TI UMUNA A SURAT NI APOSTOL PABLO CADAGITI TAGA TESALONICA CAPITULO 1 1 Ni Pablo, ni Silvano, ken ni Timoteo, isuratda iti iglesia dagiti taga Tesalonica nga adda iti Dios Ama ken ni Apo Jesus Cristo: Parabur coma cadacayo, ken talna, nga aggapu ti Dios nga Amatayo, ken ni Apo Jesus Cristo. 2 Cancanayon nga agyamyamancami iti Dios gapu cadacayo amin, nga idawdawatandacayo cadagiti carcararagmi; 3 A laglagipenmi a di agsarday ti aramidyo iti pammati, ken ti trabaho ti ayat, ken iti naibtur a pananginanamayo ken Apotayo a Jesus Cristo, iti imatang ti Dios ken Amatayo; 4 Nga ammomi, cacabsat nga ay-ayaten unay, ti pannacapiliyo iti Dios. 5 Ta ti evangeliomi ket saan a dimteng cadacayo iti sao laeng, no di pay ket iti pannacabalin, ken iti Espiritu Santo, ken ti naan-anay a kinatalged; cas ammoyo met no aniacami a kita ti tao idi cadacayo maipuon cadacayo. 6 Ket nagbalincayo a tumutulad cadacami, ken ti Apo, nga inawatyo ti sao a nabuyogan iti adu a rigat, agraman rag-o ti Espiritu Santo: 7 Iti casta nagbalincayo nga ulidan cadagiti mammati nga adda idiay Macedonia ken Acaya. 8 Ta nangrugi cadacayo ken nagwara iti sao ti Apo saan la nga idiay Macedonia ken Acaya, no di pay ket ti amin a disso ti pammatiyo ti Dios naiwarnac; iti casta awan ti pacasapulan ti panagsaomi ti aniaman. 9 Ta isuda met laeng ibagada ti maipapan cadacami no casano ti idadatengmi cadacayo, ken no casano ti panagsubliyo iti Dios manipud cadagiti didiosen tapno agservicayo iti sibibiag ken pudno a Dios; 10 Ken tapno urayenyo ti Anacna nga aggapu sadi langit, isu a pinagungarna cadagiti natay, ni Jesus, a mangisalacan cadatayo iti pungtot nga umayto. CAPITULO 2 1 Ta dacayo met laeng, cacabsat, ammoyo a ti idadatengmi cadacayo, saan nga awan capapa-ayanna: 2 No saan ket nga idinto a nagsagabacami, ken pinarparigatdacami, cas paga-ammoyo, idiay Filipos, timmuredcami a sitatalec ti Diostayo tapno isaomi cadacayo ti evangelio ti Dios iti tengnga iti adu nga supsuppiat. 3 Ta ti pammagbagami ket saan nga buyugen ti allilaw, wenno ti kinarugit, wenno ti ulbod: 4 No saan ket a cas ti panangananamong ti Dios cadacami a mapagtalcan iti evangelio, casta ti panagsaomi; saan a cas cadagiti mangay-ayo cadagiti tattao, no di ket iti Dios, a mangsuut cadagiti puspusotayo. 5 Ta uray caano dicami nagaramat ti panagsao a pammadpadayaw, cas paga-ammoyo, wenno aniaman a panangabbong iti kinaagum; ti Dios masacsianna: 6 Ket dicami met sapulen cadagiti tao ti pacaidayawan, uray iti biangyo, uray cadagiti sabsabali, idinto a calinteganmi coma iti panagturay, a cas apostol ni Cristo. 