TI UMUNA A SURAT NI APOSTOL PABLO CADAGITI TAGA CORINTO CAPITULO 1 1 Ni Pablo, naayaban nga apostol ni Jesus Cristo gapu iti pagayatan ti Dios, ken ni Sostenes a cabsattayo, 2 Isuratda iti iglesia ti Dios idiay Corinto, nga isuda dagiti napagsanto ken Cristo Jesus, naayaban nga sasanto, agraman cadagiti isuamin iti uray sadino a disso nga umaw-awag ti nagan ni Jesus Cristo nga Apotayo, cucuada ken cucuatayo: 3 Parabur maadda coma cadacayo, ken cappia, nga agtaud ti Dios nga Amatayo, ken ni Apo Jesus Cristo. 4 Agyamanac iti Diosco nga cancanayon a maipuon cadacayo, gapu iti parabur ti Dios a naited cadacayo babaen ken Jesus Cristo; 5 Gapu ta cadagiti isuamin nga banag ket napabacnangcayo gagu kencuana, dagiti isuamin nga panagsao, ken dagiti isuamin nga pannacaammo; 6 A cas met iti pammanecnec ni Cristo ket napasingkedan cadacayo: 7 Iti casta saancayo nga agcurang iti uray ania a sagut; nga agur-uray ti iyu-umay ni Apotayo a Jesus Cristo: 8 Nga mamatibker cadacayo agingga iti panungpalan, tapno awan ti pacababalawanyo iti aldaw ni Apotayo a Jesus Cristo. 9 Ti Dios mapagtalcan, gapu kencuana naayabancayo iti pannakicadcaddua ken Anacna a Jesus Cristo nga Apotayo. 10 Dawatec ngarud cadacayo, cacabsat, gapu iti nagan ni Apotayo a Jesus Cristo, a saoenyo amin coma ti maymaysa a banag, ket awan coma dagiti panagsisina cadacayo; no di ket naan-anay coma ti panagtitimpuyog iti maymaysa a panunot ken maymaysa a panangipato. 11 Ta nadamagco ti maipapan cadacayo, cacabsatco, cadagiti adda nga cabbalay ni Cloe, nga adda sussusic cadacayo. 12 Ita ket kunak daytoy, a tunggal maysa cadacayo kunana, siac cadduanac ni Pablo; ket siac cadduanac ni Apolos; ket siac cadduanac ni Cefas; ket siac cadduanac ni Cristo. 13 Ni Cristo nasinasina aya? Ni Pablo nailansa aya iti cruz gapu cadacayo? wenno nabautizarancayo aya iti nagan ni Pablo? 14 Agyamanac iti Dios ta diac binautizaran ti uray siasino cadacayo, no di laeng da Crispo ken Gayo; 15 Di la ketdi ta adda agcuna a nabautizarancayo iti bukodco a nagan. 16 Ket binautizarac met pay ti sangacabbalayan ni Estefanas: malacsid cadagitoy, diac ammo no adda sabali pay a binautizarac. 17 Ta saannac nga imbaon ni Cristo a mangbautizar, no di mangicascasaba ti evangelio: saan a buyugen ti kinasirib dagiti sasao, tapno di agbalin ti cruz ni Cristo nga awan capapay-anna. 18 Ta ti pacasaritaan ti cruz cadagiti mapucaw ket kinamaag; ngem cadatayo a naisalacan isu ti pannacabalin ti Dios. 19 Ta adda a naisurat, Pucawecto ti kinasirib dagiti mamasirib, ket pagbalinecto nga awan ti saririt dagiti nasaririt. 20 Sadino ti ayan ti masirib? adino ti ayan ti escriba? sadino ti ayan ti mannakisuppiat itoy a lubong? saan aya a pinagbalin ti Dios a kinamaag ti sirib ti lubong? 21 Idinto ta gapu iti kinasirib ti Dios ti kinasirib ti lubong saanna a nabigbig ti Dios, ti Dios kinayatna nga gapu iti kinanengneng ti pannacaicascasaba maisalacanna dagiti mamati. 22 Ta dagiti Judio dumawatda ti pagilasinan, ket dagiti Griego agsapulda ti kinasirib: 23 Ngem icasabatayo ni Cristo a nailansa iti cruz, cadagiti Judio maysa a pacaitibcolan, ken cadagiti Griego ket kinamaag; 24 Ngem cadagiti naayaban, uray Judio man ken Griego, ni Cristo ti pannacabalin ti Dios, ken ti kinasirib ti Dios. 25 Ta ti kinanengneng iti Dios nasirsirib ngem cadagiti tattao; ken ti kinacapuy iti Dios napigpigsa ngem cadagiti tattao. 26 Ta kitaenyo ti pannacaayabyo, cacabsat, ta saan nga adu a mamasirib a cas iti lasag, saan nga adu a mannacabalin, saan nga adu a natan-oc, dagiti naayaban: 27 Ngem ti Dios ket pinilina dagiti banbanag a minamaag iti lubong tapno babainenna dagiti mamasirib; ket ti Dios pinilina dagiti nacapuy a banbanag iti lubong tapno babainenna dagiti banbanag a napigsa; 28 Ket dagiti awan capapaayanna a banbanag ti lubong, ken dagiti banbanag nga maum-umsi, pinili ti Dios, wen, dagiti banbanag a dipay timmaud, tapno pucawenna dagiti addan: 29 Tapno awan ti lasag nga agpasindayag ti imatangna. 30 Ngem maipuon kencuana addacayo ken Cristo Jesus, isu a gapu iti biang ti Dios na-aramid cadatayo a kinasirib, ken kinalinteg, ken kinasanto, ken subbot: 31 Tapno, cas mayalubog iti adda nga naisuraten, Ti agpasindayag, agipasindayag coma iti biang ti Apo. CAPITULO 2 1 Ket siac, cacabsat, idi immayac cadacayo, ket saannac nga immay a binuyog ti kinalaing ti panagsasao wenno ti kinasirib, nga inwaragawagco cadacayo ti pammanecnec iti Dios. 2 Ta pinanggepco nga di ammoen ti uray aniaman iti nagtengngaanyo, no saan laeng a ni Jesus Cristo, ken ti pannacailanzana iti cruz. 3 Ket nakipaggianac cadacayo a sicacapuy, ken sibubuteng, ken sitatayegteg unay. 4 Ket ti panagsaoc ken ti panangascasabac saan a binuyog dagiti macauy-uyot a sao ti kinasirib ti tao, no di ket ti pannacaipakita ti Espiritu ken ti pannacabalin: 5 Tapno ti pammatiyo saan coma a mabangon iti kinasirib dagiti tattao, no di ket iti pannacabalin ti Dios. 6 Ngem saoenmi ti sirib cadagiti nataenganen: ngem saan a ti sirib daytoy a lubong, ket saan met a ti sirib dagiti agturay itoy lubong, isu nga ti tungpalda ket ubbaw: 7 Ngem saoenmi iti sirib ti Dios iti nalimed, uray pay ti sirib a nailemmeng, isu nga intuding ti Dios idi awan pay ti lubong a maipaay a dayawtayo: 8 Isu a saan nga naammoan ti uray siasino cadagiti agturay ditoy a lubong: ta no naammoanda coma, saanda coma nga inlansa iti cruz ti Apo iti gloria. 9 Ngem cas iti naisurat, ti mata saanna pay a nakita, wenno ti lapayag ket saanna pay a nangngeg; ken saan pay a simrec iti puso ti tao, dagiti banbanag nga insagana ti Dios cadagiti agayat kencuana. 10 Ngem ti Dios impacaammona ida cadatayo gapu iti Espirituna: ta ti Espiritu sukimatenna dagiti isuamin a banbanag, wen, dagiti nauneg nga banbanag ti Dios. 11 Siasino ngarud cadagiti tao ti macaammo cadagiti banbanag ti maysa a tao, no saan a ti espiritu ti tao nga adda kencuana? casta met dagiti banbanag ti Dios awan ti tao nga macaammo, no di iti Espiritu ti Dios. 12 Ngem ita inawattayo, saan a ti espiritu ti lubong, no di ket ti espiritu a cucua ti Dios; tapno maammoantayo dagiti banbanag a naparaburan nga inted cadatayo ti Dios. 13 Ket dagitoy a banbanag saoenmi met, saan a cadagiti sasao nga isuro ti sirib ti tao, no di cadagiti isuro ti Espiritu Santo; nga mangpadispadis dagiti banag a naespirituan cadagiti naespirituan. 14 Ngem ti sigud a nacaparsuaan a tao ket saanna nga awaten dagiti banbanag ti Espiritu ti Dios: ta kencuana isuda ti casla kinanengneng: ket dina met ida mabalin nga ammoen, agsipud ta dagitoy ket masapul a naespirituan ti pannacabigbigda. 15 Ngem ti tao a naespirituan ocomenna dagiti amin a banbanag, ngem isu saan nga maocom ti siasinoman. 16 Ta siasino ti nacaammo iti panunot ti Apo, tapno isu isurona coma? Ngem adda cadatayo ti capanunotan ni Cristo. CAPITULO 3 1 Ket siac, cacabsat, diac nabalin ti makisao cadacayo a cas cadagiti naespirituan, no di ket cas cadagiti linalasag, a cas ub-ubbing ken Cristo. 2 Tinaraonancayo ti gatas, ket saan a ti nakired: ta dicayo mabalinan idi, ken uray ita dicayo pay la mabalinan. 3 Ta linalasagcayo pay laeng: ta idinto nga adda cadacayo dagiti imun, ken susic, ken panagsisina, saancayo aya a linalasag, ken magmagnacayo a cas iti ugali dagiti tattao? 4 Ta no ti maysa kunana, Siac cadduanac ni Pablo; ket ti sabali, siac cadduanac ni Apolos; saancayo aya a linalasag? 5 Asino ngarud ni Pablo, ket asino ni Apolos, ministrosda a naaramat tapno namaticayo, ken cas iti inted ti Apo iti tunggal maysa? 