dandanum, wen, ngem dagiti napigsa a daldalluyon ti baybay. 5 Dagiti pammanecnecmo pudnoda unay: ti kinasanto maiyannugot iti balaymo, O APO, iti kinaagnanayon. SALMO 94 1 O APO Dios, sica a makinbiang iti pammales; O Dios, sica a makinbiang iti pammales, agpakitaca. 2 Tumacderca, sica nga ocom ti daga: ipaaymo iti gunggona iti natangsit. 3 APO, casano capaut dagiti nadangkes, casano capaut ti panagbalballigi dagiti nadangkes? 4 Casano ti capaut ti salawasaw ken saoda nga natatangken a banbanag? ken amin dagiti agar-aramid iti kinadangkes agpaspasindayawda? 5 Tumekenda ti ilim, O APO, ken parigatenda ti tawidmo. 6 Patayenda ti balo ken ti gangannaet, ken iccatenda ti biag dagiti ul-ulila. 7 Ket kunada, Dinto makita iti APO, dinto met icancano ti Dios ni Jacob. 8 Utobenyo, dacayo a nadueg iti pagilian: ken dacayo nga maag, caanonto ti panagnakemyo? 9 Daydiay nangimula iti pagdengngeg, saannanto aya a macangeg? daydiay namataud iti mata, saannanto aya a macakita? 10 Daydiay mamagsaplit cadagiti nasnacion, saan ngata nga agisuro? isu a mangisuro iti tao iti kinasirib, saanna ngata nga ammo? 11 Iti APO ammona dagiti pampanunot ti tao, nga isuda dagiti kinaubbaw. 12 Bendito ti tao a sursuroam, O APO, ken balacadam ita lintegmo; 13 Tapno maiccam iti inana manipud cadagiti al-aldaw ti pacarigatan, agingga iti macali ti abut a maipaay cadagiti nadangkes. 14 Ta iti APO dinanto ipalladaw ti ilina, dinanto met baybay-an ti patawidanna. 15 Ta ti panangocom agsublinto iti kinalinteg: ket amin dagiti sililinteg iti pusona sumurotdanto kencuana. 16 Siasino ti tumacderto a maipuon caniac a bumusor cadagiti managdacdakes? wenno siasino ti agtacderto a pannacabagic a bumusor cadagiti agar-aramid iti kinadangkes? 17 No saan coma a iti APO idi ti tulongco, toy cararruac nabayag coman a nagnaed iti kinaulimec. 18 Idi kinunac, Toy sacac maicagcaglis; ti kinamanangaasim, O APO, tinengngelnac. 19 Iti caadu dagiti panpanunotco itoy unegco dagiti pangliwliwam paragsakenda toy cararruac. 20 Ti trono ti kinadakes addanto aya pannakicapponna kenca, a mangbuangay iti ranggas gapu iti pagbilinan? 21 Agtitimpuyogda a mangbusor iti cararrua ti nalinteg, ken mangpabasol iti nadalus a dara. 22 Ngem iti APO isu ti natayag a baluartec; ket ti Diosco isu ti bato a camangco. 23 Ket iyegnanto cadacuada iti kinadakesda met laeng, ken pessattennanto iti kinadangkesda met laeng; wen, ti APO a Diostayo pucawennanto ida. SALMO 95 1 O umaycayo, cantaantayo iti APO: ipaaytayo ti narag-o a dir-i iti bato ti pannacaisalacantayo. 2 Mapantayo iti saclangna a siiiyaman, ken ipaayantayo iti narag-o a dir-i kencuana dagiti salmos. 3 Ta ti APO isu ti naindaclan a Dios, ken naindaclan nga Ari iti ngatoen dagiti amin a didiosen. 4 Adda cadagiti im-imana dagiti nauuneg nga disdisso ditoy daga: ti bileg dagiti turturod ket cucuana pay. 5 Ti baybay cucuana, ken inaramidna: ken dagiti im-imana pinataudda ti namaga a daga. 6 O umaycayo, agrucbabtayo ken agrucnoytayo: agparintumengtayo iti saclang iti APO a nangaramid cadatayo. 7 Ta isu ti Diostayo; ken datayo ti umili ti pagpaarabanna, ken carnero ti imana. Ita nga aldaw no mangegyo ti timecna, 8 Dicayo patangkenen ta pusoyo, a cas idi panangparurod, ken cas aldaw ti sulisog idiay let-ang: 9 Idi a dagidi ammayo sinulisogdac, pinadasdac, ken nakitada ti aramidco. 10 Uppat a pulo a tawen a nagladladingitac iti dayta a caputotan, ket kinunac, Maysa nga umili a nayaw-awan ti pusoda, ket saanda a naammoan dagiti daldalanco: 11 Gapuna insapatac iti pungtotco a didanto sumrec iti inanac. S SALMO 96 1 O cantaanyo ti APO iti baro a canta: cantaanyo iti APO, dagup ti isuamin a daga. 2 Cantaanyo iti APO, benditoenyo ti naganna; iparangarangyo ti panangisalacanna ti inaldaw-aldaw. 3 Ipalawagyo ti dayagna cadagiti nasnacion, dagiti nacascasdaaw nga ar-aramidna cadagiti amin a tattao. 4 Ta naidaclan iti APO, ket rebbengna unay iti maidaydayaw: rebbeng a pagbutngan a nangnangrona isuna ngem cadagiti amin a didiosen. 5 Ta amin dagiti didiosen dagiti nasnacion isuda dagiti sinan-didiosen: ngem iti APO inaramidna dagiti langlangit. 6 Dayaw ken dayag addada iti sangoananna: pigsa ken kinaimnas addada iti santuariona. 7 Itedyo iti APO, O dacayo a sangsangcacabaggian dagiti il-ili, itedyo iti APO ti dayag ken kinapigsa. 8 Itedyo iti APO ti dayag a maiparbeng iti naganna: mangyegcayo iti daton, ken umaycayo cadagiti parparaanganna. 9 O agrucbabcayo iti APO iti imnas ti kinasanto: agbutengcayo iti sangoananna, isuamin a daga. 10 Cunaenyo cadagiti nasnacion a ti APO agari: ti lubong maipasdecto ket saanton a pulos nga magaraw: ocomennanto dagiti tattao iti kinalinteg. 11 Dagiti langlangit agrag-oda coma, ken ti daga agragsac coma; ti baybay agdaranudor coma, ken ti isuamin nga linaonna. 12 Ti taltalon agragsac coma, ken amin nga adda kencuana: iti casta amin dagiti caycayo ti bakir agrag-o 13 Iti sangoanan iti APO: ta isu umay, ta isu umay a mangocom iti daga: ocomennanto toy lubong iti kinalinteg, ken dagiti tattao babaen ti kinapudnona. SALMO 97 1 Ti APO agari; ti daga agragsac coma; dagiti adu a purpuro agragsacda coma. 2 Dagiti ul-ulep ken sipnget agliclicmutda iti arpadna: kinalinteg ken kinajusticia isuda ti nagbalayan ti tronona. 3 Adda apuy a magna iti sangoananna, ket manguram cadagiti cabcabusorna nga aglawlaw. 4 Dagiti kimkimatna sinilnaganda toy lubong: ti daga nakitana, ket nagkintayeg. 5 Dagiti banbantay naglunagda a cas allid iti sangoanan iti APO, iti sangoanan ti Apo ti sangalubongan. 6 Dagiti langlangit ibunannagda ti kinalintegna, ket amin dagiti inilin-ili nakitada ti dayagna. 7 Mabainanda coma amin dagiti agservi cadagiti kinitikitan a ladladawan, a pagpasindayagda dagiti sinan-didiosen: agrucbabcayo kencuana, dacayo amin a didios. 8 Ti Sion nangegna, ket naragsacan; ket dagiti annac a babbai ti Juda nagragrag-oda maigapu cadagiti panangocommo, O APO. 9 Ta sica, APO, ti cangatoan iti ngatoen ti amin a daga: sica ti naitan-oc a naringringbaw unay ngem dagiti amin a didiosen. 10 Dacayo nga agayat iti APO, guraenyo ti dakes: isu salacnibanna dagiti cararrua dagiti sasantona; isalacanna ida iti ima dagiti nadangkes. 11 Ti silaw naimula a maipaay cadagiti nalinteg, ket ti kinaragsac cadagiti nalinteg iti puso. 12 Agrag-ocayo iti APO, dacayo a nalinteg; ken agyamancayo iti pannacaipalagip ti kinasantona. SALMO 98 Maysa a Salmo. 1 O cantaanyo iti APO iti baro a canta; ta nagaramid cadagiti nacascasdaaw nga banbanag: ti macanawan nga imana, ken ti nasantoan a tackiagna, nagun-odnan a maipaay kencuana ti balligi. 2 Iti APO impacaammona ti panangisalacanna: ti kinalintegna imparangna nga silalatac iti imatang dagiti nasnacion. 3 Linagipna ti kinaasi ken kinapudnona iti balay ni Israel: amin dagiti pungpungto ti daga nakitada ti panangisalacan ti Diostayo. 4 Ipaayanyo iti naragsac a dir-i iti APO, isuamin a daga: ipecsayo ti natbag a dir-i, ket agrag-ocayo, ken agcantacayo iti panangidaydayaw. 5 Cantaanyo iti APO iti arpa; bagayan ti arpa, ken iti timec ti maysa a salmo. 6 Cadagiti tangguyob ken aweng ti corneta aramidenyo ti naragsac a dir-i iti sangoanan ti APO, isu iti Ari. 7 Agdaranudor coma ti baybay, ken amin a linaonna; ti lubong, ken amin nga agnaed kencuana. 8 Dagiti laylayus pagsipatenda coma dagiti im-imada: dagiti turturod agraragsacda coma nga agtitimpuyog 9 Iti sangoanan iti APO; ta umay a mangocom itoy daga: ocomennanto iti kinalinteg daytoy a lubong, ken dagiti inilin-ili a padapada. SALMO 99 1 Iti APO agari; dagiti tattao agkintayegda coma: isu agtugtugaw iti nagbaetan dagiti kerubin; ti daga aggaraw coma. 2 Iti APO naindaclan sadi Sion; ket isu nangato iti ngatoen dagiti amin a tattao. 3 Idaydayawda coma ta naindaclan ken nacaal-alinget a naganmo; ta isu nasantoan. 4 Ti bileg ti ari pagayatanna met ti kinajusticia; sica ipasdecmo ti nabatad, sica salimetmetam ti kinajusticia ken kinalinteg ken ni Jacob. 5 Itan-ocyo iti APO a Diostayo, ken agrucbabcayo iti sacaananna; ta isu santo. 6 Da Moises ken Aaron iti gimong dagiti papadina, ken Samuel iti nagtengngaan dagiti umawag iti naganna; immawagda iti APO, ket isu sinungbatanna ida. 7 Nagsao cadacuada iti monmon nga ulep: sinalimetmetanda dagiti pammanecnecna, ken ti bilin nga intedna cadacuada. 8 Sica sinungbatam ida, O APO a Diosmi: sica ti Dios a namacawan cadacuada, nupay inaramatmo ti pammales cadagiti pinarpartuadda. 9 Itan-ocyo iti APO a Diostayo, ket agrucbabcayo idiay nasantoan a turodna; ta ti APO a Diostayo isu ket santo. SALMO 100 Maysa a Salmo iti panagdaydayaw. 1 Ipaayanyo iti naragsac a dir-i iti APO, dacayo amin nga dagdaga. 2 Agservicayo iti APO a sirarag-o: umaycayo iti sangoananna agraman iti panagcancanta. 3 Ammoenyo nga ti APO ket isu ti Dios: isu ti nangaramid cadatayo, ket saan nga datayo; datayo ti ilina, ken carnero ti pagpaarabanna. 4 Sumreccayo cadagiti ruruanganna iti panagyaman, ken cadagiti parparaanganna iti panangidaydayaw: agyamancayo kencuana, ket benditoenyo ti naganna. 5 Ta ti APO naimbag; ti kinamanangaasina agnanayon; ken ti kinapudnona agpaay cadagiti amin a caputotan. SALMO 101 Maysa a Salmo ni David. 1 Icantacto ti kinamanangaasi ken panangocom: kenca, O APO, agcantaacto. 2 Agannadacto a simamanakem iti naan-anay a dalan. O caano ti iyaaymonto caniac? Magnaacto iti uneg ti balayco babaen ti naan-anay a puso. 3 Diacto mangicabil iti nadakes a banag iti sangoanan dagiti matac: Cagurac ti aramid dagiti sumiasi; saandanto a cumpet caniac. 4 Ti nadangkes a puso umadayonto caniac: Awanto ti ammoec a dakes a tao. 5 Siasinoman a mamadpadakes a nalimed iti caarrubana, isu ti dadaelecto: ti adda nangato a panagkitkitana ken natangsit a puso diacto panoynoyan. 6 Dagiti matac siimatangdanto cadagiti matalec ditoy daga, tapno makipagnaeddanto caniac: ti magna iti nalinteg a dalan, isu ti agservinto caniac. 7 Ti agaramid ti panangallilaw dinto makipagnaed iti uneg ti balayco: ti agsao dagiti kinaulbod dinto makipagyan iti saclang dagiti matac. 8 Sapaecto a dadaelen dagiti amin a nadangkes ditoy daga; tapno pucawec dagiti agaramid iti kinadangkes idiay ciudad iti APO. SALMO 102 Maysa a Cararag ti naparigatan, idi naglapusananen iti rigat, ket inbuyatna iti casasaadna iti sangoanan iti APO. 1 Denggem ti cararagco, O APO, ket dumanon cadi kenca ti ickisco. 2 Dica cadi ilinged ta rupam caniac iti aldaw ti panacariribucco; iyallingagmo ta lapayagmo caniac: iti aldaw nga iyaawagco dardarasennac cadi a sungbatan. 3 Ta dagiti al-aldawco maib-ibusda a casla asuc, ket dagiti tultulangco mapuoranda a cas aluten. 4 Ti pusoc makeltay, ken malaylay a casla root; iti casta malipatac ti mangan iti tinapayco. 5 Maipuon iti timec ti panagungorco dagiti tultulangco dimketdan iti cudilco. 6 Arigac la itay puec ti cabakiran: arigac la itay maysa a cullaaw iti langalang. 7 Agpuyatac, ket caslaac la itay tucling nga agwaywayas iti tuctoc ti balay. 8 Dagiti cabusorco um-umsiendac nga agmalmalem; ket dagiti gumurgura caniac ilunlunoddac. 9 Ta nanganacon iti dapu a cas pannacatinapay, ket tinibnocac ti inumec iti panagsangit, 10 Gapu iti ungetmo ken pungtotmo: ta binatacnac, ken impadsonac. 11 Dagiti al-aldawco arigda la anniniwan nga agpucpucaw; ket malaylayac a cas root. 12 Ngem sica, O APO, agtalinaedca nga agnanayon; ket ti pacalaglagipam cadagiti amin a capcaputotan. 13 Bumangoncanto, ket caasiamto ti Sion: ta ti tiempo ti panangparaburmo kencuana, wen, ti natudingan a tiempo, dimtengen. 14 Ta dagiti ad-adipenmo pagay-ayatanda dagiti batbatona, ken cayatanda iti tapucna. 15 Iti casta dagiti nasnacion pagbutngandanto ti nagan iti APO, ken amin dagiti ar-ari ditoy daga dayta dayagmo. 16 Intono ti APO bangonenna iti Sion, agparangto iti kinadayagna. 17 Dengdenggenna ti cararag dagiti nacurapay, ket saanna nga laisen dagiti cararagda. 18 Daytoy maisuratto nga agpaay iti caputotan nga umay: ket ti umili a maparsuanto idaydayawdanto iti APO. 19 Ta kimmita iti baba manipud tapaw ti santuariona; manipud sadi langit iti APO minatmatanna daytoy daga; 20 Tapno denggenna ti sasainnec ti sibabalud; tapno luc-atanna dagiti nadutocan iti patay; 21 Tapno maibunannagda ti nagan ti APO idiay Sion, ken ti pacaidaydayawanna idiay Jerusalem; 22 Intono agtitipon amin dagiti tattao, ken dagiti pagpagarian, tapno agservida iti APO. 23 Isu pinacapuyna ti pigsac iti dalan; pina-ababana dagiti al-aldawco. 