|
PEDRO 1 Ni Pedro, maysa nga apostol ni Jesus Cristo, cadagiti gangannaet iti pannacaiwarwara idiay Ponto, Galacia, Capadocia, Asia, ken Bitinia, 2 Napilida cas mayannurot iti sigud a pannacaaammo iti Dios Ama, babaen ti pannacapagsantoda gapu iti Espiritu, a maipaay iti panagtulnog ken pannacaiwarsi ti dara ni Jesus Cristo: Parabur adda coma cadacayo, ken talna, umadu la coma nga umadu. 3 Bendito coma ti Dios ken Ama ni Apotayo a Jesus Cristo, isu a mayalubog iti dackel nga asina binaliwannatayo nga inyanac a maipaay iti maysa a sibibiag nga inanama gapu iti panagungar ni Jesus Cristo cadagiti natay, 4 A maipaay iti maysa a tawid a di agrupsa, ken awan tulawna, ken saan nga agcopas, naidulin sadi langit nga maipaay cadacayo, 5 A maaywanancayo gapu iti pannacabalin ti Dios gapu iti pammati a maipaay iti pannacaisalacan a sisasagana tapno maiparangarang iti camaudianan nga aldaw. 6 Ket iti daytoy agragrag-ocayo unay, nupay ita nga tiempo, no isu ti masapul, a napagladingitcayo gapu cadagiti nadumaduma a pannacasulisog: 7 Tapno ti pannacasuut ti pammatiyo, a napatpateg unay ngem iti balitoc a mapucaw, uray pay no magugoran iti apuy, agparang coma a pacaidayawan ken dayag ken tan-oc intono pannacaiparangarang ni Jesus Cristo: 8 Isu nga uray no dicayo nakita, ayatenyo; isu nga, uray no ita dicayo makita, patienyo, ket agrag-ocayo iti di mayebcas a rag-o ken napno iti dayag: 9 Nga awatenyo ti pagbanagan ti pammatiyo, uray pay ti pannacaisalacan dagiti cararruayo. 10 Maipapan itoy a pannacaisalacan dagiti mammadto sinapulda ket sinukimatda a sireregta, dagitoy a nagipadto iti maipapan iti parabur a maipaayto cadacayo: 11 A sinucsukimatda no ania, wenno casano ti tiempo nga imbaga ti Espiritu ni Cristo nga adda idi cadacuada, idi impacpacaunana a sinacsian iti panagsagaba ni Cristo, ken iti dayag a sumarunonto. 12 Naipacdaar cadacuada, a saan nga maipaay cadacuada, no di ket cadatayo inay-aywananda dagiti banbanag, gapu cadagiti nangicascasaba cadacayo iti evangelio babaen ti Espiritu Santo a naibaon nanipud sadi langit; banbanag a dagiti angel tarigagayanda a kitaen. 13 Gapuna idinto a sibabarikes ti siket ti nakemyo, agteppelcayo, ket imaldityo ti amin nga inanamayo iti parabur a mayegto cadacayo iti pannacaiparangarang ni Jesus Cristo; 14 Cas annac ti kinatulnog, saancayo nga agarcos a cas mayalubog daydi daan nga derderrepyo idi addacayo pay la iti kinanengneng: 15 No di ket cas daydiay nangayab cadacayo isu ti santo, agsantocayo met iti amin a kita ti panagbiag; 16 Ta adda a naisurat, Agsantocayo; ta siac santoac. 17 Ket no ngarud umawagcayo iti Ama, isu a di mangidumduma cadagiti tattao mangocom cas iti aramid ti tunggal maysa, agdaliasatcayo iti tiempo a panagpagpagnayo ditoy nga sibubuteng: 18 Nga ammoyo a saancayo nga nasubbot a naaramat dagiti agrupsa nga banbanag, a cas iti pirac ken balitoc, iti barengbareng a panagbiagyo nga impatawid cadacayo dagidi ammayo; 19 No di ket gapu iti napateg a dara ni Cristo, a cas maysa a cordero nga awan ti pagdacsanna ken tulawna: 20 Isu a kinapudnona natudingan sacbay ti pannacabangon toy lubong, ngem naiparangarang cadagitoy nga maud-udi nga tiempo a maipaay cadacayo, 21 A gapu kencuana mamaticayo iti Dios, a namagungar kencuana cadagiti natay, ket isu iniccanna ti dayag; tapno ti pammati ken inanamayo addada coma iti Dios. 22 Idinto a ginugoranna dagiti cararruayo iti kinatulnogyo iti pudno babaen ti Espiritu a maipaay iti ayat a pudno dagiti cacabsat, kitaenyo ta agaayan-ayatcayo iti nasged a buyogen ti nadalus a puso: 23 A nabaliwancayo a naiyanac, saan nga iti bukel nga agrupsa, no di ket iti saan nga agrupsa, a gapu iti sao ti Dios, isu nga agbiag ken agtaeng iti kina-agnanayon. 