1 Paula, Silvan le Timothe chun Thesalonika khuoa Pä Pathien le Lalpa Isu Krista kohran chibai kan bùk. Lunginsietna le inremna in kuomah um raw se. 2 Nangni leiin Pathien kuomah lawmthu ka hril rop hlak. 3 Ei Pä Pathien hmaa kan tongtai chângin in hming ma loin kan lam hlak a, ringna leia in thaw suok hai, hmangaina leia sin in thaw inrimzie hai le ei Lalpa Isu Kristaa beiseina in nei nghetzie hai kan hriet zing hlak. 4 Unauhai, Pathienin a hmangai chêu a, ama ta dingin a thlang suok chêu ti kan hriet. 5 In kuoma Chanchin Tha kan hung intlun lai khan thu el ni loin, thilthawtheina leh Thlarau Thienghlim ring nghet tlatin kan hung hril a, nangni lai kan chàm sùnga in ta dinga kan khawsak dàn khom in hriet kha. 6 Kan um dàn le Lalpa um dàn latuhai in ni tah a, rinumna nasa tak tuor pumin kan thu in lo pom a Thlarau Thienghlimin lawmna a pêk cheu a. 7 Chuongchun, Makedonia le Akaia rama ringtu po po ta dinga enton tak in hung ni a; 8 an ramah Lalpa thu nangni leiin a'n dar el chauh bâkah hmun tinah Pathien in ring thu a'n thang a; chuleiin, keinin ieng khom kan hril a tûl tah nawh. 9 Kan hung kan chêu tûma in mi lo lawm dàn hai, milem biek bânsana Pathien hring le indik tak rong bawl dinga Pathien tieng in hung nghat tâk thu hai, 10 a Naupa Isu, mithi laia inthoka a keitho, lungsenna hung tlung ding laka mi san suoktu chu vàna inthoka a hung ding in lo nghâk thu dàm an hril huoi huoi a nih.
1 Unauhai, in kuoma kan hung inzin kha a thlawn nawh ti nangni ngeiin in hriet. 2 In hriet tah angin Filipi khuoah inzakum taka soisak tuor inlang khom, dodàlna tam tak kàrah in kuoma Chanchin Tha hril dingin Pathienin a mi sukhuoi ta lem hlauh a ni kha. 3 Kan thu hril chêu hi thu indik lo amanih, tum rûk tirdakum neia inhlêm tumna thu amanih a ni nawh. 4 Chanchin Tha inkoltir tlàka Pathienin a mi ruot ang ngeiin, mihriem suklawm tum ni loin, kan lungril fietu Pathien suklawm dingin thu kan hril lem hlak a nih. 5 Ieng lai khomin mi kan inpâk der ngai naw a, duâmna thup dingin hmaithinghawng kan inbel ngai nawh ti in hriet a, a mi hrepuitu chu Pathien a nih. 6 Mihai inpâk kan phût naw a, nangni amanih mi dang amanih inpâk kan ngiet bok nawh. 7 Krista tirko kan ni leiin in ta dinga phurrik inchang thei kan na, sienkhom nuin a nauhai a duot angin kan duot lem chêu a ni kha. 8 Chuong ang khopa ngainaa kan hmangai êm chêu leiin, Pathien Chanchin Tha chauh ni loin kan hringna chen khom hlim taka pèk hiel chêu khom kan inhuom a ni kha. 9 Unauhai, sin kan thaw inrimzie le thaw nasatzie kha in hriet a, nangni lai tu khom kan sukharsat nawna dingin, a sùn a zàna sin inrim taka thaw pumin Chanchin Tha kan hril hlak chêu a ni kha. 10 Thienghlim le fel le dem kai loin ringtu nangnihai lai kan um hlak ti hretu chu nangni in ni a, Pathien khom a nih. 11 Pain a nauhai chunga a thaw angin nangni chunga khom kan thaw hlak ti in hriet. 12 A ram le a ropuina chang ve dinga kotu chèu Pathien mi ni tlâka um dinga sukphûr le thlamuongin, kan infui mol mol hlak chêu a ni kha. 13 Kan thu hung hril in lo pom lai khan, mihriem thu anga pom loa Pathien thutak a nìna ang taka in pom lem lei khan ma loin Pathien kuomah lawmthu kan hril bok hlak. Chu chu nangni ringtuhaia thok hlak, Pathien thutak ngei chu a ni hrim a nih. 14 Unauhai, nangni khom Judai rama Isu Kristaa um Pathien kohranhai ang in lo ni ve tah; annin Judahai lakah an tuor angin nangni khom in mihai lakah in tuor kha. 15 Chuong Judahai chun Lalpa Isu le anni zawlneihai ngei an that a, keini khom an mi hnot suok a, Pathien an suklawm naw a, mi dang hrim hrim an dodâl vong a nih. 16 Jentêlhai sandam an ni vèna dinga Chanchin Tha an kuoma kan hril chen khom an khap a, an suol vawr tawp an tong a, a tawpah Pathien lungsenna chu an chungah a hung tlung tah a nih. 17 Sienkhom, unauhai, lungril tieng ni loin taksa tieng hun iemani chen ei lo inthè tah a, chuleiin in hmèl hmu nawk kan chàk a, hmu chêu tumin kan thang nasa a nih. 18 Hung sir chêu kan tum hlak a, kei Paula ngei khom hin ka tum rop a, sienkhom Setanin a mi dâl hlak a. 19 Ei Lalpa Isu hung nawk phaa thil kan beisei, kan hlimna ding le chawimawina suongum a hmaa kan khum ding chu nangni naw tu dang am nîng an ta? 20 Nangni hi kan ropuina ding le kan hlimna ding chu in nih.
