TI LIBRO DAGITI SALMOS Salmo 1 ~ Salmo 85 SALMO 86 1 Bendito ti tao a saan a magna iti patigmaan dagiti nadangkes, wenno makipagtacder iti dalan dagiti managbasol, wenno agtugaw iti tugaw dagiti managsabsabrac. 2 Ngem ti pacaragsacanna adda iti linteg iti APO; ket iti lintegna imutectecanna iti aldaw ken rabii. 3 Ket isu ti caslanto maysa a cayo nga naimula cadagiti sibay dagiti carcarayan ti danum, a mangted iti bungana iti carbenganna nga tiempo; dagiti bulongna saandanto a malaylay; ken uray aniaman nga aramidenna ket rumang-ay. 4 Dagiti nadangkes saanda nga casta: ngem isuda ket casda la iti taep nga ipalais ti angin. 5 Ket iti casta dagiti nadangkes saandanto nga agtacder iti pannacaocom, uray dagiti managbasol iti gimong dagiti nalinteg. 6 Ta iti APO ammona ti dalan dagiti nalinteg: ngem ti dalan dagiti nadangkes mapucawto. SALMO 2 1 Apay a dagiti nasnacion agriribucda, ket dagiti tattao agpanpanunotda iti maysa a banag nga ubbaw? 2 Dagiti ar-ari ditoy daga pabilgenda dagiti bagida met laeng, ken dagiti turayen agpipinnatigmaanda, a maibusor iti APO, ken maibusor met iti pinulotanna, a kunkunada, 3 Pugsatentayo dagiti pangsinggalutda, ket ibellengtayo iti adayo cadatayo dagiti taltalida. 4 Daydiay a situtugaw cadagiti langlangit agcatawanto: ti Apo uyawennanto ida. 5 Ket iti casta casaonanto ida iti pungtotna, ket riribukenna ida iti napalaus a lucsawna. 6 Nupay no casta insaadco ti aric iti rabaw ti nasantoan a turodco a Sion. 7 Siac ibagacto ti maipapan iti bilin: iti APO kinunana caniac, Sica ti anacco; daytoy nga aldaw siac pinutotca. 8 Agkiddawca caniac, ket itedconto kenca dagiti nasnacion a maipaay a tawidmo, ken dagiti caungtoan a paset iti daga a cucuam. 9 Rumekemto ida iti pang-or a landoc; burakemto ida a casla banga ti agdamdamili. 10 Ita agmasiribcayo ngarud, O dacayo ar-ari: masursuroancayo coma, dacayo oc-ocom ditoy daga. 11 Agservicayo iti APO a sibubuteng, ket agragsaccayo a sikikintayeg. 12 Agepenyo ti anac, di la ket ta agpungtot, ket mapucawcayo iti dalan, no ti pungtotna ket sumged iti apagbassit. Bendito amin dagidiay nga agcammatalec kencuana. SALMO 3 Salmo ni David, idi itinarayanna ni Absalom nga anacna. 1 APO, casano ti iyaadu dagiti mangriribuc caniac! adu dagiti umalsa nga bumusor caniac. 2 Adu dagiti agcuna iti cararruac, Awan ti tulong ti Dios kencuana. Selah. 3 Ngem sica, O APO, ti maysa a calasag a manglawlaw caniac; ti dayagco, ken mamatan-oc iti uloc. 4 Awagac iti APO iti timecco, ket nangegnac manipud iti turodna nga nasantoan. Selah. 5 Nagiddaac ket nacaturogac; nagriingac; ta iti APO saranayennac. 6 Diacto agbuteng cadagiti linaclacsa a tattao, a nailicmut nga bumusor caniac. 7 Tumacd erca, O APO; isalacannac, O Diosco: ta sica sinugatmo amin dagiti cabusorco iti sangida; rinumecmo dagiti ngipen dagiti nadangkes. 8 Ti pannacaisalacan maipabiang iti APO: ti bendicionmo addada nga agpaay iti ilim. Selah. SALMO 4 Maipaay iti cangronaan nga Tomotokar a taga Neginoth, Maysa a Salmo ni David. 1 Sungbatannac no umawagac, O Dios ti kinalintegco: sica binang-arannac idi nagrigrigatac; caasiannac, ken denggem ti cararagco. 2 O dacayo nga annac dagiti tattao, casano ti cabayagto ti dayagco nga pagbalinenyo a pacaibabainan? casano ti cabayagto ti panagayatyo iti kinaubbaw, ken panangsapulyo iti kinaulbod? Selah. 3 Ngem ammoenyo nga iti APO inlasinna ti nadiosan a tao nga agpaay kencuana met laeng: iti APO dumngegto no umawagac kencuana. 4 Tumacderca nga sisisiddaaw, ket saanca nga agbasol: maki-umanca ita pusom iti pagiddaam, ket agtalnaca. Selah. 5 Idatonmo dagiti datdaton iti kinalinteg, ken agtalecca iti APO. 6 Adda adu nga agcuna: Asino ti mangiparangto cadatayo iti uray ania nga kinaimbag? APO, itag-aymo ta raniag dayta rupam cadacami. 7 Sica insaadmo ti kinaragsac itoy pusoc, iti ad-adu ngem cadagidiay tiempo no dagiti anienda ken ti baro nga aracda immaduda. 8 Agpadpada nga agiddaacto nga sitatalna, ken maturog: ta sica, APO, sicsica laeng ti mangisaad caniac iti kinatalged. SALMO 5 Agpaay iti cangronaan nga Tomotokar idiay Nehiloth, Maysa a Salmo ni David. 1 Imdengam coma dagiti sasaoc, O APO, imutectecam coma ti panpanunotec. 2 Denggem cadi iti timec ti asugco, Aric, ken Diosco: ta kenca agcararagac. 3 Ti timecco denggemto iti bigat, O APO; iti bigat iturongconto iti cararagco kenca, ket tumangadacto. 4 Ta sica saanca a maysa a Dios nga adda ayatna iti kinadakes: wenno ti dakes saan nga makitaeng kenca. 5 Dagiti napalangguad saandanto a macatacder iti sangoanam: sica guraem dagiti amin a managaramid iti kinadangkes. 6 Racrakemto dagidiay nga agsao iti tinitiri: iti APO guraenna dagiti daradara ken manangallilaw a tattao. 7 Ngem no caniac, umayacto iti balaymo iti caadu ti kinamanangngaasim: iti panagbuteng kenca agrucbabacto a situturong iti nasantoan a templom. 8 Idalannac, O APO, iti kinalintegmo gapu cadagiti cabusorco; palanasem ta dalanmo iti sangoanac. 9 Ta awan ti kinatalec iti ngiwatda; ti unegda napalalo a kinadakes; ti carabucobda isu ti maysa a silulucat nga tanem; pumasablogda babaen cadagiti dilada. 10 Dadaelem ida, O Dios; mapasagda coma a gapu cadagiti pammagbagada met laeng; pagtalawem ida babaen iti caadu dagiti salsalungasingda; ta isuda simmukirda kenca. 11 Ngem amin dagidiay nga agcamang kenca agragsac coma: umawagda coma nga agnanayon gapu iti rag-o, gapu ta icanawam ida: dagidiay met agayat ita naganmo agragsacda coma kenca. 12 Ta sica, APO, bendicionamto ti nalinteg; babaen iti parabur lawlawemto isuna a cas iti maysa a calasag. SALMO 6 Maipaay iti cangronaan nga Tomotokar nga taga Neginoth idiay Sheminith, Maysa a Salmo ni David. 1 O APO, saannac a babalawen iti panagungetmo, saannac met a dusaen ita sibabara a panaglucsawmo. 2 Caasiannac, O APO; ta nacapuyac: O APO, pasalun-atennac; ta dagiti tultulangco agbibinegda. 3 Casta met toy cararruac mariribuc unay: ket sica, O APO, casano ti cabayagna? 4 Agsublica, O APO, luc-atam toy cararruac: oh isalacannac gapu iti kinamanangngaasim. 5 Ta ken patay awan panglagipan kenca: idiay tanem asino ti agyamanto kenca? 6 Siac nabannogac gapu iti panagsasaibbecco; amin a rabii paglangoyac ti iddac; sibogac ti papagco cadagiti luluac. 7 Ti matac macullaapan gapu iti ladingit; lumacay maipuon cadagiti amin nga cabusorco. 8 Umadayo cayo caniac, dacayo amin a managaramid iti kinadakes; ta iti APO dinengngegna iti timec ti sangsangitco. 9 Iti APO dinengngegna ti dawatco; ti APO awatennanto ti cararagco. 10 Ipalubosmo coma amin dagiti cabcabusorco a mabainan ken mariribucan unay: pagsanudem ken mabainanda coma nga madardaras. SALMO 7 Shiggaion ni David, a kinantana nga naipaay iti APO, maipapan dagiti sasao ni Cush ti Benjamita. 1 O Apo nga Diosco, kenca agcamangac: isalacannac cadagiti isu-amin a mangparigat caniac, ket ispalennac: 2 Di la ket ta pigisenna toy cararruac cas iti maysa a leon, a lasanglasangenna, gapu no awan ti mangispal. 3 O APO nga Diosco, no inaramidco daytoy; no adda ti kinadakes cadagitoy nga im-imac; 4 No sinupapacac ti dakes iti tao nga sicacappia caniac; (wen, insalacanco nga awan ti gapuna ket isu iti cabusorco:) 5 Ti cabusor parigatenna coma toy cararruac, ken alaenna; wen, ken ipayatpayatna coma toy biagco iti daga, ken icabilna toy dayawco ti tapuc. Selah. 6 Tumacderca, O APO, ita ungetmo, bumangonca cadi a gapu iti pungtot dagiti cabusorco: ket agriingca gapu caniac iti panangocom nga sica ket inbilinmon. 7 Iti casta ti gimong dagiti il-ili lawlawendaca coma: ket maigapu ngarud cadacuada sica agsublica iti nangato. 8 Iti APO ocomenna dagiti il-ili: ocomennac, O APO, a mayannurot iti kinalintegco, ken mayannurot iti kinatarnawco nga adda caniac. 9 O ti kinadakes dagiti nadangkes gibusanam cadi; ngem ipasdecmo dagiti nalinteg: ta ti nalinteg a Dios suutenna dagiti puspuso ken is-isip. 10 Ti calasagco adda iti Dios, a mangisalacan cadagiti nalinteg ti pusoda. 11 Ti Dios ocomenna dagiti nalinteg, ket ti Dios siuunget cadagiti nadangcoc iti inaldaw-aldaw. 12 No ti tao saan nga agbabawi, isu asaennanto ti campilanna; inbiatnan ti panana, ket sisasagana. 13 Ket insaganana pay kencuana dagiti ar-arruaten ni patay; dinutocanna dagiti panpanana a maibusor cadagiti mamarparigat. 14 Adtoy, sumical iti kinadakes, ket nagsicog iti ranggas, ket nangipasngay iti kinatiri. 15 Inaramidna ti maysa a palab-og, ket kinalianna, ket natnag iti abut nga inaramidna. 16 Ti ranggasna agsublinto iti ulona met laeng, ket ti kinadawel nga inar-aramidna bumabanto iti coppocoppona met laeng. 17 Idaydayawconto ti APO a mayannatup iti kinalintegna: ket icancantacto ti panagdayaw iti nagan iti APO a cangatoan unay. SALMO 8 Agpaay iti cangronaan nga Tomotokar idiay Gittith, Maysa a Salmo ni David. 1 O APO nga Apomi, anian a nagtan-oc ta naganmo iti amin a daga! a nangisaad iti dayagmo iti rabaw dagiti langlangit. 2 Manipud iti ngiwat dagiti maladaga ken dagiti agsussuso dinutocam ti kinapigsa ta maigapu cadagiti cabcabusormo, tapno nabileg ti panangpaulimecmo ti cabusor ken ti manangibales. 3 No imutectecac dagiti langlangitmo, ti aramid dagita ramramaymo, ti bulan ken dagiti bitbituen, isuda nga insaadmo; 4 Ania ti tao, tapno sipapanunotca kencuana? ken ti anac ti tao, tapno sumarungcarca kencuana? 5 Ta isu inaramidmo a nababbaba bassit ngem dagiti angeles, ket isu ti binalangatam iti kinadayag ken kinadayaw. 6 Inaramidmo nga adda turayna cadagiti ar-aramid dagita im-imam; insaadmo amin nga banbanag iti babaen dagiti sacsacana: 7 Amin a carcarnero ken bacbaca, wen, ken dagiti an-animal iti away; 8 Dagiti tumatayab cadagiti tangatang, ken dagiti ican iti taaw, ken uray ania man nga aglasat iti daldalan dagiti tataaw. 9 O APO nga Apomi, anian a nagtan-oc ta naganmo iti amin nga daga! SALMO 9 Agpaay iti cangronaan nga Tomotokar idiay Muth-labben, Maysa a Salmo ni David. 1 Idaydayawcanto, O APO, iti isuamin nga pusoc; iparangconto amin dagiti nacascasdaaw nga ar-aramidmo. 2 Maragsacanacto ken rumagrag-oacto kenca: icancantacto ti panangidayaw ita naganmo, O sica a Cangatoan unay. 3 No dagiti cabusorco tumallicudda, maitibcol ken madadaeldanto iti sangoanam. 4 Ta sica sinaranaymo ti calintegac ken ringgorco; situtugawca iti trono a mangocom a sililinteg. 5 Binabalawmo dagiti nacion, dinadaelmo dagiti nadangkes, pinucawmo ti naganda iti agnanayon awan inggana. 6 O sica a cabusor, pannacadadael nacagtengda iti agnanayon a panaggibus: ket dagiti il-ili dinupracmo; iti pacalaglagipan cadacuada napucawen. 7 Ngem iti APO agtalinaed iti agnanayon: insaganana ti tronona iti panangocom. 8 Ket ocomennanto a sililinteg ti lubong, aramidennanto ti panangocom cadagiti il-ili a nalinteg. 9 Iti APO isunto met ti camang dagiti mailupitlupit, maysa a pagcamangan cadagiti tiempo ti riribuc. 10 Ket dagiti macaammo iti naganmo agcammatalecdanto kenca: ta sica, APO, saanmo a binaybay-an dagiti agbiroc kenca. 11 Cantaenyo dagiti pagdaydayaw iti APO, nga agnaed iti Sion: iwarnacyo cadagiti tattao dagiti ar-aramidna. 12 Ta intono isu ket agpalutput gapu iti dara, malagipnanto ida: saanna nga malipatan iti asug dagiti napacumbaba. 13 Mangngaasica coma caniac, O APO; matmatam ti riribuc a sagabaec cadagidiay gumurgura caniac, sica a mangaon caniac iti ruruangan ni patay: 14 Tapno maiparangarangco coma amin ti dayawmo cadagiti ruruangan ti anac nga babai ti Sion: agragragsacacto iti panangisalacanmo. 15 Dagiti nasnacion maipisocda iti palab-og nga inaramidda: iti bateng nga insanebda pacasimbaludan ti sacada met laeng. 16 Iti APO maammoan babaen ti panangocom nga inaramidnan: ti nadangkes nasilloanen iti aramid dagiti im-imana met laeng. Higgaion. Selah. 17 Dagiti nadangkes maipaturongdanto sadiay impierno, ken amin a nasnacion a manglipat iti Dios. 18 Ta ti macasapul saandanto nga cancanayon a malipatan: ket ti inanama dagiti napanglaw saanto met a maawan nga agnanayon. 19 Tumacderca, O APO; saan coma a macapagballigi ti tao: dagiti nasnacion maocomda coma dita saclangmo. 20 Pagbutngem coma ida, O APO: tapno dagiti nasnacion maammoanda coma nga taoda laeng. Selah. SALMO 10 1 Apayapay agintecca iti adayo unay, O APO? apayapay aglemmengca cadagiti tiempo ti riribuc? 2 Iti nadangkes iti kinatangsitna ket ilupitna ti napanglaw: ipalubosmo nga matiliwda coma cadagiti sicap nga inar-arapaapda. 3 Ta ti nadangkes pagpasindayawna ti calicagum ti pusona, ken benditoenna ti naagum, isu a ti APO ket caumsina. 4 Ti nadangkes, gapu iti kinatangsit ti langana, saanna a sapulen iti Dios: Ti Dios ket awan iti dagup dagiti panagpanpanunotna. 5 Dagiti cababalinna nairutda a cancanayon; dagiti panangocommo nangatngato ngem ti makitana: no maipapan iti amin a cabusorna, pugpugsoanna ida. 6 Cunana iti pusona, saannacto nga maan-ano: ta saannacto a pulos nga mariribucan. 7 Ti ngiwatna napno iti panangilunod ken panangiculbo ken panangilupit: iti babaen ti dilana adda ti kinaranggas ken kinaubbaw. 8 Agtugaw cadagiti disso a pagsaneban cadagiti purpuroc: cadagiti nalimed a disso papatayenna ti awanan basol: dagiti matana agsisiim a maibusor cadagiti napanglaw. 9 Agsibsibloc a nalimed a cas maysa a leon idiay aponna: adda nga agdadaan a mangtiliw iti napanglaw: tiliwenna ti napanglaw, no maawidnan iti batengna. 10 Agrucob, aginpapacumbaba, tapno ti napanglaw mapadso gapu cadagiti napigsa a buyotna. 11 Cunana iti pusona, ti Dios nalipatannan: inlingednan ti rupana; dinanto makita uray caanoman. 12 Bumangonca, O APO; O Dios, itayagmo ta imam: dica cadi lipatan ti napacumbaba. 13 Apayapay ti nadangkes umsienna ti Dios? ket kunana iti pusona, Saancanto nga agisingir. 14 Nakitamon; ta buybuyaem ti ranggas ken ti dakes a nakem, tapno balsem babaen iti imam: ti napanglaw agtalec kenca; sica ti mangtulong cadagiti ul-ulila. 15 Rumekem ti tackiag ti nadangkes ken ti dakes a tao: sukisukem ti kinadakesna inggana awan ti masaracam. 16 Iti APO isu ti Ari nga agnanayon nga awan ti inggana: dagiti nasnacion mapucawdan iti dagana. 17 APO, nangngegmo ti calicagum dagiti napacumbaba: isaganamto dagiti pusoda, sica iyemdengmonto ta lapayagmo a dumngeg: 18 Nga mangocom cadagiti ul-ulila ken maam-ames, tapno ti tao ti daga saan coman a mangam-ames. SALMO 11 Agpaay iti cangronaan nga Tomotokar, Maysa a Salmo ni David. 1 Iti APO ti pagcamangac: Casano nga cunayo itoy cararruac, Tumayabca a cas billit iti bantaymo? 2 Ta, adtoy, dagiti nadangkes biatenda ti bai-da, isigoda ti panada iti partengna, tapno panaenda a nalimed iti nalinteg ti pusona. 3 No dagiti pamunganayan madadaelda, ania ti mabalin nga aramiden ti nalinteg? 4 Iti APO adda iti nasantoan a templona, ti trono iti APO adda sadi langit: dagiti matana buybuyaenna, dagiti calub ti matana suutenda, dagiti annac dagiti tao. 5 Iti APO suutenna ti nalinteg: ngem ti nadangkes ken ti agayat iti kinaranggas guraen ti cararruana. 6 Cadagiti nadangkes isu itudonanto dagiti silsilo, apuy ken azufre, ken nacaal-alingget nga angin: isudanto ti pannacabagi ti copada. 7 Ta iti nalinteg nga APO ayatenna ti kinalinteg; ti rupana buyaennanto ti nalinteg. SALMO 12 Agpaay iti cangronaan nga Tomotokar idiay Sheminith, Maysa a Salmo ni David. 1 Bumadangca, APO; ta ti nadiosan a tao mapucawen; ta dagiti matalec mapucawda iti tengnga dagiti annac dagiti tao. 2 Agiinnulbodda tunggal maysa iti caarrubana: cadagiti macagargari nga bibbibig ken iti nagcaddua nga puso agsaoda. 3 Iti APO putdennanto amin nga macagargari nga bibbibig, ken ti dila nga agsao cadagiti napalangguad nga banbanag: 4 Nga kinunada, Iti dilami mangparucmacamto; dagiti bibigmi cucuami a bucod: siasinonto ti apo cadacami? 5 Gapu iti pannacailuplupit ti napanglaw, gapu iti sasainnec ti macasapul, ita bumangonacto, cuna iti APO; isu isaadconto nga sitatalged iti daydiay nga mangilupitlupit kencuana. 6 Dagiti sasao iti APO nadalusda a sasao: cas pirac a nalunag ti uneg ti horno a daga, nadalusan a naminpito. 7 Salimetmetamto ida, O APO, salacnibamto ida nga agnanayon manipud iti daytoy a caputotan. 8 Dagiti nadangkes magnada iti amin a pagnaan, no dagiti cadakesan nga tattao maitan-ocda. SALMO 13 Agpaay iti cangronaan nga Tomotokar, Maysa a Salmo ni David. 1 Casano ti capaut a lipatennac, O APO? agnanayon? casano ti capaut ti panangilingedmo caniac ita rupam? 2 Casano ti capaut ti panangawatconto iti bagbaga itoy cararruac, nga adda ladingit toy pusoc iti inaldaw? casano ti capaut ti cabusorco a natantan-oc ngem siac? 3 Imutectecam ken denggennac, O APO a Diosco: silawam dagitoy matac, di la ket maturogac ti turog ni patay; 4 Di la ket ta ti cabusorco kunana, nagballigiacon kencuana; ken dagiti mangriribuc caniac agragsacda no mapacsiatac. 5 Ngem siac nangnamnamaac ita kinamangngaasim; toy pusoc agragrag-o iti panangisalacanmo. 6 Cancantaacto iti APO, gapu ta sibubuslon a nangtaripato caniac. SALMO 14 Agpaay iti cangronaan nga Tomotokar, Maysa a Salmo ni David. 1 Ti maag kinunana iti pusona, Awan ti Dios. Isuda agrupsada, nagaramiddan iti nacarimrimon nga ar-aramid, awan iti siasinoman nga agaramid iti naimbag. 2 Iti APO minatmatanna manipud sadi langit dagiti annac dagiti tatao, tapno kitaenna no adda cadacuada ti siasinoman a nacaawat, a nagbiroc iti Dios. 3 Isuda amin nagbaw-ingda; isuda amin nagbalinda a naduggiot: awan ti siasinoman nga agaramid iti naimbag, awan, uray maysa. 4 Awan ammoda cadi dagiti agar-aramid iti kinakillo? a lamutenda dagiti tattaoc a cas panaglamutda iti tinapay, ket saanda nga awagan iti APO. 5 Idiay addaandan iti dackel a buteng: ta ti Dios adda iti caputotan dagiti nalinteg. 6 Inbabainyo ti patigmaan ti napanglaw, gapu ta iti APO ti camangna. 7 O ta ti pannacaisalacan ti Israel umay coma manipud Sion! intono iti APO lapsutenna iti pannacacayaw ti ilina, ni Jacob agragsacto, ken ni Israel agrag-onto. SALMO 15 Maysa a Salmo ni David 1 APO, asino ti agtaengto ita tabernaculom? asino ti agnaedto ita nasantoan a turodmo? 2 Dayta a magmagna a nalinteg, ken agaramid iti kinalinteg, ket agsao iti pudno manipud iti pusona. 3 Dayta a saan a mamadpadakes gapu iti dilana, ket saan a mangranggas iti caarrubana, wenno mangumsi a maibusor iti caarrubana. 4 A cadagiti matana ti nadangkes a tao malais; ngem idaydayawna dagiti agbuteng iti APO. Ti agsapata iti pacadacsanna met laeng, ket saan nga agbaliw. 5 Dayta a saan nga agpaanac iti piracna, ket saanna nga awaten ti pannucsoc a maibusor cadagiti awanan ammo. Daydiay nga agaramid cadagitoy nga banbanag ket saanto pulos a magaraw. SALMO 16 Michtam ni David 1 Pagtalinaedennac, O Dios: ta kenca agcamangac. 2 O cararruac, kinunam iti APO, Sica ti Apoc: ti kinaimbagco saan nga dumanon kenca; 3 Ngem cadagiti sasantos nga adda iti daga, ken cadagiti catan-ocan, isuda dagiti amin a pagay-ayatac. 4 Dagiti ladladingit umadudanto dagiti agdardaras nga agbiroc iti sabali nga dios: dagiti datonda nga inumen a dara saanconto nga idaton, wenno aramaten ti nagnaganda cadagiti bibbibigco. 5 Iti APO isu ti pannaca-apag a tawidco ken copac: sica pasingkedam ti bingayco. 6 Dagiti beddeng naibatangda caniac cadagiti nacaay-ayo a disdisso; wen, addaanac iti nasayaat a tawid. 7 Benditoecto iti APO, a nangted caniac iti patigmaan: ti nagugunegco isursuronac pay ti tiemtiempo ti rabii. 8 Insaadco iti APO a cancanayon iti sangoanac: gapu ta adda iti macanawanco, saannacto a magaraw. 9 Gapuna ti pusoc sirarag-o, ket ti dayagco agragragsac: ti lasagco aginananto met iti namnama. 10 Ta saanmonto a baybay-an toy cararruac idiay impierno10; saanmonto met nga ipalubos a Ti Santom ket makitana ti panagrupsa. 