24 Ta isu amin a lasag casla root, ket ti amin a dayag ti tao casla iti sabong ti root. Ti root magango, ket ti sabong agtinnag: 25 Ngem ti sao ti Dios mataginayon nga awan inggana. Ket daytoy isu ti sao dagiti naimbag a damdamag a naicascasaba cadatayo. CAPITULO 2 1 Gapuna idianyo ti amin a kinadakes, ken amin a kinasicap, ken dagiti panaginsisingpet, ken ap-apal, ken isuamin a kita dagiti dakes a sasao, 2 Cas ubbing a cayyanac, tarigagayanyo ti awan lalaocna a gatas ti sao, tapno dumackelcayo gapu kencuana: 3 No iti casta maramananyo a ti Apo ket naparabur. 4 Dumatengcayo kencuana, cas maysa a sibibiag nga bato, imbelleng a pudno dagiti tattao, ngem isu napili ti Dios, ken napateg, 5 Dacayo met, cas sibibiag nga batbato, nabangon a maysa nga naespirituan a templo, nasantoan a kinapadi, tapno idatonyo dagiti naespirituan a datdaton, macaay-ayo iti Dios gapu ken Jesus Cristo. 6 Gapu ta adda a nailanad iti surat, Adtoy, siac isaadco idiay Sion ti nangnangrona a bato a pasuli, napili, napateg: ket dayta mamati kencuana saanto a maibabain. 7 Maipaay cadacayo ngarud a mamati isu ti napateg: ngem maipaay cadagiti sumukir, ti bato nga imbelleng dagiti agar-aramid ti balay, isu met laeng ti naaramid a pasuli, 8 Ken bato a pacaitibcolan, ken bato a pacaibabainan, uray pay dagiti maitublac iti sao, idinto a nasukirda: ket itoy met nakednganda. 9 Ngem dacayo ti napili a caputotan, ti naarian a kinapadi, nasantoan a nacion, naisupsupadi a tattao; tapno ipaduyacyacyo dagiti kinatan-oc daydiay nangayab cadacayo manipud kinasipnget inggana iti nacascasdaaw a lawagna: 10 Dacayo nga idi napalabas nga aldaw saancayo nga umili, ngem ita dacayo ti ili ti Dios: nga idi saancayo a nacaasian, ngem ita nacaasiancayon. 11 Ay-ayatec nga napateg, dawatec cadacayo a cas gangannaet ken agpagpagna, nga idianyo coma dagiti derderrep a linalasag, isuda a manggubat iti cararrua; 12 A ti panagbibiagyo natacneng coma iti tengnga dagiti Gentil: tapno, dayta pagsaoanda iti dakes cadacayo a casla managaramid iti dakes, gapu cadagiti nasayaat nga aramidyo, a makitada, dayawenda coma ti Dios iti aldaw ti isasarungcar. 13 Paiturayancayo iti amin nga al-allagaden dagiti agturay a maigapu iti Apo: uray pay iti ari, a cas cangatoan unay; 14 Wenno cadagiti gobernador, ken cadagiti naibaon a mangdusa cadagiti agaramid ti dakes, ken mangidayaw cadagiti agaramid ti naimbag. 15 Ta castoy ti pagayatan ti Dios, a gapu iti panangaramidyo iti nasayaat pagulimekenyo ti kinanengneng dagiti tattao a nacuneng: 16 A casla agwayawayacayo, ngem saanyo nga aramaten ti panagwayawayayo a pangabbong ti kinadakes, no di ket cas ad-adipen ti Dios. 17 Padayawanyo dagiti isuamin a tattao. Ayatenyo dagiti cacabsat. Agbutengcayo iti Dios. Dayawenyo ti ari. 18 Paad-adipen, agtulnogcayo a si-aamac cadagiti appoyo; saan laeng a cadagiti naimbag ken naanus, no di ket cadagiti pay naunget. 