ANG BALAAN NGA BIBLIA


ANG SULAT NI PABLO KAY

TITO

KAPITULO 1

SI PABLO, isa ka alagad sang Dios, kag isa ka apostol ni Jesu-Cristo, sono sa pagtoo sang mga pinili sang Dios, kag sang pagkilala sang kamatooran nga sono sa pagkadiosnon;

2 Sa paglaum sa kabuhi nga walay katapusan, nga ang Dios, nga indi makabutig, nagsaad sa wala pa nagsugud ang kalibutan;

3 Apang sa nagakaigo nga mga tion nagpahayag sang iya polong paagi sa pagwali, nga gintugyan sa akon sono sa sogo sang Dios nga aton Manluluwas;

4 Sa kay Tito, nga akon kaugalingon nga anak sa kalabilogan nga pagtoo: Ang bugay, kalooy, kag paghidait, gikan sa Dios nga Amay kag kay Ginoong Jesu-Cristo nga aton Manluluwas.

5 Sa sining kabangdanan ginbilin ko ikaw sa Creta, agud nga dapat mo pagkaayohon ang mga butang nga kinahanglanon, kag magtangdo ka sing mga tigulang sa tagsa ka siudad, sono sa gintulin ko sa imo:

6 Kon ang bisan sin-o nga disalawayon, nga bana sang isa ka asawa, nga may kabataan nga matutum nga wala ginasumbung nga mapinatuyangon ukon malalison.

7 Kay ang isa ka obispo kinahanglan magdisalawayon, subong nga tinugyanan sang Dios; indi sia batinggilan, indi madali maakig, indi mahuyugon sa alak, dimakiawayon, indi mahuyugon sa mahigko nga ganansya;

8 Kondi mahigugmaon sang pagkamainakupon, mahigugmaon sang maayong mga tawo, but-anan, matarung, balaan, mapinugungon;

9 Nga nagahuput sing malig-on sang polong nga matutum nga sono sa natudlo sa iya, agud nga makasarang sia paagi sa maayong doktrina sa pagpaandam kag pagpatalupangud sa mga nagasumpung.

10 Kay may madamu nga malalison kag walay pulus nga mga palahambal kag mga madaya, labi na gid sila nga sa circuncision:

11 Nga ang ila baba kinahanglan mauntat, nga nagalaglag sang bug-os nga mga panimalay, nga nagapanudlo sang mga butang nga indi dapat, tungud sa mahigko nga ganansya.

12 Ang isa sa ila, isa ka manalagna nga ila kaugalingon, nagsiling, Ang mga taga-Creta butigon sing dalayon, mga sapat nga malaut, mga hangaon nga matamad.

13 Ining panaksi matuud. Busa sabdonga sila sing matigdas, agud nga magmaayo sila sa pagtoo;

14 Nga indi magsapak sa patopato nga mga sugilanon nga Jinudio, kag sa mga sogo sang mga tawo, nga nagatalikod sa kamatooran.

15 Sa mga putli ang tanan nga butang putli: apang sa ila nga nadagtaan kag dimatinoohon walay bisan ano nga putli; apang bisan ang ila mga hunahuna kag konsiensya gid ginapangdagtaan.

16 Nagatuad sila nga nagakilala sila sa Dios; apang sa mga buhat ginapanghiwala nila sia, nga mga kalangil-aran sila, kag dimatinumanon, kag sa tagsa ka maayong buhat lampingasan.



KAPITULO 2

APANG maghambal ikaw sang mga butang nga nagakaigo sa maayong doktrina:

2 Nga ang tigulang nga mga lalaki manginbut-anan, maminatud-on, mapinugungon, putli sa pagtoo, sa diosnon nga gugma, sa pagpailub.

3 Subong man ang tigulang nga mga babaye, nga sila nagagawi sang nagakaigo sa pagkabalaan, dili sila mangin dimatuud nga mga manunumbung, indi mahuyugon sa madamu nga alak, mga manunudlo sang maayong mga butang;

4 Agud nga makatudlo sila sa pamatan-on nga mga babaye nga magbut-anan, sa paghigugma sang ila mga bana, sa paghigugma sang ila mga anak,

5 Nga magmahinalongon, putli, mga matinatapon sa balay, maayo, matinumanon sa ila kaugalingon nga bana, agud nga indi mapasipalahan ang polong sang Dios.

6 Subong man laygayi ang pamatan-on nga mga lalaki nga magbut-anan.

7 Sa tanan nga butang magpakita ka nga huwaran sang maayong mga buhat: sa doktrina ipakita ang pagkadidunut, pagkamaminatud-on, pagkabunayag,

8 Maayo nga halambalanon, nga indi mabadlong; agud nga ang kasumpung mahuy-an, nga walay malaut nga ikasiling nahanungud sa imo.

