TI UMUNA NGA SAPASAP A SURAT NI JUAN CAPITULO 1 1 Ti adda nanipud idi ugma, nga nangngeganmi, nga nakita babaen cadagiti matmatami, nga binuybuyami, ken inar-aricap dagiti im-imami, a maipapan iti Sao ti biag; 2 (Ta ti biag ket naiparangarang, ket nakitami, ken panecnecanmi, ken ipaca-ammomi cadacayo dayta a biag nga agnanayon, nga adda idi iti Ama, ket naiparangarang cadacami;) 3 Dayta a nakitami ken nangngegmi isuda dagiti ipaca-ammomi cadacayo, tapno dacayo met ket adda pacaicadcadduaanyo cadacami: ken pudno a ti pannakicadcadduatayo ket adda iti Ama, ken ni Anacna nga Jesus Cristo. 4 Ket dagitoy a banbanag isuratmi cadacayo, tapno maan-anay ti rag-oyo. 5 Ket daytoy ti damag a nangngegmi kencuana, ken ipaca-ammomi cadacayo, a ti Dios isu ti silaw, ket awan kencuana ti aniaman a sipnget. 6 No cunaentayo nga adda pannakicadcadduatayo kencuana, ket magnatayo iti kinasipnget, agulbodtayo, ket saantayo nga aramiden ti pudno: 7 Ngem no magnatayo iti lawag, cas isu adda iti lawag, adda pannakicadcadduatayo iti maysa ken maysa, ket ti dara ni Jesus Cristo nga Anacna ugasannatayo iti amin a basol. 8 No cunaentayo nga awan ti basoltayo, allilawentayo ti bagitayo met laeng, ket ti pudno awan cadatayo. 9 No ipudnotayo dagiti basbasoltayo, isu ti mapagtalcan ken nalinteg a mamacawan cadagiti basbasoltayo, ken mangugas cadatayo iti amin a kinakillo. 10 No cunaentayo nga saantayo a nagbasol, isu pagbalinnentayo a naulbod, ket ti saona awan cadatayo. CAPITULO 2 1 Ub-ubbing nga annacco, isuratco cadacayo dagitoy a banbanag, tapno dicayo coma agbasol. Ngem no addanto siasinoman a macabasol, addaantayo ti manangibabaet iti Ama, isu ni Jesus Cristo a nalinteg: 2 Ket isu ti daton ti cappia gapu cadagiti basbasoltayo: ket saan laeng nga agpaay cadatayo, no di pay ket gapu dagiti basbasol iti sangalubongan. 3 Ket gapu itoy maammoantayo nga isu am-ammotayo, no salimetmetantayo dagiti bilbilinna. 4 Ti agcuna, Isu ammoc, ket dina met tungpalen dagiti bilbilinna, isu ti naulbod, ket awan ti pudno kencuana. 5 Ngem ti siasinoman a mangsalimetmet iti saona, pudno a nagdanunan kencuana ti ayat ti Dios: ket daytoy ti paca-ammoantayo nga addatayo kencuana. 6 Ti agcuna nga agtalinaed kencuana rebbengna met ti magna, a cas iti pannagnana idi. 7 Cacabsat, awan ti baro a bilin nga isuratco cadacayo, no saan a daydi daan a bilin nga adda cadacayo manipud idi damo. Daydi daan a bilin ket isu ti sao a nangngegyo manipud idi damo. 8 Ulitec, baro a bilin ti isuratco cadacayo, banag a napudno kencuana ken cadacayo: agsipud ta ti kinasipnget naglabas, ket ti silaw a pudno agranniagen. 9 Ti agcuna nga adda iti lawag, ket guraenna ni cabsatna, adda pay laeng iti kinasipnget agingga ita. 10 Ti agayat iti cabsatna agtalinaed iti lawag, ket awan ti masaracan kencuana ti aniaman a pacaiculboan. 11 Ngem ti gumura iti cabsatna adda iti kinasipnget, ket magmagna iti sipnget, ket dina ammo no sadino ti papananna, agsipud ta ti sipnget kinullaapanna dagiti matana. 