1 Kei Paula, Isu Krista siehlaw, tirko ni dinga ko, Pathien Chanchin Tha hriltu dinga ser hran bîk chun: 2 Chu Chanchin Tha chu, kha hmaa inthok khan Pathienin zawlneihai hmangin a Lekha Thienghlimah a lo tiem tah a; 3 a Naupa, ei Lalpa Isu Krista chu, taksa tiengah Davida thlaa inthoka pieng, 4 thienghlimna thlarau tienga ruok chu thìnaa inthoka thilthawtheinaa keithoa Pathien Naupa a nizie puonga um chu a nih; 5 ama zâr le a hming leiin hnam tina mihai chu ringa inawitir dingin Pathien lunginsietna le tirko nìna kan chang a, 6 nangni khom chuong anga a mihai ni dinga Isu Krista kohai chu in nih. 7 Pathienin a hmangai le ama mi thienghlim ni dinga a ko, Rom khuoa mihai chibai ka bûk cheu. Pathien ei Pa le Lal Krista Isu kuoma inthoka lunginsietna le inremna chu in kuomah um raw se. 8 A hmasatakin, in ringzie thu khawvel po poah hril dara a um leiin in rênga ta dingin Isu Krista hmingin ka Pathien kuomah lawmthu ka hril hmasa phot a nih. 9 Ka tongtainaah ka hriet zing hlak cheu ti chu theitawpa a Naupa Chanchin Tha rong ka bawl, ka Pathien chu mi hrepuitu a nih. 10 Pathienin rem a ti chun tuta tum bèk hin chu ka hung kan theina ding chêuin Ama ka hni zing a. 11 In hràt zuol theina dinga Thlarau tieng thilpêk iemani bèk hung hawnpêk chèu ka'n hawk hlè a nih, 12 ringna tienga kei le nangni inchawm tuoa ei insukhrât tuo theina dingin. 13 Unauhai, Jentêl danghai laia rà ka sîk hlak ang boka nangni lai khom ra sîk ding ka hmu ve beiseiin voi tam tak in kuomah hung ka tum taa chu remchang nawnain tu chen hin a mi la dang zing leiin ka la hung thei hrì naw a nih ti in hriet ka nuom. 14 Grik mihai, awze mihaia le mi var le mi mawlhai laka khom bat ka nei a; 15 chu lei tak chun a nih nangni Rom mihai kuoma khom Chanchin Tha hril ka'n hawk èm êm chu nih. 16 ChanchinTha chu ka'n zàpui si nawh, a ringtu taphothai sandamna dinga Pathien thilthawtheina a ni si a. A hmasain Judahai ta ding a ni phot a, a dotah Jentêlhai ta ding a hung ni nawk a. 17 Chu taka chun Pathien felna chu ringnaa inthoka ringnaah suklangin a um pei a, "Ringna leia mi fel chu hring a tih" ti ziek ang khan. b 18 Pathien ngaisaknawtuhai le mi rilohai, rîtlona leia thutak dodâltuhai chunga chun Pathien lungsenna chu vàna inthokin a hung inlang a. 19 Pathien chanchin an hriet theina dingin Pathien ngei chun tlang takin an kuomah a'n langtir a. 20 A nìna, mita hmu thei lo, a chatuon thilthawtheina le a Pathienzie chu leilung siem tîra inthokin a thilsiemah chieng taka hmu le hriet theiin a'n langtir leiin mi tu khomin suonlam ding hrim an nei nawh. 21 Pathien chu an hriet a, Pathien ang ruok chun an chawimawi naw a, lawmthu khom an hril bok nawh; teplo mei mei an ngaituo lem leiin an lungril mumal naw tak chu a hung inthim zo tah a nih. 22 Vara inngai si, mi invêt an hung ni zo tah. 23 Thi thei lo Pathien ropui chu thi thei mihriem dâm, vate dàm, sapheimanlic dâm le bokvâka lawn thilhring dàm lim ang chauin an inchangtir si. 24 Chuleiin an lungril chàk zawng thil porchè thaw ding le an taksa chu muolpho taka chêt phalin Pathienin a nghatsan tah a nih. 25 Pathien thu nêkin khêl an thlang lem a, Siemtu chawibiek nêkin a thilsiemhai chu bein an rong an bawl ta lem si a. Siemtu chu chatuona inpâk tlâk a nih. Amen 26 Chuong lei chun an tìsa chàk zawng tirdakum tak chu thaw dingin Pathienin a nghatsan tah a nih. An nuhmeihai chen khom nuhmei le pasal indit dàn phung pangngai khêlah nun letling an hraw a. 27 Chuong ang bokin, pasalhai khom an nuhmeihai le khawsak dàn pangngai bànsanin, anni le anni inchâkin an inhnar tuo a, pasal le pasal khom mawi naw takin an khawsa a, an suol rà chu an taksa ngei chun a tuor tah a nih. 28 Chu bakah, Pathien tieng hrietna indik chu an thlàthlam tâk leiin ngaituona hmang tlàk lo put ding le mawi naw taka khawsa dingin Pathien chun a pêk suok tah a nih. 29 Chuongchun, rîtlona tinrêng thawin, suolna dâm, inhnarna dàm, intheidana dâm, thîkna dàm, tuolthatna dâm, inerna dàm, inhlêmna dâm le inhrilsietna dàmin an hung sip a. 30 An indem a, Pathien an theida ad, an intivei a, an chapo a, an uongthuong a, thil suol thar chìng suok an insukhmu a, nu le pa poisak lo an chìng a, 31 an intlaw a, an depde a, lunginsietna an piengpui naw a, an tawrot bok a nih. 32 Chuong ang thaw chîng mihai chu Pathien ruot anga thi tlâk an nih ti hre zing siin anni thaw khom dittawk loin mi dang a thawtuhai chu an la ngaisàng letling nawk nghal a!
1 Chuleiin aw mihriem, tu khom soisèl thei bik ding i ni nawh, mi dang i soisèlna ngèi chun nang khom thiemnaw inchangtir a ti chê, chuong ang thil chu a soisèltu ngèiin i thaw ve hlak si a. 2 Chuong ang thil thaw hlaktuhai chu Pathienin thiem naw a'n changtir chun a thaw indik a nih ti ei hriet. 3 Aw mihriem, chuong ang thil thaw hlaktuhai soisèltu, nangin chuong ang thil chu i thaw ve hlak si leiin Pathien rorêlna chu pumpel în ring bik am a nih? 4 Annawleh, i simna dingin Pathienin thatnan a thuoi hlak chê ti hre fu loin, thatnaa a hauzie dâm le a entheizie le dawtheizie dàm chu ngâiah i lo nei el am an ta? 5 I lulul le lungril ngar leiin lungsenna ni le Pathien rorêlna nia dingin i chungah hremna i khawl khawm chauh lem a nih. 6 Pathien chun mi tin an thilthaw ang peiin a rêlpêk ding a ni si a. 7 Bohmang thei lo ropuina le chawimawina zonga thil tha thaw fan fanhai chu chatuon hringna pêng a tih. 8 Amiruokchu, mani hma chauh siel mi, thutak hnawltu, thil indik naw zawm lemtuhai chunga chun Pathienin a lungsenna le theidàna chu la bun thlàng a tih. 9 Thilsuol thaw taphothai chungah rinumna le lungngaina tlung a ta, a hmasa'n Juda mihai chungah, chu zoah Jentêlhai chungah tlung a tih; 10 sienkhom thil tha thawtuhai ruok chu ropuina dàm, chawimawina dâm le lungmuongna dàm pèk nîng an tih, a hmasa'n Judahai kuomah, chu zoah Jentêlhai kuomah. 11 Pathienin mi ditsak bîk a nei si nawh. 12 Dàn boa suol thawtuhai chu Dàn boin bohmang an ta; Dàn nei zinga suol thawtuhai ruok chu Dàn hmanga an chungthu rèl nîng a tih. 13 Dàn hretuhai ni loin a zawma zawm lemtuhai chun Pathien hmaah thiem chang an tih. 14 Dàn nei ve lo Jentêlhaiin an piengpui lungvar hmanga dànin a phùt ang an thaw chun, Dàn nei naw hai sienkhom Dàn neiah an insiem a nih. 15 Danin a phùthai chu an lungrilah an ziek ti nungchangah an suklang a, chu chu an sie le tha hrietnain a hrietpui a; lungrila mani inthiem le inthiem nawna an nei dàn angin, 16 Isu Krista hmanga mihriemhai thurùk Pathienin a ngaituo ni chun ka Chanchin Tha hril ang hin rêl a tih. 17 Nisienlakhom, nang chu Juda mi i'n ti a, Dàn i ringsan a, Pathien i uongpui a, 18 a ditzawng khom i hriet a, Dàn i hriet leiin a sie le tha khom i hriet a; 19 mitdelhai keithuoitu, thima umhai êntu, 20 mi invêthai thuoi vartu, naupangtehai zirtirtu tak niin i'n ngai a; Dàn thuah chun hrietna le thutak a'n phûm ti i hriet chieng leiin. 21 Mi danghai zirtirtu inti siin ieng dinga nang le nang i'n chûktir nawm a na? Inru lo dinga mi hriltu, nangin i'n rûk hlak si maw? 22 Uire lo dingin mi i hril a, nang chu i uire hlak si maw? Milem theidatu ni siin milem biekna ina thilhai chu i rok hlak si maw? 23 Dàn uongpuitu, nangin Dàn i bawsiet leiin Pathien i sukhmingsiet hlak an naw maw? 24 "Pathien hming chu nangni leiin Jentêlhai lai sukpawiin a um tah" ti ziek ang khan. 25 Dàn zawm la chu sertan hi a tangkai takzet a nih. Dàn bawsetu i ni ruok chun i sertan chu tan naw ang chie a nih. 26 Chuleiin, sertan lo khomin Dàn thupêkhai a vong tha chun sertan anga ngai a ni naw ding maw? 27 Sertan nawtuin Dàn thu a zawm kim chun nang, dàn bû le sertan dàn nei sia Dàn bawsetu chu thiem naw inchangtir a ti che. 28 A'n lang chaua Juda mi ni chu Juda mi tak tak nìna a ni naw a; taksa chaua sertan chu sertan tak tak nìna a ni chuong bok nawh. 29 Sûngrila Juda mi ruok chu Juda tak tak a nih; sertan tak tak chu lungril tienga tan hi a nih, lekha thu elah ni loin, Thlarau tiengah a ni lem. Chuong ang mi chu mihriemin chawimawi nawhai sien khom Pathienin chawimawi a tih.