1 Chuongchun, kan nghàk zo ta uoi naw leiin, keini chauh Athen khuoah la châmbâng inlang tha tak dingin kan ngai a. 2 Chuleiin, kan unaupa Timothe, Krista Chanchin Tha hrila Pathien rong kan bawlpui hi in ringna suknghet le sukphûr ding le hieng ang fiena leia nangni lai tu khom an inhnìng nawna dingin kan hung tir a nih. 3 Nangni khomin hieng thil hi ei tuor ngei ding a nih ti in hriet ta sa a ni kha. 4 In kuoma kan um laia sukdùdàna ei la tuor ding thu kan hril rop tah chêu ang tak khan a hung tlung tah a nih ti in hriet. 5 Hi lei hin, ringnaa in nghet pei le pei naw hre loa ka um thei tâk naw leiin le ieng kong zawngin amanih thlemtu chun thlêm hnè cheu a, kan sinthaw a thlawn el pal kan inlàu leiin Timothe hi ka hung tir a nih. 6 Timothe chu in kuoma inthokin a hung kîr nawk tah a, chanchin lawmum tak, in ring nghetzie dàm, hmangaina in hauzie dàm, keinin hmu chêu kan chàk èm êm ang boka mi hmu in chàk vezie thu hai dàm, ieng lai khomin in mi hriet zing ti thuhai dàm a mi hril a. 7 Chuleiin, unauhai, in ringna a nghet leiin kan lungzingna le rinumna po poah lung muong takin kan um thei tah a nih. 8 Lalpaa in nghet pei lei hin kan ta dingin dam man a um. 9 Nangni zâra Pathien hmaa kan hlimna po po lei hin Pathien kuomah lawmthu hril kan va bat nasa de aw! 10 In hmêl kan hmu theina ding le ringnaa in tlàksam kan phuhrûk theina ding chêuin Pathien kuomah sùn le zànin thahnemngai takin kan hni hlak. 11 Tu hin ei Pa Pathien le ei Lalpa Isu chun nangni kan hung kan theina ding chèuin lampui mi siempêk raw se. 12 Keinin kan hmangai ang chèua nasaa in inhmangai theina dingin, in hmangaina chu Lalpan sukthangin sukpungpêk cheu raw se. 13 Chuongchun, a mi thienghlim po po le ei Lalpa Isu a hung phaa Pathien, ei Pathien hmaah thienghlim le soisel boa in um theina dingin in lungril suknghet bok raw se.