11 Ipakitamto caniac ti dan-a ti biag: ita sangoanam adda iti naan-anay nga rag-o; ita macanawanmo addada dagiti pacaay-aywan nga agnanayon. SALMO 17 Maysa a cararag ni David. 1 Denggem coma ti calintegan, O APO, imdengannac itoy asugco, dumngegca coma itoy cararagco, a saan nga agtaud cadagiti naballicog nga bibbibig. 2 Rummuar coma ti maikeddeng caniac manipud dita saclangmo; dagiti matam imatanganda coma dagiti banbanag nga agpapadapada. 3 Pinadasmon toy pusoc; sinarungcarannacon iti rabii; sinuutnacon, ket awanto ti masaracam; pinanggepco a toy ngiwatco dinto macalabsing. 4 Maipapan cadagiti ar-aramid dagiti tattao, gapu iti balicas dagiti bibbibigmo siac nagannadac cadagiti daldalan ti managdadael. 5 Igagam dagiti addangco cadagiti daldalanmo, tapno dagiti addangco saanda a maicaglis. 6 Inawaganca, ta sungbatannacto, O Dios: iyallingagmo ta lapayagmo caniac, ket denggem ti saoec. 7 Iparangmo ta nacascasdaaw a kinamanagayatmo, O sica a gapu ita imam a macanawan isalacanmo dagiti agcamang kenca manipud cadagiti tumacder a bumusor cadacuada. 8 Salimetmetannac cadi a cas iti tao-tao ta matam, ilemmengnac iti baba ti salinong dagiti paypayacmo, 9 Cadagiti nadangkes a mangirurumen caniac, cadagiti pumapatay a cabusorco, a mangalicubcub caniac. 10 Naibungonda iti tabada met laeng: gapu iti ngiwatda agsaoda a sipapalangguad. 11 Isuda inalicubcubandacami ita cadagiti ad-addangmi: itaengdan dagiti matmatada a mangitublac cadacami iti daga; 12 Isu cas maysa a leon a naagawa iti matiliwna, ket cas iti maysa nga agtutubo a leon nga agsibsibloc cadagiti nalimed a disdisso. 13 Tumacderca, O APO, baw-ingem isuna, itublacmo isuna: isalacanmo toy cararruac cadagiti nadangkes, gapu ita campilanmo: 14 Ken cadagiti tao gapu ita imam, O APO, cadagiti tao a nailubongan, a ti apagda adda iti daytoy a panagbiag, ket ti tianda punnoem iti nailemmeng a gamengmo: isuda napnecda cadagiti ub-ubbing, ket ibatida ti tidda dagiti cucuada cadagiti maladagada. 15 Ngem no caniac, imatangacto ta rupam iti naincalintegan: mapnecacto, no agriingac, a cas ti caaspingmo. SALMO 18 Agpaay iti cangronaan nga Tomotokar, Maysa a Salmo ni David, ti adipen iti APO, idi kinasaritana iti APO dagitoy nga sasao daytoy nga canta iti daydiay aldaw nga panangispal iti APO kencuana manipud cadagiti im-ima dagiti isuamin nga cabusorna, ken manipud cadagiti ima ni Saul: Ket kinunana, 1 Siac ayatenca, O APO, a pigsac. 2 Iti APO isu ti batoc, ken sarikedkedco, ken mangispal caniac; Diosco, pigsac, isu a pagcamangacto; calasagco, ken iti sara ti pannacaisalacanco, ken iti nangato a torrec. 3 Siac awagacto iti APO, isu a maicari a maidaydayaw: iti casta maisalacanacto cadagiti cabusorco. 4 Dagiti ladladingit ni patay alicubcobendac, ket dagiti laylayus ti nadakes a tattao pinagbutengdac. 5 Dagiti ladladingit ni impierno licmutendac: dagiti silsilo ni patay immadanida caniac. 6 Iti panagpulcocco inawagac iti APO, ket immasugac iti Diosco: nangngegna ti timecco nanipud iti templona, ket ti asugco dimmanon ti saclangna, uray pay cadagiti laplapayagna. 7 Iti casta ti daga nagungon ken nagpigerger; dagiti pamuon met dagiti turturod naggarawda ken nagginginedda, gapu ta isu nagpungtot. 8 Ngimmato ti maysa nga asuc a rimmuar cadagiti pagangsanna, ket ti apuy a rimmuar iti ngiwatna nagalun-on: begbeggang dimmarangda gapu kencuana. 9 Isu pinagluyocna met dagiti langlangit, ket bimmaba: ket ti kinasipnget adda idi iti baba dagiti sacana. 10 Ket naglugan iti maysa a kerubin, ket timmayab: wen, timmayab cadagiti paypayac ti angin. 11 Pinagbalinna ti sipnget a nalimed nga dissona; ti bengbengna nga aglicmut kencuana ket kinasipnget dagiti dandanum ken napuscol nga ul-ulep dagiti tangatang. 12 Iti kinasilnag iti sangoananna dagiti napuscol nga ul-ulep naglasatda, nagbukel nga uraro ken beggang ti apuy. 13 Ti APO naggurrood cadagiti langlangit, ket ti Cangatoan nagtimec; nagbukel nga uraro ken beggang ti apuy. 14 Wen, imbiatna dagiti panpanana, ken winarawarana ida; pinagkimatkimatna ti adu, ken riniribucna ida. 15 Idin dagiti pagayusan ti dandanum nagparangda, ket dagiti pamuon ti lubong nawacnitanda iti panangbabalawmo, O APO, babaen iti pugso ti angesmo dagiti pagangsam. 16 Nangibaon nanipud iti ngato, innalanac, inaonnac cadagiti adu a dandanum. 17 Insalacannac iti napigsa a cabusorco, ken cadagiti gimmura caniac: ta napigsada unay caniac. 18 Immayda caniac iti aldaw ti pannacariribucco: ngem iti APO isu ti taclinco. 19 Innalanac met nga inpan iti maysa a nalawa a lugar; insalacannac, agsipud ta caay-ayonac. 20 Iti APO ginunggonaannac iti mayannatup ti kinalintegco; mayannatup iti kinadalus dagiti im-imac sinupapacannac. 21 Ta siac sinalimetmetac dagiti daldalan iti APO, ket saannac a pimmanaw a sidadangkes iti Diosco. 22 Ta isuamin dagiti imbilbilinna addada idi iti sangoanac, ket diac inyadayo dagiti linlintegna caniac. 23 Siac met ket nalinteg idi kencuana, ket ingagac ti bagic manipud iti kinadangkesco. 24 Gapuna iti APO sinupapacannac iti catutopan ti kinalintegco, iti catutopan ti kinadalus dagiti im-imac cadagiti imatangna. 25 Cadagiti naasi sica agparangcanto a naasi; cadagiti naan-anay a tao agparangcanto a cas naan-anay; 26 Cadagiti nadalus agparangcanto a nadalus; ket cadagiti nadangcoc agparangcanto a sibubusor. 27 Ta isalacanmonto dagiti mairurumen a tattao; ngem ipababamto dagiti sipapalangguad a matmata. 28 Ta gangatamto ti pagsilawac: ti APO a Diosco parangrangennanto ti kinasipngetco. 29 Ta gapu kenca duclosec ti sangabuyotan; ket babaen iti Diosco linagtoc ti maysa a bacud. 30 Maipanggep iti Dios, ti dalanna awan pagcuranganna: ti sao iti APO napadasen: isu ti maysa a calasag cadagiti amin ng agcamang kencuana. 31 Ta siasino ti Dios no saan laeng a iti APO? wenno siasino ti maysa a bato no saan laeng a ti Diostayo? 32 Ti Dios ti mangbarikes caniac iti pigsa, ket pagbalinenna ti dalanco nga awan pagcuranganna. 33 Pagbalinenna dagitoy sacsacac a cas sacsaca ti ugsa, ket italinaednac cadagiti nangangato a disdissoc. 34 Isurona dagitoy im-imac iti pannakigubat, iti casta biatenda ti maysa a bai a landoc dagitoy tactackiagco. 35 Sica intedmo met caniac ti calasag ti panangisalacanmo: ket ti macanawan nga imam tinengtengngelnac, ket ta tacnengmo pinadackelnac. 36 Pinadackelmo dagiti addangco iti babaec, ket dagiti sacac saanda a naicaglis. 37 Kinamatco dagiti cabusorco, ket nacamacamco ida: diacto met agsubli manen inggana iti magibusananda. 38 Sinugatco ida inggana iti dida mabalin ti bumangon: natuangdan iti baba dagiti sacac. 39 Gapu ta binaricsannac iti pigsa a maipaay iti gubat: pinarucmam iti babaec dagiti immalsa nga bimmusor caniac. 40 Intedmo pay dagiti tengtengnged dagiti cabusorco; tapno pucawecto coma dagiti gumura caniac. 41 Nagpuccawda, ngem awan ti salacanda: uray pay iti APO, ngem dina ida impangag. 42 Idi casta ngarud rinumecrumecco ida a cas iti tapuc a mayang-angin: impurruacco ida a cas iti rugit ti dalan. 43 Inispalnac cadagiti panagriribuc dagiti umili; ken pinagbalinnac a panguloen dagiti nacion: maysa nga umili nga diac naammoan isudanto dagiti agservi caniac. 44 Apaman a madamagdac, agtulnogdanto caniac: dagiti gangannaet agpacumbabadanto caniac. 45 Dagiti gangannaet cumpesdanto, ket umaydanto a sititigerger manipud cadagiti pagsalindeganda. 46 Iti APO sibibiag; ket bendito coma ti batoc; ket ti Dios ti salacanco maitan-oc coma. 47 Isu met laeng ti Dios ti bumales gapu caniac, ken mangparucma cadagiti tattao iti babaec. 48 Ispalennac cadagiti cabusorco: wen, sica intag-aynac iti ngatoen dagiti bumusor caniac: inispalnac iti narungsot a tao. 49 Iti casta ngarud agyamanacto kenca, O APO, iti tengnga dagiti nasnacion, ket icancantacto dagiti panangidaydayaw iti naganmo. 50 Dackel a pannacaispal ipaayna iti arina; ket ipakitana ti kinaasi iti pinulotanna, ken ni David, ken iti putotna iti agnanayon. SALMO 19 Agpaay iti cangronaan nga Tomotokar, Maysa a Salmo ni David. 1 Dagiti langlangit iparangarangda iti dayag ti Dios; ket ti tangatang ipakitana dagiti aramid ti imana. 2 Iti inaldaw aldaw iyesngawda ti sao, ket iti rinabii iparangda ti pannacaammo. 3 Awan ti sao wenno pagsasao, a ti timecda ket saan a mangngeg. 4 Ti ugisda sumacnap iti dagup ti daga, ket ti balicasda aginggadan iti ungto ti lubong. Cadacuada insaadna ti tabernaculo a maipaay iti init, 5 Isu a cas novio a rumrummuar iti siledna, ket agragsac a cas nabileg a lalaki a makilumba ti tarayan. 6 Ti pagruaranna manipud iti pungto dagiti langlangit, ket ti pagricusanna agingga cadagiti pungpungtona: ket awan ti mailemmeng iti kinapudotna. 7 Ti linteg iti APO awan pagcuranganna, pabaroenna ti cararrua: ti pammanecnec iti APO ket awan duduana, ken pagsiribenna iti nanengneng. 8 Dagiti al-allagaden iti APO nalintegda, paragsakenda ti puso: ti bilin iti APO natarnaw, lawaganna dagiti matmata. 9 Ti buteng iti APO nadalus, agtalinaed nga agnanayon: dagiti linlinteg iti APO pudnoda ken nalintegda amin a padapada. 10 Ad-addada a matarigagayan ngem ti balitoc, wen, uray pay ngem ti adu a nasudi nga balitoc: nasamsam-itda met ngem ti diro ken ti calaba. 11 Maysa pay cadacuada ti adipenmo maballaagan: ken ti panangsalimetmet cadacuada ket adda dackel a gunggona. 12 Siasino ti macaawat cadagiti bucudna nga allilaw? dalusannac cadi cadagiti nalimed nga pagbiddutan. 13 Igawidmo met ti adipenmo cadagiti kinacuspag a basol; dica ipalubos ti panangiturayda caniac: iti casta nalintegacto, ket saannacto nga macabasol iti daydiay dackel nga salungasing. 14 Dagiti coma sasao itoy ngiwatco, ken ti pampanunot itoy pusoc, maawatda cadi ita saclangmo, O APO, pigsac, ken mannubbotco. SALMO 20 Agpaay iti cangronaan nga Tomotokar, Maysa a Salmo ni David. 1 Iti APO denggennaca coma iti aldaw ti riribuc; ti nagan ti Dios ni Jacob icanawanaca; 2 Ibaonannaca iti badang manipud iti santuario, ket pabilgennaca manipud Sion; 3 Lagipenna amin dagiti datdatonmo, ken awatenna ti pinuoran a sacrificiom; Selah. 4 Itdenna kenca ti tarigagay ta pusom, ket tungpalenna amin a bagbagam. 5 Agragsaccamto iti panangisalacanmo, ket iti nagan ti Diostayo ibayogtayto dagiti wagaywaytayo: ti APO tungpalenna amin dagiti dawdawatmo. 6 Ita ammocon a iti APO salacnibanna ti pinulotanna; imdengannanto manipud iti nasantoan a langitna babaen iti mangisalacan a pigsa ti macanawan nga imana. 7 Dadduma agcammatalecda cadagiti luglugan, ket dadduma cadagiti cabcabalyo: ngem laglagipenminto ti nagan iti APO a Diostayo. 8 Isuda macusbo ket mapadsoda: ngem datayo nabangontayo, ket agtacdertayo a sililinteg. 9 Mangisalacanca, APO: ipalubosmo nga ti ari denggennacami no umawagcami. SALMO 21 Agpaay iti cangronaan nga Tomotokar, Maysa a Salmo ni David. 1 Ti ari pagragsacannanto ta bilegmo, O APO; ket iti panangisalacanmo casta la unay a pagragsacannanto! 2 Intedmo kencuana ti tarigagay ti pusona, ket dica impaidam ti dawat dagiti bibbibigna. Selah. 3 Ta sica isabatam cadagiti parabur ti kinaimbag: insaadmo ti maysa a balangat ti nasudi nga balitoc iti ulona. 4 Dimmawat kenca iti biag, ket iniccam, ti met laeng caatiddug dagiti aldaw iti kinaagnanayon. 5 Dackel ti dayagna iti panangisalacanmo: dayaw ken kinadaeg insaadmo kencuana. 6 Ta pinagbalinmo nga isu ti nabenditoan unay iti agnanayon: pinaragsacmo iti agluplupias iti saclangmo. 7 Ta ti ari agcammatalec iti APO, ket babaen ti kinaasi ti Cangatoan unay isu saanto a magaraw. 8 Ti imam masucalannanto amin dagiti cabcabusormo: ta macanawan nga imam masucalannanto dagitoy a gumura kenca. 9 Pagbalinemto ida a cas sumsumged a horno intono tiempo ti panagungetmo: iti APO alun-onennanto ida iti pungtotna, ket ti apuy runawennanto ida. 10 Ti bungada pucawemto ditoy daga, ken ti bin-ida cadagiti annac dagiti tattao. 11 Ta nagpanagemda iti dakes a maibusor kenca: binalabalada ti maysa a nasicap nga panggep, a dida nabalinan nga aramiden. 12 Gapuna a pagtallicudemto ida, intono isaganamto dagiti panpanam cadagiti parparteng nga ipaturong a maibusor iti rupada. 13 Maitan-occa coma, APO, ita bucodmo a bileg: iti casta icanta ken idayawminto ta pannacabalinmo. SALMO 22 Agpaay iti cangronaan nga Tomotokar iti Aijeleth Shahar, Maysa a Salmo ni David. 1 Diosco, Diosco, apayapay a binaybay-annac? Apay adayoca man unay iti panangarayatmo caniac, ken cadagiti sasao ti panagungorco? 2 O Diosco, umawagac iti aldaw, ngem sica dinac impangag; ken iti rabii, ken saanac nga agulimec. 3 Ngem sica santoca, O sica nga agtalinaed cadagiti panangidaydayaw ti Israel. 4 Dagiti dadackelmi nagtalecda kenca: nagtalecda, ket sica inispalmo ida. 5 Immickisda kenca, ket naispalda: nagtalecda kenca, ket dida naibabain. 6 Ngem maysaac laeng nga igges, ket saanac a tao; maysa a nacababain cadagiti tattao, ken linais dagiti umili. 7 Amin a macakita caniac catawaandac a misootan: aglibbida, ingilangilda ti uloda ket kunkunada, 8 Nagcammatalec iti APO tapno isu ispalenna: bay-anyo ta ispalenna, idinto nga isu ti pagay-ayatanna. 9 Ngem sica ti nangaon caniac iti tian: sica pinangnamnamanac idi addaac pay laeng iti barucong ni inac. 10 Sica ti nacaipurruacac manipud iti tian: sica ti Diosco nanipud idi addaac idiay tian ni inac. 11 Dica coma adayu caniac; ta ti riribuc asideg; ta awan ti tumulong. 12 Adu dagiti toro a nanglicmut caniac: dagiti napigsa a tortoro ti Bashan sinalimpupocdac. 13 Ingangada caniac dagiti ngiwatda, a cas umalun-on ken aguga a leon. 14 Naibucbucac a cas danum, ket amin dagiti tultulangco napagsisinada cadagiti nagsusuupanda: toy pusoc cas allid; malunag ditoy tengnga iti unegco. 15 Ti pigsac namagmagan a cas maysa a damili a nabuong; ket ti dilac cumpet iti ngadasco; ket sica impisocnac iti tapuc ni patay. 16 Ta dagiti as-aso linacubdac: ti taripnong dagiti managdacdakes linicmutdac: sinalputda dagiti im-imac ken sacsacac. 17 Mabalinco nga ibaga cadagiti amin a tultulangco: matmatmatanda ken mulmulenglengandac. 18 Pagbibinglayanda dagiti pagan-anayco, ket paggiginnasatanda iti cawesco. 19 Ngem dica coma adayu, O APO: O sica nga pigsac, agdarasca a mangtulong caniac. 20 Salacnibam itoy cararruac iti campilan; toy ay-ayatec iti pannacabalin ti aso. 21 Isalacannac iti ngiwat ti leon: ta nangegnac cadagiti sarsara dagiti cabcabalyo nga adda sarsarana. 22 Iparangarangconto ta naganmo cadagiti cacabsatco: iti tengnga ti gimong idaydayawcanto. 23 Dacayo nga agbuteng iti APO, idaydayawyo isuna; dacayo amin a caputotan ni Jacob, ipadayagyo isuna; ket agbutengcayo kencuana, dacayo amin a caputotan ni Israel. 24 Ta isu saanna nga inumsi ken kinauma ti leddaang ti mapaldaangan; saanna met nga inlinged kencuana ti rupana; ngem idi immawag kencuana, isu dimngeg. 25 Ti panagdayawco sica ti pacaigapuanna idiay uneg ti dackel nga gimong: bayadacto dagiti carcaric iti saclang dagiti agbuteng kencuana. 26 Dagiti naemma mangandanto ket mapnecdanto: idaydayawdanto iti APO dagiti agsapul kencuana: ti pusoyo agbiagda nga agnanayon. 27 Amin dagiti pungpungto ti daga lumagip ken agsublidanto iti APO: ket amin nga agcacabaggian cadagiti nasnacion agrucbabdanto iti saclangmo. 28 Ta ti pagarian ket cucua iti APO: ket isu ti mangituray cadagiti nasnacion. 29 Amin dagiti nanam-ay ditoy daga mangan ken agdaydayawdanto: amin dagiti agpababa iti tapuc agrucnoydanto iti saclangna: ket awan ti macabalin a mangtaginayon a sibibiag ti cararruana. 30 Maysa a caputotan agservinto kencuana; maibilangto a biang ti Apo iti maysa a caputotan. 31 Umaydanto, ket ibunannagdanto ti kinalintegna iti umili a mayanacto, nga isu ti nangaramid daytoy. SALMO 23 Maysa a Salmo ni David. 1 Ti APO isu iti pastorco; awanto ti pagcurangac. 2 Ipaiddanac cadagiti nalasbang a pagaraban: idalannac iti sibay dagiti natalna nga dandanum. 3 Pabaroenna daytoy cararruac: iturongnac cadagiti dandan-a ti kinalinteg a gapu iti naganna. 4 Wen, uray magnaac iti gingget ti sipnget ni patay, diacto agbuteng iti dakes: ta sicucuyogca caniac; ti barasmo ken sarucodmo mamakiredda caniac. 5 Isaganam ti panganan iti sangoc iti imatang dagiti cabusorco: pinulotam ti uloc iti lana; ti malucongco agliplipias. 6 Kinaagpaysona da kinaimbag ken kinamananga-asi sumurotdanto caniac dagup dagiti al-aldaw ti panagbiagco: ket agtaengacto iti balay ti APO nga agnanayon. SALMO 24 Maysa a Salmo ni David. 1 Ti daga cucua iti APO, ken amin nga adda kencuana; ti lubong, ken dagiti agnaed kencuana. 2 Ta binangonna iti rabaw dagiti tataaw, ket impasdecna iti rabaw dagiti dadackel nga dandanum. 3 Siasino ti umulinto iti turod iti APO? wenno siasino ti agtacderto iti nasantoan a dissona? 4 Daydiay nga addaan nadalus nga im-ima, ken natarnaw a puso; nga saan a nangitan-oc iti cararruana iti kinaubbaw, wenno nagsapata iti panangallilaw. 5 Awatennanto ti bendicion nga aggapu iti APO, ken ti kinalinteg nga aggapu iti Dios ti pannacaisalacanna. 6 Daytoy ti caputotan dagiti agsapsapul kencuana, nga agsapul ita rupam, O Jacob. Selah. 7 Ingatoyo dagiti ul-uloyo, O dacayo a ruruangan; maipangatocayo coma, dacayo agnanayon a rikrikep; ket ti Ari iti gloria sumrecto. 8 Siasino daytoy nga Ari iti gloria? Iti APO a napigsa ken mannacabalin, iti APO a mannacabalin iti gubat. 9 Ipangotoyo dagiti ul-uloyo, O dacayo ruruangan; ipangatoyo coma ida, dacayo agnanayon a rikrikep; ket ti Ari iti gloria sumrecto. 10 Siasino daytoy nga Ari iti gloria? Iti APO dagiti buybuyot, isu ti Ari iti gloria. Selah. SALMO 25 Maysa a Salmo ni David. 1 Kenca, O APO, itangadco itoy cararruac. 2 O Diosco, kenca agtalecac: dinac baybay-an a maibabain, dica ipalubos a dagiti cabusorco agballigida caniac. 3 Wen, awan coma ti ipalubosmo dagiti agpannuray kenca a maibabainto: ipalubosmo a maibabain coma dagiti managlabsing nga awan gapgapuna. 4 Iparangmo caniac dagiti daldalanmo, O APO; isurom caniac dagiti dandan-am. 5 Iturongnac iti kinapudnom, ket isuronac: ta sica ti Dios ti pannacaisalacanco; ta kenca agur-urayac iti amin a sangnga-aldaw. 6 Lagipem, O APO, dagiti nadungngo a caasim ken dagiti kinamanagayatmo; ta agnanayonda nanipud idi ugma. 7 Dica lagipen dagiti basbasol ti kinaagtutuboc, wenno dagiti lablabsingco: cas mayannurot iti asim sica lagipennac coma gapu iti kinaimbagmo, O APO. 8 Naimbag ket nalinteg iti APO: gapuna isuronanto dagiti managbasol iti dalan. 9 Iturongnanto ti naemma iti kinalinteg: ket isuronanto ti naemma iti dalanna. 10 Amin a dandan-a iti APO asida ken pudnoda daydiay agtalinaed ti tulagna ken iti pammanecnecna. 11 Gapu iti caicarian ti naganmo, O APO, pacawanem ti kinadakesco; ta dackel. 12 Asino a tao ti agbuteng iti APO? daydiay nga isuronanto iti dalan a pilienna. 13 Ti cararruana agnaedto iti kinatalna; ket ti putotna tawidennanto ti daga. 14 Ti palimed iti APO addanto cadagiti agbuteng kencuana; ket iparangnanto cadacuada ti tulagna. 15 Dagiti matac agnanayonda a situturong iti APO; ta alut-utennanto dagiti sacsacac iti bateng. 16 Taliawennac cadi, ken caasiannac cadi; ta matalimpungawac ken maducotanac. 17 Dagiti dandanag toy pusoc dimmadackelda: O alawennac cadi cadagiti pacarigatac. 18 Imatangam ti ducotco ken ti rigatco; ket pacawanem amin dagiti basbasolco. 19 Imatangam dagiti cabusorco, ta aduda; ket guraendac iti naranggas a gura. 20 O igagam toy cararruac, ket ispalennac: dinac baybay-an a maibabain; ta nagcammatalecac kenca. 21 Ti kinatarnaw ken kinalinteg salacnibandac coma; ta sica ti ur-urayec. 22 Subbotem ti Israel, O Dios, amin a pacaducotanna. SALMO 26 Maysa a Salmo ni David. 