1 An leh Juda mi ni chu a tangkai bikna iem a um a? Sertan khom chu a hlutna iem a um a? 2 Kong tinrêngah a hlawk hle. A hlawkna tak chu Pathien thuhai inkoltir an nìna tak hi a nih. 3 An leh, thenkhatin lo ring ta nawhai sienla iem ni tâng a ta? Anni ringnawna chun Pathien ringumna chu ieng khom loin a siem chuong am a nih? 4 Siem lo e! Mi tin khêlhlip vong nihai sien khom Pathien ruok chu indik zing a tih:"Ka chungthu i rèl indik ie, Thiemnaw ka'n changtir naw che"eti ziek ang khan. 5 Sienkhom, ei fel nawna chu Pathien felzie suklang chieng zuoltu a ni si chun ieng am hril tâng ei ta? Mihriem thukhawchâng taka hrilin, Pathienin a lungsenna ei chunga a'n langtir hi a sukdik nawh ei ti ding am a nih? 6 Ti lo e! Chuong chu lo ni ta sien, Pathienin iengtin am khawvel ro rêl thei a ta? 7 Annawleh, ka khêlhrilin Pathien indikzie a suklang zuol a, a sukropui zuol si chun, ieng dinga mi suola ngai ka la ni rop am a na? 8 Mi'n an mi hêk tuma, "Thil tha a hung tlung theina dingin thil suol thawng ei tiu" tia ka hril lo hrim hrim hrila an mi'n tum ang khan ei ti ve el dim a ni? Chuong mihai chun thiem naw chang awm hrim an nih. 9 Annawleh eini Judahai hi ei tha chuong bîk am a ni? Teu lo e! Judahai le Grikhai chu suol bawia um vong ei nih ti tuta hma khom khan ka hril ta cheu kha: 10 Tu khom mi fel tak hrim an um nawh, Pakhat bêk khom an um nawh; 11 Tu khom a hre thiem hrim an um nawh, Tu khom Pathien zong hrim an um nawh, 12 Naw tieng an pèt hmang vong a, An lo khawhlo zo tah a; Tu khom thil tha thaw hrim an um nawh, Pakhat bêk khom an um nawh; f 13 An hnuk chu thlàn inhong a na, An leiin hlêmna thu a hril a, gAn hmûrin rûl tûr a pâi a, h 14 An bâu tongsie le thu khain a sip a. i 15 Thisen insuo di'n an ngal a zâng a, 16 An fèna photah sietna le rinumna a tlung a, 17 Remna lampui an hriet naw a, j 18 An mit mengah Pathien tîna, An nei naw hrim hrim a nih"kti ziek ang khan. 19 Dàn thu chu Dàn hnuoia umhai chunga hmang dinga hril a nih ti ei hriet; tu khomin suonlam an siem thei nawna ding le khawvel pumpui hi Pathien rorêlna hnuoia sie a ni vong theina dingin. 20 Chuleiin, Dàn zawm that leia Pathien hmaa thiem chang phâk tu khom an um nawh; chu nêk hmanin, Dàn chu ei suol thaw mi'n hriettirtu a nih. 21 Tu ruok hin chu Dàn le zawlneihai lo inhriettir tah angin, Dàn hmang ngai loin Pathien felna chu suklangin a um tah a, 22 chu chu Isu Krista ei ringna leia a ringtu taphot kuoma Pathien felna suklanga um chu a nih. Tu ta ding khomin a danglam nawh. 23 Mi po poin thilsuol an thaw a, Pathien ropuina an chang thei ta si nawh. 24 Nisienlakhom, Pathien chun Isu Krista intlanna zàrah a lunginsietna lei chauin mi a thlawnin thiem a'n changtir a, 25 Krista ngei chu a thisen ringtuhai ta dinga suol thupha chawina dingin a hung pèk a. Hi hi Pathienin thiem a mi'n changtir dàn suklangna chu a nih. 26 A dawtheina leiin tuta hmaa an thil suol thawhai chu hriet naw sak sak a thawpèk a. Ama chu mi indik a na, Isu ringtu chu thiem a'n changtir ngeizie sukchieng dingin tu lai huna hin thiem a mi'n changtir dàn chu a hung suklang tah a nih. 27 Chuong an leh ieng am ei uongpui ding a um? Um lo e! Ieng leiin am? Dàn zawm leiin maw? Ni lo e! Ringna leiin a ni lem. 28 Dàn zawm lei chauh ni loin, ringna leiin mi'n thiem a chang ti thu chu ei pom tlat lem a nih. 29 Pathien chu Judahai Pathien chauh a ni? Jentêlhai Pathien khom a ni ve naw'm a nih? 30 Ni ve e! Pathien chu pakhat a na, sertanhai chu an ringna leiin thiem inchangtir a ta, sertan nawhai khom an ringna lei bokin thiem inchangtir a tih. 31 Anleh, ringna a poimaw ti lei ringotin Dàn chu ieng khom ni loah ei siem el ding a ni? Teu lo e! Dàn chu ei suknghet lem hman a nih.
1 Anleh, taksa tienga ei thlatu Abraham thu kha ieng tin am hril tâng ei ta? 2 Abraham kha thilthaw leia thiemchang chu lo ni sien, uongpui ding a nei a nih, Pathien hmaa ruok chu ni loin. 3 Pathien lekhathuin iem a hril a? "Abraham chun Pathien a ring a, chu ringna lei chun thiemchanga ruot a nih" tiin a hril a nih. 4 Miin sin a thaw chun a hlaw chu thilpêka ngai a ni naw a, bat anga ngai a nih 5 Amiruokchu, miin misuolhai thiem inchangtirtu a ring a, a thilthaw lei ni loa thiem inchangtira a um hin a ringna leiin thiem a chang a nih ei ti hlak. 6 Thilthaw lei ni loa, Pathienin thiem a'n changtirhai hamthatzie chu Davida khomin hieng hin a hril kha : 7 "An bawsietnahai ngaidama um a, An suolhai thai boa um chuAn va hang hamtha lawm lawm de! 8 Lalpan suol nei loa a ngaihai chu, An va hang hamtha lawm lawm de!"ltiin. 9 Anleh, chu hamthatna chu sertanhai ta ding chauh a ni, an naw leh sertan nawhai ta ding khom? Abraham ringna chu a felnaa ruot a nih tiin ei hril rop hlak kha. 10 Chu chu ieng ti kongin am ruot a ni thei a? Ser a tan hmain a ni, ser a tan hnungin? A sertan hnung ni loin, a sertan hmain a ni lem. 11 A sertan hmain sertan inchikna a dong a, chu ringna lei chun Pathienin thiem a'n changtir a nih ti namnghetna dingin ser a tan chauh a ni lem. Sertan nawhai khom ringna leia Pathienin thiem a'n changtirhai ta ding chun Abraham chu thlarau tienga pä a nih. 12 Chuong ang bokin, sertanhai pa khom a na, sertan a ni lei el khom ni loin, ama ei pa Abrahamin ser a tan hmaa ringna a nei ang bok kha ringna an nei ve lei a nih. 13 Dàn zawm lei ni loin, ringna leia thiem inchangtir an nina lei lemin, Pathien chun Abraham kuomah ama le a thlahaiin khawvel hi an la rochung ding thu chu a tiem a nih. 14 Dàn zawm hi rohluotu nìna ni sien chu, ringna chu a thlawn el nîng a ta, thutiem khom chu ieng khom ni naw nih. 15 Dàn chun lungsenna a cho suok a; Dàn a um nawnaah chun bawsietna khom a um nawh. 16 Chuleiin, Dàn zawmtuhai ta ding chauh ni lo a, Abraham thla po po, ama ring anga ringtuhai ta dinga Pathien thilthlawnpêk a nizie suklang dingin Abraham kuoma a thutiem kha ringnaah a'n nghat a nih. 17 "Hnam tam tak pa-ah siem ka ti che" ti ziek ang khan, a ring Pathien, mithihai sukhring nawktu le thil um lo khom inumtirtu hmaah chun Abraham chu ei rênga pa a nih. 18 "Khi ang zàt khi i thlahai la nîng an tih" tia hnam tam tak pa ni dinga thutiem chu beisei ding a um naw lai khomin beisei takin a ring tlat a. 19 Kum za ding hiela upa le a taksa en chun mithi ang el a ni tah ti le Sari ngei khom chu a ching a nih tihai ngaituona chun a ringna chu a sukchàu ngai nawh. 20 Ringhlàna chun Pathien thutiem lakah a sukhnìng ngai naw a, chu nêk hmanin a ringnaa chun sukhràta umin, Pathien a chawimawi lem a, 21 a thutiem chu hlen dingin Pathienin thilthawtheina a nei ti a ring tlat a. 22 Chu lei chun, "a ringna chu a felnaa ruot a nih". 23 A ringna chu a felnaa ruot a nih ti chu ama ta ding chaua ziek a ni naw a, 24 mithi laia inthoka ei Lalpa Isu keithotu ringtuhai, ringna leia thiemchang, ei nihai ta ding khoma ziek a nih. 25 Isu chu ei bawsietnahai leiin sukhlumin a um a, thiem ei changna dingin keithoin a um a nih.
