1 Pathien Naupaa Isu Krista Chanchin Tha intanna chu, 2 Zawlnei Isai lekhabua, "Ngai ta, ka tirko i hmaah tir ka ta, Ama chun i lampui buotsai a tih. 3 Thlalêra mi khêk rawl chun, Lalpa lamlien ding siel unla, Lampui tlûn siempek ro"tia a ziek ang khan, 4 Baptistu Johan chu a hung a, suol ngaidamna thu hrilin, simna baptisma a'n changtir a. 5 Judai ram kil tina mi le Jerusalema mi po po chun an hung pan a, an suolhai an inpuong a, Jordan vadungah a lo baptis tawl a. 6 Johan chun sanghawngsei hmula siem zakuo a hâk a, savun kawngchùn a chûn a, a bu chu khauthikthi le ram khuoizu a nih. 7 Ama chun, 'Kei nêka ropui lem ka hnungah a hung a, kei hi chu kûna a pheikhok hrui sût tlàk khom ka ni nawh. 8 Kei chun tuiin ka baptis cheu a, ama ruok chun Thlarau Thienghlimin a baptis ding cheu a nih" tiin a hril a. 9 Chuong hun lai chun Galili ram Nazareta inthokin Isu a hung a, Jordan vadungah Johanin ama chu a lo baptis a. 10 Tuia inthoka Isu a hung suok charin vàn inhonga inthokin vathu anga Thlarau hung tum a hmu a, vàna inthok chun rawl a hung suok a, 11 "Nang hi ka Naupa, ka Dittak chu i nih, i chungah ka lawm èm êm a nih" a hung ta. 12 Thlarauin ama chu thlalèrah a tir suok nghal a, 13 chu taka chun ni sawmli zet Setanin a thlêm a, ramsahai lai a khawsa a, vàntirkohaiin a rong an bawlpèk a. 14 Lung inah Johan an khum hnungin Isu chu Galili ramah a fe a, Pathien Chanchin Tha hrilin, 15 "Hun chu a hung tlung tah. Pathien ram khom a hnâi tah. Sim unla, Chanchin Tha hi ring ro" a ta. 16 Galili dìl kama Isu a fe lai chun dîla Simon le a unaupa Andri lèn dèng lai chu a va hmu a, nga mantu an ni hrim a. 17 Isun an kuomah, "Hung unla mi zui ro, mihriem mantuah siem ka ti cheu" a ta. 18 Chuongchun, an lènhai màksanin an zui ta nghâl a. 19 Chu taka inthoka hnâi tea chun Jebedai naupa Jakob le a unau Johan a hmu a, an longah chuongin an lènhai an lo siem tha a. 20 Anni khom chu a ko nghâl a, an pa Zebedai le inhlawfa an mi sorhai chu longah màksanin an zui ve tah a. 21 Kapernaumah an fe a, Sabat ni chun Sunagogah Isu a lût a, a zirtir tan nghal a. 22 Dàn zirtirtuhai ang ni loa thu nei taka a zirtir lei chun mak an ti hle a. 23 Sunagoga chun thlarau tirdakum pai mi pakhat a lo um ve a, 24 "Nazaret Isu, iem a na kan chunga thaw i tum? Mi sukse dinga hung i ni? Tu am i nih ti ka hriet-Pathien Mi thienghlim chu i nih" tiin a khêk suok ta phut a. 25 Isun, "To la, a sûnga inthok khan hung suok rawh" tiin a hal a. 26 Ramhuoi tirdakum chun a soisak hrep a, inring taka hrângin a sûnga inthokin a hung suok a. 27 An rêngin, "Hi hi ieng thil am an ta leh? Zirtirna thar, thuneina le inkop a ni hi tie! Thlarau tirdakumhai khom thu a pêk a, an awi el hi" tiin mak an ti thu an inhril tuo a. 28 Galili ram hmun tinah a chanchin chu a'n thang tan ta nghâl a. 29 Sunagoga inthoka an suok chun Jakob le Johan hai leh Simon le Andri hai in tieng chu an pan nghal a. 30 Simon tarpi chu khawsikin a lo zâl a, a damnaw thu chu Isu an hril a. 31 Ama chun a va pan a, a kut a chel a, a kei tho a, a khawsik chu a rè tah nghâl a, an rong a bawlpèk a. 32 Chu zàn tieng, nisa tlâk hnung chun damnaw tinrêng, ramhuoi man dâm chenin, a kuomah an hung thuoi a. 33 A khaw nawtin kotkhàr bula chun an hung khawm a. 34 Chuongchun, natna chi hrang hranga na mi tam tak chu Isun a sukdam a, ramhuoi tam tak a hnot suok bok a, an tong ding ruok chu a khappèk a, ama chu tu am a nih ti an hriet si leiin. 35 Isu chu zîng khaw var hmain a tho a, a suok a, hmun fienrielah a fe a, chu taka chun a va tongtai a. 36 Simon le a ruolhai chun an zong a. 37 An va hmu chun, "Mi po poin an zong che" an ta. 38 Isu chun, "Hmun dang, a khaw sê vèla khom fêng ei tiu, chu hmuna hai khom chun thu ka hril theina dingin, chu chu ka hung san a ni si a" a ta. 39 Chuongchun, Galili ram po poa an Sunagoga hai chun lûtin thu a hril pei a, ramhuoihai a hnot suok a. 40 Chun, a kuomah phâr a hung a, a hmaah dingthathuonin, "I nuom chun i mi sukthieng thei" tiin sukdam a ngên a. 41 Isun ama chu a lunginsiet ëm êm a, a hei ban a, a them a, "Nuom e, lo inthieng ta rawh" a ta. 42 A phâr chu a dam ta nghal a, a hung inthieng ta a. 43 Khau taka thu pein, 44 "Tu kuoma khom ieng khom hril dêr naw rawh; amiruokchu thiempu va'n entir la, i dam ngei ti an hrietna dingin, Mosie thupèk ang khan inthienna thil va'n hlàn rawh" tiin a'n fetir nghâl a. 45 Ama chu a fe a, chu thu chu a hril a hril a, tlâng a'n sampui ta lem a. Chu lei chun Isu chu uolau takin khuoah a lût thei ta naw a, hmun fienrielah a um ta lem a. Chuong sà khom chun hmun tina inthokin mihaiin an hung pan a.
1 Ni iemani zàt hnunga Kapernaum a hung lùt nawk chun mihaiin inah a um ti an hung hriet tah a. 2 Chuongchun, in keng lo khopa tam an hung pung khawm a, kotkhàr bul chen khom an inhnaw sip vong a, an kuomah thu a hril a. 3 Mi paliin zeng an hung zawn a, a kuom tieng an hung panpui a. 4 Mipui an tam leiin Isu kuom an hung paw thei naw a, Isu umna zawn lai in chung chu an thiek a, zeng chu a khum pumin an zuk thlâk thla a. 5 An ringzie Isun a lo hmu chun zeng kuomah, " Ka naupa, i suolhai ngaidam a ni tah" a ta. 6 Chu taka inthung vehai lai chun Dàn zirtirtu thenkhat an um a. 7 An lungrilin, "Hi pa hin ieng leia hieng thu hi a hril am a na? Pathien a hrilsiet a nih. Pathien chauh naw chun tuin am suol a ngaidam thei a?" an ti a. 8 Chuong thil chu lungrilin an ngaituo ti Isun a hriet nghâl a, an kuomah, "Ieng dinga lungrilin chuong thil chu in ngaituo am a na? 9 Zeng kuomah, 'I suol ngaidam a ni tah' ti le 'Tho la, i puonpha chawi la, lawn ta rawh' ti hi a ieng am a olsam lem a? 10 Amiruokchu, hi khawvela hin Mihriem Naupain suol ngaidam theina a nei ti in hrietna dingin" a ta, 11 zeng kuoma chun, "Tho la, i puonpha la la, i inah fe rawh ka ti che" a ta. 12 Chuongchun, ama chu a tho a, a puonpha a lâk a, an mit hmua ngei chun a suok ta nghâl a. An rêng chun makti êm êmin, "Hieng ang hrim hrim hi ei la hmu ngai nawh" an ta, Pathien an inpàk a. 13 Chun, Isu chu Galili dìl kamah a lêng nawk a, mipui tam tak a kuomah an hung a, anni chu a lo inchûktir a. 14 A fe malamin Alfai naupa Levib chu sie chawina hmuna thung a hmu a, a kuomah, "Mi zui rawh" a ta, ama chu a tho a, a zui ta nghal a. 15 Levi ina zànbu a fàk laiin siekhontu le mi suol tam takin Isu le a zirtirhai chu thlaithlèng an otpui a, a zuitu chu an thahnem hle hrim a. 16 Siekhontu le mi suolhai zânbu a kilpui lai Farisaihai laia Dàn zirtirtuhaiin an hmu chun a zirtirhai kuomah, "Ieng dinga siekhontu le mi suolhai lai bu a fâk am a na?" an ta. 17 Isun chu chu a hrietin an kuomah, "Mi hriselin daktor an mamaw naw a, mi borsawmhaiin a nih an mamaw lem. Mi felhai lam dinga hung ka ni naw a, mi suolhai insimtir dinga hung ka ni lem" a ta. 18 Farisaihai le Johan zirtirhai bu nghei ni chun mi tuhai amanih an hung a, Isu kuomah, "Johan zirtirhai le Farisaihaiin bu an nghei a, ieng dinga i zirtirhaiin an nghei ve ngai naw?" tiin an hung indon a. 19 Isun an kuomah, "Anni lai moneitu a um sûngin mo thuoituhaiin bu an nghei hlak am a ni? Moneitu an umpui sùng chun bu an nghei ngai nawh. 20 Moneitu chu an kuoma inthoka thuoi hmang a ni hun la hung tlung a ta, chu pha ruok chun la nghei vêng an tih. 21 "Tu khomin puon thar la rin loin puon hlui an phawk ngai nawh, phawk tah ang sien, puon thar chun puon hlui chu kei tawm a ta, inek nasa zuol a tih. 22 Chun, tu khomin savun peng hluiah uoiin thar an thun ngai nawh, thun ta ang sien, uoiin thar chun savun peng hlui chu mor koi a ta, uoiin le a peng chu se vé vèng a tih; uoiin thar chu savun peng tharah an thun lem hlak" a ta. 23 Sabat tum khat chu Isu le a zirtirhaiin huit bu bil an hraw laiin a zirtirhaiin bu vui an thliek a. 24 Farisaihai chun Isu kuomah, "En rawh, ieng leia Sabat nia thaw thieng lo an thaw am a na?" an ta. 25 Ama chun, "Phingtâma Davida le a ruolhai an um laia an thil thaw kha in tiem ngai naw maw? 26 Thiempu laltaka Abiathar a thang lai a na, Davida chu Pathien inah a lût a, thiempuhai chauh fàk thieng hlânbeic chu a fâk a, a ruolhai khom a pêk ve a ni kha" a ta. 27 Ama bok chun an kuomah, "Sabat hi mihriem ta dinga siem a na, mihriem hi Sabat ta dinga siem a ni nawh. Chuleiin, Mihriem Naupa hi Sabat chunga chen khom Lalpa a nih" a ta. 28 (A um nawh)
1 Chun, Sunagogah a lût nawk a, chu taka chun mi pakhat kut zeng a lo um a. 2 An hêk theina dingin Sabat niin zeng chu a sukdam ding le ding naw an enthlàk a. 3 Kut zeng kuoma chun Isun, "Mipui hmaa hin hung ngìr raw leh" a ta. 4 An kuoma chun, "Sabat ni hin sukthat am suksiet, sukdam am sukhlum a thieng?" tiin a'n don a, sienkhom an to chip a. 5 An lungril ngarzie a hmuin poi a ti hle a, lungsen taka anni rawi chu a mel kuol hnungin zeng kuoma chun, "I kut phar suok rawh" a ta, a hei phar suok chun a dam ta nghâl a. 6 Chuongchun, Farisaihai chu an suok a, Isu an sukhlum thei dàn ding phierin Heroda pawlhai le chun an inrawn khawm tah nghâl a. 7 Isu chu a zirtirhai leh dil kam tieng an fe a, Galili rama inthoka hung mipui tam takin an zui a. 8 A thilthaw ropuizie an hrietin Judai ram dâm, Jerusalem dâm, Idumia ram dâm, Jordan râla inthok dâm le Sidon le Tura le an sè vêl khaw hrang hranga inthok dâmin mi tam tak an hung bok a. 9 Mipui an tam si a, an hung hneng chêp taluo pal thutah tiin a chuongna ding long lo buotsai lawk dingin a zirtirhai chu a hril a. 10 Mi tam tak a sukdam ta leiin natna nei taphot chun ama them tumin an baw huoi huoi el si a. 11 Thlarau tirdakumhai khomin ama an hmu pha bokkhupin, "Nang Pathien Naupa chu i nih" tiin an khêk hlak a. 12 Sienkhom, ama ruok chun a nìna tak chu puong lo dingin a khap tlat tawl a. 13 Isu chu tlângah a fe a, a mi ditzawnghai po chu a ko a, a kuomah an hung a. 14 A kuomah um a, a thu hrila a tir suok ding, 15 ramhuoi khom hnot suok thei mi sawmpahnih, 'tirko' tia a kohai chu a ruot a. 16 Sawmpahni a ruothai chu Simon (Peter an ti bok) hai, 17 Zebedai nau Jakob le a unau Johan, 'Bonergia' (Vàninrûm nau) an ti hai, 18 Andri hai, Filip hai, Bartholomai hai, Mathai hai, Thoma hai, Alfai naupa Jakob hai, Thadaid hai, Kanan mi Simon hai, 19 a'n mantirtu Juda Iskariot hai chu an nih. 20 Chun, Isu chu inah a lût a, mipui an hung pung khawm nawk a, a zirtirhai leh bu fâkna hun takngiel khom an nei hlei thei naw a. 21 A sûnghaiin chu chu an hrietin, "A thluok a buoi an ta chu!" an ta, ama thuoi dingin an hung inthok a. 22 Jerusalema inthoka hung thla Dàn zirtirtuhai khom chun, "Belzebub a zawl a ni hi. Ramhuoi lal leiin annawm ramhuoihai a hnot suok hlak" an ti bok a. 23 Anni chu Isun a ko a, tekhinthu hmangin an kuomah, "Setanin Setan bok iengtin am hnot suok thei a ta? 24 Ram khom ama le ama indo chu a ngîr thei nawh. 25 Mani le mani indo sûngkuo khom an ngìr suok thei bok nawh. 26 Setan khom ama le ama inkhinga a'n do si chun ngîr thei naw ni a, bohmang lem a tih. 27 Mi hrât chu an khuop de hmasa zet naw chun a inah hlukhumin a sum an làkpèk el thei nawh, an khuop de hnung ruok chun rok thei tàng an tih. 28 Thu dik ka hril cheu hi, mihai suolna po po le Pathien an hrilsietna po po chu ngaidam nîng a ta, 29 Thlarau Thienghlim hrilsetu ruok chu ngaidam ni ngai naw nih, a thilthaw chu chatuona thiem naw changna suol a ni si a" a ta. 30 "Thlarau tirdakum a zawl a nih" an ti lei khan chu chu a hril a nih. 31 Isu nu le a unauhai chu an hung tlung a, tuolah an ngìr a, ama ko dingin mi an tir a. 32 A bula mipui thunghai chun a kuomah, "En ta, tuola son i nu le i unauhaiin an zong che" an ta. 33 Ama chun, "Ka nu le ka unauhai chu tuhai am an na?" a ta. 34 A bula thunghai chu a hang en vel a, "En ta u, ka nu le ka unauhai hi. 35 Tu khom Pathien ditzawng thawtu chu, chu ngei chu ka unauhai, ka farnuhai, ka nuhai an nih" a ta.
