ANG BALAAN NGA BIBLIA

ANG BUGNA NI SAN JUAN NGA DIOSNON

KAPITULO 1

ANG Bugna ni Jesu-Cristo, nga ginhatag sang Dios sa iya, sa pagpakita sa iya mga alagad sang mga butang nga kinahanglan mahanabu sa madali; kag ginpadala niya kag ginpakilala ini paagi sa iya anghel sa iya alagad nga si Juan:

2 Nga nagsaksi sang polong sang Dios, kag sang pagpamatuud ni Jesu-Cristo, kag sang tanan nga mga butang nga iya nakita.

3 Bulahan ang nagabasa, kag ang mga nagapamati sang mga polong sining tagna, kag nagahuput sinang mga butang nga nasulat sa sini: kay malapit na ang tion.

4 SI JUAN sa pito ka iglesia nga yara sa Asia: Ang bugay sa inyo, kag paghidait, gikan sa iya nga amo karon, kag nga amo anay, kag nga amo sa palaabuton; kag gikan sa pito ka Espiritu nga yara sa atubangan sang iya trono;

5 Kag gikan kay Jesu-Cristo, nga amo ang saksi nga matutum, kag ang una nga ginpanganak sang mga patay, kag ang prinsipe sang mga hari sa duta. Sa iya nga naghigugma sa aton, kag naghugas sa aton gikan sa aton mga sala sa iya kaugalingon nga dugo,

6 Kag naghimo sa aton nga mga hari kag mga pari sa Dios kag iya Amay; sa iya ang himaya kag ang pagdumala sa gihapon kag sa walay katapusan. Amen.

7 Yari karon, nagakari sia kaupud sang mga panganud; kag ang tagsa ka mata makakita sa iya, kag sila man nga nagbuno sa iya: kag ang tanan nga kahimataan sang duta magahaya bangud sa iya. Mangin-amo sina, Amen.

8 Ako ang Alpha kag Omega, ang ginsuguran kag ang katapusan, nagasiling ang Ginoo, nga amo karon, kag nga amo anay, kag nga amo sa palaabuton, ang Makaako.

9 Ako si Juan, nga utud man ninyo, kag kaupud sa kangitngitan, kag sa ginharian kag pagpailub ni Jesu-Cristo, didto anay sa pulo nga ginatawag Patmos, tungud sa polong sang Dios, kag sa pagpamatuud ni Jesu-Cristo.

10 Sa Espiritu ako sa adlaw sang Ginoo, kag nakabati ako sa akon likod sang isa ka dakung tingug, subong sa isa ka budyong,

11 Nga nagasiling, Ako ang Alpha kag Omega, ang nahauna kag ang katapusan: kag, Kon ano ang imo makita, isulat sa isa ka libro, kag ipadala sa pito ka iglesia nga yara sa Asia; sa Efeso, kag sa Smirna, kag sa Pergamo, kag sa Tiatira, kag sa Sardis, kag sa Filadelfia, kag sa Laodicea.

12 Kag nagbalikid ako sa pagtan-aw sang tingug nga nagpakighambal sa akon. Kag sang nakabalikid ako, nakakita ako sang pito ka kandilero nga bulawan;

13 Kag sa tunga sang pito ka kandilero ang isa nga kaangay sang Anak sang tawo, nga napanaptan sing isa ka panapton nga nagalambut tubtub sa tiil, kag nawagkusan sa dughan sing wagkus nga bulawan.

14 Ang iya olo kag ang iya mga bohok maputi subong sang dilana, subong kaputi sang nieve; kag ang iya mga mata subong sang dabdab sang kalayo;

15 Kag ang iya mga tiil kaangay sang saway nga mapino, subong nga daw sa nagadabdab sila sa horno; kag ang iya tingug subong sang daganas sang madamu nga tubig.

16 Kag may pito sia ka bitoon sa iya kamut nga too: kag sa iya baba naggowa ang isa ka espada nga matalum nga duha sing sulab: kag ang iya nawung subong sang adlaw nga nagasilak sa iya kabaskug.

17 Kag sang nakita ko sia, napukan ako nga daw patay sa iya tiilan. Kag ginpahamtang niya sa akon ang iya kamut nga too, nga nagasiling sa akon, Dili magkahadluk; ako amo ang nahauna kag ang katapusan:

18 Ako amo sia nga nagakabuhi, kag napatay; kag, yari karon, buhi ako sa walay katapusan, Amen; kag yari sa akon ang mga yabi sang impierno kag sang kamatayon.

19 Isulat ang mga butang nga imo nakita, kag ang mga butang nga amo karon, kag ang mga butang nga mahanabu sa tapus sini;

20 Ang misterio sang pito ka bitoon nga imo nakita sa akon kamut nga too, kag sang pito ka kandilero nga bulawan. Ang pito ka bitoon amo ang mga anghel sang pito ka iglesia: kag ang pito ka kandilero nga imo nakita amo ang pito ka iglesia.

KAPITULO 2

SA anghel sang iglesia sang Efeso isulat; Ining mga butang ginasiling sang nagauyat sang pito ka bitoon sa iya kamut nga too, nga nagalakat sa tunga sang pito ka kandilero nga bulawan;

2 Nakilala ko ang imo mga buhat, kag ang imo pagpangabudlay, kag ang imo pagpailub, kag nga indi mo mabatas ang mga malaut: kag gintilawan mo ang mga nagasiling nga mga apostol sila, kag indi sila amo, kag nasapwan sila nga mga butigon:

3 Kag nagbatas ka, kag may pagpailub, kag nagpangabudlay tungud sa akon ngalan, kag wala pagpangluyahi.

4 Apang may akon ako nga batok sa imo, bangud ginbayaan mo ang imo nahaunang gugma.

5 Busa dumduma kon gikan diin ka napukan, kag maghinulsul, kag magbuhat sang nahaunang mga buluhaton; kon indi, magakari ako sa imo sing madali, kag magakuha sang imo kandilero sa iya duug, luwas kon maghinulsul ka.

6 Apang may imo ka sini, nga ginadumtan mo ang mga buhat sang mga Nicolaita, nga ginadumtan ko man.

7 Sia nga may idulungug, magpamati sia sang ginasiling sang Espiritu sa mga iglesia; Ang nagadaug tugutan ko nga magkaon gikan sa kahoy sang kabuhi, nga yara sa tunga sang paraiso sang Dios.

8 Kag sa anghel sang iglesia sa Smirna isulat; Ining mga butang ginasiling sang nahauna kag sang katapusan, nga napatay, kag nagakabuhi;

9 Nakilala ko ang imo buhat, kag kangitngitan, kag kaimolan, (apang manggaranon ka) kag nakilala ko ang pagpasipala sang mga nagasiling nga sila mga Judio, kag indi sila amo, kondi sila sinagoga ni Satanas.

10 Dili pagkahadluki inang mga butang nga imo antuson: yari karon, igabutang sang yawa ang iban sa inyo sa bilanggoan, agud nga matilawan kamo; kag may kangitngitan kamo sing napulo ka adlaw: magpakatutum ka tubtub sa kamatayon, kag hatagan ko ikaw sing purungpurung sang kabuhi.

11 Sia nga may idulungug, magpamati sia sang ginasiling sang Espiritu sa mga iglesia; Ang nagadaug indi masamad sang ikaduhang kamatayon.

12 Kag sa anghel sang iglesia sa Pergamo isulat; Ining mga butang ginasiling niya nga may iya sang espada nga matalum nga duha sing sulab;

13 Nakilala ko ang imo mga buhat, kag kon diin ka nagapuyo, diin ang lingkoran ni Satanas: kag ginahuptan mo sing malig-on ang akon ngalan, kag wala mo pag-ipanghiwala ang akon pagtoo, bisan sa sinang mga adlaw nga si Antipas nga akon martir nga matutum, nga ginpatay sa tunga ninyo, diin nagapuyo si Satanas.

14 Apang may pila ka butang ako batok sa imo, bangud may mga dira sa imo nga nagahuput sang doktrina ni Balaam, nga nagtudlo kay Balac sa pagbutang sing kasandaran sa atubangan sang mga anak sang Israel, sa pagkaon sang mga butang nga ginhalad sa mga diosdios, kag sa pagpakighilawas.

15 Subong man may mga imo ka nga nagahuput sang doktrina sang mga Nicolaita, nga ang amo nga butang ginadumtan ko.

16 Maghinulsul ka; kon indi, magakari ako sa imo sing madali, kag awayon ko sila sang espada sang akon baba.

17 Sia nga may idulungug, magpamati sia sang ginasiling sang Espiritu sa mga iglesia; Ang nagadaug tugutan ko nga magkaon gikan sa mana nga tinago, kag hatagan ko sia sing bato nga maputi, kag sa bato nasulat ang isa ka bag-ong ngalan, nga walay tawo nga nakahibalo kondi ang nagabaton sini.

18 Kag sa anghel sang iglesia sa Tiatira isulat; Ining mga butang ginasiling sang Anak sang Dios, nga ang iya mga mata kaangay sang dabdab sang kalayo, kag ang iya mga tiil kaangay sang mapino nga saway;

19 Nakilala ko ang imo mga buhat, kag diosnon nga gugma, kag pag-alagad, kag pagtoo, kag ang imo pagpailub, kag ang imo mga buhat; kag ang naolihi labi pa sa nahauna.

20 Walay sapayan may akon ako nga pila ka mga butang batok sa imo, bangud ginatugutan mo inang babaye nga si Jezebel, nga nagatawag sa iya kaugalingon nga isa ka manalagna, sa pagtudlo kag sa pagsulay sang akon mga alagad sa pagpakighilawas, kag sa pagkaon sang mga butang nga ginhalad sa mga diosdios.

21 Kag ginhatagan ko sia sing tion sa paghinulsul sa pagpanghilawas niya; kag wala sia maghinulsul.

22 Yari karon, ihaboy ko sia sa higdaan, kag ang mga nagpakighilahi kaupud niya sa dakung kangitngitan, kon indi sila maghinulsul sang mga buhat nila.

23 Kag pagapatyon ko ang iya mga anak sing kamatayon; kag ang tanan nga mga iglesia makahibalo nga amo ako ang nagapangusisa sang mga rienda kag sang mga tagiposoon: kag hatagan ko ang tagsa sa inyo sono sa inyo mga buhat.

24 Apang nagasiling ako sa inyo, kag sa mga nabilin sa Tiatira, sa tanan nga wala sining doktrina, kag wala makahibalo sang mga kadadalman ni Satanas, subong sang ginahambal nila; indi ako magpapas-an sa inyo sing iban nga lulan.

25 Apang hupti ninyo sing malig-on inang yara na sa inyo tubtub nga ako magkari.

26 Kag ang nagadaug, kag ang nagahuput sang akon mga buhat tubtub sa katapusan, hatagan ko sia sing kagamhanan sa kapungsuran:

27 Kag magadumala sia sa ila sa bilogon nga salsalon; subong sang mga suludlan sang maninihon pagadugmokon sila: subong sa nabaton ko sa akon Amay.

28 Kag ihatag ko sa iya ang kaagahon nga bitoon.

29 Sia nga may idulungug, magpamati sia sang ginasiling sang Espiritu sa mga iglesia.

KAPITULO 3

KAG sa anghel sang iglesia sa Sardis isulat; Ining mga butang ginasiling sang may pito ka Espiritu sang Dios, kag may pito ka bitoon; Nakilala ko ang imo mga buhat, nga may ngalan ikaw nga nagakabuhi ka, kag ikaw patay.

2 Magmapinulawon ka, kag lig-ona ang mga butang nga nabilin, nga malapit na nga mapatay: kay wala ako sing nakita sang mga buhat mo nga himpit sa atubangan sang Dios.

3 Busa dumduma kon paano ka nakabaton kag nakabati, kag hupti sing malig-on, kag maghinulsul. Busa kon indi ka magbantay, magakari ako sa imo subong sang isa ka makawat, kag indi ka makahibalo kon sa ano nga takna magakari ako sa imo.

