ANG BALAAN NGA BIBLIA

ROMA

KAPITULO 1

SI PABLO, nga isa ka alagad ni Jesu-Cristo, nga gintawag nga mangin isa ka apostol, nga ginpain sa ebanghelyo sang Dios,

2 (Nga ginsaad niya nga daan paagi sa iya mga manalagna sa balaan nga mga kasulatan,)

3 Nahanungud sa iya Anak nga si Jesu-Cristo nga aton Ginoo, nga naggikan sa kaliwat ni David sono sa unud;

4 Kag ginpahayag nga Anak sang Dios nga may gahum, sono sa espiritu sang pagkabalaan, paagi sa pagkabanhaw gikan sa mga patay:

5 Nga paagi sa iya nakabaton kami sang bugay kag pagkaapostol, nga sa pagtuman sang pagtoo sa tunga sang tanan nga pungsud, tungud sa iya ngalan:

6 Nga sa tunga nila amo man kamo nga pinanawag ni Jesu-Cristo:

7 Sa tanan nga yara sa Roma, nga mga hinigugma sang Dios, gintawag sa pagkamangin mga santo: Ang bugay sa inyo kag paghidait nga gikan sa Dios nga aton Amay, kag Ginoong Jesu-Cristo.

8 Sa nahauna, nagapasalamat ako sa akon Dios paagi kay Jesu-Cristo tungud sa inyo tanan, nga ang inyo pagtoo ginahambalan sa bug-os nga kalibutan.

9 Kay saksi ko ang Dios, nga akon ginaalagad sang akon espiritu sa ebanghelyo sang iya Anak, nga sa walay langan ginasambit ko kamo sa gihapon sa akon mga pangamuyo;

10 Nga nagapangabay, kon sa bisan ano nga paagi karon sa katapusan ako makaangkon sang isa ka masanyug nga panlakaton paagi sa kabubut-on sang Dios sa pagkari sa inyo.

11 Kay nagahandum ako sa pagpakigkita sa inyo, agud nga makapaambit ako sa inyo sing hiyas nga espirituhanon, sa katuyoan nga palig-onon kamo;

12 Nga amo, agud nga magkalipay ako kaupud ninyo sing tingub paagi sa pagtoo nga alangay nga yara sa inyo kag sa akon.

13 Karon indi ko buut nga kamo dimakasayud, mga kauturan, nga sa masunsun nagtuyo ako sa pagkadto sa inyo, (apang tubtub karon ginasablagan ako,) agud nga may bunga ako sa inyo man, subong sa iban sang mga Gentil.

14 Mangungutang ako sa mga Griego, kag sa mga Barbaro; sa mga maalam, kag sa mga dimaalam.

15 Gani, kon ano ang yara sa akon, handa ako nga iwali ang ebanghelyo sa inyo man nga yara sa Roma.

16 Kay wala ko ginakahuya ang ebanghelyo ni Cristo: kay ini amo ang gahum sang Dios sa kaluwasan sa tagsatagsa nga nagatoo; sa Judio sing una, kag sa Griego man.

17 Kay sa sini ginapahayag ang pagkamatarung sang Dios halin sa pagtoo pa pagtoo: subong nga nasulat na, Ang matarung magakabuhi paagi sa pagtoo.

18 Kay ang kasingkal sang Dios ginapahayag gikan sa langit batok sa tanan nga pagkadidiosnon kag pagkadimatarung sang mga tawo, nga ginahuptan nila ang kamatooran sa pagkadimatarung;

19 Bangud yadtong makapakilala sa Dios hayag sa ila; kay ginpahayag ini sang Dios sa ila.

20 Kay ang dimakita nga mga butang nahanungud sa iya kutub sang pagtuga sang kalibutan makita sing maathag, nga ginahangup paagi sa mga butang nga ginbuhat, nga amo ang iya walay katapusan nga gahum kag pagka-Dios; agud nga sila wala sing mabalibad:

21 Bangud, sang nakilal-an nila ang Dios, wala nila paghimayaa sia subong nga Dios, bisan ginapasalamatan nila; kondi nangin-walay pulus sa ila mga painoino, kag ang ila tagiposoon nga buang gindulman.

22 Sa ila pagpadayag nga mga maalam, nanginbuangbuang sila,

23 Kag nagbaylo sang himaya sang Dios nga dimadinulunton sa isa ka imahen nga ginhimo kaanggid sang tawo nga madinulunton, kag sang mga pispis, kag sang mga sapat nga apat sing tiil, kag sang mga butang nga nagasaug.

24 Busa ginpatumbayaan sila sang Dios man sa kahigkoan paagi sa mga kailigbon sang ila kaugalingon nga mga tagiposoon, sa pagpakahuya sang ila mga lawas sa tunga nila:

25 Nga ginbaylo nila ang kamatooran sang Dios sa isa ka butig, kag nagsimba kag nag-alagad sang tinuga labi pa sa Manunuga, nga bulahan sa walay katapusan. Amen.

26 Sa sining kabangdanan ginpatumbayaan sila sang Dios sa mga balatyagon nga makahuluya: kay bisan ang ila mga babaye nagbaylo sang paggamit nga kinaugali sa sinang batok sa kinaugali:

27 Kag sa amo man ang mga lalaki, nga nagabiya sang kinaugali nga paggamit sang babaye, nasonog sa ila kailigbon sa isa kag isa; ang mga lalaki sa mga lalaki nagabuhat sang indi dapat, kag nagabaton sa ila mga kaugalingon sinang bayad nga nagakaigo sa ila sayup.

28 Kag sanglit indi sila luyag sa paghuput sang Dios sa ila ihibalo, ginpatumbayaan sila sang Dios sa panghunahuna nga lampingasan, sa paghimo sinang mga butang nga dinagakaigo;

29 Nga napun-an sang tanan nga pagkadimatarung, pagpanghilawas, pagkamalaut, pagkamahamkonon, pagkamalain; puno sang kahisa, pagpatay, pinuyas, limbong, kadaut; mga palakutso-kutso,

30 Mga malibakon, mga madinumuton sa Dios, matampalason, bugalon, mga hambog, mga manugpatok sang malaut nga mga butang, dimatinumanon sa mga ginikanan,

31 Mga walay paghangup, mga dimatinumanon sang ginkaisahan, walay gugma nga kinabatasan, batinggilan, dimaloloy-on:

32 Nga ini sila, sa nahibaloan nila ang paghukom sang Dios, nga ang mga nagahimo sang amo nga mga butang takus sa kamatayon, indi lamang nagahimo sila sang amo, kondi man nga may pagkalipay sila sa mga nagahimo sa mga sini.

KAPITULO 2

BUSA wala ka sing balibad, O tawo, bisan sin-o ka nga nagahukom: kay sa paghukom mo sa isa, ginatagudilian mo ang imo kaugalingon; kay ikaw nga nagahukom nagahimo sang amo nga mga butang.

2 Apang kita nakapat-ud nga ang paghukom sang Dios sono sa kamatooran batok sa mga nagahimo sang amo nga mga butang.

3 Kag nagahunahuna ka bala sini, O tawo, nga nagahukom sa mga nagahimo sang amo nga mga butang, kag ikaw nagahimo sang amo man, nga makapalagyo ka sang paghukom sang Dios?

4 Ukon ginatamay mo bala ang kamanggaran sang iya pagkaayo kag pagpaumud kag pagkamabinatason; nga wala mo mahibaloi nga ang pagkaayo sang Dios nagatuytuy sa imo sa paghinulsul?

5 Apang sa imo katig-a kag dimahinulsulon nga tagiposoon nagatipon ka sing kasingkal sa imo kaugalingon sa adlaw sang kasingkal kag pagpahayag sang matarung nga paghukom sang Dios;

6 Nga magahatag sa tagsa ka tawo sono sa iya mga buhat:

7 Sa ila nga paagi sa mapinadayonon nga pagpailub sa maayong mga buhat nagapangita sing himaya kag dungug kag pagkadimamalatyon, kabuhi nga walay katapusan:

8 Apang sa mga mabinahinbahinon, kag wala nagatuman sang kamatooran, kondi nagatuman sang pagkadimatarung, kaalipungut kag kasingkal,

9 Kangitngitan kag kasakit, sa tagsa ka kalag sang tawo nga nagabuhat sing malaut, sa Judio sing una, kag sa Gentil man;

10 Apang himaya, dungug, kag paghidait, sa tagsa ka tawo nga nagabuhat sing maayo, sa Judio sing una, kag sa Gentil man:

11 Kay ang Dios walay ginapasulabi sa mga tawo.

12 Kay ang tanan nga nakasala sa walay kasogoan magakawala man sa walay kasogoan: kag ang tanan nga nakasala sa idalum sang kasogoan hukman paagi sa kasogoan;

13 (Kay indi ang mga nagapamati sang kasogoan amo ang matarung sa atubangan sang Dios, kondi ang mga nagatuman sang kasogoan pakamatarungon.

14 Kay kon ang mga Gentil nga walay kasogoan, nagahimo sa kinaugali sang mga butang nga yara sa kasogoan, ini sila, sa wala sila sing kasogoan, sila kasogoan sa ila kaugalingon:

15 Nga nagapahayag sang buhat sang kasogoan nga nasulat sa ila mga tagiposoon, ang ila konsiensya man nagasaksi, kag ang ila mga panghunahuna nagasumbung ukon ayhan nagaapin sa ila;)

16 Sa adlaw nga ang Dios magahukom sang mga tinago sang mga tawo paagi kay Jesu-Cristo sono sa akon ebanghelyo.

17 Yari karon, ikaw ginatawag nga Judio, kag nagasalig sa kasogoan, kag nagahimo sang imo pagpabugal nahanungud sa Dios,

18 Kag nakakilala sang iya kabubut-on, kag nagasugut sa mga butang nga labing maayo, nga naton-an gikan sa kasogoan;

19 Kag nagasalig nga ikaw gid manugtuytuy sang mga bulag, kapawa sang mga yara sa kadudulman,

20 Manunudlo sang mga buangbuang, magtotoon sang mga lapsag, nga may imo ka sang dagway sang ihibalo kag sang kamatooran sa kasogoan.