24 Kinunac, O Diosco, dinac cadi pucawen iti tengnga dagiti al-aldawco: dagiti tawtawenmo agtarusda cadagiti amin a caputotan. 25 Idi ugma insimpamon ti pamuon toy daga: ket dagiti langlangit isuda dagiti aramid dagita im-imam. 26 Mapucawdanto, ngem sica agnanayoncanto: wen, isuda amin dumaandanto a cas iti pagan-anay; cas pamlesan sucatamto ida, ket masucatandanto: 27 Ngem sica castam met laeng, ket dagiti tawtawenmo awan ti canibusananda. 28 Dagiti annac dagiti ad-adipenmo agtuloydanto, ket dagiti bin-ida maipasdecdanto iti sangoanam. SALMO 103 Maysa a Salmo ni David. 1 Benditoem iti APO, O cararruac: ken amin nga adda iti unegco, benditoenyo ti nasantoan a naganna. 2 Benditoem iti APO, O cararruac, ket dica lipaten dagiti amin nga paraburna: 3 Isu a mamacawan cadagiti amin a kinadangkesmo; isu nga mangpasalun-at cadagiti amin a nasacsakitmo; 4 Isu a nangsubbot ita biagmo iti pannacadadael; isu a nangbalangat kenca iti kinamanagayat ken cadagiti nadungngo nga as-asi; 5 Isu a mangpennec ta ngiwatmo cadagiti naimbag a banbanag; iti casta ti kinaagtutubom mapabaro a cas ti aguila. 6 Iti APO ibanagna ti kinalinteg ken panangocom dagiti isuamin nga mailuplupit. 7 Impacaammona dagiti daldalanna ken Moises, dagiti ar-aramidna cadagiti annac ti Israel. 8 Iti APO ket naasi ken managparabur, namayamay nga agpungtot, ken aglaplapusanan iti kinamanangaasi. 9 Saanto a cancanayon a makirupir: wenno salimetmetanna ti pungtotna iti kinaagnanayon. 10 Isu saanna nga impaay cadatayo ti cas mayannatup cadagiti basbasoltayo; wenno sinupapacannatayo iti catutopan dagiti kinadangkestayo. 11 Ta cas iti langit adda iti ngatoen itoy daga, casta ti cadackel ti asina cadagiti agbuteng kencuana. 12 Cas p anagaddayo ti daya ken ti laud, casta ti nangyadayoanna cadatayo dagiti salsalungasingtayo. 13 Cas panangngaasi ti maysa nga ama cadagiti annacna, casta ti panangnga-asi iti APO cadagiti agbuteng kencuana. 14 Ta ammona ti pannacasucogtayo; isu malagipna a datayo tapuctayo. 15 No maipanggep iti tao, dagiti aldawna casda la root: cas maysa a sabong iti talon, casta ti panaglangtona. 16 Ta ti angin lumabas kencuana, ket nagawanen; ket ti nagsaadanna saanto pay a maammoanen. 17 Ngem ti asi iti APO kinaagnanayon agpapan iti kinaagnanayon cadagiti agbuteng kencuana, ken ti kinalintegna agpaay cadagiti annac dagiti an-annac; 18 Cadagidiay mangsalimetmet iti tulagna, ken cadagiti manglaglagip nga aramiden cadagiti al-allagadenna. 19 Iti APO impasdecna ti tronona cadagiti langlangit; ket ti pagarianna pagturayanna iti isuamin. 20 Benditoenyo ti APO, dacayo nga angelesna, a mannacabalin iti bileg, a manungtungpal iti bilbilinna, a nangtimtimud iti timec ti saona. 21 Benditoenyo ti APO, dacayo amin a buybuyotna; dacayo a minministrona, nga agaramid iti pagayatanna. 22 Benditoenyo ti APO, amin nga ar-aramidna cadagiti amin a disso ti pagturayanna: benditoenyo ti APO, O cararruac. SALMO 104 1 Benditoem ti APO, O cararruac. O APO a Diosco, sica naindaclanca unay; nacawesanca iti dayaw ken kinadayag. 2 Sica a mangbungon kenca met laeng iti lawag a casla pannacapagan-anaymo: a nangbistrad cadagiti langlangit a cas maysa a cortina: 3 A nangicabil cadagiti pasanggir dagiti silsiledna iti uneg dagiti dandanum: a pagbalinenna a luganna dagiti ul-ulep: a magna iti rabaw dagiti paypayac ti angin: 4 A mamagbalin cadagiti angelesna nga espiritu; dagiti minministrona nga aggilgil-ayab nga apuy: 5 Isu a nangicabil dagiti pamuon toy daga, tapno saandan nga maiccat iti uray caanoman. 6 Isu inabbongam iti caadalman a cas la pannacapagan-anayna: dagiti dandanum nagtacderda iti ngatoen dagiti banbantay. 7 Iti panagtubngarmo nagtalawda; iti timec ti gurroodmo nagdardarasda. 8 Simmang-atda cadagiti banbantay; simmalogda cadagiti tantanap a napan cadagiti disso a pinarnuaymo nga agpaay cadacuada. 9 Sica nangicabilca iti beddeng tapno dida ballasiwen; tapno dida sunotanen a lapunosen toy daga. 10 Isu ibaonna dagiti ub-ubbog cadagiti tantanap, nga agtaray cadagiti babaet dagiti turturod. 11 Itdenda ti inumen iti tunggal animal iti away: dagiti atap nga asno pedpedenda ti wawda. 12 Iti sibayda dagiti tumatayab cadagiti langlangit adda pagnaedanda, nga agcanta cadagiti babaet ti sangsanga. 13 Isu siboganna dagiti turturod manipud cadagiti silsiledna: ti daga mapnec iti bunga dagiti gappuanam. 14 Pagtuboenna ti root a maipaay cadagiti bacbaca, ken ti mula nga agservi iti tao: tapno isu maparnuayna ti taraon iti daga; 15 Ken ti arac a mamaragsac iti puso ti tao, ken lana a mamagsilnag iti rupana, ken tinapay a mamakired iti puso ti tao. 16 Dagiti caycayo iti APO napnoda iti tubbog; dagiti cedro ti Libano, nga immulana; 17 Isu a pagaramidan dagiti bilbillit cadagiti um-umocda: no maipanggep iti cannaway, dagiti caycayo nga parwa isuda ti balayna. 18 Dagiti natayag a turturod ti pagyanan dagiti calding nga atap; dagiti batbato isuda ti apon dagiti conejo. 19 Dinutocanna ti bulan a pagbaliwan ti tiempo: ti init ammona ti ilelennecna. 20 Aramidem ti sipnget, ket isu ti rabii: kencuana dagiti amin nga an-animal ti cabakiran agsawarda. 21 Dagiti urbon a leon ugaanda ti tucmaanda, ket birokenda ti taraonda nga aggapu iti Dios. 22 Ti init sumingising, agtitiponda a sangsangcamaysa, ket agiddada iti uneg dagiti rukrukibda. 23 Ti tao mapan iti aramidna ken iti trabahona agingga iti mumalem. 24 O APO, anian a nagadu dagiti ar-aramidmo! ti kinasirib inaramidmo amin ida: ti daga napnoan iti kinabacnangmo. 25 Casta met daytoy dackel ken nalawa a taaw, isu a ayan dagiti agcacarayam nga banbanag a saan nga mabilang, babassit man ken dadackel nga an-animal. 26 Adda idiay a magna dagiti sasacayan ti taaw: adda iti leviatan, nga inaramidmo nga agay-ayam sadiay. 27 Dagitoy agurayda amin kenca; tapno iccam ida iti taraonda iti maiparbeng a tiempo. 28 Iccam ida ket isuda acuyenda: ucradem ta imam, ket isuda mapnecda iti naimbag. 29 Ilingedmo ta rupam, isuda mariribucanda: iccatem ti angesda, matayda, ket agpulangda iti catatapucda. 30 Sica ibaonmo ti espiritum, ket naparsuada: ket pinabarom iti langa ti daga. 31 Ti dayag iti APO agtalinaed nga agnanayon: ti APO agragrag-onto dagiti ar-aramidna. 32 Matmatanna toy daga, ket agpigerger: calbitenna dagiti turturod, ket agasucda. 33 Cancantaacto iti APO bayat iti isuamin nga panagbiagco: cancantaacto ti panangidaydayaw ti Diosco bayat ti caadda iti kinataoc. 34 Toy panagpampanunotco kencuana ket nasam-itto: pagrag-oacto iti APO. 35 Dagiti managbasol maibusda coma ditoy daga, ket dagiti nadangkes maawanda coman. Benditoem cadi iti APO, O cararruac. Idaydayawyo iti APO. SALMO 105 1 Agyamancayo iti APO; umawagcayo iti naganna: ipacaammoyo dagiti ar-aramidna cadagiti tattao. 2 Cantaanyo isuna, cantaanyo cadagiti salmo: saoenyo amin dagiti nacascasdaaw nga ar-aramidna. 3 Pagpasindayawyo ti nasantoan a naganna: agragrag-o coma ti puso dagiti mangbiroc iti APO. 4 Birokenyo iti APO, ken ti pigsana: sapulenyo ti rupana iti kinaagnanayon. 5 Lagipenyo dagiti nacascasdaaw nga ar-aramid nga inaramidna; dagiti datdatlagna, ken dagiti panangikeddeng ti ngiwatna; 6 O dacayo a caputotan ni Abraham nga adipenna, dacayo nga annac ni Jacob a pinilina. 7 Isu iti APO a Diostayo: dagiti panangocomna addada iti isuamin a daga. 8 Silalagip nga agnanayon iti tulagna, ti sao nga imbilinna cadagiti rinibu a capcaputotan. 9 Ti tulag nga inaramidna ken Abraham, ken ti insapatana ken Isaac; 10 Ket pinasingkedanna dayta met laeng ken Jacob iti maysa a pagbilinan, ken iti Israel iti maysa a tulag nga agnanayon: 11 A kinunana, Kenca itedconto ti daga a Canaan, ti daga a tawidem: 12 Idi a bassit pay laeng ti bilangda a tattao; wen, bassitda pay unay, ket gangannaetda sadiay. 13 Ket nagalla-allada iti nacion ken nacion, manipud maysa a pagarian agingga iti sabali nga tattao; 14 Dina intuloc iti siasinoman a tao nga agaramid iti dakes cadacuada: wen, tinubngarna dagiti ar-ari gapu cadacuada; 15 A kunana, Dicayo sagiden dagiti pinulotac, ken dicayo ranggasan dagiti mammadtoc. 16 Maysa pay immayab ti panagbisin ti daga: dinadaelna ti isuamin a pagtaraon. 17 Nangibaon iti maysa a tao nga immuna cadacuada, ni Jose, isu a nailaco nga adipen: 18 Dagiti sacana pinarigatda cadagiti tul-ong: isu naicabil cadagiti cawar a landoc: 19 Agingga iti tiempo a ti saona immay: ti sao iti APO ti nangsuut kencuana. 20 Ti ari nagbaon ket rinuc-atanna; uray pay ti agturay cadagiti tattao, ket pinalubosanna nga agwayawaya. 21 Pinagbalinna nga apo ti balayna, ken agturay iti amin nga sanicuana: 22 Tapno manengngel cadagiti piprincipena cas pagayatanna; ken mangisuro cadagiti panglacayenna iti kinasirib. 23 Ni Israel immay met sadi Egypto; ket ni Jacob nakipagtaeng idiay daga ni Cam. 24 Ket pinaaduna unay ti ilina; ken pinagbalinna ida a napigpigsa ngem cadagiti cabcabusorda. 25 Imbaw-ingna dagiti pusoda tapno guraenda ti ilina, tapno agaramidda a sisisicap cadagiti ad-adipenna. 26 Imbaonna ni Moises nga adipenna; castamet ni Aaron a pinilina. 27 Incabilda iti tengngada dagiti pagilasinanna, ken datdatlag iti daga ni Cam. 28 Binaonna ti sipnget, ken pinagsipngetna; ket saanda a binusor dagiti sasaona. 29 Pinagbalinna a dara dagiti dandanumda, ket pinatayna dagiti ic-icanda. 30 Ti dagada pinarruarna idi dagiti nagadu nga tuctucac, cadagiti silsiled dagiti ar-arida. 31 Nagsao, ket dimteng dagiti nadumaduma a kita ti ngilngilaw, ken cutcuto cadagiti amin a lawlawda. 32 Intedna cadacuada ti uraro a pannacatudoda, ken gumilgil-ayab nga apuy iti dagada. 33 Kinabilna met dagiti cauv-uvasanda ken highigosda; ken sinip-acna dagiti caycayo cadagiti bedbeddengda. 34 Nagsao, ket ti dudon dimteng, ken ti agcarcarayam nga igges, ket dagitoy saanda nga mabilang, 35 Ket kinnanda amin a mulmula idiay dagada, ket inkisapda ti bunga dagiti dagada. 36 Pinatayna met amin dagiti inauna nga annac idiay dagada, dagiti turayen iti amin a pigsada. 37 Ket inlapsutna ida a napacuyugan iti pirac ken balitoc: ket awan uray maysa nga agcacapuy a tao cadagiti capcapuonanda. 38 Ti Egipto naragsacan idi nagluasda: ta ti panagbuteng cadacuada immapay met cadacuada. 39 Nangibistrad iti ulep a pannacaabbongda; ken apuy a mangraniag iti rabii. 40 Dagiti tattao nagdawatda, ket nangyeg cadagiti tuctucling, ket pinennecna ida iti tinapay ti langit. 41 Linucatanna ti bato, ken dagiti dandanum pimsuacda; nagayusda cadagiti namaga a disdisso a cas maysa nga carayan. 42 Ta nalagipna ti nasantoan a carina, ken ni Abraham nga adipenna. 43 Ket inaonna ti ilina a sirarag-o, ken dagiti pinilina a siraragsac: 44 Ket intedna cadacuada dagiti dagdaga dagiti nasnacion: ket tinawidda ti nagbannogan dagiti tattao; 45 Tapno masalimetmetanda dagiti al-allagadenna, ken matungpalda dagiti linlintegna. Idaydayawyo iti APO. SALMO 106 1 Idaydayawyo ti APO. O pagyamananyo ti APO; ta isu naimbag: ti kinamanangaasina agpaut ti agnanayon. 2 Siasino ti macaisao cadagiti nabileg a gappuanan iti APO? siasino ti macaiparangarang amin a pacaidaydayawanna? 3 Bendito dagiti mangsalimetmet iti kinalinteg, ken ti agaramid iti kinalinteg cadagiti amin a tiemtiempo. 4 Laglagipennac, O APO, nga iraman iti parabur nga ipaaymo iti ilim: O sucnalannac ita panangisalacanmo; 5 Tapno makitac ti imbag dagiti pinilim, tapno macapagrag-oac iti kinaragsac ti nacionmo, tapno mabalinco coma ti makipagloria cadagiti patawidam. 6 Nagbasolcami nga caraman cadagiti am-amami, nagaramidcami ti salungasing, nagaramidcami a sidadakes. 7 Dagiti ammami dida naawatan dagiti datdatlagmo idiay Egipto; dida linagip ti caadu dagiti as-asim; ngem simmukirda ketdi idiay baybay, wen idiay Nalabbaga a baybay. 8 Nupay casta insalacanna ida a maigapu iti naganna, tapno maipacaammona ti napigsa a pannacabalinna. 9 Tinubngarna met ti Nalabbaga a baybay, ket nagmaga: iti casta inlasatna ida cadagiti cauunegan, nga casla iti let-ang. 10 Ket insalacanna ida iti ima ti nanggura cadacuada, ket sinubbotna ida iti ima ti cabusor. 11 Ket dagiti dandanum linapunosda dagiti cabusorda: awan natda uray maysa cadacuada. 12 Idi a casta pinatidan dagiti sasaona; incantada ti pannacaidaydayawna. 13 Nalipatanda iti apagbiit dagiti ar-aramidna; saanda a nagpannuray iti pammatigmaanna: 14 Ngem naggartemda iti napalalo idiay let-ang, ket sinulisogda ti Dios idiay langalang. 