19 Ta daytoy ket macaay-ayo, no ti siasinoman a gapu iti consciensana agpaay iti Dios ket agitured cadagiti rangranggas, ken agsagaba a di maiparbeng. 20 Ta ania ti pacaidayawan, no, matungpacayo gapu cadagiti biddutyo, ket sagabaenyo a siaanus? ngem no, agaramidcayo iti naimbag, ket agsagabacayo, ket ituredyo a siaanus, daytoy macaay-ayo iti Dios. 21 Ta maipaay iti daytoy naawiscayo: gapu ta ni Cristo nagsagaba met gapu cadatayo, nangibati cadatayo iti ulidan, tapno surotenyo dagiti addangna: 22 Isu saan a nagaramid iti basol, ken awan ti nasaracan nga allilaw iti ngiwatna: 23 Isu, nga idi rinabrabngisda, saan a simmungbat iti kinarabngis; idi nagsagaba, saan a nangam-ames; no di ket nagtalec iti daydiay mangocom a sililinteg: 24 Isu met laeng a nangawit cadagiti basbasoltayo iti bagina iti rabaw di cayo, tapno, idinto a nataytayo cadagiti basbasol, agbiagtayo a maipaay iti kinalinteg: gapu cadagiti sugsugatna na-agasancayo. 25 Ta dacayo idi iti cas carnero nga nayaw-awan; ngem ita nagsublicayon iti Pastor ken Obispo dagiti carcararruayo. CAPITULO 3 1 Casta met, dacayo a babbai, agtulnogcayo cadagiti assawayo; ta, no adda saan nga agtulnog iti sao, mapatulnogda nga awan ti sao gapu iti cababalin dagiti babbai nga assawada; 2 No mapaliiwda ti nanacman a panagbiagyo a buyogen ti panagbuteng. 3 A ti arcosyo saan coma a ti arcos iti ruar ti pannagsallapid iti booc, ken ti panangicapet cadagiti alajas a balitoc, wenno ti naarcos a pagan-anay; 4 Ngem ti tao a makin-uneg iti puso, macawesan coma iti saan nga agrupsa, uray pay dagiti arcos a naemma ken natalna nga espiritu, nga iti imatang iti Dios ket dackel ti pategna. 5 Ta castoy met idi unana nga aldaw ti panagcawes dagiti nasantoan a babbai, dagidi nanginanama iti Dios, nagcawesda, babaen ti panagtulnog cadagiti assawada: 6 Cas ken Sara nagtulnog ken Abraham, ket inawaganna nga apo: ket dacayo dagiti annacna a babbai, no agaramidcayo iti naimbag, ket dicayo agbuteng gapu iti aniaman a pagkigtotan. 7 Casta met, dacayo a lallaki, makipagnaedcayo cadagiti assawayo a mayalubog iti kinasirib, a padayawanyo ida, a cas iti baso a narasrasi, ken cas makipagtawid met iti parabur ti biag; tapno dagiti carcararagyo saanda coma a malappedan. 8 Camaudiananna, agmaymaysacayo coma amin iti nakem, nga adda dungngoyo ti maysa ken maysa, aginnayatcayo a cas agcacabsat, manangnga-asicayo, naemmacayo coma: 9 A dicayo supapacan ti dakes iti dakes, wenno ti lunod iti lunod: no di ket bendicion; ta gapu itoy naawiscayo, tapno tawidenyo ti pannacabendicion. 10 Ta ti agtarigagay nga agayat iti biag, ken macakita cadagiti nasayaat nga al-aldaw, igawidna coma ti dilana iti dakes, ken dagiti bibigna tapno dida agsao ti ulbod: 11 Umadayu coma iti dakes, ket agaramid iti naimbag; sapulenna coma ti talna, ket isu ti surotenna. 12 Ta dagiti mata ti Apo sikikitada cadagiti nalinteg, ket dagiti pagdengngegna sititimudda cadagiti ar-ararawda: ngem ti rupa ti Apo sisasango nga maibusor cadagiti agaramid iti dakes. 13 Ket siasino dayta mangranggasto cadacayo, no regtaanyo a suroten ti naimbag? 