|
NI APOSTOL PABLO CADAGITI TAGA CORINTO 1 Ni Pablo, apostol ni Jesus Cristo gapu iti pagayatan ti Dios, casta met ni Timoteo a cabsattayo, isuratda iti iglesia ti Dios nga adda idiay Corinto, ken cadagiti isuamin a sasanto nga adda iti amin nga Acaya: 2 Parabur ma-adda coma cadacayo ken talna ti Dios nga Amatayo, ken ni Apo Jesus Cristo. 3 Madaydayaw coma ti Dios, ken Ama ni Apotayo a Jesus Cristo, ti Ama dagiti asi, ken Dios ti amin a liwliwa; 4 Isu a mangliwliwa cadatayo iti isuamin a pagladladingitantayo, tapno mabalintayo a liwliwaen dagiti adda iti uray ania a pagladingitan, gapu iti liwliwa a pangliwliwa met laeng ti Dios cadatayo. 5 Ta cas dagiti sinagaba ni Cristo umadu cadacami, casta met dagiti liwliwami umadu gapu ken Cristo. 6 Ngem uray no agsagabacami, maipaay iti pannacaliwliwayo ken pannacaisalacanyo, isu nga agaramid iti panagibtur nga agsagaba cadagiti rigrigat a sagabaenmi met: wenno uray maliwliwacami, maipaay iti pannacaliwliwayo ken pannacaisalacanyo. 7 Ket ti inanamami no maipapan cadacayo ket natibker, nga ammomi, a no casano ti pannacairamanyo cadagiti sagabaen, castanto met iti pannacaliwliwa. 8 Ta dicami cayat a dicayo maammoan, cacabsat, ti maipapan iti na-aramid a ladingitmi idiay Asia, iti casta napacapsuyancami, iti nacaro la unay, a dicami idi inanamaenen nga agbiagcami pay: 9 Pudno a dacami met laeng impapanmi a mataycami, nga dicami agcammatalec cadacami met laeng, no di iti Dios a mamagungar cadagiti matay: 10 Isu a nangilisi cadacami iti nacaro nga ipapatay, ken mangilisinto pay cadacami: isu a pagtalcanmi a tuluyennatayto pay nga ilisi; 11 Makipagcararagcayo met a maipaay cadacami, tapno gapu iti parabur a naited cadacami iti adu a tao ket agyamyamanda met iti adu a maipaay cadacami. 12 Ta ti pagragsacanmi isu daytoy, ti panagpanecnec ti concienciami, a binuyogan ti kinasanto ken ti nadiosan a kinapudno, saan a ti sirib a linalasag, no di gapu iti parabur ti Dios, nagbibiagcami ditoy lubong, a maipaay cadacayo a nangnangrona. 13 Ta awan ti isuratmi cadacayo a sabali, no di dagiti basaenyo wenno panecnecanyo met; ket siac mangnamnamaac a panecnecanyonto agingga iti panungpalan; 14 Cas met iti panangpanecnecyo cadacami cadagiti dadduma a paset, a dacami ti ragsacyo, a cas met dacayo ti ragsacmi inton aldaw ni Apo Jesus. 15 Ket itoy a panagtalec pinanggepco ti umay nga umuna cadacayo, tapno maaddaancayo iti maicaddua a paglainganyo; 16 Ken manipud cadacayo mapanac idiay Macedonia, ken agsubliacto manen cadacayo manipud Macedonia, tapno tulongandac a mapan idiay Judea. 17 Iti caadda daytoy a panggepco, imparangco aya ti panagduadua? wenno dagiti banag a panggepec, panggepec ida a cas iti lasag, tapno adda caniac ti wen wen, ken ti saan saan? 18 Ngem agsipud ta ti Dios isu ti pudno, ti saomi cadacayo saan nga isu ti wen ken saan. 19 Ta ti Anac ti Dios, ni Jesus Cristo, daydi incascasabami cadacayo, dacami cada Silvano ken Timoteo, saan nga isu ti wen ken saan, no di ket adda kencuana ti wen. 20 Ta amin dagiti cari ti Dios adda kencuana ti wen, gapuna kencuana adda met iti Amen, a maipaay iti dayag ti Dios gapu iti pannacaaramatmi. 21 Ket ti mamatalged cadacami agraman cadacayo ken Cristo, ken ti nangpulot cadatayo, ket isu ti Dios; 22 Isu a nangted ti tanda cadatayo, ken nangted cadagiti umuna a sagut ti Espiritu cadagiti puspusotayo. 23 Ngem awagac ti Dios a pannacasacsi toy cararruac, a gapu iti panangsalacnibco cadacayo diac pay laeng umay dita Corinto. 24 Saan a gapu ta iturayanmi ti pammatiyo, no di ket tumultulongcami iti rag-oyo: ta gapu iti pammati addacayo a sititibker. CAPITULO 2 1 Ngem daytoy inkeddengco a siac, a diacto umay manen cadacayo a silaladingit. 2 Ta no siac pagladingitencayto, siasino ngarud ti mangparagsac caniac, no di daydiay napagladingit gapu caniac? 3 Ket nagsuratac cadacayo ti maipapan itoy met laeng a banag, di la ket, inton umayac, agliday coma iti biang dagidiay a rebbengco coma a pagragsacan; manginanamaac cadacayo amin, a ti rag-oc isu ti rag-oyo amin. 4 Ta iti tengnga ti adu a ladingit ken sainnec ti puso nagsuratac cadacayo a nabuyogan iti adu a lulua; saan a tapno mapaladingitcayo, no di ket tapno maammoanyo ti ayatco a naglaplapusanan cadacayo. 5 Ngem no adda namaldaang, saan a siac ti pinagleddaangna, no di ket dadduma: tapno dicayo mapabasol amin. 6 Umanayen iti casta a tao dayta a dusa, nga impatay kencuana dagiti adu cadacayo. 7 Iti casta rebbengyo ketdi nga pacawanen, ken liwliwaen, di la ket ta dayta a tao malmes iti aglablabes a leddaang. 8 Gapuna dawatec cadacayo a panecnecanyo ti ayatyo kencuana. 9 Ta gapu met itoy nagsuratac, tapno maammoac ti cababalinyo, no natulnogcayo met laeng iti isuamin. 