12 Isuratco cadacayo, ub-ubbing nga annac, agsipud ta dagiti basbasolyo napacawandan gapu iti naganna a napateg. 13 Agsuratac cadacayo, amma, gapu ta ammoyo daydiay adda a nanipud idi ugma. Agsuratac cadacayo, agtutubo a lallaki, agsipud ta inabacyo ti dakes. Agsuratac cadacayo, ub-ubbing nga annac, agsipud ta naammoanyon ti Ama. 14 Nagsuratac cadacayo, amma, gapu ta ammoyo daydiay adda a nanipud idi punganay. Nagsuratac cadacayo, agtutubo a lallaki, gapu ta napigsacayo, ket ti sao ti Dios agtalinaed cadacayo, ket inabacyo ti dakes. 15 Dicayo ayaten ti lubong, uray dagiti banbanag nga adda ditoy lubong. No ti siasinoman a tao agayat iti lubong, ti ayat ti Ama awan kencuana. 16 Ta isuamin nga adda ditoy lubong, ti derrep ti lasag, ken ti derrep dagiti mata, ken ti kinapalangguad ti panagbiag, saanda nga aggapu iti Ama, no di iti lubong. 17 Ket ti lubong aglabas, ken ti dakes a tarigagayna: ngem ti agaramid ti pagayatan ti Dios ket mataginayon. 18 Ub-ubbing nga annac, isu ti camaudiananen nga horas: ket cas iti nangngegyo nga umay ni anticristo, uray ita adudan dagiti anticristo; ket daytoy ti paca-ammoantayo nga isu ti camaudiananen nga horas. 19 Rimmuarda cadatayo, ngem ditayo ida caddua; ta no cadduatayo coma ida, nakipagtaengda coma cadatayo: ngem rimmuarda, tapno maiparangarangda a saantayo a cacaddua ida. 20 Ngem adda cadacayo ti maysa a pananglana Ti Nasantoan, ket ammoyo dagiti isuamin a banbanag. 21 Saannac a nagsurat cadacayo gapu ta dicayo ammo ti pudno, no di ket gapu ta ammoyo, ken gapu ta awan ti ulbod nga agtaud iti pudno. 22 Asino ti naulbod no di daydiay mangilibac a ni Jesus isu ti Cristo? Daytoy isu ti anticristo, daydiay mangilibac iti Ama ken iti Anac. 23 Siasinoman a mangilibac iti Anac, dayta ket awan met ti Ama kencuana: (ngem) ti mangipudno iti Anac adda met kencuana ti Ama. 24 Mataginayon coma dayta nga agtalinaed cadacayo, daydi nangngegyo nanipud idi damo. No daydi nangngegyo nanipud idi punganay ket agtalinaed cadacayo, agtalinaedcayto met iti Anac, ken iti Ama. 25 Ket daytoy ti cari nga incarina cadatayo, uray pay ti biag nga agnanayon. 26 Insuratco cadacayo dagitoy a banbanag a maipuon cadagiti mangyaw-awan cadacayo. 27 Ngem no maipapan ti pananglana nga inawatyo kencuana ket agtalinaed cadacayo, saanen a masapul iti uray siasino a tao nga mangisuro cadacayo: ngem daytoy nga pananglana ket isuronacayo dagiti isuamin a banbanag, ket isu ti pudno, ket saan nga ulbod, ket cas insuronacayo, casta met agtalinaedcayo kencuana. 28 Ket ita, ub-ubbing nga annac, agtaengcayo kencuana; tapno, inton maiparangarang, adda panagtalectayo, ket saantayo a mabainan iti sangoananna inton iyaayna. 29 No ammoyo nga isu nalinteg, ammoenyo met nga isuamin nga agaramid iti kinalinteg ket naiyanacda kencuana. CAPITULO3 1 Kitaenyo, no ania a kita iti ayat nga insagut cadatayo ti Ama, tapno managanantay annac ti Dios: gapu itoy ti lubong saannatay nga am-ammo, gapu ta isu saanna a nammoan. 2 Ay-ayatec, ita annacnatay ti Dios, ket saan pay a maiparangarang no aniatayto: ngem ammotayo, nga no isu maiparangarangto, umaspingtayto kencuana; gapu ta makitatayto a cas iti kinaisuna. 