4 May pila ikaw ka mga ngalan sa Sardis nga wala magdagta sang ila mga panapton; kag magalakat sila upud sa akon nga nakaputi: kay mga takus sila.

5 Ang nagadaug, amo man ang panaptan sing panapton nga maputi; kag indi ko pagpanason ang iya ngalan sa libro sang kabuhi, apang ituad ko ang iya ngalan sa atubangan sang akon Amay, kag sa atubangan sang iya mga anghel.

6 Sia nga may idulungug, magpamati sia sang ginasiling sang Espiritu sa mga iglesia.

7 Kag sa anghel sang iglesia sa Filadelfia isulat; Sia nga balaan nagasiling sining mga butang, sia nga matuud, sia nga may iya sang yabi ni David, sia nga nagabukas, kag wala sing tawo nga nagatakup; kag nagatakup, kag wala sing tawo nga nagabukas;

8 Nakilala ko ang imo mga buhat: yari karon, nagbutang ako sa imo atubangan sang isa ka ganhaan nga bukas, kag wala sing tawo nga makatakup: kay may diotay ka nga kusug, kag naghuput sang akon polong, kag wala magpanghiwala sang akon ngalan.

9 Yari karon, himoon ko ang mga sa sinagoga ni Satanas, nga nagasiling nga sila mga Judio, kag indi amo, kondi nagabutig; yari karon, pakarion ko sila kag pasimbahon sa atubangan sang imo tiilan, kag pakilalahon nga ginhigugma ko ikaw.

10 Bangud ginhuptan mo ang polong sang akon pagpailub, ako magabantay man sa imo sa takna sang pagsulay, nga magaabut sa bug-os nga kalibutan, sa pagtilaw sa mga nagapuyo sa duta.

11 Yari karon, magakari ako sa madali; hupti sing malig-on inang may imo ikaw, agud nga walay tawo nga magakuha sang imo purungpurung.

12 Ang nagadaug himoon ko sia nga isa ka haligi sa templo sang akon Dios, kag indi na sia maggowa: kag isulat ko sa iya ang ngalan sang akon Dios, kag ang ngalan sang siudad sang akon Dios, nga amo ang bag-ong Jerusalem, nga nagapanaug halin sa langit gikan sa akon Dios: kag isulat ko sa iya ang akon bag-ong ngalan.

13 Sia nga may idulungug, magpamati sia sang ginasiling sang Espiritu sa mga iglesia.

14 Kag sa anghel sang iglesia sang mga taga-Laodicea isulat; Ining mga butang ginasiling sang Amen, ang matutum kag matuud nga saksi, ang pamuno sang pagtuga sang Dios;

15 Nakilala ko ang imo mga buhat, nga indi ka mabugnaw ukon mainit: buut ko kuntani nga mabugnaw ka ukon mainit.

16 Gani niyan bangud nga maalabaab ka, kag indi mabugnaw ukon mainit, igasuka ko ikaw sang akon baba.

17 Bangud nagasiling ka, Manggaranon ako, kag nagbugana ako sing mga pagkabutang, kag wala nagakinahanglan sing bisan ano; kag wala makahibalo nga ikaw kailo, kag makalolooy, kag imol, kag bulag, kag hubo:

18 Nagalaygay ako sa imo sa pagbakal gikan sa akon sing bulawan nga inulay sa kalayo, agud nga magmanggaranon ka; kag sing panapton nga maputi, agud nga mapanaptan ka, kag agud nga ang kahuluy-an sang imo pagkahubo indi magdayag; kag haplasi ang imo mga mata sing panambal, agud nga makakita ka.

19 Ang tanan nga ginahigugma ko, ginasabdong ko kag ginadisiplina: busa magmakugihon ka, kag maghinulsul.

20 Yari karon, nagatindug ako sa ganhaan, kag nagapanoktok: kon ang bisan sin-o nga tawo magpamati sang akon tingug, kag magbukas sang ganhaan, magasulud ako sa iya, kag magapanihapon kaupud niya, kag sia kaupud nakon.

21 Ang nagadaug pagatugutan ko nga maglingkod kaupud nakon sa akon trono, subong nga ako nagdaug man, kag nagalingkod kaupud sa akon Amay sa iya trono.

22 Sia nga may idulungug, magpamati sia sang ginasiling sang Espiritu sa mga iglesia.

KAPITULO 4

SA TAPUS sini nagtolok ako, kag, yari karon, ang isa ka ganhaan nabuksan sa langit: kag ang nahauna nga tingug nga akon nabatian subong nga daw sa budyong nga nagapakighambal sa akon; nga nagsiling, Saka diri, kag ipakita ko sa imo ang mga butang nga kinahanglan magakalahanabu sa olihi.

2 Kag sa gilayon sa espiritu ako: kag, yari karon, may isa ka trono sa langit, kag may isa nga nagalingkod sa trono.

3 Kag sia nga nagalingkod kon tolokon kaangay sang isa ka jaspe kag isa ka sardio nga bato: kag may isa ka balangaw sa palibut sang trono, kon tolokon kaangay sang isa ka esmeralda.

4 Kag sa palibut sang trono may apat kag duha ka pulo ka lingkoran: kag sa mga lingkoran nakita ko ang apat kag duha ka pulo ka tigulang nga nagalingkod, nga napanaptan sing mga panapton nga maputi; kag sila may mga purungpurung nga bulawan sa ila mga olo.

5 Kag gikan sa trono nagahalin ang mga kilat kag mga pagpanaguub kag mga tingug: kag may pito ka sulu sang kalayo nga nagadabdab sa atubangan sang trono, nga amo ang pito ka Espiritu sang Dios.

6 Kag sa atubangan sang trono may isa ka dagat nga katya kaangay sang kristal: kag sa tunga sang trono, kag sa palibut sang trono, may apat ka sapat nga puno sang mga mata sa atubangan kag sa likod.

7 Kag ang nahaunang sapat kaangay sang isa ka leon, kag ang ikaduhang sapat kaangay sang isa ka tinday nga baka, kag ang ikatlong sapat may nawung nga subong sang isa ka tawo, kag ang ikap-at nga sapat kaangay sang isa ka aguila nga nagalupad.

8 Kag ang apat ka sapat, ang tagsa sa ila may anum ka pakpak sa palibut niya; kag sila puno sang mga mata sa sulud: kag wala sila nagapahuway sa adlaw kag gab-i, nga nagasiling, Balaan, balaan, balaan, Ginoong Dios nga Makaako, nga amo anay, kag amo karon, kag amo sa palaabuton.

9 Kag kon nagahatag sing himaya kag dungug kag mga pasalamat inang mga sapat sa iya nga nagalingkod sa trono, nga nagakabuhi sa gihapon kag sa walay katapusan,

10 Ang apat kag duha ka pulo ka tigulang nagahapa sa atubangan niya nga nagalingkod sa trono, kag nagasimba sa iya nga nagakabuhi sa gihapon kag sa walay katapusan, kag nagapilak sang ila mga purungpurung sa atubangan sang trono, nga nagasiling,

11 Takus ka, O Ginoo, sa pagbaton sang himaya kag dungug kag gahum: kay nagtuga ka sang tanan nga mga butang, kag tungud sang imo kahamuut nangin-amo kag gintuga sila.

KAPITULO 5

KAG nakita ko sa kamut nga too sang nagalingkod sa trono ang isa ka libro nga nasulatan sa sulud kag sa likod, nga naselyohan sing pito ka selyo.

2 Kag nakita ko ang isa ka makusug nga anghel nga nagabantala sa matonog nga tingug, Sin-o bala ang takus sa pagbukas sang libro, kag sa paghukas sang mga selyo sini?

3 Kag walay tawo sa langit, ukon sa duta, ukon sa idalum sang duta, nga sarang makabukas sang libro, ukon makatan-aw sa sini.

4 Kag naghibi ako sing tama, bangud nga walay tawo nga nakita nga takus sa pagbukas kag sa pagbasa sang libro, ukon sa pagtan-aw sa sini.

5 Kag ang isa sang mga tigulang nagsiling sa akon, Dili ka maghibi: yari karon, ang Leon sang tribo sang Juda, ang Gamut ni David, nakadaug sa pagbukas sang libro, kag sa paghukas sang pito ka selyo sini.

6 Kag nagtolok ako, kag, yari karon, sa tunga sang trono kag sang apat ka sapat, kag sa tunga sang mga tigulang, nagatindug ang isa ka Cordero subong nga ini ginpatay, nga may pito ka sungay kag pito ka mata, nga amo ang pito ka Espiritu sang Dios nga ginpadala sa bug-os nga duta.

7 Kag nagpalapit sia kag ginkuha ang libro sa kamut nga too sang nagalingkod sa trono.

8 Kag sang nakuha niya ang libro, naghapa sa atubangan sang Cordero ang apat ka sapat kag ang apat kag duha ka pulo ka tigulang, nga ang tagsa sa ila may mga arpa, kag mga praskita nga bulawan nga puno sang mga kaamyon, nga amo ang mga pangamuyo sang mga santo.

9 Kag nag-amba sila sing isa ka bag-ong ambahanon, nga nagasiling, Takus ka sa pagkuha sang libro, kag sa paghukas sang mga selyo sini: kay ginpatay ka, kag gintubus kami nga sa Dios paagi sa imo dugo sa tagsa ka kahimataan, kag hambal, kag katawohan, kag pungsud;

10 Kag ginhimo kami nga mga hari kag mga pari sa amon Dios: kag magahalari kami sa duta.

11 Kag nagtolok ako, kag nabatian ko ang tingug sang madamung anghel sa palibut sang trono kag sang mga sapat kag sang mga tigulang: kag ang kadamuon nila napulo ka libo ka napulo ka libo, kag linibo sang linibo;

12 Nga nagasiling sa matonog nga tingug, Takus ang Cordero nga ginpatay sa pagbaton sang gahum, kag manggad, kag kaalam, kag kusug, kag dungug, kag himaya, kag pagpakamaayo.

13 Kag ang tagsa ka tinuga nga yara sa langit, kag sa duta, kag sa idalum sang duta, kag ang mga yara sa dagat, kag ang tanan nga yara sa ila, nabatian ko nga nagasiling, Sa iya nga nagalingkod sa trono, kag sa Cordero, ang pagpakamaayo, kag dungug, kag himaya, kag gahum sa gihapon kag sa walay katapusan.

14 Kag ang apat ka sapat nagsiling, Amen. Kag ang apat kag duha ka pulo ka tigulang naghapa kag nagsimba sa nagakabuhi sa gihapon kag sa walay katapusan.

KAPITULO 6

KAG nakita ko sang ang Cordero nagbukas sang isa sang mga selyo, kag nabatian ko, subong sang dagubdub sang daguub, ang isa sang apat ka sapat nga nagasiling, Kari kag magtan-aw.

2 Kag nakita ko, kag yari karon ang isa ka kabayo nga maputi: kag ang nagasakay sa iya may isa ka pana; kag ginhatagan sia sing isa ka purungpurung: kag naglakat sia nga nagapangdaug, kag sa pagpangdaug.

3 Kag sang nabuksan niya ang ikaduha nga selyo, nabatian ko ang ikaduha nga sapat nga nagasiling, Kari kag magtan-aw.

4 Kag naggowa ang isa na man ka kabayo nga mapula: kag sia nga nagalingkod sa sini ginhatagan sing gahum sa pagkuha sang paghidait sa duta, kag nga sila magpalatyanay ang isa kag isa: kag ginhatagan sia sing isa ka dakung espada.

5 Kag sang nabuksan niya ang ikatlo nga selyo, nabatian ko ang ikatlo nga sapat nga nagasiling, Kari kag magtan-aw. Kag nagtolok ako, kag yari karon ang isa ka kabayo nga maitum; kag ang nagasakay sa iya may timbangan sa iya kamut.

