ANG BALAAN NGA BIBLIA

ZACARIAS

KAPITULO 1

SA ikawalong bulan, sa ikaduha nga tuig ni Dario, nag-abut ang polong sang GINOO kay Zacarias nga anak nga lalaki ni Berequias, ang anak nga lalaki ni Iddo, ang manalagna, nga nagasiling,

2 Ang GINOO naakig sing tama sa inyo mga kaamayan.

3 Busa isiling mo sa ila, Amo ini ang ginasiling sang GINOO sang mga kasoldadosan; Balik kamo sa akon, nagasiling ang GINOO sang mga kasoldadosan, kag ako magabalik sa inyo, nagasiling ang GINOO sang mga kasoldadosan.

4 Dili kamo magsubong sa inyo mga kaamayan, nga sa ila nagsinggit ang una nga mga manalagna, nga nagasiling, Amo ini ang ginasiling sang GINOO sang mga kasoldadosan; Talikod kamo karon sa inyo malaut nga mga dalanon, kag sa inyo malaut nga mga hinimoan: apang wala sila magpamati, ukon magtalupangud sa akon, nagasiling ang GINOO.

5 Ang inyo mga kaamayan, diin bala sila? kag ang mga manalagna, nagakabuhi sila bala sing dayon?

6 Apang ang akon mga polong kag ang akon mga palatukuran, nga ginsogo ko sa akon mga alagad nga mga manalagna, wala bala nila malambut ang inyo mga kaamayan? kag nagbalik sila kag nagsiling, Sono sa gintapat sang GINOO sang mga kasoldadosan nga himoon sa aton, sono sa aton mga dalanon, kag sono sa aton mga hinimoan, amo ini ang paghisayo niya sa aton.

7 ś Sa ikaduha ka pulo kag apat nga adlaw sang bulan nga ikapulog isa, nga amo ang bulan nga Sebat, sa ikaduhang tuig ni Dario, nag-abut ang polong sang GINOO kay Zacarias nga anak nga lalaki ni Berequias, ang anak nga lalaki ni Iddo, ang manalagna, nga nagasiling,

8 Nakita ko sa kagab-ihon, kag yari karon ang isa ka lalaki nga nagasakay sa kabayo nga mapula, kag nagdolog sia sa tunga sang mga kahoy nga mirto nga yara sa ubus; kag sa olihi niya may mapula nga mga kabayo, pintokpintokon, kag maputi.

9 Niyan nagsiling ako, O ginoo ko, ano bala ini sila? Kag ang anghel nga nagpakighambal sa akon nagsiling sa akon, Ipakita ko sa imo kon ano ini sila.

10 Kag ang lalaki nga nagdolog sa tunga sang mga kahoy nga mirto nagsabat kag nagsiling, Ini sila amo ang mga ginpadala sang GINOO sa paglakat pakadto-pakari sa duta.

11 Kag sila nagsabat sa anghel sang GINOO nga nagdolog sa tunga sang mga kahoy nga mirto, kag nagsiling, Naglakat kami pakadto-pakari sa duta, kag, yari karon, ang bug-os nga duta matinong, kag nagapahuway.

12 ś Niyan ang anghel sang GINOO nagsabat kag nagsiling, O GINOO sang mga kasoldadosan, tubtub pa bala san-o nga indi ka magkalooy sa Jerusalem kag sa mga siudad sang Juda, nga batok sa ila naalipungut ka sini nga kapitoan ka tuig?

13 Kag ang GINOO nagsabat sa anghel nga nagpakighambal sa akon sa maayo nga mga polong kag makalilipay nga mga polong.

14 Gani ang anghel nga nagpakighambal sa akon nagsiling sa akon, Singgit ka, nga nagasiling, Amo ini ang ginasiling sang GINOO sang mga kasoldadosan; Nagakaimon ako sa Jerusalem kag sa Zion sa daku nga kaimon.

15 Kag nagakaakig ako sing tama gid sa mga pagano nga yara sa katawhay: kay naakig ako lamang sing diotay, kag nagbulig sila sa pagpadayon sang kapipit-an.

16 Busa amo ini ang ginasiling sang GINOO; Nagabalik ako sa Jerusalem nga may mga kalooy: patindugon sa sini ang akon balay, nagasiling ang GINOO sang mga kasoldadosan, kag ang latid untayon sa ibabaw sang Jerusalem.

17 Singgit pa, nga nagasiling, Amo ini ang ginasiling sang GINOO sang mga kasoldadosan; Ang akon mga siudad paagi sa kauswagan magaawas pa; kag lipayon pa sang GINOO ang Zion, kag pilion pa ang Jerusalem.

18 ś Niyan ginbayaw ko ang akon mga mata, kag nakakita, kag yari karon ang apat ka sungay.

19 Kag nagsiling ako sa anghel nga nagpakighambal sa akon, Ano bala ini sila? Kag nagsabat sia sa akon, Ini sila amo ang mga sungay nga nagpaaplaag sang Juda, sang Israel, kag sang Jerusalem.

20 Kag ginpakitaan ako sang GINOO sing apat ka panday.

21 Niyan nagsiling ako, Ano bala ang ginakari nila sini nga himoon? Kag nagpamolong sia, nga nagasiling, Ini sila amo ang mga sungay nga nagpaaplaag sang Juda, sa bagay nga wala sing tawo nga nagtukhayaw sang iya olo: apang ini sila nagkari sa pagpakugmat sa ila, sa pagtabog sang mga sungay sang mga Gentil, nga nagbayaw sang ila sungay sa ibabaw sang duta sang Juda sa pagpaaplaag sini.

KAPITULO 2

GINBAYAW ko liwat ang akon mga mata, kag nakakita, kag yari karon ang isa ka lalaki nga may inuglatid sa iya kamut.

2 Niyan nagsiling ako, Diin ka makadto? Kag sia nagsiling sa akon, Sa pagtakus sang Jerusalem, sa pagtan-aw kon ano ang kasangkaron sini, kag kon ano ang kalabaon sini.

3 Kag, yari karon, ang anghel nga nagpakighambal sa akon nagtaliwan, kag ang isa pa ka anghel naggowa sa pagsugata sa iya,

4 Kag nagsiling sa iya, Dalagan, magpamolong sa sining pamatan-on nga lalaki, nga nagasiling, Pagapuy-an ang Jerusalem subong sang mga banwa nga wala sing mga kuta, bangud sang kadamuon sang mga tawo kag sang kahayupan sa sini:

5 Kay ako, nagasiling ang GINOO, manginkuta nga kalayo sa iya sa palibut, kag manginhimaya ako sa tunga niya.

6 ś Hoy, hoy, maggowa, kag magpalagyo gikan sa duta sang aminhan, nagasiling ang GINOO: kay ginlapta ko kamo subong sang apat ka hangin sang langit, nagasiling ang GINOO.

