SOFONIASKAPITULO 1ANG polong sang GINOO nga nag-abut kay Sofonias nga anak nga lalaki ni Cusi, ang anak nga lalaki ni Gedalias, ang anak nga lalaki ni Amarias, ang anak nga lalaki ni Hezkias, sa mga adlaw ni Josias nga anak nga lalaki ni Amon, hari sang Juda.2 Papason ko sing bug-os ang tanan nga butang gikan sa duta, nagasiling ang GINOO. 3 Papason ko ang tawo kag sapat; papason ko ang kapispisan sang langit, kag ang kaisdaan sang dagat, kag ang mga kasandaran upud sa mga malauton; kag utdon ko ang tawo gikan sa duta, nagasiling ang GINOO. 4 Untayon ko man ang akon kamut sa Juda, kag sa tanan nga mga pumuluyo sang Jerusalem; kag papason ko sa sining duug ang nabilin ni Baal, kag ang ngalan sang mga Kemarim upud sa mga pari; 5 Kag ang mga nagasimba sang panong sang langit sa ibabaw sang mga atop; kag ang mga nagasimba kag nagasumpa tungud sa GINOO, kag mga nagasumpa tungud kay Malcam; 6 Kag ang mga nagatalikod gikan sa pagsonod sa GINOO; kag yadtong mga wala nagapangita sa GINOO, ukon nagpangusisa nahanungud sa iya. 7 Hipus ka sa atubangan sang Ginoong DIOS: kay ang adlaw sang GINOO malapit na: kay ang GINOO nakaaman sing halad, nakaagda sia sang iya mga inagda. 8 Kag mahanabu sa adlaw sang halad sang GINOO, nga silotan ko ang mga prinsipe, kag ang mga kabataan sang hari, kag ang tanan nga napanaptan sing panapton nga dumuloong. 9 Sa amo man nga adlaw silotan ko yadtong tanan nga nagaliktin sa atangan, nga nagapuno sang mga balay sang ila mga agalon sing palugus kag paglimbong. 10 Kag mahanabu sa sinang adlaw, nagasiling ang GINOO, nga may kagahud sang sininggit gikan sa gawang sang isda, kag paghinaya gikan sa ikaduha, kag dakung pagrinagaak gikan sa kabakoloran. 11 Maggalaab, kamo nga mga pumuluyo sang Maktes, kay ang tanan nga tawo nga komersyante napukan; tanan sila nga nagadala sing pilak napapas. 12 Kag mahanabu sa sinang tion, nga usisaon ko nga may mga kandila ang Jerusalem, kag silotan ang mga tawo nga yara sa ila mga lagdo: nga nagasiling sa ila tagiposoon, Ang GINOO indi magahimo sing maayo, kag indi sia magahimo sing malaut. 13 Busa ang ila mga pagkabutang mangin-inatihan, kag ang ila mga balay manginmamingaw: magapatindug man sila sing mga balay, apang indi sila makapuyo sa ila; kag magatanum sila sing mga ulubasan, apang indi makainum sang alak sa ila sini. 14 Ang dakung adlaw sang GINOO malapit na, malapit na ini, kag nagadalidali sing tama, bisan ang tingug sang adlaw sang GINOO: ang gamhanan nga lalaki magasinggit sing mapait didto. 15 Inang adlaw adlaw sang kasingkal, adlaw sang kagamo kag kalisud, adlaw sang kalaglagan kag kamingaw, adlaw sang kadudulman kag kaguum, adlaw sang mga gal-um kag pitipit nga kadudulman, 16 Adlaw sang budyong kag paandam batok sa mga siudad nga napamakuran, kag batok sa mataas nga mga torre. 17 Kag dalhon ko ang kalisud sa mga tawo, agud nga maglakat sila kaangay sang mga tawong bulag, bangud nga nakasala sila batok sa GINOO: kag ang dugo nila ulaon subong sang yab-ok, kag ang ila unud subong sang ipot. 18 Bisan ang ila pilak ukon ang ila bulawan indi sarang makaluwas sa ila sa adlaw sang kasingkal sang GINOO; apang ang bug-os nga duta halunhonon sang kalayo sang iya kaimon: kay sia magahimo sing hinali gid nga pagpangtapus sa ila tanan nga nagapuyo sa duta. KAPITULO 2TILIPON kamo sing tingub, hoo, tilipon sing tingub, O pungsud nga indi halandumon;2 Sa wala pa matuman ang mando, sa wala pa magligad ang adlaw subong sang labhang, sa wala pa mag-abut sa inyo ang masingkal nga kaakig sang GINOO, sa wala pa mag-abut sa inyo ang adlaw sang kaakig sang GINOO. 