1 Tum khat chu Galili dil kamah a'n chùktir nawk a. Mipui pung khawm chu an tam êm leiin dila longa chun a chuong a, a'n thung a, mipui chu dil kam hrûl khawmuola chun an um a. 2 Tekhinthu hmangin thil tam tak a'n chùktir tawl a. 3 An kuoma chun, "Ngai ro, loneitu hi bu chi thè dingin a fe a; 4 a hang thè chun a then lampuiah a tla a, vatehaiin an hung tlàn zo a. 5 A then pielthlèng, pil inphânnaah a tla a, a hung mawng nghâl a, 6 sienkhom hnuoi a sà naw leiin nisa a hung insàng a, a em vuoi a, zung a kei naw leiin a rop a. 7 A then hling buk lai a tla a, hling chu a hung inthang a, ra nei thei loin a dîp hmang a. 8 A then ruok chu pil thatna hmunah a tla a, a hung mawng a, a'n thang a, a let sawmthum dâm, a let sawmruk dâm le a let za dâmin rà a'n suo a" a ta. 9 Isun an kuomah, "Ngaithlâkna dinga na nei chun ngaithla ngun raw se" a ti bok a. 10 A fâla an um hnungin Sawmpahni le a thuoihruoi danghai chun tekhinthu umzie chu an indon chieng a. 11 Ama chun an kuomah, "Pathien ram thurûk chu in kuoma pèk a ni a, puo tieng mi ta ding ruok chun tekhinthu vonga hril a nih. 12 'En en siin hmu si nawng an ta, Ngaithla ngaithla siin hre si nawng an ta; Chuong chu ni naw sien ngha kîr an ta, Ngaidam an ni ta ding bah'ti ang khan" a ta. 13 Ama bokin, "Hi tekhinthu hi in hriet thiem naw chun ieng tin am tekhinthu dang lem chu hre thiem phâk hrim in ta? 14 Loneitu chi thè chu thu a nih. 15 Lampuia tlahai chu hieng ang hi an nih: thu an ngaithlàk a, sienkhom Setan a hung nghâl a, annia thu thea um chu a lâkpèk nawk nghâl hlak. 16 Chuong ang bokin pielthlèng chunga thè chu hieng ang hi a nih: thu chu an hriet a, lawm takin an pom nghal a, 17 sienkhom anniah zung a kei naw a, sawt naw te chauh a dai a, chu hnung chun thu leia rinumna amanih suknomnatna amanih a hung um pha an tlu nghâl hlak a nih. 18 Hling buk laia thè khom hieng mihai ang hi an nih: thu chu an hriet a, 19 sienkhom damsûng thil lungkhamna hai, hausak thlâkhlàna hai le thil dang châknahai chu an hung lùt a, thu chu an dîp hmang a, ra loin a um hlak a nih. 20 Hnuoi thaa thè ruok chu, thu chu hre a, pom a, a lêt sawmthum dâm, a lêt sawmruk dâm le a lêt za dâma rahai hi an nih" a ta. 21 Ama bokin an kuomah, "Khawnvar chu leikhawra khup khum dingin amanih, khum hnuoia sie dingin amanih in sit hlak am a ni? A sienaa sie ding a ni lem naw maw? 22 Puong lo dinga ip ieng khom a um naw a, inlang lo dinga thup ieng khom a um bok nawh. 23 Ngaithlâkna dinga na nei chun ngaithla ngun raw se" a ta. 24 Chun, ama bokin, "In thil ngaithlàk chu ngun takin ngaituo ro; in inkhìna hmang ngei chun inkhìpêk an ti cheu a, bel sa lem hman an tih. 25 A nei chu pèk belsa nîng an ta, a nei naw chu an nei sun khom lapêk an tih" a ta. 26 A hril pei a. "Pathien ram chu miin a loa thlài chî a thè ang hi a nih. 27 Zànah a in a, sùnah a tho a, a hriet naw karin chî chu toin sùn le zànin a'n thang zing a nih. 28 Hnuoi chun amain ra a hung insuotir hlak a, a hmasa takin a kûng, a dotah a vùi, chu zoah a vùia bu mal kim chu. 29 A rà chu a hung hmin a, bu sîk a hun tàk leiin kawiten a ât hlak a nih" a ta. 30 Chuongchun, a hril pei a. "Pathien ram chu ieng le'm hrilkhiin, ieng tekhinthu am hmangin hrilfie tâng ei ta? 31 Antam mu, chi ei thè hlak po po laia chîn tak ang hi a nih. 32 An hang thè chun thlài dang po po nêka lienin a hung inthang a, lien takin a hung inzâr a, chunglèng vatehaiin a buk chu riebûkah an hmang hlak" a ta. 33 Chuong ang tekhinthu hmang chun an hriet thiem thei zawng dingin thu chu an kuomah a hril hlak a; 34 tekhinthu naw chun an kuomah thu a hril ngai nawh. Ama zirtirhai kuoma ruok chu fienrielah iengkim a hrilfie hlak. 35 Chu ni zàn tieng chun a zirtirhai kuomah, "Ràl khing tieng son kâi ei tiu" a ta. 36 Mipuihai chu an màksan a, a chuongna long ma chun ama chu an fepui a, long dang khom an thang ve a. 37 Chun, thlipui na takin a hung hràng a, tuifawn chu longah a hung invor lùt a, long chu a pil vâng vâng el tah a. 38 Ama chu long mei tieng lukham khamin a lo in a. A zirtirhai chun an kei thoa, "Zirtirtu, kan bohmang el ding hi poi i ti naw maw?" an ta. 39 Ama chu a hung tho a, thli chu a hal a; tuifawn kuoma khom chun, "To la, um tok tok rawh" a ta. Thli chu a ma a, a hung rè ta thup el a. 40 A zirtirhai kuoma chun, "Ieng dinga chuong lawma in ti am a na? Ringna hrim in nei naw maw?" a ta. 41 Ti êm êmin, "Hi pa hi tu'm an ta le, thli le tuifawn chenin a thu an awi el hi?" an inti tuo a.
1 Galili dîl ràla Gerasinf mihai ram chu a tlung a. 2 Longa inthoka a hung suok chun thlarau tirdakum pài mi pakhat, thlàn hmuna inthoka hung chun a'n tuokpui a. 3 Chu pa chu thlàn hmunah a khawsa hlak a, tu khomin an thuhnè thei ta naw a, khaidiet khomin an thlung hnè ta nawh. 4 Khaidieta khit a, kol an inbuntir chang khomin khaidiet chu a kei tan a, thîr kolhai khom a suksiet pei a, tu khom a thunun zo an um nawh. 5 A sùn a zànin thlàn hmun le tlânga hai a khêk tuor tuor a, lung dàmin a'n àt thi neng nung hlak a. 6 Hla taka inthoka Isu hung a hei hmu chun a kuom tieng a tlân phei a, kûnin chibai a bûk a. 7 Rawl inring taka khêkin, "Isu, Pathien Chunghnungtak Naupa, ieng angin am mi law i tum a na? Mi soisa naw hràm dingin Pathien hmingin ka ngèn che" a ta. 8 Isun, "Nang ramhuoi porchê, mihriem sûnga inthok khan suok rawh" tia thu a pêk tah leiin chuong chu a hril a nih. 9 Chun, Isun, "I hming iem a na?" tiin an don a. Ama chun, "Ka hming chu Sângrukg a nih, tam tak kan nih" a ta. 10 Chu rama inthoka anni chu hnot suok lo dingin a ngên tâl a. 11 Chu tlâng panga chun vok ruol tam tak an tla khawm a. 12 Ramhuoihai chun, "Vok ruol lai son mi'n fetir la, an sûngah mi'n lûttir rawh" tiin an ngèn a. 13 Isun a phalpèk a. Chuongchun, thlarau porchehai chu an hung suok a, vok sûnga chun an lùt a. Vok ruol chu sânghni laia tam an na, dîl pang tênbarama chun an tlàn thla a, dîlah an tla hlum ta vong a. 14 Vok enkoltuhai chu khuo le a sè vèla mihai chu hril dingin an tlàn a, ieng thil am a tlung ti en dingin mihai chu an hung tlàn khawm a. 15 Isu kuom an hung tlung chun ramhuoi zawl Sângruk kha puon sil a, lungril pangngai puta inthung an hmu a, an tì èm êm a. 16 Ramhuoi zawl pa chunga thil hung tlung dàn le vok ruol chanchin chu mit ngeia hmutuhai chun an lo hril a. 17 Chuongchun, a ram mihai chun Isu chu an ram suoksan dingin an ngèn a. 18 Longa Isu a chuong ding lai chun ramhuoi zawl pa khan a kuoma um zing a ngên a; 19 sienkhom Isun a phal naw a, "I inah i sûnghai kuomah fe la, Lalpan i ta dinga thil a thawpèk chê le a lunginsietzie chê thu hi va hril lem rawh" a ta. 20 Ama chu a fe a, Dekapolih biela khuohaia chun Isun a ta dinga thil a thawpèk ropuizie chu a tlâng insampui a, mi po poin mak an ti hle a. 21 Longa ràl khing tieng Isu a hung kai nawk chun mipui tam tak an hung pung khawm a. 22 Sunagoga hotu pakhat, a hming Jaira chu a hung a, Isu a hmu chun a ke bulah a bokkhup a, 23 "Ka naunu nghàklakte a thi vâng vàng a. Hung hrâm la, a chungah kut innghat la, hung har a ta, dam nawk el a tih" tiin nasa takin a ngèn a. 24 Chuongchun, Isun a fepui a, mipui tam takin an zui a, an inhneng nuk nuk a. 25 Nuhmei pakhat, kum sawmpahni thi pûta damnaw a um a. 26 Daktor tam tak a pan tah a, a nei po po a sèng hnung khomin that tieng nêkin zuol tieng a pan deu deu lem a. 27 Chu nu chun Isu chanchin a lo hriet a, a hnung tieng mipui kâra chun a hung a, a puon chu a them a. 28 A lungril chun, "A puon chauh khom tawk lang, dam ka tih" a ta. 29 Chuongchun a thi pût chu a hung chàt a, a natna chu a dam tah ti a taksa chun a hriet nghàl a. 30 Isu khomin amaa inthokin thilthawtheina a suok ti a hriet nghal a, mipui lai chun a ngha vêl a, "Tu'm a na ka puon them kha?" a ta. 31 A zirtirhai chun, "Mipuiin an hneng sup sup che hi i hmu nghal a, iengtiziea a themtu che chu in don?" an ta. 32 Ama themtu chu hmu tumin a ngha vêl a. 33 A chunga thil hung tlung chu hrein nuhmei chu ti le inthin pumin a hung a, a hmaah a bokkhup a, iengkim indik takin a hril ta vong a. 34 Isu chun a kuomah. "Ka naunu, i ringna i dampui a nih, thlamuong takin fe ta la, i natna chu hung dam song ta raw se" a ta. 35 Isu a la tong zing laiin Sunagog hotu Jaira ina inthoka hunghai chun, "I naunu a thi tah. Zirtirtu hi suksawl ta da'l rawh" an hung ta. 36 Isu ruok chun an thu hril chu ngaisak loin Sunagog hotupa kuoma chun, "Ti naw la, ring el rawh" a ta. 37 Peter hai, Jakob hai, Jakob unaupa Johan hai ti chauh naw chun mi dangin an zui a phal naw a. 38 Sunagog hotupa in an va tlung a, buoi mur mura an lo tap khêk veng vung chu an hmu a. 39 A lût malam chun an kuomah, "Ieng dinga hienga buoia in tap khêk am a na? Naupang chu a thi nawh, a in a ni lem" a ta. 40 Anni chun an nuisan a. Chuongchun, an rêngin a hnot dok a, naupang nu le pa le ama zuituhai chauh chu a thuoi a, naupang zàlna pindana chun an lût a. 41 Naupang kut chu a chel a, a kuomah, "Talitha, kum" a ta, chu chu "Bawinu, tho rawh" tìna a nih. 42 Nuhmei naupang chu a hung tho a, a lawn ta nghàl a, ama chu kum sawmpahni mi a nih. Mak an ti takmeu a. 43 Ama ruok chun an kuomah, "Tu khom hril naw ro" a ti tlat a; fàk ding pe dingin a hril bok a.