7 Panginluwas ka, O Zion, nga nagapuyo upud sa babaye nga anak sang Babilonia.

8 Kay amo ini ang ginasiling sang GINOO sang mga kasoldadosan; Tungud sa himaya ginpadala niya ako sa mga pungsud nga nag-ati sa inyo: kay ang nagatandug sa inyo nagatandug sang tawotawo sang iya mata.

9 Kay, yari karon, ibalabad ko ang akon kamut sa ila, kag mangin-inagaw sila sa mga nag-alagad sa ila: kag makilala ninyo nga ang GINOO sang mga kasoldadosan nagpadala sa akon.

10 ś Mag-amba kag magkasadya, O babaye nga anak sang Zion: kay, yari karon, nagakari ako, kag magapuyo ako sa tunga nimo, nagasiling ang GINOO.

11 Kag magasilimpon ang madamu nga mga pungsud sa GINOO sa sinang adlaw, kag manginkatawohan nakon: kag magapuyo ako sa tunga nimo, kag makilala mo nga ang GINOO sang mga kasoldadosan nagpadala sa akon sa imo.

12 Kag panublion sang GINOO ang Juda nga bahin niya sa duta nga balaan, kag pilion liwat ang Jerusalem.

13 Maghipus, O tanan nga unud, sa atubangan sang GINOO: kay nagatindug sia gikan sa iya balaan nga puluy-an.

KAPITULO 3

KAG ginpakita niya sa akon si Josue nga mataas nga pari nga nagatindug sa atubangan sang anghel sang GINOO, kag si Satanas nga nagatindug sa iya too sa pagsumpung sa iya.

2 Kag ang GINOO nagsiling kay Satanas, Ang GINOO magsabdong sa imo, O Satanas; ang GINOO gid nga nagpili sang Jerusalem magsabdong sa imo: indi bala ini agipo nga ginkuha sa kalayo?

3 Karon si Josue napanaptan sing mga panapton nga mahigko, kag nagatindug sa atubangan sang anghel.

4 Kag sia nagsabat kag nagpamolong sa mga nagatindug sa atubangan niya, nga nagasiling, Ubaha ninyo sa iya ang mga bayo nga mahigko. Kag sa iya nagsiling sia, Yari karon, ginpataliwan ko sa imo ang kalautan nimo, kag papanaptan ko ikaw sing bayo nga bag-o.

5 Kag nagsiling ako, Magbutang sila sing turbante nga matahum sa ibabaw sang iya olo. Gani ginbutangan nila sing turbante nga matahum ang iya olo, kag ginpapanaptan sia sing mga panapton. Kag ang anghel sang GINOO nagtindug sa luyo.

6 Kag ang anghel sang GINOO nagpamatuud kay Josue, nga nagasiling,

7 Amo ini ang ginasiling sang GINOO sang mga kasoldadosan; Kon maglakat ka sa akon mga dalanon, kag kon magbantay ka sang akon tinulin, niyan magahukom ka man sang akon balay, kag magabantay man sang akon mga luwang, kag hatagan ko ikaw sing mga duug nga lalaktan sa tunga sining mga nagatindug sa luyo.

8 Pamatii karon, O Josue nga mataas nga pari, ikaw, kag ang imo mga kaupdanan nga nagalingkod sa atubangan mo: kay mga lalaki sila nga katingalahan: kay, yari karon, pakarion ko ang akon alagad nga SANGA.

9 Kay yari karon ang bato nga ginbutang ko sa atubangan ni Josue; sa isa ka bato manginmay pito ka mata: yari karon, itigib ko ang inugtigib sini, nagasiling ang GINOO sang mga kasoldadosan, kag kuhaon ko ang kalautan sinang duta sa isa ka adlaw.

10 Sa sinang adlaw, nagasiling ang GINOO sang mga kasoldadosan, matawag kamo ang tagsa ka tawo sang iya isigkatawo sa idalum sang puno sang ubas kag sa idalum sang kahoy nga higuera.

KAPITULO 4

KAG ang anghel nga nagpakighambal sa akon nagbalik, kag nagpukaw sa akon, subong sang tawo nga ginpukaw sa iya katologon,

2 Kag nagsiling sa akon, Ano bala ang makita mo? Kag nagsiling ako, Nagtan-aw ako, kag yari karon ang isa ka kandilero nga bus-og nga bulawan, nga may yahong sa ibabaw sini, kag ang iya pito ka suga sa ibabaw sini, kag pito ka iligan nga sa pito ka suga, nga yara sa ibabaw sini:

3 Kag duha ka kahoy nga olivo sa luyo sini, ang isa sa too nga kilid sang yahong, kag ang isa sa wala nga kilid sini.

4 Gani nagsabat ako kag nagpamolong sa anghel nga nagpakighambal sa akon, nga nagasiling, Ano bala ini sila, ginoo ko?

5 Niyan ang anghel nga nagpakighambal sa akon nagsabat kag nagsiling sa akon, Wala ka bala makakilala kon ano ini sila? Kag nagsiling ako, Wala, ginoo ko.

6 Niyan nagsabat sia kag nagpamolong sa akon, nga nagasiling, Ini amo ang polong sang GINOO kay Zorobabel, nga nagasiling, Indi sa kusug, ukon sa gahum, kondi sa akon espiritu, nagasiling ang GINOO sang mga kasoldadosan.

7 Sin-o bala ikaw, O daku nga bukid? sa atubangan ni Zorobabel manginkapatagan ka: kag dalhon niya ang pangolong bato sini nga may mga sininggit, nga nagatuaw, Bugay, bugay sa sini.

8 Labut pa ang polong sang GINOO nag-abut sa akon, nga nagasiling,

9 Ang mga kamut ni Zorobabel nagpasad sang sadsaran sini nga balay; ang iya mga kamut man magahuman sini; kag makilala mo nga ang GINOO sang mga kasoldadosan nagpadala sa akon sa inyo.

10 Kay sin-o bala ang nagtamay sang adlaw sang magamay nga mga butang? kay magakalipay sila, kag magatan-aw sang tonton sa kamut ni Zorobabel upud sadtong pito; sila amo ang mga mata sang GINOO, nga nagapanoloktolok sa bug-os nga duta.