1 Chuleiin, ringna leia thiem ei chang tah leiin, ei Lalpa Isu Krista zàrah Pathien leh inremin ei um a nih. 2 Ama zâr bok chun tuta ei ngirna lunginsietna hnuoia hin ringnain ei lùt a, ei la'n tawmpui ding Pathien ropuina chu beiseiin ei lawm bok a nih. 3 Chubâkah, ei rinumnaah khom ei lawm pei a nih: rimsikna chun tuorselna a siem a, 4 tuorselna chun nungchang nghet a siem a, nungchang nghet chun beiseina a siem ti ei hriet si a. 5 Chu beiseina chun lunghnuolin a mi siem ngai nawh, Thlarau Thienghlim a mi pèk hmangin ei lungrilah Pathien chun a hmangaina chu a hung buok ta si a. 6 Thaw thei ieng khom ei nei naw lai khan a hun takah Krista chu misuolhai ta dingin a lo thi tah a nih. 7 Mi fel ta dinga thi nuom an vâng hle el thei a, mi tha ta dinga thi ngam ruok chu mi an lo um khiet el rawi mawh. 8 Pathienin a mi hmangaizie a suklang dàn ruok chu, mi suol ei la ni zing laia ei ta dinga Krista a hung thi el kha a nih! 9 Chuongchun, a thisena thiem inchangtira ei um ta hnung lem hin chu, ama zâr bokin Pathien lungsennaa inthokin sandam ei va hang ni chieng awm ngei de! 10 Hmêlma ei ni lai hmana a Naupa thìna zàra Pathien leh lo inrem tah ei ni chun, inrema ei um ta hnung lem hin chu a hringna zàrin sandam ni nawk zuol ngei ei tih. 11 Chu chauh khom chu ni loin, Pathien le mi'n remtir nawktu ei Lalpa Isu Krista lei chun Pathienah ei lawm bok a nih. 12 Chuleiin, mi pakhat leia khawvelah suol a lût ang khan, suol leiin thìna khom a hung lùt a, chuonga mi po po an lo suol tàk lei chun thìna khom mi po po chungah a tlung a nih. 13 Dàn thu pêk a ni hma khomin khawvelah suol a um tah a; amiruokchu dàn a um si naw chun suol chu suola ngài a ni nawh. 14 Nisienlakhom, Adam huna inthoka Mosie hun chen khan, Adamin a bawsiet anga suol ve lohai chunga khom, thìna chun thu a nei a nih. Adam chu la hung ding hlimthla chu a nih. 15 Pathien thilthlawnpèk le Adam bawsietna ruok chu an inang nawh. Kha mi pakhat bawsietna lei khan mi tam tak an thi a; Pathien lunginsietna le mi pakhat, Isu Krista lunginsietna leia thilthlawnpêk ruok chu mi tam tak chungah a liema vùrin a um ve thung a nih 16 Chu Pathien thilthlawnpèk chu mi pakhat suolna leia thil hung um leh chun an inang bok nawh: thiem naw inchangtirna rorêlna chu mi pakhat bawsietna leiin a hung um a, thiem inchangtirna thilthlawnpêk ruok chu bawsietna tam tak leiin a hung um a nih. 17 Chu mi pakhat bawsietna lei hmana thìnain ro a rèl chun, mi pakhat Isu Krista leia Pathien lunginsietna nasa tak le a thilthlawnpèk thiemchangna dongtuhai chun hringna changin ropui takin ro an va hang rèl nasa nawkzuol awm ngei de! 18 Chuongchun, mi pakhat bawsietna leia mi po poin thiemnaw an chang angin, mi pakhat thil indik thaw leiin mi po po thiemchangin an hring phà tah a nih. 19 Mi pakhat thu awi nawna leia mi tam tak mi suol an hung ni tah ang khan, mi pakhat thu awina leiin mi tam tak mi fel la hung nìng an tih. 20 Bawsietna chu a pung zuolna dingin Dàn a hung pung a. Nisienlakhom suol a pungna taphotah lunginsietna khom a pung zuol sauh hlak, 21 suol leia thinain ro a rêl angin, ei Lalpa Isu Krista zàra chatuon hringna ei nei theina dinga Pathien lunginsietna chun thiem inchangtirna hmanga ro a hung rêl theina dingin.
1 Ieng am hril tâng ei ta? Lunginsietna chu a pung nawk zuolna dingin ei suol zui pei di'm a nih? 2 Teu lo e! Eini suol thìsan tahai chu ieng tin am suolah la'n hnel zing ei ta? 3 Eini Krista Isua baptisma chang tahai po chu a thìnaah baptis-in ei um tah ti in hriet naw am a ni? 4 Chuleiin, Pain mithi laia inthoka ropui taka Krista a keitho anga eini khom hringna thara ei lèng ve theina dingin, a thìnaa baptisma changin, a kuomah phùmin ei um ve tah a nih. 5 A thìnaah eini khom ama leh inzoma ei thi chun ama a tho nawk ang bokin ama leh inzomin eini khom keithoin um vé ngèi ei tih 6 Suol bawia ei um ta nawna dingin suol put taksa hi sukhlum dingin ei mihriem hlui chu a kuomah hemdein a um tah ti ei hriet. 7 Tu khom a thi tah chu suola inthokin a zalèn ta si a. 8 Krista leh ei thi ve tah chun a kuomah chêng vèng ei tih ti ei ring a nih. 9 Krista chu mithi laia inthokin keithoin a um a, a thi nawk ta naw ding a nih ti ei hriet si a; thìna chun a chungah thu a nei ta nawh. 10 A thìna chu voi khat thil thua suol tieng konga thì songna a na, a hringna ruok chu Pathien kuoma hring songna a nih 11 Chuong ang bokin, nangni khom suol tieng pangah thi taah inngai unla, Pathien tieng ruok chu Krista Isu-a chun hringah inngâi ro. 12 Chuleiin, in taksa nuom zawng thil suolhai zawm dingin in taksa thi theia chun suolnain ro rêl ta naw raw se. 13 In taksa pènghai khom suol hmangruo dingin suol kuomah pe phal bok naw ro; chuong nêk hmanin, mithi laia inthoka hung hring nawk angin Pathien kuomah inhlàn lem unla, in taksa pènghai khom felna hmangruo dingin Pathien kuomah pe lem ta ro. 14 Suolin in chungah thu a nei ta naw ding a ni si a; dàn hnuoia um in ni ta naw a, lunginsietna hnuoia um in ni ta lem. 15 Ieng tin am ni tâng a ta? Dàn thu hnuoia um ni loa lunginsietna hnuoia um ei ni lem lei hin ei la suol pei ding am a nih? Teu lo e! 16 Tu kuoma khom an thu awi dinga an bawia in lùt chun an thu in awi bawi chu nîng in tih. Suol bawi a ni chun thìna, thu awina bawi a ni chun thiemchangna a nih ti in hriet nawm a nih? 17 Amiruokchu, suol bawi lo ni tah inla khom, Chanchin Tha zirtirna thu in dong chu lungril takzeta chela in zawm leiin, 18 suol bawia inthoka insuoin in um a, felna bawihai in hung ni tah lem a nih. Chuleiin, Pathien kuomah lawmthu um raw se. 19 In taksa hràt nawzie hrein, mihriem thuphungin ka hril a nih. Kha hma khan chu suol bawi, bawsietna tirdakum le rîtlonaa hluor zuol pei kuomah in taksa pênghai chu in inhlàn hlak a, tu ruok hin chu felna bawi kuomah thienghlim taka khawsa ta dingin inhlàn ve thung ta ro. 20 Suol bawia in um lai khan felna thu hnuoiah in um ngai nawh. 21 Tuta in inzàpui tah, khang laia thil in lo thaw hlak hai khan ra tangkai ieng am an insuo a? Chuong thil po po tawpna chu thìna a nih. 22 Tu ruok hin chu suola inthoka insuo in ni ta a, Pathien bawihai in hung ni ta lem a, chatuon hringna chang dinga sukthienghlim in ni tah. 23 Suol man chu thìna a ni si a; Pathien thilthlawnpêk ruok chu ei Lalpa Isu Krista zàrah chatuon hringna a nih.
