1

1 Isu Krista siehlaw le tirko Simon Peter chun, mi sandamtu Isu Krista zàr le ei Pathien felna zàra ringna hlu tak ei nei ang nei vehai chu chibai ka bûk chêu. 2 Pathien le ei Lalpa Isu in hrietnaah lunginsietna le inremna in chungah sukpungin um raw se. 3 A ropuina le thatna chang ve dinga mi kotu ei hrietna zàra chun Pathien tîna tienga ei hring theina dingin Pathien thilthawtheina chun ei mamaw iengkim a mi pêk a. 4 Chuongchun, thilpêk ropui tak le hlu tak a tiem chu a mi pèk tah leiin, khawvel suol châkna, mi sukse thei laka inthok chun suokin, Pathien zie in intawmpui thei tah a nih. 5 Hi lei hin theitawp suo unla, in ringnaa chun thatna thang sa sien, in thatnaa chun hrietna, 6 in hrietnaa chun mani inthununna, mani inthununnaa chun selna, 7 in selnaa chun Pathien ngaisakna, Pathien in ngaisaknaa chun unauhai làinatna, unauhai in làinatnaa chun hmangaina thang sa raw se. 8 Chuong chu in nei a, a pung pei chun ei Lalpa Isu Krista hrietnaah mi taima tak le tangkai takah siem a ti chêu. 9 Chuong thil nei nawtuhai chu mitdel, khaw hmu tawi, kha hmaa an suolhai kha sawp faipêk vong an ni tah ti theinghil tahai chu an nih. 10 Chuongchun, unauhai, a kona le a thlangna chèu hi suklang dingin theitawpin thang la zuol sauh ro; chuong anga thawtuhai chu ieng lai khomin tlu se naw ni hai. 11 Chuongchun, ei Lalpa le Sandamtu Isu Krista chatuon ramah chun lawm takin inlûttir a ti chêu. 12 Chuleiin, thutak in hrieta khan nghet takin um tah ni inla khom hieng thu hi inhriet nontir rop chêu ka nuom a nih 13 Hi taksa puon ina ka chèng sûng hin, chu thutak inhriet nontir rop cheu chu ka thaw dingah ka ngai tlat a. 14 Ei Lalpa Isu Kristan chieng taka a mi hril angin, hi ka taksa in hi ka suoksan vak ding a ni tah ti ka hriet. 15 Ka suoksan hnunga khom, ieng lai khoma hieng thuhai hi in hriet zing theina dingin theitawp ka suo a nih. 16 Thilthawtheina le ei Lalpa Isu Krista a hung nawk ding thu kan hril lai cheu khan tienami phuok fawm el hril chêu kan ni naw a, mit ngeia a ropuina hmutu kan nih. 17 Pa Pathiena inthoka chawimawina le ropuina a dong lai khan, Ropuina Insângtaka inthokin rawl a hung suok a, " Hi hi ka Naupa, ka Dittak chu a nih, a chungah ka lawm bèk bêk a nih" a hung ti a. 18 Chu rawl, vàna inthoka hung suok chu, keini khomin tlâng thienghlima a kuoma kan um laiin kan hriet ve a. 19 Zawlneihai thu lo puong ta kha a'n dik ngei ti keini khomin kan pom nghet zuol a, nangni khom in lungrila Sikhawvar a hung inlang hma chun zàn inthim, khaw var hmaa khawnvar êng angin, chu thu chu in lungril êntuah hmang inla thâng a tih. 20 Pathien Lekha thua hrillawkna thuhai hi zawlneiin ama ngaidàna a hril fie anga hung tlung a ni ngai nawh ti hre hmasa phot ro. 21 Hrillawkna hrim hrim hi mihriem thu suok a ni ngai naw a, mihriemin Thlarau Thienghlim thuoia Pathiena inthoka thu suok an puong a ni chauh lem.