11 ś Niyan nagsabat ako, kag nagsiling sa iya, Ano bala ining duha ka kahoy nga olivo sa too nga kilid sang kandilero kag sa wala nga kilid sini?

12 Kag liwat nagsabat ako, kag nagsiling sa iya, Ano bala ining duha ka sanga nga olivo, nga paagi sa duha ka bulawan nga iligan nagapailig sing bug-os sang bulawanon nga lana gikan sa ila?

13 Kag nagsabat sia sa akon kag nagsiling, Wala ka bala makakilala kon ano ini sila? Kag nagsiling ako, Wala, ginoo ko.

14 Niyan nagsiling sia, Ini sila amo ang duha ka hinaplas, nga nagatindug sa luyo sang Ginoo sang bug-os nga duta.

KAPITULO 5

NIYAN nagbalikid ako, kag ginbayaw ang akon mga mata, kag nagtan-aw, kag yari karon ang isa ka linukut nga nagalupad.

2 Kag nagsiling sia sa akon, Ano bala ang makita mo? Kag nagsabat ako, Nakita ko ang isa ka linukut nga nagalupad; ang kalabaon sini duha ka pulo ka maniko, kag ang kasangkaron sini napulo ka maniko.

3 Niyan nagsiling sia sa akon, Ini amo ang pagpakamalaut nga nagalupad sa ibabaw sang kadaygan sang bug-os nga duta: kay ang tagsatagsa nga nagapangawat utdon sa sining kilid sono sa sini; kag ang tagsatagsa nga nagasumpa utdon sa sinang kilid sono sa sini.

4 Pagowaon ko ini, nagasiling ang GINOO sang mga kasoldadosan, kag magasulud ini sa balay sang makawat, kag sa balay sang nagasumpa sing dimatuud paagi sa akon ngalan: kag magapabilin ini sa tunga sang iya balay, kag magaupus sini pati sang mga pasagi sini kag sang mga bato sini.

5 ś Niyan ang anghel nga nagpakighambal sa akon naggowa, kag nagsiling sa akon, Bayawa karon ang imo mga mata, kag tan-awa kon ano ining nagagowa.

6 Kag ako nagsiling, Ano bala ini? Kag sia nagsiling, Ini amo ang efa nga nagagowa. Labut pa nagsiling sia, Ini amo ang dagway nila sa bug-os nga duta.

7 Kag, yari karon, may ginbayaw nga isa ka talanton nga tingga: kag ini amo ang isa ka babaye nga nagalingkod sa tunga sang efa.

8 Kag nagsiling sia, Pagkamalaut ini. Kag gindasuk niya ini sa tunga sang efa; kag ginpus-ang niya ang kabug-at sang tingga sa baba sini.

9 Niyan ginbayaw ko ang akon mga mata, kag nakakita, kag, yari karon, may naggowa nga duha ka babaye, kag ang hangin yara sa ila mga pakpak; kay may mga pakpak sila kaangay sang mga pakpak sang dugwak: kag ginbayaw nila ang efa sa ulut sang duta kag langit.

10 Niyan nagsiling ako sa anghel nga nagpakighambal sa akon, Diin bala nila ginadala ang efa?

11 Kag nagsiling sia sa akon, Sa pagpatindug nga sa sini sing balay sa duta sang Sinar: kag ini tukuron, kag ipahamtang didto sa ibabaw sang iya palatukan.

KAPITULO 6

KAG nagbalikid ako, kag ginbayaw ko ang akon mga mata, kag nagtan-aw, kag, yari karon, may nag-abut nga apat ka kangga gikan sa ulut sang duha ka bukid; kag ang mga bukid mga bukid nga saway.

2 Sa nahaunang kangga may mga kabayo nga mapula; kag sa ikaduhang kangga mga kabayo nga maitum;

3 Kag sa ikatlong kangga mga kabayo nga maputi; kag sa ikap-at nga kangga mga kabayo nga aboabohon kag mapulapula nga pagkakaki.

4 Niyan ako nagsabat kag nagsiling sa anghel nga nagpakighambal sa akon, Ano bala ini sila, ginoo ko?

5 Kag ang anghel nagsabat kag nagsiling sa akon, Ini sila amo ang apat ka espiritu sang mga langit, nga nagagowa gikan sa pagtindug sa atubangan sang GINOO sang bug-os nga duta.

6 Ang mga kabayo nga maitum nga yara sa sini nagapadolong sa duta nga naaminhan; kag ang maputi nagasonod sa olihi nila; kag ang aboabohon nagapadolong nayon sa duta nga bagatnan.

7 Kag ang mapulapula nga pagkakaki naggowa, kag nagtinguha sa paglakat agud nga sila maglibutlibut sa duta: kag nagsiling sia, Lakat kamo, libuta ang duta. Gani naglibutlibut sila sa duta.

8 Niyan nagsinggit sia sa akon, kag nagpamolong sa akon, nga nagasiling, Yari karon, ini sila nga nagapadolong nayon sa duta nga naaminhan nagpalinong sang akon espiritu sa duta nga naaminhan.

9 ś Kag ang polong sang GINOO nag-abut sa akon, nga nagasiling,

10 Kuha ka sa kabihagan kay Heldai, kay Tobias, kag kay Jedaya, nga nag-abut gikan sa Babilonia, kag lakat ka sa amo nga adlaw, kag magsulud sa balay ni Josias nga anak nga lalaki ni Sofonias;

11 Niyan magkuha ka sing pilak kag bulawan, kag maghimo sing mga purungpurung, kag ibutang sila sa olo ni Josue nga anak nga lalaki ni Josadac, ang mataas nga pari;

12 Kag ipamolong sa iya, nga nagasiling, Amo ini ang ginapamolong sang GINOO sang mga kasoldadosan, nga nagasiling, Yari karon ang lalaki nga ang iya ngalan Ang SANGA; kag magatubo sia gikan sa iya duug, kag patindugon niya ang templo sang GINOO:

13 Sia gid magapatindug sang templo sang GINOO; kag magadala sia sang himaya, kag magalingkod kag magadumala sa iya trono; kag manginpari sia sa iya trono: kag ang laygay sang paghidait mangin sa tunga nila nga duha.

14 Kag ang mga purungpurung mangin kay Helem, kag kay Tobias, kag kay Jedaya, kag kay Hen nga anak nga lalaki ni Sofonias, nga sa handumanan sa templo sang GINOO.