10 Ngem iti pamacawananyo iti aniaman, pacawanec met: ta castaac met no adda pinacawanco, pinacawanco isuna, gapu cadacayo pinacawanco iti biang ni Cristo; 11 Tapno ni Satanas saannatayo a gundawayan: ta saantayo a nacuneng cadagiti kinasicapna. 12 Calpasanna pay, idi dimtengac idiay Troas nga mangasaba ti evangelio ni Cristo, ket maysa a ruangan a maipaay caniac ti linuctan iti Apo, 13 Saan a nagtalna ti espirituc, gapu ta diac nasaracan ni Tito a cabsatco: ngem idi nacapacadaac cadacuada, pimmanawac ket napanac idiay Macedonia. 14 Ngem yaman pay iti Dios, isu nga agnanayon a mamagballigi cadatayo ken Cristo, ken iparangarangna ti sayamusom ti pannacaammo kencuana gapu cadatayo met laeng iti isuamin a disso. 15 Ta iti Dios ket datayo ti maysa a nabanglo a sayamusom ni Cristo, cadagiti naisalacan, ken cadagiti mapucaw: 16 Cadagiti dadduma datayo ti angot ni patay a maipaay iti patay; ket cadagiti sabsabali datayo ti banglo ti biag a maipaay iti biag. Ket siasino ti macaan-anay cadagitoy a banbanag? 17 Ta saantayo a cas cadagiti adu, a mangmulit iti sao ti Dios: no di ket cas buyugen ti kinapudno, a cas nagtaud iti Dios, iti imatang ti Dios agsaocami ken Cristo. CAPITULO 3 1 Baliwanmi manen aya nga italec dagiti bagbagimi? wenno masapul ngata, a cas cadagiti dadduma, dagiti sursurat a panangitalec a maipaay cadacayo, wenno sursurat a panangitalec a nagtaud iti biangyo? 2 Dacayo met laeng ti suratmi a naisurat cadagiti pusomi, nga ammo ken basaen dagiti isuamin a tattao: 3 Maiparangarang a dacayo ti maysa a surat ni Cristo nga inaywananmi, a nasuratan saan nga iti tinta, no di ket iti Espiritu ti sibibiag a Dios; saan a cadagiti taptapi a bato, no di ket cadagiti naglasag nga taptapi iti puso. 4 Ket iti casta a panagtalec adda cadacami gapu ken Cristo ken maipuon iti Dios: 5 Saancami a maca-anay a dacdacami laeng a mangpanunot iti aniaman a cas aggapu cadacami met laeng, no di ket ti pannacaan-anaymi agtaud iti Dios; 6 Isu a nangaramid met cadacami a naan-anay nga ministro iti baro a tulag; saan a ti letra, no di ti espiritu: ta ti letra mamapatay, ngem ti espiritu mangted ti biag. 7 Ngem no ti kinaministro ti patay, a naisurat ken naikitikit cadagiti batbato, immay a sidadayag, ta uray pay dagiti annac ti Israel saanda idi a mabalin nga iperreng ti matada iti langa ni Moises gapu iti dayag ti rupana; isu a dayag nga mapucpucawen: 8 Casanonto nga saan a ti kinaministro ti espiritu ad-addanto pay iti kinadayagna? 9 Ta no ti kinaministro ti pannacadusa adda dayagna idi, ad-addanto pay nga ti kinaministro ti kinalinteg ket nawadwadwad ti dayag. 10 Ta pudno a ti naaramid a sidadayag saan pay a naaramid a nadayag unay, gapu iti dayag a mangdaeg kencuana. 11 Ta no dayta a mapucpucawen ket adda dayagna idi, ad-addanto pay nga ti mataginayon ket nadayag. 12 Idinto nga adda cadacami ti nasnec unay nga inanama, situtured nga agsaocami: 13 A saan a cas ken Moises, nga inabbonganna ti rupana, tapno dagiti annac ti Israel saanda a maiperreng dagiti matmatada iti panungpalan daydi mapucaw: 14 Ngem dagiti is-isipda nacudrepan: ta uray agingga ita nga aldaw adda pay laeng cadacuada daydi met laeng nga abbong no mabasa ti daan a tulag; ket dayta nga abbong naiccaten gapu ken Cristo. 15 Ngem agingga itoy nga aldaw, no mabasa ti surat ni Moises, maabbongan dagiti puspusoda. 16 Numan pay casta no agsublida iti Apo, ti abbong maiccatto cadacuada. 17 Ket ita ti Apo isu ti Espiritu: ket no sadino ti ayan iti Espiritu ti Apo, idiay adda iti wayawaya. 18 Ngem datayo amin, ti rupatayo awan abbongna ket kitkitaentayo a cas ti sarming ti dayag ti Apo, agbalintayo nga umasping kencuana a mapadayagtayo a mapadayag, cas naggapu iti Espiritu ti Apo. CAPITULO 4 1 Gapuna idinto ta adda cadacami daytoy nga panagaywan, cas iti pannacagun-odmi ti asi, saancami nga agcapuy; 2 No di ket nagpanawanmi dagiti nailemlemmeng a nacababain, a dicami agsicsicap, ken saanmi a killoen ti sao ti Dios; no di ket iti panangiparangarang ti pudno italecmi ti bagimi iti conciencia dagiti amin a tattao iti imatang ti Dios. 3 Ket no ti evangeliomi naabbongan pay laeng, naabbongan a maipaay cadagiti napucaw: 4 Cadacuada ti dios a nailubongan binulsecna dagiti is-isip dagiti saan a mamati, di la ket ta iti lawag ti dayag ti evangelio ni Cristo, isu nga ladawan ti Dios, agraniag coma cadacuada 5 Ta dicami icascasaba dagiti bagbagimi, no di ni Cristo Jesus nga Apo; ket dacami dagiti adipenyo a maipuon ken Jesus. 6 Ta ti Dios, nga nangbilin ti silaw nga agraniag iti casipngetan, linawaganna dagiti puspusotayo, tapno itedtayo ti lawag ti pannacaammo iti dayag ti Dios iti rupa ni Jesus Cristo. 7 Ngem addaancami iti daytoy a gameng cadagiti damili a baso, tapno ti naindaclan a pannacabalin ket biang coma ti Dios, a saan a cadacami. 