6 Kag nabatian ko ang isa ka tingug sa tunga sang apat ka sapat nga nagasiling, Isa ka sukub sang trigo tungud sa isa ka denario, kag tatlo ka sukub sang sebada tungud sa isa ka denario; kag andam ka nga dili mo paghalitan ang lana kag ang alak.

7 Kag sang nabuksan niya ang ikap-at nga selyo, nabatian ko ang tingug sang ikap-at nga sapat nga nagasiling, Kari kag magtan-aw.

8 Kag nagtolok ako, kag yari karon ang isa ka kabayo nga maluspad: kag ang ngalan sang nagasakay sa iya amo ang Kamatayon, kag ang Impierno nagasonod upud sa iya. Kag ginhatagan sila sing kagamhanan sa ikap-at nga bahin sang duta, sa pagpamatay sa espada, kag sa tiggulutum, kag sa kamatayon, kag sa mga sapat sang duta.

9 Kag sang nabuksan niya ang ikalima nga selyo, nakita ko sa idalum sang halaran ang mga kalag sang mga ginpamatay tungud sa polong sang Dios, kag tungud sa pagpamatuud nga ila ginhuptan:

10 Kag nagsinggit sila sa matonog nga tingug, nga nagasiling, Tubtub pa bala san-o, O Ginoo, balaan kag matuud, nga indi mo paghukman kag itimalus ang amon dugo sa mga nagapuyo sa duta?

11 Kag ginhatagan ang tagsa sa ila sing mga kunup nga maputi; kag ginsilingan sila, nga dapat sila magpahuway anay sing diotay nga dag-on, tubtub nga ang pagpamatay sang ila mga masigkaalagad man kag sang ila mga kauturan subong sa ila matuman.

12 Kag nagtolok ako sang nabuksan niya ang ikan-um nga selyo, kag, yari karon, may isa ka dakung linog; kag ang adlaw nag-itum subong sang sako nga panapton nga bohok, kag ang bulan nanginsubong sang dugo;

13 Kag ang mga bitoon sang langit naholog sa duta, subong sang kahoy nga higuera nga nagataktak sang iya mga alang-alang nga higos, kon ginauyug ini sang isa ka mabaskug nga hangin.

14 Kag ang langit nagtaliwan subong sang isa ka rolyo sang libro nga ginalokot; kag ang tagsa ka bukid kag pulo ginhalin gikan sa ila mga duug.

15 Kag ang mga hari sang duta, kag ang kadalagkuan nga mga tawo, kag ang manggaranon nga mga tawo, kag ang puno nga mga kapitan, kag ang gamhanan nga mga tawo, kag ang tagsa ka ulipon, kag ang tagsa ka hilway nga tawo, nagpanago sa mga lungib kag sa mga dakung bato sang kabukiran;

16 Kag nagsiling sa mga bukid kag mga dakung bato, Tiphagi kami, kag tagoa kami sa nawung sang nagalingkod sa trono, kag sa kasingkal sang Cordero:

17 Kay nag-abut ang dakung adlaw sang iya kasingkal; kag sin-o bala ang sarang makabatas?

KAPITULO 7

KAG sa tapus sining mga butang nakita ko ang apat ka anghel nga nagatindug sa apat ka pamusud sang duta, nga nagapugung sang apat ka hangin sang duta, agud nga ang hangin indi maghuyup sa duta, ukon sa dagat, ukon sa bisan ano nga kahoy.

2 Kag nakita ko nga nagakayab ang isa na man ka anghel gikan sa sidlangan, nga nagadala sang selyo sang Dios nga buhi: kag nagsinggit sia sa matonog nga tingug sa apat ka anghel, nga sa ila gintugut ang pagsamad sang duta kag sang dagat,

3 Nga nagasiling, Dili ninyo pagsamara ang duta, ukon ang dagat, ukon ang kakahoyan, tubtub nga maselyohan namon ang mga alagad sang aton Dios sa ila mga agtang.

4 Kag nabatian ko ang kadamuon sang mga naselyohan: kag may isa ka gatus kag kap-atan kag apat ka libo nga ginselyohan gikan sa tanan nga mga tribo sang mga anak ni Israel.

5 Sa tribo ni Juda napulog duha ka libo ang ginselyohan. Sa tribo ni Ruben napulog duha ka libo ang ginselyohan. Sa tribo ni Gad napulog duha ka libo ang ginselyohan.

6 Sa tribo ni Aser napulog duha ka libo ang ginselyohan. Sa tribo ni Neftali napulog duha ka libo ang ginselyohan. Sa tribo ni Manases napulog duha ka libo ang ginselyohan.

7 Sa tribo ni Simeon napulog duha ka libo ang ginselyohan. Sa tribo ni Levi napulog duha ka libo ang ginselyohan. Sa tribo ni Issacar napulog duha ka libo ang ginselyohan.

8 Sa tribo ni Zabulon napulog duha ka libo ang ginselyohan. Sa tribo ni Jose napulog duha ka libo ang ginselyohan. Sa tribo ni Benjamin napulog duha ka libo ang ginselyohan.

9 Sa tapus sini nagtolok ako, kag, yari karon, isa ka dakung kadam-an, nga walay tawo nga makaisip, gikan sa tanan nga mga pungsud, kag mga kahimataan, kag katawohan, kag mga hambal, nga nagatilindug sa atubangan sang trono, kag sa atubangan sang Cordero, nga napanaptan sing mga kunup nga maputi, kag may mga paklang sa ila mga kamut;

10 Kag nagsinggit sila sa matonog nga tingug, nga nagasiling, Ang kaluwasan sa aton Dios nga nagalingkod sa trono, kag sa Cordero.

11 Kag ang tanan nga anghel nagtindug sa palibut sang trono, kag palibut sang mga tigulang kag sang apat ka sapat, kag naghapa sa atubangan sang trono sa ila mga nawung, kag nagsimba sa Dios,

12 Nga nagasiling, Amen: Ang pagpakamaayo, kag himaya, kag kaalam, kag pagpasalamat, kag dungug, kag gahum, kag kusug, manginsa aton Dios sa gihapon kag sa walay katapusan. Amen.

13 Kag nagsabat ang isa sang mga tigulang, nga nagasiling sa akon, Ano bala ini sila, nga napanaptan sing mga kunup nga maputi? kag diin sila maghalin?

14 Kag nagsiling ako sa iya, Sir, ikaw nakahibalo. Kag nagsiling sia sa akon, Ini amo sila ang naggowa sa dakung kangitngitan, kag nagbunak sang ila mga kunup, kag nagpaputi sa ila sa dugo sang Cordero.

15 Busa yara sila sa atubangan sang trono sang Dios, kag nagaalagad sa iya sa adlaw kag gab-i sa iya templo: kag sia nga nagalingkod sa trono magapuyo sa tunga nila.

16 Indi na sila paggutumon, ukon pag-uhawon pa; kag ang adlaw indi magsilak sa ila, ukon ang bisan ano nga init.

17 Kay ang Cordero nga yara sa tunga sang trono magapahalab sa ila, kag magatuytuy sa ila sa mga tuburan nga buhi sang mga tubig: kag ang Dios magapahid sang tanan nga mga luha sa ila mga mata.

KAPITULO 8

KAG sang nabuksan niya ang ikapito nga selyo, may kalinong sa langit sing mga tunga sa takna.

2 Kag nakita ko ang pito ka anghel nga nagatindug sa atubangan sang Dios; kag ginhatagan sila sing pito ka budyong.

3 Kag nag-abut ang isa na man ka anghel kag nagtindug sa halaran, nga may incensario nga bulawan; kag ginhatagan sia sing madamung incienso, agud nga idolot niya ini kaupud sang mga pangamuyo sang tanan nga mga santo sa halaran nga bulawan nga sa atubangan sang trono.

4 Kag ang aso sang incienso, nga kaupud sang mga pangamuyo sang mga santo, nagtub-ok sa atubangan sang Dios gikan sa kamut sang anghel.

5 Kag ginkuha sang anghel ang incensario, kag ginpuno ini sang kalayo gikan sa halaran, kag ginpilak ini sa duta: kag may mga tingug, kag mga pagpanaguub, kag mga kilat, kag isa ka linog.

6 Kag ang pito ka anghel nga may pito ka budyong naghanda sang ila kaugalingon sa pagpatonog.

7 Ang nahaunang anghel nagpatonog, kag nag-ulan sang hielo kag kalayo nga nasamoan sang dugo, kag ginpamilak sila sa duta: kag ang ikatlong bahin sang kakahoyan nasonog, kag ang tanan nga hilamon nga hilaw nasonog.

8 Kag ang ikaduhang anghel nagpatonog, kag daw isa ka daku nga bukid nga nagadabdab sa kalayo ang gintagbung sa dagat: kag ang ikatlong bahin sang dagat nahimo nga dugo;

9 Kag ang ikatlong bahin sang mga tinuga nga yara sa dagat, kag may kabuhi, nagkalamatay; kag ang ikatlong bahin sang mga sakayan nawagwag.

10 Kag ang ikatlong anghel nagpatonog, kag may naholog gikan sa langit nga isa ka dakung bitoon, nga nagadabdab nga daw isa ka suga, kag naholog ini sa ikatlong bahin sang mga suba, kag sa mga tuburan sang mga tubig;

11 Kag ang ngalan sang bitoon ginatawag Artamisa: kag ang ikatlong bahin sang mga tubig nangin artamisa; kag madamung tawo ang nagkalamatay bangud sang mga tubig, bangud nga ginpapait sila.

12 Kag ang ikap-at nga anghel nagpatonog, kag ginhampas ang ikatlong bahin sang adlaw, kag ang ikatlong bahin sang bulan, kag ang ikatlong bahin sang mga bitoon; agud nga magdulum ang ikatlo nila nga bahin, kag ang adlaw wala nagsanag sa ikatlong bahin sini, kag subong man ang gab-i.

13 Kag nagtolok ako, kag nabatian ang isa ka anghel nga nagalupad sa tunga sang langit, nga nagasiling sa matonog nga tingug, Kailo, kailo, kailo, sa mga nagapuyo sa duta bangud sang iban nga mga tingug sang budyong sang tatlo ka anghel, nga magapatonog pa!

KAPITULO 9

KAG ang ikalima nga anghel nagpatonog, kag nakita ko ang isa ka bitoon gikan sa langit nga naholog sa duta: kag ginhatag sa iya ang yabi sang boho nga walay idalum.

2 Kag ginbuksan niya ang boho nga walay idalum; kag may nagtub-ok nga aso gikan sa boho, subong sang aso sang isa ka dakung horno; kag ang adlaw kag ang kahanginan nagdulum bangud sang aso sang boho.

3 Kag may naggowa gikan sa aso nga mga apan sa ibabaw sang duta: kag ginhatagan sila sing gahum, subong nga ang mga iwiiwi sang duta may gahum.

4 Kag ginsogo sa ila nga indi nila pagsamaron ang hilamon sang duta, ukon ang bisan ano nga butang nga hilaw, ukon bisan ano nga kahoy; kondi yadtong mga tawo lamang nga walay selyo sang Dios sa ila mga agtang.

5 Kag wala gintugut sa ila nga patyon nila sila, kondi nga pagpasakitan sila sing lima ka bulan: kag ang pagsakit nila subong sang pagsakit sang iwiiwi, kon magkutut ini sa tawo.

6 Kag sa sinang mga adlaw ang mga tawo magapangita sang kamatayon, kag indi makita ini; kag magahandum nga mapatay, kag ang kamatayon magapalagyo gikan sa ila.

7 Kag ang mga dagway sang mga apan kaangay sang mga kabayo nga nahanda sa inaway; kag sa ila mga olo may daw mga purungpurung nga kaangay sang bulawan, kag ang ila mga nawung subong sang mga nawung sang mga tawo.