3 Ket isuamin dagiti addaan kencuana daytoy nga inanama ket aggugor, a cas isu nadalus. 4 Siasinoman a macaaramid iti basol ket salungasingenna met iti linteg: ta ti basol isu ti panagsalungasing iti linteg. 5 Ket ammoyo nga isu ket naiparangarang tapno iccatenna dagiti basbasoltayo; ket isu awan basol kencuana. 6 Siasinoman nga agtaeng kencuana ket saan nga agbasol: siasinoman nga agbasol isu ti saanna a nakita, ket dina met naammoan. 7 Ub-ubbing nga annac, awan coma ti mangallilaw cadacayo: ti agaramid iti kinalinteg nalinteg, a cas met isu ket nalinteg. 8 Ti agaramid iti basol cucua ti diablo; ta nanipud idi damo ti diablo agbasbasol. Gapu itoy a panggep ti Anac ti Dios naiparangarang, tapno pucawenna dagiti ar-aramid ti diablo. 9 Siasinoman a nabukel iti Dios saan nga agbasol; ta ti bukelna agtaeng kencuana: ket isu saanna a mabalin ti agbasol, agsipud ta nabukel iti Dios. 10 Iti daytoy dagiti annac ti Dios maiparangarang, ken dagiti annac ti diablo: siasinoman a saan nga agaramid ti kinalinteg ket saan a tao ti Dios, uray ti di agayat ken cabsatna. 11 Ta daytoy ti damag a nangngegyo nanipud idi damo, nga agayan-ayattayo coma iti maysa ken maysa. 12 Saan a cas ken ni Cain, nga iturayan ti dakes, ket pinatayna ti cabsatna. Ket ania ti gapu a pinatayna? Agsipud ta dagidi ar-aramidna ket dakesda, ket dagiti ar-aramid ni cabsatna ket nalintegda. 13 Dicayo masmasdaaw, cacabsatco, no guraennacayo ti lubong. 14 Ammotayo nga immalistayo nanipud ken patay agingga iti biag, agsipud ta ayatentayo dagiti cacabsat. Ti saan nga agayat ti cabsatna ket agtalinaed ken patay. 15 Siasinoman a gumura ken cabsatna isu ket mangpapatay: ket ammoyo nga awan ti mangpapatay nga adda biagna nga agnanayon nga agtaeng kencuana. 16 Itoy ti paca-ammoantayo iti ayat ti Dios, agsipud ta isu intedna ti biagna a maipaay cadatayo: ket rebbengtayo met coma nga ited dagiti biagtayo a maipaay cadagiti cacabsat. 17 Ngem dayta agicut cadagiti sanicua daytoy a lubong, ket makitana ni cabsatna nga aglac-am iti pannacasapul, ket punitanna ti ayat iti pusona, casano ti panagnaed ti ayat ti Dios kencuana? 18 Ub-ubbing nga annac, saantayo coma nga agayat ti sao, wenno ti dila; no di ket ti aramid ken ti napudno. 19 Itoy ti paca-ammoantayo a taonatayo ti pudno, ket pagtalgedentayo dagiti pusotayo iti sangoananna. 20 Ta no ti pusotayo pabasolennatayo, ti Dios dacdackel ngem ti pusotayo, ken ammona dagiti amin a banbanag. 21 Ay-ayaten, no ti pusotayo saannatayo a pabasolen, adda ngarud iti panagtalectayo iti Dios. 22 Ket isuamin a dawatentayo, awatentayo kencuana, agsipud ta salimetmetantayo dagiti bilbilinna, ken aramidentayo dagiti banbanag a macaay-ayo cadagiti matana. 23 Ket daytoy ti bilinna, A mamaticayo coma iti nagan ti Anacna a Jesus Cristo, ket agayan-ayattayo ti maysa ken maysa, cas imbilinna cadatayo. 