1 Chu taka inthok chun a suok a, a khuo tieng a pan a, a zirtirhaiin an zui pei a. 2 Sabat ni a hung tlung chun sunagogah a zirtir a, a thu ngaithlatu mi tam tak chun mak an ti hle a. "Hieng hi khaw laia inthoka a hriet am nîng a ta? Thilmak thaw theina khop hiel varna pèka a um hi ieng varna am ni tâng a ta? 3 Hi pa hi Mari naupa, Jakob hai, Josefa hai, Juda hai, Simonhai unaupa mistiri kha a ni naw am a ni? A farnuhai khom eini lai an um zing an naw maw?" an ta, a chungah an lungni naw hle a. 4 Isu chun, "Zawlnei chu ama khuo tieng le a laichinhai le ama sûngkuohai lai chawimawiin a um ngai naw hrim a nih"i a tìsan a. 5 An chungah kut innghata damnaw tlawmte a sukdam ti chauh naw chu chu taka chun thilmak hrim a thaw thei nawh. 6 An ring nawna lei chun mak a ti hle a. 7 Chuongchun, inchûktir malam peiin khaw hrang hrang a fang a. Sawmpahnihai chu a ko a, a kop peiin a tir suok a, thlarau tirdakumhai chunga thuneina khom a pêk bok a. 8 An kuomah, "In inzin pha funghrol chauh naw chu bei dàm, mansa dâm chawi naw unla, kawngchûnah poisa ip khâi bok naw ro. 9 Pheikhok ruok chu bun un la, sienkhom zakuo inthlâkna ding khom chawi naw ro. 10 In khaw sir in suoksan hmâ khat in tlungna ngaiah tlung zing ro. 11 Tu khuo khomin an lawm naw cheu a, in thu an ngaithlàk naw chun, chu khuo chu in suoksan ding pha an thaw indik nawzie inhriettirna dingin in kephaa pilvut chu thin thla ro" tiin thu an chà tawl a. 12 Chuongchun an inzin suok a, suol sim dingin mihai an zirtir a. 13 Ramhuoi tam tak an hnot suok a, damnaw tam tak hriek an nâl a, an sukdam bok a. 14 Isu hming chu a'n thang ta êm leiin Lal Heroda khomin a lo hriet ve tah a. Mi thenkhat chun, "Baptistu Johan kha mithi laia inthokin a hung tho nawk a, chuleiin hieng thilmakhai thawtheina hi amaah a thok a nih" an ta. 15 A thenin, "Elija a nih" an ta; a then ruok chun, "Zawlnei, tien laia zawlnei pakhat ang kha a nih" an ti bok a. 16 Herodan a lo hriet ruok chun, "A lu ka tanpèk Johan kha a nih, a hung tho nawk tah a ni chu!" a ta. 17 Heroda ngei chu Johan man dinga thupetu le lung ina khumtu a nih. Ama hin a unaupa Filip nuhmei Herodi chu nuhmeiah a neipèk leiin hieng thil hi a thaw a nih. 18 A san chu Heroda kuomah Johanin, "I unaupa nuhmei i làkpèk hi a thieng nawh" tiin a hril a. 19 Chuleiin Herodi chun Johan chu a theida a, sukhlum a nuom a, sienkhom a thei naw a; 20 Herodan Johan chu mi fel le mi thienghlim a nih ti a hriet a, a ti a, a hum tlat a. Johan thuhril a ngaithlàk chàngin Heroda chu inngaituo buoi hle hlak sienkhom a ngaithlàk nuom tlat bok si. 21 A tawpa chun hun remchang a hung tlung a. Heroda piengcham ni chun ruoi ropui tak a buotsai a, chu taka chun sorkar mi lien, sipai hotu le Galilia mi challanghai chu a fiel khawm a. 22 Herodi naunu chu a hung lùt a, a lâm a, Heroda le a ruoi kîltuhai chu a suklawm hle a. Heroda chun, "Ieng khom i hni taphot chu pêng ka ti che" a ta. 23 Chun, inkhâm meuin, "I mi hni taphot chu pêng ka che, ka ram zâtve hiel khom" tiin thu a tiem a. 24 Ama chu a suok a, a nu kuomah, "Iem ka hni ding?" tiin a va'n don a. A nu chun, "Baptistu Johan lu" tiin a lo hril a. 25 Inhmaw takin lal kuoma chun a kîr nawk nghal a, "Tu ngei hin thlèngah Baptistu Johan lu mi pe rawh" a ta. 26 Lal chun nasa takin poi a ti a, sienkhom a thutiem le a ruoi kîlpuihai lei chun sêl a rin a. 27 Chuongchun, vêngtu sipai pakhat chu Johan lu la dingin a tir nghal a, lung ina um Johan lu chu a va lâk a, 28 a lu chu thlèngin a hung dom a, nunghàk kuoma chun a pêk a. 29 Johan zirtirhaiin chu chu an hriet phing leh a ruong chu an va làk a, thlànah an vui a. 30 Tirkohai inzin chu Isu kuomah an hung kîr nawk a, an thilthawhai le an thu inchûktir po po chu an ripawt a. 31 A kuoma hung le suok an inzi nuk nuk a, bu tak ngiel khom an fàk hman naw leiin Isun, "Nangni rawi chauh hung inla, fienriel hmunah fèng ei ta, ei chawl hadam ding a nih" a ta. 32 Chuongchun, hmun fienriel panin longin an suok a. 33 An suok chu mi tam takin an hmu a, anni an nih ti an hriet chun khaw tina inthoka hung tlàn khawmhai chun khawmuolah kein an lo tlàn khal a. 34 Longa inthoka an hung suok chun mipui tam tak a hmu a, vêngtu nei lo beram ang an ni leiin a lunginsiet tawl èm êm a, thu tam tak a zirtir a. 35 Khuo a hung inhnu ta hle a, a zirtirhai chu a kuomah an hung a, "Hi hi hmun kilkhawr a na, khuo khom an hnu tah a, 36 fàk ding iemani bèk an inchawk theina dingin ei kawl vèl lo le khuoa hai infetir tawl ta la" an hung ta. 37 Ama chun, "Nangnin fàk ding pe lem ro" tiin a lo don a. Anni chun, "Chuong zàt bei inchawkna ding chun patling thla riet hlaw hiel ngai a tih. Chuong zât zàt sènga va'n chawin kan pèk tawl dim a ni?" an ta. 38 Ama chun, "Bei ieng zât am in nei hang en ta u" a ta. An nei zàt an hriet phing leh, "Bei phêk nga le ngate pahnih" an ta. 39 An rêngin a pawl pawla hlobet chunga inthungtir dingin a zirtirhai chu thu a pèk a; 40 za dâm, sawmnga dâm peiin an inthung khawmtir a. 41 Ama chun bei phêk nga le ngate pahni chu a lâk a, vàn tieng nghaa lawmthu a hril zoin bei chu a khoi a, mipui kuoma sem dingin a zirtirhai chu a pêk a, nga khom chu a pêk seng bok a. 42 An rêng chun tlai takin an fàk a; 43 bei le nga an fàk bâng an rût khawm chu bawm sawmpahni sip a nih. 44 Bei fatuhai chu patling ngot khom sângnga an nih. 45 Isun mipui an tintir lai chun a zirtirhai chu ràl khing tieng Bethesaida khuo pana lo fe hmasa dingin longah an chuongtir nghal a. 46 Mipui a'n tintir hnung chun tongtai dingin tlângah a fe a. 47 Zàn tieng a hung ni chun long chu dil lailung a tlung tah a, Isu chu ama chauhin khawmuola chun a um a. 48 Long chu thliin a naw tienga inthokin a hung nam leiin an kar hràt thei naw a, an mangang ti a hmu a. Vartien lai velin dil chungah kea lawnin anni tieng a hung pan a, anni chu fe khêl a tum a. 49 Dîl chunga lawn an hmu chun phûng an sawn a. 50 An rêng chun an hmu a, thlabârin an khêk chùl a. Ama chun a biek nghal tawl a, "Lung muong takin um ro, kei ka ni annawm, Ti naw ro" a ta. 51 Chuongchun, longa chun a chuong ve a, thli chu a rè tah a. 52 Maktinain an sip a, a bei sukpung thu kha a ngaina an la hriet naw bok leh; an ngaituonain a la man phâk si nawh. 53 Dîl ràl khing tienga Genesaret ram an kài chun an long an thlung a. 54 Longa inthoka an hung suok chun mihaiin Isu a nih ti an lo hriet nghal a. 55 Chu biel po poa chun hril vêl dingin an tlàn sup sup a, a um ti an hrietna taphotah damnawhai chu an khum pumin an hung zawn a. 56 Khaw tê, khaw lien le loa hai, khaw lai khom a fèna taphotah damnawhai chu dawr hmunah an zâl khup a, a puon hmor bèk them phalna an hni a, a them taphot an dam pei bok a.