8 Kag may bohok sila subong sang bohok sang mga babaye, kag ang ila mga ngipon subong sang mga ngipon sang mga leon.

9 Kag may mga taming sa dughan sila, nga daw mga taming sa dughan nga salsalon; kag ang lagapak sang ila mga pakpak subong sang tonog sang mga kangga nga may madamung kabayo nga nagadalagan sa pag-away.

10 Kag may mga ikog sila kaangay sang mga iwiiwi, kag may mga sudlot sa ila mga ikog: kag ang ila gahum amo ang pagsamad sa mga tawo sing lima ka bulan.

11 Kag may ila sila nga hari, nga amo ang anghel sang boho nga walay idalum, nga ang iya ngalan sa Hebreo nga hambal si Abaddon, apang sa Griego nga hambal may iya sia nga ngalan si Apolion.

12 Ang isa ka kailo nagligad; kag, yari karon, may duha pa ka kailo nga magaabut sa tapus sini.

13 Kag ang ikan-um nga anghel nagpatonog, kag nabatian ko ang isa ka tingug gikan sa apat ka sungay sang halaran nga bulawan nga yara sa atubangan sang Dios,

14 Nga nagasiling sa ikan-um nga anghel nga may budyong, Hubari ang apat ka anghel nga nagapus sa dakung suba nga Eufrates.

15 Kag ginhubaran ang apat ka anghel, nga naaman sa isa ka takna, kag isa ka adlaw, kag isa ka bulan, kag isa ka tuig, sa pagpamatay sang ikatlong bahin sang mga tawo.

16 Kag ang kadamuon sang kasoldadosan nga manugkabayo duha ka gatus ka libo ka libo: kag nabatian ko ang kadamuon nila.

17 Kag sa among bagay nakita ko ang mga kabayo sa palanan-awon, kag ang mga nagsakay sa ila, nga may mga taming sa dughan nga kalayo, kag jacinto, kag azufre: kag ang mga olo sang mga kabayo subong sang mga olo sang mga leon; kag naggowa sa mga baba nila ang kalayo kag ang aso kag ang azufre.

18 Paagi sining tatlo ang ikatlong bahin sang mga tawo ginpatay, paagi sa kalayo, kag paagi sa aso, kag paagi sa azufre, nga nagagowa sa ila mga baba.

19 Kay ang ila gahum yara sa ila baba, kag sa ila mga ikog: kay ang ila mga ikog kaangay sa mga man-ug, kag may mga olo, kag paagi sa ila nagapangsamad sila.

20 Kag ang nabilin sang mga tawo nga wala mapatay sining mga kalalat-an wala gihapon maghinulsul sang mga buhat sang ila mga kamut, nga indi sila dapat magsimba sang mga yawa, kag sang mga diosdios nga bulawan, kag pilak, kag saway, kag bato, kag kahoy: nga indi makakita, ukon makabati, ukon makalakat:

21 Kag wala sila maghinulsul sang ila mga pagpamatay, ukon sang ila mga pagbabaylan, ukon sang ila pagpanghilawas, ukon sang ila mga pagpangawat.

KAPITULO 10

KAG nakita ko ang isa pa ka gamhanan nga anghel nga nagapanaug gikan sa langit, nga napanaptan sing isa ka panganud: kag may balangaw sa iya olo, kag ang iya nawung subong nga daw sa adlaw, kag ang iya mga tiil subong sang mga haligi nga kalayo:

2 Kag sia may isa ka libro nga diotay nga nabuksan sa iya kamut: kag gintapak niya ang iya tiil nga too sa dagat, kag ang iya tiil nga wala sa duta,

3 Kag nagsinggit sa matonog nga tingug, subong sang pagngurub sang leon: kag sang nakasinggit sia, ang pito ka daguub naghalambal sang ila mga tingug.

4 Kag sang nakahalambal ang pito ka daguub sang ila mga tingug, buut na ako kuntani magsulat: kag nabatian ko ang isa ka tingug gikan sa langit nga nagasiling sa akon, Selyohi inang mga butang nga ginhambal sang pito ka daguub, kag dili pag-isulat sila.

5 Kag ang anghel nga nakita ko nga nagatindug sa dagat kag sa duta nagbayaw sang iya kamut sa langit,

6 Kag nagsumpa paagi sa iya nga nagakabuhi sa gihapon kag sa walay katapusan, nga nagtuga sang langit, kag sang mga butang nga yara sa sini, kag sang duta, kag sang mga butang nga yara sa sini, kag sang dagat, kag sang mga butang nga yara sa sini, nga indi na maglawig ang tion:

7 Apang sa mga adlaw sang tingug sang ikapitong anghel, kon sia magsugud sa pagpatonog, ang misterio sang Dios matapus, sono sa ginpahayag niya sa iya mga alagad nga mga manalagna.

8 Kag ang tingug nga akon nabatian gikan sa langit naghambal liwat sa akon, kag nagsiling, Lakat kag kuhaa ang libro nga diotay nga nabuksan sa kamut sang anghel nga nagatindug sa dagat kag sa duta.

9 Kag nagkadto ako sa anghel, kag nagsiling sa iya, Ihatag sa akon ang libro nga diotay. Kag nagsiling sia sa akon, Kuhaa ini, kag kaona; kag pagapapaiton sini ang imo tiyan, apang sa imo baba magatam-is ini subong sang dugus.

10 Kag ginkuha ko ang libro nga diotay sa kamut sang anghel, kag ginkaon ini; kag nagtam-is ini sa akon baba subong sang dugus: kag sang nakaon ko ini, nagpait ang akon tiyan.

11 Kag nagsiling sia sa akon, Kinahanglan nga magpanagna ka liwat sa madamung katawohan, kag mga pungsud, kag mga hambal, kag mga hari.

KAPITULO 11

KAG may ginhatag sa akon nga tabun-ak nga kaangay sa isa ka sungkud: kag ang anghel nagtindug, nga nagasiling, Tindug, kag taksa ang templo sang Dios, kag ang halaran, kag ang mga nagasimba didto.

2 Apang ang luwang nga sa gowa sang templo bayaan mo, kag dili mo pagtakson; kay ginhatag ini sa mga Gentil: kag tasakon nila ang balaan nga siudad sing kap-atan kag duha ka bulan.

3 Kag hatagan ko sang gahum ang akon duha ka saksi, kag sila magapanagna sing isa ka libo kag duha ka gatus kag kan-uman ka adlaw, nga napanaptan sing panapton nga sako.

4 Amo ini sila ang duha ka kahoy nga olivo, kag ang duha ka kandilero nga nagatindug sa atubangan sang Dios sang duta.

5 Kag kon ang bisan sin-o nga tawo nga buut magsamad sa ila, nagagowa ang kalayo sa ila mga baba, kag nagalamon sang ila mga kaaway: kag kon ang bisan sin-o nga tawo nga buut magsamad sa ila, kinahanglan sia patyon sa sining bagay.

6 Ini sila may gahum sa pagtakup sang langit, agud nga indi mag-ulan sa mga adlaw sang ila panagna: kag may gahum sila sa mga tubig sa paghimo sa ila nga dugo, kag sa pagsakit sang duta sa tanan nga mga kalalat-an, sa masunsun nga buut sila.

7 Kag kon matapus na nila ang ila pagpamatuud, ang sapat nga nagasaka gikan sa boho nga walay idalum magapakig-away batok sa ila, kag magadaug sa ila, kag magapatay sa ila.

8 Kag ang ila mga patay nga lawas yara sa dalan sang dakung siudad, nga sa espirituhanon ginatawag Sodoma kag Egipto, diin ang aton Ginoo man ginlansang sa krus.

9 Kag ang mga gikan sa katawohan kag mga kahimataan kag mga hambal kag mga pungsud magatan-aw sang ila mga patay nga lawas sing tatlo ka adlaw kag tunga, kag indi magtugut nga ilubung ang ila mga patay nga lawas sa mga lulubngan.

10 Kag ang mga nagapuyo sa duta magakalipay sa ila, kag magakasadya, kag magaregalohay ang isa kag isa; bangud nga ginsakit sining duha ka manalagna ang mga nagapuyo sa duta.

11 Kag sa tapus sang tatlo ka adlaw kag tunga ang Espiritu sang kabuhi gikan sa Dios nagsulud sa ila, kag nagtindug sila sa ila mga tiil; kag ginhadlukan sing daku ang mga nakakita sa ila.

12 Kag nabatian nila ang isa ka dakung tingug gikan sa langit nga nagasiling sa ila, Saka diri. Kag nagsalaka sila sa langit sa isa ka panganud; kag ang ila mga kaaway nagtolok sa ila.

13 Kag sa amo nga takna may isa ka dakung linog, kag napukan ang ikapulo nga bahin sang siudad, kag ang nagkalamatay sa linog pito ka libo ka tawo: kag ang nabilin nalisang, kag naghatag sing himaya sa Dios sang langit.

14 Nagligad ang ikaduhang kailo; kag, yari karon, ang ikatlong kailo magaabut sing madali.

15 Kag ang ikapitong anghel nagpatonog; kag may dalagkung mga tingug sa langit, nga nagasiling, Ang mga ginharian sining kalibutan nangin-iya na sang aton Ginoo mga ginharian, kag sang iya Cristo; kag magahari sia sa gihapon kag sa walay katapusan.

16 Kag ang apat kag duha ka pulo ka tigulang, nga nagalingkod sa atubangan sang Dios sa ila mga lingkoran, naghapa, kag nagsimba sa Dios,

17 Nga nagasiling, Nagapasalamat kami sa imo, O Ginoong Dios nga Makaako, nga amo karon, kag amo anay, kag amo sa palaabuton; bangud nga nakuha mo na ang imo dakung gahum, kag nakahari na.

18 Kag nagkalaakig ang kapungsuran, kag nag-abut ang imo kasingkal, kag ang tion sang mga patay, nga sila dapat pagahukman, kag nga ikaw magahatag sang padya sa imo mga alagad nga mga manalagna, kag sa mga santo, kag sa ila nga nagakahadluk sa imo ngalan, mga magamay kag mga dalagku; kag magalaglag sang mga nagalaglag sang duta.

19 Kag nabuksan ang templo sang Dios sa langit, kag nakita sa iya templo ang arka sang iya testamento: kag may mga kilat, kag mga tingug, kag mga pagpanaguub, kag isa ka linog, kag dakung ulan sang hielo.

KAPITULO 12

KAG may nagpahayag nga isa ka dakung katanhagaan sa langit; isa ka babaye nga napanaptan sing adlaw, kag ang bulan sa idalum sang iya mga tiil, kag sa iya olo ang isa ka purungpurung nga napulog duha ka bitoon:

2 Kag sia nagsinggit sa iya pagdala, nga ginasakitan, kag nagapasakit bangud sa pag-anak.

3 Kag may nagpahayag nga isa na man ka katanhagaan sa langit; kag yari karon ang isa ka dakung dragon nga mapula, nga may pito ka olo kag napulo ka sungay, kag pito ka purungpurung sa iya mga olo.

4 Kag ginguyud sang iya ikog ang ikatlong bahin sang mga bitoon sa langit, kag ginpamilak sila sa duta: kag ang dragon nagtindug sa atubangan sang babaye nga buut na mag-anak, sa paglamon sang iya bata kon mapanganak ini.

5 Kag nag-anak sia sing isa ka lalaki nga bata, nga amo ang gintangdo sa pagdumala sang tanan nga kapungsuran sa bilogon nga salsalon: kag ginsabnit ang iya bata paibabaw sa Dios, kag sa iya trono.

6 Kag ang babaye nagpalagyo pa kamingawan, diin may duug sia nga gin-aman sang Dios, agud nga pakan-on nila sia sing isa ka libo kag duha ka gatus kag kan-uman ka adlaw.