7 No di ket nagannadcami iti tengngayo, a cas iti ina nga agtagibi dungdungoenna dagiti annacna met laeng: 8 Casta met ti panaglailomi cadacayo, si-ayatcami nga mangipaay cadacayo, saan laeng nga iti evangelio ti Dios, no di ket dagiti pay carcararruami, ta nagbalincayo nga patpatgenmi unay. 9 Ta malagipyo, cacabsat, ti bannog ken rigatmi: nga nagbannogcami idi iti rabii ken aldaw, tapno dicami agbalin nga dadagsen ti uray siasino cadacayo, incascasabami cadacayo ti evangelio ti Dios. 10 Dacayo ti macasacsi, ken casta met ti Dios, no casano iti kinasanto ken kinalinteg ken awan a pacapilawan iti pannakipagbiagmi idi cadacayo a mamati: 11 A cas met ammoyo no casano ti panamagbagami ken panangpakiredmi ken panangpanecnecmi iti tunggal maysa cadacayo, a cas maysa nga ama cadagiti annacna, 12 Tapno magnacayo coma a maicari iti Dios, a nangayab cadacayo iti pagarian ken dayagna. 13 Ket gapu met itoy agyamancami iti Dios a di agressat, gapu ta, idi inawatyo ti sao ti Dios nga nangeganyo cadacami, inawatyo saan a casla sao dagiti tattao, no di ket cas pudno, iti sao iti Dios, nga agaramid met a sireregta cadacayo a mamati. 14 Ta dacayo, cacabsat, nagbalincayo a tumultulad cadagiti iglesia ti Dios idiay Judea nga adda ken Cristo Jesus: a nagsagabacayo met cadagiti cacasdi a banbanag cadagiti cailianyo met laeng, a cas cadacuada cadagiti Judio: 15 Isuda a namapatay ken Apo Jesus, ken cadagiti mammadtoda, ken indadanesdacami pay; ket dida maay-ayo ti Dios, ket maibusorda cadagiti amin a tattao: 16 Ket paritandacami nga agsao cadagiti Gentil tapno maisalacanda coma, iti casta punpunnoenda a cancanayon dagiti basbasolda: ta ti pungtot dumteng cadacuada inggana ti pannacaan-anayna. 17 Ngem dacami, cacabsat, idinto a naisinacami cadacayo iti apagbiit iti rupanrupa, saan nga iti puso, ipampamuspusanmi a sireregta tapno makitami ti rupayo babaen ti nasged a tarigagay. 18 Ta naminadu a tinarigagayanmi ti umay cadacayo, uray pay siac ni Pablo, naminsan ken naminsan pay; ngem ni Satanas linappedannacami. 19 Ta ania ti inanamami, wenno rag-o, wenno balangat a pacaidayawanmi? Saan aya a dacayo met laeng iti sangoanan ni Apotayo a Jesus Cristo iti iyaayna? 20 Ta dacayo ti dayaw ken rag-omi. CAPITULO 3 1 Gapuna idi a dicami macaurayen, napanunotmi a nasayaat no agbaticami a dacdacami idiay Atenas; 2 Ket imbaonmi ni Timoteo, a cabsattayo, ken ministro ti Dios, ken catulonganmi iti evangelio ni Cristo, tapno papigsaennacayo, ken liwliwaennacayo maipapan iti pammatiyo: 3 Tapno awan coma ti tao a magaraw gapu cadagitoy a rigat: ta dacayo met laeng ammoyo a naayabantayo nga maipaay itoy. 4 Ta kinapudnoanna, uray idi addacami cadacayo, impacpacaunami cadacayo nga agsagabatayto ti rigat; a cas naaramid, a paga-ammoyo. 5 Gapu met itoy, idinto a diac macaibturen, nangibaonac tapno maammoac ti pammatiyo, di la ket ta ti managsulisog sulisogennacayo, ket ti aramidmi agbalinto a barengbareng. 6 Ngem ita ta simmangpeten ni Timoteo a naggapu cadacayo, ket imbagana cadacami ti naragsac a damag ti pammati ken ayatyo, ken iti cancanayon a laglagipyo cadacami, ken mailiwcayo unay a cumita cadacami, a cas met ti iliwmi a mangkita cadacayo: 7 Gapuna, cacabsat, naliwliwacami maipapan cadacayo iti isuamin a tuocmi ken rigatmi gapu ti pammatiyo: 8 Ita agbiagtayo, no agtalinaedca a sititibker iti Apo. 9 Ta ania ti pagyaman a mabalinmi manen nga ited iti Dios gapu cadacayo, gapu iti amin a rag-o a pagragragsacmi maipuon cadacayo iti sangoanan ti Dios; 10 A rabii ken aldaw nga agdawdawatcami iti nasged unay tapno makitadacayo a rupanrupa, tapno paan-anayenmi ti nagcurangan ti pammatiyo? 