14 Ngem uray no agsagabacayo gapu iti kinalinteg, nagasatcayo: ket dicayo pagbutngan ti amac a pataudenda, ket dicayo met aglagaw; 15 Ngem ilasinyo ni Apo Dios nga agpaay cadagiti puspusoyo: a sidadaan a sumungbat iti isuamin a tao a mangintuudto cadacayo ti gapu ti inanama nga adda cadacayo a buyogan ti kinapacumbaba ken panagbuteng: 16 Nga adda nasayaat a consciensayo; tapno, iti daydiay met laeng a pangsaoanda ti dakes cadacayo, mabainanda coma dagiti manguyaw iti nasayaat a panagbiagyo ken Cristo. 17 Ta nasaysayaat, no casta ti pagayatan ti Dios, ti agsagaba nga agaramid iti naimbag, ngem iti agaramid iti dakes. 18 Ta ni Cristo nagsagaba met iti naminpinsan gapu cadagiti basbasol, daydi nalinteg gapu cadagiti nakillo, tapno iragpatnatayo iti Dios, idi napapatay no maipapan iti lasag, ngem sibibiag no maipapan iti Espiritu: 19 Ket babaen kencuana napan nagipadamag cadagiti espiritu a sibabalud; 20 Dagidiay nga nasukirda, idi unana nga aldaw idi agur-uray ti atiddug nga anus ti Dios cadagidi aldaw ni Noe, idi maisagsagana pay di daong, ket bassitda, cayatna a saoen, walo a cararrua dagiti naisalacan iti danum. 21 Isu a napaypayso a caasping ti pammautizar a mangisalacan ita cadatayo met (saan nga iti pannacaiccat ti rugit ti lasag, no di sungbat ti maysa a nasayaat a consciensa nga agpaay iti Dios,) gapu iti panagungar ni Jesus Cristo: 22 Isu nga immulin sadi langit, ken adda iti macanawan ti Dios; a dagiti angel ken dagiti kinaturay ken dagiti pannacabalin paiturayanda kencuana. CAPITULO 4 1 Idinto ngarud ta nagsagaba ni Cristo a maipaay cadatayo iti lasag, agigamcayo coma iti cas di met a panunot: ta ti nagsagaba iti lasag simmardeng iti basol; 2 Tapno dicayo coma agbiag ti tiempoyo a natda pay iti lasag a maipaay cadagiti derrep dagiti tattao, no di ket maipaay iti pagayatan ti Dios. 3 Ta ti aldaw a napalabas immanayen a panagaramid iti pagay-ayatan dagiti Gentil, idi nagnatayo iti kinaderrep, dagiti tarigagay nga aglablabes, dagiti panagbarbartec, dagiti kinabuklis, dagiti aglablabes a daydaya, ken dagiti macarimon a panagrucbab cadagiti ladladawan a didiosen: 4 Ket cadagitoy a banbanag masmasdaawda gapu ta dicayo makitimpuyogen cadacuada iti panaglablabes a kinadakes, ket padpadacsendacayo: 5 Isuda idatagdanto daytoy iti daydiay adda a sisasagana a mangocom cadagiti nabiag ken natay. 6 Ta gapu itoy naipadamag ti evangelio uray pay cadagiti natay, tapno maocomda a pudno cas mayannurot cadagiti tattao no maipapan iti lasag, ngem agbiagda coma a cas mayannurot iti Dios no maipapan iti espiritu. 7 Ngem ti tungpal dagiti isuamin a banag asidegen: agparbengcayo ngarud, ken agsalucagcayo iti cararag. 8 Ket nangnangrona ngem iti amin adda coma cadacayo met laeng ti nasged nga ayat: ta ti ayat abbonganna dagiti adu unay a basbasol. 9 Nga agpipinnadaguscayo nga awan tantanabutob. 10 Tungal maysa cas iti sagut nga inawatna, ket agtitinnulong coma ti maysa ken maysa, cas naimbag a mangaywan cadagiti adu a kita ti parabur ti Dios. 11 No ti siasinoman nga agsao, agsao coma cas cadagiti sasao ti Dios; no ti maysa agservi, agservi coma iti pannacabalin nga inted ti Dios: tapno ti Dios madaydayaw coma cadagiti isuamin a banbanag gapu ken Jesus Cristo, isu a makincucua iti dayag ken iti panagturay iti agnanayon nga awan inggana. Amen. 12 Ay-ayatec, dicayo panunoten a nacascasdaaw dagiti nabara a rigrigat nga umayto mangsuut cadacayo, a casla adda maysa nga banag a nacascasdaaw a mapasamac cadacayo: 13 No di ket agragsaccayo, gapu ta mairamancayo cadagiti panagsagaba ni Cristo; tapno, intono ti dayagna maiparangarang, agrag-ocayo met iti rag-o a nagdanunan. 