8 Cadagiti isuamin a disso mailetancami, ngem saan a maparigat unay; agduaduacami, ngem saan a maiccat ti inanamami; 9 Naidadanescami, ngem saan a nabaybay-an; naituangcami, ngem saancami a nadadael; 10 Nga itugtugotmi nga agnanayon iti bagimi ti ipapatay ni Apo Jesus, tapno ti biag ni Jesus ket maiparangarang met iti bagimi. 11 Ta dacami nga agbiag ket cancanayon a mayawatcami ken patay gapu ken Jesus, tapno ti biag met ni Jesus ket maiparangarang iti matay a lasagmi. 12 Iti casta ti patay agaramid cadacami, ngem ti biag cadacayo. 14 Nga ammomi a ti namagungar ken Apo Jesus ket pagungarennacamto met gapu ken Jesus, ket iparangnacamto a maicuyog cadacayo. 15 Ta isuamin maigapu cadacayo, tapno ti adu a parabur gapu cadagiti panagyaman ti adu umadu met a pacaidayawan ti Dios. 16 Gapuna saancami a maupay; ta uray no ti makinruar a taotayo ket mapucaw, ti makin-uneg a tao ket mapabaro nga inaldaw aldaw. 17 Ta ti nalag-an a sagabami, isu nga apagcanito laeng, agaramid cadacami ti saan a marucod a cangato ken agnanayon a cadackel ti dayag; 18 Idinto a dicami kitaen dagiti banbanag a makita, no di ket dagiti saan a makita: ta dagiti banbanag a makita saanda a mataginayon; ngem dagiti saan a makita mataginayonda. CAPITULO 5 1 Ta ammomi a no ti naindagaan a balay ti tabernaculotayo ket madadaelto, adda maysa a balaytayo nga aggapu iti Dios, balay a saan nga inaramid iti ima, agnanayon cadagiti langlangit. 2 Ta iti daytoy agsensennaaytayo, a tartarigagayantayo iti nasged a maicawes cadatayo ti balaytayo nga aggapu idiay langit: 3 Ta no casta idinto a sicacawestayo saandatayo a masaracan a lamolamo. 4 Ta datayo nga adda itoy a tabernaculo ket agsensennaaytayo, nga madadagsenan: a ditayo tarigagayan ti malabusan, no di ket macawesan, tapno daytoy matay ket maalun-on coma gapu iti biag. 5 Ita ti nangaramid cadatayo a maipaay itoy met laeng ket isu ti Dios, isu met laeng ti nangted cadatayo ti tanda ti Espiritu. 6 Gapuna idinto a sitatalgedcami a cancanayon, ket ammomi, a no addacam nga agtaeng iti bagi, awancami iti Apo: 7 (Ta magnacami gapu iti pammati, saan nga iti panagkita:) 8 Sitatalgedcami, kunak, ket cayatmi coma ti maawanan iti bagi, ket addacam nga agtaeng iti Apo. 9 Gapuna umagawacami met, tapno, uray agtaengcami wenno saan iti bagi, macaay-ayocami coma kencuana. 10 Ta masapul a datayo amin maiparangarangtayto iti saclang iti tugaw ti pangocoman ni Cristo; tapno tunggal maysa awatenna dagiti supapac ti inaramidna babaen ti bagina, naimbag man wenno dakes. 11 Idinto ngarud nga ammomi iti panagbuteng iti Apo, bagbagaanmi dagiti tattao; ket naiparangcami iti Dios; ket namnamaec a naiparangarangcami met cadagiti concienciayo. 12 Ta saanmi nga italec manen dagiti bagbagimi cadacayo, ngem iccandacayo ti pannacaipaayna a panagrag-oyo gapu cadacami, tapno adda isungbatyo cadagiti agpaspasindayaw iti ruar, ket saan nga iti puso. 13 Ta uray no agmauyongcami, maipaay iti Dios: uray no manakemcami, maipaay cadacayo. 14 Ta ti ayat ni Cristo pilitennacami; idinto nga ipatomi a castoy, nga no ti maysa natay gapu cadagiti isuamin, no casta isuamintayo natay: 15 Ta isu natay gapu cadagiti isuamin, tapno dagiti agbiag saanda nga agbiagen a maipaay cadacuada, no di maipaay iti daydi natay gapu cadacuada, ken nagungar manen. 16 Gapuna dacami manipud ita ken iti masangoanan awan ti kitaenmi cas iti lasag: wen, ket uray kinitami idi ni Cristo cas iti lasag, ngem itan dicami bigbigenen a casta. 17 Gapuna no ti maysa a tao adda ken Cristo, isu baro a parsua: dagiti daan a banbanag napalabasdan; adtoy, amin nga banbanag nagbalinda a baro. 18 Ket dagiti isuamin a banbanag agtaudda iti Dios, isu a nangicappia cadatayo kencuana met laeng gapu ken Jesus Cristo, ket intalecna cadacami ti kinaministro iti pannakicappia; 19 Cayatna a saoen, a ti Dios adda idi ken Cristo, a pakicappiaenna toy lubong kencuana met laeng, a saanna nga ipabaclay cadagiti tattao dagiti salungasingda; ket intalecna cadacami ti sao ti pannakicappia. 20 Ita dacami ngarud dagiti imbaon ni Cristo, a casla agdawdawat ti Dios cadacayo gapu cadacami: iti biang ni Cristo dawatenmi, a makicappiacayo iti Dios. 21 Ta isu inaramidna nga basol gapu cadatayo, daydi saan a nacaammo ti basol; tapno macapagbalintayo a kinalinteg ti Dios gapu kencuana. CAPITULO 6 1 Dacami ngarud, a cas makipagtrabaho kencuana, dawatenmi met cadacayo a dicayo awaten iti parabur ti Dios iti awan pagmama-ayanna. 2 (Ta kunana, idi tiempo a pannacaipaayna dinengngegca, ket idi aldaw ti pannacaisalacan tinulonganca: adtoy, ita isu iti tiempo a maiparbeng; adtoy, ita isu iti aldaw ti pannacaisalacan.) 