21 Busa ikaw nga nagatudlo sa iban, wala ka bala nagatudlo sa imo kaugalingon? ikaw nga nagawali nga ang tawo dili magpangawat, nagapangawat ka bala?

22 Ikaw nga nagasiling nga ang tawo dili magpanglahi, nagapanglahi ka bala? ikaw nga nagakangil-ad sa mga diosdios, nagahimo ka bala sang paglapas?

23 Ikaw nga nagapabugal sa kasogoan, ginapakahuy-an mo bala ang Dios paagi sa imo paglapas sang kasogoan?

24 Kay ang ngalan sang Dios ginapasipalahan bangud sa inyo sa tunga sang mga Gentil, subong sang nasulat na.

25 Kay ang circuncision matuud may kapuslanan, kon ikaw nagahuput sang kasogoan: apang kon ikaw manuglapas sang kasogoan, ang imo circuncision nangin-dicircuncision.

26 Gani kon ang wala macircuncidar nagahuput sang mga pagkamatarung sang kasogoan, indi bala ang iya dicircuncision maisip nga circuncision?

27 Kag indi bala ang dicircuncision nga sa kinaugali, kon ini nagatuman sang kasogoan, magahukom sa imo, nga paagi sa may letra kag circuncision nagalapas sang kasogoan?

28 Kay sia indi Judio, nga nahagowa; ukon indi inang circuncision, nga among nahagowa sa unud:

29 Kondi sia Judio, nga among nahasulud; kag ang circuncision amo ang sa tagiposoon, ang sa espiritu, kag indi sa letra; nga ang pagdayaw sa iya indi gikan sa mga tawo, kondi sa Dios.

KAPITULO 3

BUSA ano bala ang kinapasulabi sang Judio? ukon ano bala ang kapuslanan sang circuncision?

2 Madamu sa tagsa ka bagay: ang nahauna, bangud sa ila gintugyan ang mga oraculo sang Dios.

3 Kay ano bala kon ang iban wala magtoo? magapakawalay pulus bala ang ila dipagtoo sang pagtoo sang Dios?

4 Ang Dios magdumili: hoo, pakamatooron ang Dios, apang ang tagsa ka tawo butigon; subong sang nasulat na, Agud nga pakamatarungon ka sa imo mga hambalanon, kag magdaug kon ikaw paghukman.

5 Apang kon ang aton pagkadimatarung nagapakilala sang pagkamatarung sang Dios, ano bala ang aton isiling? Dimatarung bala ang Dios nga nagatimalus? (Nagahambal ako subong nga tawo.)

6 Ang Dios magdumili: kay niyan paano bala ang paghukom sang Dios sang kalibutan?

7 Kay kon ang kamatooran sang Dios nagbugana sing labi nga sa iya himaya paagi sa akon butig; ngaa bala paghukman pa ako subong nga makasasala?

8 Kag ngaa bala indi, (subong nga kami ginsugid sing mabinutangbutangon, kag sono sa ginapamatud-an sang iban nga nagasiling kami,) Magbuhat kita sang kalautan, agud magkari ang kaayohan? nga ang katagudilian nila sini matarung.

9 Niyan ano bala? maayo pa bala kita sang sa ila? Indi, bisan sa ano nga bagay: kay amon napamatud-an sing una nga ang mga Judio kag ang mga Gentil, nga sila tanan nasakup sa idalum sang sala;

10 Subong sang nasulat na, Walay bisan sin-o nga matarung, wala, bisan isa:

11 Walay bisan sin-o nga nagahangup, walay bisan sin-o nga nagapangita sa Dios.

12 Sila tanan naglipas sa dalan, nanginwalay pulus sila sing tingub; walay bisan sin-o nga nagahimo sing maayo, wala, bisan isa.

13 Ang ila totonlan lulubngan nga bukas; sa ila mga dila nagagamit sila sing limbong; ang dalit sang mga man-ug nga dalitan yara sa idalum sang ila mga bibig:

14 Nga ang ila baba puno sang pagpakamalaut kag kapaitan:

15 Ang ila mga tiil madagmit sa pagpaagay sing dugo:

16 Kalaglagan kag kamusmusan yara sa ila mga dalan:

17 Kag ang dalan sang paghidait wala nila makilala:

18 Walay kahadluk sa Dios sa atubangan sang ila mga mata.

19 Karon aton nahibaloan nga ang bisan ano nga mga butang nga ginasiling sang kasogoan, ginasiling sa ila nga yara sa idalum sang kasogoan: agud nga matakpan ang tagsa ka baba, kag ang bug-os nga kalibutan mapamatud-an nga nakasala sa atubangan sang Dios.

20 Busa paagi sa mga buhat sang kasogoan walay unud nga pagpakamatarungon sa itololok niya: kay paagi sa kasogoan amo ang pagkilala sang sala.

21 Apang karon ang pagkamatarung sang Dios napahayag sa walay kasogoan, nga ginasaksihan sang kasogoan kag sang mga manalagna;

22 Ang pagkamatarung sang Dios paagi sa pagtoo nga sa kay Jesu-Cristo sa tanan kag sa ila tanan nga nagatoo: kay walay ginkalainan:

23 Kay ang tanan nagpakasala, kag nangin kabus sa himaya sang Dios;

24 Sanglit ginapakamatarung sila sa walay bayad sang iya bugay paagi sa pagtubus nga yara kay Cristo Jesus:

25 Nga ginpahayag sang Dios nga katumbasan paagi sa pagtoo sa iya dugo, sa pagpahayag sang iya pagkamatarung bangud sa kapatawaran sang mga sala nga nagligad, paagi sa pagpaumud sang Dios;

26 Sa pagpahayag, ako nagasiling, sang iya pagkamatarung sa karon nga tion: agud nga amo sia ang matarung, kag ang manugpakamatarung sang nagatoo kay Jesus.

27 Busa diin bala ang pagpabugal? Ginsikway ini. Sa ano bala nga kasogoan? sa mga buhat? Indi: kondi sa kasogoan sang pagtoo.

28 Busa amon ginatakpan nga ang tawo ginapakamatarung paagi sa pagtoo sa walay mga buhat sang kasogoan.

29 Sia bala ang Dios sang mga Judio lamang? indi man bala sia sang mga Gentil? Hoo, sang mga Gentil man:

30 Sanglit may isa ka Dios, nga magapakamatarung sang circuncidado paagi sa pagtoo, kag sang dicircuncidado paagi sa pagtoo.

31 Busa ginapakawalay pulus namon bala ang kasogoan paagi sa pagtoo? Ang Dios magdumili: hoo, ginapalig-on namon ang kasogoan.

KAPITULO 4

NIYAN ano bala ang isiling ta nga nakit-an sang aton amay nga si Abraham, nahanungud sa unud?

2 Kay kon si Abraham ginpakamatarung paagi sa mga buhat, may kabangdanan sia sa paghimaya; apang indi sa atubangan sang Dios.

3 Kay ano bala ang ginasiling sang kasulatan? Si Abraham nagtoo sa Dios, kag naisipan ini sa iya nga sa pagkamatarung.

4 Karon sa iya nga nagapangabudlay, ang balus indi ginaisip nga sa bugay, kondi nga sa utang.

5 Apang sa iya nga wala nagapangabudlay, kondi nagatoo sa iya nga nagapakamatarung sa didiosnon, ang iya pagtoo ginaisip nga sa pagkamatarung.

6 Subong man si David nagasaysay sang pagkabulahan sang tawo, nga ginaisipan sang Dios sing pagkamatarung sa walay mga buhat,

7 Nga nagasiling, Bulahan sila nga ginpatawad ang ila mga kalautan, kag ang ila mga sala gintabonan.

8 Bulahan ang tawo nga indi pag-isipan sang Ginoo sang sala.

9 Busa nagaabut bala ini nga pagkabulahan sa circuncidado lamang, ukon sa dicircuncidado man? kay nagasiling kita nga ang pagtoo naisipan kay Abraham nga sa pagkamatarung.

10 Paano niyan ang pag-isip sini? sang sa circuncision sia, ukon sa dicircuncision? Indi sa circuncision, kondi sa dicircuncision.

11 Kag ginbaton niya ang tanda sang circuncision, nga pat-in sang pagkamatarung sang pagtoo nga naangkon niya sang dicircuncidado pa sia: agud nga mangin-amay sia sang tanan nga nagatoo, bisan dicircuncidado sila; agud nga maisip sa ila man ang pagkamatarung:

12 Kag amay sang circuncision nga indi lamang sa mga sa circuncision, kondi man sa mga nagalakat sa mga tikang sinang pagtoo sang aton amay nga si Abraham, nga naangkon niya sang dicircuncidado pa sia.

13 Kay ang saad, nga sia amo ang manginmanunubli sang kalibutan, indi sa kay Abraham, ukon sa iya kaliwat, paagi sa kasogoan, kondi paagi sa pagkamatarung sang pagtoo.

14 Kay kon sila nga sa kasogoan mga manunubli, manginwalay pulus ang pagtoo, kag mangin walay kapuslanan ang saad:

15 Bangud ang kasogoan nagapatubas sing kasingkal: kay didto sa walay kasogoan, wala man sing paglapas.

16 Sa sining kabangdanan ini paagi sa pagtoo, agud nga ini mangin paagi sa bugay; agud nga mapalig-on ang saad sa tanan nga kaliwat; indi lamang sa mga sa kasogoan, kondi man sa mga sa pagtoo ni Abraham; nga amo ang amay naton tanan,

17 (Subong sang nasulat na, Ginhimo ko ikaw nga amay sang madamung pungsud,) sa atubangan niya nga iya gintoohan, nga amo ang Dios, nga nagabuhi sang mga patay, kag nagatawag sinang mga butang nga indi amo subong nga daw amo sila.

18 Nga batok sa paglaum nagtoo sa paglaum, agud nga sia ang mangin-amay sang madamung pungsud, sono sa napamolong, Magamangin-amo ini ang imo kaliwat.