15 Kag sila nga sa malayo magaabut kag magapatindug sa templo sang GINOO, kag makilala ninyo nga ang GINOO sang mga kasoldadosan nagpadala sa akon sa inyo. Kag mahanabu ini, kon tumanon ninyo sing makugihon ang tingug sang GINOO nga inyo Dios.

KAPITULO 7

KAG nahanabu sa ikap-at nga tuig ni haring Dario, nga ang polong sang GINOO nag-abut kay Zacarias sa ikap-at nga adlaw sang bulan nga ikasiam, nga among Cisleu;

2 Sang nagpadala sila sa balay sang Dios kay Serezer kag kay Regem-melec, kag sang ila mga tawo, sa pagpangamuyo sa atubangan sang GINOO,

3 Kag sa pagpamolong sa mga pari nga yara sa balay sang GINOO sang mga kasoldadosan, kag sa mga manalagna, nga nagasiling, Maghibi bala ako sa ikalima nga bulan, nga nagapahain sang akon kaugalingon, subong sang ginhimo ko sining madamu na gid nga tuig?

4 ś Niyan nag-abut sa akon ang polong sang GINOO sang mga kasoldadosan, nga nagasiling,

5 Ipamolong sa tanan nga katawohan sang duta, kag sa mga pari, nga nagasiling, Sang nagpuasa kamo kag naglalaw sa ikalima kag sa ikapitong bulan, sa sinang kapitoan ka tuig, nagpuasa bala kamo gayud sa akon, sa akon gid?

6 Kag sang nagkaon kamo, kag sang nag-inum kamo, wala bala kamo nagkaon nga sa inyo kaugalingon, kag nag-inum nga sa inyo kaugalingon?

7 Indi bala kamo dapat magpamati sang mga polong nga ginsinggit sang GINOO paagi sa mga manalagna nga una, sang napuy-an ang Jerusalem kag sa kauswagan, kag ang mga siudad sini sa palibut niya, sang ginpuy-an sang mga tawo ang bagatnan kag ang kapatagan?

8 ś Kag ang polong sang GINOO nag-abut kay Zacarias, nga nagasiling,

9 Amo ini ang ginapamolong sang GINOO sang mga kasoldadosan, nga nagasiling, Hikota ang matuud nga paghukom, kag magpahayag sing kalooy kag mga kaawa ang tagsa ka tawo sa iya utud:

10 Kag dili pagpiguson ang balo nga babaye, ukon ang ilo sa amay, ang dumuloong, ukon ang imol; kag walay bisan sin-o sa inyo nga magpadugi sing malaut sa inyo tagiposoon batok sa iya utud.

11 Apang nagdumili sila sa pagtalupangud, kag nagtalikod sang abaga, kag nagsungsung sang ila mga idulungug, agud nga indi sila makabati.

12 Hoo, ginhimo nila ang ila tagiposoon subong sang matig-a nga bato, basi nga makabati sila sang kasogoan, kag sang mga polong nga ginpadala sang GINOO sang mga kasoldadosan sa iya espiritu paagi sa una nga mga manalagna: busa may nag-abut nga dakung kasingkal gikan sa GINOO sang mga kasoldadosan.

13 Busa nahanabu nga, subong nga sia nagpanawag, kag wala sila magpamati; sa amo nagpanawag sila, kag wala ako magpamati, nagasiling ang GINOO sang mga kasoldadosan:

14 Apang ginpaaplaag ko sila sang buhawi sa tunga sang tanan nga pungsud nga wala nila makilala. Sa amo ang duta mamingaw sa olihi nila, sa bagay nga walay tawo nga nag-agi ukon nagbalik: kay ginpamingaw nila ang maayong duta.

KAPITULO 8

LIWAT nag-abut sa akon ang polong sang GINOO sang mga kasoldadosan, nga nagasiling,

2 Amo ini ang ginasiling sang GINOO sang mga kasoldadosan; Nagkaimon ako sa Zion sa dakung kaimon, kag nagkaimon ako sa iya sa dakung kaalipungut.

3 Amo ini ang ginasiling sang GINOO; Nagabalik ako sa Zion, kag magapuyo sa tunga sang Jerusalem: kag ang Jerusalem tawgon nga siudad sang kamatooran; kag ang bukid sang GINOO sang mga kasoldadosan nga balaan nga bukid.

4 Amo ini ang ginasiling sang GINOO sang mga kasoldadosan; May magapuyo pa nga mga tigulang nga lalaki kag mga tigulang nga babaye sa mga dalan sang Jerusalem, kag ang tagsa ka tawo may iya nga sungkud sa iya kamut bangud sang katigulangon.

5 Kag ang mga dalan sang siudad mahil-ob sang mga kabataan nga lalaki kag sang mga kabataan nga babaye nga nagahinampang sa mga dalan sini.

6 Amo ini ang ginasiling sang GINOO sang mga kasoldadosan; Kon ini makatilingala sa mga mata sang nabilin sining katawohan sa sining mga adlaw, manginmakatilingala man bala ini sa akon mga mata? nagasiling ang GINOO sang mga kasoldadosan.

7 Amo ini ang ginasiling sang GINOO sang mga kasoldadosan; Yari karon, luwason ko ang akon katawohan gikan sa duta nga nasidlangan, kag gikan sa duta nga nakatundan;

8 Kag dalhon ko sila, kag magapuyo sila sa tunga sang Jerusalem: kag sila mangin-akon katawohan, kag ako mangin-ila Dios, sa kamatooran kag sa pagkamatarung.

9 ś Amo ini ang ginasiling sang GINOO sang mga kasoldadosan; Pabaskuga ang inyo mga kamut, kamo nga nagapamati sining mga polong sa sining mga adlaw paagi sa baba sang mga manalagna, nga amo sila sa adlaw nga ginpasad ang sadsaran sang balay sang GINOO sang mga kasoldadosan, agud nga mapatindug ang templo.

10 Kay sa wala pa ining mga adlaw walay hinakay sa tawo, ukon hinakay sa sapat; kag walay bisan ano nga paghidait sa nagagowa ukon sa nagasulud bangud sang kapipit-an: kay ginpahamtang ko ang tanan nga tawo ang tagsatagsa batok sa iya isigkatawo.

11 Apang karon sa nabilin sining katawohan indi ako magsubong sang sa mga adlaw nga una, nagasiling ang GINOO sang mga kasoldadosan.