15 Ket intedna cadacuada ti dinawatda; ngem imbaonna ti kinakisang iti cararruada. 16 Nagimonda met ken Moises idiay pacarso, ken ni Aaron a santo iti APO. 17 Ti daga nagnganga ket inalun-onna ni Datan, ket ginaboranna ti bunggoy ni Abiram. 18 Ket ti apuy dimmarang iti bunggoyda; ti darang pinuoranna dagiti nadangkes. 19 Nangaramidda iti sinan urbon a baca idiay Horeb, ket nagdaydayawda iti sinucog a ladawan. 20 Iti casta insucatda ti gloriada iti maysa a caasping ti baca a mangan iti root. 21 Linipatda ti Dios a mangisalacanda, a nagaramid cadagiti dadackel a banbanag idiay Egipto; 22 Nacascasdaaw nga ar-aramid idiay daga a Cam, ken nacakigkigtot a banbanag idiay Nalabbaga a baybay. 23 Gapuna isu kinunana a pucawenna coma ida, no ni Moises a pinilina saan coma a nagtacder iti saclangna idiay pagbettacanna, tapno ibaw-ingna ti pungtotna, di la ket ta pucawenna ida. 24 Wen, inumsida ti nacaay-ayo a daga, saanda a pinati iti saona: 25 No di ket nagtantanabutobda cadagiti toltoldada, ket dida intaltalec ti timec iti APO. 26 Gapuna intag-ayna ti imana a maibusor cadacuada, tapno padsoennanto ida idiay let-ang: 27 Ken padsoennanto ti caputotanda cadagiti nasnacion, ken iwaraswarasnanto ida cadagiti dagdaga. 28 Nakitiponda met ken Baalpeor, ket kinnanda dagiti datdaton cadagiti natnatay. 29 Iti casta ginargarida isuna nga agpungtot cadagidiay nga parnuayda: ket ti angol napasamac cadacuada. 30 Idin nagtacder ni Finees, ket imbanagna ti panangocom: ket iti casta ti angol naatipa. 31 Ket dayta naibilang kencuana a kinalinteg agpapan cadagiti amin a capcaputotan iti agnanayon. 32 Ket isu pinapungtotda met idiay dandanum ti riribuc, iti casta isu ti nacapadakes ken ni Moises a maipuon cadacuada: 33 Gapu ta ginargarida iti espirituna, ket isu nagsao nga awan capapaayanna dagiti bibbibigna. 34 Saanda a dinadael dagiti nasnacion, a cas imbilin ti APO cadacuada: 35 Ngem nakilaocda ketdi cadagiti nasnacion, ket sinursuroda dagiti ar-aramidda. 36 Ken nagservida cadagiti didiosenda: isu a nagbalin a pangsilo cadacuada. 37 Wen, indatonda dagiti annacda a lallaki ken annacda nga babbai cadagiti demonio, 38 Ken imbuyatda ti dara a nadalus, uray pay ti dara dagiti annacda a lallaki ken annacda nga babbai, isuda nga indatonda cadagiti didiosen ti Canaan: ket ti daga namulitan iti dara. 39 Iti casta narugitanda cadagiti bucudda nga ar-aramid, ket nagbalangcantisda cadagiti parparnuayda. 40 Gapuna a ti pungtot iti APO simged a sibubusor iti ilina, ket iti casta kinarimonna ti bucodna a nagpatawidanna. 41 Ket intedna ida iti ima dagiti nasnacion; ket dagidi gumurgura cadacuada inturayanda ida. 42 Dagiti cabusorda inlupitda met ida, ket nagyanda a naparucma iti babaen dagiti imada. 43 Namin-adu nga inispalna ida; ngem simmukirda iti panagbibinnalacadda, ket naipababada iti bucodda nga kinadangkes. 44 Nupay casta inimatanganna ti panagrigatda, idi a nangngegna ti sangitda: 45 Ket linagipna a maipaay cadacuada ti tulagna, ket nagbabawi cas mayalubog iti caadu dagiti as-asina. 46 Ket inaramidna met a macaasianda cadagiti amin a nangaycayaw cadacuada. 47 Isalacannacami, O APO a Diosmi, ket acoyennacami nga alaen cadagiti nasnacion, tapno agyamancami ita nasantoan a naganmo, ken agballigicami iti pannacaidaydayawmo. 48 Bendito ti Apo Dios iti Israel manipud iti agnanayon aginggana iti agnanayon: ket amin ti umili kunana coma, Amen. Idaydayawtayo ti APO. SALMO 107 1 O agyamancayo iti APO, ta isu naimbag: ta ti kinamanangngaasina agtalinaed iti agnanayon. 2 Dagiti sinubbot iti APO cunaenda coma a casta, dagidiay a sinubbotna iti ima ti cabusor; 3 Ken tiniptiponna a naggapu cadagiti dagdaga, manipud iti daya, manipud iti laud, manipud amianan, ket manipud abagatan. 4 Nagpagnapagnada iti let-ang iti langlangalang a dalan; awan nasaracanda nga ili a pagnaedan. 5 Sibibisin ken siwawaw, ti cararruada nagtalimudaw cadacuada. 6 Idi a casta imkisda iti APO iti panagducotda, ket isu inispalna ida cadagiti sensennaayda. 7 Inturongna met ida iti nalinteg a dalan, tapno macagtengda iti ili a pagtaengan. 8 O dagiti tattao idaydayawda coma iti APO gapu iti kinaimbagna, ken gapu cadagiti nacascasdaaw nga ar-aramidna cadagiti annac dagiti tattao! 9 Ta pennekenna ti gumawgawawa a cararrua, ken punnoenna ti sibibisin a cararrua iti naimbag. 10 Cas cadagidiay a nagtugaw iti kinasipnget ken iti anniniwan ni patay, a nagalutan ti leddaang ken landoc; 11 Gapu ta sinukirda dagiti sasao ti Dios, ken inumsida ti patigmaan ti Cangatoan unay: 12 Gapuna a pinadagsenanna ti pusoda iti panagrigat; natuangda, ket awan siasinoman a simmaranay. 13 Idi a casta imkisda iti APO iti panagducotda, ket isu insalacanna ida cadagiti sensennaayda. 14 Inaonna ida iti kinasipnget ken iti anniniwan ni patay, ket pinugsatna dagiti parautda. 15 O dagiti tattao idaydayawda coma iti APO gapu iti kinaimbagna, ken gapu cadagiti nacascasdaaw nga ar-aramidna cadagiti annac dagiti tattao! 16 Ta dinupracna dagiti ruruangan nga gambang, ket pinutedna dagiti balbalunet a landoc. 17 Dagiti maag gapu iti salungasingda, ken gapu iti kinadangkesda, maparigatanda. 18 Ti cararruada carurodda ti aniaman a kita ti taraon; ket umadanida cadagiti ruruangan ni patay. 19 Iti casta umkisda iti APO iti panagrigatda, ket isu insalacanna ida cadagiti sensennaayda. 20 Inbaonna ti saona, ket inagasanna ida, ket inispalna ida cadagiti pacadadaelanda. 21 O dagiti tattao idaydayawda coma iti APO gapu iti kinaimbagna, ken gapu cadagiti nacascasdaaw nga ar-aramidna cadagiti annac dagiti tattao! 22 Ket idatonda coma dagiti sacrificio ti panagyaman, ken iparangarangda dagiti ar-aramidna iti kinarag-o. 23 Dagiti tumapug idiay baybay cadagiti sasacayan, nga agtagilaco idiay ayan dagiti dadackel a dandanum; 24 Dagitoy makitada dagiti ar-aramid iti APO, ken dagiti datdatlagna iti taaw. 25 Ta bilinenna, ket pabangonenna ti angin ti baggio, isu a mangipangato cadagiti daldalluyonna. 26 Umalimpatocda nga agpalangit, sada manen agpababa cadagiti caungan: ti cararruada malunag gapu iti danag. 27 Maipaspas-irawda, ket agalla-allada a cas ti nabartec a tao, ket addada nga awanen iti ammoda. 28 Iti casta umkisda iti APO iti panagducotda, ket ilapsutna ida cadagiti sensennaayda. 29 Pagbalinenna ti baggio a nalinac, iti casta dagiti dalluyonna agtalnada. 30 Iti casta maragsacandan gapu ta natalnadan; ket sana iturong ida iti tartarigagayanda a pagsangladan. 31 O dagiti tattao idaydayawda coma iti APO gapu iti kinaimbagna, ken gapu cadagiti nacascasdaaw nga ar-aramidna cadagiti annac dagiti tattao! 32 Itan-ocda met isuna coma iti gimong ti umili, ken idaydayawda coma iti taripnong dagiti panglacayen. 33 Pagbalinenna dagiti carcarayan a let-ang, ken dagiti burburayoc a danum a naticag nga daga; 34 Nabunga nga daga agbalin nga awan bungana, gapu iti kinadakes dagiti agnaed cadacuada. 35 Pagbalinenna ti let-ang a danum nga natalna, ken ti naticag a daga nga danum nga agburayoc. 36 Ket sadiay pagnaedenna dagiti mabisin, tapno macaisaganada ti ili a pagnaedan; 37 Ken mabunubonanda dagiti taltalon, ket mamulaanda dagiti panguvasan, tapno agited dagiti bungbunga nga adu. 38 Isu bendicionanna met ida, tapno umaduda unay; ket saanna nga ituloc a bumassit dagiti an-animalda. 39 Manen, macsayanda ken maparucmada gapu iti pannacailuplupit, ducot, ken ladingit. 40 Iparucpocna ti umsi cadagiti pipprincipe, ket pagcalcallautangenna ida iti langalang, nga awan ti pagdalanan. 41 Ngem ipasdecna ti napanglaw a nangato manipud iti ladingitna, ket ipaayanna iti famfamilia a cas pangen. 42 Dagiti nalinteg makitadanto, ket agragsacdanto: ket ti amin a kinadakes pagsardengento ti ngiwatna. 43 Siasinoman a masirib, ken imutectecanna dagitoy a banbanag, uray pay dagitoy ket maawatandanto ti kinamanagayat iti APO. SALMO 108 Maysa a Canta wenno Salmo ni David. 1 O Dios, ti pusoc naisimpan; agcantaacto ken agdaydayawacto, uray pay ti pannacaitan-occo. 2 Agriingcayo, salterio ken arpa: uray siac agriingacto met a masapa unay. 3 Agdayawacto kenca, O APO, iti tengnga dagiti tattao: ket icantacto dagiti panangidaydayaw kenca iti tengnga dagiti nasnacion. 4 Ta ti kinaasim naindaclan iti ringbaw dagiti langlangit: ken ti kinapudnom dumanon cadagiti ul-ulep. 5 Maitan-occa coma, O Dios, iti ringbaw dagiti langlangit: ken ti dayagmo ti ringbaw ti amin toy daga; 6 Tapno ti ay-ayatem maispal coma: isalacannacami ita macanawan nga imam, ket sungbatannac. 7 Ti Dios nagsaon babaen iti kinasantona; Agragrag-oacto, bingayecto ti Sikem, ket rucodecto ti tanap ti Succot. 8 Cucuac ti Galaad; cucuac ti Manases; ti Efraim isu met ti pigsa ti uloc; ti Juda isu ti cetroc; 9 Ti Moab isu ti palanggana a pagbuggoac; sadi Edom ipalladawconto ti sapatosco; sadi Filistia agballigiacto. 10 Siasino ti mangiserrecto caniac idiay nabileg nga ili? siasino ti mangiturongto caniac idiay Edom? 11 Saanca aya, O Dios, nga nangiwagsac cadacami? ken saanca aya, O Dios, a cumuyog cadagiti buybuyotmi? 12 Badangannacami cadagiti pacariribucanmi: ta ubbaw ti tulong nga aggapu iti tao. 13 Gapu iti Dios simamaingelcamto: ta isu ti mangilupitto cadagiti cabcabusormi. SALMO 109 Agpaay iti cangronaan a Tomotokar, Maysa a Salmo ni David. 1 Dica tenglen iti talnam, O Dios a pagdaydayawco; 2 Ta ti ngiwat ti nadangkes ken ti ngiwat ti manangallilaw nacangangada a maibusor caniac: nagsaoda caniac babaen ti ulbod a dilada. 3 Inalicubcubdac met cadagiti sasao ti gura; ket nakibacalda caniac nga awan gapgapuna. 4 Gapu iti ayatco isu ti pakicabusoranda caniac: ngem intedco ti biangco iti cararag. 5 Ket insupapacda caniac ti dakes gapu iti naimbag, ken gura gapu iti ayatco. 6 Mangicabilca iti dakes a tao nga agimaton kencuana: ken tumacder coma ni Satanas iti macanawan nga imana. 7 Intono isuna ket maocom, rumsua coma nga naocomen: ket ti cararagna agbalin coma a basol. 8 Bumassit coma dagiti al-aldawna; ket alaen coma ti sabali ti saadna. 9 Maulila coma dagiti annacna, ken mabalo ti asawana. 10 Agalla-alla coma nga cancanayon dagiti annacna, ken makilimlimosda: ket agsapulda coma iti taraonda cadagiti langlangalang a luglugarda. 11 Ti nagaramugam nga managpatubo cuyucuyenna coma amin nga adda kencuana; ket dagiti gangannaet samsamenda coma ti nagbannoganna. 12 Awan coma uray maysa a mangigay-at iti asi kencuana: awan met coma ti siasino man a mangparabur cadagiti ul-ulila nga annacna. 13 Magudas coma ti inaudina; ket iti sumaganad a caputotan mapunas coma ti naganda. 14 Ti kinadakes dagiti dadackelna maipalpalagip coma iti APO; ket ti basol ti inana saan coma nga mapunas. 15 Addada coma a cancanayon iti saclang iti APO, tapno gudasenna ti pacalaglagipan cadacuada ditoy daga. 16 Gapu ta dina linagip nga imparangarang ti asi, no di ket indadanesna ti napanglaw ken macasapul a tao, tapno patayenna pay dagiti nadunor ti pusona. 17 Cas nagayatanna ti panagilunod, dumteng met coma ngarud kencuana: ket cas dina nagrayoan ti pammendicion, mayadayo ngarud coma kencuana. 18 Cas incawesna iti bagina dagiti panagilunod a cas pagan-anayna, bay-am a sumrec coma ngarud cadagiti caungan ti bagina a cas danum, ken cas lana cadagiti tultulangna. 19 Isu coma kencuana ti cas cagay nga nangabungot kencuana, ken pannacabarikes a pagbarikesna a cancanayon. 20 Daytoy coma ti gunggona dagiti cabusorco gapu iti APO, ken cadagidiay nga agsao iti dakes a maicaniwas itoy cararruac. 21 Ngem bumiangca cadi caniac, O DIOS nga Apo, a maigapu ita naganmo: ta ti kinamanangaasim ket naimbag, ispalennac cadi. 22 Ta napanglawac ken agcasapulannac, ket toy pusoc nadunor itoy unegco. 23 Maawanacon a cas ti anniniwan no agpucaw: maipalpallatocac a casla dudon. 24 Dagiti tumtumengco aglucaylucaydan gapu iti panagay-ayunar; ket ti lasagco maaw-awananen ti taba. 25 Nagbalinac met a nacababain cadacuada: no cumitada caniac iwingiwingda ti uloda. 26 Tulongannac, O APO a Diosco: O isalacannac cas mayalubog ita kinamanangaasim: 27 Tapno maammoanda a daytoy isu ti imam; a sica, APO, ti nangaramid. 28 Bay-am nga agilunodda, ngem sica mamendicionca: no bumangonda, maibabainda coma; ngem toy adipenmo agragrag-o coma. 29 Macawesan coma dagiti cabusorco iti pannacaibabain, ket macumotanda coma iti bucodda nga pannacariro, a cas ti maysa nga cagay. 