ANG SULAT NI PABLO NGA APOSTOL SA MGATAGA-FILIPOSKAPITULO 1SI PABLO kag si Timoteo, mga alagad ni Jesu-Cristo, sa tanan nga santo sa kay Cristo Jesus nga yara sa Filipos, upud ang mga obispo kag mga diacono:2 Ang bugay sa inyo, kag ang paghidait, gikan sa Dios nga aton Amay, kag kay Ginoong Jesu-Cristo. 3 Nagapasalamat ako sa akon Dios sa tagsa ka pagpanumdum sa inyo, 4 Sa gihapon sa tagsa ka pangamuyo nakon tungud sa inyo tanan ginahimo ko ang pagpangabay nga may kalipay, 5 Bangud sang inyo paghiliupud sa ebanghelyo kutub sang nahaunang adlaw tubtub karon; 6 Nga nagasalig sa sining butang gid, nga sia nga nagsugud sing maayong buhat sa inyo magatapus sini tubtub sa adlaw ni Jesu-Cristo: 7 Subong nga nagakaigo sa akon ang paghunahuna sini nahanungud sa inyo tanan, bangud nga yari kamo sa akon tagiposoon; sanglit sa akon mga gapus, kag sa pag-apin kag pagpalig-on sang ebanghelyo, mga kaambit kamo nga tanan sa akon bugay. 8 Kay ang Dios amo ang akon saksi, kon daw ano ang kahidlaw ko sa inyo tanan sa tuduk nga balatyagon ni Jesu-Cristo. 9 Kag ini ginapangamuyo ko, nga ang inyo gugma magbugana sing labi pa gid sa ihibalo kag sa bug-os nga paghukom; 10 Agud nga mapamatud-an ninyo ang mga butang nga labing maayo; agud nga magputli kamo kag walay kasawayan tubtub sa adlaw ni Cristo; 11 Nga napun-an sang mga bunga sang pagkamatarung, nga paagi kay Jesu-Cristo, sa kahimayaan kag kadayawan sang Dios. 12 Apang buut ko nga mahangpan ninyo, mga kauturan, nga ang mga butang nga nahanabu sa akon hinonoo nanginsa kauswagan sang ebanghelyo; 13 Sa bagay nga ang akon mga gapus kay Cristo nahayag sa bug-os nga palacio, kag sa tanan nga iban nga duug; 14 Kag madamu sang mga kauturan sa Ginoo, nga ginapaisug bangud sang akon mga gapus, nagamasidla sing labi pa sa paghambal sang polong sa walay kahadluk. 15 Ang iban sa pagkamatuud nagawali kay Cristo gikan sa kahisa kag sa kaawayon; kag ang iban man gikan sa maayong kabubut-on: 16 Ang isa nagawali kay Cristo gikan sa kasuayon, indi sa kabunayag, nga nagahunahuna sa pagdugang sing kasakit sa akon mga gapus: 17 Apang ang isa gikan sa gugma, nga nakahibalo nga handa ako sa pag-apin sang ebanghelyo. 18 Ano niyan? walay sapayan, sa tagsa ka bagay, kon sa pagkasalimpapaw, ukon sa kamatooran, ginawali si Cristo; kag sa sini nagakalipay ako, hoo, kag magakalipay. 19 Kay ako nakahibalo nga ini manginsa kaluwasan ko paagi sa inyo pangamuyo, kag paghatag sang Espiritu ni Jesu-Cristo, 20 Sono sa akon hanoot nga pagpaabut kag sa akon paglaum, nga indi ako mahuy-an sa bisan ano, kondi sa bug-os nga kasidla, subong sa gihapon, karon man pakadakuon si Cristo sa akon lawas, bisan sa kabuhi, ukon sa kamatayon. 21 Kay sa akon ang pagkabuhi amo si Cristo, kag ang pagkapatay amo ang pagdaug. 22 Apang kon ako magkabuhi sa unud, ini ang bunga sang akon pagpangabudlay: apang kon ano ang akon pilion indi ako makahibalo. 