12 Kay ang binhi mangin katin-aran; ang puno sang ubas magahatag sang iya bunga, kag ang duta magahatag sang iya patubas, kag ang mga langit magahatag sang ila ton-og; kag papanag-iyahan ko sa nabilin sining katawohan ining tanan nga butang.

13 Kag mahanabu, nga subong nga nanginpagpakamalaut kamo sa mga pagano, O panimalay sang Juda, kag panimalay sang Israel; amo man luwason ko kamo, kag manginpagpakamaayo kamo: dili magkahadluk, kondi pabaskuga ang inyo mga kamut.

14 Kay amo ini ang ginasiling sang GINOO sang mga kasoldadosan; Subong nga naghunahuna ako sa pagsilot sa inyo, sang ginpasingkal ako sang inyo mga kaamayan, nagasiling ang GINOO sang mga kasoldadosan, kag wala ako maghinulsul:

15 Sa amo liwat naghunahuna ako sa sining mga adlaw sa paghimo sing maayo sa Jerusalem kag sa panimalay sang Juda: dili kamo magkahadluk.

16 ś Ini amo ang mga butang nga inyo himoon; Magpamolong kamo ang tagsa ka tawo sing kamatooran sa iya isigkatawo; hikuta ang paghukom sang kamatooran kag paghidait sa inyo mga gawang:

17 Kag dili ang bisan sin-o sa inyo magpadugi sing malaut sa inyo mga tagiposoon batok sa iya isigkatawo; kag dili maghigugma sing dimatuud nga sumpa: kay ini tanan mga butang nga akon ginadumtan, nagasiling ang GINOO.

18 ś Kag ang polong sang GINOO sang mga kasoldadosan nag-abut sa akon, nga nagasiling,

19 Amo ini ang ginasiling sang GINOO sang mga kasoldadosan; Ang puasa sang ikap-at nga bulan, kag ang puasa sang ikalima, kag ang puasa sang ikapito, kag ang puasa sang ikapulo, manginkalipay kag kasadya kag malipayon nga mga pandut sa panimalay sang Juda; busa higugmaa ang kamatooran kag paghidait.

20 Amo ini ang ginasiling sang GINOO sang mga kasoldadosan; Mahanabu pa, nga may magaabut nga katawohan, kag mga pumuluyo sang madamung siudad:

21 Kag ang mga pumuluyo sang isa ka siudad magakadto sa isa, nga nagasiling, Magkadto kita sing madali sa pagpangamuyo sa atubangan sang GINOO, kag sa pagpangita sa GINOO sang mga kasoldadosan: ako magakadto man.

22 Hoo, madamu nga katawohan kag makusug nga mga pungsud magaabut sa pagpangita sa GINOO sang mga kasoldadosan sa Jerusalem, kag sa pagpangamuyo sa atubangan sang GINOO.

23 Amo ini ang ginasiling sang GINOO sang mga kasoldadosan; Sa sinang mga adlaw mahanabu, nga ang napulo ka tawo magabuyot gikan sa tanan nga hambal sang mga pungsud, sila magabuyot sang sidsid sang Judio, nga nagasiling, Magaupud kami sa inyo: kay nabatian namon nga ang Dios nagaupud sa inyo.

KAPITULO 9

ANG lulan sang polong sang GINOO sa duta sang Hadrac, kag ang Damasco mangin kapahuwayan sini: kon ang mga mata sang tawo, subong sang tanan nga tribo sang Israel, mangin nayon sa GINOO.

2 Kag ang Hamat man magatambi sa sini; ang Tiro, kag ang Zidon, bisan pa maalam gid ini.

3 Kag ang Tiro nagpatindug nga sa iya sing pamakud, kag nagtumpi sang pilak subong sang yab-ok, kag sang bulawan nga ulay subong sang lunang sang mga dalan.

4 Yari karon, ang GINOO magatabog sa iya, kag magasamad sia sang iya gahum sa dagat; kag lamonon sia sang kalayo.

5 Ang Ascalon makakita sini, kag magakahadluk; ang Gaza man makakita sini, kag magakasubo sing tama, kag ang Ecron; kay pagapakahuy-an ang iya pagpaabut; kag ang hari mawala sa Gaza, kag ang Ascalon indi pagpuy-an.

6 Kag ang unon magapuyo sa Asdod, kag walaon ko ang bugal sang mga Filistinhon.

7 Kag kuhaon ko ang iya dugo sa iya baba, kag ang iya mga kangil-aran gikan sa ulut sang iya mga ngipon: apang sia nga nagapabilin, sia gid, mangin nga sa aton Dios, kag manginsubong sia sang gobernador sa Juda, kag ang Ecron subong sang Jebusnon.

8 Kag magapahamtang ako sing kampo sa palibut sang akon balay bangud sang kasoldadosan, bangud sa iya nga nagalabay, kag bangud sa iya nga nagabalik: kag wala na sing manugpigus nga magaagi sa ila: kay karon nakita ko sang akon mga mata.

9 ś Magkalipay sing daku, O babaye nga anak sang Zion; magsinggit, O babaye nga anak sang Jerusalem: yari karon, ang imo Hari nagakari sa imo: matarung sia, kag may kaluwasan; mapainubuson, kag nagasakay sa asna, kag sa tinday, nga lamharon sang asna.

10 Kag papason ko ang kangga sa Efraim, kag ang kabayo sa Jerusalem, kag ang pana sa away papason: kag sia magapamolong sing paghidait sa mga pagano: kag ang iya pagdumalahan manginkutub sa dagat tubtub gid sa dagat, kag kutub sa suba tubtub gid sa mga ukbung sang duta.

11 Nahanungud sa imo man, paagi sang dugo sang imo katipan, ginhilway ko ang imo mga binilanggo gikan sa boho nga wala sing tubig.

12 ś Balik kamo sa pamakud, kamo nga mga binilanggo sang paglaum: karon gid nga adlaw ginapahayag ko nga magahatag ako sing pilo sa imo;

13 Kon mabuyuk ko na nga sa akon ang Juda, mabaslayan ang pana sang Efraim, kag masugyot ang imo mga lalaking anak, O Zion, batok sa imo mga lalaking anak, O Grecia, kag mahimo ikaw subong sang espada sang tawo nga gamhanan.

14 Kag ang GINOO makita sa ibabaw nila, kag ang iya baslay magagowa subong sang kilat: kag ang Ginoong DIOS magapatonog sang budyong, kag magaupud sa mga buhawi sang bagatnan.