6 Nagmulaac, ni Apolos nagsibog; ngem ti Dios intedna ti idadackel. 7 Iti casta uray ti agmula awan ti aniamanna, uray met ti agsibog; no di laeng ti Dios a mangted ti idadackel. 8 Ti agmula ken ti agsibog maymaysada a banag: ngem tunggal maysa awatennanto ti gunggonana a cas mayannurot met laeng iti aramidna. 9 Ta catulongannatayo ti Dios: dacayo iti talonen ti Dios, ken dacayo iti balayen ti Dios. 10 Cas iti parabur ti Dios a naited caniac, cas masirib nga agar-aramid ti balay, incabilco ti pamunganayan, ket sabali ti agbalay iti rabawna. Ngem kitaen ti tunggal maysa no casano ti panagbalayna iti rabawna. 11 Ta awan ti macabalin a mangicabil ti sabali a pamunganayan no di laeng ti naicabilen, nga isu ni Jesus Cristo. 12 No adda agbalay iti rabaw daytoy a pamunganayan ti balitoc, pirac, batbato a napateg, cayo, root, garami; 13 Ti aramid ti tunggal maysa maiparangarangto: ta ti aldaw ipakitananto, ta maipalgacto gapu iti apuy; ket ti met laeng apuy padasennanto ti aramid ti tunggal maysa no ania a kita. 14 No ti aramid a binalay ti siasinoman a tao iti rabawna ket mataginayonto, awatennanto ti gunggona. 15 No ti aramid ti siasinoman a tao ket mapuoranto, mapucawanto: ngem isu met laeng maisalacanto; ngem casla limmasat iti apuy. 16 Dicayo ammo aya a dacayo ti templo ti Dios, ket ti Espiritu ti Dios agtaeng cadacayo? 17 No siasinoman a tao ket tulawanna ti templo ti Dios, isu dadaelento ti Dios; ta ti templo ti Dios nasantoan, ket dayta a templo dacayo. 18 Awan coma ti mangallilaw iti bagina. No adda tao cadacayo iti agpanunot nga isu nasirib itoy a lubong, agbalin coma a nanengneng, tapno agbalin nga masirib. 19 Ta ti sirib daytoy a lubong ket isu ti kinanengneng iti Dios. Ta adda a naisurat, Isu tiliwenna dagiti mamasirib iti kinasicapda met laeng. 20 Ket manen, Ti Apo ammona dagiti pampanunot dagiti mamasirib, nga dagitoy ket barengbarengda. 21 Iti casta ngarud awan coma ti agpasindayag gapu cadagiti tattao. Ta amin dagiti banbanag cucuayo ida; 22 Uray ni Pablo, uray ni Apolos, uray ni Cefas, wenno ti lubong, wenno ti biag, wenno ti patay, wenno ti agdama, wenno ti mapasungad; cucuayo amin ida: 23 Ket dacayo cucuanacayo ni Cristo; ket ni Cristo cucua ti Dios. CAPITULO 4 1 Iti casta ibilangdacami coma, a cas cadagiti ministro ni Cristo, ken agaywan cadagiti palimed ti Dios. 2 Castamet masapul a dagiti agaywan, tattaoda coma a nasaracan a matalec. 3 Ngem no caniac bassit unay a banag no maocomac cadacayo, wenno iti panangocom dagiti tattao: wen, uray siac met laeng diac ocomen ti bagic. 4 Ta awan ti ammoc a macadadael caniac; ngem saanac a mapalinteg gapu itoy: no di ket ti mangocom caniac isu ti Apo. 5 Iti casta ngarud awan coma ti ocomenyo no dina pay pannacaipaay, agingga iti Apo umay, isu a mangipanayagto iti lawag cadagiti nailemmeng a banag dagiti sipnget, ket iparangarangnanto dagiti panagem dagiti puspuso: ket iti dayta tunggal maysa addanto panangidaydayawna iti Dios. 6 Ket dagitoy a banbanag, cacabsat, inaramatco ida a cayarigan ni Apolos ken siac gapu cadacayo; tapno masursuroyo coma cadacami a dicayo panunoten ti lumbes iti adda a naisurat, tapno awan coma cadacayo ti agtangsit maipuon iti maysa a bumusor iti sabali. 7 Ta siasino ti nangaramid kenca a naidumdumaca? wenno ania ti adda kenca nga dica inawat? ngem no inawatmo, apay-apay nga pagtangsitmo, a casla ket tay dica inawaten? 8 Napneccayon, bimmacnangcayon, nacapagaricayon nga awancami: ket sapay coma idawatco ti Apo ta agaricayo, tapno makipagaricami met cadacayo. 9 Ta pagarupec a ti Dios incabilnacami nga apostol a maipanayag a maud-udi, a casla nakedngan iti ipapatay: ta naaramidcami a buyaen ti lubong, ken dagiti angel, ken dagiti tattao. 10 Nanengnengcami gapu ken Cristo, ngem mamasiribcayo ken Cristo; nacapuycami, ngem napigsacayo; madaydayawcayo, ngem malalaiscami. 11 Agingga itoy horas nga agdama mabisincami, ken mawawcami, ket addacami a lamolamo, ken matungtungpacami, ket awan ti masnop a balaymi; 12 Ken nabannog, a panggedmi dagiti im-imami met laeng: no pagsasaoandacami, pagsaoanmi ida ti naimbag; no irurumendacami, ibturenmi: 13 No ibabaindacami, agpacpacaasicami: pinagbalindacami a rugit iti lubong, ken mamontoon a rugit dagiti isuamin a banbanag agingga ita. 14 Saanco nga isurat dagitoy a banag tapno ibabaincayo, no di ket cas ay-ayatec unay nga an-annac bagbagaancayo. 15 Ta uray coma no adda sangapulo ribo nga agaywan cadacayo ken Cristo, nupay casta awan ti adu nga ammayo: ta gapu ken Cristo Jesus pinutotcayo babaen ti evangelio. 16 Dawatec ngarud cadacayo, a surotendac coma. 17 Ta gapu itoy imbaonco cadacayo ni Timoteo, nga ay-ayatec unay nga anac, ken matalec iti Apo, isu a mangipalagipto cadacayo cadagiti daldalanco ken Cristo, a cas isursuroc met cadagiti isuamin nga disso iti tunggal iglesia. 18 Ngem ita dagiti dadduma addada a timmangsit, a casla ket tay saannacon nga umay cadacayo. 19 Ngem umayacto iti mabiit cadacayo, no ipalubos ti Apo, ket maamoacto, saan a ti sao dagiti agtangtangsit, no di ket ti pannacabalin. 20 Ta ti pagarian ti Dios ket saan nga iti sao, no di ket iti pannacabalin. 21 Ania ti cayatyo? Umayac cadacayo nga itugotco ti pagsaplit, wenno ti ayat, wenno ti espiritu ti kinaemma? CAPITULO 5 1 Maipadpadamagen nga adda mannakicamalala cadacayo, ket iti casta a kita ti pannakicamalala uray pay cadagiti Gentil ket awan, a ti maysa cadacayo ket cupicupanna ti asawa ni amana. 2 Ket dacayo agtangsitcayo, idinto a rebbengyo coma ti agladingit, tapno maiccat coma iti tengngayo ti nagaramid iti castoy. 3 Ta siac iti kinapudnoanna, uray awanac cadacayo, ngem sisasango ti espirituc, naocomcon, a casla addaac a sisasango, iti daydiay nakingapuanan iti castoy nga aramid, 4 Gapu iti nagan ni Apotayo a Jesús Cristo, intono naggigimongcayo, ken ti espirituc, gapu iti pannacabalin ni Apotayo a Jesús Cristo, 5 Dayta mayawat coma ken Satanas a maipaay iti pacadadaelan ti lasag, tapno ti espiritu ket maisalacanto intono aldaw ni Apo Jesus. 6 Ti pagtangsitanyo ket saan a nasayaat. Dicayo ammo aya a ti bassit a levadura banglesenna ti amin a masa? 7 Ugasanyo ngarud ti baac a levadura, tapno agbalincayo nga baro a masa, ta dacayo ket awanen ti levadurayo. Ta uray met ni Cristo nga ilalabastayo ket naidaton met a naipaay cadatayo: 8 Iti casta ngarud ngilinentayo ti fiesta, saan a buyugen ti baac a levadura, saan met nga iti levadura ti panagipato ti dakes ken ti kinadakes; ngem ketdi iti awan levadurana a tinapay ti kinadalus ti nakem ken kinapudno. 9 Insuratco cadacayo idi suratco a dicayo coma makicadcaddua cadagiti mannakicamalala: 10 Ngem saan nga amin cadagiti mannakicamalala ditoy a lubong, wenno dagiti naagum, wenno nasicap nga managpatubo, wenno dagiti agrucbab cadagiti ladladawan; ta no iti casta coma ket masapulyonto ti pumanaw ditoy a lubong. 11 Ngem ita insuratco cadacayo a dicayo makicadcaddua, iti uray siasino nga managan cabsat no isu mannakicamalala, wenno naagum, wenno agrucbab cadagiti ladawan, wenno managsao ti dakes, wenno managbartec, wenno nagaramugam nga managpatubo; iti casta a tao uray makipangan kencuana saan. 12 Ta ania ti rebbengco a mangocom cadagiti taga ruar? saan aya a dacayo ti mangocom cadagiti taga uneg? 13 Ngem dagiti taga ruar ti Dios ocomenna ida. Ngarud iccatenyo iti tengngayo dayta a dakes nga tao. CAPITULO 6 1 Maitured aya ti maysa cadacayo, idinto nga adda pangidarumanna iti sabali, nga ipanna iti pangocoman dagiti nakillo, ket saan nga iti saclang dagiti sasanto? 