1 Unauhai, dàn chun mi a dam sung po chauh a chungah thu a nei hlak ti in hriet naw am a nih? Hi hi Dàn hrehai hriet ding bìka ka hril a nih. 2 Entirna dingin, nuhmeiin pasal a nei chun a pasal dam sûng po chu inneina dânin a pasalah a phuor bet a, a pasal thi hnung ruok chun a pasal lakah chu dân chun a khit ta nawh. 3 A pasal dam sûng mi dang a nei chun 'uire nu' tìng an tih; a pasal a thì hnung ruok chun chu dân phuornaa inthok chun sùtin a um a, mi dang nei sienkhom uirè ti a ni ta nawh. 4 Chuong ang bokin unauhai, Krista taksa pèng in ni tah leiin Dàn chu in thìsan tah a, Pathien ta dinga rà ei insuo theina dingin tu hin chu mi dang tà, mithi laia inthoka keithoa um tah tâ chu ei ni tah lem. 5 Suol khuop dè mihriem hlui ei la put lai khan chu ei chàkna suol, Dànin a chok tho khan, ei taksaah sin a thaw a, ei rà suok chu thìna a nih. 6 Tu ruok hin chu mi khuop hlaktu chu thisanin, dàn khuopnaa inthoka insuoin ei um tah a; chuleiin, Dàn thu ziek hlui chu zui ta loin, Thlarau dàn thar hnuoiah rong ei bawl tah lem a nih. 7 Ieng am hril tâng ei ta? Dàn chu suol a ni? Teu lo e! Dànin mi hril naw sien chu suol hi hre naw ning. Dànin "Inhnar naw" lo ti naw sien chu inhnar hi iem a nih ti hre naw bok ka tih. 8 Sienkhom, suol chun dàn thupêk chu remchânga hmangin, inhnarna tinrêng ka sûngah a'n umtir a. Dàn um naw sien chu suol hi thil thi el a nih. 9 Kha hma khan Dàn thang loin ka lo hring hlak a; nisienlakhom, dàn thupêk a hung um phingleh suolna chu a hung har a, kei chu ka thi a. 10 Hringna dinga dàn thupêk chu thìna ding lem a lo nih ti ka hung hmu suok a. 11 Suolna chun dàn thupêk chu remchânga hmangin a mi hlèm a, thupêk chu hmangin a mi sukhlum tah a nih. 12 Chuong chu a ni leiin, Dàn chu a thienghlim a, thupêk khom a thienghlim a, a fel a, a thà a nih. 13 Anleh, thil thâ chu ka ta dingin thìna intluntu a lo ni maw? Teu lo e! Suolna chu ka ta dingin thìna a hung ni ta lem a nih: suol chu suol a nih ti a'n lang theina dingin thil thâ chu hmangin a mi sukhlum a, chu dàn thupêk chun suolin taluo a nei nawzie a hung suklang tah a nih. 14 Dàn chu thlarau tieng thil a nih ti ei hriet; kei ruok chu taksaa um, suol bawia zor hmang tahnung ka nih. 15 Ka khawsak dàn hi a ngaina tak khom ka hriet nawh. Ka thaw nuom zawng thaw loin, ka theidà zawng ka thaw lem hlak. 16 Ka thaw nuom naw zawng ka thaw hin dàn chu tha ka tipui tìnâ a nih. 17 Tuta ka ngìrhmun chu, thil ka thawhai hi keima thaw ni loin, keimaa chêng suol chun a thaw lem a nih. 18 Suol kop keima mihriema hin thil tha hrim a chêng nawh ti ka hriet; thil tha thaw nuomna nei lang khom ka phur suok zo si nawh. 19 Thil tha ka thaw nuom chu thaw loin ka thaw nuom naw thil suol chu ka thaw lem si. 20 Ka nuom naw zawng ka thaw si chun, a thawtu chu kei ni loin, keimaa chêng suol chu a ni lem. 21 Chuongchun, hieng hi thil um dàn a nih ti ka hung hriet suok tah: thil tha thaw ka nuoma chu suolin a mi chèng chil zing si. 22 Ka lungril sûngril tak chun Pathien dân a lawm a; 23 sienkhom ka taksaa sinthaw, ka lungril tha tizawng dàn dotu chu a um ti ka hmu a, chu ka taksa bunghaia sinthaw hlak suol dàn chun salah a mi siem hlak a nih. 24 Mi rimsi ka va ni ngei! Hi thîna taksaa inthok hin tuin am mi san suok a ta? Pathienin tie! Ka Lalpa Isu Krista zàrah ama chu inpâkin um raw se. Chuongchun, keima lungril tak chun Pathien dân rong ka bawl a, keimaa suol kop ruok chun suol dàn rong a bawl a nih. 25 (A um nawh)
1 Chuongchun, tuhin chu tisa dàn hraw loa thlarau dàn hraw lemtu, Krista Isua umhai ta ding chun thiemnaw inchangtirna hrim a um ta nawh. 2 Krista Isua hringna Thlarau dàn chun suolna le thìna dâna inthok chun a mi san suok ta si a. 3 Tisa hràt nawna leia Dànin a thaw thei dèr naw chu Pathienin a hung thaw a; suol kài mihriem taksa ang putin, suol thawina dingin a Naupa ngei chu a hung tir a, tisaa suol um chu thiemnaw a'n changtir ta a; 4 chu chu tisa dàna um ta loa thlarau dàn hraw tah lemtu einiah hin Dànin a phût chu a hlen theina ding a nih. 5 Tisa dàna umhai chun tisa tieng thilhai an dit hlak. Thlarau dàna umhai ruok chun thlarau tieng thilhai an dit bok. 6 Tisa tieng thil dit chu thìna a na; Thlarau tieng thil dit ruok chu hringna le thlamuongna a nih. 7 Tisa ditzawng ngaituona chun Pathien a do a, Pathien dân a zawm naw a, zawm khom a zawm thei bok nawh. 8 Chuleiin, tisa dit zawnga umhai chun Pathien an suklawm thei nawh. 9 Pathien Thlarau nangniah a chêng chun tisa mi ni ta loin Thlarau mi in ni ta lem. Tu khom Krista Thlarau nei lo chu ama mi a ni nawh. 10 Krista chu nangniah a um si chun, in taksa chu suol leia thi ni sienkhom thiem inchangtir in ni tâk leiin in thlarau ruok chu a hring a nih. 11 Mithi laia inthoka Isu keithotu Thlarau kha nangniah a um chun, mithi laia inthoka Krista Isu keithotu chun nangnia um Thlarau zàrah, in taksa thi theihai chu sukhring bok a tih. 12 Chuleiin unauhai, bat ei nei a, chu chu tisa nuomzawnga tisâ taka khawsa ding tìna ruok chu a ni nawh. 13 Tisa dit zawnga in um chun thi ngei in tih; sienkhom tisa nuom zawng in thaw hlakhai chu Thlaraua in sukhlum ruok chun hring in tih. 14 Pathien Thlarau thuoia umhai po chu Pathien nauhai an ni si a. 15 Titna bawia intâng nawk dingin bawi nìna thlarau pèk in ni naw a; nau nîna thlarau in chang lem a nih; chu thlarau zara chun, "Abba, Pa!" tiin ei insèk hlak a nih. 16 Chu Thlarau ngei chun eini thlarauah Pathien nauhai ei nizie a mi'n hriettir hlak. 17 Pathien nauhai ei ni chun rohluotu, Pathien rohluotu, Krista ro hluopuituhai ei nih; Krista tuorna ei intawmpui si chun a ropuina khom intawmpui vê ngèi ei tih. 18 Tuta ei tuornahai hi ei ta dinga ropuina suklanga la um ding le chun hrilkhi tlàkah ka ngai nawh. 19 Pathienin a nauhai a suklang hun ding chu thilsiem po poin nghâkhlâ takin an thlìr a nih. 20 Thilsiemhai chu anni ditthlangna ni loa a Siemtu thu leia iengma lo la ni vong dinga tì an nih. Amiruokchu, beisei ding a la um: 21 thilsiem po pohai chu hmon theina bawia inthoka insuoa umin, Pathien nauhai zalènna ropuia chun an la lùt ding a nih ti beiseina chu. 22 Thilsiem po pohai chu tu chen hin nauha sè tuor inrûm angin an inrûm tawl ti ei hriet si a. 23 Chu chauh khom chu ni loin, eini Thlarau rà hmasa dongtuhai ngei khom hin nau nîna ei hluo hun ding le ei taksa intlanna ni ding chu lungrila nghâkhlâ takin ei inrûm a nih. 24 Chu beiseina lei chun sandam ei ni a; nisienlakhom, hmu tah zing beisei chu beiseina a ni nawh. Hmu tah zing chu tuin am a la beisei rop ding? 25 Ei la hmu naw ei beisei chun ei nghàk fan fan hlak a nih. 26 Chuong ang bokin, Thlarau chun ei hràt nawnaah a mi thangpui hlak a; tongtai dàn ding ei hriet naw lai khomin Thlarau chun hril ruol loa inrûmin a mi tongtaipek lem hlak a nih. 27 Lungril enfietu Pathien chun Thlarau ditzawng chu ieng am a nih ti a hriet a; Thlarau chun Pathien ditzawng ang peiin mi thienghlimhai ta dingin a mi tongtaipèk hlak. 28 Pathien hmangaituhai, aman a ruot anga a kohai ta ding chun iengkimah an thatna dingin a thawpèk hlak ti ei hriet; 29 A hriet lawkhai chu a Naupa ang taka um dingin a ruot lawk si a, a Naupa chu unau tam tak laia nau lutîr a hung ni theina dingin. 30 Chun, a ruot lawkhai chu a ko a; a kohai chu thiem a'n changtir a; thiem a'n changtirhai chu a chawimawi bok a nih. 31 Chuong thua chun ieng am hril tâng ei ta? Pathien eini tieng a thang chun tuin am mi khing ngam a ta? 32 Ama Naupa ngei khom hlà loa ei rênga ta dinga petu chun thil dang khom a thlawnin a mi pêk sa naw dim a nih? 33 Pathien mi thlanghai chu tuin am hêk ngam an ta? Thiem inchangtirtu chu Pathien a ni si a. 34 Tuin am thiem naw inchangtir a ta? Krista Isu chu ei ta dinga thi le mithi laia inthoka tho nawk chauh khom ni loin, Pathien chang tieng inthung a, eini mi hrilpuitu a ni si a. 35 Krista hmangainaa inthok chun iengin am mi thè thei a ta? Rinumna dàm, harsatna dàm, suknomnatna dàm, tâmna dâm, saruokna dàm, titna dâm, kawlhnâm dàmin maw a mi thè thei ding? 36 Nangma leiin ni tin elin, Thìna ko tlângah kan ngìr a; That ding beram anga ngaiKan lo ni tawl vong ta si a. m ti ziek ang khan. 37 Thè thei teu lo e! Chuong po poa chun a mi hmangaitu zàrin hnetuhai chunga lêng ei nih. 38 Thil ieng khomin, thìna hai, hringna hai, vàntirko hai, boruoka thuneitu hai, thil tlung zing le la tlung ding hai, thilthawtheina hai, 39 thil insâng le inthûk hai le thilsiem dang hrim hrim khomin ei Lalpa Krista Isua um Pathien hmangainaa inthok chun mi thè thei naw nih ti chieng takin ka hriet.