7 Kag may inaway sa langit: si Miguel kag ang iya mga anghel nagpakig-away batok sa dragon; kag ang dragon nagpakig-away kag ang iya mga anghel,

8 Kag wala magdaug; kag ang ila duug wala na makit-an sa langit.

9 Kag ginpilak ang dakung dragon, yanang dumaan nga man-ug, nga ginatawag ang Yawa, kag Satanas, nga nagadaya sang bug-os nga kalibutan: ginpilak sia sa duta, kag ang iya mga anghel ginpilak kaupud niya.

10 Kag nabatian ko ang isa ka matonog nga tingug nga nagasiling sa langit, Karon nag-abut ang kaluwasan, kag ang kusug, kag ang ginharian sang aton Dios, kag ang gahum sang iya Cristo: kay ginholog ang manunumbung sang aton mga kauturan, nga nagsumbung sa ila sa atubangan sang aton Dios sa adlaw kag gab-i.

11 Kag gindaug nila sia paagi sa dugo sang Cordero, kag paagi sa polong sang ila pagpamatuud; kag wala nila paghigugmaa ang ila mga kabuhi tubtub sa kamatayon.

12 Busa magkalipay, kamo nga mga langit, kag kamo nga nagapuyo sa ila. Kailo sa mga nagapuyo sa duta kag sa dagat! kay ang yawa nagpanaug sa inyo, nga may dakung kasingkal, bangud nga nakahibalo sia nga may malip-ot lamang sia nga tion.

13 Kag sang pagkakita sang dragon nga ginholog sia sa duta, ginhingabut niya ang babaye nga nag-anak sing lalaki nga bata.

14 Kag ginhatagan ang babaye sang duha ka pakpak sang dakung aguila, agud nga makalupad sia gikan sa nawung sang man-ug pa kamingawan, sa iya duug, diin sagudon sia sa isa ka tion, kag mga tion, kag katunga sa tion.

15 Kag nagbuga ang man-ug sa iya baba sing tubig nga subong sang baha sa olihi sang babaye, agud nga mapaanud niya sia sa baha.

16 Kag ang duta nagtabang sa babaye, kag ginbuka sang duta ang iya baba, kag gintolon ang baha nga ginbuga sang dragon sa iya baba.

17 Kag ang dragon naakig sa babaye, kag nagkadto sa pagpakig-away batok sa nabilin sang iya kaliwat, nga nagahuput sang mga sogo sang Dios, kag may ila sila sang pagpamatuud ni Jesu-Cristo.

KAPITULO 13

KAG nagtindug ako sa balas sang dagat, kag nakita ko ang isa ka sapat nga nagatakas gikan sa dagat, nga may pito ka olo kag napulo ka sungay, kag sa iya mga sungay may napulo ka purungpurung, kag sa iya mga olo ang ngalan sang pasipala.

2 Kag ang sapat nga akon nakita kaangay sang isa ka leopardo, kag ang iya mga tiil subong sang mga tiil sang isa ka oso, kag ang iya baba subong sang baba sang isa ka leon: kag ginhatag sa iya sang dragon ang iya gahum, kag ang iya lingkoran, kag dakung pagbulut-an.

3 Kag nakita ko ang isa sang iya mga olo subong sang napilasan nga ikamatay; kag ang iya pilas nga ikamatay nag-ayo: kag ang bug-os nga kalibutan nagkalatingala sa sapat.

4 Kag ginsimba nila ang dragon nga naghatag sang gahum sa sapat: kag ginsimba nila ang sapat, nga nagasiling, Sin-o bala ang kaangay sa sapat? sin-o bala ang sarang makapakig-away batok sa iya?

5 Kag ginhatagan sia sing baba nga nagahambal sang dalagkung mga butang kag mga pasipala; kag ginhatagan sia sang gahum sa pagpadayon sing kap-atan kag duha ka bulan.

6 Kag gintikab niya ang iya baba sa pagpasipala batok sa Dios, sa pagpasipala sang iya ngalan, kag sang iya tabernakulo, kag sang mga nagapuyo sa langit.

7 Kag ginpahanugutan sia nga magpakig-away batok sa mga santo, kag sa pagdaug sa ila: kag ginhatagan sia sing kagamhanan sa tanan nga kahimataan, kag mga hambal, kag mga pungsud.

8 Kag magasimba sa iya ang tanan nga nagapuyo sa duta, nga ang ila mga ngalan wala masulat sa libro sang kabuhi sang Cordero nga ginpatay kutub sang pagpasad sang kalibutan.

9 Kon ang bisan sin-o nga tawo may idulungug, magpamati sia.

10 Sia nga nagapamihag pagabihagon sia: sia nga nagapatay sa espada kinahanglan nga patyon sa espada. Yari ang pagpailub kag ang pagtoo sang mga santo.

11 Kag nagtolok ako sang isa na man ka sapat nga nagapasaka gikan sa duta; kag may duha sia ka sungay kaangay sang sa isa ka cordero, kag naghambal sia subong sang isa ka dragon.

12 Kag nagahikot sia sang tanan nga gahum sang nahaunang sapat sa atubangan niya, kag ginapasimba niya ang duta kag ang mga nagapuyo sa sini sa nahaunang sapat, nga ang iya pilas nga ikamatay nag-ayo.

13 Kag nagahimo sia sing dalagkung mga katanhagaan, bisan sa ginapapanaug niya ang kalayo sa duta gikan sa langit sa itololok sang mga tawo,

14 Kag ginadayaan niya ang mga nagapuyo sa duta paagi sa sinang mga milagro nga may gahum sia sa paghimo sa itololok sang sapat; nga nagasiling sa mga nagapuyo sa duta, nga dapat sila maghimo sang imahen sa sapat, nga napilasan sang espada, kag nabuhi.

15 Kag may gahum sia sa paghatag sing kabuhi sa imahen sang sapat, agud nga ang imahen sang sapat magahambal, kag magapapatay sang tanan nga indi magsimba sa imahen sang sapat.

16 Kag ginapabaton niya ang tanan, magamay kag dalagku, manggaranon kag imol, hilway kag ulipon, sang marka sa ila kamut nga too, ukon sa ila mga agtang:

17 Kag nga wala sing tawo nga sarang makabakal ukon makabaligya, luwas kon sia may marka, ukon may ngalan sang sapat, ukon may numero sang iya ngalan.

18 Yari ang kaalam. Ang may paghangup, isipon niya ang numero sang sapat: kay ini amo ang numero sang isa ka tawo; kag ang iya numero Anum ka gatus kag kan-uman kag anum.

KAPITULO 14

KAG nagtolok ako, kag, yari karon, isa ka Cordero nagatindug sa bukid nga Sion, kag kaupud niya ang isa ka gatus kag kap-atan kag apat ka libo, nga may ila sila sang ngalan sang iya Amay nga nasulat sa ila mga agtang.

2 Kag nabatian ko ang isa ka tingug gikan sa langit, subong sang tingug sang madamung tubig, kag subong sang tingug sang isa ka dakung daguub: kag nabatian ko ang tingug sang mga manug-arpa nga nagakuting-kuting sang ila mga arpa:

3 Kag nag-amba sila sing daw isa ka bag-ong ambahanon sa atubangan sang trono, kag sa atubangan sang apat ka sapat, kag sang mga tigulang: kag walay tawo nga makatoon sinang ambahanon kondi ang isa ka gatus kag kap-atan kag apat ka libo, nga tinubus gikan sa duta.

4 Ini sila amo ang mga wala madagtai sing mga babaye; kay mga ulay sila. Ini sila amo ang mga nagasonod sa Cordero bisan diin sia nagakadto. Ini sila mga tinubus gikan sa mga tawo, mga nahaunang bunga nga sa Dios kag sa Cordero.

5 Kag walay limbong nga nasapwan sa ila baba: kay sila walay sayup sa atubangan sang trono sang Dios.

6 Kag nakita ko ang isa na man ka anghel nga nagalupad sa tunga sang langit, nga may walay katapusan nga ebanghelyo nga iwali sa mga nagapuyo sa duta, kag sa tagsa ka pungsud, kag kahimataan, kag hambal, kag katawohan,

7 Nga nagasiling sa matonog nga tingug, Kahadluki ninyo ang Dios, kag hatagi sia sing himaya; kay nag-abut na ang takna sang iya paghukom: kag simbaha sia nga naghimo sang langit, kag duta, kag sang dagat, kag sang mga tuburan sang mga tubig.

8 Kag may nagsonod nga isa na man ka anghel, nga nagasiling, Ang Babilonia napukan, napukan, inang dakung siudad, bangud ginpainum niya ang tanan nga pungsud sang alak sang kasingkal sang iya pagpanghilawas.

9 Kag ang ikatlong anghel nagsonod sa ila, nga nagasiling sa matonog nga tingug, Kon ang bisan sin-o nga tawo magsimba sa sapat kag sa iya imahen, kag magbaton sang iya marka sa iya agtang, ukon sa iya kamut,

10 Ang amo man magainum sang alak sang kasingkal sang Dios, nga gin-ula nga walay simbug sa tagayan sang iya kaalipungut; kag sakiton sia sa kalayo kag azufre sa atubangan sang mga anghel nga balaan, kag sa atubangan sang Cordero:

11 Kag ang aso sang ila kasakit nagatub-ok sa gihapon kag sa walay katapusan: kag wala sila sing pahuway sa adlaw ukon gab-i, sila nga nagasimba sa sapat kag sa iya imahen, kag ang bisan sin-o nga nagabaton sang marka sang iya ngalan.

12 Yari ang pagpailub sang mga santo: yari sila nga nagahuput sang mga sogo sang Dios, kag sang pagtoo nga sa kay Jesus.

13 Kag nabatian ko ang isa ka tingug gikan sa langit nga nagasiling sa akon, Isulat, Bulahan ang mga patay nga nagakamatay sa Ginoo kutub karon: Hoo, nagasiling ang Espiritu, agud nga makapahuway sila sa ila mga pagpangabudlay; kag ang ila mga binuhatan nagasonod sa ila.

14 Kag nagtolok ako, kag yari karon ang isa ka panganud nga maputi, kag sa ibabaw sang panganud nagalingkod ang isa nga kaangay sang Anak sang tawo, nga may purungpurung nga bulawan sa iya olo, kag isa ka galab nga matalum sa iya kamut.

15 Kag ang isa na man ka anghel naggowa sa templo, nga nagasinggit sa matonog nga tingug sa iya nga nagalingkod sa panganud, Ihabyog ang imo galab, kag mag-ani: kay nag-abut na ang tion nga ikaw mag-ani; kay ang alanyon sang duta luto na.

16 Kag sia nga nagalingkod sa panganud naghabyog sang iya galab sa duta; kag gin-ani ang duta.

17 Kag ang isa na man ka anghel naggowa sa templo nga yara sa langit, sia man may isa ka galab nga matalum.

18 Kag ang isa na man ka anghel naggowa gikan sa halaran, nga may gahum sa kalayo; kag nagsinggit sa matonog nga singgit sa iya nga may matalum nga galab, nga nagasiling, Ihabyog ang imo galab nga matalum, kag tipona ang mga pinungpung sang puno sang ubas sang duta; kay luto na gid ang iya mga ubas.

19 Kag ginhabyog sang anghel ang iya galab sa duta, kag gintipon ang puno sang ubas sang duta, kag ginpilak ini sa dakung linasan sang ubas sang kasingkal sang Dios.

20 Kag ang linasan sang ubas ginlinas sa gowa sang siudad, kag naggowa ang dugo gikan sa linasan sang ubas, tubtub sa mga busal sang mga kabayo sa kataason, sa kalayoon nga isa ka libo kag anum ka gatus ka estadio.

KAPITULO 15

KAG nakita ko ang isa na man ka tanda sa langit, daku kag makatilingala, pito ka anghel nga may pito ka katapusan nga mga kalalat-an; kay sa ila puno na ang kasingkal sang Dios.