15 Ang GINOO sang mga kasoldadosan magaapin sa ila; kag magalamon sila, kag magadaug nga may mga bato sang labyog; kag magainum sila, kag magagahud subong sang sa alak; kag pun-on sila kaangay sang mga yahong, kag kaangay sang mga pamusud sang halaran.

16 Kag ang GINOO nga ila Dios magaluwas sa ila sa sinang adlaw subong sang panong sang iya katawohan: kay manginsubong sila sang mga bato nga tampok sang purungpurung, nga nabayaw subong sang hayahay sa ibabaw sang iya duta.

17 Kay daw ano ka daku sang iya pagkaayo, kag daw ano ka daku sang iya katahum! ang uyas magapahalipay sang mga pamatan-on nga lalaki, kag ang bag-o nga alak sang mga dalaga.

KAPITULO 10

PANGAYO kamo sa GINOO sing ulan sa tion sang naolihi nga ulan; sa amo ang GINOO magahimo sing mga panganud nga masiga, kag hatagan sila sing mga bugana nga ulan, sa tagsatagsa sing hilamon sa latagon.

2 Kay ang mga diosdios nagpamolong sing wala sing pulus, kag ang mga manugpakot nakakita sing butig, kag nagsugid sing dimatuud nga mga damgo; nagalipay sila sa wala sing pulus: busa naglakat sila sa ila dalanon kaangay sang panong, ginalisdan sila, bangud nga wala sing manugpahalab.

3 Nagdabdab ang akon kaakig batok sa mga manugpahalab, kag ginsilotan ko ang mga kanding: kay ang GINOO sang mga kasoldadosan nagduaw sa iya panong nga panimalay sang Juda, kag ginhimo sila subong sang iya ali nga kabayo sa inaway.

4 Sa iya naggowa ang pamusud, sa iya ang lansang, sa iya ang pana sa inaway, sa iya ang tagsa ka manugpigus sing tingub.

5 ś Kag manginsubong sila sang gamhanan nga mga tawo, nga nagatapak sang ila mga kaaway sa lunang sang mga alagyan sa inaway: kag magaaway sila, bangud nga ang GINOO nagaupud sa ila, kag ang mga manugsakay sa mga kabayo malibogan.

6 Kag palig-onon ko ang panimalay sang Juda, kag luwason ko ang panimalay ni Jose, kag pabalikon ko sila sa pagpahamtang sa ila; kay nalooy ako sa ila: kag sila manginsubong sang wala ko masobol sila: kay ako amo ang GINOO nga ila Dios, kag magapamati ako sa ila.

7 Kag ang mga sa Efraim manginkaangay sang gamhanan nga tawo, kag ang ila tagiposoon magakasadya subong sang sa alak: hoo, ang ila mga anak makakita sini, kag magakalipay; ang ila mga tagiposoon magakasadya sa GINOO.

8 Ako magapanitsit tungud sa ila, kag tiponon sila; kay gintubus ko sila: kag magadugang sila subong sang nagdulugang sila.

9 Kag isab-ug ko sila sa tunga sang katawohan: kag dumdumon nila ako sa malayo nga mga kadutaan; kag magakabuhi sila upud sang ila mga anak, kag magabalik.

10 Pabalikon ko sila liwat man gikan sa duta sang Egipto, kag tiponon sila gikan sa Asiria; kag pasudlon ko sila sa duta sang Galaad kag Libano; kag wala sing duug nga makita nga sa ila.

11 Kag magaagi sia sa dagat nga may kapipit-an, kag magahampak sang mga balud sa dagat, kag magamala ang tanan nga mga kadadalman sang suba: kag ang bugal sang Asiria paubson, kag ang cetro sang Egipto magataliwan.

12 Kag palig-onon ko sila sa GINOO; kag magalakat sila paibabaw kag paubus sa iya ngalan, nagasiling ang GINOO.

KAPITULO 11

BUKSI ang imo mga ganhaan, O Libano, agud nga ang kalayo makalamon sang imo mga cedro.

2 Maghaya, kahoy nga abeto; kay napukan ang cedro; bangud nga ang mga gamhanan nalaglag: maghaya, O kamo nga mga terebinto sang Basan; kay ang talon nga nagapatubas sang ubas natup-ay.

3 ś May tingug sang hinaya sang mga manugpahalab; kay ang ila himaya nalaglag: tingug sang pagngurub sang bataon nga mga leon; kay ang bugal sang Jordan nawagwag.

4 Amo ini ang ginasiling sang GINOO nga akon Dios; Pahalba ang panong nga ilihawon;

5 Nga ang mga nagatag-iya sa ila nagapatay sa ila, kag nagapakawala sila sing sala: kag ang mga nagabaligya sa ila nagasiling, Pagpakamaayohon ang GINOO; kay manggaranon ako: kag ang ila mga manugpahalab wala nagakaawa sa ila.

6 Kay indi na ako magkaawa sa mga pumuluyo sang duta, nagasiling ang GINOO: apang, yari karon, ako magatugyan sang mga tawo ang tagsatagsa sa kamut sang iya isigkatawo, kag sa kamut sang iya hari: kag samaron nila ang duta, kag ako indi magluwas sa ila gikan sa ila kamut.

7 Kag pahalbon ko ang panong nga ilihawon, bisan kamo, O makalolooy sang panong. Kag nagkuha ako nga sa akon sing duha ka sungkud; ang isa ginhingalanan ko Katahum, kag ang isa ginhingalanan ko Mga Higot; kag ginpahalab ko ang panong.

8 Ginpapas ko ang tatlo ka manugpahalab man sa isa ka bulan; kag ang akon kalag nagtaka sa ila, kag ang kalag nila man nangil-ad sa akon.

9 Niyan nagsiling ako, Indi ako magpahalab sa inyo: inang himalatyon, pakamatya; kag inang palapason, ipapapas; kag ang mga mabilin magkan-anay sang unud sang isa kag isa.

10 ś Kag ginkuha ko ang akon sungkud, nga Katahum, kag gin-utud ini, agud nga mabungkag ko ang akon katipan nga ginhimo ko sa tanan nga katawohan.

11 Kag ginbungkag ini sa sadtong adlaw: kag sa sini ang makalolooy sang panong nga nag-alagad sa akon nakahibalo nga yadto polong sang GINOO.

12 Kag nagsiling ako sa ila, Kon ginapakamaayo ninyo, hatagi ako sang bili nakon; kag kon indi, pabayai. Gani nagtimbang sila nga sa akon bili sing katloan ka bilog nga pilak.