30 Idaydayawconto ti naindaclan ti APO babaen itoy ngiwatco; wen, idaydayawconto iti tengnga dagiti caadduan. 31 Ta isu agtacderto iti macanawam nga ima ti napanglaw, tapno isalacanna cadagiti mangocom iti cararruana. SALMO 110 Maysa a Salmo ni David. 1 Iti APO kunana iti Apoc, Agtugawca iti macanawan nga imac, aginggana iti mapagbanagco dagiti cabcabusormo a pagbatayam. 2 Iti APO ibaonnanto ti sarucod ti bilegmo manipud Sion: agturayca iti tengnga dagiti cabcabusormo. 3 Ti ilim situtulocdanto iti aldaw ti pannacabalinmo, iti imnas nga nasantoan a nagtaud iti aanacan ti bigat: addaanca iti linnaaw ti kinaagtutubom. 4 Iti APO insapatana, ket dinto agbabawi, Sica ti padi nga agnanayon nga cas galad ni Melkisedec. 5 Ti Apo dita macanawanmo dunorennanto dagiti ar-ari iti aldaw ti pungtotna. 6 Mangocomto cadagiti nasnacion, punnoennanto dagiti disdisso cadagiti bagbagi a natay; dunorennanto dagiti ul-ulo ti adu a pagpagilian. 7 Inumannanto ti waig iti dalan: iti casta ital-onanto ti ulo. SALMO 111 1 Idaydayawyo ti APO. Idaydayawconto ti APO iti amin a pusoc, iti taripnong dagiti nalinteg, ken iti gimong. 2 Dagiti ar-aramid iti APO naindaclanda, a biroken dagiti amin nga agray-o cadacuada. 3 Ti aramidna kinadayaw ken kinadayag: ket ti kinalintegna agtalinaed nga agnanayon. 4 Inaramidna dagiti nacascasdaaw nga ar-aramidna tapno laglagipen ida: ti APO managparabur ken napnoan iti kinamanangngaasi. 5 Nangted iti taraon cadagiti agbuteng kencuana: silalagipto laeng a cancanayon iti tulagna. 6 Impamatmatna iti ilina ti pannacabalin dagiti ar-aramidna, tapno itedna cadacuada iti tawid dagiti nasnacion. 7 Dagiti ar-aramid dagiti imana ket kinapudno ken kinajusticia; amin nga bilbilinna napaypaysoda. 8 Naipasdecda nga agnanayon ken awan patinggana, naaramidda babaen iti kinapudno ken kinalinteg. 9 Imbaonna ti pannacasubbot iti ilina: imbilinna ti tulagna nga agnanayon: kinasanto ken kinaraem ket isu iti naganna. 10 Ti panagbuteng iti APO isu ti pangruggian ti kinasirib: ti nasayaat a pannacaawat adda cadagiti amin nga agtulnog cadagiti bilbilinna: ti pannacaidaydayawna agtalinaed nga agnanayon. SALMO 112 1 Idaydayawyo ti APO. Bendito ti tao nga agbuteng iti APO, nga maragsacan iti dackel unay cadagiti bilbilinna. 2 Ti caputotanna mannacabalinto ditoy rabaw ti daga: ti caputotan ti nalinteg mabendicionanto. 3 Sanicua ken kinabacnang addadanto iti balayna: ket ti kinalintegna agtalinaed nga agnanayon. 4 Iti nalinteg adda bumangon a silaw iti sipnget: isu ket managparabur, ken napnoan ti kinamanangngaasi, ken nalinteg. 5 Ti naimbag a tao ipakitana ti parabur, ken agpautang: idalannanto dagiti panggepna iti kinaannad. 6 Kinapudnona saanto a magaraw uray caanoman: ti nalinteg addadanto iti agnanayon nga pannacalaglagip. 7 Dinanto pagbutngan dagiti dakes a damdamag: ti pusona nacasimpan, nga sitatalec iti APO. 8 Ti pusona napatalgeden, dinto agbuteng, agingga iti makitana ti tarigagayna cadagiti cabcabusorna. 9 Isu nagiwaras, nangted cadagiti napanglaw; ti kinalintegna agtalinaed nga agnanayon; ti sarana maitan-octo a sidadayaw. 10 Ti nadangkes makitananto, ket aglucsawto; pagngaretngetennanto dagiti ngipenna, ket marunawto: ti tarigagay ti nadangkes ket mapucawto. SALMO 113 1 Idaydayawyo ti APO. Idaydayawyo, O dacayo nga ad-adipen iti APO, idaydayawyo ti nagan iti APO. 2 Bendito coma ti nagan iti APO manipud ita nga oras ken iti kinaagnanayon. 3 Manipud isingising ti init agingga iti ilelennecna met laeng ti nagan iti APO maidaydayaw coma. 4 Iti APO natan-oc iti ringbaw dagiti amin a nasnacion, ken ti dayagna naringringbaw ngem dagiti langlangit. 5 Siasino ti cas iti APO a Diostayo, nga agnanaed iti nangato, 6 Nga agpacumbaba tapno matmatanna dagiti adda sadi langit, ken iti daga! 7 Bangonenna ti napanglaw manipud iti tapuc, ket aonenna ti nacurapay iti pagibellengan ti rugit; 8 Tapno isu ti isaadna cadagiti pipprincipe, cadagiti met laeng pipprincipe iti ilina. 9 Pagtagibalayenna ti babai a lupes, ket pagbalinenna a naragsac nga ina dagiti annac. Idaydayawyo ti APO. SALMO 114 1 Idi a pimmanaw ti Israel idiay Egipto, ti balay ni Jacob nanipud iti umili a gangannaet ti pagsasaona; 2 Ti Juda nagbalin a santuariona, ket ti Israel isu ti pagturayanna. 3 Ti baybay nakitana, ket nagtalaw: ti Jordan ket nagsanud. 4 Dagiti banbantay naglaglagtoda a cas carcarnero a calalakian, dagiti turturod a babassit cas carcarnero nga urbon. 5 Ania ti napasamacmo, O sica baybay, a nagtalawca? sica Jordan, nga sica nagsanudca? 6 Dacayo a banbantay, a naglalagtocayo pay a cas carcarnero a calalakian; ket dacayo turturod a babassit, a cas carcarnero nga urbon? 7 Agkintayegca, sica daga, iti sangoanan ti Apo, iti sangoanan ti Dios ni Jacob; 8 Isu nga namagbalin ti bato a libtong ti danum, ti pamulinawen pinagbalinna nga ubbog dagiti dandanum. SALMO 115 1 Saan a cadacami, O APO, saan a cadacami, no di ket ita naganmo ti pangtedam iti dayag, gapu iti kinamanangaasim, ken gapu iti pateg ti kinapudnom. 2 Apay a saoento dagiti nacion, Sadino ita iti ayan ti Diosda? 3 Ngem ti Diosmi adda cadagiti langlangit: inaramidna ti aniaman a kinaycayatna. 4 Dagiti didiosenda ket pirac ken balitoc, ti aramid dagiti im-ima dagiti tattao. 5 Adda ngiwngiwatda, ngem dida agsao: adda matmatada, ngem dida macakita: 6 Adda laplapayagda, ngem dida macangngeg; adda ag-agongda, ngem dida macaangot: 7 Adda im-imada, ngem dida macaiggem: adda sacsacada, ngem dida macapagna: dida met macapagsao cadagiti carabucobda. 8 Dagiti mangaramid cadacuada casladanto cadacuada; ken casta met ti sinoman nga agcammatalec cadacuada. 9 O Israel, agcammatalecca iti APO: isu ti tulongda ken calasagda. 10 O balay ni Aaron, agcammataleccayo iti APO: isu ti tulongda ken calasagda. 11 Dacayo nga agbuteng iti APO, agtaleccayo iti APO: isu ti tulongda ken calasagda. 12 Iti APO silalagip cadatayo: bendicionannatayto; bendicionannanto ti balay ni Israel; bendicionannanto ti balay ni Aaron. 13 Bendicionannanto dagiti agbuteng iti APO, babassit man ken dadackel. 14 Iti APO paadduennacayto pay nga paadduen, dacayo ken dagiti an-annacyo. 15 Benditonacayo iti APO isu a nangaramid iti langit ken daga. 16 Ti langit, uray pay dagiti langlangit, cucua ti APO: ngem ti daga intedna cadagiti annac dagiti tattao. 17 Dagiti natay dida idaydayaw iti APO, casta met dagiti sinoman a bumaba iti caulimecan. 18 Ngem benditoentayto iti APO manipud ita nga oras ken iti kinaagnanayon. Idaydayawyo ti APO. SALMO 116 1 Ayatec iti APO, agsipud ta dinengegna ti timecco ken dagiti dawdawatco. 2 Gapu ta inyallingagna ti lapayagna caniac, gapuna umawagacto kencuana bayat ti isuamin a panagbiagco. 3 Dagiti ladladingit ni patay linacubnac, ken dagiti tutuoc ti impierno kinapetdac: nasaracac ti ducot ken ladingit. 4 Idin immawagac iti nagan iti APO; O APO, agdawatac kenca, ispalem toy cararruac. 5 Managparabur iti APO, ken nalinteg; wen, ti Diostayo ket manangaasi. 6 Iti APO salacnibanna dagiti awanan ammo: naipababaac, ket isu tinulongannac. 7 Agsublica iti kinatalnam, O cararruac; ta iti APO bimmiang a sipaparabur kenca. 8 Ta inispalmo toy cararruac nanipud ken patay, dagiti matac nanipud cadagiti lulua, ken dagiti sacac nanipud iti pannacatnag. 9 Magnaacto iti saclang iti APO idiay daga dagiti sibibiag. 10 Mamatiac, gapuna nagsaoacon: dackel unay ti pannacapaleddaangco: 11 Kinunac iti pannacaganatco, Amin a tattao naulbod. 12 Ania ti itdecto iti APO a subad dagiti paraburna caniac? 13 Alaecto ti copa ti pannacaisalacan, ken awagacto ti nagan iti APO. 14 Bayadacto dagiti carcaric iti APO itan iti sangoanan ti amin nga ilina. 15 Napateg iti imatang iti APO ti ipapatay dagiti sasantona. 16 O APO, pudno a siac ti adipenmo; siac ti adipenmo, ken anac a lalaki ti babai nga adipenmo: sica winarwarmo dagiti repreppetco. 17 Isagutconto kenca ti daton a panagyaman, ken umawagacto iti nagan iti APO. 18 Bayadacto dagiti carcaric iti APO itan iti sangoanan ti amin nga ilina, 19 Cadagiti parparaangan ti balay iti APO, iti tengngam, O Jerusalem. Idaydayawyo ti APO. SALMO 117 1 O idaydayawyo iti APO, dacayo amin a nasnacion: ipadpadayawyo, dacayo amin nga tattao. 2 Gapu ti napnoan asi nga kinamanagayatna naindaclan cadatayo: ken ti kinapudno iti APO agtalinaed iti agnanayon. Idaydayawyo ti APO. SALMO 118 1 O agyamancayo iti APO; ta isu naimbag; ta ti kinamanangaasina agtalinaed iti agnanayon. 2 Cunaen coma ita ti Israel, a ti kinamanangaasina agtalinaed iti agnanayon. 3 Cuna coma ti balay ni Aaron ita, ti kinamanangaasina agtalinaed iti agnanayon. 4 Dagiti agbuteng iti APO kunada coma ita, ti kinamanangaasina agtalinaed iti agnanayon. 5 Immawagac iti APO iti pannacaducotco: ti APO sinungbatannac, ket incabilnac iti nalawa a disso. 6 Iti APO adda ditoy sikigac; diacto agbuteng: ania ti mabalin nga aramiden ti tao caniac? 7 Iti APO salinongannac iti nagtengngaan dagiti mangarayat caniac: iti casta makitacto ti calicagumco cadagiti gumurgura caniac. 8 Nasaysayaat ti panagcamang iti APO ngem ti panagtalec iti tao. 9 Nasaysayaat ti panagcamang iti APO ngem ti panagtalec cadagiti pipprincipe. 10 Amin dagiti nasnacion linacubdac: ngem babaen iti nagan iti APO dadaelecto ida. 11 Isuda ket linacubdac; wen, isuda ket linacubdac: ngem babaen iti nagan iti APO ket dadaelecto ida. 12 Linacubdac nga arigda la uyocan; naidepdepda a cas apuy dagiti sisiit: ta babaen iti nagan iti APO dadaelecto ida. 13 Sica dinuclosnac a nacaro tapno matuangac: ngem iti APO inarayatnac. 14 Iti APO isu ti bilegco ken cantac, ken isu ti nagbalin a mangisalacanco. 15 Ti timec ti panagragragsac ken pannacaisalacan adda cadagiti toltolda dagiti nalinteg: ti macanawan nga ima iti APO agmamaingel ti aramidna. 16 Ti macanawan nga ima ti APO naitan-oc: ti macanawan nga ima iti APO agmamaingel ti aramidna. 17 Saanacto a matay, ngem agbiagacto, ken ipalawagconto dagiti ar-aramid iti APO. 18 Iti APO dinusanac iti nacaro: ngem saannac nga inyawat ken patay. 19 Lucatam caniac dagiti ruruangan ti kinalinteg: sumrecacto cadacuada, ket idaydayawconto ti APO: 20 Daytoy ti ruangan ti APO, a dagiti nalinteg sumrecdanto kencuana. 21 Idaydayawcanto: ta dinengngegnac, ket nagbalinca a salacanco. 22 Ti bato nga imbelleng dagiti agbangbangon ket nagbalin a cangronaan nga bato a pasuli. 23 Daytoy ti aramid iti APO; ket nacacascasdaaw cadagiti matmatatayo. 24 Daytoy ti aldaw nga inaramid iti APO; pagragsacanmi ken pagragoanminto isuna. 25 Mangisalacanca ita, dawatec kenca, O APO: O APO, dawatec kenca, ibaonmo itan ti kinarang-ay. 26 Bendito ti siasinoman nga umay iti nagan iti APO: binenditodaca manipud iti balay iti APO. 27 Ti Dios isu iti APO, a nangiparangarang cadatayo iti silaw: galutanyo ti daton cadagiti taltali, wen agingga cadagiti sarsara iti altar. 28 Sica ti Diosco, ket idaydayawcanto: sica ti Diosco, ket itantan-occanto. 29 O agyamancayo iti APO; ta isu naimbag: ta ti kinamanangaasina agtalinaed iti agnanayon. SALMO 119 ALEPH. 1 Bendito dagiti awan mulitda iti dalan, nga magmagna iti linteg ti APO. 2 Bendito dagiti mangsalimetmet cadagiti pammanecnecna, ken birokenda isuna ti amin a pusoda. 3 Saanda pay nga agaramid iti kinakillo: magnada cadagiti daldalanna. 4 Sica imbilinmo cadacami nga salimetmetanmi dagiti pangngeddengmo a sireregta. 5 O ta dagiti desdesco maiturongda coma nga mangsalimetmet cadagiti al-allagadem! 6 Iti casta saannacto a mabain, intono adda panagraemco cadagiti amin a bilbilinmo. 7 Idaydayawcanto agraman ti kinalinteg iti puso, intono masursuroc dagiti nalinteg nga panagocommo. 8 Annurotecto dagiti pangngeddengmo: O dinac cadi baybay-an a pulos. BETH. 9 Ania ti pangdalusto ti agtutubo iti dalanna? babaen ti panangitaltalecna iti mayannurot iti saom. 10 Iti amin a pusoc binirbirocca: O dinac baybay-an a maisiasi cadagiti bilbilinmo. 11 Ti saom indulinco itoy pusoc, tapno diac agbasol kenca. 12 Benditoca, O APO: isurom caniac dagiti al-allagadem. 13 Cadagiti bibbibigco impalawagco amin dagiti bilbilin ta ngiwatmo. 14 Nagrag-oac ti dalan dagiti pammanecnecmo, a cas iti caadu dagiti amin a kinabacnang. 15 Imutectecacto dagiti pangngeddengmo, ket pagraemacto dagiti daldalanmo. 16 Maragragsacanacto cadagiti al-allagadem: diacto lipaten ti saom. GIMEL. 17 Ipaayam cadi a sipaparabur toy adipenmo, tapno agbiagac, iti casta annurotecto ti saom. 18 Lucatam dagitoy matac, tapno mabuyac dagiti nacascasdaaw nga banbanag nga aggapu ita lintegmo. 