19 Kag sia nga wala magluya sa pagtoo, wala niya ginkabig ang iya kaugalingon nga lawas nga patay na, sang mga isa ka gatus ka tuig na sia, ukon sang kamatayon sang taguangkan ni Sara:

20 Wala sia magduhaduha sa saad sang Dios paagi sa dipagtoo; kondi nagbaskug sia sa pagtoo, nga nagahatag sing himaya sa Dios;

21 Kag nagsalig sia sing bug-os, nga kon ano ang iya ginsaad, makasarang man sia sa paghimo.

22 Kag busa ini naisipan sa iya nga sa pagkamatarung.

23 Karon ini wala nasulat tungud sa iya lamang, nga gin-isip ini sa iya;

24 Kondi tungud sa aton man, nga pagaisipan sini, kon kita magtoo sa iya nga nagbanhaw kay Jesus nga aton Ginoo gikan sa mga patay;

25 Nga gintugyan tungud sa aton mga sala, kag ginbanhaw nga sa aton pagpakamatarung.

KAPITULO 5

BUSA sanglit ginpakamatarung kita paagi sa pagtoo, may paghidait kita sa Dios paagi sa aton Ginoong Jesu-Cristo:

2 Paagi sa iya man makapalapit kita paagi sa pagtoo sa sining bugay diin nagatindug kita, kag nagakalipay sa paglaum sa himaya sang Dios.

3 Kag indi lamang ina, kondi nagahimaya man kita sa mga kangitngitan: sa nahibaloan ta nga ang kangitngitan nagapatubas sing pagpailub;

4 Kag ang pagpailub, eksperiensya; kag ang eksperiensya, paglaum:

5 Kag ang paglaum wala nagapakahuya; bangud nga ang gugma sang Dios napasagahay sa aton mga tagiposoon paagi sa Balaan nga Espiritu nga ginhatag sa aton.

6 Kay sang wala pa kita sing kusug, si Cristo napatay sa nagakaigo nga panag-on tungud sa mga didiosnon.

7 Kay halus nga ang isa manginmatay tungud sa matarung nga tawo: apang ayhan tungud sa maayong tawo may mangahas bisan sa pagpanginmatay.

8 Apang ang Dios nagapakilala sang iya gugma sa aton, nga, sang mga makasasala pa kita, si Cristo napatay tungud sa aton.

9 Busa labi na gid, nga karon ginpakamatarung kita paagi sa iya dugo, maluwas kita sa kasingkal paagi sa iya.

10 Kay kon, sang mga kaaway pa kita, ginpasag-uli kita sa Dios paagi sa kamatayon sang iya Anak, labi pa, nga ginpasag-uli kita, maluwas kita paagi sa iya kabuhi.

11 Kag indi lamang ina, kondi kita man nagakalipay sa Dios paagi sa aton Ginoong Jesu-Cristo, nga paagi sa iya nabaton ta karon ang katumbasan.

12 Busa, subong nga paagi sa isa ka lalaki nagsulud ang sala sa kalibutan, kag ang kamatayon paagi sa sala; kag gani ang kamatayon naglaton sa tanan nga tawo, kay ang tanan nakasala:

13 (Kay tubtub sa kasogoan ang sala yari sa kalibutan: apang ang sala wala ginaisip kon walay kasogoan.

14 Walay sapayan ang kamatayon naghari kutub kay Adam tubtub kay Moises, bisan pa sa mga wala makasala nga subong sang paglapas ni Adam, nga amo ang dagway sadtong magaabut.

15 Apang indi subong sang paglapas, amo man ang walay bayad nga regalo. Kay kon paagi sa paglapas sang isa napatay ang madamu, labi pa ang bugay sang Dios, kag ang regalo paagi sa bugay, nga paagi sa isa ka tawo, nga si Jesu-Cristo, nagbugana sa madamu.

16 Kag indi subong nga ini paagi sa isa nga nakasala, amo man ang regalo: kay ang paghukom naggikan sa isa nga sa katagudilian, apang ang walay bayad nga regalo nag-abut tungud sa madamung paglapas nga sa pagpakamatarung.

17 Kay kon paagi sa paglapas sang isa ka tawo naghari ang kamatayon paagi sa isa; labi pa sila nga nagabaton sang kabuganaan sang bugay kag sang regalo sang pagkamatarung magahari sa kabuhi paagi sa isa, nga si Jesu-Cristo.)

18 Busa subong nga paagi sang paglapas sang isa nag-abut ang paghukom sa tanan nga tawo nga sa katagudilian; subong man paagi sa pagkamatarung sang isa nag-abut ang walay bayad nga regalo sa tanan nga tawo nga sa pagpakamatarung sang kabuhi.

19 Kay subong nga paagi sa pagkadimatinumanon sang isa ka tawo ang madamu ginpakamakasasala, subong man paagi sa pagkamatinumanon sang isa ang madamu pakamatarungon.

20 Labut pa ang kasogoan nagsulud, agud nga magbugana ang paglapas. Apang diin ang sala nagbugana, ang bugay nagbugana labi pa gid:

21 Agud nga subong nga naghari ang sala sa kamatayon, amo man magahari ang bugay paagi sa pagkamatarung nga sa kabuhi nga walay katapusan paagi kay Jesu-Cristo nga aton Ginoo.

KAPITULO 6

NIYAN ano bala ang aton isiling? Magapadayon bala kita sa sala, agud nga ang bugay magbugana?

2 Ang Dios magdumili. Paano bala nga kita, nga patay na sa sala, magakabuhi pa sa sini?

3 Wala bala kamo makahibalo, nga tanan kita nga ginbautisohan kay Jesu-Cristo ginbautisohan sa iya kamatayon?

4 Busa ginlubung kita kaupud niya sa kamatayon paagi sa bautismo: agud nga subong nga si Cristo ginbanhaw gikan sa mga patay paagi sa himaya sang Amay, amo man kita dapat maglakat sa pagkabag-o sang kabuhi.

5 Kay kon kita gintanum sing tingub sa kaanggid sang iya kamatayon, kita man mangin-kaanggid sang iya pagkabanhaw:

6 Sa nahibaloan ini, nga ang aton daan nga tawo nalansang sa krus kaupud niya, agud nga ang lawas sang sala laglagon, agud nga kutub karon indi na kita dapat mag-alagad sa sala.

7 Kay sia nga patay nahilway sa sala.

8 Karon kon patay kita kaupud ni Cristo, nagatoo kita nga magakabuhi man kita kaupud niya:

9 Sa nahibaloan nga si Cristo nga ginbanhaw gikan sa mga patay indi na gid mapatay; ang kamatayon wala na sing kagamhanan sa iya.

10 Kay sanglit sia napatay, napatay sia sa sala sing makaisa: apang sanglit sia nagakabuhi, nagakabuhi sia sa Dios.

11 Amo man kabiga man ninyo ang inyo kaugalingon nga patay gid sa sala, apang buhi sa Dios paagi kay Jesu-Cristo nga aton Ginoo.

12 Busa dili ninyo pagpahari-a ang sala sa inyo lawas nga mamalatyon, agud nga inyo ini tumanon sa mga kailigbon sini.

13 Kag dili ninyo itugyan ang mga bahin sang inyo lawas subong nga galamiton sang pagkadimatarung sa sala: kondi itugyan ang inyo kaugalingon sa Dios, subong sa ila nga buhi gikan sa mga patay, kag ang mga bahin sang inyo lawas subong nga mga galamiton sang pagkamatarung sa Dios.

14 Kay ang sala magawalay kagamhanan sa inyo: kay kamo indi sa idalum sang kasogoan, kondi sa idalum sang bugay.

15 Ano niyan? magapakasala bala kita, bangud nga kita indi sa idalum sang kasogoan, kondi sa idalum sang bugay? Ang Dios magdumili.

16 Wala bala kamo makahibalo, nga sa ginatugyanan ninyo sang inyo kaugalingon nga mga alagad nga pagtumanon, mga alagad kamo sang inyo ginatuman; kon sa sala nga sa kamatayon, ukon sa pagkamatinumanon nga sa pagkamatarung?

17 Apang salamat sa Dios, nga kamo anay mga alagad sang sala, apang kamo nagtuman gikan sa tagiposoon sa sinang huwaran sang doktrina nga gintugyan sa inyo.

18 Niyan sang ginhilway kamo sa sala, nangin-alagad kamo sang pagkamatarung.

19 Nagahambal ako sono sa kinabatasan sang mga tawo bangud sang kaluyahon sang inyo unud: kay subong nga gintugyan ninyo ang mga bahin sang inyo lawas nga mga alagad sa kahigkoan kag sa kalautan pa kalautan; amo man karon itugyan ninyo ang mga bahin sang inyo lawas nga mga alagad sa pagkamatarung pa pagkabalaan.

20 Kay sang mga alagad kamo sang sala, hilway kamo gikan sa pagkamatarung.

21 Niyan ano bala nga bunga sa sadtong mga butang ang inyo karon ginakahuya? kay ang katapusan sadtong mga butang amo ang kamatayon.

22 Apang karon nga nahilway kamo sa sala, kag nangin mga alagad sa Dios, may yara kamo nga inyo bunga nga sa pagkabalaan, kag ang katapusan ang kabuhi nga walay katapusan.

23 Kay ang bayad sang sala kamatayon; apang ang regalo sang Dios kabuhi nga walay katapusan paagi kay Jesu-Cristo nga aton Ginoo.

KAPITULO 7

WALA bala kamo makahibalo, mga kauturan, (kay nagahambal ako sa ila nga nakahibalo sang kasogoan,) nga ang kasogoan may kagamhanan sa tawo samtang nagakabuhi pa sia?

2 Kay ang babaye nga may bana nahigot sang kasogoan sa iya bana samtang nagakabuhi sia; apang kon mapatay ang bana, hilway na sia sa kasogoan sang iya bana.