1 Farisaihai le Dàn zirtirtuhai laia mi thenkhat Jerusalema inthoka hunghai chu Isu kuomah an hung a, 2 a zirtirhai laia thenkhatin kut sawp loa bu an fàk chu an hmu a. 3 Farisaihai le Juda mi po po chun an upahai chìng dàn chel tlatin an dàn anga kut an sawp zet naw chun bu an fàk ngai nawh. 4 Bazar hmuna inthoka an hung kîr khomin an insawp zet naw chun thil an fàk ngai nawh. Chîng dàn tam tak an zawm laia thang sa ve chu no hai, tuibêl hai, ketli hai le bu fâkna dawkàn hai sawp a nih. 5 Chuongchun, Farisaihai le Dàn zirtirtuhai chun Isu kuomah, "Ieng dinga i zirtirhaiin upahai chìng dàn zawm ve loa kut sawp loa bu an fàk hlak am a na?" tiin an indon a. 6 Ama chun, "Isaiin nangni lêmderhai chungthu a ziek kha a lo indik ngot el:'Hienghai rawi hin bauin an mi'n pàk a, An lungril ruok chun an mi hlat hle si; 7 Thuringah mihriem thu an inchûktir a, An mi chawibiek khom hi a thlawn el a nih'ti hi" a ta. 8 Chun, ama bokin an kuomah, "Pathien dân thupêkhai hnawlin pipu chìng dàn in chel a. 9 In chìng dàn in vong theina dinga Pathien dân thupêkhai hnawl dàn chu in thiem khop hi! 10 Mosien, "I nu le pa chawimawi rawh, Tu khom a nu le pa hrilsetu chu sukhlum ngei ding a nih" a ta. 11 Nangni ruok chun in nu le pahai kuomah, 'Ka thâ i sor ding kha Korbanj a ni tah' in ti chun, 12 a nu le pain a thà an sor ding in phal ta ngai nawh. 13 Pipu chìng dàn in inhlàn sawng pei chun Pathien thu chu iengma loah in siem a, chuong ang thil tam tak chu in thaw hlak" a ta. 14 Chuongchun, mipuihai chu a ko khawm nawk a, "Mi tinin ka thu hi ngaithla seng unla, hre chieng ro. 15 Puo tienga inthoka mihriem sûnga lût chun ama a sukporchè thei nawh. Chuong nèk hmanin, mihriem sûnga inthoka suok hin a nih mi a sukporchè hlak chu. 16 Tu khom hrietna dinga na nei chun ngaithla ngun raw se" a ta. 17 Mipuihai chu a màksan a, inah a lùt hnungin a zirtirhaiin tekhinthu chu an indon chieng a. 18 Ama chun, "Nangni khom chuong lawm chun in lo mawl ve a ni maw? Ieng khom puo tienga inthoka mihriem sûnga lûtin ama a sukporchè thei nawh. 19 A san chu a lungrilah lût loin a phìngah a lût a, an hnawm suok nawk el a nih. (Hi hi iengkim fàk a thieng thu a hrilna a nih). 20 Sûnga inthoka suok hi a nih mihriem sukporchètu chu. 21 Sûnga inthok, mihriem lungrila inthoka suok chu ngaituona suol dàm, inngaina suol dàm, rûkrùkna dàm, tuolthatna dàm, uirèna dàm, 22 duàmna dâm, theidàna dâm, hlèmna dâm, hurna dâm, itsikna dàm, inhril sietna dàm, chapona dâm le intlawkna dàm a nih. 23 Chuong ang suol chu sûnga inthokin a hung suok a, mihriem a sukporchè hlak" a ta. 24 Chu hmun chu a suoksan a, Tura le Sidon bielah a fe a, in pakhatah a lût a, a hung thu tu hriet khom a nuom naw a, sienkhom a'n thup thei si nawh. 25 Nuhmei pakhat, a naunu ramhuoi tirdakum pai chun a chanchin a hriet charin a hung pan a, a ke bulah a bokkhup a. 26 Ama nu chu Grik mi, Suria Foinikiak pieng a na. A naunu sûnga inthoka ramhuoi hnot suokpèk dingin Isu a ngèn a. 27 Isu chun a kuomah. "Nauhaiin fa khop hmasa phot raw hai se. Nauhai bei làkpèka uihai kuoma pêk chu a'n dik nawh" a ta. 28 Ama nu chun, "Lalpa, ni chu ni e, sienkhom dawkàn hnuoia uihai khomin nauhai bei nawi tla chu an fâk hlak tho annawm" a ta. 29 Isun, "I thu hril lei tak chun kîr nawk ta la, ramhuoi chu i naunu sûnga inthokin a suok tah" a ta. 30 Chuongchun, inah a kîr a, ramhuoiin a suoksan, khuma zâl a naunu chu a hmu a. 31 Chu zoah Isu chun Tura biel a suoksan a, Sidon pal tlanga Galili dîlah tum thlain, Dekapoli biel a tlung a. 32 Mi pakhat, nasêt le tong fel thei lo hi a kuomah an hung thuoi a, a chungah kut innghat dingin an ngên a. 33 Isun ama chu mipui sìrah a kei bing a, a kutpârin a nakuo a khîkpèk a, chil a sâk a, a lei a thempek a. 34 Vàn tieng nghaa inthuok huoiin, 'Effata, a ta, chu chu "Lo inhong ta rawh" tìna a nih. 35 Chu phing leh a na a hung inhong a, a lei inkhuop khom chu a hung insùt a, fie takin a hung tong thei tah a. 36 Isun tu khom hril lo dingin thu a pêk a. Sienkhom a khap nasa po leh a chanchin chu an hril thang zuol sau a. 37 Mipuihai chu maktinaa sipin, "Iengkim tha takin a thaw a, nasêt dàm sukvarin tong thei naw khom an tongtir thei a nih" an ta.
1 Chuong lai vêl bok chun mipui tam tak an hung pung khawm nawk a. Fàk ding ieng khom an nei naw leiin Isun a zirtirhai chu a ko a, 2 "Mipuihai hi ka lunginsiet a nih; ni thum zet ka kuomah an um tah a, fàk ding hlak an nei si nawh; 3 phingtâma kan tîntir chun lam lakah tâmsawl rawi an tih, a then lem chu an hungna a hla si a" a ta. 4 A zirtirhai chun, "Tuin am hieng ang ram pilrilah mi hieng zozài hraina khop bei an hmu zo ding?" tiin an don a. 5 Ama chun, "Bei phèk ieng zât am in nei a?" a ta. Anni chun, "Phêk sarih" an ta. 6 Mipuihai chu hnuoiah inthung dingin thu a pêk a. Bei phêk sari chu a lâk a, lawmthu a hril zoin a khoi a, mipui lai sem dingin a zirtirhai chu a pêk a, an sem a. 7 Ngate tlawmte an nei bok a, chuonghai khom chu lawmthu a hril zoin a zirtirhai chu an semtir a. 8 Mipui chun an fàk a, an tlai ta seng a. An fàk bâng zirtirhaiin an rût khawm chu bawm sari sip a nih. 9 Anni rawi chu sângli lai an nih. 10 A'n tîntir zo chun ama khom a zirtirhai leh longin Dalmanuthal bielah an fe tah a. 11 A kuomah Farisaihai an hung a, an hung sêl a. Ama fiena dingin vàna inthoka inchikna thilmak inentir an phût a. 12 Lung intar taka inrûm suokin, "Ieng dinga tu lai ruoltharhai hin inchikna an zong am a na? Thu dik ka hril cheu hi, inchikna thilmak hrim hrim pèk ni naw ni hai" a ta. 13 Chuongchun, anni chu a mâksan a, longah a chuong a, ràl khing tieng panin a fe tah a. 14 Zirtirhai chun bei an lo chawi theinghil a, longa chun bei phêk khat chauh naw chu a dang hrim an nei nawh. 15 Isu chun, "Farisaihai chol le Heroda chol laka chun invêng unla, fimkhur hlè ro" tiin anni chu an fûi a. 16 Anni rawi chun, "Bei ei nei dêr naw leia a hril a nih" tiin an inhril tuo a. 17 Isun chu chu a lo hriet a, "Bei in nei naw thu ieng dinga in buoipui am a na? Tu chen khom hin hmu thei loin, in la man fûk thei naw zing a ni maw? Chuong lawm chun in lungril a lo chawlol a ni maw? 18 Mit nei siin in hmu thei naw a ni? Na nei siin in hriet thei naw rop maw? An leh, in theinghil hman el am an ta? 19 Bei phêk ngaa mi sângnga ka hrai tum khan fàk mahla bawm ieng zât am in rût sip a?" a ta. Anni chun, "Bawm sawmpahnih" an ta. 20 "An leh, bei phêk saria mi sângli ka hrai khan ieng zât am in rût a?" a ta. "Bawm sari" an ta. 21 Chuongchun, an kuomah, "Chuong sà khom chun a ngaina in la hriet naw rop maw?" a ta. 22 Bethsaida an hung tlung a, mi thenkhatin mitdel pakhat an hung thuoi a, ama chu them dingin Isu an ngèn a. 23 Isun mitdel chu a bânah a kei a, khaw puo tieng a thuoi suok a. A mitah chil a sâk a, a them zoin Isun, "Khuo i hmu thei am?" a ta. 24 Ama chu a hung dàk suok a, "Mi ka hmuh, thing lawn angin ka hmu tawl" a ta. 25 Isun a mit chu a hang thempèk nawk a. Chuongchun a mit a hung meng a, a hung dam fel a, iengkim chieng takin a hmu thei tah a. 26 Isun a kuomah "Khuoah lût ta loin in tieng fe nghâl rawh"m a ta. 27 Isu le a zirtirhai chun Filip Kaisari sè vêla khuohai chu an fang a. Lampuia chun a zirtirhai kuomah, "Mihaiin tum a nih an mi ti a?" tiin an don a. 28 Anni chun, "Baptistu Johan ti che an um a; Elija ti che an um bok a; a then ruok chun zawlnei tu amanih an ti che" an ta. 29 Ama chun, "An leh, nangnin tu am nia in mi hriet?" a ta. Peter chun, "Kristan chu i nih" tiin a don a. 30 Isu chun a nìna chu tu khom hril lo dingin a ti tlat a. 31 Chuongchun, Mihriem Naupan thil tam tak a tuor ngei ding thu dàm, upahai, thiempu lalhai le Dàn hretuhaiin an hnawl ding thu dàm, an sukhlum ding thu le a ni thumnaah a tho nawk ding thu dàm chu a zirtirhai a hril tan tah a. 32 Tlang takin chuong thuhai chu a hril tawl leiin Peter chun ama chu a thuoi hrang a, a kawk a. 33 Isu ruok chun naw tieng nghatsana a zirtir danghai tieng chu enin, "Setan, fe hmang dai rawh; Pathien thil ngaituo loin mihriem thil i ngaituo a ni hi" tiin Peter chu a kawk lêt a. 34 Mipuihai chu a zirtirhai le chun a ko khawm a, an kuomah, "Tu khomin a mi zui nuom chun mani insie hmangin, mani kraws putin mi zui raw se. 35 Tu khom mani hringna hum tum chun chân a ta, tu khom keima le Chanchin Tha leia hringna chân chun hum a tih. 36 Miin khawvel pumpui hi nei sien, a hringna chân si sien la, a ta dingin iem hlawkna a um a? 37 Miin a thlarau le inthleng dingin iem pêng a ta? 38 Tu lai ruolthar uire hmang le mi suolhai laia kei le ka thu inzàpui taphot chu, Mihriem Naupa hi a vàntirko thienghlimhai le a Pa ropuinaa inthuoma a hung pha chun ama chu inzàpui vêng a tih" a ta.
1 Chun, ama bokin, "Thu dik ka 2 Chun, ni ruk hnungin Isun Peter hai, Jakob hai le Johan hai chauh thuoiin tlâng insàngah a fepui a, anni chauha an um lai chun a hmêl a hung danglam ta a. 3 Hnuoia puon sawptu tu khomin an sukvâr thei naw khop hiela vârin a silfèn chu a hung vâr tle sur el a. 4 An kuoma chun Elija le Mosie an hung inlâr a, Isu leh an inbiek a. 5 Peter chun Isu kuomah, "Rabbi, hi taka um hi ei ta dingin a tha. Bawkte pathum khawng ei tiu, i ta dingin pakhat, Mosie ta dingin pakhat, Elija ta dingin pakhat" a ta. 6 An ti êm a, hril ding mumal khom a hriet nawh. 7 Chun, sûm a hung zìng a, anni chu a hung tuom a, sûma inthok chun rawl a hung suok a, "Hi hi ka Naupa, ka Dittak chu a nih, ama thu ngai ro" tiin. 8 Chuongchun, an ngha vêl ruoi a, anni lai chun Isu chauh naw chu tu dang khom an hmu ta nawh. 9 Tlânga inthoka an hung thlàk lai chun, mithi laia inthoka Mihriem Naupa a tho nawk hma chun an thil hmuhai chu tu khom hril dêr lo dingin Isun thu a pêk a. 10 Chu thu chu lungrilah an vong zing a, 'mithi laia inthoka tho nawk' ti umzie chu iem nîng a ta ti thu chu an hril tlâng hlak a. 11 Chun, anni chun, "Iengti ziea Dàn zirtirtuhaiin, 'Elija a hung hmasa zet ding a nih' an ti'm a na?" tiin Isu an indon a. 12 Ama chun, "Elija chu iengkim siem tha dingin a hung hmasa ding a ni hrim a nih. Chuong a ni si leh iengti ziea Mihriem Naupa hin thil tam tak tuor a ta, hnawlin a um bok ding a nih ti hi an ziek tlat am a na? 13 Sienkhom ka hril cheu hi, Elija chu a hung tah a, a chanchin an ziek ang ngei khan a chungah an nuom taphot an thaw ta kha" a ta. 14 Zirtir danghai kuom an zuk tlung chun an vêlah mipui tam tak an hmu a, Dàn zirtirtuhai leh an lo insêl a. 15 Isu hung an hmu chun an phawk hle a, a hmuok dingin an tlàn hum hum a. 16 An kuomah, "Hienghai le hin ieng thu am