1 Kristaa chun thudik ka hril a nih; thukhêl ka hril nawzie Thlarau Thienghlim zàrin ka sie le tha hrietna khomin a hriet chieng. 2 Ka lungrilah rinumna nasa tak le lungngaina rè thei dêr lo ka pâi a. 3 Ka unauhai, taksa thila ka chipuihai ai hin keiin tongsie phurin Krista kuoma inthoka sàt thlâk ni lem lang ka ti hiel hlak. 4 Israel mi an ni si a, nau nîna hai, ropuina hai, thuthlung hai, Dàn thu hai, rongbawlna sin hai le thutiem hai po po changtu an nih. 5 Thlatuhai chu an pùhai an ni a, mihriem tienga sui chun Krista chu an chipui ngei a nih; iengkim chunga um Pathien chu chatuona inpâkin um raw se, Amen. 6 Pathien thu chu a thlawn elin a'n chang ka tìna a ni nawh. Israel thlahai po po chu Israel mi an ni vong chuong nawh. 7 Abraham thlahai po po khom a nauhai an ni vong chuong nawh; 'Isaka hin i thlàhai sui an tih' ti a ni lem. 8 Chu umzie chu, taksa tienga nauhai chu Pathien nauhai an ni vong chuong naw a, thutiem leia Abraham nauhai chu a thlà indik taka ngai an ni lem, tìna a nih. 9 "Tuta hun anga hin hung ka ta, Sari chun nau pasal nei a tih" tiin a tiem a ni kha. 10 Chu chauh khom chu ni loin, Rebek khomin ei thlatu Isaka inthoka nau inphîr a von lai khan, 11 an pieng thlàk hma, sie le tha an la hriet hmain, thilthaw lei ni loa a kotu dit ang lei lemin, pakhat lem chu thlang a nih ti a'n lang. 12 Pathien thu ruot chu namnghetna dingin Rebek kuomah, "A upa lemin a naupang lem rong bawl a tih" a tì a ni kha. 13 "Jakob chu ka hmangai a, Esau chu ka theida" ti ziek a ni bok. 14 Ieng am hril tâng ei ta? Pathien chu a thu an lài nawh ei ti dim a nih? 15 Teu lo e! Ama chun, "Ka lunginsiethai po lunginsiet ka ta, za ka ngainahai po chungah zà ngai ka tih" tiin Mosie kuomah a hril a nih. 16 Chuleiin, mihriem dit dàn le an thaw rakna lei ni loin Pathien lunginsietnaa innghat a ni lem. 17 Pathien Lekha thuin Faraw kuomah, "Hi lei ngot hin ka tungding chê a nih, nangmaa chun ka thilthawtheina ka'n entir theina ding le khawvel po poah ka hming puong dar a ni theina dingin" a ti si a 18 Chuongchun, Pathien chun a lunginsiet nuom po a lunginsiet a, a suklulul nuom po a suklulul el a nih. 19 Chuong a ni si chun Pathienin ieng dinga mi a la mawsiet rop am a na? A ditzawng tuin am a kal thei a?" in ti khom a ni thei. 20 Aw mihriem, Pathien sêl ngamtu chu tu'm i na? Thilsiem chun a siemtu kuomah, "Ieng dinga hieng anga i mi siem am a na?" a ti thei am a ni? 21 Bepil tlang khata inthokin bêl hlu tak le bêl naran siem dingin bêlhemtu chun bêl chungah thu a nei naw am a nih? 22 Pathien chun a lungsenna le a thilthawtheizie suklang nuom hlak sien khom, sukbohmang ela um ding a lungsenna bêl dongtu dinghai chunga chun zâi a daw hràm hrâm a, 23 a lunginsietna bêl, a ropuina changtu dinga a lo buotsai lawk, einihai kuomah a ropuina nasatzie chu a hung suklang tah thung a nih. 24 Chu lunginsietna bêlhai chu Judahai laia inthok chauh ni loin Jentêlhai laia inthoka kohai khom ei nih. 25 Hosea lekhabua, "Ka mi ni ngai lohai chu, Ka mihai tîng ka ta; Hmangai ngai naw nu chu, Hmangai nu tîng ka tih; 26 'Ka mihai in ni nawh' A tîna hmun ngeia chun, 'Pathien hring nauhaia Inbûkin um an tih"ntia a hril ang bok khan. 27 Isai khoma Israelhai thu chu khêkpuiin, "Isreal mihai chu tuifinrieta phaiphin angin tamhai sien khom, tlawmte chauh sandamin um an tih. 28 Lalpan hnuoi chunga a rorêlna chu khauh tak le inrang takin a hlen ding a ni si a" a ti kha. 29 Isai bokin, "Iengkim Lalpa chun chi thlatu Mi lo hlàpêk naw sien chu, Sodom khuo angin um tâng ei ta, Gomora khuo ang ni tâng ei tih"otiin a lo hrillawk bok kha. 30 Ieng am hril tâng ei ta? Thiemchang tuma bei ve nawtu Jentêlhai chu ringna leia thiem inchangtir an lo ni tah. 31 Dàn zawm leia thiem chang tum Israelhai ruok chun Dànah thiemchangna an hmu zo ta nawh. 32 Ieng leiin am? Ringna thang loa thilthawa thiemchang an tum lei a nih. Tlûkna lungah chun an insui thlu ta si a. 33 "Ngai ta, Zaiawnah lungpui ka'n zâl, A'n sui taphot tlûkna ding lung chu; Tu khom ama ringtu chu, Muolpho ngai hrim hrim naw nih"pti ziek ang khan.
1 Unauhai, ka chipui Israelhai chu sandamin um hai sien ti hi ka duthusam le Pathien kuoma ka hnî rop chu a nih. 2 Pathien ta dinga thahnem an ngaizie ka hriet a, sienkhom an hriet dàn a mumal si nawh. 3 Pathienin thiem mi a'n changtir dàn chu an hriet thiem naw a, anni lampui an hraw tlat a, Pathienin thiem a'n changtir dàn hnuoia chun an tlu lùt nuom nawh. 4 Ama ringtu taphotin thiem an chang theina dinga Dàn sukfamkimtuq chu Krista a nih. 5 Dàn zawm leia thiemchang dàn thu chu Mosien hieng ang hin a lo ziek a, "Dàn zawmtu chu dànin hring a tih" tiin. 6 Ringna leia thiemchang dàn thua ruok chun, "Tu'm vànah lawn a ta?" (Vàna inthokin tuin am Krista hung thuoi thlâng a ta?) amanih, 7 "Tu am khurpuiah zu tum a ta?" (Mithi khuoa inthokin tuin am Krista zu thuoi suok a ta?) amanih in lungrilin ti naw ro" tiin a hril bâkah, 8 "Thu chun a hnai che, I bàu le i lungrilah a um"r a ti lem a ni kha. Chu thu chu ringna thu kan hril hlak hi a nih. 9 I bàuin Isu chu Lalpa a nih ti i tan a, mithi laia inthokin Pathienin a keitho ti i lungrila i ring chun sandamin um i tih. 10 Lungrila ringtuhai chu thiem inchangtirin an um a, bàua tantuhai chu sandamin an um bok. 11 Pathien Lekha thuin, "Tu khom ama ring taphot chu muolpho ngai hrim hrim naw nih"a ti a nih. 12 Juda mi le Grik mi ieng khom a danglam chuong nawh. Lalpa pakhat chu an rênga Lalpa a na; ama kotuhai chungah chun a hausakna a vùr hlak. 13 "Tu khom Lalpa hming lam taphot chu sandamin um an tih" a ti a nih. 14 Anleh, an ring naw chu ieng tin am ko an ta? Thu an hriet naw chu ieng tin am ring thei an ta? Thuhriltu um loin iengtin am hrieng an ta? 15 Tir an ni si naw chun ieng tin am thu hril an ta? "Thil tha chanchin lawmum intluntuhai kè chu a va mawi de!" ti ziek a ni kha. 16 Sienkhom, Chanchin Tha chu an rêngin an ring vong chuong nawh. Isai bokin, "Lalpa kan thu hril tuin am a ring a?" a ti si a. 17 Chuongchun, ringna chu thu an ngaithlàka inthoka hung um a na, thû hrila um chu Isu Krista thù a nih. 18 Anleh, thu chu an nain an hriet ngai naw'm a nih? Hre ngai e a! "Sienkhom an rawlin hnuoi a fang suok a, An thuin kawl kil a dèng suok"sti a ni kha. 19 Anleh, hang ti nawk ta pei inla, Israel mihaiin an hriet naw am a ni ding? "Hnama hril khop lohai chu Inthîktir ka ti chêu a, Hnam invêthai chu hmangin, Suklungsen ka ti cheu"ttiin Mosien a hril hmasa tak a. 20 Isai chun huoi takin, "A mi zong nawtuhai chun An mi hmu a; A mi ko nawtuhai kuomahKeima ka'n hriettir a"ua ti nawk a. 21 Amiruokchu, Israelhai chung thua ruok chun, "Mi kawmaw le helhmang ta dingin, Sùnnithlâkin bân ka phar hlak"va ti kha.