3 A dicami mangted ti pacaiculboan iti uray aniaman, tapno saan a mababalaw ti kinaministromi: 4 No di ket iti isuamin italecmi ti bagimi a cas ministro iti Dios, iti adu nga anus, ladladingit, pacasapsapulan, ken rigrigat, 5 Pannacababaot, pannacarepreppet, riribuc, banbannog, panagpuypuyat, ken saan a panpannangan; 6 A buyugen ti kinadalus, ti pannacaammo, ti nabayag a panagiturtured, ti kinamanagayat, babaen ti Espiritu Santo, babaen ti ayat a pudno, 7 Babaen iti sao ti kinapudno, babaen iti pannacabalin ti Dios, babaen iti cabal ti kinalinteg iti macanawan ken iti macatigid, 8 Babaen iti dayaw ken ti pannacaibabain, babaen iti dakes a damag ken ti naimbag a damag: cacasla mangul-ulbod, ngem napudno; 9 A cas di am-ammo, ngem naammoan unay; a cas nganngani matay, ket, adtoy, a sibibiagcami; a cas madusdusa, ngem saan a mapapatay; 10 Cas naladingit, ngem agnanayon a siraragsac; cas napanglaw, ngem pabacnangenmi dagiti adu; a cas awanancami ti uray ania, ngem cupicupanmi dagiti isuamin a banbanag. 11 O taga Corinto, awan ti saanmi nga imbaga cadacayo, dagiti pusomi ket limmawa cadacayo. 12 Saancayo a mailetan cadacami, ngem mailetancayo cadagiti puspusoyo met laeng. 13 Ita ket cas supapac daytoy, (casaocayo a casla annacco,) lumawacayo met coma. 14 Saancayo a makicadcaddua iti sangol cadagiti saan a mammati: ta ania ti pakicadduaan ti kinalinteg iti kinakillo? wenno ania ti pacaicadduaan ti lawag ti sipnget? 15 Ket ania ti pakicappiaan ni Cristo ken Belial? wenno ania ti pacaibiangan ti mamati iti saan a pulos nga mammati? 16 Ket ania ti pacainugotan ti templo ti Dios cadagiti ladladawan a didiosen? ta datayo ti templo ti sibibiag a Dios; a cas met kinuna ti Dios, Agbalayacto cadacuada, ket magmagnaacto cadacuada; ket siacto ti Diosda, ket isudanto dagiti tattaoc. 17 Gapuna pumanawcayo iti nagtetengaanda, ket suminacayo, cuna ti Apo, ket saanyo a sagiden ti aniaman a di nadalus; ket siac awatencayto, 18 Ket siacto ti Amayo, ket dacayonto ti annacco a lallaki ken babbai, cuna ti Apo a Mannacabalin-amin. CAPITULO 7 1 Iyantangay adda cadatayo dagitoy a carcari, patpatgec nga ay-ayatec unay, agdalustayo coma iti isuamin a kinarugit ti lasag ken espiritu, nga an-anayentayo ti kinasanto iti panagbuteng iti Dios. 2 Awatendacami; awan ti rinanggasanmi a tao, awan ti dinadaelmi a tao, awan ti tinacawanmi a tao. 3 Saanco a saoen daytoy tapno pabasolencayo; ta sinaocon idi, nga addacayo cadagiti puspusomi tapno matay ken agbiagtayo nga agtitimpuyog. 4 Dackel ti turedco nga agsao cadacayo, dackel ti panangipadayawco gapu cadacayo: Napnoanac iti liwliwa, agluplupias ti ragsacco iti tengnga dagiti amin a rigatmi. 5 Ta, idi dimtengcami diay Macedonia, ti bagimi awan idi ti panagtalnana, ta maparigatancami ti uray sadino a turongen; iti ruar ket riribuc, ken ti uneg ket butbuteng. 6 Nupay casta ti Dios, a mangliwliwa cadagiti naibelleng ti baba, liniwliwanacami gapu iti iyaay ni Tito; 7 Ket saan laeng a gapu iti iyaayna, no di met gapu iti liwliwa a nacaliwliwaanna cadacayo, idi impadamagna cadacami ti narayray nga essemyo, ti sangityo, ti regtayo gapu caniac; iti casta nagragsacac ti ad-adda pay. 8 Ta uray no pinagladingitnacayo daydi suratco, saanco a ladingiten, uray no nagladingitac idi: ta mabigbigco a daydi a surat ket pinagladingitnacayo, nupay apagbiit laeng a panawen. 9 Ita agragsacac, saan a gapu ta nagladingitcayo, no di ket gapu ta nagladingitcayo iti maipaay iti panagbabawi: ta nagladingitcayo nga mayannurot iti nadiosan, tapno awan coma ti pannacadadael a sagabaenyo nga agtaud iti biangmi. 10 Ta ti nadiosan a panagladingit ket pataudenna ti panagbabawi a pacaisalacanan a saan a pagbabawyan: ngem ti ladingit ti lubong pataudenna ti ipapatay. 11 Ngarud adtoy met laeng, a nagladingitcayo a mayannurot iti nadiosan, ania ket nga annaden ti pinataudna cadacayo, wen, ania ket a panangipalawagyon iti casasaadyo, wen, ania ket a pungtoten, wen, ania ket a butengen, wen, ania ket nga essemen, wen, ania ket a regtan, wen, ania ket a pammalesen! Iti isuamin a banbanag nagparangcayo a nadalus itoy a panggep. 12 Iti casta ngarud, uray no nagsuratac cadacayo, saan a gapu iti daydi nagaramid ti dakes, saan met a gapu ti daydi nagsagaba ti dakes, no di ket tapno maiparang coma iti panangigagami cadacayo iti imatang ti Dios. 13 Gapuna naliwliwacami iti pannacaliwliwayo: wen, agragragsaccami a nangnangrona pay gapu iti rag-o ni Tito, agsipud ta ti espirituna ket napabileg gapu cadacayo amin. 14 Ta no adda aniaman a nagpasindayawac kencuana iti maipapan cadacayo, saannac a naibabain; no di ket cas iti cunami cadacayo a pudnoda amin, casta met iti panagpasindayawmi, nga imbaga ken Tito, ket nasaracan nga agpayso. 15 Ket ti akinuneg a dungngona ad-adda pay cadacayo, no malagipna ti kinatulnogyo amin, ken no casano a buteng ken kintayeg ti panangawatyo kencuana. 