1 Ocomennac, O APO; ta nagnaac iti kinatarnawco: nagtalecac met iti APO; gapuna saannacto nga maicaglis. 2 Usigennac, O APO, ket padasennac; tingitingem toy isipco ken pusoc. 3 Ta ti kinamanagayatmo adda iti sango dagiti matac: ken nagnaac iti kinapudnom. 4 Saanac a nakicatugaw cadagiti ubbaw nga tattao, ken diacto met sumrec a makicuyog cadagiti mamagsina. 5 Cagurac ti gimong dagiti managdacdakes; ket diacto makicatugaw cadagiti nadangkes. 6 Buggoacto dagiti im-imac babaen ti kinadalus: iti casta liclicmutecto ti altarmo, O APO: 7 Tapno mairacuracco ti timec ti panagyaman, ken maibagac amin dagiti nacascasdaaw nga ar-aramidmo. 8 APO, ayatec ti pagnaedan a balaymo, ken ti ayan a pagnaedan ti kinadayawmo. 9 Dica itipon toy cararruac cadagiti managbasol, wenno iti biagco cadagiti daradara nga tattao: 10 A cadagiti im-imada adda ti kinadangkes, ket ti macanawan nga imada napno cadagiti pangsucsoc. 11 Ngem no siac, magnaaacto iti kinatarnawco: subbotennac, ket mangnga-asica cadi caniac. 12 Ti sacac agtacder iti nasimpa a disso: cadagiti gimgimong benditoecto iti APO. SALMO 27 Maysa a Salmo ni David. 1 Iti APO isu ti silaw ken salacanco; asino ti cabutengconto? ti APO isu ti bileg ti biagco; siasino ti pagbutengacto? 2 No dagiti managdacdakes, uray dagiti cabusorco ken carupacco, dinarupdac tapno lamutenda ti lasagco, naitibcolda ken natuangda. 3 Uray sangabuyotan ti agpacarso a bumusor caniac, ti pusoc dinto agbuteng: uray no gubat ti maisango caniac, nupay casta iti daytoy sitatalecacto laeng. 4 Maysa a banag ti dinawatco iti APO, isu a birokecto; ti panagtaengco coma iti balay iti APO iti dagup dagiti al-aldaw ti biagco, tapno buyaec iti imnas ti APO, ken ti agsalsaludsud iti uneg ti templona. 5 Ta iti aldaw ti panagrigat igaganacto a sililimed iti salinongna: iti palimed ti tabernaculona ilemmengnacto; isalpanacto iti tapaw iti maysa a bato. 6 Ket ita ti uloc maital-onto iti ngatoan dagiti cabcabusorco a silalawlaw caniac: ngarud idatonconto iti tabernaculona dagiti datdaton ti ragsac; agcantaacto, wen, cantaacto dagiti panangidaydayaw iti APO. 7 Denggem, O APO, no umkisac iti timecco: caasiannac met, ket sungbatannac. 8 Idi no kinunam, Sapulenyo ti rupac; toy pusoc kinunana kenca, Ta rupam, APO, sapulecto. 9 Dica ilinged ta rupam caniac; dica pagtalawen a capungtot toy adipenmo: sican ti tulongco; dinac panawan, wenno baybay-an, O Dios ti salacanco. 10 No da amac ken inac baybay-andac, ti APO pidutennacto. 11 Isurom caniac ti dalanmo, O APO, ket iturongnac iti nabatad a dan-a, gapu cadagiti cabusorco. 12 Dinac iyawat iti pagayatan dagiti cabcabusorco: ta dagiti natiri a sacsacsi timmacderda a bumusor caniac, ket dagita isang-awda ti kinadawel. 13 Nagtalimpungawac coma, no diac coma namati a makitac ti kinaimbag iti APO iti daga dagiti sibibiag. 14 Urayem iti APO: tumuredca, ket pabilgennanto ta pusom: urayem, kunak, iti APO. SALMO 28 Maysa a Salmo ni David. 1 Kenca umawagacto, O APO a batoc; dica coma agulimec caniac; amangan la ket ta, no agulimecca caniac, agbalinac a cas cadagiti bumaba iti abut. 2 Denggem ti timec dagiti ar-arawco, no umkisac kenca, no itag-ayco dagiti im-imac nga agturong iti nasantoan a pagipalawagam. 3 Dinac paadayoen a maicuyog cadagiti nadangkes, ken cadagiti agar-aramid iti kinadakes, a saoenda ti cappia cadagiti caarrubada, ngem kinagulib ti adda cadagiti puspusoda. 4 Itdem cadacuada ti catutopan ti gappuananda, ken catutopan ti kinadangkes dagiti panagaramidda: itdem cadacuada cas iti panagaramid ti im-imada; ipaaymo cadacuada ti caicarianda. 5 Ta dida icancano dagiti ar-aramid iti APO, wenno dagiti gapuanan dagiti im-imana, rebbaennanto ida, ken dinanto bangonenen ida. 6 Bendito coma iti APO, ta impangagna ti timec dagiti ar-ararawco. 7 Iti APO isu ti bileg ken calasagco; ti pusoc nagtalec kencuana, ket natulongannac: gapuna itoy pusoc agragsac unay; ket iti cantac idaydayawconto. 8 Iti APO isu ti bilegda, ket isu ti sarikedked ti panangisalacan iti pinulotanna. 9 Isalacanmo ti ilim, ket bendicionam iti tawidmo: taraonam met ida, ket saranayem ida nga agnanayon. SALMO 29 Maysa a Salmo ni David. 1 Ipaayyo iti APO, O dacayo nga maingel, ipaayyo iti APO ti kinadayag ken kinabileg. 2 Ipaayyo iti APO ti kinadayag a maiparbeng iti naganna; raemenyo iti APO iti naimnas a kinasanto. 3 Ti timec iti APO adda iti rabaw dagiti dandanum: ti Dios ti kinadayag aggurrood: iti APO met laeng iti rabaw dagiti adu a dandanum. 4 Ti timec iti APO ket mannacabalin; ti timec iti APO ket napno iti kinadaeg. 5 Ti timec iti APO seppakenna dagiti cedcedro; wen, iti APO bungbungtolenna dagiti cedcedro diay Libano. 6 Paglagtoenna met ida a cas urbon a baca; Libano ken Sirion a cas bumaro a cabalyo nga adda sarana. 7 Ti timec iti APO gessatenna dagiti darang ti apuy. 8 Ti timec iti APO pagarigengenenna ti let-ang; iti APO pagarigengenenna ti let-ang ti Cades. 9 Ti timec iti APO aramidenna a dagiti ug-ugsa aganacda, ket masaracanda dagiti bacbakir: ket idiay templona tunggal maysa sasaoenna iti kinadayagna. 10 Iti APO nagtugaw cadagiti layus; wen, iti APO agtugaw nga Ari iti agnanayon. 11 Iti APO itednanto ti pigsa cadagiti tattaona; iti APO bendicionannanto iti ilina ti cappia. SALMO 30 Maysa a Salmo ken Canta idi naidaton iti balay ni David. 1 Itantandudocanto, O APO; ta impangatonac, ket dica impalubos nga dagiti cabusorco ket pagraragsacandac. 2 O APO a Diosco, imkisac kenca, ket sica pinaimbagnac. 3 O APO, sica inaonmo toy cararruac manipud iti tanem: sica tinaginayonnac a sibibiag, tapno diac agpababa iti abut. 4 Icantayo ti agpaay iti APO, O dacayo a sasantosna, ket agyamancayo a pacalaglagipan iti kinasantona. 5 Ta ti ungetna agtalinaed iti apagcanito laeng; ti pammaraburna ket biag: ti panagsangsangit mabalin nga agpatnag iti rabii, ngem ti ragsac umay iti bumigat. 6 Iti kinarang-ayco kinunac, diacto pulos magarawen. 7 APO, gapu iti paraburmo inaramidmo ti bantayco a timmacder nga natibker: sica inlingedmo dayta rupam, ket nagducotac. 8 Imkisac kenca, O APO; ket iti saclang ti APO nagpacpacaasiac. 9 Ania ti pateg ti darac, inton umulogacon iti abut? Ti tapuc idaydayawanacanto ngata? ipaduyacyacnanto ngata ti kinapudnom? 10 Dumngegca, O APO, ket mangaasica caniac: APO, sica cadi ti manulong caniac. 11 Sica pinagbalinmo caniac ti panagladladingitco iti panagsalsala: sica inwacsim ti nakersang a lupotco, ket binaricsannac iti ragsac; 12 Tapno iti banagna ti kinadayagco icancantana coma ti panangidaydayaw kenca, ken saan nga agulimec. O APO a Diosco, agyamanacto kenca nga agnanayon. SALMO 31 Agpaay iti cangronaan nga Tomotokar, Maysa a Salmo ni David. 1 Kenca, O APO, agcamangac; diac cadi maibabain uray caanoman: ispalennac ita kinalintegmo. 2 Iyallingagmo cadi ta lapayagmo caniac; ispalennac daras: sica cadi ti natibker a bato caniac, balay a pagsalacniban a mangisalacan caniac. 3 Ta sica ti batoc ken pagsalindegac; ngarud gapu iti naganmo idalannac, ken iturongnac. 4 Alut-utennac cadi iti bateng nga impacatda a sililimed caniac: ta sica ti pigsac. 5 Cadagita imam italecco iti espirituc: sinubbotnac, O APO Dios iti kinapudno. 6 Guraec dagiti managayat cadagiti panangallilaw a kinaubbaw: ngem agtalecac iti APO. 7 Agragsacac ken agragrag-oacto ita kinaasim: ta nakitam iti ducotco; naammoam itoy cararruac cadagiti panagsisicor; 8 Ket saannac nga impapetpet iti ima ti cabusor: insimpam dagiti sacsacac iti nalawa a lugar. 9 Mangaasica caniac, O APO, ta addaac iti pacaducotan: ti matac naibusen iti liday, wen, ti cararruac ken ti tianco. 10 Ta ti biagco aggibusen iti liday, ket dagiti tawenco iti panagsasaibbec: ti pigsac umawan gapu iti kinadakesco, ket dagiti tultulangco maib-ibusdan. 11 Nagbalinac a pacaumsian cadagiti amin nga cabusorco, ngem nangnangrona cadagiti caarrobac, ken maysa a pagbutngan cadagiti am-ammoc: dagiti nacakita caniac iti ruar intarayandac. 12 Nalipatandacon a cas natay a tao nga naiccat iti panunotna: arigco ti maysa a naboong nga baso. 13 Ta nangngegco ti panangibabain dagiti adu: buteng iti agsusumbangir: idi a nagbibinnalacadda a bumusor caniac, pinanggepda nga iccaten daytoy biagco. 14 Ngem nagcammatalecac kenca, O APO: kinunac, Sica iti Diosco. 15 Dagiti al-aldawco addada ita imam: ispalennac iti ima dagiti cabcabusorco, ken cadagiti mangidadanes caniac. 16 Pagraniagem ta rupam itoy adipenmo: isalacannac gapu iti kinamanangngaasim. 17 Saanmo coma nga ipalubos a maibabainac, O APO; iyantangay inawaganca: dagiti coma managdacdakes ti maibabain, isuda coma ti agulimec idiay uneg ti tanem. 18 Dagiti managulbod nga bibbibig pagulimekem coma ida; dagiti agsao ti nasabrac nga banbanag a sitatangsit ken si-uuyaw a maibusor cadagiti nalinteg. 19 O nagdackelen ti kinaimbagmo, nga impenpenmo nga agpaay cadagiti agbuteng kenca; nga inaramidmo cadagiti agcamang kenca iti sangoanan dagiti annac dagiti tattao! 20 Ilemmengmonto ida iti nalimed a sangoanam cadagiti kinatangsit iti tao: salimetmetamto ida a nalimed iti maysa a salinong cadagiti susic iti dildila. 21 Bendito coma iti APO: ta impakitana caniac ti nacascasdaaw a kinaasina iti maysa nga ili a natibker. 22 Ta kinunac iti pannacaganatco, nagudasnacon ita sangoanan dagiti matam: nupay casta sica nangngegmo ti timec dagiti ar-ararawco idi imkisac kenca. 23 O ayatenyo iti APO, dacayo amin a sasantosna: ta iti APO igagana dagiti mapagtalcan, ket supapacanna iti adu ti agaramid a sitatangsit. 24 Agturedcayo coma, ket pabilgenna ta pusoyo, dacayo amin a mangnamnama iti APO. SALMO 32 Maysa a Salmo ni David, Maschil. 1 Bendito a ti salungasingna ket napacawanen, a ti basolna ket naabbonganen. 2 Bendito ti tao a di pangipatayan iti APO iti kinakillo, ken iti espirituna awan ti kinasicap. 3 Idi nagulimecac, dagiti tultulangco nalunagda a dimmaan bayat ti panagungorco iti amin nga sangca-aldaw. 4 Ta aldaw ken rabii ta imam sibabantot a naiparabaw caniac: ti ling-etco namalbaliw a cas iti kinaticag ti tiempo ti calgaw. Selah. 5 Binigbigco ti basolco kenca, ket ti kinadakesco diac inlinged. Kinunac, ipudnocto dagiti salungasingco iti APO; ket sica pinacawanmo ti kinadangkes iti basolco. Selah. 6 Gapu itoy tunggal maysa a nadiosan agcararag kenca iti tiempo intono sica masaracanca: pudno nga intono aglippias dagiti dadackel a dandanum didanto dumanon kencuana. 7 Sica ti paglemmengac; igaganacto iti riribuc; sica liclicmutennacto cadagiti cancanta ti pannacaispal. Selah. 8 Iwanwancanto ken isurocanto iti dalan a pagnaamto: idalancanto babaen cadagitoy matac. 9 Saancayo cadi a cas iti cabalyo, wenno cas iti mulo, nga awanan pannacaawat: a dagiti ngiwatda masapul iti pangigawid cadacuada dagiti arruaten a pacagat ken rienda, di la ket ta isuda ket asitgandaca. 10 Adu a ladladingit ti maaddanto cadagiti nadangkes: ngem ti agtalec iti APO, kinamanangngaasi ti manglawlawto kencuana. 11 Agragsaccayo iti APO, ken agrag-ocayo, dacayo a nalinteg: ket ipuccawyo iti kinarag-o, dacayo a nalinteg iti puso. SALMO 33 1 Agragsaccayo iti APO, O dacayo a nalinteg: ta ti panangidaydayaw nasayaat a maipaay iti nalinteg. 2 Idaydayawyo iti APO a buyogen ti arpa: cantaanyo dagiti salterio a danggayan ti pagtocaran a sangapulo dagiti cuerdasna. 3 Cantaanyo isuna iti baro nga canta; laingenyo ti agtocar nga buyugen iti napigsa nga aweng. 4 Ta ti sao iti APO ket nalinteg; ket isuamin nga aramidna ket naaramidda iti kinapudno. 5 Ayatenna ti kinalinteg ken panangocom: ti daga sipupunno iti kinaimbag iti APO. 6 Gapu iti sao iti APO naaramid dagiti langlangit; ken dagup ti amin nga buyotda gapu ti sang-aw ti ngiwatna. 7 Isu pagtitiponenna dagiti dandanum ti baybay a cas gabsuon: ipenpenna ti nauuneg cadagiti pagpenpenan. 8 Ti amin nga daga agbuteng coma iti APO: iti amin coma nga agnaed ditoy lubong tumacderda coma a sisisiddaaw kencuana. 9 Ta nagsao, ket natungpalen; nagbilin, ket timmacder a sititibker. 10 Iti APO pagbalinenna ti balbalacad dagiti nasnacion nga awan: ket aramidenna dagiti pangpanggep dagiti tattao nga awan capapay-anna. 11 Ti balacad iti APO agtalinaed a natibker iti agnanayon, dagiti pampanunot ti pusona agpaut cadagiti amin a capcaputotan. 12 Bendito ti nacion a ti Diosna ket isu iti APO: ken ti ili a pinilina nga agpaay kencuana nga bucodna a tawid met laeng. 13 Iti APO simamatmat manipud langit; buybuyaenna amin dagiti annac dagiti tattao. 14 Manipud iti ayan ti taengna tannawaganna amin dagiti agnaed ditoy daga. 15 Isu a mangsucog cadagiti puspusoda amin; isu nga mangut-utob cadagiti amin nga ar-aramidda. 16 Awan ti ari a maisalacan gapu iti kinaadu ti buyot: maysa a tao a maingel saan a maispal gapu iti dackel a bileg. 17 Ti cabalyo maysa nga ubbaw a pagtalgedan: ken saanna met a maispal iti siasinoman gapu iti naindaclan a bilegna. 18 Adtoy, ti mata iti APO sisisiput cadagiti agbuteng kencuana, cadagiti manginanama iti kinamanangaasina; 19 Tapno ispalenna ti cararruada ken patay, ken taginayonenna ida a sibibiag iti tiempo iti panagbisin. 20 Ti cararruatayo agur-uray iti APO: isu ti saranay ken calasagtayo. 21 Ta ti pusotayo agragsacto kencuana, gapu ta nagtalectayo iti nasantoan a naganna. 22 Agpaay cadi ta kinamanangaasim, O APO, cadacami coma, a cas iti pananginanamami kenca. SALMO 34 Maysa a Salmo ni David, idi binalbaliwanna iti ugalina ti sangoanan ni Abimelech; isu a nangpatalaw kencuana, ket isu pimmanaw. 1 Ibenditocto iti APO iti amin nga canito: ti dayawna agnanayonto nga adda iti ngiwatco. 2 Ti cararruac pagpaspasindayagnanto iti APO: dagiti napacumbaba mangngegdanto, ket agrag-oda. 3 O bumuyogcayo caniac a mangitan-oc iti APO, ket itag-aytayo nga agtitimpuyog ti naganna. 4 Binirocco iti APO, ket sinungbatannac, ket inispalnac cadagiti amin a panagbutbutengco. 5 Kimmitada kencuana, ket nagranniagda: ket dagiti ruprupada saanda nga nagbain. 6 Toy napanglaw a tao imkis, ket ti APO dinengngegna isuna, ket insalacanna cadagiti amin nga ducducotna. 7 Ti angel iti APO alicubcubanna dagiti agbuteng kencuana, ket ispalenna ida. 8 O nanamenyo ket kitaenyo ta iti APO naimbag: bendito ti tao a cumamang kencuana. 9 O agbutengcayo iti APO, dacayo a sasantosna: ta awan pagcurangan cadagiti agbuteng kencuana. 10 Dagiti urbon a leon makiranganda, ket agsagabada iti bisin: ngem dagiti mangbiroc iti APO saandanto a macurangan iti aniaman a naimbag. 11 Umaycayo, dacayo nga annac, dumgngegcayo caniac: isurocto cadacayo ti panagbuteng iti APO. 12 Siasino a tao ti agcalicagum iti biag, ken agayat iti adu nga al-aldaw, tapno macakita iti imbag? 13 Aluadam ta dilam ti dakes, ken dagita bibigmo iti panagsaoda iti kinasicap. 14 Pagpanawam ti dakes, ket aramidem ti naimbag; birokem ti talna, ket isu iti surotem. 15 Dagiti mata ti APO sisisirayda cadagiti nalinteg, ket dagiti lapayagna silulucatda cadagiti ickisda. 16 Ti rupa iti APO maibusor cadagiti agaramid iti dakes, tapno gupdenna ti pacalaglagipan cadacuada ditoy daga. 17 Dagiti nalinteg agickisda, ket ti APO dinengngegna, ket inispalna ida cadagiti amin a ducducotda. 18 Iti APO adda iti asideg cadagiti nabuong a puso; ket isalacanna dagiti sibabawi ti espirituda. 19 Adu dagiti sicsicor ti nalinteg: ngem iti APO ispalenna cadacuada amin. 20 Alluadanna amin a tultulangna: awan uray maysa cadacuada ti mabungtol. 21 Ti dakes patayennanto ti nadangkes: ket dagiti gumurgura iti nalinteg aglangalangto. 22 Iti APO subbotenna ti cararrua dagiti ad-adipenna: ket awan dagiti cumamang kencuana ti aglangalangto. SALMO 35 Maysa a Salmo ni David 1 Makirupirca, O APO, cadagiti makirupir caniac: gubatem dagiti manggubat a maibusor caniac. 2 Petpetam ti calasag ken ti sarapa, ket agtacderca a badangco. 3 Asutem met ti gayang, ket pasardengem ti dalan a maibusor cadagiti mangidadanes caniac: cunaem itoy cararruac, siac ti salacanmo. 4 Matalimpungaw ken mabainan coma dagiti mamirbiroc itoy cararruac: mapagsubli ken mariribucda coma dagiti mangisicsicat iti pacaranggasac. 5 Pagbalinem coma isuda a cas taep a maipallais iti angin: ket ti angel iti APO camatenna coma ida. 6 Ti dalanda nasipngetda ken nagalisda coma: ket ti angel iti APO parigatenna coma ida. 7 Ta awan gapgapuna inlingedda caniac ti batengda iti palab-og, a awan gapgapuna incalianda toy cararruac. 8 Ti pannacadadael dumteng coma kencuana a dina mapacpacadaan; ket ti bateng nga inlemmengna mangsimbalud cadi kencuana met laeng; iti dayta met laeng a pannacadadael matnag coma iti daydiay. 9 Ket ti cararruac sirarag-onto iti APO: agragsacto iti panangisalacanna. 10 Amin a tultulangco kunadanto, APO, siasino ti cas kenca, a mangispal iti napanglaw iti daydiay napigpigsa ngem isu, wen, iti napanglaw ken ti nacacaasi iti daydiay mangagaw kencuana? 11 Dagiti natiri a sacsi timmacderda; impacaammoda caniac dagiti banbanag a diac ammo. 12 Supapacanda caniac ti dakes iti naimbag a pacatalimpungawan toy cararruac. 13 Ngem no siac, idi a nagsakitda, nagpanesac: pinacumbabac toy cararruac iti panagayunar; ket ti cararagco nagsubli itoy barucongco met laeng. 14 Nagsaadac nga imbilangco cas isu gayyemco wenno cabsatco: nagtamedac a sililiday, a cas maysa a mangdung-aw iti inana. 15 Ngem iti pannacaparigatco nagragragsacda, ket nagtitiponda: wen, dagiti nagulib naggu-urnongda a sibubusor caniac, ket saanco a naammoan; pinisangpisangdac, ket dida sinardayan: 16 Cas cadagiti managrabngis cadagiti pagrambacan, in-ngarngarrietda caniac dagiti ngipenda. 17 Apo, casanonto ti capaut ti panagbuybuyam? alut-utem toy cararruac cadagiti panangdadaelda, itoy ay-ayatec cadagiti leon. 18 Agyamanacto kenca iti dackel a gimong: idaydayawcanto iti tengnga dagiti adu nga tattao. 19 Dica coma ipalubos dagiti cabcabusorco nga pagragragsacandac a di um-umno: ken dica coma ipalubos nga agkikinnidday ti mata dagiti gumurgura caniac nga awan gapgapuna. 20 Ta dida saoen ti cappia: ngem sicatenda ketdi dagiti naulbod a sasao a maibusor cadagiti natalna iti daga. 21 Wen, in-ngangada nga nacalawlawa ti ngiwatda caniac, a kinunada, Aha, aha, isu nakitan dagiti matami. 22 Daytoy nakitam, O APO: dica agulimec: O Apo, dica cadi adayo caniac. 23 Matignayca cadi, ket agriingca iti kinalinteg a maitutop caniac, iti met laeng calintegac, Diosco ken Apoc. 24 Ocomennac, O APO a Diosco, cas mayannurot ita kinalintegmo; ket dica ipalubos a pagraragsacandac. 25 Dica palubos a cunaenda iti pusoda, Ah, casta ti tinarigagayanmi: dica ipalubos a kunada, Inalun-onmin isuna. 26 Mabainanda cadi ket mariribucda a padapada dagiti agragsac iti pannacaranggasco: mabaddoanda coma iti kinabain ken ab-abi dagiti agindadackel a bumusor caniac. 27 Umsiagda coma iti rag-o, ken maragsacanda, dagiti makiananamong itoy sililinteg a panggepco: wen, cunaenda cadi a cancanayon, Iti APO maitan-oc coma, isu a pagay-ayatanna ti kinarang-ay ti adipenna. 28 Ket ti dilac sarsaritaennanto ti kinalintegmo ken ti pannacaidayawmo iti bayat ti amin a sangca-aldaw. SALMO 36 Agpaay iti cangronaan nga Tomotokar, Maysa a Salmo ni David ti adipen iti APO. 1 Ti kinasalungasing ti nadangkes kunana iti uneg toy pusoc, nga awan panagbuteng iti Dios iti saclang dagiti matana. 2 Ta paspasablogenna ti bagina cadagiti matana met laeng, aginggana a ti kinadakesna masucalan nga macagura. 3 Dagiti sasao ti ngiwatna kinakillo ken kinaulbod: binaybay-anna ti kinamanakem, ken panagaramid iti naimbag. 4 Pangpanggepenna ti kinakillo iti iddana; sumrec iti dalan a saan a nasayaat; ket saanna a casimron ti kinadakes. 