in lo insêl leh?" a ta. 17 Mipui laia pakhat chun a don a, "Zirtirtu, ka naupa, ramhuoi tong thei loin a man chu ka hung thuoi a. 18 A man pha leh a thè thlùk hlak a, a chil huom dàm a tla a, hâ a rawt a, a khong tlat hlak a. I zirtirhai hi hnot suok dingin ka ta, an thaw thei si naw a" a ta. 19 Ama chun, "Tu lai ruol thar, ringna tlasamhai, ieng chen am in kuomah um ka ta, ieng chen am ka ngai thei ding cheu a na? Naupang chu hung thuoi ro" a ta. 20 Chuongchun, an hung thuoi a. Ramhuoiin Isu a hmu char chun naupang chu a soisak nghàl a, hnuoiah a thè thlùk a, chil huom tla neng nungin an per chor chor a. 21 Isu chun a pa kuomah, "Hienga a umna hi ieng chen am an ta a?" tiin an don a. 22 A pa chun, "A naupang laia inthok a ni tah. Sukhlum tumin voi tam tak meia dàm, tuia dàm a pei ta hlak a. A thei hrâm chun mi lunginsiet la, mi thangpui lul rawh" tiin a ngên a. 23 Isun a kuomah, " I thei chun i ti maw? A ringtu ta ding chun iengkim hi thaw thei vong a nih" a ta. 24 Naupang pa chun, "Ka ring ie. Ka ringhlàna hi mi hnèpêk rawh" tiin a khêk suok ta nghal a. 25 Mipui an hung tlàn khawm hut hut Isun a hmu chun ramhuoi tirdakum chu a hal a, "Nang ramhuoi, tong thei lo le nasêt, thu ka pêk che, a sûnga inthok khan hung suok la, lût nawk ta ngai naw rawh" a ta. 26 Ramhuoi chu a khêk rak a, a soisak hrep hnungin a hung suok a. Naupang chu thi ang dêrin a um a, mi tam tak lem chun "A thi tah a nih" an ti hiel a. 27 Nisienlakhom, Isun a kut a chel a, a kei tho a, a hung ngìr suok el tah a. 28 Inah Isu a lût hnung chun a zirtirhaiin, "Iem a ta keinin kan hnot suok ve thei naw?" tiin a fâlin an indon a. 29 Ama chun, "Hieng thil hi chu tongtainao chauh naw chun hnot suok thei a ni nawh" a ta. 30 Chu taka inthok chun an fe suok a, Galili ram a fe thleng a, chu chu tu hriet khom Isun a nuom nawh, 31 a zirtirhai chu thil a zirtir lai a ni leiin. Chuongchun an kuomah, "Mihriem Naupa hi mihriemhai kuta inmantir nîng a ta, sukhlum an ta, a ni thum niah tho nawk a tih" a ta. 32 Amiruokchu, anni chun a thu hril umzie chu an hriet naw a, ama hlak an indon chieng ngam bok si nawh. 33 Kapernaum an hung tlung a. In an lùt chun, "Lampuia in insèlna kha ieng thu am an ta le?" tiin an don tawl a. 34 Lampuia chun "Eini lai tu am ropui tak a ta?" ti thua insêl an ni leiin an to ta chip a. 35 Isu chu a'n thung a, sawmpahnihai chu a ko khawm a, an kuomah, "Tu khom a hmasa tak ni nuom chu a nuhnung takah um a ta, mi po po rongbawltuah a um ding a nih" a ta. 36 Naupangte a hung kei a, anni lai a'n ngìrtir a, a kuo a, 37 "Tu khom ka hming leia hieng ang naupangte pakhat khom lawmtu chun kei a mi lawm a na, tu khom kei mi lawmtu chun kei a mi lawm ni loin a mi tirtu a lawm a ni lem" a ta. 38 Johan chun a kuomah, "Zirtirtu, tuin amanih i hmingin ramhuoihai a hnot suok kan hmu a, keini a zuitu che lai a thang ve si naw leiin thaw ta lo dingin kan hril el a nih" a ta. 39 Isu ruok chun, "Khap naw ro, tu khom ka hminga thilmak thaw sia mi hrilse zui nghal el thei an um nawh. 40 Tu khom a mi kaltu ni lo chu eini tienga thang a nih. 41 Thu dik ka hril cheu hi, Krista mi in ni leia dawn ding tuisik no khat khom ka hminga petu cheu taphot chun a lawmman ding chu chân naw top a tih. 42 "Tu khom a mi ringtu laia a chìn tak khom sukthlutu chu a rîngah bu rawtna lung lien tak inhlitirin tuifinrietah thlàk ni sien a ta dingin tha lem a tih. 43 I kutin suol a'n thawtir che chun tan el rawh, kut pahni neia Gehenna mei rêm thei loa fe nêkin kut khing bûla hringnaa lût chu i ta dingin a tha lem. 44 Chu taka chun pânna inlung a thi thei naw a, mei khom a rêm ngai bok nawh. 45 Chun, i kein suol a'n thawtir che chun tan el rawh, ke pahni neia Gehenna mei rêm thei loa lùt nêk chun ke khing bùla hringnaa lùt i ta dingin a tha lem. 46 Chu hmuna chun pânna inlung a thi ta ngai naw a, mei khom a rêm ta ngai bok nawh. 47 I mit khomin suol a'n thawtir che chun khel dok el rawh, mit khing hni neia Gehennaa peia um nêk chun mit khing khat neia Pathien rama lût i ta dingin a tha lem. 48 Chu hmuna chun pânna inlung a thi ta ngai naw a, mei khom a rêm ta ngai bok nawh. p 49 Mi tin chu meia raw thienghlimq an ni ding a ni si a; inthawina tinrêng khom chia saw thienghlim nîng a tih. 50 Machi hi a tha a, sienkhom a alna da ta sien, iengtin am suk-al nawk in ta? Nangniah machi nei un la, inngei diel dielin um ro" a ta.
1 Chu taka inthok chun Isu a suok a, Jordan vadung kaiin Judai ramah a fe a, mipuiin an lo bawr luoi luoi a; chuongchun, a thaw dàn pangngaiin a zirtir tawl a. 2 Farisai thenkhat a kuomah an hung a, ama fiena dingin, "Pasalin a nuhmei a màk a thieng am?" tiin an indon a. 3 Ama chun, "Mosien ieng thu am a pêk cheu?" a ta. 4 Anni chun, "Mosie chun inmâkna lekha zieka màk a phal" an ta. 5 Isu ruok chun, "In lungril ngar leiin Mosien hi dàn hi a ziekpêk chêu a nih. 6 Amiruokchu, thilsiem intan tira inthokin Pathienin anni chu pasal le nuhmeiah a siem a. 7 Chu lei tak chun pasalin a nu le pa màksan a ta, a nuhmei leh inkop an ta, r 8 an pahni chun pum khats ni tâng an tih. Pahni an ni ta naw a, kop khat an lo ni ta lem a nih. 9 Pathienin a zom tah chu mihriemin thè naw raw se" a ta. 10 Inah a zirtirhaiin chu thu bok chu an indon nawk a. 11 Ama chun, "Tu khomin a nuhmei thea mi dang a nei chun a nuhmei a uiresan a nih; 12 nuhmei khomin a pasal the a, mi dang a nei chun a uirê a nih" a ta. 13 A them dingin naupangte ruol an hung thuoi a, a zirtirhaiin an lo hal a. 14 Isun chu chu a hmuin a lung a khei a, an kuomah, "Naupanghai kha ka kuomah inhungtir unla, khap naw ro, Pathien ram chu hieng ang mihai ta hi a ni si a. 15 Thu dik ka hril cheu hi, naupang anga Pathien ram lawm naw taphot chu a sûngah lût naw top an tih" a ta. 16 Anni chu a pom a, mal a sawm tawl a. 17 Chu taka inthoka Isu an thok suok lai chun mi pakhat a hung tlàn a, a hmaah a dingthathuon a, "Zirtirtu Tha, chatuon hringna ka nei theina dingin iem thawng ka ta?" tiin an don a. 18 Isun a kuomah, "Ieng dinga Tha i mi ti? Tu khom tha an um nawh, Pathien chau naw chu. 19 Dàn thupêkhai chu i hriet annawm: tuol that naw, uire naw, inru naw, khêlin mi hêk naw, hlêpru naw, i nu le pa chawimawi rawh, tihai hi. " a ta. 20 Ama chun, "Zirtirtu, chuong po po chu ka tleirawl tîra inthokin ka zawm hlak" a ta. 21 Isun ama chu chieng takin a en a, a ngaina ta hle a, a kuomah, " Kong khat i la bâk ie. Fe la, i nei po po va zor la, pasiehai pe rawh, chuongchun vànah ro nei i tih. Chu zoah hung la, mi zui rawh" a ta. 22 Chu zet chun a hmêl a hung ngûi a, beidong takin a fe hmang a, mi hausa tak a ni si a. 23 Isu chu a ngha vêl a, a zirtirhai kuomah, "Mi hausa ta dingin Pathien rama lût a va'n tak awm de!" a ta. 24 Zirtirhai chun a thu hril chu mak an ti hle a. Isun a hril pei a, "Nauhai, Pathien rama lût chu a harsa rêng annawm! 25 Pathien rama mi hausa an lùt nêkin thim naa sanghawngsei a lùt thleng ol lem a tih" a ta. 26 A zirtirhai chun mak an tizuol a, "Chuong a ni chun tu am sandam ni thei an ta?" an ti sap sap a. 27 Isun anni chu a en a, "Chu chu mihriem ta ding chun thaw thei ruol a ni naw hrim a nih, Pathien ta ding ruok chun a ni nawh; Pathien ta dingin iengkim thaw thei a nih" a ta. 28 Peter chun a kuomah, "Ngai ta, keini hlakin iengkim màksanin kan zui ta si che a!" a ta. 29 Isun, "Thu dik tak ka hril cheu hi, tu khom keima lei le Chanchin Tha leia in le lo dàm, unauhai dàm, farnuhai dàm, nu dàm, pa dàm, nauhai dàm màksan chun, 30 tuta dam sûng lâ la hin in le lo hai, unau hai, farnu hai, nu le pa hai le nauhai a let za hmu ngei an tih, sukdudana hai le hun la hung tlung dinga chatuon hringna leh. 31 Nisienlakhom, mi tam tak a hmasa taka umhai chu a nuhnung tak la nîng an ta, a nuhnung taka um khom a hmasa tak la nîng an tih" a ta. 32 Jerusalem an pan tung lai chun Isun hma a thuoi a, a zirtirhai chun mak an ti hle a, a zuituhai chu an zâm hlè bok a. Sawmpahnihai chu Isun a ko bing a, a chunga thil hung tlung ding po po chu a hril tawl a. 33 "Ngai ta u, Jerusalemah ei hang fe nawk ding a nih. Mihriem Naupa hi thiempu lalhai le Dàn zirtirtuhai kuta inmantirin a um ding a nih. Anni chun thi dingin a chungthu rêl an ta, Jentelhai kutah pe suok an tih. 34 Ama chu nuizatbûrah hmang an ta, chil sâkkhum an ta, vuong an ta, sukhlum an tih; nisienlakhom ni thum niah tho nawk a tih" a ta. 35 Zebedai naupa Jakob le Johan chun ama chu an hung hnai a, "Zirtirtu, kan hni taphot che chu i mi thawpêk kan nuom" an ta. 36 Ama chun, "Iem thawpêk lang cheu in nuom a?" a ta. 37 Anni chun, "I ropuinaa chun i chang tieng pakhat, i voi tieng pakhat mi'n thungtir rawh" an ta. 38 Isu ruok chun, "In thil hni hi in hriet naw a nih. Ka no dawn ding chu in dawn ve thei dim a ni? Baptisma ka chang ding khom in chang ve thei dim a ni?" a ta. 39 Anni chun, "Thei kan tih" an ta. Isun, "Ka no dawn ding chu dawn in ta, baptisma ka chang ding khom chang vèng in tih. 40 Nisienlakhom ka chang tieng amanih voi tieng amania inthungtir chu ka thu a ni naw a, an buotsaipèkhai ta ding chauh a ni lem" a ta. 41 Zirtir dang sawmhaiin chu chu an lo hrietin Jakob le Johan chungah an lungni naw hle a. 42 An rêng chun Isun a ko khawm a, "Jentêlhai chunga rorêltua ruothai chu an chungah an insuklal êm êm hlak a, an mi lienhai khomin an chungah thu an nei hlè hlak. 43 Nangni lai ruok chu chuong ang chu a ni ve ding a ni nawh. Chu nêk hmanin, tu khom nangni laia a ropui tak ni nuom chu in rongbawltuah a um ding a nih. 44 Nangni laia a hmasa tak ni nuom khom mi po po siehlawah a um bok ding a nih. 45 Mihriem Naupa meuh khom a rong bawlpèka um dingin a hung naw a, rongbawl ding le mi tam tak intlannaa a hringna pe dingin a hung lem a nih" a ta. 46 Jeriko an hung tlung a, Isu chu a zirtirhai le mipui tam tak leh Jerikoa inthok chun an suok a, Timai naupa, mitdel Bartimai chu lam sìrah kutdawin a lo inthung a. 47 Nazaret Isu a nih ti a hriet chun, "Isu, Davida naupa, mi lunginsiet rawh" tiin a khêk a. 48 Mi tam takin an hal a, to dinga an hril khomin a hma nêka inringin, "Davida Naupa, mi lunginsiet rawh" tiin a khêk zuol sau a. 49 Isu chu a ngîr a, "Hung ko ta u" a ta. Mitdel chu an hung ko a, "Ngai sukngam la, tho rawh, a ko che" an ta. 50 A puon chu a thè thlàk a, an chawm tho a, Isu kuom tieng a pan a. 51 "Iem thawpêk lang che i nuom a?" tiin Isun an don a. Ama chun, "Rabbi, hmu thei ka nuom" a ta. 52 Isu chun, "Fe ta rawh, i ringna i dampui a nih" a ta. Khuo a hmu thei ta nghal a, lampuia chun Isu a zui ve ta a.