2 Kag nakita ko ang daw isa ka dagat nga katya nga nasimbugan sing kalayo: kag ang mga nagdaug sa sapat, kag sa iya imahen, kag sa iya marka, kag sa numero sang iya ngalan, nga nagatindug sa dagat nga katya, nga may mga arpa sang Dios.

3 Kag nagaamba sila sang ambahanon ni Moises nga alagad sang Dios, kag sang ambahanon sang Cordero, nga nagasiling, Dalagku kag kalatingalahan ang imo mga binuhatan, Ginoong Dios nga Makaako; matarung kag matuud ang imo mga dalanon, ikaw nga Hari sang mga santo.

4 Sin-o bala ang indi magakahadluk sa imo, O Ginoo, kag magahimaya sang imo ngalan? kay ikaw lamang ang balaan: kay ang tanan nga pungsud magakari kag magasimba sa atubangan nimo; kay ang imo mga paghukom napahayag.

5 Kag sa tapus sini nagtolok ako, kag, yari karon, ang templo sang tabernakulo sang pagpamatuud sa langit nabuksan:

6 Kag naggowa sa templo ang pito ka anghel, nga may pito ka kalalat-an, nga napanaptan sing lino nga lubus kag maputi, kag nawagkusan ang ila mga dughan sing mga wagkus nga bulawan.

7 Kag ang isa sang apat ka sapat naghatag sa pito ka anghel sing pito ka praskita nga bulawan nga puno sang kasingkal sang Dios, nga nagakabuhi sa gihapon kag sa walay katapusan.

8 Kag ang templo napuno sang aso gikan sa himaya sang Dios, kag sa iya gahum; kag walay tawo nga nakasarang sa pagsulud sa templo, tubtub nga natuman ang pito ka kalalat-an sang pito ka anghel.

KAPITULO 16

KAG nabatian ko ang isa ka dakung tingug gikan sa templo nga nagasiling sa pito ka anghel, Lakat kamo sa inyo mga dalanon, kag iula ang mga praskita sang kasingkal sang Dios sa duta.

2 Kag naglakat ang nahauna, kag nag-ula sang iya praskita sa duta; kag nag-abut ang isa ka hubag nga masakit kag malala sa mga tawo nga may marka sang sapat, kag sa ila nga nagsimba sa iya imahen.

3 Kag ang ikaduhang anghel nag-ula sang iya praskita sa dagat; kag nahimo ini nga dugo subong sang iya sang tawong patay: kag ang tagsa ka kalag nga buhi sa dagat nagkamatay.

4 Kag ang ikatlong anghel nag-ula sang iya praskita sa mga suba kag sa mga tuburan sang mga tubig; kag nahimo sila nga dugo.

5 Kag nabatian ko ang anghel sang mga tubig nga nagasiling, Matarung ka, O Ginoo, nga amo karon, kag amo anay, kag amo sa palaabuton, bangud nga naghukom ka sing subong sini.

6 Kay gin-ula nila ang dugo sang mga santo kag mga manalagna, kag ginpainum mo sila sing dugo; kay takus sila.

7 Kag nabatian ko ang isa na man gikan sa halaran nga nagasiling, Mangin-amo sina, Ginoong Dios nga Makaako, matuud kag matarung ang imo mga paghukom.

8 Kag ang ikap-at nga anghel nag-ula sang iya praskita sa adlaw; kag ginhatagan sia sing gahum sa pagpaso sang mga tawo sa kalayo.

9 Kag nagkapaso ang mga tawo sa dakung kainit, kag ginpasipalahan nila ang ngalan sang Dios, nga may gahum sa sining mga kalalat-an: kag wala sila maghinulsul sa paghatag sa iya sang himaya.

10 Kag ang ikalimang anghel nag-ula sang iya praskita sa lingkoran sang sapat; kag ang iya ginharian napuno sang kadudulman; kag ginpangagat nila ang ila mga dila sa kasakit,

11 Kag ginpasipalahan ang Dios sang langit bangud sang ila mga kasakit kag mga hubag, kag wala sila maghinulsul sang ila mga binuhatan.

12 Kag ang ikan-um nga anghel nag-ula sang iya praskita sa dakung suba nga Eufrates; kag ang tubig sini nahubas, agud nga maaman ang dalan sang mga hari sang sidlangan.

13 Kag nakita ko ang tatlo ka espiritu nga dimatinlo subong sang mga paka nga nagagowa sa baba sang dragon, kag sa baba sang sapat, kag sa baba sang dimatuud nga manalagna.

14 Kay sila amo ang mga espiritu sang mga yawa, nga nagahimo sing mga milagro, nga nagakadto sa mga hari sang duta kag sang bug-os nga kalibutan, sa pagtipon sa ila sa inaway sinang dakung adlaw sang Dios nga Makaako.

15 Yari karon, nagakari ako subong sang isa ka makawat. Bulahan ang nagabantay, kag nagatipig sang iya mga panapton, agud nga indi sia maglakat nga hublas, kag makita nila ang iya kahuluy-an.

16 Kag gintipon niya sila sing tingub sa isa ka duug nga ginatawag sa Hebreo nga hambal Armagedon.

17 Kag ang ikapitong anghel nag-ula sang iya praskita sa kahanginan; kag may naggowa nga isa ka dakung tingug sa templo sang langit, gikan sa trono, nga nagasiling, Nahimo na.

18 Kag may mga tingug, kag mga daguub, kag mga kilat; kag may isa ka dakung linog, nga wala pa gid sing subong kutub sang may mga tawo sa duta, isa ka linog nga tama kabaskug, kag tama ka daku.

19 Kag ang dakung siudad nabahin sing tatlo, kag ang mga siudad sang mga pungsud napukan: kag ang dakung Babilonia nadumduman sang Dios, sa paghatag sa iya sang tagayan sang alak sang kabaris sang iya kasingkal.

20 Kag ang tagsa ka pulo nagpalagyo, kag wala makit-i ang kabukiran.

21 Kag may naholog gikan sa langit sa mga tawo nga isa ka dakung ulan sang hielo, nga ang tagsa ka binato subong sang bug-at sang isa ka talanton: kag ginpasipalahan sang mga tawo ang Dios bangud sang kalalat-an sang ulan nga hielo; kay ang kalalat-an sini tama gid ka daku.

KAPITULO 17

KAG nag-abut ang isa sang pito ka anghel nga may pito ka praskita, kag nagpakighambal sa akon, nga nagasiling sa akon, Kari diri; ipakita ko sa imo ang paghukom sang dakung bigaon nga nagalingkod sa ibabaw sang madamung tubig:

2 Nga sa iya nakapakighilawas ang mga hari sang duta, kag ang mga nagapuyo sa duta nahobog sang alak sang iya pagpanghilawas.

3 Gani sa espiritu gindala niya ako sa kamingawan: kag nakita ko ang isa ka babaye nga nagasakay sa sapat nga nagaduag sing escarlata, nga puno sang mga ngalan sang pagpasipala, nga may pito ka olo kag napulo ka sungay.

4 Kag ang babaye napanaptan sing purpura kag escarlata nga duag, kag napunihan sing bulawan kag mga bato nga malahalon kag mga mutya, nga may isa ka tagayan nga bulawan sa iya kamut nga puno sang mga kangil-aran kag sang kahigkoan sang iya pagpanghilawas:

5 Kag sa iya agtang nasulat ang isa ka ngalan, MISTERIO, BABILONIA NGA DAKU, ANG ILOY SANG MGA ALPOT KAG MGA KANGIL-ARAN SANG DUTA.

6 Kag nakita ko ang babaye nga nahobog sang dugo sang mga santo, kag sang dugo sang mga martir ni Jesus: kag sang nakita ko sia, nagkatingala ako sing dakung katingala.

7 Kag ang anghel nagsiling sa akon, Ngaa bala nagkatingala ka? Isugid ko sa imo ang misterio sang babaye, kag sang sapat nga may pito ka olo kag napulo ka sungay, nga nagadala sa iya.

8 Ang sapat nga nakita mo amo anay, kag indi karon; kag magasaka gikan sa boho nga walay idalum, kag magakadto sa kalaglagan: kag ang mga nagapuyo sa duta magakatingala, nga ang ila mga ngalan wala masulat sa libro sang kabuhi kutub sa pagpasad sang kalibutan, kon ila makita ang sapat nga amo anay, kag indi karon, kag walay sapayan amo karon.

9 Kag yari ang hunahuna nga may kaalam. Ang pito ka olo amo ang pito ka bukid, nga ginalingkoran sang babaye.

10 Kag may pito ka hari: ang lima napukan, kag ang isa amo karon, kag ang isa wala pa mag-abut; kag kon mag-abut sia, kinahanglan nga magpadayon sia sing malip-ot nga tion.

11 Kag ang sapat nga amo anay, kag indi karon, sia amo ang ikawalo, kag halin sia sa pito, kag magakadto sa kalaglagan.

12 Kag ang napulo ka sungay nga nakita mo amo ang napulo ka hari, nga wala pa makabaton sang ginharian; apang magabaton sing gahum subong nga mga hari sing isa ka takna kaupud sang sapat.

13 Ini sila may isa ka hunahuna, kag igahatag nila ang ila gahum kag kusug sa sapat.

14 Ini sila magapakig-away batok sa Cordero, kag ang Cordero magadaug sa ila: kay sia Ginoo sang mga ginoo, kag Hari sang mga hari: kag sila nga kaupud niya mga tinawag, kag mga pinili, kag mga matutum.

15 Kag nagsiling sia sa akon, Ang mga tubig nga nakita mo, nga ginalingkoran sang bigaon, sila mga katawohan, kag mga kadam-an, kag mga pungsud, kag mga hambal.

16 Kag ang napulo ka sungay nga imo nakita sa sapat, ini sila magadumut sa bigaon, kag magapamusmus kag magapahubo sa iya, kag magakaon sang iya unud, kag magasonog sa iya sa kalayo.

17 Kay ginbutang sang Dios sa ila mga tagiposoon ang paghimo sang iya kabubut-on, kag ang paghisugut, kag ang paghatag sang ila ginharian sa sapat, tubtub nga matuman ang mga polong sang Dios.

18 Kag ang babaye nga imo nakita amo inang dakung siudad, nga nagahari sa mga hari sang duta.

KAPITULO 18

KAG sa tapus sining mga butang nakita ko ang isa na man ka anghel nga nagapanaug gikan sa langit, nga may dakung gahum; kag ang duta nasanagan sang iya himaya.

2 Kag nagsinggit sia sing isganan nga may mabaskug nga tingug, nga nagasiling, Ang Babilonia nga daku napukan, napukan, kag nangin-amo ang puluy-an sang mga yawa, kag hulukmungan sang tagsa ka espiritu nga mahigko, kag isa ka hawla sang tagsa ka pispis nga dimatinlo kag dulumtan.

3 Kay ang tanan nga kapungsuran nakainum sang alak sang kasingkal sang iya pagpanghilawas, kag ang mga hari sang duta nakapakighilawas sa iya, kag ang mga komersyante sa duta nagmanggaranon paagi sa pagkabugana sang iya mga pagpatuyang.

4 Kag nabatian ko ang isa na man ka tingug gikan sa langit, nga nagasiling, Gowa sa iya, katawohan nakon, agud nga indi kamo mangin mga umalambit sang iya mga sala, kag agud nga indi kamo makabaton sang iya mga kalalat-an.

5 Kay ang iya mga sala naglambut tubtub sa langit, kag ang Dios nakadumdum sang iya mga kalautan.

6 Ibalus sa iya subong sang ginbalus niya sa inyo, kag ibalus sing pilo ang iya pilo nga pagbalus sa inyo sono sa iya mga buhat: sa tagayan nga iya ginpuno ipuno ninyo sa iya sing pilo.