2 Dicayo ammo aya a dagiti sasanto ket ocomendanto ti lubong? ket no ocomenyonto ti lubong, saancayo aya a maicari a mangocom cadagiti banbanag a bassit unay ti pategna? 3 Saanyo nga ammo aya nga ocomentayto dagiti angel? dinto nangnangrona pay cadagiti banag itoy a biag? 4 No ngarud adda ocomenyo iti maipapan cadagiti banbanag daytoy a biag, pilienyo a mangocom dagiti nanumo ti pategda iti iglesia. 5 Kunak cadacayo tapno pagbainanyo. Apay, awan aya cadacayo ti uray maysa a tao a masirib? awan, awan uray maysa a macabalin coma a mangocom cadagiti cacabsatna? 6 Ngem ketdi ti cabsat ringgorenna ti cabsatna, ket ipanna iti saclang dagiti saan a mammati. 7 Ita ngarud maysa a pacapilawan cadacayo, gapu ti caadda iti ringringgoryo ti maysa ken maysa. Apay a dicayo pay la itured ti pannacaranggas? apayapay a dicayo pay la anusan ti mapucawan ti calintegan? 8 Saan, dacayo met laeng ti agaramid iti kinakillo, ken mangallilawcayo, cadagiti cacabsatyo met laeng. 9 Dicayo ammo aya a dagiti nakillo didanto tawiden ti pagarian ti Dios? Dicayo coma maallilaw: uray dagiti mannakiabig, uray dagiti agrucbab cadagiti ladladawan, uray dagiti makicamcamalala, uray dagiti binabai, wenno agabuso cadagiti bagbagida met laeng babaen iti tao, 10 Uray dagiti mannanacaw, uray dagiti naagum, uray dagiti managbarbartec, uray dagiti managtabbaaw, uray dagiti nagaramugam nga managpatubo, saandanto a tawiden ti pagarian ti Dios. 11 Ket cacastada idi dagiti dadduma cadacayo: ngem nadalusancayon, ngem napagsantocayon, ngem napalintegcayon babaen iti nagan ni Apo Jesus, ken babaen iti Espiritu ti Diostayo. 12 Dagiti isuamin a banbanag maipalubosda caniac, ngem saan nga isuamin maiparbeng: dagiti isuamin a banbanag maipalubosda caniac, ngem saanacto a pa-adipen ti uray aniaman cadagitoy. 13 Dagiti taraon maipaayda iti tian, ket ti tian maipaay cadagiti taraon: ngem ti Dios dadaelenna ida nga agpadpada. Ita ti bagi saan a maipaay iti pannakiabig, no di ket maipaay iti Apo; ket ti Apo maipaay iti bagi. 14 Ket ti Dios saan laeng a pinagungarna ti Apo, no di ket pagungarennatayto met gapu iti pannacabalinna. 15 Dicayo ammo aya a dagiti bagbagiyo isuda dagiti camcameng ni Cristo? alaecto aya ngarud dagiti camcameng ni Cristo, ket pagbalinec ida a camcameng ti maysa a balangcantis? Ti Dios dina ipalubos. 16 Ania? dicayo ammo aya a ti makitipon iti maysa a balangcantis ket makipagmaymaysa a bagi? ta ti dua, kinunana, agbalindanto a maymaysa nga lasag. 17 Ngem ti makitipon iti Apo makipagmaymaysanto nga espiritu. 18 Itarayanyo ti pannakicamalala. Iti amin a basol nga aramiden ti tao ket adda iti ruar ti bagi; ngem ti makicamalala agbasol a maibusor iti bagina met laeng. 19 Ania? dicayo aya ammo a ti bagiyo ket isu ti templo iti Espiritu Santo nga adda cadacayo, isu a naggapu iti Dios, ken saanyo a cucua ti bagiyo? 20 Ta nagatangcayo iti maysa a pateg: ngarud idaydayawyo ti Dios iti bagiyo, ken ti espirituyo, isu nga cucua ti Dios. CAPITULO 7 1 No maipapan cadagiti banbanag nga insuratyo caniac: Naimbag a ti lalaki ket saanna coma a sagiden ti babai. 2 Ngem, tapno maliclican iti pannakicamalala, tunggal lalaki adda coma asawana, ket tunggal babai adda coma asawana. 3 Ited coma ti lalaki iti asawana ti annongna a cas asawa: ket casta met ti babai ken asawana. 4 Ti babai saan nga isu ti agtagicua iti bagina, no di ti asawana: ket casta met ti lalaki saan nga isu ti agtagicua iti bagina, no di ni asawana. 5 Saancayo nga agpipinnaidam iti maysa ken maysa, malacsid no nagnumoanyo nga agpadpada, tapno sangoenyo a cancanayon ti panagayunar ken panagcararag; ket calpasanna agdennacayo manen, di la ket ta sulisogennacayo ni Satanas gapu iti dicayo panagdenna. 6 Ngem kunak daytoy a cas pammalacadco, ngem saan a cas bilin. 7 Ta cayatco nga isuamin dagiti tao ket cacasda la coma caniac. Ngem tunggal maysa adda bucodna a sagut ti Dios, iti maysa castoy, ket ti sabali casdiay. 8 Ngem kunak cadagiti saan a nakiasawa ken cadagiti balo nga babbai, Naimbag cadacuada no mataginayondanto a cas caniac. 9 Ngem no dida macaibtur, makiasawada coma: ta nasaysayaat ti makiasawa ngem iti sumged. 10 Ken dagiti addaan asawa ibilinco, ngem saan a siac, no di ti Apo, Ti babai di coma sumina ken asawana: 11 Ngem no sumina, agtaeng a di makiasawa, wenno makicappia coma ken asawana: ket ti lalaki saanna coma nga isina ni asawana. 12 Ngem no maipapan cadagiti sabali siac kunak, saan a ti Apo: No ti lalaki a cabsat adda asawana a di mamati, ket ti babai si-aayat a makicabbalay kencuana, dina coma isina. 13 Ket ti babai nga adda asawana a di mamati, ket ti lalaki si-aayat a makicabbalay kencuana, ti babai dina coma panawan ti asawana. 14 Ta ti lalaki a di mamati mapagsanto ken asawana, ket ti babai a di mamati mapagsanto ken asawana: ta no saan a casta dagiti annacyo saanda coma a nadalus: ngem ita nasantoanda. 15 Ngem no ti di mamati ket suminanto, bay-am a sumina. Ti cabsat a lalaki wenno babai ket saan a naisinggalut cadagiti casta nga casasaad: ngem ti Dios inayabannatayo nga agbiag iti panagcacappia. 16 Ta casano ti pannacaammom, O babai, no maisalacanmonto ni asawam? wenno casano ti pannacaammom, O lalaki, no maisalacanmonto ni asawam? 17 Ngem cas iti panangbunong ti Apo iti tunggal maysa, ken no casano ti panangawis ti Dios iti tunggal maysa, casta coma iti panagbiagna: Ket castoy ti ibilinco cadagiti isuamin nga iglesia. 18 Naayaban ti asinoman a tao a nacugit? saan coma nga agbalin a di nacugit. Adda naayaban a di nagcugit? dayta saan coma a pacugit. 19 Ti pannacacugit awan capapaayanna, ket ti saan a pannacacugit awan capapaayanna, no di ket iti panangtungpal cadagiti bilbilin ti Dios. 20 Tunggal maysa a tao agtaeng coma iti casasaadna a nacaayabanna. 21 Naayabanca nga adipen? dica pagdanagan daytoy: ngem no mabalinmo met ti agwayawaya, aramatem coma. 22 Ta ti naayaban iti Apo, nga isu ket adipen, isu nawayawayaan a tao iti Apo: casta met ti naayaban, nga agdama nga agwayawaya, isu adipen ni Cristo. 23 Nagatangcayo iti maysa a pateg; dicayo coma paad-adipen cadagiti tattao. 24 Cacabsat, iti tunggal maysa a tao, iti dayta nga naca-ayabanna, iti dayta ket agtaeng coma iti Dios. 25 No maipapan cadagiti birhen nga babbalasang awan iti bilin ti Apo caniac: nupay casta itedco ti pammagbagac, cas maysa nga matalec a nacagun-od ti asi iti Apo. 26 Pagarupec ngarud a daytoy isu ti naimbag gapu iti agdama a rigat, kunak, nga nasayaat a ti tao agtaeng coma a cas iti casasaadna ita. 27 Addaca a naisinggalut iti maysa nga asawa a babai? dica tarigagayan ti lumapsut. Addaca a nacalapsut iti maysa nga asawa a babai? dica sumapul ti asawam. 28 Ngem uray pay no mangasawacanto, saanca a macabasol; ket no ti maysa a birhen makiasawanto, saan a macabasol. Numan pay casta dagita addanto rigatda iti lasag: ket cayatco coma a malisianyo daytoy. 29 Ngem daytoy kunak, cacabsat, ti tiempo ababan: ti agtalinaed, dagiti lallaki nga adda assawada agbalinda coma a casla awan ti asawada; 30 Ken dagiti agsangit, casla coma dida agsangit; ket dagiti agragsac, casla coma dida agragsac; ken dagiti aggatang, a casla awan ti tagicuaenda; 31 Ket dagiti mangaramat daytoy a lubong, dida coma cas aglablabes: ta ti ugalina daytoy a lubong lumabas. 32 Ngem cayatco coma nga awan dagiti pacaringoranyo. Ti lalaki a saan a nangasawa agawaanna a tamingen dagiti banbanag a cucua ti Apo, no casano ti panangay-ayona iti Apo: 33 Ngem ti lalaki a nangasawa agawaanna a tamingen dagiti banbanag toy lubong, no casano ti panangay-ayona iti asawa. 