24 Ket ti mangsalimetmet cadagiti bilbilinna agtaeng kencuana, ket isu kencuana. Ket itoy ti paca-ammoantayo nga isu agtaeng cadatayo, gapu iti Espiritu nga intedna cadatayo. CAPITULO 4 1 Ay-ayatec, saanyo nga patien dagiti amin nga espiritu, no di ket suutenyo dagiti espiritu no nagtaudda iti Dios: ta adu dagiti saan a pudno a mammadto a rimmuaren ditoy lubong. 2 Daytoy ti pacaammoanyo iti Espiritu ti Dios: Isu-amin nga espiritu nga umanamong a ni Jesus Cristo immay a naglasag ket nagtaud iti Dios: 3 Ket amin nga espiritu a di mangipudno nga ni Jesús Cristo immay nga naglasag ket saan a cucua ti Dios: ket daytoy ti espiritu ni anticristo, a nangngegyo nga umay; ket uray itan addan ditoy lubong. 4 Dacayo tattaonacayo ti Dios, ub-ubbing nga annac, ket inabacyo ida: ta dacdackel daydiay adda cadacayo, ngem ti adda iti lubong. 5 Isuda tattao ida ti lubong: gapu itoy agsaoda iti maipapan iti lubong, ket ti lubong denggenna ida. 6 Datayo tattaonatayo ti Dios: ti macaammo iti Dios denggennatayo; ti saan a tao ti Dios saannatayo a denggen. Gapu itoy ma-ammoantayo ti espiritu ti pudno, ken ti espiritu ti ulbod. 7 Ay-ayatec unay, agiinnayattayo: ta ti ayat nagtaud iti Dios; ket tunggal maysa nga agayat nabukel iti Dios, ket ammona ti Dios. 8 Ti saan nga agayat ket saanna nga ammo ti Dios; ta ti Dios isu ti ayat. 9 Daytoy ti nacaiparangaran iti ayat ti Dios cadatayo, gapu ta imbaon ti Dios ti Anacna a bugbugtong ditoy lubong, tapno agbiagtayo gapu kencuana. 10 Ket daytoy ti ayat, saan a gapu ta ayatentayo ti Dios, no di ket gapu ta isu inayatnatayo, ket imbaonna ti Anacna a daton a subbot cadagiti basbasoltayo. 11 Ay-ayaten unay, no ti Dios ket ay-ayatennatayo unay, rebbengtayo met ti agayan-ayat ti tunggal maysa. 12 Awan ti tao a nacakita iti Dios uray caano. No agayan-ayattayo, ti Dios agtaeng cadatayo, ket ti ayatna nagdanunan cadatayo. 13 Daytoy ti pacakitaantayo nga agnaedtayo kencuana, ket isu cadatayo, agsipud ta iniccannatayo iti Espirituna. 14 Ket dacami nakitami ken sacsianmi a ti Ama ket imbaonna ti Anac a Manangisalacan iti lubong. 15 Uray siasino a mangipaduyacyacto a ni Jesus isu ti Anac ti Dios, ti Dios agtaeng kencuana, ket isu agtaeng iti Dios. 16 Ket dacami na-ammoanmi ket pinatimi ti ayat ti Dios nga impaayna cadatayo. Ti Dios isu ti ayat; ket ti agtaeng iti ayat agtaeng iti Dios, ket ti Dios agtaeng kencuana. 17 Daytoy ti pacatungpalan ti ayat cadatayo, tapno adda panagtalectayo iti aldaw ti pannacaocom: ta no casano ti kinaisuna, castatayo met ditoy lubong. 18 Awan ti buteng ken ayat; no di ket ti ayat a nagdanunan pacsiatenna ti buteng: agsipud ta ti buteng addaan tuoc. Ti agbuteng saan pay a naaramid a nagdanunan ti ayat. 19 Datayo ayatentayo isuna, agsipud ta isu inayatnatayo nga immuna. 20 No adda tao nga agcuna, Siac ayatec ti Dios, ket guraenna ni cabsatna, isu ti maysa a naulbod: ta ti saan nga agayat iti cabsatna a nakitana, casano a mabalinna nga ayaten ti Dios a dina pay nakita? 21 Ket daytoy a bilin nga naadda cadatayo ket nagtaud kencuana, Ti agayat iti Dios ayatenna met ni cabsatna. CAPITULO 5 1 Siasinoman a mamati a ni Jesus isu ti Cristo ket nabukel iti Dios: ket siasinoman nga agayat iti nangbukel kencuana ayatenna met ti nabukel kencuana. 