1 Anleh, Pathienin a mihai chu a hnawl am a ni? Hnawl lo e! Kei ngei khom hi Israel mi, Abraham thla, Benjamin hnama mi ka ni si a. 2 A hriet lawk, a mihai chu Pathienin a hnawl nawh. Pathien Lekha thua chuong Elija chanchin kha in hriet naw am a ni? Ama chun Israel mihai chungthu Pathien kuomah a'n tlun a: 3 "Lalpa, i zawlneihai an sukhlum a, I maichàmhai an sukchim a; Ka khât chauh ka ni ta a, Kei khom mi sukhlum an tum a nih"wtiin. 4 Pathienin ieng tin am a don a? "Baal hmaa la kûn ngai lo, mi sangsari keima ta dingin ka la hlâ zing a nih" tiin a don a ni kha. 5 Tu khom hin chuong ang bok chun Pathienin a lunginsietna leia a thlang suok tlawma zawng an um. 6 A lunginsietna leia thlang suok an ni chun, an thilthaw lei a ni thei nawh; chuong naw chun lunginsietna chu lunginsietna ni thei naw nih. 7 Ieng tin am ni tâng a ta le? Israelhaiin an zong chu an hmu naw a, Pathien thlang mi tlawmte chauin an hmu a, mi dang po po chu an chawlol zo tah a nih. 8 "Pathienin voisun chen hin inlusùkna thlarau a pêk a, mita hmu thei nawna le naa hriet thei nawna leh" ti ziek ang khan. 9 Lal Davida chun, An ruoi chu châng inchang sien, Inremna ruoi an kîl khom, Bilah inchangpèk raw se. 10 An mithai sukdelpèk la, Khuo hrim hmu thei naw hai sien, An zâng inkûl song raw sey a lo ti bok a. 11 Anleh, an insui thlùk chu an tlu song dim a ni? Tlu song lo e! An tlùkna leiin Jentêlhai kuomah sandamna a hung tlung a, Israelhai inhnar dingin. 12 Chuongchun, an tlùkna hman khawvel sukhausakna a ni a, an tlâk hnuoina hman Jentêlhai hausakna a ni bok si chun, an hung thang kim pha chun hausakna ropui lem an va'n tlun nasa awm de! 13 Nangni Jentêlhai kuomah thu ka hril a ni hi. Kei hi Jentêlhai ta dinga tirko ka ni leiin ka rongbawl sin hi ka ngaihlu a nih; 14 ka chipuihai ka'n thîktir cheu a nih, a then bêk ka sandam theina dingin. 15 Anni hnawla an umna hman khawvel hi Pathien le inremtirna a ni si chun, anni lawm lût nawkna chu thìnaa inthoka hring nawkna a ni naw di'm a ni? 16 Bei tlang hmet laia a hlek sik thlàk hmasa tak chu inser thienghlim a ni chun a tlang hlawm po chu inser thienghlim a ni hlak a; chuong ang bokin thing khom a zung a thienghlim chun a kâuhai khom an thienghlim hlak. 17 Oliv kàu zâr thenkhat a tliek leiin nangni oliv puopa chu oliv kungah zom in ni a; zung hrisel chu in intawmpui ve tah a. 18 Chuleiin, zâr danghai lakah uong tum in ni khoma uong thei in ni nawh, a zung chawmtu in ni naw a, a zungin a chawm lem chêu a nih. 19 Chun, nangin, "Zoma ka um theina dingin zâr thenkhat chu sàt thlàk a ni annawm" i ti a ni thei. 20 I hril indik ie; an ring naw leiin sàt thlàk an ni hrim a, nang chu i ring leiin zom i nih. Chapo el naw la, ti hlé lem rawh. 21 Pathienin zâr takhai hman a hlá si naw chun nang khom hlà bik naw ni che. 22 Pathien ngilneizie le khauhzie ngaituo hlak rawh; a tluhai chungah a khauh hle a, a ngilneinaah i um zing ruok chun i chungah ngilnei zing a ta, i um zing naw chun nang khom sàt thlâk ni vêng i tih. 23 Chun, anni khom ring loa an um zing naw chun zomin la um nawk an tih, Pathienin anni chu a zom nawk thei si a. 24 Nang oliv puopaa inthoka sàt thlâk hman, pienphung pangngai ang loa oliv thing thaa zom i ni si chun, oliv indik tak zâr chu oliv thing indika zom chu a va olsam awm ngei de! 25 Unauhai, hi thurûk hi in hriet naw ka nuom nawh, chuong naw chun var bikah lo inngai pal hlauh rawi in tih. Jentêlhai an lùt kim hma chun Israel mi thenkhathai lungrilah ngongna a la tlung hrî phot a ni hi. 26 Chuongchun, Israelhai chu sandamin la um vong an tih ti chu Pathien Lekha thuin a lo ziek ta kha:Ziona inthokin Sandamtu hung a ta, Jakob thlahai rîtlona po po chu, La la hmang vong a tih; 27 Chu chu ka thuthlung ding chu a nih, An suolhai ka lâk hmang pha chun. y 28 Chanchin Tha chungthua chun, in chan thatna dingin hmêlmaah an inchang a; sienkhom Pathien thlang an ni leiin, an thlatuhai zàrin, a dittakhai an ni zing tho. 29 Pathienin mi mal a sawm tah le a thlang tahai chu sût nawk thei a ni nawh. 30 Kha hma khan Pathien thu in awi naw a, tu ruok hin chu annin an awi naw leiin a lunginsietna in dong tah a. 31 Chuong ang bokin, tu hin nangnin lunginsietna in dong leiin anni khoma lunginsietna an dong ve theina dingin an awi hrì naw a ni hi. 32 Pathien chun mi po po chungah a lunginsietna a'n langtir theina dingin awi nawnaah a khum khawm tawl vong a nih. 33 Pathien hausakzie, varzie, hrietzie, Aw a va'n thûk ngei de!A rorêl dàn hriet phâk ruol lo, A lampuihai khom sui suok ruol lo, A lo va ni ngei de aw! 34 Tu am Lalpa lungril hre a, A remruotpêktua thang ta hlak? 35 Pathien rul nawk beisei a, A kuoma thil pe tu'm an um hlak a? 36 Thil po po hi amaa inthoka um, Ama lei le ama ta dinga um, An lo ni vong tlat si a; A kuoma chun chatuonin, Ropuina um raw se, Amen.