3 Pangitaa ninyo ang GINOO, kamo tanan nga mapainubuson sang duta, nga nagtuman sang iya pagsolondan; pangitaa ang pagkamatarung, pangitaa ang pagkamapainubuson: ayhan malipdan kamo sa adlaw sang kaakig sang GINOO. 4 ¶ Kay ang Gasa bayaan, kag ang Ascalon manginmamingaw: tabogon nila ang Asdod sa kaodtohon, kag gabuton ang Ecron. 5 Kailo sa mga pumuluyo sang baybayon sang dagat, ang pungsud sang mga Keretnon! ang polong sang GINOO batok sa inyo; O Canaan, duta sang mga Filistinhon, laglagon ko man ikaw, agud nga wala na sing pumuluyo. 6 Kag ang baybayon sang dagat mangin mga puluy-an kag mga payagpayag nga sa mga manugpahalab, kag mga toril nga sa mga panong. 7 Kag ang baybayon matungud sa nabilin sang panimalay sang Juda; magapahalab sila didto: sa mga balay sang Ascalon magahigda sila sa kagab-ihon: kay duawon sila sang GINOO nga ila Dios, kag magapahauli sang ila kabihagan. 8 ¶ Nabatian ko ang pagpakahuya sang Moab, kag ang mga pagbuyayaw sang mga anak ni Amon, nga ginpakahuya nila sa akon katawohan, kag nagpakadaku sang ila kaugalingon batok sa ila dulunan. 9 Busa sa nagakabuhi ako, nagasiling ang GINOO sang mga kasoldadosan, ang Dios sang Israel, Sa pagkamatuud ang Moab manginsubong sang Sodoma, kag ang mga anak ni Amon subong sang Gomorra, nga nagapatubo sang mga katunukan, kag mga awang sang asin, kag dayon nga kamingaw: ang salin sang akon katawohan magaati sa ila, kag ang nabilin sang akon katawohan magatag-iya sa ila. 10 Ini agumon nila tungud sang ila pagpabugal, bangud nga nagpakahuya kag nagpakadaku sila batok sa katawohan sang GINOO sang mga kasoldadosan. 11 Ang GINOO manginmakakulugmat sa ila: kay pagutuman niya ang tanan nga dios sang duta; kag ang mga tawo magasimba sa iya, ang tagsatagsa kutub sa iya duug, ang tanan nga kapuloan sang mga pagano. 12 ¶ Kamo man nga mga Etiopiahanon, patyon kamo sang akon espada. 13 Kag untayon niya ang iya kamut batok sa aminhan, kag laglagon ang Asiria; kag himoon nga mamingaw ang Ninive, kag mamala kaangay sang kamingawan. 14 Kag ang mga panong magaluko sa tunga niya, ang tanan nga kasapatan sang mga pungsud: ang uwak sa dagat kag ang herisa magaholon sa naibabaw nga mga olohan sang ganhaan sini; ang ila tingug magaamba sa mga bintana; ang kamingaw manginsa mga atangan: kay hublasan niya ang mga binuhat nga cedro. 15 Amo ini ang siudad nga masinadyahon nga nagpuyo sing patarasak, nga nagsiling sa iya tagiposoon, Ako amo, kag wala na sing iban luwas sa akon: daw ano nga nagmingaw sia, isa ka duug nga lulukhan sang kasapatan! ang tagsatagsa nga nagalabay sa iya magapanagutsut, kag magabalabad sang iya kamut. KAPITULO 3KAILO sa iya nga mahigko kag dinagtaan, sa mapiguson nga siudad!2 Wala sia magtuman sang tingug; wala sia magbaton sang pagbadlong; wala sia magsalig sa GINOO; wala sia magpalapit sa iya Dios. 3 Ang iya mga prinsipe sa tunga niya mga leon nga nagangurub; ang iya mga hukom mga lobo sa kagab-ihon; wala sila nagakitkit sang mga tul-an tubtub sa aga. 4 Ang iya mga manalagna mga mapatuyangon kag mabudhion nga mga tawo: ang iya mga pari nagdagta sang santuario, ginpalugusan nila ang kasogoan. 