14 No maumsicayo gapu iti nagan ni Cristo, nagasatcayo; ta ti espiritu ti dayag ken ti Dios agtaeng cadacayo: cadacuada dakes ti masaritada, ngem cadacayo isu maitantan-oc. 15 Ta awan coma ti agsagaba cadacayo a cas nacapapatay, wenno cas mannanacaw, wenno cas managdacdakes, wenno cas bumibiang cadagiti sabali a tattao. 16 Ngem no adda agsagaba a cas Cristiano, saan coma nga agbain; no di ket dayawenna ti Dios no maipapan daytoy. 17 Ta dimteng ti tiempo a ti panangocom mangrugi iti balay ti Dios: ket no mangrugi cadatayo, anianto ti tungpal dagiti saan nga agtulnog iti evangelio ti Dios? 18 Ket no ti nalinteg ket narasay a maisalacan, sadino ti pagparanganto dagiti nasukir ken managbasol? 19 Gapuna dagiti agsagaba a mayannurot iti pagayatan ti Dios italecda coma dagiti cararruada a naimbag kencuana, cas mapagtalcan a Namarsua. CAPITULO 5 1 Dagiti panglacayen nga adda cadacayo bagbagaac, siac a panglacayen met, ken macasacsi cadagiti sinagaba ni Cristo, ken makiraman pay met iti dayag a maiparangarangto: 2 Ipastoranyo ti arban ti Dios nga adda cadacayo, nga acmenyo ti panangaywan, saan a mapilpilit, no di ket si-aayat; saan met nga iti naalas a panagsapul, no di ket iti nasiglat a nakem; 3 Saancayo a casla agturay cadagiti agtawid iti Dios, no di ket agbalincayo coma a pagulidanan dagiti arban. 4 Ket inton ti catan-ocan a Pastor maipanayag, awatenyonto ti balangat a nagloriaan a di agrupsa. 5 Casta met, dacayo a saan a panglacayen, agtulnogcayo cadagiti panglacayen. Wen, dacayo amin agtitinnulongcayo, ken agcawescayo ti kinapacumbaba: ta ti Dios tallicudanna dagiti natangsit, ngem iccanna ti parabur dagiti napacumbaba. 6 Agpacumbabacayo ti mannacabalin nga ima ti Dios, tapno itan-ocnacayo iti pannacaipaayna nga tiempo: 7 Itaclinyo kencuana ti amin a pagdanaganyo; gapu ta isu aluadannacayo. 8 Agparbengcayo, agsalucagcayo; gapu ta ti cabusoryo a diablo, cas leon nga ngumerngernger, magmagna iti sibayyo, ket agsapsapul ti alun-onenna. 9 Isu sarangtenyo ngarud babaen iti nabileg a pammati, iyantangay ammoyo a dagiti castoy a sagsagabaen ket madamada a mapaspasamac cadagiti cacabsatyo nga adda ditoy lubong. 10 Ket ti Dios ti amin a parabur, a nangayab cadatayo iti agnanayon a gloriana ken Cristo Jesus, iti calpasan ti panagsagabayo iti bassit nga aldaw, aramidennacayo nga naan-anay, saan nga magaraw, napigsa, ken pabilgennacayo. 11 Maited coma kencuana ti gloria ken panagturay iti agnanayon nga awan patinggana. Amen. 12 Gapu ken Silvano, matalec a cabsat cadacayo, cas pagarupec, nagsuratac cadacayo iti ababa, a bagbagaancayo, ket panecnecac a daytoy isu ti napaypayso a parabur ti Dios nga incayo nagtacderan. 13 Ti iglesia nga adda diay Babilonia, napili a cas cadacayo, cablaawandacayo; casta met ni Marcos nga anacco. 14 Agkikinnablaawcayo a buyogen ti agep ni ayat. Talna coma cadacayo amin nga adda ken Cristo Jesus. Amen. |