11 Ngem ti met laeng Dios ken Amatayo, ken ni Apotayo a Jesus Cristo, ti mangidalan coma cadacami nga agturong cadacayo. 12 Ket aramiden coma ti Apo a dumackelcayo ken adduancayo iti ayat ti maysa ken maysa, ken cadagiti isuamin a tattao, a cas met ti panagayatmi cadacayo: 13 Tapno inton panungpalanna mapapigsa dagiti puspusoyo nga awan ti pacapilawanda ti kinasanto iti sangoanan ti Dios, ken Amatayo, intono iyaay ni Apotayo a Jesus Cristo a cuyugen dagiti isuamin a sasantona. CAPITULO 4 1 Camaudiananna dawatenmi, cacabsat, ken bagbaga-andacayo ken Apo Jesus, a cas iti sinursuroyo cadacami no casano ti rebbengyo a pannagna ken panangay-ayo ti Dios, casta met coma ti aramidenyo a rumang-ay nga rumang-ay. 2 Ta ammoyo no ania dagiti al-allagaden nga intedmi cadacayo gapu ken Apo Jesus. 3 Ta daytoy iti pagayatan ti Dios, isu ti pannacapagsantoyo, nga idianyo coma iti pannakicamalala: 4 A tunggal maysa cadacayo ket ammoyo coma nga salimetmetan ti bagiyo a mabuyogan iti kinasanto ken kinadayaw; 5 Saan nga iti tarigagay ti derrep, a casla cadagiti Gentil a dida ammo ti Dios: 6 Nga awan coma ti mangranggas ken mangallilaw iti cabsatna iti uray ania a banag: ta ti Apo isu ti bumales iti maipapan cadagitoy, a cas met impacpacauna ken pinanecnecanmin cadacayo. 7 Ta ti Dios saannatayo nga inayaban a maipaay iti kinarugit, no di ket iti kinasanto. 8 Gapuna dagiti sumukir, saan a tao ti sukiranna, no di ket iti Dios, isu a nangted cadatayo ti santo nga Espirituna. 9 Ngem no maipapan iti ayat nga incacabsatan saanyo a masapulen nga agsuratac cadacayo: ta dacayo met laeng nasursuroancayo iti Dios iti panagayat ti maysa ken maysa. 10 Ta pudno nga ar-aramidenyo a castan cadagiti isuamin a cacabsat nga adda iti amin a Macedonia: ngem dawatenmi cadacayo, cacabsat, a rumang-aycayo la coma a rumang-ay pay; 11 Ket agawaanyo coma ti agbiag a sitatalna, ket sangoenyo dagiti pagsapulanyo, ket agtrabahocayo babaen cadagiti im-imayo, a cas iti imbilinmi cadacayo; 12 Tapno macapagnacayo a sitatacneng cadagiti taga ruar, ket awan coma ti aniaman a pagcuranganyo. 13 Ngem dicami cayat nga awan ti ammoyo, cacabsat, maipapan cadagiti maturog, tapno dicayo agladingit, a cas dagiti dadduma nga awan inanamada. 14 Ta no patientayo a ni Jesus natay ket nagungar, casta met ti Dios iyegnanto dagiti maturog ken Jesus nga icuyog kencuana. 15 Ta daytoy ti ibagami cadacayo babaen ti sao ti Apo, a datayo a sibibiag datayo nga agbati agingga iti iyaay ti Apo saantayonto nga unaan dagiti naturogen. 16 Ta ti Apo met laeng aggapunto sadi langit a buyugen ti ariwawa, ti timec ti archangel, ken ti trompeta ti Dios: ket dagiti natay ken Cristo bumangondanto nga umuna: 17 Calpasanna datayo a sibibiag ken mabati maitayabtayo a maicuyog cadacuada cadagiti ul-ulep, a sumabet iti Apo iti tangatang: ket iti casta cancanayon nga addatayto iti Apo. 18 Ngarud pangliwliwayo iti maysa ken maysa dagitoy a sasao. CAPITULO 5 1 Ngem maipapan cadagiti al-aldaw ken dagiti pannawen, cacabsat, awan pacasapulanyon nga agsuratac cadacayo. 