19 Gangannaetac ditoy daga: dica ilinged dagiti bilbilinmo caniac. 20 Toy cararruac mariribuc gapu iti iliwna cadagiti linlintegmo a cancanayon. 21 Tinubngarmo dagiti natangsit nga nailunod, isuda dagitoy ti sumiasi cadagiti linlintegmo. 22 Iyadayom cadi caniac ti bain ken uyaw; gapu ta sinalimetmetac dagiti pammanecnecmo. 23 Dagiti pipprincipe nagtugawda ken pinagsasaoandac pay: ngem toy adipenmo nagpanunot cadagiti al-allagadem. 24 Dagiti pammanecnecmo isuda met ti pagray-oac ken pammalacadco. DALETH. 25 Toy cararruac kimpet iti tapuc: biagennac cadi cas mayannurot iti saom. 26 Impalawagco dagiti daldalanco, ket siac dinengngegnac: isurom caniac dagiti al-allagadem. 27 Ipaawatmo caniac ti dalan dagiti pangngeddengmo: iti casta ipalawagconto dagiti nacascasdaaw nga ar-aramidmo. 28 Toy cararruac marunaw gapu iti kinabantot: papigsaennac cadi nga cas mayannurot iti saom. 29 Iccatem caniac ti dalan ti kinaulbod: ket itdem ti lintegmo caniac a sipaparabur. 30 Pinilic ti dalan ti kinapudno: dagiti pagbilbilinam incabilco ditoy sangoc. 31 Salikepkepac dagiti pammanecnecmo: O APO, dinac cadi pabainan. 32 Tarayecto ti dalan dagiti bilbilinmo, intono palawaen toy pusoc. HE. 33 Isurom caniac, O APO, ti dalan dagiti al-allagadem; ket salimetmetacto agpapan panungpalan. 34 Iccannac ti pannacaawat, ket salimetmetacto ti lintegmo; wen, annurotecto iti isuamin nga pusoc. 35 Ipannac iti dan-a dagiti bilbilinmo; ta cadacuada iti pacaragsacac. 36 Pagturongem toy pusoc cadagiti pammanecnecmo, a saan ketdi nga iti kinaagum. 37 Ilisim dagitoy matac iti panangmatmat iti kinaubbaw; ket biagennac cadagiti daldalanmo. 38 Pasingkedam ti saom itoy adipenmo, a naipaay iti panagbuteng kenca. 39 Iliclicmo caniac ti pannacaab-abi a cabutengco: ta dagiti pagbilbilinam naimbagda. 40 Adtoy, inil-iliwco dagiti pangngeddengmo: biagennac iti kinalintegmo VAU. 41 Umay coma met caniac ta kinamanangaasim, O APO, uray pay ti salacanmo, cas mayannurot iti saom. 42 Iti casta addanto isungbatco iti mangab-abi caniac: ta agtalecac iti saom. 43 Ket dica cadi iccaten a pulos ti sao ti pudno itoy ngiwatco; ta nanginanamaac cadagiti bilbilinmo. 44 Iti casta annurotecto ti lintegmo iti agnanayon nga awan patinggana. 45 Ket magnaacto a siwayawaya: ta binirocco dagiti pangeddengmo. 46 Saoecto met dagiti pammanecnecmo iti saclang dagiti ar-ari, ket saannacto a mabain. 47 Ket pagrayrayoacto dagiti bilbilinmo, isuda nga inay-ayatco. 48 Itag-ayconto met dagiti im-imac cadagiti bilbilinmo, isuda nga inay-ayatco; ket imutectecacto dagiti al-allagadem. ZAIN. 49 Laglagipem ti saom itoy adipenmo, gapu ta isuda iti pinangnamnamaac. 50 Daytoy ti liwliwac iti ladingitco: ta ti saom ket pinagbiagnac. 51 Dagiti natangsit inuy-uyawdac a napalalo: ngem saannac a simmiasi iti lintegmo. 52 Linagipco dagiti pangngeddengmo idi ugma, O APO; ket naliwliwaac. 53 Nacaal-alingget a buteng ti kimpet caniac gapu cadagiti nadangkes a nangbaybay-a iti lintegmo. 54 Dagiti al-allagadem isuda dagiti cancantac iti balay ti panagpagnapagnac. 55 Linagipco ti naganmo, O APO, iti rabii, ket inannurotco ti lintegmo. 56 Daytoy ti addan caniac, gapu ta sinalimetmetac dagiti pannursurom. CHETH. 57 Sica ti apagco, O APO: sinaocon nga annurotecto dagiti sasaom. 58 Dinawdawatco ti paraburmo iti amin a pusoc: caasiannac cadi a cas mayannurot iti saom. 59 Pinanunotco dagiti daldalanco, ket inturongco dagiti sacsacac cadagiti pammanecnecmo. 60 Nagdardarasac, ket diac nagtantan a mangannurot cadagiti bilbilinmo. 61 Dagiti taltali dagiti nadangkes ket tinacawandac: ngem diac linipatan ti lintegmo. 62 Iti tengnga ti rabii bumangonacto nga agyaman kenca gapu cadagiti nalinteg a pangngeddengmo. 63 Maysaac a caddua dagiti agbuteng kenca, ken dagiti mangannurot cadagiti pangngeddengmo. 64 Ti daga, O APO, ket napno iti kinaasim: isurom caniac dagiti al-allagadem. TETH. 65 Impaayam a nasayaat toy adipenmo, O APO, cas mayannurot iti saom. 66 Isuronac iti naimbag a panagipato ken pannacaammo: ta namatiac cadagiti bilbilinmo. 67 Idi diac pay nagleddaang nayaw-awanac: ngem itan annurotecon ti saom. 68 Sica naimbagca, ken naimbag ti aramidmo; isurom caniac dagiti al-allagadem. 69 Dagiti natangsit nagparboda iti ulbod a maibusor caniac: ngem salimetmetacto dagiti pangngeddengmo iti isuamin nga pusoc. 70 Ti pusoda nataba a cas sebo; ngem agray-oac iti lintegmo. 71 Nasayaat caniac daydi panagleddaangco; tapno maammoac dagiti al-allagadem. 72 Ti linteg ta ngiwatmo nasaysayaat caniac ngem dagiti rinibu a balitoc ken pirac. JOD. 73 Dagiti im-imam inaramiddac ken sinucogdac: iccannac iti pannacaawat, tapno masursuroc dagiti bilbilinmo. 74 Dagiti agbuteng kenca ket maragsacandanto no makitadac; gapu ta nanginanamaac iti saom. 75 Ammoc, O APO, a dagiti panangocommo nalintegda, ken iti kinamatalecmo pinagladingitnac. 76 Ipalubosmo, dawatec kenca, ti napnoan asi a kinamanagayatmo isu cadi ti liwliwac, cas mayannurot iti saom itoy adipenmo. 77 Dagiti nadungngo a caasim umayda cadi caniac, tapno macapagbiagac: ta ti lintegmo isu ti pagray-oac. 78 Dagiti natangsit maibabainda cadi; ta nagaramidda ti kinaulpit caniac nga awan ti gapgapuna: ngem imutectecacto dagiti pangngeddengmo. 79 Dagiti agbuteng kenca agturongda coma caniac, ken dagidiay nacaammon dagiti pammanecnecmo. 80 Toy pusoc maan-anay cadi cadagiti al-allagadem; tapno saanac a maibabain. CAPH. 81 Toy cararruac matalimudaw gapu ita panangisalacanmo: ngem manginanamaac iti saom. 82 Dagiti matac aglidemda gapu ita saom, a kunana, Caanonto ti panangliwliwam caniac? 83 Ta nagbalinac a cas botelya iti uneg ti asuc; nupay casta diac malipatan dagiti al-allagadem. 84 Mano cadi dagiti al-aldaw toy adipenmo? caano ti panangipataymo ti panangocom cadagiti mangirurumen caniac? 85 Dagiti nacuspag incaliandac dagiti ab-abut, a saan nga mayannurot iti lintegmo. 86 Amin dagiti bilbilinmo ket sitatalinaedda: irurumendac a di um-umno; saranayennac cadi. 87 Dandanidac rinunot ditoy rabaw ti daga; ngem diac binaybay-an dagiti al-allagadem. 88 Pagbiagennac cas mayalubog iti kinamanagayatmo; iti casta annurotecto ti pammanecnec ta ngiwatmo. LAMED. 89 Agnanayon, O APO, a ti saom sitatalinaed sadi langit. 90 Ti kinamatalecmo agtalinaed cadagiti amin a capcaputotan: insimpamon ti daga, ket agtalinaed. 91 Agtultuloyda itoy nga aldaw cas mayalubog cadagiti bilbilinmo: ta isuda amin ket ad-adipenmo. 92 No saan coma a ti lintegmo ti pagragrag-oac, natayac coman idi iti pannacaparigatco. 93 Uray caanoman diacto malipatan dagiti pannursurom: ta isuda ti pinangpabiagmo caniac. 94 Siac cucuanac, isalacannac; ta binirocco dagiti pannursurom. 95 Dagiti nadangkes dinadaanandac tapno dadaelendac: ngem ut-utobecto dagiti pammanecnecmo. 96 Nakitac ti pagpatinggaan ti amin a kinaan-anay: ngem ti bilinmo ket napalaus unay ti kinalawana. MEM. 97 O anian a panangayatco iti lintegmo! isu ti imutectecac ti amin nga aldaw. 98 Gapu cadagiti bilbilinmo pinagbalindac a nasirsirib ngem dagiti cabcabusorco: ta agnanayonda caniac. 99 Ad-adda ti pannacaawatco ngem dagiti amin a manursuro caniac; ta dagiti pammanecnecmo isuda ti ut-utobec. 100 Ad-adda ti pannacaawatco ngem cadagiti lallacay, gapu ta sinalimetmettac dagiti al-alagadem. 101 Tinengngelco dagiti sacsacac iti aniaman a dakes a dalan, tapno maannurotco coma ti saom. 102 Saanac a simmiasi cadagiti pagbilbilinam: ta sica insuronac. 103 Anian a nagsam-it dagiti sasaom itoy panagnanamco! wen, nasamsam-it ngem diro itoy ngiwatco! 104 Gapu cadagiti bilbilinmo maragpatco ti pannacaawat: gapuna guraec ti amin nga ina-allilaw a dalan. NUN. 105 Ti saom pagsilawan cadagiti sacsacac, ken silaw iti dan-ac. 106 Insapatac, ket pinasingkedac, nga annurotecto dagiti nalinteg a pagbilinam. 107 Siduducotac la unay: pagbiagennac cadi, O APO, cas mayalubog iti saom. 108 Awatem, dawatec kenca, dagiti sibubulos a sagsagut toy ngiwatco, O APO, ken isuronac cadagiti pagbilinam. 109 Ti cararruac adda a cancanayon itoy imac: nupay casta diac malipatan ti lintegmo. 110 Dagiti nadangkes nangipacatda iti pangsilo caniac: nupay casta diac simmiasi cadagiti al-allagadem. 111 Dagiti pammanecnecmo inawatco ida a cas tawid nga agnanayon: ta isuda ti ragrag-o toy pusoc. 112 Inrucnoyco toy pusoc a mangtungpal cadagiti al-allagadem nga cancanayon, uray pay agpapan iti canibusanan. SAMECH. 113 Cagurac dagiti ubbaw nga pampanunot: ngem ti lintegmo ay-ayatec. 114 Sica ti pagsalindegac ken calasagco: ta siac ket nanginanamaac iti saom. 115 Umadayocayo caniac, dacayo a managdacdakes: ta salimetmetacto dagiti bilbilin ti Diosco. 116 Saranayennac cas mayalubog iti saom, tapno agbiagac: ket saanac coma a mabain itoy namnamac. 117 Bitibitennac, ket natalgedacto: ket pagraemacto dagiti al-allagadem nga cancanayon. 118 Sica pinayatpayatmo dagiti sumiasi cadagiti al-allagadem: ta ti pangallilawda isu ti kinaulbod. 119 Sica iccatem dagiti nadangkes ditoy daga a cas lati: gapuna ayatec dagiti pammanecnecmo. 120 Ti lasagco agpigerger iti panagbuteng kenca; ket mabutengac cadagiti pangngeddengmo. AIN. 121 Inaramidco ti kinajusticia ken kinalinteg: dinac cadi baybay-an cadagiti mangilupit caniac. 122 Sica cadi ti pammatalged toy adipenmo a pagimbaganna: diac coma mailupit ti natangsit. 123 Dagitoy matac umlayda gapu iti panangisalacanmo, ken gapu ti sao iti kinalintegmo. 124 Ipaayam toy adipenmo cas mayalubog iti kinaasim, ken isurom caniac dagiti al-allagadem. 125 Siac ti adipenmo; iccannac iti pannacaawat, tapno maammoac dagiti pammanecnecmo. 126 Ita iti tiempomon, APO, nga agtrabaho: ta binarengbarengda ti lintegmo. 127 Gapuna ayatec dagiti bilbilinmo a nagnangrona ngem balitoc; wen, nangnangrona ngem pulos a balitoc. 128 Gapuna ilalaec amin dagiti al-allagadem maipapan cadagiti amin a banag a nalinteg; ken guraec amin a dalan nga ina-allilaw. PE. 129 Dagiti pammanecnecmo nacascasdaawda: gapuna a toy cararruac salimetmetanna ida. 130 Ti iseserrec dagiti sasaom mangted lawag; mangted iti pannacaawat cadagiti awanan ammo. 131 Inngangac toy ngiwatco, ket nagal-alac: ta siseseggaac idi cadagiti bilbilinmo. 132 Kitaennac cadi, ket caasiannac, cas cadawyam nga aramiden cadagiti agayat ita naganmo. 133 Ipasdecmo dagiti ad-addangco iti saom: ket awan coma ti aniaman a kinadakes a macapagturay caniac. 134 Ispalennac iti panangilupit ti tao: iti casta annurotecto dagiti pangngeddengmo. 135 Pagraniagem coma ta rupam itoy adipenmo; ket isurom caniac dagiti al-allagadem. 136 Carcarayan dagiti dandanum agayusda cadagitoy matac, gapu ta dida annuroten ti lintegmo. TZADDI. 137 Sica ti nalinteg, O APO, ken nalinteg dagiti panangocommo. 138 Dagiti pammanecnecmo nga imbilinmo isuda ti kinalinteg ken ti kinamatalec unay. 139 Ti ganetgetco rinunotnacon, gapu ta dagiti cabcabusorco linipatanda dagiti sasaom. 140 Ti saom pulos a nadalus: gapuna a toy adipenmo ay-ayatenna. 141 Bassitac ket maicuscuspilac: nupay casta diac lipaten dagiti pangngeddengmo. 142 Ti kinalintegmo ket agnanayon a kinalinteg, ket ti lintegmo isu ti pudno. 143 Da ducot ken sennaay kimpetda caniac: nupay casta dagiti bilbilinmo isuda dagiti pagragrag-oac. 144 Ti kinalinteg iti pammanecnecmo ket agnanayon: iccannac iti pannacaawat, ket agbiagacto. KOPH. 145 Immawagac iti isuamin a pusoc; denggennac cadi, O APO: salimetmetacto dagiti al-allagadem. 146 Immawagac kenca; isalacannac, ket annurotecto dagiti pammanecnecmo. 147 Inunaac ti bannawag ti agsapa, ket imkisac: nanginanamaac iti saom. 148 Sinacbayan dagitoy matac dagiti agbantay nga agpuyat, tapno imutectecac ti saom. 149 Denggem toy timecco cas mayalubog iti kinamanagayatmo: O APO, pagbiagennac cas mayalubog cadagiti pangngeddengmo. 150 Umadanida dagiti sumursurot iti kinadakes: adayoda iti lintegmo. 151 Sica asidegca, O APO; ket amin dagiti bilbilinmo kinapudno. 152 No maipapan cadagiti pammanecnecmo, naammoacon idi damo a binuangaymo ida nga agnanayon. RESH. 153 Imutectecam toy leddaangco, ket ispalennac: iyantangay diac lipatan ti lintegmo. 154 Salacnibam cadi ti panggepco, ket ispalennac: pagbiagennac cas mayalubog iti saom. 155 Ti pannacaisalacan adayo cadagiti nadangkes: ta dida biroken dagiti al-allagadem. 156 Dackel dagiti kinamanangngaasim, O APO: pagbiagennac cas mayalubog cadagiti pagbilinam. 