5 Ang GINOO nga matarung yara sa tunga sini; indi sia magahimo sing kalautan: sa tagsa ka aga ginapasiga niya ang iya paghukom, wala sia nagapalangan; apang ang dimatarung wala makakilala sing kahuya. 6 Ginpapas ko ang mga pungsud: ang ila mga torre mamingaw; ginguba ko ang ila mga dalan, sa bagay nga wala na sing nagaagi: ang ila mga siudad nalaglag, sa bagay nga wala na sing tawo, nga wala na sing pumuluyo. 7 Nagsiling ako, Magakahadluk ka sa akon sing totoo, magabaton ka sing pagbadlong; agud nga ang ila puluy-an indi mapapas, bisan ginsilotan ko sila: apang nagbangon sila sing aga pa, kag nagpadunut sang tanan nila nga hinimoan. 8 ¶ Busa hulata ninyo ako, nagasiling ang GINOO, tubtub sa adlaw nga magtindug ako sa inagaw: kay ang akon pagtapat amo ang pagtipon sang mga pungsud, agud nga matingub ko ang mga ginharian, sa pag-ula sa ila sang akon kaalipungut, ang bug-os kong masingkal nga kaakig: kay ang bug-os nga duta lamonon sang kalayo sang akon kaimon. 9 Kay niyan palisoon ko sa katawohan ang isa ka putli nga hambal, agud nga sila tanan magtawag sa ngalan sang GINOO, sa pag-alagad sa iya sa isa ka paghilisugut. 10 Kutub sa unhan sang mga suba sang Etiopia ang akon mga manugpangampo, ang babaye nga anak sang akon ginpaaplaag, magadala sang akon dolot. 11 Sa sinang adlaw indi ka pagpakahuy-an bangud sang tanan mo nga hinimoan, diin naglalis ka batok sa akon: kay niyan kuhaon ko sa tunga nimo ang mga nagakasadya sa imo pagpabugal, kag indi ka na magpalabilabihon bangud sang akon balaan nga bukid. 12 Magabilin ako man sa tunga nimo sing napiotan kag imol nga katawohan, kag sila magasalig sa ngalan sang GINOO. 13 Ang nabilin sang Israel indi magahimo sing kalautan, ukon magapamolong sing mga kabutigan; kag ang malimbongon nga dila indi makita sa ila baba: kay sila magahalab kag magaluko, kag wala gid sing magapahadluk sa ila. 14 ¶ Mag-amba, O babaye nga anak sang Zion; singgit, O Israel; magkalipay kag magkasadya sa bug-os nga tagiposoon, O babaye nga anak sang Jerusalem. 15 Ang GINOO nagkuha sang imo mga paghukom, ginsobol niya ang imo kaaway: ang hari sang Israel, nga amo ang GINOO, yara sa tunga nimo: indi ka na makakita sing malaut. 16 Sa sinang adlaw isiling sa Jerusalem, Dili ka magkahadluk: kag sa Zion, Dili magluya ang imo mga kamut. 17 Ang GINOO nga imo Dios sa tunga nimo gamhanan; magaluwas sia, magakasadya sia sa imo nga may kalipay; magapahuway sia sa iya gugma, magakalipay sia sa imo nga may inamba. 18 Tiponon ko ang mga masinulub-on nga sa pagtilipon nga solemne, sila nga mga sa imo, nga sa ila isa ka lulan ang pagpakahuya sini. 19 Yari karon, sa sinang tion magapamusmus ako sa tanan nga nagapapiot sa imo: kag luwason ko sia nga nagapiangpiang, kag tiponon sia nga ginsobol; kag himoon ko sila nga pagdayaw kag kabantug sa tagsa ka duta diin ginpakahuy-an sila. 20 Sa sinang tion dalhon ko kamo liwat, sa tion gid nga tiponon ko kamo: kay himoon ko kamo nga ngalan kag pagdayaw sa tunga sang tanan nga katawohan sang duta, kon pahaulian ko ang inyo kabihagan sa atubangan sang inyo mga mata, nagasiling ang GINOO. |