1 A tawp taka chun unauhai, Pathien lawmzawnga um dàn ding kan inchûktir hlak chêu ang khan tu hin in um a, chuong anga um zuol pei dingin Lalpa Isu hminga ngènin kan infui bok chêu a nih. 2 Lalpa Isu thuneina hmanga kan thu inchûktirhai chèu kha in hriet. 3 Pathien ditzawng chu hi hi a nih- in thienghlim hi. Chuleiin, inngaihai bânsan ro. 4 Mi tinin mani taksaa seng thienghlim le inzaum taka thunun dàn inchûk raw se. 5 Pathien hre lo Jentêlhai angin tisa châknaah tlu lût naw ro. 6 Hi thila hin tu khomin a unau hlêmin a lakah thil tha naw thaw naw raw se; chuong ang thawtuhai chunga chun Lalpan phuba lâng a tih ti hrilin kan inhriettir tah cheu kha. 7 Pathien chun thienghlim lo dingin a mi ko naw a, thienghlim taka khawsa dingin a mi ko lem a nih. 8 Chuleiin, hi thu poisa nawtu chun mihriem a poisa naw ni loin Thlarau Thienghlim petu cheu Pathien a poisa naw a ni lem. 9 Pathienin nangni ngei inhmangai tuo dàn a'n chûktir ta chêu leiin unau in inhmangai dàn ding thu chu in kuomah ziek hran a ngai nawh. 10 Chuong ang chun Makedonia rama unau po po khom in hmangai hlak kha. Unauhai, chu chu thaw zuol pei dingin ka ngèn cheu. 11 Kan infui tah chêu ang khan, dei dapa khawsain mani sin sengah inbûr unla, mani kut ngeia sinthaw uor ro. 12 Chuongchun, in ni tin khawsaka chun puo tieng mi inzà phur in ta, tu chunga khom innghat naw bok in tih. 13 Unauhai, beiseina hrim nei lo mi danghai anga in lungngai nawna dingin, lo in tahai chanchin chu in hriet naw ka nuom nawh. 14 Isu a thi a, a tho nawk ti ei ring a, amaa in tahai chu Pathienin Isu leh hung thuoi a tih ti ei ring bok a. 15 Lalpa thuin hi hi kan hril chêu a nih: eini Lalpa hung chena dama la um zinghai hin a lo in tahai chu lekhal naw top ei tih. 16 Lalpa ngei chu, thupêk inring tak le vàntirko ropui tak rawl le Pathien kona tawtawrawt ri leh, vàna inthokin hung tum a ta, Kristaa thi tahai chu tho hmasàng an tih. 17 Chu hnunga chun eini dama la um zinghai hi boruokah Lalpa hmuok dingin anni ruolin sûm lai khin làk tungin um ei ta, Lalpa kuomah um kumkhuo tàng ei tih. 18 Chuongchun, hieng thuhai hin inthlamuong tuo hlak ro.
1 Amiruokchu, unauhai, a hun le ni thu chu in kuoma ziek a ngai nawh. 2 Lalpa ni chu zàna rûkru a hung angin a hung tlung ding a nih ti in hriet si a. 3 Mihaiin, "A him, a muong" an ti laiin nuhmei nauha se angin sietna an chungah hung tlung thut a ta, pumpel top naw ni hai. 4 Unauhai, nangni chu thima um in ni naw leiin chu ni chun rûkru angin nang nawng a ti chêu. 5 In rêngin var nauhai le ni nauhai in ni vong si a. Zàna mi ei ni naw a, thima mi ei ni bok nawh. 6 Chuleiin, mi danghai anga in ve loin, meng zingin ngaiven lem ei tiu. 7 Inhai chu zànah a nih an in hlak; zuruihai khom zànah a nih an inrui hlak. 8 Eini chu sùna mi ei ni leiin ringna le hmangaina awmphaw hâkin, sandam beiseina chu lukhuma hmangin, har fîm takin um lem ei tiu. 9 Pathien lungsenna tuor ding ni loin ei Lalpa Isu Krista zàra sandam ni dingin a mi ruot lem a nih. 10 Ei dam khoma ei thi khoma ama leh ei hring theina dingin ama chu ei ta dingin a thi ta si a. 11 Chuleiin, in thaw hlak ang hrimin, inthlamuong tuoin insukhrât tuo ro. 12 Unauhai, in ta dinga inrim taka sinthawtuhai, Lalpaa nangni enkoltuhai le kawktuhai chèu chu hre zing dingin ka ngèn cheu a nih. 13 Anni chu an sinthaw leiin hmangainain ngai chunghnung tak unla, inngei diel dielin um ro. 14 Chun, unauhai, ka ngèn cheu hi, mi thabohai chu kawk unla, zaksiehai chu sukphûr unla, mi hrât nawhai chu thangpui unla, mi tin chungah dawthei ro. 15 Tu khomin tu suol khom suola thungrul lo dingin fîmkhur unla, ieng lai khoma thil tha inthawpêk tuoin, mi po po chungah thil tha thaw pei ro. 16 Lawm rop unla, 17 ma loin tongtai unla, 18 iengkimah lawmthu hril rop ro. Hi hi Krista Isua chun in ta dinga Pathien ditzawng a nih. 19 Thlarau mei chu sukmit naw ro. 20 Thuhriltuhai hmusit naw ro. 21 Iengkim fie unla, a tha taphot chu chel nghet ro. 22 Suol taphot laka chun inthier fihlim ro. 23 Remna Pathien ngei chun in pumin sukthienghlim sien cheu, ei Lalpa Isu Krista hung pha in thlarau le in lungril le in taksa a rêngin soisèl boin inumtir raw se. 24 A kotu chèu chu a ringum a, thaw khom thaw ngei a tih. 25 Unauhai, mi tongtaipêk ro. 26 Unau po pohai kha fawp inthiengin mi hung chibai vong ro. 27 Hi lekha hi unau po po hrieta tiem dingin Lalpa hmingin ka ngèn chêu a nih. 28 Ei Lalpa Isu Krista lunginsietna chu in kuomah um raw se.