157 Aduda dagiti mangidadanes caniac ken cabcabusorco; nupay casta diac simmiasi cadagiti pammanecnecmo. 158 Minatmatac dagiti nagulib, ket nasicoranac; gapu ta dida annuroten ti saom. 159 Utobem no casano ti panagayatco cadagiti bilbilinmo: pagbiagennac, O APO, cas mayalubog iti kinamanagayatmo. 160 Ti saom isu ti pudno nanipud idi damo: ket tunggal maysa cadagiti nalinteg a pagbilinam agtalinaed nga agnanayon. SCHIN. 161 Dagiti principe indadanesdac nga awan gapgapuna: ngem toy pusoc agtaeng a siraraem cadagiti saom. 162 Pagragrag-oac ti saom, a cas maysa a nacasarac iti dackel a sinamsam. 163 Guraec ket carimonco ti kinaulbod: ngem ti lintegmo ay-ayatec. 164 Maminpito iti inaldaw nga idaydayawca gapu cadagiti nalinteg a pagbilinam. 165 Dackel a talna ti adda cadagiti agayat iti lintegmo: ket awanto ti pacaitibcolanda. 166 APO, ninamnamac ti panangisalacanmo, ket tinungpalco dagiti bilbilinmo. 167 Toy cararruac sinalimetmetanna dagiti pammanecnecmo; ket ayatec ida iti napalaus unay. 168 Inannurotco dagiti bilinmo ken pammanecnecmo: ta amin dagiti daldalanco addada iti saclangmo. TAU. 169 Ti ickisco macaasideg coma kenca, O APO: iccannac iti pannacaawat cas mayalubog iti saom. 170 Ti dawatco macagteng cadi dita sangoanam: ispalennac cas mayalubog iti saom. 171 Dagiti bibbibigco agiyebcasda ti pammadayaw, intono maisurom caniac dagiti al-allagadem. 172 Toy dilac iyebcasnanto ti saom: ta amin dagiti bilbilinmo ket kinalintegda. 173 Ta imam sisasagana cadi a mangarayat caniac; ta pinilicon dagiti al-allagadem. 174 Sinegseggaac ti panangisalacanmo, O APO; ket ti lintegmo isu ti pagragrag-oac. 175 Agbiag coma toy cararruac, ket mangidaydayawto kenca; ken dagiti pagbilinam saranayendac coma. 176 Naiwawaac a cas carnero a nayaw-awan; birokem toy adipenmo; ta diac malipatan dagiti bilbilinmo. SALMO 120 Maysa a Canta nga nabingbingay. 1 Iti uneg ti pannacariribucco ket imkisac iti APO, ket isu nangegnac. 2 Ispalem toy cararruac, O APO, cadagiti naulbod a bibbibig, ken iti manangallilaw a dila. 3 Ania ti maitedto kenca? wenno ania ti maaramidto kenca, sica a manangiculbo nga dila? 4 Natadem nga panpana iti mannacabalin, agraman beggang ti enebro. 5 Asiac pay, ta sangsangailiac ditoy Mesech, ta agnaedac iti tengnga dagiti toltolda ti Kedar! 6 Toy cararruac nabayag a nakipagnaed iti manggura iti talna. 7 Siac cayatco ti talna: ngem no agsaoac, makigubatda. SALMO 121 Maysa a Canta nga nabingbingay. 1 Itangadconto dagiti matmatac cadagiti turturod, a sadiay iti paggapuanto ti tulongco. 2 Ti tulongco aggapu iti APO, a nangaramid iti langit ken daga. 3 Dinanto ituloc a maicaglis ta sacam: daydiay agaywan kenca ket saanto nga macaridep. 4 Adtoy, ti agaywan iti Israel saanto nga macaridep wenno macaturog. 5 Iti APO isu ti agaywan kenca: iti APO isu ti linongmo iti macanawan nga imam. 6 Ti init dinacanto cabilen iti aldaw, uray ti bulan iti rabii. 7 Iti APO saluadannacanto iti amin a dakes: igagananto ta cararruam. 8 Iti APO saluadannanto ti iruruarmo ken ti iseserrecmo manipud ita, ken agpapan iti agnanayon. SALMO 122 Maysa a Canta ni David nga nabingbingay. 1 Naragsacanac idi kinunada caniac, Intayon idiay balay iti APO. 2 Dagiti sacsacami agtacderda iti uneg dagiti ruruanganmo, O Jerusalem. 3 Ti Jerusalem ket nabangon a cas ili a sangsangcanayon a sangsangcamaysa: 4 Isu a pagsang-atan dagiti tribu, dagiti tribu iti APO, idiay ayan ti pammanecnec ken Israel, tapno agyamanda iti nagan iti APO. 5 Ta sadiay naisaad dagiti trontrono a pangocoman, dagiti trontrono ti balay ni David. 6 Agcararagcayo a maipaay iti talna ti Jerusalem: agrang-aydanto dagiti agayat kenca. 7 Maadda coma ti talna iti uneg dagiti bacbacudmo, ken kinarang-ay iti uneg dagiti palaciom. 8 Maigapu cadagiti cacabsatco ken cacadduac, cunaec ngarud itan, Talna coma iti maadda kenca. 9 Maipuon iti balay iti APO a Diosmi ket supulecto iti pagimbagam. SALMO 123 Maysa a Canta nga nabingbingay. 1 Kenca itangadco dagitoy matac, O sica nga agnanaed cadagiti langlangit. 2 Adtoy, cas panangsipsiput dagiti mata dagiti adipen iti ima ti apoda a lalaki, ken cas dagiti mata ti adipen a babai iti ima ni apona a babai; casta met dagiti matami ur-urayenda iti APO a Diosmi, agingga iti panangngaasina cadacami. 3 Caasiannacami, O APO, caasiannacami: ta napalalo unay ti pannacapunnomi iti pannacaab-abi. 4 Ti cararruami napalalo unay ti pannacapunnona iti panangrabrabac dagiti sinanam-ay, ken iti panangab-abi dagiti natangsit. SALMO 124 Maysa a Canta ni David nga nabingbingay. 1 No saan coma a iti APO ti nakicappon cadatayo, cunaen coma ti Israel ita; 2 No saan coma a iti APO ti nakicappon cadatayo, idi a dagiti tattao timmacderda a bumusor cadatayo: 3 Inalun-ondatayo coman a madaras, idi a ti gurada simged a maibusor cadatayo: 4 Idin dagiti dandanum linapunusdatayon, ti carayan naglasaten iti rabaw dagiti cararruatayo: 5 Idin dagiti napalangguad a dandanum naglasaten iti rabaw dagiti cararruatayo. 6 Bendito coma iti APO, isu a saan nga nangted cadatayo a cas tinucmaan cadagiti ngipngipenda. 7 Ti cararruatayo nacalapsut a cas billit cadagiti silo dagiti mannilo: ti silo nagsat, ket nacatalawtayo. 8 Ti tulongtayo adda iti nagan ti APO, isu a nangaramid iti langit ken daga. SALMO 125 Maysa a Canta nga nabingbingay. 1 Dagiti agcammatalec iti APO caslada la iti bantay Sion, a saan nga maiccat, ngem agtalinaed nga agnanayon. 2 Cas pananglicmut dagiti banbatay iti Jerusalem, casta met iti APO a mangliclicmut iti ilina manipud ita ken agpapan iti agnanayonen. 3 Ta ti sarucod ti kinadangkes dinto agdisso iti bingay dagiti nalinteg; di la ket ta dagiti nalinteg ket itanggayada dagiti im-imada iti kinadangkes. 4 Ipaaymo ti naimbag, O APO, cadacuada nga naimbag, ken dagiti sililinteg cadagiti puspusoda. 5 Ngem no cadagiti simmiasi a mapan cadagiti nakillo a dalanda, iti APO iturongnanto ida cadagiti agar-aramid iti kinadakes: ngem cappia maaddanto iti Israel. SALMO 126 Maysa a Canta nga nabingbingay. 1 Idi impulang manen iti APO dagidiay nacayawan iti Sion, casla cami la idi cadagiti nagtagtagainep. 2 Idin ti ngiwattayo napunno iti catcatawa, ken ti dila tayo iti panagcancanta: idi a casta nasaoda cadagiti nasnacion, iti APO inaramidna dagiti dadackel a banbanag cadacuada. 3 Iti APO inaramidna dagiti dadackel nga banbanag a maipaay cadatayo; gapuna nga agragsactayo. 4 Ipanawmo coma manen ti pannacacayawmi, O APO, a cas cadagiti carcarayan iti abagatan. 5 Dagiti agmula cadagiti lulua agapitdanto iti ragsac. 6 Ti mapan ket agsangsangit, nga agawit iti napateg a bin-i, awan duaduana nga agawidto a siraragsac, nga cacuyogna dagiti betbettecna. SALMO 127 Maysa a Canta ken ni Solomon nga nabingbingay. 1 No saan nga iti APO ti mangbangon iti balay, agbannogda a barengbareng dagiti mangbangon: no saan nga iti APO ti mangaywan iti ili, ti agbantay agpuyat ngem banbannogna laeng. 2 Banbannogmo ti agriing a masapa, ti uminana a maladaw, ti pannanganmo iti tinapay ti ladladingit: idinto nga isu itedna cadagiti ay-ayatenna iti turog. 3 Adtoy, dagiti annac ket isuda ti pagpatawid iti APO: ket ti bunga ti tian isu ti panggunggonana. 4 Cas cadagiti panpana iti ima ti maingel a lalaki; casta met dagiti annac nga agcabanuagan. 5 Nagasat ti tao a ti tagubanna napno cadacuada: saandanto a maibabain, ngem makisaodanto cadagiti cabcabusorda idiay ruangan. SALMO 128 Maysa a Canta nga nabingbingay. 1 Bendito ti tunggal maysa nga agbuteng iti APO; a magna cadagiti daldalanna. 2 Ta sica canemto ti pagbannogan dagiti im-imam: nabenditocanto, ket naimbagto la kenca. 3 Ti asawam caslanto la nargaayan nga uvas cadagiti sicsikigan iti balaymo: dagiti annacmo casladanto mulmula nga olivas a nailicmut iti lamisaanmo. 4 Adtoy, castanto ti tao a nabenditoan nga agbuteng iti APO. 5 Iti APO bendicionannacanto manipud Sion: ket makitamto ti imbag ti Jerusalem iti amin nga al-aldaw ti biagmo. 6 Wen, makitamto dagiti annac dagiti annacmo, ken talna iti Israel. SALMO 129 Maysa a Canta nga nabingbingay. 1 Namin-adu a pinarparigatdac nanipud kinaubingco, cunaen coma ti Israel itan: 2 Namin-adu a pinarparigatdac nanipud kinaubingco: nupay casta saanda nga nagballigi caniac. 3 Dagiti agar-arado inaradoda toy bucotco: isuda ket inyatiddugda dagiti gulgulisda. 4 Iti APO nalinteg: ginupedna dagiti pangreppet dagiti nadangkes. 5 Mabainanda ken mapasanudda coma amin dagiti gumura iti Sion. 6 Caslada coma root cadagiti tuctoc ti balay, a malaylay iti sacbay ti itutubona: 7 Apay nga ti agani dina mapunno ti imana; wenno ti agreppet iti binettec iti saclotna. 8 Di met cunaen dagiti lumabas, Ti bendicion iti APO maadda coma kenca: dacami bendicionandaca iti nagan iti APO. SALMO 130 Maysa a Canta nga nabingbingay. 1 Nanipud cadagiti yuyeng imkisac kenca, O APO. 2 Apo, denggem toy timecco: siimdeng coma dagita lapayagmo itoy timec dagitoy panagdawdawatco. 3 No sica, APO, tandaanam coma dagiti kinadangkes, O Apo, siasino coma ti macapagtacder? 4 Ngem adda kenca ti pammacawan, tapno mapagbutnganca coma. 5 Paturayco iti APO, toy cararruac agpannuray, ket iti saona manginanamaac. 6 Toy cararruac segseggaanna ti Apo a nacarcaro pay ngem dagiti agur-uray iti ibibigatna: cunaec, nacarcaro pay ngem dagiti agur-uray iti ibibigatna. 7 Manginanama coma ti Israel iti APO: ta iti APO adda asi, ket kencuana adda nabuslon a pannubbot. 8 Ket isu subbotennanto ti Israel cadagiti amin a kinadangkesna. SALMO 131 Maysa a Canta ni David nga nabingbingay. 1 APO, ti pusoc saan a natangsit, wenno dagiti matac nacuspag: diac met agasak cadagiti dadackel a banbanag, wenno dagiti banbanag a nangato la unay caniac. 2 Pudno a nagulimecac ken nagtalnaac, cas ubing a napusot ken inana: toy carraruac ket cas pay met tay napusot nga ubing. 3 Ti Israel ket manginanama coma iti APO manipud ita ken agpapan iti agnanayonen. SALMO 132 Maysa a Canta nga nabingbingay. 1 APO, lagipem ni David, ken iti amin a leddaangna: 2 No casano iti panagsapatana iti APO, ken panagcarina iti mannacabalin a Dios ni Jacob; 3 Pudno a diacto sumrec iti tabernaculo ti balayco, wenno mapan iti pagiddaac; 4 Diacto paturogen dagiti matac, wenno pagridepen dagiti calub ti matac, 5 Agingga iti macasaracac ti maysa a disso a maipaay iti APO, a pagnaedan ti mannacabalin a Dios ni Jacob. 6 Adtoy, nangngeganmi idiay Efrata: nasaracanmi idiay tay-ac ti kabakiran. 7 Mapancaminto cadagiti tabtabernaculona; ket agdaydayawcaminto iti sacaananna. 8 Tumacderca, O APO, dita ayan a pagin-inanaam; sica, ken ti lacasa ti kinabilegmo. 9 Dagiti papadim macawesanda coma iti kinalinteg; ket dagiti sasantom agdir-ida coma iti ragsac. 10 Maipuon ken ni adipenmo a David dica cadi itallicud iti rupa ti pinulotam. 11 Iti APO nagsapata iti kinapudno ken David; saannanto nga pagtallicudan; Iti bunga ti bagim siac isaadconto iti tronom. 12 No dagiti annacmo salimetmetandanto ti tulagco ken ti pammanecnecco nga isurocto cadacuada, dagiti annacda agtugawdanto met ita tronom iti agnanayon. 13 Ta iti APO pinilina ti Sion; kinalicagumanna nga pagnaedanna. 14 Daytoy ti paginanaac nga agnanayon: ditoy ti pagnaedacto; ta isu ti kinalicagumac. 15 Bendicionacto a sibubuslon ti taraonna: pennekecto dagiti napanglawna iti tinapay. 16 Cawesacto met dagiti papadina iti pannacaisalacan: ken dagiti sasantona agdir-idanto a napigsa iti ragsac. 17 Sadiay ti sara ni David pagsaringitecto: dinutocac ti maysa a pagsilawan iti pinulotac. 18 Dagiti cabusorna cawesacto iti pannacaibabain: ngem kencuana ti balangatna agrangpayanto. SALMO 133 Maysa a Canta ni David nga nabingbingay. 1 Kitaenyo, nagimbagen ken anian a nacaay-ayo ti panagtitimpuyog dagiti agcacabsat iti panagmaymaysa! 2 Casla la ti napateg a lana iti ulo, nga nagayus iti iming, uray pay iti iming ni Aaron: a nagpababa agingga iti baraybay dagiti cawcawesna; 3 Cas iti linnaaw sadi Hermon, ken cas iti linnaaw a bumaba cadagiti banbantay ti Sion: ta sadiay ket ti APO binilinna ti bendicion, uray pay iti biag nga agnanayon. SALMO 134 Maysa a Canta nga nabingbingay. 