34 Adda met paggigidiatan ti asawa nga babai ken ti birhen. Ti babai nga awan asawana agawaanna dagiti banbanag ti Apo, tapno agbalin a nasantoan iti bagi ken espiritu nga agpadpada: ngem ti naasawaan a babai agawaanna dagiti banag ti lubong, no casano ti panangay-ayona ken asawana. 35 Ket daytoy kunak tapno paglainganyo; saan a tapno siloancayo, no di gapu iti naurnos, ken tapno mabalinyo ti agservi iti Apo nga awan macasingsinga. 36 Ngem no ti maysa pagarupenna a dinto maipaay iti kinabirhenna, no napalabasen ti casayaatan ti tawenna a iyasawa, ket masapul a maiparbeng, aramidenna coma ti cayatna, saan a macabasol: makiasawada ngarud. 37 Ngem ti adda a sititibker iti pusona, nga awan pacasapulanna, ket matengelna ti nakemna met laeng, ket pinanggep iti pusona a taginayonennanto ti kinabirhenna, naimbagto ti aramidenna. 38 Iti casta ti mangyasawa iti balasang nasayaat ti aramidenna; ngem iti saan a mangyasawa kencuana nasaysayaat pay ti aramidenna. 39 Ti babai nga asawa naisinggalut iti bayat ti panagbiag ni asawana; ngem no natay ti asawana, adda a siwawaya a makiasawa ti cayatna; isuna laeng a maaramid coma a cas mayalubog iti Apo. 40 Ngem pagarupec a naragragsacto no agtalinaed, cas panangipatoc: ket inanamaec nga adda met caniac ti CAPITULO 8 1 No maipapan cadagiti maidaton cadagiti ladladawan a didiosen, ammotayo a datayo amin ket adda siribtayo. Ti sirib mamagtangsit, ngem ti ayat mamatibker. 2 Ket no panunoten ti maysa nga adda bassit ammona, awan pay ti ammona cas iti rebbengna a panangammo. 3 Ngem no ti maysa a tao ayatenna ti Dios, daytoy a tao ket naammoanna. 4 No maipapan ngarud iti pannangan cadagiti maidaton cadagiti ladladawan a didiosen, ammotayo a ti ladawan a didiosen ket awan iti capapaayanna ditoy a lubong, ket awan iti Dios no di laeng maymaysa. 5 Ta uray no adda dagiti naganenda a didios, idiay langit wenno ditoy daga, (a casla ket tay ad-adu dagiti didios, ken adu dagiti ap-appo,) 6 Ngem cadatayo adda maymaysa a Dios, ti Ama, nga paggapuan dagiti isuamin nga banag, ket datayo maipaaytayo kencuana; ken maymaysa nga Apo Jesus Cristo, a gapu kencuana adda dagiti isuamin a banag, ken gapu kencuana addatayo. 7 Ngem daytoy a pannacaammo ket awan cadagiti isuamin: ta agingga ita dagiti dadduma a nairuam cadagiti ladladawan a didiosen manganda cadagiti sidsida a naidaton a cas naidaton iti maysa a ladawan a didiosen; ket ti nakemda idinto a nacapuy matulawan. 8 Ngem ti pagtaraon saan nga isu ti mangitalec cadatayo iti Dios: ta saan, no mangantayo, ket saantayo met a nasaysayaat; uray pay, no saantayo a mangan, saantayo met a dacdakes. 9 Ngem agannadcayo di la ket ta daytoy a wayawayayo agbalin nga pacaiculboan dagiti nacapuy. 10 Ta no adda macakitanto kenca nga adda siribmo a makipanganca idiay templo dagiti ladladawan a didiosen, dinto aya a ti nakem iti nacapuy ket mapabileg a mangan cadagiti banbanag a naidaton cadagiti ladladawan; 11 Ta gapu iti siribmo ti nacapuy a cabsat ket madadaelto, isu a nacaigappuan ni Cristo a natay? 12 Ket idinto nga agbasolcayo iti castoy a macadadael cadagiti cacabsat, ket sugatenyo ti nakemda a nacapuy, agbasolcayo iti maisalungasing ken Cristo. 13 Gapuna, no ti pagtaraon ket iculbona ti cabsatco, saannacto nga agsidan ti lasag iti uray caanoman, tapno diac maiculbo ti cabsatco. CAPITULO 9 1 Saanac aya nga apostol? saanac aya a siwawaya? saanco aya a nakita ni Jesus Cristo nga Apotayo? saan aya a dacayo ti gappuanac iti Apo? 2 Uray no cadagiti sabsabali ket saannac nga apostol, ngem awan duduana no cadacayo: ta ti tanda ti kinaapostolco ket isu ti caaddayo iti Apo. 3 Daytoy ti isungbatco cadagiti mangpalutpot caniac, 4 Awan cadi ti calinteganmi nga mangan ken uminum? 5 Awan cadi ti calinteganmi a mangicuyog iti dennami iti maysa a cabsat a babai, maysa nga asawa, a cas cadagiti dadduma nga apostol, ken cas dagiti cacabsat ti Apo, ken ni Cefas? 6 Wenno siac laeng aya ken ni Bernabe, ti awan ti calinteganmi a di agtrabaho? 7 Siasino ti mapan makigubat ti uray caano a cucuana ti magastona? siasino ti mangimula ti maysa a cauvasan, ket saan a mangan iti bungana? wenno siasino ti mangpastor ti sangarbaanan nga an-animal, ket saan nga agtaraon iti gatas ti sangarbaanan? 8 Saoec aya daytoy a cas cadawyan laeng dagiti tattao? wenno saan met aya a saoen pay ti linteg ti casta? 9 Ta adda a naisurat iti linteg ni Moises, Dica bosalan ti baca nga agiric ti pagay cadagiti sacsacana. Saan cadi a ti Dios igagana dagiti baca? 10 Wenno insaona a maipaay laeng cadatayo? Gapu cadatayo, awan duaduana, a naisurat: ta ti agarado rebbengna ti agarado a siinanama; ket ti agbayo a siinanama mairanud iti inanamana. 11 No nagmulacami cadagiti banbanag a naespirituan a maipaay cadacayo, dackel a banag aya no agapitcami coma cadagiti cucuayo a naindagaan? 12 No dagiti sabali adda calinteganda cadacayo, dinto dacdackel pay ti calinteganmi? Nupay casta saanmi nga inaramat daytoy a calintegan; no di ket isuamin sagabaenmi, tapno dicami mangicabil ti aniaman a lapped iti evangelio ni Cristo. 13 Saanyo nga ammo a dagiti agtrabaho cadagiti nasantoan a banag manganda cadagiti cucua ti templo? ket dagiti agservi iti altar makibingayda cadagiti cucua ti altar? 14 Casta met imbilin ti Apo a dagiti mangicascasaba iti evangelio agbiagda coma gapu iti evangelio. 15 Ngem diac inaramat ti uray ania cadagitoy: ket diac insurat dagitoy a banbanag, tapno casta coma ti maaramid caniac: ta naim-imbag coma caniac ti matay, ngem iti adda mangiccat ti capapayan ti dayawco. 16 Ta uray no icascasabac ti evangelio, awan ti aniaman a panagpasindayagco: ta naipabaclay caniac daytoy a pannacasapul; wen, ay-ayac pay ngarud, no diacto icascasaba ti evangelio! 17 Ta no aramidec daytoy a gapu ta isu ti tarigagayco, adda gunggonac: ngem no mapilpilitac, ti saad a panagaywan ti evangelio ket naitalec caniac. 18 Ania ngarud ti gunggonac? Kinaagpaysona, no icascasabac ti evangelio, ipaayco ti evangelio ni Cristo nga awan baybayadna, tapno ti panangaramatco iti calintegac iti evangelio saan a dakes. 19 Ta idinto a siwayawayaac cadagiti isuamin a tattao, pina-adipennac cadagiti isuamin, tapno mairagpatco dagiti ad-adu. 20 Iti casta cadagiti Judio nagbalinac a Judio, tapno mairagpatco dagiti Judio; cadagiti adda iti babaen ti linteg, nagbalinac a casla adda iti babaen ti linteg, tapno mairagpatco dagiti adda iti babaen ti linteg; 21 Cadagiti awan lintegda, a cas awan linteg (caslaac la awan lintegna ti Dios, ngem addaac iti babaen ti linteg ni Cristo,) tapno mairagpatco dagiti awan ti lintegda. 22 Cadagiti nacapuy nagbalinac a cas nacapuy, tapno mairagpatco dagiti nacapuy: nagbalinac nga isuamin cadagiti isuamin a tattao, tapno cadagiti isuamin a pamay-an maisalacanco dagiti dadduma. 23 Ket dagitoy aramidec gapu iti evangelio, tapno mairamanac cadacayo. 24 Saanyo nga ammo nga iti paglulumbaan agtarayda amin, ngem maymaysa laeng iti umawat ti gunggona? Agtaraycayo met iti casta, tapno magun-odanyo. 25 Ket tunggal tao a makisalisal, agparbeng cadagiti isuamin a banbanag. Isuda aramidenda daytoy tapno magun-odanda ti maysa a balangat nga agrupsa; ngem datayo ti saan nga agrupsa. 26 Siac ngarud agtarayac iti castoy, saan a casla makigasanggasat; ta ti pannakidangadangco, saan a casla makicabil iti angin: 27 Ngem gubgubatec ti bagic, ket iturayac: di la ket ta, idinto a kinascasabaac dagiti sabali, siac ket mapagtalaw met. CAPITULO 10 1 Maysa pay, cacabsat, diac cayat a dicayo maammoan, a dagidi ammatayo addada amin iti baba ti ulep, ket dimmaliasatda amin iti uneg ti taaw; 2 Ket nabautizaranda amin ken Moises iti ulep ken iti baybay; 3 Ket nanganda amin iti daydiay naespirituan nga pagtaraon; 4 Ket imminumda amin iti daydiay naespirituan nga inumen: ta imminumda iti daydiay a naespirituan a Bato a sumursurot cadacuada idi: ket daydi a Bato isu idi ni Cristo. 