1 Chuleiin unauhai, Pathien lawm tlàk inthawina hring le thienghlima in taksa chu inhlàn dingin Pathien lunginsietna zàrin ka ngên cheu; chu chu thlaraua in chawibiek dàn ding tak chu a nih. 2 Hi khawvel um dàn hi zawm ta loin, lungril thar putin inthlâkthleng unla; chuongchun, Pathien ditzawnga tha, lawm tlâk le famkim chu hung hre fie thei tâng in tih. 3 Nangni lai tu khom mani nìna bâka inngai sâng lo a, lungril fîm puta mani inbi chieng a, Pathien mi pèk ei ringna phù tawk ang peia insie lem dingin Pathienin lunginsietna a mi pèk zârin ka ngên cheu a nih. 4 Taksa pum khatah bung hrang tam tak ei nei a, bung hrang hrang sinthaw a dang seng a. 5 Chuong ang bokin, tam tak ni inla khom Kristaa chun taksa pum khat ei na, ei rêng hin taksa bung anga inpêng tuo vong ei nih. 6 Lunginsietna a mi pèk ang peiin thilpêk tum tum ei nei a, chuong ang tak chun hmang ei tiu. Thuhriltu ei ni chun ei ringna le inphù tawkin hril ei tiu. 7 Rongbawltu ei ni chun thahnemngai takin bawl ei tiu. Zirtirtu ei ni chun zirtir ei tiu. 8 Infuitu ei ni chun mi chokphûr ei tiu. Somdawltu ei ni chun phal takin pêng ei tiu. Thuoitu ei ni chun taima takin thuoi ei tiu. Lunginsiettu chun hlim takin lunginsiet ei tiu. 9 Hmangaina chu a takin ni raw se. Suol chu theidà unla, a thà chu pom tlat ro. 10 Unau an inlainat angin inlainat tuo unla, mani nêkin mi dang chawimawi uor lem ro. 11 Inthlàdà ngai naw unla, lungril phûr takin Lalpa rong chu bawl ro. 12 Beiseina chun suklawm sien la cheu, sukdùdàna chu sel takin tuor unla, ieng lai khomin tongtai ro. 13 Pathien mihai tlâksamna chu somdawl unla, mikhuol lawm hlak ro. 14 A suknomnatuhai chèu chu malsawm unla, tongsie inphur naw ro. 15 Lawmhai chu lawmpui unla, taphai chu tappui ro. 16 Mi leh inrem takin um diel diel unla, chapo naw unla, mi hnuoihnunghai chu inpawlpui lem hlak unla, indù ngai naw ro. 17 Suol chu suolin thungrul naw unla, mi po po ngaia mawi chu ngaituo lem ro. 18 A thei phot chun, nangni tienga bek mi po po leh inrem tum ro. 19 Dittakhai, phuba la naw unla, Pathien lungsennaa rul dingin khêk lem ro; "Phuba lâk chu ka chan a nih, keiman thungrul ka tih" Lalpan a tih, ti ziek a ni si a. 20 Chuong nèk hmanin, "I hmêlma a phing a tâm chun bu pe la, A dang a châr chun dawn ding pe rawh. I pêk chun a luah meiling i sie khawl nîng a ta, LALPAN lawmman pêng a ti che. " 21 Suol hnèin um naw la, suol chu thatnain hnè lem rawh.
1 Mi tinin an chunga rorêltuhai thu awi raw hai se. Pathien ruot loin rorêltu an um thei nawh. Tuta rorêltuhai khom hi Pathien ruot an nih. 2 Chuleiin, rorêltu dodàltu taphot chun Pathien ruot a dodàl a na, a dodàltu chun a chungah hremna intlungtir a tih. 3 Rorêltuhai chu thil tha thawtuhai ta dingin an tium naw a, thil tha naw thawtuhai ta ding ruok chun an tium a nih. Rorêltu ti loa um i nuom am? Thil tha thaw la, inpâk hlawng i tih. 4 Rorêltu chu i thatna dinga Pathien rongbawltu a ni si a. Thil suol i thaw ruok chun tì hlê rawh, nuoma kawlhnâm chawi mei mei a ni nawh! Pathien rongbawltu a ni a, thil suol thawtuhai hremtu a nih. 5 Chuleiin, hrem tì lei ni loin, i sie le tha hrietna lei khomin thuneituhai thu chu i zawm ding a nih. 6 Chuong chu a ni leiin sie khom in chawi hlak. Thuneituhai chu Pathien rongbawltu an na, an hun po po rorêlna sina inhmang an nih. 7 Tu chunga khom bat in nei chun tlâk unla, leiman in bat chun pe unla, sie chawi ding a ni leh chawi unla, inzà ding chu inzà unla, chawimawi ding chu chawimawi ro. 8 Inhmangai tuona ngot naw chu tu thil khom bat naw ro. Mani mihriempui hmangaitu chun Dàn a hraw kim tah a nih. 9 Hieng 'uire naw, tuol that naw, inru naw, inhnar naw' ti le thupêk dang hrim hrim hi 'Nangma i'n hmangai angin i vênghai hmangai rawh" ti hin a fùn khawm vong a nih. 10 Hmangainain khuo le vênghai poi a tawk ngai nawh. Chuleiin, hmangaina hi Dàn hraw kimna a nih. 11 Chu bâkah, tu lai thil umzie hi in hriet a, inhai ta dingin thang har a hun tah takzet a nih, ei ring tìr lai nêk khan tuhin ei sandamna chu a hnai lem ta si a. 12 Zàn hi a bo váng vàng tah a, khuo a var ding a ni tah. Chuleiin, thim thilthawhai chu bànsanin var thuom inbel ei tiu. 13 Nuom chèna inrui chiri loin, zâuthâu le indit hmanga um loin, innghirngho le inthîk tuo bok loin, sùn vara umhai angin inzaum takin um ei tiu. 14 Lalpa Isu Kristaa chun inthuom lem unla, in tisa châknahai chu sukpuitling tum hrim hrim naw ro.
1 Ringnaa mi hrât naw chu, a ngaidan insêlpui kher loin, lawm lût el ro. 2 Mi pakhatin iengkim fàk thiengin a ring a, mi hrât naw ruok chun thlài chauh a fâk a. 3 Iengkim fatu chun a fa ve nawtu chu hmusit naw sien, a fa nawtu chun a fatu chu soisel bok naw raw se, Pathienin ama chu a pom ve tho si leiin. 4 Mi dang siehlaw lo soiseltu chu tu am i ni leh? A ngìr amanih a tlùk amanih chu a pu thu annawm. Ngîr a tih, Lalpa chun a'n ngìrtir thei si a. 5 Mi pakhatin ni khat hi ni dang nêkin a ngaihlu bìk a, mi dangin ni po po inang vongin a ngài thung a. Mi tinin mani ngaidàn chiengkuong tak nei ding a nih. 6 Ni pakhat inser bîktu chun Lalpa chawimawina dingin a'n ser a nih; iengkim fatu chun Pathien kuoma lawmthu hrila fa a ni leiin Pathien chu a chawimawi a nih. Fâk tienga insûm mi khom chun Pathien kuomah lawmthu a hril tho leiin Lalpa chawimawina dinga a thaw a nih. 7 Tu khom mani ta dinga hring ei ni naw a, tu khom mani ta dinga thi ei ni bok nawh. 8 Ei hring leh Lalpa ta dinga hring ei na, ei thi khomin Lalpa ta dinga thi ei nih. Chuleiin, ei hring khomin, ei thi khomin, Lalpa ta ei nih. 9 Hi lei tak hin, a dam lai le a thi tahai Lalpa a ni theina dingin Krista chu a thi a, a hring nawk tah a nih. 10 Chuong a ni si chun, ieng dinga nangin i unaupa chu i soisèl am a na? Ieng leia i unaupa chu i hmusit? Pathien rorêlna lalthungpha hmaah ei la ngîr vong ding a ni si a. 11 " 'Hring zing chu ka ni leiin, Mi tin ka hmaah kûn an ta, Lei tinrêng Pathien hmaah inpuong an tih'Lalpan a tih"z ti ziek ang khan. 12 Chuongchun, ei rêngin Pathien hmaah mani chungthu seng ei la hril ding a nih. 13 Chuleiin, insoisel tuo hi bânsan ei ta, mani unau tlùkna le lampui dàltua thang tum ta naw seng lem bok ei tiu. 14 Lalpa Isua chun thil hrim hrim ama ngota inthieng lo ieng khom a um nawh ti ka hriet chieng. Amiruokchu, thil thenkhat thieng loa ngaitu ta ding chun thil thieng lo a ni el a nih. 15 I thil fâk leia i unau lungril a na chun hmangaina lampui i hraw ta nawh tìna a nih. I thil fâkin i unau sietna intlun naw raw se, a ta dingin Krista a thi si a. 16 Tha in tizawng chu suol anga an hril hnawm phal naw ro. 17 Pathien ram chu fàk le dawn thil a ni si nawh; Thlarau Thienghlim zâra thiemchangna dàm, inremna dàm le lawmna dâm a ni lem. 18 Chuong anga Krista rongbawltu taphot chu Pathien lawmzawng mi a na, mihriem inpàk khom a hlaw hlak. 19 Chuongchun, inremna le insuksawt tuona thilhai chu theitawpin hnot ei tiu. 20 I thil fâkin Pathien sinthaw sukse naw raw se. Thil iengkim fâk a thieng a, sienkhom mi dang tlùk theina fàk ruok chu a tha nawh. 21 Sa fâk hai, uoiin dawn hai, i unau tlûk theina thil hrim hrim chu chîng lo a tha. 22 Hieng thila i ring dàn chu Pathien le in inkâr thuah sie rawh. Mani ring dàn ang zawng thawa lungrila inthiem nawna nei lo mi chu a hamtha. 23 Sienkhom, ringhla puma fatu chun thiem naw a chang zing tah a nih, a ring dàn naw anga a thaw leiin. Iengkim hi ringnaa inthoka suok a ni naw chun suol a nih.