23 Kay ako naipit sa tunga sang duha, nga may paghandum ako sa pagtaliwan, kag pagpakig-upud kay Cristo; nga among labi pa gid kaayo: 24 Apang ang pagpabilin sa unud labing kinahanglan tungud sa inyo. 25 Kag sa sining pagsalig, ako nakahibalo nga magapabilin ako kag magapadayon kaupud ninyo tanan nga sa inyo kauswagan kag kalipay sa pagtoo; 26 Agud nga ang inyo kalipay magabugana sing labi sa kay Jesu-Cristo tungud sa akon sa pagbalik ko liwat sa inyo. 27 Lamang maggawi kamo sing takus sa ebanghelyo ni Cristo: agud nga bisan magkari ako kag magpakigkita sa inyo, ukon sa wala ako, makabati ako nahanungud sa inyo kahimtangan, nga nagatindug kamo sing malig-on sa isa ka espiritu, nga may isa ka hunahuna nga nagapanikasug sing tingub tungud sa pagtoo sang ebanghelyo; 28 Kag wala mahadluk sa bisan ano bangud sang inyo mga kasumpung: nga sa ila amo ang tanda nga maathag sang kalaglagan, apang sa inyo kaluwasan, kag ina gikan sa Dios. 29 Kay sa inyo ginatugut ini tungud kay Cristo, indi lamang ang pagtoo sa iya, kondi man ang pag-antus tungud sa iya; 30 Nga may amo man kamo nga pagpakig-away nga inyo nakita sa akon, kag karon ginapamatian nga yari sa akon. KAPITULO 2BUSA kon may bisan ano nga pagpalig-on kay Cristo, kon may bisan ano nga paglipay sang paghigugma, kon may bisan ano nga paghiliupud sa Espiritu, kon may bisan ano nga kalolo kag mga kalooy,2 Himun-i ninyo ang akon kalipay, nga kamo mag-alangay sa panghunahuna, nga may amo man kamo nga gugma, nga nagahiusa, nga isa ang hunahuna. 3 Dili maghimo sang bisan ano paagi sa kaawayon ukon pagpadayawdayaw; kondi sa pagpaubus sa hunahuna ang tagsatagsa magbilang sa iban nga maayo pa sang sa ila kaugalingon. 4 Dili magtamud ang tagsa ka tawo sa iya kaugalingon nga mga butang, kondi ang tagsa ka tawo sa mga butang man sang iban. 5 Hupti ini nga hunahuna, nga yara man kay Cristo Jesus: 6 Nga, sa dagway sang Dios, wala niya pagbilanga nga pagpangawat ang pagpakigtupung sa Dios: 7 Kondi ginhimo niya ang iya kaugalingon nga walay kabantugan, kag nagkuha sang dagway sang isa ka alagad, kag nahimo sa kaanggid sang mga tawo: 8 Kag sang nakita sa bayhon subong sang isa ka tawo, nagpaubus sia sang iya kaugalingon, kag nanginmatinumanon tubtub sa kamatayon, bisan ang kamatayon sa krus. 9 Busa ginbayaw man sia sang Dios sing mataas gid, kag ginhatagan sia sing ngalan nga labaw sa tagsa ka ngalan: 10 Agud nga sa ngalan ni Jesus ang tagsa ka tuhud magpilo, sang mga butang sa langit, kag mga butang sa duta, kag mga butang sa idalum sang duta; 11 Kag nga ang tagsa ka dila magtuad nga si Jesu-Cristo Ginoo, sa himaya sang Dios nga Amay. 12 Busa, mga hinigugma ko, subong nga kamo nagtuman sa gihapon, indi lamang sa akon atubangan, kondi karon labi pa nga wala ako, panikasugi ang inyo kaugalingon nga kaluwasan nga naangkon nga may kahadluk kag pagkurug. 13 Kay ang Dios amo ang nagahikot sa inyo sa pagbuut kag sa pagbuhat sang iya maayong kahamuut. 