5 Ti kinamanangaasim, O APO, adda cadagiti langlangit; ti kinamatalecmo dumanon cadagiti ul-ulep. 6 Ti kinalintegmo cas cadagiti dadackel nga banbantay; dagiti panangocommo dackel iti kinaunegda: O APO, sica salacnibam ti tao ken ti animal. 7 Anian iti kinadaeg ti kinamanagayatmo, O Dios! ita ngarud dagiti annac dagiti tattao agcamangda iti salinong dagita paypayacmo. 8 Mapnecdanto nga aglaplapusanan iti kinaan-anay ti balaymo; ket sica painumento ida iti carayan dagiti pagay-ayatam. 9 Ta adda kenca ti ubbog ti biag: ita silawmo makitaminto ti lawag. 10 O tuloyem ti kinamanagayatmo cadagiti macaammo kenca; ken ti kinalintegmo cadagiti sililinteg dagiti pusoda. 11 Ti saca ti kinatangsit dica coma ipalubos nga umay bumusor caniac, ket ti ima ti nadangkes dinac cadi pacsiaten. 12 Dagidiay managaramid iti kinadangkes natuangdan: naitublacdan, ket didanto macabangonen. SALMO 37 Maysa a Salmo ni David 1 Dica agalimuteng gapu cadagiti managdacdackes, dica met apalan dagiti agar-aramid iti kinadangkes. 2 Ta isuda mapatpatdanto iti mabiit a cas root, ken malaylaydanto a cas nalangto a mula. 3 Agtalecca iti APO, ket agaramidca iti naimbag; tapno agnaedca ditoy daga, ket pudno a mataraonanca. 4 Pagay-ayatam met iti APO; ket isu itdennanto kenca dagiti tarigagay ta pusom. 5 Icumitmo ti dalanmo iti APO; agtalecca met kencuana; ket isu ibanagnanto. 6 Ket isu pagsacnapennanto ti kinalintegmo a cas iti lawag, ken ti calintegam a cas iti tengnga ti aldaw. 7 Aginanaca iti APO, ket agurayca a siaanus kencuana: dica agalimuteng gapu ti agrang-ay iti dalanna, gapu iti tao a mangpataud dagiti nadangkes a pangpanggepna ken mapalabasna ida. 8 Sardayam ti pungtot, ket lipatem ti gura: saanmo nga ipalubos nga pulos iti panagaramid iti dakes. 9 Ta dagiti agaramid iti dakes magessatdanto: ngem dagidiay nga aguray iti APO, tawidendanto ti daga. 10 Ta iti bassit pay a canito, ket ti nadangkes awanton: wen, ganetgetamto nga utoben iti ayanna, ket awanton isuna. 11 Ngem dagiti naemma tawidendanto ti daga; ket maay-ayatandanto iti kinaruay ti talna. 12 Ti nadangkes isicsicapna ti maibusor iti nalinteg, ket ingarngaretngetna dagiti ngipenna kencuana. 13 Ti Apo catawaannanto isuna: ta makitana a ti aldawna ket dumdumtengen. 14 Dagiti nadangkes inasutda ti campilan, ket imbiatda ti bai ti panada, tapno maipasagda ti napanglaw ken macasapul, tapno mapatayda dagiti nalinteg iti dalanda. 15 Ti campilanda sumrecto cadagiti puspusoda met laeng, ket dagiti bai ti panada matuccolto. 16 Ti sangcabassit a cucua ti nalinteg a tao ket nasaysayaat ngem ti kinabacnang iti adu a nadangkes. 17 Ta dagiti tackiag dagiti nadangkes matuccoldanto: ngem iti APO saranayenna dagiti nalinteg. 18 Iti APO ammona dagiti aldaw dagiti nalinteg: ket ti tawidda agnanayonto. 19 Saandanto a mababainan intono tiempo ti dakes: ken intono aldaw ti panagbisin mapnecdanto. 20 Ngem dagiti nadangkes mapucawdanto, ken dagiti cabusor iti APO casdanto la taba dagiti carcarnero: marunawdanto; cas asuc maawandanto. 21 Ti nadangkes umutang, ket saanto nga agbayaden: ngem ti nalinteg managparabur, ken mangted. 22 Ta dagidiay bendicionanna tawidendanto ti daga; ket dagiti ilunodna magessatdanto. 23 Dagiti panagaddang iti naimbag a tao ket inurnos iti APO: ket isu pagay-ayatanna ti dalanna. 24 Uray matuang, saanto a matalipupos nga madalupisac: ta iti APO saranayenna babaen iti imana. 25 Ubingac idi, ket ita lacayacon; diac pay nacakita iti nalinteg a nabaybay-an, wenno dagiti putotna nga makipalpalama iti taraon. 26 Amin nga aldaw sipaparabur, ket agpabulod; ket ti putotna mabendicionan. 27 Pagtalawam ti dakes, ket agaramidca iti naimbag; ket agtalinaedca nga agnanayon. 28 Ta iti APO ayatenna ti kinalinteg, ket dina baybay-an dagiti sasantosna; maigagada nga agnanayon: ngem ti putot dagiti nadangkes magessatdanto. 29 Ti nalinteg tawidennanto ti daga, ket agtaengto kencuana nga agnanayon. 30 Ti ngiwat ti nalinteg agsarita iti kinasirib, ket ti dilana agsao iti kinalinteg. 31 Ti linteg ti Diosna adda iti pusona; cadagiti addangna awanto ti maicaglis. 32 Ti nadangkes siimenna ti nalinteg, ket ibirocna ti panangpapatayna kencuana. 33 Iti APO dinanto baybay-an isuna iti imana, dinanto met dusaen intono maocom. 34 Paturaymo iti APO, ket salimetmetam ti dalanna, ket itan-ocnacanto nga agtawid iti daga: intono magessat ti nadangkes, ket makitamto. 35 Nakitac ti nadangkes iti naidaclan a pannacabalin, ket agsalumpayac isuna a cas nalasbang a cayo. 36 Ngem isu limmabas, ket, adtoy, isu awanen: wen, sinapulco isuna, ngem isu saan a nasaracanen. 37 Tandaanam ti naan-anay a tao, ket matmatam ti nalinteg: ta ti tungpal dayta a tao ket talna. 38 Ngem no maipapan cadagiti managlabsing madadaeldanto a matalipupus: ti tungpal dagiti nadangkes magessatto. 39 Ngem ti pannacaisalacan dagiti nalinteg ket biang iti APO: isu ti pigsada iti panawen ti ducot. 40 Ket iti APO tulonganna ida, ken ispalenna ida: isu ispalenna ida cadagiti nadangkes, ket isalacanna ida, gapu ta kimmamangda kencuana. SALMO 38 Maysa a Salmo ni David, a mangited iti panangipalagip. 1 O APO, dinac cadi babalawen ita pungtotmo: wenno dusaen ita nabara nga lucsawmo. 2 Ta dagiti panam naipasucda a siiirut caniac, ket ta imam pandagannac a sidadagsen. 3 Awan ti kinasalun-at iti lasagco gapu ita ungetmo; awan met ti talna a pulos dagiti tultulangco gapu iti basolco. 4 Ta dagiti kinakilloc lapunosenda ti uloc: cas nadagsen nga awit nalaus ti bantotda caniac. 5 Dagiti sugsugatco nagbuyocda ken nagderderda gapu iti kinamaagco. 6 Mariribucannac; maparucobac a napalalo; silaladingitac nga agmalmalem. 7 Ta dagiti lomlomoc napnoda iti nacaar-arriec nga sakit: ket awan ti kinasalun-at iti lasagco. 8 Mapacapuyac ket nacaro ti pannacaparigatco: nagungorac gapu iti saan nga pannacatalna toy pusoc. 9 Apo, amin a calicagumco sisasaclang kenca; ket ti panagun-unnoyco saan met a nailinged kenca. 10 Toy pusoc agal-al, ti pigsac agpucpucaw: no maipapan iti lawag ti matac, casta met a naawan caniac. 11 Dagiti caingungot ken gagayyemco cumayacayda itoy didigrac; ket dagiti cacabaggiac addada iti adayo. 12 Dagiti met mangsibsibloc itoy biagco agipacatda cadagiti silsilo caniac: ken dagiti agbirbiroc iti pacadangranac agsaoda cadagiti agcacaranggas, ket agpanpanunotda cadagiti sinisicap nga agmalmalem. 13 Ngem siac, cas tuleng a tao, diac nangeg; ken arigac la umel a tao a dina ngangaen ti ngiwatna. 14 Iti casta siac arigac la tao a di macangngeg, ken iti ngiwatna nga awan ti isusuppiat. 15 Ta sica, O APO, ti pagtalcac: sica dumngegcanto, O Apo a Diosco. 16 Ta kinunac, Denggennac, di la ket ta pagraragsacandac: no agcaglis ti sacac, ipangatoda dagiti bagbagida nga maibusor caniac. 17 Ta nacasaganaacon nga matuang, ket ti ladingitco agnanayon itoy sangoanac. 18 Ta ipalgacconto iti kinakilloc; agladladingitacto gapu iti basolco. 19 Ngem dagiti cabusorco napartacda, ken napigsada: ket dagiti gumurgura a di um-umno caniac umaduda. 20 Dagidiay met a subadanda iti dakes ti imbag sibubusorda caniac; gapu ta surotec ti banag a naimbag. 21 Dinac baybay-an, O APO: O Diosco, dica coma umadayo caniac. 22 Darasem ti mangarayat caniac, O Apo a salacanco. SALMO 39 Agpaay iti cangronaan nga Tomotokar, uray pay ni Jeduthun, Maysa a Salmo ni David. 1 Siac kinunac, annadacto dagiti daldalanco, tapno diac macabasol babaen itoy dilac: pacagatacto ti rienda toy ngiwatco, bayat ti caadda ti nadangkes itoy sangoanac. 2 Nagumelac a siulimec, nagteppelac, uray pay iti naimbag; ket ti ladingitco nagkibur. 3 Ti pusoc nagbara ditoy unegco, idi nga agpanpanunotac ti apuy simged: idi a casta nagsaoac babaen itoy dilac, 4 APO, ipacaammom caniac ti tungpalco, ken no ania ti rucod dagiti aldawco, no aniada; tapno maammoac coma ti nalaus nga kinarasic. 5 Adtoy, inaramidmo dagiti al-aldawco a cas dinangan; ket ti tawtawenco caslada awan ita sangoanam: pudno a ti tunggal tao iti casayaatan a casasaadna ket biig amin nga ubbaw. Selah. 6 Pudno a tunggal tao magna iti ubbaw a panagpabuya: pudno nga cumalaisegda a barengbareng: aguccon iti kinabacnang, ket dina ammo no siasino ti mangacoyto cadacuada. 7 Ket ita, Apo, ania ti urayec? ti inanamac adda kenca. 8 Ispalennac cadagiti amin a salungasingco: dinac pagbalinen nga um-umsien ti maag. 9 Nagumelac, diac nginanga ti ngiwatco; ta sica inaramidmo. 10 Iyadayom ti danogmo caniac: marunawac babaen iti panagtupac ta imam. 11 No sica babaen cadagiti panagtubngar bagbagaam ti tao gapu iti kinadangkesna, talipupusem ti kinasayaatna a cas iti sanga: pudno nga amin a tao ket ubbaw. Selah. 12 Denggem ti cararagco, O APO, ket ipangagmo toy ickisco; dica agulimec cadagitoy luluac: ta siac maysaac a gangannaet kenca, ken maysa nga agdaldaliasat, a cas cadagidi isuamin nga am-ammac. 13 O ispalennac, tapno maipulang iti pigsac, sacbay a mapanacon, ken maawanen a pulos. SALMO 40 Agpaay iti cangronaan nga Tomotokar, Maysa a Salmo ni David. 1 Inurayco a siaanus iti APO; ket inallingagnac, ken nangngegna iti ickisco. 2 Inaonnac met iti nacaal-alingget nga abut, iti nacalutlutlot nga pitac, ket imbatayna dagiti sacsacac iti maysa a bato, ket pinasingkedanna dagiti addangco. 3 Ket impaayna ti baro a canta ditoy ngiwatco, uray pay pangidaydayaw iti Diostayo: adunto dagiti macakita, ken agbuteng, ket agtalecdanto iti APO. 4 Bendito ti tao a pagbalinenna ti APO a pagcammatalcanna, ket saanna a pagraeman ti natangsit, wenno dagiti agturong cadagiti ul-ulbod. 5 Aduda, O APO a Diosco, dagiti nacascasdaaw nga ar-aramid nga inaramidmon, ken dagiti panpanunotmo nga agturong cadacami: saan a mabalin nga bilangenen iti sangoanam: no palawagec ket saoec coma ida, ad-aduda ngem ti mabalin a bilangen. 6 Ti daton ken ti sagut dica tarigagayan; dagiti lapayagco linucatam: ti daton a mapuoran ken daton gapu iti basol saanmo nga kiniddaw. 7 Idi a casta kinunac, Adtoy, umayac: iti lucot ti libro adda a naisurat ti maipanggep caniac, 8 Pagragsacac nga aramiden iti pagayatam, O Diosco: wen, ti lintegmo adda iti uneg ti pusoc. 9 Incasabac ti kinalinteg iti uneg ti dackel nga gimong: adtoy, diac minedmedan dagiti bibigco, O APO, sica ammom. 10 Diac inlimed ti kinalintegmo iti uneg toy pusoc; impacdaarco ti kinamatalecmo ken panangisalacanmo: saanco nga inlemmeng ti kinamanagayatmo ken kinapudnom iti dackel a gimong. 11 Dica gawidan caniac dagita nadungngo a caasim, O APO: ta kinamanagayat ken kinapudnom cancanayon cadi a salacnibandac. 12 Ta dagiti saan nga mabilang a kinadakes linicmutdac: dagiti kinakilloc sinallucobandac, iti casta diac nabalinan iti tumangad; ad-aduda ngem dagiti booc ti uloc: gapuna ti pusoc upayennac. 13 Maay-ayoca cadi, O APO, a mangispal caniac: O APO, darasennac nga tulongan. 14 Mababainanda ken mariruda cadi a padapada dagiti mangbirbiroc itoy cararruac tapno dadaelenda; pagtalawem coma a pagsanudem ken ibabainmo coma ida dagiti agayat iti pacaranggasac. 15 Pagwalangwalangem coma a gunggona iti bainda dagiti agcuna caniac, Aha, aha. 16 Amin dagiti mangbiroc kenca agrag-o ken maragsacanda coma kenca: dagiti agayat iti panangisalacanmo kunada cadi a cancanayon, Ti APO maitandudo coma. 17 Ngem siac napanglawac ken agcasapulannac; nupay casta ti Apo sipapanunot caniac: sica ti saranayco ken mangispalco; dica agtactac, O Diosco. SALMOS 41 Agpaay iti cangronaan nga Tomotokar, Maysa a Salmo ni David. 1 Bendito ti mangtaming iti napanglaw: iti APO ispalennanto intono aldaw ti riribuc. 2 Iti APO salacnibannanto, ket taripatoennanto a sibibiag; ket benditonto ditoy rabaw ti daga: ket dicanto iyawat isuna iti pagayatan dagiti cabcabusorna. 3 Iti APO papigsaennanto isuna nga adda ti idda a nacaidalitan: tarimaanemto amin nga iddana iti panagsakitna. 4 Kinunac, APO, caasiannac: agasam ti cararruac; ta nagbasolac kenca. 5 Dagiti cabusorco pagsasaoandac iti dakes, Caanonto ti ipapatayna, ken ti naganna mapucaw? 6 Ket no umaynac kitaen, agsao iti ubbaw: ti pusona aguccon iti kinakillo kencuana met laeng; no macaruaren, isaonan. 7 Amin a gumurgura caniac agarasaasda iti maibusor caniac: ti maibusor caniac ti panggepda a dangrandac. 8 Dakes a sakit, kunada, ti sicacapet unay kencuana: ket ita ta nacaiddan saanto pulos a bumangonen. 9 Wen, ti pay caingongotco unay a cadcaddua, a nagtalcac, isu a nakicaan iti canec, incugtarna ti mucodna caniac. 10 Ngem sica, O APO, caasiannac, ket ipatacdernac, tapno maibalesco ida. 11 Gapu itoy ammoc a sica pagay-ayatannac, gapu ta ti cabusorco saan nga agballigi caniac. 12 Ket no maipanggep caniac, sica bitibitennac iti kinatarnawco, ket inpasdecnac ti sangoanam iti kina-agnanayon. 13 Bendito coma ti APO Dios ti Israel manipud iti agnanayon, aginggana ti agnanayon. Amen, ken Amen. SALMO 42 Agpaay iti cangronaan nga Tomotokar, Maschil, cadagiti annac a lallaki ni Korah. 1 Cas iti ugsa agal-al a mawaw cadagiti baresbes a dandanum, iti casta agal-al a mawaw toy cararruac kenca, O Dios. 2 Toy cararruac mawaw iti Dios, iti sibibiag a Dios: caano ti idadatengconto a dumatag iti saclang ti Dios? 3 Dagiti luluac isuda dagiti taraonco iti aldaw ken rabii, idinto a cancanayon a kunkunada caniac, Ayannan ti Diosmo? 4 No malagipco dagitoy a banbanag, ibuyatco toy cararruac itoy unegco: ta napanacon agraman sangabunggoyan, ket napanac a cadduac ida iti balay ti Dios, agraman timec ti ragsac ken panangidaydayaw, ken caraman ti sangabunggoyan nga nangsalimetmet ti aldaw a nasantoan. 5 Apay a mapasagca man, O cararruac? ken apay a maringgoranca iti unegco? manginanamaca iti Dios: ta idaydayawco pay isuna gapu iti tulong ti langana. 6 O Diosco, ti cararruac sipapasag itoy unegco: gapuna lagipenca manipud iti daga ti Jordan, ken cadagiti Hermonitas, manipud iti turod a Mizar. 7 Ti yuyeng ayabanna ti yuyeng iti panagdaranudor dagiti disso-ormo: amin dagiti daldalluyonmo ken dagiti palongmo naglasatda iti rabawco. 8 Ngem iti APO baonennanto ti kinamanagayatna iti bayat ti aldaw, ket iti rabii ti cantana addanto caniac, ken ti cararagco iti Dios ti biagco. 9 Kunakto iti Dios a batoc, Apay a linipatannac? apay a magmagnaac a silaladingit gapu iti panangidadanes ti cabusor? 10 Cas adda ti campilan cadagitoy tultulangco, dagiti cabusorco um-umsiendac; sada pay cuncuna nga inaldaw caniac, Ayannan ti Diosmo? 11 Apay a mapasagca man, O cararruac? ken apay a maringgoranca man iti unegco? manginanamaca iti Dios: ta idaydayawconto pay, isu ti salun-at ti langac, ken Diosco. SALMO 43 1 Ocomennac, O Dios, ket irisirismo ti calintegac iti maysa nga nadangkes a nacion: O ispalennac iti nasicap ken nakillo a tao. 2 Ta sica ti Dios ti pigsac: apay nga inwagsacnac man? apay a magmagnaac a silaladingit gapu iti panangidadanes ti cabusor? 3 O ibaonmo ti silawmo ken kinapudnom: isuda cadi ti mangiturong caniac; iturongdac cadi ita nasantoan a turodmo, ken cadagiti tabernaculom. 4 Iti casta innacto iti altar ti Dios, iti Dios nga aglaplapusanan a rag-oc: wen, babaen iti harpa idaydayawca, O Dios nga Diosco. 5 Apay a mapasagca man, O cararruac? ken apay a maringgoranca man iti unegco? manginanamaca iti Dios: ta idaydayawconto pay isuna, isu nga salun-at iti langac, ken Diosco. SALMO 44 Agpaay iti cangronaan nga Tomotokar cadagiti annac a lallaki ni Korah, Maschil. 1 Nangngegmi babaen cadagiti lapayagmi, O Dios, dagiti dadackelmi imbagada cadacami, no ania ti aramid nga inaramidmo cadagiti al-aldawda, cadagiti al-aldaw idi un-unana. 2 No casano a pinacsiatmo dagiti nasnacion babaen ita imam, ken insaadmo ida; no casano a pinagladingitmo dagiti tattao, ken pinagwarasmo ida. 3 Ta saanda a naala a tagicuaen ti daga gapu ti campilanda met laeng, saan met nga ti tackiagda met laeng ti nangisalacan cadacuada: no di ket ta macanawan nga iman, ken tackiagmo, ken ti lawag ta langam, gapu ta sipaparaburca idi cadacuada. 4 Sica ti Aric, O Dios: ibilinmo dagiti pannacasalacnib ni Jacob. 5 Gapu kenca maidaramudomminto dagiti cabusormi: gapu iti naganmo maibaddecminto dagiti umalsa a bumusor cadacami. 6 Ta diacto agtalec iti baic, saan met a ti campilanco ti mangisalacanto caniac. 7 Ngem sica ti nangisalacan cadacami cadagiti cabcabusormi, ket imbabainmo dagiti manggurgura cadacami. 8 Babaen iti Dios nagpaspasindayawcami a nagmalmalem, ket itdenminto ti panagyaman ita naganmo iti agnanayon. Selah. 9 Ngem ita sica impurruacnacami, ken impannacami iti pannacaibabain; ket saanca a cumuyogen cadagiti buybuyotmi. 10 Sica pinagsanudnacami manipud cadagiti cabusor: ket dagiti manggurgura cadacami agsamsamda. 11 Sica pinagbalinnacami a cas carnero a naisagana a masida; ket inwarasnacami cadagiti nasnacion. 12 Ilacom ti ilim nga awan bayadna, ket saanmo a pinaadu ti sanicuam gapu iti pategda. 13 Sica pagbalinennacami a pacaumsian dagiti caarrubami, malalais ken macatcatawaan cadagiti aglawlaw cadacami. 14 Sica pagbalinennacami nga calcallautangen dagiti nasnacion, maysa nga ngilngilangilan dagiti tattao. 15 Agmalmalem a ti pannacaibabainco adda ditoy sangoanac, ket ti bain ti rupac binungonnac, 16 Gapu iti timec ti mangab-abi ken agbasbassawang; gapu iti cabusor ken iti mangibales. 17 Amin dagitoy agdissoor cadacami; nupay casta saandaca a linipatan, saancami met a naggulib iti tulagmo. 18 Ti pusomi saan nga limmicud, saanmi met nga inlagisi dagiti ad-addangmi iti dalanmo; 19 Numan pay rinebbanacami a nasakit unay iti ayan dagiti dragon, ken inabongotannacami iti anniniwan ni patay. 20 No linipatanmi coma ti nagan ti Diosmi, wenno inyunnatmi coma dagiti im-imami iti sabali a dios; 21 Dinto met la palutputen ti Dios daytoy? ta isu ammona dagiti palpalimed ti puso. 22 Wen, ta gapu kenca mapapataycami nga agmalmalem; maibilangcami a cas cadagiti carcarnero a naipaay iti pagpartian. 23 Agriingca, apay a maturogca, O Apo? bumangonca, dinacami ipurruac a cancanayon. 24 Apay nga ilingedmo ta rupam, ket lipatem ti panagleddaang ken pannacairurumenmi? 25 Ta ti cararruami naimameg inggana iti tapuc: ti tianmi cumebkeb iti daga. 26 Bumangonca cadi a saranaymi, ken subbotennacami gapu iti kinamananga-asim. SALMO 45 Agpaay iti cangronaan nga Tomotokar ken Shoshannin, cadagiti annac a lallaki ni Korah, Maschil, Maysa a Canta iti ay-ayat. 1 Ti pusoc aglippias iti naimbag a banag: saoec dagiti banbanag a naaramidco maipanggep iti ari: ti dilac isu ti pluma ti maysa a sisasagana nga mannurat. 2 Nasaysayaatca ngem dagiti annac dagiti tattao: ti parabur naibuyat cadagiti bibigmo: gapuna ti Dios binendicionannaca nga agnanayon. 3 Ibarikesmo ta campilanmo dita luppom, O mannacabalin unay, agraman dayagmo ken ti tan-ocmo. 4 Ket iti tan-ocmo agsacayca a sirarang-ay gapu iti pudno ken kinaemma ken kinalinteg; ket ta macanawanmo isuronanto kenca dagiti nacaal-allinget nga banbanag. 5 Dagiti panpanam natiradda cadagiti puso dagiti cabcabusor ti ari; gapuna dagiti tattao matuangda iti babaem. 6 Ti tronom, O Dios, ket agnanayon nga awan patinggana: ti cetro ti pagariam isu ti nalinteg a cetro. 7 Inayatmo ti kinalinteg, ket ginuram ti kinadangkes: gapuna Dios, ti Diosmo, pinulotannaca iti lana ti kinaragsac a nangnangrona ngem cadagiti cacadduam. 8 Amin dagiti cawesmo agayamuom a mirra, ken agassandalo, ken agacacasia, manipud cadagiti palacio a marfil, gapuna pinagragsacdaca. 9 Babbai nga annac dagiti ar-ari addada iti nagtengngaan dagiti natan-oc a bunggoymo a babbai: dita macanawanmo nagtacder ti reina a naarcosan iti balitoc iti Ofir. 10 Denggem, O anac a babai, ken utobem, ken iyallingagmo ta lapayagmo; lipatem met iti ilim, ken ti balay ni amam; 11 Iti casta ti ari dackelto nga tarigagayanna ta imnasmo: ta isu ti Apom; ket agrucbabca kencuana. 