7 Kon ano ang paghimaya niya sang iya kaugalingon, kag pagkabuhi sing patuyang, hatagi sia sing subong nga pagsakit kag pagkalisud: kay nagasiling sia sa iya tagiposoon, Nagalingkod ako nga isa ka hara, kag indi ako balo, kag indi ako makakita sing kalisud.

8 Busa magaabut ang iya mga kalalat-an sa isa ka adlaw, ang kamatayon, kag kasubu, kag tiggulutum; kag sonogon sia sing bug-os sa kalayo: kay makusug ang Ginoong Dios nga nagahukom sa iya.

9 Kag ang mga hari sang duta, nga nakapakighilawas kag nagkabuhi sing patuyang kaupud niya, magabakho sa iya, kag magahaya sa iya, kon magatolok sila sa aso sang iya pagkasonog,

10 Nga nagatindug sa malayo sa kahadluk sang iya kasakit, nga nagasiling, Ahay, ahay, inang dakung siudad nga Babilonia, inang gamhanan nga siudad! kay sa isa ka takna ang paghukom sa imo nag-abut.

11 Kag ang mga komersyante sang duta magahibi kag magakalisud sa iya; kay wala na sing tawo nga nagabakal sang ila balaligya:

12 Balaligya nga bulawan, kag pilak, kag mga bato nga malahalon, kag nga mga mutya, kag lino nga mapino, kag purpura, kag sukla, kag escarlata, kag tanan nga thyine nga tigkahoy, kag tanan nga sahi sang mga suludlan nga tiposo, kag tanan nga sahi sang mga suludlan nga kahoy nga labing malahalon, kag nga saway, kag salsalon, kag marmol,

13 Kag canela, kag mga pahamut, kag mga ihalaplas, kag frankincienso, kag alak, kag lana, kag harina nga mapino, kag trigo, kag mga sapat, kag mga carnero, kag mga kabayo, kag mga kangga, kag mga ulipon, kag mga kalag sang mga tawo.

14 Kag ang mga bunga nga ginkaibogan sang imo kalag nagtaliwan sa imo, kag ang tanan nga mga butang nga manamit kag matahum nagtaliwan sa imo, kag indi mo na gid sila makita.

15 Ang mga komersyante sining mga butang, nga nagmanggaranon paagi sa iya, magatindug sa malayo tungud sa kahadluk sang iya kasakit, nga nagahibi kag nagahaya,

16 Kag nagasiling, Ahay, ahay, inang dakung siudad, nga napanaptan sing lino nga mapino, kag purpura, kag escarlata, kag napunihan sing bulawan, kag mga bato nga malahalon, kag mga mutya!

17 Kay sa isa ka takna napapas ang kon daw ano ka daku nga manggad. Kag ang tagsa ka pangolo sang sakayan, kag ang tanan nga tripulante sa mga sakayan, kag ang mga sakayanon, kag ang tanan nga nagapatikang sa dagat, nagtindug sa malayo,

18 Kag nagsinggit sang nakita nila ang aso sang iya pagkasonog, nga nagasiling, Ano bala nga siudad ang kaangay sining dakung siudad!

19 Kag ginsabwagan nila sing yab-ok ang ila mga olo, kag nagsinggit, nga nagahibi kag nagahaya, nga nagasiling, Ahay, ahay, inang dakung siudad, diin nagmanggaranon ang tanan nga may mga sakayan sa dagat paagi sa iya kamanggaran! kay sa isa ka takna namusmus sia.

20 Magkalipay ka sa iya, langit, kag kamo nga balaan nga mga apostol kag mga manalagna; kay gintimalusan sia sang Dios tungud sa inyo.

21 Kag ang isa ka gamhanan nga anghel nagkuha sing isa ka bato nga kaangay sang dakung bato nga galingan, kag gintagbung ini sa dagat, nga nagasiling, Sa amo sini ang pagpusdak sinang dakung siudad nga Babilonia, kag indi na gid makita.

22 Kag ang tingug sang mga manug-arpa, kag mga manugmusica, kag sang mga manuglantoy, kag mga manugbudyong, indi na gid mabatian sa imo; kag wala na gid sing panday, sa bisan anong buluhaton, nga makit-an sa imo; kag ang tonog sang bato nga galingan indi na gid mabatian sa imo;

23 Kag ang kapawa sang kandila indi na gid magsilak sa imo; kag ang tingug sang nobyo kag sang nobya indi na gid mabatian sa imo: kay ang imo mga komersyante amo anay ang kadalagkuan nga mga tawo sang duta; kay paagi sa imo mga pagbabaylan ang tanan nga kapungsuran gindayaan.

24 Kag sa iya nasapwan ang dugo sang mga manalagna, kag sang mga santo, kag sang tanan nga ginpatay sa duta.

KAPITULO 19

KAG sa tapus sining mga butang nabatian ko ang isa ka dakung tingug sang madamung tawo sa langit, nga nagasiling, Aleluya; Kaluwasan, kag himaya, kag dungug, kag gahum, sa Ginoo nga aton Dios:

2 Kay matuud kag matarung ang iya mga paghukom: kay ginhukman niya ang dakung bigaon, nga nagdunut sang duta sang iya pagpanghilawas, kag gintimalusan ang dugo sang iya mga alagad sa kamut niya.

3 Kag sa liwat nagsiling sila, Aleluya. Kag ang iya aso nagtub-ok sa gihapon kag sa walay katapusan.

4 Kag ang apat kag duha ka pulo ka tigulang kag ang apat ka sapat naghapa kag nagsimba sa Dios nga nagalingkod sa trono, nga nagasiling, Amen; Aleluya.

5 Kag ang isa ka tingug naggowa gikan sa trono, nga nagasiling, Dayawa ninyo ang aton Dios, tanan kamo nga mga alagad niya, kag kamo nga nagakahadluk sa iya, magamay kag dalagku.

6 Kag nabatian ko ang daw tingug sang isa ka dakung kadam-an, kag subong sang tingug sang madamung tubig, kag subong sang tingug sang mabaskug nga mga pagpanaguub, nga nagasiling, Aleluya: kay ang Ginoong Dios nga makagagahum sa ngatanan nagahari.

7 Magkalipay kita kag magkasadya, kag maghatag sing dungug sa iya: kay ang kasal sang Cordero nag-abut, kag nakaaman na ang iya asawa.

8 Kag ginhatag sa iya ang pagpanaput sing lino nga mapino, matinlo kag maputi: kay ang lino nga mapino amo ang pagkamatarung sang mga santo.

9 Kag nagsiling sia sa akon, Isulat, Bulahan ang mga tinawag sa panihapon sang kasal sang Cordero. Kag nagsiling sia sa akon, Ini sila amo ang matuud nga mga hambalanon sang Dios.

10 Kag naghapa ako sa iya tiilan sa pagsimba sa iya. Kag nagsiling sia sa akon, Andam nga dili ka maghimo sini: ako imo masigkaalagad, kag sang imo mga kauturan nga may ila sila sang pagpamatuud ni Jesus: simbaha ang Dios: kay ang pagpamatuud ni Jesus amo ang espiritu sang tagna.

11 Kag nakita ko nga nabuksan ang langit, kag yari karon ang isa ka kabayo nga maputi; kag sia nga nagasakay sa iya gintawag Matutum kag Matuud, kag sa pagkamatarung nagahukom sia kag nagapakig-away.

12 Ang iya mga mata subong sang dabdab sang kalayo, kag sa iya olo madamung purungpurung; kag may ngalan sia nga nasulat, nga walay tawo nakakilala, kondi sia gid lamang.

13 Kag napanaptan sia sing isa ka bayo nga natusmug sa dugo: kag ang iya ngalan ginatawag Ang Polong sang Dios.

14 Kag ang mga kasoldadosan nga yara sa langit nagsonod sa iya sa mga kabayong maputi, nga napanaptan sing lino nga mapino, maputi kag matinlo.

15 Kag gikan sa iya baba nagagowa ang isa ka espada nga matalum, nga sa sini lab-on niya ang mga pungsud: kag pagadumalahan niya sila sa isa ka bilogon nga salsalon: kag ginalinas niya ang linasan sang ubas sang kabaris kag kasingkal sang Makaako nga Dios.

16 Kag sa iya bayo kag sa iya paa may ngalan sia nga nasulat, HARI SANG MGA HARI, KAG GINOO SANG MGA GINOO.

17 Kag nakita ko ang isa ka anghel nga nagatindug sa adlaw; kag nagsinggit sia sa matonog nga tingug, nga nagasiling sa tanan nga pispis nga nagalulupad sa tunga sang langit, Kari kamo kag magtipon sing tingub nga sa panihapon sang dakung Dios;

18 Agud nga makakaon kamo sang unud sang mga hari, kag sang unud sang mga kapitan, kag sang unud sang gamhanan nga mga tawo, kag sang unud sang mga kabayo kag sang mga nagasakay sa ila, kag sang unud sang tanan nga mga tawo, hilway kag ulipon, magamay kag dalagku.

19 Kag nakita ko ang sapat, kag ang mga hari sang duta, kag ang ila mga kasoldadosan, nga nagtipon sing tingub sa pagpakig-away batok sa nagasakay sa kabayo, kag batok sa iya kasoldadosan.

20 Kag nadakpan ang sapat, kag kaupud niya ang dimatuud nga manalagna nga naghimo sang mga milagro sa atubangan niya, nga paagi sini gindayaan niya ang mga nagbaton sang marka sang sapat, kag ang mga nagsimba sang iya imahen. Ini sila nga duha gintagbung nga buhi sa isa ka linaw nga kalayo nga nagadabdab sing azufre.

21 Kag ang nabilin ginpatay sa espada sang nagasakay sa kabayo, nga ang among espada nagagowa gikan sa iya baba: kag nabusug ang tanan nga mga pispis sang ila unud.

KAPITULO 20

KAG nakita ko ang isa ka anghel nga nagapanaug gikan sa langit, nga may yabi sang boho nga walay idalum kag isa ka dakung kadena sa iya kamut.

2 Kag gindakup niya ang dragon, yanang dumaan nga man-ug, nga amo ang Yawa, kag Satanas, kag gingapus sia sing isa ka libo ka tuig,

3 Kag gintagbung sia sa boho nga walay idalum, kag gintakpan sia, kag ginbutangan sang isa ka selyo sa ibabaw niya, agud nga indi na niya pagdayaan ang mga pungsud, tubtub nga matuman ang isa ka libo ka tuig: kag sa tapus sini kinahanglan sia paghubaran sa diotay nga dag-on.

4 Kag nakita ko ang mga trono, kag sila nagalingkod sa ila, kag gintugyanan sila sang paghukom: kag nakita ko ang mga kalag sang mga napamugutan sing olo tungud sang pagpamatuud nahanungud kay Jesus, kag tungud sang polong sang Dios, kag ang mga wala magsimba sa sapat, ukon sa iya imahen, kag wala magbaton sang iya marka sa ila mga agtang, ukon sa ila mga kamut; kag nagkabuhi sila kag naghari kaupud kay Cristo sing isa ka libo ka tuig.

5 Apang ang nabilin sang mga patay wala mabuhi liwat tubtub nga matapus ang isa ka libo ka tuig. Ini amo ang nahaunang pagkabanhaw.

6 Bulahan kag balaan ang may bahin sa nahaunang pagkabanhaw: sa ila sini walay gahum ang ikaduhang kamatayon, kondi mangin mga pari sila sang Dios kag ni Cristo, kag magahari sila kaupud niya sing isa ka libo ka tuig.

7 Kag kon matapus na ang isa ka libo ka tuig, si Satanas hubaran gikan sa iya bilanggoan,

8 Kag magagowa sa pagdaya sa mga pungsud sa apat ka pamusud sang duta, Gog kag Magog, sa pagtipon sa ila sing tingub sa pagpakig-away: ang ila kadamuon subong sang balas sang dagat.