5 Nupay casta ti Dios saan a naay-ayo cadagiti adu cadacuada: ta napucawda idiay let-ang. 6 Ket dagidi a banbanag isuda dagiti ulidan cadatayo, tapno ditayo aguman dagiti banbanag a dakes, a cas ti panagagumda. 7 Dicayo met agrucbab cadagiti ladladawan, a cas cadagidi dadduma cadacuada; cas adda a naisurat, Dagiti umili nagtugawda a nangan ken uminum, ken timmacderda a nagay-ayam. 8 Ditayo met makicamalala, a cas inaramid dagiti dadduma cadacuada, ket iti maymaysa nga aldaw napasag dagiti duapulo ket tallo a ribu. 9 Ditayo met ruroden ti Apo, cas inaramid dagiti dadduma cadacuada, ket natayda gapu cadagiti ululeg. 10 Dicayo agtanabutob, cas cadagiti dadduma cadacuada a nagtanabutobda, ket nadadaelda gapu iti manangdadael. 11 Ket dagitoy a banbanag na-aramidda cadacuada a pagulidanan: ket naisuratda tapno pacabagbagaantayo, a dimtengen dagiti panungpalan dagiti aldaw. 12 Gapuna ti mangipagarup nga adda a sitatacder kitaenna ta di maiculbo. 13 Saan nga immay cadacayo ti uray ania a pannacasulisog a di met simro cadagiti isuamin a tattao: ngem ti Dios mapagtalcan, isu a dinto mangipalubos a masulisogcayo iti aglabes iti mabalinanyo; no di ket maigiddanto iti pannacasulisog isaganananto met ti dalan a paglissian, tapno mabalinyo a pagballigian. 14 Gapuna, patpatgec nga ay-ayatec, pumanawcayo iti panagrucbab cadagiti ladladawan. 15 Agsaoac cadacayo a cacasla mamasirib a tattao; ipatoyo iti saoec. 16 Ti copa iti bendicion a bendicionantayo, saan aya nga isu ti panagmaymaysatayo iti dara ni Cristo? Ti tinapay nga pisientayo, saan aya nga isu ti panagmaymaysatayo iti bagi ni Cristo? 17 Ta datayo idinto nga adutayo ket maymaysatayo a tinapay, ken maymaysa a bagi: ta mairamantayo amin iti daydiay maymaysa nga tinapay. 18 Kitaenyo ni Israel a cas iti lasag: saan aya a dagiti mangan cadagiti datdaton ket mairaman iti altar? 19 Ania ngarud ti kunak? a ti maidaton cadagiti ladladawan adda capapay-anna, wenno ti ladawan adda capapay-anna? 20 Ngem kunak, nga dagiti banbanag nga idaton dagiti Gentil, idatonda cadagiti sairo, ket saan nga iti Dios: ket diac cayat nga adda pannakimaymaysayo cadagiti sairo. 21 Saanyo a mabalin ti uminum iti copa ti Apo, ken iti copa dagiti sairo: saanyo a mabalin ti mairaman iti lamisaan ti Apo, ken iti lamisaan dagiti sairo. 22 Wenno gargarientayo aya ti Apo nga agimun? napigpigsatayo aya ngem isu? 23 Dagiti amin a banbanag maipalubosda caniac, ngem amin a banbanag saanda a maipaay amin: dagiti amin a banbanag maipalubosda caniac, ngem amin a banbanag saanda amin a mamatibker. 24 Awan coma ti agagawa iti cabucbucodanna, no di ket iti tunggal maysa ti pagimbagan iti sabali. 25 Isuamin a malaco iti paguragaan, canenyo, a dicayo agsaludsud a maigapu iti conciencia: 26 Ta ti daga ket cucua ti Apo, ken dagup ti kinapunnona. 27 No ti maysa nga saan a namati agawis ti pannangan, ket cayatyo ti mapan; dagup ti isangoda cadacayo, canenyo, a dicayo agsalsaludsud a gapu iti conciencia. 28 Ngem no adda agsaonto cadacayo, Daytoy naidaton iti altar ti ladladawan, saanyo ngarud a canenen gapu iti daydiay nangibaga, ken gapu iti conciencia: ta ti daga ket cucua ti Apo, ken dagup ti kinapunnona: 29 Ti conciencia, kunak, saan a ti concienciam, no di ket ti concienciana: ta apayapay ti wayawayac ket maocomto gapu iti conciencia ti sabali? 30 No siac babaen ti parabur mairamanac, apayapay a dakes ti pacababalawacto gapu ti daydiay nagyamanac? 31 Gapuna uray mangancayo, uray uminomcayo, wenno uray ania nga aramidenyo, aramidenyo amin a maipaay iti dayaw ti Dios. 32 Saancayo coma nga agbalin a pacaiculboan, uray cadagiti Judio, uray cadagiti Gentil, uray iti iglesia ti Dios: 33 A cas met caniac iti isuamin agawaac nga ay-ayoen dagiti amin a tattao, a saanco a sapulen ti paglaingac, no di ket paglaingan dagiti adu, tapno isuda ket maisalacanda. CAPITULO 11 1 Tuladendac coma, a cas met iti panangtuladco ken Cristo. 2 Siac ita ket idaydayawcayo, cacabsat, gapu ta cadagiti isuamin a banag malagipdac, ket salimetmetanyo a di agbalbaliw dagiti sursuro, a cas idi inyawatco ida cadacayo. 3 Ngem cayatco a maamoanyo coma, a ti panguloen ti isuamin a tao isu ni Cristo; ket ti panguloen ti babai isu ti lalaki; ket ti pannacaulo ni Cristo isu ti Dios. 4 Isuamin a lalaki nga agcararag wenno agipadpadto, nga adda a siabbong ti ulona, iccatenna ti dayaw ti ulona. 5 Ngem isuamin a babai nga agcarcararag wenno agipadto a saanna nga abbongan ti ulona iccatenna iti dayaw ti ulona: ta casla adda a nakiskisan. 6 Ta no ti babai saan coma nga maabbongan, mapukisan coma met: ngem no nacababain iti babai ti mapukisan wenno makiskisan, maabbongan ngarud. 7 Ta ti lalaki kinapudnoanna a dina rebbeng nga abbongan ti ulona, idinto nga isu ti ladawan ken dayaw ti Dios: ngem ti babai isu ti dayaw ti lalaki. 8 Ta ti lalaki saan a naala iti babai; no di ket ti babai naala iti lalaki. 9 Ket saan met a naparsua ti lalaki a maipaay iti babai; no di ket naparsua ti babai a maipaay iti lalaki. 10 Gapuna rebbeng ti babai ti maaddaan iti ulona ti pagilasinan ti pannacabalin gapu cadagiti angeles. 11 Nupay casta awan ti babai nga agwaywayas nga awan lalaki, awan met ti lalaki nga agwaywayas nga awan babai, iti Apo. 12 Agsipud ta ti babai naala iti lalaki, casta met ti lalaki maadda gapu iti babai; ngem amin dagiti banbanag naggapuda iti Dios. 13 Ipatoyo a dacdacayo: maipaay aya a ti maysa a babai ket agcararag iti Dios a ti ulona di naabbongan? 14 Saan aya nga isuro ti sigud a cadawyan cadacayo, nga no, ti lalaki ket atiddog ti boocna, daytoy ket nacababain kencuana? 15 Ngem no ti babai ket atiddag ti boocna, isu ti dayawna: ta ti boocna naited kencuana nga abbong. 16 Ngem no adda tao nga mangsupiat daytoy, awan dayta nga ugalitayo, uray pay dagiti iglesia ti Dios. 17 Ita ngarud iti panangibagac cadagitoy cadacayo siac dicayo dayawen, agsipud ta aggu-urnongcayo saan a maipaay iti nasaysayaat, ngem maipaay iti dacdakes. 18 Ta umuna, no aggu-urnongcayo iti iglesia, nadamagco nga adda panagsisina cadacayo; ket adda bassit a panamatic daytoy. 19 Ta masapul nga adda bungbunggoy a sumupadi cadacayo, tapno dagiti mabigbig maiparangarang cadacayo. 20 No ngarud aggu-urnongcayo iti maysa a disso, saan nga isu iti pannangan iti pangrabii ti Apo. 21 Ta iti pannanganyo tunggal maysa alaenna ti bucodna a pangrabii: ket adda maysa a mabisinan, ken adda mabartec. 22 Ania? awan ti balbalayyo a panganan ken inumanyo? wenno umsienyo ti iglesia ti Dios, ket babainenyo dagiti napanglaw? Ania ti saoecto cadacayo? dayawencayo aya gapu itoy? Saancayo a dayawen. 23 Ta inawatco iti Apo ti inyawatco met cadacayo, A ni Apo Jesus idi met la a rabii a nayawat, nangala iti tinapay: 24 Ket idi a nacapagyamanen, pinisina, ket kinunana, Alaenyo, canenyo: daytoy ti bagic, a napisi gapu cadacayo: aramidenyo daytoy a panglaglagip caniac. 25 Ket casta met innalana ti copa, idi calpasan ti pangrabii, a kinunana, Daytoy a copa isu ti baro a tulag iti darac: aramidenyo daytoy, a masansan nga uminomcayo, a maipaay a panglaglagip caniac. 26 Ta no masansan a canenyo daytoy a tinapay, ken uminomcayo iti copa, iwarragawagyo ti ipapatay ti Apo agingga iti iyaayna. 