12 Ket ti anac a babbai ti Tiro addanto idiay agraman maysa nga sagut; uray dagiti nabacnang cadagiti umili agpacpacaasidanto ita paraburmo. 13 Ti anac nga babbai ti ari ket napnoan dayag idiay uneg: ti pagan-anayna napattopattocan iti balitoc. 14 Isu maitulodto iti ari agraman binordaan a cawesna: dagiti birhen nga cadduana a sumursurot kencuana mayegdanto kenca. 15 Babaen iti rag-o ken panagragsac maituloddanto: sumrecdanto iti palacio ti ari. 16 Maisandi dagiti dadackelmo cadagitinto annacmo, isuda a pagbalinemto a piprincipe iti amin a daga. 17 Pagbalinecto ti naganmo a malaglagip cadagiti amin a capcaputotan: gapuna dagiti tattao agdaydayawdanto kenca nga agnanayon awan inggana. SALMO 46 Agpaay iti cangronaan nga Tomotokar cadagiti annac a lallaki ni Korah, Maysa a Canta ken Alamoth. 1 Ti Dios isu ti camang ken bilegtayo, sidadaan unay a tulong iti pannacaducot. 2 Gapuna ditayo agbuteng, agpapan pay ti daga mayalis, ken agpapan pay dagiti banbantay aggagabsuonda iti tucoc dagiti baybay; 3 Uray pay dagiti dandanumda agungor ken makiburda, uray pay dagiti banbatay agpigergerda gapu iti idadackelda. Selah. 4 Adda maysa a carayan, a dagiti ayusna paragsakenda ti ili ti Dios, ti nasantoan nga ayan dagiti tabernaculos ti Cangatoan unay. 5 Ti Dios adda iti tengnga ti ili; ti ili saanto a mayalis: ti Dios tulongannanto isuna, ket dayta mabiit unay. 6 Dagiti nasnacion nagkiburda, dagiti pagpagarian nariribucda: inyesngawna ti timecna, ti daga nalunag. 7 Iti APO dagiti buybuyot adda cadatayo; ti Dios ni Jacob isu ti camangtayo. Selah. 8 Umaycayo, imatanganyo dagiti ar-aramid iti APO, no ania dagiti panangdadael nga inaramidna ditoy daga. 9 Pagsardengenna dagiti gubgubat inggana iti ungto ti daga; rungrungdoenna ti bai ti pana, ket gupdenna a maminpinsan ti gayang; puoranna dagiti luglugan iti apuy. 10 Agtalnacayo, ket ammoenyo a siac ti Dios: maitan-ocacto cadagiti nasnacion, maitan-ocacto ditoy daga. 11 Iti APO dagiti buybuyot adda cadatayo; ti Dios ni Jacob isu ti camangtayo. Selah. SALMO 47 Agpaay iti cangronaan nga Tomotokar, Maysa a Salmo cadagiti annac a lallaki ni Korah. 1 O agsipatcayo cadagiti im-imayo, dacayo amin nga umili; agdir-icayo iti Dios iti timec ti panagballigi. 2 Ta iti APO a cangatoan unay ket nacakigkigtot; isu ti naindaclan nga Ari iti amin a daga. 3 Isu parucmaenna dagiti il-ili iti babaentayo, ken dagiti nasnacion iti baba dagiti dapdapantayo. 4 Isu piliannatayo iti tawidentayo, iti kinadaeg ni Jacob nga isu ti inay-ayatna. Selah. 5 Ti Dios ngimmato a naipucpuccaw, iti APO a napacuyogan iti aweng ti trompeta. 6 Cantaenyo dagiti panangidaydayaw iti Dios, cantaenyo dagiti panangidaydayaw: cantaenyo dagiti panangidaydayaw iti Aritayo, cantaenyo dagiti panangidaydayaw. 7 Ta ti Dios isu ti Ari ti amin a daga: cantaenyo dagiti panangidaydayaw nga maawatanyo. 8 Ti Dios iturayanna dagiti nasnacion: ti Dios agtugaw iti nasantoan a tronona. 9 Dagiti piprincipe dagiti il-ili agtitiponda, uray pay dagiti tattao ti Dios ni Abraham: ta dagiti calasag ti daga cucua ida ti Dios: isu maitan-oc unay. SALMO 48 Maysa a Canta ken Salmo nga agpaay cadagiti annac a lallaki ni Korah. 1 Dackel iti APO, ket maicari a maidaydayaw unay iti uneg ti ili iti Diostayo, idiay bantay iti kinasantona. 2 Naimnas ti casasaadna, ragsac iti isuamin nga daga, isu ti bantay Sion, iti bangbangir ti amianan, ti ili iti dackel nga Ari. 3 Ti Dios nagpacaammo cadagiti palpalaciona a maipaay a pagcamangan. 4 Ta, adtoy, dagiti ar-ari naggigimongda, naglabasda a sangsangcatimpuyog. 5 Nakitada, idi a casta nasdaawda; nariribucda, ken nagpanawda a dagus. 6 Ti buteng kinapetna ida sadiay, ken ut-ut, a cas iti maysa a babai nga agpasical. 7 Sica binuracmo dagiti sasacayan ti Tarsis babaen ti dayaen nga angin. 8 Cas nangngegmi, casta ti nakitami idiay ili iti APO dagiti buybuyot, iti ili ti Diostayo: ti Dios pasingkedannanto nga agnanayon. Selah. 9 Pinanpanunotmi ti kinamanagayatmo, O Dios, iti tengnga iti templom. 10 Cas mayalubog iti naganmo, O Dios, casta ti pannacaidaydayawmo agingga cadagiti pungto ti daga: ta macanawan nga imam napno iti kinalinteg. 11 Ti bantay Sion agrag-o coma, dagiti babbalasang ti Juda agragsac coma, gapu cadagiti pangngeddengmo. 12 Sumibsibayca ti Sion, ket licmuten ti ar-arubayanna: ibagam dagiti tortorrena. 13 Bigbigem dagiti natibker a bacudna, utobem dagiti palpalaciona; tapno mabalinmo nga ibaga cadagiti sumarsaruno nga caputotan. 14 Ta daytoy a Dios isu ti Diostayo iti agnanayon awan patinggana: isu ti mangiturongto cadatayo uray aginggana iti patay. SALMO 49 Agpaay iti cangronaan nga Tomotokar, Maysa a Salmo cadagiti annac a lallaki ni Korah. 1 Ipangagyo daytoy, dacayo amin nga il-ili; dumngegcayo, dacayo amin nga agnaed itoy lubong: 2 Ti nababa man ken nangato, nabacnang ken napanglaw, dacayo amin. 3 Ti ngiwatco agsaonto iti kinasirib; ket ti panpanunot itoy pusoc addanto ti pannacaawat. 4 Iyallingagconto ti lapayagco iti maysa a pangngarig: ibatadconto ti nasipnget a saoc iti arpa. 5 Ania ti pagbutngacto cadagiti al-aldaw ti dakes, inton ti kinadangkes dagitoy mucodco alicubcubendac? 6 Dagiti agtalec iti kinabacnangda, ket pagpasindayagda ti caadu dagiti sanicuada; 7 Awan cadacuada ti macabalin babaen iti ania man a pamuspusan a mangsubbot iti cabsatna, wenno mangted iti Dios iti supapac nga agpaay kencuana. 8 (Ta ti pannacasubbot ti cararruada ket napateg, ket agsarday nga agnanayon:) 9 Tapno agbiag coma pay laeng nga agnanayon, ken saanna nga makita ti pannacarupsa. 10 Ta isu makitana a dagiti masirib a tattao matayda, casta met ti maag ken ti nacuneng a tao mapucawda, ket ibatida dagiti sanicuada cadagiti sabsabali. 11 Panunotenda iti unegda, a dagiti balbalayda agnanayonda, ket dagiti ayan a pagtataenganda agingganada cadagiti amin a caputotan; impanaganda cadagiti dagdagada dagiti nagnaganda met laeng. 12 Numan pay casta ti tao a napadayawan saan nga agtaeng: capadpadana dagiti an-animal a mapucaw. 13 Daytoy a dalanda isu ti kinamaagda: iti casta ti casasaadda ket ananamongan dagiti sasaoda. Selah. 14 Cas carnero naiwayatda ken tanem; ni patay agarabto cadacuada; ket ti nalinteg addanto panagturayna cadacuada no bumigat; ket ti pintasda runotento ni tanem cadagiti pagnaedanda. 15 Ngem ti Dios subbotennanto ti cararruac iti pannacabalin ni tanem: ta isu awatennacto. Selah. 16 Dica agbuteng no adda maysa nga bumacnang, no ti dayag ti balayna ket dumackel; 17 Ta intono matay awanto ti maitugotna: ti dayagna dinto bumaba a sumurot kencuana. 18 Uray pay no iti bayat ti panagbiagna binenditona ti cararruana: ken dagiti tattao idaydayawdaca, no agaramidca iti naimbag kenca met laeng. 19 Mapanto cadagiti caputotan dagiti ammana; didanto makita uray caano man ti lawag. 20 Ti tao a madaydayaw, ken saan a macaawat, isu ket cas cadagiti an-animal a mapucaw. SALMO 50 Maysa a Salmo ni Asaph. 1 Ti Mannacabalin a Dios, uray pay iti APO, nagsaon, ket inawaganna ti daga manipud iti irurusing ti init agingga iti ilelennecanna. 2 Manipud iti Sion, ti awan pagcuranganna iti kinaimnas, ti Dios nagranniagen. 3 Ti Diostayo umay, ket saan nga agulimec: adda apuy a mangrunaw iti sangoananna, ket iti sibayna aglicmut ti casta unay a baggio. 4 Awaganna dagiti langlangit sadi ngato, ken ti daga, tapno ocomenna coma ti ilina. 5 Urnongenyo dagiti sasantosco a maitipon caniac; dagiti nakitulag caniac gapu iti panagidaton. 6 Ket dagiti langlangit ipalawagdanto ti kinalintegna: ta ti Dios isu ti ocom met laeng. Selah. 7 Dumngegca, O ilic, ket agsaoacto; O Israel, ket agsacsiacto kenca: siac ti Dios, ti Diosmo met laeng. 8 Saancanto a babalawen gapu cadagiti datdatonmo wenno dagiti datdatonmo a mapuoran, nga addada idi a cancanayon ditoy sangoanac. 9 Diacto awaten ti bumaro a baca iti balaymo, uray met cadagiti calcalding a lallaki cadagiti corralmo. 10 Ta tunggal animal ti cabakiran ket cucuac, ken dagiti arban iti tapaw dagiti sangngaribu nga turturod. 11 Ammoc amin dagiti tumatayab cadagiti banbantay: ken dagiti atap nga an-animal ti away cucuac. 12 No coma no mabisinac, saanco nga ibaga kenca: ta ti lubong cucuac, ken amin nga adda kencuana. 13 Agsidaacto aya iti lasag ti bacbaca, wenno uminom iti dara dagiti calcalding? 14 Idatonmo ti Dios ti panagyaman; ket bayadam dagiti incarim iti Cangatoan unay: 15 Ket awagannac iti aldaw ti pannagpulcoc: ispalencanto, ket sica itantan-ocnacto. 16 Ngem cadagiti nadangkes ti Dios kunana, Ania ti maaramidmo a pangiparangarangmo cadagiti al-allagadec, wenno awatem iti pannakitulagco ita ngiwatmo? 17 Idinto a caguram iti masursuroan, ken ibellengmo dita licudam dagiti sasaoc? 18 Idi nakitam ti maysa a mannanacaw, nakitimpuyogca kencuana, ken nakiramanca cadagiti naki-abig cadagiti dida assawa. 19 Sica ipaaymo ta ngiwatmo iti dakes, ken ta dilam parnuayenna iti kinasicap. 20 Agtugawca ket agsaoca a maibusor iti cabsatmo; padpadacsem ti anac ni inam met laeng. 21 Inaramidmo dagitoy a banbanag, ket nagulimecac; ipatpatomon a siac maysaac a cas kenca met laeng: ngem babalawencanto, ket urnosecto ida nga icabil iti sango dagiti matam. 22 Ita utobenyo daytoy, dacayo a manglipat iti Dios, di la ket ta pirgipirgisencayo, ket awan iti macaispal. 23 Siasinoman a mangidaton ti pammadayaw itantan-ocnac: ket daydiay mangurnos a nalinteg iti dalanna iparangconto kencuana ti panangisalacan ti Dios. SALMO 51 Agpaay iti cangronaan nga Tomotokar, Maysa a Salmo ni David, idi immay kencuana ni mammadto a Nathan, calpasan iti iseserrecna ken Bath-sheba. 1 Caasiannac, O Dios, cas mayannurot iti kinamanagayatmo: cas mayannurot iti kinaadu dagiti nadungo nga caasim punasem dagiti kinasalungasingco. 2 Buggoannac iti isuamin nga kinadakesco, ken ugasannac iti basolco. 3 Ta annugotec dagiti salsalungasingco: ket ti basolco cancanayon nga adda ditoy sangoanac. 4 Sica, sica laeng, ti nacabasolac, ken nacaaramidac daytoy a dakes iti sangoanam: ta maipakita ti kinalintegmo no agsaoca, ken nalawagca no agocomca. 5 Adtoy, nayanacac iti kinadakes; ket iti basol impasngaynac ni inac. 6 Adtoy, tarigagayam ti kinapudno cadagiti caungan a paspaset: ket dagiti nalemmeng a paset ipacaammomto caniac ti kinasirib. 7 Dalusannac babaen iti hisopo, ket madalusannacto: buggoannac, ket napudpudawacto ngem nieve. 8 Ipangegmo caniac ti rag-o ken ragsac; tapno dagiti tultulang a binungbungtolmo agragsacda coma. 9 Ilingedmo ta rupam cadagiti basbasolco, ket punasem dagiti isuamin a kinadakesco. 10 Parsuaem caniac ti nadalus a puso, O Dios; ket pabaroem ti maysa a nalinteg nga espiritu itoy unegco. 11 Dinac pagtalawen dita saclangmo; ket dica iccaten ti nasantoan nga espiritum caniac. 12 Isublim caniac ti ragsac ti panangisalacanmo; ken patacderennac iti siwayawaya nga espiritum. 13 Iti casta isurocto cadagiti managlabsing dagiti daldalanmo; ket dagiti managbasol agsublidanto kenca. 14 Ispalennac iti pannacabasol ti panangpapatay, O Dios, sica a Dios ti pannacaisalacanco: ket ti dilac icantananto a napigsa iti kinalintegmo. 15 O Apo, luctam dagiti bibigco; ket ti ngiwatco iparangarangnanto ti pannacaidaydayawmo. 16 Ta saanmo nga tinarigagayan iti sacrificio; ta no saan a casta itdec coma: saanmo nga tinarigagayan ti pinuoran a daton. 17 Dagiti sacsacrificio a maipaay iti Dios isu ti espiritu a nadudog: ti nadudog ken sibabawi a puso, O Dios, saanmonto a laisen. 18 Ipaayam iti imbag ita naimbag a nakemmo iti Sion: bangonem dagiti bacbacud ti Jerusalem. 19 Iti casta maay-ayocanto cadagiti sacsacrificio ti kinalinteg, iti daton a pinuoran ken ti sibubukel a daton a pinuoran: iti casta agidatondanto cadagiti bumaro a bacbaca iti rabaw ti altarmo. SALMO 52 Agpaay iti cangronaan nga Tomotokar, Maschil, Maysa a Salmo ni David, idi immay ni Doeg nga Edomita ket imbagana ken Saul, a kinunana kencuana, ni David napan idiay balay ni Ahimelech. 1 Apay a pagpasindayagmo man ti kinaulpit, O mannacabalin a tao? ti kinaimbag ti Dios cancanayon iti panagtultuloyna. 2 Ta dilam paltuadenna dagiti kinarukiroc; cas natadem a navajas, nga agtartarabaho a mangisicsicap. 3 Ad-adda a pagayatam ti dakes ngem ti naimbag; ken ti panagulbod ngem ti panagsaom iti kinalinteg. Selah. 4 Pagayatam amin dagiti mangalun-on a sasao, O sica naulbod a dila. 5 Iti casta ti Dios dadaelennacanto met nga agnanayon, isu ket alaennacanto nga ipanaw, ket gabsutennacanto nga iruar dita toldam, ket parutennacanto iti daga dagiti sibibiag. Selah. 6 Dagiti nalinteg makitadanto met, ken agbutengda, ket catawaandanto isuna: 7 Adtoy, daytoy isu ti tao a dina pinagbalin ti Dios a pigsana; ngem nagtalec ketdi iti caadu dagiti kinabacnangna, ken pinabilegna ti bagina iti kinadangkesna. 8 Ngem siac arigac la maysa a nalangto nga oliva iti balay ti Dios: agtalecac iti asi ti Dios nga agnanayon. 9 Idaydayawcanto iti agnanayon, ta sica ti nangaramid: ket manginanamaacto iti naganmo; ta isu ti naimbag iti saclang dagiti sasantosmo. SALMO 53 Agpaay iti cangronaan nga Tomotokar iti Mahalath, Maschil, Maysa a Salmo ni David. 1 Ti maag kinunana iti pusona, Awan ti Dios. Nadangkesda, ken nagaramidda iti nacarimrimon a kinadakes: awan uray maysa nga agaramid iti naimbag. 2 Ti Dios kimmita manipud sadi langit cadagiti annac dagiti tattao, tapno kitaenna no adda maysa a nacaawat, a nangbiroc iti Dios. 3 Tunggal maysa cadacuada timmallicudda: padapada a nagbalinda a nacarugrugit; awan uray maysa nga agaramid iti naimbag, awan, uray maysa. 4 Dagiti managaramid iti dakes awan aya ti isipda? a manglamut ti ilic a cas panaglamutda iti canen: ket dida pay inawagan ti Dios. 5 Adda idi isuda ti dackel a panagbuteng, idiay awan ti buteng: ta ti Dios inwarsiwarsina dagiti tultulang ti sipapacarso a bumusor kenca: sica imbabainmo ida, gapu ta ti Dios pinaayna ida. 6 O ti pannacaisalacan ti Israel agparang coma manipud iti Sion! Intono ti Dios subbotenna ti pannacacayaw ti ilina, ni Jacob agragsacto, ket ti Israel agrag-onto. SALMO 54 Agpaay iti cangronaan nga Tomotokar idiay Neginoth, Maschil, Maysa a Salmo ni David, idi dagiti Ziphims immayda imbaga a kinuna ken Saul, Saan cadi a ni David adda nga aglemlemmeng cadatayo? 1 Isalacannac, O Dios, gapu ita naganmo, ket ocomennac ita pannacabalinmo. 2 Denggem ti cararagco, O Dios; allingagem dagiti balbalicas ti ngiwatco. 3 Ta dagiti gangannaet bimmangonda a bumusor caniac, ket dagiti naranggas binirbirocda toy cararruac: saanda nga insaad ti Dios iti sangoananda. Selah. 4 Adtoy, ti Dios isu ti catulongac: ti Apo makicuyog cadagiti manaranay itoy cararruac. 5 Gunggonaannanto ti dakes dagiti cabcabusorco: putdem ida iti kinapudnom. 6 Iti sibubulos a nakem agidatonacto kenca: idaydayawconto iti naganmo, O APO; ta isu naimbag. 7 Ta inispalnac iti amin a riribuc: ket ti matac nakitanan ti calicagumna a maipaay cadagiti cabusorco. SALMO 55 Agpaay iti cangronaan nga Tomotokar idiay Neginoth, Maschil, Maysa a Salmo ni David. 1 Ipangagmo toy cararagco, O Dios; ket dica aglinged iti daytoy nga ararawco. 2 Timudennac, ken denggennac: naladingitac iti as-asugco, ket agsasainnecac; 3 Gapu iti timec ti cabusor, gapu iti panangilupit dagiti nadangkes: ta agipalladawda iti kinadakes caniac, ket iti pungtotda caguradac. 4 Ti pusoc matuocan unay itoy unegco: ket dagiti al-alingget ni patay nagtinnagdan caniac. 5 Ti buteng ken tayegteg nagdissuorda caniac, ket ti pannacaalliaw pinandagannac. 6 Ket kinunac, O no adda coma paypayacco a cas maysa a calapati! iti casta tumayabac coma nga umadayo, ket aginanaac. 7 Adtoy, iti casta agcalcalautangac coma iti adayo, ken agtalinaed iti let-ang. Selah. 8 Agpartacac coma nga talawan ti umalipugpug nga angin ken bagio. 9 Dadaelem, O Apo, pisiem ti dildilada: ta nakitac ti kinaranggas ken ringgor idiay uneg iti ili. 10 Aldaw ken rabii agibaw-ibawda iti rabaw dagiti bacbacud: ti met kinadakes ken ti ladingit addada iti tengngana. 11 Ti kinadakes adda iti tengngana: panangilupit ken panangiculbo saanda a pumanaw cadagiti lanlansanganna. 12 Ta saan a cabusor ti nangab-abi caniac; ta no casta naibturac coma: saan met a ti nanggurgura caniac ti nagindadackel a bimmusor caniac; ta no casta ket naglemmengac coma kencuana: 13 Ngem sica gayam, tao a capadpadac, ken mangidalanco, ken capalpalaloac a cadcaddua. 14 Nagcadduata iti nasam-it a patigmaan, nagnata iti balay ti Dios agraman dagiti caadduan. 15 Ni patay gammatanna coma ida, bumabada coma daras idiay impierno: ta ti kinadangkes adda iti pagnaedanda, ken cadacuada. 16 No maipapan caniac, siac umawagacto iti Dios; ket iti APO isalacannacto. 17 Malem, ken bigat, ken iti tengnga ti aldaw, agcararagacto, ken agasugac iti napigsa: ket denggennanto ti timecco. 18 Sinubbotna a sitatalna toy cararruac iti gubat a maibusor caniac: ta aduda dagidiay cacadduac. 19 Ti Dios mangegnanto, ket parigatenna ida, uray pay ti agtaeng manipud ugma. Selah. Gapu ta awan ti panagbalbaliwda, iti casta dida nagbuteng iti Dios. 20 Intedna dagiti im-imana a bumusor cadagiti sicacappia kencuana: sinalungasingna ti tulagna. 21 Ti sasao ti ngiwatna naglamuyotda a cas mantequilla, ngem gubat ti adda ti pusona: dagiti sasaona naluclucnengda ngem lana, nupay csata isuda dagiti nacaasut a camcampilan. 22 Iyallatiwmo ta awitmo iti APO, ket isu saranayennacanto: saannanto pulos nga ipalubos ti nalinteg a magaraw. 23 Ngem sica, O Dios, ipisocmonto ida iti abut ti pannacadadael: dagiti mawaw iti dara ken mananggulib a tattao didanto agbiag iti caguddua dagiti al-aldawda; ngem siac agcammatalecacto kenca. SALMO 56 Agpaay iti cangronaan nga Tomotokar iti Jonath-elem-rechokim, Michtam ni David, idi innala dagiti Philisteos ti Gath. 1 Caasiannac cadi, O Dios: ta ti tao cayatnac nga alun-onen; makigubgubat nga inaldaw a mangilupit caniac. 2 Dagiti cabusorco cayatdac nga alun-unen nga inaldaw: ta aduda dagiti makibacal a bumusor caniac, O sica a Cangatoan unay. 3 Ania man nga horas a panagbutengco, agtalecacto kenca. 4 Iti Dios idaydayawconto ti saona, iti Dios insaadcon ti panagtalecco; saanacto a mapabuteng ti maaramid ti lasag caniac? 5 Tunggal aldaw ballicogenda dagiti sasaoc: amin dagiti pampanunotda maibusorda caniac a pacadacsac. 6 Agtitiponda a sangsangcamaysa, ken aglingedda, tandaananda dagiti tugtugotco, no ur-urayenda daytoy cararruac. 7 Macalasutdanto ngata babaen ti kinadakes? babaen ti pungtotmo ipurruacmo dagiti tattao, O Dios. 8 Ammom dagiti panagpagnapagnac: icabilmo dagiti luluac iti botelyam: saanda aya nga adda dita librom? 9 Intono umawagac kenca, ti casta dagiti cabusorco tumallicoddanto: daytoy ammoc, ta ti Dios agpaay caniac. 10 Iti Dios idaydayawconto ti saona: iti APO idaydayawconto ti saona. 11 Iti Dios insaadco ti panagtalecco: diacto agbuteng iti aniaman nga aramiden ti tao caniac? 12 Dagiti carcarim addada caniac, O Dios: ipaayconto dagiti datdaton a panagdaydayaw kenca. 13 Ta inispalmo toy cararruac iti patay: saanmo cadi aya nga ispalen dagiti sacsacac iti pannacatuang, tapno macapagnaac iti sangoanan ti Dios babaen ti lawag dagiti sibibiag? SALMO 57 Agpaay iti cangronaan nga Tomotokar, Al-taschith, Michtam ni David, idi tinarayanna ni Saul idiay uneg iti rukib. 1 Caasiannac, O Dios, mangngaasica cadi caniac: ta ti cararruac agsalindeg kenca: wen, iti salinong dagiti paypayacmo agcamangacto, aginggana dagitoy a pacarigatan mapalabas. 2 Umkisacto iti Dios a cangatoan unay; iti Dios a mangipapaay cadagiti amin a banbanag caniac. 