1 Jerusalem an tlung tawm, Oliv tlànga Bethfage le Bethani an hung tlung ding chun a zirtirhai pahni a tir a. 2 "In hma zawn khuoa son va fe unla, khuo in lût charin tu la chuongna ngai lo sabengtung tuoi inthlung hmung in ta, sût unla, hung kei ro. 3 Tu khomin, 'Ieng dinga sabengtung tuoi kha in sût am' an ti chun, 'Lalpan a mamaw a, hung thak kîr nawk vak kan tih' ti ro" a ta. 4 Chuongchun, an fe a, sabengtung tuoi, kotkhàr bienga inthlung, tuol tieng kotthlèra ngîr chu an va hmu a. 5 An sût lai chun chu taka ngîrhai chun, 'Sabengtung tuoi kha ieng dinga in sût am a na?" an ta. 6 Anni chun Isu hril ang tak khan an hril a, fe an phal tah a. 7 Sabengtung tuoi chu Isu kuomah an hung kei a, a chungah an puonhai an pha a, Isu chu a chuong a. 8 Mi tam takin lampuiah an puonhai an pha a, a thenin rama sawlhna an thliekhai chu an phâ bok a. 9 A hmaa fehai le a hnung zuituhai chun, "Hosanna!Lalpa hminga hung chu, A hamtha; 10 Ram hung tlung ding, Ei Pa Davida ram chu, A hamtha; Chunghnung taka khinHossana"ttiin an khêk a. 11 Isu chu Jerusalemah a lût a, tempulah a fe a. Iengkim a en vel hnung chun, khuo khom an hnu ta leiin, Bethani tieng zirtir sawmpahnihai leh an fe tah a. 12 A zingah Bethani an suoksan hnungin a phìng a hung tàm tah a. 13 Hla takah theichang, a hna inbuk hlup el a hmu a, a ra a um takduoiin tiin a va pan a. A tlung chun a hna chau naw chu a hmu naw a, theichang ra hun a ni naw hrim a. 14 Thing kuoma chun Isun, "Tuta inthok chu kumkhuoin i ra tu khomin fa ta naw raw hai se" a ta. A zirtirhai khomin a hril chu an hriet a. 15 Jerusalem an hung tlung chun tempul huongah a lùt a, chu taka thil zortuhai le inchawtuhai chu a hnot suok a, tangka thlengtuhai dawkàn le parva zortuhai inthungnahai chu a nam thlùk a. 16 Tempul inhuonna sùng chu tu khomin an thil zorhai chawia an hraw tlang a khap a. 17 Anni rawi chu inchûktirin, " 'Ka in chu hnam tin ta dinga tongtaina in tîng an tih' ti ziek a ni naw am a ni? Nangni rawi ruok chun suomhmanghai pùkah in siem ta lem a ni hi" a ta. 18 Thiempu lalhai le Dàn zirtirtuhaiin an lo hriet chun ama sukhlum dàn ding chu an zong zing a, sienkhom a zirtirna chu mipui po poin an ngaisàng leiin ama chu an ti si a. 19 Zàn tieng a hung ni chun Isu le a zirtirhai chu khawpuia inthokin an suok a. 20 Zîng tieng an fe malamin theichang kùng kha a zung chenin a thêm tah ti an hmu a. 21 Peter chun a hriet suok a, a kuomah, "Rabi, en ta, tongsie i'n phur theichang kha a lo thêm zo tah" a ta. 22 Isun a don a, "Pathienah ringna innghat ro. 23 Thu dik ka hril cheu hi, tu khomin hi tlâng kuoma hin, 'Inson la, tuifinrietah indehawn rawh' ti sien, a hril ang chun hung tlung ngei a tih ti lungrila a ringhla naw chun, a ti ang chun thawpêk nîng a tih. 24 Chuleiin ka hril cheu hi, in tongtaiin in thil hni taphot chu hmu taah inngai unla, thawpek nîng in tih. 25 Tongtai dinga in ngìr huna khom tu chunga khom thu poi in nei chun ngaidam hmasa zet ro, vàna in Pa khomin in bawsietnahai chu a ngaidam ve theina ding cheuin. 26 In ngaidam naw ruok chun vàna in Pa khomin in suolhai ngaidam bik naw ni cheu. " a ta. u 27 Jerusalem an hung tlung nawk a, tempul a fang vèl laiin thiempu lalhai, Dàn zirtirtuhai le upahai chu a kuomah an hung a. 28 Ieng thuneinain am hieng thil hi i thaw? Tuin am thu a pêk che a?" tiin an indon a. 29 Isun, " Zawna pakhat hang indon vèng ka ti cheu; mi don inla, kei khomin tu thuin am hieng thil hi ka thaw ti hril ka ti cheu. 30 Johan baptisma kha vàna mi thu a ni, an naw leh mihriem thu? Chu chu mi don ro leh" a ta. 31 Anni rawi chu an inrawn khawm a, "Vàna mi thu ei ti chun 'Ieng dinga a thu in awi naw?' a mi ti ding a ni si a; 32 mihriem thu ei ti el dim a nih?" an inti a. Mi po poin Johan chu zawlnei ni ngêiah an pom tlat leiin mipui chu an ti bok si a. 33 Chuongchun, "Kan hriet nawh" tiin Isu chu an don a. Isu khom chun, "Kei khomin tu thuin am hieng thil hi ka thaw ti hril bik naw ning cheu" a ta.
1 Tekhinthuin an kuomah thu a hril tan a: "Mi tuin amanih grêp huon a siem a, palin a'n huon a, uoiin sawrna khur a cho a, vèngbûk insâng tak a bawl a, chu zoah a grêp huon chu loneituhai a'n sântir a, a'n zinsan ta dai a. 2 A lo huna chun a chan-ai la dingin huon enkoltuhai kuoma chun a siehlaw pakhat a tir a. 3 Anni chun an lo man a, an vuok a, kut ruokin an infetir a. 4 Siehlaw dang a tir nawk a, chu khom chu a luah an lo vuok a, inzakum takin an lo soisak a. 5 Siehlaw dang a tir nawk a, chu pa lem chu an lo that a. Siehlaw dang tam tak a tirhai chu a then an lo vuok naw leh an then an lo that pei a. 6 "A naupa dittak chauh naw chu mi dang hang tir ding a nei ta naw a. 'Ka naupa hi chu lo inza êm awm tak' tiin a nuhnung takah a tir a. 7 Nisienlakhom, huon enkoltuhai chun, 'Hi pa hi ro hluotu ding chu a nih. Thaw ro, that ei tiu, a ro hluo ding chu ei ta a ni el ding a nih' an ta. 8 Chuongchun, an man a, an that a, grêp huona inthokin an pei suok a. 9 Huon neitu chun iengtin am hung thawng a ta? Hung a ta, huon enkoltuhai chu hung that a ta, a huon chu mi dang insàntir a tih. 10 Hi Pathien Lekha thu, 'In bawltuhai lung hnawl ngei chu, A kil thut dotu tak a hung ni ta si. 11 Chu chu LALPA thilthaw a na, Ei hmuin ropui ei ti hle, ti hi in tiem ngai naw a ni maw?" a ta. 12 A tekhinthu hril chu anni a demna a nih ti an hriet leiin inmantir dàn kong an dap a; amiruokchu mipui an ti si leiin ama chu an màksan a, an fe hmang tah a. 13 A thu hrila inthoka intong awktir dàn a um rawm tiin a kuomah Farisaihai le Heroda pawla mihai chu an tir a. 14 A kuom an hung tlung chun, "Zirtirtu, mi indik tak i na, tu khom poisak bik i nei naw leiin tu khomin an kei her thei naw che a, Pathien thu indik tak chu i zirtir hlak ti kan hriet. An leh, Kaisar kuoma sie chawi hi an dik am an dik naw? 15 Sie kan pêk ding, kan pêk naw ding?" an ta. Sienkhom, an vervèkzie Isun a hriet a, "Ieng dinga mi khal awk in tum? Denari tangka kha hung la ro, lo en ka tih" a ta. 16 Anni chun an hung làk a. Ama chun "Hi hi tu lim le tu hming am a na?" a ta. Anni chun, "Kaisar" an ta. 17 Isu chun, "Kaisar thil chu Kaisar pe unla, Pathien thil chu Pathien pe ro" tiin a don a. Ama chu mak an ti hle a. 18 Thonawkna a um nawh ti pawl Sadukaihai khom chu a kuomah thu indon dingin an hung ve a. 19 "Zirtirtu, Mosien, 'Tu khom nau nei loin a nuhmei thisan sien, a nuhmei chu a unaupain hluong a ta, a unaupa ta dingin chi thlàpêk a tih' tiin a mi ziekpèk a. 20 Aw leh, unau sal sari an um a, a upa takin nuhmei a nei a, suonmongin a thi a. 21 A dottu chun a nuhmei chu a hluo a, chi thla loin a thi nawk a; a pathumna khom chuong ang bok chun. 22 Unau pasarihai chun nuhmeiin an nei vong a, sienkhom tu khomin chi thla loin suonmongin an thi vong a. A tawpah nuhmei khom chu a thi a. 23 An pasari chun an inneipui vong si leiin, thonawknaah a tu nuhmei tak am nîng a ta?" tiin an indon a. 24 Isun an kuomah, "Pathien Lekha thu le Pathien thilthawtheina in hriet naw leia fe suol in ni hrim an naw maw? 25 Mithihai an tho nawk pha chun nuhmei pasal innei tuo ta naw ni hai a, vàna vàntirkohai ang ni ta lem an tih. 26 Mosie lekhabua chîmbuk chok chanchina khan mithihai an tho nawkzie thu in tiem ngai naw maw? Pathienin Mosie kuomah, 'Kei hi Abraham Pathien, Isak Pathien, Jakob Pathien chu ka nih' a ti kha. 27 Ama chu mithi Pathien ni loin, mihring Pathien a ni lem. In hriet suol nasa hlè a nih!" a ta. 28 Dàn zirtirtuhai laia pakhat a hung a, an thil hril chu a lo ngaithlâk zing a. Isun a don tha hle ti a hriet chun a kuomah, "Thupêk po po lai a ieng hi'm a poimaw tak a?" tiin a'n don ve a. 29 Isun, "Aw Israel, ngai ta, Lalpa ei Pathien chauh hi Lalpa chu a nih. 30 Lalpa i Pathien chu i lungril po poin, i thlarau po poin, i ngaituona po poin, i hràtna po poin i hmangai ding a nih' ti hi a poimaw tak a. 31 A pahnina chu, 'Nangma i'n hmangai angin i vênghai hmangai rawh' ti hi. Hienghai nêka thupêk ropui lem a um nawh" a ta. 32 Dàn zirtirtu chun, "Zirtirtu, a ni ngei. Lalpa chauh hi Pathien chu a ni a, ama naw chu Pathien dang an um naw a, 33 ama chauh chu lungril po po, hriet thiemna po po le hrâtna po poa hmangai ding a nizie le mani inhmangai anga vênghai hmangai hi pumraw thilhlân le inthawina po po nêkin a poimaw lem ti i hril hi i hril indik khop el" a ta. 34 Var takin a don ti Isun a hriet chun a kuomah, "Pathien ram chu i hlat naw hi tie" a ta. Chu hnung chun tu khomin ieng khom an indon ngam ta nawh. 35 Tempula a zirtir malamin Isun a hril pei a, "Dàn zirtirtuhaiin iengti ziea Krista chu Davida naupa nia an hril hlak am a na? 36 Davida ngeiin Thlarau Thienghlima hrilin, "LALPAN ka Lalpa kuomah, 'Ka chang tieng hin hung thung rawh, I hmêlmahai po po chuI ke sirsana ka siemHmàkhat chun' tiin a hril"a lo ti a. 37 David ngeiin 'Lalpa' a ti si chun ieng tin am a naupa ni thei a ta?" a ta. A ngaithlatu mipui tlim hmurhai chun an ngainuom hle a. 38 Chuonga a zirtir lai chun Isun, "Dàn zirtirtuhai laka chun fimkhur ro. Zakuo fuol hâka lêng vêl a, bazar hmuna hai mi chibai an thlàkhla a, 39 sunagogah thungna langsâr tak le ruoi thèna hmunah thungna poimaw tak an ngiet hlak. 40 Hienghai rawi, hmeithaihai insùng fa tlarantu le a sieli khaw mawia sawt tak tak tongtai chîngtuhai hin hrem tuor nasa zuol an tih" a ta. 41 Chun, thawlawm bawm zawna chun a'n thung a, mihaiin bawma thawlawm an thlàk lai chu a thlîr zing a. Mi hausa tak takhai chun an thlàk teu teu a. 42 Chun, hmeithai pase tak hi a hung ve a, dâr tangka pahniv a hung thlàk a, chu chu poisa khat hù a nih. 43 Isun a zirtirhai chu a ko a, an kuomah, "Thu dik ka hril cheu hi, bawma thawlawm thlâktu dang po nêkin hi hmeithai rethei hin a thaw rawn lem. 44 Mi danghai chun an nei chuong liem an thlàk a, ama hin chu tlasam hle sienkhom a nei po po, a hringna dinga a fàk sik chu a thlâk a nih" a ta.