27 Gapuna siasinoman a manganto iti tinapay, wenno uminomto iti copa ti Apo, a saan nga maicari, macabasolto iti maipapan iti bagi ken dara ti Apo. 28 Ngem tunggal maysa ket sukimatenna ti bagina, iti casta sa mangan iti tinapay, ken uminom ti copa. 29 Ta ti mangan ken uminom a saan nga maicari, canenna ken inumenna ti pannacaocomna met laeng, no dina mailasin ti bagi ti Apo. 30 Gapu itoy adu iti nacapuy ken masacsakit cadacayo, ken adu dagiti naturog. 31 Ngem no sukimatentayo coma dagiti bagbagitayo, saantayo coma a maocom. 32 Ngem no maocomtayo, dusaennatayo ti Apo, tapno saantayo nga madusa a mairaman iti lubong. 33 Gapuna, cacabsatco, no aggu-urnongcayo a mangan, aggi-innuray ti maysa ken maysa. 34 No siasinoman a tao ti mabisin, mangan coma idiay balayna; tapno dicayo aggigimong nga maipaay iti pacaocoman. Ket dagiti dadduma nga banbanag urnosecto intono umayac. CAPITULO 12 1 Ket no maipapan cadagiti naespirituan a sagsagut, cacabsat, diac cayat a diyo maammoan. 2 Ammoyo nga idi Gentilcayo, naipancayo cadagitoy a nengneng nga ladladawan, cas iti pannacaidalanyo. 3 Gapuna ipacaammoc cadacayo, nga awan ti tao nga agsao babaen ti Espiritu ti Dios ket awaganna ni Jesus ti nailunod: ket awan ti macabalin nga agsao a ni Jesus isu ti Apo, no di babaen ti Espiritu Santo. 4 Ngem adda pagdudumaan dagiti sagsagut, ngem maymaysa nga Espiritu. 5 Ket adda agduduma a panagaywan, ngem maymaysa ti Apo. 6 Ket adda agduduma a panagaramid, ngem isu met laeng a Dios ti agaramid amin cadagiti isuamin. 7 Ngem ti pannacaiparangarang ti Espiritu ket maited iti tunggal maysa a maipaay a paglaingan. 8 Ta iti maysa naited gapu ti Espiritu iti sao ti kinasirib; ket iti sabali ti sao ti pannacaammo gapu iti isu met laeng nga Espiritu; 9 Iti sabali maited ti pammati gapu iti isu met laeng nga Espiritu, iti sabali dagiti sagsagut iti panangagas gapu ti isu met laeng nga Espiritu; 10 Iti sabali maited dagiti pannacabalin nga agaramid cadagiti datdatlag; iti sabali ti panangipadto; iti sabali ti panagilasin cadagiti espiritu; iti sabali nadumaduma a kita dagiti pagsasao; iti sabali ti panagipatarus cadagiti pagsasao: 11 Ngem isuamin dagitoy a banbanag gappuanan ida daydiay maymaysa ket isu met laeng nga Espiritu, nga agibunong iti bingay ti tunggal maysa a cas iti cayatna. 12 Ta cas iti bagi maymaysa, ngem adu dagiti camcamengna, ket isuamin dagiti camcameng dayta a bagi, idinto nga aduda, maymaysada a bagi: casta met ni Cristo. 13 Ta gapu iti maymaysa nga Espiritu datayo amin nabautizarantayo iti maymaysa a bagi, uray Judio wenno Gentiltayo, uray adipen wenno agwayawaya; ket datayo amin napainumtayo iti maymaysa nga Espiritu. 14 Ta ti bagi saan nga maymaysa a cameng, no di ket adu. 15 No cunanto ti saca, Gapu ta saannac nga ima, saannac a canayon ti bagi; saan ngarud daytoy a canayonen ti bagi? 16 Ket no cunaento ti lapayag, Gapu ta saannac a mata, saannac a canayon ti bagi; saan ngarud daytoy a canayonen ti bagi? 17 No ti amin a bagi ket mata coma, sadino coma ti ayan ti pagdengngeg? No amin a bagi ket lapayag coma, sadino coma ti ayan iti pagangot? 18 Ngem ita ti Dios insaadna ti tunggal maysa a camcameng iti bagi, a cas iti kinayatna. 19 No ngarud no isuda ket maymaysa coma a cameng, sadino coma ti ayan iti bagi? 20 Ngem ita dagiti camcameng ket aduda, ngem maymaysa ti bagi. 21 Ket saan a mabalin ti mata a saoenna iti ima, awan pacasapulac kenca: saan met a cunaen ti ulo cadagiti saca, awan pacasapulac kenca. 22 Saan, nangnangrona ketdi dagidiay camcameng ti bagi, a pagarupen nga nacapuy unay, a casapulanda: 23 Ket dagidiay camcameng ti bagi, a pagarupentayo nga nacurang iti dayawda, cadagitoy ket ad-addada nga idaydayawtayo unay; ket dagiti camcamengtayo a nalaad ad-adda ti pannacatarimaanda. 24 Idinto a dagiti camcameng a nalibnos awan ti pacasapulanda: ngem ti Dios inurnosna ti bagi, nga iniccanna iti dacdackel a dayaw daydiay camcameng nga agcurang: 25 Tapno awan coma iti panagsisina iti bagi; no di ket dagiti camcameng agsisinnakitda coma iti maysa ken maysa. 26 Ket no agsagaba ti maysa a cameng, amin a camcameng agsagabada coma a mairaman kencuana; ket no ti maysa a cameng mapadayawan, dagiti isuamin a camcameng makipagragsacda coma kencuana. 27 Dacayo ngarud itan iti bagi ni Cristo, ket tunggal maysa cadacayo iti camcamengna. 28 Ket ti Dios insaadna dagiti dadduma iti iglesia, umuna dagiti apostol, maicaddua dagiti mammadto, maicatlo dagiti mannursuro, sumaganad datdatlag, sumaganad dagiti talunggading ti panangagas, ti itutulong, ti panangituray, nadumaduma nga pagsasao. 29 Apostolda amin? Mangascasabada amin? mannursuroda amin? agaramidda ti datdatlag amin? 30 Addaanda cadi amin ti taltalungdading ti panangagas? agsaoda cadi amin iti nadumaduma a pagsasao? agipatarusda cadi amin? 31 Ngem tarigagayanyo a sirarayray dagiti casayaatan nga sagsagut: ket ipakitac cadacayo iti maysa pay a nasaysayaat unay a dalan. CAPITULO 13 1 No agsaoac coma agraman amin cadagiti dildila dagiti tattao ken dagiti angel, ngem awan ti ayatco, nagbalinac a cas bronce nga aguni, wenno piang-piang nga umaweng. 2 Ket no cupicupac coma ti talunggading ti mammadto, ket ammoc coma dagiti isuamin a palimed, ken ti amin a sirib; ket no cupicupac coma ti isuamin a pammati, a mabalinco coma a garawen dagiti banbantay, ngem awan ti ayatco, awan pulos ti pategco. 3 Ket no iwarasco coma dagiti isuamin a cucuac tapno maipacan cadagiti napanglaw, ket no iyawatco coma daytoy bagic tapno mapuoran, ngem awan iti ayatco, awan ti magunggonac. 4 Ti ayat managitured, ken nalaing; ti ayat awan apalna; ti ayat saan a napasindayag, saan a natangsit, 5 Saan a naalas ti ugalina, saan nga aginbubucodan, saan nga aglucsaw, saan nga agpanunot ti dakes; 6 Saanna a pagragsacan ti kinakillo, ngem makipagrag-o iti kinapudno; 7 Isuamin sagabaenna, isuamin patienna, isuamin inanamaenna, isuamin ibturanna. 8 Ti ayat saan a maibus uray caano: ngem uray pay adda dagiti padpadto, matungpaldanto; uray pay adda dagiti nadumaduma a pagsasao, agsardengdanto; ken uray pay adda dagiti kinasirib, mapucawto. 9 Ta ammotayo ti dadduma a paset, ket ipadtoantayo ti dadduma a paset. 10 Ngem inton umay daydiay kinaan-anay, iti casta daydiayto kinacurang ket mapucaw. 11 Idi ubingac, nagsasaoac a casla ubing, macaawatac a casla ubing, nagpanunotac a casla ubing: ngem idi nacagtengacon a nataengan nga tao, binaybay-ac dagiti inu-ubingan nga banbanag. 12 Ta ita cumitatayo babaen ti maysa a sarming, a sicucudrep; ngem madamdama ket rupanrupanton: ita ammoc ti dadduma a paset; ngem madamdama naan-anaytayton iti pannacaammoc a cas met ti pannacaammona caniac. 13 Ket ita mataginayon ti pammati, ti inanama, ti ayat, dagitoy a tallo; ket ti cadackelan cadacuada isu ti ayat. CAPITULO 14 1 Surutenyo ti ayat, ken tarigagayanyo dagiti naespirituan a sagsagut, ngem ketdi nangnangrona coma iti panagipadtoyo. 2 Ta ti agsao iti sabali a pagsasao saanna a casao dagiti tattao, no di ti Dios; ta awan ti macaawat kencuana; ngem no babaen iti Espiritu agsao cadagiti palpalimed. 3 Ngem ti agipadto agsao cadagiti tattao a maipaay a mamatibker, ken mamagbaga, ken mangliwliwa. 4 Ti agsao iti sabali a pagsasao ket patibkerenna ti bagina; ngem ti agipadto ket patibkerenna ti iglesia. 5 Siac cayatco coma a dacayo amin agsaocayo cadagiti nadumaduma a pagsasao, ngem nangnangrona pay agipadtocayo coma: ta dacdackel daydiay agipadto ngem iti daydiay agsao cadagiti nadumaduma a pagsasao, malacsid no agipatarus, tapno ti iglesia mapabileg coma. 6 Ita ngarud, cacabsat, no umayacto cadacayo nga agsao cadagiti nadumaduma a pagsasao, ania ti magungunayonto caniac, malacsid no agsaoc cadacayo babaen ti panangipacaammo, wenno sirib, wenno padto, wenno babaen ti sursuro? 