13 Kag ang GINOO nagsiling sa akon, Ipilak ini sa maninihon: ang maayo nga bili nga ginpabili nila sa akon. Kag ginkuha ko ang katloan ka bilog nga pilak, kag ginpilak sila sa maninihon sa balay sang GINOO.

14 Niyan gin-utud ko ang akon isa pa ka sungkud, nga Mga Higot, agud nga mabungkag ko ang paghiliutud sa tunga sang Juda kag Israel.

15 ś Kag ang GINOO nagsiling sa akon, Kuhaa pa nga sa imo ang mga gamit sang manugpahalab nga buangbuang.

16 Kay, yari karon, magabangon ako sing manugpahalab sa duta, nga indi magtatap sang mga ginapapas, ukon magpangita sang bataon, ukon magbolong sang nabali, ukon magpahalab sinang nagaduyo: kondi kaonon niya ang unud sang matambok, kag magapihak sang ila mga koko.

17 Kailo sa manugpahalab nga diosdios nga nagabiya sang panong! ang espada manginsa iya butkon, kag sa iya mata nga too: ang iya butkon maitus gid, kag ang iya mata nga too magadulum sing bug-os.

KAPITULO 12

ANG lulan sang polong sang GINOO nga sa Israel, nagasiling ang GINOO, nga nagahumlad sang mga langit, kag nagapasad sang sadsaran sang duta, kag nagahuman sang espiritu sang tawo sa sulud niya.

2 Yari karon, himoon ko ang Jerusalem nga tagayan sang pagkurug sa tanan nga katawohan sa palibut, kon sila magakibon batok sa Juda kag batok sa Jerusalem.

3 ś Kag sa sinang adlaw himoon ko ang Jerusalem nga mabug-at nga bato sa tanan nga katawohan: ang tanan nga magapabug-at sang ila kaugalingon sa sini pihakpihakon, bisan ang tanan nga katawohan sang duta magatipon sing tingub batok sini.

4 Sa sinang adlaw, nagasiling ang GINOO, pakugmaton ko ang tagsa ka kabayo, kag pasalahon ang iya manugsakay: kag muklaton ko ang akon mga mata sa panimalay sang Juda, kag bulagon ang tagsa ka kabayo sang katawohan.

5 Kag ang mga gobernador sang Juda magasiling sa ila tagiposoon, Ang mga pumuluyo sang Jerusalem mangin-akon kusug sa GINOO sang mga kasoldadosan nga ila Dios.

6 ś Sa sinang adlaw himoon ko ang mga gobernador sang Juda kaangay sang dapog sang kalayo sa tunga sang gatong, kag kaangay sang sulo nga nagadabadaba sa tunga sang linaylay; kag lamonon nila ang tanan nga katawohan sa palibut sa too kag sa wala: kag ang Jerusalem pagapuy-an liwat sa iya kaugalingon nga duug, sa Jerusalem.

7 Ang GINOO man magaluwas sing una sang mga layanglayang sang Juda, agud nga ang himaya sang panimalay ni David kag ang himaya sang mga pumuluyo sang Jerusalem indi magpadaku sang ila kaugalingon batok sa Juda.

8 Sa sinang adlaw ang GINOO magaapin sang mga pumuluyo sang Jerusalem; kag sia nga maluya sa ila sa sinang adlaw manginsubong kay David; kag ang panimalay ni David manginsubong sang Dios, subong sang anghel sang GINOO sa atubangan nila.

9 ś Kag mahanabu sa sinang adlaw, nga magatinguha ako sa paglaglag sang tanan nga mga pungsud nga nagaalabut batok sa Jerusalem.

10 Kag ipasagahay ko sa panimalay ni David, kag sa mga pumuluyo sang Jerusalem, ang espiritu sang bugay kag sang mga pag-ampo: kag magatolok sila sa akon nga ila ginbuno, kag magalalaw sila tungud sa iya, subong sang isa nga nagalalaw tungud sa iya bugtong nga anak nga lalaki, kag manginsa kapaitan tungud sa iya, subong sang isa nga yara sa kapaitan tungud sang iya panganay.

11 Sa sinang adlaw manginmay daku nga paglalaw sa Jerusalem, subong sang paglalaw sang Adadrimon sa nalupyakan sang Meguidon.

12 Kag ang duta magalalaw, ang tagsa ka panimalay sing pahain; ang panimalay sang balay ni David sing pahain, kag ang ila mga asawa sing pahain; ang panimalay sang balay ni Natan sing pahain, kag ang ila mga asawa sing pahain;

13 Ang panimalay sang balay ni Levi sing pahain, kag ang ila mga asawa sing pahain; ang panimalay ni Simei sing pahain, kag ang ila mga asawa sing pahain;

14 Ang tanan nga mga panimalay nga nabilin, ang tagsa ka panimalay sing pahain, kag ang ila mga asawa sing pahain.

KAPITULO 13

SA sinang adlaw manginmay tuburan nga nabuksan sa panimalay ni David kag sa mga pumuluyo sang Jerusalem nga sa sala kag nga sa pagkadimatinlo.

2 ś Kag mahanabu sa sinang adlaw, nagasiling ang GINOO sang mga kasoldadosan, nga papason ko sa duta ang mga ngalan sang mga diosdios, kag indi na sila pagdumdumon: kag ang mga manalagna kag ang espiritu nga dimatinlo pataliwanon ko man sa duta.

3 Kag mahanabu, nga kon ang bisan sin-o magpanagna pa, niyan ang iya amay kag ang iya iloy nga nagpanganak sa iya magasiling sa iya, Indi ka magakabuhi; kay nagapamolong ka sing mga kabutigan sa ngalan sang GINOO: kag ang iya amay kag ang iya iloy nga nagpanganak sa iya magabuno sa iya kon magpanagna sia.

4 Kag mahanabu sa sinang adlaw, nga ang mga manalagna magakahuya ang tagsatagsa sang iya palanan-awon, kon magpanagna sia; kag indi sila magsuklub sing panapton nga bulbulon sa paglimbong:

5 Kondi magasiling sia, Indi ako manalagna, mangunguma ako; kay gintudloan ako sang tawo nga magbantay sang kahayupan kutub sa akon pagkapamatan-on.

6 Kag ang isa magasiling sa iya, Ano bala ining mga pilas sa imo mga kamut? Niyan magasabat sia, Sa ila ginpilas ako sa balay sang akon mga abyan.