1 Tempula inthoka an suok lai chun a zirtir laia pakhatin a kuomah, "Zirtirtu, en ta, an lung hmang dàm hi a hromhrawin an bawl ropui kher el!" a ta. 2 Isun a don a, "Hieng in ropui tak tak hi i hmu maw? Hieng lung inthuo po po hi pakhat khom sukchim loa màksan um naw nih" a ta. 3 Tempul ep, Oliv tlànga Isu a'n thung laiin Peter hai, Jakob hai, Johan hai le Andri hai chun a fâlin thu an indon a; 4 "Chuong thil chu iengtik am hung tlung a ta ? Chuong po po a hung tlung ding pha chun inchikna thilmak ieng am hung um a ta? Mi hril rawh" an ta. 5 Isun an kuomah, "Tu khomin an hlèm nawna ding cheuin fimkhur ro. 6 Ka hming sâlin, "Krista chu ka nih" tiin mi tam tak hung suok an ta, mi thuoi hmang teu an tih. 7 Indo ri hai, indo thuthang hai in hriet pha leh thlaphâng naw ro; chuong chu a hung tlung ding hrim a na, hun tawp ruok chu la ni hrî naw nih. 8 Hnam dang le hnam dang, ram dang le ram dang indo an ta, hmun hrang hrangah lir inhnîng a ta, tàm tlâng a tih. Chuong chu nau hase intanna ang nîng a tih. 9 "Nangni chu inring zingin um ro. Rorêltuhai kutah imantir an ti cheu a, sunagog-ah hai vuong an ti cheu a, keia leiin lârsap le lalhai hmaah, ka thu an hriet theina dingin, inngìrtir an ti cheu. 10 Chanchin Tha hi hnam po po kuomah hril hmasak ngei ding a ni si a. 11 An man cheu a, in chungthu rêl dinga an inhlàn hun cheu chun hril ding ngaituo lawkin lungkham naw ro; a hun taka hung inlang taphot chu hril el ro, a hriltu chu nangni in ni awm si nawh, Thlarau Thienghlim ni lem a tih. 12 Sukhlum dingin unau le unau inmantir an ta, pa khomin a naupa, nauhai khomin an nu le pahai do an ta, insukhlumtir bok an tih. 13 Ka hming leiin mi tinin theidàng an ti cheu a, nisienlakhom a tawp chena sel taka tuor taphot chu, chu ngêi chu sandam nîng a tih. 14 "Sukramtu tirdakum chu a ngir nawna ding hmuna ngîr in hmu pha chun (a tiem taphotin a umzie hre raw se), Judai rama umhai chu tlâng ramah tlân raw hai se. 15 In chunga um chu in sûnga thuomhnaw inchù dingin tum naw raw se. 16 Loa fe khom a thuomhnaw inchù dingin inah kîr nawk naw raw se. 17 Chu huna chun nau paihai le naute pom lai neihai chung chu rik a tih. 18 Chu chu phalbi lai a hung tlung nawna dingin tongtai ro. 19 Chuong nihai chu rimsikna ni a ni ding a ni si a; chuong anga rimsikna nasa hrim hrim chu Pathienin leilung a siema inthokin a la um ngai nawh; ieng tik khom um nawk ta ngai bok naw nih. 20 Lalpan chuong nihai chu suktawi naw sien chu, mihriem tu khom dam suok um naw ni hai; sienkhom a mi thlanghai leiin a suktawi a nih. 21 Chu huna chun tu khomin in kuomah, "En ta u, Krista chu hi taka hin a um" amanih, "En ta, saw va sawh" amanih an ti chun awi naw ro. 22 Krista tehlèm le zawlnei tehlèmhai an hung suok ding a ni si a, theihai sien la lem chu, thlanghai meuh khom thuoi hmang dingin inchikna thilmakhai thawng an tih. 23 Nangni ruok chu fimkhur ro, iengkim ka hril vong ta cheu hi. 24 "Chuong ang hun rinum a liem hnung chun nisa inthim a ta, thlà khom var bok naw nih; 25 vàna inthokin arasihai til an ta, vàna thilthawtheinahai chu sukhnîngin um a tih. 26 Chun, Mihriem Naupa hi thilthawtheina nasa tak leh ropui takin sûm laia hung hmûng an tih. 27 Chuongchun, a vàntirkohai chu tir suok a ta, a mi thlanghai chu kawlkil li, hnuoi tawpa inthoka vàn tawp chenin lawr khawm a tih. 28 "Chuongchun, theichang kunga inthokin thil umzie inchûk ro. A hung indawn a, a hna a hung inder chun nipui a ni ding an tah ti in hriet hlak. 29 Chuong ang bokin, nangni khomin chuong po po chu a hung tlung in hmu pha chun ama chu a hung hnâi tah a, kotkhàr bulah a um tah ti hre ro. 30 Thu dik ka hril cheu hi, chuong po po chu a hung tlung hma chun tu lai mihaiw hi bo naw ni hai. 31 Hnuoi le vàn bo a ta, ka thu ruok chu bo naw nih. 32 "Nisienlakhom, chu thil hung tlung hun ding ni le dârkâr chu Pa chauh naw chun tu khomin, vàntirkohai khomin, Naupa khomin, an hriet nawh. 33 Fimkhur unla, inring zinga umin tongtai ro, a hun chu in hriet si nawh. 34 Mi, ram danga inzin dingin a siehlawhai kuomah an sin puol seng maw inphurtir a, kotkhàr vêngtu khom inring zinga um dinga thu a pêk hieu hnunga a fe ta daih ang hi a nih. 35 Chuleiin, inring zingin um ro. In neitupa hung hun ding chu zàn tieng amanih zàn ril amanih, zîng arkhuon amanih, zîngkâr amanih ding in hriet si nawh; 36 a hung thut chun inin hung hmu hlauh rawi a ti cheu. 37 In kuoma ka hril hi mi po po ta dinga ka hril a nih: inring zingin um ro" a ta.
1 Chun, ni hni hnungah Fekan Kût le Cholthanglo Bei Kût a um ding a na, thiempu lalhai le Dàn zirtirtuhai chun Isu chu zawra man ding le sukhlum dingin an zong a. 2 "Kût lai chu ni naw sien, chuong naw chun vàntlâng lai buoina suok hlauh rawi a tih" an ta. 3 Bethani khuoa phâr pakhat Simon an ti inah dawkana Isun thlaithleng a ot laiin alabasta bûra nard hriek rimtui hlîr hlak, to tak el chawiin nuhmei pakhat a hung a, a bûr chu a tetkoi a, a luah a buok khum a. 4 Chu taka mi thenkhat chun an ngai thei naw a, "Ieng dinga hriek rimtui hi a sukral mei mei am a na? 5 Hi hriek hi puitling kum khat hlawx nêka tam hiela zor a, mi retheihai kuoma pèk lem awm annawm" an ta, chu nu chu na takin an hal a. 6 Isu ruok chun, "Tosan ro. Ieng dinga in sukbuoi am a na? Ka chungah thil ditum tak a thaw a ni hi. 7 Mi retheihai chu nangni lai an um zing a, in nuom hun hunah in somdawl thei annawm; kei ruok chu nangni lai um zing naw ning. 8 A thaw thei ang ang chu thawin, ka taksa hi phûm dingin hriek a lo nâl lawk a ni hi. 9 Thu dik ka hril cheu hi, khawvel pumpuia Chanchin Tha an hrilna taphotah, hi nu thilthaw hi ama hriet zingna dingin hril ve pei an tih" a ta. 10 Chun, Sawmpahnihai laia mi pakhat, Juda Iskariot chu Isu inmantir tumin thiempu lalhai kuomah a fe a. 11 Chu thu an lo hriet chun an lawm hle a, sum khom pèk an tiem a. Chuongchun, an mantir dàn remchâng a zong tah a. 12 Cholthanglo Bei Kùt ni hmasa tak, Fekân Kùt beramte an that hlak nia chun a zirtirhaiin Isu kuomah, "Fekân Kùt ruoi i kîl theina dingin khawlai am buotsai inlang i nuom a?" tiin an indon a. 13 Chuongchun, zirtirhai laia mi pahni a tir a, an kuomah, "Khawpuiah va lût unla, bêla tui chawi pa pakhat intuokpui in ta, ama chu zui ro. 14 A lûtna in neitu kuoma chun, 'Zirtirtuin, ka zirtirhai le Fekân Kùt ruoi kan kìlna ding pindan chu a khaw hi'm a na? a tih' va ti ro. 15 Ama ngei chun pindan chunghnung lien tak, hmangruo iengkim, inpei sa diem umna chu inentir a ti cheu a, chu taka chun ei ta dingin ruoi va buotsai ro" a ta. 16 Chuongchun, zirtirhai chu an suok a, khawpuia chun an fe a, an kuoma a hril ang ngei khan an va hmu a, Fekân Kùt ruoi chu an buotsai tah a. 17 Zàn tieng a hung ni chun Isu chu zirtir sawmpahnihai leh a hung tlung a. 18 Thlaithlèng an kîl lai chun Isun, "Thu dik ka hril cheu hi, nangni laia pakhat, mi kîlpuitu ngèi hin mi'n mantir a tih" a ta. 19 An lungzing ta hle a, a mal malin a kuomah, "Kei chu ni awm lo tak maw?" an ti seng a. 20 Ama chun, "Sawmpahnihai laia pakhat, kei le thlengkûma bei inchietuy chu nîng a tih. 21 Mihriem Naupa chu a chungthu hrila a um tah angin a fé ngei ding a nih. Nisienlakhom, Mihriem Naupa inmantirtu mihriem chung chu a rik ie. Chu mihriem chu pieng naw sien a ta dingin tha lem a tih" a ta. 22 Chuonga an fàk lai chun Isun bei a lâk a, lawmthu a hril a, a khoi a, a zirtirhai chu a pêk a, "La ro, hi hi ka taksa a nih" a ta. 23 No khom chu a lâk a, lawmthu a hril zoin anni chu a pêk a, an dawn seng a. 24 Ama chun an kuomah, "Hi hi ka thisen, thuthlungna, z mi tam tak ta dinga suok ding chu a nih. 25 Thu dik ka hril cheu hi, Pathien rama a thara ka dawn hun a tlung hmâ khat chu grêp ra tui hi dawn nawk ta ngai ning" a ta. 26 Hla an sak zo chun Oliv tlâng panin an suok tah a. 27 Isun an kuomah, "In rêngin mi zamsan vong in tih. 'Berampu chu vuong ka ta, beramhai chu indar an tih' ti ziek a ni kha. 28 Nisienlakhom, kei thoa ka um hnungin Galili ramah lo fe hmasàng ka tih" a ta. 29 Peter ruok chun, "An rêngin nghatsan vong hai sienla che khom kei chun nghatsan naw top ka ti che" a ta. 30 Isun a kuomah, "Thu dik ka hril che hi, voi zàn lá là hin, ar voi hnih a khuong hmain nangin voi thum mi'n phat i tih" a ta. 31 Ama ruok chun rorum takin, "I thìnaa chun thi ve ding ni lang khom, inphat naw top ka ti chê" a ta. Mi dang khomin a ti ang chun an hung ti ve tlier tlier a. 32 Hmun pakhat, Gethsemani an ti chu an tlung a, Isun a zirtirhai kuomah, "Ka tongtai sùng hi taka hin lo thung ro" a ta. 33 Peter hai, Jakob hai, Johan hai a thuoi a, nasa taka beidongin a lungzing a. 34 An kuomah, "Lungngaina thipui khop hielin ka thlarau hi a tlâkbuok a nih. Hi taka hin um inla, mi mengpui zing ro" a ta. 35 Hma tieng a va fe hret a, hnuoiah a bokkhup a, thei ni sien, chu dârkâr chun a fe khèl theina dingin a tongtai a. 36 "Abba, Pa, iengkim i thaw thei a, hi no hi mi la sonpèk rawh, sienkhom keima thu ni loin nangma thû thù ni lem raw se" a ta. 37 A hung kîr nawk a, anni chu inlusuin a hung hmu a. Peter kuomah, " Simon, i inlusu a ni maw? Dârkâr khat bèk khom in mi mengpui thei naw a ni maw? 38 Thlèmnaa in lùt nawna dingin mengin tongtai ro. Thlarau chun a pei a, taksa ruok chu a hrât naw a nih" a ta. 39 A fe nawk a, a hril ngai hrilin a va tongtai nawk a. 40 A hung kir nawk chun an inlusu chu a hung hmu nawk a, an imu a suok êm leiin hang don ngaina khom an hriet nawh. 41 A hung kîr voi thumnaa chun, "Inlusuin in la chawl zing a ni maw? A hun tah. A dârkâr chu a hung tlung tah. En ta u, Mihriem Naupa hi mi suolhai kuta inmantir a ni ding an ta hi. 42 Tho unla, fèng ei tiu. A mi'n mantirtu ding khom a hung ta saw!" a ta. 43 A hril lai zingin Juda, Sawmpahnihai laia pakhat kha a hung tlung a, ama ruol chun thiempu lalhai, Dàn zirtirtuhai le upahai tir mi tam tak, kawlhnâm le hmoltum chawiin an hung tlung ta rup a. 44 A'n mantirtu ding khan, "Ka fawp fawp chu ama nîng a tih; man unla, ngun taka vêngin thuoi hmang ro" tiin inchikna ding a lo hril sa diem tah a na. 45 A hung tlung charin Isu chu a hung pan a, "Rabbi" tiin a fawp a. 46 Isu chu an chel a, an man tah a. 47 A bula ngîrhai laia pakhat chun kawlhnâm a phawi a, thiempu laltak siehlaw chu a sât a, a nakawr a fikpèk a. 48 Isun an kuomah, "Suomhmang man ding ang elin kawlhnâm le hmoltum chawiin in hung inthok a ni maw? 49 Nangni lai tempulah ni tin ka zirtir hlak a, in mi man si nawh. Nisienlakhom, Pathien Lekha thu chu a hung tlung kim ngei ding a nih" a ta. 50 Chuongchun an rêngin an tlànsietsan a, an bo ta rip a. 51 Tlangvàl pakhat, a puon hlap chauh sil hin Isu chu a zui ve a, ama khom chu an man a, 52 sienkhom a'n tàl suok a, a puon tlànsanin saruokin a tlân hmang tah a. 53 Isu chu Thiempu laltak kuomah an thuoi a, thiempu lalhai, upahai le Dàn zirtirtuhai chu an hung pung khawm a. 54 Peter khomin an hnung hla feah Thiempu laltak in huon sûng tuollai chen a zui a; vêngtu pulishai lai chun mei lum awiin a thung ve a. 55 Thiempu laltak le Sanhedrina thang po po chun Isu an sukhlum theina ding san an zong a, an hmu si naw a. 56 Mi tam takin khêlin an hèk a, sienkhom an hèkna thuhai chu a'n mil tawl bok si nawh. 57 Chun, mi pakhat a hung ngìr a, khêlin a hêk a, 58 "Hi tempul kuta bawl hi thiek ka ta, tempul dang, kuta bawl lo ni thum sûngin indin nawk ka tih' a ta, chu chu a ti lai ngei kan hriet" a ta. 59 Chuong thila khom chun an hêkna thuhai chu a la'n hmu hlei thei nawh. 60 Thiempu laltak chu a lâiah a va ngìr a, "Hieng an hêkna zozài che hi i don thei naw a ni? " tiin Isu a'n don a. 61 Ama hlak chu a to zing a, ieng khomin a don nawh. Thiempu laltak chun, "Nang hi Krista, Hamtha Naupa chu i ni?" tiin a'n don nawk a. 62 Isu chun, "Ni e. Mihriem Naupa hi Iengkimthawthei chang tieng inthung a, vàn sumhai le hung la hmung in tih" a ta. 63 Chu phing leh Thiempu laltak chun a silfènhai chu a pot thlèr a, " Hrepuitu dang tu am ei la ngai? 64 Pathien poi a hril dàn chu in hriet tah a, ieng tin am in ngai?" a ta. An rêngin Isu chu sukhlum tlâkah an ngài a. 65 A thenin chil an sâkkhum tan a; a mit an tuompèk a, kuta lokin, "Tuin am a thaw che hril thei rawh" an ta. Vêngtu pulishai chun an thuoi a, an ben sok sok a. 66 In hnuoi tieng tuolzawla Peter a um lai chun thiempu laltak siehlawhai laia nuhmei pakhat a hung a, 67 Peter mei awi lai chu a hung hmu a, a hang en chieng a, "Nang khom hi Nazaret mi Isu kuoma um kha i ni hi" a ta. 68 Ama ruok chun, "I thu hril umzie chu ka hriet dèr nawh, a ngaina khom ka hriet nawh" tiin a'n phat a. 69 Nunghàk khan a en zui a, a bula ngîrhai kuoma chun, "Anni laia mi chu a ni hi tie!" a ti nawk a, ama chun a'n phat nawk a. 70 Chu hnung ela chun Peter kawla ngîrhai chun, "Anni laia mi a ni ngei hi, Galili mi a ni annawm" an ta. 71 Ama ruok chun tongsephur dong huoma inkhâmin, "Chu mihriem in hril chu ka hriet dêr nawh" a ta. 72 Chu zoah ar khuon hnìna chu a hung khuong ta nghal a. Isun a kuoma, "Ar voi hni a khuong hmain nangin voi thum mi'n phat i tih" a ti thu kha Peter chun a hriet suok a, insûm zo loin a tap a.