2

1 Nisienlakhom, keini mihai lai zawlnei tehlêm an um hlak ang khan nangni lai khom zirtirtu indik lo an hung suok ding a na, mi sukse thei, zirtirna indik lo a rûkin hung put lût an ta, an Laltak, anni intlantu chu phatsan an ta, anni ngei chungah sietna inrang takin intlungtir an tih. 2 An um dàn inzapuium tak chu mi tam takin zui vèng an ta, thutak lampui hi sukpawi an tih. 3 Sum an hmu theina dingin huomhap taka thu phuok fawm hmangin, sumdawngnain hmang an ti chêu. An chungthu rêlna, thiemnaw an changna thu chu an lu chungah a um ta zing a, sietna chun in loin a'n chân ràn tawl a nih. 4 Vàntirkohaiin thil suol an thaw lai khan Pathienin a hlà tawl naw a, hremhmunah a pei a, Rorêlna Ni nghâk dingin khuorkhurûm inthimah a thlâk tawl a ni kha. 5 Tien lai khawvel khom a hlà bik nawh; khawvel suol tak chungah tui a'n lêttir a, felna thu puongtu Nova le mi dang pasari chauh san suok an ni kha. 6 Sodom le Gomora khuohai khom thiemnaw inchangtirin mei vâmah a'n changtir a, Pathien ngaisak nawtuhai a hrem dàn ding inentirna dingin a hmang a ni kha. 7 Mi fel Lota, mi suolhai um dàn porchè tak el poiti êm êm hlaktu ruok chu a san suok a, 8 chu mi tha tak chu anni laia khawsa ve hlak a na, an thilsuol thaw a hmu le a hrietin a lung a na êm êm hlak a nih. 9 Lalpa chun ama tituhai chu tuorna laka inthoka san suok dàn le Rorêl Ni a hung tlung hma khoma mi suolhai hrem dàn a hriet a, 10 an tisa châkna tirdakum anga umhai le Pathien thuneina hmusittuhai ngat lem chu hrem dàn ding a hriet nawkzuol. Hieng zirtirtu indik nawhai hi an invèt huoi a, an chapo a, vàn mi ropuihai khom khi hril siet an tì nawh. 11 Anni nêka hrât lem le thil thaw thei lem vàntirkohai hmanin, Lalpa hmaah hieng mi ropuihai chungchang hi an hril chàngin tong sie an hmang ngai nawh. 12 Sienkhom, hienghai ruok hin chu an hriet thiem phâk naw taphot hril siet an chìng a. Ramsa kol, mani pienvar chauh hmang thei, mana that el dinga hung pienghai ang hi an nih. 13 Poi an tawk ang char chu an suol man la tuor an tih. Inhoi an tizawng chu sùnnithlâk thlàka nuomchèn hi a nih. Nangni le hmangaina ruoi thè hi inhoi an tizawng a na, mi tirdakum le mi khawlo, nangni laia inzep an ni si a. 14 An mitin uirepui ding zongin an melkai zing a, suol thaw an nghok thei nawh. Mi lungril nghet nawhai an zawl thlùk a, duâm hi an chemkalna zawng a na, tongsephur nauhai an nih. 15 Lampui indik chu an pêtsan a, lam an inhmang a, rîtlona ra lawmtu Bosora naupa Balaam lampui chu an hraw a, 16 sienkhom Balaam chu a bawsietnaah zilhauin a um a, sabengtung tong thei lo chu mihriem anga hung tong suokin, zawlnei invêt thil thaw tum chu a khappèk a ni kha. 17 Hieng mihai hi tuikhur hnàr kang châr tah le sûm leivàk, thliin a lên vèl ang mei mei chauh hi an ni a, thima khom thim sa tak chu an umna dinga ruot a nih. 18 Umzie nei lo thu invêtthlak tak takhai chu uong takin an inpawtpui a, mihriem tisa châkna suol tieng chok tho thei thilhai chun mi, an nun suol laka inthoka intâl suok hlimhai chu, an zawr a, 19 zalènna pèk an tiem a, anni hlak chu an thil chîng tha lo bawia intâng an ni zing bok si. Tu el khom hi ama thuhnêtu bawia intâng a nih. 20 Ei Lalpa le Sandamtu Isu Krista hrietna leia khawvel suol nghatsantuhai chu suola an inawk nawk chun a tira an um dàn nêkin a nuhnunga an um dàn chu a se lem dai hlak. 21 Thupêk thienghlim dong ta zeta nghatsan nawktuhai chun felna lampui hi lo hre naw law law hai sien, an ta dingin tha lem a tih. 22 An um dàna inthokin hieng thuvarhai indikzie hi a'n lang chieng hle: "Ui chu a luoka bok a kîr nawk hlak" ti le "Vokpui insiltir chu chirhaka bok a'n buol nawk hlak" tihai hi.