14 Himoa ninyo ang tanan nga butang sa walay pagkinumud kag pagbinais: 15 Agud nga mangindisalawayon kamo kag dimahalaliton, nga mga anak nga lalaki sang Dios, nga indi salabdongon, sa tunga sang isa ka pungsud nga tiko kag balingag, nga sa tunga nila nagasiga kamo subong nga mga kapawa sa kalibutan; 16 Nga nagabayaw sang polong sang kabuhi; agud nga magakalipay ako sa adlaw ni Cristo, nga wala ako magdalagan sing walay pulus, ukon magpangabudlay sing walay pulus. 17 Hoo, kag kon ako idolot sa halad kag pag-alagdan sang inyo pagtoo, nagakasadya ako, kag nagakalipay kaupud ninyo tanan. 18 Kay sa among bagay nagakasadya man kamo, kag nagakalipay kaupud nakon. 19 Apang nagasalig ako kay Ginoong Jesus sa pagpadala kay Timoteo sa inyo sa indi madugay, agud nga ako lipayon man, kon mahibaloan ko ang inyo kahimtangan. 20 Kay wala ako sing tawo nga may kaangay sing panghunahuna, nga magatatap sing matuud gid sa inyo kahimtangan. 21 Kay ang tanan nagapangita sang natungud sa iya kaugalingon, indi ang mga butang nga iya ni Jesu-Cristo. 22 Apang kamo nakahibalo sang pamatuud niya, nga, subong nga ang anak nga lalaki upud sa amay, nag-alagad sia upud sa akon sa ebanghelyo. 23 Busa ginalauman ko nga ipadala sia sa inyo sa gilayon, kon mahibal-an ko kon paano ako. 24 Apang nagasalig ako sa Ginoo nga ako man magakari sing madali. 25 Walay sapayan ginkabig ko nga kinahanglan ipadala sa inyo si Epafrodito, nga akon utud, kag kaupud sa pagpangabudlay, kag masigkasoldado, apang inyo manugbalita, kag manughikot sang akon mga kinahanglanon. 26 Kay sia nagkahidlaw sa inyo tanan, kag puno sang kabug-atan, bangud nga inyo nabatian nga nagmasakit sia. 27 Kay matuud nagmasakit sia nga diotay lang mapatay: apang ang Dios nalooy sa iya; kag indi lamang sa iya, kondi sa akon man, agud nga indi ako masuboan sa kasulub-on. 28 Busa ginpadala ko sia sing labi ka mainandamon, agud nga, kon makita ninyo sia liwat, magakalipay kamo, kag agud nga maghaganhagan ang kasubu ko. 29 Busa batona ninyo sia sa Ginoo sa bug-os nga kalipay; kag padunggan ninyo ang mga subong sa iya: 30 Kay tungud sa buluhaton ni Cristo diotay lang sia mapatay, nga wala nagakabalaka sang iya kabuhi, sa paghimuno sang nakulangan ninyo sa pag-alagad sa akon. KAPITULO 3SA KATAPUSAN, mga kauturan ko, magkalipay sa Ginoo. Ang pagsulat sa inyo sang amo man nga mga butang, matuud sa akon indi makatalaka, apang panabang sa inyo.2 Mag-andam sa mga ido, mag-andam sa malaut nga mga manugpangabudlay, mag-andam sa mga circuncidado. 3 Kay kita amo ang circuncision, nga nagasimba sa Dios sa espiritu, kag nagakalipay kay Cristo Jesus, kag walay pagsalig sa unud. 4 Bisan ako man makasalig sa unud. Kon bisan sin-o nga tawo nagahunahuna nga may masaligan sia sa unud, ako may labi pa: 5 Gincircuncidar sa ikawalong adlaw, sa kaliwat ni Israel, sa tribo ni Benjamin, isa ka Hebreo sang mga Hebreo; nahanungud sa kasogoan, isa ka Fariseo; 6 Nahanungud sa kakugi, ginhingabut ko ang iglesia; nahanungud sa pagkamatarung nga sa kasogoan, disalawayon. 