1 Matmatanyo, benditoenyo iti APO, dacayo amin nga ad-adipen iti APO, nga iti rabii agtaengcayo iti balay iti APO. 2 Itag-ayyo dagiti im-imayo iti santuario, ket benditoenyo iti APO. 3 Ti APO a nangaramid iti langit ken daga bendicionannaca coma manipud Sion. SALMO 135 1 Idaydayawyo ti APO. Idaydayawyo ti nagan iti APO; idaydayawyo, O dacayo nga ad-adipen iti APO. 2 Dacayo nga aggigian iti balay iti APO, cadagiti parparaangan ti balay ti Diostayo, 3 Idaydayawyo ti APO; ta ti APO naimbag: cantaenyo dagiti panangidaydayaw iti naganna; ta nacaay-ayo. 4 Ta iti APO pinilina ni Jacob a maipaay kencuana, ken Israel nga naisupsupadi a gamengna. 5 Ta ammoc a ti APO dackel, ken ti Apotayo ket isu iti cangatoan ngem cadagiti isuamin nga didiosen. 6 Aniaman a nagayatan iti APO, dayta ti inaramidna sadi langit, ken ditoy daga, cadagiti baybay, ken cadagiti amin a caungan nga disdisso. 7 Ipangatona ti alingasaw manipud cadagiti pungto toy daga; isu a mamagkimat a maipaay ti tudo; isu a mangparuar iti angin cadagiti pagiduldulinanna. 8 Isu a nangpatay iti inauna nga annac sadi Egipto, tao man wenno animal agpadpada. 9 Isu a nangibaon cadagiti pagilaslasinan ken datdatlag iti tengngam, O Egipto, ken Faraon, ken cadagiti amin nga ad-adipenna. 10 Isu a nangcabil cadagiti dadackel a nasnacion, ken namapatay cadagiti nabileg nga ar-ari; 11 Ni Sehon nga ari dagiti Amorreo, ken ni Og nga ari ti Basan, ken amin a pagpagarian sadi Canaan: 12 Ket intedna ti dagada nga impatawid, tinawid ti Israel nga ilina. 13 Ti naganmo, O APO, agtalinaed iti agnanayon; ti pacalaglagipam, O APO, cadagiti amin a capcaputotan. 14 Ta ti APO ocomennanto ti ilina, ket pagbabawiannanto maipuon cadagiti ad-adipenna. 15 Dagiti didiosen dagiti nasnacion piracda ken balitocda, ti aramid dagiti im-ima dagiti tattao. 16 Adda ngiwngiwatda, ngem dida agsao; adda matmatada, ngem dida macakita; 17 Adda laplapayagda, ngem dida macangngeg; awan met a pulos ti panaganges cadagiti ngiwngiwatda. 18 Dagiti mangaramid cadacuada umaspingdanto met cadacuada: casta met iti tunggal maysa nga agcammatalec cadacuada. 19 Benditoenyo iti APO, O balay ni Israel: benditoenyo iti APO, O balay ni Aaron: 20 Benditoenyo iti APO, O balay ni Levi: dacayo nga agbuteng iti APO, benditoenyo iti APO. 21 Bendito coma iti APO manipud Sion, isu nga agnaed sadi Jerusalem. Idaydayawyo ti APO. SALMO 136 1 O pagyamananyo iti APO; ta isu naimbag: ta ti kinamanangaasina agtalinaed iti agnanayon. 2 O pagyamananyo ti Dios dagiti didios: ta ti kinamanangaasina agtalinaed iti agnanayon. 3 O pagyamananyo ti Apo dagiti ap-appo: ta ti kinamanangaasina agtalinaed iti agnanayon. 4 Isu a cacaisuna nga agaramid cadagiti dadackel a datdatlag: ta ti kinamanangaasina agpaut iti agnanayon. 5 Isu a ti kinasirib inaramidna dagiti langlangit: ta ti kinamanangaasina agtalinaed iti agnanayon. 6 Isu a nangibistrad iti daga iti ngato dagiti dandanum: ta ti kinamanangaasina agtalinaed iti agnanayon. 7 Isu a nangaramid cadagiti dadackel a silsilaw: ta ti kinamanangaasina agtalinaed iti agnanayon: 8 Ti init nga agturay iti aldaw: ta ti kinamanangaasina agtalinaed iti agnanayon: 9 Ti bulan ken bitbituen nga agturay iti rabii: ta ti kinamanangaasina agtalinaed iti agnanayon. 10 Isu a nangdidigra iti Egipto cadagiti annacda nga inauna: ta ti kinamanangaasina agpaut iti agnanayon: 11 Ken nangaon iti Israel cadacuada: ta ti kinamanangaasina agtalinaed iti agnanayon: 12 Babaen ti nabileg nga ima, ken naiyunnat a tackiagna: ta ti kinamanangaasina agpaut iti agnanayon. 13 Isu a namagsina iti Nalabbaga a baybay: ta ti kinamanangaasina agtalinaed iti agnanayon: 14 Ken nangpalasat iti Israel iti tengngana: ta ti kinamanangaasina agtalinaed iti agnanayon: 15 Ngem impadsona ni Faraon ken ti buyotna idiay Nalabbaga a baybay: ta ti kinamanangaasina agtalinaed iti agnanayon. 16 Isu a nangilasat iti ilina iti let-ang: ta ti kinamanangaasina agtalinaed iti agnanayon. 17 Isu a nangdidigra cadagiti dadackel nga ar-ari: ta ti kinamanangaasina agtalinaed iti agnanayon: 18 Ken namapatay cadagiti agdindinamag nga ar-ari: ta ti kinamanangaasina agtalinaed iti agnanayon: 19 Ni Sihon nga ari dagiti Amorreos: ta ti kinamanangaasina agtalinaed iti agnanayon: 20 Ken ni Og nga ari ti Basan: ta ti kinamanangaasina agtalinaed iti agnanayon: 21 Ket intedna nga impatawid ti dagada: ta ti kinamanangaasina agtalinaed iti agnanayon: 22 Uray pay maysa a tawiden ni Israel nga adipenna: ta ti kinamanangaasina agtalinaed iti agnanayon. 23 Daydiay nanglagip cadatayo iti daydi casasaadtayo a nababa; ta ti kinamanangaasina agpaut iti agnanayon: 24 Ken nangispal cadatayo cadagiti cabcabusortayo: ta ti kinamanangaasina agtalinaed iti agnanayon. 25 Daydiay mangted iti taraon iti amin a lasag: ta ti kinamanangaasina agtalinaed iti agnanayon. 26 O pagyamananyo ti Dios iti langit: ta ti kinamanangaasina agtalinaed iti agnanayon. SALMO 137 1 Iti denna dagiti carcarayan sadi Babilonia, sadiay nagtugtugawcami, wen, nagsangsangitcami, no malagipmi idi ti Sion. 2 Inbitinmi dagiti ar-arpami iti tengnga dagiti caycayo a carawawi. 3 Ta idiay dagiti nangcayaw cadacami nagdawatda nga agcantacami; ket dagiti namarigat cadacami nagdawatda nga agragsaccami, kunada, Icantaandacami man iti maysa cadagiti cancanta ti Sion. 4 Casano ti panangcantaminto iti canta iti APO iti maysa a gangannaet a daga? 5 No lipatenca coma, O Jerusalem, malipatan coma toy macanawan nga imac ti kinalaingna. 6 No saanca coma a malagip, toy dilac cumpet coma iti ngadas toy ngiwatco; no diac coma ipatpateg ti Jerusalem ngem iti cangronaan a ragsacco. 7 Laglagipem, O APO, dagiti annac ti Edom ti aldaw ti Jerusalem; isuda a nagcuna, Duprakenyo, duprakenyo, uray pay aginggana iti pamuonna. 8 O anac a babai ti Babilonia, a maracracto; naragsacto ti mangsupapac kenca, a manggungona kenca a cas iti impaaymo cadacami. 9 Naragsacto isuna, ti mangala ken mangibarsac cadagiti maladagam cadagiti cabatoan. SALMO 138 Maysa a Salmo ni David. 1 Idaydayawcanto iti isuamin a pusoc: iti saclang dagiti didiosen icantacto dagiti panangidaydayaw kenca. 2 Agrucbabacto nga agturong iti nasantoan a templom, ken idaydayawconto ita naganmo gapu iti kinamanagayatmo ken kinapudnom: ta sica intantan-ocmo ti saom a nangatngato ngem ti amin a naganmo. 3 Iti aldaw a panangawagco sica sinungbatannac, ken pinapigsanac iti pigsa itoy cararruac. 4 Amin dagiti ar-ari ditoy daga agdaydayawdanto kenca, O APO, idi nangegda dagiti sasao ta ngiwatmo. 5 Wen, icantadanto dagiti daldalan iti APO: ta dackel unay ti dayag iti APO. 6 Ta nupay ti APO nangato, adda pay la panangpadayawna iti napacumbaba: ngem ti napalangguad mabigbigna manipud iti nacaad-adayo. 7 Nupay magnaac iti tengnga ti riribuc, sica pagbiagennacto: iyunnatmonto dayta imam a mangsallin iti gura dagiti cabcabusorco, ket ta macanawan nga imam isalacannacto. 8 Iti APO an-anayennanto daydiay maipapan caniac: ti kinamanangaasim, O APO, agpaut iti agnanayon: dica baybay-an dagiti ar-aramid dagiti im-imam met laeng. SALMO 139 Agpaay ti cangronaan a Tomotokar, Maysa a Salmo ni David. 1 O APO, sica sinukimatnac, ket naammoannac. 2 Ammom ti itutugawco ken itatacderco, sica maawatamon dagiti panunotco nga adayo pay laeng. 3 Linawlawmo ti dan-ac ken panagiddac, ket pagaammom unay amin dagiti daldalanco. 4 Ta awan pay ti sao ditoy dilac, ngem, adtoy, O APO, ammomon amin. 5 Sica linawlawnac iti licudan man ken sangoanan, ket imparabawmo ta imam caniac. 6 Ti casta nga pannacaammo ket nacacascasdaaw unay caniac; nacangatngato, ken diac magaw-at. 7 Sadino ngata ti papanac a maipanaw ita espiritum? wenno sadino ti pagtalawac ita sangoanam? 8 No umuliac sadi langit, addaca sadiay: no aramidec ti pagiddaac idiay impierno, adtoy, addaca sadiay. 9 No alaec dagiti payac ni bannawag, ket agnaedac cadagiti capungpungtoan a paset iti baybay; 10 Uray idiay ta imam iturongnacto, ket ta macanawan nga imam tenglennacto. 11 No kunak, Awan duadua ni sipnget calubannacto; uray pay ti rabii ket agbalinto a lawag caniac. 12 Wen, ni sipnget saan a macalinged kenca; ngem ti rabii agraniag ketdi a cas aldaw: da sipnget ken lawag agpadpadada kenca. 13 Ta sica ti nangbukel cadagiti nagunegco: sica ti nangbungon caniac idiay aanacan ni inac. 14 Idaydayawcanto; ta nacaam-amac ken nacascasdaaw ti pannacaaramidco: nacascasdaaw dagiti ar-aramidmo; ket dayta toy cararruac am-ammona unay. 15 Dagiti langlangac saan a nailinged kenca, idi nabukelac a sililimed, ket naaramidac a naisangayan cadagiti caungan nga paspaset toy daga. 16 Dagiti matam nakitada dagiti langlangac, numan pay dipay nabukel; ket ita librom dagiti camcamengco naisuratda aminen, isuda a nagtultuloy a nabukbulel, idinto nga cas awan pay uray maysa cadacuada idi. 17 Anian a nagpategda met dagiti pampanunotmo caniac, O Dios! anian a nagdackel ti pacadagupanda! 18 No bilangec coma ida, ad-adu ti bilangda ngem ti darat: no agriingac, addaac pay la kenca. 19 Pudno a papatayemto dagiti nadangkes, O Dios: pumanawcayo ngarud caniac, dacayo tattao a mawaw iti dara. 20 Ta agsaoda a sidadangkes iti maibusor kenca, ket dagiti cabcabusormo aramatenda a barengbareng ti naganmo. 21 Saanco aya a guraen ida, O APO, dagiti gumura kenca? ken saanco aya a paglidayan dagiti tumacder a sibubusor kenca? 22 Guraec ida iti naan-anay a gura: ibilangco ida nga cabcabusorco. 23 Usigennac, O Dios, ken ammoem toy pusoc: padasennac, ket ammoem dagiti pampanunotco: 24 Ket kitaem no adda kinadangkes a dalan caniac, ket iturongnac iti dalan iti kinaagnanayon. SALMO 140 Agpaay ti cangronaan a Tomotokar, Maysa a Salmo ni David. 1 Ispalennac, O APO, manipud iti dakes a tao: salacnibannac iti naranggas a tao; 2 Dagiti agpanagem cadagiti rangranggas iti pusoda; cancanayon nga agtitiponda iti pannakigubat. 3 Pinatiradda ti dilada a cas iti uleg; ti gita ti carasaen adda iti babaen dagiti bibbibigda. Selah. 4 Saluadannac, O APO, cadagiti im-ima dagiti nadangkes; salacnibannac iti naranggas a tao; isuda a nangisicat a mangipadso dagiti ad-addangco. 5 Dagiti natangsit nangipacatda iti pangsilo caniac, ken batbateng; nangibistradda iti iket iti igid ti dalan; nagicabilda cadagiti palpalab-og caniac. Selah. 6 Kinunac iti APO, Sica ti Diosco: allingagem ti timec dagiti ar-ararawco, O APO. 7 O DIOS nga Apo, ti bileg ti pannacaisalacanco, sica inabbongam toy uloc idi aldaw iti pannakigubat. 8 Dica cadi itden, O APO, dagiti tarigagay ti nadangkes: dica ituloc nga agpatuloy pay iti dakes a panagemna; di la ket ta agpalangguadda. Selah. 9 No maipanggep iti ulo dagiti manglacub caniac, ti ranggas dagiti bibbibigda met laeng isu cadi ti mangtaccab cadacuada. 10 Dagiti bumarbara a begbeggang agdisso coma cadacuada: maitappuacda cadi iti apuy; cadagiti nauneg nga ab-abut, tapno didanto lumung-aw manen. 11 Ti dakes nga mannanao saanmo coma a pagtalinaeden ditoy daga: ti dakes anupennanto ti nauyong a tao tapno padsoenna. 12 Ammoc a iti APO igagananto ti calintegan dagiti maparparigatan, ken ti kinajusticia cadagiti napanglaw. 13 Kinapudnona ti nalinteg agyamanto ita naganmo: ti nalinteg agnaedto dita saclangmo. SALMO 141 Maysa a Salmo ni David. 1 APO, immawagac kenca: darasem cadi ti umay caniac; denggem cadi ti timecco, no umawagac kenca. 2 Ti cararagco agtarus cadi dita sangoanam a cas incienso; ken ti panangitanggayac cadagitoy im-imac cas daton ti mumalem. 3 Mangicabilca iti agbantay, O APO, iti sangoanan toy ngiwatco; saluadam ti ruangan dagiti bibigco. 4 Dica iturong toy pusoc iti uray ania a dakes nga banag, nga agaramid dagiti nadangkes nga ar-aramid: ket diac coma makipangan cadagiti cancanenda. 5 Ti nalinteg cabilennac coma; isunto ti maysa a panagayat: ken babalawennac coma; isunto ti nadaeg a lana, ket saanna nga dunoren ti uloc: ta uray pay dagiti cararagco addanto cadagiti pacadidigraanda. 6 Idi nga dagiti oc-ocomda naibarsacda cadagiti cabatoan nga disdisso, mangegdanto dagiti sasaoc; ta nasam-itda. 7 Dagiti tultulangtayo nawarawarada iti ngiwat ni tanem, a casla no ti maysa agpucan ken agurnong ti cayo iti daga. 8 Ta dagiti matac agturongda kenca, O DIOS nga Apo: kenca iti camangco; dica baybay-an toy cararruac nga agmaymaysa. 9 Saluadannac iti silo nga impacatda caniac, ken cadagiti palpalab-og dagiti agar-aramid iti kinadakes. 10 Mailab-og coma dagiti nadangkes cadagiti batbatengda met laeng, iti casta siac macalapsutac. SALMO 142 Maschil ni David; Maysa a Cararag idi adda idiay uneg ti rukib. 1 Inyickisco iti APO toy timecco; itoy timecco iti APO inaramidco ti panag-ararawco. 2 Ibucbucco ti asugco iti saclangna; inparangco iti saclangna ti pagsicorac. 