3 Busa, kon mangin-asawa sia sa iban nga lalaki, samtang nagakabuhi pa ang iya bana, tawgon sia nga makihilahion: apang kon mapatay ang iya bana, hilway na sia sa sinang kasogoan; sa bagay nga indi sia makihilahion, bisan pa nangin-asawa sia sang iban nga lalaki.

4 Busa, mga kauturan ko, kamo man nanginpatay sa kasogoan paagi sa lawas ni Cristo; agud nga kamo kaslon sa iban, sa iya nga nabanhaw gikan sa mga patay, agud nga dapat kita magpamunga sing bunga nga sa Dios.

5 Kay sang yara kita sa unud, ang mga paghublag sang mga sala, nga paagi sa kasogoan, nagpanghikot sa aton nga mga bahin sang lawas sa pagpamunga sing bunga nga sa kamatayon.

6 Apang karon nahilway kita sa kasogoan, nga patay na sa diin gingapus kita sadto; agud nga dapat mag-alagad kita sa pagkabag-o sang espiritu, kag indi sa kadaanon sang letra.

7 Niyan ano bala ang aton isiling? Ang kasogoan sala bala? Ang Dios magdumili. Indi, ako wala nakakilala sing sala, kondi paagi sa kasogoan: kay wala ako nakakilala sang pagkaibog, kon wala magsiling ang kasogoan, Dili ka magkaibog.

8 Apang ang sala, sang nakakita sing kahigayonan paagi sa sogo, nagpanghikot sa akon sang tanan nga bagay sang pagkaibog. Kay sa walay kasogoan ang sala patay.

9 Kay ako buhi sang una nga walay kasogoan: apang sang pag-abut sang sogo, nabuhi ang sala, kag ako napatay.

10 Kag ang sogo, nga gintangdo pa kabuhi, akon nakit-an nga pakadto sa kamatayon.

11 Kay ang sala, sang nakakita sing kahigayonan paagi sa sogo, nagdaya sa akon, kag paagi sini ginpatay ako.

12 Busa ang kasogoan balaan, kag ang sogo balaan, kag matarung, kag maayo.

13 Niyan nanginkamatayon bala sa akon inang maayo? Ang Dios magdumili. Apang ang sala, agud nga ini mapakita nga sala, nga nagapanghikot sing kamatayon sa akon paagi sinang maayo; agud nga ang sala paagi sa sogo magmanginlakas gid nga makasasala.

14 Kay aton nahibaloan nga ang kasogoan espirituhanon: apang ako unudnon, nga ginbaligya sa idalum sang sala.

15 Kay ang akon ginahimo wala ko ginatugti: kay kon ano ang buut ko, ina wala ko ginahimo; apang kon ano ang ginadumtan ko, ina ginahimo ko.

16 Niyan kon ginahimo ko ang indi ko buut, nagasugut ako sa kasogoan nga ini maayo.

17 Karon niyan indi na ako ang nagahimo sini, kondi ang sala nga nagapuyo sa akon.

18 Kay nakahibalo ako nga sa akon, (kon sayoron, sa akon unud,) walay nagapuyo nga maayo nga butang: kay ang pagbuut yari sa akon; apang kon paano ang paghimo sinang maayo wala ko makit-i.

19 Kay ang maayo nga buut ko wala ko ginahimo: apang ang malaut nga indi ko buut, ina ang ginahimo ko.

20 Karon kon ang indi ko buut ginahimo ko, indi na ako ang nagahimo sini, kondi ang sala nga nagapuyo sa akon.

21 Busa nakasapo ako sing isa ka kasogoan, nga, kon buut ko maghimo sing maayo, ang malaut yara upud sa akon.

22 Kay nagakalipay ako sa kasogoan sang Dios sono sa tawo nga sa sulud:

23 Apang nakita ko ang iban nga kasogoan sa akon mga bahin sang lawas, nga nagapakig-away batok sa kasogoan sang akon hunahuna, kag nagadala sa akon sa kabihagan sa kasogoan sang sala nga yari sa akon mga bahin sang lawas.

24 O kailo ako nga tawo! sin-o bala ang magaluwas sa akon sa lawas sining kamatayon?

25 Nagapasalamat ako sa Dios paagi kay Jesu-Cristo nga aton Ginoo. Gani niyan ako gid sa hunahuna nagaalagad sa kasogoan sang Dios; apang sa unud sa kasogoan sang sala.

KAPITULO 8

BUSA karon wala sing katagudilian sa mga yara kay Cristo Jesus, nga nagalakat indi sono sa unud, kondi sono sa Espiritu.

2 Kay ang kasogoan sang Espiritu sang kabuhi kay Cristo Jesus naghimo sa akon nga hilway gikan sa kasogoan sang sala kag kamatayon.

3 Kay ang indi mahimo sang kasogoan, sanglit ini maluya paagi sa unud, ang Dios nagpadala sang iya kaugalingon nga Anak sa kaanggid sang unud nga makasasala, kag tungud sa sala, nagtagudili sang sala sa unud:

4 Agud nga ang pagkamatarung sang kasogoan matuman sa aton, nga nagalakat indi sono sa unud, kondi sono sa Espiritu.

5 Kay sila nga mga sono sa unud nagahunahuna sang mga butang sang unud; apang sila nga mga sono sa Espiritu sang mga butang sang Espiritu.

6 Kay ang pagkamangin-unudnon nga panghunahuna kamatayon; apang ang pagkamangin-espirituhanon nga panghunahuna kabuhi kag paghidait.

7 Bangud ang unudnon nga panghunahuna kaawayon batok sa Dios: kay wala ini nagapasakup sa kasogoan sang Dios, kag indi gid makasarang.

8 Gani niyan sila nga sa unud indi makapahamuut sa Dios.

9 Apang kamo wala sa unud, kondi sa Espiritu, kon matuud nga ang Espiritu sang Dios nagapuyo sa inyo. Karon kon ang bisan sin-o nga tawo walay Espiritu ni Cristo, sia indi iya.

10 Kag kon si Cristo yara sa inyo, ang lawas patay bangud sang sala; apang ang Espiritu kabuhi bangud sang pagkamatarung.

11 Apang kon ang Espiritu sang nagbanhaw kay Jesus gikan sa mga patay nagapuyo sa inyo, sia nga nagbanhaw kay Cristo gikan sa mga patay magabuhi man sang inyo mga lawas nga mamalatyon paagi sa iya Espiritu nga nagapuyo sa inyo.

12 Busa, mga kauturan, mga mangungutang kita, indi sa unud, sa pagkabuhi sono sa unud.

13 Kay kon nagakabuhi kamo sono sa unud, kamo magakalamatay: apang kon kamo paagi sa Espiritu nagapakamatay sang mga buhat sang lawas, magakabuhi kamo.

14 Kay ang tanan nga ginatuytuyan sang Espiritu sang Dios, sila amo ang mga anak nga lalaki sang Dios.

15 Kay wala kamo makabaton sang espiritu sang kahiolipnan nga sa kahadluk liwat; kondi nakabaton kamo sang Espiritu sang pagkainangkon, nga paagi sini nagatuaw kita, Abba, Amay.

16 Ang Espiritu gid nagasaksi upud sa aton espiritu, nga kita among mga anak sang Dios:

17 Kag kon mga anak, niyan mga manunubli; mga manunubli sang Dios, kag mga masigkamanunubli upud kay Cristo; kon mag-antus kita kaupud niya, agud nga paghimayaon man kita sing tingub.

18 Kay ginakabig ko nga ang mga pag-antus sa karon nga tion indi takus nga ikapaanggid sa himaya nga ipahayag sa aton.

19 Kay ang hanoot nga pagpaabut sang tinuga nagahulat sang pagpahayag sang mga anak nga lalaki sang Dios.

20 Kay ang tinuga ginhimo nga masakup sa walay kapuslanan, indi sing kinabubut-on, kondi sa kabangdanan niya nga nagsakup sa iya sa paglaum,

21 Bangud nga ang tinuga gid hilwayon man sa kahiolipnan sang pagkamadinulunton nga sa mahimayaon nga kahilwayan sang mga anak sang Dios.

22 Kay aton nahibaloan nga ang bug-os nga tinuga nagaugayong kag nagapasakit sa kasakit sing tingub tubtub karon.

23 Kag indi lamang sila, kondi kita man, nga may nahaunang mga bunga sang Espiritu, bisan pa kita nagaugayong sa sulud sang aton kaugalingon, nga nagahulat sang pagkainangkon, nga amo, ang pagtubus sang aton lawas.

24 Kay kita naluwas paagi sa paglaum: apang ang paglaum nga makita indi paglaum: kay kon ano ang makita sang tawo, ngaa bala nga nagalaum pa sia?

25 Apang kon nagalaum kita sinang indi naton makita, niyan ginahulat ta ini nga may pagpailub.

26 Subong man ang Espiritu nagabulig man sa aton mga kaluyahon: kay wala kita makahibalo kon ano ang dapat naton nga ipangamuyo subong sa dapat naton ipangamuyo: apang ang Espiritu gid nagapatunga tungud sa aton nga may mga pag-ugayong nga dimamitlang.

27 Kag sia nga nagausisa sang mga tagiposoon nakahibalo kon ano ang hunahuna sang Espiritu, bangud nagapatunga sia tungud sa mga santo sono sa kabubut-on sang Dios.

28 Kag nahibaloan naton nga sa ila nga nagahigugma sa Dios ang tanan nga mga butang nagapanghikot sing tingub nga sa ikaayo, sa ila nga among pinanawag sono sa iya tinutuyo.

29 Kay ang nahibaloan niya nga daan, gintangdoan man niya nga daan nga manginsono sa dagway sang iya Anak, agud nga manginpanganay sia sa madamung mga kauturan.

30 Labut pa ang iya gintangdoan nga daan, sila iya man gintawag: kag ang gintawag niya, sila iya man ginpakamatarung: kag ang ginpakamatarung niya, sila iya man ginhimaya.