1 Zîngkâr inhma takin thiempu lal hai, upa hai, Dàn zirtirtuhai leh Sanhedrin po po chun ro an rêl a; Isu chu an khit a, an thuoi hmang a, Pilat kutah an inhlàn a. 2 Pilat chun, "Judahai lal i ni maw?" tiin a lo indon a. Ama chun, "Ni e, i ti annawm" a ta. 3 Thiempu lalhai chun kong tam takin an hèk a. 4 Chuongchun, Pilatin, "An hèkna zozai che hi i hriet naw maw? I don dèr naw ding maw?" tiin a'n don nawk a. 5 Nisienlakhom, Isun a don chuong naw leiin Pilat chun mak a ti hle a. 6 Kût niin tâng pakhat insuopêk dinga mipuiin an hni taphot chu Pilatin a'n suopêk hlak a. 7 Helna a suok tuma tuol that leia hel pawl an man le lung ina an khumhai lai chun mi pakhat a hming Barabas a um a. 8 Chuongchun, mipui chu an hung a, a thaw hlak anga thaw dingin an ngên a. 9 Ama chun, "Judahai lal hi insuopêk lang cheu in nuom am?" a lo ta. 10 Thîkna leiin Isu chu thiempu lalhaiin a kutah an hung inhlàn a nih ti Pilatin a hriet si a. 11 Amiruokchu, Barabas insuo hni lem dingin thiempu lalhai chun mipui an infui por a. 12 Pilat chun, "Chuong a ni si chun Judahai lal in ti hi ieng tia thaw dingin am in dit a?" tiin a'n don nawk a. 13 Anni chun, "Hemde rawh" tiin an khêk a. 14 Pilat chun, "Ieng leiin am ie? Iem a thaw suol a?" a ta. Nisienlakhom, anni chun inring nawk zuolin, "Kraws-ah hemde rawh" tiin an khêk a 15 Chuongchun, mipui chu suklawm nuomin Barabas chu a'n suopêk a; Isu ruok chu a'n vuoktir a, kraws-a hemde dingin an kutah a pêk suok ta a. 16 Sipaihai chun Isu chu lal in sùng, Praitorian an tia chun an thuoi a, an pawla mi po po chu an ko khawm a. 17 Ama chu korfuol senduk an inhàktir a, a lallukhum dingin hling an inkuol a, an inkhumtir a. 18 "Chibai, Judahai lal" tiin an inriem khum a. 19 Hmolin a luah an vuok an vuok a, chil an sâkkhum a, dingthathuonin chibai an bûk el huoi huoi a. 20 Chuonga nuizat siemnaa an hmang zo chun korfuol senduk chu an hlìppèk a, ama silfèn an inhâktir nawk a, kraws-a hemde dingin an thuoi suok tah a. 21 Mi pakhat Simon, Kurini khaw mi, Aleksandra le Rufa hai pa, thingtlânga inthoka hung chu Isu kraws putpui dingin an man lui a. 22 Golgotha, 'Lu ru hmun' an ti chu an thuoi tlung a, 23 murra pol uoiin an pèk a, nisienlakhom a dawn nuom naw a. 24 Chuongchun, kraws-ah an hemde a. A silfènhai chu insemin, an chan ding seng hrietna dingin thum an vawr a. 25 An hemde hun chu zing dar kuob vel a nih. 26 Ama an hèkna thu, "JUDAHAI LAL" ti chu an tàr a. 27 Ama ruol chun suomhmang pahni an hemde bok a, a chang tieng pakhat, a voi tieng pakhat. 28 Pathien Lekha thua, "Ama chu bawsetuhai lai tiem sain a um a" ti kha chuong ang chun a hung tlung indik tah a nih. c 29 Mi invêl nuk nuk hai chun an lu thinin, "E hei! Nang, tempul thieka ni thuma bawl nawk theitu, 30 insukdam la, kraws-a inthok khan hung tum ta la" tiin an biek el a. 31 Chuong ang bokin thiempu lalhai le Dàn zirtirtuhai chun, "Mi dang hman sukdam hlak si, mani insukdam thei si lo. 32 Ama ei ring theina dingin ei mit hmua ngei Krista, Israel lal chu tuhin kraws-a inthokin hung tum raw se chu" tiin an nuisaw a. Ama ruola an hemde pakhat khom chun a lo deusaw bok a. 33 Sùn dâr sawmpahnia inthoka chawhnung dâr thum chenin khawvel pumpui chu a'n thim ta vong a. 34 Chawhnung dâr thum vêla chun rawl inring takin, "Eloi. Eloi, lama sabakthani" tiin a khêk a (chu chu "Pathien, Pathien, ieng dinga i mi màksan am?" tìna a nih). 35 A bula ngîr thenkhatin chu chu an hrietin, "Ngai ta u, Elija a ko a ni chu" an ta. 36 Mi pakhat a tlân a, siponah uoiin thûr a'n chie a, hmolah a târ a, Isu chu indawntir a tum a, "Ama la thla dingin Elija a hung hrim am, en ei tiu" a ta. 37 Isu chu rawl inring takin a khêk a, a hnuk a chat tah a. 38 Chun, tempula puonzâr chu a chung tienga inthoka a hnuoi tieng chenin a'n thlêr vong a. 39 A hma zawna ngîr sipai zahotu, chuonga a khêk ri hrea a thi dàn hmutu chun, "Hi mi hi Pathien Naupa a lo ni ngêi hi tie!" a ta. 40 Nuhmei ruol khomin hla taka inthokin an thlìr a, chuonghai lai chun Mari Magdalin hai, Jakob chîn lem le Jose nu Mari hai le Salomi hai khom an thang a. 41 Hieng mihai hi Galili rama a um laia ama zuia a rong bawlpêk hlaktuhai an nih; chun, anni ruola Jerusalema hang fe ve nuhmei dang tam tak an thang sa bok a. 42 Judahai Inrinnid a ni a (chu chu Sabat dinga an inbuotsai ni a nih). 43 Zàn tieng a hung ni chun Josefa, Arimathai khuoa mi, Judahai Rorêlna Inpuia membar pakhat, mi inzaum tak, Pathien ram beisei mi chu huoi takin Pilat kuomah a fe a, Isu ruong a hni a. 44 Pilat chun a thi tah ti a hrietin mak a ti hle a, sipai zahotu chu a ko a, a thi hun a'n don a. 45 A thi ngei tah ti sipai zahotu bâua inthoka a hriet hnung chun Isu ruong chu Josefa a pêk a. 46 Chuongchun, ruong tuomna ding puon a'n chawk a, chu chun a tuom a, lung ker thlànah a'n zàl a, thlàn kotkhàr chu lungkhàrin a khàr a. 47 Mari Magdalin le Jose nu Mari khomin Isu an inzàltirna thlàn chu an hmu a.
1 Sabat ni a hung invoi chun Mari Magdalin hai, Jakob nu Mari hai le Salomi hai chun Isu ruonga nâl ding hriek rimtui an inchawk a. 2 Pathienni tûk inhma tak, ni suok hlimin thlànah an va fe a. 3 "Thlànkhàr tuin am mi'n hlum sonpek a ta?" an ta. 4 An hang en ruok chun thlànkhàr lung lien tak el chu inhlum son sain an hmu a. 5 Thlàna chun an lùt a, tlangvàl pakhat puon vâr sil, chang tienga inthung an hmu a, an ti hle a. 6 Ama chun, "Ti naw ro. Nazaret Isu, an hemde tah kha in zong a ni awm a, a tho nawk tah a, hi taka hin a um ta nawh; en ta u, a zàlna chu hi hi a nih. 7 Nisienlakhom fe unla, a zirtirhai le Peter kuomah, 'A hril cheu ang ngei khan Galiliah a lo fe hmasa ding a na, chu taka chun hmûng in tih' tiin va hril ro" a ta. 8 Anni chu ti le maktia inthin hawpin, thlàna inthok chun an tlàn suok a, an ti luotin tu kuoma khom ieng khom an hril nawh. 9 [Pathienni tûk inhma taka a thonawk chun a sûnga inthoka khawhri pasari a hnot suokpèk Mari Magdalin kuomah a'n lâr hmasa tak a. 10 Ama chu Isu ruolhai kuomah a fe a, mithi pûr doa an tap lai chun a va hril a. 11 A hring nawk thu le hmu khom a hmu ngei thu a hril chu hre hai sienkhom an awi chuong nawh. 12 Chu hnung chun anni laia mi pahnih, thingtlâng khuo tieng pana an fe laiin hmêl danglam putin an kuomah a'n làr a. 13 Anni khom chun an ruol danghai chu an hung hril ngei a, sienkhom an lo awi chuong bik nawh. 14 Chu hnung chun zirtir sawmpakhathaiin bu an fàk lai an kuomah a hung inlàr a, an ringna tlawm lei le a tho nawk hmutuhai thu an awi nuom tlat nawna thuah a kawk tawl a. 15 An kuomah, "Khawvel po poah fe unla, thilsiem po po kuomah Chanchin Tha hril ro. 16 Tu khom ring a, baptisma chang chu sandam nîng an ta, tu khom a ring naw chun thiem naw chang an tih. 17 Hieng inchikna thilmakhai hin a ringtuhai chu zui pei a tih: Ka hmingin ramhuoihai hnot suok an ta; tong tharin tong an ta; 18 kutin rûl man an ta; thìna tûr dawn hai sien khom ieng khom ti naw ni hai; damnawhai chungah kut innghat an ta, hung dam pei an tih" a ta. 19 An kuoma thu a hril zo chun Lalpa Isu chu vàna thuoi tungin a um a, Pathien chang tieng a hang inthung tah a. 20 Zirtirhai khom chu thu chu hrilin ram tinah an fe suok a, Lalpan anni chu a thawpui a, an thu khom a zuitu inchikna thilmakhaiin a suknghet pei a. Amen.