16 Agragsacac gapu ta adda naan-anay a panagtalecco cadacayo cadagiti isuamin nga banbanag. CAPITULO 8 1 Casta met, cacabsat, ipaca-ammomi cadacayo ti parabur ti Dios a naited cadagiti iglesia ti Macedonia; 2 No casano nga iti caadda iti dackel a pannacasuut ti rigatda ti cawadwad ti rag-oda ken ti nauneg a kinapanglawda naglaplapusananda a maipaay iti kinabacnang ti nasayaat a nakemda. 3 Ta cas cadagiti cabaelanda, sacsiac, wen, ken aglablabes pay cadagiti cabaelanda ket timmulongda a nacnakemda laeng; 4 A dinawatda iti nasnecan a calicagum tapno awatenmi daytoy nga parabur, ti pannacairaman iti panagcacaddua iti ibabadangda cadagiti sasanto. 5 Ket daytoy inaramidda, saan a cas ti ninamnamami, no di ket impaayda dagiti bagbagida nga umuna iti Apo, ket calpasanna cadacami gapu iti pagayatan ti Dios. 6 Iti casta dinawatmi ken Tito, iyantangay isu rinuggianna nga immun-una, casta met coma nga ileppasna cadacayo daytoy met laeng nga parabur. 7 Iyantangay, nawadwadcayo ngarud iti isuamin, iti pammati, iti sao, iti sirib, ken iti amin a regta, ken iti ayatyo cadacami, umaducayo met coma itoy a parabur. 8 Saanac nga agsao a casla ti agbilin, no di ket gapu iti regta dagiti sabali, ken cas pangsuut ti kinapudno ti ayatyo. 9 Ta ammoyo ti parabur ni Apotayo a Jesus Cristo, nga, idinto a nabacnang, ngem gapu cadacayo nagbalin a napanglaw, tapno dacayo gapu iti kinapanglawna bumacnangcayo coma. 10 Ket ibagac ti pammalacadco: ta daytoy maipaay cadacayo, nga immun-una a nangrugi idi, saan laeng a ti panagaramid, no di ket iti panagayat pay idi napalabas a tawen. 12 Ta no umuna a sisasagana ti pakinakem, ti sagut macaay-ayo no mayannurot iti cupicupan ti maysa a tao, a saan a cas mayannurot iti awan kencuana. 13 Ta diac saoen daytoy tapno dagiti sabsabali ket mapalag-ananda, ken mapadagsenancayo: 14 Ngem gapu iti panagpapada, itoy a tiempo ti kinawadwadyo anayanna ti pacasapulanda, tapno ti kinawadwadda anayannanto met ti pacasapulanyo: tapno adda coma panagpapada: 15 Cas adda a naisurat, Ti nagacup ti adu awan ti suroc kencuana; ket ti nagacup ti bassit awan met ti nagcurang kencuana. 16 Ngem yaman pay iti Dios, a nangipaay iti naregta a panangigaga iti puso ni Tito nga agpaay cadacayo. 17 Ta saan laeng nga inawatna ti pammagbagami; ngem idinto a sireregta unay, nacnakemna ti nagluas nga immay cadacayo. 18 Ket imbaonmi nga impacuyog kencuana ti cabsat, a ti pannacadaydayawna ti evangelio nagwara cadagiti isuamin nga ig-iglesia; 19 Ket saan laeng a daytoy, no di ket dagiti iglesia tinudinganda a cacuyogmi iti panamagpagnami maipanggep iti daytoy a parabur, nga aywananmi a maipaay iti dayag met laeng iti Apo, ken panangipakita ti sisasagana a nakemyo: 20 A lissianmi daytoy, nga awan coma ti mangpabasol cadacami ti maipapan iti daytoy nawadwad a parabur nga aywananmi: 21 Nga aramidenmi dagiti natacneng a banbanag, saan laeng nga ti imatang ti Apo, no di pay iti imatang ti tao. 22 Ket impacuyogmi cadacuada ti cabsatmi, isu a namin adu a napadasmi a nagaget cadagiti adun a banbanag, ngem ita nagaggaget pay, gapu iti dackel a panagtalecco cadacayo. 23 Ket no adda agsaludsud maipapan ken Tito, isu ti cadduac ken catulungan a maipaay cadacayo: ket no maipapan cadagiti cacabsat no adda agsaludsud, isuda dagiti babaonen dagiti iglesia, ken iti dayag ni Cristo. 24 Iparangarangyo ngarud cadacuada, ken iti imatang dagiti iglesia, iti pacakitaan ti ayatyo, ken ti panagpasindayagmi a maipapan cadacayo. CAPITULO 9 1 Ta no maipapan iti panagservi cadagiti sasanto, saan a masapulen nga agsuratac cadacayo: 2 Ta ammoc ti kinamanagsagana iti panunotyo, isu a pangipasindayagco cadacayo cadagiti taga Macedonia, a ti Acaya adda a nacasaganan nanipud idi napan a tawen; ket ti regtayo ginuyoguyna dagiti adu unay. 3 Nupay casta imbaonco dagiti cacabsat, tapno ti panangipasindayagmi cadacayo saan nga agbalin nga awan capapay-anna itoy a panggep; tapno, cas sinaoc, addacayo coma a sisasagana: 4 Di la ket ta no umayto makicuyog caniac dagiti taga Macedonia, ket masaracandacayto a saan a nacasagana, dacami (tapno dicami cuna, a dacayo) addanto pacababainanmi itoy a panagtalgedmi. 5 Ngarud napanunotco a masapul a balacadan dagiti cacabsat, nga umun-unada nga umay cadacayo, ket isaganada coma nga unaen ti sagutyo, a naicarin idi, tapno adda a sisasagana, nga cas sagut, ket saan a casla napilpilit nga inaagum. 6 Ngem kunak daytoy, Ti agmula a si-iimut aganinto met iti ini-imut; ket ti agmula iti nawadwad aganinto met iti nawadwad. 7 Tunggal maysa itdenna coma ti pinanggep iti pusona, isu mangted coma; saan nga iti dakes a nakem, wenno mapilpilit: ta ti Dios ayatenna ti mangted a si-aayat. 