1 Eini a hrât lemhai hin mani lawmna zong loin a hrât naw lemhai hràt nawna chu phuhrûk lem ei tiu. 2 Mani tuolbawmhai thatna ding zonga suklawmin, dom sàng tum seng ei tiu. 3 Krista khomin mani lawmna a zong si nawh. "Nangma deusawtuhai cheksolna chu ka chungah a tla tah" tia ziek ang khan a tuor ta lem a ni kha. 4 Kha hmaa inthoka Pathien Lekha Thua zieka lo um ta hrim hrim hai kha inchûktir nei vong an na, tuorselna le phùrna nei a, beiseina ei nei theina dinga ziek an nih. 5 Selna le phùrna petu cheu Pathien chun, Krista Isu in zuinaah, thlarau hmun khat inputtir sien la chêu, 6 chuongchun, lungril hmun khat puta zài khata luongin, ei Lalpa Isu Krista Pa le Pathien chu inpâk tlàng thei in tih. 7 Pathien ropuina dinga Krista'n a lawm chêu ang bok khan inlawm tuo ro. 8 Ka hril chêu hi, Pathien ringumzie sukchiengna dingin, thlatuhai kuoma a thutiemhai chu hlenin, Krista chu sertan Judahai rongbawltuah a hung um a. 9 Chu chu Jentêlhai khomin a lunginsietna leia Pathien an chawimawi theina ding a nih, "Hi lei hin Jentêlhai laiInpâk ka ti che a; I hming inpakin hla sak ka tih"a tia ziek ang khan. 10 Chun, hieng ang hin a lo ti bok:"Aw Jentêlhai, Ama mihai le chun lawm ro. " 11 Hieng ang khom hin a lo ti a:"Jentêl po po hai, Lalpa chu inpâk ro; Ama mihai po po khomin, Inpâk raw hai se. "b 12 Isai khomin hieng hin a lo hril a:"Jesai zungzàm inchor suok a ta, Jentêlhai chungah inlal a ta, Jentêlhai chun amaah, Beiseina la'n nghat an tih. "c 13 Thlarau Thienghlim thilthawtheina zàra beiseinaa in sip liem theina dingin, beiseina hnâr Pathien chun in ringna leiin lawmna le thlamuongna tinrêngin vûr raw se cheu. 14 Ka unauhai, nangni rawi hi thatnaa sip, kong tinrênga varna hau le inzirtir tuo thei ding in nih ti ka ring tlat a nih. 15 Amiruokchu, thil thenkhat inhriet nontir ding cheuin ka hung ziek a, Pathienin lunginsietna a mi pèk zârin thil thenkhat lem chu ka ziek huoi hlè a nih. 16 Jentèlhai chu Thlarau Thienghlim sukthienghlima um a, Pathien lawm tlàka an inhlàn theina dingin, anni laia Chanchin Tha hril hi Krista Isuaa ka thiempu sin a nih. 17 Chuleiin, Krista Isua chun hienga Pathien rong ka bawl hi ka suong hlè a nih. 18 Pathien thu Jentêlhai inawitir dinga Thlarau thangpuina zàra thu le thilthawhai, inchikna le thilmak thaw theinahai hmanga Kristan keimaa thil a thawhai chauh naw chu ieng khom hril ka tum nawh. 19 Jerusalema inthoka Ilurikon le a sè vêl chen hmun tinah Krista Chanchin Tha ka hril vong tah. 20 Mi dang lungphùm rem ta sa chunga ka rem nawna dingin, Krista hming an la lam ngai nawna hmun taphota Chanchin Tha puong dar hi ka thil tum a ni si a. 21 "A chanchin hrilna ngai lo mihai chun, Ama chu la hmûng an ta; La hre ngai nawtuhai chun, La hung hrieng an tih"d ti ziek ang khan. 22 Chu lei chun a nih, in kuoma ka hung ding ka thul rop hlak chu. 23 Tu ruok hin chu hieng lai biela hin ka ta dingin rongbawlna hmun a um ta naw bàkah nangni hung kan cheu ka'n hawkna hi kum tam a ni tah a; 24 Spain ram ka sir malamin hung sir cheu ka beisei a, nangni leh hun iemani chen ei inpawl hlim zet hnungah ka'n zin peinaa khom in mi thangpui ka beisei bok a. 25 Tu ruok hin chu mi thienghlimhai rong bawl dingin Jerusalemah ka la fe phot ding a nih. 26 Makedonia le Akaia rama mihai chun phal takin Jerusalema mi thienghlimhai laia retheihai ta dingin thawlawm an thaw a. 27 Phal taka thaw an nia chu anni lakah bat an nei ve hrim a nih, Jentêlhaiin an thlarau tieng thil an intawmpui chun, khawvel tieng thila anni an somdawl ve thung chu an thaw awm hrim a nih. 28 Chu chu thaw a, anni kuomah thawlawm kan hlàn fel zet hnungin Spain ram ka pan malamin hung sir ka ti cheu. 29 In kuoma ka hung pha chun Krista malsawmna famkim leh ka hung ding a nih ti ka hriet. 30 Unauhai, ei Lalpa Isu Krista le Thlarau Thienghlima in mi hmangaina chun Pathien kuomah mi tongtaipêk ngat ngat dingin ka ngên chêu a nih. 31 Judai rama ring nawtuhai laka ka him theina ding dàm, ka rongbawlna hi Jerusalema mi thienghlimhai ta dinga thil lawmum tak a ni theina ding dàm, 32 Pathien remtia lungril hlim taka ka hung theina ding dàm le ei insukhar tuo theina ding dàmin mi tongtaipêk ro. 33 Remna Pathien chu in rênga kuomah um raw se. Amen.
1 Ei farnu Foibi, Kenkiriei kohrana rongbawltu hi inhmèlhriettir chêu ka nuom a. 2 Ama hi mi thienghlimhai thaw hlak ang hrima Lalpa hminga lo lawm ding le thangpui a ngaina taphota thangpui dingin ka ngèn chêu a nih. Ama hi mi tam tak thangpui hlaktu a ni a, kei ngei khom a mi thangpui a nih. 3 Prisila le Akuila, Krista Isua ka rongbawlpuihai kha chibai ka bûk. 4 Ka ta dingin thi an inhuom a; kei chauh ni loin Jentêl kohranhai po po khom an chungah an lawm a nih. 5 An ina kohran inkhawmhai kha chibai ka bûk. Ka dit tak Epaineta, Asia biela ringtu hmasa tak kha chibai ka bûk. 6 Mari, in ta dinga inrim taka thok hlak kha, chibai ka bûk. 7 Andronika le Junia, ka chipui le lung ina ka'n tângpuihai kha, chibai ka bûk. Anni kha tirkohai laia hmingthang tak an na, keia nêk khoma Krista ring hmasatu an nih. 8 Ampliata, Lalpaa ka dit tak kha chibai ka bûk. 9 Kristaa ka rongbawlpui Urbana le ka ruol dittak Staki hai kha chibai ka bûk. 10 Kristaa mi tak, Apelia kha chibai ka bûk. Aristobul sûnghai kha chibai ka bûk bok. 11 Ka chipui Herodian kha chibai ka bûk. Narkisa sûnghai laia mi Lalpaa umhai kha chibai ka bûk. 12 Trifeni le Trifosi, Lalpa sin inrim taka thawtu nupuihai kha chibai ka bûk. Dittak Persi, Lalpa ta dinga inrim taka thoktu kha chibai ka bûk. 13 Lalpa rongbawlna sina mi langsar Rufa le a nu, ka nu ve tho hai kha, chibai ka bûk. 14 Asunkrita hai, Flegona hai, Hermia hai, Patroba hai, Herma hai le an kuoma um unauhai le khan chibai ka bûk. 15 Filologo le Juli leh, Nire le a farnu Olimpi le an kuoma mi thienghlim um po po hai chibai ka bûk. 16 Fawp thienghlimin in chibai tuo unla, Krista kohranhai hin chibai kan bûk bok cheu a nih. 17 Unauhai, zirtirna thu in dong tahai kal zawnga nangni laia innghirnghona le intheidàna siemtuhai laka chun invêng fîmkhur ding le anni chu nghatsan dingin ka ngèn chêu a nih. 18 Chuong mihai chun ei Lalpa Krista rong bawl nêkin mani phingpui chauh an ngaituo hlak. An dang innàlna le mi inpâk der an thiemna chun mi mawlhai an hlêm hlak. 19 Chanchin Thaa in nghetzie mi tin hriet a na, chuleiin kei khom in chungah ka lawm a nih. Thil tha tieng var a, suol tienga in mawl ka dit a nih. 20 Remna Pathien chun Setan chu in ke hnuoiah insir dètir vak a ti chêu. 21 Ka rongbawlpui Timothe le ka chipui Lukia hai, Jason hai, Sosipater hai hin chibai an bûk chêu. 22 Kei Tertia, hi lekha ziektu hin Lalpa hmingin chibai ka bûk chèu. 23 Ka tlungna pa, kohran inkhawmna lo dongtu Gaia hin chibai a bûk chèu. Khaw sûnga sum enkoltu Erasta le ei unaupa Kuarta khomin chibai an bûk chêu. 24 Ei Lalpa Isu Krista lunginsietna chu in kuomah um raw se. 25 Tuhin, tiena inthoka thu ril inthup puonga um, Isu Krista thu, ka Chanchin Tha hrila suknghet theitu chêu Pathien chu chawimawi ei tiu. 26 Chu thu inthup hlak chu, ziek ngeia zawlneihai lo hril lawk angin, puong suokin a hung um tah a, tu khomin ringa an awi theina dingin, chatuon Pathien thupêk angin hnam tin lai inhriettir a ni tah. 27 Ama chauh Pathien var um sun kuoma chun Isu Krista leiin chatuonin ropuina um raw se. Amen.