7 Ket uray dagiti banbanag nga awan biagda ket mangted da ti uni, flauta man wenno arpa, no dida pagdudumaen dagiti aw-awengda, casanonto ti pannacaammo ti tocaren iti flauta wenno iti arpa? 8 Ta no ti trompeta mangtedto ti maysa nga uni a pagduaduaan, siasinonto ti mangisagana iti bagina a makigubat? 9 Casta met cadacayo, no dicayto agsao cadagiti sasao a nalaca nga awaten, casanonto ti pannacaawat iti sinaoyo? ta makisasaocayo ngarud iti angin. 10 Caspagarigan, adda nalabit, adu a kita dagiti sasao ditoy lubong, ket awan uray maymaysa ti awan caipapa-ayanna. 11 No ngarud diac maawatan ti cababagas ti sao, siac ket gangannaetacto iti sao, ket ti agsao gangannaetto met caniac. 12 Iti casta ngarud, dacayo met yantangay naregtacayo cadagiti naespirituan a sagsagut, agawaanyo ti rumang-ay a maipaay iti pannacapatibker ti iglesia. 13 Gapuna ti agsao iti sabali a pagsasao ket agcararag tapno mabalinna coma ti agipatarus. 14 Ta no agcararagac babaen iti sabali a pagsasao, ti espirituc agcarcararag, ngem ti pannacaawatco ket awan bungana. 15 Ania ngarud? Agcararagacto babaen ti espiritu, ken agcararagacto met babaen ti pannacaawat: agcantaacto iti espiritu, ket agcantaacto met iti pannacaawat. 16 Ta no mangbendicionca babaen iti espiritu, casanonto ti panagcuna ti saan a nasursuroan Amen iti panungpalan ti panagyamanmo, ta dina met maawatan iti sasaoem? 17 Ta sica kinapudnoanna ket nasayaat ti panagyamanmo, ngem ti sabali ket saan nga napatibker. 18 Agyamanac iti Dios, ta agsaoac cadagiti nadumaduma a pagsasao nga ad-adda ngem cadacayo amin: 19 Ngem iti iglesia caycayatco ti agsao iti limlima a sao babaen ti pannacaawatco, tapno maisuroc met dagiti sabali, ngem iti sangapulo ribo nga sasao iti sabali a pagsasao. 20 Cacabsat, saancayo nga agub-ubingan iti pannacaawat: ngem iti kinadakes cascayla coma ub-ubbing, ngem iti pannacaawat cascayla coma tao a nataenganen. 21 Iti linteg adda a naisurat, Babaen cadagiti tattao a gangannaet ken sabsabali nga bibbibig ket makisaoacto iti daytoy nga ili; uray pay no amin a casta ket didacto latta a denggen, cuna ti Apo. 22 Iti casta dagiti nadumaduma a pagsasao ket maipaayda a pagilasinan, saan a cadagiti mamati, no di ket cadagiti saan a mamati: ngem ti pammadto maipaay a pagilasinan saan a cadagiti di mamati, no di ket cadagiti mamati. 23 No ngarud ti isuamin nga iglesia addanto a maurnong iti maysa a disso, ket isuda amin agsaodanto cadagiti nadumaduma a pagsasao, ket sumrecto dagiti saan a nasursuroan, wenno dagiti saan a mamati, didanto cuna nga mauyongcayo? 24 Ngem no isuda amin agipadtoda, ket sumrec ti maysa a di mamati, wenno saan a nasursuroan, isu mabagbagaan cadacuada, isu maipatonto cadacuada: 25 Ket dagiti palpalimed ti pusona maiparangarangda; ket iti casta agrucbabto ket daydayawennanto ti Dios, nga ipalawagna a ti Dios pudno nga adda iti nagtengngaanyo. 26 Ania ngarud, cacabsat? inton aggu-urnongcayo, tunggal maysa adda salmosna, adda sursurona, adda naiduma a pagsasaona, adda ipaca-ammona, adda panagipatarusna. Maaramid coma dagiti isuamin a banbanag tapno agtungpal iti pannacapatibker. 27 No adda agsao iti sabali a pagsasao, dua laeng coma, wenno tallo nga awanen surocna, ken agsisinnublatda; ket maysa laeng iti agipatarus. 28 Ngem no awanto ti mangipatarus, agulimec coma idiay iglesia; ket agsao nga is-isu, isu ken iti Dios. 29 Cadagiti mammadto dua wenno tallo laeng ti agsao, ket diay sabali agipato coma. 30 Ngem no adda paltiing iti maysa cadagiti adda nga situtugaw, ti immun-una agulimec coma. 31 Ta mabalinyo amin ti agipadto a masagsaganad, tapno isuamin masursuroan, ken isuamin maliwliwa. 32 Ket dagiti espiritu dagiti mammadto paiturayanda cadagiti mammadto. 33 Ta ti Dios saan nga isu ti pangruggian ti saan nga naurnos, no di ti talna, cas maar-aramid cadagiti isuamin nga iglesia dagiti sasanto. 34 Dagiti babbai agulimecda coma cadagiti iglesia: ta saan a maipalubos cadacuada ti agsao; ngem addada babaen ti bilin a paiturayanda coma, cas cuna met ti linteg. 35 Ket no adda cayatda a sursuroen, intuudenda cadagiti assawada met laeng idiay balayda: ta nacababain ti maysa a babbai nga agsao iti iglesia. 36 Ania? Nagtaud aya cadacayo ti sao ti Dios? wenno cadacayo laeng ti immayanna? 37 No ti maysa panunotenna nga isu ket mammadto, wenno naespirituan, ammoenna coma a dagitoy nga banbanag nga isuratco cadacayo ket bilbilin ida ti Apo. 38 Ngem no ti siasinoman a tao ket nanengneng, bay-am latta a nanengneng. 39 Gapuna, cacabsat, tarigagayanyo iti panangipadto, ket dicayo iparit ti agsao cadagiti nadumaduma a pagsasao. 40 Maaramid coma dagiti isuamin a banbanag babaen iti kinatacneng ken kinaurnos. CAPITULO 15 1 Nangnangrona pay, cacabsat, ipalawagco ti evangelio nga incascasabac cadacayo, isu met nga inawatyo, isu met nga ayanyo a sititibker; 2 Nga isu ti nacaisalacananyo, no icutanyo nga naimpapusoan ti incascasabac cadacayo, malacsid no namaticayo a barengbareng. 3 Ta immuna inyawatco cadacayo ti inawatco met, no casano a ni Cristo natay gapu cadagiti basbasoltayo a cas mayalubog cadagiti sursurat; 4 Ket naitanem, ken nagungar iti maicatlo nga aldaw a cas maiyalubog cadagiti sursurat: 5 Ket nagparang ken Cefas, calpasanna cadagiti sangapulo ket dua: 6 Calpasanna, nagparang cadagiti nasuroc a lima gasut nga cacabsat iti naminpinsan; ket dagiti caadduan cadacuada addada pay la agingana ita, ngem dagiti dadduma ket naturogdan. 7 Calpasanna, nagparang ken Santiago; calpasanna cadagiti isuamin nga apostoles. 8 Ket camaudiananna amin nagparang met caniac, a cas maysa a nayanac iti saan a maiparbeng a panawen. 9 Ta siac ti cababassitan cadagiti apostol, ket saannac a maicari a managan apostol, gapu ta indadanesco ti iglesia ti Dios. 10 Ngem gapu iti parabur ti Dios addaac iti casasaadco: ket ti paraburna caniac saan a nagbalin nga awan capapay-anna; no di ket nagbannogac iti ad-adu pay ngem cadacuada amin: ngem saan a siac, no di ket ti parabur ti Dios nga adda caniac. 11 Gapuna uray siac ngarud wenno uray isuda, castoy ti panangascasabami, ket castoy ti pinatiyo. 12 Ngem no maicascasaba ni Cristo a napagungar cadagiti natay, casano ti panagcuna dagiti dadduma cadacayo nga awan iti panagungar dagiti natay? 13 No ngarud no awan ti panagungar dagiti natay, saan met a napagungar ni Cristo: 14 Ket no ni Cristo saan a napagungar, ngarud ti incascasabami ket awan capapay-anna, ket ti pammatiyo awan met iti capapay-anna. 15 Wen, ket rumsuacami a naulbod nga sacsi ti Dios; agsipud ta sinacsianmi ti maipapan iti Dios a pinagungarna ni Cristo: isu a saanna a pinagungar, no casta a dagiti natay saanda nga agungar. 16 Ta no dagiti natay ket saanda nga agungar, saan met a napagungar ni Cristo: 17 Ket no ni Cristo saan a napagungar, ti pammatiyo awan iti capapay-anna; addacayo pay laeng ngarud cadagiti basbasolyo. 18 Casta met ngarud a dagiti naturog ken Cristo ket napucawda. 19 No iti agdama a biag laeng isu ti caadda ti pananginanamatayo ken Cristo, datayo dagiti nacacaasi unay cadagiti tattao. 20 Ngem ita ni Cristo ket napagungar cadagiti natay, ken isu ti umuna a bunga cadagiti matmaturog. 21 Ta iyantangay gapu iti tao immay ni patay, gapu iti tao umay met ti panagungar dagiti natay. 22 Ta cas ken Adam matayda amin, casta met ken Cristo mabiagdanto amin. 23 Ngem tunggal maysa iti batangna: ni Cristo ti umuna a bunga; sumaruno dagiti tao ni Cristo iti iyaayna. 