7 ś Pagmata, O espada, batok sa akon manugpahalab, kag batok sa tawo nga kaupud nakon, nagasiling ang GINOO sang mga kasoldadosan: samara ang manugpahalab, kag magaaplaag ang mga carnero: kag lisoon ko ang akon kamut sa mga magamay.

8 Kag mahanabu, nga sa bug-os nga duta, nagasiling ang GINOO, ang duha ka bahin sa sini papason kag mapatay; apang ang ikatlo mabilin sa sini.

9 Kag paagihon ko sa kalayo ang ikatlong bahin, kag ulayon sila subong sang pag-ulay sang pilak, kag pagatilawan sila subong sang pagtilaw sang bulawan: sila magatawag sa akon ngalan, kag pamatian ko sila: magasiling ako, Ini akon katawohan: kag magasiling sila, Ang GINOO akon Dios.

KAPITULO 14

YARI KARON, ang adlaw sang GINOO nagaabut, kag ang imo inagaw bahinbahinon sa tunga nimo.

2 Kay tiponon ko ang tanan nga pungsud sa inaway batok sa Jerusalem; kag ang siudad agawon, kag ang mga balay atihon, kag ang mga babaye luguson; kag ang katunga sang siudad magakadto sa kabihagan, kag ang salin sang katawohan indi pagpapason sa siudad.

3 Niyan magagowa ang GINOO, kag magapakig-away batok sa sadtong mga pungsud, subong sang pag-away niya sa adlaw sang inaway.

4 ś Kag ang iya mga tiil magatindug sa sinang adlaw sa bukid sang mga Olivo, nga yara sa atubang sang Jerusalem sa sidlangan, kag ang bukid sang mga Olivo mapihak sa tunga sini nayon sa sidlangan kag nayon sa katundan, kag manginmay daku gid nga nalupyakan; kag ang katunga sang bukid magaisdug pa aminhan, kag ang katunga sini pa bagatnan.

5 Kag magapalagyo kamo pakadto sa nalupyakan sang mga bukid; kay ang nalupyakan sang mga bukid magalambut tubtub sa Azal: hoo, magapalagyo kamo, kaangay sang pagpalagyo ninyo gikan sa linog sa mga adlaw ni Uzias nga hari sang Juda: kag ang GINOO nga akon Dios magaabut, kag ang tanan nga santo upud sa imo.

6 Kag mahanabu sa sinang adlaw, nga ang kapawa indi magmangin masanag, ukon madulum:

7 Kondi ini mangin isa ka adlaw nga kilala sa GINOO, indi adlaw, kag indi gab-i: apang mahanabu, nga sa tion sang kagab-ihon manginmay kapawa.

8 Kag sa sinang adlaw, ang mga tubig nga buhi magagowa gikan sa Jerusalem; ang katunga nila nayon sa dagat nga una, kag ang katunga nila nayon sa dagat nga naolihi: ini mangin sa tingadlaw kag sa tigtulugnaw.

9 Kag ang GINOO mangin-hari sa bug-os nga duta: manginmay isa ka GINOO sa sinang adlaw, kag ang iya ngalan isa.

10 Ang bug-os nga duta himoon nga kaangay sa kapatagan kutub sa Geba tubtub sa Rimon sa bagatnan sang Jerusalem: kag pataason ini, kag pagapapuy-an sa iya duug, kutub sa gawang ni Benjamin tubtub sa duug sang nahaunang gawang, tubtub sa gawang sa pamusud, kag kutub sa torre ni Hananeel tubtub sa mga linasan sang ubas sang hari.

11 Kag ang mga tawo magapuyo sa sini, kag wala na sing pagpanglaglag sing bug-os; apang ang Jerusalem pagapuy-an sing malig-on.

12 ś Kag mangin-amo ini ang kalalat-an nga isakit sang GINOO sa tanan nga katawohan nga nagpakig-away batok sa Jerusalem; Ang ila unud mahagas samtang nagatindug sila sa ila mga tiil, kag ang ila mga mata mahagas sa ila mga boho, kag ang ila dila mahagas sa ila baba.

13 Kag mahanabu sa sinang adlaw, nga ang dakung kagubut gikan sa GINOO manginsa tunga nila; kag sila magakapyot ang tagsatagsa sa kamut sang iya isigkatawo, kag ang iya kamut magabayaw batok sa kamut sang iya isigkatawo.

14 Kag ang Juda man magaaway sa Jerusalem; kag ang manggad sang tanan nga pagano sa palibut tiponon sing tingub, ang bulawan, kag ang pilak, kag ang panapton, sa dakung kabugana.

15 Kag amo man ang kalalat-an sang kabayo, sang mula, sang camelyo, kag sang asno, kag sang tanan nga kasapatan nga mangindidto sa sining mga layanglayang, subong sining kalalat-an.

16 ś Kag mahanabu, nga ang tagsatagsa nga nabilin sang tanan nga pungsud nga nag-abut batok sa Jerusalem magataklad tuigtuig sa pagsimba sang Hari, ang GINOO sang mga kasoldadosan, kag sa paghiwat sang pandut sang mga tabernakulo.

17 Kag ang bisan sin-o sang tanan sang mga panimalay sang duta nga indi magtaklad sa Jerusalem sa pagsimba sang Hari, ang GINOO sang mga kasoldadosan, walay matupa nga ulan sa ila.

18 Kag kon ang panimalay sang Egipto indi magtaklad, kag indi magkari, nga wala sing ulan; manginmay kalalat-an, nga isakit sang GINOO sa mga pagano nga wala nagataklad sa paghiwat sang pandut sang mga tabernakulo.

19 Mangin-amo ini ang silot sa Egipto, kag silot sa tanan nga pungsud nga wala nagataklad sa paghiwat sang pandut sang mga tabernakulo.

20 ś Sa sinang adlaw sa mga kilingkiling sang mga kabayo may, PAGKABALAAN SA GINOO; kag ang mga kolon sa balay sang GINOO manginkaangay sang mga yahong sa atubangan sang halaran.

21 Hoo, ang tagsa ka kolon sa Jerusalem kag sa Juda mangin pagkabalaan sa GINOO sang mga kasoldadosan: kag sila tanan nga nagahalad magakari kag magakuha sa ila, kag lagaan sila: kag sa sinang adlaw wala na sing Canaanhon sa balay sang GINOO sang mga kasoldadosan.

AMAZING GRACE BIBLE INSTITUTE