31 Niyan ano bala ang aton isiling sa sining mga butang? Kon ang Dios apin sa aton, sin-o bala ang makabatok sa aton?

32 Sia nga wala magpaiway sang iya kaugalingon nga Anak, kondi nagtugyan sa iya tungud sa aton tanan, paano bala nga indi sia maghatag man sa aton sing walay bayad sang tanan nga butang kaupud niya?

33 Sin-o bala ang makasumbung sing bisan ano nga butang batok sa mga pinili sang Dios? Ang Dios amo ang nagapakamatarung.

34 Sin-o bala sia nga nagatagudili? Si Cristo amo ang napatay, hoo labi na gid, nga nabanhaw, nga yara sa too sang Dios, nga nagapatunga man tungud sa aton.

35 Sin-o bala ang magapahamulag sa aton sa gugma ni Cristo? ang kangitngitan bala, ukon kasakit, ukon paghingabut, ukon tiggulutum, ukon kahubo, ukon katalagman, ukon espada?

36 Subong sang nasulat na, Tungud sa imo ginapamatay kami sa bug-os nga adlaw; naisipan kami subong sang mga carnero nga ilihawon.

37 Indi, sa tanan sining butang labi pa kita sa mga mandadaug paagi sa iya nga naghigugma sa aton.

38 Kay ako nakapat-ud, nga ang kamatayon, ukon kabuhi, ukon mga anghel, ukon mga punoan, ukon mga kagamhanan, ukon mga butang nga sa karon, ukon mga butang nga palaabuton,

39 Ukon kataasan, ukon kadadalman, ukon bisan ano nga iban nga tinuga, indi sarang makapahamulag sa aton sa gugma sang Dios, nga yara kay Cristo Jesus nga aton Ginoo.

KAPITULO 9

NAGASILING ako sang kamatooran kay Cristo, wala ako nagabutig, ang akon konsiensya nagasaksi man sa akon sa Balaan nga Espiritu,

2 Nga may daku ako nga kabug-atan kag padayon nga kasubu sa akon tagiposoon.

3 Kay akon ginahandum kuntani nga ang akon kaugalingon manginpinapakamalaut gikan kay Cristo tungud sa akon mga kauturan, nga akon mga himata sono sa unud:

4 Nga mga Israelnon; nga sa ila ang pagkainangkon, kag ang himaya, kag ang mga katipan, kag ang paghatag sang kasogoan, kag ang pag-alagad sa Dios, kag ang mga saad;

5 Nga ila ang mga kaamayan, kag sa ila nahanungud sa unud si Cristo nag-abut, nga labaw sa tanan, ang Dios dalayawon sa walay katapusan. Amen.

6 Indi nga ang polong sang Dios daw nanginwalay pulus. Kay sila indi tanan Israel, nga gikan sa Israel:

7 Kag indi sila tanan mga anak, bangud kay sila kaliwat ni Abraham: apang, Kay Isaac tawgon ang imo kaliwat.

8 Kon sayoron, Sila nga mga anak sang unud, ini sila indi ang mga anak sang Dios: kondi ang mga anak sang saad ginaisip subong nga kaliwat.

9 Kay amo ini ang polong sang saad, Sa sining panag-on ako magakari, kag si Sara magaanak sing lalaki.

10 Kag indi lamang ini; kondi si Rebeca man sang nagpanamkon paagi sa isa, kay Isaac nga aton amay;

11 (Kay bisan wala pa ang mga bata matawo, kag wala nakahimo sing maayo ukon malaut, agud nga ang tinutuyo sang Dios sono sa pagpili maglig-on, indi sa mga buhat, kondi sa iya nga nagatawag;)

12 Ini ginsiling sa iya, Ang magulang magaalagad sa manghud.

13 Subong sang nasulat na, Ginhigugma ko si Jacob, apang gindumtan ko si Esau.

14 Niyan ano bala ang isiling ta? May pagkadimatarung bala sa Dios? Ang Dios magdumili.

15 Kay nagasiling sia kay Moises, Magakalooy ako sa kalooyan ko, kag magakaawa ako sa kaawaan ko.

16 Gani indi sa iya ang pagbuut, ukon indi man sa nagadalagan, kondi sa Dios nga nagapahayag sing kalooy.

17 Kay ang kasulatan nagasiling kay Faraon, Sa sini gid nga katuyoan ginbangon ko ikaw, agud nga sa imo mapakita ko ang akon gahum, kag nga ang akon ngalan mapalapnag sa bug-os nga duta.

18 Busa nagakalooy sia sa buut niya kalooyan, kag kon sin-o ang buut niya iya ginapatig-a.

19 Niyan magasiling ka sa akon, Ngaa bala nga nagapangita pa sia sing sayup? Kay si sin-o bala ang nakasumpung sang iya kabubut-on?

20 Indi kondi, O tawo, sin-o ka bala nga nagasabat batok sa Dios? Magasiling bala ang butang nga gindihon sa iya nga nagdihon sini, Ngaa bala nga ginhimo mo ako sing subong?

21 Wala bala sing gahum sa lunang ang maninihon, sa paghimo sa amo man nga linamas sing isa ka suludlan nga sa kadungganan, kag ang isa nga sa kahuluy-an?

22 Ano bala kon ang Dios, nga buut magpakita sang iya kasingkal, kag magpakilala sang iya gahum, nagbatas sang dakung pagkamabinatason sing mga suludlan sang kasingkal nga takus sa kalaglagan:

23 Kag agud nga mapakilala niya ang kamanggaran sang iya himaya sa mga suludlan sang kalooy, nga gin-aman niya nga daan nga sa himaya,

24 Bisan kita, nga iya gintawag, indi gikan sa mga Judio lamang, kondi sa mga Gentil man?

25 Subong man sang ginasiling niya sa Oseas, Tawgon ko sila nga akon katawohan, ang indi ko anay katawohan; kag nga iya hinigugma, ang indi anay hinigugma.

26 Kag mahanabu, nga sa duug diin ginsiling sa ila, Indi kamo akon katawohan; didto tawgon sila nga mga anak sang Dios nga buhi.

27 Si Isaias man nagasinggit nahanungud sa Israel, Bisan ang kadamuon sang mga anak ni Israel subong sang balas sa dagat, ang nabilin amo ang maluwas:

28 Kay iya tapuson ang buluhaton, kag utdon ini sing malip-ot sa pagkamatarung: bangud isa ka malip-ot nga buluhaton ang himoon sang Ginoo sa duta.

29 Kag subong sang nasiling ni Isaias anay, Kon ang Ginoo sang Sabaoth wala makabilin sa aton sing kaliwat, nanginsubong kita kuntani sa Sodoma, kag ginhimo kaangay sa Gomorra.

30 Niyan ano bala ang isiling ta? Nga ang mga Gentil, nga wala magsonod sa pagkamatarung, nakadangat sa pagkamatarung, nga amo ang pagkamatarung nga paagi sa pagtoo.

31 Apang ang Israel, nga nagsonod sa kasogoan sang pagkamatarung, wala makadangat sa kasogoan sang pagkamatarung.

32 Ngaa bala? Bangud nga wala nila pagpangitaa ini paagi sa pagtoo, kondi nga daw ini paagi sa mga buhat sang kasogoan. Kay nasandad sila sa sinang bato nga kasandaran;

33 Subong sang nasulat na, Yari karon, nagabutang ako sa Sion sing isa ka bato nga kasandaran kag dakung bato sang kasaklaw: kag ang bisan sin-o nga nagatoo sa iya indi mahuy-an.

KAPITULO 10

MGA KAUTURAN, ang handum sang akon tagiposoon kag ang pangamuyo sa Dios tungud sa Israel amo nga maluwas sila.

2 Kay nagasaksi ako sa ila nga may pagkakugi sila sa Dios, apang indi sono sa ihibalo.

3 Kay sila nga wala makahibalo sang pagkamatarung sang Dios, kag nagatinguha sa pagtukud sang ila kaugalingon nga pagkamatarung, wala sila magpasakup sa pagkamatarung sang Dios.

4 Kay si Cristo amo ang katapusan sang kasogoan nga sa pagkamatarung sa tagsatagsa nga nagatoo.

5 Kay si Moises nagasaysay sang pagkamatarung nga gikan sa kasogoan, Nga ang tawo nga nagahimo sinang mga butang magakabuhi paagi sini.

6 Apang ang pagkamatarung nga gikan sa pagtoo nagahambal sing amo, Dili ka magsiling sa imo tagiposoon, Sin-o bala ang magasaka sa langit? (kon sayoron, sa pagpapanaug kay Cristo gikan sa ibabaw:)

7 Ukon, Sin-o bala ang magapanaug sa kadadalman? (kon sayoron, sa pagpasaka kay Cristo liwat gikan sa mga patay.)

8 Apang ano bala ang ginasiling sini? Ang polong malapit sa imo, sa imo baba, kag sa imo tagiposoon: nga amo, ang polong sang pagtoo, nga amon ginawali;

9 Nga kon ituad mo sa imo baba ang Ginoong Jesus, kag magtoo sa imo tagiposoon nga ang Dios nagbanhaw sa iya gikan sa mga patay, maluwas ka.

10 Kay sa tagiposoon ang tawo nagatoo nga sa pagkamatarung; kag sa baba ang pagtuad ginahimo nga sa kaluwasan.

11 Kay ang kasulatan nagasiling, Ang bisan sin-o nga nagatoo sa iya indi mahuy-an.

12 Kay walay ginkalainan sa tunga sang Judio kag sang Griego: kay ang amo man nga Ginoo nga labaw sa tanan manggaranon sa tanan nga nagatawag sa iya.

13 Kay ang bisan sin-o nga magtawag sa ngalan sang Ginoo maluwas.

14 Busa paano bala ang pagpanawag nila sa iya nga wala nila matoohi? kag paano bala ang pagtoo nila sa iya nga wala nila mabatii? kag paano bala ang pagkabati nila kon walay manugwali?

15 Kag paano bala ang pagwali nila, kon indi sila pag-ipadala? subong sang nasulat na, Daw ano katahum sang mga tiil sang mga nagawali sang ebanghelyo sang paghidait, kag nagadala sang mga masadya nga balita sang maayo nga mga butang!