24 Calpasanna umay ti panungpalan, intono iyawatna ti pagarian iti Dios, ken Ama; intono maiccatna aminen a panagturay ken amin a panguloen ken pannacabalin. 25 Ta isu masapul nga agari, agingga iti panangicabilna cadagiti amin a cabusorna iti babaen dagiti sacsacana. 26 Ti maudi a cabusor a mapucawto ket isu ni patay. 27 Ta incabilna dagiti amin a banbanag iti babaen dagiti sacsacana. Ngem idi kunana nga dagiti isuamin a banbanag addada a paiturayan kencuana, nalawag a saan a mairaman, daydiay mangicabil cadagiti isuamin a banbanag iti babaen ti pannacabalinna. 28 Ket intono dagiti isuamin a banbanag paiturayandan kencuana, no casta uray ti Anac met laeng paiturayanton iti daydiay nangicabil iti babaen ti panagturayna cadagiti isuamin a banbanag, tapno ti Dios isu coma amin cadagiti isuamin. 29 No saan coma a casta ania ti aramidento dagiti nabautizaran a maipaay cadagiti natay, no dagiti natay saanda nga agungar uray caanoman? apayapay ngarud nga nabautizaranda a maipaay cadagiti natay? 30 Apayapay nga agpeggadtayo met iti inoran-oras? 31 Panecnecac gapu iti rag-oyo a cupcupicupac ken Cristo Jesus nga Apotayo, matayac nga inaldaw aldaw. 32 No siac cas ugali ti tao nakicabilac cadagiti narungsot nga animal idiay Efeso, ania ti magunggonac, no dagiti natay saanda nga agungar? mangantayo ken uminomtayo; iyantangay intono bigat mataytayto. 33 Saancayo a maallilaw: dagiti dakes a pannakicuyog dadaelenda dagiti nasayaat a cababalin. 34 Agriingcayo a maipaay iti kinalinteg, ket saancayo nga agbasol; ta dagiti dadduma saanda nga ammo ti Dios: kunak daytoy tapno pagbainanyo. 35 Ngem addanto tao nga agcuna, Casano ti panagungar dagiti natay? ket anianto a kita ti bagida? 36 Nacuneng, ti imulam met laeng saan nga agbiag, no di umuna a matay: 37 Ket no imulam, saanmo nga imula ti bagi nga tumaudto, no di ti bukel a lamolamo, uray ngata no trigo, wenno maysa cadagiti sabali a bukel: 38 Ngem ti Dios iccanna ti bagi a cas iti pagayatanna, ket iti tunggal bukel iccanna ti bucodna a bagi. 39 Saan nga isuamin a lasag padapadada: no di ket adda maysa a lasag dagiti tao, ken sabali a lasag dagiti animal, ken sabali a lasag dagiti ic-ican, ken sabali dagiti tumatayab. 40 Adda met nailangitan a bagbagi, ken naidagaan a bagbagi: ngem maysa ti dayag dagiti nailangitan, ket sabali ti dayag dagiti naidagaan. 41 Maysa ti dayag ti init, ket sabali ti dayag ti bulan, ket sabali ti dayag dagiti bitbituen: ta ti maysa a bituen maisupadi ti dayagna iti sabali a bituen. 42 Casta met ti panagungar dagiti natay. Maimula nga agrupsa; mapagungarto a di agrupsa: 43 Maimula iti pannacaibabain; mapagungarto iti pannacaidayaw: maimula iti kinacapuy; mapagungarto iti pannacabalin: 44 Maimula a bagi a nalasagan; mapagungarto a bagi a naespirituan. No adda bagi a nalasagan, adda met bagi a naespirituan . 45 Casta met nga adda a naisurat, Ti umuna a tao ni Adam ket immay nagbalin a cararrua a sibibiag; ngem ti maudi nga Adam ket nagbalin a maysa nga espiritu a macabiag. 46 Ngem saan nga immuna iti naespirituan, no di ket iti sigud nga nacaparsuaan; ket calpasanna iti naespirituan. 47 Ti immuna a tao ket nabukel iti daga, naidagaan: ti maicaddua a tao ket isu ti Apo a naggapu idiay langit. 48 No casano idi daydi naidagaan, castada met dagiti naidagaan: ket no casano daydi nailangitan, castada met dagiti nailangitan. 49 Ket no casano ti pannacaalatayo ti ladawan daydi naidagaan, maalatayto met ti ladawan daydiay nailangitan. 50 Kunak ngarud daytoy, cacabsat, a ti lasag ken dara saanda a mabalin a tawiden ti pagarian ti Dios; ket uray pay ti panagrupsa dina tawiden ti saan nga agrupsa. 51 Adtoy, ipakitac cadacayo ti maysa a palimed; Saantayto a maturog amin, ngem mabaliwantayto amin, 52 Iti apagdaricmat, iti kirem ti mata, iti camaudianan a trumpeta: ta ti trumpeta aguninto, ket dagiti natay agungardanto a di agrupsa, ket mabaliwantayto. 53 Ta masapul a daytoy bagi nga agrupsa agcawes iti saan a panagrupsa, ket daytoy bagi a matay agcawes iti saan nga ipapatay. 54 Ket intono daytoy bagi nga agrupsa agcawesto iti saan a panagrupsa, ket daytoy bagi a matay agcawesto iti saan nga ipapatay, iti casta matungpalto ti sao nga adda a naisurat, Ti patay inabac ti balligi. 55 O patay, adino ti panniludmo? O tanem, sadino ti ayan iti panagballigim? 56 Ti pannilud ni patay ket isu ti basol; ket ti pigsa ti basol ket isu ti linteg. 57 Ngem yaman pay iti Dios, a mangted cadatayo ti balligi gapu ken Apotayo a Jesus Cristo. 58 Gapuna, ay-ayatec a cacabsat, agtaengcayo a sititibker, saan a magaraw, a cancanayon nga addua-ancayo laeng iti aramid ti Apo, nga ammoyo a ti aramidyo addanto capapay-anna iti Apo. CAPITULO 16 1 Ita no maipapan iti maurnong a maipaay cadagiti sasanto, cas imbilinco cadagiti iglesia ti Galacia, aramidenyo met ti casta. 2 Tunggal umuna nga aldaw ti lawas sagtunggal maysa cadacayo ket mangilasin ti idulinna, cas panangparang-ay ti Dios kencuana, tapno intono umayac ket saanto nga masapul ti agurnongen. 3 Ket intono dumtengac, ibaonconto dagidiay anamunganyonto babaen cadagiti surat, tapno ipanda ti kinamanagparaburyo idiay Jerusalem. 4 Ket no maicarinto a mapanac met, makicuyogdanto caniac. 5 Ngem umayacto cadacayo, inton masarungcarac ti Macedonia: ta labasac a pagnaan ti Macedonia. 6 Ket nalabit makipaggianacto cadacayo, wen, ken aggianac pay iti calam-ecna, tapno dacayo idalandac iti uray sadino a masapul a papanac. 7 Ta saancayo a makita itan iti dalan; ngem inanamaec ti agtaeng iti sumagmamano nga aldaw cadacayo, no ipalubos ti Apo. 8 Ngem agsardengacto idiay Efeso agingga iti Pentecostes. 9 Ta maysa a ruangan nga dackel ken pagsayaatan iti naluctan caniac, ket adu dagiti cabusor. 10 Ket ita no ni Timoteo umayto, kitaenyo tapno aggian cadacayo nga awan iti pagbutnganna: ta isu ket aramidenna ti aramid ti Apo, a cas caniac. 11 Awan ngarud ti tao a mangumsi kencuana: ngem isu cadduaanyo a sitatalna, tapno umayto caniac: ta isu ket ur-urayec agraman dagiti cacabsat. 12 Ngem no maipapan ken cabsat nga Apolos, nagdawatac unay kencuana tapno umay idi cadacayo a makicuyog cadagiti cacabsat: ket dina pay laeng cayat ti umay ita; ngem umayto intono adda pannacaipaayna. 13 Agsalucagcayo, agtalinaedcayo a sititibker iti pammati, agbiagcayo a si-iingel, napigsacayo coma. 14 Maaramid coma dagiti isuamin nga aramidyo a buyugen ti ayat. 15 Dawatec cadacayo, cacabsat, (ammoyo a dagiti cabbalay ni Estefanas, isuda ti immun-una a bungbunga ti Acaya, ket indatonda dagiti bagbagida iti panagservi cadagiti sasanto,) 16 A paiturayancayo cadacuada, ken iti tunggal maysa a tumulong cadatayo, ken agbannog. 17 Ket agragsacac gapu iti iyaay ni Estefanas ken ni Fortunato ken ni Acaico: ta iti nagcuranganyo ket pinunnoanda. 18 Ta pinabang-aranda ti espirituc ken ti espirituyo: bigbigenyo ngarud dagiti cacasta. 19 Dagiti iglesia ti Asia cablaawandacayo. Da Aquila ken Priscilla cablaawandacayo unay iti Apo, agraman ti iglesia nga adda iti balayda. 20 Isuamin dagiti cacabsat cablaawandacayo. Agkikinnablaawcayo iti maysa ken maysa a buyugan iti nasantoan nga agep. 21 Ti cablaawco ni Pablo insurat met laeng toy imac. 22 No adda tao nga di agayat ken Apo Jesus Cristo, Mailunod Coma Agingga Ti Iyaayna. 23 Ti parabur ni Apo Jesus Cristo agtaeng coma cadacayo. 24 Ti ayatco agtaeng coma cadacayo amin ken Cristo Jesus. Amen. Ti umuna a libro nga agpaay cadagiti taga Corintos ket naisurat idiay Filipos babaen ken Stephanas, ken Foetunatus, ken Achaicus, ken Timoteo.