3 Agbaonto manipud langit, ket isalacannac ti mangab-abi nga mangalun-on caniac. Selah. Ti Dios ibaonnanto ti kinamananga-asina ken kinapudnona. 4 Ti cararruac adda iti tengnga dagiti leon: ket agiddaac pay iti baet dagiti napadarangan, uray pay dagiti annac dagiti tattao, nga dagiti ngipenda ket picpica ken panpana, ken ti dilada natadem a campilan. 5 Maitan-occa cadi, O Dios, iti ngato dagiti langlangit; ti dayagmo rimbawanna coma amin a daga. 6 Insaganaanda iti bateng dagiti addangco; ti cararruac naparucob: nangcalida iti palab-og iti sangoanac, iti tengnga ti nacaipisocanda met laeng. Selah. 7 Ti pusoc naisimpan, O Dios, ti pusoc naisimpan: agcantaacto ken itedco dagiti panangidaydayaw. 8 Agriingca, kinadayagco; agriingcayo, saltero ken arpa: siac a bucodco met laeng agriingacto a masapa. 9 Idaydayawcanto, O Apo, iti tengnga dagiti tattao: cantaancanto iti tengnga dagiti nasnacion. 10 Ta ti kinaasim dackel agingga cadagiti langlangit, ket ti kinapudnom agingga cadagiti ul-ulep. 11 Maitan-occa cadi, O Dios, iti ngato dagiti langlangit: ti dayagmo rimbawanna coma amin ti daga. SALMO 58 Agpaay iti cangronaan nga Tomotokar, Al-taschith, Michtam ni David. 1 Pudno aya nga agsaocayo iti kinalinteg? O gimong? agipatocayo aya a sililinteg, O dacayo nga annac dagiti tattao? 2 Wen, iti uneg ti puso agaramidcayo iti kinadakes; timbengenyo ti ranggas dagiti im-imayo ditoy daga. 3 Dagiti nadangkes naisupadidan manipud iti aanacan: sumiasidan apaman a mayanacda, nga agsaoda cadagiti ulbod. 4 Ti gitada cas gita ti uleg: casda la carasaen a tuleng a rinepcanda ti lapayagda; 5 A dina mangngeg ti timec dagiti manangayaw, uray pay dagiti calaingan a mangayaw. 6 Pusiem dagiti ngipenda, O Dios, cadagiti ngiwatda: pusiem dagiti sangsangi dagiti cabanbannoaganna a leon, O APO. 7 Aglunagda cadi a cas danum nga agayus a canayon: no binnatenna nga isirig dagiti panpanana, itulocmo nga maputedputedda coma. 8 Cas ti bisucol a marunaw, lumabasda coma tunggal maysa: cas iti pannacaalis ti maysa a babai, tapno saanda a makita ti init. 9 Sacbay ti pannacaricna dagiti bangbangam dagiti sisiit, pucawennanto ida cas iti alipugpug, dagiti sibibiag, ken iti pungtotna. 10 Ti nalinteg agrag-onto no makitana ti pammales: ibuggonanto dagiti sacsacana iti dara ti nadangkes. 11 Tapno iti casta ti maysa a tao cunaennanto, Pudno nga adda gunggona dagiti nalinteg: pudno nga isu ti Dios a mangocom ditoy daga. SALMO 59 Agpaay iti cangronaan nga Tomotokar, Al-taschith, Michtam ni David; idi nagbaon ni Saul, ket binantayanda ti balay tapno papatayenda isuna. 1 Ispalennac cadagiti cabusorco, O Diosco: salucubannac cadagiti bumangon a bumusor caniac. 2 Ispalennac cadagiti agar-aramid iti kinadakes, ken isalacannac cadagiti tattao a mawaw iti dara. 3 Ta, adtoy, cumlebda a mangsaneb toy cararruac: ti maingel sititimpuyog a bumusor caniac; saan a gapu iti panaglabsingco, wenno gapu iti basolco, O APO. 4 Agtarayda ken agsaganada met idinto nga awan basolco: agriingca tapno tulongannac, ket matmatam. 5 Sica ngarud, O APO Dios dagiti buybuyot, Dios ti Israel, bumangonca tapno sarungcaram amin dagiti nasnacion: saanca cadi a naasi cadagiti nadangkes a managlabsing. Selah. 6 Agsublida iti rumabii: agtagguubda a cas aso, ket liclicmutenda iti ili. 7 Adtoy, agtig-abda cadagiti ngiwatda: adda camcampilan cadagiti bibbibigda: ta siasino, kunada, ti macangngeg? 8 Ngem sica, O APO, catawaamto ida; pagbalinemto amin dagiti nasnacion a marabrabac. 9 Gapu iti bilegna agpannurayacto kenca: ta ti Dios isu ti calasagco. 10 Ti Dios iti asic sabtennacto: ti Dios ipaaynanto a makitac ti calicagumco nga agpaay cadagiti cabusorco. 11 Dica papatayen ida, di la ket ta dagiti tattaoc manglipatda: iwarasmo ida gapu iti pannacabalinmo, ket ipababam ida, O Apo a calasagmi. 12 Gapu iti basol ti ngiwatda ken sasao dagiti bibbibigda matiliwda met la coma iti kinatangsitda: ken gapu iti panaglunlunod ken panagul-ulbod iti saoenda. 13 Runawem ida iti pungtot, runawem ida, tapno maawandan: ket ipacaammom cadacuada a ti Dios agturay ken Jacob aginggana cadagiti pungto itoy daga. Selah. 14 Ket iti rumabii pagsubliem ida; pagtaguubem ida a cas aso, ket liclicmutenda ti ili. 15 Agalla-alladanto nga agbiroc iti taraon, ken sumsumgadanto no dida mapnec. 16 Ngem icantacto ti kinabilegmo; wen, icantacto a natibong iti agsapa ti kinaasim: ta sican ti calasagco ken camangco iti aldaw ti pannacariribucco. 17 Kenca, O bilegco, agcantaacto: ta ti Dios isu ti calasagco, ken ti Dios iti asic. SALMO 60 Agpaay iti cangronaan nga Tomotokar iti Shusan-eduth, Michtam ni David, a panangisuro; idi nakisinnuppiat ken Aram-naharaim ken ni Aram-zobah, idi nagsubli ni Joab, a pinatayna ti sangapulo ket dua a ribu iti Edom idiay tanap iti asin. 1 O Dios, sica impalladawnacami, sica intublacnacami, nacaungetca; O taliawennacami cadi manen. 2 Pinagkintayegmo ti daga; pinagbirrim: agasam dagiti rengrengngatna; ta agpigpigerger. 3 Imparangam ti ilim cadagiti nabantot a banbanag: pinainumnacami iti arac ti pammasiddaaw. 4 Intedmo ti bandera cadagiti agbuteng kenca, tapno maibistrad gapu iti kinapudnom. Selah. 5 Tapno ti ay-ayatem maispal coma; isalacanmo babaen iti macanawan nga imam, ket denggennacami. 6 Ti Dios nagsaon iti kinasantona; agrag-oacto, bingayecto ti Sikem, ket rucodecto ti tanap a Succot. 7 Ti Galaad cucuac, ken cuac ti Manases; ti Efraim isu met ti pigsa toy uloc; ti Juda isu ti cetroc; 8 Ti Moab isu ti bacca a pagugasac; idiay Edom ipalladawconto ti sapatosco: Filistia, agballigica gapu caniac. 9 Siasino ti mangipanto caniac iti ili a natibker? siasino ti mangiturong caniac diay Edom? 10 Saan cadi a sica, O Dios, ti nangipalladaw cadacami? ket sica, O Dios, a saan nga nakicuyog cadagiti buybuyotmi? 11 Tulongannacami iti riribuc: ta barengbareng ti tulong nga aggapu iti tao. 12 Gapu iti Dios agaramidtayto a simamaingel: ta isu ti mangibaddecto dagiti cabcabusortayo. SALMO 61 Agpaay iti cangronaan nga Tomotokar iti Neginah, Maysa a Salmo ni David. 1 Denggem ti ickisco, O Dios; imdengam ti cararagco. 2 Manipud iti pungto ti daga umawagacto kenca, intono toy pusoc ket malapunos: itulodnac iti bato a nataytayag ngem siac. 3 Ta sican ti kinamangac, ken natibker a torre cadagiti cabusor. 4 Agtaengacto nga agnanayon iti tabernaculom: agcamangacto iti salucob dagiti paypayacmo. Selah. 5 Ta sica, O Dios, dinengngegmo dagiti carcaric: intedmo caniac ti tawid dagiti agbuteng iti naganmo. 6 Paatiddugemto ti biag ti ari: ken dagiti tawtawenna casladanto cadagiti adu a capcaputotan. 7 Agtaengto iti sangoanan ti Dios iti agnanayon: O saganaem ti kinamanangngaasi ken kinapudno, tapno isuda ti mangsalimetmet kencuana. 8 Iti casta icantacto ti panangidaydayaw iti naganmo iti agnanayon, tapno inaldaw a tungpalec dagiti carcaric. SALMO 62 Agpaay iti cangronaan nga Tomotokar, ken Jeduthun, Maysa a Salmo ni David. 1 Pudno a toy cararruac agpannuray iti Dios: ta kencuana aggapu ti pannacaisalacanco. 2 Isu laeng ti batoc ken salacanco; isu ti calasagco; saanacto unay a maan-ano. 3 Casano capaut a pampanunotenyo ti dakes iti maysa a tao? mapapataycayto amin: cascayto la nagirig a diding, ken cas aglugadlugad nga alad. 4 Agbibinnalacadda laeng tapno mapadsoda manipud iti kinangatona: pagay-ayatanda dagiti ul-ulbod: mangbenditionda cadagiti ngiwatda, ngem mangilunodda cadagiti unegda. Selah. 5 Cararruac, agpannurayca iti Dios laeng; ta ti inanamac aggapu kencuana. 6 Isu laeng ti batoc ken salacanco: isu ti nangato a baluartec; saannacto nga maan-ano. 7 Adda iti Dios ti pannacaisalacanco ken dayagco: ti bato ti kinabilegco, ken ti camangco, adda iti Dios. 8 Agtaleccayo kencuana iti amin a tiempo; dacayo nga umili, ibucbocyo ti pusoyo iti sangoananna: ti Dios isu ti camang a maipaay cadatayo. Selah. 9 Pudno a dagiti tattao a nababa ti casasaadda ubbawda, ket dagiti tattao a nangato ti casasaadda ulbodda: ti gagantingan tumayocdanto, ket no agtitiponda amin nalaglag-anda ngem kinaubbaw. 10 Dica pagtalcan ti panangilupit, ket dica mapaubbaw iti panagagaw: no ti sanicua umadu, dica italinaed ta pusom cadacuada. 11 Ti Dios nagsaon iti naminsan; naminduan a nangngegco daytoy; a ti pannacabalin biang ti Dios. 12 Casta met a sica, O Apo, ti asi biangmo: ta sica itdem iti tunggal tao ti mayannatup iti aramidna. SALMO 63 Maysa a Salmo ni David, idi adda iti let-ang iti Juda. 1 O Dios, sica ti Diosco; sapaecto ti mangbiroc kenca: toy cararruac mawaw kenca, ti lasagco segseggaannaca iti naticag ken nautuyan a daga, nga awanan danum; 2 Tapno kitaec ti pannacabalinmo ken dayagmo, iti casta minatmatanca iti uneg ti nasantoan nga ayanmo. 3 Ta ti kinamanagayatmo nasaysayaat ngem ti biag, dagiti bibbibigco idaydayawdacanto. 4 Iti casta idaydayawcanto bayat ti panagbiagco: itag-ayconto dagiti im-imac gapu iti naganmo. 5 Toy cararruac mapnecto cas cadagiti pata ken taba; ket ti ngiwatco idaydayawnacanto cadagiti siraragsac a bibbibig. 6 No malagipca iti pagiddaac, ken panpanunotenca cadagiti panagpuyat iti rabii. 7 Gapu ta sican ti saranayco, ngarud iti salinong dagiti paypayacmo agragrag-oacto. 8 Toy cararruac sumursurot a sigaganetget kenca: ti macanawan nga imam patacderennac. 9 Ngem dagiti mangbiroc itoy cararruac, tapno dadaelenda, mapandanto cadagiti nababbaba nga paspaset ti daga. 10 Maiyawatdanto iti pannacabalin ti campilan: isudanto ti maysa nga bingay cadagiti zorra. 11 Ngem ti ari agrag-onto iti Dios; tunggal maysa nga agsapata gapu kencuana agragsacto: ngem ti ngiwat dagiti agsao cadagiti ul-ulbod ket maputeddanto. SALMO 64 Agpaay iti cangronaan nga Tomotokar, Maysa a Salmo ni David. 1 Denggem ti timecco, O Dios, itoy panagasugco: salacnibam toy biagco iti panagbuteng iti cabusor. 2 Ilemmengnac iti nalimed a panangisicat dagiti managdacdakes; iti iya-alsa dagiti agar-aramid iti kinakillo: 3 Dagidiay a pinatademda ti dilada a cas campilan, ken inbiatdan dagiti panpanpanada, nga isuda dagiti napait a sasao: 4 Tapno puntaanda ti nalimed dagiti napnoan imbag: dagus nga puntaanda isuna, ket dida agbuteng. 5 Paturedenda dagiti bagbagida iti dakes a gandat: pagtutulaganda ti agisaad iti silo a nalinged; kunada, Siasino ti macakitanto cadacuada? 6 Isuda sapulenda dagiti kinadangkes; nalpasdan ti naregta a panangsapsapul: ket ti nalimed a panunot ti tunggal maysa cadacuada, ken ti puso, isu naguneg. 7 Ngem ti Dios puntaannanto ida babaen iti maysa a pana; ket dagus nga masugatdanto. 8 Iti casta aramidendanto dagiti met laeng dilada a mangitublac cadacuada: isuamin dagiti macakita cadacuada ket tumalawdanto. 9 Ket amin a tao agbutengdanto, ket ibunannagdanto ti aramid ti Dios; ta ut-utobendanto a sisisirib ti panangaramidna. 10 Dagiti nalinteg maay-ayatandanto iti APO, ket agcamangdanto kencuana; ket amin dagiti nalinteg iti pusoda agragsacdanto. SALMO 65 Agpaay iti cangronaan nga Tomotokar, Maysa a Salmo ken Canta ni David. 1 Ti panangidaydayaw segsegaannaca, O Dios, idiay Sion: ket kenca maitungpalto ti cari. 2 O sica a dumngeg iti cararag, kenca ti umayanto dagiti isuamin nga lasag. 3 Dagiti kinadangkes mangabacda caniac: no maipapan cadagiti panaglablabsingmi, sica dalusamto ida. 4 Bendito ti tao a piliem, ket aramidem nga umasideg kenca, tapno macapagnaed cadagiti paraanganmo: mapneccamto iti kinaimbag ti balaymo, uray iti nasantoan a templom. 5 Babaen iti nacakigkigtot a banbanag iti kinalinteg sica sungbatannacaminto, O Dios ti pannacaisalacanmi; sica a pagtalcan dagiti amin a pungto ti daga, ken dagiti adda iti adayo babaen cadagiti taaw: 6 Daydiay babaen iti bilegna patibkerenna dagiti banbantay; idinto ta nagbarikes iti pannacabalin: 7 Daydiay pagtalnaenna ti daranudor dagiti baybaybay, ti daranudor dagiti daldalluyon, ken ti gulogulo dagiti tattao. 8 Dagiti met agnaed cadagiti caadayoan nga disdisso mabutengda maigapu cadagiti pacalaglagipan ti pannacabalinmo: sica paragsakem dagiti iruruar ti bigat ken ti rabii. 9 Sica sarungcaram ti daga, ket bisibisam: pabacnangem unay gapu iti carayan ti Dios, a napno iti danum: insaganaam ida iti bukel, nga impaaymon cadacuada. 10 Danumam a sibubuslon dagiti gulgulisna: pababaem dagiti timtimburongna: palucnengem ida cadagiti arbis: bendicionam ti panagrusingna. 11 Balangatam ti tawen ita kinaimbagmo; ket dagiti daldalanmo agitedtedda iti kinalucmeg. 12 Tedtedanda dagiti pagaraban cadagiti let-ang: ket dagiti babassit nga turturod nabaricsanda iti ragsac. 13 Dagiti pagaraban nacawesanda cadagiti ar-arban; dagiti tantanap nacumotanda met iti anien; agdirdir-ida iti ragsac, agcancantada met. SALMO 66 Agpaay iti cangronaan nga Tomotokar, Maysa a Canta wenno Salmo. 1 Aramidem ti naragsac a panagdir-i iti Dios, dacayo amin a sangadagaan: 2 Icantam ti dayaw ti naganna: padayagem ti pannacaidaydayawna. 3 Cunaem iti Dios, Anian a nacaal-alingetca cadagiti ar-aramidmo! gapu iti cadackel ti pannacabalinmo dagiti cabcabusormo maparucmadanto kenca. 4 Ti amin a daga agdaydayawto kenca, ken cancantaannacanto; cantaandanto ti naganmo. Selah. 5 Umaycayo ket kitaenyo dagiti ar-aramid ti Dios: nacaal-alinget cadagiti aramidna a maipaay cadagiti annac dagiti tao. 6 Pinagbalinna ti taaw a namaga a daga: linasatda ti danum babaen cadagiti sacada: sadiay nagragrag-ocami kencuana. 7 Isu agturay babaen ti pannacabalinna iti agnanayon; dagiti matana kitkitaenna dagiti nasnacion: ti nasukir saanda coma a macapagpasindayaw. Selah. 8 O benditoenyo ti Diostayo, dacayo a tattao, ket ipangegyo ti timec ti pannacaidaydayawna: 9 Daydiay mangigaga ti cararruatayo iti panagbiag, ken dina ituloc a dagiti sacsacatayo maiyalisda. 10 Ta sica, O Dios, pinadasnacamin: sinuutnacamin, a cas iti pirac a maguguran. 11 Impastrecnacami iti bateng; insaadmo ti pannacaparigat cadagiti lomlomomi. 12 Pinagtalaytaymo dagiti tattao cadagiti rabaw dagiti ul-ulomi; naglasatcami iti apuy ken iti danum: ngem sica inlusotnacami nga impan iti nabacnang a disso. 13 Umayacto iti balaymo agraman cadagiti datdaton nga mapuoran: bayadacto kenca dagiti carcaric, 14 Nga insawang dagiti bibbibigco, ken insao ti ngiwatco, idi addaac iti pagducotan. 15 Idatonconto kenca ti datdaton nga mapuoran dagiti nalucmeg, agraman incenso dagiti carcarnero a lallaki; agidatonacto cadagiti bacbaca a lallaki agraman calcalding. Selah. 16 Umaycayo ken dumngegcayo, dacayo amin nga agbuteng iti Dios, ket ipalawagconto ti impaayna itoy cararruac. 17 Imkisac kencuana babaen iti ngiwatco, ket naidaydayaw babaen daytoy dilac. 18 No ipategco ti kinadakes ditoy pusoc, ti Apo saanto nga dumngeg caniac: 19 Ngem pudno a ti Dios dinengegnac; inimdenganna ti timec ti cararagco. 20 Bendito coma ti Dios, isu a saan a nangiwagsac iti cararagco, wenno ti asina caniac. SALMO 67 Agpaay iti cangronaan nga Tomotokar idiay Neginoth, Maysa a Salmo wenno Canta. 1 Dios manga-asica coma cadacami, ken bendicionannacami; pagraniagem coma ti rupana cadacami; Selah. 2 Tapno ti dalanmo maammoan coma ditoy rabaw ti daga, ti panangisalacanmo a nasalun-at iti tengnga dagiti amin a nasnacion. 3 Dagiti tattao idaydayawdaca coma, O Dios; amin dagiti tattao idaydayawdaca coma. 4 O dagiti nasnacion agracsacda ken agcantada coma a pagrag-o: ta ocomemto a sililinteg dagiti tattao, ken iturayam dagiti nasnacion ditoy rabaw ti daga. Selah. 5 Dagiti tattao idaydayawdaca coma, O Dios; amin nga tattao idaydayawdaca coma. 6 Iti casta ti daga pinaaduna ti apitna; ket ti Dios, ti met laeng Diostayo, bendicionannatayto. 7 Ti Dios bendicionannatayto; ket amin dagiti pungto ti daga agbutengdanto kencuana. SALMO 68 Agpaay iti cangronaan nga Tomotokar, Maysa a Salmo wenno Canta ni David. 1 Tumacder coma ti Dios, dagiti cabusorna mawarawarada coma: agtalawda met coma iti sangoananna dagiti gumurgura kencuana. 2 Cas pannacaipanaw ti asuc, papanawem coma ida a casta: cas pannacalunag ti allid a maisarang iti apuy, casta coma ti pannacapucaw dagiti nadangkes iti sangoanan ti Dios. 3 Ngem dagiti nalinteg maay-ayatanda coma; agrag-oda coma iti saclang ti Dios: wen, agragragsacda coma iti napalalo unay. 4 Cantaanyo ti Dios, icantayo ti panangidaydayaw iti nagannna: itan-ocyo isuna nga agsacay a lumasat cadagiti langlangit babaen iti naganna JAH, ket agragrag-ocayo iti sangoananna. 5 Ama dagiti ul-ulila, ken ocom dagiti balbalo, ti Dios iti uneg ti nasantoan a pagnaedanna. 6 Ti Dios ipasdecna ti taltalimpungawen iti famfamilia: irruarna dagiti nacayawan cadagiti cawcawar: ngem dagiti nasukir agnaedda iti naticag a daga. 7 O Dios, idi impanguloam ti ilim, idi naglasatca iti let-ang; Selah: 8 Ti daga nagkintayeg, dagiti met langlangit nagtinnag iti sangoanan ti Dios: uray pay idiay Sinai nagpigerger iti sangoanan ti Dios, ti Dios iti Israel. 9 Sica, O Dios, nangibaonca iti nacaad-adu nga tudo, gapuna pinatalgedam dagiti tawidmo, idi a nabannoganda. 10 Ti gimongmo nagnaed sadiay: sica, O Dios, insaganaam ita kinaimbagmo a maipaay ti napanglaw. 11 Ti Apo itdenna ti sao: dackelda a buyot dagiti nangiwarnac cadagiti damdamag. 12 Dagiti ar-ari cadagiti buybuyot agtalawda: ket ti babai nga nagbati iti balay bingayenna ti masamsam. 13 Uray no agiddaca iti tengnga dagiti damdamili, caslacanto dagiti paypayac ti calapati a nacalupcupan iti pirac, ken dagiti dutdotna iti amarillo a balitoc. 14 Idi a ti Mannacabalin-amin nagiwaras cadagiti ar-ari sadiay, nagbalin a napudaw a casla nieve idiay Salmon. 15 Ti turod ti Dios ket cas iti turod ni Basan; natayag a turod a cas iti turod ni Basan. 16 Apay a lumagtocayo, dacayo nangato nga turturod? daytoy ti turod nga tinarigagayan ti Dios a pagtaenganna; wen, iti APO pagtaengannanto nga agnanayon. 17 Dagiti luglugan ti Dios ket duapulo ribuda, uray pay riniburibu met nga angeles: ti Apo adda iti tengngada, cas idiay Sinai, idiay nasantoan nga disso. 18 Immulica iti nangato, impanawmo dagiti nacayawan: inawatmo dagiti sagsagut iti tengnga dagiti tattao; wen, castamet cadagiti nasukir, ta iti APO a Dios agnaed coma iti nagtetengaanda. 19 Bendito ti Apo, nga inaldaw a mangpennec cadatayo iti bendicion, wen uray ti Dios a salacantayo. Selah. 20 Ti Diostayo ket isu ti Dios ti pannacaisalacan; ket biang iti Dios nga Apo dagiti banbanag ni patay. 21 Ngem ti Dios burakennanto ti ulo dagiti cabusorna, ken ti nabooc a tuctoc ti magmagna pay laeng iti kinamanagbasolna. 22 Ti Apo kinunana, Alaecto manen manipud Basan, aonecto manen dagiti tattaoc cadagiti yuyeng ti baybay: 23 Tapno maibaddecmo ti sacam iti dara dagiti cabusormo, ken casta met iti dila dagiti as-asom. 24 Nakitada dagiti ipapanmo, O Dios; uray pay dagiti ipapan ti Diosco, Aric, idiay santuario. 25 Dagiti cumacanta immunada, dagiti tumotocar cadagiti instrumento simmarunoda; iti tengnga dagiti babbalasang a nagtagipandareta. 26 Benditoenyo ti Dios cadagiti gimgimong, uray ti Apo, manipud cadagiti ubbog ti Israel. 27 Sadiay adda ni ubing a Benjamin agraman agturayda, dagiti piprincipe ti Juda ken dagiti turayenda, dagiti piprincipe ti Zabulon, ken dagiti piprincipe ti Neftali. 28 Ti Diosmo binilinna iti kinapigsam: papigsaem, O Dios, dayta nga inaramidmon nga agpaay cadacami. 29 Gapu iti templom idiay Jerusalem dagiti ar-ari agiyegdanto cadagiti sagsagut kenca. 30 Tubngarem ti buyot dagiti nagtagipica a tattao, ti kinaadu dagiti bacbaca a toro, agraman cadagiti urbon a baca dagiti tattao, aginggana tunggal maysa agtulnog babaen cadagiti paspaset ti pirac: warawaraem dagiti tattao nga pagay-ayatanda iti gubat. 