16 Apang indi ang tanan sa ila nagtuman sang ebanghelyo. Kay si Isaias nagasiling, Ginoo, sin-o bala ang nagtoo sang amon ginbalita?

17 Gani ang pagtoo nagaabut paagi sa pagpamati, kag sa pagpamati paagi sa polong sang Dios.

18 Apang nagasiling ako, Wala bala sila makabati? Hoo sa pagkamatuud, ang ila tonog naglapnag sa bug-os nga duta, kag ang ila mga polong tubtub sa mga ukbong sang kalibutan.

19 Apang ako nagasiling, Wala bala makahibalo ang Israel? Sa nahauna si Moises nagasiling, Papaimonon ko kamo paagi sa ila nga indi katawohan, kag paagi sa pungsud nga buang paakigon ko kamo.

20 Apang si Isaias masidla gid, kag nagasiling, Nakita ako sang mga wala magpangita sa akon; nangindayag ako sa mga wala magpamangkot nahanungud sa akon.

21 Apang sa Israel nagasiling sia, Sa bug-os nga adlaw gin-untay ko ang akon mga kamut sa katawohan nga dimatinumanon kag malalison.

KAPITULO 11

NIYAN nagasiling ako, Ginsikway bala sang Dios ang iya katawohan? Ang Dios magdumili. Kay ako man isa ka Israelnon, gikan sa kaliwat ni Abraham, sa tribo ni Benjamin.

2 Ang Dios wala magsikway sang iya katawohan nga iya nahibaloan nga daan. Wala bala ninyo mahibal-i ang ginasiling sang kasulatan nahanungud kay Elias? kon paano nga nagapatunga sia sa Dios batok sa Israel, nga nagasiling,

3 Ginoo, ginpatay nila ang imo mga manalagna, kag ginwagwag nila ang imo mga halaran; kag nabilin ako nga isa lamang, kag ginatinguha nila ang akon kabuhi.

4 Apang ano bala ang ginasiling sang sabat sang Dios sa iya? May ginbilin ako nga sa akon nga pito ka libo ka tawo, nga wala magpilo sang tuhud sa imahen ni Baal.

5 Gani man sa karon nga tion may nabilin sono sa pagpili sang bugay.

6 Kag kon paagi sa bugay, niyan indi na ini sa mga buhat: sa iban nga bagay ang bugay indi na bugay. Apang kon ini paagi sa mga buhat, niyan indi na ini sa bugay: sa iban nga bagay ang buhat indi na buhat.

7 Niyan ano bala? Wala maagum sang Israel inang ginapangita niya; apang ang pinili nakaagum sini, kag ang nabilin ginbulag

8 (Sono sa nasulat na, Ang Dios naghatag sa ila sing espiritu sang katologon, mga mata agud nga indi sila makakita, kag mga idulungug agud nga indi sila makabati;) tubtub sini nga adlaw.

9 Kag si David nagasiling, Magmanginsiod ang ila latok, kag tiglapak, kag kasandaran, kag tumbas sa ila:

10 Padulma ang ila mga mata, agud nga indi sila makakita, kag magsioktot sa gihapon ang ila likod.

11 Niyan nagasiling ako, Nasandad bala sila agud nga mapukan sila? Ang Dios magdumili: hinonoo paagi sa ila pagkapukan nag-abut ang kaluwasan sa mga Gentil, sa pagpaimon sa ila.

12 Karon kon ang ila pagkapukan amo ang kamanggaran sang kalibutan, kag ang pagdiotay nila ang kamanggaran sang mga Gentil; daw ano pa gid ang kabug-osan nila?

13 Kay nagahambal ako sa inyo nga mga Gentil, sanglit ako ang apostol sa mga Gentil, ginapakadaku ko ang akon pagpangabudlay:

14 Kon sa ano nga bagay nga mahangkat ko sila nga akon unud sa pagtopo, kag maluwas ang iban sa ila.

15 Kay kon ang pagsikway sa ila amo ang pagpasag-uli sang kalibutan, daw ano bala ang pagbaton sa ila, kondi kabuhi gikan sa mga patay?

16 Kay kon ang nahaunang bunga balaan, ang linamas balaan man: kag kon ang gamut balaan, amo man ang mga sanga.

17 Kag kon ang iban sang mga sanga ginbanggi, kag ikaw, talonon nga olivo nga kahoy, ginsumpay sa tunga nila, kag upud sa ila nagapakig-ambit sa gamut kag sa katambok sang olivo nga kahoy;

18 Dili ka magpabugal batok sa mga sanga. Apang kon magpabugal ka, indi ikaw ang nagadala sang gamut, kondi ang gamut sa imo.

19 Niyan magasiling ka, Ang mga sanga ginbanggi, agud nga ako masumpay.

20 Maayo; bangud sang pagkadimatinoohon ginbanggi sila, kag ikaw nagatindug paagi sa pagtoo. Dili ka magmatinaastaason, kondi magkahadluk:

21 Kay kon ang Dios wala magpaiway sa mga sanga nga unay, mag-andam ka kay basi sia man indi magpaiway sa imo.

22 Busa tan-awa ang pagkaayo kag ang pagkaid-id sang Dios: sa mga nagkapukan, pagkaid-id; apang sa imo, ang pagkaayo, kon magpadayon ka sa iya pagkaayo: kay kon indi ikaw man tapson.

23 Kag sila man, kon indi sila magpabilin pa sa pagkadimatinoohon, isumpay: kay ang Dios sarang nga magsumpay liwat sa ila.

24 Kay kon ikaw gin-utud gikan sa olivo nga kahoy nga sa kinaugali talonon, kag ginsumpay batok sa kinaugali sa maayong olivo nga kahoy: daw ano pa gid ini sila, nga unay nga mga sanga, nga isumpay sa ila kaugalingon nga olivo nga kahoy?

25 Kay indi ko buut, mga kauturan, nga indi ninyo mahibaloan ining misterio, basi kon magpakaalam kamo sa inyo kaugalingon nga mga pagpalabi-labi; nga ang pagkabulag sa bahin nahanabu sa Israel, tubtub ang kabug-osan sang mga Gentil makasulud.

26 Kag gani ang bug-os nga Israel maluwas: subong sang nasulat na, Magagikan sa Sion ang Manluluwas, kag magapahilayo kay Jacob sang pagkadidiosnon:

27 Kay ini amo ang akon katipan sa ila, kon kuhaon ko ang ila mga sala.

28 Nahanungud sa ebanghelyo, sila mga kaaway tungud sa inyo: apang nahanungud sa pagpili, sila mga hinigugma tungud sa mga kaamayan.

29 Kay ang mga dolot kag pagtawag sang Dios wala sing paghinulsul.

30 Kay subong nga kamo sa mga tion nga nagligad wala nagtoo sa Dios, apang karon nakaagum sing kalooy paagi sa ila pagkadimatinoohon:

31 Amo man ini sila karon wala magtoo, agud nga paagi sa inyo kalooy sila man makaagum sing kalooy.

32 Kay ginbilang sang Dios sila tanan sa pagkadimatinoohon, agud nga iya makalooyan ang tanan.

33 O pagkadalum sang kamanggaran sang kaalam kag ihibalo sang Dios! daw ano nga ang iya mga paghukom dimatungkad, kag ang iya mga dalanon dimausoy!

34 Kay si sin-o bala ang nakahibalo sang hunahuna sang Ginoo? ukon sin-o bala ang nanginmanuglaygay niya?

35 Ukon sin-o bala ang una nga nakahatag sa iya, kag ini ibalus sa iya liwat?

36 Kay gikan sa iya, kag paagi sa iya, kag ayon sa iya, ang tanan nga butang: sa iya ang himaya sa walay katapusan. Amen.

KAPITULO 12

BUSA ginapakilooy ko sa inyo, mga kauturan, paagi sa mga kalooy sang Dios, nga idolot ninyo ang inyo mga lawas nga isa ka halad nga buhi, balaan, kag kalahamut-an sa Dios, nga amo ang inyo nagakasinanto nga pag-alagad.

2 Kag dili kamo magpauyon sa sining kalibutan: kondi magbalhin kamo paagi sa pagbag-o sang inyo hunahuna, agud nga inyo mapamatud-an kon ano ang maayo, kag kalahamut-an, kag himpit, nga kabubut-on sang Dios.

3 Kay nagasiling ako, paagi sa bugay nga ginhatag sa akon, sa tagsa ka tawo nga yara sa inyo, nga dili maghunahuna sang iya kaugalingon sing mataas pa sa dapat niya paghunahunaon; kondi maghunahuna sing but-anan, sono sa talaksan sang pagtoo nga ginbahin sang Dios sa tagsa ka tawo.

4 Kay subong nga may madamu kita nga bahin sa isa ka lawas, kag ang tanan nga bahin wala sing alangay nga hilikuton:

5 Amo man kita, bisan madamu, isa ka lawas kay Cristo, kag ang tagsatagsa kabahin sang isa kag isa.

6 Niyan sa may mga hiyas kita nga nagakalainlain sono sa bugay nga ginhatag sa aton, kon sa pagpanagna, magpanagna kita sono sa talaksan sang pagtoo;

7 Ukon sa pag-alagdan, mag-alagad kita: ukon sia nga nagapanudlo, sa pagpanudlo;

8 Ukon sia nga nagapanglaygay, sa pagpanglaygay: sia nga nagahatag, maghatag sia sing bunayag; sia nga nagadumala, sing may kapisan; sia nga nagapahayag sing kalooy, sing may kalipay.