9 Laygayi ang mga alagad nga magmangin-matinumanon sa ila kaugalingon nga mga agalon, kag magpahamuut sa ila sing maayo sa tanan nga butang; nga dili magsabat sa pagbato;

10 Dili magpangawat, kondi magpakita sing bug-os nga maayo nga pagkatutum; agud nga mapunihan nila ang doktrina sang Dios nga aton Manluluwas sa tanan nga butang.

11 Kay ang bugay sang Dios nga nagadala sang kaluwasan nagpahayag sa tanan nga tawo,

12 Nga nagatudlo sa aton sini, nga sa ginasikway ta ang pagkadidiosnon kag kalibutanon nga mga kailigbon, dapat kita magkabuhi sang but-anan, matarung, kag diosnon, sa sining kalibutan karon;

13 Nga nagapaabut sinang bulahan nga paglaum, kag sang mahimayaon nga pagpahayag sang daku nga Dios kag aton Manluluwas nga si Jesu-Cristo;

14 Nga naghatag sang iya kaugalingon tungud sa aton, agud nga matubus niya kita gikan sa tanan nga kalautan, kag matinloan nga sa iya kaugalingon ang isa ka pinasahi nga katawohan, nga makugi sa maayong mga buhat.

15 Ining mga butang ihambal, kag ilaygay, kag isabdong sa bug-os nga pagbulut-an. Walay tawo nga magtamay sa imo.



KAPITULO 3

PAHANUMDUMA sila nga magpasakup sa mga punoan kag mga kagamhanan, nga magtuman sa mga gumalahum, nga maghanda sa tagsa ka maayong buhat,

2 Nga dili maghambal sing malaut nahanungud sa bisan sin-o nga tawo, nga dili mangin mabinangigon, kondi magmalolo, nga nagapakita sang bug-os nga pagpaubus sa tanan nga tawo.

3 Kay kita aton sang una mga buangbuang man, dimatinumanon, gindayaan, nga nagaalagad sang sarisaring mga kailigbon kag mga kinasadya, nga nagakabuhi sa kalainan kag kahisa, madinumuton, kag nagadinumtanay.

4 Apang sa tapus nga napahayag ang kaayo kag ang gugma sang Dios nga aton Manluluwas ayon sa tawo,

5 Indi paagi sa mga buhat sang pagkamatarung nga aton nahimo, kondi sono sa iya kalooy iya kita ginluwas, paagi sa pagpanghugas sang bag-ong pagkatawo, kag pagpangbag-o sang Balaan nga Espiritu;

6 Nga iya ginpasagahay sa aton sing bugana paagi kay Jesu-Cristo nga aton Manluluwas;

7 Nga sa napakamatarung kita paagi sa iya bugay, mangin-manunubli kita sono sa paglaum sa kabuhi nga walay katapusan.

8 Matutum ini nga hambalanon, kag ining mga butang buut ko nga ipamatuud mo sing dalayon, agud nga sila nga nagtoo sa Dios magmahinalongon sa pagpadayon sa maayong mga buhat. Ining mga butang maayo kag mapuslanon sa mga tawo.

9 Apang likawi ang mga pamangkotanon nga binuang, kag mga lista sang kaliwatan, kag mga pagpinuyasay, kag mga pagbinanggianay nahanungud sa kasogoan; kay sila walay kapuslanan kag walay pulus.

10 Isikway ang tawo nga erehe sa tapus ang makaisa kag makaduha nga laygay;

11 Nga nahibaloan nga ang among tawo nagtalang, kag nagapakasala, nga natagudilian sang iya kaugalingon.

12 Kon ipadala ko sa imo si Artemas, ukon si Tiquico, magpaninguha ka gid sa pagkari sa akon sa Nicopolis: kay nagtapat ako sa pagpabilin didto sa tigtulugnaw.

13 Patigayona sing makugi sa ila panlakatan si Zenas nga mangin-alamon sa kasogoan kag si Apolos, agud nga walay makulang sa ila.

14 Kag magtoon man ang mga aton sa pagpadayon sa maayong mga buhat sa kinahanglanon nga mga butang, agud nga indi sila manginwalay bunga.

15 Ang tanan nga upud sa akon nagaabiabi sa imo. Tamyawa sila nga nagahigugma sa aton sa pagtoo. Ang bugay manginkaupud ninyo nga tanan. Amen.

¶ Ini ginsulat sa kay Tito, gintangdo nga nahauna nga obispo sang iglesia sang mga taga-Creta, gikan sa Nicopolis sang Macedonia.


AMAZING GRACE BIBLE INSTITUTE