7 Apang ang bisan ano nga mga butang nga sa akon sadto daug, ina sila ginbilang ko nga kadulaan tungud kay Cristo. 8 Hoo sa walay pagduhaduha, kag ginabilang ko ang tanan nga butang nga kadulaan tungud sang labaw gid nga pagkilala kay Cristo Jesus nga akon Ginoo: tungud sa iya gin-antus ko ang kadulaan sang tanan nga butang, kag ginabilang sila nga ipot, agud nga manginkadaugan ko si Cristo, 9 Kag makita ako sa iya, nga walay akon kaugalingon nga pagkamatarung, nga gikan sa kasogoan, kondi inang paagi sa pagtoo nga sa kay Cristo, ang pagkamatarung nga gikan sa Dios paagi sa pagtoo: 10 Agud nga makilala ko sia, kag ang gahum sang iya pagkabanhaw, kag ang paghiliupud sang iya mga pag-antus, nga ginapakaangay ako sa iya kamatayon; 11 Kon sa ano man nga paagi nga makadangat ako sa pagkabanhaw sang mga patay. 12 Indi nga daw nadangtan ko na, ukon nahimpit na: kondi nagapadayon ako, kon makadangat ako sa sina, nga tungud sina man nadangtan ako ni Cristo Jesus. 13 Mga kauturan, wala ako nagaisip sang akon kaugalingon nga nakadangat na: apang isa ka butang ang akon ginahimo, ginakalimtan ko inang mga butang nga tinalikdan, kag nagahimulat sa sinang mga butang nga naunhan, 14 Nagapadayon ako padulong sa lalambutan tungud sa premyo sang mataas nga pagtawag sang Dios nga yara kay Cristo Jesus. 15 Busa, ang tanan nga mga himpit sa aton, maghunahuna sing subong: kag kon sa bisan anong butang tuhay kamo sing panghunahuna, ina man ipahayag sang Dios sa inyo. 16 Walay sapayan, sa nadangatan ta na, maglakat kita paagi sa amo man nga pagsolondan, magbantay kita sang amo man nga butang. 17 Mga kauturan, magsomolonod kamo sing tingub sa akon, kag pat-ini ninyo ang mga nagalakat sing subong sono sa huwaran ninyo sa amon. 18 (Kay madamu ang nagalakat, nga nahanungud sa ila nagsugid ako sa inyo sing masunsun, kag karon nagasugid sa inyo nga nagahibi, nga sila amo ang mga kaaway sang krus ni Cristo: 19 Nga ang ila katapusan kalaglagan, nga ang ila Dios amo ang ila tiyan, kag ang ila himaya yara sa ila kahuluy-an, nga nagatalupangud sang mga butang nga dutan-on.) 20 Kay ang aton pagginawi amo ang sa langit; nga gikan sini ginapaabut man naton ang Manluluwas, si Ginoong Jesu-Cristo: 21 Nga magabalhin sang aton kubus nga lawas, agud nga madihon ini subong sa iya mahimayaon nga lawas, sono sa pagpanghikot nga sa diin sarang sia bisan sa pagpasakup sa iya sang tanan nga butang. KAPITULO 4BUSA, mga kauturan kong hinigugmang nalolotan kag nahidlawan, akon kalipay kag purungpurung, magtindug kamo sing malig-on sing amo sa Ginoo, mga hinigugma kong nalolotan.2 Nagapangabay ako kay Eudias, kag nagapangabay ako kay Sintique, nga mag-isa sila sa panghunahuna sa Ginoo. 3 Kag ginapakilooy ko sa imo man, totoo nga masigkamanugpangabudlay, buligi inang mga babaye nga nagpangabudlay upud sa akon sa ebanghelyo, upud si Clemente man, kag upud sa iban nga mga masigkamanugpangabudlay nakon, nga ang ila mga ngalan yara sa libro sang kabuhi. 