8 Ket ti Dios mabalinna a paaduen ti isuamin a parabur a maipaay cadacayo; tapno cadacayo, adda ti amin a kinawadwad iti amin a banbanag, ket rumang-aycayo a maipaay iti isuamin nga aramid a naimbag: 9 (Cas adda a naisurat, Isu nagiwaras; nangted cadagiti napanglaw: ti kinalintegna agtalinaed nga agnanayon. 10 Ita ket ti mangted iti bin-i ti agmulmula ken tinapay a pagtaraon, mangtedto ket paaduennanto ti bin-iyo nga imula, ket nayonannanto dagiti bunga ti kinalintegyo;) 11 Idinto a napabacnangcayo a nawadwad iti isuamin, isu ti agaramid cadacami cadagiti panagyaman iti Dios. 12 Ta ti panangipaay itoy a panagservi ket saan laeng a dagiti pacasapulan dagiti sasanto ti punnoanna, no di ket umadu pay gapu cadagiti adu a panagyaman iti Dios; 13 Ket gapu iti panangipaayyo itoy nga aramid dayawenda ti Dios gapu iti kinatulocyo iti evangelio ni Cristo, ken gapu iti kinaburayyo a mangted ti maipaay cadacuada, ken cadagiti isuamin a tao; 14 Idinto nga agdawdawatda a maipaay cadacayo, adda narayray nga ayatda cadacayo gapu iti nawadwad unay a parabur ti Dios cadacayo. 15 Yaman pay iti Dios gapu iti di mayebcas a sagutna. CAPITULO 10 1 Ket ita siac ni Pablo dawatec cadacayo gapu iti kinapacumbaba ken kinaemma ni Cristo, siac nga iti sangoananyo ket nanumo cadacayo, ngem no awanac naturedac cadacayo: 2 Ngem siac kiddawec cadacayo, nga saannac coma a natured no addaac a sisasango a natalged, a pampanunotec ti agtured cadagiti dadduma, a mangipappapan nga agbibiagcami a cas iti lasag. 4 (Ta dagiti igam ti kinasoldadomi ket saanda a linalasag, ngem mannacabalinda iti Dios a mangrebbec cadagiti sarikedked;) 5 A duprakenda dagiti panagis-isip, ken amin a nangato a banag a bumusor iti pannaca-ammo iti Dios, ket ibaludda ti amin a panunot iti panagtulnog ken Cristo; 6 Ket addada a sisasagana a mangbales ti isuamin a kinasukir, intono ti panagtulnogyo matungpalen. 7 Kitkitaenyo laeng dagiti banag a naruar? No adda siasinoman nga agtalec kencuana met laeng nga isu cucua ni Cristo, panunotenna coma manen daytoy, nga, isu a cas cucua ni Cristo, castacami met cucuanacami met ni Cristo. 8 Ta uray no agpasindayawac coma unay maipapan iti turaymi, nga inted ti Apo a maipaay a pangpatibker, ket saan a pangdadael cadacayo, saanacto a mabainan: 9 Tapno saan nga agparang a casla cayatco coma a kigtotencayo babaen cadagiti sursurat. 10 Ta dagiti sursuratna, kunada, nadagsen ken nabilegda; ngem ti kita iti bagina nacapuy, ket ti saona nanumo. 11 Panunotenna coma ti maysa daytoy, nga, no ania cami iti sao babaen cadagiti sursurat no awancami, castacamto met iti aramid inton sisasangocami. 12 Ta dimi maitured nga ibilangmi, wenno ipadismi dagiti bagbagimi cadagidiay mangidaydayaw cadagiti bagbagida: ngem dagiti agririnnucod met laeng nga is-isuda, ken agpipinnadisda met laeng nga is-isuda, saanda a masirib. 13 Ngem dacami saancaminto nga agpasindayag iti labes ti rucodmi, no di ket cas mayannurot ti rucod ti pagayatan nga impabagi ti Dios cadacami, maysa a rucod nga dumanon pay uray cadacayo. 14 Ta saanmi nga labsan iti rebbengmi a rucod, a casla ket tay dicami nacagtengen: ta immaycami ti adayu iti panangicasabami cadacayo iti evangelio ni Cristo: 15 A dicami agpasindayaw iti saanna a carbengan, cayatco a saoen, cadagiti aramid dagiti sabsabali; ngem adda inanamami, nga inton rumang-ay ti pammatiyo, mapadackelcamto unay cadacayo a mayalubog iti beddengmi. 16 Tapno icasabami ti evangelio cadagiti disso iti labesyo, ket saancami nga agpasindayag no maipapan iti naisaganan nga inaramid ti sabali a tao. 17 Ngem ti agpasindayaw, agpasindayaw coma iti Apo. 18 Ta saan nga ti mangipadayaw iti bagina ti maananamongan, no di ket daydiay dayawen ti Apo. CAPITULO 11 1 Sapay coma ti Dios ta anusandac iti bassit a kinacunengco: wen cadi anusandac. 2 Ta agimunac gapu cadacayo iti nadiosan nga imun: ta intulagco nga iyasawacayo iti maymaysa a lalaki, tapno iparangcayo a cas birhen a nadalus ken Cristo. 3 Ngem maamacac, di la ket ta, cas iti panangulbod daydi uleg ken Eva iti kinasicapna, casta met dagiti panunotyo madadaelda ken maisinada iti nadalus a singgalut a maipaay ken Cristo. 4 Ta no adda umay mangicasaba ti sabali a Jesus, a saanmi nga incascasaba, wenno awatenyo ti naiduma nga espiritu, isu nga saanyo nga inawat, wenno naiduma nga evangelio, a dicayo nga inawat, anusanyo a nalaing. 5 Ngem pagarupec nga iti uray ania saanac a maatiw cadagiti cangatoan unay nga apostoles. 6 Ta uray no nagubalac iti panagsao, ngem saan iti pannacaammo; iti isuamin imparangarangmi cadacayo babaen cadagiti isuamin a banbanag. 7 Nacabasolac aya iti panagpacumbabac tapno madaydayawcayo coma, agsipud ta incascasabac cadacayo ti evangelio ti Dios nga awan tangdanco? 