9 Magdisalimpapaw ang gugma. Kangil-ari inang malaut; magkapyot sa sinang maayo.

10 Magmalolo kamo ang isa sa isa nga may gugma sang paghiliutud; sa kadungganan pasulabihon ang isa sa isa;

11 Indi tamad sa buluhaton; mainit sa espiritu; nga nagaalagad sa Ginoo;

12 Nagakalipay sa paglaum; mapinailubon sa kangitngitan; nagapadayon sa gilayon sa pangamuyo;

13 Nagapanagtag sa mga kinahanglanon sang mga santo; mainakupon.

14 Pakamaayoha ang mga nagahingabut sa inyo: magpakamaayo, kag dili magpanghimalaut.

15 Magkalipay kaupud sang mga nagakalipay, kag maghibi kaupud sang mga nagahibi.

16 Mag-alalangay sing panghunahuna sa isa kag isa. Dili maghunahuna sang mataas nga mga butang, kondi magpaubus sa mga tawo nga kubus sing kahimtangan. Dili magpakamaalam sa inyo kaugalingon nga hunahuna.

17 Dili magbalus sa bisan kay sin-o sing malaut sang malaut. Maghimulat sang mga butang nga maayo sa itololok sang tanan nga tawo.

18 Kon mahimo, sa masarangan ninyo, magkabuhi sing mahidaiton sa tanan nga tawo.

19 Mga hinigugmang nalolotan, dili pag-itimalus ang inyo mga kaugalingon, hinonoo hatagi sing lugar ang kasingkal: kay nasulat na, Akon ang pagtimalus; magabalus ako, nagasiling ang Ginoo.

20 Busa kon ang imo kaaway ginagutum, pakaona sia; kon ginauhaw sia, paimna sia: kay sa paghimo mo sini magatumpi ka sing mga baga sa iya olo.

21 Dili magpadaug sa malaut, kondi dag-a ang malaut sang maayo.

KAPITULO 13

ANG tagsa ka kalag magpasakup sa mataas nga mga kagamhanan. Kay walay gahum nga indi gikan sa Dios: ang karon nga mga kagamhanan tinangdoan sang Dios.

2 Busa ang bisan sin-o nga nagabato sa gahum, nagasumpung sang pagsolondan sang Dios: kag sila nga nagasumpung magabaton sing katagudilian sa ila kaugalingon.

3 Kay ang mga manugdumala indi kahadlukan sa mga buhat nga maayo, kondi sa malaut. Niyan buut ka bala nga indi mahadluk sa gahum? buhata inang maayo, kag magabaton ka sing pagdayaw gikan sa iya:

4 Kay sia ang ministro sang Dios nga sa imo kaayohan. Apang kon maghimo ka sinang malaut, magkahadluk ka; kay wala sia nagadala sang espada sa walay pulus: kay sia ang ministro sang Dios, manugpanimalus sa paghikot sang kasingkal sa nagabuhat sing malaut.

5 Bangud sini kinahanglan ninyo nga magpasakup, indi lamang bangud sang kasingkal, kondi man tungud sa konsiensya.

6 Sa sining kabangdanan magbayad man kamo sing buhis: kay mga ministro sila sang Dios, nga nagaatipan gihapon sa sini gid nga butang.

7 Busa maghatag sa tanan sang natungud sa ila: buhis sa natungdan sang buhis; bayad sa balayran; kahadluk sa kahadlukan; pagtahud sa talahuron.

8 Dili kamo mag-utang sing ano man bisan kay sin-o, kondi ang paghigugmaanay sang isa kag isa: kay sia nga nagahigugma sa iban nakatuman sang kasogoan.

9 Bangud sini, Dili ka magpanglahi, Dili ka magpatay, Dili ka magpangawat, Dili ka magsaksi sing dimatuud, Dili ka magkaibog; kag kon may iban pa nga sogo, ini natingub sa sining hambalanon, nga amo, Higugmaon mo ang imo isigkatawo subong sang imo kaugalingon.

10 Ang gugma wala nagabuhat sing malain sa iya isigkatawo: busa ang gugma amo ang katumanan sang kasogoan.

11 Kag ini, nahibaloan ninyo ang takna, nga tion na ini nga inugmata sa katologon: kay karon malapit na ang aton kaluwasan labi pa sang kita nagtoo.

12 Ang kagab-ihon malapit na magtaliwan, ang adlaw malapit na: busa isikway ta ang mga buhat sang kadudulman, kag isuklub ta ang hinganib sang kapawa.

13 Maglakat kita sing mabunayag, subong nga sa adlaw; indi sa pagginamo kag paghinobog, indi sa kaulag kag kalaw-ayan, indi sa kasuayon kag kahisa.

14 Kondi isuklub ninyo si Ginoong Jesu-Cristo, kag dili kamo magpanigana nga sa unud, sa pagtuman sang mga kailigbon sini.

KAPITULO 14

BATONA ninyo ang maluya sa pagtoo, apang indi sa madinuhaduhaon nga mga pagpinuyas.

2 Kay ang isa nagatoo nga makakaon sia sang tanan nga butang: ang iban, nga maluya, nagakaon sing mga utan.

3 Ang nagakaon indi magtamay sa wala nagakaon; kag ang wala nagakaon indi maghukom sa nagakaon: kay nabaton sia sang Dios.

4 Sin-o ka bala nga nagahukom sang alagad sang iban nga tawo? sa iya kaugalingon nga agalon nagatindug sia ukon nagakapukan. Hoo, patindugon sia: kay ang Dios may ikasarang sa pagpatindug sa iya.

5 Ang isa ka tawo nagakabig sang isa ka adlaw nga labaw sa isa: ang iban nagakabig sing alangay sang tanan nga adlaw. Ang tagsa ka tawo maglig-on sing bug-os sa iya kaugalingon nga hunahuna.

6 Sia nga nagapakamahal sang adlaw, nagapakamahal sini sa Ginoo; kag sia nga wala nagapakamahal sang adlaw, wala nagapakamahal sini sa Ginoo. Sia nga nagakaon, nagakaon sa Ginoo, kay nagapasalamat sia sa Dios; kag sia nga wala nagakaon, sia wala nagakaon sa Ginoo, kag nagapasalamat sa Dios.

7 Kay walay bisan sin-o sa aton nga nagakabuhi sa iya kaugalingon, kag walay tawo nga nagakapatay sa iya kaugalingon.

8 Kay kon kita nagakabuhi, nagakabuhi kita sa Ginoo; kag kon kita nagakamatay, nagakamatay kita sa Ginoo: gani bisan kita nagakabuhi, ukon nagakamatay, iya kita sang Ginoo.

9 Kay sa sining katuyoan napatay si Cristo, kag nabanhaw, kag nabuhi liwat, agud nga mangin-Ginoo sia sang mga patay kag sang mga buhi.

10 Apang ngaa bala nagahukom ka sa imo utud? ukon ngaa bala nagatamay ka sang imo utud? kay tanan kita magatindug sa atubang sang lingkoran nga hukmanan ni Cristo?

11 Kay nasulat na, Sa nagakabuhi ako, nagasiling ang Ginoo, magapilo ang tagsa ka tuhud sa akon, kag ang tagsa ka dila magatuad sa Dios.

12 Gani ang tagsatagsa sa aton magahatag sing husay sang iya kaugalingon sa Dios.

13 Busa dili na kita maghinukmanay ang isa kag isa: apang hukman ninyo sing labi pa kaayo ini, nga walay tawo nga magbutang sing kasandaran ukon kahigayonan sa pagkaholog sa dalanon sang iya utud.

14 Nakahibalo ako, kag nakapat-ud paagi kay Ginoong Jesus, nga walay bisan anong butang nga dimatinlo sa iya kaugalingon: kondi sa iya nga nagaisip nga ang bisan ano nga butang dimatinlo, sa iya ini dimatinlo.

15 Apang kon ang imo utud ginasub-an sang imo pagkaon, karon wala ka nagalakat nga may diosnon nga gugma. Bangud sa imo ginakaon dili mo paglaglagon sia, nga tungud sa iya napatay si Cristo.

16 Gani dili pag-ipahimalaut ang inyo maayo:

17 Kay ang ginharian sang Dios indi pagkaon kag pag-inum; kondi pagkamatarung, kag paghidait, kag kalipay sa Balaan nga Espiritu.

18 Kay sia nga nagaalagad kay Cristo sa sining mga butang kalahamut-an sa Dios, kag napamatud-an sang mga tawo.

19 Busa sondon ta ang mga butang nga nagahimo nga sa paghidait, kag mga butang nga sa diin ang isa makapalig-on sa isa.

20 Dili paglaglaga bangud sa pagkaon ang buhat sang Dios. Ang tanan nga butang matuud matinlo; apang malaut sa sinang tawo nga nagakaon nga may pagpasandad.

21 Maayo nga indi magkaon sing unud, ukon mag-inum sing alak, ukon sing bisan ano nga butang nga nagapasandad sa imo utud, ukon nagapasaklaw, ukon nagapaluya.

22 May pagtoo ka bala? tipigi ini sa imo kaugalingon sa atubang sang Dios. Malipayon ang wala nagatagudili sa iya kaugalingon sa sinang butang nga iya ginatugut.

23 Kag sia nga nagaduhaduha ginatagudilian kon magkaon sia, bangud nga nagakaon sia nga indi gikan sa pagtoo: kay ang bisan ano nga indi gikan sa pagtoo sala.

KAPITULO 15

NIYAN kita nga mabakud dapat magdala sang mga kaluyahon sang mga maluya, kag dili magpahamuut sa aton kaugalingon.

2 Ang tagsa sa aton magpahamuut sa iya isigkatawo sa ikaayo niya sa pagpalig-on.

3 Kay si Cristo wala man magpahamuut sa iya kaugalingon; kondi, sono sa nasulat na, Ang mga pasipala sang mga nagpasipala sa imo nagtupa sa akon.

4 Kay ang bisan anong mga butang nga nasulat sadto anay ginsulat nga sa pagtolon-an naton, agud nga paagi sa pagpailub kag paglipay sang mga kasulatan may paglaum kita.