2 Daytoy ti paca-ammoantayo nga ayatentayo dagiti annac ti Dios, no ayatentayo ti Dios, ken salimetmetantayo dagiti bilbilinna. 3 Ta daytoy ti ayat ti Dios, a tungpalentayo dagiti bilbilinna: ket dagiti bilbilinna ket saanda nga macapadagsen. 4 Ta ti aniaman a nabukel iti Dios ket parucmaenna ti lubong: ket daytoy ti panagballigi a pangparucma iti lubong, isu ti pammatitayo. 5 Ket siasino ti mangparmec iti lubong, no di daydiay mamati a ni Jesus isu ti Anac ti Dios? 6 Daytoy daydi immay gapu iti danum ken dara, nga isu ni Jesus Cristo; saan nga iti danum laeng, no di ket iti danum ken dara. Ket ti Espiritu ti mangted ti pangpanecnec, gapu ta ti Espiritu ket isu ti pudno. 7 Ta adda tallo dagiti mangpanecnec sadi langit, ti Ama, ti Sao, ken ti Espiritu Santo, ket dagitoy tallo ket maymaysada. 8 Ken adda tallo dagiti mangsacsi ditoy rabaw ti daga, ti Espiritu, ken ti danum, ken ti dara: ket dagitoy tallo agdadanggayda iti maymaysa a panangsacsi. 9 No awatentayo ti pammanecnec dagiti tattao, ti pammanecnec ti Dios dacdackel: ta daytoy ti pammanecnec ti Dios nga pinanecnecanna maipapan iti Anacna. 10 Ti mamati iti Anac ti Dios addaan ti pammanecnec kencuana: ti saan a mamati iti Dios isu pinagbalinna nga ulbod; ta saanna a pinati ti pammanecnec nga inted ti Dios a maipapan iti Anacna. 11 Ket daytoy isu ti pammanecnec, a ti Dios iniccannatayo iti biag nga agnanayon, ket daytoy a biag adda iti Anacna. 12 Ti agicut iti Anac adda biagna; ti saan nga mangupicup iti Anac ti Dios awan kencuana ti biag. 13 Dagitoy a banbanag insuratco cadacayo a mamati ti nagan ti Anac ti Dios; tapno ma-ammoanyo nga addaancayo iti biag nga agnanayon, tapno dacayo mamaticayo coma iti nagan ti Anac iti Dios. 14 Ket daytoy ti adda cadatayo a panagtalec kencuana, nga, no adda aniaman a dawatentayo a mayannurot iti pagayatanna, isu denggennatayo: 15 Ket no ammotayo a denggennatayo, iti isuamin a dawatentayo kencuana, ammotayo nga awatentayo dagiti dinawattayo kencuana. 16 No ti maysa a tao makitana ni cabsatna nga agbasbasol iti maysa a basol a saan a maipaay iti ipapatay, rebbengna nga idawdawat, ket ti Dios iccannanto ti biag cadagiti agbasol a saan a maipaay iti ipapatay. Adda basol a maipaay iti ipapatay: saan a daytoy ti kunak nga idawdawatannanto. 17 Isuamin a kinakillo ket basol: ket adda basol a saan a maipaay iti ipapatay. 18 Ammotayo a ti siasinoman a nabukel iti Dios saan nga agbasol; no di ket ti nabukel iti Dios agannad, ket ti dakes saan a sumagid kencuana. 19 Ket ammotayo a tattaonatayo ti Dios, ket ti sangalubongan adda iti babaen ti kinadakes. 20 Ket ammotayo a ti Anac ti Dios immay, ket iniccannatayo ti pannacaawat, tapno ma-ammoantayo daydiay a napudno, ket datayo agtaengtayo iti daydiay a napudno, nga isu ni Anacna a Jesus Cristo. Daytoy isu ti pudno a Dios, ken ti biag nga agnanayon. 21 Ub-ubbing nga annac, igagayo dagiti bagbagiyo cadagiti didiosen. Amen.