8 Pinadagsenac dagiti sabali nga iglesia, a nangalaac ti tangdan, tapno pagservic cadacayo. 9 Ket idi addaac cadacayo, ket nagcurangac ti gastoen, saanac a nagbalin nga awit iti uray siasino: ta ti nagcurangac pinunnoan dagiti cacabsat a naggapu sadi Macedonia: ket iti isuamin inannadac ti saan nga paawit cadacayo, ken annadacto pay. 10 Idinto a ti kinapudno ni Cristo adda caniac, awanto ti mangpasardeng caniac itoy a panagpasindayaw cadagiti isuamin a dagdaga ti Acaya. 11 Ania ngarud? gapu ta saancayo nga ayaten? Ti Dios ammona. 12 Ngem ti ar-aramidec, aramidecto laeng, tapno iccatec ti gundaway dagiti agtarigagay nga aguyaw; tapno maipapan iti panagpasindayawda, masaracan ida a cas met cadacami. 13 Ta sinan-apostol dagita, managaramidda a nasicap, nga pagbalinenda isuda nga apostol ni Cristo. 14 Ket saan a nacascasdaaw; ta uray isuna ni Satanas ket agbalin nga angel ti lawag. 15 Saan ngarud nga pacasdaawan unay a dagiti ministrona ket agbalinda met nga ministro ti kinalinteg; a ti panungpalanda ket maiyannurot cadagiti aramidda. 16 Kunak manen, Awan coma ti mangipagarup a nanengnengac; ngem no casta ti panangipagarupyo, awatendac met a casla nanengneng, tapno agpasindayawac met iti bassit. 17 Ti saoec, saanco a saoen cas mayannurot iti Apo, no di ket babaen ti kinanengneng, ken panagtalged ti panagpasindayaw. 18 Iyantangay adu dagiti agpasindayaw a cas iti lasag, agpasindayawacto met. 19 Ta anusanyo a siraragsac dagiti nacuneng, idinto a masiribcayo. 20 Ta anusanyo, no adda mangadipen cadacayo, no adda mangalun-on cadacayo, no adda mangala cadacayo, no idayawna ti bagina, no tungpaennacayo. 21 Agsaoac a mayannurot iti pannaca-umsi, a casla nagbalincami a nacapsut. Ngem iti uray aniaman a pagturedan ti siasino, (agsaoac babaen ti kinacuneng,) naturedac met. 22 Hebreosda aya? castaac met. Israelitasda aya? castaac met. Caputotan ida ni Abraham? castaac met. 23 Ministro ida ni Cristo? (Agsaoac a cas la napucawan ti nakem) Nangnangronaac pay; ad-adduan cadagiti panagbannog, ti pannacababaot nasuroc unay, ad-adduan cadagiti pannacabalbalud, cadagiti nganngani ipapatay namin-adu. 24 Iti biang dagiti Judio naminlima a nabaotac ti uppat a pulo agcurang maysa. 25 Namitlo a nasaplitac cadagiti pang-or, naminsan nauborac, namitlo a nadadael ti nagvirayac, maysa nga aldaw ken maysa a rabii nga addaac iti taaw; 26 Cadagiti panagdaldaliasat namin-adu, dagiti pegpeggad cadagiti carcarayan, dagiti pegpeggad cadagiti tulisan, dagiti pegpeggad cadagiti cailiac, cadagiti pegpeggad ti biang dagiti Gentil, cadagiti pegpeggad idiay ili, cadagiti pegpeggad idiay let-ang, cadagiti pegpeggad idiay baybay, cadagiti pegpeggad iti tengnga dagiti sinan-cacabsat; 27 Iti bannog ken rigrigat, cadagiti puypuyat namin-adu, iti bisin ken waw, iti saan a panpannangan namin-adu, iti lam-ec ken iti kinalamolamo. 28 Mainayon pay cadagiti banbanag iti ruar, ti mamarigat caniac nga inaldaw, isu ti panangaywanco cadagiti isuamin nga iglesia. 29 Siasino ti nacapuy, ket diac makipagcapuy? siasino ti maiculbo, ket diac bumara iti pungtot? 30 No masapulco ti agpasindayag, agpasindayagacto cadagiti banbanag nga agtaud cadagiti kinacapuyco. 31 Ti Dios ken Ama ni Apo Jesus Cristo, isu a bendito iti agnanayon, ammona a diac agulbod. 32 Idiay Damasco daydi gobernador iti babaen ni ari Aretas inaywananna ti ili dagiti taga Damascones babaen ti pagbaludan, ket tarigagayanna a tiliwennac: 33 Ngem ti maysa a tawa naibabaac iti bacud babaen iti maysa a curibut, ket nacalapsutac cadagiti im-imana. CAPITULO 12 1 Saanen a casapulan pay caniac nga awan duduana ti agpasindayaw. Ngem saritaecto dagiti parparmata ken dagiti paltiing ti Apo. 2 Am-ammoc ti maysa a tao ken Cristo ket sangapulo ket uppat a tawen itan, (no sibabagi, diac maibaga; wenno saan a sibabagi, diac maibaga: ti Dios ammona;) daytoy a tao naipangato agingga iti maicatlo a langit. 3 Ket siac ammoc daydi a tao, (no sibabagi, wenno saan a sibabagi, diac maibaga: ti Dios ammona;) 4 No casano a naipangato idiay paraiso, ket nangngegna dagiti saan nga mayebcas a sasao, a saan nga rebbeng ti maysa a tao nga iyebcas. 5 No maipapan itoy a tao agpasindayawacto: ngem no maipapan caniac met laeng saannacto nga agpasindayaw, no di cadagiti kinacapuyco. 6 Ta uray no cayatco coma ti agpasindayaw, saannacto a nacuneng; ta saoecto ti pudno: ngem ita agteppelac, tapno awan ti mangipapan caniac a nangatngatoac ngem iti panagkitana caniac, wenno ti mangngegna a maipapan caniac. 7 Di la ket ta maidaydayawac iti aglablabes gapu iti cadackel dagiti paltiing, naited caniac ti maysa a siit iti lasagco, maysa a babaonen ni Satanas ti mamarigat caniac, tapno saanac coma a maidaydayaw iti aglablabes. 8 No maipapan daytoy nagcararagac iti Apo ti namitlo a daras, tapno daytoy ket mayadayo coma caniac. 