5 Karon ang Dios sang pagpailub kag paglipay magtugut sa inyo nga mag-alalangay ang panghunahuna sang isa kag isa sono kay Cristo Jesus:

6 Agud nga sa isa ka hunahuna kag isa ka baba mahimaya ninyo ang Dios, ang Amay sang aton Ginoong Jesu-Cristo.

7 Busa magbinatonay kamo ang isa kag isa, subong nga si Cristo man nagbaton sa aton sa himaya sang Dios.

8 Karon nagasiling ako nga si Jesu-Cristo isa ka ministro sang nacircuncidar tungud sa kamatooran sang Dios, agud nga mapamatud-an ang mga saad nga ginhimo sa mga kaamayan:

9 Kag agud nga ang mga Gentil maghimaya sa Dios tungud sang iya kalooy; subong sang nasulat na, Sa sining kabangdanan magatuad ako sa imo sa tunga sang mga Gentil, kag magaamba sa imo ngalan.

10 Kag liwat nagasiling sia, Magkalipay, kamo nga mga Gentil, kaupud sang iya katawohan.

11 Kag liwat, Dayawa ang Ginoo, tanan kamo nga mga Gentil; kag magdayaw sa iya, tanan kamo nga katawohan.

12 Kag liwat, si Isaias nagasiling, May magakari nga isa ka gamut ni Jesse, kag sia nga magalutaw sa paghari sa mga Gentil; sa iya ang mga Gentil magasalig.

13 Karon ang Dios sang paglaum magpuno sa inyo sing bug-os nga kalipay kag paghidait sa pagtoo, agud nga magbugana kamo sa paglaum, paagi sa gahum sang Balaan nga Espiritu.

14 Kag ako gid nakapat-ud man nahanungud sa inyo, mga kauturan ko, nga kamo man napun-an sa pagkaayo, napun-an sang bug-os nga ihibalo, sarang man sa paglinaygayay.

15 Walay sapayan, mga kauturan, nagsulat ako sa inyo sing masidla pa sa iban nga bahin, sa pagpahanumdum sa inyo, bangud sang bugay nga ginhatag sa akon sang Dios,

16 Nga mangin-ministro ako ni Jesu-Cristo sa mga Gentil, nga nagaalagad sang ebanghelyo sang Dios, agud nga ang pagdolot sang mga Gentil manginkalahamut-an, nga ginpakabalaan sang Balaan nga Espiritu.

17 Busa may yara ako nga ikahimaya paagi kay Jesu-Cristo sa sinang mga butang nga iya sang Dios.

18 Kay indi ako magpangahas sa paghambal sang bisan ano sa sinang mga butang nga wala nahimo ni Cristo paagi sa akon, sa paghimo sang mga Gentil nga magmatinumanon, paagi sa polong kag buhat,

19 Paagi sa gamhanan nga mga tanda kag mga katanhagaan, paagi sa gahum sang Espiritu sang Dios; sa bagay nga kutub sa Jerusalem, kag sa palibut tubtub sa Ilirico, nawali ko sing bug-os ang ebanghelyo ni Cristo.

20 Hoo, sa amo nagpaninguha ako sa pagwali sang ebanghelyo, indi sa diin si Cristo nahingadlan na, agud nga indi ako magtukud sa ibabaw sang sadsaran sang iban nga tawo:

21 Apang subong sang nasulat na, Sa ila nga wala sia mabantala, makakita sila: kag sila nga wala makabati makahangup.

22 Amo ini ang kabangdanan man nga sa masunsun nasablagan ako sa pagkari sa inyo.

23 Apang karon nga wala na ako sing duug sa sining mga bahin, kag may daku nga handum ako sa pagkari sa inyo sa sining madamu nga tuig;

24 Kon magpa-Espanya ako, magakari ako sa inyo: kay ginasaligan ko nga sa akon pagpanlakatan makita ko kamo, kag pagpatigayonon ako ninyo sa akon pagpakadto didto, kon ako anay sa isa ka bagay mapuno sing inyo pagpakig-upud.

25 Apang karon nagapakadto ako sa Jerusalem sa pagbulig sa mga santo.

26 Kay nahamut-an nila nga taga-Macedonia kag taga-Acaya ang pag-amut tungud sa imol nga mga santo nga yara sa Jerusalem.

27 Nahamut-an nila sa pagkamatuud; kag sila may utang sa ila. Kay kon ang mga Gentil nangin-umalambit sang ila espirituhanon nga mga butang, ang ila katungdanan man amo ang pag-alagad sa ila sa lawasnon nga mga butang.

28 Busa kon mahimo ko ini, kag maselyohan sa ila ining bunga, magaagi ako dira sa inyo pa Espanya.

29 Kag nakaseguro ako, nga kon magkari ako sa inyo, magakari ako sa kabug-osan sang pagpakamaayo sang ebanghelyo ni Cristo.

30 Karon ginapakilooy ko sa inyo, mga kauturan, bangud kay Ginoong Jesu-Cristo, kag bangud sa gugma sang Espiritu, nga magpanikasug kamo sing tingub kaupud nakon sa inyo mga pangamuyo sa Dios tungud sa akon;

31 Agud nga maluwas ako sa mga wala nagatoo sa Judea; kag nga ang akon pag-alagad tungud sa Jerusalem mabaton sa mga santo;

32 Agud nga magakari ako sa inyo nga may kalipay paagi sa kabubut-on sang Dios, kag makapaumpaw ako kaupud ninyo.

33 Karon ang Dios sang paghidait manginkaupud ninyo nga tanan. Amen.

KAPITULO 16

GINAPANUGYAN ko sa inyo ang aton utud nga babaye nga si Febe, nga isa ka alagad sang iglesia nga yara sa Cencreas:

2 Nga batonon ninyo sia sa Ginoo, nga nagakaigo sa mga santo, kag nga inyo sia buligan sa bisan ano nga may kinahanglan sia sa inyo: kay sia kabulig sa madamu, kag sa akon kaugalingon man.

3 Tamyawa ninyo si Priscila kag si Aquila, nga akon mga kabulig kay Cristo Jesus:

4 Nga tungud sa akon kabuhi ginpakatalagman nila ang ila kaugalingon nga mga liog: indi lamang ako ang nagapasalamat sa ila, kondi man ang tanan nga iglesia sang mga Gentil.

5 Tamyawa man ang iglesia nga yara sa ila balay. Abiabiha ang akon hinigugma kaayo nga si Epeneto, nga amo ang mga nahauna nga bunga sa Acaya kay Cristo.

6 Tamyawa si Maria, nga naghatag sing madamu nga pagpangabudlay sa amon.

7 Abiabiha si Andronico kag si Junia, nga akon mga himata, kag mga masigkabinilanggo ko, nga sa mga apostol mga bantug sila, nga sila man yara kay Cristo una sa akon.

8 Tamyawa si Amplias nga hinigugma ko sa Ginoo.

9 Abiabiha si Urbano, nga aton kabulig kay Cristo, kag ang akon hinigugma nga si Staquis.

10 Abiabiha si Apeles nga napamatud-an kay Cristo. Abiabiha ang mga sa panimalay ni Aristobulo.

11 Abiabiha si Herodion nga akon himata. Tamyawa ang mga sa panimalay ni Narciso, nga yara sa Ginoo.

12 Abiabiha si Trifena kag si Trifosa, nga nagapangabudlay sa Ginoo. Abiabiha ang hinigugma nga si Persida, nga nagpangabudlay sing daku sa Ginoo.

13 Abiabiha si Rufo nga pinili sa Ginoo, kag ang iya iloy kag akon.

14 Abiabiha si Asincrito, si Flegonte, si Hermas, si Patrobas, si Hermes, kag ang mga kauturan nga kaupud nila.

15 Abiabiha si Filologo, kag si Julia, si Nereo, kag ang iya utud nga babaye, kag si Olimpas, kag ang tanan nga santo nga kaupud nila.

16 Mag-abiabihay kamo nga may balaan nga haluk. Ang mga iglesia ni Cristo nagaabiabi sa inyo.

17 Karon ginapakilooy ko sa inyo, mga kauturan, tanda-i ninyo sila nga ginakabangdanan sang pagbinahinbahin kag mga kasandaran batok sa doktrina nga inyo naton-an; kag magpahilayo sa ila.

18 Kay ini sila wala nagaalagad sa aton Ginoong Jesu-Cristo, kondi sa ila kaugalingon nga tiyan; kag paagi sa maayong mga polong kag matahum nga mga hambal ginalimbongan nila ang mga tagiposoon sang mga mahuyang.

19 Kay ang inyo pagkamatinumanon naglapnag sa tanan nga mga tawo. Busa nagakalipay ako sa inyo: apang buut ko nga magmaalam kamo sa maayo, kag magbunayag nahanungud sa malaut.

20 Kag ang Dios sang paghidait magadugmok sa madali kay Satanas sa idalum sang inyo mga tiil. Ang bugay sang aton Ginoong Jesu-Cristo mangin-kaupud ninyo. Amen.

21 Si Timoteo nga akon masigkamanugpangabudlay, kag si Lucio, kag si Jason, kag si Sosipater, nga akon mga himata, nagaabiabi sa inyo.

22 Ako si Tercio, nga nagasulat sining sulat, nagaabiabi sa inyo sa Ginoo.

23 Si Gayo nga akon tagbalay, kag sang bug-os nga iglesia, nagaabiabi sa inyo. Si Erasto nga manugtatap sang pagkabutang sang siudad nagaabiabi sa inyo, kag si Cuarto nga isa ka utud.

24 Ang bugay sang aton Ginoong Jesu-Cristo manginkaupud ninyo nga tanan. Amen.

25 Karon sa iya nga may gahum sa pagpalig-on sa inyo sono sa akon ebanghelyo, kag pagwali nahanungud kay Jesu-Cristo, sono sa bugna sang misterio, nga gintago kutub sang nagsugud ang kalibutan,

26 Apang karon ginpahayag, kag paagi sa mga kasulatan sang mga manalagna, sono sa sogo sang Dios nga walay katapusan, ginpakilala sa tanan nga kapungsuran nga sa pagtuman sang pagtoo:

27 Sa Dios lamang nga maalam, ang himaya paagi kay Jesu-Cristo sa walay katapusan. Amen.

AMAZING GRACE BIBLE INSTITUTE