2 Ta dacayo met laeng ammoyo a naan-anay a ti aldaw iti Apo umay a cas iti mannanacaw iti rabii. 3 Intono sasaoenda, Talna ken talged; isunto metten ti iyaayna cadacuada ti kellaat a pannacadadael, cas iti panagpasical a mapasamac iti masicog; ket didanto macalisi. 4 Ngen dacayo, cacabsat, awancayo iti sipnget, tapno daydiay nga aldaw kellaatennacayo a cas mannanacaw. 5 Ta dacayo amin annacnacayo ti lawag, ken annac ti aldaw: datayo saantayo a taga rabii, ket saan met a taga sipnget. 6 Saantayo ngarud a maturog, a cas cadagiti dadduma; no di ket agsalucagtayo ken managparbengtayo coma. 7 Ta dagiti maturog maturogda iti rabii; ket dagiti nabartec nabartecda iti rabii. 8 Ngem no maipapan cadatayo, a taga aldaw, managparbengtayo, nga icapettayo a cabal ti barucong ti pammati ken ayat, ken cabal ti ulo, ti inanama ti pannacaisalacan. 9 Ta ti Dios saannatayo a tinudingan a maipaay ti pungtot, no di ket tapno magun-odantayo ti pannacaisalacan gapu ken Apotayo a Jesus Cristo, 10 Isu a natay gapu cadatayo, tapno, uray addatayo nga saan nga matmaturog wenno matmaturog, agbiagtayo coma a maicuyog kencuana. 11 Gapuna aglilinniwanliwacayo iti maysa ken maysa, ket agpipinnabilegcayo, cas ar-aramidenyo met. 12 Ket dawatenmi cadacayo, cacabsat, a bigbigenyo dagiti agbannog iti tengngayo, ken mamangulo 13 Ket patgenyo coma unay ida babaen ti ayat a maipanggep iti aramidda. Ken agtalinaedcayo a sitatalna ti tunggal maysa cadacayo. 14 Itan ibalacadmi cadacayo, cacabsat, bagbagaanyo dagiti naringgor, pabilgenyo dagiti maupay ti nakemda, patalgedanyo dagiti nacapuy, ket na-anuscayo coma cadagiti isuamin a tattao. 15 Kitaenyo ta awan ti manupapac iti siasino ti dakes iti dakes met laeng; ngem surutenyo a cancanayon ti nasayaat, iti maysa ken maysa cadacayo, ken cadagiti isuamin a tattao. 16 Agragsaccayo a cancanayon. 17 Agcararagcayo a di agressat. 18 Iti isuamin agyamancayo: ta daytoy iti pagayatan ti Dios ken Cristo Jesus ti maipapan cadacayo. 19 Saanyo nga iddepen ti Espiritu. 20 Saanyo a laisen dagiti panagpadto. 21 Suutenyo amin; salimetmetanyo a sititibker ti naimbag. 22 Idianyo iti amin a kita ti dakes. 23 Ket ti met laeng Dios ti cappia pagsantoennacayo a naan-anay; ket icararagco iti Dios nga ti isuamin nga espirituyo ken cararruayo ken bagiyo maaywananda coma amin nga awan pacapilawanda agingga iti iyu-umay ni Apotayo a Jesus Cristo. 24 Mapagtalcan ti nangayab cadacayo, isu a mangaramidto met. 25 Cacabsat, icarcararagandacami. 26 Cablaawanyo dagiti isuamin a cacabsat babaen iti nasantoan nga agep. 27 Ipaunay-unayco cadacayo gapu ti Apo a daytoy nga surat ket maibasa coma cadagiti isuamin a nasantoan nga cacabsat. 28 Ti parabur ni Apotayo a Jesus Cristo adda coma cadacayo. Amen. ¶ Ti umuna a libro nga maipaay cadagiti taga Tesalonica ket naisurat idiay Atenas.