4 Magkalipay sa gihapon sa Ginoo: kag liwat nagasiling ako, Magkalipay. 5 Ipakilala ang inyo pagkamapinugungon sa tanan nga tawo. Ang Ginoo malapit na. 6 Dili kamo magkabalaka sa bisan ano; kondi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay. 7 Kag ang paghidait sang Dios, nga nagalabaw sa tanan nga paghangup, magatipig sang inyo mga tagiposoon kag mga hunahuna paagi kay Cristo Jesus. 8 Sa katapusan, mga kauturan, ang bisan anong mga butang nga matuud, ang bisan anong mga butang nga halangdon, ang bisan anong mga butang nga matarung, ang bisan anong mga butang nga putli, ang bisan anong mga butang nga hiligugmaon, ang bisan anong mga butang gikan sa maayong pahayag; kon may bisan ano nga birtud, kag kon may bisan ano nga pagdayaw, maghunahuna sa sining mga butang. 9 Inang mga butang nga inyo naton-an, kag nabaton, kag nabatian, kag nakita sa akon, ini buhata: kag ang Dios sang paghidait manginkaupud ninyo. 10 Apang nagkalipay ako sing daku sa Ginoo, nga karon sa katapusan ang inyo pag-alila sa akon nagbugana liwat; nga sa sina kamo man nagmatinatapon, apang nakulangan kamo sing kahigayonan. 11 Indi nga nagahambal ako nahanungud sa kinawad-on: kay naton-an ko ang pagkacontento sa bisan ano ako nga kahimtangan. 12 Makahibalo ako magpakakubus, kag makahibalo ako magpakabugana: sa bisan diin kag sa tanan nga butang naton-an ako, indi lamang ang pagkabusug, kondi man ang pagkagutum, indi lamang sa kabugana, kondi man sa kinawad-on. 13 Makahimo ako sang tanan nga butang paagi kay Cristo nga nagapabakud sa akon. 14 Walay sapayan naghimo kamo sing maayo, nga nagpakigbahin kamo sa akon kapiotan. 15 Karon kamo nga taga-Filipos nakahibalo man, nga sa pagpamuno sang ebanghelyo, sang nagtaliwan ako sa Macedonia, walay iglesia nga nagpakigbahin sa akon nahanungud sa paghatag kag pagbaton, kondi kamo lamang. 16 Kay bisan sa Tesalonica ginpadalhan ninyo ako sang akon kinahanglan sing labi pa sa makaisa. 17 Indi nga nagapangita ako sing dolot: kondi nagapangita ako sang bunga nga magabugana sa inyo kaayohan. 18 Apang may akon na ako sang tanan, kag nagabugana: puno ako, nga nakabaton kay Epafrodito sang mga ginpadala nga butang gikan sa inyo, nga maamyon nga humut, halad nga kalahamut-an, nga nahamut-an gid sang Dios. 19 Apang ang akon Dios magahimuno sang tanan nga kinahanglan ninyo sono sa iya kamanggaran sa himaya paagi kay Cristo Jesus. 20 Karon sa Dios kag sa aton Amay ang himaya sa gihapon kag sa walay katapusan. Amen. 21 Abiabiha ninyo ang tagsa ka santo kay Cristo Jesus. Ang mga kauturan nga kaupud nakon nagatamyaw sa inyo. 22 Ang tanan nga santo nagaabiabi sa inyo, labi na gid ang sa panimalay ni Cesar. 23 Ang bugay sang aton Ginoong Jesu-Cristo manginkaupud ninyo nga tanan. Amen. ¶ Ginsulat ini sa mga taga-Filipos gikan sa Roma paagi kay Epafrodito. |