9 Kag nagsaka sila sa kalaparan sang duta, kag ginlibutan nila ang kampo sang mga santo, kag ang hinigugmang siudad: kag naholog halin sa langit ang kalayo gikan sa Dios, kag naglamon sa ila.

10 Kag ang yawa nga nagdaya sa ila gintagbung sa linaw nga kalayo kag azufre, diin ang sapat kag ang dimatuud nga manalagna, kag pagasakiton sa adlaw kag gab-i sa gihapon kag sa walay katapusan.

11 Kag nakita ko ang isa ka dakung trono nga maputi, kag sia nga nagalingkod sa sini, nga sa iya nawung nagpalagyo ang duta kag ang langit; kag walay nakita nga duug nga sa ila.

12 Kag nakita ko ang mga patay, magamay kag dalagku, nga nagatindug sa atubangan sang Dios; kag ang mga libro ginbuksan: kag ang isa na man ka libro ginbuksan, nga amo ang libro sang kabuhi: kag ang mga patay ginhukman gikan sinang mga butang nga nasulat sa mga libro, sono sa ila mga binuhatan.

13 Kag ginhatag sang dagat ang mga patay nga yara sa sini; kag ginhatag sang kamatayon kag impierno ang mga patay nga yara sa ila: kag sila ginhukman ang tagsa ka tawo sono sa ila mga binuhatan.

14 Kag ang kamatayon kag ang impierno gintagbung sa linaw nga kalayo. Ini amo ang ikaduhang kamatayon.

15 Kag ang bisan sin-o nga wala makit-an nga nasulat sa libro sang kabuhi gintagbung sa linaw nga kalayo.

KAPITULO 21

KAG nakita ko ang isa ka bag-ong langit kag ang isa ka bag-ong duta: kay ang nahaunang langit kag ang nahaunang duta nagtaliwan; kag wala na sing dagat.

2 Kag ako si Juan, nakita ko ang balaan nga siudad, ang bag-ong Jerusalem, nga nagapanaug halin sa langit gikan sa Dios, nga naaman subong sang isa ka nobya nga napunihan nga sa iya bana.

3 Kag nabatian ko ang isa ka dakung tingug gikan sa langit nga nagasiling, Yari karon, ang tabernakulo sang Dios upud sa mga tawo, kag magapuyo sia kaupud nila, kag sila mangin-iya katawohan, kag ang Dios gid manginkaupud nila, kag mangin-ila Dios.

4 Kag ang Dios magapahid sang tanan nga mga luha sa ila mga mata; kag wala na sing kamatayon, ukon kasubu, ukon paghibi, ukon kasakit pa: kay ang nahaunang mga butang nagtaliwan na.

5 Kag sia nga nagalingkod sa trono nagsiling, Yari karon, ginabag-o ko ang tanan nga mga butang. Kag nagsiling sia sa akon, Isulat: kay ining mga polong matuud kag matutum.

6 Kag nagsiling sia sa akon, Nahimo na. Ako ang Alpha kag Omega, ang ginsuguran kag ang katapusan. Sia nga nauhaw hatagan ko sa tuburan sang tubig sang kabuhi sa walay bayad.

7 Ang nagadaug magapanubli sang tanan nga mga butang; kag ako mangin-iya Dios, kag sia mangin-akon anak nga lalaki.

8 Apang ang mga mahaladlukon, kag mga dimatinoohon, kag ang mga makangilil-ad, kag mga manugpatay, kag mga makihilawason, kag mga babaylan, kag mga manugsimba sang mga diosdios, kag tanan nga mga butigon, ang ila bahin manginsa linaw nga nagadabdab sing kalayo kag azufre: nga amo ang ikaduhang kamatayon.

9 Kag nag-abut sa akon ang isa sang pito ka anghel nga may pito ka praskita nga puno sang pito ka katapusan nga kalalat-an, kag nagpakighambal sa akon, nga nagasiling, Kari diri, ipakita ko sa imo ang nobya, ang asawa sang Cordero.

10 Kag sa espiritu gindala niya ako sa isa ka daku kag mataas nga bukid, kag ginpakita sa akon inang dakung siudad, ang balaan nga Jerusalem, nga nagapanaug halin sa langit gikan sa Dios,

11 Nga may himaya sang Dios: kag ang iya kapawa kaangay sa isa ka bato nga labing malahalon, subong sang isa ka bato nga jaspe, nga matin-aw subong sang kristal;

12 Kag may isa ka pader nga daku kag mataas, kag may napulog duha ka gawang, kag sa mga gawang napulog duha ka anghel, kag may mga ngalan nga nasulat sa sini, nga amo ang mga ngalan sang napulog duha ka tribo sang mga anak ni Israel:

13 Sa sidlangan tatlo ka gawang; sa aminhan tatlo ka gawang; sa bagatnan tatlo ka gawang; kag sa katundan tatlo ka gawang.

14 Kag ang pader sang siudad may napulog duha ka sadsaran, kag sa ila ang mga ngalan sang napulog duha ka apostol sang Cordero.

15 Kag sia nga nagpakighambal sa akon may isa ka tabun-ak nga bulawan sa pagtakus sang siudad, kag sang mga gawang sini, kag sang pader sini.

16 Kag ang siudad kwadrado, kag ang kalaba subong man sang kasangkad: kag gintakus niya sang tabun-ak ang siudad, napulog duha ka libo ka estadio. Ang kalaba kag ang kasangkad kag ang kataas sini alangay.

17 Kag gintakus niya ang pader sini, isa ka gatus kag kap-atan kag apat ka maniko, ang sono nga takus nga sa tawo, nga amo, ang sa anghel.

18 Kag ang pagtukud sang pader sini himo sa jaspe: kag ang siudad puro nga bulawan, subong sang matin-aw nga katya.

19 Kag ang mga sadsaran sang pader sang siudad napunihan sang tanan nga sahi sang mga bato nga malahalon. Ang nahaunang sadsaran jaspe; ang ikaduha, zafiro; ang ikatlo, isa ka calcedonia; ang ikap-at, isa ka esmeralda;

20 Ang ikalima, sardonica; ang ikan-um, sardio; ang ikapito, crisolito; ang ikawalo, berilo; ang ikasiam, isa ka topacio; ang ikapulo, isa ka crisopraso; ang ikapulog isa, isa ka jacinto; ang ikapulog duha, isa ka amatista.

21 Kag ang napulog duha ka gawang, napulog duha ka mutya; ang tagsa ka gawang himo sa isa ka mutya: kag ang dalan sang siudad puro nga bulawan, subong sang matin-aw nga katya.

22 Kag wala ako sing nakita nga templo didto: kay ang Ginoong Dios nga Makaako kag ang Cordero amo ang templo sini.

23 Kag ang siudad walay kinahanglan sang adlaw, ukon sang bulan, nga magsilak sa sini: kay ang himaya sang Dios nagapasanag sini, kag ang Cordero amo ang kapawa sini.

24 Kag ang mga pungsud sang mga naluwas magalakat sa kapawa sini: kag ang mga hari sang duta nagadala sang ila himaya kag dungug sa sini.

25 Kag ang mga gawang sini indi gid pagtakpan sa adlaw: kay walay gab-i didto.

26 Kag dalhon nila ang himaya kag dungug sang mga pungsud sa sini.

27 Kag walay makasulud sa sini sa bisan ano nga paagi nga bisan anong butang nga nagadagta, ukon bisan ano nga nagahimo sing kangil-aran, ukon nagahimo sang pagbutig: kondi sila nga nasulat sa libro sang kabuhi sang Cordero.

KAPITULO 22

KAG ginpakita niya sa akon ang isa ka puro nga suba sang tubig sang kabuhi, nga matin-aw subong sang kristal, nga nagagikan sa trono sang Dios kag sang Cordero.

2 Sa tunga sang dalan sini, kag sa magtimbang nga kilid sang suba, yara ang kahoy sang kabuhi, nga nagadala sing napulog duha ka sari sang mga bunga, kag nagapatubas sang iya bunga sa tagsa ka bulan: kag ang mga dahon sang kahoy among sa pagpaayo sa mga pungsud.

3 Kag wala na sing pagpanghimalaut: apang ang trono sang Dios kag sang Cordero mangindidto; kag ang iya mga alagad magaalagad sa iya:

4 Kag makita nila ang iya nawung; kag ang iya ngalan manginsa ila mga agtang.

5 Kag wala sing gab-i didto; kag wala sila sing kinahanglan sang kandila, ukon sang kapawa sang adlaw; kay ang Ginoong Dios nagahatag sa ila sang kapawa: kag magahari sila sa gihapon kag sa walay katapusan.

6 Kag nagsiling sia sa akon, Ining mga hambalanon matutum kag matuud: kag ang Ginoong Dios sang mga balaan nga manalagna nagpadala sang iya anghel sa pagpakita sa iya mga alagad sang mga butang nga kinahanglan mahanabu sing madali.

7 Yari karon, magakari ako sa madali: bulahan ang nagahuput sang mga hambalanon sang tagna sining libro.

8 Kag ako si Juan nakakita sining mga butang, kag nakabati sa ila. Kag sang pagkabati kag pagkakita ko, naghapa ako sa pagsimba sa atubangan sang tiilan sang anghel nga nagpakita sa akon sining mga butang.

9 Niyan nagsiling sia sa akon, Andam nga dili ka maghimo sini: kay ako imo masigkaalagad, kag sang imo mga kauturan nga mga manalagna, kag sang mga nagahuput sang mga hambalanon sining libro: simbaha ang Dios.

10 Kag nagsiling sia sa akon, Dili pagselyohi ang mga hambalanon sang tagna sining libro: kay ang tion malapit na.

11 Sia nga dimatarung, magdimatarung gihapon sia: kag sia nga mahigko, magmahigko gihapon sia: kag sia nga matarung, magmatarung gihapon sia: kag sia nga balaan, magbalaan gihapon sia.

12 Kag, yari karon, magakari ako sa madali; kag ang akon padya kaupud nakon, sa paghatag sa tagsa ka tawo sono sa iya buhat.

13 Ako ang Alpha kag Omega, ang ginsuguran kag ang katapusan, ang nahauna kag ang naolihi.

14 Bulahan ang mga nagatuman sang iya mga sogo, agud nga may kinamatarung sila sa kahoy sang kabuhi, kag makasulud sa siudad paagi sa mga gawang.

15 Kay sa gowa yara ang mga ido, kag mga babaylan, kag mga makihilawason, kag mga manugpatay, kag mga manugsimba sang mga diosdios, kag ang bisan sin-o nga nagahigugma kag nagahimo sang pagbutig.

16 Ako si Jesus nagpadala sang akon anghel sa pagpamatuud sa inyo sining mga butang sa mga iglesia. Ako amo ang gamut kag ang kaliwat ni David, kag ang masiga kag kaagahon nga bitoon.

17 Kag ang Espiritu kag ang nobya nagasiling, Kari. Kag sia nga nagapamati magsiling, Kari. Kag sia nga ginauhaw magkari. Kag ang bisan sin-o nga buut, magkuha sia sang tubig sang kabuhi sa walay bayad.

18 Kay ako nagapamatuud sa tagsa ka tawo nga nagapamati sang mga polong sang tagna sining libro, Kon ang bisan sin-o nga tawo magdugang sa sining mga butang, ang Dios magadugang sa iya sang mga kalalat-an nga nasulat sa sining libro:

19 Kag kon ang bisan sin-o nga tawo mag-iban sa mga polong sang libro sining tagna, pagakuhaon sang Dios ang iya bahin sa libro sang kabuhi, kag sa balaan nga siudad, kag sa mga butang nga nasulat sa sining libro.

20 Sia nga nagapamatuud sining mga butang nagasiling, Sa pagkamatuud magakari ako sa madali. Amen. Mangin-amo sina, kari, Ginoong Jesus.

21 Ang bugay sang aton Ginoong Jesu-Cristo manginkaupud ninyo tanan. Amen.

AMAZING GRACE BIBLE INSTITUTE