31 Dagiti pipprincipe rummuardanto sadi Egipto; ti Etiopa darasennanto nga iyunnat dagiti imana iti Dios. 32 Cantaanyo ti Dios, dacayo a pagpagarian ditoy daga; O agcantacayo iti panangidaydayaw iti Apo; Selah: 33 Iti daydiay nga agsacsacay iti langit dagiti langlangit, nga adda idi ugma; adtoy, inbaonna ti timecna, ket daytoy nabileg a timec. 34 Ibunannagyo ti kinapigsa iti Dios: ti kinatan-ocna adda iti ngatoen ti Israel, ket ti bilegna adda cadagiti tangtangatang. 35 O Dios, nacabutbutengca manipud cadagiti nasantoan a pagnaedam: ti Dios ti Israel isu a mangted ti bileg ken pannacabalin ti ilina. Bendito coma ti Dios. SALMO 69 Agpaay iti cangronaan nga Tomotokar idiay Shoshannim, Maysa a Salmo ni David. 1 Isalacannac, O Dios; ta dagiti dandanum simrecdan ditoy cararruac. 2 Lumlumnedac iti nauneg nga lugnac, nga awan pagtacderan: maitapugac cadagiti nauneg a dandanum, a dagiti layus lapunosendac. 3 Napacsoyanacon iti panagic-ickisco: ti carabucobco nagmagan: dagiti matac umlayda bayat ti panagur-urayco iti Diosco. 4 Dagidiay gumurgura caniac nga awan gapgapuna ad-aduda ngem dagiti booc toy uloc: dagidiay a mangdadael coma caniac, a saan nga pudno a cabcabusorco, ket nabilegda: idin inpulangco ti saanco nga innala. 5 O Dios, sica ammom ti kinamaagco; ket dagiti basbasolco saanda a mailinged kenca. 6 Dagiti agur-uray kenca, O Apo DIOS dagiti buybuyot, saanda coma a mababainan gapu caniac: dagiti mangbiroc kenca saanda cadi a maibabain gapu caniac, O Dios ti Israel. 7 Iyantangay gapu kenca nagsagabaac iti pannacaum-umsi; ni bain inabungotanna toy rupac. 8 Nagbalinac a sangsangaili cadagiti cacabsatco, ken gangannaet cadagiti annac ni inac. 9 Ta ti kinaregta iti balaymo ibusennacon; ket dagiti panangumsi dagiti mangumsi kenca nagdissuorda caniac. 10 Idi nagsangitac, ken ginugurac toy cararruac iti panagayunar, isu ti nacaum-umsiac. 11 Pinagcawesco ti nakersang a lupot; ken nagbalinac a proverbio cadacuada. 12 Dagiti agtugtugaw iti ruangan pagsaosaoanda ti maibusor caniac; ket siac ti icancanta dagiti nabartec. 13 Ngem no caniac, ti cararagco maipaay kenca, O APO, iti tiempo a maiparbeng: O Dios, iti kinaadu dagiti kinaasim denggennac, iti kinapudno ti panangisalacanmo. 14 Alut-otennac iti lugnac, ket dinac baybay-an nga lumned: maisalacannac cadi cadagiti gumurgura caniac, ken cadagiti nauneg nga dandanum. 15 Ti danum ti layus saannac cadi nga iremrem, dinac met coma alun-onen iti yuyeng, ket ti abut dina coma icaem ti ngiwatna caniac. 16 Denggennac, O APO; ta ti kinamanagayatmo naimbag: talliawennac cas mayannurot ita caadu dagiti nadungngo a kinamanangngaasim. 17 Ket dica ilinged ta rupam itoy adipenmo; ta mariribucannac: sungbatannac cadi a sidadaras. 18 Umasidegca itoy cararruac, ket subbotem: ispalennac gapu cadagiti cabcabusorco. 19 Ammom ti pannacaum-umsic, ken pannacaibabainco, ken pannacaidadanesco: dagiti cabusorco addada amin iti sangoanam. 20 Ti umsi binuracna toy pusoc; ket ita sipupunnoac cadagiti dadagsen: ket nangkitaac iti siasinoman a mangngaasi caniac, ngem awan pulos; ken cadagiti mangliwliwa, ngem awan nasaracac. 21 Iniccandac met ti apro a maipaay a taraonco; ket iti pannacawawco pinainumdac iti suca. 22 Ti pangananda iti sangoananda pagbalinem coma a silo: ket dagiti banag nga pagnam-ayanda, pagbalinem coma a maysa nga palab-og. 23 Pagbalinem coma nga agcudrep dagiti matmatada, tapno saanda nga macakita; ket pagbalinem coma dagiti lomlomoda a cancanayon nga agpigpigerger. 24 Ibuyatmo ti pungtotmo cadacuada, ket ti rungsot ta pungtotmo magam-udanna coma ida. 25 Ti pagtaenganda aglangalang coma; ken awan coma ti macapagtaeng cadagiti calcalapawda. 26 Ta idadanesda iti kinabilmon; ket isarsaritada ti kinatuoc cadagiti sinugatmon. 27 Nayonam iti kinadakes dagiti kinadangkesda: ket saanmo ida a pastreken ita kinalintegmo. 28 Punasem coma ida iti libro ti biag, ket saanda coma a mailista a caraman dagiti nalinteg. 29 Ngem nacacaasiac ken silaladingitac: ti panangisalacanmo coma, O Dios, ipangatonac cadi. 30 Idaydayawconto ti nagan ti Dios babaen iti canta, ken padayagecto isuna iti panagyaman. 31 Daytoy ket ad-addanto a pacaay-ayoan iti APO ngem ti maysa a baca wenno toro a saraan ken cuccuan. 32 Dagiti napacumbababa makitadanto daytoy, ket agragsacda: ket ta pusoyo agbiagto dacayo a mangbiroc iti Dios. 33 Ta iti APO denggenna ti nacacaasi, ket saanna a laisen dagiti balbaludna. 34 Ti langit ken daga idaydayawdaca coma, dagiti baybay, ken amin nga aggargaraw cadacuada. 35 Ta ti Dios isalacannanto ti Sion, ken bangonennanto dagiti il-ili ti Juda: tapno agtaengdanto sadiay, ken tagicuaendanto. 36 Ti caputotan pay dagiti ad-adipenna tawidendanto: ket dagiti agayat iti naganna agnaeddanto sadiay. SALMO 70 Agpaay iti cangronaan nga Tomotokar, Maysa a Salmo ni David, a panangipalagip. 1 Darasem, O Dios, ti mangispal caniac; darasem ti umarayat caniac, O APO. 2 Mababainan ken mariribucda cadi dagiti mangbirbiroc itoy cararruac: mapagsublida cadi, ken maibabainda, dagiti maayatan iti pacaranggasac. 3 Mapatallicudda coma a gunggona ti pannacababainda dagiti agcuna, Aha, aha. 4 Dagiti agbiroc kenca agragrag-o ken maragsacanda coma kenca: ket dagiti agayat iti panangisalacanmo kunada coma a cancanayon, Ti Dios maitandudo coma. 5 Ngem napanglawac ken agcasapulanac: darasem cadi nga umay caniac, O Dios: sica ti badangco ken mangispalco; O APO, dica cadi agtantan. SALMO 71 1 Kenca, O APO, agcamangac: saanmo coma nga ipalubos a maibabainac uray caanoman. 2 Ispalennac ita kinalintegmo, ken alawennac: iyallingagmo ta lapayagmo caniac, ket isalacannac. 3 Sica cadi ti nabileg a pagnaedan a maipaay caniac, a mabalinco nga umayan a cancanayon: imbilinmon a maisalacanac; ta sica ti batoc ken salindegco. 4 Alawennac, O Diosco, iti ima dagiti managdacdakes, iti ima ti nadangkes ken nadawel a tao. 5 Ta sica ti inanamac, O Apo DIOS: sica ti talecco nanipud kinaubingco. 6 Sica ti nanarsaranay caniac nanipud iti aanacan: sica ti nangirruar caniac iti tian ni inac: ti panangidaydayawco kenca ket cancanayonto. 7 Arigac la datdatlag cadagiti adu; ngem sica ti nabileg a camangco. 8 Pagbalinem coma ti ngiwatco a mapno iti pannacaidaydayawmo ken iti tan-ocmo ti inal-aldaw. 9 Dinac cadi pagtalawen iti tiempo ti kinalacay; dinac cadi baybay-an intono ti pigsac umawanen. 10 Ta dagiti cabusorco agsasaoda a maibusor caniac; ken dagiti mangsisiim itoy cararruac agbibinnalacadda, 11 A kunada, ti Dios binaybay-anna isunan: idadanesyo ken tiliwenyo; ta awanen ti mangispal kencuana. 12 O Dios, dinac cadi adayoan: O Diosco, agdarasca nga umarayat caniac. 13 Mabainan ken maibusda cadi dagiti sibubusor itoy cararruac; mabungonda coma iti pannacalais ken pannacaibabain dagiti mangisapsapul iti pacaranggasac. 14 Ngem manginanamaacto a cancanayon, ken idaydayawcanto laeng a dumegdeg a dumegdeg. 15 Ti ngiwatco sarsaritaennanto ti kinalintegmo ken ti panangisalacanmo iti amin nga aldaw; ta diac ammo dagiti bilbilangda. 16 Umayacto iti bileg ni Apo DIOS: saritaecto ti kinalintegmo, wen sica laeng. 17 O Dios, sica insuronac nanipud kinaagtutuboc: ket agpapan ita impalpalawagco dagiti nacascasdaaw nga ar-aramidmo. 18 Itan ta laclacayanacon nga ub-ubanan, O Dios, dinac cadi baybay-an; inggana iti maipakitac ti kinapigsam iti daytoy a caputotan, ken ti pannacabalinmo iti tunggal siasinoman nga dumteng. 19 Ti met kinalintegmo, O Dios, nangato unay, sica a nangaramid cadagiti dadackel nga banbanag: O Dios, siasino cadi iti cas kenca! 20 Sica, a nangiparang caniac cadagiti adu ken naut-ut a rigat, pagbiagennacto manen, ken aonennacto manen cadagiti caunegan ti daga. 21 Degdegamto ti kinadackelco, ken liwliwaennac iti amin a sikigac. 22 Idaydayawcanto met iti salterio, ti kinapudnom met laeng, O Diosco: kenca agcantaacto cadagiti arpa, O sica A Santo ti Israel. 23 Dagiti bibigco umsiagdanto iti dackel nga ragsac intono agcantaac cadagiti pangidaydayaw kenca; ken toy cararruac, nga sinubbotmo. 24 Casta met a daytoy dilac sarsaritaennanto ti kinalintegmo iti sangca-aldaw: ta nariribucanda, ken naibabainda, dagiti mangsapsapul iti pacaranggasac. SALMO 72 Maysa a Salmo nga agpaay ken Solomon. 1 Itedmo iti ari dagiti pangngeddengmo, O Dios, ken ti kinalintegmo iti anac ti ari. 2 Isu mangocomto iti ilim ti kinalinteg, ken dagiti napanglawmo ti panangocom. 3 Dagiti banbantay mangyegdanto iti cappia cadagiti umili, ken dagiti babassit a turturod, iti kinalinteg. 4 Isu mangocomto cadagiti napanglaw iti umili, isalacannanto dagiti annac ti agcasapulan, ket pispisangennanto ti mangidadanes. 5 Agbutengdanto kenca bayat ti panagpaut ti init ken ti bulan, cadagiti amin a capcaputotan. 6 Bumabanto a cas tudo iti napatpat a root: cas arbis a mangbisibis iti daga. 7 Cadagiti al-aldawna agrangpayanto dagiti nalinteg; ken kinaruay ti talna agingga iti caadda ti bulan. 8 Addanto met panagturayna manipud baybay agingga iti baybay, ken manipud idiay carayan inggana cadagiti pungpungto ti daga. 9 Dagiti agnaed iti let-ang agrucnoydanto iti saclangna; ket dagiti cabusorna dilpatandanto iti tapuc. 10 Dagiti ar-ari idiay Tarsis ken dagiti purpuro agisagutdanto: dagiti ar-ari ti Sheba ken Seba agipaaydanto cadagiti sagsagut. 11 Wen, amin nga ar-ari agrucbabdanto iti saclangna: amin a nasnacion agservidanto kencuana. 12 Ta ispalennanto ti macasapul intono umkis; ken ti pay napanglaw, ken iti awan mangarayat kencuana. 13 Mangngaasinto cadagiti napanglaw ken macasapul, ket isalacannanto dagiti cararrua dagiti macasapul. 14 Subbotennanto dagiti cararruada iti panangirurumen ken iti ranggas: ket napategto ti darada iti saclangna. 15 Ken agbiagto, ket isu maiccanto iti balitoc ti Sheba: ket icararagandanto isuna a cancanayon; ket inaldaw nga maidaydayawto. 16 Addanto sangcarakem ti bukel iti daga iti tapaw dagiti banbantay; ti bungada margaayandanto a cas ti Libano: ket dagiti taga-ili agrangpayadanto a cas iti root iti daga. 17 Ti naganna agtalinaedto nga agnanayon: ti naganna mataginayonto a cas iti capaut ti init: ket dagiti tattao mabendicionandanto kencuana: amin a nasnacion awagandanto isuna ti bendito. 18 Bendito iti APO Dios, ti Dios iti Israel, nga isu laeng ti agaramid cadagiti nacascasdaaw nga banbanag. 19 Ket bendito ti nadayag a naganna iti agnanayon: ket iti isuamin nga daga mapno coma iti kinadayagna; Amen, ken Amen. 20 Dagiti carcararag ni David nga anac ni Jesse ket naggibusdan. SALMO 73 Maysa a Salmo ni Asaph. 1 Pudno a ti Dios naimbag iti Israel, wen uray pay cadagiti nadalus ti pusoda. 2 Ngem no siac, dagiti sacsacac nagistayda naawanen; dagiti addangco nganganida la unay naigalis. 3 Ta immapalac cadagiti kinamaag, idi a nakitac ti kinarang-ay dagiti managdacdakes. 4 Ta awan ti panagrigat iti ipapatayda: ngem natibker ketdi ti pigsada. 5 Awan iti pacarigatanda a cas cadagiti sabali a tattao; saanda met a madidigra a cas cadagiti sabali a tattao. 6 Gapuna a ti kinatangsit naipulipul a cas cawar cadacuada; ti kinaranggas binungonna ida a cas cawes. 7 Dagiti matmatada agbukirad ti kinalugmeg: addaanda ti ad-adu ngem ti mabalinan ti puso a calicaguman. 8 Mangrabrabngisda, ket iti kinadakes agiyebcasda iti panangidadanes: agsaoda a sipapalangguad. 9 Intan-ocda ti ngiwatda cadagiti langlangit, ket ti dilada agdakiwas ditoy daga. 10 Gapuna dagiti tattaona agsublida ditoy: ket ti dandanum ti napno a copa mapespes cadacuada. 11 Ket kunada, Casano ti pannacaammo ti Dios? adda aya pannacaammo iti Cangatoan unay? 12 Matmatanyo, dagitoy dagiti nadangkes, nga narang-ay ditoy lubong; dumegdeg ti kinabacnangda. 13 Pudno nga inugasacon toy pusoc ti kinaubbaw, ken binuggoac dagiti im-imac iti awan pannacaammo. 14 Ta amin nga sangca-aldaw nadidigraac, ket nadusaac iti biniganbigat. 15 No coma kinunac, saoecto ti casta; adtoy, nagaramidac coman iti pacaitibcolan ti caputotan dagiti annacmo. 16 Idi nga pinanpanunotco no casano ti pannacaammoc daytoy, ket naut-ut unay a napalalo caniac; 17 Aginggana iti napanac iti santuario ti Dios; idin naawatac ti maudi a panungpalanda. 18 Pudno nga incabilmo ida cadagiti nagalis nga disdisso: intublacmo ida iti pannacadadael. 19 Casano a napanda a langalang, cas iti apagdaricmat! marunotda a natalipupos cadagiti nacaal-allinget. 20 Cas maysa a dardarepdep no agriing ti maysa; casta, O Apo, no agriingca, umsiemto ti langada. 21 Iti casta ti pusoc napalidayan, ken naduyoc itoy unegco. 22 Iti casta napaubbawac, ken nanengnengac: maysaac a cas atap nga animal iti sangoanam. 23 Nupay casta cancanayon nga addaac kenca: gapu ta sica ket tinengngelmo ti canawan nga imac. 24 Sica iturongnacto iti pammatigmaanmo, ket calpasanna awatennacto dita gloria. 25 Siasino ti tagicuaec sadi langit no saan a sica? ket awan ditoy daga ti tarigagayac no saan laeng a sica. 26 Ti lasagco ken ti pusoc marsaacda: ngem ti Dios isu ti bileg toy pusoc, ken biangco nga agnanayon. 27 Ta, adtoy, dagiti adayo kenca ket mapucawdanto: dinadaelmo amin ida dagiti mapan agbalangcantis nga tumallicud kenca. 28 Ngem nasayaat caniac no umadaninac iti Dios: pinagbalinco a camangco iti Apo DIOS, tapno maiparangarangco amin dagiti ar-aramidmo. SALMO 74 Maschil ni Asaph. 1 O Dios, apay a pagtalawennacami nga agnanayon? apay a dayta pungtotmo umasoc a bumusor cadagiti carcarnero iti pagpaarabam? 2 Lagipem ti gimongmo, a ginatangmo nanipud idi ugma; ti sarucod ti tawidmo, isu nga sinubbotmo; daytoy bantay Sion, isu a nagtaengam. 3 Bagcatem dagita sacsacam cadagiti agnanayon a langalang; uray pay iti amin a dakes nga inaramid ti cabusor iti nasantoan a disso. 4 Dagiti cabcabusormo nagugada iti tengnga ti gimongmo; imbayogda dagiti wagaywayda a cas tanda. 5 Ti tao ket mabigbig idi a cas mayannurot ti panangitag-ayna dagiti wasay nga agdisso cadagiti napuscol nga caycayo. 6 Ket ita tumekenda ti kinitikitan nga aramid a naminpinsan cadagiti waswasay ken marmartillo. 7 Inuramda ti balaymo a nasantoan, tinabbaawanda babaen iti panangrebbada ti pagnaedan ti naganmo inggana iti daga. 8 Kinunada cadagiti puspusoda, Dadaelentayo amin ida a maminpinsan: pinuoranda amin dagiti sinagogas ti Dios iti daga. 9 Saantayo a makitan dagiti tandatayo: awanen ti siasinoman a mammadto: awan ti siasinoman cadatayo a macaammo no casano ti cabayagna. 10 O Dios, casano ti capaut ti panangum-umsi ti cabusor? cancanayonto aya a ti cabusor tabtabbaawanna ta naganmo? 11 Apay a medmedam ta imam, uray dayta met laeng macanawanmo? ucsutemon ita barucongmo. 12 Ta ti Dios isu ti Ari nanipud ugma, a mangar-aramid iti pannacaisalacan ditoy daga. 13 Sica biningaymo ti baybay ita kinapigsam: sica binuracmo ti ul-ulo dagiti dragon iti tataaw. 14 Sica binuracmo dagiti ul-ulo ti leviatan iti saggabassit, isu ti intedmo a taraon dagiti tattao nga agnanaed cadagiti let-ang. 15 Linuctam dagiti ubbog ken carcarayan: pinagmagam dagiti napigsa nga carcarayan. 16 Ti aldaw cucuam, ket ti rabii cucuam met: sica ti nangisagana iti silaw ken iti init. 17 Incabilmo dagiti pagpatinggaan ti daga: inaramidmo dagiti tiempo ti pudot ken lam-ec. 18 Lagipem daytoy, a ti cabusor nangum-umsin, O APO, ken ti ubbaw nga umili nagtabbaawanda ta naganmo. 19 O dica iyawat ti cararrua ti pagawmo cadagiti adu a nadangkes: dica lipaten ti gimong dagiti napanglawmo iti agnanayon. 20 Dayawem coma ti tulag: ta dagiti nasipnget a disso toy daga ket napnoda cadagiti pagyanan ti kinadawel. 21 O saan coma nga agsubli a mabainan ti mairurumen: ti napanglaw ken macasapul idaydayawda coma ta naganmo. 22 Bumangonca, O Dios, icalintegam ti bucudmo met laeng a panggep: lagipem a ti maag nga tao um-umsiennaca nga agmalmalem. 23 Dica lipaten ti timec dagiti cabcabusormo: ti gulogulo dagiti umalsa nga bumusor kenca ket dumegdegda a cancanayon. SALMO 75 Agpaay iti cangronaan nga Tomotokar, Al-taschith, Maysa a Salmo wenno Canta ni Asaph. 1 Kenca, O Dios, agyamancami, itedmi kenca iti panagyaman: ta ti naganmo asideg a saritaenda dagiti nacascasdaaw nga ar-aramidmo. 2 Intono awatec ti gimong mangocomacto a nalinteg. 3 Ti daga ken dagiti agnaed kencuana marunawda: binagkatco dagiti ad-adigina. Selah. Kinunac cadagiti maag, Saancayo nga agmamaag: ket cadagiti nadangkes, Dicayo ingato dagiti sarayo: 5 Dicayo itag-ay a nangato dagiti sarayo: dicayo agsao a sisisickil ti tengngedyo. 6 Ta ti pannacaipangato saan nga aggapu iti daya, wenno iti laud, wenno iti abagatan. 7 Ta ti Dios isu ti ocom: ipababana ti maysa, ken ipangatona ti sabali. 8 Ta iti ima iti APO adda maysa a copa, ket ti arac nalabbaga; napno iti naglalaoc; ken ibuyatna: ngem dagiti ared-edna, amin dagiti nadangkes iti daga pespesendanto, ket inumendanto. 9 Ngem ipalawagconto nga agnanayon; icantacto dagiti panangidaydayaw iti Dios ni Jacob. 10 Amin met dagiti sarsara dagiti nadangkes putdecto; ngem dagiti sarsara dagiti nalinteg maipangatonto. SALMO 76 Agpaay iti cangronaan nga Tomotokar ti Neginoth, Maysa a Salmo weno Canta ni Asaph. 1 Idiay Juda ti Dios maammoan: ti naganna naindaclan sadi Israel. 2 Idiay met Salem adda ti tabernaculona, ken ti pagtaenganna idiay Sion. 3 Sadiay binungtolna dagiti panpana ti bai, ti calasag, ken ti campilan, ken ti gubat. Selah. 4 Nagloriaanca ket natantan-occa uray pay cadagiti banbantay a pagtucmaan. 5 Dagiti nalucmeg ti pusoda agbalinda a sinamsam, inturogdan ti turogda: ket awan cadagiti tattao a napigsa ti nacasarac cadagiti im-imada. 6 Iti panagtubngarmo, O Dios ni Jacob, ti lugan ken ti cabalyo agpadpadada a maipurruac iti nargaan a turog. 7 Sica, uray sica, pagbutbutngandaca: ket siasino ti macapagtacder iti sangoanam no agpungtotcan? 8 Impangngegmo ti keddeng manipud sadi langit; ti daga nagbuteng, ket nagtalna, 9 Idi bimmangon ti Dios a mangocom, tapno isalacanna amin a naemma itoy daga. Selah. 10 Pudno a ti pungtot ti tao pacaidayawamto: ti tidda ti pungtot tenglemto. 11 Agcaricayo, ket agbayadcayo iti APO a Diosyo: amin dagiti adda iti arpadna agiyegda coma cadagiti sagsagut kencuana isuna a rumbeng a pagbutngan. 12 Gudasennanto ti espiritu dagiti piprincipe: isu nacaal-alinget cadagiti ar-ari ditoy daga. SALMO 77 Agpaay iti cangronaan nga Tomotokar, ni Jeduthun, Maysa a Salmo ni Asaph. 1 Iyickisconto iti Dios, ti timecco, uray iti Dios ti timecco; ket dinengngegnac. 2 Idi aldaw ti panagdanagco binirocco ti Apo: ti sugatco nagpatpatnag, ket saan a simmarday: toy cararruac dina cayat ti maliwliwaan. 3 Linagipco ti Dios, ket nariribucannac: nagasugac, ket ti espirituc nalapunos. Selah. 4 Tinengelmo dagiti matac nga agriing: nalaus ti pannacariribucco a diac macasao. 5 Inut-utobco dagiti al-aldaw idi ugma, dagiti tawtawen dagidi cadaanan a tiemtiempo. 6 Linagipco ti cantac iti rabii: casasaoc toy pusoc met laeng: ket ti espirituc inaramidna iti naregta nga panagsukisuc. 7 Ti Apo agnanayonto aya nga mangbaybay-a? ken saanto aya ngatan nga mangngaasin? 8 Ti kinamanangaasina nagawanen aya iti agnanayon? ti carina nagpucawen ngata a cancanayon? 9 Nalipatan ngata ti Dios ti kinamanagparaburnan? iti ungetna rinepkanna aya ngatan dagiti nadungngo nga as-asina? Selah. 10 Ket kinunac, Daytoy ti dadagsenco: ngem lagipecto dagiti tawtawen ti macanawan nga ima ti Cangatoan unay. 11 Lagipecto dagiti ar-aramid iti APO: pudno a lagipecto dagiti nacascasdaaw a gapuanam idi ugma. 12 Pampanunotecto met amin nga aramidmo, ken saritaecto dagiti gapgapuanam. 13 Ti dalanmo, O Dios, adda idiay santuario: siasino ti naindaclan a Dios a cas iti Diostayo? 14 Sica ti Dios nga agaramid cadagiti nacascasdaaw: impacaammom ti pigsam iti nagtengngaan dagiti tattao. 