3

1 Dittakhai, hi lekha hi in kuoma ka lekhathon voi hnina a nih. In hriet tah sa inhriettir non nawk ding cheu le in lungrilhai ngaituona thienghlima chok har dingin voi hnih zet ka hung thon chêu a ni hi. 2 Zawlnei thienghlimhai thu hril lawk le Lalpa le Sandamtu thupèk, in tirkohaiin kha hmaa an hril tah chêu kha, hre zing ro. 3 Ni nuhnunga chun hmusittu, mani chàkzawng ang peia khawsahai chu hung suok an tih ti hre hmasa ro. 4 Hmusit èm êmin, "A hung nawkna ding thutiem kha iem an ta le? Ei thlatuhai an thi zo tah a, thilsiem tan tira inthokin iengkim a la pangngai zing an naw maw?" tiin la cheksol an tih. 5 Vànhai khi tiena tlânga Pathien thua inumtir a nizie dàm, hnuoi hi tuia inthoka tui hmanga inumtir a nizie dàm, 6 tui bok chu lêtin khawvel hlui a chîm a, a suksiet thu hai dàm kha an theinghil lui a. 7 Pathien ngaisak nawtuhai chungthu rêl hun le sukbohmanga an um nia meia raw fai dingin tuta vànhai le hnuoi khom hi Pathien thu bokin a la hlà a nih. 8 Ka ruol dittakhai, hi thil pakhat hi theinghil naw ro: Lalpa ngaiah ni khat hi kum sângkhat ang a na, kum sângkhat khom hi ni khat ang a nih. 9 Lalpa chu a thutiem hlen kongah muongchâng anga mi thenkhatin an ring angin a muongchâng nawh. Tu khom bohmang lo a, mi po poin an suol sim a, a kuoma an kìr a dit leiin nangni lakah a dawthei a ni chauh lem. 10 Lalpa Ni chu rûkru angin hung tlung a tih. Chu ni chun ri râpthlâk tak leh vàn khi bohmang a ta, a sûnga um po po kàng hmang a ta, hnuoi khom a sûnga um po po leh kàng fâi a tih. 11 Hienghai hi chuong anga se vong ding an ni si chun, nangni rawi kha ieng am ni in tum a? 12 Pathien ni tiem nghâkhlâ taka in Tlumte thlîr zing lai hin mi thienghlim le Pathien tienga inhmang mi in ni ding a nih. Chu ni chun vàn khi meia raw hmang nîng a ta, a sûnga um po po khom intui ral vong a tih. 13 Nisienlakhom, eini nghâk ruok hi chu Pathien thutiem, hnuoi thar le vàn thar, felna in chu a nih. 14 Chuongchun, dittakhai, hieng thil in nghâk lai hin Pathien hmaa thienghlim le soisel boa um dingin theitawp insuo unla, ama leh inrem ro. 15 Lalpa dawtheina hi sandam in ni theina hun remchàngah ngai ro. Pathienin varna a pêk angin ka unaupa dittak Paula khomin hieng thu hi a ziek hlak a. 16 A thu ziek thenkhat chu hriet thiem el a'n tak a, ieng khom inchûk lo le mi nghet nawhaiin Pathien Lekha thu dang an ngai kawi ang bokin an ngai kawi a, anni le anni chungah sietna an intlungtir pha hlak a ni kha. 17 Dittakhai, nangni chun in hriet tah leiin fimkhur ro, chuong naw chun bawsetuhai suolnain thuoi hmang vèng a ti chêu a, in nghet that lai hi tlu pal hlauh rawi in tih. 18 Ei Lalpa le Sandamtu Isu Krista hrietnaa dàm, lunginsietnaa dàm inthang lien pei ro. A kuoma chun ropuina tuta le chatuon chenin um raw se. Amen.