9 Ket isu kinunana caniac, Ti paraburco ket maca-anayen kenca: ta iti bilegco mangan-anay ti kinacapuy. Gapuna siraragsacac unay nga agpasindayaw a nangnangrona ti kinacapuyco, tapno iti pannacabalin ni Cristo salucobannac. 10 Gapuna mapnecac cadagiti kinacapuy, cadagiti pannacauy-uyaw, cadagiti pacasapsapulan, cadagiti pannacaidadanes, cadagiti rigrigat gapu ken Cristo: ta inton nacapuyac, isu ti capigsac. 11 Nagbalinac nga nacuneng iti panagpasindayaw; dacayo ti nangipapilit caniac: ta siac coma ti indaydayawyo: ta iti uray ania saanac a maatiw cadagiti cangatoan nga apostol, uray no awan ti capaypay-ac. 12 Pudno a dagiti pagilasinan ti kinaapostol iti tengngayo ket naipakita iti isuamin nga anus, cadagiti pagilasinan, ken datdatlag, ken dagiti mannacabalin nga ar-aramid. 13 Ta ania iti nacaat-atiwanyo cadagiti sabali nga iglesia, no saan laeng a daytoy ti diac panagpaawit iti caaddac cadacayo? pacawanendac iti daytoy a biddut. 14 Adtoy, daytoy ti maicatlo a daras a sisasaganaac nga umay cadacayo; ket saannacto nga umay paawit cadacayo: ta diac sapulen ti cucuayo, no di dacayo: ta dagiti annac saanda a rebbeng iti agurnong ti sanicua a maipaay cadagiti nagannacda, no di ket dagiti nagannac agurnongda ti maipaay cadagiti annacda. 15 Ket sia-ayatac unay nga aggastonto ket magastoacto gapu cadacayo; ta no umadu unay ti panangayatco cadacayo, bumasbassit met iti pannaca-ayatco. 16 Ngem numan pay casta, saancayo a pinadagsenan: isuna laeng, idinto ta nasicapac, tiniliwcayo babaen ti al-lilaw. 17 Nagsicapancayo aya gapu iti siasinoman cadagiti binaonco cadacayo? 18 Binalacadac ni Tito, ket imbaonco ti cabsat a kimmuyog kencuana. Sinicapannacayo iti aniaman ni Tito? saancami aya a sangsangca-timpuyog iti espiritu? ken iti sangsangca-maysa a pannagna? 19 Manen, pagarupenyo aya a nabayagen nga agpampambarcami cadacayo? agsaocami iti imatang ti Dios ken Cristo: ngem aramidenmi amin a banbanag, napateg nga ay-ayaten, a maipaay a pacapatibkeranyo. 20 Ta maamacac, di la ket ta, inton umayac, saancayo a masaracan nga cas iti cayatco, ken masaracandacto a casla ti diyo coma cayat: di la ket ta addanto ringringgor, im-imun, pungpungtot, panagsisina, panaggi-innuyaw, tantanabutob, tangtangsit, kibkibor: 21 Di la ket ta, inton dumtengac manen, ti Diosco ket pagpacumbabaennac iti sangoyo, ket pagladingitecto dagiti adu nga nagbasolen, ket saanda a nagbabawi iti kinarimon ken pannakicamalala ken kinaderrep nga inaramidda. CAPITULO 13 1 Daytoy ti maicatlo a daras nga umayac cadacayo. Babaen ti dua wenno tallo a mangpanecnec ti tunggal sao ket mapatalgedanto. 2 Imbagac idin, ken ipacpacaunac, cas idi addaac a sisasango, idi maicaddua; casta met ita nga awanac isuratco cadagiti nagbasol, ken cadagiti isuamin a dadduma, nga, no umayac manen, awanto ti palabasec: 3 Iyantangay sapulenyo ti pacakitaan a ni Cristo iti agsasao caniac, nga saan a nacapuy a maipaay cadacayo, no di ket mannacabalin cadacayo. 4 Ta uray no nailansa iti cruz gapu iti kinalap-it, itan ket sibibiag gapu iti pannacabalin iti Dios. Dacami met uray no nalap-itcami kencuana, nupay casta agbiagcamto a makicuyog kencuana gapu iti pannacabalin ti Dios a maipaay cadacayo. 5 Sukimatenyo dagiti bagbagiyo, no addacayo iti pammati; suutenyo dagiti bagbagiyo met laeng. Saanyo nga ammo aya ti maipapan cadacayo met laeng, a ni Jesus Cristo adda cadacayo, malacsid no adda cadacayo iti kinadakes? 6 Ngem namnamaec a maammoanyonto nga awan cadatayo iti kinadakes. 7 Ket ita agcararagac iti Dios a saancayo coma nga agaramid ti dakes; saan a tapno agparangcami a ma-anamungan, no di ket tapno maaramidyo coma ti natacneng, uray no casla agparangcami a kinadakes. 8 Ta awan ti pannacabalinmi a sumalungasing iti pudno, no di ket ti maipaay iti pudno. 9 Ta agragrag-ocami, no nacapuycami, ket napigsacayo: gapu itoy met laeng dawdawatenmi, ti naan-anay a pannacapalaingyo. 10 Gapuna isuratco dagitoy a banag ita ta awanac, tapno inton sisasangoac saanco coma nga aramaten ti kinainget, cas mainugot iti pannacabalin nga inted caniac ti Apo a maipaay iti panangpatibker, a saan ket nga iti panangdadael. 11 Panungpalanna, cacabsat, agpacadaacon. Lumaingcayo coma a naan-anay, maliwliwacayo coma, agmaymaysacayo coma, agbiagcayo iti talna; ket ti Dios iti ayat ken talna agtaengto cadacayo. 12 Agkikinnablaaw ti tunggal maysa cadacayo a buyugen iti nasantoan nga agep. 13 Dagiti isuamin a sasanto cablaawandacayo. 14 Ti parabur ni Apo Jesus Cristo, ken ti ayat iti Dios, ken ti pannakicadcaddua iti Espiritu Santo, adda coma cadacayo amin. Amen. Ti maicaddua nga surat cadagiti taga Corinto ket naisurat manipud Filipos, maysa a ciudad ti Macedonia, babaen da Tito ken ni Lucas. |