15 Babaen ita tackiagmo sinubbotmo iti ilim, dagiti annac da Jacob ken Jose. Selah. 16 Dagiti dandanum nakitadaca, O Dios, dagiti dandanum nakitadaca; ket nagbutengda: dagiti caadalman nariribucda met. 17 Dagiti ul-ulep nagibuyatda iti danum: dagiti langlangit nagawengda: dagiti pampanam met ket nagsawarda. 18 Ti uni ti gurruodmo addada iti langit: dagiti kimkimat sinilnaganda ti lubong: ti daga nagarigengen ken nagunggon. 19 Ti dalanmo adda idi iti taaw, ket dagiti dan-am cadagiti dadackel a dandanum, ken dagiti tugtugotmo saan ida a nailasin. 20 Impanguloam ti ilim a cas maysa a pangen babaen ti ima da Moises ken ni Aaron. SALMO 78 Maschil ni Asaph. 1 Ipangagmo, O ilic, iti lintegco: iyallingagmo dagita laplapayagyo cadagiti sasao ti ngiwatco. 2 Iyebcasto toy ngiwatco iti maysa a pangarig: iyesngawconto dagiti nasipnget a sasao iti kinaugma: 3 Isuda a nangngeg ken naammoantayo, ken imbaga cadatayo dagidi am-ammatayo. 4 Dicamto ilimed ida cadagiti putputotda, babaen ti panangibagam iti caputotan a sumaruno dagiti pacaidaydayawan iti APO, ken ti kinapigsana, ken dagiti nacascasdaaw nga ar-aramid nga inaramidna. 5 Ta nangted iti pammanecnec ken Jacob, ket nangikeddeng iti linteg iti Israel, isu nga imbilinna cadagiti am-ammatayo, nga ipacaammoda coma ida cadagiti putputotda: 6 Tapno ti caputotan a sumaganad maammoanna ida, agpapan dagiti ubbing a mayanacto; dagidiay bumangonto ken ibagadanto ida cadagiti putputotda: 7 Tapno maisaadda coma ti inanamada iti Dios, ken dida malipatan dagiti aramid ti Dios, ken salimetmetanda ketdi dagiti bilbilinna: 8 Ken saanda coma a cas cadagidi am-ammada, a nasukir ken nasungit a caputotan; caputotan a dida mapaglinteg ti pusoda, ken ti espirituda saan a naipasdec no maipapan iti Dios. 9 Dagiti anac ni Efraim, idinto a nagtagi-armasda, ken nagtagipanada, timmallicudda idi aldaw ti gubat. 10 Dida sinalimetmetan ti tulag ti Dios, ken dida kinayat ti nagna cadagiti lintegna; 11 Ket linipatanda dagiti ar-aramidna, ken dagiti nacascasdaaw nga imparangarangna cadacuada. 12 Nacascasdaaw a banbanag dagiti inaramidna iti imatang dagiti am-ammada, idiay daga nga Egipto, idiay away ti Zoan. 13 Binisngayna ti baybay, ket pinaglasatna ida iti tengngana; ket pinagtacderna dagiti dandanum a cas la napenpen. 14 Iti aldaw inturturongna met ida babaen ti maysa nga ulep, ket bayat ti agpatnag babaen iti lawag ti apuy. 15 Pinagrengngatna dagiti batbato iti let-ang, ken iniccanna ida iti inumen a cas aggapu cadagiti caungan. 16 Pinagpusuacna met dagiti baresbes cadagiti batbato, ket pinagayusna dagiti dandanum a cas carcarayan. 17 Nupay casta immadu ket ti basolda a maicaniwas kencuana ta ginargarida ti Cangatoan unay diay let-ang. 18 Ken sinuutda ti Dios iti pusoda gapu iti panagkiddawda iti taraon a cas maitutop iti derrepda. 19 Wen, nagsaoda iti maibusor iti Dios; kinunada, Mabalin ngata ti Dios nga mangisagana ti lamisaan ditoy let-ang? 20 Adtoy, binaotna ti bato, ket iti casta pimsuac dagiti dandanum, ket dagiti wawaig naglippiasda; macaited met ngata iti tinapay? mangipaayto ngata iti lasag nga agpaay iti ilina? 21 Ngarud iti APO nangngegna, ket nacapungtot: ket simged ti apuy a maibusor ken Jacob, casta met ti pungtot immay pay a maibusor iti Israel; 22 Gapu ta saanda a namati iti Dios, ket saanda a nagtalec iti panangisalacanna: 23 Nupay binilinna dagiti ul-ulep iti ngato, ken linuctanna dagiti ruruangan ti langit, 24 Ket intudona cadacuada ti mana a canenda, ken intedna cadacuada ti taraon manipud langit. 25 Ti tao ket nangan idi ti taraon dagiti angeles: imbaonanna ida iti naglaplapusanan nga taraon. 26 Pinaganginna ti aggaput daya cadagiti tangatang: ket babaen ti bilegna inyegna ti abagatan nga angin. 27 Nagtudo met iti lasag cadacuada a cas tapoc, ken nadutdotan nga tumatayab a cas iti darat dagiti baybay: 28 Ket pinagtinnagna ida iti tengnga ti nagpacarsoanda, iti aglicmut cadagiti nagnaedanda. 29 Iti casta nanganda, ket napnecda a nalaing: ta intedna cadacuada iti bucodda nga tarigagay; 30 Dida pay naisina iti daydi a tinarigagayanda. Ngem idi a ti lasag adda pay laeng cadagiti ngiwngiwatda, 31 Ti pungtot ti Dios immay cadacuada, ket pinatayna dagiti cabanegan cadacuada, ken impasagna dagiti naidumduma nga lallaki ti Israel. 32 Iti amin cadagitoy isuda nagbasolda pay laeng, ken dida namati cadagiti nacascasdaaw nga ar-aramidna. 33 Gapuna nga dagiti al-aldawda inibusna iti kinabarengbareng, ket dagiti tawtawenda iti kinaricut. 34 Idi a papatayenna ida, isu metten ti panangbirocda kencuana: ket nagsublida ken sinapulda a nasapa ti Dios. 35 Ket nalagipda a ti Dios isu ti batoda, ken ti cangatoan a Dios ti mannubbot cadacuada. 36 Numan pay casta isu pinarparatoanda babaen ti ngiwatda, ket nagulbodda kencuana babaen ti dildilada. 37 Ta ti pusoda saan a nalinteg kencuana, dida met sipapasdec iti tulagna. 38 Ngem isu, idinto a napnoan ti asi, pinacawanna ti kinadakesda, ket saanna a dinadael ida: wen, namin-adu nga inbabawina ti pungtotna, ket saanna nga impapas amin a pungtotna. 39 Ket linaglagipna nga isuda ket lasagda laeng; angin nga lumabas, ken saanen nga agsublin. 40 Anian a nagadu ti ibubusorda kencuana idiay let-ang, ken panangpaladingitda kencuana idiay langalang! 41 Wen, sinublianda ken sinuutda ti Dios, ken pinaungetda ti Santo ti Israel. 42 Saanda a linaglagip ti imana, wenno daydi aldaw a pinangsubbotna cadacuada iti cabusor. 43 No casano dagiti pagilasinanna impakitana idiay Egipto, ken dagiti nacascasdaawna idiay tay-ac ti Zoan: 44 Ket pinagbalinna dagiti carcarayanda a dara; ken dagiti layusda, tapno iti casta dida macainum. 45 Nangibaon cadacuada dagiti nadumaduma a kita ti ngilaw, a nangsepsep cadacuada; ken tuctucac, a nangdadael cadacuada. 46 Inyawatna met ti kinarangpayada iti arabas, ken dagiti nagbannoganda iti dudon. 47 Dinadaelna dagiti inuvasanda iti uraro, ket dagiti sicomoroda iti linnaaw a nagbalay. 48 Impaayna met cadagiti an-animalda ti uraro, ket dagiti pangenda iti nabara a kimkimat. 49 Impalladawna met cadacuada ti kinarungsot ti ungetna, pungtot, ken gura, ken riribuc, babaen ti panangibaonna dagiti dakes nga angeles cadacuada. 50 Inyaramidanna iti dan-a ti pungtotna; saanna nga incaluya ti cararruada iti patay, no di ket intedna ti biagda iti angol; 51 Ket pinatayna amin dagiti inauna nga annac sadi Egipto; ti pangulo ti pigsada idiay tabernaculos ni Cam: 52 Ngem intulodna ti ilina met laeng a cas carnero, ket inturongna ida iti let-ang a cas maysa a pangen. 53 Ket intulodna ida a natalged, ket dida nagbuteng: ngem ti baybay linemmesna dagiti cabcabusorda. 54 Ket inyegna ida iti ugis ti pungto ti santuariona, uray iti daytoy nga bantay, a ginatang ti macanawan nga imana. 55 Pinacsiatna met dagiti nasnacion iti sangoananda, ken pinaglalasinna ida iti tawid ti pinuonpuon, ket pinagnaedna dagiti capcaputotan ni Israel cadagiti toltoldada. 56 Nupay casta sinuut ken bimmusorda iti cangatoan unay a Dios, ket dida sinalimetmetan dagiti pammanecnecna: 57 Timmalicudda ketdi, ken nangliputda cas cadagiti ammada: naisiasida a cas mangallilaw a bai ti pana. 58 Ta ginargarida a nacapungtot gapu cadagiti nangato a dissoda, ket ginutugotda nga agimun gapu cadagiti nakitikitan a ladladawanda. 59 Idi a ti Dios nangngegna daytoy, nagpungtot, ket kinarimonna a napalalo ti Israel: 60 Iti casta pinanawanna ti tabernaculo idiay Silo, ti tolda a binangonna iti nagtengngaan dagiti tattao; 61 Ket inyawatna ti pigsana iti pannacacayaw, ken ti dayagna iti ima ti cabusor. 62 Inyawatna met ti ilina iti campilan; ket nacapungtot iti tawidna. 63 Ti apuy linamutna dagiti agtutubo a lallakida; ket dagiti babbalasangda saanda a naited ti pannakiasawa. 64 Dagiti papadida napasagda babaen iti campilan; ket dagiti balbaloda dida nacapagdung-aw. 65 Idin ti Apo nagriing a cas maysa a nacaturog, ken cas mannacabalin a lalaki nga agis-issiag gapu iti arac. 66 Ket kinabilna ti cabusorna cadagiti licudanda: insaadna ida iti agnanayon a pannacaibabain. 67 Maysa pay binaybay-anna ti tabernaculo ni Jose, ken dina met pinili ti caputotan ni Efraim: 68 Ngem pinilina ti caputotan ni Juda, ti bantay Sion nga inayatna. 69 Ket binangonna ti santuariona a cas cadagiti nangato a disdisso, cas iti daga nga impasdecna nga agnanayon. 70 Pinilina met ni David nga adipenna, ken innalana isuna cadagiti pagaponan dagiti carcarnero: 71 Nanipud iti panangsursurotna cadagiti cabai-an a carnero nga addaan urbon nga annac isu innalana tapno pacanenna ni Jacob nga ilina, ken iti Israel a tawidna. 72 Iti casta pinacanna ida nga cas mayannurot iti kinatarnaw ti pusona; ken indalanna ida babaen ti kinalaing dagiti im-imana. SALMO 79 Maysa a Salmo ni Asaph. 1 O Dios, dagiti nasnacion umaydan iti uneg ti tawidmo; ti nasantoan a templom minulitandan; impadsoda ti Jerusalem nga ginabgabsuon. 2 Dagiti bangcay dagiti ad-adipenmo impalamutda cadagiti tumatayab dagiti tangatang, ti lasag dagiti sasantom cadagiti an-animal nga atap ditoy daga. 3 Ti darada imbuyatda a cas danum iti aglawlaw ti Jerusalem; ket awan ti mangitabon cadacuada. 4 Nagbalincami a nacababain cadagiti carcarrubami, misuot ken ab-abi cadagiti aglawlaw cadacami. 5 Casano ti capautna, APO? sipupungtotcanto aya nga agnanayon? ti imunmo manguramto aya a cas apuy? 6 Iparucpucmo ta pungtotmo cadagiti nasnacion a saan nga mangbigbig kenca, ken cadagiti pagpagarian nga saan nga immawag ita naganmo. 7 Ta inibusda ni Jacob, ket inyaplagda a langalang ti pagnaedanna a lugar. 8 O dica cadi lagipen a maibusor cadacami dagiti naglabas nga kinadakes: dagita nadungngo nga caasim sabtennacami cadi a sipapardas; ta naipababacami la unayen. 9 Saranayennacami, O Dios ti pannacaisalacanmi, tapno pacaidayagan ti naganmo: ket ispalennacami, ken dalusam dagiti basbasolmi, gapu ita naganmo. 10 Ania ti gapuna a dagiti nasnacion makunadanto, Sadino ti ayan ti Diosda? ipacaammom isuna cadagiti nasnacion iti saclangmi babaen ti pannacaibales ti dara dagiti ad-adipenmo nga naibuyat. 11 Ti sennaay ti nacabalud dumanon coma kenca: cas mainugot iti kinadackel ti pannacabalinmo salacnibam cadi dagiti nadutocanen ken patay; 12 Ket isublim cadagiti caarrubami ti maminpito idiay barucongda ti pannacaumsida, isu a pinangum-umsida kenca, O Apo. 13 Iti casta dacami nga ilim ken carnero iti pagpaarabam ket agyamancamto kenca nga agnanayon: iparangminto ta dayawmo iti isuamin a capcaputotan. SALMO 80 Agpaay iti cangronaan nga Tomotokar iti Shoshannin-Eduth, Maysa a Salmo ni Asaph. 1 Iyallingagmo, O Pastor iti Israel, sica a nangiturong ken Jose a cas maysa a pangen; sica nga agnanaed iti nagbaetan dagiti kerkerubin, agraniagca cadi. 2 Iti sango da Efraim ken Benjamin ken Manases kiwarem ta pigsam, ket umayca ken isalacannacami. 3 Ipasublinacami cadi, O Dios, ken pagraniagem ta rupam, ket maisalacancamto. 4 O APO Dios dagiti buybuyot, casano ti capaut a sipupungtotca ti cararag iti ilim? 5 Sica tinaraonam ida iti tinapay ti lulua; ken impainummo cadacuada iti lulua a nalaus ti caaduna. 6 Sica pakirupirennacami cadagiti caarrubami: ket dagiti cabcabusormi agkikinnatawada. 7 Ipasublinacam cadi, O Dios dagiti buybuyot, ken pagraniagem ta rupam; ket maisalacancamto. 8 Nangalaca iti maysa nga uvas manipud Egipto: pinacsiatmo dagiti nasnacion, ket immulam. 9 Insaganaam iti lugarna, ket pinagramutmo nga nacaun-uneg, ket sinacnapanna ti daga. 10 Dagiti turturod naabbonganda iti anniniwanna, ket dagiti sangsangana arigda la dagiti naimbag nga cedro. 11 Insalumpayacna dagiti sangsangana aginggana iti taaw, ket dagiti rusrusingna agingga idiay carayan. 12 Apay a rinebbam dagiti al-aladna, ket iti casta dagiti amin nga lumabas iti dalan ket rabsutenda? 13 Ti alingo ti cabakiran pagwalangwalangenna, ket dagiti atap nga an-animal aglamutda kencuana. 14 Sumublica, dawatenmi kenca, O Dios dagiti buybuyot: kumitaca manipud langit, ket matmatam, ken sarungcaram daytoy nga uvas; 15 Ken ti cauvasan nga immula ta macanawan nga imam, ken ti sanga nga pinatibkermo nga agpaay kenca met laeng. 16 Napuoranen iti apuy, ken napucanen: mapucawda gapu iti panangtubngar ta langam. 17 Ta imam maipatay coma iti tao dita macanawanmo, iti anac ti tao nga pinapigsam nga agpaay kenca met laeng. 18 Iti casta dicamto tumallicud kenca: biagennacami, ket awaganminto ta naganmo. 19 Ipasublinacam cadi, O APO Dios dagiti buybuyot, pagraniagem cadi ta rupam; ket maisalacancamto. SALMO 81 Agpaay iti cangronaan nga Tomotokar iti Gittith, Maysa a Salmo ni Asaph. 1 Agcantacayo iti natibong ti Dios nga pigsatayo: idir-iyo ti naragsac nga timec ti Dios ni Jacob. 2 Mangalacayo ti maysa a salmo, ket iyegyo ditoy ti pandareta, ti nacaay-ayo nga arpa agraman salterio. 3 Puyotenyo ti tangguyob iti baro a bulan, iti nadutocan a tiempona, iti aldaw ti nadaeg nga fiestatayo. 4 Ta isu ti linteg ken Israel, ken maysa a bilin ti Dios ni Jacob. 5 Isu ti inkeddengna ken Jose a maipaay a pammanecnec, idi a rimmuar idiay daga nga Egypto: isu a nacangngegac ti pagsasao a diac maawatan. 6 Iniccatco ti abagana iti dadagsen: dagiti im-imana nailisida cadagiti damdamili. 7 Sica immawagca iti pannacariribuc, ket inispalca; sinungbatanca iti nalemmeng nga ayan ti gurruood: sinuutca idiay dandanum ti Meriba. Selah. 8 Denggem, O ilic, ket mamanecnecacto kenca: O Israel, no coma no ipangagnac; 9 Awanto ti gangannaet a dios kenca; dicanto met agdaydayaw iti aniaman a gangannaet nga dios. 10 Siac iti APO a Diosmo, a nangaon kenca idiay daga nga Egypto: ingangam a nalaing ta ngiwatmo, ket siac punnoecto. 11 Ngem ti ilic dina impangag ti timecco; ken ti Israel dinac kinayat. 12 Ita casta binaybay-ac ida a sumurot iti derrep dagiti pusoda: ket nagnada cadagiti bucbucodda a balbalacad. 13 Oh no ti ilic dinengngegnac coma, ken ti Israel nagna coma cadagiti daldalanco! 14 Pinarucmac coman daras dagiti cabcabusorda, ken inwadagco coman toy imac cadagiti casalisalda. 15 Dagiti gumurgura iti APO nagpacumbabada coman kencuana: ngem ti tiempoda nagtalinaed coma iti agnanayon. 16 Tinaraonanna met coma idan cadagiti casayaatan ti trigo: ken iti diro nga aggapu iti bato siac pinennecca coman. SALMO 82 Maysa a Salmo ni Asaph. 1 Ti Dios agtactacder iti gimong dagiti maingel; isu mangocom iti nagtengngaan dagiti didios. 2 Casano ti cabayag ti panangocomyo a nakillo, ken awatenyo dagiti tattao a managdacdakes? Selah. 3 Salacnibanyo dagiti napanglaw ken ul-ulila: itedyo ti apag-isu a rebbengen dagiti naparigat ken agcasapulan. 4 Ispalenyo dagiti napanglaw ken agcasapulan: iccatenyo ida iti ima dagiti managdacdakes. 5 Awan ammoda, dida met macaawat; magmagnada iti kinasipnget: amin dagiti pamunganayan iti daga ket awan ti masnop a turongenna. 6 Kinunac, Dacayo dioscayo; ket dacayo amin annacnacayo ti Cangatoan unay. 7 Nupay casta mataycayto a cas cadagiti tattao, ken matuang a cas maysa cadagiti piprincipe. 8 Bumangonca, O Dios, ocomem ti daga: ta tawidemto amin dagiti nasnacion. SALMO 83 Maysa a Canta wenno Salmo ni Asaph. 1 Dica taginayonen ta ulimecmo, O Dios: dica gemgeman ti talnam, ken dica agmayeng, O Dios. 2 Ta, adtoy, dagiti cabusormo agririawda: ket dagiti gumurgura kenca impangatoda ti uloda. 3 Adda nasicap a gandatda a pangbusorda iti ilim, ket agbibinnalacadda iti maibusor cadagiti salsalacnibam. 4 Kinunada, Umaycayo, gupdentayo ti kinanacionda; tapno ti nagan ti Israel ket saanen a pulos nga malaglagip. 5 Ta nagtitimpuyogda amin a nagbibinnalacad: nangaramidda iti maysa a tulag a maibusor kenca: 6 Dagiti toltoldas ti Edom, ken dagiti Ismaelitas; ti Moab, ken dagiti Agarenos; 7 Gebal, ken Ammon, ken Amalec; ti Filistia agraman dagiti agnaed iti Tiro; 8 Ti Asiria kimmappon met cadacuada: isuda dagiti catulongan dagiti annac ni Lot. Selah. 9 Aramidem cadacuada ti cas ken Madian; ti cas ken Sisara, ti cas ken Jabin, idiay waig ti Cison: 10 Isuda a natay idiay Endor: dagidi nagbalin a cas ibleng a maipaay itoy daga. 11 Pagbalinem dagiti natan-ocda a cas cada Oreb, ken cas ken Zeeb: wen, amin dagiti piprincipeda cas cada Zeba, ken cas ken Zalmunna: 12 Isuda a nagcuna, Alaentayo ketdi dagiti balbalay ti Dios a tagicuaen. 13 O Diosco, pagbalinem ida a cas maysa a pilid; cas nagango a root nga mayangin-angin. 14 Cas apuy a mangpuor iti maysa a cayo, ken cas gil-ayab a mangited cadagiti banbantay iti uram; 15 Iti casta camatem ida iti alipugpugmo, ken pagbutengem ida iti baggiom. 16 Punnoem dagiti ruprupada iti bain; tapno sapulenda coma ti naganmo, O APO. 17 Maulawda ken mariribucda coma nga agnanayon; wen, maibabainda coma, ken mapucawda: 18 Tapno ti tao maammoandaca coma a sica, ti agnagan laeng iti JEHOVA, ti cangatoan unay iti amin a daga. SALMO 84 Agpaay iti cangronaan nga Tomotokar iti Gittith, Maysa a Salmo a maipaay cadagiti annac nga lallaki ni Korah. 1 Nagimnasdan ketdin dagiti tabernaculom, O APO dagiti buybuyot! 2 Toy cararruac sii-iliw, wen, sisesegga pay cadagiti paraangan iti APO: ti pusoc ken lasagco um-umkisda iti Dios a sibibiag. 3 Wen, ti billit nacasapul iti balayna, ket ti sallapingaw maysa a pagumocan a maipaay kencuana met laeng, a pangicabilanna cadagiti annacna, isu met dagiti altarmo, O APO dagiti buybuyot, Aric, ken Diosco. 4 Bendito dagiti agtaeng iti balaymo: sidadayawdanto laeng kenca. Selah. 5 Bendito ti tao a ti bilegna agtaud kenca; nga iti pusona adda dagiti daldalanmo. 6 Intono lumasatda idiay tanap ti Baca pagbalinenda a bubon; ti tudo punnoenna met dagiti tangtangke. 7 Pumigsada laeng a pumigsa, tunggal maysa idiay Sion agparangda iti saclang ti Dios. 8 O APO Dios dagiti buybuyot, denggem ti cararagco: imdengam, O Dios ni Jacob. Selah. 9 Imatangam, O Dios a calasagmi, ket siputam ti rupa ti pinulotam. 10 Ta ti maysa nga aldaw cadagiti paraanganmo ket nasaysayaatda ngem sangaribu. Caycayatco laengen ti agbantay iti ruangan ti balay ti Diosco, ngem ti agnaed cadagiti toltolda iti kinadangkes. 11 Ta iti APO Dios isu ti init ken calasag: ti APO mangtedto iti parabur ken dayag: awanto ti naimbag a banag nga maikedked cadagiti magna a sililinteg. 12 O APO dagiti buybuyot, bendito ti tao nga agcammatalec kenca. SALMO 85 Agpaay iti cangronaan nga Tomotokar, Maysa a Salmo a maipaay cadagiti annac nga lallaki ni Korah. 1 APO, sica pinaraburam ti dagam: insublimon iti pannacacayaw ni Jacob. 2 Pinacawanmon ti kinadakes ti ilim, inabbongam iti isuamin a basolda. Selah. 3 Iniccatmo aminen a pungtotmo: nagpanawam ti kinarungsot ti pungtotmo. 4 Agsublica cadacami, O Dios ti pannacaisalacanmi, ket pagsardayem ti lucsawmo cadacami. 5 Sipupungtotcanto aya cadacami nga agnanayon? padanonemto aya ti pungtotmo cadagiti amin a capcaputotan? 6 Dinacamto aya pagbiagen manen: tapno dagiti tattaom makipagragsacda kenca? 7 Iparangarangmo cadacami ti kinamananga-asim, O APO, ket itdem cadacami ti panangisalacanmo. 8 Imdengacto ti saoen iti Dios nga APO: ta agsaonto iti cappia cadagiti tattaona, ken cadagiti sasantosna: ngem saanmo coma nga ipalubos manen a sumublida ti kinamaag. 9 Pudno a ti panangisalacanna asideg cadagiti agbuteng kencuana; tapno ti dayag agtaeng iti dagatayo. 10 Ti panangnga-asi ken kinapudno naginnaracupda; ti kinalinteg ken cappia naginnagepda. 11 Ti kinapudno tumaudto ditoy daga; ken ti kinalinteg tummannawagto manipud langit. 12 Wen, iti APO itdennanto dayta a naimbag; ket ti dagatayo pataudennanto ti bungana. 13 Ti kinalinteg magnanto iti sangoananna; ket icabilnatayto iti dalan babaen cadagiti tugtugotna.