3 Idi a toy cararruac naidalit itoy unegco, sica ammom idi ti dan-ac. Iti dalan a pagpagnaac nangipacatda iti nailemmeng nga pangsilo caniac. 4 Miningmingac toy imac a macanawan, ket nakitac, ta awan tao a macabigbig caniac: naawananac iti pagcamangan; awan tao a nangitaltalec itoy cararruac. 5 Imkisac kenca, O APO: kinunac, Sica ti camangco ken apagco ditoy daga dagiti sibibiag. 6 Imdengam toy ickisco; ta naimegmegac unay: ispalennac cadi cadagiti mangidadanes caniac; ta napigpigsada ngem siac. 7 Aonem toy cararruac iti pagbaludan, tapno maidaydayawco ta naganmo: dagiti nalinteg lawlawendacto; ta sipaparaburcanto caniac. SALMO 143 Maysa a Salmo ni David 1 Denggem ti cararagco, O APO, allingagem dagiti ar-ararawco: ita kinamatalecmo sungbatannac, ken ita kinalintegmo. 2 Ket dica cadi ocomen toy adipenmo: ta ita imatangmo ket awanto ti tao nga sibibiag a mapalinteg. 3 Ta ti cabusor indadanesna daytoy cararruac; dinunorna daytoy biagco nga impadaga; pinagnaednac cadagiti ayan a nasipnget, a cas cadagiti nabayagen a natay. 4 Gapuna a toy espirituc naidalit itoy unegco; ti pusoc itoy unegco ket aglangalang. 5 Malagipco dagiti aldaw idi ugma; pampanunotec amin dagiti ar-aramidmo; is-isipec ti aramid dagiti im-imam. 6 Itayac dagiti daculapco kenca: toy cararruac mawaw kenca, a cas naticag nga daga. Selah. 7 Denggennac cadi a madaras, O APO: toy espirituc agcapsut: dica ilinged ta rupam caniac, di la ket ta agbalinac a cas cadagiti agpababa iti abut. 8 Ipangngegmo caniac ti kinamanagayatmo iti bigat; ta sica ti pagtalcac: ipacaammom caniac ti dalan a rebbengco coma a pagnaan; ta itanggayac toy cararruac kenca. 9 Ispalennac, O APO, cadagiti cabcabusorco: tumarayac nga umay kenca tapno aglemmengac. 10 Isuronac a mangtungpal ita pagayatam; ta sica ti Diosco: ti espiritum naimbag; idalannac iti daga ti kinalinteg. 11 Pagbiagennac, O APO, maipuon ita naganmo: gapu ita kinalintegmo aonem toy cararruac iti pagsicoran. 12 Ket ita kinamanangaasim pucawem dagiti cabcabusorco, ket dadaelem amin dagiti mamarigat itoy cararruac: ta siac ti adipenmo. SALMO 144 Maysa a Salmo ni David. 1 Bendito iti APO a pigsac, isu a mangisuro cadagitoy imac a makigubat, ken cadagiti ramramayco a makibacal: 2 Kinaimbagco, ken pagsalindegac; natayag a baluartec, ken mangispal caniac; calasagco, ken isu a pagcamangac; isu a mangparucma iti ilic iti babaec. 3 APO, ania cadi iti tao, nga isu bigbigbigem? wenno ti anac ti tao, nga isu ket ibilbilangmo? 4 Ti tao maipadpad iti kinaubbaw: dagiti al-aldawna arigda la maysa nga aniniwan nga agpucaw. 5 Pagrucobem dagiti langlangitmo, O APO, ket agpababaca: sagidem dagiti banbantay, ket agasucdanto. 6 Iwagsacmo dagiti kimkimat, ket iwarasmo ida: ibiatmo dagiti panpanam, ket dadaelem ida. 7 Iyunnatmo ta imam manipud ngato; ilapsutnac, ket ispalennac cadagiti dadackel a dandanum, iti ima dagiti gangannaet nga ub-ubbing; 8 A ti ngiwatda agsao iti kinaubbaw, ken ti macanawan nga imada ket ima a macanawan ti kinaulbod. 9 Mangcantaacto iti baro a canta kenca, O APO: madanggayan ti salterio ken instrumento a sangapulo dagiti cuerdasna agcantaacto cadagiti panangidaydayaw kenca. 10 Sica daydiay mangted iti pannacaisalacan cadagiti ar-ari: a nangilisi ken David nga adipenna iti naranggas a campilan. 11 Ilapsutnac, ket ispalennac iti ima dagiti gangannaet nga ub-ubbing, a ti ngiwatda agsao iti kinaubbaw, ken ti macanawan nga imada ket ima a macanawan ti kinaulbod: 12 Tapno dagiti annacmi a lallaki casladanto mulmula a nacadackelen iti kinabumarito da; ket dagiti annacmi a babbai casladanto pasuli nga batbato, a napasileng a cas capadpada iti maysa nga palacio: 13 Tapno dagiti camalig mi mapno coma, a maipaaydan ti aniaman a kita ti penpen: tapno dagiti carnero mi agpasngayda ti rinibribu ken pinullo a ribribu cadagiti lanlansanganmi: 14 Tapno dagiti bacbaca mi napigsada nga agtrabaho; tapno awanen ti isasari, ken itatacyas; tapno awanen ti agagal cadagiti calcalsadatayo: 15 Bendito dayta nga umili, a castoy ti casasaadna: wen, bendito dayta nga umili, a ti Diosna isu iti APO. SALMO 145 Salmo iti panagdaydayaw ni David . 1 Itandudocanto, Diosco, O ari; ket benditoecto ti naganmo iti agnanayon ken agnanayon. 2 Tunggal aldaw benditoencanto; ket idaydayawconto ti naganmo iti agnanayon ken agnanayon. 3 Dackel iti APO, ken naindaclan unay nga maidaydayaw; ket ti kinadackelna saan a matucod. 4 Ti maysa a caputotan ipadpadayawnanto dagiti ar-aramidmo iti sabali, ket sarsaritaennanto dagiti mannacabalin nga ar-aramidmo. 5 Saoecto ti nagloriaan a dayaw ti kinadaegmo, ken dagiti nacascasdaaw nga ar-aramidmo. 6 Ket dagiti tattao sasaoendanto ti bileg dagiti nacaam-amac nga inar-aramidmo: ket saritaecto ti kinadackelmo. 7 Nabuslonto iti pangiyesngawda ti pacalaglagipan iti dackel nga kinaimbagmo, ken icantadanto ti kinalintegmo. 8 Iti APO managparabur, ken napnoan iti kinaayat; nabannayat nga agpungtot, ken dackel ti asina. 9 Ti APO naimbag cadagiti isuamin: ket dagiti nadungngo nga caasina adda cadagiti amin nga ar-aramidna. 10 Amin dagiti ar-aramidmo idaydayawdacanto, O APO; ket dagiti sasantom benditoendacanto. 11 Sasaoendanto ti kinadayag ti pagariam, ken sarsaritaendanto ti pannacabalinmo; 12 Tapno ipacaammoda cadagiti annac dagiti tattao dagiti nabileg nga ar-aramidna, ken ti dayag ti nadaeg a pagarianna. 13 Ti pagariam ket agnanayon a pagarian, ti panagturaymo mataginayon cadagiti amin a caputotan. 14 Iti APO saranayenna amin a matuang, ken batakenna amin dagiti maparucob. 15 Dagiti matmata dagiti isuamin agur-urayda kenca; ket itdem cadacuada ti taraonda iti maitutop a tiempona. 16 Inyuccradmo ta imam, ket pinnennecmo ti tarigagay ti tunggal maysa nga nabiag. 17 Ti APO nalinteg cadagiti amin a daldalanna, ken santo cadagiti amin nga ar-aramidna. 18 Ti APO asideg cadagiti amin nga umawag kencuana, cadagiti amin nga umawag kencuana iti kinapudno. 19 Tungpalennanto ti tarigagay dagiti agbuteng kencuana: denggennanto met ti ickisda, ket isalacannanto ida. 20 Iti APO salacnibanna amin dagiti agayat kencuana: ngem amin dagiti nadangkes dadaelennanto ida. 21 Ti ngiwatco agsaonto iti panangidaydayaw iti APO: ket amin a lasag benditoenna coma ti nasantoan a naganna iti agnanayon awan patinggana. SALMO 146 1 Idaydayawyo ti APO. Idaydayawmo ti APO, O cararruac. 2 Bayat ti panagbiagco idaydayawconto iti APO: cantaacto dagiti panangidaydayaw ti Diosco bayat ti kinaaddac. 3 Dica agcammatalec cadagiti pipprincipe, wenno iti anac ti tao, a kencuana awan ti tulong. 4 Ti angesna agpucaw, isu agsubli iti dagana; iti dayta met la nga aldaw dagiti panpanunotna mapucawda. 5 Bendito daydiay adda kencuana ti Dios ni Jacob a badangna, a ti inanamana adda iti APO a Diosna: 6 Isu a nangaramid iti langit, ken daga, ti baybay, ken amin nga adda cadacuada: isu a mangsalimetmet iti kinapudno nga agnanayon: 7 Isu a mangaramid iti kinajusticia cadagiti mailupitlupit: isu a mangted iti taraon cadagiti mabisin. Ti APO luc-atanna dagiti nacabalud: 8 Ti APO lucatanna dagiti mata dagiti bulsec: ti APO batakenna dagiti maparucob: iti APO ayatenna dagiti nalinteg: 9 Ti APO salacnibanna dagiti sangsangaili; saranayenna dagiti ul-ulila ken balo: ngem ti dalan dagiti nadangkes balibalictadenna. 10 Ti APO agarinto iti agnanayon, uray iti Diosmo, O Sion, iti isuamin a capcaputotan. Idaydayawyo ti APO. SALMO 147 1 Idaydayawyo ti APO: ta nasayaat ti panagcanta cadagiti panangidaydayaw iti Diostayo; ta nacaay-ayo; ket naimnas ti panangidaydayaw. 2 Ti APO bangonenna ti Jerusalem: pagtitiponenna a maymaysa dagiti naipanaw iti Israel. 3 Agasanna dagiti nadunor iti pusoda, ket bedbedanna dagiti sugsugatda. 4 Bilangenna ti dagup dagiti bitbituen; awaganna amin ida cadagiti nagnaganda. 5 Dackel iti Apotayo, ken napigsa iti pannacabalinna: iti pannacaawatna ket awan nga pulos iti panungpalanna. 6 Ti APO itag-ayna dagiti naemma: ipadsona dagiti nadangkes iti daga. 7 Cantaanyo ti APO iti panagyaman; cantaanyo cadagiti panangidaydayaw a maarpaan ti Diostayo: 8 Isu a mangcumot cadagiti langlangit cadagiti ul-ulep, isu a mangisagana iti tudo a maipaay toy daga, isu a mamagtubo iti root cadagiti banbantay. 9 Itedna cadagiti an-animal ti taraonna, ken cadagiti urbon a wac nga umarakiac. 10 Saanna a pagray-oan ti pigsa ti cabalyo: saanna a pacaay-ayoan dagiti gurgurong ti tao. 11 Ti APO maay-ayo cadagiti agbuteng kencuana, cadagiti mangnamnama iti kinamanangaasina. 12 Idaydayawmo iti APO, O Jerusalem; idaydayawmo ti Diosmo, O Sion. 13 Ta pinalagdana dagiti balunet dagiti ruruanganmo; binendicionanna dagiti annacmo dita unegmo. 14 Patalnaenna iti uneg dagiti bedbeddengmo, ken pusekennaca iti cababagasan a trigo. 15 Inbaonna ti bilinna ditoy rabaw ti daga: ti saona agtaray a sipapardas. 16 Mangted iti nieve a casla napudaw a delana: mangiwarakiwac iti nagbalay a linaaw a cas dapu. 17 Mangipalladaw iti hielo a casla cadagiti murcat: siasino ti macaibtur iti lam-ecna? 18 Iyesngawna ti saona, ket runawenna ida: pagpul-oyenna ti anginna, ket dagiti dandanum agayusda. 19 Iparangarangna ti saona ken Jacob, dagiti al-allagadenna ken pangngeddengna iti Israel. 20 Saan a nagaramid iti casta iti siasinoman a sabali a nacion: ket no maipanggep cadagiti pangngeddengna, dida naammoan ida. Idaydayawyo ti APO. SALMO 148 1 Idaydayawyo iti APO. Idaydayawyo iti APO manipud cadagiti langlangit: idaydayawyo cadagiti cangatoan. 2 Idaydayawyo isuna, dacayo amin nga angelna: idaydayawyo isuna, dacayo amin a buybuyotna. 3 Idaydayawyo isuna, init ken bulan: idaydayawyo isuna, dacayo amin a bituen nga agsilnag. 4 Idaydayawyo isuna, dacayo langlangit dagiti langlangit, ken dacayo a dandanum nga adda iti ngatoen dagiti langlangit. 5 Idaydayawda coma ti nagan iti APO: ta isu nagbilin, ket naparsuada. 6 Isu ket impasdecna met ida nga agnanayon nga awan iti patinggana: isu nangaramid iti linteg a saanto a mapucaw. 7 Idaydayawyo ti APO manipud iti daga, dacayo nga leviatan, ken isuamin nga yuyeng: 8 Apuy, ken uraro; nieve, ken alingasaw; baggio nga angin nga mangtungpal iti saona: 9 Banbantay, ken isuamin nga turturod; nabunga a caycayo, ken isuamin nga cedcedro: 10 An-animal nga atap, ken amin nga naamo; aguy-uyas nga parparsua, ken agtaytayab a bilbillit: 11 Ar-ari ditoy daga, ken amin nga tattao; pipprincipe, ken amin nga oc-ocom ditoy daga: 12 Babbaro man, ken babbalasang agpadpada; lallacay, ken ub-ubbing: 13 Idaydayawda coma ti nagan iti APO: ta ti naganna laeng ti natan-oc; ti dayagna naringringbaw ngem ti daga ken iti langit. 14 Isu ket itan-ocna met ti sara ti ilina, ti panangidaydayaw dagiti amin a sasantona; ken dagiti pay annac ti Israel, maysa nga umili nga asideg kencuana. Idaydayawyo ti APO. SALMO 149 1 Idaydayawyo ti APO. Cantaanyo ti APO iti baro a canta, ken iti pannacaidaydayawna iti gimong dagiti sasanto. 2 Pagrag-oan coma ti Israel ti nangaramid kencuana: siraragsac coma dagiti annac ti Sion iti Arida. 3 Idaydayawda coma ti naganna iti panagsala: cantaenda coma kencuana dagiti panangidaydayaw babaen iti pandareta ken arpa. 4 Ta iti APO pagay-ayatanna ti ilina: papintasennanto ti naemma babaen iti pannacaisalacan. 5 Dagiti sasanto agrag-odanto coma iti kinadayag: agcantada coma iti natbag cadagiti pagiddaanda. 6 Dagiti natan-oc a panangidayaw iti Dios adda coma cadagiti ngiwngiwatda, ken iti dua ti tademna a campilan iti imada; 7 Tapno aramidenda ti pammales cadagiti nasnacion, ken pannusa cadagiti inilin-ili; 8 Tapno reppetenda dagiti ar-arida cadagiti cawcawar, ken dagiti natan-ocda cadagiti tul-ong nga landoc; 9 Tapno tungpalenda cadacuada ti panangocom a naisurat: daytoy a dayaw adda cadagiti amin a sasantona. Idaydayawyo ti APO. SALMO 150 1 Idaydayawyo ti APO. Idaydayawyo ti Dios idiay santuariona: idaydayawyo isuna idiay tangatang ti pannacabalinna. 2 Idaydayawyo gapu cadagiti mannacabalin a gappuananna: idaydayawyo cas mayalubog iti natan-oc unay nga kinadackelna. 3 Idaydayawyo iti aweng ti tangguyob: idaydayawyo a madanggayan iti salterio ken arpa. 4 Idaydayawyo iti pandereta ken sala: idaydayawyo cadagiti pagtocaran a kinuerdasan ken pitpito. 5 Idaydayawyo cadagiti piang-piang nga naaweng: idaydayawyo cadagiti piang-piang a nacalangiking. 6 Isuamin nga adda angesna idaydayawda coma iti APO. Idaydayawyo ti APO.